Ephrem the Syrian. “Nisibis 66.” Digital Syriac Corpus. Last modified June 12, 2019. https://syriaccorpus.org/320.
    
        
            
                Nisibis LXVI
            
            
                
                    ܝܗ ܒܰܪ ܩܳܠܶܗ
                
                
                    1
                    ܀܀܀
                    ܫܠܰܘ ܩܰܠܺܝܠ ܐܳܘ ܡܳܝܽܘ̈ܬܳܐ ܐܶܡܰܪ ܡܰܘܬܳܐ 
                    ܘܕܰܡܰܘ ܒܺܝ ܕܰܟܡܳܐ ܫܳܠܶܐ ܐ̱ܢܳܐ ܒܓܰܘܳܗ̇ ܕܰܫܝܽܘܠ
                    
                    ܥܽܘܢܺܝܬܳܐ: ܠܳܟ ܫܽܘܒܚܳܐ ܥܺܝܪܳܐ ܕܰܢܚܶܬ ܒܳܬܰܪ ܕܰܡ̈ܟܶܐ 
                    ܘܝܰܗ̱ܒ ܩܳܠܳܐ ܥܰܠ ܩܰܝܣܳܐ ܘܰܐܥܺܝܪ ܐܶܢܽܘܢ 
                    
                
                
                    2
                    ܫܚܺܝܩܺܝܢ ܐܰܢ̱ܬܽܘܢ ܐܳܦ ܒܳܟܶܝܢ ܐܰܢ̱ܬܽܘܢ ܥܰܠ ܡܰܢ ܕܰܥܢܰܕ
                    ܐܰܝܟ ܗܰܘ ܕܶܐܬܳܐ ܕܢܶܛܚܰܢ ܠܺܝ ܪܳܚܝܳܐ ܒܰܫܝܽܘܠ
                    
                
                
                    3
                    ܫܶܠܝܰܐ ܗ̱ܘ ܪܰܒܳܐ ܝܳܗܶܒ ܐ̱ܢܳܐ ܠܰܐܝܠܶܝܢ ܕܰܠܐܶܝܢ 
                    ܠܰܘ ܐܰܟܘܳܬܟܽܘܢ ܠܳܐܶܐ ܐ̱ܢܳܐ ܐܰܘ ܡܰܠܶܐܐ ܐ̱ܢܳܐ 
                    
                
                
                    4
                    ܫܳܡܰܥ ܐ̱ܢܳܐ ܟܽܠ ܠܰܘ̈ܛܳܬܳܐ ܡܶܢ ܛܳܠܽܘ̈ܡܶܐ 
                    ܒ̈ܢܰܝ ܐܳܕܳܡ ܠܳܐܕܳܡ ܕܳܡܶܝܢ ܕܰܛܠܶܡ ܡܳܪܶܗ
                    
                
                
                    5
                    ܫܓܺܝܫܺܝܢ ܐܰܟܚܰܕ ܩ̈ܳܠܰܝܟܽܘܢ ܘܰܥܒ̈ܳܕܰܝܟܽܘܢ 
                    ܒܩܳܠܳܐ ܒܳܟܶܐ ܘܒܰܥܒܳܕܳܐ ܟܬܰܫ ܟܽܠܝܽܘܢ 
                    
                
                
                    6
                    ܫܶܡܥܶܬ ܒܶܟܝܳܐ ܘܣܶܒܪܶܬ ܠܺܝ ܕܠܳܐ ܐ̱ܢܳܫ ܥܳܡܶܠ 
                    ܚܙܺܝܬ ܬܶܥܫܳܐ ܘܣܶܒܪܰܬ ܠܺܝ ܕܠܳܐ ܐ̱ܢܳܫ ܡܳܐܶܬ
                    
                
                
                    7
                    ܫܰܚܩܶܗ ܕܐ̱ܢܳܫܳܐ ܡܣܰܒܰܪ ܠܺܝ ܕܠܰܘ ܡܳܝܽܘܬܰܐ ܗ̱ܘ 
                    ܒܶܟܝܶܗ ܪܰܒܳܐ ܡܣܰܒܰܪ ܠܺܝ ܕܰܡܚܳܪ ܠܰܝܬܰܘܗ̱ܝ 
                    
                
                
                    8
                    ܫܡܼܰܥܘ̱ ܘܶܐܗܘܶܐ ܠܟܽܘܢ ܡܳܠܽܘܟܳܐ ܐܶܢ ܨܳܒܶܝܢ ܐܰܢ̱ܬܽܘܢ 
                    ܬܪ̈ܰܝܗܽܘܢ ܓܶܝܪ ܗܳܠܶܝܢ ܛܰܥܢ̈ܶܐ ܛܳܒ ܡܰܪ̈ܺܝܪܺܝܢ 
                    
                
                
                    9
                    ܫܶܠܘ̱ ܩܰܠܺܝܠ ܡܶܢ ܗܰܘ ܥܰܡܠܳܐ ܐܳܦ ܡܶܢ ܒܶܟܝܳܐ 
                    ܥܡܰܠܘ̱ ܘܰܒܟܰܘ ܐܰܝܟ ܡܳܝ̈ܽܘܬܳܐ ܕܰܡܚܳܪ ܡܰܘܦܶܝܢ 
                    ܀܀܀
                
                
                    10
                    ܫܰܢܝܳܐܺܝܢ ܐܰܢ̱ܬܽܘܢ ܒܒܳܟܬܳܐ ܕܥܰܢܺܝ̈ܕܰܝܟܽܘܢ 
                    ܘܰܫܚܺܝܩܺܝܢ ܐܰܢ̱ܬܽܘܢ ܒܬܥܫܐ ܕܩ̈ܶܢܝܳܢܰܝܟܽܘܢ 
                    
                
                
                    11
                    ܫܰܦܺܝܪ ܡܺܝܬܺܝܢ ܝ̈ܰܠܽܘܕܶܐ ܘܰܒܪܽܝܟ ܠܗܽܘܢ
                    ܕܡܰܓܗܺܝܢ ܡܶܢܶܗ ܕܕܽܐܘܢܳܐ ܕܪܳܡܶܝܢ ܐܰܢ̱ܬܽܘܢ ܒܶܗ 
                    
                
                
                    12
                    ܫܽܘܒܩܽܘܢܳܢܝ̱ ܐܶܙܰܠ ܠܰܫܝܽܘܠ ܘܶܐܡܰܪ ܬܰܡܳܢ 
                    ܕܛܽܘܒܰܝܟܽܘܢ ܡܺܝ̈ܬܶܐ ܫ̈ܠܰܝܳܐ ܟܡܳܐ ܢܺܝܚܺܝܢ ܐܰܢ̱ܬܽܘܢ
                    
                
                
                    13
                    ܫܡܰܥܘ̱ ܣܳܟܳܐ ܡܶܢ ܡ̈ܶܠܰܝܟܽܘܢ ܕܶܐܢ ܢܽܘܚܳܡܰܐ ܗ̱ܘ
                    ܠܳܐ ܬܶܒܟܽܘܢ ܐܳܦ ܠܳܐ ܬܠܰܐܽܘܢ ܐܰܝܟ ܬܰܘ̈ܬܳܒܶܐ 
                    
                
                
                    14
                    ܫܚܺܝܩܺܝܢ ܐܰܢ̱ܬܽܘܢ ܐܰܝܟ ܐ̱ܢܳܫ ܕܰܬܢܳܢ ܚܳܝܶܐ ܠܥܳܠܰܡ
                    ܘܒܳܟܶܝܢ ܐܰܢ̱ܬܽܘܢ ܐܰܝܟ ܐ̱ܢܳܫ ܕܳܐܦ ܠܳܐ ܬܽܘܒ ܡܶܬܢܰܚܰܡ
                    
                
                
                    15
                    ܫܡܰܥܘ̱ ܡ̈ܶܠܰܝ ܐܶܢ ܐܺܝܬ ܒܟܽܘܢ ܐܰܬܪܳܐ ܠܡܶܫܡܰܥ 
                    ܘܰܙܘ̈ܳܕܶܐ ܛܰܝܶܒܘ̱ ܕܶܐܡܰܬܝ̱ ܕܶܐܩܪܶܐ ܬܶܥܢܽܘܢ 
                    
                
                
                    16
                    ܫܳܡܰܥ ܐ̱ܢܳܐ ܓܶܝܪ ܐܳܦ ܐܶܢܳܐ ܠܰܕܩܳܪܶܐ ܠܺܝ
                    ܘܡܰܦܢܳܐ ܐ̱ܢܳܐ ܦܰܓܪ̈ܰܝܟܽܘܢ ܥܰܡ ܓ̈ܰܙܰܝܟܽܘܢ 
                    
                
                
                    17
                    ܫܰܝܢܳܐ ܢܶܗܘܶܐ ܒܰܝܢܳܬܰܢ ܥܰܕ ܗܰܘ ܝܰܘܡܳܐ 
                    ܘܡܳܐ ܕܢܳܦܩܺܝܢ ܐܰܢ̱ܬܽܘܢ ܐܶܩܥܶܐ ܘܐܺܡܰܪ ܙܶܠܘ̱ ܒܰܫܠܳܡܳܐ 
                    
                
                
                    18
                    ܬܰܘ ܐܰܢ̱ܬܽܘܢ ܘܶܐܢܳܐ ܕܗܳܫܳܐ ܢܶܬܶܠ ܫܽܘܒܚܳܐ 
                    ܠܗܰܘ ܕܰܡܡܺܝܬ ܐܳܦ ܗܽܘ ܡܰܚܶܐ ܐܰܝܟ ܕܰܢܥܰܕܰܪ
                    
                
                
                    19
                    ܀܀܀
                    ܬܰܘܕܺܝܬ ܟܽܠܰܢ ܬܶܗܘܶܐ ܡܳܪܝ̱ ܕܶܒܚܰܬ ܚ̈ܰܝܶܐ 
                    ܕܰܒܕܶܒܚܰܬ ܦܰܓܪܳܟ ܐܰܚܝܰܬ ܚ̈ܰܝܶܐ ܘܡܺܝ̈ܬܶܐ 
                    
                
                
                    20
                    ܬܰܘܕܺܝ ܠܡܰܢ ܕܰܠܒܶܫ ܦܰܓܪܰܢ ܘܡܺܝܬ ܘܶܐܬܢܰܚܰܡ
                    ܡܺܝܬ ܒܰܢ ܗܽܘ ܘܚܰܝܰܝܢ ܚܢܰܢ ܒܶܗ ܒܪܺܝܟ ܫܳܠܽܘܚܶܗ