Ephrem the Syrian. “Nisibis 59.” Digital Syriac Corpus. Last modified June 12, 2019. https://syriaccorpus.org/313.
    
        
            
                Nisibis LIX
            
            
                
                    ܚ ܒܰܪ ܩܳܠܶܗ 
                
                
                    1
                    ܗܳܐ ܡܰܘܬܳܐ ܡܶܢ ܣܳܛܳܢܳܐ ܥܺܝܪܬܰܢ ܬܳܒܰܥ 
                    ܬܰܘ ܢܶܫܡܰܥ ܨܰܥܪܶܗ ܘܢܶܚܕܶܐ ܕܚܰܕܺܝ ܒܨܰܥܪܰܢ
                    
                    ܥܽܘܢܺܝܬܳܐ: ܠܳܟ ܫܽܘܒܚܳܐ ܡܶܢ ܡܰܪܥܺܝܬܳܟ ܕܒܳܟ ܐܶܫܬܰܥܒܰܕܘ̱ 
                    ܐܳܦ ܡܰܘܬܳܐ ܐܳܦ ܣܳܛܳܢܳܐ ܬܚܶܬܝ̱ ܪ̈ܶܓܠܶܝܗ̇
                    
                
                
                    2
                    ܢܶܬܬܠܽܘܢ ܒܺܝܫ̈ܶܐ ܬܰܩܢܳܐܺܝܬ ܘܰܐܢ̱ܬ ܗܳܦܟܳܐܺܝܬ
                    ܗܳܦܟܳܐܺܝܬ ܓܶܝܪ ܠܫܶܡܥܽܘܢ ܒܩܰܝܣܳܐ ܙܩܰܦܬܳܝܗ̱ܝ
                    
                
                
                    3
                    ܥܰܠ ܟܽܠܗܶܝܢ ܫܶܬܩܰܬ ܡܰܘܬܳܐ ܕܰܨܠܳܐ ܠܶܗ ܙܒܰܢܝ̱ 
                    ܫܶܡܥܽܘܢ ܗܽܘܝܽܘ ܡܽܘܡܳܐ ܗ̱ܘܳܐ ܕܗܳܟܰܢ ܙܽܘܩܦܽܘܢܳܢܝ̱
                    
                
                
                    4
                    ܐܶܠܽܘ ܟܺܐܢ̈ܶܐ ܠܛܽܘܢܺܝ ܗ̱ܘܰܘ ܠܳܐ ܡܰܟܪܳܐ ܗܘܺܝܬ
                    ܥܝܳܛܶܗ ܕܡܰܘܬܳܐ ܒܺܝܫ ܗ̱ܽܘ ܠܺܝ ܡܶܢ ܓܺܗܰܢܳܐ 
                    
                
                
                    5
                    ܨܰܥܪܶܗ ܕܡܳܪܰܢ ܠܳܐ ܐܶܡܪܶܬ ܪܰܒ ܗ̱ܽܘ ܡܶܢ ܦܽܘܡܝ̱
                    ܕܶܐܬܩܽܘܠ ܘܐܶܦܰܚܶܡ ܚܰܫܶܗ ܥܰܡ ܫܽܘܢܳܩܳܟ
                    
                
                
                    6
                    ܬܪ̈ܶܥܣܰܪ ܟܽܘܪ̈ܣܰܘܳܢ ܡܼܰܬܩܰܢ ܠܰܬܪ̈ܰܥܣܰܪܬܶܗ
                    ܕܒܶܬܪ̈ܶܥܣܰܪ ܫܰܒ̈ܛܺܝܢ ܐܰܢ̱ܬ ܗ̱ܽܘ ܡܶܬܚܰܝܰܒ ܐܰܢ̱ܬ
                    
                
                
                    7
                    ܚܶܒܠܳܐ ܕܡܳܓܶܢ ܬܶܬܠܳܐ ܠܳܟ ܐܳܘ ܣܳܛܳܢܳܐ 
                    ܕܰܬܠܳܐ ܠܶܗ ܚܒܳܠܳܐ ܒܝܰܩܺܝܪ ܗܰܘ ܬܰܠܡܺܝܕܳܟ
                    
                
                
                    8
                    ܛܳܟ ܬܶܣܬܰܦܰܩ ܒܰܚܢܳܢܳܐ ܗܳܝ ܓܺܗܰܢܳܐ 
                    ܘܰܬܦܽܘܫ ܒܳܗ̇ ܐܰܢ̱ܬ ܒܰܠܚܽܘܕܳܝܟ ܥܰܡ ܫܰܡ̈ܳܫܰܝܟ 
                    
                
                
                    9
                    ܣܰܓܺܝ̈ܐܺܢ ܐܶܢܶܝܢ ܠܰܘ̈ܛܳܬܳܟ ܘܰܟܡܳܐ ܐܶܚܫܽܘܒ
                    ܗܳܐ ܣܳܟܳܐ ܕܟܽܠ ܠܰܘ̈ܛܳܬܳܟ ܥܰܠ ܗܰܕܳܡ̈ܰܝܟ 
                    
                
                
                    10
                    ܢܕܰܩܪܽܘܢܳܟ ܒܺܝ̈ܫܶܐ ܒܢܽܘܪܳܐ ܕܐܰܒܐܫܰܬ ܠܗܽܘܢ 
                    ܢܶܬܥܰܕܠܽܘܢ ܒܳܟ ܕܰܠܡܳܢܳܐ ܠܟܳܐ ܐܺܝܬܺܝܬܰܢ
                    
                
                
                    11
                    ܢܶܬܓܪܽܘܢ ܒܳܟ ܚܰܛ̈ܳܝܶܐ ܘܛܳܟ ܢܰܒܐܶܫ ܠܳܟ
                    ܠܽܘܚܳܡܗܽܘܢ ܡܶܢ ܫܽܘܢܳܩܳܐ ܕܗܳܝ ܓܺܗܰܢܳܐ 
                    
                
                
                    12
                    ܢܶܗܘܽܘܢ ܠܳܟ ܗܶܢܽܘܢ ܬܰܡܳܢ ܟܽܠ ܣ̈ܳܛܳܢܺܝܢ 
                    ܐܰܝܟ ܕܰܗܘܺܝܬ ܠܗܽܘܢ ܗܳܪܟܳܐ ܚܰܕ ܣܳܛܳܢܳܐ 
                    ܀܀܀
                
                
                    13
                    ܥܺܝܪ̈ܶܐ ܢܶܣܒܽܘܢ ܢܶܫܕܽܘܢܳܟ ܟܰܕ ܡܶܬܕܰܟܪܶܝܢ 
                    ܕܰܠܡܳܪܗܽܘܢ ܒܳܟ ܡܶܢ ܪܰܘܡܳܐ ܠܥܽܘܡܩܳܐ ܫܕܰܐܽܘܗ̱ܝ
                    
                
                
                    14
                    ܢܶܪܗܰܛ ܟܽܠ ܐ̱ܢܳܫ ܠܪܶܓܡܳܟ ܟܰܕ ܠܳܐ ܛܳܥܶܝܢ 
                    ܕܒܳܟ ܗܽܘ ܪܗܶܛ ܥܰܡܳܐ ܦܰܩܪܳܐ ܠܡܶܪܓܰܡ ܠܰܒܪܳܐ 
                    
                
                
                    15
                    ܠܳܟ ܒܺܝܫܳܐ ܡܶܢ ܟܽܠ ܦܽܘܡ̈ܺܝܢ ܪܰܘܩܳܐ ܕܚܶܡܬܳܐ 
                    ܕܒܳܟ ܪܰܩܘ ܠܶܗ ܠܗܰܘ ܕܰܒܪܽܘܩܶܗ ܦܬܰܚ ܣܰܡܝܳܐ 
                    
                
                
                    16
                    ܠܳܟ ܒܺܝܫܳܐ ܡܶܢ ܠܳܟ ܠܶܫܳܢ ܐܳܦ ܟܽܠ ܠܽܘܛܳܢ
                    ܕܒܳܟ ܓܰܕܶܦܘ̱ ܥܰܠ ܗܰܘ ܕܰܦܬܰܚ ܦܽܘܡ̈ܶܐ ܣܟܺܝܪ̈ܶܐ
                    
                
                
                    17
                    ܒܪܺܝܟ ܕܬܳܒܰܥ ܠܥܰܠܺܝܒܽܘܬܰܢ ܟܰܕ ܫܰܬܺܝܩܳܐ 
                    ܘܰܓܪܺܝ ܒܶܗ ܒܡܰܘܬܳܐ ܠܒܺܝܫܳܐ ܕܗܽܘ ܢܦܰܠ ܒܶܗ
                    
                
                
                    18
                    ܢܝܰܒܶܒ ܐܰܚ̈ܰܝ ܒܽܐܘܫ̈ܰܥܢܶܐ ܒܰܕܡܽܘܬ ܓܶܕܥܽܘܢ 
                    ܕܟܰܕ ܗܽܘ ܡܝܰܒܶܒ ܪܕ̈ܽܘܦܶܐ ܢܦܰܠܘ̱ ܒܰܚܕ̈ܳܕܶܐ