Isaac of Nineveh. “Discourse 2.” Based upon Digital Syriac Corpus. Last modified March 5, 2019. https://syriaccorpus.org/393.
    
        
            
                 11 
                 ܡܹܐܡܪܵܐ ܕܲܬܼܪܹܝܢ.
            
            
                 ܩܘܼܒܵܠܛܲܝܒܿܘܼܬܼܵܐ ܕܢܵܤܘܿܒܼܵܐ ܡܓܲܪܸܓܼ ܠܝܵܗܘܿܒܼܵܐ: ܥܵܠ
                ܡܵܘ̈ܗܒܼܵܬܼܵܐ ܕܪܵܘܪ̈ܒܼܵܢ ܡ̣ܢ ܩܲܕܼ̈ܡܵܝܬܼܵܐ. ܐܲܝܢܵܐ ܕܟܼܵܐܹ̇ܡ ܥܲܠ ܙܥܘܿܪ̈ܝܵܬܼܵܐ:
                ܘܐܵܦ ܒܪܵܘܪ̈ܒܼܵܬܼܵܐ ܕܲܓܵܠܵܐ ܐܝܼܬܼܵܘܗܝ ܘܛܵܠܘܿܡܵܐ܀ ܟܪܝܼܗܵܐ ܕܲܡܦܵܣ
                ܒܟܼܘܼܪܗܵܢܹܗ: ܕܠܝܼܠܵܐ ܐܵܪܤܝܘܼܬܹܗ. ܘܐܲܝܢܵܐ ܕܲܒܼܟܹܐܒܹܗ ܡܵܘܕܸܐ:
                ܩܲܪܝܼܒܼ ܗ̄ܘ̣ ܠܚܘܼܠܡܵܢܵܐ܀ ܠܸܒܵܐ ܩܲܫܝܵܐ: ܢܸܤܓܿܘܿܢ ܟܹܐܒܼܵܘ̈ܗܝ.
                ܘܲܟܼܪܝܼܗܵܐ ܕܲܡܪܲܕܼ ܥܲܠ ܐܵܤܝܵܐ: ܫܘܼܢܵܩܹܗ ܡܸܬܿܬܵܘܤܲܦ܀ ܠܲܝܬܿ
                ܚܛܝܼܬܼܵܐ ܕܠܵܐ ܫܘܼܒܼܩܵܢܵܐ: ܐܸܠܵܐ ܐܲܝܕܵܐ ܕܲܕܠܵܐ ܬܝܵܒܼܘܼܬܼܵܐ ܐܝܼܬܹܝܗ̇.
                ܘܠܲܝܬܿ ܡܵܘܗܲܒܼܬܼܵܐ ܕܲܕܼܠܵܐ ܬܵܘܤܲܦܬܼܵܐ ܡܩܵܘܝܵܐ: ܐܸܠܵܐ ܐܲܝܕܵܐ ܕܚܲܤܝܼܪܵܐ
                ܡ̣ܢ ܬܵܘܕܝܼܬܼܵܐ. ܤܲܟܼܠܵܐ ܠܲܡ: ܙܥܘܿܪܝܵܐ ܡܢܵܬܹܗ ܒܥܲܝܢܵܘ̈ܗܝ܀
                ܗ̤ܘܲܝܬܿ ܡܸܬܼܥܲܗܲܕܼ ܐܲܡܝܼܢܵܐܝܼܬܼ ܠܐܲܝܠܹܝܢ ܕܲܡܥܲܠܹܝܢ ܡܸܢܵܟܼ
                ܒܲܡܝܲܬܿܪܘܼܬܼܵܐ: ܕܲܒܼܨܝܼܪܵܐ ܬܸܚܙܸܐ ܢܲܦܫܵܟܼ ܡ̣ܢ ܦܸܚܡܗܘܿܢ ܒܟܼܠܙܒܲܢ.
                ܘܲܗ̤ܘܲܝܬܿ ܡܸܬܼܒܲܩܸܐ ܒܟܼܠܙܒܲܢ ܒܐܘܼ̈ܠܨܵܢܹܐ ܚܲܤܝܼ̈ܢܹܐ ܕܐܲܝܠܹܝܢ
                ܕܥܲܤܩܝܼܢ ܘܒܼܝܼܫܝܼܢ ܛܘܼܪ̈ܵܦܲܝܗܘܿܢ: ܕܩܘܼܒܵܠܛܲܝܒܿܘܼܬܼܵܐ ܬܸܬܸܠ ܥܲܠ
                ܙܥܘܿܪ̈ܝܵܬܼܵܐ ܕܲܫܟܼܝܼ̈ܚܵܢ ܨܹܐܕܲܝܟ: ܘܬܸܫܟܲܚ ܠܲܡܤܲܝܒܵܪܘܼ ܐܸܢܹܝܢ
                ܒܚܲܕܘܼܬܼܵܐ܀ ܒܙܲܒܼܢܵܐ ܕܐܝܼܬܲܝܟ ܒܡܸܙܕܲܟܼܝܵܢܘܼܬܼܵܐ ܘܫܲܦܠܘܼܬܼܵܐ
                ܘܡܲܐܝܼܢܘܼܬܼܵܐ: ܘܐܲܤܝܼܪ ܘܲܡܦܲܟܲܪ ܐܲܢ̄ܬܿ ܠܲܒܼܥܸܠܕܲܪܵܟܼ ܒܕܼܵܘܝܘܼܬܼܵܐ
                ܓܢܝܼܚܵܬܐ ܘܒܲܬܼܥܝܼܫܘܼܬܼܵܐ ܕܦܘܼܠܚܵܢܵܐ ܕܲܚܛܝܼܵܬܼܵܐ: ܐܲܝܵܬܐ ܥܲܠ ܒܵܠܵܟܼ
                ܙܲܒܼ̈ܢܹܐ ܩܲܕܼ̈ܡܵܝܹܐ ܕܟܲܫܝܼܪܘܼܬܼܵܐ: ܘܕܲܐܝܟܲܢ ܐܵܦ ܥܕܲܡܵܐ ܠܲܙܥܘܿܪ̈ܝܵܬܼܵܐ
                ܫܩܵܠܛܲܥܢܵܐ ܡܚܵܘܸܐ ܗ̣̄ܘܲܝܬܿ: ܘܒܲܛܢܵܢܵܐ ܡܸܬܿܬܿܙܝܼܥ ܗ̣̄ܘܲܝܬܿ ܠܘܼܩܒܲܠ
                ܡܥܵܘ̈ܟܼܵܢܹܐ ܕܡܲܪܕܝܼܬܼܵܟܼ. ܘܬܸܢ̈ܚܵܬܼܵܐ ܡܲܤܪܲܚ ܗ̣̄ܘܲܝܬܿ ܥܲܠ ܐܲܦܲܝ̈
                
                 12 
                
                ܒܨܝܼܪ̈ܵܬܼܵܐ ܕܡܸܬܼܒܲܤ̈ܝܵܢ ܗ̣̄ܘܲܝ̈ ܡܸܢܵܟܼ ܐܲܝܟܼ ܕܲܒܼܓܸܕܼܫܵܐ: ܘܟܼܠܹܗ ܐܲܢ̄ܬܿ:
                ܩܵܛܲܪ ܗ̣̄ܘܲܝܬܿ ܟܠܝܼܠܵܐ ܒܙܵܟܼܘܼܬܼܵܐ ܕܲܒܼܗܹܝܢ. ܘܗܵܝܕܹܝܢ ܡܸܟܹܝܠ
                ܒܗܵܠܹܝܢ ܘܕܲܐܝܟܼ ܗܵܠܹܝܢ ܥܘܼ̈ܗܕܵܢܹܐ: ܡܸܬܿܬܿܥܝܼܪܵܐ ܢܲܦܫܵܟܼ ܐܲܝܟܼ
                ܕܡ̣ܢ ܥܘܼܡܩܵܐ: ܘܠܵܒܼ̇ܫܵܐ ܫܲܠܗܹܒܼܝܼܬܼܵܐ ܕܲܛܢܵܢܵܐ. ܘܐܲܝܟܼ ܕܡ̣ܢ ܡܝܼ̈ܬܹܐ
                ܩܵܝ̇ܡܵܐ ܡ̣ܢ ܛܘܼܒܵܥܵܗ̇: ܘܙܵܩ̇ܦܵܐ ܗ̤ܝ ܠܵܗ̇ ܘܐܵܬܼ̇ܝܵܐ ܠܛܲܟܼܤܵܗ̇
                ܩܲܕܼܡܵܝܵܐ: ܒܐܵܓܼܘܿܢܵܐ ܚܲܡܝܼܡܵܐ ܕܠܘܼܩܒܲܠ ܤܵܛܵܢܵܐ ܘܲܚܛܝܼܬܼܵܐ܀ ܐܸܬܿܕܲܟܼܪ
                ܡܲܦܘܼܠܬܼܵܐ ܕܚܲܝ̈ܠܬܼܵܢܹܐ: ܕܬܸܬܼܡܲܟܲܟܼ ܒܲܡܝܲܬܿܪ̈ܵܬܼܵܟܼ. ܘܲܥܗܲܕܼܥܲܤܩܘܼܬܼ
                ܚܛܵܗܹ̈ܐ ܕܐܲܝܠܹܝܢ ܕܲܢܦܲܠ̣ܘ ܘܬܼܵܒܼܘ: ܘܪܘܼܡܪܵܡܵܐ ܘܐܝܼܩܵܪܵܐ ܕܩܲܒܸܿܠ̣ܘ
                ܡ̣ܢ ܒܵܬܲܪܟܸܢ: ܕܬܸܬܼܠܲܒܲܒܼ ܒܲܬܼܝܵܒܼܘܼܬܼܵܟܼ܀ ܗ̤ܘܝܼ ܪܵܕܼܘܿܦܵܐ ܠܲܩܢܘܿܡܵܟܼ:
                ܘܡܸܬܼܪܕܸܦ ܡ̣ܢ ܘܲܥܕܵܟܼ ܒܥܸܠܕܲܪܵܟܼ܀ ܐܸܫܬܲܝܲܢ ܐܲܢ̄ܬܿ ܥܲܡ ܢܲܦܫܵܟܼ:
                ܘܡܸܫܬܲܝܢܝܼܢ ܥܲܡܵܟܼ ܫܡܲܝܵܐ ܘܐܲܪܥܵܐ. ܐܸܬܼܚܲܦܲܛ ܠܡܸܥܲܠ ܠܒܹܝܬܼ ܓܲܙܵܐ
                ܕܲܠܓܼܵܘ ܡܸܢܵܟܼ: ܘܲܚܙܲܝܬܵܝܗܝ ܠܗܵܘ̇ ܕܒܲܫܡܲܝܵܐ. ܚܲܕܼ ܐܝܼܬܼܵܘܗܝ ܗܵܢܵܐ
                ܘܗܵܘ̇: ܘܒܲܚܕܼܵܐ ܡܲܥܲܠܬܼܵܐ ܬܸܚܙܸܐ ܬܪ̈ܲܝܗܘܿܢ. ܤܸܒܿܠܬܼܵܐ ܕܗܵܝ̇
                ܡܲܠܟܿܘܼܬܼܵܐ ܠܓܼܵܘ ܡܸܢܵܟܼ ܡܛܲܫܝܵܐ: ܘܲܒܼܓܼܵܘ ܢܲܦܫܵܟܼ. ܥܡܲܕܼ ܐܲܢ̄ܬܿ
                ܒܵܟܼ ܡ̣ܢ ܚܛܝܼܬܼܵܐ: ܘܬܲܡܵܢ ܡܸܫܟܲܚ ܐܲܢ̄ܬܿ ܡܲܤܩܵܢܹ̈ܐ ܕܲܒܼܗܘܿܢ
                ܬܸܤܲܩ܀
                 ܕܡܵܢܵܐ ܐܸܢܹܝܢ ܨܸܒܼ̈ܘܵܬܼܵܐ ܕܥܵܠܡܵܐ ܕܲܥܬܼܝܼܕܼ: ܠܵܐ ܦܲܫܸܩ̣ܘ ܟܬܼܵܒܹ̈ܐ.
                ܕܐܲܝܟܲܢܵܐ ܕܹܝܢ ܢܩܲܒܸܠ ܡܲܪܓܿܫܵܢܘܼܬܼܵܐ ܕܒܼܘܼܤܵܡܗܹܝܢ ܡ̣ܢ ܟܲܕܼܘܼ:
                ܤܛܲܪ ܡ̣ܢ ܫܘܼܚܠܵܦܵܐ ܟܝܵܢܵܝܵܐ ܘܫܘܼܢܵܝܵܐ ܐܲܬܼܪܵܢܵܝܵܐ: ܦܫܝܼܩܵܐܝܼܬܼ ܐܲܠܸܦ̣ܘ
                ܠܲܢ܀ ܘܐܵܦܸܢ ܫܡܵܗܹ̈ܐ ܪ̈ܚܝܼܡܹܐ ܕܨܸܒܼ̈ܘܵܬܼܵܐ ܫܒܼܝܼ̈ܚܵܬܼܵܐ ܕܗܲܢܝܼ̈ܐܵܢ ܘܝܲܦܝܼܪ̈ܵܢ
                ܠܘܵܬܲܢ ܤܵܡ̣ܘ ܠܗܹܝܢ ܠܓܼܘܼܪܵܓܲܢ: ܒܗܵܝ̇ ܕܐܸܡ݂ܲܪܘ ܕܥܲܝܢܵܐ ܠܵܐ
                ܚܙܵܬ̤ ܘܐܸܕܼܢܵܐ ܠܵܐ ܫܸܡܥܲܬ̤ ܘܫܲܪܟܵܐ: ܐܸܠܵܐ ܩܲܢܝܵܘܼܬܼ ܕܵܡܝܘܼܬܼܵܐ
                
                 13 
                
                ܒܠܵܐ ܡܸܬܿܕܲܟܵܢܘܼܬܼܗܹܝܢ ܠܲܚܕܼܵܐ ܡ̣ܢ ܕܲܬܼܢܵܢ: ܫܵܘܕܲܥ ܠܲܢ ܗܵܢܹܝܢ
                ܕܲܥܬܼܝܼ̈ܕܼܵܢ. ܒܘܼܤܵܡܵܐ ܟܹܝܬܼ ܪܘܼܚܵܢܵܝܵܐ: ܠܵܐ ܗ̄ܘ̣ܵܐ ܚܫܲܚܬܼܵܐ ܗ̄ܘ̣
                ܕܨܸܒܼ̈ܘܵܬܼܵܐ ܩܢ̈ܘܿܡܵܝܵܬܼܵܐ: ܕܲܠܒܲܪ ܡ̣ܢ ܝܵܬܼܵܐ ܕܢܵܤܘܿܒܹ̈ܐ ܫܟܼܝܼ̈ܚܵܢ ܒܬܼܘܼܩܵܢܵܐ
                ܗܵܘ̇ ܕܲܥܬܼܝܼܕܼ ܠܲܢ ܢܸܤܬܲܒܼ̈ܵܢ. ܘܐܸܢ ܠܵܐ ܗܵܝ̇ ܕܡܲܠܟܿܘܼܬܼܵܐ ܕܲܫܡܲܝܵܐ
                ܠܓܼܵܘ ܡܸܢܟܼܘܿܢ ܗ̣̄ܝ: ܘܗܵܝ̇ ܕܬܹܐܬܸܐ ܡܲܠܟܿܘܼܬܼܵܟܼ: ܡܵܕܹܝܢ ܡܠܘܿܐܵܐ
                ܕܨܸܒܼ̈ܘܵܬܼܵܐ ܡܸܬܼܪ̈ܲܓܼܫܵܢܝܬܼܵܐ ܩܢܹܝܢܲܢ ܠܓܼܵܘ ܡܸܢܲܢ: ܠܪܲܗܒܼܘܿܢܵܐ ܕܒܼܘܼܤܵܡܵܐ
                ܕܲܒܼܗܹܝܢ. ܐܵܢܲܢܩܹܐ ܓܹܝܪ: ܕܐܲܟܼܘܵܬܼܗܹܝܢ ܢܸܗܘܸܐ ܐܝܼܬܼ ܠܹܗ ܩܲܢܝܵܘܼܬܼ
                ܕܘܼܡܝܵܐ ܘܲܠܪܲܗܒܼܘܿܢܵܐ: ܘܐܵܦܸܢ ܡܸܟܵܐ ܒܲܡܢܵܬܼܵܐ: ܒܫܘܼܡܠܵܝܵܐ ܕܹܝܢ
                ܟ̱ܠܹܗ ܠܗܲܠ. ܒܕܼܵܐܦ ܗܵܝ̇ ܕܐܲܝܟܼ ܕܲܒܼܡܲܚܙܝܼܬܼܵܐ: ܘܐܵܦܸܢ ܠܵܘ ܩܢܘܿܡܵܐܝܼܬܼ:
                ܡ̣ܢ ܟܠܦܪܘܼܣ: ܩܲܢܵܝܘܼܬܼ ܕܘܼܡܝܵܐ ܡܫܵܘܕܥܵܐ. ܐܸܢ ܕܹܝܢ ܐܲܝܟܼ
                ܤܵܗ̈ܕܘܵܬܼܵܐ ܫܲܪܝܼܪ̈ܲܬܼܵܐ ܕܲܡܦܲܫ̈ܩܲܝ ܟܬܼܵܒܹ̈ܐ: ܡܲܥܒܿܕܼܵܢܘܼܬܼܵܐ ܗ̣̄ܝ
                ܡܸܬܼܝܲܕܼܥܵܢܝܼܬܼܵܐ ܕܪܘܼܚܵܐ ܕܩܘܼܕܼܫܵܐ: ܘܗܵܕܹܐ ܡܢܵܬܼܵܐ ܗ̣̄ܝ ܡ̣ܢ ܗܵܝ̇
                ܟ̱ܠܵܢܵܝܬܼܵܐ: ܡܵܕܹܝܢ ܤܛܲܪ ܡ̣ܢ ܡܲܥܒܿܕܼܵܢܘܼܬܼܵܐ ܪܘܼܚܵܢܵܝܬܼܵܐ ܕܲܒܼܡܲܪܓܫܵܢܘܼܬܼܵܐ
                ܡܸܬܼܝܲܕܼܥܵܢܝܼܬܼܵܐ ܗܵܘ̇ܝܵܐ ܒܹܝܬܼ ܠܵܗ̇ ܘܲܠܗܘܿܢ. ܘܠܵܐ ܡܸܕܸܡ ܡܸܬܼܪܲܓܼܫܵܢܵܐ
                ܠܒܼܘܼܤܵܡܵܐ ܕܩܲܕܼܝܼ̈ܫܹܐ ܡܸܨܥܵܝܵܐ ܡ̣ܢ ܪܸ̈ܓܼܫܹܐ ܘܪ̈ܵܓܼܘܿܫܹܐ ܬܲܡܵܢ:
                ܤܛܲܪ ܡ̣ܢ ܥܘܼ̈ܒܹܐ ܚܵܒܼ̈ܫܲܝ ܠܟܼܠ ܡܬܲܚܡܵܐܝܼܬܼ. ܕܐܸܢ ܐܲܫܝܼܕܼܘܼܬܼ
                ܢܘܼܗܪܵܐ ܢܹܐܡܲܪ: ܠܵܐ ܝܲܕܘܼܥܬܼܵܢܝܵܐ ܒܪܲܡ܀ ܪܵܚܹ̇ܡ ܡܝܲܬܿܪܘܼܬܼܵܐ
                ܐܝܼܬܼܵܘܗܝ: ܠܵܘ ܐܲܝܢܵܐ ܕܫܲܦܝܼܪ̈ܵܬܼܵܐ ܤܵܥ݁ܲܪ ܚܦܝܼܛܵܐܝܼܬܼ: ܐܸܠܵܐ ܐܲܝܢܵܐ
                ܕܒܼܝܼ̈ܫܵܬܼܵܐ ܕܢܲܩܝܼ̈ܦܵܢ ܠܹܗ: ܒܚܲܕܼܘܼܬܼܵܐ ܡܩܲܒܸܿܠ܀ ܠܵܐ ܪܲܒܵܐ ܕܲܚܠܵܦ
                ܡܝܲܬܿܪܘܼܬܼܵܐ ܐ̄ܢܵܫ ܒܐܘܼ̈ܠܨܵܢܹܐ ܢܚܲܡܤܸܢ: ܐܲܝܟܼ ܗܵܝ ܕܲܒܼܫܘܼܕܵܠܵܐ
                ܕܚܘܼ̈ܬܼܚܵܬܹܐ ܠܵܐ ܢܸܬܿܕܵܘܲܕܼ ܪܸܥܝܵܢܵܐ ܡ̣ܢ ܓܒܼܝܼܬܼܵܐ ܕܨܸܒܼܝܵܬܹܗ ܫܲܦܝܼܪܵܐ܀
                ܟܠ ܡܸܬܿܬܵܘܝܵܢܘܼܬܼܵܐ ܓܹܝܪ ܕܒܼܵܬܲܪ ܡܸܬܿܬܿܪܝܼܡܵܢܘܼܬܼܵܐ ܕܚܹܐܪܘܼܬܼܵܐ
                
                 14 
                
                ܗܵܘ̇ܝܵܐ: ܠܵܐ ܚܲܕܼܘܼܬܼܵܐ ܡܸܢܵܗ̇ ܢܵܒܼ̇ܥܵܐ: ܘܠܵܐ ܠܦܘܿܘܼܪܥܵܢܘܼܬܼܵܐ ܡܸܬܼܚܲܫܒܵܐ
                ܕܩܲܡܵܝ݂ܝ̈ܗ̇܀
                 ܚܲܦܵܐ ܥܲܠ ܚܲܛܵܝܵܐ: ܟܲܕܼ ܠܵܐ ܚܵܤܲܪ ܐܲܢ̄ܬܿ ܒܹܗ. ܐܸܠܵܐ
                ܬܠܲܒܿܒܼܝܼܘܗܝ ܠܚܲܝܹ̈ܐ: ܕܢܸܛܥܢܘܼܢܵܟܼ ܪ̈ܲܚܡܹܐ ܕܡܵܪܘܼܬܼܵܐ܀ ܤܡܘܿܟܼ
                ܠܲܡܚܝܼ̈ܠܹܐ ܘܥܲܚ̈ܝܼܩܲܝ ܪܘܼܚܵܐ ܒܡܸܠܬܼܵܐ ܟܡܵܐ ܕܡܵܛ̇ܝܵܐ ܒܐܝܼܕܲܝ̈ܟ:
                ܕܲܬܼܤܲܡܟܼܵܟܼ ܝܲܡܝܼܢܵܐ ܛܥܝܼܢܲܬܼ ܠܟܼܠ܀ ܗ̤ܘܝܼ ܫܵܘܬܵܦܵܐ ܥܲܡ ܚܲܫܝܼ̈ܫܲܝ
                ܠܸܒܵܐ ܒܚܲܫܵܐ ܕܨܲܠܘܿܬܼܵܐ ܘܲܚܢܲܓܼܬܼܵܐ ܕܠܸܒܵܐ: ܘܢܸܬܼܦܬܲܚ ܩܕܼܵܡ
                ܫܸܐ̈ܠܵܬܼܵܟܼ ܡܲܒܿܘܼܥܵܐ ܕܲܚܢܵܢܵܐ. ܐܲܥܡܸܠ ܝܵܬܼܵܟܼ ܒܒܼܵܥܘܼܬܼܵܐ ܕܟܼܠܥܸܕܵܢ
                ܩܕܼܵܡ ܐܲܠܵܗܵܐ: ܒܠܸܒܵܐ ܕܲܛܥܝܼܢ ܡܲܚܫܲܒܼܬܼܵܐ ܙܗܝܼܬܼܵܐ ܕܡܲܠܝܵܐ ܚܲܫܵܐ:
                ܘܲܢܢܲܛܲܪ ܪܸܥܝܵܢܵܟܼ ܡ̣ܢ ܚܘܼ̈ܫܵܒܹܐ ܨܵܐܹ̈ܐ: ܕܠܵܐ ܬܸܙܕܲܠܲܠ ܒܵܟܼ ܐܘܼܪܚܹܗ
                ܕܐܲܠܵܗܵܐ. ܐܲܦܗܵܐ ܚܙܵܬܼܵܟܼ ܒܥܸܢܝܵܢܵܐ ܐܲܡܝܼܢܵܐ ܕܩܸܪܝܵܢܵܐ ܕܦܘܼܪܫܵܢܵܐ:
                ܕܕܲܠܡܵܐ ܒܥܸܠܲܬܼ ܒܸܛܠܵܢܵܐ ܢܸܬܼܟܲܬܲܡ ܒܲܚܝܵܪܵܟܼ ܚܸܙܘܵܐ ܢܘܼܟܼܪܵܝܵܐ܀
                ܠܵܐ ܬܢܲܤܸܐ ܠܪܸܥܝܵܢܵܟܼ ܐܲܝܟܼ ܕܲܠܒܼܘܼܩܝܵܐ ܒܚܵܘܪܵܐ ܕܚܘܼ̈ܫܵܒܹܐ ܙܲܠܝܼ̈ܠܹܐ
                ܕܲܡܢܲܤܹܝܢ: ܟܲܕܼ ܤܵܒܲ̇ܪ ܐܲܢ̄ܬܿ ܗ̄ܘ̣ ܕܠܵܐ ܡܸܙܕܟܸܐ ܐܲܢ̄ܬܿ. ܐܵܦ ܚܲܟܿܝܼ̈ܡܹܐ
                ܐܸܬܿܕܵܘܲܕܼܘ ܒܕܼܘܼܟܿܬܼܵܐ ܗܵܕܹܐ: ܘܲܫܛ̣ܵܘ. ܠܵܐ ܬܸܚܡܘܿܠ ܫܲܠܗܹܒܼܝܼܬܼܵܐ
                ܒܥܘܼܒܵܟܼ: ܐܲܝܟܼ ܕܐܲܡܝܼܪ: ܕܠܵܐ ܐܘܼ̈ܠܨܵܢܹܐ ܚܲܤܝܼ̈ܢܹܐ ܕܦܲܓܼܪܵܐ:
                ܥܲܤܩܵܐ ܗ̣̄ܝ ܠܠܵܐ ܡܢܲܦܩܘܼܬܼܵܐ ܕܛܲܠܝܘܼܬܼܵܐ: ܠܡܸܬܼܟܕܼܵܢܘܼ ܬܚܹܝܬܼ
                ܢܝܼܪܵܗ̇ ܕܩܲܕܝܼܫܘܼܬܼܵܐ܀ ܠܫܘܼܪܵܝ ܥܲܡܛܵܢܵܐ ܕܗܵܘܢܵܐ ܟܲܕܼ ܬܸܬܼܚܵܘܸܐ
                ܐܵܬ̤ܵܐ ܒܢܲܦܫܵܐ ܗܵܕܲܐ ܗ̣̄ܝ: ܒܡܲܐܝܼܢܘܼܬܼܵܐ ܩܲܕܼܡܵܝܑܬܼ ܕܲܠܘܵܬܼ ܬܸܫܡܸܫܬܼܵܐ
                ܘܲܨܠܘܿܬܼܵܐ ܡܫܲܪܝܵܐ. ܐ̄ܚܪܵܢܝܵܐܝܼܬܼ ܓܹܝܪ ܕܢܸܬܿܕܪܸܫ ܫܒܼܝܼܠܵܐ ܕܲܠܬܼܵܘܫܵܐ
                ܒܢܲܦܫܵܐ: ܠܵܐ ܡܲܨܝܵܐ: ܐܸܠܵܐ ܐܸܢ ܠܘܼܩܕܲܡ ܡ̣ܢ ܬܲܡܵܢ ܬܸܦܸܠ. ܐܲܝܟܼ
                
                 15 
                
                ܕܟܲܕܼ ܬܸܬܼܓܠܸܙ ܡ̣ܢ ܥܘܼܕܼܪܵܢܵܐ ܐܲܠܵܗܵܐ: ܗܵܘ̇ ܕܡܲܪܕܝܼܬܹܗ ܡ̣ܢ
                ܬܲܡܵܢ ܗܵܘ̇ܝܵܐ ܠܘܵܬܹܗ: ܕܠܝܼܠܵܐܝܼܬܼ ܒܐܝܼܕܲܝ̈ܗܘܿܢ ܕܒܲܥ̈ܠܲܝ ܕܲܪܵܐ
                ܬܸܦܸܠ. ܘܲܐ̄ܚܪܹܬܼܵܐ. ܕܟܲܕܼ ܬܸܗܘܸܐ ܬܘܼܒܼ ܕܠܵܐ ܨܸܦܬܼܵܐ ܡ̣ܢ ܗܵܠܹܝܢ
                ܕܲܡܝܲܬܪܘܼܬܼܵܐ: ܡ̣ܢ ܟܠܦܪܘܿܣ: ܠܘܵܬܼ ܗܵܢܹܝܢ ܕܕܲܠܩܘܼܒܼܠܵܐ
                ܬܸܬܼܓܿܪܸܦ. ܫܘܼܢܵܝܵܐ ܡ̇ܢ ܕܡ̣ܢ ܐܲܝܢܵܐ ܕܗ̤ܘ ܓܲܒܵܐ: ܫܘܼܪܵܝܵܐ ܐܝܼܬܼܵܘܗܝ
                ܕܲܠܘܵܬܼ ܓܲܒܵܐ ܕܕܲܠܩܘܼܒܼܠܵܐ. ܬܸܥܫܲܢ ܥܒܼܝܼܕܬܵܐ ܕܲܡܝܲܬܿܪܘܼܬܼܵܐ ܥܲܠ
                ܢܲܦܫܵܐ: ܘܬܸܪܢܸܐ ܒܵܗ̇: ܘܫܲܪܟܵܐ܀ ܚܵܘܵܐ ܩܕܼܵܡ ܐܲܠܵܗܵܐ ܡܚܝܼܠܘܼܬܼܵܟܼ
                ܒܟܼܠܥܸܕܵܢ. ܕܠܵܐ ܢܸܒܼܨܘܿܢ ܢܘܼܟܼܪ̈ܵܝܹܐ ܚܲܝܠܵܟܼ: ܟܲܕܼ ܬܸܫܬܵܘܚܲܕܼ ܡ̣ܢ
                ܡܥܲܕܪܵܢܵܟܼ.
                 ܥܦܝܼܦܵܐ ܐܝܼܬܼܵܘܗܝ: ܦܘܼܠܚܵܢܹܗ ܕܲܙܩܝܼܦܵܐ. ܘܗܵܕܹܐ: ܠܦܘܼܬܼ
                ܥܦܝܼܦܘܼܬܹܗ ܕܲܟܼܝܵܢܵܐ. ܕܡܸܬܼܦܲܠܲܓܼ ܠܲܡ̈ܢܵܘܵܬܼܵܐ: ܬܲܪܬܹܝܢ.
                ܠܲܡܤܲܝܒܿܪܵܢܘܼܬܼܵܐ ܕܐܘܼ̈ܠܨܵܢܹܐ ܕܦܲܓܼܪܵܐ: ܕܡܸܬܼܓܲܡܪܵܐ ܒܡܲܥܒܿܕܼܵܢܘܼܬܼܵܐ
                ܕܚܸܡܬܼܵܐ ܕܢܲܦܫܵܐ: ܘܡܸܬܼܩܲܫܝܵܐ ܤܵܥܘܿܪܘܼܬܼܵܐ. ܘܲܠܦܘܼܠܚܵܢܵܐ
                ܩܲܛܝܼܢܵܐ ܕܡܲܕܥܵܐ: ܒܥܸܢܝܵܢܹ̈ܐ ܐܲܠܵܗܵܝܹ̈ܐ ܘܐܲܡܝܼܢܘܼܬܼܵܐ ܕܲܨܠܘܿܬܼܵܐ
                ܘܫܲܪܟܵܐ: ܕܡܸܬܼܦܲܠܚܵܐ ܒܲܡܢܵܬܼܵܐ ܗܵܝ̇ ܪܸܓܿܬܼܵܢܵܝܬܼܵܐ: ܘܡܸܫܬܲܡܗܵܐ
                ܬܹܐܘܿܪܝܼܵܐ. ܘܲܚܕܼܵܐ ܡ̇ܢ: ܠܲܡܢܵܬܼܵܐ ܚܵܫܘܿܫܬܼܵܐ ܡܕܲܟܿܝܵܐ ܒܝܲܕܼ ܚܲܝܠܹܗ
                ܕܲܛܢܵܢܵܐ. ܘܲܐ̄ܚܪܹܬܼܵܐ: ܒܝܲܕܼ ܡܲܥܒܿܕܼܵܢܘܼܬܼܵܐ ܕܚܘܼܒܵܐ ܕܢܲܦܫܵܐ: ܕܐܝܼܬܹܝܗ̇
                ܡܸܬܼܝܲܐܒܼܵܢܘܼܬܼܵܐ ܟܝܵܢܵܝܬܼܵܐ: ܠܲܡܢܵܬܼܵܐ ܡܸܤܬܲܟܿܠܵܢܝܼܬܼܵܐ ܡܨܲܠܠܵܐ܀ ܟܠܡ̇ܢ
                ܗܵܟܹܝܠ ܕܡܸܢܩܕܵܡ ܢܘܼܦܵܩܵܐ ܕܒܲܡܢܵܬܼܵܐ ܩܲܕܼܡܵܝܬܼܵܐ ܦܵܤܲܥ̇ ܥܲܠܗܵܝ̇
                ܕܬܲܪܬܹܝܢ ܡܸܛܠ ܗܲܢܝܼܐܘܼܬܼܵܗ̇: ܘܝܲܐܝܼܒܼܵܐܝܼܬܼ ܕܠܵܐ ܐܹܡܲܪ ܚܒܸܢܵܢܵܐܝܼܬܼ:
                ܪܘܼܓܼܙܵܐ ܡܥܲܬܸܕܼ ܕܢܸܢܫܲܡ ܠܩܘܼܒܼܠܹܗ. ܒܗܵܝ̇ ܕܟܲܕܼ ܠܵܐ ܠܘܼܩܕܲܡ
                
                 16 
                
                ܐܲܡܝܼܬܼ ܗܲܕܵܡܵܘ̈ܗܝ ܕܒܲܐܪܥܵܐ: ܗܵܢܵܘ ܕܹܝܢ: ܐܲܤܝܼ ܟܪܝܼܗܘܼܬܼܵܐ
                ܕܚܘܼܫܵܒܼܵܘ̈ܗܝ ܒܲܡܤܲܝܒܿܪܵܢܘܼܬܼܵܐ ܕܥܲܡܠܹܗ ܘܨܲܗܪܹܗ ܕܲܙܩܝܼܦܵܐ:
                ܐܲܡܪܲܚ̣ ܠܲܡܗܲܓܵܓܼܘܼ ܒܗܵܘܢܹܗ ܫܘܼܒܼܚܹܗ ܕܲܙܝܼܦܵܐ. ܘܗܵܕܹܐ ܐܝܼܬܹܝܗ̇
                ܗܵܝ̇ ܕܡ̣ܢ ܩܲܕܼܝܼ̈ܫܹܐ ܩܲܕ̈ܡܵܝܹܐ ܐܲܡܝܼܪܵܐ: ܕܡ̣ܢ ܩܕܼܵܡ ܕܢܸܫܠܘܿܢ ܡ̣ܢ
                ܡܚܝܼܠܘܼܬܼܵܐ ܗܸܢܘܿܢ ܪܸ̈ܓܼܫܹܐ: ܐܸܢ ܨܵܒܹ̇ܐ ܗܵܘܢܵܐ ܠܡܸܤܲܩ ܠܲܙܩܝܼܦܵܐ:
                ܪܘܼܓܼܙܹܗ ܕܐܲܠܵܗܵܐ ܐܵܬܹ̇ܐ ܥܠܵܘܗܝ܀ ܡܲܤܲܩܬܼܵܐ ܕܠܲܙܩܝܼܦܵܐ ܡܲܥܒܿܕܲܬܼ
                ܪܘܼܓܼܙܵܐ: ܠܵܘ ܠܲܡܢܵܬܼܵܐ ܗܵܝ̇ ܩܲܕܼܡܵܝܬܼܵܐ ܕܲܡܤܲܝܒܿܪܵܢܘܼܬܼܵܐ ܕܐܘܼ̈ܠܨܵܢܹܐ
                ܕܐܝܼܬܹܝܗ̇ ܙܩܝܼܦܘܼܬܼܵܐ ܕܦܲܓܼܪܵܐ ܩܵܪܹܐ: ܐܸܠܵܐ ܠܡܲܤܲܩܬܼܵܐ ܕܬܹܐܘܿܪܝܼܵܐ
                ܕܐܝܼܬܹܝܗ̇ ܡܢܵܬܼܵܐ ܕܬܲܪܬܹܝܢ: ܗܵܝ̇ ܕܡ̣ܢ ܒܵܬܲܪ ܚܘܼܠܡܵܢܵܐ ܕܢܲܦܫܵܐ
                ܗܵܘ̇ܝܵܐ. ܕܐܲܝܢܵܐ ܠܲܡ ܕܟܲܕܼ ܡܟܲܬܼܡ ܪܸܥܝܵܢܹܗ ܒܚܲܫܹ̈ܐ ܡܨܲܗܪܹ̈ܐ:
                ܪܵܗܹ̇ܛ ܠܲܡܗܲܓܵܓܼܵܘܼ ܒܠܸܒܹܗ ܫܪܲܓܼܪ̈ܵܓܼܝܵܬܼܵܐ ܕܚܘܼ̈ܫܵܒܹܐ ܕܲܥܬܼܝܼ̈ܕܼܵܬܼܵܐ:
                ܒܲܡܤܵܡ ܒܪܹܫܵܐ ܡܸܫܬܲܬܲܩ. ܒܗܵܝ̇ ܕܟܲܕܼ ܠܵܐ ܠܘܼܩܕܲܡ ܙܲܗܝܼ
                ܪܸܥܝܵܢܹܗ ܒܐܘܼ̈ܠܨܵܢܹܐ ܕܟܼܘܼܒܵܫ ܪ̈ܓܼܝܼܓܼܵܬܼܵܐ ܕܒܸܤܪܵܐ: ܪܗܸܛ̣ ܡ̣ܢ
                ܡܲܫܡܲܥ ܐܸܕܼܢܵܐ ܘܲܕܼܝܘܿܬܼܵܐ ܠܘܼܩܒܲܠ ܐܲܦܵܘ̈ܗܝ: ܠܡܸܪܕܵܐ ܒܐܘܼܪܚܵܐ
                ܡܲܠܝܲܬܼ ܥܲܡܛܵܢܵܐ ܟܲܕܼ ܤܲܡ̈ܝܵܢ ܒܵܒܼ̈ܬܹܗ. ܗܵܝ̇ ܕܐܵܦ ܐܲܝܠܹܝܢ ܕܲܚܠܝܼܡܵܐ
                ܚܙܵܬܼܗܘܿܢ ܘܡܲܠܝܵܐ ܢܘܼܗܪܵܐ: ܘܗܲܕܿܝܵܝܵܐ ܩܢܹܝܢ ܛܲܝܒܿܘܼܬܼܵܐ:
                ܒܩܹܘܲܢܕܹܝܢܘܿܣ ܐܝܼܬܲܝܗܘܿܢ ܕܠܹܠܲܝ ܐܝܼܡܵܩ. ܟܲܕܼ ܡܲܠ̈ܝܵܢ ܒܵܒܼܵܬܼ̈ܗܘܿܢ
                ܕܸܡ̈ܥܹܐ: ܘܒܲܨܠܘܿܬܼܵܐ ܘܒܲܒܼܟܼܵܬܼܵܐ ܡܲܩܦܝܼܢ ܠܸܠܝܵܐ ܠܐܝܼܡܵܡܵܐ: ܡܸܛܠ
                ܩܸܢܛܵܐ ܕܡܲܪܕܝܼܬܼܵܐ: ܘܲܫܩܝܼ̈ܦܹܐ ܚܲܤܝܼ̈ܢܹܐ ܕܲܒܼܗܘܿܢ ܦܵܓܼܥ̇ܝܼܢ: ܘܐܸܤܟܹ̈ܡܹܐ
                ܕܲܫܪܵܪܵܐ ܕܲܤܒܼܝܼܤܵܐܝܼܬܼ ܫܟܝܼܚܝܼܢ ܒܐܘܼܪܚܵܐ ܥܲܡ ܡܕܲܡ̈ܝܵܢܹܐ. ܗܵܠܹܝܢ
                ܠܲܡ ܕܐܲܠܵܗܵܐ: ܡ̣ܢ ܢܲܦܫܗܹܝܢ ܐܵܬܼ̈ܝܵܢ: ܟܲܕܼ ܐܲܢ̄ܬܿ ܠܵܐ ܪܓܼܝܼܫ ܐܲܢ̄ܬܿ:
                ܐܸܢ ܢܸܗܘܸܐ ܐܲܬܼܪܵܐ ܕܠܸܒܵܐ ܕܲܟܼܝܵܐ ܘܠܵܐ ܡܛܵܘܫܵܐ. ܐܸܢ ܠܵܐ ܡܕܲܟܲܝ
                
                 17 
                
                ܒܵܒܼܘܿܢܵܐ ܙܥܘܿܪܵܐ ܕܢܲܦܫܵܟܼ: ܠܵܐ ܬܲܡܪܲܚ ܠܡܲܨܵܕܼܘܼ ܒܐܸܤܦܹܝܪ
                ܫܸܡܫܵܐ: ܕܲܠܡܵܐ ܬܸܬܼܓܠܸܙ ܘܐܵܦ ܡ̣ܢ ܚܙܵܬܼܵܐ ܕܲܥܝܵܕܼܵܐ: ܕܐܝܼܬܹܝܗ̇
                ܗܲܝܡܵܢܘܼܬܼܵܐ ܦܫܝܼܛܬܼܵܐ ܘܡܲܟܿܝܼܟܼܘܼܬܼܵܐ: ܘܬܼܵܘܕܝܼܬܼܵܐ ܠܸܒܵܢܵܝܬܼܵܐ:
                ܘܦܘܼܠܚܵܢܵܐ ܙܥܘܿܪܵܐ ܕܐܲܝܟܼ ܚܲܝܠܵܟܼ: ܘܬܸܫܬܕܸܐ ܠܚܲܕܼ ܡ̣ܢ ܐܲܬܼܪ̈ܵܘܵܬܼܵܐ
                ܡܸܬܼܝܲܕܼܥܵܢܹ̈ܐ: ܕܐܝܼܬܼܵܘܗܝ ܚܸܫܟܵܐ ܕܲܠܒܲܪ ܡ̣ܢ ܐܲܠܵܗܵܐ: ܠܡܸܥܲܠ
                ܐܲܝܟܼ ܗܵܘ̇ ܕܐܲܡܪܲܚ̣ ܒܢܲܚ̈ܬܹܐ ܨܵܐܹ̈ܐ ܠܡܸܫܬܿܘܼܬܼܵܐ܀
                 ܡ̣ܢ ܥܲܡܠܵܐ ܘܲܙܗܝܼܪܘܼܬܼܵܐ: ܘܲܙܗܝܼܪܘܼܬܼܵܐ: ܢܵܒܼ̇ܥܵܐ ܙܲܗܝܼܘܼܬܼܵܐ ܕܚܘܼ̈ܫܵܒܼܵܐ.
                    ܘܡ̣ܢ
                ܙܲܗܝܘܼܬܼܵܐ ܕܚܘܼ̈ܫܵܒܹܐ: ܢܘܼܗܪܵܐ ܕܬܲܪܥܝܼܬܼܵܐ. ܘܡܸܟܵܐ: ܡ̣ܢ ܛܲܝܒܿܘܼܬܼܵܐ
                ܡܸܬܼܗܲܕܸܐ ܗܵܘܢܵܐ: ܠܘܵܬܼ ܗܵܘ̇ ܡܸܕܸܡ ܕܠܵܐ ܫܲܠܝܼܛ ܠܪܸ̈ܓܼܫܹܐ:
                ܠܵܐ ܠܡܲܠܵܦܘܼ ܘܠܵܐ ܠܡܹܐܠܲܦ܀ ܬܸܬܼܚܫܸܒܼ ܠܵܟܼ ܡܝܲܬܿܪܘܼܬܼܵܐ
                ܕܐܝܼܬܹܝܗ̇: ܦܲܓܼܪܵܐ. ܬܹܐܘܿܪܝܼܵܐ ܕܹܝܢ: ܢܲܦܫܵܐ. ܬܲܪ̈ܬܲܝܗܹܝܢ ܕܹܝܢ: ܚܲܕܼ
                ܒܲܪܢܵܫܵܐ ܡܫܲܠܡܵܢܵܐ ܕܪܘܼܚ: ܡܚܲܝܲܕܼ ܡ̣ܢ ܡܢܵܘ̈ܵܬܼܵܐ ܡܸܬܼܪ̈ܲܓܼܫܵܢܝܵܬܼܵܐ
                ܘܡܸܬܼܝܲܕܼܥܵܢ̈ܝܵܬܼܵܐ. ܘܐܲܝܟܲܢܵܐ ܡܲܨܝܵܐ ܕܠܵܐ ܡܲܨܝܵܐ ܕܬܹܐܬܸܐ ܠܲܗܘܵܝܵܐ
                    ܘܲܠܡܵܘܠܵܕܼܵܐ
                ܢܲܦܫܵܐ ܒܸܠܥܵܕܼ ܡܗܲܕܡܘܼܬܼܵܐ ܕܲܡܫܲܡܠ̱ܝܘܼܬܼ ܓܒܼܝܼܠܘܼܬܹܗ ܕܦܲܓܼܪܵܐ:
                ܗܵܟܲܢܵܐ ܠܵܐ ܡܲܨܝܵܐ ܬܹܐܘܿܪܝܼܵܐ ܢܲܦܫܵܐ ܕܬܲܪܬܹܝܢ ܕܐܝܼܬܹܝܗ̇ ܪܘܼܚܵܐ
                ܕܓܸܠܝܵܢܹ̈ܐ: ܕܬܸܬܿܨܝܼܪ ܒܟܲܪܤܹܗ ܕܡܲܕܿܥܵܐ ܡܩܲܒܿܠܵܢܵܐ ܕܲܡܠܘܿܐܵܐ
                ܕܙܲܪܥܵܐ ܪܘܼܚܵܢܵܝܵܐ: ܒܸܠܥܵܕܼ ܓܫܝܼܡܘܼܬܼ ܦܘܼܠܚܵܢܵܐ ܕܲܡܝܲܬܿܪܘܼܬܼܵܐ ܒܲܝܬܵܗ̇
                ܕܝܼܕܲܥܬܼܵܐ ܡܩܲܒܿܠܵܢܝܼܬܼܵܐ ܕܓܸܠܝܵܢܹ̈ܐ܀ ܬܹܐܘܿܪܝܼܵܐ ܕܝܼܬܹܝܗ̇: ܪܓܸܫܬܼܵܐ
                ܕܐ̄ܪ̈ܵܙܹܐ ܐܲܠܵܗܵܝܹ̈ܐ: ܕܲܛܡܝܼܪܝܼܢ ܒܨܸܒܼ̈ܘܵܬܼܵܐ ܕܡܸܬܼܡܲܠ̈ܠܵܢ܀ ܐܸܡܲܬܼܝ ܕܹܝܢ
                ܕܬܸܫܡܲܥ ܪܚܘܼܩܝܵܐ ܕܡ̣ܢ ܥܵܠܡܵܐ: ܐܵܘ ܫܒܼܝܼܩܘܼܬܼܵܐ ܕܥܵܠܡܵܐ: ܐܵܘ
                ܕܲܟܼܝܼܘܼܬܼܵܐ ܕܡ̣ܢ ܥܵܠܡܵܐ: ܠܘܼܩܕܲܡ ܤܢܝܼܩ ܐܲܢ̄ܬܿ ܠܡܹܐܠܲܦ
                
                 18 
                
                ܘܲܠܡܸܕܲܥ: ܠܵܘ ܗܸܕܝܼܘܿܛܵܐܝܼܬܼ ܐܸܠܵܐ ܒܙܵܘ̈ܥܹܐ ܝܲܕܘܼ̈ܥܬܼܵܢܹܐ: ܕܡܵܢܵܘ
                ܟܘܼܢܵܝܹܗ ܕܥܵܠܡܵܐ: ܘܡ̣ܢ ܟܡܵܐ ܦܘܼܪ̈ܫܵܢܹܐ ܡܸܬܼܩܲܝܲܡ ܗܵܢܵܐ ܫܡܵܐ:
                ܘܗܵܝܕܹܝܢ ܬܸܫܟܲܚ ܬܸܕܲܥ ܢܲܦܫܵܟܼ: ܕܲܟܼܡܵܐ ܗ̣̄ܝ ܠܵܟܼ ܪܲܚܝܼܩܘܼܬܼܵܐ
                ܐܵܘ ܚܘܼܠܛܵܢܵܐ ܕܲܠܘܵܬܼ ܥܵܠܡܵܐ. ܐܸܠܵܐ ܠܘܼܩܕܲܡ ܝܑܼܕܲܥ̣ ܐ̄ܢܵܫ
                ܡܵܢܵܘ ܥܵܠܡܵܐ: ܐܵܦ ܠܵܐ ܡܲܕܼܪܸܟܼ ܕܒܲܟܼܡܵܐ ܗܲܕܵܡܝܼ̈ܢ ܪܲܚܝܼܩ ܐܵܦ
                ܡܦܲܟܲܪ ܒܓܼܵܘܹܗ܀ ܤܲܓܿܝܼ̈ܐܹܐ ܐܸܢܘܿܢ ܐܲܝܠܹܝܢ ܕܲܒܼܬܲܪܬܹܝܢ ܘܲܬܼܠܵܬܼ
                ܨܸܒܼ̈ܘܵܢ ܕܲܟܼܠܵܘ ܢܲܦܫܗܘܿܢ ܡ̣ܢ ܥܵܠܡܵܐ: ܐܲܤܒܲܪܘ ܥܲܠ ܢܲܦܫܗܘܿܢ
                ܕܝܲܬܝܼܪܹ̈ܐ ܐܸܢܘܿܢ ܠܒܲܪ ܡܸܢܹܗ ܒܕܼܘܼܒܵܪ̈ܲܝܗܘܿܢ. ܒܗܵܝ̇ ܕܠܵܐ ܐܸܤܬܲܟܲܠܘ
                ܘܲܚܙܵܘ ܚܲܟܿܝܼܡܵܐܝܼܬܼ: ܕܲܒܼܚܲܕܼ ܘܲܬܼܪܹܝܢ ܗܲܕܵܡܹ̈ܐ ܡܲܝܝܼܬܼܝܼܢ ܠܥܵܠܡܵܐ:
                ܫܲܪܟܵܐ ܕܹܝܢ ܕܗܲܕܵܡܲܝ̈ܗܘܿܢ ܚܲܝܝܼܢ ܐܸܢܘܿܢ ܒܓܼܵܘ ܓܘܼܫܡܹܗ ܕܥܵܠܡܵܐ.
                ܘܒܲܕܼܓܼܘܿܢ: ܐܵܦܠܵܐ ܒܚܲܫܲܝ̈ܗܘܿܢ ܐܸܫܟܲܚ̣ܘ ܠܡܲܪܓܵܫܘܼ. ܘܲܒܼܗܵܝ̇ ܕܠܵܐ
                ܐܲܪܓܸܫ̣ܘ: ܐܵܦܠܵܐ ܥܲܠ ܐܵܤܝܘܼܬܼܗܘܿܢ ܐܸܬܼܒܛܸܠ ܠܗܘܿܢ܀
                 ܥܵܠܡܵܐ ܡܸܬܼܐܡܲܪ ܡ̣ܢ ܒܘܼܚܵܢܵܐ ܕܬܹܐܘܿܪܝܼܵܐ: ܡܩܲܝܡܘܼܬܼ ܫܡܵܐ
                ܓܵܘܵܢܵܝܵܐ: ܕܢܵܦܹ̇ܠ ܥܲܠ ܚܲܫܹ̈ܐ ܡܦܲܪ̈ܫܹܐ. ܐܸܡܲܬܼܝ ܕܹܝܢ ܕܲܠܚܲܫܹ̈ܐ
                ܓܵܘܵܢܵܐܝܼܬܼ ܨܵܒܹ̇ܝܢܲܢ ܕܢܸܩܪܸܐ: ܩܵܪܹܝܢܲܢ ܠܗܘܿܢ ܥܵܠܡܵܐ. ܟܲܕܼ ܕܹܝܢ
                ܡܦܲܪܫܵܐܝܼܬܼ: ܚܲܫܹ̈ܐ ܩܵܪܹܝܢܲܢ: ܒܦܘܼܪܵܫ ܫܡܵܗܹ̈ܐ ܕܝܼܠܗܘܿܢ܀ ܚܲܫܹ̈ܐ:
                ܡܢܵܘ̈ܬܼܵܐ ܐܸܢܘܿܢ ܕܪܲܗܛܵܐ ܕܝܘܼܒܵܠܹܗ ܕܥܵܠܡܵܐ. ܘܐܲܝܟܵܐ ܕܚܲܫܹ̈ܐ
                ܒܛܸܠ̣ܘ: ܬܲܡܵܢ ܦܵܫ̣ ܠܹܗ ܥܵܠܡܵܐ ܡ̣ܢ ܝܘܼܒܵܠܹܗ. ܕܐܝܼܬܲܝܗܘܿܢ:
                ܪܸܚܡܲܬܼ ܥܘܼܬܼܪܵܐ. ܟܘܼܢܵܫ ܨܸܒܼ̈ܘܵܬܼܵܐ. ܦܛܵܡܵܐ ܕܦܲܓܼܪܵܐ: ܕܡܸܢܹܗ
                ܡܲܪܕܝܼܬܼܵܐ ܕܚܲܫܵܐ ܕܙܘܼܘܵܓܼܵܐ. ܪܸܚܡܲܬܼ ܐܝܼܩܵܪܹ̈ܐ: ܕܐܝܼܬܹܝܗ̇ ܢܸܒܼܥܵܐ
                ܕܲܚܤܵܡܵܐ. ܡܕܲܒܿܪܵܢܘܼܬܼܵܐ ܕܪܹܫܵܢܘܼܬܼܵܐ. ܚܘܼܬܼܪܵܐ ܘܓܲܐܝܘܼܬܼܵܐ ܕܫܘܼܠܛܵܢܵܐ.
                
                 19 
                
                ܤܸܩܠܵܐ. ܬܸܫܒܿܘܿܚܬܼܵܐ ܐ̄ܢܵܫܵܝܬܼܵܐ: ܕܐܝܼܬܹܝܗ̇ ܥܸܠܬܼܵܐ ܕܐܲܟܿܬܼܵܢܘܼܬܼܵܐ.
                ܕܸܚܠ̱ܬܼܵܐ ܕܦܲܓܼܪܵܐ܀ ܐܲܝܟܵܐ ܕܹܝܢ ܕܗܵܠܹܝܢ ܐܸܫܬܲܠܝܼ ܡ̣ܢ ܪܲܗܛܵܐ:
                ܬܲܡܵܢ ܒܲܡܢܵܬܼܵܐ ܐܲܝܟܼ ܦܘܼܚܵܡܵܐ ܕܦܵܪܫܗܹܝܢ: ܥܵܠܡܵܐ ܒܛܸܠ̣ ܡ̣ܢ
                ܩܘܼܝܵܡܹܗ ܘܦܵܫ̣. ܐܲܝܟܼ ܕܲܒܼܚܲܕܼ ܚܲܕܼ ܡ̣ܢ ܩܲܕܝܼ̈ܫܹܐ ܕܟܲܕ ܚܲܚܝܼܢ:
                ܡܲܝܝܼܬܝܼܢ ܐܸܢܘܿܢ. ܚܲܚܝܼܢ ܡ̇ܢ ܒܲܦܓܲܪ: ܐܸܠܵܐ ܠܵܘ ܕܹܝܢ ܒܸܤܪܵܢܵܐܝܼܬܼ
                ܚܵܐܹ̇ܝܢ. ܚܙܝܼ ܕܒܲܐܝܼܠܹܝܢ ܡ̣ܢ ܗܵܠܹܝܢ ܚܲܝ ܐܲܢ̄ܬܿ: ܘܗܵܝܕܹܝܢ ܝܵܕܲܥ̇
                ܐܲܢ̄ܬܿ ܕܒܲܟܼܡܵܐ ܡܢܵܘ̈ܵܬܼܵܐ ܐܝܼܬܲܝܟ ܚܲܝܵܐ ܠܥܵܠܡܵܐ: ܘܒܲܟܼܡܵܐ ܡܝܼܬܼܵܐ܀
                ܐܸܡܲܬܼܝ ܕܝܼܠܸܦ̣ܬܿ ܡܵܢܵܘ ܥܵܠܡܵܐ: ܡܸܢܗܘܿܢ ܕܗܵܠܹܝܢ ܦܘܼܪ̈ܫܵܢܹܐ ܝܵܠܹ̇ܦ
                ܐܲܢ̄ܬܿ: ܘܐܵܦ ܥܘܼܪܓܵܠܵܟܼ ܕܒܹܗ: ܐܵܘ ܤܦܝܼܩܘܼܬܼܵܟܼ ܕܡܸܢܹܗ܀ ܤܵܟܼܵܐ:
                ܥܵܠܡܵܐ ܐܝܼܬܼܵܘܗܝ: ܕܘܼܒܵܪܵܐ ܦܲܓܼܪܵܢܵܝܵܐ ܘܬܲܪܥܝܼܬܼܵܐ ܕܒܸܤܪܵܐ. ܡܸܛܠ
                ܕܐܵܦ ܡܪܝܼܡܘܼܬܼܵܐ ܕܡܸܢܹܗ: ܒܗܵܠܹܝܢ ܬܲܪܬܹܝܢ ܡܸܬܼܝܲܕܼܥܵܐ. ܡ̣ܢ
                ܫܘܼܓܼܢܵܝܵܐ ܕܕܼܘܼܒܵܪܹ̈ܐ: ܘܡ̣ܢ ܦܘܼܪܫܵܢܵܐ ܕܙܵܘ̈ܥܹܐ܀ ܡ̣ܢ ܢܸܒܼ̈ܗܹܐ ܕܪܸܥܝܵܢܵܟܼ
                ܥܲܠ ܨܸܒܼ̈ܘܵܬܼܵܐ ܕܲܥܠܲܝܗܹܝܢ ܦܵܗܹ̇ܐ ܒܙܵܘܥܵܘ̈ܗܝ: ܡܲܕܼܪܸܟܼ ܐܲܢ̄ܬܿ
                ܡܫܘܼܚܬܼܵܐ ܕܕܼܘܼܒܵܪ̈ܲܝܟ. ܕܥܲܠ ܐܲܝܠܹܝܢ ܤܵܘܲܚ ܟܝܵܢܵܐ ܕܠܵܐ ܥܲܡܠܵܐ:
                ܘܐܲܝܠܹܝܢ ܐܸܢܘܿܢ ܢܸܒܼ̈ܗܹܐ ܕܐܲܡܝܼܢܘܼܬܼܵܐ: ܘܐܲܝܠܹܝܢ ܐܸܢܘܿܢ ܕܓܸܕܼܫܵܐ ܡܙܝܼܥ
                ܠܗܘܿܢ. ܘܕܐܸܢ ܫܩܝܼܠܵܐ ܠܪܸܥܝܵܢܵܐ ܟܠ ܟ̱ܠܹܗ ܪܓܸܫܬܼܵܐ ܕܙܵܘ̈ܥܹܐ
                ܠܵܐ ܓܫܝܼ̈ܡܹܐ: ܐܵܘ ܟ̱ܠܹܗ ܗܘܼܠܵܢܵܐܝܼܬܼ ܪܵܦܹ̇ܬܼ. ܘܗ̤ܝ ܗܘܼܠܵܢܵܝܘܼܬܹܗ
                ܚܲܫܵܢܵܫܝܬܼܵܐ ܗ̣̄ܝ: ܐܵܘ ܟܹܝܬܼ ܛܲܒܼ̈ܥܹܐ ܐܸܢܘܿܢ ܕܲܓܼܫܝܼܡܘܼܬܼ ܦܘܼܠܚܵܢܵܐ:
                ܕܡܸܫܬܪܲܓܼܪܲܓܼ ܪܸܥܝܵܢܵܐ ܒܠܵܐ ܨܸܒܼܝܵܢܹܗ ܒܐܲܝܠܹܝܢ ܕܲܒܼܗܹܝܢ ܡܝܲܬܿܪ̈ܵܬܼܵܐ
                ܦܵܠܲܚ. ܘܡܸܢܗܹܝܢ ܠܵܐ ܟܪܝܼܗܵܐܝܼܬܼ ܠܪܸܬܼܚܵܐ ܢܵܤܹ̇ܒܼ ܥܸܠܬܼܵܐ ܘܲܠܟܼܘܼܢܵܫܵܐ
                
                 20 
                
                ܕܚܘܼ̈ܫܵܒܹܐ: ܕܲܒܼܢܝܼܫܵܐ ܫܲܦܝܼܪܵܐ ܓܫܝܼܡܵܐܝܼܬܼ ܓܫܝܼܡܵܐܝܼܬܼ ܝܵܕܲܥ̇ ܠܡܸܦܠܲܚ
                    ܪܸܥܝܵܢܵܐ
                ܡܸܛܠ ܠܵܐ ܡܢܲܦܩܘܼܬܹܗ: ܐܵܦܸܢ ܠܵܘ ܚܲܫܵܢܵܐܝܼܬܼ: ܘܕܸܐܢ ܠܵܐ
                ܡܸܬܼܡܪܲܗ ܒܟܲܤܝܘܼܬܼ ܦܸܓܼܥܹ̈ܐ ܕܛܲܒܼܥܲܝ̈ ܚܘܼ̈ܫܵܒܹܐ ܪܸܗܝܵܢܵܐ ܡܸܛܠ
                ܫܘܼܠܗܵܒܹܗ ܝܲܬܿܝܼܪܵܐ ܕܒܲܐܠܵܗܵܐ: ܗܵܘ̇ ܕܲܡܥܵܕܼ ܠܡܸܦܤܲܩ ܥܘܼ̈ܗܕܵܢܹܐ
                ܤܪ̈ܝܼܩܹܐ. ܗܵܠܹܝܢ ܪ̈ܘܼܫܡܹܐ ܙܥܘܿܪܹ̈ܐ ܕܲܒܼܪܹܫܵܐ ܗܵܢܵܐ: ܤܵܦ̇ܩܝܼܢ ܠܒܲܪܢܵܫܵܐ
                ܠܲܡܢܲܗܵܪܘܼܬܹܗ: ܐܸܢ ܫܠܸܡ ܘܦܵܪܘܿܫ: ܚܠܵܦ ܟܬܼܵܒܹ̈ܐ ܤܲܓܝܼ̈ܐܹܐ܀
                ܚܲܤܝܼܢܵܐ ܒܒܲܪܢܵܫܵܐ: ܕܸܚܠܬܼܵܐ ܕܦܲܓܼܪܵܐ. ܘܕܲܐܝܟܼ ܗܵܟܲܢܵܐ: ܕܙܲܒܼ̈ܝܼܢ
                ܤܲܓܿܝܼ̈ܐܵܢ ܡ̣ܢ ܫܒܼܝܼ̈ܚܵܬܼܵܐ ܘܲܡܝܲܩܪ̈ܵܬܼܵܐ ܦܵܐܹ̇ܫ ܡܸܛܠܵܬܼܵܗ̇. ܡܵܐ ܕܹܝܢ
                ܕܲܬܿܕܼܝܩ ܥܲܠ ܗܵܕܹܐ ܕܸܚܠܬܼܵܐ ܕܢܲܦܫܵܐ: ܗܵܟܲܢܵܐ ܚܵܝ̇ܒܵܐ ܡ̣ܢ ܩܕܼܵܡܹܝܗ̇:
                ܐܲܝܟܼ ܩܹܪܘܼܬܼܵܐ ܡ̣ܢ ܚܲܝܠܵܗ̇ ܕܫܲܠܗܹܒܼܝܼܬܼܵܐ.
            
            
                 ܫܠܸܡ ܡܹܐܡܪܵܐ ܕܲܬܼܪܹܝܢ.