Isaac of Nineveh. “Discourse 7.” Based upon Digital Syriac Corpus. Last modified March 5, 2019. https://syriaccorpus.org/398.
    
        
            
                ܬܘܼܒܼ ܥܲܠ ܢܝܼܫܹ̈ܐ ܐ̄ܚܪ̈ܵܢܹܐ: ܟܠ ܬܲܪܥܵܐ ܡܸܢܹܗ ܘܠܹܗ:
                ܒܦܵܤ̈ܘܿܩܹܐ ܟܪ̈ܲܝܵܐ: ܥܲܠ ܙܢܵܐ ܕܬܼܘܼܟܼܠܵܢܵܐ ܕܥܲܠ ܐܲܠܵܗܵܐ: ܘܕܲܠܡܲܢ̣ܘ
                ܙܵܕܹܩ ܕܢܸܬܿܬܿܟܸܠ ܥܲܠ ܐܲܠܵܗܵܐ. ܘܐܵܦ ܟܲܕܼ ܡܸܬܿܬܿܟܸܠ: ܡܸܫܟܲܚ
                ܐܲܝܟܼ ܬܲܪܥܝܼܬܹܗ: ܘܲܕܼܡܲܢ̣ܘܼ ܕܤܲܟܼܠܵܐܝܼܬܼ ܘܲܕܼܠܵܐ ܒܘܼܝܵܢ. ܙ .
            
            
                ܐܝܼܬܼ ܬܘܼܟܼܠܵܢܵܐ ܕܥܲܠ ܐܲܠܵܗܵܐ ܒܗܲܝܡܵܢܘܼܬܼܵܐ ܕܠܸܒܵܐ: ܕܫܲܦܝܼܪ
                ܗ̄ܘ̣ ܘܲܕܼܦܘܼܪܫܵܢܵܐ ܕܝܼܕܲܥܬܼܵܐ. ܘܐܝܼܬܼ ܐ̄ܚܪܹܢܵܐ ܕܦܲܟܿܝܼܗ ܗ̄ܘ̣
                ܘܲܕܼܤܲܟܼܠܘܼܬܼܵܐ: ܘܬܘܼܟܼܠܵܢܵܐ ܗ̄ܘ̣ ܕܲܓܵܠܵܐ܀ ܕܐ̄ܢܵܫ ܡܲܢ ܗܵܟܹܝܠ
                ܕܠܲܓܼܡܵܪ ܠܵܐ ܪܡܸܐ ܠܹܗ ܕܡܸܕܸܡ ܡ̣ܢ ܗܵܠܹܝܢ ܥܵܒܼܘܿܪ̈ܝܵܬܼܵܐ: ܘܠܹܠܲܝ
                ܐܝܼܡܵܡ ܠܲܥܒܼܵܕܼܵܘ̈ܗܝ ܕܐܲܠܵܗܵܐ ܝܑܼܗܝܼܒܼܵܐ ܢܲܦܫܹܗ: ܘܠܵܐ ܝܲܨܝܼܦ ܕܡܸܕܸܡ
                ܥ̇ܒܼܵܕܼܵܐ ܕܥܵܠܡܵܐ ܗܵܢܵܐ: ܡܸܛܠ ܒܛܝܼܠܘܼܬܹܗ ܤܲܓܝܼܐܬܼܵܐ ܕܥܲܠ
                ܡܝܲܬܿܪܘܼܬܼܵܐ: ܘܲܫܩܝܼܠ ܨܸܦܬܼܵܐ ܟ̱ܠܵܗ̇ ܕܗܵܢܹܝܢ ܐܲܠܵܗܝܵ̈ܬܼܵܐ. ܘܡܸܛܠ
                ܗܵܕܹܐ ܢܲܗܡܸܐ ܠܹܗ ܡ̣ܢ ܕܠܲܡܛܲܝܵܒܼܘܼ ܠܒܼܘܼܫܵܐ ܐܵܘ ܤܲܝܒܵܪܬܵܐ:
                ܐܵܘ ܠܡܲܬܼܩܵܢܘܼ ܘܠܲܡܛܲܝܒܼܘܼ ܕܘܼܟܿܬܼܵܐ ܠܤܸܬܵܪܹܗ ܘܫܲܪܟܵܐ: ܘܢܸܬܿܬܿܟܸܠ
                ܥܲܠ ܐܲܠܵܗܵܐ ܕܗ̤ܘ ܡܛܲܝܸܒܼ ܠܙܲܒܼܢܹܗ ܟܠܡܸܕܸܡ ܕܡܸܬܼܒܿܥܸܐ ܠܹܗ:
                ܘܝܵܨܹ̇ܦ ܕܝܼܠܹܗ. ܗܵܢܵܐ ܚܲܬܿܝܼܬܼܵܐܝܼܬܼ ܬܘܼܟܼܠܵܢܵܐ ܗ̄ܘ̣ ܕܲܫܪܵܪܵܐ: ܘܬܼܘܼܟܼܠܵܢܵܐ
                ܗ̄ܘ̣ ܕܚܸܟܼܡ̱ܬܼܵܐ. ܘܐܲܝܟܼ ܕܒܲܫܪܵܪܵܐ: ܐܵܦ ܫܲܦܝܼܪ ܠܹܗ ܠܗܵܢܵܐ ܟܲܕܼ
                
                 100 
                
                ܢܸܬܿܬܿܟܸܠ ܥܲܠ ܐܲܠܵܗܵܐ: ܡܸܛܠ ܕܦܵܠܚܹܗ ܗ̄ܘ̣. ܘܡܲܪ̈ܢܝܵܬܼܵܐ ܕܝܼܠܹܗ
                ܛܥܝܼܢ: ܘܝܘܼܩܪܵܐ ܕܲܥܒܼܵܕܼܵܘ̈ܗܝ ܫܩܝܼܠ: ܕܠܵܐ ܡܲܗܡܝܵܢܘܼܬܼܵܐ
                ܕܥܸܠ̈ܠܵܬܼܵܐ. ܘܐܵܦ ܠܹܗ: ܘܵܠܝܼܬܼܵܐ ܗ̣̄ܝ ܠܲܡܚܵܘܵܝܘܼ ܥܠܵܘܗܝ
                ܒܛܝܼܠܘܼܬܼܵܐ: ܕܲܦܪܝܼܫܵܐ ܡ̣ܢ ܕܥܲܠ ܫܲܪܟܵܐ ܕܲܒܼܢܲܝ̈ܢܵܫܵܐ: ܕܐܲܚܝܼܕܼ
                ܒܲܩܢܘܿܡܹܗ ܙܗܝܼܪܵܐܝܼܬܼ ܠܡܸܠܬܹܗ ܕܡܵܪܲܢ ܕܐܸܡ݂ܲܪ: ܕܲܒܼܥܵܘ ܡܲܠܟܿܘܼܬܹܗ
                ܕܐܲܠܵܗܵܐ ܘܙܲܕܝܼܩܘܼܬܹܗ: ܘܠܵܐ ܬܹܐܨܦܘܼܢ ܕܦܲܓܼܪܵܐ. ܘܟܲܕܼ ܕܗܵܕܹܐ
                ܬܹܐܨܦܘܼܢ: ܗ̤ܘ ܥܵܠܡܵܐ ܐܲܝܟܼ ܥܲܒܼܕܵܐ ܡܛܲܝܸܒܼ ܠܟܼܘܿܢ ܟܠܡܸܕܸܡ.
                ܘܐܲܝܟܼ ܕܲܠܡܵܪܵܐ ܡܸܫܬܲܥܒܲܕܼ ܠܡܸܠܲܝ̈ܟܿܘܿܢ ܕܠܵܐ ܦܘܼܫܵܟܼ: ܟܲܕܼ ܠܵܐ
                ܥܵܨܹ̇ܐ ܠܨܸܒܼܝܵܢܟܼܘܿܢ ܒܡܸܕܸܡ. ܘܒܲܕܓܘܿܢ ܡܸܛܠ ܗܵܝ̇ ܕܠܵܐ ܢܸܒܼܛܲܠ
                ܡ̣ܢ ܩܵܘܡܹܗ ܐܲܡܝܼܢܵܐ ܕܲܩܕܼܵܡܵܘܗܝ ܒܝܲܕܼ ܥܸܠ̈ܠܵܬܼܵܐ: ܠܵܐ ܝܵܗܹ̇ܒܼ
                ܢܲܦܫܹܗ ܠܗܵܠܹܝܢ ܕܡܸܛܠ ܦܲܓܼܪܵܐ ܐܵܠ̈ܨܵܢ. ܡܸܛܠ ܕܐܵܦܠܵܐ ܥܲܠ
                ܐ̄ܚܪ̈ܵܢܝܵܬܼܵܐ ܒܛܝܼܠ ܠܹܗ: ܐܸܠܵܐ ܚܕܼܵܐ ܫܲܘܝܘܼܬܼܵܐ ܕܒܸܛܠܵܢܵܐ ܩܢܸܐ:
                ܡ̣ܢ ܙܥܘܿܪܵܐ ܘܲܥܕܲܡܵܐ ܠܪܲܒܵܐ: ܕܲܢܝܵܚܵܐ ܐܵܘ ܦܘܼܪܓܵܝܵܐ: ܐܵܘ ܒܸܛܠܵܢܵܐ
                ܕܲܒܼܗܘܿܢ ܡ̣ܢ ܕܸܚܠܲܬܼ ܐܲܠܵܗܵܐ. ܘܐܵܦ ܗ̤ܘ ܡܸܫܟܲܚ ܬܡܝܼܗܵܐܝܼܬܼ:
                ܘܟܲܕܼ ܠܵܐ ܩܵܪܹܒܼ ܠܲܚܕܼܵܐ ܡܸܢܗܹܝܢ: ܐܵܘ ܥܵܡܹ̇ܠ ܒܗܹܝܢ܀
                 ܐ̄ܚܪܹܢܵܐ ܕܹܝܢ: ܟܲܕܼ ܠܲܓܼܡܵܪ ܛܡܝܼܪ ܠܸܒܹܗ ܒܐܲܪܥܵܐ: ܘܐܲܡܝܼܢܵܐܝܼܬܼ
                ܥܲܡ ܚܸܘܝܵܐ ܥܲܦܪܵܐ ܐܵܟܹ̇ܠ: ܘܠܵܐ ܒܛܝܼܠ ܠܹܗ ܐܵܦܠܵܐ ܒܲܚܕܼܵܐ ܥܲܠ
                ܗܵܠܹܝܢ ܕܦܲܐ̈ܝܵܢ ܠܐܲܠܵܗܵܐ: ܘܲܒܼܡܼܠ ܡܸܕܸܡ ܒܗܵܠܹܝܢ ܕܦܲܓܼܪܵܐ ܐܵܥܹ̇ܦܫ:
                ܘܲܫܪܸܐ ܘܒܲܛܝܼܠ ܐܲܡܝܼܢܵܐܝܼܬܼ ܒܝܲܕܼ ܥܸܢܝܵܢܵܐ ܘܦܘܼܪܓܵܝܵܐ ܘܐܸܤܛܪܹܢܝܵܐ:
                ܘܐܵܚܹ̇ܕܼ ܥܸ̈ܠܵܠܵܬܼܵܐ ܕܡܸܕܸܡ ܡܸܕܸܡ. ܘܟܲܕܼ ܒܗܵܕܹܐ ܚܒܸܢܵܢܘܼܬܼܵܐ ܘܒܸܛܠܵܢܵܐ
                ܕܡ̣ܢ ܡܝܲܬܿܪܘܼܬܼܵܐ ܪܡܸܐ: ܒܲܙܒܲܢ ܙܒܲܢ ܟܲܕܼ ܢܸܬܼܐܠܸܨ ܐܵܘ ܢܸܚܤܲܪ
                ܠܹܗ ܡܸܕܸܡ: ܐܵܘ ܦܹܐܪܵܐ ܕܤܲܟܼܠܘܼܬܼܵܐ ܡܥܝܼܩ ܠܹܗ ܒܲܨܒܼܘܼ: 
                
                 101 
                
                ܐܵܡܲ݁ܪ: ܐܸܬܿܬܿܟܸܠ ܥܲܠ ܐܲܠܵܗܵܐ: ܘܗ̤ܘ ܥܵܒܹ̇ܕܼ ܠܝܼ ܕܠܵܐ ܨܸܦܬܼܵܐ
                ܘܲܡܢܝܼܚ ܠܝܼ. ܐܘܿ ܤܲܟܼܠܵܐ: ܥܕܲܡܵܐ ܠܗܵܫܵܐ ܠܐܲܠܵܗܵܐ ܠܵܐ
                ܐܸܬܿܕܟܲܪܬܵܝܗܝ: ܘܲܡܨܲܥܲܪ ܗ̣̄ܘܲܝܬܿ ܠܹܗ ܒܫܲܪܝܘܼܬܼܵܐ ܕܲܥܒܼܵܕܲܝ̈ܟ:
                ܘܲܫܡܹܗ ܡܸܛܠܵܬܼܵܟܼ ܡܸܬܼܓܲܕܲܦ ܗ̄ܘ̣ܵܐ ܒܹܝܬܼ ܥܲܡܡܹ̈ܐ ܐܲܝܟܼ ܕܲܟܼܬܼܝܼܒܼ.
                ܘܗܵܫܵܐ ܒܟܼܠܹܗ ܦܘܼܡܵܟܼ ܐܵܡܲ݁ܪ ܐܲܢ̄ܬܿ: ܕܲܬܼܟܼܝܼܠ ܐ̄ܢܵܐ ܥܠܵܘܗܝ
                ܕܲܡܥܲܕܲܪ ܠܝܼ ܘܝܵܨܹ̇ܦ ܕܝܼܠܝ. ܫܲܦܝܼܪ ܐܸܡ݂ܲܪ ܐܵܦ ܐܲܠܵܗܵܐ ܒܲܢܒܼܝܼܵܐ:
                ܟܲܕܼ ܡܚܲܤܸܕܼ ܠܕܲܐܝܟܼ ܗܵܠܹܝܢ: ܕܒܼܵܥܹ̇ܝܢ ܠܝܼ ܠܲܡ ܟܠܝܘܿܡ: ܘܨܵܒܹ̇ܝܢ
                ܠܡܸܕܲܥ ܐܘܼܪ̈ܚܵܬܼܝ. ܐܲܝܟܼ ܥܲܡܵܐ ܕܲܥ̣ܒܲܕܼ ܙܲܕܝܼܩܘܼܬܼܵܐ: ܘܠܵܐ ܫܒܲܩ̣
                ܕܝܼܢܵܐ ܕܐܲܠܵܗܹܗ: ܫܵܐܠܹ̇ܝܢ ܠܝܼ ܕܝܼܢܵܐ ܘܙܲܕܝܼܩܘܼܬܼܵܐ. ܡ̣ܢ ܗܵܠܹܝܢ
                ܐܝܼܬܼܵܘܗܝ ܫܵܛܝܵܐ: ܕܐܵܦܠܵܐ ܒܬܲܪܥܝܼܬܹܗ ܡܸܬܼܩܲܪܲܒܼ ܠܘܵܬܼ ܐܲܠܵܗܵܐ:
                ܘܒܲܙܒܲܢ ܕܲܟܼܪ̈ܝܼܟܼܵܢ ܠܹܗ ܟܘܿܟܼ̈ܝܵܬܼܵܐ ܕܐܘܼ̈ܠܨܵܢܹܐ: ܡܪܝܼܡ ܐܝܼܕܼܵܘܗܝ
                ܠܘܵܬܹܗ ܒܬܼܘܼܟܼܠܵܢܵܐ. ܠܗܵܢܵܐ ܙܵܕܹܩ ܕܢܸܬܼܟܵܘܸܐ ܙܲܒܼ̈ܢܵܬܼܵܐ ܤܲܓܿܝܼ̈ܐܵܬܼܵܐ:
                ܕܡܸܟܵܐ ܘܲܠܗܲܠ ܢܸܬܼܚܲܟܲܡ. ܕܟܲܕܼ ܠܲܝܬܿ ܠܹܗ ܥ̇ܒܼܵܕܼܵܐ ܕܫܵܘܹ̇ܐ
                ܠܬܼܘܼܟܼܠܵܢܵܐ ܕܥܲܠ ܐܲܠܵܗܵܐ: ܐܸܠܵܐ ܘܐܲܝܟܼ ܕܡ̣ܢ ܥܒܼܵܕܼܵܘ̈ܗܝ ܒܝܼ̈ܫܹܐ
                ܘܡܲܗܡܝܵܢܘܼܬܼܵܐ ܕܡ̣ܢ ܘܵܠ̈ܝܵܬܼܵܐ ܠܡܲܪܕܘܼܬܼܵܐ ܫܵܘܹ̇ܐ: ܘܲܒܼܪ̈ܲܚܡܹܐ
                ܛܥܝܼܢ. ܒܢܲܦܫܹܗ ܠܵܐ ܢܸܗܘܸܐ ܡܲܛܥܸܐ: ܘܡܸܬܼܢܫܸܐ ܠܛܲܟܼܤܸܐ
                ܕܗܘܼܦܵܟܹܗ ܩܲܕܼܡܵܝܵܐ: ܘܐܵܡܲ݁ܪ: ܬܟܼܝܼܠ ܐ̄ܢܵܐ ܒܐܲܠܵܗܵܐ. ܗܵܢܵܐ: ܢܸܬܼܪܕܸܐ.
                ܕܟܲܕܼ ܠܲܝܬܿ ܠܹܗ ܥ̇ܒܼܵܕܹ̈ܐ ܕܗܲܝܡܵܢܘܼܬܼܵܐ: ܠܵܐ ܢܸܦܫܘܿܛ ܪܸ̈ܓܼܠܵܘܗܝ
                ܒܒܸܛܠܵܢܵܐ: ܘܐܵܡܲ݁ܪ: ܡܗܲܝܡܸܢ ܐ̄ܢܵܐ ܕܐܲܠܵܗܵܐ ܝܵܗܹ̇ܒܼܠܝܼ ܠܡܹܐܟܲܠ: ܐܲܝܟܼ
                ܕܒܲܥ̇ܒܼܵܕܼܵܐ ܕܐܲܠܵܗܵܐ ܥܡܝܼܠ. ܐܵܘ ܕܐܵܙܹ̇ܠ ܢܵܦܹ̇ܿܠ ܒܒܹܪܵܐ ܒܥܸܠܲܬܼ
                ܫܵܛܘܿܪܘܼܬܹܗ: ܘܟܲܕܼ ܟܠ ܟ̱ܠܹܗ ܡ̣ܢ ܩܕܼܵܡ ܗܵܝ̇ ܠܵܐ ܤܠܸܩ̣
                ܐܲܠܵܗܵܐ ܥܲܠ ܒܵܠܹܗ: ܗܵܫܵܐ ܐܵܡܲ݁ܪ: ܥܲܠ ܐܲܠܵܗܵܐ ܡܸܬܿܬܿܟܸܠ ܐ̄ܢܵܐ
                
                 102 
                
                ܕܦܵܪܹܩ ܠܝܼ. ܠܵܐ ܬܸܛܥܸܐ: ܐܘܿ ܤܲܟܼܠܵܐ. ܩܲܕܝܼܡܝܼܢ ܐܸܢܘܿܢ ܥܲܡܠܹ̈ܐ
                ܕܡܸܛܠ ܐܲܠܵܗܵܐ ܘܕܼܘܼܥܬܼܵܐ ܕܦܘܼܠܚܵܢܹܗ: ܠܬܼܘܼܟܼܠܵܢܵܐ ܕܥܲܠ ܐܲܠܵܗܵܐ.
                ܡܗܲܝܡܸܢ ܐܲܢ̄ܬܿ ܠܹܗ ܠܐܲܠܵܗܵܐ: ܫܲܦܝܼܪ ܥܵܒܹ̇ܕܼ ܐܲܢ̄ܬܿ. ܒܪܲܡ: ܐܵܦ
                ܗܲܝܡܵܢܘܼܬܼܵܐ ܬܘܼܒܼ ܥܒܼܵܕܹ̈ܐ ܒܵܥ̇ܝܵܐ. ܘܬܼܟܼܠܵܢܵܐ ܕܒܹܗ: ܤܵܗܕܘܼܬܼܵܐ
                ܕܬܹܐܪܬܵܐ: ܗܵܝ̇ ܕܡܸܬܼܝܲܠܕܵܐ ܡ̣ܢ ܠܹܐܘܬܼܵܐ ܕܲܡܝܲܬܿܪܘܼܬܼܵܐ. ܗܲܝܡܸܢ
                ܕܐܲܠܵܗܵܐ ܝܵܨܘܿܦܵܐ ܗ̄ܘ̣ ܕܲܒܼܪܝܼܬܹܗ: ܘܐܵܦ ܡܨܸܐ ܚܹܝܠ ܟܠ. ܐܸܠܵܐ
                ܠܗܲܝܡܵܢܘܼܬܼܵܟܼ ܐܲܩܸܦ ܥܒܼܵܕܼܵܐ ܕܠܵܚ̇ܡܝܼܢ ܠܵܗ̇: ܘܗܵܝܕܹܝܢ ܥܵܢܹ̇ܐ ܠܵܟܼ.
                ܠܵܐ ܬܸܠܒܿܘܿܟܼ ܪܘܼܚܵܐ ܒܚܘܼܦܢܵܟܼ: ܗܵܢܵܘ ܕܹܝܢ: ܗܲܝܡܵܢܘܼܬܼܵܐ ܕܠܵܐ
                ܤܘܼܥܪ̈ܵܢܹܐ܀
                 ܐܸܢ ܐ̄ܢܵܫ ܕܹܝܢ ܠܵܐ ܪܓܼܝܼܫ: ܘܐܵܙܹ̇ܠ ܒܐܘܼܪܚܵܐ ܒܵܗ̇ ܚܲܝܘܬܼܵܐ
                ܒܝܼܫܬܼܵܐ ܐܵܘ ܐ̄ܢܵܫܵܐ ܩܵܛ̈ܘܿܠܹܐ: ܐܵܘ ܫܲܪܟܵܐ ܕܡܸܕܸܡ ܕܐܲܝܟܼ ܗܵܠܹܝܢ
                ܟܲܕܼ ܠܵܐ ܝܲܕܲܥ̇: ܗܵܕܹܐ ܒܛܝܼܠܘܼܬܼܵܐ ܗ̣̄ܝ ܓܵܘܵܢܵܝܬܼܵܐ ܕܐܲܠܵܗܵܐ: ܕܲܟܼܡܵܐ
                ܙܲܒܼ̈ܢܝܼܢ ܡܲܥܒܲܪ ܡܸܢܹܗ: ܟܲܕܼ ܡܬܲܗܸܐ ܠܹܗ ܒܕܼܘܼܟܿܬܼܵܐ ܕܐܝܼܬܼܵܘܗܝ
                ܒܝܲܕܼ ܥܸܠ̈ܠܵܬܼܵܐ: ܥܕܲܡܵܐ ܕܥܵܒܼ̇ܕܵܐ ܒܝܼܫܬܼܵܐ: ܐܵܘ ܐ̄ܢܵܫ ܦܵܓܲܥ̇ ܒܹܗ
                ܘܡܲܗܦܸܟܼ ܠܹܗ. ܘܬܘܼܒܼ: ܗܵܫܵܐ ܚܸܘܝܵܐ ܡܸܕܸܡ ܒܝܼܫܵܐ ܕܲܡܝܼܟܼ
                ܒܐܘܼܪܚܵܐ: ܘܗ̤ܘ ܠܵܐ ܚܵܙܹ̇ܐ ܠܹܗ. ܘܨܵܒܹ̇ܐ ܐܲܠܵܗܵܐ ܕܠܵܐ ܢܸܬܿܬܿܚܸܕܼ
                ܒܵܗ̇ ܒܒܼܝܼܫܬܼܵܐ: ܘܡ̣ܢ ܫܹܠܝ ܪܵܡܹ̇ܐ ܩܵܠܵܐ ܪ̈ܲܚܫܵܐ ܗܵܘ̇: ܐܵܘ ܫܵܒܹ̇ܩ
                ܘܲܡܫܲܢܸܐ. ܐܵܘ ܪܵܚܹ̇ܫ ܩܕܼܵܡܵܘܗܝ: ܕܢܸܚܙܹܝܘܗܝ ܘܢܸܙܕܗܲܪ. ܘܦܵܪܹܩ
                ܠܹܗ ܐܲܠܵܗܵܐ: ܘܐܵܦܸܢ ܠܵܐ ܫܵܘܹ̇ܐ: ܡܸܛܠ ܥܸܠ̈ܠܵܬܼܵܐ ܟܲܤ̈ܝܵܬܼܵܐ ܕܗ̤ܘ
                ܒܲܠܚܘܿܕܼܵܘܗܝ ܝܵܕܲܥ̇. ܘܝܲܬܿܝܼܪܵܐܝܼܬܼ: ܡܸܛܠ ܪ̈ܲܚܡܵܘܗܝ. ܘܬܼܘܼܒܼ ܐܝܼܬܼ
                ܐܸܡܲܬܼܝ: ܕܒܲܝܬܼܵܐ ܡܸܕܸܡ ܐܵܘ ܐܸܤܬܼܵܐ ܐܵܘ ܟܹܐܦܵܐ ܩܲܪܝܼܒܼ ܠܡܸܦܲܠ:
                ܐܵܘ ܠܡܸܫܬܿܪܵܥܘܼ ܡ̣ܢ ܕܘܼܟܿܬܹܗ: ܘܠܲܡܸܚܲܬܼ ܒܚܹܐܦܵܐ: ܘܝܲܬܿܝܼܒܼܝܼܢ
                
                 103 
                
                ܬܲܡܵܢ ܐܵܢܵܫܵܐ ܟܡܵܐ ܕܗ̤ܘ. ܘܦܵܩܹ̇ܕܼ ܐܲܠܵܗܵܐ ܠܡܲܠܲܟܼܵܐ: ܘܲܡܬܲܗܸܐ
                ܠܤܘܼܥܪܵܢܵܐ ܘܠܵܒܹ̇ܟܼ ܠܹܗ: ܥܕܲܡܵܐ ܕܩܵܝ̇ܡܝܼܢ ܡ̣ܢ ܬܲܡܵܢ. ܟܲܕܼ
                ܒܥܸܠܬܼܵܐ ܡܸܕܸܡ ܡܲܦܸܩ ܠܗܘܿܢ: ܐܲܝܟܲܢܵܐ ܕܐܵܦܠܵܐ ܚܲܕܼ ܢܸܫܬܿܚܲܪ
                ܬܚܘܿܬܼܵܘܗܝ. ܘܡܵܐ ܕܲܢܦܲܩ̣ܘ: ܒܵܗ̇ ܒܫܵܥܬܼܵܐ ܢܵܦܹ̇ܠ. ܘܐܸܢ ܢܸܓܼܕܲܫ
                ܘܢܸܬܿܬܿܚܸܕܼ ܐ̄ܢܵܫ ܡܸܢܗܘܿܢ ܬܚܘܿܬܼܵܘܗܝ: ܡܸܕܸܡ ܢܸܟܼܝܵܢܵܐ ܠܵܐ ܗܵܘܹ̇ܐ
                ܒܹܗ. ܟܲܕܼ ܒܗܵܕܹܐ: ܠܪܲܒܿܘܼܬܼ ܚܲܝܠܵܐ ܕܝܼܠܹܗ ܨܵܒܹ̇ܐ ܕܢܵܘܕܲܥ.
                ܗܵܠܹܝܢ ܘܕܲܐܝܟܼ ܗܵܠܹܝܢ: ܒܛܝܠܘܼܬܼܵܐ ܗ̣̄ܝ ܓܵܘܵܢܵܝܬܼܵܐ. ܙܲܕܝܼܩܵܐ ܕܹܝܢ
                ܠܗܵܕܹܐ ܛܲܝܒܿܘܼܬܼܵܐ: ܐܲܡܝܼܢܵܐܝܼܬܼ ܩܢܸܐ ܠܵܗ̇. ܘܝܼܚܝܼܕܼܵܐܝܼܬܼ: ܘܠܵܘ
                ܓܵܘܢܵܐܝܼܬܼ. ܠܫܲܪܟܵܐ ܕܹܝܢ ܐ̄ܚܪܵܢܹܐ: ܒܦܵܪܘܿܫܘܼܬܼܵܐ ܦ̣ܩܲܕܼ ܠܗܘܿܢ
                ܐܲܠܵܗܵܐ ܕܲܢܕܲܒܿܘܼܢ ܢܲܦܫܗܘܿܢ: ܘܝܼܕܲܥܬܼܵܐ ܢܡܲܙܓܼܘܼܢ ܥܲܡ
                ܒܛܝܼܠܘܼܬܹܗ ܕܐܲܠܵܗܵܐ ܒܨܸܒܼ̈ܘܵܬܼܗܘܿܢ. ܙܲܕܝܼܩܵܐ ܕܹܝܢ ܠܗܵܕܹܐ ܝܑܼܕܲܥܬܼܵܐ:
                ܠܲܡܕܲܒܵܪܘܼ ܒܵܗ̇ ܨܸܒܼ̈ܘܵܬܹܗ: ܠܵܐ ܒܵܥܹ̇ܐ ܠܵܗ̇. ܩܢܸܐ ܠܹܗ ܕܹܝܢ ܚܠܵܦ
                ܗܵܕܹܐ ܝܑܼܕܲܥܬܼܵܐ: ܗܲܝܡܵܢܘܼܬܼܵܐ: ܕܒܼܵܗ̇ ܚܵܤܹ̇ܢ ܚܸܤ̈ܢܹܐ ܡܪ̈ܝܼܕܹܐ. ܘܡ̣ܢ
                ܡܸܕܸܡ ܕܐܲܝܟܼ ܗܵܠܹܝܢ ܕܲܡܢܲܝܢܲܢ ܠܵܐ ܩܵܢܹ̇ܛ: ܐܲܝܟܼ ܕܲܟܼܬܼܝܼܒܼ. ܕܙܲܕܝܼܩܵܐ:
                ܐܲܝܟܼ ܐܲܪܝܵܐ ܬܟܼܝܼܠ: ܘܥܲܠ ܟܠܡܸܕܸܡ ܡܲܡܪܲܚ ܒܗܲܝܡܵܢܘܼܬܼܵܐ. ܠܵܘ
                ܐܲܝܟܼ ܕܲܡܢܲܤܸܐ ܠܐܲܠܵܗܵܐ: ܐܸܠܵܐ ܐܲܝܟܼ ܐܲܚܝܼܕܼ ܬܘܼܟܼܠܵܢܵܐ ܕܝܼܠܹܗ:
                ܘܐܲܝܟܼ ܡܙܲܝܢܵܐ ܘܠܲܒܵܫܵܐ ܚܲܤܝܼܢܵܐ ܕܲܒܼܚܲܝܠܹܗ ܕܪܘܼܚܵܐ. ܘܥܲܠ
                ܤܲܓܝܼܐܘܼܬܼ ܝܲܨܝܼܦܘܼܬܹܗ ܐܲܡܝܼܢܬܼܵܐ ܕܲܥܠܵܘܗܝ: ܐܵܦ ܐܲܠܵܗܵܐ ܗܵܟܲܢܵܐ
                ܐܸܡ݂ܲܪ: ܕܥܲܡܹܗ ܐ̄ܢܵܐ ܒܐܘܼܠܨܵܢܵܐ: ܘܬܹܥܲܫܢܝܼܘܗܝ ܘܐܹܝܲܩܪܝܼܘܗܝ.
                ܘܢܘܼܓܼܪܵܐ ܕܝܵܘ̈ܡܵܬܼܵܐ ܐܹܤܲܒܿܥܝܼܘܗܝ: ܘܐܹܚܵܘܹܝܘܗܝ ܦܘܼܪܩܵܢܝ. ܐܲܝܢܵܐ
                
                 104 
                
                ܕܢܲܫܝܼܫ ܒܲܥܒܼܵܕܼܵܘ̈ܗܝ ܘܲܪܦܸܐ: ܐܵܘ ܡܲܗܡܝܵܢ: ܐܵܘ ܒܝܼܫܝܼܢ
                ܤܘܼܥܪ̈ܵܢܵܘܗܝ: ܗܵܢܵܐ ܤܲܒܼܪܵܐ ܕܢܸܗܘܸܐ ܠܹܗ ܠܵܐ ܡܸܫܟܿܚܵܐ. ܐܸܠܵܐ
                ܠܐܲܝܢܵܐ ܕܐܲܡܝܼܢ ܠܘܵܬܼ ܐܲܠܵܗܵܐ ܒܟܼܠܡܸܕܸܡ: ܘܩܲܪܝܼܒܼܵܐ ܕܝܼܠܹܗ
                ܐܝܼܬܼܵܘܗܝ ܒܝܲܕܼ ܫܲܦܝܼܪ̈ܵܬܼܵܐ ܕܲܥ̇ܒܼܵܕܹܗ: ܘܲܡܬܲܚ̣ ܚܝܵܪܵܐ ܕܠܸܒܹܗ
                ܠܛܲܝܒܘܼܬܹܗ ܐܲܡܝܼܢܵܐܝܼܬܼ: ܐܲܝܟܼ ܕܐܸܡ݂ܲܪ ܕܵܘܝܼܕ: ܓܵܙ̣ ܥܲܝ̈ܢܲܝ ܟܲܕܼ
                ܡܤܲܟܸܐ ܐ̄ܢܵܐ ܠܐܲܠܵܗܵܝ.