Ephrem the Syrian. “Nisibis 67.” Digital Syriac Corpus. Last modified June 12, 2019. https://syriaccorpus.org/321.
    
        
            
                Nisibis LXVII
            
            
                
                    ܝܘ ܒܰܪ ܩܳܠܶܗ
                
                
                    1
                    ܬܰܘ ܢܶܫܡܰܥ ܟܰܕ ܡܰܟܶܣ ܠܶܗ ܡܰܘܬܳܐ ܠܥܰܡܳܐ 
                    ܕܡܶܢ ܡܰܘܬܳܐ ܩܰܫܝܳܐ ܗ̱ܝ ܚܰܪܒܶܗ ܕܰܠܘܳܬ ܟܺܐܢ̈ܶܐ 
                    
                    ܥܽܘܢܺܝܬܳܐ: ܠܳܟ ܫܽܘܒܚܳܐ ܕܰܒܝܰܕ ܕܶܒܚܶܗ ܦܰܪܥܶܗ ܠܒܶܙܚܰܢ
                    ܘܡܰܘܬܶܗ ܗܳܘܶܐ ܚܠܳܦ ܟܽܠ ܡ̈ܰܘܬܺܝܢ ܕܰܢܢܰܚܶܡ ܟܽܘܠ
                    
                
                
                    2
                    ܠܰܘ ܠܰܡ ܡܰܘܬܳܐ ܙܰܩܦܶܗ ܠܝܶܫܽܘܥ ܐܶܠܳܐ ܥܰܡܳܐ 
                    ܟܡܳܐ ܗܳܟܺܝܠ ܣܳܢܶܐ ܥܰܡܳܐ ܕܳܐܦ ܡܶܢܝ̱ ܣܳܢܰܐ ܗ̱ܘ 
                    
                
                
                    3
                    ܒܓܽܘܒܳܐ ܫܕܰܐܘܗ̱ܝ ܠܶܐܪܰܡܝܳܐ ܗܰܘ ܕܣܰܝܢܳܐ 
                    ܐܶܢܳܐ ܕܶܝܢ ܒܰܫܝܽܘܠ ܐܺܝܩܳܪܳܐ ܠܓܰܪ̈ܡܰܘܗ̱ܝ ܦܶܠܓܰܬ 
                    
                
                
                    4
                    ܠܰܢܒܽܘܬ ܒܟܺܐܦ̈ܶܐ ܦܥܰܘܗ̱ܝ ܐܰܝܟ ܕܰܠܟܰܠܒܳܐ 
                    ܟܡܳܐ ܛܳܒ ܐܶܢܳܐ ܕܳܐܦ ܠܳܐ ܠܟܰܠܒܳܐ ܦܥܰܬ ܡܬܽܘܡ
                    
                
                
                    5
                    ܠܰܒ̈ܢܰܝܗܶܝܢ ܒܟܰܦܢܳܐ ܐܶܟܰܠ ܗܘܺܝ ܥܶܒܪ̈ܳܝܳܬܳܐ 
                    ܫܝܽܘܠ ܛܳܒܳܐ ܕܦܶܠܛܰܬ ܝܶܗܒܰܬ ܕܠܳܐ ܥܽܘܣܩܳܐ
                    
                
                
                    6
                    ܠܰܐܪܡܰܠܬܳܐ ܒܪܳܗ̇ ܝܶܗ̇ܒܰܬ ܠܳܗ̇ ܒܝܰܕ ܐܶܠܺܝܳܐ 
                    ܠܫܺܝܠܽܘܡܺܝܬܳܐ ܚܰܒܺܝܒܳܗ̇ ܒܝܰܕ ܐܶܠܺܝܫܰܥ 
                    
                
                
                    7
                    ܥܶܒܪ̈ܳܝܳܬܳܐ ܝ̈ܰܥܢܳܬܳܐ ܐܶܟܰܠ ܠܰܒ̈ܢܰܝܗܶܝܢ 
                    ܫܝܽܘܠ ܝܶܗܒܰܬ ܡܺܝ̈ܬܶܐ ܘܝܶܠܦܰܬ ܨܰܘܡܳܐ ܢܰܟܦܳܐ 
                    
                
                
                    8
                    ܠܳܐ ܗ̱ܘܳܐ ܫܝܽܘܠ ܐܺܝܬܶܝܗ̇ ܫܝܽܘܠ ܐܶܠܳܐ ܕܡܰܘܬܳܐ 
                    ܐܺܝܙܒܶܠ ܗܳܝ ܫܝܽܘܠ ܕܰܫܪܳܪܳܐ ܕܟܺܐܢ̈ܶܐ ܒܶܠܥܰܬ
                    
                
                
                    9
                    ܠܰܒ̈ܢܰܝ ܢܒܺܝ̈ܶܐ ܘܰܢܒܺܝ̈ܶܐ ܚܶܪܒܰܬ ܘܰܫܕܳܬ 
                    ܠܰܫܡܰܝܳܐ ܥܪܰܩ ܐܶܠܺܝܳܐ ܡܶܢ ܦܰܩܪܽܘܬܶܗ̇
                    
                
                
                    10
                    ܟܡܳܐ ܡܰܘ̈ܬܶܝܢ ܚܠܳܦ ܚܰܕ ܡܰܘܬܳܐ ܐܺܝܬ ܗ̱ܘܳܐ ܒܥܰܡܳܐ 
                    ܘܰܟܡܳܐ ܫܝܽܘܠ ܒܚܶܠܦܳܐ ܕܰܚܕܳܐ ܐܺܝܬ ܗܘܰܝ ܬܰܡܳܢ 
                    
                
                
                    11
                    ܫܳܡܪܺܝܢ ܘܺܐܝܙܪܳܥܶܝܠ ܒܰܪܬܳܗ̇ ܒܶܝܬ ܐܺܝܣܪܳܝܶܠ
                    ܘܨܶܗܝܽܘܢ ܘܐܽܘܪܫܠܶܡ ܚܬܳܗ̇ ܒܶܝܬ ܝܺܗܽܘܕܳܐ 
                    
                
                
                    12
                    ܠܰܢܒܺܝ̈ܶܐ ܘܟܺܐܢ̈ܶܐ ܕܒܺܝܗܽܘܕ ܘܒܶܐܝܣܪܳܝܶܠ
                    ܒܗܳܠܶܝܢ ܬܰܪ̈ܬܶܝܢ ܗ̈ܘܳܬܳܐ ܚܢܰܩܘ̱ ܐܶܢܽܘܢ 
                    
                
                
                    13
                    ܠܡܳܢܳܐ ܗܳܟܺܝܠ ܣܰܢܝܳܐ ܫܝܽܘܠ ܗܺܝ ܒܰܠܚܽܘܕܶܝܗ̇
                    ܟܰܕ ܐܺܝܬ ܗܽܘ ܣܰܓܺܝ̈ܳܐܬܳܐ ܕܣܳܢܶܝܢ ܡܶܢܳܗ̇
                    
                
                
                    14
                    ܡ̈ܝܬܝܗܘܢ ܕܺܝܗ̈ܽܘܕܳܝܶܐ ܠܺܝ ܛܳܒ ܣܳܢܶܝܢ 
                    ܢܕܺܝ̈ܕܺܝܢ ܠܺܝ ܐܳܦ ܓܰܪ̈ܡܰܝܗܽܘܢ ܒܓܰܘܳܗ̇ ܕܰܫܝܽܘܠ
                    
                
                
                    15
                    ܐܶܠܽܘ ܟܰܝ ܐܺܝܬ ܗ̱ܘܳܐ ܦܽܘܪܣܳܐ ܕܰܐܓܺܝܠ ܐܶܢܽܘܢ 
                    ܠܓܰܪ̈ܡܰܝܗܽܘܢ ܡܶܢܳܗ̇ ܕܰܫܝܽܘܠ ܡܰܣܪܶܝܢ ܠܳܗ̇ ܓܶܝܪ
                    
                
                
                    16
                    ܀܀܀
                    ܒܪܽܘܚܳܐ ܕܩܽܘܕܫܳܐ ܬܳܡܰܗ ܐ̱ܢܳܐ ܕܰܟܡܳܐ ܥܶܡܪܰܬ
                    ܒܓܰܘ ܥܰܡܳܐ ܕܰܙܦܰܪ ܪܺܝܚܶܗ ܐܰܝܟ ܕܽܘܒܳܪܶܗ
                    
                
                
                    17
                    ܒܨ̈ܰܠܶܐ ܘܬܽܘܡܰܐ ܟܳܪ̈ܽܘܙܶܐ ܕܥܰܒ̈ܕܰܝܗܽܘܢ 
                    ܐܰܝܟ ܡܶܐܟܽܘܠܬܶܗ ܬܰܪܥܺܝܬܶܗ ܕܥܰܡܳܐ ܨܰܚܢܳܐ 
                    
                
                
                    18
                    ܒܒܳܥܽܘܬܳܐ ܕܟܽܠ ܡܰܢ ܕܰܩܥܶܕ ܘܰܣܓܶܕ ܠܰܐܒܽܘܟ 
                    ܐܶܬܪܰܚܰܡ ܥܰܠ ܣܳܓܽܘܕܳܟ ܕܰܛܠܶܡ ܚܽܘܒܳܟ 
                    
                
                
                    19
                    ܡܶܢ ܥܶܒܪ̈ܳܝܶܐ ܘܳܐܪ̈ܳܡܳܝܶܐ ܐܳܦ ܡܶܢ ܥܺܝܪ̈ܶܐ 
                    ܠܳܟ ܫܽܘܒܚܳܐ ܘܒܺܐܝܕܳܟ ܠܰܐܒܽܘܟ ܐܳܦ ܬܶܫܒܽܘܚܬܳܐ 
                    
                
                
                    20
                    ܚܠܳܦ ܕܰܗܘܺܝܬ ܦܽܘܡܳܐ ܠܡܰܘܬܳܐ ܕܰܕܠܳܐ ܦܽܘܡܰܐ ܗ̱ܘ 
                    ܒܪܳܐ ܕܟܽܠܶܗ ܦܽܘܡ̈ܶܐ ܗܽܘ ܢܶܐܚܽܘܕ ܐܰܒܽܘܬܝ̱ ܠܰܐܒܽܘܗ̱ܝ