Ephrem the Syrian. “Nisibis 60.” Digital Syriac Corpus. Last modified June 12, 2019. https://syriaccorpus.org/314.
    
        
            
                Nisibis LX
            
            
                
                
                    ܛ ܒܰܪ ܩܳܠܶܗ
                
                
                    1
                    ܐܰܘ ܬܶܗܪܳܐ ܕܓܰܕܫܶܗ ܠܒܺܝܫܳܐ ܡܶܢ ܫܶܠܝ̱ ܐܰܚ̈ܰܝ
                    ܕܰܚܛܺܝܬܳܐ ܐܶܬܟܰܘܢܰܬ ܗܘܳܬ ܘܰܩܢܳܬ ܛܰܥܡܳܐ 
                    
                    ܥܽܘܢܺܝܬܳܐ: ܬܶܫܒܽܘܚܬܳܐ ܠܚܰܕ ܒܰܠܚܽܘܕܰܘܗ̱ܝ ܕܰܙܟܳܐ ܠܒܺܝܫܳܐ 
                    ܘܠܶܗ ܟܰܕ ܠܶܗ ܐܳܦ ܬܰܘܕܺܝܬܳܐ ܕܚܰܣܢܶܗ ܠܡܰܘܬܳܐ
                    
                
                
                    2
                    ܬܽܘܒ ܒܺܝܫܳܐ ܕܰܐܝܟܰܘ ܓܽܘܚܟܳܗ̇ ܘܰܐܝܟܰܘ ܒܣܳܡܳܗ̇
                    ܘܰܐܝܟܰܘ ܪܰܩܕܳܗ̇ ܘܨܰܒܬܳܗ̇ ܓܠܺܝ ܘܪܽܘܫܥܳܗ̇ ܟܰܣܝܳܐ 
                    
                
                
                    3
                    ܕܰܚܠܳܦ ܓܽܘܚܟܳܗ̇ ܗܰܘ ܙܰܠܺܝܠܳܐ ܒܒܶܟܝܳܐ ܥܶܢܝܳܐ 
                    ܣܰܥܪܳܗ̇ ܢܶܣܪܰܬ ܨܳܐܬܶܗ ܕܝܶܫܽܘܥ ܠܡܰܟܦܰܪܘ̱ 
                    
                
                
                    4
                    ܠܳܐ ܩܰܝܳܡ ܒܳܗ̇ ܡܶܢ ܝܽܘܠܦܳܢܝ̱ ܐܳܦ ܠܳܐ ܦܳܫ ܒܳܗ̇
                    ܡܶܢ ܬܽܘܠܡܳܕܰܢ ܦܶܠܛܰܬ ܘܰܫܕܳܬ ܟܽܠ ܕܰܐܠܶܦܬܳܗ̇
                    
                
                
                    5
                    ܟܶܦܪܰܬ ܐܳܦ ܒܰܢ ܘܒܰܥܢܺܝܢܰܢ ܘܰܐܝܟ ܗܰܘ ܕܳܐܦ ܠܳܐ 
                    ܚܙܳܬܰܢܝ̱ ܡܶܡܬܽܘܡ ܥܛܳܬܶܗ ܠܨܰܠܡܰܢ ܡܶܢ ܪܶܥܝܳܢܳܗ̇
                    
                
                
                    6
                    ܚܡܺܝܪܶܗ ܕܝܶܫܽܘܥ ܚܝܳܐ ܦܪܰܚ ܒܳܗ̇ ܕܝܶܫܽܘܥ ܫܠܳܐ
                    ܘܗܺܝ ܡܶܬܚܰܨܦܳܐ ܚܶܒܨܰܬ ܥܶܠܰܬ ܟܰܕ ܠܳܐ ܩܪܰܐܘܳܗ̇
                    
                
                
                    7
                    ܛܥܳܬܶܗ ܠܚܽܘܒܰܢ ܗܰܘ ܕܰܫ̈ܢܰܝܳܐ ܘܒܰܪܦܳܦ ܥܰܝܢܳܐ 
                    ܒܶܝܬ ܠܺܝ ܐܳܦ ܠܳܗ̇ ܫܶܩܠܰܬ ܗܘܳܬ ܡܰܘܬܳܐ ܣܳܡܰܬ
                    
                
                
                    8
                    ܚܠܳܦ ܓܶܝܪ ܓܽܘܚܟܳܐ ܒܶܟܝܳܐ ܒܣܶܡ ܠܳܗ̇ ܘܰܚܠܳܦ ܟܽܘܚܳܠܳܐ 
                    ܡܶܛܪܳܐ ܕܕܶܡ̈ܥܶܐ ܘܰܚܠܳܦ ܣܰܩܠܳܐ ܚܶܙܘܳܐ ܟܡܺܝܪܳܐ 
                    
                
                
                    9
                    ܠܙܰܟܰܝ ܥܶܒܕܰܬ ܪܺܝܫ ܥܳܠܽܘ̈ܒܶܐ ܠܗܳܕܶܐ ܥܶܒܕܰܬ
                    ܪܺܝܫ ܛܰܡ̈ܐܳܬܳܐ ܠܰܬܪ̈ܶܝܢ ܓ̈ܶܦܰܝ ܬܒܰܪ ܝܶܫܽܘܥ
                    
                
                
                    10
                    ܐܶܢ ܗܽܘ ܕܙܰܟܺܝ ܐܶܬܬܰܠܡܰܕ ܠܶܗ ܘܶܐܢ ܗܽܘ ܕܗܳܕܶܐ
                    ܐܶܫܬܰܡܥܰܬ ܠܶܗ ܩܦܰܣܘ̱ ܡܶܟܺܝܠ ܐܽܘܡܢܽܘܬܰܢ
                    
                
                
                    11
                    ܓܠܺܝ̈ܦܶܐ ܡܶܟܺܝܠ ܠܒܶܙܚܳܐ ܗܳܘܶܝܢ ܘܰܠܡܽܘܝܳܩܳܐ 
                    ܓܠܽܘ̈ܦܰܝܗܽܘܢ ܐܳܦ ܠܓܽܘܚܟܳܐ ܥܳܒܽܘܕ̈ܰܝܗܽܘܢ
                    ܀܀܀
                
                
                    12
                    ܐܶܚܕܰܬ ܥܰܝ̈ܢܶܐ ܕܠܳܐ ܢܶܬܒܰܚܪܽܘܢ ܕܰܓ̈ܠܺܝܦܶܐ ܐܶܢܽܘܢ 
                    ܝܶܫܽܘܥ ܦܬܰܚ ܥܰܝ̈ܢܶܐ ܕܢܶܚܙܽܘܢ ܕܰܥܒܺܝܕ̈ܶܐ ܐܶܢܽܘܢ
                    
                
                
                    13
                    ܐܶܢ ܟܳܪܽܘܙܳܐ ܓܒܳܐ ܠܶܗ ܝܶܫܽܘܥ ܡܶܫܬܰܬܩܳܐ ܠܳܗ̇
                    ܟܳܪܽܘܙܽܘܬܰܢ ܗܳܕܶܐ ܕܡܰܠܝܳܐ ܡܶܢܳܗ̇ ܬܺܒܶܝܠ
                    
                
                
                    14
                    ܕܗܳܐ ܟ̈ܰܠܕܳܝܶܐ ܥܰܡ ܩܳܨ̈ܽܘܡܶܐ ܘܗܳܐ ܙܳܟܽܘܪ̈ܶܐ 
                    ܥܰܡ ܝܳܕܽܘ̈ܥܶܐ ܟܬܺܝ̈ܫܶܐ ܘܟܽܘܡܪ̈ܶܐ ܥܰܡ ܟܽܘܠ ܒܺܝ̈ܫܳܢ 
                    
                
                
                    15
                    ܟܽܘܡܪ̈ܶܐ ܐܶܟܰܠܬܽܘܢ ܣܰܩܬܽܘܢ ܡܶܟܺܝܠ ܙܶܠܘ̱ ܩܳܨܽܘܡ̈ܶܐ
                    ܗ̱ܘܰܘ ܦܰܠܳܚ̈ܶܐ ܢܶܟܪܽܘܟ ܣܶܦܪ̈ܰܘܗ̱ܝ ܐܳܦ ܟܰܠܕܳܝܳܐ 
                    
                
                
                    16
                    ܐܶܢ ܥܶܒܪ̈ܳܝܶܐ ܐܶܬܬܰܠܡܰܕܘ̱ ܠܶܗ ܕܰܒܟܽܠ ܐܳܬܘ̈ܳܢ 
                    ܠܳܐ ܐܶܬܟܰܒܰܫܘ̱ ܡܰܢ ܡܶܢ ܥܰܡ̈ܡܶܐ ܕܠܳܐ ܫܳܡܰܥ ܠܶܗ 
                    
                
                
                    17
                    ܐܶܢ ܗ̈ܳܦܟܳܝܶܐ ܫܰܪܺܝ ܡܰܬܩܶܢ ܫܪܳܐ ܠܶܗ ܫܰܪܒܰܢ
                    ܠܳܐ ܢܶܬܦܰܠܰܓ ܒܰܢ ܗܽܘ ܡܶܟܺܝܠ ܓܥܰܪ ܟܽܠ ܐ̱ܢܰܫ
                    
                
                
                    18
                    ܕܰܒܟܽܠ ܢܰܘܣ̈ܺܝܢ ܐܶܣܬܰܓܕܶܬ ܗܘܺܝܬ ܨܰܥܪܰܢ ܣܳܓܳܐ 
                    ܡܶܢ ܐܺܝܩܳܪܰܢ ܕܟܽܠ ܐ̱ܢܳܫ ܪܳܐܶܩ ܒ̈ܥܶܠܘܳܬܰܢ
                    
                
                
                    19
                    ܒܶܣܪܳܐ ܕܒܺܝܚܳܐ ܗܳܘܶܐ ܢܕܺܝܕܳܐ ܘܰܠܨܽܘܠܳܚܳܐ 
                    ܦܬܰܟܪ̈ܶܐ ܗܘܳܝܶܢ ܓܠܺܝ̈ܦܶܐ ܫܳܓܪܺܝܢ ܬܚܶܝܬ ܩܕܳܪ̈ܰܝܗܽܘܢ 
                    
                
                
                    20
                    ܠܫܶܥܝܳܐ ܗܳܘܶܐ ܟܽܠܶܗ ܥܰܒܕܰܢ ܘܰܠܣܽܘܚܳܦܳܐ
                    ܟܽܘܠ ܕܒܳܢܶܝܢ ܚܢܰܢ ܘܰܠܩܽܘܠܩܳܠܳܐ ܟܽܠ ܕܰܐܠܦܰܢ ܚܢܰܢ
                    
                
                
                    21
                    ܀܀܀
                    ܐ̱ܪ̈ܳܙܶܐ ܟܣ̈ܰܝܳܐ ܕܐܰܠܶܦܬ ܐܶܢܽܘܢ ܝܰܩܺܝܪܳܐܺܝܬ
                    ܥܬܺܝܕܺܝܢ ܐܶܢܽܘܢ ܠܡܰܦܪܣܺܝܘ ܥܰܠ ܐܰܓܳܪ̈ܶܐ 
                    
                
                
                    22
                    ܒܡܶܨܪ̈ܳܝܶܐ ܚܬܺܝܪ ܐܰܢ̱ܬ ܣܰܓܺܝ ܡܶܢ ܟܽܠ ܥܰܡ̈ܡܺܝܢ 
                    ܥܕܰܡܳܐ ܠܗܳܕܶܐ ܕܳܐܦ ܠܒܳܨ̈ܶܠܶܐ ܘܬܽܘܡܰܐ ܣܓܶܕܘ̱ ܗ̱ܘܰܘ
                    
                
                
                    23
                    ܗܳܐ ܩܳܢܶܛ ܐ̱ܢܳܐ ܕܰܠܡܳܐ ܐܰܝܟܳܐ ܕܣܶܓܝܰܬ ܛܽܘܥܝܰܝ
                    ܢܰܨܠܰܚ ܩܽܘܫܬܳܐ ܕܬܰܡܳܢ ܝܰܬܺܝܪ ܡܰܡܠܳܟ ܝܶܫܽܘܥ
                    
                
                
                    24
                    ܘܶܐܢ ܟܰܕ ܛܰܠܝܰܐ ܗ̱ܘ ܘܰܥܪܰܩ ܘܰܢܚܶܬ ܬܶܗܪܰܬ ܡܶܨܪܶܝܢ 
                    ܐܳܦ ܢܨܰܪܬܶܗ ܚܶܢܩܰܬ ܥܰܘ̈ܳܠܶܐ ܥܽܘܠܳܐ ܪܶܚܡܰܬ
                    
                
                
                    25
                    ܕܶܡ ܪܰܗܒܽܘܢܳܐ ܢܚܶܬ ܗ̱ܘܳܐ ܝܰܗ̱ܒ ܠܳܗ̇ ܕܰܐܝܟ ܡܳܟܽܘܪܳܐ 
                    ܫܪܳܪܳܐ ܝܰܗ̱ܒ ܕܡܳܐ ܕܶܐܬܥܰܠܰܡ ܐܳܦ ܢܣܰܒ ܠܳܗ̇
                    
                
                
                    26
                    ܠܳܐ ܡܨܶܐ ܦܶܪܥܽܘܢ ܕܰܢܩܺܝܡ ܪܶܓܠܳܐ ܠܰܘ ܓܶܝܪ ܦܺܐܩܰܐ ܗ̱ܘ 
                    ܕܰܢܕܰܓܶܠ ܒܶܗ ܐܳܦ ܠܳܐ ܥܰܒܕܳܐ ܕܰܢܟܰܕܶܒ ܒܶܗ
                    
                
                
                    27
                    ܡܰܚܶܐ ܗ̱ܘܳܐ ܡܽܘܫܶܐ ܡܶܪܕܽܘ ܡܶܨܪ̈ܳܝܶܐ ܘܰܪܕܳܐ ܠܥܰܡܳܐ 
                    ܡܶܪܕܽܘ ܥܶܒܪ̈ܳܝܶܐ ܝܶܫܽܘܥ ܒܳܠܰܥ ܘܰܠܟܽܠ ܡܚܳܐ 
                    
                
                
                    28
                    ܗܳܕܶܐ ܩܰܫܝܳܐ ܕܠܰܘ ܒܰܩܛܺܝܪܳܐ ܒܡܳܐ ܢܺܝܪܶܗ 
                    ܥܰܠ ܕܡܰܪܺܝܕܺܝܢ ܗܽܘ ܡܶܬܢܰܓܰܕ ܘܶܐ̱ܚܪܺܝܢ ܝܺܠܶܦ
                    
                
                
                    29
                    ܪܽܘܩܳܐ ܕܦܽܘܡܶܗ ܫܰܘܺܝ ܫܰܩܠܳܗ̇ ܠܒܶܗܬܰܬ ܐܳܕܳܡ 
                    ܒܫܽܘܩܳܦ ܦܰܟ̈ܰܘܗ̱ܝ ܥܰܩܪܳܗ̇ ܠܚܶܡܬܰܢ ܡܶܢ ܬܰܠܡܺܝܕ̈ܰܘܗ̱ܝ
                    
                
                
                    30
                    ܒܨ̈ܶܨܶܐ ܕܩܰܒܶܠ ܠܺܝ ܡܚܳܫ ܗ̱ܘܳܐ ܚܶܕܝܰܬ ܕܰܙܩܰܦܬܶܗ 
                    ܘܠܳܐ ܝܳܕܰܥ ܗܘܺܝܬ ܕܠܺܝ ܙܩܰܦ ܗܘܺܝܬ ܒܰܙܩܺܝܦܽܘܬܶܗ