Ephrem the Syrian. “Nisibis 74.” Digital Syriac Corpus. Last modified June 12, 2019. https://syriaccorpus.org/328. Nisibis XXXIV ܥܰܠ ܩܳܠܳܐ ܕܐܳܘ ܡܳܪܝ̱ ܒܓܢܝܟ ܀܀܀ 1 ܐܳܘ ܟܡܳܐ ܪܰܒ ܐܳܕܳܡ ܘܰܫܒܺܝܚ ܒܰܒܪܺܝܬܶܗ ܐܳܘ ܟܡܳܐ ܪܰܒ ܫܰܦܠܶܗ ܒܥܶܕܳܢ ܡܺܝܬܽܘܬܶܗ ܢܰܘܪܒܺܝܘܗ̱ܝ ܢܽܘܚܳܡܳܟ ܥܽܘܢܺܝܬܳܐ: ܢܚܰܕܬܺܝܘܗ̱ܝ ܢܽܘܚܳܡܳܟ 2 ܒܪܽܘܟܳܒܶܗ ܨܺܝܪܳܐ ܚܶܟܡܰܬ ܒܳܪܽܘܝܶܗ ܒܚܽܘܒܳܠܶܗ ܪܰܫܺܝܡܳܐ ܒܺܝܫܽܘܬ ܢܳܟܽܘܠܶܗ ܢܶܒܗܰܬ ܒܚܽܘܕܳܬܶܗ 3 ܓܒܳܐ ܘܪܳܒ ܒܰܥܒܳܕܶܗ ܘܫܺܝܛ ܗ̱ܽܘ ܒܥܽܘܢܕܳܢܶܗ ܒܚ̈ܰܝܰܘܗ̱ܝ ܐܰܝܟ ܡܶܕܶܡ ܒܡܰܘܬܶܗ ܐܰܝܟ ܠܳܐ ܡܶܕܶܡ ܬܽܘܒ ܡܳܪܝ̱ ܐܰܘܪܒܳܝܗ̱ܝ 4 ܕܳܐܶܢ ܘܰܡܚܰܝܶܒ ܡܥܰܩܶܒ ܘܰܡܙܰܟܶܐ ܕܽܘܡܝܶܗ ܕܰܐܠܳܗܳܐ ܘܡܰܘܬܶܗ ܕܚܰܝ̈ܘܳܬܳܐ ܨܰܠܡܳܟ ܢܺܐܪܰܒ ܒܳܟ 5 ܗܳܐ ܡܶܠܬܶܗ ܪܰܒܳܐ ܗ̱ܝ ܘܥܰܠ ܟܽܘܠ ܡܶܬܦܰܪܣܶܐ ܒܬܺܒܶܝܠ ܡܰܠܳܠܰܐ ܗ̱ܘ ܘܒܰܫܝܽܘܠ ܡܶܫܬܰܬܰܩ ܚܰܕܶܬ ܩ̈ܺܝܢܳܬܶܗ 6 ܘܰܥܡܰܕ ܒܝܰܡܳܐ ܘܡܰܣܶܩ ܣܺܝܡ̈ܳܬܶܗ ܘܡܳܐ ܕܰܥܡܰܕ ܒܰܫܝܽܘܠ ܟܳܡ ܥܠܰܘܗ̱ܝ ܡܰܘܬܳܐ ܒܳܟ ܡܳܪܝ̱ ܢܶܬܕܰܠܶܐ 7 ܙܪܺܝܙܳܐ ܕܰܠܝܰܡܳܐ ܡܰܫܥܒܶܕ ܘܰܠܝܰܒܫܳܐ ܒܩܰܒܪܳܐ ܡܶܫܬܰܦܰܠ ܘܗܳܘܶܐ ܫܶܪܕܽܘܕܳܐ ܢܓܽܘܠܽܘܢ ܡܳܪܝ̱ ܪ̈ܰܚܡܰܝܟ 8 ܚܰܝܘ̈ܳܬܳܐ ܡܫܰܥܒܶܕ ܢܺܝܪܶܗ ܚܰܣܺܝܢܳܐ ܘܢܺܝܪܶܗ ܕܡܰܘܬܳܐ ܡܫܰܦܶܠ ܚܺܐܪܽܘܬܶܗ ܒܳܟ ܡܳܪܝ̱ ܢܶܬܚܰܪܰܪ 9 ܛܰܟܶܣ ܒܰܦܓܽܘ̈ܕܶܐ ܚܺܐܦܳܐ ܕܡܰܪܟܰܒܬܳܐ ܡܰܘܬܳܐ ܒܠܰܡ ܠܶܗ ܘܒܰܫܝܽܘܠ ܐܳܣܰܪ ܠܶܗ ܢܶܫܪܶܝܘܗ̱ܝ ܫܳܪܶܐ ܟܽܠ 10 ܝܺܬܶܒ ܥܰܠ ܬܪܢܽܘܣ ܒܬܳܓܳܐ ܘܒܰܟܠܺܝܠܳܐ ܘܡܰܘܬܳܐ ܡܰܚܶܬ ܠܶܗ ܐܶܣܟܺܡܶܗ ܘܬܳܒܰܪ ܠܶܗ ܒܳܟ ܡܳܪܝ̱ ܢܶܬܝܰܩܰܪ 11 ܟܳܬܶܒ ܘܳܐܦ ܩܳܪܶܐ ܘܕܳܪܶܫ ܘܰܡܬܰܪܓܰܡ ܘܠܳܐ ܡܶܫܟܰܚ ܕܰܢܦܺܝܣ ܠܡܰܘܬܳܐ ܒܚ̈ܶܟܡܳܬܶܗ ܒܳܟ ܡܳܪܝ̱ ܢܶܬܦܰܨܶܐ 12 ܟܰܕ ܠܰܐܪܝܳܐ ܚܳܒܶܫ ܘܶܐܣܰܪ ܬܰܢܺܝܢܳܐ ܘܠܳܐ ܒܢܶܩܥܳܐ ܕܰܫܝܽܘܠ ܡܰܘܬܳܐ ܚܳܒܶܫ ܠܶܗ ܢܰܦܩܺܝܘܗ̱ܝ ܩܳܠ ܩܰܪܢܳܐ 13 ܠܺܐܝܠܳܢܳܐ ܦܣܰܩ ܘܰܡܚܰܠܶܦ ܘܳܐܦ ܣܳܓܶܐ ܘܠܶܗ ܦܪܰܫ ܡܰܘܬܳܐ ܡܶܢ ܟܽܠ ܚܰܒܺܝܒܰܘ̈ܗ̱ܝ ܒܫܽܘܒܚܳܟ ܢܶܚܙܶܐ ܐܶܢܽܘܢ 14 ܠܡܰܚ̈ܘܳܬܳܐ ܐܰܣܺܝ ܒܣܰܡ̈ܳܡܢܶܐ ܕܶܐܫܟܰܚ ܘܠܰܡܚܽܘܬܶܗ ܕܡܰܘܬܳܐ ܣܳܡܳܐ ܠܳܐ ܢܦܰܠ ܢܰܐܣܶܝܘܗ̱ܝ ܣܳܡ ܚ̈ܰܝܶܐ 15 ܡܶܫܚܶܗ ܘܗܶܪ̈ܽܘܡܰܘܗ̱ܝ ܘܣܽܘܓܳܐܐ ܕܒܰܣܡ̈ܳܢܰܘܗ̱ܝ ܠܳܐ ܡܨܶܐ ܡܰܦܟܶܗ ܠܶܗ ܠܪܺܝܚܶܗ ܡܳܐ ܕܰܥܢܰܕ ܒܡܶܠܚܳܟ ܢܶܬܡܰܕܰܟ 16 ܢܰܗܺܝܪ̈ܶܐ ܡܦܰܠܶܓ ܠܫ̈ܳܥܶܐ ܘܥܶܕ̈ܳܢܶܐ ܘܫܳܥܰܬ ܥܽܘܢܕܳܢܶܗ ܐܰܝܟܳܐ ܗ̱ܝ ܠܳܐ ܝܳܕܰܥ ܫܽܘܒܚܳܐ ܠܝܳܕܰܥ ܟܽܠ 17 ܣܥܳܐ ܥܰܠ ܕܰܐܪܥܳܐ ܘܒܳܨܶܐ ܕܰܫܡܰܝܳܐ ܘܡܳܐ ܕܰܡܛܳܝܗ̱ܝ ܡܰܘܬܳܐ ܛܥܳܐ ܠܶܗ ܘܶܐܬܕܰܘܰܕ ܒܳܟ ܡܳܪܝ̱ ܢܶܬܦܰܨܶܐ 18 ܣܶܦܳܐ ܪܒܺܝܬܳܐ ܘܡܰܘܣܶܦ ܥܰܠ ܩܰܪܢܳܐ ܬܳܒܰܥ ܟܰܢܶܫ ܠܳܗ̇ ܘܒܰܕܰܪ ܡܰܘܪܶܬ ܠܳܗ̇ ܬܰܥܬܪܶܗ ܛܰܝܒܽܘܬܳܟ 19 ܥܳܒܶܕ ܡܶܕܝܳܪ̈ܶܐ ܠܩܰܝܛܳܐ ܘܰܠܣܰܬܘܳܐ ܘܚܰܕ ܩܰܒܪܳܐ ܠܩܰܝܛܳܐ ܘܰܠܣܰܬܘܳܐ ܣܦܰܩ ܠܶܗ ܠܰܥܕܶܢ ܢܶܬܒܰܣܰܡ 20 ܦܰܠܶܓ ܘܕܰܢܣܰܒ ܫܳܐܶܠ ܝܰܬܺܝܪܳܐ ܡܰܘܬܳܐ ܡܫܰܚ ܝܰܗ̱ܒ ܠܶܗ ܐܶܡ̈ܶܐ ܬܠܳܬ ܒܰܫܝܽܘܠ ܠܽܐܘܪܥܳܟ ܡܳܪܝ̱ ܢܶܦܪܰܚ 21 ܨܰܠܶܠ ܚܰܡܪ̈ܳܢܶܐ ܘܰܐܣܓܺܝ ܒܽܘܣܳܡ̈ܶܐ ܡܰܘܬܳܐ ܣܳܟܰܪ ܠܶܗ ܠܦܽܘܡܶܗ ܡܶܢ ܪܶܥܝܶܗ ܢܒܰܝܐܺܝܘܗܝ ܦܳܬܽܘܪܳܟ 22 ܩܦܰܣ ܘܰܐܣܓܺܝ ܝܰܥܢܳܐ ܐܰܘܨܪ̈ܶܐ ܠܳܐ ܣܳܢܶܗ ܡܰܘܬܳܐ ܡܰܦܶܩ ܠܶܗ ܘܒܰܫܝܽܘܠ ܩܦܰܣ ܠܶܗ ܢܰܦܩܶܗ ܢܽܘܚܳܡܳܟ 23 ܪܳܕܶܐ ܒܰܫ̈ܒܺܝܠܶܐ ܘܰܥܛܰܦ ܒܽܐܘܪ̈ܚܳܬܳܐ ܚܕܳܐ ܗ̱ܝ ܐܽܘܪܚܳܐ ܐܶܙܰܠ ܕܬܽܘܒ ܒܳܗ̇ ܠܳܐ ܥܛܰܦ ܢܶܦܢܶܐ ܠܦܰܪܕܰܝܣܳܟ 24 ܫܩ̈ܽܘܠܶܐ ܡܳܝܬܺܝܢ ܘܩܳܪܶܝܢ ܛܳܥܽܘ̈ܢܶܐ ܘܰܚܠܳܦ ܥܰܪ̈ܣܳܬܶܗ ܥܰܪܣܳܐ ܕܥܰܢܺܝ̈ܕܶܐ ܢܶܦܪܚܺܝܘܗ̱ܝ ܢܽܘܚܳܡܳܐ 25 ܬܥܰܫ ܒܰܐܦܕ̈ܳܢܶܐ ܪ̈ܘܺܝܚܶܐ ܕܢܰܘܦܽܘܢ ܠܶܗ ܘܦܰܓܪܶܗ ܡܠܶܐ ܩܰܒܪܳܐ ܘܥܰܦܪܶܗ ܡܠܶܐ ܫܽܘܥܳܠܳܐ ܡܶܕܪܺܝܫ ܚܰܕܬܳܝܗ̱ܝ