Ephrem the Syrian. “Nisibis 61.” Digital Syriac Corpus. Last modified June 12, 2019. https://syriaccorpus.org/315.
    
        
            
                Nisibis LXI
            
            
                
                    ܝ ܒܰܪ ܩܳܠܶܗ
                
                
                    1
                    ܒܒܽܘܝܳܢܳܐ ܠܡܰܘܬܳܐ ܢܶܫܡܰܥ ܐܳܘ ܚܰܒܺܝ̈ܒܰܝ
                    ܕܰܡܩܰܛܪܶܓ ܠܰܢ ܥܰܠ ܒܟܝܳܢ ܘܥܰܠ ܝ̈ܺܠܠܳܬܰܢ
                    
                    ܥܽܘܢܺܝܬܳܐ: ܠܳܟ ܫܽܘܒܚܳܐ ܕܰܢܚܶܬܬ ܒܳܬܰܪ ܐܳܕܳܡ 
                    ܘܶܐܫܟܰܚ ܗ̱ܘܳܐ ܠܳܐܕܳܡ ܘܳܐܦ ܒܶܗ ܠܝ̈ܰܠܕܰܘܗ̱ܝ ܕܳܐܕܳܡ
                    
                
                
                    2
                    ܘܰܒܙܶܕܩܳܐ ܐܰܟܒܰܪ ܐܶܡܰܪ ܕܰܩ̈ܛܺܝܠܰܝܟܽܘܢ 
                    ܕܠܳܐ ܪ̈ܰܚܡܶܐ ܘܗܳܐ ܕܶܡ̈ܥܰܝܟܽܘܢ ܐܰܝܟ ܪ̈ܰܚܡܳܢܶܐ 
                    
                
                
                    3
                    ܥܒܰܕܬܽܘܢܳܢܝ̱ ܐܰܝܟ ܣܳܪܽܘܚܳܐ ܐܳܘ ܩ̈ܳܛܽܘܠܶܐ 
                    ܩܳܛܠܺܝܢ ܐܰܢ̱ܬܽܘܢ ܓܶܝܪ ܠܰܚ̈ܕܳܕܶܐ ܡܶܢ ܒܶܠܥܳܕܝ̱
                    
                
                
                    4
                    ܥܰܕ ܒܳܥܶܐ ܡܰܘܬܳܐ ܕܢܺܐܬܶܐ ܩܰܕܡܶܗ ܣܰܝܦܳܐ 
                    ܢܶܚܙܶܐ ܓܶܝܪ ܥܰܠ ܡܰܢ ܓܳܥܶܐ ܕܡܳܐ ܕܰܩ̈ܛܺܝܠܶܐ 
                    
                
                
                    5
                    ܥܠܰܝܟܽܘܢ ܓܳܥܶܝܢ ܚܢܺܝ̈ܩܶܐ ܕܰܐܠܺܝܨܺܝܢ ܗ̱ܘܰܘ
                    ܢܶܟܦܶܬ ܠܺܝ ܓܶܝܪ ܒܰܚܒܳܠܳܐ ܕܚܽܘܢܩ̈ܰܝܗܽܘܢ 
                    
                
                
                    6
                    ܥܰܠܝ̱ ܦܳܣܩܺܝܢ ܐܳܦ ܫܰܦܠܽܘܬܳܐ ܕܡܶܢ ܒܶܠܥܳܕܝ̱
                    ܚܢܺܝ̈ܩܶܐ ܘܰܩܛܺܝ̈ܠܶܐ ܐܰܝܟܰܢ ܥܰܠܘ̱ ܠܳܗ̇ ܠܰܫܝܽܘܠ
                    
                
                
                    7
                    ܥܰܘܠܰܝ̈ܟܽܘܢ ܗܳܐ ܡܶܫܬܕܶܝܢ ܐܰܝܟ ܕܰܒܡܶܨܪܶܝܢ 
                    ܒܢܰܝ̈ܟܽܘܢ ܠܫܺܐܕ̈ܶܐ ܕܰܒܰܚܬܽܘܢ ܐܳܘ ܫܺܐܕ̈ܳܢܶܐ 
                    
                    ܀܀܀
                
                
                    8
                    ܥܰܕ ܒܳܥܶܐ ܡܰܘܬܳܐ ܕܢܶܛܥܰܡ ܒܰܫ̈ܠܰܕܰܝܟܽܘܢ 
                    ܩܳܐܶܝܢ ܫܰܪܚܰܢܝ̱ ܩܰܕܡܳܐܺܝܬ ܒܰܕܡܳܐ ܕܐ̱ܢܳܫܳܐ 
                    
                
                
                    9
                    ܥܰܕ ܒܥܳܐ ܕܶܐܓܰܪ ܪܽܘܚܝ̱ ܕܰܢܡܽܘܬ ܐܳܕܳܡ 
                    ܩܕܳܡ ܫܽܘܠܛܳܢܝ̱ ܫܠܰܛܬܽܘܢܳܢܝ̱ ܥܰܠ ܦܰܓܪ̈ܰܝܟܽܘܢ
                    
                
                
                    10
                    ܥܰܩܪܶܗ ܩܳܐܶܝܢ ܒܣܰܝܦܶܗ ܠܬܰܪܥܳܗ̇ ܕܰܫܝܽܘܠ 
                    ܐܰܚܺܝܕ ܗ̱ܘܳܐ ܓܶܝܪ ܘܰܩܕܳܡ ܙܰܒܢܳܐ ܩܕܳܡ ܦܰܬܚܶܗ
                    
                
                
                    11
                    ܥܡܰܠ ܕܪܺܝܫܳܗ̇ ܐܽܘܪܚܳܐ ܕܰܫܝܽܘܠ ܡܶܢ ܒܶܠܥܳܕܝ̱
                    ܒܽܐܘܪܚܳܐ ܓܶܝܪ ܕܰܕܪܰܫܬܽܘܢ ܠܺܝ ܗܳܐ ܪܳܕܶܐ ܐ̱ܢܳܐ 
                    
                
                
                    12
                    ܬܫܰܥܡܳܐܐ ܫ̈ܢܺܝܢ ܝܶܬܒܰܬ ܩܰܘܝܰܬ ܠܳܐܕܳܡ ܕܰܢܡܽܘܬ
                    ܩܳܐܶܝܢ ܕܶܝܢ ܐܳܦ ܠܳܐ ܝܰܘܡܳܐ ܫܰܒܩܶܗ ܠܰܐܚܽܘܗ̱ܝ
                    
                
                
                    13
                    ܓܰܝ̈ܳܣܶܐ ܒܓܰܘ ܐܽܘܪ̈ܚܳܬܳܐ ܒܺܝܫ̈ܺܝܢ ܐܶܢܽܘܢ ܡܶܢܝ̱
                    ܐܶܢܳܐ ܕܳܡܶܟ ܐ̱ܢܳܐ ܘܗܶܢܽܘܢ ܥܺܝܪܺܝܢ ܠܰܡܩܰܛܳܠܽܘ
                    
                
                
                    14
                    ܗܳܐ ܚܪ̈ܺܝܒܰܝܟܽܘܢ ܒܩܰܒܪ̈ܶܐ ܘܰܩܛܺܝ̈ܠܰܝܟܽܘܢ 
                    ܒܽܐܘܪ̈ܚܳܬܳܐ ܘܰܚܢܺܝ̈ܩܰܝܟܽܘܢ ܥܰܠ ܣܟܝ̈ܟܘܢ 
                    
                
                
                    15
                    ܐܶܢ ܐܶܢܳܐ ܡܶܪܕܶܬ ܥܰܠ ܡܳܪܝ̱ ܠܰܡ ܘܩܰܛܠܬܶܗ 
                    ܡܰܢܽܘ ܩܳܛܶܠ ܐܶܢܽܘܢ ܠܗܳܠܶܝܢ ܐܳܡܰܪ ܝܰܗܽܘ
                    
                
                
                    16
                    ܘܶܐܢ ܐܶܢܳܐ ܡܰܘܬܳܐ ܕܒܰܪ̣ܬ ܠܥܰܢܺܝ̈ܕܰܝܟܽܘܢ 
                    ܚܢܺܝ̈ܩܶܐ ܩ̈ܛܺܝܠܶܐ ܘܚܰܪ̈ܺܝܒܶܐ ܡܰܢܽܘ ܩܳܛܶܠ
                    
                
                
                    17
                    ܀܀܀
                    ܣܳܛܳܢܳܐ ܐܰܢ̱ܬܽܘܢ ܠܰܚܕ̈ܳܕܶܐ ܘܰܣܩܺܝܪ ܒܺܝܼܫܳܐ 
                    ܡܰܘܬܳܢܳܐ ܐܰܢ̱ܬܽܘܢ ܠܰܚܕ̈ܳܕܶܐ ܘܰܥܕܺܝܠ ܡܰܘܬܳܐ 
                    
                
                
                    18
                    ܨܶܒܝܳܢܟܽܘܢ ܠܟܽܘܢ ܣܳܛܳܢܰܐ ܗ̱ܘ ܘܳܐܦ ܩܳܛܽܘܠܰܐ ܗ̱ܘ 
                    ܘܡܶܢ ܡܰܘܬܳܐ ܘܡܶܢ ܣܳܛܳܢܳܐ ܩܰܒܶܠ ܟܽܠ ܐ̱ܢܳܫ 
                    
                
                
                    19
                    ܣܰܡܳܐ ܕܡܰܘܬܳܐ ܡܰܫܩܶܝܢ ܐܰܢ̱ܬܽܘܢ ܬܽܘܒ ܠܰܚܕ̈ܳܕܶܐ 
                    ܟܡܳܐ ܡ̈ܰܘܬܶܝܢ ܗܳܐ ܐܺܝܬ ܠܟܽܘܢ ܡܶܢ ܒܶܠܥܳܕܝ̱
                    
                
                
                    20
                    ܢܶܟ̈ܠܶܐ ܟܡܺܐܢ̈ܶܐ ܐܳܦ ܦ̈ܰܚܶܐ ܣܰܝܦܳܐ ܘܣܰܡܳܐ 
                    ܟܡܳܐ ܡܰܘ̈ܬܺܝܢ ܡܶܢܟܽܘܢ ܘܒܳܟܽܘܢ ܗܳܐ ܡܶܬܝܰܠܕܺܝܢ
                    
                
                
                    21
                    ܕܰܝܳܢܳܐ ܒܓܰܘ ܒܶܝܬ ܕܺܝܢܳܐ ܡܰܘܬܰܐ ܗ̱ܘ ܕܰܬܪ̈ܶܝܢ 
                    ܗܰܘ ܩܳܛܶܠ ܒܰܐܓܪܳܐ ܟܰܣܝܳܐ ܘܶܐܢܳܐ ܡܰܓܳܢ 
                    
                
                
                    22
                    ܚܙܺܝܬܶܗ ܠܫܽܘܚܕܳܐ ܘܬܶܗܪܶܬ ܒܶܗ ܕܰܪܗܶܛ ܩܕܳܡܰܢܝ̱
                    ܟܡܳܐ ܩ̈ܳܛܠܺܝܢ ܩܳܛܶܠ ܫܽܘܚܕܳܐ ܘܠܳܐ ܐ̱ܢܳܫ ܡܰܪܓܶܫ
                    
                
                
                    23
                    ܢܶܟܦܶܬ ܠܺܝ ܕܗܶܕܝܽܘܛܳܐܺܝܬ ܡܶܬܕܰܒܰܪ ܐ̱ܢܳܐ 
                    ܚܕܳܐ ܫܠܰܕܳܐ ܐܶܢ ܕܒܰܪ ܐܶܢܳܐ ܟܽܠ ܐ̱ܢܳܫ ܡܰܪܓܶܫ
                    
                
                
                    24
                    ܒܒ̈ܳܬܶܐ ܒܶܟܝܳܐ ܘܰܒܫܽܘ̈ܩܶܐ ܐܳܦ ܡܰܪܩܽܘܕܬܳܐ 
                    ܥܕܰܡܳܐ ܕܥܰܠ ܬܰܪ̈ܥܶܝܗ̇ ܕܰܫܝܽܘܠ ܥܘܶܝܢ ܥܠܰܝ
                    
                
                
                    25
                    ܥܘܰܘ ܥܠܰܝܟܽܘܢ ܕܰܟܡܳܐ ܣܳܢܶܝܢ ܐܰܢ̱ܬܽܘܢ ܘܠܺܝ ܣܳܢܶܝܢ ܐܰܢ̱ܬܽܘܢ
                    ܫܝܽܘܠ ܡܶܟܺܝܠ ܬܰܥܘܶܐ ܥܠܰܝܟܽܘܢ ܐܳܘ ܩ̈ܳܛܽܘܠܶܐ
                    
                
                
                    26
                    ܒܣܶܪܩܳܐ ܢܶܓܕܳܐ ܘܢܽܘܪܳܐ ܘܳܐܦ ܒܪܶܓܡܳܐ 
                    ܡܡܺܝܬܺܝܢ ܐܰܢ̱ܬܽܘܢ ܠܰܒܢܰܝ̈ܢܳܫܳܐ ܘܰܚܬܺܝܪܺܝܢ ܐܰܢ̱ܬܽܘܢ 
                    
                
                
                    27
                    ܢܳܟܶܦ ܐ̱ܢܳܐ ܡܶܢܟܽܘܢ ܐܳܦ ܪܳܚܡܳܢ ܐܳܦ ܡܝܰܩܰܪ 
                    ܒܺܐܝܩܳܪܳܐ ܓܶܝܪ ܕܒܰܪ ܐܶܢܳܐ ܠܥܰܢܺܝ̈ܕܰܝܟܽܘܢ
                    
                
                
                    28
                    ܥܰܠ ܥܰܪ̈ܣܳܬܳܐ ܡܫܰܕܶܠ ܐ̱ܢܳܐ ܠܰܐܝܢܳܐ ܕܟܰܪܝܶܗ
                    ܘܢܺܝܚܳܐܺܝܬ ܡܰܕܡܶܟ ܐ̱ܢܳܐ ܠܶܗ ܫܢܰܬ ܙܰܒܢܳܐ