Jacob of Serugh. “On the Lenten Fast II - ܥܲܠ ܨܵܘܡܵܐ ܩܲܕܝܼܫܵܐ ܕܐܲܪܒܿܥܝܼܢ ܒ.” Based upon Paul Bedjan ed., Homiliae selectae Mar-Jacobi Sarugensis vol. 1 (Paris: Harrassowitz, 1905). Digital Syriac Corpus. Last modified March 30, 2018. https://syriaccorpus.org/363.
    
        
            
                 571 
                ܕܝܼܠܹܗ ܟܲܕܼ ܕܝܼܠܹܗ ܕܩܲܕܝܼܫܵܐ ܡܲܪܝ ܝܲܥܩܘܿܒܼ 
                ܡܐܡܪܐ .ܟܕ.
                .ܒ.( ܕܒ̄ P.) ܕܥܲܠ ܨܵܘܡܵܐ ܩܲܕܝܼܫܵܐ ܕܐܲܪܒܿܥܝܼܢ.
            
            
                ܦܹܐܖܹ̈ܐ ܚܠܲܝ̈ܵܐ ܕܨܵܘܡܵܐ ܩܸܛ̇ܦܹܬܼ ܡ̣ܢ ܝܘܼܠܦܵܢܵܐ: 
                ܡܵܪܵܗ̇ ܕܲܥܕܹܢ ܩܲܒܸܿܠ ܩܘܼܪܒܵܢܝ ܥܲܠ ܦܵܬܼܘܿܪܵܟܼ܀ 
                ܐܵܕܼܫܹ̈ܐ ܦܖ̈ܝܼܫܹܐ ܕܥܲܢܘܵܝܘܼܬܼܵܐ ܐ̄ܬ̣ܼܵܘ ܠܝܼܕܲܥܬܼܵܐ: 
                ܘܗܵܐ ܡܦܲܠܓܼܵܐ ܠܗܘܿܢ ܥܲܠ ܩܲܖ̈ܝܼܒܹܝܗ̇ ܒܵܟܼ ܢܸܣܬܲܕܪܘܼܢ܀ 
                ܨܵܘܡܵܐ ܒܚܘܼܒܹܗ ܫ̣ܒܼܵܐ ܠܬܲܪܥܝܼܬܼܵܐ ܕܲܬܼܡܲܠܸܠ ܒܹܗ: 
                ܠܫܘܼܒܼܚܵܟܼ ܝܼܫܘܿܥ ܟܠܗܹܝܢ ܡܸܠܲܝ̈ ܟܲܕܼ ܣ̇ܵܓܹܕܼ ܐ̄ܢܵܐ܀ 
                ܙܲܒܼܢܵܐ ܬܲܒܼܥܲܢܝ ܐܹܡܲܠܸܠ ܒܹܗ ܙܲܕܝܼܩܵܐܝܼܬܼ: 
                ܬܸܗܘܸܐ ܡܸܠܲܬܼܝ ܥܸܛܪܵܐ ܚܲܠܝܵܐ ܒܹܝܬܼ ܚܘܼܣܵܝܵܐ܀ 
                ܡܸܛܠ ܨܵܘܡܵܐ ܕܐܝܼܬܼܵܘܗܝ ܫܘܼܦܪܵܐ ܕܙܲܕܝܼܩܘܼܬܼܵܐ: 
                ܙܵܥ̣ ܠܸܫܵܢܵܐ ܒܵܟܼ ܢܸܬܼܗܲܦܲܟܼ ܥܲܠ ܬܸܫܒܿܘܿܚܬܵܟܼ܀ 
                ܗܲܒܼܘ ܠܝܼ ܨܵܘܬܵܐ ܖ̈ܵܚܡܲܝ ܚܲܝܹ̈ܐ ܕܲܩܢܘܿܡܲܝ̈ܗܘܿܢ: 
                ܕܲܩܕܼܵܡܲܝܟܿܘܿܢ ܐܲܥܸܠ ܫܲܪܒܵܐ ܕܟܼܠܹܗ ܚܲܝܹ̈ܐ ܗ̣̄ܘ܀ 
                ܣܲܓܿܝܼ ܒܛܸܠܢܲܢ ܡ̣ܢ ܝܘܼܬܼܖ̈ܵܢܹܐ ܖ̈ܘܼܚܵܢܵܝܹܐ: 
                ܢܸܪܗܲܛ ܗܵܫܵܐ ܕܠܵܐ ܬܲܕܼܪܸܟܼ ܠܲܢ ܡܸܣܟܹܿܢܘܼܬܼܵܐ܀ 
                ܣܲܓܿܝܼ ܕܡܸܟܼܢܲܢ ܡ̣ܢ ܛܲܒܼ̈ܵܬܼܵܐ ܕܠܵܐ ܢܸܣܬܲܥܖ̈ܵܢ: 
                ܢܸܬܿܬܿܥܝܼܪ ܗܵܫܵܐ ܘܢܸܦ̮ܬܼܲܚ ܬܲܪܥܵܐ ܠܫܲܦܝܼܖ̈ܵܬܼܵܐ܀
                 572 
                ܣܲܓܝܼ ܚܒܲܨܢܲܢ ܥܲܠ ܡܹܐܟܼ̈ܠܵܬܼܵܐ ܝܲܬܿܝܼܪܵܬܼܵܐ: 
                ܢܨܘܼܡ ܝܵܘܡܵܢ ܕܠܵܐ ܢܸܛܒܲܥ ܠܹܗ ܒܙܸܒܼܠܵܐ ܗܵܘܢܲܢ܀ 
                ܣܲܓܝܼ ܪܗܸܛܢܲܢ ܥܲܡܹܗ ܕܦܲܓܼܪܵܐ ܒܣܲܝܒܵܖ̈ܵܬܼܵܐ: 
                ܢܸܒܼܥܸܐ ܗܵܫܵܐ ܚܲܝܹ̈ܐ ܕܢܲܦ̮ܫܵܐ ܕܢܸܩܢܸܐ ܐܸܢܘܿܢ܀ 
                ܣܲܓܿܝܼ ܪܚܸܡܢܲܢ ܦܲܓܼܖ̈ܵܢܝܵܬܼܵܐ ܠܲܡܟܲܢܵܫܘܼ: 
                ܒܖ̈ܘܼܚܵܢܝܵܬܼܵܐ ܢܸܠܐܸܐ ܩܲܠܝܼܠ ܕܲܡ ܡܸܫܬܲܟܼ̈ܚܵܢ܀ 
                ܣܲܓܿܝܼ ܒܣܸܡܢܲܢ ܡ̣ܢ ܡܹܐܟܼܘܼܠܬܵܐ ܕܟܼܠܵܗ̇ ܙܸܒܼܠܵܐ ܗ̣̄ܝ: 
                ܢܸܠܐܸܐ ܗܵܫܵܐ ܒܨܵܘܡܵܐ ܩܲܠܝܼܠ ܠܵܐ ܢܹܐܩܲܪ ܠܲܢ܀ 
                ܗܵܐ ܡܹܐܟܼ̈ܠܵܬܼܵܐ ܘܲܛ̈ܥܵܡܵܬܼܵܐ ܫܪܸܟܼ ܠܲܚܒܼܵܠܵܐ: 
                ܠܡܘܿܢ ܡܸܬܼܖ̈ܲܗܛܵܢ ܟܲܫܝܼܪܵܐܝܼܬܼ ܟܲܕܼ ܠܲܝܬܿ ܐܸܢܹܝܢ܀ 
                ܟ̱ܠܹܗ ܪܲܗܛܲܢ ܟܲܪܣܵܐ ܫܩܲܠܬܹܗ ܘܐܸܬܼܚܲܒܲܠ ܒܵܗ̇: 
                ܫܝܘܿܠ ܗ̣̄ܝ ܕܣܵܪܚܵܐ ܟܠ ܓܘܼ̈ܥܠܵܢܝܼܢ ܕܡܸܬܼܝܲܗܒܿܝܼܢ ܠܵܗ̇܀ 
                ܟ̱ܠܵܗ̇ ܫܲܢ̄ܬܵܐ ܠܦܲܓܼܪܵܐ ܝܲܗ̣̄ܢܵܝܗܝ ܟ̱ܠܹܗ ܥܲܡܠܲܢ: 
                ܢܸܬܸܿܠ ܗܵܫܵܐ ܠܢܲܦ̮ܫܵܐ ܡܸܕܸܡ ܬܸܬܼܒܲܝܐܵܐ ܒܹܗ܀ 
                ܛܥܘܼܡܹ̈ܐ ܕܦܲܓܼܪܵܐ ܪܒܲܚܘ ܘܐܸܬܼܚܲܒܲܠܘ ܘܲܗܘ̤ܵܘ ܙܸܒܼܠܵܐ: 
                ܢܸܛܥܲܡ ܗܵܫܵܐ ܠܨܵܘܡܵܐ ܕܡܸܡܬܼܘܿܡ ܠܵܐ ܡܸܬܼܚܲܒܲܠ܀ 
                ܐܸܢ ܫܵܘܬܵܦܵܐ ܗ̣̄ܘ ܦܲܓܼܪܵܐ ܠܢܲܦ̮ܫܵܐ( ܕܢܦܫܐ R.) ܠܡܘܿܢ ܥܵܠܹܿܒܼ
                    ܠܵܗ̇: 
                ܘܟܼܠܹܗ ܪܲܗܛܵܐ ܕܟܲܫܝܼܪܘܼܬܼܵܐ ܗ̤ܘ ܫܵܩܹ̇ܠ ܠܹܗ܀ 
                ܠܒܼܘܼܫܵܐ ܕܫܲܚܝܼܢ ܠܲܚܡܵܐ ܕܫܲܦܝܼܪ ܘܚܲܡܪܵܐ ܕܒܲܣܝܼܡ: 
                ܒܸܣܪܵܐ ܘܡܸܫܚܵܐ ܘܲܛ̈ܥܵܡܵܬܼܵܐ ܝܲܬܝܼܖ̈ܵܬܼܵܐ܀
                 573 
                ܐܘܿ ܨܸܒܼܝܵܢܵܐ ܕܒܲܝܢܵܬܼ ܦܲܓܼܪܵܐ ܠܢܲܦ̮ܫܵܐ ܩܵܐܹ̇ܡ: 
                ܩܘܼܡ ܚܵܘܵܐ ܠܲܢ ܕܲܡܦܲܠܸܓܼ ܐܲܢ̄ܬܿ ܒܲܬܼܪܝܼܨܘܼܬܼܵܐ܀ 
                ܬܪܹܝܢ ܫܵܘ̈ܬܵܦܹܐ ܬܵܒܼܥ̇ܝܼܢ ܡܸܢܵܟܼ ܣܘܼܢܩܵܢܲܝ̈ܗܘܿܢ: 
                ܦܲܠܸܓܼ ܡܵܕܹܝܢ ܒܲܬܼܪܝܼܨܘܼܬܼܵܐ ܐܸܢ ܟܹܐܢܵܐ ܐܲܢ̄ܬܿ܀ 
                ܟ̱ܠܵܗ̇ ܠܹܐܘܬܼܵܐ ܝܲܗ̄ܒܼܬܵܗ̇ ܠܦܲܓܼܪܵܐ ܒܣܲܝܒܵܖ̈ܵܬܹܗ: 
                ܘܦܵܫܲܬ̤ ܢܲܦ̮ܫܵܐ ܘܠܲܝܬܿ ܠܵܗ̇ ܡܢܵܬܼܵܗ̇ ܒܹܝܬܼ ܦܘܼ̈ܠܵܓܹܐ܀ 
                ܠܦܲܓܼܪܵܐ ܐܲܣܓܲܝܬܿ ܟܠ ܫܵܖ̈ܘܵܬܼܵܐ ܟܠ ܦܘܼܢܵܩܹ̈ܐ: 
                ܟܠ ܦܲܛ̈ܒܼܵܓܹܐ ܟܠ ܡܹܐܟܼ̈ܠܵܬܼܵܐ ܖܹ̈ܫܵܝܵܬܼܵܐ܀ 
                ܒܣܵܡܹ̈ܐ ܦܨܝܼܚܹ̈ܐ ܢܝܵܚܹ̈ܐ ܐ̄ܡܝܼ̈ܢܹܐ ܫܲܢ̄ܬܵܐ ܟ̱ܠܵܗ̇: 
                ܘܢܲܦ̮ܫܵܐ ܣܚܝܼܦܵܐ ܘܟܲܕܼ ܒܲܪ̄ܬܼ ܙܵܘܓܵܐ ܗ̣̄ܝ ܠܵܐ ܡܸܬܼܚܲܫܒܵܐ܀ 
                ܐܘܿ ܡܦܲܠܓܼܵܢܵܐ ܕܐܲܣ̣ܓܝܼ ܠܦܲܓܼܪܵܐ ܡܘܿܢ ܥܵܒܹ̇ܕܼ ܐܲܢ̄ܬܿ: 
                ܗܲܒܼ ܠܵܗ̇ ܠܢܲܦ̮ܫܵܐ ܡܢܵܬܼܵܗ̇ ܕܝܼܠܵܗ̇ ܕܐܵܦ ܗ̤ܝ ܬܸܚܸܐ܀ 
                ܟ̱ܠܵܗ̇ ܫܲܢ̄ܬܵܐ ܛܠܲܡܬܵܗ̇ ܘܒܸܛܠܲܬ̤ ܡ̣ܢ ܝܘܼܬܼܖ̈ܵܢܹܐ: 
                ܨܵܕܵܟܼ ܨܵܘܡܵܐ ܗܲܒܼ ܠܵܗ̇ ܠܢܲܦ̮ܫܵܐ ܣܲܝܒܵܖ̈ܵܬܼܵܗ̇܀ 
                ܐܵܦ ܗܵܫܵܐ ܓܹܝܪ ܕܝܲܪܚܵܐ ܗ̣̄ܘ ܕܲܓܼܠܝܼܣ ܡ̣ܢ ܥܲܠ̈ܠܵܬܼܵܐ: 
                ܠܐܝܼ ܥܲܡ ܢܲܦ̮ܫܵܐ ܕܐܝܼܬܼ ܠܵܗ̇ ܥ̇ܒܼܵܕܼܵܐ ܕܠܵܐ ܡܸܬܼܚܲܒܲܠ܀ 
                ܒܗܵܢܵܐ ܙܲܒܼܢܵܐ ܕܠܵܐ ܥܵܨܘܿܖܹ̈ܐ ܘܠܵܐ ܚܵܨ̈ܘܿܕܹܐ: 
                ܣܡܘܿܟܼܝܼܗ̇ ܠܵܐ̇ܝܵܐ ܒܨܵܘܡܵܐ ܕܡܲܥܬܲܪ ܠܲܕܼܠܵܐܹ̇ܐ ܒܹܗ܀ 
                ܝܵܘܡܵܢ ܕܲܥܣܸܩ ܙܲܒܼܢܵܐ ܠܥܲܡ̈ܠܹܐ ܦܲܓܼܖ̈ܵܢܵܝܹܐ: 
                ܢܩܝܼܡܝܼܗ̇ ܠܢܲܦ̮ܫܵܐ ܥܲܠ ܛܵܒܼ̈ܵܬܼܵܐ ܕܬܸܣܥܘܿܪ ܐܸܢܘܿܢ܀ 
                ܝܵܘܡܵܢ ܕܲܫܠܹܝܢ ܟܠ ܐܲܟܵܖܹ̈ܐ ܡ̣ܢ ܦܘܼܠܚܵܢܵܐ ܩܘܼܡܘ 
                ܬܲܝܵܒܹ̈ܐ ܟܢܘܼܫܘ ܥܲܠ̈ܠܵܬܼܵܐ ܕܙܲܕܝܼܩܘܼܬܼܵܐ܀
                 574 
                ܬܵܐ ܨܸܒܼܝܵܢܵܐ ܦܲܠܸܓܼ ܘܐܲܫܘܵܐ ܠܲܬܼܪܹܝܢ ܐܲܚ̈ܝܼܢ: 
                ܘܐܲܝܟܼ ܕܲܠܦܲܓܼܪܵܐ ܗܲܒܼ ܠܵܗ̇ ܠܢܲܦ̮ܫܵܐ ܡܵܐ ܕܚܵܫܲܚ ܠܵܗ̇܀ 
                ܒܩܲܝܛܵܐ ܬܖ̈ܲܝܗܘܿܢ ܪܲܗܛܘܼܗ̇ ܠܚܲܩܠܵܐ ܟܲܫܝܼܪܵܐܝܼܬܼ: 
                ܣܝܼܡ ܠܵܗ̇ ܠܢܲܦ̮ܫܵܐ ܡܢܵܬܼܵܗ̇ ܕܬܸܣܲܒܼ ܡ̣ܢ ܥܲܠ̈ܠܵܬܼܵܐ܀ 
                ܡܢܵܬܼܵܐ ܕܢܲܦ̮ܫܵܐ ܗܲܒܼ ܠܲܣܢܝܼ̈ܩܹܐ ܘܲܠܚܵܕܼܘܿܖܹ̈ܐ: 
                ܘܬܲܪܣܵܐ ܠܟܲܦܢܹ̈ܐ ܕܬܸܗܘܸܐ ܬܪܝܼܨ ܐܲܢ̄ܬܿ ܡܵܐ ܕܲܡܦܲܠܸܓܼ܀ 
                ܠܵܐ ܫܲܦܝܼܪܵܐ ܕܦܸܠܚܲܬ̤ ܢܲܦ̮ܫܵܐ ܥܲܡ ܫܲܘܬܵܦܵܗ̇: 
                ܕܬܸܗܘܸܐ ܛܠܝܼܡܬܵܐ ܡ̣ܢ ܐܵܠ̈ܨܵܬܼܵܐ ܕܡܸܬܼܒܲܥ̈ܝܵܢ ܠܵܗ̇܀ 
                ܠܥܲܖ̈ܛܸܠܵܝܹܐ ܨܵܒܼ̇ܝܵܐ ܕܬܲܠܒܸܫ ܫܲܡܠܵܐ ܥܲܡܵܗ̇: 
                ܡ̣ܢ ܢܲܦ̈ܩܵܬܹܗ ܕܦܲܓܼܪܵܐ ܚܲܣܸܟܼ ܘܐܲܪܦܵܐ ܕܬܸܣܥܘܿܪ܀ 
                ܪܵܓܵܐ ܢܲܦ̮ܫܵܐ ܕܢܸܚܣܘܿܟܼ ܦܲܓܼܪܵܐ ܡ̣ܢ ܡܹܐܟܼ̈ܠܵܬܹܗ: 
                ܘܡ̣ܢ ܡܵܙܘܿܢܹܗ ܬܬܲܪܣܹܐ ܒܨܵܘܡܹܗ ܠܟܼܠ ܕܲܣܢܝܼܩܝܼܢ܀ 
                ܐܘܿ ܠܵܟܼ ܦܲܓܼܪܵܐ ܐܲܪܟܸܢ ܟܲܬܼܦܵܟܼ ܘܲܦܠܘܿܚ ܥܲܡܵܗ̇: 
                ܕܢܲܦ̮ܫܵܐ ܕܒܼܵܥ̇ܝܵܐ ܕܬܸܛܘܿܪ ܚܲܝܹ̈ܐ ܐܵܦ ܠܵܟܼ ܐܵܦ ܠܵܗ̇܀ 
                ܐܲܪܡܵܐ ܢܝܼܪܵܗ̇ ܒܨܵܘܪܵܟܼ ܘܲܦܠܘܿܚ ܟܠ ܛܵܒܼ̈ܵܬܼܵܐ: 
                ܝܵܐܹ̇ܐ ܗ̣̄ܘ ܥܲܡܠܵܗ̇ ܕܟܼܠ ܡܵܐ ܕܪܵܗ̇ܛܵܐ ܠܵܐ ܡܸܬܼܚܲܒܲܠ܀ 
                ܠܵܘ ܠܵܗ̇ ܒܲܠܚܘܿܕܼ ܒܵܥ̇ܝܵܐ ܥܘܼܬܼܪܵܐ ܠܲܡܟܲܢܵܫܘܼ: 
                ܕܓܼܵܘܵܗ̇ ܗ̣̄ܘ (ܪܲܗܛܵܗ̇ ܐܲܪܦܵܐ( ܥܡܠܗ̇ ܐܪܦܗ̇ L.) ܚܦܝܼܛܵܐ
                    ܒܫܲܦܝܼܖ̈ܵܬܪܵܐ܀ 
                ܐܘܿ ܠܹܟܼܝ ܢܲܦ̮ܫܵܐ ܥܨܝܼ ܫܵܘܬܵܦܹܟܼܝ ܢܸܪܗܲܛ ܥܲܡܹܟܼܝ: 
                ܠܵܐ ܬܸܬ̇ܠܝܼܢ ܠܹܗ ܫܸܠܝܵܐ ܕܢܸܛܒܲܥ ܒܲܖ̈ܓܼܝܼܓܼܵܬܼܵܐ܀
                 575 
                ܥܵܨܹ̇ܐ ܗ̣̄ ܣܵܦ̇ܪܵܐ ܠܛܲܠܝܵܐ ܕܢܹܐܠܲܦ ܡܵܐ ܕܚܵܫܲܚ ܠܹܗ: 
                ܘܟܲܕܼ ܪܵܚܹ̇ܡ ܠܹܗ ܠܵܐ ܡܫܲܡܸܕܼ ܠܹܗ ܕܠܵܐ ܢܸܣܬܲܓܲܦ܀ 
                ܟܒܼܘܿܫܝ ܬܲܠܡܝܼܕܹܟܼܝ ܕܠܵܐ ܢܸܬܼܡܲܕܲܪ( Sic (ܢܸܬܼܡܲܪܲܕܼ؟ N. E. ) ܢܡܕܪ
                            L.) ܡ̣ܢ ܝܘܼܠܦܵܢܹܟܼܝ: 
                ܕܠܵܐ ܟܲܕܼ ܢܵܦܹ̇ܠ ܡ̣ܢ ܬܲܩܢܘܼܬܼܵܐ ܢܸܣܚܘܿܦ ܐܵܦ ܠܹܟܼܝ܀ 
                ܠܵܐ ܬܸܬ̇ܠܝܼܢ ܠܹܗ ܢܝܵܚܹ̈ܐ ܠܦܲܓܼܪܵܐ ܕܠܵܐ ܛܵܒܼܝܼܢ ܠܹܗ: 
                ܫܚܘܿܩ ܫܲܥܒܸܕܼܝܼܘܗܝ ܕܲܟܼܡܵܐ ܕܢܸܠܐܸܐ ܫܘܼܦܪܵܐ ܡܵܘܣܸܡ܀ 
                ܚܘܼܒܵܐ ܗ̣̄ܘ ܗܵܢܵܐ ܕܠܵܐ ܬܲܪܦܹܝܢܵܝܗܝ ܒܲܖ̈ܓܼܝܼܓܼܵܬܼܵܐ: 
                ܥܲܡܠܵܐ ܗܲܒܼܠܹܗ ܕܲܒܼܕܼܘܼܖ̈ܵܫܹܐ ܚܲܝܹ̈ܐ ܢܸܫܟܲܚ܀ 
                ܡܸܛܠ ܚܘܼܒܹܗ ܪܵܕܹܐ ܣܵܦ̇ܪܵܐ ܠܛܲܠܝܵܐ ܕܢܹܐܠܲܦ: 
                ܘܲܡܢܲܓܸܕܼ ܠܹܗ ܟܲܕܼ ܪܵܚܹ̇ܡ ܠܹܗ ܕܢܸܗܘܸܐ ܚܲܟܿܝܼܡ܀ 
                ܐܸܢܕܹܝܢ ܚܵܐܹ̇ܣ ܘܲܡܚܲܒܸܒܼ ܠܹܗ ܘܠܵܐ ܡܲܠܸܦ ܠܹܗ: 
                ܥ̇ܒܼܵܕܼܵܐ ܕܣܵܢܹ̇ܐ ܥܵܒܹ̇ܕܼ ܨܹܐܕܼܵܘܗܝ ܟܲܕܼ ܡܲܚܸܒܼ ܠܹܗ܀ 
                ܒܵܥܹ̇ܐ ܗ̣̄ܘ ܛܲܠܝܵܐ ܕܢܸܠܥܲܣ ܘܢܸܫܬܸܐ ܘܲܕܼܢܸܫܬܿܥܸܐ: 
                ܘܐܸܢ ܝܵܗܹ̇ܒܼ ܠܹܗ ܣܵܦ̇ܪܵܐ ܪܸܓܿܬܹܗ ܬܘܼܟܵܐ ܗܵܘܹ̇ܐ܀ 
                ܨܵܒܹ̇ܐ ܗ̣̄ܘ ܦܲܓܼܪܵܐ ܕܢܸܩܢܸܐ ܢܝܵܚܹ̈ܐ ܥܲܡ ܒܘܼܣܵܡܹ̈ܐ: 
                ܠܵܐ ܬܸܬܿܠܝܼܢ ܠܹܗ ܪܸܓܬܹܗ ܠܡܸܣܥܲܪ ܕܠܵܐ ܢܹܐܒܲܕܼ ܠܹܗ܀ 
                ܗܲܒܼܝ ܠܹܗ ܨܵܘܡܵܐ ܘܲܚܣܘܿܠܝ( ܘܚܣܘܠ Sic.) ܡܸܢܹܗ
                    ܣܲܝܒܵܖ̈ܵܬܼܵܐ: 
                ܕܛܵܒܼ ܡ̣ܢ ܠܲܚܡܵܐ ܟܲܦܢܵܐ ܡܵܘܬܲܪ ܘܲܡܦܲܢܸܩ ܠܹܗ܀ 
                ܐܘܿ ܠܵܟܼ ܦܲܓܼܪܵܐ ܐܲܪܟܸܿܢ ܐܸܕܼܢܵܟܼ ܨܹܝܕܼ ܣܵܦܲܪܬܼܵܐ: 
                ܘܲܫܡܲܥ ܡܸܢܵܗ̇ ܡܸܠܟܹ̈ܐ ܛܵܒܹ̈ܐ ܘܲܣܥܘܿܪ ܐܸܢܘܿܢ܀ 
                ܐܲܢ̄ܬܿ ܙܸܠ ܒܲܬܼܪܵܗ̇ ܕܢܲܦ̮ܫܵܐ ܕܪܵܚ̇ܡܵܐ ܫܲܦܝܼܖ̈ܵܬܼܵܐ:
                 576 
                ܕܐܸܢ ܬܸܫܡ̱ܥܝܼܗ̇ ܫܘܼܦܪܵܟܼ ܢܸܨܡܲܚ ܒܹܝܬܼ ܡܲܠܲܐܟܹ̈ܐ܀ 
                ܗܲܠܸܟܼ ܥܲܡܵܗ̇ ܕܲܠܥܸܠ ܪܵܚ̇ܡܵܐ ܠܲܡܦܲܪܵܚܘܼ: 
                ܣܲܩ ܡ̣ܢ ܛܝܼܢܵܐ ܕܗ̤ܝ ܒܲܫܡܲܝܵܐ ܨܵܒܼ̇ܝܵܐ ܕܬܸܥܡܲܪ܀ 
                ܝܲܩܝܼܪ ܥܲܦܪܵܟܼ ܘܐܸܢ ܬܸܬܸܿܠ ܠܵܗ̇ ܠܢܲܦ̮ܫܵܐ ܐܝܼܕܼܵܟܼ: 
                ܦܫܝܼܩ ܠܵܗ̇ ܕܬܲܣܩܵܟܼ ܡ̣ܢ ܩܸܩ̱ܠܬܵܐ ܠܒܹܝܬܼ ܡܲܠܟܿܘܼܬܼܵܐ܀ 
                ܣܝܵܢܵܐ ܗ̣̄ܘ ܓܸܢܣܵܟܼ ܘܐܸܢ ܫܵܡ̇ܥܵܐ ܠܵܟܼ ܬܹܐܬܸܐ ܥܲܡܵܟܼ: 
                ܒܟܸܬܵܐ ܣܪܝܼܬܼܵܐ ܡܸܬܼܚܲܒܲܠ ܐܲܢ̄ܬܿ ܐܵܦ ܐܲܢ̄ܬܿ ܐܵܦ ܗ̤ܝ܀ 
                ܚܘܼܣ ܥܲܠ ܫܘܼܦܪܵܐ ܕܲܡܨܲܠܲܠܬܵܐ ܕܠܵܐ ܢܸܬܼܚܲܒܲܠ: 
                ܘܲܠܐܝܼ ܥܲܡܵܗ̇ ܒܫܲܦܝܼܖ̈ܵܬܼܵܐ ܕܥܲܡܵܗ̇ ܬܲܡܠܸܟܼ܀ 
                ܐܸܢ ܝܵܗ̇ܒܵܐ ܠܵܟܼ ܨܵܘܡܵܐ ܠܡܸܠܒܲܟܼ ܠܵܐ ܬܸܟܼܪܸܐ ܠܵܟܼ: 
                ܩܲܒܸܿܠ ܘܲܚܕܼܝܼ ܕܪܲܒܿ ܗ̣̄ܘ ܟܠܝܼܠܵܐ ܕܡܸܫܟܲܚ ܐܲܢ̄ܬܿ ܒܹܗ܀ 
                ܐܸܢ ܓܵܠ̇ܙܵܐ ܠܵܟܼ ܡ̣ܢ ܡܹܐܟܼ̈ܠܵܬܼܵܐ ܠܵܐ ܬܸܬܼܝܲܥܲܢ: 
                ܕܲܠܦܵܬܼܘܿܪܹܗ ܕܡܲܠܟܵܐ ܩܪܵܬܼܵܟܼ ܒܲܢܙܝܼܪܘܼܬܼܵܗ̇܀ 
                ܐܸܢ ܫܵܚ̇ܩܵܐ ܠܵܟܼ ܒܫܲܗܪܵܐ ܪܲܒܵܐ ܘܒܲܨ̈ܠܵܘܵܬܼܵܐ: 
                ܐܸܬܿܬܿܥܝܼܪ ܘܲܠܐܝܼ ܕܬܸܗܘܸܐ ܚܲܒܼܪܵܐ ܠܲܫܡܲܝܵܢܹ̈ܐ܀ 
                ܒܟܼܠܗܘܿܢ ܥܲܡ̈ܠܹܐ ܕܙܲܕܝܼܩܘܼܬܼܵܐ ܗܲܒܼ ܠܵܗ̇ ܐܝܼܕܼܵܟܼ: 
                ܕܟܼܠܗܘܿܢ ܫܘܼܦܖܹ̈ܐ ܖ̈ܘܼܚܵܢܵܝܹܐ ܥܲܡܵܗ̇ ܬܸܫܟܲܚ܀ 
                ܐܘܿ ܨܸܒܼܝܵܢܵܐ ܕܢܲܦ̮ܫܵܐ ܘܦܲܓܼܪܵܐ ܒܹܗ ܡܸܬܼܦܲܩܕܝܼܢ: 
                ܐܲܢ̄ܬܿ ܫܲܠܝܼܛ ܐܲܢ̄ܬܿ ܥܲܠ ܛܵܒܼ̈ܵܬܼܵܐ ܘܥܲܠ ܒܝܼ̈ܫܵܬܼܵܐ܀ 
                ܦܲܓܼܪܵܐ ܘܢܲܦ̮ܫܵܐ ܠܵܟܼ ܡܸܫܬܲܡܥܝܼܢ ܒܐܸܣܟܹܡܲܝ̈ܗܘܿܢ: 
                ܐܲܢ̄ܬܿ ܚܘܼܨ ܐܸܢܘܿܢ ܕܲܗܘ̤ܵܘ ܦܵܠ̇ܚܝܼܢ ܫܲܦܝܼܖ̈ܵܬܼܵܐ܀ 
                ܩܘܼܡ ܨܸܒܼܝܵܢܵܐ ܦܩܘܿܕܼ ܐܲܝܟܼ ܡܲܠܟܵܐ ܠܚܲܝ̈ܠܵܘܵܬܼܵܐ:
                 577 
                ܫܵܡܲܥ̇ ܗ̣̄ܘ ܠܵܟܼ ܦܲܓܼܪܵܐ ܘܢܲܦ̮ܫܵܐ ܘܠܵܐ ܥܵܨܹܝܢ ܠܵܟܼ܀ 
                ܐܸܢ ܐܲܢ̄ܬܿ ܬܸܨܒܸܿܐ ܢܨܲܚܘ ܫܵܘ̈ܬܵܦܹܐ ܒܣܘܼܥܖ̈ܵܢܲܝܗܘܿܢ: 
                ܘܐܸܢ ܐܲܢ̄ܬܿ ܬܲܗܡܸܐ ܫܪܸܟܼ ܠܲܚܒܼܵܠܵܐ ܟ̱ܠܹܗ ܓܘܼܫܡܵܐ܀ 
                ܐܘܿ ܨܲܝܵܡܵܐ ܨܸܒܼܝܵܢܵܟܼ ܗ̣̄ܘ ܕܲܡܕܲܒܲܪ ܠܵܟܼ: 
                ܪܚܲܡ ܙܵܟܼܘܼܬܼܵܐ ܘܲܒܼܟܼܠ ܥܸܠ̈ܠܵܢ ܡܸܫܟܲܚ ܐܲܢ̄ܬܿ ܠܵܗ̇܀ 
                ܥܲܕܼ ܐܝܼܬܼ ܙܲܒܼܢܵܐ ܕܝܵܗܹ̇ܒܼ ܐܝܼܕܼܵܐ ܠܙܲܕܝܼܩܘܼܬܼܵܐ: 
                ܦܠܘܿܚ ܛܵܒܼ̈ܵܬܼܵܐ ܕܢܸܫܬܲܟܼ̈ܚܵܢ ܠܵܟܼ ܐܲܝܟܼ ܣܝܼ̈ܡܵܬܼܵܐ܀ 
                ܡ̣ܢ ܕܝܼܠܵܟܼ ܗ̣̄ܝ ܕܬܸܪܚܲܡ ܨܵܘܡܵܐ ܘܲܢܙܝܼܪܘܼܬܼܵܐ: 
                ܘܐܸܢܗܸܘ ܕܬܸܨܒܸܿܐ ܩܢܲܝܬܵܗ̇ ܠܟܼܠܵܗ̇ ܐܵܣܘܿܛܘܼܬܼܵܐ܀ 
                ܦܫܝܼܩ ܠܵܟܼ ܬܹܐܟܼܘܿܠ ܘܲܦܫܝܼܩ ܬܨܘܼܡ ܐܸܢ ܨܵܒܹ̇ܐ ܐܲܢ̄ܬܿ: 
                ܨܒܼܝܼ ܨܲܝܵܡܵܐ (ܒܥܲܢܘܵܝܘܼܬܼܵܐ ܘܗܵܐ ܒܸܣܡܲܬ̤ ܠܵܟܼ( ܘܗܐ ܒܣܡܬ̤ ܠܟ ܥܢܘܝܘܬܐ
                        R.)܀ 
                ܦܫܝܼܩ ܗ̣̄ܘ ܟܝܵܢܵܐ ܘܝܵܗܹ̇ܒܼ ܐܝܼܕܼܵܐ ܠܟܼܠ ܫܘܼ̈ܚܠܵܦܝܼܢ: 
                ܘܲܟܼܡܵܐ ܕܬܸܥܨܹܝܘܗܝ ܐܝܼܬܼ ܒܹܗ ܚܲܝܠܵܐ ܠܲܡܩܲܒܵܠܘܼ܀ 
                ܐܵܦ ܠܲܫܡܲܝܵܐ ܡܸܫܟܲܚ ܕܢܸܣܲܩ ܐܸܢ ܡܸܙܕܲܕܲܩ: 
                ܐܵܦ ܠܲܬܼܗܘܿܡܵܐ ܦܫܝܼܩ ܠܹܗ ܕܢܸܚܘܿܬܼ ܐܸܠܵܐ ܡܲܟܼܫܲܪ܀ 
                ܟܡܵܐ ܕܬܸܬܼܒ̱ܿܥܵܝܗܝ ܐܝܼܬܼ ܒܹܗ ܕܢܸܦܠܘܿܚ ܫܲܦܝܼܖ̈ܵܬܼܵܐ: 
                ܘܐܸܢ ܐܸܬܼܪܲܦܝܼ ܢܵܡ̣ ܘܐܸܬܿܕܲܡܲܟܼ ܨܹܝܕܼ ܣܲܢ̈ܝܵܬܼܵܐ܀ 
                ܐܸܢ ܐܲܥܝܼܪܬܵܝܗܝ ܗܵܐ ܥܒܼܝܼܕܼ ܚܲܒܼܪܵܐ ܠܲܫܡܲܝܵܢܹ̈ܐ: 
                ܘܐܸܢ ܬܲܓܲܪ ܠܹܗ ܕܡܸܟܼ ܥܲܠ ܛܝܼܢܵܐ ܘܩܲܕܝܼ ܥܲܦܪܹܗ܀ 
                ܐܘܿ ܨܲܝܵܡܵܐ ܐܲܥܝܼܪ ܢܲܦ̮ܫܵܟܼ ܙܲܕܝܼܩܵܐܝܼܬܼ: 
                ܕܲܟܼܡܵܐ ܕܬܸܨܒܸܿܐ ܦܵܠܲܚ ܐܲܢ̄ܬܿ ܠܵܗ̇ ܠܙܲܕܝܼܩܘܼܬܼܸܵܐ܀ 
                
                 578 
                ܣܲܓܝܼ ܦܫܝܼܩܵܐ ܙܲܕܝܼܩܘܼܬܼܵܐ ܠܲܕܼܪܵܚܹ̇ܡ ܠܵܗ̇: 
                ܘܡ̣ܢ ܣܘܼܥܖ̈ܵܢܹܐ ܙܥܘܿܖܹ̈ܐ ܡܠܲܩܸܛ ܘܲܡܟܲܢܸܫ ܠܵܗ̇܀ 
                ܩܲܠܝܼܠ ܡܵܘܫܸܛ ܠܲܚܡܵܐ ܠܟܲܦܢܵܐ ܘܲܡܣܲܒܲܥ ܠܹܗ: 
                ܩܲܠܝܼܠ ܣܵܡܹ̇ܟܼ ܠܐܲܝܢܵܐ ܕܲܣܢܝܼܩ ܘܲܡܥܲܕܲܪ ܠܹܗ܀ 
                ܒܲܙܒܲܢ ܚܵܐܹ̇ܣ ܥܲܠ ܡܸܣܟܹܿܢܵܐ ܘܡܸܙܕܲܕܲܩ ܒܹܗ: 
                ܘܬܼܘܼܒܼ ܟܲܪܝܵܐܠܹܗ ܥܲܠ ܚܵܕܼܘܿܪܵܐ ܘܠܵܐ ܫܵܐܹ̇ܛ ܠܹܗ܀ 
                ܐܝܼܬܼ ܬܘܼܒܼ ܐܸܡܲܬܝ ܕܐܵܦ (ܠܲܟܼܪܝܼܗܵܐ ܣܢܝܼܩܵܐ( ܠܣܢܝܩܐ ܟܪܝܗܐ R.)
                    ܣܵܥܲܪ: 
                ܘܲܒܼܠܵܐ ܡܸܕܸܡ ܫܵܪܹܐ ܪܸܓܿܬܹܗ ܒܝܲܕܼ ܡܵܘܗܲܒܼܬܹܗ܀ 
                ܩܲܠܝܼܠ (ܦܵܪܹܫ ܢܵܛܲܪ( ܩܠܝܠ ܦ̇ܪܫ R. ) ܢܲܦ̮ܫܹܗ
                    ܡ̣ܢ ܡܹܐܟܼ̈ܠܵܬܼܵܐ: 
                ܘܟܲܕܼ ܠܵܐ ܚܵܣܲܪ ܫܵܐܹ̇ܛ ܚܲܡܪܵܐ ܘܠܵܐ ܫܵܬܹ̇ܐ ܠܹܗ܀ 
                ܢܲܛܲܪ ܢܲܦ̮ܫܹܗ ܡ̣ܢ ܡܵܘ̈ܡܵܬܼܵܐ( ܬܘ̈ܩܠܬܐ P. L.) ܘܲܦܫܝܼܩ
                    ܗ̣̄ܘ ܠܹܗ: 
                ܥܝܵܕܼܵܐ ܗ̣̄ܘ ܠܵܒܹ̇ܟܼ ܘܲܕܼܠܵܐ ܥܲܡܠܵܐ ܗܘ̤ܵܐ ܫܲܪܝܼܪܵܐ܀ 
                ܚܵܣܹ̇ܠ ܦܘܼܡܹܗ ܡ̣ܢ ܨܘܿܚ̈ܝܵܬܼܵܐ ܕܲܟܼ̈ܢܵܘܵܬܹܗ: 
                ܘܡܲܡܠܵܐ ܣܲܢܝܵܐ ܠܵܐ ܡܸܫܬܲܡܲܫ ܡ̣ܢ ܣܸܦ̈ܘܵܬܹܗ܀ 
                ܐܵܣܲܪ ܚܘܼܒܹܗ ܒܲܬܼܪܲܥ ܒܲܝܬܵܗ̇ ܕܐܲܠܵܗܘܼܬܼܵܐ: 
                ܘܟܼܠܝܘܿܡ ܒܵܥܹ̇ܐ ܚܢܵܢܵܐ ܠܐܵܣܝܵܐ ܕܲܢܛܲܦܸܐ ܠܹܗ܀ 
                ܕܵܚܹ̇ܠ ܣܲܓܿܝܼ ܡ̣ܢ ܣܘܼܓܦܵܢܹ̈ܐ ܖ̈ܘܼܚܵܢܵܝܹܐ: 
                ܘܢܹܐܬܲܪ ܒܵܥܹ̇ܐ ܘܲܒܼܟܲܣ̈ܝܵܬܹܗ ܘܲܒܼ̈ܓܲܠܝܵܬܹܗ܀ 
                ܚܛܵܗܵܐ ܙܥܘܿܪܵܐ ܠܹܗ ܠܘܿܠܝܼܬܼܵܐ ܗ̣̄ܘ ܐܸܢ ܦܵܓܲܥ̇ ܒܹܗ: 
                ܘܥܵܪܹܩ ܡܸܢܹܗ ܐܲܝܟܼ ܡ̣ܢ ܩܸܢܵܐ ܕܲܚ̈ܘܵܘܵܬܼܵܐ܀
                 579 
                ܘܟܼܠ ܝܘܼܬܼܪܵܢܵܐ ܙܥܘܿܪܵܐ ܕܡܸܫܟܲܚ ܚܲܛ̣ܦܹܗ ܨܹܐܕܼܵܘܗܝ: 
                ܘܐܲܝܟܼ ܕܲܒܼܡܸܕܸܡ ܪܲܒܵܐ ܚܵܕܹܐ ܟܲܕܼ ܩܵܢܹ̇ܐ ܠܹܗ܀ 
                ܐܲܝܢܵܐ ܕܪܵܚܹ̇ܡ ܙܲܕܝܼܩܘܼܬܼܵܐ ܗܵܟܲܢ ܝܵܨܹ̇ܦ: 
                ܕܐܵܦ ܠܹܗ ܠܪܸܡܙܵܐ ܕܥܲܝܢܵܐ ܢܸܛܘܿܪ ܡ̣ܢ ܣܘܼܓܦܵܢܹ̈ܐ܀ 
                ܒܲܙܥܘܿܖ̈ܝܵܬܼܵܐ ܡܟܲܢܸܫ ܥܵܒܹ̇ܕܼ ܙܲܕܝܼܩܘܼܬܼܵܐ( ܟܪܝܐ ܪܒܐ L.): 
                ܥܕܲܡܵܐ ܕܢܸܗܘܸܐ ܛܘܼܪܵܐ ܪܵܡܵܐ ܕܪܵܡ ܡ̣ܢ ܐܲܪܥܵܐ܀ 
                ܐܵܦ ܕܸܒܿܘܿܪܬܵܐ ܒܩܲܠܝܼܠ ܩܲܠܝܼܠ ܡ̣ܢ ܥܸܩܵܖܹ̈ܐ: 
                ܡܟܲܢܫܵܐ ܘܥܵܒܼ̇ܕܵܐ ܐܵܕܼܫܵܐ ܚܲܠܝܵܐ ܕܲܡܠܸܐ ܬܲܗܪܵܐ܀ 
                ܠܵܐ ܡܵܐ̇ܢܵܐ ܠܵܗ̇ ܕܐܵܦ ܡ̣ܢ ܟܘܼ̈ܒܹܿܐ ܘܡ̣ܢ ܙܝܼ̈ܙܵܢܹܐ: 
                ܬܸܥܦܸܐ ܘܬܸܣܲܒܼ ܗܵܘ̇ ܡܵܐ ܕܚܵܫܲܚ ܠܲܣܢܝܼܩܘܼܬܼܵܗ̇܀ 
                ܟܠ ܝܘܿܡ ܠܵܐ̇ܝܵܐ ܕܟܼܠ ܝܘܿܡ ܬܵܘܣܸܦ ܥܲܠ ܝܘܼܬܼܪܵܢܵܗ̇: 
                ܘܡ̣ܢ ܢܘܼ̈ܛܦܵܬܼܵܐ ܒܩܲܠܝܼܠ ܩܲܠܝܼܠ ܐܵܣ̇ܢܵܐ ܢܲܦ̮ܫܵܗ̇܀ 
                ܠܵܘ ܡ̣ܢ ܓܲܙܵܐ( ܐܘܨܪܐ L.) ܪܲܒܵܐ ܫܵܩ̇ܠܵܐ ܘܡܵܠܝܵܐ ܓܲܙܵܗ̇: 
                ܐܸܠܵܐ ܒܥܲܡܠܵܐ ܡ̣ܢ ܢܸܬܼܖ̈ܘܿܢܹܐ ܕܟܼܠ ܗܲܒܵܒܼ̈ܝܼܢ܀ 
                ܝܵܘܡܵܢ ܩܲܠܝܼܠ ܝܵܘܡܵܐ ܐ̄ܚܪܹܢܵܐ ܒܨܝܼܪ ܡ̣ܢ ܩܲܠܝܼܠ: 
                ܘܡܵܐ ܕܟܲܢܸܫܬܹܗ ܗܘ̤ܵܐ ܠܹܗ ܣܲܓܿܝܼ ܒܟܲܫܝܼܪܘܼܬܼܵܗ̇܀ 
                ܙܲܕܝܼܩܘܼܬܼܵܐ ܕܕܼܵܡ̇ܝܵܐ ܒܛܲܥܡܵܗ̇ ܠܟܲܟܵܪܝܼܬܼܵܐ: 
                ܒܩܲܠܝܼܠ ܩܲܠܝܼܠ ܟܵܢܹ̇ܫ ܠܵܗ̇ ܐ̄ܢܵܫ( Deest in P. R.) ܡ̣ܢ
                    ܣܘܼܥܖ̈ܵܢܹܐ܀ 
                ܐܸܠܘܼ ܫܩܲܠܬܼܵܗ̇ ܡܲܐܝܼܢܘܼܬܼܵܐ ܠܕܸܒܿܘܿܪܝܼܬܼܵܐ: 
                ܕܬܸܒܼܣܸܐ ܒܟܼ̈ܘܼܒܹܿܐ ܘܲܕܼܠܵܐ ܬܸܫܟܲܢ ܥܲܠ ܙܝܼ̈ܙܵܢܹܐ܀ 
                ܘܬܸܬܼܩܲܛܲܥ ܠܵܗ̇ ܥܲܠ ܕܐܝܼܬܼ ܥܲܡܠܵܐ ܒܲܥܒܼܝܼ̈ܕܼܵܬܼܵܗ̇:
                 580 
                ܘܬܲܒܼܣܸܐ ܒܕܸܒܼܫܵܐ ܥܲܠ ܕܲܡܒܲܕܲܪ ܥܲܠ ܖ̈ܵܡܵܬܼܵܐ܀ 
                ܘܬܸܒܼܥܸܐ ܢܝܵܚܵܐ ܚܠܵܦ ܛܘܼܖ̈ܵܦܹܐ ܕܐܲܬܼܖ̈ܵܘܵܬܼܵܐ: 
                ܠܵܐ ܡܟܲܢܫܵܐ ܗ̄ܘܵܬܼ ܗܵܝ̇ ܚܲܠܝܘܼܬܼܵܐ ܕܲܟܼܢܝܼܫܵܐ ܠܵܗ̇܀ 
                (ܟܲܟܵܪܝܼܬܼܵܐ ܕܡܘܼܬܼܵܐ ܐܝܼܬܹܝܗ̇ ܕܙܲܕܝܼܩܘܼܬܼܵܐ( ܙܕܝܩܘܬܐ . . ܕܟܟܪܝܬܐ
                        L.): 
                ܘܐܲܝܢܵܐ ܕܝܵܨܹ̇ܦ ܐܲܝܟܼ ܕܸܒܿܘܿܪܬܵܐ ܡܟܲܢܸܫ ܗ̣̄ܘ ܠܵܗ̇܀ 
                ܐܸܢܕܹܝܢ ܡܲܒܼܣܸܐ ܒܲܙܥܘܿܖ̈ܝܵܬܼܵܐ ܟܲܕܼ ܡܸܣܬܲܥܖ̈ܵܢ: 
                ܘܲܠܗܵܝ̇ ܫܵܐܹ̇ܛ ܘܲܒܼܗܵܝ̇ ܡܲܗܸ̇ܠ ܘܲܠܗܵܝ̇ ܫܵܚܹ̇ܡ܀ 
                ܘܡܵܐ ܕܦܵܓܲܥ̇ ܒܹܗ ܣܢܝܼܩܵܐ ܕܚܵܕܲܪ ܫܲܒܼܩܹܗ ܘܲܥ̣ܒܲܪ: 
                ܘܡ̣ܢ ܡ̇ܢ ܕܲܟܼܪܝܼܗ ܡܲܡܐܸܢ ܥܵܒܲ̇ܪ ܘܠܵܐ ܣܵܥܲܪ ܠܹܗ܀ 
                ܘܐܸܢ ܣܘܼܥܪܵܢܵܐ ܢܸܥܪܲܨ ܝܵܡܹ̇ܐ ܟܲܕܼ ܠܵܐ ܕܵܚܹ̇ܠ: 
                ܘܲܕܼܠܵܐ ܡܕܲܓܸܠ ܠܵܐ ܚܫܝܼܒܼܵܐ ܠܹܗ ܚܛܝܼܬܼܵܐ ܕܝܼܡ̣ܵܐ܀ 
                ܘܫܵܪܹܐ ܨܵܘܡܹܗ ܒܟܼܠ ܥܸܠ̈ܠܵܬܼܵܐ ܟܲܕܼ ܡܸܬܼܚܲܟܲܡ: 
                ܘܡܸܛܠ ܖ̈ܵܚܡܵܘܗܝ ܫܵܬܹ̇ܐ ܚܲܡܪܵܐ ܡ̣ܢ ܚܘܼܒܵܐ ܠܲܡ܀ 
                ܘܲܢܛܘܼܖ̈ܵܬܹܗ ܕܨܵܘܡܵܐ ܚܲܒܸܿܠ̣ ܒܲܦܫܝܼܛܘܼܬܹܗ: 
                ܘܲܕܼܡܸܟܼ ܘܐܸܬܿܬܿܢܝܼܚ ܘܲܕܼܠܵܐ ܚܛܝܼܬܼܵܐ ܗ̣̄ܘ ܐܲܝܟܼ ܕܲܣ̣ܒܲܪ ܠܹܗ܀ 
                ܘܲܒܼܝܘܼܬܼܪܵܢܵܐ ܙܥܘܿܪܵܐ ܡܲܗܡܸܐ ܘܠܵܐ ܚܵܛܹ̇ܦ ܠܹܗ: 
                ܘܡ̣ܢ ܗܵܘ̇ ܪܲܒܵܐ ܦܣܝܼܩ ܗ̣̄ܘ ܚܘܼܒܹܗ ܘܠܵܐ ܒܵܥܹ̇ܐ ܠܹܗ܀ 
                ܒܩܲܠܝܼܠ ܩܲܠܝܼܠ ܦܵܫܲܬ̤ ܟ̱ܠܵܗ̇ ܙܲܕܝܼܩܘܼܬܼܵܐ: 
                ܘܠܵܐ ܩܵܢܹ̇ܐ ܠܵܗ̇ ܐܲܝܢܵܐ ܕܡܲܗܡܸܐ ܒܲܥܒܼܝ̈ܕܼܵܬܹܗ܀ 
                ܠܵܐ ܐܸܬܼܟܲܫܲܪ ܐܲܝܟܼ ܕܸܒܿܘܿܪܬܵܐ ܕܐܲܣܢܲܬ̤ ܢܲܦ̮ܫܵܗ̇: 
                ܒܲܙܥܘܿܖ̈ܝܵܬܼܵܐ ܘܗܵܐ ܡܸܫܬܲܒܿܚܵܐ ܒܐܵܕܼܫܵܠ ܪܲܒܵܐ܀
                 581 
                ܙܲܕܝܼܩܘܼܬܼܵܐ ܒܐܲܡܝܼܢܘܼܬܼܵܐ ܐ̄ܢܵܫ ܩܵܢܹ̇ܐ ܠܵܗ̇: 
                ܘܐܲܝܢܵܐ ܕܡܲܡܐܸܢ ܥܵܪܩܵܐ ܡܸܢܹܗ ܘܠܵܐ ܡܲܕܼܪܸܟܼ ܠܵܗ̇܀ 
                ܗܵܐ ܝܵܘ̈ܡܵܬܼܵܐ ܠܙܲܕܝܼܩܘܼܬܼܵܐ ܠܐܝܼ ܨܲܝܵܡܵܐ: 
                ܕܬܸܫܟܲܚ ܬܸܟܼܢܘܿܫ ܗܵܝ̇ ܚܲܠܝܘܼܬܼܵܐ ܕܡܲܠܝܵܐ ܚܲܝܹ̈ܐ܀ 
                ܣܒܲܪܬܼܵܐ ܕܵܢ̇ܚܵܐ( ܕܚܝ̈ܐ R.) ܘܚܵܕܹܝܢ ܥܵܡ̈ܠܹܐ( ܥܠܡ̈ܐ
                        R.) ܒܦܘܼܖ̈ܫܵܢܲܝܗܘܿܢ: 
                ܘܓܲܠܝܘܼܬܼ ܐܲܦܹ̈ܐ ܬܵܒܲܥ̇ ܕܸܢܚܹܗ ܕܝܵܘܡܵܐ ܪܲܒܵܐ܀ 
                ܪܗܲܛ ܒܹܗ ܒܨܵܘܡܵܐ ܐܲܝܟܼ ܟܲܫܝܼܪܵܐ ܕܒܼܵܥܹ̇ܐ ܚܲܝܵܘ̈ܗܝ: 
                ܕܡܵܐ ܕܲܩܝܵܡܬܵܐ ܡܚܵܘܝܵܐ ܢܲܦ̮ܫܵܗ̇ ܚܕܼܘܿܓܼܵܐ ܬܸܗܘܸܐ܀ 
                ܨܘܼܡ ܠܹܗ ܠܚܲܬܼܢܵܐ ܕܲܒܼܡܸܫܬܿܘܼܬܹܗ ܬܸܚܕܸܐ ܥܲܡܹܗ: 
                ܕܲܠܨܲܝܵܡܹ̈ܐ ܐܵܬܹ̇ܐ ܢܢܲܨܲܚ ܒܲܟܼܠܝܼܠܲܝ̈ܗܘܿܢ܀ 
                ܒܝܵܘܡܹܗ ܪܲܒܵܐ ܡܵܐ ܕܡܸܬܼܒܲܥܝܵܐ ܓܲܠܝܘܼܬܼ ܐܲܦܹ̈ܐ: 
                ܐܲܝܟܲܢ ܬܸܚܕܸܐ ܐܸܠܵܐ ܐ̄ܒܼܝܼܠ ܐܲܢ̄ܬܿ ܥܲܡ ܨܲܝܵܡܹ̈ܐ܀ 
                ܒܗܵܘ̇ ܥܲܕܼܥܹܕܼܵܐ ܕܡܲܦܨܲܚ ܐܲܦܹ̈ܐ ܕܟܼܠ ܕܲܟܼܡܝܼܪܝܼܢ: 
                ܡܘܿܢ ܝܘܼܬܼܪܵܢܵܐ ܡܸܫܟܲܚ ܐܲܢ̄ܬܿ ܒܹܗ ܕܗܵܐ ܦܨܝܼܚ ܐܲܢ̄ܬܿ ܗ̣̄ܘ܀ 
                ܡܵܐ ܕܡܸܬܼܝܲܗܒܿܝܼܢ ܟܠ ܖ̈ܘܼܟܵܟܹܐ ܠܟܼܠ ܨܲܝܵܡܹ̈ܐ: 
                ܡܘܿܢ ܫܵܩܹ̇ܠ ܐܲܢ̄ܬܿ ܐܸܢ ܡ̣ܢ ܝܵܘܡܵܢ ܒܵܣܘܿܡܵܐ ܐܲܢ̄ܬܿ܀ 
                ܡܵܐ ܕܲܢܝܵܚܬܵܐ ܐܵܬܼ̇ܝܵܐ ܒܛܲܟܼܣܵܗ̇ ܠܐܲܝܢܵܐ ܕܲܠܐܝܼ: 
                ܐܸܠܵܐ ܠܵܐܹ̇ܝܬܿ( ܠܐܐ ܐܢ̄ܬ P.) ܐܲܝܟܲܢ ܬܸܬܿܢܝܼܚ ܥܲܡ ܨܲܝܵܡܹ̈ܐ܀ 
                ܐܸܢܗ̤ܘ ܕܚܲܫܹܗ ܕܝܼܚܝܼܕܼܵܝܵܐ ܠܵܐ ܡܲܚܸܫ ܠܵܟܼ: 
                ܐܲܦܠܵܐ ܒܦܸܨܚܹܗ ܡܢܵܬܼܵܐ ܐܝܼܬܼ ܠܵܟܼ ܕܬܸܬܼܒܲܣܲܡ ܒܹܗ( ܒܗ̇
                        R.)܀ 
                ܝܵܘܡܵܐ ܪܲܒܵܐ ܕܐܵܬܹ̇ܐ ܕܢܲܫܸܐ ܠܟܼܠ ܨܲܝܵܡܹ̈ܐ:
                 582 
                ܡܘܿܢ ܡܲܫܸܐ ܠܵܟܼ ܐܸܢܗ̤ܘ ܕܨܵܘܡܵܐ ܠܵܐ ܡܲܠܐܸܐ ܠܵܟܼ܀ 
                ܡܵܐ ܕܲܣܒܲܪܬܼܵܐ ܝܵܗ̇ܒܵܐ ܐܲܓܼܪܵܐ ܕܲܢܛܘܼܖ̈ܵܬܼܵܐ: 
                ܡܘܿܢ ܬܸܬܸܠ ܠܵܟܼ ܐܸܠܵܐ ܢܛܝܼܪ ܐܲܢ̄ܬܿ ܙܲܕܝܼܩܵܐܝܼܬܼ: 
                ܗܲܒܼ ܠܹܗ ܠܨܵܘܡܵܐ ܥܲܡ̈ܠܹܐ ܘܖ̈ܲܗܛܹܐ ܕܙܲܕܝܼܩܘܼܬܼܵܐ: 
                ܕܬܹܐܙܲܠ ܬܸܫܟܲܚ ܨܹܝܕܼ ܫܘܼܠܵܡܹܗ ܟܠܝܼܠܵܐ ܪܲܒܵܐ܀ 
                ܟܠܝܼܠܹܗ ܕܨܵܘܡܵܐ ܢܘܼܚܵܡܹܗ ܗ̣̄ܘ ܕܝܼܚܝܼܕܼܵܝܵܐ: 
                ܘܐܸܠܵܐ ܬܨܘܼܡ ܐܵܦ ܠܲܟܼܠܝܼܠܵܐ ܢܘܼܟܼܪܵܝܵܐ ܐܲܢ̄ܬܿ܀ 
                ܨܵܘܡܵܐ ܘܫܲܗܪܵܐ ܘܲܨ̈ܠܵܘܵܬܼܵܐ ܥܲܡ ܙܸܕܼ̈ܩܵܬܼܵܐ: 
                ܐܲܝܟܼ ܖ̈ܘܼܡܝܵܢܹܐ ܠܚܲܬܼܢܵܐ ܥܵܐ̇ܠܝܼܢ ܡܵܐ ܕܐܸܬܼܢܲܚܲܡ܀ 
                ܐܵܙܹ̇ܠ ܨܵܘܡܵܐ ܘܐܵܬܼ̇ܝܵܐ ܩܝܵܡܬܹܗ ܕܝܼܚܝܼܕܼܵܝܵܐ: 
                ܡܘܿܢ ܬܲܪܡܸܐ ܠܹܗ ܐܸܠܵܐ ܬܨܘܼܡ ܙܲܕܝܼܩܵܐܝܼܬܼ܀ 
                ܥܲܕܼ ܐܝܼܬܼ ܨܵܘܡܵܐ ܟܢܘܿܫ ܠܵܟܼ ܡܸܢܹܗ ܟܠ ܖ̈ܘܼܡܝܵܢܝܼܢ: 
                ܕܡܵܐ ܕܚܵܙܹ̇ܐ ܠܵܟܼ ܚܲܬܼܢܵܐ ܒܝܵܘܡܹܗ ܢܸܚܕܸܐ ܠܐܘܼܪܥܵܟܼ܀ 
                ܐܲܝܟܼ ܕܸܒܿܘܿܪܬܵܐ ܠܲܩܸܛ ܐܵܕܼܫܹ̈ܐ ܡ̣ܢ ܙܸܕܼ̈ܩܵܬܼܵܟܼ: 
                ܕܲܠܡܸܫܬܘܼܬܼܵܐ ܬܵܘܒܸܿܠ ܥܲܡܵܟܼ ܟܲܟܵܪܝܼܬܼܵܐ܀ 
                ܙܲܕܝܼܩܘܼܬܼܵܐ ܛܲܥܡܵܐ ܗ̣̄ܝ ܚܲܠܝܵܐ ܒܥܹܐܕܼܵܐ ܪܲܒܵܐ: 
                ܬܹܐܙܲܠ ܥܲܡܵܟܼ ܘܐܸܠܵܐ ܚܲܬܼܢܵܐ ܠܵܐ ܚܵܕܹܐ ܒܵܟܼ܀ 
                ܡܵܐ ܕܨܲܝܵܡܹ̈ܐ ܥܵܐ̇ܠܝܼܢ ܩܘܼܕܼܡܵܘܗܝ ܒܐܸܣܟܹܡܲܝ̈ܗܘܿܢ: 
                ܘܲܛܥܝܼܢ ܟܠܢܵܫ ܫܲܗܪܹܗ ܘܨܵܘܡܹܗ ܘܥܲܢܘܵܝܘܼܬܹܗ܀ 
                ܡܵܐ ܕܙܸܕܼ̈ܩܵܬܼܵܐ ܒܥܹܐܕܹܗ ܢܵܨ̈ܚܵܢ ܐܲܝܟܼ ܢܲܗܝܼܖܹ̈ܐ: 
                ܐܲܢ̄ܬܿ ܡܘܿܢ ܬܵܘܒܸܿܠ ܐܸܢ ܚܸܫܘܿܟܼ ܐܲܢ̄ܬܿ ܒܲܥܒܼܝܼ̈ܕܼܵܬܼܵܟܼ܀ 
                ܡܵܐ ܕܲܟܼܪܝܼܟܼܝܼܢ ܥܝܼܖܹ̈ܐ ܠܩܲܒܼܪܹܗ ܒܚܸܘܵܖ̈ܲܝܗܘܿܢ:
                 583 
                ܘܬܲܠܡܝܼ̈ܕܼܵܬܼܵܐ ܒܒܸܣܡܵܢܲܝ̈ܗܹܝܢ ܘܲܒܼܥܸܛܖ̈ܲܝܗܹܝܢ܀ 
                ܒܨܲܦܪܵܐ ܪܲܒܵܐ ܕܢܵܗܖ̈ܵܢ ܐܲܦܹ̈ܐ ܕܟܼܠ ܨܲܝܵܡܹ̈ܐ: 
                ܒܓܲܠܝܘܼܬܼ ܐܲܦܹ̈ܐ ܗ̤ܘܝܼ ܩܲܕܼܡܵܝܵܐ ܕܬܼܵܒܲܥ̇ ܐܲܓܼܪܹܗ܀ 
                ܪܗܲܛ ܠܲܣܒܲܪܬܼܵܐ ܐܲܝܟܼ ܝܘܿܚܲܢܲܢ ܩܲܠܝܼܠܵܐܝܼܬܼ: 
                ܘܲܚܙܝܼ ܩܝܵܡܬܵܐ ܟܲܕܼ ܠܵܐ ܒܣܝܼܪ ܐܲܢ̄ܬܿ ܡ̣ܢ ܟܹܐܢܘܼܬܼܵܐ܀ 
                ܠܒܲܫ ܠܲܩܝܵܡܬܵܐ( ܒܩܝܡܬܐ L.) ܢܲܚܬܵܐ ܕܲܙܩܝܼܪ ܡ̣ܢ ܙܸܕܼ̈ܩܵܬܼܵܐ: 
                ܕܬܸܗܘܸܐ ܫܲܦܝܼܪ ܐܲܝܟܼ ܡܲܠܲܐܟܹ̈ܐ ܒܚܸܘܵܖ̈ܲܝܗܘܿܢ܀ 
                ܠܐܝܼ ܘܛܲܝܸܒܼ ܠܵܟܼ ܡܵܐܢܹ̈ܐ ܫܒܼܝܼ̈ܚܹܐ ܠܥܹܐܕܼܵܐ ܪܲܒܵܐ: 
                ܨܵܘܡܵܐ ܕܲܟܼܝܵܐ ܘܙܲܕܝܼܩܘܼܬܼܵܐ ܕܡܲܠܝܵܐ ܫܘܼܦܖܹ̈ܐ܀ 
                ܡ̇ܢ ܝܵܗܹ̇ܒܼ ܠܵܟܼ ܬܸܚܕܸܐ ܒܥܹܐܕܼܵܐ ܪܘܼܚܵܢܵܐܝܼܬܼ: 
                ܐܸܠܵܐ ܠܵܐܹ̇ܝܬܿ ܥܲܡܹܗ ܕܨܵܘܡܵܐ ܦܲܓܼܪܵܢܵܐܝܼܬܼ܀ 
                ܩܘܼܡ ܐܸܬܼܟܲܫܲܪ ܒܲܨ̈ܠܵܘܵܬܼܵܐ ܘܲܒܼܙܸܕܼ̈ܩܵܬܼܵܐ: 
                ܘܒܲܢܛܘܼܖ̈ܵܬܼܵܐ ܕܬܼܵܒܲܥ̇ ܨܵܘܡܵܐ ܡ̣ܢ ܨܲܝܵܡܹ̈ܐ܀ 
                ܒܕܲܪܓܹܗ ܟܠܢܵܫ ܢܸܛܘܿܪ ܢܲܦ̮ܫܹܗ ܡ̣ܢ ܣܘܼܓܦܵܢܹ̈ܐ: 
                ܕܨܵܘܡܵܐ ܕܓܼܵܘܵܐ ܗ̣̄ܘ ܟܠܢܵܫ ܢܸܠܐܸܐ ܒܫܲܦܝܼܖ̈ܵܬܼܵܐ܀ 
                ܢܨܘܼܡ ܪܵܥܝܵܐ ܚܠܵܦ ܡܲܪܥܝܼܬܹܗ ܘܲܚܠܵܦ ܢܲܦ̮ܫܹܗ: 
                ܘܒܲܨ̈ܠܵܘܵܬܼܵܐ ܢܸܛܥܲܢ ܝܘܼܩܪܵܐ ܕܥܵܢ̈ܵܐ ܟ̱ܠܵܗ̇܀ 
                ܐܵܦ ܥܲܠܠܵܢܹ̈ܐ ܒܨܵܘܡܵܐ ܢܣܘܼܓܼܘܼܢ ܟܠ ܬܘܼܖ̈ܥܵܬܼܵܐ: 
                ܘܒܲܒܼܛܝܼܠܘܼܬܼܵܐ ܢܸܛܪܘܼܢ ܥܵܢ̈ܵܐ ܡ̣ܢ ܓܲܝܵܣܹ̈ܐ܀ 
                ܩܝܵܡܵܐ ܢܲܟܼܦܵܐ ܢܸܪܗܲܛ ܒܵܬܲܪ ܩܲܕܝܼܫܘܼܬܼܵܐ: 
                ܒܸܠܥܵܕܹܝܗ̇ ܓܹܝܪ ܢܸܚܙܸܐ ܠܡܵܪܝܵܐ ܐ̄ܢܵܫ ܠܵܐ ܡܸܫܟܲܚ܀
                 584 
                ܢܨܘܼܡ ܣܵܒܼܵܐ ܕܲܩܦܲܣܼ ܘܲܙܥܲܪ ܟܲܝܠܵܐ ܕܲܫܢܵܘ̈ܗܝ: 
                ܕܲܒܼܫܲܪܟܵܢܵܐ ܕܚܲܝܹ̈ܐ ܕܦܵܫ̣ ܠܹܗ ܠܡܵܪܝܵܐ ܢܸܫܦܲܪ܀ 
                ܢܨܘܼܡ ܛܲܠܝܵܐ ܕܲܠܛܲܠܝܘܼܬܼܵܐ ܦܐܸܐ ܢܸܨܚܵܢܵܐ: 
                ܘܲܠܡܲܦܘܼܠܬܵܐ ܣܲܓܿܝܼ ܦܫܝܼܩܵܐ ܬܸܚܙܸܐ ܢܲܦ̮ܫܵܗ̇܀ 
                ܥܠܲܝ̈ܡܹܐ ܢܨܘܼܡܘܼܢ ܕܲܩܫܸܐ ܚܹܐܦܵܐ ܕܲܥܠܲܝܡܘܼܬܼܵܐ: 
                ܘܐܸܢܗ̤ܘ ܕܨܵܘܡܵܐ ܠܵܐ ܡܲܪܟܸܢ ܠܵܗ̇ ܛܥܵܬ̤ ܝܘܼܬܼܪܵܢܵܗ̇܀ 
                ܢܸܫܲܝ̈ ܓܲܒܼܖܹ̈ܐ ܒܨܵܘܡܵܐ ܨܲܒܸܬܼܝ̈ ܠܲܩܢܘܿܡܲܝ̈ܟܹܝܢ: 
                ܘܲܒܼܕܲܟܼܝܘܼܬܼܵܐ ܫܦܲܖ̈ܝ ܠܐܲܠܵܗܵܐ ܘܲܠܓܲܒܼܖ̈ܲܝܟܹܝܢ܀ 
                ܫܲܦܝܼܪ ܨܵܘܡܵܐ ܠܲܒܼܬܼܘܼ̈ܠܵܬܼܵܐ ܘܠܲܡܟܼܝܼܖ̈ܵܬܼܵܐ: 
                ܕܗ̤ܘ ܝܲܗ̣̄ܒܼ ܠܐܸܣܬܹܝܪ ܫܘܼܦܪܵܐ ܕܬܸܙܟܸܐ ܒܫܲܦܝܼܖ̈ܵܬܼܵܐ܀ 
                ܐܵܦ ܐܲܪܡܲܠܬܵܐ ܕܩܸܒܼܪܲܬ̤ ܓܲܒܼܪܵܗ̇ ܨܵܘܡܵܐ ܬܸܪܚܲܡ: 
                ܕܗ̤ܘ ܡܩܲܪܸܒܼ ܠܵܗ̇ ܨܹܝܕܼ ܐܲܠܵܗܵܐ ܕܢܸܗܘܸܐ ܓܲܒܼܪܵܗ̇܀ 
                ܢܨܘܼܡ ܝܲܬܼܡܵܐ ܕܐܵܘܒܸܿܕܼ ܐܲܒܼܘܼܗܝ ܟܲܕܼ ܡܸܬܼܟܲܫܲܦ: 
                ܠܐܲܒܼܵܐ ܕܝܲܬܼܡܹ̈ܐ ܕܲܢܡܲܠܸܐ ܠܹܗ ܚܲܣܝܼܪܘܼܬܹܗ܀ 
                ܢܨܘܼܡ ܐܲܟܵܪܵܐ ܡܸܛܠ ܚܲܩܠܹܗ ܘܡܸܛܠ ܢܲܦ̮ܫܹܗ: 
                ܕܬܸܗܘܸܐ ܢܛܝܼܪܵܐ ܥܠܲܠܬܼܵܐ ܘܢܲܦ̮ܫܵܐ ܡ̣ܢ ܢܸܟܼܝܵܢܹ̈ܐ܀ 
                ܡܥܲܕܲܪ ܨܵܘܡܵܐ ܘܲܠܬܲܓܵܪܵܐ ܕܪܵܕܹܐ ܒܐܘܼܪܚܵܐ: 
                ܕܥܲܡ ܬܹܐܓܼܘܼܪܬܹܗ ܟܠ ܝܘܼܬܼܖ̈ܵܢܹܐ ܕܪܘܼܚܵܐ ܢܸܟܼܢܘܿܫ܀ 
                ܡܵܘܬܲܪ ܨܵܘܡܵܐ ܘܲܠܥܲܬܝܼܖܹ̈ܐ ܕܲܒܼܙܸܕܼ̈ܩܵܬܼܵܐ: 
                ܢܸܩܢܘܿܢ ܖ̈ܵܚܡܹܐ ܕܲܡܩܲܒܿܠܝܼܢ ܠܗܘܿܢ ܒܲܡܛܲܠܠܲܝ̈ܗܘܿܢ܀ 
                ܝܵܐܹ̇ܐ ܨܵܘܡܵܐ ܘܲܠܡܸܣܟܹܿܢܵܐ ܕܟܲܦܢܵܐ ܟܲܪܣܹܗ: 
                ܕܗ̤ܘ ܗܵܘ̇ ܟܲܦܢܹܗ ܡ̣ܢ ܨܸܒܼܝܵܢܹܗ ܢܨܘܼܡ ܠܐܲܠܵܗܹܗ܀
                 585 
                ܢܨܘܼܡܘܼܢ ܣܲܓܿܝܼ ܝܑܼܚܝܼ̈ܕܼܵܝܹܐ ܒܢܲܝ̈ ܡܲܠܟܿܘܼܬܼܵܐ: 
                ܕܲܠܗܘܿܢ ܫܲܦܝܼܪ ܩܹܐܪܣܵܐ ܘܕܲܪܵܐ ܐܵܦ ܢܸܨܚܵܢܵܐ܀ 
                ܢܨܘܼܡ ܚܲܛܵܝܵܐ ܕܚܵܘܒܿܬܹܗ ܪܲܒܵܐ ܗ̣̄ܝ ܐܵܦ ܡ̣ܢ ܚܲܝܠܹܗ: 
                ܕܲܠܡܵܐ ܢܸܫܟܲܚ ܢܸܦܪܘܿܥ ܩܲܠܝܼܠ ܡ̣ܢ ܐܸܫܛܵܪܹܗ܀ 
                ܢܨܘܼܡ ܙܲܕܝܼܩܵܐ ܕܢܵܘܣܸܦ ܫܘܼܦܪܵܐ ܠܙܲܕܝܼܩܘܼܬܹܗ: 
                ܕܲܟܼܡܵܐ ܕܢܸܣܲܩ ܐܝܼܬܼ ܗ̣̄ܘ ܕܲܪܓܼܵܐ ܠܪܵܘܡܵܐ ܕܲܠܥܸܠ܀ 
                ܢܨܘܼܡ ܬܲܝܵܒܼܵܐ ܕܙܲܒܼܢܵܐ ܗ̄ܘ̣ ܕܥܵܨܹ̇ܒܼ ܠܲܡ̈ܡܲܚܲܝܵܐ: 
                ܘܐܸܢܗ̤ܘ ܕܝܵܨܹ̇ܦ ܟܠܗܘܿܢ ܫܘܼܚܢܵܘ̈ܗܝ ܡܸܬܼܚܲܠܡܝܼܢ ܒܹܗ܀ 
                ܒܗܵܢܵܐ ܨܲܘܡܵܐ ܢܨܘܼܡܘܼܢ ܒܬܼܘܼ̈ܠܹܐ ܐܵܦ ܩܲܕܝܼ̈ܫܹܐ: 
                ܕܒܹܗ ܨܵܐܹ̇ܡ ܗ̄ܘ̣ܵܐ ܒܪܵܗ̇ ܕܲܒܼܬܼܘܼܠܬܵܐ ܡܸܛܠܵܬܲܢ܀ 
                ܡܙܵܘ̈ܓܹܐ ܢܨܘܼܡܘܼܢ ܘܲܒܼܙܸܕܼ̈ܩܵܬܼܵܐ ܚܕܼܵܕܹ̈ܐ ܢܸܩܢܘܿܢ: 
                ܘܟܲܕܼ ܛܵܒܼ ܕܲܟܼܝܵܐ ܗ̣̄ܝ ܢܝܲܩܪܘܼܢ ܥܲܪܣܵܐ ܕܫܵܘܬܵܦܘܼܬܼܵܐ܀ 
                ܐܵܦ ܓܲܝܵܪܵܐ ܐܸܢܗ̤ܘ ܕܨܵܐܹ̇ܡ ܠܵܐ ܡܸܣܬܲܓܲܦ: 
                ܕܲܡܩܲܚܲܦ ܠܹܗ ܠܚܲܫܵܐ ܒܨܵܘܡܵܐ ܘܡܲܓܼܗܸܐ ܡܸܢܹܗ܀ 
                ܠܵܐ ܚܵܣ̇ܪܵܐ ܗ̄ܘ̣ܵܬܼ ܐܸܠܘܼ ܨܵܡܲܬ̤ ܐܵܦ ܙܵܢܝܼܬܼܵܐ: 
                ܕܲܡܨܸܐ ܗ̣̄ܘ ܨܵܘܡܵܐ ܢܫܲܗܸܐ ܠܚܘܼܨܦܵܐ ܕܙܲܠܝܼ̈ܠܵܬܼܵܐ܀ 
                ܟܠܗܘܿܢ ܬܸܓܼܡܹ̈ܐ ܒܐܸܣܟܹܡܲܝ̈ܗܘܿܢ ܘܲܒܼܕܲܖ̈ܓܲܝܗܘܿܢ: 
                ܒܛܲܟܼܣܹܗ ܟܠ ܐ̄ܢܵܫ ܢܝܲܩܲܪ ܨܵܘܡܵܐ ܡܠܸܐ ܝܘܼܬܼܖ̈ܵܢܹܐ܀ 
                ܣܲܓܝܼ ܪܚܝܼܡܵܐ ܙܲܕܝܼܩܘܼܬܼܵܐ ܕܡ̣ܢ ܣܲܓܝܼ̈ܐܹܐ: 
                ܘܐܝܼܬܼ ܒܵܗ̇ ܚܲܝܠܵܐ ܕܬܸܣܲܒܼ ܟܠܝܘܿܡ ܟܠ ܫܸܐ̈ܠܵܬܼܵܗ̇܀ 
                ܛܘܼ̈ܦܲܝ ܡܸܛܪܵܐ ܚܕܼܵܐ ܚܕܼܵܐ ܡܸܢܗܹܝܢ ܛܘܼ̈ܦܹܐ ܐܸܢܹܝܢ: 
                ܘܡܵܐ ܕܐܸܬܼܟܲܢܲܫ ܗܲܘ̇ܝܵܐ ܪܓܸܠܬܵܐ ܕܠܵܐ ܡܸܬܼܥܲܒܼܪܵܐ܀
                 586 
                ܡ̣ܢ ܢܘܼܛ̈ܦܵܬܼܵܐ ܣܲܓܝܼ̈ܐܵܬܼܵܐ ܓܪܘܼܦܝܵܐ ܪܲܒܵܐ: 
                ܘܒܲܨ̈ܠܵܘܵܬܼܵܐ ܕܥܲܡܵܐ ܟ̱ܠܹܗ ܨܵܘܡܵܐ ܦܲܐܝܵܐ܀ 
                ܟܲܠܲܬܼ ܢܘܼܗܪܵܐ( ܡܠܟܐ R.) ܒܟܼܠܗܘܿܢ ܝܲܠܕܹܝ̈ܗ ܫܵܐ̇ܠܵܐ ܖ̈ܲܚܡܹܐ: 
                ܕܡ̣ܢ ܟܠ ܦܘܼܡ̈ܝܼܢ ܬܸܣܓܸܐ ܨܠܘܿܬܼܵܐ ܘܗܵܐ ܐܸܫܬܲܡܥܲܬ̤܀ 
                ܐܲܝܟܼ ܕܲܠܡܹܐܡܲܪ ܛܘܼ̈ܦܝܼܢ ܡ̣ܢ ܥܲܪܦܸܠܵܐ: 
                ܘܗܵܘ̇ܝܵܐ ܪܓܸܠܬܵܐ ܕܠܵܐ ܡܸܬܼܥܲܒܼܪܵܐ ܡ̣ܢ ܪܲܒܿܘܼܬܼܵܗ̇܀ 
                ܒܣܲܓܿܝܼܐܘܼܬܼܵܐ ܕܦܘܼܡܹ̈ܐ ܡܠܝܼ̈ܠܹܐ ܚܕܼܵܐ ܬܸܫܒܿܘܿܚܬܵܐ: 
                ܘܫܵܐ̇ܠܵܐ ܘܢܵܣ̇ܒܵܐ ܘܠܵܐ ܡܸܬܼܟܲܠܝܵܐ ܡ̣ܢ ܕܲܝܵܢܵܐ܀ 
                ܒܟܼܠ ܨܲܝܵܡ̈ܝܼܢ ܘܲܒܼܟܼܠ ܡܘܼܫ̈ܚܵܢ ܥܵܒܼ̇ܕܵܐ ܨܵܘܡܵܐ: 
                ܘܲܒܼܟܼܠ ܦܘܼܡ̈ܝܼܢ ܩܵܪܝܵܐ ܠܡܵܪܵܗ̇ ܥܲܬܿܝܼܪܵܐܝܼܬܼ܀ 
                ܠܨܵܘܡܵܐ ܕܟܼܠ ܐ̄ܢܵܫ ܡܟܲܢܫܵܐ ܘܥܵܒܼ̇ܕܵܐ ܨܵܘܡܵܐ ܪܲܒܵܐ: 
                ܕܕܼܵܡܹ̇ܐ ܠܢܲܗܪܵܐ ܗܵܘ̇ ܕܐܸܬܼܟܲܢܲܫ ܡ̣ܢ ܢܘܼܛ̈ܦܵܬܼܵܐ܀ 
                ܬܵܘ ܨܲܝܵܡܹ̈ܐ ܟܲܢܸܫܘ ܘܲܚܠܘܿܛܘ ܦܘܼܖ̈ܫܵܢܲܝܟܿܘܿܢ: 
                ܕܨܵܘܡܵܐ ܪܲܒܵܐ ܢܸܗܘܸܐ ܒܟܸܢܫܵܗ̇ ܕܒܲܪ̄ܬܼ ܢܲܗܝܼܖܹ̈ܐ܀ 
                ܫܘܼܦܪܵܗ̇ ܕܟܲܠܬܼܵܐ ܨܵܘܡܵܐ ܗ̣̄ܘ ܙܲܗܝܵܐ ܕܡ̣ܢ ܣܲܓܿܝܼ̈ܐܹܐ: 
                ܘܨܸܒܼܬܵܗ̇ ܘܫܲܗܪܵܗ̇ ܘܲܨ̈ܠܵܘܵܬܼܵܗ̇ ܐܲܝܟܼ ܚܸܫ̈ܠܵܬܼܵܐ܀ 
                ܢܲܦ̮ܫܵܗ̇ ܢܵܛ̇ܪܵܐ ܡ̣ܢ ܡܹܐܟܼܘܼܠܬܵܐ ܒܬܼܘܼܠܲܬܼ ܢܘܼܗܪܵܐ: 
                ܕܲܒܼܫܘܼܠܵܡܹܗ ܕܨܵܘܡܵܐ ܠܚܲܬܼܢܵܐ ܪܓܼܝܼܓܼܵܐ ܕܬܹܐܟܼܘܼܠ܀ 
                ܛܥܘܼܡܹ̈ܐ ܟܠܗܘܿܢ ܫܝܼܛܝܼܢ ܘܲܒܼܣܹܝܢ ܘܲܒܼܣܝܼܪܝܼܢ ܠܵܗ̇: 
                ܘܐܸܠܵܐ ܐ̄ܟܲܠܬܹܗ ܠܵܐ ܐܸܬܼܪܵܘܚܲܬ̤ ܒܲܪ̄ܬܼ ܐܝܼܡܵܡܵܐ܀ 
                ܥܲܠ ܗܵܝ̇ ܨܵܝ̇ܡܵܐ ܘܚܵܣ̇ܠܵܐ ܢܲܦ̮ܫܵܗ̇ ܒܲܪ̄ܬܼ ܦܘܼܢܵܩܹ̈ܐ:
                 587 
                ܕܡܵܐ ܕܐܵܟܼ̇ܠܵܐ ܠܹܗ ܬܸܗܘܸܐ ܢܛܝܼܪܵܐ ܡ̣ܢ ܠܲܥܒܘܼܬܼܵܐ܀ 
                ܒܨܵܘܡܵܐ ܟܲܠܬܼܵܐ ܠܚܲܬܼܢܵܐ ܪܓܼܝܼܓܼܵܐ ܠܲܡܢܲܬܵܫܘܼ: 
                ܘܗܵܐ ܡܙܲܡܢܝܼܢ ܠܵܗ̇ ܥܲܡܡܹ̈ܐ ܘܥܵܠܡܹ̈ܐ ܕܬܼܵܘܟܸܠ ܐܸܢܘܿܢ܀ 
                ܨܵܝ̇ܡܵܐ ܒܚܘܼܒܹܗ ܘܥܲܠ ܕܲܪܓܼܝܼܓܼܵܐ ܕܡܸܢܹܗ ܬܹܐܟܼܘܿܠ: 
                ܛܥܵܬܹܗ ܠܠܲܚܡܵܐ ܒܪܸܓܿܬܹܗ ܕܚܲܬܼܢܵܐ ܕܝܲܐܝܼܒܼܵܐ ܠܹܗ܀ 
                ܐܲܝܟܵܐ ܚܙܸܐ ܠܟܼܘܿܢ ܟܲܠܬܼܵܐ ܕܐܲܟܼ̇ܠܵܐ ܠܚܲܬܼܢܵܐ ܡܸܡܬܼܘܿܡ: 
                ܐܵܘ ܠܲܒܼܬܼܘܼܠܬܵܐ ܕܣܝܼܡ ܠܵܗ̇ ܡܟܼܝܼܪܵܗ̇ ܥܲܠ ܦܵܬܼܘܿܪܵܐ܀ 
                ܪܸܓܲܬ̤ ܪܸܚܡܲܬ̤ ܨܵܡܲܬ̤ ܟܸܦܢܲܬ̤ ܩܸܪܒܲܬ̤ ܐܸܟܼܠܲܬ̤: 
                ܒܸܣܡܲܬ̤ ܫܸܡܢܲܬ̤ ܥܸܠܲܬ̤ ܝܸܪܬܲܬ̤ ܓܲܙܹܗ ܕܐܲܒܼܵܐ܀ 
                ܒܨܵܘܡܵܐ ܚܙܵܬܹܗ ܟܲܕܼ ܡܸܬܼܟܲܬܲܫ ܥܲܡ ܐܲܪܟܿܘܿܢܵܐ: 
                ܨܵܡܲܬ̤ ܥܲܡܹܗ ܘܕܲܗܘ̤ܵܐ ܕܸܒܼܚܵܐ ܩܨܵܬܹܗ ܠܲܒܼ̈ܢܹܝܗ̇܀ 
                ܪܲܓܼܬܹܗ ܒܕܲܒܼܪܵܐ ܥܲܠ ܕܲܚܠܵܦܹܝܗ̇ ܡܸܬܼܟܲܬܲܫ ܗ̄ܘ̣ܵܐ: 
                ܘܗܵܐ ܡܸܬܼܟܲܫܦܵܐ( ܡܬܟܦܢܐ L.) ܕܬܹܐܟܼܘܿܠ ܬܸܣܒܲܥ ܡ̣ܢ ܫܲܦܝܼܪܵܐ܀ 
                ܒܲܣܝܼܡ ܨܵܘܡܵܐ ܠܥܹܕܬܵܐ ܡܟܼܝܼܪܬܹܗ ܕܝܼܚܝܼܕܼܵܝܵܐ: 
                ܘܲܒܼܫܘܼܠܵܡܹܗ ܚܵܙ̇ܝܵܐ ܠܚܲܬܼܢܵܐ ܒܫܘܼܚܵܐ ܪܲܒܵܐ܀ 
                ܗܵܐ ܨܲܝܵܡܹ̈ܐ ܠܥܹܐܕܼܵܟܼ ܚܵܝ̇ܪܝܼܢ ܒܲܪ ܐܲܠܵܗܵܐ: 
                ܕܬܲܝܬܸܐ ܫܲܝܢܵܟܼ ܡ̣ܢ ܒܹܝܬܼ ܓܲܙܵܟܼ ܠܐܲܪܒܲܥܦܸܢ̈ܝܵܢ܀ 
                ܩܲܒܸܿܠ ܨܵܘܡܲܢ ܘܲܥܒܸܕܼ ܫܲܝܢܵܟܼ ܥܲܠ ܐܲܖ̈ܥܵܬܲܢ: 
                ܫܘܼܒܼܚܵܐ ܠܖ̈ܲܚܡܹܐ ܕܫܲܠܚܘܼܟܼ ܠܐܲܪܥܵܐ ܕܬܸܫܬܲܝܲܢ ܒܵܟܼ܀ 
            
            
                ܫܠܸܡ̣ ܡܹܐܡܪܵܐ ܕܲܬܼܪܹܝܢ ܕܥܲܠ ܨܵܘܡܵܐ.