Paulus Bedjan ed., Mar Isaacus Ninivita. De perfectione religiosa. (Paris/Leipzig: Otto Harrassowitz, 1909)
    
        
            
                ܥܲܠ ܗܵܝ̇ ܕܠܵܐ ܦܐܸܐ ܠܥܲܒܼܕܹܗ ܕܐܲܠܵܗܵܐ ܕܐܸܤܬܲܪܲܩ ܡ̣ܢ ܥܵܠܡܵܐ
                ܘܲܢܦܲܩ̣ ܒܲܒܼܥܵܬܹܗ ܘܐܵܦ ܕܲܫܪܵܪܵܐ: ܡ̣ܢ ܥܸܠܲܬܼ ܩܸܢܛܵܐ ܟܹܐܡܲܬܼ ܕܲܕܲܡ
                ܠܵܐ ܢܸܫܟܲܚ ܠܲܫܪܵܪܵܐ: ܢܦܘܼܫ ܡ̣ܢ ܒܥܵܬܼܵܐ ܕܝܼܠܹܗ ܕܲܫܪܵܪܵܐ: ܘܡ̣ܢ
                ܪܸܬܼܚܵܐ ܚܲܡܝܼܡܵܐ ܕܡܸܬܼܝܼܠܸܕܼ ܡ̣ܢ ܤܘܼܘܵܚܵܐ ܕܒܲܐܠܵܗܵܝ̈ܵܬܼܵܐ: ܘܲܒܼܨܵܬܼܵܐ
                ܕܐ̄ܪ̈ܵܙܲܝܗܹܝܢ ܕܲܪܫܝܼܡܝܼܢ ܐ̄ܪܵܙܵܢܵܐܝܼܬܼ. ܕܲܒܼܗܵܕܹܐ ܒܥܵܬܼܵܐ: ܢܦܘܼܫ ܪܸܥܵܝܢܵܐ
                ܡ̣ܢ ܦܸܗܝܵܐ ܒܝܼܫܵܐ: ܘܥܘܼ̈ܗܕܵܢܹܐ ܚܲܫܵܢܵܝܹ̈ܐ. ܝܒ.
            
            
                ܬܠܵܬܼܵܐ ܐܸܢܘܿܢ ܛܲܟܼܤܹ̈ܐ: ܕܲܒܼܗܘܿܢ ܡܸܬܿܕܲܪܲܓܼ ܟ̱ܠܹܗ ܪܲܗܛܵܐ
                ܕܒܲܪܢܵܫܵܐ. ܛܲܟܼܤܵܐ ܕܫܲܪܘܵܝܘܼܬܼܵܐ: ܘܡܸܨܥܵܝܘܼܬܼܵܐ: ܘܲܓܼܡܝܼܪܘܼܬܼܵܐ.
                
                 122 
                
                ܘܛܲܟܼܤܵܐ ܩܲܕܼܡܵܝܵܐ: ܟ̱ܠܹܗ ܥܸܢܝܵܢܹܗ ܘܥܘܼܗܕܵܢܹܗ. ܐܵܦܸܢ ܠܘܵܬܼ
                ܡܝܲܬܿܪܘܼܬܼܵܐ ܢܚܝܼܪ ܪܸܥܝܵܢܹܗ: ܒܚܲܫܵܐ ܐܝܼܬܼܵܘܗܝ܀ ܘܕܲܬܼܪܹܝܢ:
                ܡܸܨܥܵܝܵܐ ܐܝܼܬܼܵܘܗܝ: ܒܹܝܬܼ ܚܵܫܘܿܫܘܼܬܼܵܐ ܠܪܘܼܚܵܢܘܼܬܼܵܐ. ܘܚܘܼ̈ܫܵܒܹܐ
                ܕܝܲܡܝܼܢܵܐ ܘܲܕܼܤܸܡܵܠܵܐ: ܫܲܘܝܵܐܝܼܬܼ ܢܵܒܼܗ̇ܝܼܢ ܒܹܗ. ܘܠܵܐ ܓܵܐܹ̇ܙ ܡܲܒܿܘܼܥܵܐ
                ܕܢܘܼܗܪܵܐ ܘܲܕܸܚܫܘܿܟܼܵܐ ܕܲܬܼܪ̈ܲܝܗܘܿܢ ܓܲܒܹ̈ܐ ܤܵܟܼ: ܐܲܝܟܼ ܕܐܲܡܝܼܪ. ܐܸܢܕܹܝܢ
                ܢܦܘܼܫ ܐܵܦܸܢ ܩܲܠܝܼܠ ܡ̣ܢ ܗܸܪܓܵܐ ܕܠܵܐ ܢܵܘܚܵܐ ܕܒܲܟܼܬܼܝܼ̈ܒܵܬܼܵܐ ܕܪܘܼܚ
                ܘܲܫܪܲܓܼܪ̈ܵܓܼܝܼܬܼܵܐ ܕܲܒܼܗܵܠܹܝܢ ܐܲܠܵܗܵܝ̈ܵܬܼܵܐ: ܕܲܒܼܗܲܓܵܓܲܝ̈ܗܹܝܢ ܢܸܫܬܲܠܗܲܒܼ
                ܢܘܼܪܵܢܵܐܝܼܬܼ ܒܢܝܼܫܵܐ ܕܚܵܢܹ̇ܐ ܠܲܫܪܵܪܵܐ: ܥܲܡ ܢܛܘܼܪܬܵܐ ܕܲܠܒܲܪ ܐܲܝܟܼ
                ܚܲܝܠܹܗ. ܕܡܸܢܵܗ̇ ܘܗܵܝ̇ ܕܲܠܓܼܵܘ ܘܥܲܡܠܵܐ ܕܤܵܦܹ̇ܩ: ܠܘܵܬܼ ܓܲܒܵܐ
                ܕܚܲܫܹ̈ܐ ܡܸܬܼܓܪܸܦ. ܘܐܸܢ ܢܬܲܪܤܸܐ ܠܚܲܡܝܼܡܘܼܬܹܗ ܟܝܵܢܵܝܬܼܵܐ ܒܗܵܠܹܝܢ
                ܕܐܸܡ̇ܪܹܬܼ: ܘܡ̣ܢ ܒܥܵܬܼܵܐ ܘܥܘܼܩܵܒܼܵܐ ܠܵܐ ܢܦܘܼܫ. ܘܢܸܤܘܲܚ ܐܸܢܹܝܢ
                ܡ̣ܢ ܪܘܼܚܩܵܐ ܟܲܕܼ ܠܵܐ ܚܲܙ̈ܝܵܢ ܠܹܗ: ܐܸܠܵܐ ܐܸܢ ܪܸ̈ܡܙܲܝܗܹܝܢ ܕܒܲܟܼܬܼܵܒܹ̈ܐ.
                ܘܲܢܪܲܒܸܐ ܐܸܢܘܿܢ ܠܚܘܼܫܵܒܼܵܘ̈ܗܝ ܘܲܢܦܲܓܸܕܼ ܐܸܢܘܿܢ ܒܗܵܠܹܝܢ ܕܠܵܐ
                ܢܸܨܛܠܘܿܢ ܠܤܸܡܵܠܵܐ: ܐܵܘ ܢܩܲܒܿܠܘܼܢ ܙܲܪܥܵܐ ܡܸܕܸܢ ܕܦܲܢܛܵܤ̈ܝܼܵܣ
                ܡ̣ܢ ܫܹܐܕܹ̈ܐ ܕܘܲܟܲܬܼ ܫܪܵܪܵܐ. ܐܸܠܵܐ ܢܸܬܼܝܲܐܲܒ̣ ܘܢܸܛܲܪ ܢܲܦܫܹܗ: ܘܲܢܦܝܼܣ
                ܠܐܲܠܵܗܵܐ ܒܲܨܠܘܿܬܼܵܐ ܕܚܲܫܵܐ ܕܡ̣ܢ ܢܲܓܝܼܪܘܼܬܼ ܪܘܼܚܵܐ. ܡܵܐ ܕܠܲܐܠܵܗܵܐ
                ܫܸܦܪܲܬ̤ ܠܡܸܬܲܠ ܠܹܗ: ܦܵܬܲܚ ܬܲܪܥܵܐ ܩܕܼܵܡܵܘܗܝ. ܝܲܬܝܼܪܵܐܝܼܬܼ:
                ܡܸܛܠ ܡܲܟܿܝܼܟܼܘܼܬܹܗ. ܕܲܠܡܲܟܿܝܼ̈ܟܹܐ: ܐ̄ܪ̈ܵܙܹܐ ܡܸܬܼܓܝܹܝܢ. ܐܸܢܕܹܝܢ ܒܹܗ
                ܒܗܵܢܵܐ ܤܘܼܟܵܝܵܐ ܡܵܐܹ̇ܬܼ: ܟܲܕܼ ܠܵܐ ܚ̣ܙܵܗ̇ ܠܐܲܪܥܵܐ ܗܵܝ̇ ܡ̣ܢ
                ܩܘܼܪܒܵܐ: ܤܵܒܲܪ ܐ̄ܢܵܐ ܕܝܵܪܬܘܼܬܹܗ ܥܲܡ ܟܹܐܢܹ̈ܐ ܩܲܕܸܡܵܝܹ̈ܐ ܗܵܘ̇ܝܵܐ:
                ܐܲܝܠܹܝܢ ܕܤܲܟܿܝܼܘ ܠܲܓܼܡܝܼܪܘܼܬܼܵܐ: ܐܲܝܟܼ ܡܸܠܬܹܗ ܕܲܫܠܝܼܚܵܐ: ܘܠܵܐ
                
                 123 
                
                ܚܙ̣ܵܘ: ܘܥܲܠ ܤܲܒܼܪܵܗ̇ ܥܡܲܠ̣ܘ ܟܠܗܘܿܢ ܝܵܘ̈ܡܵܬܼܵܐ ܘܲܕܼܡܸܟܼܘ.
                ܐܸܠܵܐ ܡܵܢܵܐ ܢܹܐܡܲܪ: ܐܸܢ ܠܵܐ ܢܸܡܛܸܐ ܐ̄ܢܵܫ ܠܗܵܝ̇ ܕܢܸܥܘܿܠ ܠܐܲܪܥܵܐ
                ܕܡܘܼܠܟܵܢܵܐ ܕܐܝܼܬܼܵܘܗܝ ܛܲܟܼܤܵܐ ܕܲܓܼܡܝܼܪܹ̈ܐ: ܘܢܸܫܟܲܚ ܠܲܫܪܵܪܵܐ
                ܥܹܝܢ ܒܲܓܼܠܸܐ ܟܡܵܐ ܕܤܸܦܹ̇ܩ ܟܝܵܢܵܐ: ܢܦܘܼܫ ܡܸܟܹܝܠ ܘܡ̣ܢ ܗܵܢܵܐ
                ܒܛܲܟܼܤܵܐ ܗܵܘ̇ ܬܲܚܬܵܝܵܐ: ܕܟܼܠܹܗ ܒܡܸܡܵܠܵܐ ܥܢܸܐ. ܘܡܸܛܠ ܗܵܝ̇
                ܕܠܵܐ ܐܸܫܟܲܚ ܠܲܫܪܵܪܵܐ ܟ̱ܠܹܗ: ܐܵܪܵܐ ܢܩܵܘܸܐ ܒܬܲܚܬܵܝܘܼܬܼܵܐ ܕܠܵܐ ܝܵܕܲܥ̇
                ܐܵܦܠܵܐ ܠܡܸܪܲܓܼ ܗܵܠܹܝܢ: ܐܵܘ ܢܸܬܼܥܲܠܸܐ ܠܗܵܢܵܐ ܡܸܨܥܵܝܵܐ ܕܐܸܡ̇ܪܹܬܼ:
                ܐܵܦܸܢ ܠܵܐ ܢܸܚܙܸܐ ܐܲܝܟܼ ܕܲܒܼܡܲܚܙܝܼܬܼܵܐ: ܐܸܠܵܐ ܡ̣ܢ ܪܘܼܚܩܵܐ ܡܤܲܟܸܐ ܠܹܗ:
                ܘܒܹܗ ܒܤܘܼܟܵܝܵܐ ܡܸܬܼܟܢܸܫ ܠܘܵܬܼ ܐܲܒܼܵܘ̈ܗܝ؟ ܘܐܵܦܸܢ ܠܵܐ ܢܸܫܬܿܘܸܐ
                ܠܗܵܝ̇ ܟ̱ܠܵܗ̇ ܛܲܝܒܿܘܼܬܼܵܐ ܬܢܵܢ: ܐܸܠܵܐ ܒܥܸܢܝܵܢܵܐ ܕܥܲܡܵܗ̇ ܟܲܕܼ
                ܪܲܚܝܼܩ: ܢܲܦܗܸܐ ܗܵܘܢܹܗ. ܘܲܒܼܓܼܘܼܪ̈ܵܓܹܐ ܕܝܼܠܵܗ̇ ܟܡܵܐ ܕܚܲܝ ܢܸܦܤܘܿܩ
                ܢܲܡܸܕܼ ܡ̣ܢ ܚܘܼ̈ܫܵܒܹܐ ܒܝܼ̈ܫܹܐ. ܘܲܒܼܗܵܢܵܐ ܤܲܒܼܪܵܐ: ܟܲܕܼ ܡܠܸܐ ܠܸܒܹܗ ܡ̣ܢ
                ܐܲܠܵܗܵܐ: ܡܫܲܢܸܐ ܡ̣ܢ ܥܵܠܡܵܐ ܗܵܢܵܐ. ܟܠ ܡܸܕܸܡ ܕܲܒܼܡܲܟܿܝܼܟܼܘܼܬܼܵܐ
                ܗܵܘܹ̇ܐ: ܫܲܦܝܼܪ ܗ̄ܘ̣. ܗܲܓܵܓܹ̈ܐ ܠܵܐ ܓܫܝܼ̈ܡܹܐ ܕܡܲܕܥܵܐ ܒܢܝܼܫܵܐ
                ܕܪܸܚܡܲܬܼ ܐܲܠܵܗܵܐ ܒܤܘܼ̈ܟܵܠܹܐ ܕܲܟܿܬܼܵܒܹ̈ܐ: ܤܵܝ̇ܓܝܼܢ ܠܡܲܥ̈ܠܵܢܹܐ ܕܢܲܦܫܵܐ
                ܩܕܼܵܡ ܚܘܼ̈ܫܵܒܹܐ ܢܘܼܟܼܪ̈ܵܝܹܐ: ܘܢܵܛ̇ܪܝܼܢ ܠܪܸܥܝܵܢܵܐ ܠܥܘܼ̈ܗܕܵܢܹܐ
                ܕܨܸܒܼ̈ܘܵܬܼܵܐ: ܘܡ̣ܢ ܗܵܠܹܝܢ ܬܸܫܬܲܗܸܐ ܚܲܡܝܼܡܘܼܬܼܵܐ ܕܙܵܘܥܹܗ: ܘܢܸܦܸܠ
                ܒܲܪܓܼܝܼܓܼܵܬܼܵܐ.