Ephrem the Syrian. “Nisibis 76.” Digital Syriac Corpus. Last modified June 12, 2019. https://syriaccorpus.org/330. Nisibis LXXVI ܓ ܒܰܪ ܩܳܠܶܗ 1 ܡܰܢܽܘ ܕܰܠܨܶܒܬܳܟ ܢܶܬܝܰܐܰܒ ܦܰܓܪܳܐ ܡܰܢܽܘ ܕܰܠܫܽܘܦܪܳܟ ܢܶܦܠܽܘܚ ܥܰܒܕܽܘܬܳܐ ܒܳܟ ܡܳܪܝ̱ ܢܶܬܚܰܪܰܪ ܥܽܘܢܺܝܬܳܐ: ܒܳܟ ܡܳܪܝ̱ ܢܶܬܚܰܪܰܪ 2 ܐܰܝܢܳܐ ܕܒܶܝܬ ܚ̈ܰܝܶܐ ܫܽܘܦܪܳܟ ܫܒܳܐ ܠܶܗ ܚܙܺܝܟ ܒܶܝܬ ܡܺܝ̈ܬܶܐ ܒܰܫܝܽܘܠ ܡܢܳܕ ܠܶܗ ܠܳܟ ܡܳܪܝ̱ ܢܶܬܝܰܐܰܒ 3 ܣܟܰܠ ܗܽܘ ܚܰܟܺܝܡܳܐ ܕܠܳܐܶܐ ܕܠܳܟ ܢܶܫܦܰܪ ܣܩܰܠ ܐܳܦ ܡܰܡܠܳܠܶܗ ܕܡܶܢܳܟ ܢܶܬܩܰܠܰܣ ܚܙܺܝ ܡܳܪܝ̱ ܫܽܘܥܒܳܕܰܢ 4 ܕܠܳܐ ܐܰܠܳܗ ܐܺܝܬܰܘܗ̱ܝ ܐܰܝܢܳܐ ܕܠܳܟ ܦܳܠܰܚ ܒܥܽܘܢܕܳܢܳܟ ܢܶܒܗܰܬ ܕܰܠܡܰܢ ܫܳܦܰܪ ܗ̱ܘܳܐ ܠܰܐܒܽܘܟ ܒܳܟ ܢܶܫܦܰܪ 5 ܡܰܘܬܰܐ ܗ̱ܘ ܬܰܒܰܪ ܠܶܗ ܠܓܶܦܳܟ ܩܰܠܺܝܠܳܐ ܕܠܳܐܶܐ ܘܠܳܐ ܫܰܟܶܢ ܐܶܠܳܐ ܨܶܝܕ ܕܰܗܒܳܐ ܠܘܳܬܳܟ ܡܳܪܝ̱ ܢܶܦܪܰܚ 6 ܢܶܫܪ̈ܶܐ ܨܶܝܕ ܒܶܣܪܳܐ ܘܐ̱ܢܳܫܳܐ ܨܶܝܕ ܟܶܣܦܳܐ ܒܪܺܝܟ ܗ̱ܽܘ ܕܠܰܝܬ ܕܰܡܨܶܐ ܠܡܶܐܟܰܠ ܡܶܢ ܕܰܗܒܳܐ ܦܰܓܪܳܟ ܣܳܡ ܚ̈ܰܝܰܐ ܗ̱ܘ 7 ܟܰܕ ܠܰܝܬ ܕܶܐܟܰܠ ܠܶܗ ܠܰܝܬ ܕܣܰܒܰܥ ܡܶܢܶܗ ܟܰܕ ܠܰܘ ܡܶܐܟܽܘܠܬܰܐ ܗ̱ܘ ܠܶܗ ܗܽܘ ܟܦܶܢ ܟܽܠ ܐ̱ܢܳܫ ܠܰܠܚܡܳܟ ܢܶܬܝܰܐܰܒ ܀܀܀ 8 ܥܳܠܡܳܐ ܩܳܪܶܐ ܠܳܟ ܬܳܐ ܦܽܘܩ ܠܰܬܥܳܫܳܐ ܩܰܒܪܳܐ ܩܳܪܶܐ ܠܳܟ ܬܳܐ ܢܽܘܚ ܚܰܠܳܫܳܐ ܢܶܬܢܺܝܚ ܒܰܠܡܺܐܢܳܟ 9 ܝܰܘܡܰܐ ܗ̱ܘ ܕܰܠܩܰܒܪܳܐ ܡܨܰܒܰܬ ܓܰܕܽܘ̈ܕܶܐ ܒܬܽܘ̈ܠܳܬܳܐ ܡܟܰܠܶܠ ܡܫܰܕܰܪ ܠܳܗ̇ ܠܰܫܝܽܘܠ ܢܶܚܕܽܘܢ ܥܰܡ ܥܰܠܡ̈ܰܝܟ 10 ܝܰܘܡܰܐ ܗ̱ܘ ܕܡܰܥܡܶܛ ܒܰܝܬܳܐ ܒܰܒܟܳܬܳܐ ܘܦܳܪܶܣ ܥܰܠ ܐܶܣ̈ܰܘܗ̱ܝ ܚܶܫܟܳܐ ܘܕܰܐܘܢܳܐ ܢܪܰܕܦܶܗ ܒܽܘܝܳܐܳܟ 11 ܟܐܺܝ ܡܳܪܝ̱ ܒܡܰܘܬܳܐ ܝܰܥܢܳܐ ܕܪܳܥܶܐ ܠܰܢ ܚܰܝܰܬ ܒܳܠܰܥ ܠܰܢ ܒܟܰܪܣܶܗ ܩܒܰܪ ܠܰܢ ܢܰܨܪܺܝܘܗ̱ܝ ܫܺܝܦܽܘܪܳܟ 12 ܝܰܘܡܰܐ ܗ̱ܘ ܕܡܰܫܠܰܚ ܣܰܩܠܳܐ ܕܥܰܪ̈ܣܳܬܳܐ ܘܰܚܠܳܦ ܣܩ̈ܳܠܰܝܗܶܝܢ ܒܣܰܩ̈ܶܐ ܡܶܬܟܰܡܪ̈ܳܢ ܝܰܘܡܳܟ ܢܰܦܨܰܚ ܠܰܢ 13 ܐܰܢ̱ܬܬܳܐ ܡܶܢ ܗܶܕܪܶܗ ܕܥܽܘܡܪܳܗ̇ ܡܰܦܶܩ ܠܳܗ̇ ܟܰܦܳܐ ܘܰܐܫܺܝܕ ܘܒܰܠܺܝܠ ܕܶܐܒܰܕܘ̱ ܛܽܘ̈ܟܣܰܘܗ̱ܝ ܢܛܰܟܶܣ ܢܰܦܫ̈ܳܬܰܢ 14 ܝܰܘܡܰܐ ܗ̱ܘ ܕܡܰܪܟܶܢ ܘܟܳܐܶܦ ܩܰܘܡ̈ܳܬܳܐ ܘܡܶܬܪܰܟܢܺܝܢ ܐ̱ܪ̈ܳܙܶܐ ܥܰܠ ܐ̱ܪ̈ܳܙܶܐ ܕܰܢܦܼܰܠܘ̱ ܒܳܟ ܬܽܘܒ ܡܳܪܝ̱ ܢܶܫܼܘܰܚ 15 ܦܰܓܪܳܐ ܡܶܬܚܰܒܰܠ ܕܢܶܦܩܰܬ ܠܳܗ̇ ܢܰܦܫܳܐ ܡܰܠܳܚܳܐ ܘܚܰܝܽܘܬܳܐ ܕܪ̈ܶܓܫܶܐ ܘܗ̈ܶܕܳܡܶܐ ܒܳܗ̇ ܬܽܘܒ ܢܶܨܛܰܒܰܬ 16 ܝܰܘܡܰܐ ܗ̱ܘ ܕܰܒ̈ܓܙܰܘܗ̱ܝ ܚܳܐܰܪ ܥܰܬܺܝܪܳܐ ܘܚܳܙܶܐ ܕܠܳܐ ܠܳܘܶܝܢ ܠܡܳܪܗܽܘܢ ܩ̈ܶܢܝܳܢܶܐ ܢܶܥܬܪܳܢ ܒܶܝܬ ܓܰܙܳܟ 17 ܝܰܘܡܰܐ ܗ̱ܘ ܕܟܺܐܢ̈ܶܐ ܒܰܠܚܽܘܕ ܚܳܕܶܝܢ ܒܶܗ ܕܩܳܢܶܝܢ ܘܡܰܩܕܶܝܢ ܙܘ̈ܳܕܶܐ ܕܙܶܕܩ̈ܳܬܳܐ ܢܙܽܘܕܳܢ ܚܽܘܦܛܳܟ 18 ܡܶܫܬܰܠܰܚ ܡܶܫܟܳܐ ܕܰܩܪܺܝܡ ܥܰܠ ܐܰܦ̈ܶܐ ܘܗܳܘܶܐ ܥܰܪܛܶܠܝ̱ ܘܰܫܟܺܝܪ ܦܰܪܨܽܘܦܳܐ ܢܨܰܒܬܶܗ ܢܽܘܚܳܡܳܟ ܀܀܀ 19 ܐܶܕ̈ܢܶܐ ܗܘܺܝ ܢܶܩ̈ܥܶܐ ܠܗܰܘ ܪܰܚܫܳܐ ܕܰܫܝܽܘܠ ܘܥܰܝ̈ܢܶܐ ܗ̈ܘܰܝ ܩ̈ܢܶܐ ܠܪܳܡܬܳܐ ܕܰܒܩܰܒܪ̈ܶܐ ܚܙܺܝ ܡܳܪܝ̱ ܡܽܘܟܳܟܰܢ 20 ܓܒ̈ܺܝܠܶܐ ܕܡܶܢ ܛܺܝܢܳܐ ܬܳܚܘ̱ ܘܰܗܘܰܘ ܒܰܫܝܽܘܠ ܟܬܳܐ ܕܣܰܝܢܳܐ ܫ̈ܰܦܠܶܐ ܕܫܰܦܺܝܪ̈ܶܐ ܚܙܺܝ ܡܳܪܝ̱ ܚܽܘܒܠܰܢ 21 ܝܰܘܡܰܐ ܗ̱ܘ ܕܰܥܢܰܕܘ̱ ܒܶܗ ܡܰܠܟ̈ܶܐ ܒܟܰܪܝܽܘܬܳܐ ܘܰܫܪܰܘ ܬܳܓܰܝ̈ܗܽܘܢ ܘܰܢܚܶܬܘ̱ ܠܳܗ̇ ܠܰܫܝܽܘܠ ܡܰܠܟܰܢ ܒܰܫܡܰܝܰܐ ܗ̱ܘ 22 ܡܰܘܬܳܐ ܡܫܰܦܶܠ ܟܽܠ ܡܰܘܬܳܐ ܡܡܰܣܟܶܢ ܟܽܠ ܡܰܘܬܳܐ ܡܰܚܪܶܒ ܟܽܠ ܡܰܘܬܳܐ ܪܳܥܶܐ ܟܽܠ ܢܶܪܕܦܺܝܘܗ̱ܝ ܢܽܘܚܳܡܳܟ 23 ܝܰܘܡܳܐ ܕܥܽܘܢܕܳܢܳܐ ܝܰܘܡܰܐ ܗ̱ܘ ܡܰܪܺܝܪܳܐ ܝܰܘܡܰܐ ܗ̱ܘ ܡܒܰܟܶܐ ܟܽܠ ܝܰܘܡܰܐ ܗ̱ܘ ܡܰܟܡܰܪ ܟܽܠ ܢܶܙܟܶܝܘܗ̱ܝ ܡܳܪܝ̱ ܝܰܘܡܳܟ 24 ܝܰܘܡܳܐ ܕܢܽܘܚܳܡܳܐ ܗܽܘܝܽܘ ܡܚܰܠܶܛ ܟܽܠ ܗܽܘܝܽܘ ܡܒܰܝܰܐ ܟܽܠ ܗܽܘܝܽܘ ܡܰܦܨܰܚ ܟܽܠ ܢܶܕܪܟܰܢ ܡܳܪܝ̱ ܝܰܘܡܳܟ 25 ܝܰܘܡܰܐ ܗ̱ܘ ܕܰܐܒܳܗ̈ܶܐ ܚܳܙܶܝܢ ܠܰܒܢܰܝ̈ܗܽܘܢ ܝܰܘܡܰܐ ܗ̱ܘ ܬܽܘܒ ܕܰܐܚ̈ܶܐ ܚܳܙܶܝܢ ܠܰܐܚ̈ܰܝܗܽܘܢ ܫܽܘܒܚܳܐ ܠܡܰܚܶܐ ܟܽܠ