Ephrem the Syrian. “Nisibis 65.” Digital Syriac Corpus. Last modified June 12, 2019. https://syriaccorpus.org/319.
    
        
            
                Nisibis LXV
            
            
                
                    ܝܕ ܡܶܢܶܗ ܒܰܪ ܩܳܠܶܗ
                
                
                    1
                    ܐܳܘ ܡܰܘܬܳܐ ܠܳܐ ܬܰܗܶܠ ܒܶܗ ܒܨܰܠܡܶܗ ܕܳܐܕܳܡ
                    ܕܰܐܝܟ ܙܰܪܥܳܐ ܒܰܐܪܥܳܐ ܡܰܓܥܶܠ ܥܰܕ ܢܽܘܚܳܡܳܐ 
                    
                    ܥܽܘܢܺܝܬܳܐ: ܠܳܟ ܫܽܘܒܚܳܐ ܕܰܢܚܶܬ ܘܰܥܡܰܕ ܒܳܬܰܪ ܐܳܕܳܡ 
                    ܘܰܫܠܳܝܗ̱ܝ ܡܶܢ ܥܽܘܡܩܶܝ̈ܗ̇ ܕܰܫܝܽܘܠ ܘܰܐܥܠܶܗ ܠܰܥܕܶܢ 
                    
                
                
                    2
                    ܒܗܳܢܳܐ ܙܰܪܥܳܐ ܬܳܡܶܗ ܐ̱ܢܳܐ ܐܰܝܟ ܡܶܠܰܬܟܽܘܢ 
                    ܕܗܳܐ ܚܰܡܫܳܐ ܐܰܠܦܺܝ̈ܢ ܕܰܫ̈ܢܰܝܳܐ ܠܳܐ ܟܰܝ ܫܘܰܚ
                    
                
                
                    3
                    ܓܡܰܪ ܠܶܗ ܗܳܢܳܐ ܥܽܘܡܪܳܐ ܒܰܕܡܽܘܬ ܣܰܬܘܳܐ
                    ܘܳܐܬܝܳܐ ܟܰܦܳܐ ܒܢܽܘܚܳܡܳܐ ܠܽܐܘܨܳܪ ܚ̈ܰܝܶܐ 
                    
                
                
                    4
                    ܕܩܳܛܦܰܐ ܗ̱ܘ ܗܳܐ ܝܳܕܰܥ ܐ̱ܢܳܐ ܠܳܐ ܓܶܝܪ ܚܙܺܝܬ 
                    ܡܺܝ̈ܬܶܐ ܕܰܡܬܽܘܡ ܡܶܙܕܰܪܥܺܝܢ ܐܰܘ ܡܶܬܚܰܨܕܺܝܢ 
                    
                
                
                    5
                    ܗܳܘܶܐ ܚܶܨܕܳܐ ܐܳܘ ܡܰܘܬܳܐ ܕܡܰܣܪܰܩ ܠܳܟ 
                    ܘܢܳܦܩܺܝܢ ܥܺܝܪ̈ܶܐ ܚܰܨ̈ܽܘܕܶܐ ܕܡܰܓܙܶܝܢ ܠܳܟ 
                    
                
                
                    6
                    ܘܶܐܡܰܬܝ̱ ܗܽܘ ܗܘܺܝܬ ܐܰܟܳܪܳܐ ܚܠܳܦ ܩܳܛܽܘܦܳܐ 
                    ܠܰܫܝܽܘܠ ܡܰܥܨܰܪܬܳܐ ܡܰܢܽܘ ܚܰܩܠܳܐ ܥܰܒܕܳܗ̇
                    
                
                
                    7
                    ܙܰܪܥܳܐ ܟܰܝ ܠܳܐ ܡܰܠܶܦ ܠܳܟ ܕܰܡܣܶܐ ܘܰܐܒܺܝܕ
                    ܘܰܦܣܺܝܩ ܣܰܒܪܶܗ ܘܡܶܢ ܡܶܛܪܳܐ ܩܳܢܶܐ ܣܰܒܪܶܗ
                    
                
                
                    8
                    ܚܶܠܡܳܐ ܚܙܰܝܬܽܘܢ ܚܰܠܳܫ̈ܶܐ ܕܚܰܝܰܬ ܡܺܝ̈ܬܶܐ 
                    ܒܥܰܠܘܶܐ ܓܶܝܪ ܢܽܘܚܳܡܳܐ ܠܳܐ ܚܳܙܶܝܢ ܐܰܢ̱ܬܽܘܢ 
                    
                
                
                    9
                    ܛܽܘܒܥܳܟ ܕܺܝܠܳܟ ܓܰܠܙܳܟ ܕܠܳܐ ܬܶܚܙܶܐ 
                    ܟܶܢܫ̈ܶܐ ܕܐ̱ܪ̈ܳܙܶܐ ܟܰܕ ܩܳܥܶܝܢ ܥܰܠ ܢܽܘܚܳܡܳܐ 
                    
                
                
                    10
                    ܝܳܕܰܥ ܐ̱ܢܳܐ ܕܚܰܝ̈ܺܝܢ ܙܰܪ̈ܥܶܐ ܠܳܐ ܕܶܝܢ ܚܳܙܶܝܬ 
                    ܓܰܪ̈ܡܶܐ ܕܺܝܥܘ̱ ܒܳܗ̇ ܒܰܫܝܽܘܠ ܘܰܫܘܰܚܘ̱ ܘܰܣܠܶܩܘ̱ 
                    
                
                
                    11
                    ܟܽܠܶܗ ܡܡܰܠܠܳܟ ܠܳܟ ܕܳܡܶܐ ܕܗܳܐ ܚܰܙܩܺܝܐܶܝܠ
                    ܐܰܠܦܳܟ ܒܰܦܩܰܥܬܳܐ ܐܰܝܟܰܢ ܚܰܝ̈ܰܝܢ ܡܺܝ̈ܬܶܐ 
                    
                
                
                    12
                    ܠܺܐܝܠܳܢ̈ܶܐ ܚܳܙܶܝܬ ܕܰܒܩܰܝܛܳܐ ܠܒܶܫܘ̱ ܢܶܚ̈ܬܰܝܗܽܘܢ 
                    ܓܰܪ̈ܡܶܐ ܕܶܝܢ ܥܰܪܛܶܠܳܐܺܝܬ ܒܰܫܝܽܘܠ ܫܳܕܶܝܢ 
                    
                
                
                    13
                    ܡܽܘܫܶܐ ܒܙܺܝܘܶܗ ܬܰܒܪܶܗ ܗ̱ܘܳܐ ܠܒܶܟ ܡܰܘܬܳܐ 
                    ܒܰܪ ܐܳܕܳܡ ܐܰܥܕܺܝ ܫܽܘܒܚܶܗ ܕܳܐܕܳܡ ܘܰܠܒܶܫ
                    
                
                
                    14
                    ܢܳܡܽܘܣܰܢ ܒܰܫܝܽܘܠ ܗܳܢܰܘ ܫܶܬܩܳܐ ܠܡܰܛܰܪ 
                    ܠܟܽܘܢ ܡ̈ܶܠܶܐ ܘܠܺܝ ܣܽܘܥܪܳܢܳܐ ܐܳܘ ܚܰܠܳܫ̈ܶܐ 
                    
                
                
                    15
                    ܣ̈ܳܒܶܐ ܐܰܝܟܰܢܳܐ ܫܒܺܝܩܺܝܢ ܐܶܢ ܩܳܛܽܘܦܳܐ ܐܰܢ̱ܬ 
                    ܗܰܘ ܕܟܽܠܳܟ ܡܶܢ ܚܰܝ̈ܰܝܗܽܘܢ ܗܽܘ ܡܢܰܚܶܡ ܟܽܠ
                    ܀܀܀
                
                
                    16
                    ܥܽܘܠܳܐ ܒܟܰܪܣܳܐ ܡܰܟܶܣ ܠܳܟ ܕܰܩܒܺܝܪ ܬܰܡܳܢ 
                    ܠܰܢ ܡܰܟܪܶܙ ܚܰܝܰܬ ܡܺܝ̈ܬܶܐ ܘܠܳܟ ܣܽܘܪܳܩܳܐ
                    
                
                
                    17
                    ܦܶܩܚܳܐ ܫܺܝܛܳܐ ܫܳܐܶܛ ܠܳܟ ܕܰܐܚܺܝܕ ܘܰܫܒܺܝܩ 
                    ܘܟܰܕ ܐܰܒܺܝܕܰܐ ܗ̱ܘ ܠܳܐ ܐܰܒܺܝܕ ܕܰܡܗܰܒܶܒ ܠܶܗ 
                    
                
                
                    18
                    ܦܰܪܽܘܓܳܐ ܩܒܺܝܪܳܐ ܩܥܳܐ ܡܶܢ ܓܰܘ ܒܰܪܬܳܐ 
                    ܕܡܶܨܛܰܪܶܝܢ ܩܰܒܪ̈ܶܐ ܒܩܳܠܳܐ ܘܩܳܐܶܡ ܦܰܓܪܳܐ 
                    
                
                
                    19
                    ܦܰܓܪܰܐ ܗ̱ܘ ܓܶܝܪ ܐܳܦ ܦܰܪܽܘܓܳܐ ܕܰܒܓܰܘ ܒܰܪܬܳܐ 
                    ܦܰܓܪܶܗ ܠܦܰܓܪܰܢ ܗܳܐ ܡܰܟܪܶܙ ܚܰܝܰܬ ܡܺܝ̈ܬܶܐ 
                    
                
                
                    20
                    ܨܶܝܕ ܩܰܡܨܳܐ ܡܰܘܦܶܐ ܘܫܰܠܶܡ ܫܰܪܒܳܟ ܡܰܘܬܳܐ 
                    ܕܡܶܢ ܥܰܦܪܰܐ ܗ̱ܘ ܢܳܦܶܩ ܡܰܠܶܦ ܚܰܝܰܬ ܡܺܝ̈ܬܶܐ 
                    
                
                
                    21
                    ܪܥܶܐ ܗܘܺܝܬ ܐܶܠܽܘ ܡܶܢ ܟܰܕܽܘ ܗ̱ܘܳܐ ܢܽܘܚܳܡܳܐ 
                    ܕܰܢܺܝܚ ܗ̱ܘܳܐ ܠܺܝ ܝܽܘܡ ܢܽܘܚܳܡܳܐ ܡܶܢ ܕܰܝ̈ܳܢܰܝܟܽܘܢ 
                    
                
                
                    22
                    ܪܰܚܡܳܢܰܐ ܗ̱ܘ ܒܰܪ ܥܶܠܳܝܳܐ ܐܳܦ ܛܳܒ ܐܳܦ ܟܐܶܝܢ 
                    ܘܠܰܘ ܥܰܛܳܠܳܐܺܝܬ ܬܳܒܰܥ ܠܺܝ ܡܰܘܬܶܗ ܕܳܐܕܳܡ 
                    
                
                
                    23
                    ܪܳܥܝܳܢܳܐ ܟܰܝ ܠܰܝܬ ܒܟܽܘܢ ܠܡܶܦܪܰܫ ܗܳܕܶܐ 
                    ܕܰܐܒܽܘܟܽܘܢ ܐܰܪܡܺܝ ܥܠܰܝܟܽܘܢ ܗܳܢܳܐ ܚܽܘܒܳܠܳܐ