Isaac of Nineveh. “Discourse 13.” Based upon Digital Syriac Corpus. Last modified March 5, 2019. https://syriaccorpus.org/404. 124 ܥܲܠ ܫܘܼ̈ܚܠܵܦܹܐ ܕܗܵܘܹ̇ܝܢ ܠܘܵܬܼ ܪ̈ܕܝܼܚܲ ܒܫܸܠܝܵܐ: ܕܦܵܩܚܵܐܝܼܬܼ ܡ̣ܢ ܐܲܠܵܗܵܐ ܡܛܲܟܿܤܵܐ ܐܘܼܪܚܵܐ ܗܵܕܹܐ. ܐܝܼܬܼ ܐܸܡܲܬܼܝ ܕܲܟܼܡܝܼܪܘܼܬܼܵܐ ܘܲܚܢܘܼܩܝܵܐ ܢܲܦܫܵܢܵܝܵܐ: ܘܡ̣ܢ ܫܸܠܝܵܐ ܦܨܝܼܚܘܼܬܼܵܐ ܘܚܲܕܼܘܼܬܼܵܐ ܘܪܸܬܼܚܵܐ ܚܲܡܝܼܡܵܐ ܘܚܲܝܠܵܐ ܕܠܵܐ ܒܲܥܝܵܕܼܾܵܐ. ܫܘܼܒܼܞܵܠ ܒܲܡܛܲܟܿܤܵܢܵܗ̇ ܕܐܘܼܪܚܲܢ. ܐܵܡܹܝܢ. ܝܓ. ܐܲܝܢܵܐ ܕܹܝܢ ܕܲܦܤܲܩ̣ ܒܪܸܥܝܵܢܹܗ ܕܲܒܼܕܼܘܼܝܵܪܵܐ ܠܚܘܿܕܼܵܝܵܐ ܕܥܲܡ ܢܲܦܫܹܗ ܢܛܲܟܸܣ ܝܵܬܹܗ: ܘܲܒܼܦܘܼܠܚܵܢܵܐ ܘܛܘܼܟܵܤܵܐ ܕܲܙܢܲܝ̈ ܫܸܠܝܵܐ ܢܲܦܸܩ ܫܲܪܟܵܢܵܐ ܕܚܲܝܵܘ̈ܗܝ. ܐܸܡܲܬܼܝ ܕܐܲܝܟܼ ܥܝܵܕܼܵܐ ܕܲܒܼܫܸܠܝܵܐ: ܗܵܘ̇ ܕܲܡܬܲܚܲܡ ܦܵܩܚܵܐܝܼܬܼ ܠܛܲܝܒܿܘܼܬܼܵܐ ܐܲܠܵܗܵܝܬܼܵܐ: ܢܸܓܼܕܲܫ ܕܲܠܓܼܵܘ ܥܲܡܛܵܢܵܐ ܡܸܬܿܛܲܡܪܵܐ ܢܲܦܫܹܗ: ܘܒܲܕܼܡܘܼܬܼ ܘܲܗܝܼܪ̈ܵܘܗܝ ܕܫܸܡܫܵܐ ܕܡܸܬܼܟܲܤܹܝܢ ܡ̣ܢ ܝܵܬܹܒܼܬܼܵܐ ܡ̣ܢ ܠܒܼܝܼܕܼܘܼܬܼܵܐ ܕܲܥܢܵܢܹ̈ܐ: ܒܲܡܠܸܬ ܩܲܠܝܼܠ ܡܸܬܼܓܠܸܙ ܡ̣ܢ ܒܘܼܝܵܐܑܵ ܪܘܼܚܵܢܵܐ ܘܡ̣ܢ ܨܸܡܚܵܐ ܕܛܲܝܒܿܘܼܬܼܵܐ ܒܝܲܕܼ ܥܢܵܢܵܐ ܕܚܲܫܹ̈ܐ: ܘܩܵܦܹ̇ܿܣ ܡܸܢܹܗ ܩܲܠܝܼܠ ܚܲܝܠܵܐ ܗܵܘ̇ ܡܚܲܕܝܵܢܵܐ: ܘܢܸܩܛܲܪ ܥܲܠ ܪܸܥܝܵܬܹܗ ܚܸܫܟܵܐ ܗܵܘ̇ ܕܠܵܐ ܒܲܥܝܵܕܼܵܐ: ܠܵܐ ܬܸܗܘܸܐ ܡܸܫܬܲܓܼܫܵܐ ܬܲܪܥܝܼܬܹܗ: ܘܝܵܗܹ̇ܒܼ ܐܝܼܕܼܵܐ ܠܲܙܥܘܿܪܘܼܬܼ ܢܲܦܫܵܐ. ܐܸܠܵܐ ܢܤܲܝܒܲܪ ܟܲܕܼ ܡܸܬܼܥܢܸܐ ܒܲܟܼܬܼܵܒܹ̈ܐ ܒܐ̄ܢܵܫܵܐ ܐܲܠܵܗܵܝܹ̈ܐ ܘܲܨ̈ܠܵܘܵܬܼܵܐ ܕܥܸܨܝܵܢܵܐ: ܘܲܡܤܲܟܸܐ ܠܥܘܼܕܼܪܵܢܵܐ. ܘܡ̣ܢ ܫܹܠܝ ܡܸܬܼܝܼܗܸܒܼ ܠܹܗ: ܟܲܕܼ ܠܵܐ ܝܵܕܲܥ̇. ܡܸܛܠ ܕܐܲܟܼܙܢܵܐ ܕܡܸܬܼܦܲܨ̈ܚܵܢ ܐܲܦܹ̈ܝܗ̇ ܕܥܵܡܲܪܬܵܐ ܒܙܲܠܝܼܩܵܘ̈ܗܝ ܕܫܸܡܫܵܐ: ܒܲܫܪܵܝܵܐ ܕܲܠܒܲܝܼܕܼܘܼܬܹܗ ܕܐܵܐܲܪ: ܗܵܟܲܢܵܐ ܡܸܫܟܿܚܵܐ ܡܸܠܲܬܼ ܨܠܘܿܬܼܵܐ ܕܬܸܫܪܸܐ ܘܲܬܼܦܲܠܗܸܕܼ ܡ̣ܢ ܢܲܦܫܵܐ ܥܲܪܦܸܠܵܐ ܕܚܲܫܹ̈ܐ: 125 ܘܬܲܦܨܲܚ ܘܬܲܢܗܲܪ ܠܪܸܥܝܵܢܵܐ ܒܙܸܠܓܹ̈ܐ ܕܚܲܕܼܘܼܬܼܵܐ ܘܲܕܼܒܼܘܼܝܵܐܵܐ ܕܡܵܘܠܕܼܵܐ ܒܚܘܼ̈ܫܵܒܲܝܢ. ܝܲܬܝܼܪܵܐܝܼܬܼ ܐܸܡܲܬܼܝ ܕܢܸܗܘܸܐ ܠܵܗ̇ ܡܠܡܼܐܵܐ ܠܥܘܼܕܼܪܵܢܵܐ ܡ̣ܢ ܟܬܼܵܒܲܝ̈ ܩܘܼܕܼܫܵܐ: ܘܫܲܗܪܵܐ ܡܙܲܗܝܵܢܵܐ ܕܪܸܥܝܵܢܵܐ. ܗܸܪܓܵܐ ܐܲܡܝܼܢܵܐ ܕܒܲܟܼܬܼܵܒܹ̈ܐ ܩܲܕܝܼ̈ܫܹܐ: ܒܐܲܡܝܼܢܘܼ ܬܲܗܪܵܐ ܠܵܐ ܡܸܬܿܕܲܪܟܵܢܵܐ ܘܚܲܕܼܘܼܬܼܵܐ ܕܒܲܐܠܵܗܵܐ ܡܵܠܹ̇ܐ ܠܵܗ̇ ܠܢܲܦܫܵܐ.