Ephrem the Syrian. “Nisibis 63.” Digital Syriac Corpus. Last modified June 12, 2019. https://syriaccorpus.org/317.
    
        
            
                Nisibis LXIII
            
            
                
                    ܝܒ ܒܰܪ ܩܳܠܶܗ
                    ܀܀܀
                
                
                    1
                    ܡܰܢܽܘ ܢܶܬܩܽܘܠ ܦܽܘܪܥܳܢܶܗ ܕܗܰܘ ܐܰܒܪܳܗܳܡ 
                    ܕܬܶܗܪܰܬ ܒܶܗ ܟܰܕ ܦܳܟܰܪ ܠܶܗ ܠܺܝܚܺܝܕܳܝܶܗ 
                    
                    ܥܽܘܢܺܝܬܳܐ: ܠܳܟ ܫܽܘܒܚܳܐ ܩܳܠܳܐ ܕܰܐܚܰܝ ܠܡܺܝ̈ܬܶܐ ܕܰܫܝܽܘܠ
                    ܘܰܣܠܶܩܘ̱ ܘܰܗܘܰܘ ܟܳܪ̈ܽܘܙܶܐ ܠܒܰܪ ܡܰܚܶܐ ܟܽܘܠ
                    
                
                
                    2
                    ܗܰܘ ܥܶܕܳܢ ܦܚܶܬ ܢܶܦܩܰܬ ܕܶܐܚܙܶܐ ܬܶܗܪܳܐ 
                    ܕܰܫܡܺܝܛܳܐ ܠܶܗ ܣܰܟܺܝܢܶܗ ܥܰܠ ܚܰܒܺܝܒܶܗ
                    
                
                
                    3
                    ܩܶܦܣܰܬ ܐܰܣܓܝܰܬ ܥܽܘܗ̈ܕܳܢܝ̱ ܡܶܢ ܟܽܠ ܦܶܢܝ̈ܳܢ
                    ܘܟܶܢܫܰܬ ܢܰܦܫܝ̱ ܕܶܐܬܗܰܪ ܗܘܺܝܬ ܒܶܗ ܒܗܰܘ ܢܰܨܺܝܚܳܐ 
                    
                
                
                    4
                    ܐܰܝܟܰܢܳܐ ܟܰܝ ܩܳܪܶܝܢ ܐܰܢ̱ܬܽܘܢ ܫܰܪܒܶܗ ܪܰܒܳܐ 
                    ܨܥܰܪܬܽܘܢܳܝܗ̱ܝ ܩܶܪܝܳܢܶܗ ܒܓܰܘ ܐܶܕ̈ܢܰܝܟܽܘܢ 
                    
                
                
                    5
                    ܣܰܝܦܶܗ ܕܢܶܦܬܰܚ ܒܣܰܪ ܠܶܗ ܠܰܐܝܢܳܐ ܕܰܐܒܺܝܠ
                    ܒܰܪܬܶܗ ܗܘܳܬ ܠܶܗ ܡܰܚܙܺܝܬܳܐ ܕܰܚܺܝܬ ܡܺܝ̈ܬܶܐ 
                    
                
                
                    6
                    ܗܺܝ ܝܶܗܒܰܬ ܢܰܦܫܳܗ̇ ܠܰܐܒܽܘܗ̇ ܘܰܐܢ̱ܬܽܘܢ ܐܰܓܥܶܠܘ̱ 
                    ܚܰܝ̈ܰܝܟܽܘܢ ܠܰܐܒܳܐ ܕܟܽܠܳܐ ܒܥܶܕܳܢ ܩܨܳܐ 
                    
                
                
                    7
                    ܒܟܰܪܣܳܐ ܟܰܝ ܠܳܐ ܢܣܺܝܬܽܘܢ ܐ̱ܪܳܙܳܗ̇ ܕܰܫܝܽܘܠ
                    ܕܒܰܫܝܽܘܠ ܣܰܓܺܝ ܢܺܝܚܺܝܢ ܐܰܢ̱ܬܽܘܢ ܡܰܢ ܕܰܒܟܰܪܣܳܐ 
                    
                
                
                    8
                    ܩܫܐ ܗܘ ܠܟܽܘܢ ܠܰܡܩܳܡ ܠܽܘܩܒܰܠ ܨܶܒܝܳܢܝ̱ ܪܰܒܳܐ 
                    ܠܥܽܘܕܪܳܢܳܐ ܓܶܝܪ ܗܳܐ ܕܒܰܪ ܠܥܰܢܺܝ̈ܕܰܝܟܽܘܢ 
                    
                
                
                    9
                    ܒܡܰܠܟܳܐ ܕܡܽܘܐܳܒ ܗܰܘ ܕܢܰܟܶܣ ܠܰܒܪܶܗ ܒܺܐܝ̈ܕܰܘܗ̱ܝ
                    ܢܶܬܟܰܐܰܪ ܐܰܝܢܳܐ ܕܡܺܝܠܶܠ ܥܰܠ ܥܰܢܺܝܕܳܐ 
                    
                
                
                    10
                    ܗܰܘ ܚܰܢܦܰܐ ܗ̱ܘ ܐܰܝܟ ܡܳܐ ܕܰܐܢ̱ܬܽܘܢ ܗܳܐ ܩܳܪܶܝܢ ܐܰܢ̱ܬܽܘܢ
                    ܘܰܐܢ̱ܬܽܘܢ ܡ̈ܰܠܦܶܐ ܘܰܪ̈ܕܰܝܳܐ ܐܰܝܟ ܕܣܰܒܰܪܬܽܘܢ 
                    
                
                
                    11
                    ܗܽܘ ܣܰܝܒܰܪ ܘܰܐܢ̱ܬܽܘܢ ܦܳܩܪܺܝܢ ܕܰܐܒܺܝܠܺܝܢ ܐܰܢ̱ܬܽܘܢ 
                    ܥܰܠ ܨܶܒܝܳܢܶܗ ܕܡܳܪܳܐ ܟܽܠ ܟܰܕ ܒܳܟܶܝܢ ܐܰܢ̱ܬܽܘܢ 
                    
                
                
                    12
                    ܐܶܢܳܐ ܓܶܝܪ ܕܳܚܶܠ ܐ̱ܢܳܐ ܕܰܐܥܒܰܪ ܫܰܪܒܶܗ ܕܺܐܝܽܘܒ
                    ܒܓܰܘ ܗܳܢܳܐ ܦܽܘܡܝ̱ ܚܰܠܳܫܳܐ ܕܠܳܐ ܫܳܘܶܐ ܐ̱ܢܳܐ 
                    
                
                
                    13
                    ܒܰܕܓܽܘܢ ܗܳܟܰܢ ܚܳܐܶܓ ܐ̱ܢܳܐ ܡܶܢ ܓܰܪ̈ܡܰܝܗܽܘܢ 
                    ܟܰܕ ܡܰܘܕܶܐ ܐ̱ܢܳܐ ܠܡܰܢ ܕܝܰܗ̱ܒ ܕܰܠܘܳܬܝ̱ ܢܺܐܬܽܘܢ 
                    
                
                
                    14
                    ܠܳܐ ܬܨܰܥܪܽܘܢ ܗܰܕܳܡ̈ܰܝܟܽܘܢ ܒܰܚܛܳܗ̈ܰܝܟܽܘܢ 
                    ܕܒܰܫܝܽܘܠ ܫܺܝܛܺܝܢ ܓܰܪ̈ܡܰܝܗܽܘܢ ܕܰܐܝܠܶܝܢ ܕܰܐܪܫܰܥܘ̱
                    
                
                
                    15
                    ܐܰܝܟܳܐ ܕܚܳܙܶܐ ܐ̱ܢܳܐ ܦܰܓܪܶܗ ܕܚܰܕ ܡܶܢ ܒܺܝ̈ܫܶܐ 
                    ܥܠܰܘܗ̱ܝ ܕܳܐܶܫ ܐ̱ܢܳܐ ܘܠܳܐܶܛ ܐ̱ܢܳܐ ܐܳܦ ܕܽܘܟܪܳܢܶܗ 
                    
                
                
                    16
                    ܘܰܐܝܟܳܐ ܕܚܳܙܶܐ ܐ̱ܢܳܐ ܓܰܪ̈ܡܶܐ ܕܚܰܕ ܡܶܢ ܟܺܐܢ̈ܶܐ 
                    ܡܰܣܛܳܐ ܐ̱ܢܳܐ ܘܰܡܝܰܩܰܪ ܐ̱ܢܳܐ ܟܰܕ ܣܳܓܶܕ ܐ̱ܢܳܐ 
                    
                
                
                    17
                    ܠܳܐ ܪܓܺܝܫܺܝܢ ܐܰܢ̱ܬܽܘܢ ܚܰܠܳܫ̈ܶܐ ܒܟܽܠ ܛܽܘ̈ܟܳܣܝ̱
                    ܠܘܳܬܟܽܘܢ ܗܽܘ ܒܠܺܝܠܺܝܢ ܛܶܟ̈ܣܶܐ ܕܰܥܘܺܝܪ̈ܺܝܢ ܐܰܢ̱ܬܽܘܢ 
                    
                
                
                    18
                    ܡܽܘܫܰܐ ܗ̱ܘ ܒܰܠܚܽܘܕ ܝܳܕܰܥ ܐ̱ܢܳܐ ܕܝܰܩܰܪ ܐܰܟܘܳܬܝ̱
                    ܓܰܪ̈ܡܶܐ ܕܝܰܘܣܶܦ ܗܰܘ ܕܶܐ̱ܢܳܐ ܠܶܗ ܡܰܘܪܶܒ ܐ̱ܢܳܐ 
                    ܀܀܀
                
                
                    19
                    ܡܽܘܫܶܐ ܕܶܝܢ ܠܚܰܕ ܦܰܓܪܳܐ ܕܰܟܝܳܐ ܝܰܩܰܪ
                    ܐܶܢܳܐ ܕܶܝܢ ܦܰܓܪ̈ܶܐ ܐܳܦ ܓܰܪ̈ܡܶܐ ܕܟܽܠ ܙܰܕܺܝ̈ܩܶܐ 
                    
                
                
                    20
                    ܨܶܡܚܺܝܢ ܓܰܪ̈ܡܶܐ ܕܰܢܒܺܝ̈ܶܐ ܐܳܦ ܕܰܫ̈ܠܺܝܚܶܐ 
                    ܫܪܳܓܳܐ ܗ̱ܘܰܘ ܠܺܝ ܒܚܶܫܽܘܟܳܐ ܟܽܠ ܙܰܕܺܝ̈ܩܶܐ 
                    
                
                
                    21
                    ܣܳܓܶܕ ܐ̱ܢܳܐ ܠܡܰܢ ܕܰܐܢܗܰܪ ܠܺܝ ܚܶܫܟܳܗ̇ ܕܰܫܝܽܘܠ 
                    ܙܺܝܘܶܗ ܕܡܽܘܫܶܐ ܟܡܳܐ ܕܰܗܘܳܐ ܫܶܡܫܳܐ ܗ̱ܘܳܐ ܠܺܝ