Ephrem the Syrian. “Nisibis 77.” Digital Syriac Corpus. Last modified June 12, 2019. https://syriaccorpus.org/331.
    
        
            
                Nisibis LXXVII
            
            
                
                    ܕ ܒܰܪ ܩܳܠܶܗ 
                
                    1
                    ܒܥܰܢܺܝܕܳܐ ܢܶܚܙܶܝܘܗ̱ܝ ܠܥܽܘܡܪܰܢ ܕܰܐܝܟ ܚܶܠܡܰܐ ܗ̱ܘ 
                    ܐܶܢ ܓܶܝܪ ܩܰܢܝܳܐ 
                    ܗܳܐ ܛܠܶܩ ܐܰܝܟ ܚܶܙܘܳܐ 
                    ܚܰܕ ܟܡܳܐ ܩܶܢܝܳܢܶܗ 
                    
                    ܥܽܘܢܺܝܬܳܐ: ܐܰܢ̱ܬ ܡܳܪܝ̱ ܢܰܚܡܳܝܗ̱ܝ
                    
                
                
                    2
                    ܒܗܳܢܳܐ ܟܺܝܬ ܝܰܘܡܳܐ 
                    ܕܒܰܛܶܠ ܪܽܘܟܳܒܰܢ
                    ܬܰܘ ܢܶܒܛܶܠ ܢܶܚܙܶܝܘܗ̱ܝ 
                    ܠܥܳܠܡܳܐ ܕܰܒܛܶܠ ܠܶܗ
                    ܠܡܳܪܰܢ ܬܰܘ ܢܶܦܠܽܘܚ
                    
                
                
                    3
                    ܝܰܘܡܰܐ ܗ̱ܘ ܕܰܡܫܰܬܶܩ 
                    ܠܦܽܘܡܳܐ ܘܠܳܐ ܢܨܳܪ
                    ܕܓܳܙ ܡܰܒܽܘܥ ܡ̈ܶܠܰܘܗ̱ܝ 
                    ܘܰܡܥܶܝܢ ܦܶܬܓܳܡ̈ܰܘܗ̱ܝ
                    ܒܡܶܠܬܳܟ ܢܶܬܒܰܝܰܐ 
                    ܀܀܀
                
                
                    4
                    ܝܰܘܡܰܐ ܗ̱ܘ ܕܣܳܟܰܪ 
                    ܐܶܕ̈ܢܶܐ ܦܬܺܝܚ̈ܳܬܳܐ 
                    ܕܫܳܥ ܐܶܢܶܝܢ ܡܰܘܬܳܐ 
                    ܘܰܗ̈ܘܰܝ ܚܰܪ̈ܫܳܬܳܐ 
                    ܒܩܳܠܳܟ ܢܶܬܦܰܬܚܳܢ
                    
                
                
                    5
                    ܝܰܘܡܰܐ ܗ̱ܘ ܕܡܰܥܡܶܨ 
                    ܥܰܝ̈ܢܶܐ ܦܰܐܝ̈ܳܬܳܐ 
                    ܫܪ̈ܳܓܶܐ ܘܠܰܡܦܺܐܕ̈ܶܐ 
                    ܕܗܰܝܟܰܠ ܢܰܦܫ̈ܳܬܳܐ 
                    ܢܶܚܙܶܝܢ ܢܰܗܺܝܪܳܟ 
                    
                
                
                    6
                    ܥܰܝ̈ܢܶܐ ܐܰܝܟ ܟܰܘ̈ܶܐ 
                    ܣܟܰܪ ܐܳܦ ܡܰܚܫܳܟ
                    ܠܒܰܝܬܳܐ ܕܰܫܒܰܩܬܶܗ 
                    ܬܰܘܬܳܒܬܳܐ ܢܰܦܫܳܐ 
                    ܢܩܰܒܠܳܗ̇ ܒܢܽܘܚܳܡܳܐ 
                    
                
                
                    7
                    ܝܰܘܡܰܐ ܗ̱ܘ ܕܠܺܐ̈ܝܕܶܐ 
                    ܦܳܟܰܪ ܘܡܰܫܠܶܐ 
                    ܫܰܪܺܝ ܘܠܳܐ ܫܰܠܶܡ 
                    ܘܰܫܒܰܩ ܚ̈ܶܢܓܳܬܳܐ 
                    ܒܚܰܝܠܳܟ ܢܶܬܠܰܒܰܒ
                    
                
                
                    8
                    ܡܓܰܪܶܣ ܗ̈ܰܠܟܳܬܳܐ 
                    ܡܰܟܦܰܪ ܥܶܩܒ̈ܳܬܳܐ 
                    ܠܰܝܬ ܬܽܘܒ ܕܽܘܪ̈ܟܳܬܶܗ 
                    ܕܰܦܣܰܩ ܐܽܘܪ̈ܚܳܬܶܗ
                    ܢܕܽܘܨܳܢ ܒܰܚܠܽܘܠܳܟ 
                    
                
                
                    9
                    ܝܰܘܡܰܐ ܗ̱ܘ ܕܬܰܟܶܣ 
                    ܢܶܫܡܬܳܐ ܕܠܳܐ ܬܶܥܽܘܠ
                    ܡܶܢ ܓܰܘ ܐܳܠܶܨ ܠܳܗ̇ 
                    ܕܬܶܦܽܘܩ ܪܳܕܶܦ ܠܳܗ̇
                    ܬܪܰܕܦܺܝܘܗ̱ܝ ܒܢܽܘܚܳܡܳܐ
                    
                
                
                    10
                    ܡܰܚܫܰܒܬܶܗ ܕܺܐܝܬܶܝܗ̇ 
                    ܓܺܝܓܰܠ ܟܽܠ ܙܰܘ̈ܥܺܝܢ 
                    ܒܬܶܡܗܳܐ ܐܶܣܰܪ ܠܳܗ̇ 
                    ܒܫܶܬܩܳܐ ܡܰܫܠܶܐ ܠܳܗ̇
                    ܬܰܫܘܶܐ ܠܡܰܠܟܽܘܬܳܟ
                    
                
                
                    11
                    ܝܰܘܡܰܐ ܗ̱ܘ ܕܓܰܘܢܳܐ 
                    ܒܓܰܘܢܳܐ ܡܶܬܚܰܠܰܦ
                    ܚܠܳܦ ܗܰܘ ܕܚ̈ܰܝܶܐ 
                    ܕܡܺܝ̈ܬܶܐ ܡܶܬܥܰܛܰܦ
                    ܒܢܽܘܗܪܳܟ ܢܶܙܕܰܗܶܐ 
                    
                
                
                    12
                    ܬܩܽܘܠܘ̱ ܓ̈ܰܠܶܐ ܘܦܰܓܪ̈ܶܐ 
                    ܘܰܚܙܰܘ ܠܛܳܒܳܐ 
                    ܕܶܐܢ ܓ̈ܰܠܶܐ ܡܢܰܚܶܡ 
                    ܟܡܳܐ ܟܺܝܬ ܦܰܓܪ̈ܰܝܟܽܘܢ 
                    ܢܰܚܶܐ ܠܬܶܫܒܽܘܚܬܶܗ
                    
                
                
                    13
                    ܫ̈ܳܥܶܐ ܣܕܺܝܪ̈ܳܢ ܐܶܢܶܝܢ 
                    ܚܕܳܐ ܚܕܳܐ ܒܥܶܕܳܢܳܗ̇
                    ܗܳܟܰܢ ܣܕܺܝܪ̈ܺܝܢ 
                    ܙܰܒ̈ܢܶܐ ܠܡܳܪܶܐ ܟܽܠ
                    ܫܽܘܒܚܳܐ ܠܡܰܬܩܶܢ ܟܽܠ
                    
                
                
                    14
                    ܫܳܥܬܳܐ ܗ̱ܝ ܕܰܥܣܰܪ 
                    ܠܳܐ ܩܰܕܡܳܐ ܠܰܕܫܶܬ 
                    ܗܳܟܰܢ ܠܳܐ ܬܶܒܥܽܘܢ 
                    ܀܀܀
                    ܙܰܒ̈ܢܶܐ ܩܕܳܡ ܙܰܒ̈ܢܶܐ 
                    ܒܪܺܝܟ ܗ̱ܽܘ ܡܛܰܟܶܣ ܟܽܠ
                    
                
                
                    15
                    ܫܰܦܺܝܪ ܬܽܘܒ ܣܺܝܡܺܝܢ 
                    ܝܰܪ̈ܚܶܐ ܠܛܽܘܟܳܣܳܐ 
                    ܘܠܳܐ ܩܕܳܡ ܝܰܪܚܳܐ
                    ܠܝܰܪ̈ܚܶܐ ܒܡܶܢܝܳܢܳܐ 
                    ܒܪܺܝܟ ܗ̱ܽܘ ܒܛܽܘܟ̈ܳܣܰܘܗ̱ܝ
                    
                
                
                    16
                    ܫܓܺܝܫܳܐ ܗ̱ܝ ܕܰܠܬܶܫܪܺܝܢ 
                    ܢܺܝܣܳܢ ܗ̱ܘܳܐ ܩܕܳܡ 
                    ܘܰܫܓܺܝܫ ܡܰܢ ܕܶܐܡܰܪ 
                    ܕܰܐܝܟܰܘ ܢܽܘܚܳܡܳܐ 
                    ܒܪܺܝܟ ܗ̱ܽܘ ܣܳܕܰܪ ܟܽܘܠ
                    
                
                
                    17
                    ܫܓܺܝܫܳܐ ܗ̱ܝ ܕܰܠܙܰܪܥܳܐ 
                    ܚܶܨܕܳܐ ܗܳܘܶܐ ܩܕܳܡ
                    ܘܗܳܟܰܢ ܕܰܠܡܰܘܬܳܐ 
                    ܢܶܩܕܽܘܡ ܢܽܘܚܳܡܳܐ 
                    ܫܽܘܒܚܳܐ ܠܰܐܟܪܰܢ 
                    
                
                
                    18
                    ܫܳܠܶܡ ܓܶܝܪ ܘܡܰܘܦܶܐ 
                    ܙܰܪܥܳܐ ܕܥܰܢܺܝ̈ܕܶܐ 
                    ܘܡܳܛܶܠ ܙܒܰܢ ܥܺܝܪ̈ܶܐ 
                    ܠܡܶܦܰܩ ܠܚܶܨܕܳܐ 
                    ܫܽܘܒܚܳܐ ܠܙܳܪܽܘܥܰܢ
                    
                
                
                    19
                    ܫܰܦܺܝܪ ܟܺܝܬ ܪܳܕܶܐ 
                    ܝܰܠܕܳܐ ܩܕܳܡ ܡܰܘܬܳܐ 
                    ܘܫܰܦܺܝܪ ܕܰܠܡܰܘܬܳܐ 
                    ܡܚܰܬܶܡ ܢܽܘܚܳܡܳܐ 
                    ܫܽܘܒܚܳܐ ܠܝܳܕܰܥ ܟܽܘܠ
                    ܀܀܀
                
                
                    ܫܶܠܡܰܬ ܦܰܢܩܺܝܬܳܐ ܕܡܰܕܪ̈ܳܫܶܐ ܕܰܢܨ̈ܺܝܒܳܝܶܐ 
                    ܕܛܽܘܒܳܢܳܐ ܡܳܪܝ̱ ܐܰܦܪܶܝܡ 
                    ܕܗܳܘܶܝܢ ܒܡܶܢܝܳܢܳܐ ܫܰܒܥܺܝܢ ܘܫܰܒܥܳܐ 
                    
                    ܫܽܘܒܚܳܐ ܠܰܐܒܳܐ ܘܠܰܒܪܳܐ
                    ܘܰܠܪܽܘܚܳܐ ܕܩܽܘܕܫܳܐ 
                    ܗܳܫܳܐ ܘܰܒܟܽܠ ܙܒܰܢ ܘܰܠܥܳܠܰܡ ܥܳܠܡܺܝܢ 
                    ܐܰܡܺܝܢ