Ephrem the Syrian. “Nisibis 64.” Digital Syriac Corpus. Last modified June 12, 2019. https://syriaccorpus.org/318.
    
        
            
                Nisibis LXIV
            
            
                
                    ܝܓ ܒܰܪ ܩܳܠܶܗ
                
                
                    1
                    ܚܰܠܳܫ̈ܶܐ ܡܶܢ ܒܳܟܶܝܢ ܐܰܢ̱ܬܽܘܢ ܥܰܠ ܡ̈ܺܝܬܰܝܟܽܘܢ 
                    ܕܰܒܡܰܘܬܳܐ ܡܶܢ ܥܳܩ̈ܳܬܳܐ ܘܚ̈ܰܘܒܶܐ ܐܰܓܗܺܝܘ̱
                    
                    ܥܽܘܢܺܝܬܳܐ: ܫܽܘܒܚܳܐ ܕܰܠܟܽܠ ܣܰܝܒܰܪ ܗ̱ܘܳܐ ܡܶܛܽܠ ܟܽܠ ܐ̱ܢܳܫ
                    ܐܳܦ ܡܰܘܬܳܐ ܛܥܶܡ ܡܶܛܽܠ ܟܽܠ ܕܢܰܢܚܶܡ ܟܽܠ
                    
                
                
                    2
                    ܐܶܓܠܶܐ ܠܟܽܘܢ ܕܳܐܦ ܣܳܛܳܢܳܐ ܟܰܕ ܛܳܒ ܡܢܳܚ
                    ܥܰܠ ܕܶܡ̈ܥܰܝܟܽܘܢ ܛܳܒ ܓܚܶܟ ܥܰܠ ܐܶܒܠܰܝ̈ܟܽܘܢ 
                    
                
                
                    3
                    ܒܒܶܙܚܳܐ ܩܰܪܨܰܢܝ̱ ܐܳܦ ܪܶܡܙܰܢܝ̱ ܐܰܝܟ ܛܰܪܟܳܢܳܐ 
                    ܕܬܳܐ ܢܶܓܚܰܟ ܥܰܠ ܚ̈ܰܛܳܝܶܐ ܕܗܳܐ ܡܶܫܬܰܢܶܝܢ 
                    
                
                
                    4
                    ܫܒܰܩܘ̱ ܠܰܡ ܪܶܢܝܳܗ̇ ܕܗܳܝ ܢܽܘܪܳܐ ܕܰܠܗܽܘܢ ܛܶܡܪܰܬ
                    ܘܗܳܐ ܪܳܘܶܝܢ ܣܰܟ̈ܠܶܐ ܒܰܒܟܳܬܳܐ ܕܥܰܢܺܝ̈ܕܰܝܗܽܘܢ
                    
                
                
                    5
                    ܚܠܳܦ ܕܢܶܒܼܟܽܘܢ ܕܰܐܝܟܰܢܳܐ ܕܰܕܠܳܐ ܙܘ̈ܳܕܶܐ 
                    ܣܶܪܩܰܬ ܐܰܦܩܰܬ ܡܺܝ̈ܬܰܝܗܽܘܢ ܗܳܐ ܡܶܫܬܰܢܶܝܢ
                    
                
                
                    6
                    ܢܰܦܫ̈ܳܬܳܐ ܕܒܺܝܫ̈ܶܐ ܡܥܳܩܳܢ ܥܰܕ ܝܽܘܡ ܕܺܝܢܼܳܐ 
                    ܘܗܳܠܶܝܢ ܒܳܟܶܝܢ ܥܰܠ ܩܰܒܪ̈ܶܐ ܐܰܝܟ ܫ̈ܢܰܝܳܐ 
                    
                
                
                    7
                    ܠܳܐ ܝܳܨܦܺܝܢ ܕܰܚܛܳܗ̈ܰܝܗܽܘܢ ܕܰܐܟܒܰܪ ܠܰܡܚܳܪ
                    ܒܒܶܗܬܰܬ ܐܰܦܰܝ̈ܗܽܘܢ ܐܳܬܶܝܢ ܨܶܝܕ ܡܺܝ̈ܬܰܝܗܽܘܢ
                    
                
                
                    8
                    ܘܟܶܢ ܗܽܘ ܒܳܗ̇ܬܺܝܢ ܫܰܘܝܳܐܺܝܬ ܛܽܘܗ̈ܡܺܝܢ ܛܽܘܗ̈ܡܺܝܢ 
                    ܒܰܫܝܽܘܠ ܡܶܬܬܘܶܝܢ ܚ̈ܰܠܳܫܶܐ ܕܠܳܐ ܝܽܘܬܪܳܢܳܐ 
                    
                
                
                    9
                    ܫܒܽܘܩ ܪܳܘܶܝܢ ܐܳܦ ܡܶܫܬܰܢܶܝܢ ܗܰܘ ܝܰܘܡܳܐ 
                    ܕܒܶܗ ܢܰܦܶܨ ܠܶܗ ܚܰܡܪܶܗ ܠܰܐܝܢܳܐ ܕܰܡܫܰܬܢܳܐ ܗ̱ܘܳܐ 
                    
                
                
                    10
                    ܐܳܙܶܠ ܐ̱ܢܳܐ ܕܰܐܥܦܶܐ ܐܶܢܽܘܢ ܐܰܝܟ ܠܰܛ̈ܠܳܝܶܐ 
                    ܕܢܶܫܬܰܥܽܘܢ ܐܳܦ ܢܶܫܬܰܢܽܘܢ ܥܰܕ ܗܳܐ ܡܰܘܦܶܝܢ
                    
                
                
                    11
                    ܗܳܐ ܓܠܺܝܬ ܠܟܽܘܢ ܐܳܦ ܐ̱ܪܳܙܶܗ ܟܰܣܝܳܐ ܕܟܢܬܝ
                    ܦܽܘܩܘ̱ ܙܶܠܘ̱ ܗܳܟܺܝܠ ܐܶܬܟܰܫܰܪܘ̱ ܒܰܬܝܳܒܽܘܬܳܐ
                    
                
                
                    12
                    ܐܰܪܦܽܐܘܢܳܝ ܐܳܦ ܐܶܢܳܐ ܐܳܙܶܠ ܐܶܣܥܽܘܪ ܨܶܒܘ̈ܳܬܝ̱ 
                    ܕܒܰܐܦ̈ܶܐ ܓܰܠܝ̈ܳܬܳܐ ܐܶܬܶܠ ܚܽܘܫܒܳܢܝ̱ ܠܡܳܪܝ̱
                    
                
                
                    13
                    ܝܳܕܰܥ ܐ̱ܢܳܐ ܕܪܽܘܚܰܐ ܗ̱ܘ ܢܶܫܒܰܬ ܫܶܩܠܰܬ ܡ̈ܶܠܰܝ 
                    ܐܰܢ̱ܬܽܘܢ ܓܶܝܪ ܗܳܢܽܘܢ ܐܶܢܽܘܢ ܕܰܐܣܓܺܝܬ ܘܰܒܩܺܝܬ 
                    
                
                
                    14
                    ܕܟܺܝܪ ܐܶܪܰܡܝܳܐ ܗܰܘ ܕܰܐܡܬܶܠ ܡܳܪܳܚܽܘܬܳܐ 
                    ܒܗܶܢܕܘܳܝܳܐ ܕܠܳܐ ܡܶܬܚܰܠܰܦ ܟܰܕ ܚܺܐܪܽܘܬܳܐ ܗ̱ܝ
                    
                    ܀܀܀
                
                
                    15
                    ܐܳܦ ܗܳܕܶܐ ܓܶܝܪ ܕܺܝܠܳܗ̇ ܗܺܝ ܕܗܳܝ ܚܺܐܪܽܘܬܳܐ 
                    ܕܐܰܣܪܰܬ ܢܰܦܫܳܗ̇ ܒܨܶܒܝܳܢܳܐ ܐܰܝܟ ܒܰܟܝܳܢܳܐ 
                    
                
                
                    16
                    ܫܰܠܺܝܛ ܗ̱ܽܘ ܓܶܝܪ ܨܶܒܝܳܢܳܐ ܒܕܒܰܪ ܚܺܐܪ̈ܰܐ ܗ̱ܘ 
                    ܕܳܐܦ ܠܟܺܝܢܳܐ ܢܶܬܕܰܡܶܐ ܒܝܰܕ ܕܽܘܒܳܪ̈ܰܘܗ̱ܝ