Ephrem the Syrian. “Nisibis 73.” Digital Syriac Corpus. Last modified June 12, 2019. https://syriaccorpus.org/327. Nisibis LXIII ܓ ܡܶܢܶܗ ܒܰܪ ܩܳܠܶܗ 1 ܗܳܐ ܬܚܶܝܬ ܐܰܪܥܳܐ ܚܰܒ̈ܺܝܒܰܝ ܫ̈ܠܰܕܶܐ ܘܦܰܓܪ̈ܶܐ ܕܰܩܒܺܝܪ̈ܶܐ ܘܗܳܐ ܒܰܫܡܰܝܳܐ ܙܰܕܺܝܩ̈ܶܐ ܗܳܐ ܛܥܺܝܢܳܢ ܓܶܝܪ ܬܰܪ̈ܬܰܝܗܶܝܢ ܓܽܘ̈ܥܠܳܢܶܐ ܕܰܒ̈ܢܰܝ ܐ̱ܢܳܫܳܐ ܐܰܪܥܳܐ ܘܰܫܡܰܝܳܐ ܓܳܥܶܝܢ ܐܶܢ ܡܶܬܛܰܠܡܺܝܢ ܙܰܕܺܝܩ̈ܶܐ ܥܽܘܢܺܝܬܳܐ: ܫܽܘܒܚܳܐ ܠܰܒܪܳܐ ܕܰܒܩܳܠ ܩܰܪܢܶܗ ܡܰܨܪܳܐ ܩܰܒܪ̈ܶܐ ܘܰܡܩܺܝܡ ܡܺܝ̈ܬܶܐ 2 ܘܶܐܢܗܽܘ ܕܬܰܓܳܪܳܐ ܟܺܐܢܳܐ ܒܶܫܛܳܪܳܐ ܝܺܙܶܦ ܟܶܣܦܳܐ ܒܫܶܠܝܳܐ ܪܰܚܫܳܐ ܪܰܒܰܝܬܶܗ ܘܶܐܢ ܡܺܝܬ ܡܳܪܶܗ ܕܰܫܛܳܪܳܐ ܚܰܝܳܐ ܗ̱ܝ ܒܳܬܪܶܗ ܪܰܒܰܝܬܳܐ ܡܰܢܽܘ ܢܣܰܝܶܟ ܪܰܒܰܝܬܶܗ ܕܩܽܘܪܒܳܢܳܐ ܕܩܰܪܶܒ ܗܳܒܶܝܠ 3 ܡܰܢ ܠܳܐ ܢܰܘܙܶܦ ܠܰܐܠܳܗܳܐ ܕܚܰܝܳܐ ܗ̱ܝ ܒܳܬܰܪ ܥܽܘܢܕܳܢܶܗ ܪܰܒܰܝܬܳܐ ܕܰܨ̈ܠܰܘܳܬܶܗ ܫܛܳܪܳܐ ܡܰܘܠܶܕ ܪܰܒܰܝܬܳܐ ܘܰܐܪܥܳܐ ܟܬܳܐ ܘܰܟܬܟܬܐ ܘܓܰܙܶܗ ܕܰܐܠܳܗܳܐ ܡܰܘܪܶܒ ܙܶܕܩ̈ܳܬܰܢ ܘܰܨ̈ܠܰܘܳܬܰܢ 4 ܚܕܳܐ ܗ̱ܝ ܐܽܘܪܚܳܐ ܠܟܽܠܰܢ ܐܰܚ̈ܰܝ ܡܶܢ ܝܰܠܕܳܐ ܘܰܠܘܳܬ ܡܰܘܬܳܐ ܘܡܶܢ ܡܰܘܬܳܐ ܨܶܝܕ ܢܽܘܚܳܡܳܐ ܘܡܶܢ ܬܰܡܳܢ ܬܰܪ̈ܬܶܝܢ ܐܽܘܪ̈ܚܳܢ ܚܕܳܐ ܠܢܽܘܪܳܐ ܘܰܚܕܳܐ ܠܰܥܕܶܢ ܢܨܰܠܶܐ ܟܽܠ ܐ̱ܢܳܫ ܥܰܠ ܡܺܝܬܶܗ ܕܠܽܐܘܪܚܳܐ ܕܰܥܕܶܢ ܢܰܫܘܶܐ 5 ܠܗܶܢܕ̈ܘܳܝܶܐ ܘܠܰܐܬܽܘܪ̈ܳܝܶܐ ܫ̈ܠܰܕܰܝܗܽܘܢ ܒܕܰܒܪܳܐ ܐܰܪܡܺܝ ܘܰܐܚܺܝ ܓܰܪ̈ܡܶܐ ܒܰܦܩܰܥܬܳܐ ܠܰܘ ܡܶܢ ܚܰܝܶܠ ܐ̱ܚܪܺܝܢ ܐܰܚ̈ܰܝ ܒܰܩܛܺܝܪܳܐ ܡܶܬܕܰܒܪܺܝܢ ܚܢܰܢ ܨܶܒܝܳܢܰܐ ܗ̱ܘ ܕܥܰܠ ܟܽܠ ܫܰܠܺܝܛ ܡܰܘܠܶܕ ܘܰܡܡܺܝܬ ܘܰܡܢܰܚܶܡ 6 ܣܒܰܪܬܳܐ ܛܳܒܬܳܐ ܠܰܛ̈ܠܳܝܶܐ ܕܦܶܪܥܽܘܢ ܚܰܢܶܩ ܝ̈ܰܠܽܘܕܶܐ ܦܽܘܪܩܳܢܶܗ ܕܥܰܡܳܐ ܚܰܢܩܶܗ ܗܳܟܰܢܳܐ ܡܳܐܶܬ ܡܰܘܬܳܐ ܒܢܽܘܚܳܡܳܐ ܕܰܠܟܽܠ ܡܚܰܕܶܐ ܘܰܒܛܶܠ ܡܰܘܬܳܐ ܡܶܢ ܫܰܒܪ̈ܶܐ ܐܰܝܟ ܦܶܪܥܽܘܢ ܡܶܢ ܝ̈ܰܠܽܘܕܶܐ 7 ܐܰܝܟܰܢ ܛܳܠܶܡ ܝܰܠܽܘ̈ܕܶܐ ܕܰܐܝܟ ܩܽܘܦܳܝܳܐ ܕܩܰܡܨܳܐ ܡܺܝ̈ܬܶܐ ܥ̈ܰܘܳܠܶܐ ܒܢܰܗܪܳܐ ܩܳܦܶܝܢ ܗ̱ܘܰܘ ܘܰܐܒ̈ܳܗܰܝܗܽܘܢ ܟܰܕ ܚܳܙܶܝܢ ܒܳܟܶܝܢ ܘܓܳܥܶܝܢ ܠܰܫܡܰܝܳܐ ܒܪܺܝܟ ܗ̱ܽܘ ܕܚܰܘܺܝ ܠܗܽܘܢ ܒܰܕܡܳܐ ܢܽܘܚܳܡܳܐ ܕܝܰܠܽܘ̈ܕܰܝܗܽܘܢ 8 ܚܰܕ ܡܶܢ ܥܺܝܪ̈ܶܐ ܐܶܬܦܰܩܰܕ ܘܰܪܫܶܡ ܪܽܘܫܡܳܐ ܕܦܽܘܪܩܳܢܳܐ ܥܰܠ ܒܶܝܬ ܥܰܝ̈ܢܶܐ ܕܙܰܕܺܝ̈ܩܶܐ ܓܙܽܘܪܬܳܐ ܒܶܗܬܰܬ ܕܰܚܙܳܬܶܗ ܠܰܚܬܳܡܳܐ ܟܰܣܝܳܐ ܕܢܰܨܰܚ ܪܫܽܘܡܘ̱ ܡܺܝ̈ܬܰܝܟܽܘܢ ܒܰܨܠܺܝܒܳܐ ܕܢܶܙܟܽܘܢ ܠܡܰܘܬܳܐ ܬܰܢܺܝܢܳܐ 9 ܠܳܐ ܗ̱ܘܳܐ ܒܒܺܝܫܘ̱ ܐܶܬܚܰܫܰܚ ܗܰܘ ܥܳܒܽܘܕܳܐ ܚܰܟܺܝܡܳܐ ܘܺܐܝܩܺܐ ܬܩܶܢ ܐܳܦ ܚܒܳܠ ܐܶܢ ܐܽܘܡܳܢܳܐ ܡܳܝܽܘܬܳܐ ܕܠܳܐ ܒܽܘܝܳܢܳܐ ܠܳܐ ܥܒܰܕ ܚܳܣ ܕܢܺܐܡܰܪ ܕܰܐܠܳܗܳܐ ܪܰܟܶܒ ܘܰܫܪܳܐ ܕܠܳܐ ܦܽܘܪܫܳܢ 10 ܘܶܐܢ ܒܰܪܢܳܫܳܐ ܡܰܠܳܠܳܐ ܪܰܒ ܠܶܗ ܕܰܗܒܳܐ ܫܰܬܺܝܩܳܐ ܘܰܙܗܺܝܪ ܒܶܗ ܕܰܠܡܳܐ ܢܺܐܒܰܕ ܘܰܨܝܳܪܳܐ ܕܨܺܝܪ ܨܰܠܡܳܐ ܢܛܰܪ ܠܶܗ ܕܠܳܐ ܢܶܬܚܰܒܰܠ ܟܡܳܐ ܗܳܟܺܝܠ ܢܳܛܰܪ ܛܳܒܳܐ ܠܨܰܠܡܳܐ ܕܰܐܩܺܝܡ ܠܺܐܝܩܳܪܶܗ 11 ܐܶܢ ܢܽܘܚܳܡܳܐ ܠܳܐ ܗܳܘܶܐ ܐܰܟܶܬ ܚܰܝܽܘܬܳܐ ܠܙܰܕܺܝܩܳܐ ܥܒܰܪ ܒܳܗ̇ ܘܰܗܘܳܐ ܣܽܘܠܳܐܢܳܐ ܢܦܰܠ ܒܰܐܪܥܶܗ ܘܶܐܚܰܕ ܣܳܟܶܗ ܫܠܶܡ ܫܰܪܒܶܗ ܘܰܐܘܦܺܝ ܟܽܠܶܗ ܚܳܣ ܠܶܗ ܠܦܳܪܽܘܥܳܐ ܟܺܐܢܳܐ ܠܳܐ ܓܶܝܪ ܛܳܠܶܡ ܙܰܕܺܝ̈ܩܰܘܗ̱ܝ [ܫܠܶܡ]