Jacob of Serugh. “An Admonition - ܕܡܲܪܬ݁ܝܵܢܘܼܬܼܵܐ.” Based upon Paul Bedjan ed., Homiliae selectae Mar-Jacobi Sarugensis vol. 1 (Paris: Harrassowitz, 1905). Digital Syriac Corpus. Last modified March 10, 2018. https://syriaccorpus.org/340.
    
        
            
                ܕܡܲܪܬ݁ܝܵܢܘܼܬܼܵܐ
            
            
                 1 
                ܡܐܡܪܐ ܩܕܡܝܐ
                ܕܡܵܪܝ ܝܲܥܩܘܿܒ̣ ܡܲܠܦܵܢܵܐ: 
                ܕܡܲܪܬ݁ܝܵܢܘܼܬܼܵܐ.
            
            
                ܐܲܙܝܼܥ ܩܵܠܲܝ̈ ܥܲܠ ܬܸܫܒ݁ܘܿܚܬܵܟܼ ܒܲܪ ܐܲܠܵܗܵܐ: 
                ܘܲܢܗܲܠܠܘܼܢ ܠܵܟ̣ ܟܠܗܘܿܢ ܪܸ̈ܓ̣ܫܲܝ ܒܲܙܡܵܪ̈ܲܝܗܘܿܢ܀ 
                ܐܲܝܟܼ ܕܲܠܫܘܼܒܼܚܵܟܼ ܡܲܬܼܩܲܢ ܠܸܫܵܢܝ ܡ̣ܢ ܫܘܼܪܵܝܵܐ: 
                ܘܐܸܢܗ݀ܘ ܕܒܼܵܛܹ̇ܠ ܡ̣ܢ ܬܸܫܒ݁ܘܿܚܬܼܵܟ̣ ܠܢܸܓ̣ܕܵܐ ܫܵܘܹ̇ܐ܀ 
                ܠܵܐ ܡܵܪܝ ܐܸܒ̣ܛܲܠ ܡ̣ܢ ܥܸܢܝܵܢܵܐ ܕܲܙܡܝܼܪ̈ܵܬܼܵܟ̣: 
                ܕܠܵܐ ܐܸܬܼܢܲܓܲܕܼ ܡ̣ܢ ܟܹܐܢܘܼܬܼܵܐ ܒܕܼܝܼܢܵܐ ܟܹܐܢܵܐ܀ 
                ܦܘܼܡܵܐ ܕܐ̄ܢܵܫܵܐ ܠܫܘܼܒ̣ܚܵܗ̇ ܡܲܬܼܩܲܢ ܕܐܲܠܵܗܘܼܬܼܵܐ: 
                ܘܐܲܝܢܵܐ ܕܫܵܠܹ̇ܐ ܡ̣ܢ ܬܸܫܒ݁ܘܿܚܬܵܐ ܥܕܼܝܼܠ ܘܲܡܩܲܦܲܚ܀ 
                ܗ݀ܘ ܒܵܪܘܿܝܵܐ ܣܵܡ̣ ܒܹܗ ܒܦܘܼܡܵܐ ܟܲܕܼ ܒܵܪܹܐ ܠܹܗ: 
                ܩܵܠܵܐ ܘܡܸܠܬܼܵܐ ܕܢܸܗܘܹܐ ܡܸܬ݁ܬ݁ܙܝܼܥ ܠܲܡܫܲܒܵܚܘܼ܀ 
                ܘܗܵܟܲܢ ܚܲܝܵܒ̣ ܟܠ ܡܲܢ ܕܐܲܪܓܸܫ ܕܐܝܼܬܼ ܒܵܪܘܿܝܵܐ: 
                ܕܐܲܝܟ̣ ܡܲܕܲܐܬܼܵܐ ܢܸܬܸܠ ܫܘܼܒ̣ܚܵܐ ܠܡܵܪܝܵܐ ܕܲܒ̣ܪܵܝܗܝ܀ 
                 2 
                 ܫܲܪ̈ܒܹ݁ܐ ܣܪ̈ܝܼܩܹܐ ܘܗܵܠܹܝܢ ܡܸܠܹ̈ܐ ܕܠܵܐ ܫܲܦܝܼܪ̈ܵܢ: 
                ܠܵܐ ܫܲܠܝܼܛ ܠܹܗ ܠܦܘܼܡܵܐ ܕܐ̄ܢܵܫܵܐ ܢܫܲܡܸܫ ܐܸܢܘܿܢsic
                ܗܘ݀ ܒܵܪܘܿܝܵܐ ܗܵܟܲܢ ܐܲܬܼܩܸܢ ܟܲܕܼ ܒܵܪܹܐ ܗ̄ܘ̣ܵܐ: 
                ܦܘܼܡܵܐ ܠܫܘܼܒ̣ܚܹܗ ܠܵܘ ܠܲܚܫܲܚܬܼܵܐ ܕܲܣܪ̈ܝܼܩܵܬܼܵܐ܀ 
                ܩܥܝܼ ܒܓܲܓܲܪܬܵܟܼ ܘܐܲܪܝܼܡ ܩܵܠܵܟ̣ ܐܲܝܟ̣ ܫܝܼܦܘܿܪܵܐ: 
                ܐܵܡܲܪ ܡܵܪܝܵܐ ܠܐܲܝܢܵܐ ܕܫܵܠܹ̇ܐ ܡ̣ܢ ܬܸܫܒ݁ܘܿܚܬܹܗ܀ 
                ܒܪܝܼܬܼܵܟ̣ ܐ̄ܢܵܐ ܡܵܪܝ ܗܲܒ̣ ܠܝܼ ܐܸܬܼܗܲܪ ܒܲܥܒ̣ܝܼ̈ܕܼܵܬܼܵܟ̣: 
                ܘܐܲܝܟ̣ ܕܲܒ̣ܪܲܝܬܵܢܝ ܗܲܒ̣ ܠܝܼ ܐܹܙܘܼܥ ܠܲܡܫܲܒܵܚܘܼ܀ 
                ܗܲܒ̣ ܠܹܗ ܠܠܸܒܵܐ ܕܲܒ̣ܚܘܼ̈ܫܵܒܹܐ ܕܩܲܕܝܼܫܘܼܬܼܵܐ: 
                ܢܸܗܘܹܐ ܡܫܲܡܸܫ ܠܵܟ̣ ܕܲܕܼܚܝܼܠ ܐܲܢ̄ܬ݁ ܥܲܠ ܒܸܪ̈ܝܵܬܼܵܐ܀ 
                ܩܲܕܸܫ ܠܸܫܵܢܝ ܡ̣ܢ ܟܠ ܫܲܪ̈ܒ݁ܝܼܢ ܥܵܠܡܵܢܵܝܹ̈ܐ: 
                ܘܲܒ̣ܥܸܢܝܵܢܵܟ̣ ܢܸܗܘܹܐ ܡܸܬ݁ܬ݁ܙܝܼܥ ܠܲܡܫܲܒܵܚܘܼ܀ 
                ܗܵܐ ܦܬܼܝܼܚ ܠܵܟ̣ ܦܘܼܡܝ ܡܠܝܼܘܗܝ ܡܵܪܝ ܫܘܼܒ̣ܚܵܐ ܐܲܝܟܼ ܕܐܸܫܬܵܘܕܝܼܬ݁: 
                ܘܠܵܐ ܢܸܥܒܲܪ ܒܹܗ ܡܲܡܠܠܵܐ ܣܪܝܼܩܵܐ ܕܢܸܫܬܲܡܲܫ ܒܹܗ܀ 
                ܢܙܘܼܥܘܼܢ ܩܵܠܲܝ̈ ܥܲܠ ܡܵܘܗܲܒ̣ܬܼܵܟ̣ ܡܲܠܝܲܬܼ ܬܲܗܪܵܐ: 
                ܒܲܪ ܐܲܠܵܗܵܐ ܟܲܕܼ ܡܵܘܕܹܐ ܐ̄ܢܵܐ ܥܲܠ ܬܸܫܒ݁ܘܿܚܬܵܟ̣܀ 
                
            
            
                ܫܠܸܡ̣.