Isaac of Nineveh. “Discourse 11.” Based upon Digital Syriac Corpus. Last modified March 5, 2019. https://syriaccorpus.org/402.
    
        
            
                ܕܲܒܼܡܵܢܵܐ ܡܸܬܼܢܲܛܪܝܼܢ ܫܘܼܦܪܹ̈ܐ ܕܝܼܚܕܼܵܝܘܼܬܼܵܐ: ܘܕܲܐܝܟܲܢ ܬܸܗܘܸܐ
                ܥܸܠܲܬܼ ܬܸܫܒܿܘܿܚܬܹܗ ܕܐܲܠܵܗܵܐ. ܝܐ.
            
            
                ܙܵܕܹܩ ܠܹܗ ܠܝܼܚܝܼܕܼܵܝܵܐ: ܕܡ̣ܢ ܟܠܗܘܿܢ ܚܘܼܕܼܪ̈ܵܘܗܝ: ܚܙܵܬܼܵܐ
                ܕܓܼܘܼܪܵܓܼܵܐ ܢܸܗܘܸܐ ܠܚܲܙܵܝܵܘ̈ܗܝ. ܐܲܝܟܲܢܵܐ ܕܡ̣ܢ ܫܘܼܦܪ̈ܵܘܗܝ ܤܲܓܝܼ̈ܐܹܐ:
                ܕܐܲܝܟܼ ܙܲܠܝܼ̈ܩܲܝ ܫܸܡܫܵܐ ܡܲܒܼܪܩܝܼܢ ܡ̣ܢ ܟܠ ܚܘܼܕܼܪ̈ܵܘܗܝ: ܐܵܦ
                ܒܥܸܠܕܒܼܵܒܼܵܘ̈ܗܝ ܕܲܫܪܵܪܵܐ: ܟܲܕܼ ܠܵܐ ܨܵܒܹ̇ܝܢ ܢܵܘܕܘܿܢ: ܕܐܝܼܬܼ ܤܲܒܼܪܵܐ
                ܫܲܪܝܼܪܵܐ ܠܲܟܼܪܸ̈ܤܛܝܵܢܹܐ. ܘܡ̣ܢ ܟܠ ܕܘܟܼ: ܠܘܵܬܼܗܘܿܢ ܢܸܪܗܛܘܼܢ
                ܠܒܹܝܬܼ ܓܵܘܤܵܐ: ܘܢܸܬܿܬܿܪܝܼܡ ܪܹܫܵܗ̇ ܕܥܹܕܼܬܵܐ ܥܲܠ ܒܥܸܠܕܒܼܵܒܹ̈ܝܗ̇.
                ܐܲܝܟܲܢܵܐ ܕܫܘܼܒܼܚܵܐ ܕܲܥܒܼܵܕܼܵܘ̈ܗܝ: ܓܘܼܪܵܓܼܵܐ ܢܲܪܡܸܐ ܒܤܲܓܿܝܼ̈ܐܹܐ
                ܠܡܲܦܲܩܬܼܵܐ ܕܡ̣ܢ ܥܵܠܡܵܐ. ܘܕܲܗܘ̤ܵܐ ܕܚܝܼܠ ܡ̣ܢ ܟܠ: ܡ̣ܢ ܗܸܕܼܪܵܐ
                ܕܲܡܝܲܬܿܪܘܼܬܹܗ. ܐܲܝܟܲܢܵܐ ܕܡܸܛܠܵܬܹܗ: ܢܸܗܘܸܐ ܦܬܼܝܼܚ ܦܘܼܡܗܘܿܢ
                ܕܲܒܼ̈ܢܲܝ ܥܹܕܬܵܐ: ܘܲܡܪܲܝܲܡ ܪܹܫܢܗܘܿܢ ܥܲܠ ܟܠܗܹܝܢ ܕܸܚ̈ܠܵܬܼܵܐ.
                ܫܘܼܒܼܗܵܪܵܐ ܕܥܹܕܬܹܗ ܕܲܡܫܝܼܚܵܐ: ܕܘܼܒܵܪܵܐ ܐܝܼܬܼܵܘܗܝ ܕܝܼܚܝܼ̈ܕܼܵܝܹܐ.
                ܡܸܛܠܗܵܢܵܐ ܙܵܕܹܩ ܠܹܗ ܠܝܼܚܝܼܕܼܵܝܵܐ: ܡ̣ܢ ܟܠܗܘܿܢ ܓܲܒܵܘ̈ܗܝ:
                ܗܘ̤ܵܘ ܕܢܝܼܚܝܼܢ ܫܘܼܦܪܹ̈ܐ ܕܐܸܤܟܹܡܹܗ: ܒܲܟܼܢܝܼܟܼܘܼܬܼܵܐ ܕܗܲܕܵܡܵܘ̈ܗܝ:
                ܒܤܘܼܡܥܵܠܵܐ ܕܐܸܤܟܹܡܹܗ: ܒܲܡܥܲܠܝܘܼܬܹܗ ܕܡ̣ܢ ܡܸܬܼܚܲܙܝܵܢ̈ܝܵܬܼܵܐ:
                
                 120 
                
                ܒܚܲܬܿܝܼܬܼܘܼܬܼܵܐ ܕܲܡܤܲܪܩܘܼܬܹܗ: ܒܒܲܤܝܘܼܬܹܗ ܓܡܝܼܪܬܵܐ ܕܥܲܠ
                ܦܲܓܼܪܑܵܐ: ܒܲܥܡܝܼܠܘܼܬܼܵܐ ܕܨܵܘܡܹܗ: ܒܫܸܬܼܩܹܗ ܐܲܡܝܼܢܵܐ: ܒܲܡܛܲܟܿܤܘܼܬܼܵܐ
                ܕܪܸ̈ܓܼܫܵܘܗܝ. ܒܲܢܛܝܼܪܘܼܬܼܵܐ ܕܲܚܙܵܬܹܗ: ܒܠܵܐ ܚܸܪܚܵܘܼܬܹܗ ܕܲܒܼܚܲܕܼ
                ܡ̣ܢ ܨܒܼܘܼ ܕܒܲܒܼܪܝܼܬܼܵܐ: ܡ̣ܢ ܙܥܘܿܪܘܼܬܼܵܐ ܕܡܸܠܬܹܗ: ܡ̣ܢ ܕܲܟܲܝܘܼܬܹܗ
                ܕܡ̣ܢ ܐܲܟܿܬܼܵܐ: ܡ̣ܢ ܦܫܝܼܛܘܼܬܹܗ ܕܦܘܼܪܫܵܢܵܐ. ܘܲܕܼܢܸܗܘܸܐ ܝܑܼܕܼܝܼܥ
                ܕܝܲܬܝܼܪܵܐ ܐܝܼܬܼܵܘܗܝ ܠܗܵܠܹܝܢ ܚܲܝܹ̈ܐ ܚܲܒܿܝܼ̈ܠܹܐ ܘܦܵܪ̈ܘܿܚܹܐ: ܘܩܲܪܝܼܒܼܵܐ
                ܠܗܵܢܘܿܢ ܫܲܪܝܼܪܹ̈ܐ ܘܪ̈ܘܼܚܵܢܹܐ: ܡ̣ܢ ܐܲܡܝܼܢܘܼܬܼܵܐ ܕܠܲܘܵܬܼ ܢܲܦܫܹܗ:
                ܘܡ̣ܢ ܠܵܐ ܝܑܼܕܼܝܼܥܘܼܬܹܗ ܕܒܹܝܬܼ ܒܢܲܝ̈ܢܵܫܵܐ: ܘܠܵܐ ܐܲܤܝܼܪܘܼܬܹܗ ܕܲܒܼܐ̄ܢܵܫ
                ܚܲܒܼܪܵܐܝܼܬܼ ܘܲܡܚܲܝܕܼܵܐܝܼܬܼ: ܘܡ̣ܢ ܐܲܬܼܪܵܐ ܫܲܠܝܵܐ ܕܥܘܼܡܪܹܗ: ܘܡ̣ܢ
                ܩܦܝܼܤܘܼܬܼܵܐ ܕܡܵܘܬܿܒܹܗ: ܘܡ̣ܢ ܙܥܘܿܪܘܼܬܼܵܐ ܘܲܒܼܤܝܼܪܘܼܬܼܵܐ
                ܕܨܸܒܼ̈ܘܵܬܹܗ: ܘܡ̣ܢ ܥܪܘܼܩܝܹܗ ܕܡ̣ܢ ܒܢܲܝ̈ܢܵܫܵܐ: ܘܡ̣ܢ ܐܲܡܝܼܢܘܼܬܹܗ
                ܕܒܲܨܠܘܿܬܼܵܐ: ܘܡ̣ܢ ܤܸܢ̱ܐܬܹܗ ܘܲܥܪܘܼܩܝܹܗ ܕܡ̣ܢ ܐܝܼܩܵܪܵܐ: ܘܡ̣ܢ ܠܵܐ
                ܐܲܤܝܼܪܘܼܬܹܗ ܕܲܒܼܚܲܝܹ̈ܐ ܕܙܲܒܼܢܵܐ: ܘܡ̣ܢ ܥܘܼܡܩܵܐ ܪܲܒܵܐ ܕܲܡܤܲܝܒܿܪܵܢܘܼܬܹܗ:
                ܘܡ̣ܢ ܚܘܼܡܤܵܢܹܗ ܕܲܒܼܢܸܤ̈ܝܘܿܢܹܐ: ܘܡ̣ܢ ܚܤܝܼܟܼܘܼܬܹܗ ܕܡ̣ܢ ܫܸܡ̈ܥܹܐ
                ܘܥܘܼ̈ܩܵܒܹܐ ܕܫܲܪ̈ܒܲܝ ܥܵܠܡܵܐ: ܘܡ̣ܢ ܡܲܪܢܝܼܬܹܗ ܐܲܡܝܼܢܬܼܵܐ ܘܗܸܪܓܹܗ
                ܕܲܒܼܗܵܘ̇ ܐܲܬܼܪܹܗ ܫܲܪܝܼܪܵܐ. ܕܡܸܫܬܵܘܥܵܐ ܡ̣ܢ ܠܵܐ ܦܨܝܼܚܘܼܬܼܵܐ
                ܕܦܲܪܨܘܿܦܹܗ ܘܲܡܚܲܪܟܼܘܼܬܼܵܐ ܕܐܲܦܵܘ̈ܗܝ: ܘܡ̣ܢ ܒܸܟܼܝܹܗ ܐܲܡܝܼܢܵܐ
                ܕܠܹܠܲܝ ܐܝܼܡܵܩ. ܘܝܲܬܝܼܪ ܡ̣ܢ ܟܠܡܸܕܸܡ: ܡ̣ܢ ܙܗܝܼܪܘܼܬܼܵܐ
                ܕܲܒܼܢܲܟܼܦܘܼܬܹܗ: ܘܡ̣ܢ ܚܲܤܝܘܼܬܹܗ ܕܡ̣ܢ ܝܲܥܢܘܼܬܼܵܐ. ܒܙܲܥܘܿܪ̈ܝܵܬܼܵܐ:
                ܘܲܥܕܲܡܵܐ ܠܪܵܘܪ̈ܒܼܵܬܼܵܐ. ܘܗܵܠܹܝܢ ܐܸܢܘܿܢ ܐܲܝܟܼ ܕܲܒܼܪ̈ܘܼܫܡܹܐ ܕܦܵܤܝܼ̈ܩܵܬܼܵܐ
                ܫܘܼܦܪܹ̈ܐ ܓܠܲܝ̈ܵܐ ܕܝܼܚܝܼܕܼܵܝܵܐ: ܕܤܵܗ̇ܕܝܼܢ ܥܲܠ ܡܝܼܬܼܘܼܬܹܗ ܓܡܝܼܪܬܵܐ
                
                 121 
                
                ܕܡ̣ܢ ܥܵܠܡܵܐ: ܘܩܲܪܝܼܒܼܘܼܬܹܗ ܕܲܠܘܵܬܼ ܐܲܠܵܗܵܐ. ܘܙܵܕܹܩ ܕܲܒܼܗܵܠܹܝܢ
                ܢܸܪܢܸܐ ܐܲܡܝܼܢܵܐܝܼܬܼ: ܘܢܸܩܢܸܐ ܐܸܢܘܿܢ. ܐܸܢ ܐ̄ܢܵܫ ܕܹܝܢ ܐܵܡܲ݁ܪ: ܕܡܵܢܵܐ
                ܐܵܠܨܵܐ ܗ̄ܘ̣ܵܬܼ ܥܲܠ ܗܵܠܹܝܢ ܪ̈ܘܼܫܡܹܐ: ܕܠܵܐ ܗ̄ܘ̣ܵܐ ܡܤܲܝܟܼܵܐܝܼܬܼ
                ܐܸܬܼܐ̱ܡܲܪܘ: ܐܵܡܲ݁ܪܢܵܐ: ܕܤܲܓܝܼ ܐܵܠܵܨܵܐ ܗ̄ܘ̣ܵܬܼ. ܕܟܲܕܼ ܡ̣ܢ ܗܵܠܹܝܢ
                ܪ̈ܘܼܫܡܹܐ ܢܸܒܼܥܸܐ ܐܸܢܘܿܢ ܠܚܲܕܼ ܚܲܕܼ ܒܢܲܦܫܹܗ: ܐܸܢ ܐܝܼܬܼ ܡܸܕܸܡ ܕܚܲܤܝܼܪ
                ܠܹܗ ܠܐܲܝܢܵܐ ܕܲܒܼܛܝܼܠ ܠܹܗ ܥܲܠ ܚܲܝܵܘ̈ܗܝ: ܡ̣ܢ ܗܵܠܹܝܢ ܦܘܼܪ̈ܫܵܢܹܐ
                ܢܲܕܼܪܸܟܼ ܚܲܤܝܼܪܘܼܬܹܗ ܕܲܒܼܟܼܠ ܚܕܼܵܐ ܡ̣ܢ ܡܝܲܬܿܪ̈ܵܬܼܵܐ. ܘܢܸܗܘܘܿܢ ܠܹܗ
                ܗܵܠܹܝܢ ܪ̈ܘܼܫܡܹܐ: ܕܘܼܟܲܬܼ ܡܥܲܗܕܼܵܢܹ̈ܐ. ܘܡܵܐ ܕܗܵܠܹܝܢ ܟܠܗܹܝܢ
                ܕܲܪ̈ܫܝܼܡܵܢ ܩܢ̣ܵܐ ܐܸܢܹܝܢ ܒܲܩܢܘܿܡܹܗ: ܐܵܦ ܫܲܪܟܵܐ ܐܲܝܠܹܝܢ ܕܐܸܫܬܿܒܸܩ:
                ܡܸܬܼܝܲܗܒܵܐ ܠܹܗ ܝܑܼܕܲܥܬܼܝܼܗܹܝܢ: ܘܗܵܘܹ̇ܐ ܥܸܠܲܬܼ ܬܸܫܒܿܘܿܚܬܹܗ ܕܐܲܠܵܗܵܐ
                ܠܲܒܼܢܲܝ̈ܢܵܫܵܐ ܘܲܠܡܲܠܲܐܟܹ̈ܐ ܩܲܕܝܼ̈ܫܹܐ. ܘܡ̣ܢ ܗܵܪܟܵܐ ܡܛܲܝܸܒܼ ܠܵܗ̇
                ܠܢܲܦܫܹܗ ܐܲܬܼܪܵܐ ܕܲܢܝܵܚܬܼܵܐ: ܡ̣ܢ ܩܕܼܵܡ ܡܲܦܩܵܢܹܗ ܕܡ̣ܢ ܗܵܢܵܐ ܥܵܠܡܵܐ.