Ephrem the Syrian. “Nisibis 68.” Digital Syriac Corpus. Last modified June 12, 2019. https://syriaccorpus.org/322.
    
        
            
                Nisibis LXVIII
            
            
                
                    ܝܙ ܒܰܪ ܩܳܠܶܗ
                
                
                    1
                    ܐܳܘ ܡܰܘܬܳܐ ܠܳܐ ܬܶܫܬܥܰܠܶܐ ܥܰܠ ܙܰܕܺܝ̈ܩܶܐ 
                    ܒ̈ܢܰܝ ܡܳܪܳܟ ܕܰܒܦܽܘܩܕܳܢܶܗ ܐܳܬܶܝܢ ܨܶܐܕܰܝܟ
                    
                    ܥܽܘܢܺܝܬܳܐ: ܠܳܟ ܫܽܘܒܚܳܐ ܕܰܒܦܽܘܩܕܳܢܳܟ ܐܰܡܠܶܟ ܡܰܘܬܳܐ 
                    ܘܰܒܢܽܘܚܳܡܳܟ ܡܶܫܬܦܶܠ ܐܰܝܟ ܡܶܣܟܺܢܳܐ 
                    
                
                
                    2
                    ܒܗܳܕܶܐ ܝܰܬܺܝܪ ܝܺܪܶܒ ܐ̱ܢܳܐ ܐܰܝܟ ܡܶܠܬܰܟܽܘܢ 
                    ܕܟܰܕ ܥܳܒܕܶܐ ܐ̱ܢܳܐ ܕܳܐܶܫ ܐ̱ܢܳܐ ܠܰܒ̈ܢܰܝ ܚܺܐܪ̈ܶܐ 
                    
                
                
                    3
                    ܓܒܳܐ ܗ̱ܘܳܐ ܐܳܕܳܡ ܘܰܡܫܰܠܶܛ ܘܰܬܚܶܝܬ ܢܺܝܪܶܗ 
                    ܐܰܢ̱ܬ ܡܰܘܬܳܐ ܘܒܺܝܫܳܐ ܟܶܢܬܳܟ ܥܰܒܼ̈ܕܶܐ ܗܰܘܝܬܽܘܢ 
                    ܀܀܀
                
                
                    4
                    ܕܫܽܘܒܗܳܪܰܢ ܗܺܝ ܕܗܳܐ ܥܰܒ̈ܕܶܐ ܗ̱ܘܰܘ ܡܳܪ̈ܰܝܳܐ 
                    ܡܰܘܬܳܐ ܘܣܳܛܳܢܳܐ ܟܢܳܬܶܗ ܕܫܰܘܗ̱ܝ ܠܳܐܕܳܡ 
                    
                
                
                    5
                    ܗܳܐ ܫܰܦܠܳܟ ܐܳܦ ܕܟܶܢܬܳܟ ܥܰܒ̈ܕܶܐ ܟܦܺܝܪ̈ܶܐ 
                    ܕܰܚܢܽܘܟ ܕܳܫ ܗ̱ܘܳܐ ܠܰܬܪ̈ܰܝܟܽܘܢ ܘܰܦܪܰܚ ܘܰܐܡܠܶܟ 
                    
                
                
                    6
                    ܘܶܐܢ ܗܽܘ ܕܰܚܢܽܘܟ ܐܰܟܳܪܝ̱ ܠܰܢ ܡܶܬܒܰܝܰܐ ܐ̱ܢܳܐ 
                    ܕܥܰܠ ܥܰܦܪܶܗ ܕܢܽܘܚ ܒܰܫܝܽܘܠ ܗܳܐ ܕܳܐܶܫ ܐ̱ܢܳܐ 
                    
                
                
                    7
                    ܙܽܘܥ ܡܰܘܬܳܐ ܡܶܢ ܒܰܪܢܳܫܳܐ ܕܳܐܦ ܟܰܕ ܥܰܒܕܰܐ ܗ̱ܘ 
                    ܢܺܝܪܳܐ ܕܡܳܪܽܘܬܶܗ ܡܰܡܠܶܟ ܥܰܠ ܒܶܪ̈ܝܳܬܳܐ 
                    
                
                
                    8
                    ܚܳܕܶܐ ܐ̱ܢܳܐ ܕܠܰܘ ܠܰܒܨܺܝܪ̈ܶܐ ܡܳܕܶܝܢ ܙܟܺܝܬ 
                    ܟܡܳܐ ܕܢܺܐܪܰܒ ܓܶܝܪ ܚܰܝܳܒܳܐ ܪܰܒ ܗܽܘ ܕܰܙܟܳܝܗ̱ܝ
                    
                
                
                    9
                    ܛܳܒ ܢܨܰܪ ܩܳܠܳܟ ܡܰܘܬܳܐ ܥܰܠ ܙܰܕܺܝ̈ܩܶܐ 
                    ܚܢܽܘܟ ܓܶܝܪ ܘܶܐܠܺܝܳܐ ܬܰܒܰܪܘ̱ ܙܰܘܓܳܐ ܕܓܶܦܰܝ̈ܟ 
                    
                
                
                    10
                    ܝܳܕܰܥ ܐ̱ܢܳܐ ܕܰܬܩܽܘܠ ܐܶܒ̈ܠܰܝ ܥܰܡ ܒܽܘ̈ܝܳܐܝ
                    ܚܠܳܦ ܬܪ̈ܶܝܢ ܗܳܐ ܣܰܓ̈ܺܝܐܶܐ ܕܶܐܬܰܘ ܘܳܐܬܶܝܢ 
                    
                
                
                    11
                    ܟܽܠ ܕܶܐܬܳܐ ܘܳܐܬܶܐ ܨܶܐܕܰܝܟ ܐܰܝܟ ܬܰܘܬܒܳܐ 
                    ܫܪܳܐ ܘܡܰܫܩܰܠ ܡܶܢ ܕܰܝܪܳܟ ܐܰܝܟ ܠܳܥܳܙܳܪ
                    
                
                
                    12
                    ܠܳܐ ܬܰܒܪܢܝ ܗܳܢܳܐ ܩܳܠܳܐ ܐܰܝܟ ܡܳܐ ܕܥܰܨܒܳܢܝ̱
                    ܕܠܳܥܳܙܳܪ ܕܡܶܪܰܕ ܥܠܰܝ ܬܽܘܒ ܫܰܥܒܳܕܬܶܗ
                    
                
                
                    13
                    ܀܀܀
                    ܡܰܘܬܳܐ ܐܶܫܬܐܶܠ ܘܰܕܪܽܘܫ ܕܳܡ ܐܳܠܨܰܬ ܗܘܳܬ 
                    ܕܢܶܬܢܰܚܰܡ ܐܶܢ ܠܰܘ ܐ̱ܪܳܙܳܐ ܨܳܪ ܢܽܘܚܳܡܶܗ
                    
                
                
                    14
                    ܢܰܗܺܝܪܺܝܢ ܐܰܢ̱ܬܽܘܢ ܠܰܕܪܳܫܳܐ ܐܰܝܟ ܒ̈ܰܛܺܝܠܶܐ 
                    ܐܶܢܳܐ ܓܶܝܪ ܒܰܥܒܳܕܝ̱ ܥܳܡܶܠ ܐ̱ܢܳܐ ܕܶܐܦܪܽܘܫ ܘܰܐܕܒܰܪ
                    
                
                
                    15
                    ܣܰܓܺܝ ܠܡܶܕܪܰܫ ܐܶܬܛܰܝܒܰܬ ܡܰܢܽܘ ܙܶܓܪܳܟ 
                    ܫܪܳܪܶܗ ܕܢܽܘܚܳܡܰܢ ܐܳܠܨܳܟ ܒܗ̈ܶܦܟܳܬܶܗ
                    
                
                
                    16
                    ܥܒܰܕܬܽܘܢܳܢܝ̱ ܠܟܽܘܢ ܣܰܢܝܳܐ ܟܰܕ ܠܳܐ ܣܳܢܶܐ ܐ̱ܢܳܐ 
                    ܐܶܢܳܐ ܐ̱ܢܳܐ ܕܰܡܢܺܝܚ ܐ̱ܢܳܐ ܣ̈ܒܺܝܟܽܘܢ ܘܰܐ̈ܠܺܝܨܰܝܟܽܘܢ
                    
                
                
                    17
                    ܥܒܰܕܬܽܘܢܳܢܝ̱ ܐܰܝܟ ܣܳܪܽܘܚܳܐ ܐܰܘ ܡܳܝܽܘ̈ܬܳܐ 
                    ܐܳܕܳܡ ܩܰܛܠܟܽܘܢ ܘܶܐ̱ܢܳܐ ܡܶܨܛܚܳܐ ܐ̱ܢܳܐ 
                    
                
                
                    18
                    ܦܫܺܝܩܳܐܺܝܬ ܐܰܦܪܣܰܝܟܽܘܢ ܥܰܒܕܳܐ ܗܘܺܝܬ ܓܶܝܪ
                    ܘܰܐܢ̱ܬܽܘܢ ܗܽܘ ܒܰܚܛܳܗ̈ܰܝܟܽܘܢ ܐܰܡܶܠܟܬܽܘܢܳܢܝ̱
                    
                
                
                    19
                    ܨܳܒܶܝܢ ܐܳܕܳܡ ܐܰܥܺܝܪܳܢܝ̱ ܕܫܳܠܶܐ ܗܘܺܝܬ ܓܶܝܪ
                    ܡܺܝܬܳܐ ܗܘܺܝܬ ܘܰܐܚܰܝܬܽܘܢܳܢܝ̱ ܕܰܬܡܽܘܬܽܘܢ ܒܺܝ
                    
                
                
                    20
                    ܩܰܒܶܠ ܐ̱ܢܳܐ ܡܶܢ ܟܰܕܳܒ̈ܶܐ ܕܰܩܛܰܠܘ̱ ܘܰܟܦܰܪܘ̱ 
                    ܐܳܕܳܡ ܓܶܝܪ ܩܛܰܠ ܢܰܦܫܶܗ ܘܒܺܝ ܡܶܬܥܕܰܠ 
                    
                
                
                    21
                    ܪܺܝܫ ܗܳܪܬܳܐ ܚܶܘܝܰܐ ܗ̱ܘ ܠܺܝܛܳܐ ܕܫܰܦܺܝܪ ܚܓܺܝܪ
                    ܕܪܳܫܶܦ ܥܰܠ ܣܳܡ ܡܨܽܘܬܳܐ ܒܶܝܬ ܠܺܝ ܘܰܠܟܽܘܢ 
                    
                
                
                    22
                    ܫܒܺܝܩ ܣܳܛܳܢܳܐ ܘܰܥܠܰܝ ܗܽܘ ܡܶܬܓܰܪܶܝܢ ܐܰܢ̱ܬܽܘܢ 
                    ܙܶܠܘ̱ ܐܶܬܟܰܬܰܫܘ̱ ܥܰܡ ܒܺܝܫܳܐ ܕܗܽܘ ܚܰܝܶܒܟܽܘܢ 
                    
                
                
                    23
                    ܫܰܘܬܶܦܝ̱ ܗܽܘ ܘܠܳܐ ܟܳܦܰܪ ܐ̱ܢܳܐ ܘܕܰܣܢܰܐ ܗ̱ܘ ܣܰܓܺܝ 
                    ܡܶܢ ܐܳܠܨܳܬ ܕܶܐܨܛܚܳܐ ܒܶܗ ܟܦܺܝܪ ܒܶܗ ܡܶܟܺܝܠ
                    
                
                
                    24
                    ܫܡܰܥܘ̱ ܡ̈ܶܠܰܝ ܐܳܘ ܡܳܝ̈ܽܘܬܳܐ ܘܰܐܒܰܝܰܐܟܽܘܢ 
                    ܐܶܢܳܐ ܐܶܥܺܝܩܰܬ ܘܶܐܢܳܐ ܡܰܘܕܶܐ ܒܚܰܝܰܬ ܡܺܝ̈ܬܶܐ 
                    
                
                
                    25
                    ܫܰܪܺܝ ܓܶܝܪ ܢܳܛܰܦ ܒܶܐܕ̈ܢܰܝ ܩܳܠ ܛܽܘܝܳܒܳܐ 
                    ܕܫܺܝܦܽܘܪܳܐ ܕܣܳܥܰܪ ܢܰܦܫܶܗ ܠܡܰܝܳܒܒܽܘ 
                    
                
                
                    26
                    ܫܡܰܥܘ̱ ܡ̈ܶܠܰܝ ܘܰܐܣܶܓܘ̱ ܡܶܫܚܳܐ ܠܰܠܡܦܺܐܕ̈ܰܝܟܽܘܢ 
                    ܕܰܟܠܺܝܬܳܐ ܓܶܝܪ ܡܶܢ ܨܶܐܕܝ̱ ܠܳܐ ܐܺܝܬ ܠܟܽܘܢ 
                    
                
                
                    27
                    ܬܶܗܘܽܘܢ ܝܳܕܥܺܝܢ ܕܳܐܦ ܟܰܕ ܛܳܒ ܗܳܠܶܝܢ ܐܶܡܪܰܬ 
                    ܪܚܺܝܡܺܝܢ ܐܶܢܽܘܢ ܨܰܘ̈ܬܰܝܟܽܘܢ ܠܨܳܕܶܝܗ̇ ܕܰܫܝܽܘܠ
                    
                
                
                    28
                    ܬܩܺܝܠ ܗܽܘ ܠܺܝ ܓܶܝܪ ܒܰܪ ܐ̱ܢܳܫܳܐ ܘܪܰܒ ܗܽܘ ܫܰܝܢܶܗ
                    ܕܪܰܚܫܳܐ ܘܢܽܘ̈ܢܶܐ ܘܦܳܪܰܚܬܳܐ ܠܘܰܥܕܶܗ ܐܳܬܶܝܢ 
                    
                
                
                    29
                    ܬܶܡܗܳܐ ܕܶܝܢ ܕܳܐܦ ܥܰܠ ܥܺܝܪ̈ܶܐ ܚܰܒܺܝܒ ܨܰܘܬܶܗ 
                    ܐܳܦ ܗܽܘ ܒܺܝܫܼܳܐ ܠܓܺܗܰܢܳܐ ܠܘܺܝܬܶܗ ܒܳܥܶܐ 
                    
                
                
                    30
                    ܬܶܗܘܶܐ ܠܟܽܘܢ ܚܰܝܰܬ ܡܺܝ̈ܬܶܐ ܐܳܘ ܡܳܝ̈ܽܘܬܳܐ 
                    ܘܶܐܢܳܐ ܕܓܶܙܝܰܬ ܐܶܬܓܰܙܳܐ ܒܓܰܘܳܗ̇ ܕܰܫܝܽܘܠ
                    
                
                
                    31
                    ܬܰܘܕܺܝܬܳܐ ܬܶܣܰܩ ܡܶܢ ܟܽܠ ܠܳܟ ܡܰܚܶܐ ܟܽܠ 
                    ܕܡܶܢ ܟܽܠ ܕܽܘܟܳܐ ܡܟܰܢܶܫ ܐܰܢ̱ܬ ܥܰܦܪܶܗ ܕܳܐܕܳܡ
                    ܀܀܀