Isaac of Nineveh. “Discourse 14.” Based upon Digital Syriac Corpus. Last modified March 5, 2019. https://syriaccorpus.org/405.
    
        
            
                ܬܘܼܒܼ ܥܲܠ ܗܵܠܹܝܢ ܕܲܒܼܫܸܠܝܵܐ ܪܵܕܹܝܢ: ܕܐܸܡܲܬܼܝ ܡܫܲܪܹܝܢ ܠܕܲܡܸܥ
                ܐܵܦܸܢ ܩܲܠܝܼܠ ܕܠܲܐܝܟܵܐ ܡܲܛܝܼܘ ܒܦܘܼܠܚܵܢܗܘܿܢ: ܒܝܲܡܵܐ ܠܵܐ
                ܡܸܬܿܕܲܪܟܵܢܵܐ ܕܕܼܘܼܒܵܪܵܐ ܕܫܸܠܝܵܐ ܢܸܫܟܿܚܘܼܬܢ ܠܡܸܬܿܬܿܟܼܵܠܘܼ ܒܨܝܼܪ
                ܩܲܠܝܼܠ ܥܲܠ ܠܹܐܘܲܬܼܗܘܿܢ ܕܫܲܪܝܲܬ̤ ܝܵܗ̇ܒܵܐ ܦܹܐܪܹ̈ܐ. ܝܕ.
            
            
                ܐܵܡܲ݁ܪ ܐ̄ܢܵܐ ܠܵܟܼ ܨܒܼܘܼܬܼܵܐ: ܘܠܵܐ ܬܸܓܼܚܲܟܼ. ܡܸܛܠ ܕܲܫܪܵܪܵܐ
                ܐܵܡܲ݁ܪ ܐ̄ܢܵܐ. ܘܠܵܐ ܬܸܬܼܦܲܠܲܓܼ ܥܲܠ ܡܸܠܬܼܵܐ: ܕܫܲܪܝܼܪܝܼܢ ܐܲܝܠܹܝܢ
                ܕܡܸܢܗܘܿܢ ܩܲܒܿܠܹ̇ܬܼ܀ ܐܸܢ ܒܲܬܼܠܝܼ̈ܦܹܐ ܕܥܲܝܢܲܝ̈ܟ ܬܸܬܼܠܸܐ ܩܕܼܵܡ
                ܐܲܠܵܗܵܐ: ܥܕܲܡܵܐ ܕܲܒܼܕܸܡ̈ܥܹܐ ܬܸܦܓܲܥ: ܠܵܐ ܬܸܤܒܲܪ ܕܲܠܡܸܕܸܡ
                ܡܲܛܝܼܬܿ ܒܕܼܘܼܒܵܪܵܐ. ܥܕܲܟܹܝܠ ܓܹܝܪ: ܠܥܵܠܡܵܐ ܡܫܲܡ̈ܫܵܢ ܟܲܤ̈ܝܵܬܼܵܟܼ.
                ܗܵܢܵܘ ܕܹܝܢ: ܒܕܘܼܒܵܪܵܐ ܕܥܵܠܡܵܝܹ̈ܐ ܡܗܲܝ̈ܡܢܹܐ ܩܵܐܹ̇ܡ ܐܲܢ̄ܬܿ. ܒܒܲܪܢܵܫܵܐ
                ܓܹܝܪ ܒܲܪܝܵܐ ܥܵܡܹ̇ܠ ܐܲܢ̄ܬܿ ܒܦܠܚܵܢܵܐ ܕܲܠܘܵܬܼ ܐܲܠܵܗܵܐ: ܘܒܲܪܢܵܫܵܐ
                ܕܲܠܓܼܵܘ ܥܕܲܟܹܝܠ ܕܠܵܐ ܦܹܐܪ̈ܝܼܢ ܐܝܼܬܼܵܘܗܝ. ܒܦܹܐܪ̈ܵܘܗܝ ܡܲܢ: ܡ̣ܢ
                ܐܲܝܟܵܐ ܕܐܸܡ̇ܪܹܬܼ ܡܫܲܪܸܐ. ܡܵܐ ܕܹܝܢ ܕܠܲܐܬܼܪܵܐ ܕܕܸܡ̈ܥܹܐ ܡܲܛܝܼܬܿ:
                ܗܵܝܕܹܝܢ ܐܸܤܬܲܟܲܠ ܕܲܢܦܲܩ̣ ܠܹܗ ܪܸܥܝܵܢܵܐ ܡ̣ܢ ܒܹܝܬܼ ܚܒܼܘܼܫܝܵܐ
                ܕܥܵܠܡܵܐ ܗܵܢܵܐ: ܘܤܵܡ̣ ܪܸܓܼܠܹܗ ܒܡܲܪܕܝܼܬܼܵܐ ܕܥܵܠܡܵܐ ܚܲܕܼܬܼܵܐ.
                ܘܫܲܪܝܼ ܤܵܐܹ̇ܩ ܐܵܐܲܪ ܬܡܝܼܗܵܐ ܕܬܲܡܵܢ: ܘܲܡܫܲܪܸܐ ܡܲܚܸܬܼ ܕܸܡ̈ܥܹܐ.
                
                 126 
                
                ܒܗܵܝ̇ ܕܲܬܼܟܸܒܼܘ ܠܗܘܿܢ ܡܸܟ݂ܝܠ ܚܸܒܼ̈ܠܹܐ ܕܡܲܦܩܵܢܵܐ: ܥܲܠ ܥܘܸܠܵܐ
                ܗܵܘ̇ ܕܪܘܼܚ. ܕܛܲܝܒܿܘܿܬܼܵܐ ܐܸܡܵܐ ܕܓܼܵܘܵܐ ܡܤܲܪܗܒܼܵܐ ܠܡܵܘܠܵܕܼܘܼ
                ܒܐ̄ܪܵܙܵܐ ܠܢܲܦܫܵܐ ܨܲܠܡܵܐ ܕܐܲܠܵܗܵܐ: ܠܢܘܼܗܪܹܗ ܕܥܵܠܡܵܐ ܕܲܥܬܝܼܕܼ.
                ܘܡܵܐ ܕܲܡܛ̣ܵܐ ܙܲܒܼܢܵܐ ܕܡܵܘܠܵܕܼܵܐ: ܪܸܥܝܵܢܵܐ ܡܲܪܓܸܫ ܡܸܟܹܝܠ ܒܡܸܕܸܡ
                ܡܸܕܸܡ ܡ̣ܢ ܬܲܡܵܢ: ܐܲܝܟܼ ܤܵܘܩܵܐ ܡܸܕܸܡ ܩܲܛܝܼܢܵܐ ܕܲܡܩܲܒܸܠ
                ܥܘܸܠܵܐ ܠܓܼܵܘ ܡ̣ܢ ܗܲܕܵܡܹ̈ܐ ܕܲܒܼܗܘܿܢ ܐܸܬܼܪܲܒܿܝܼ. ܘܲܕܼܠܵܐ ܡܤܲܝܒܲܪ
                ܡܸܕܸܡ ܕܠܵܐ ܒܲܥܝܵܕܼܵܐ: ܡܙܝܼܥ ܠܹܗ ܠܦܲܓܼܪܵܐ: ܒܒܸܟܼܝܵܐ ܕܲܚܠܝܼܛܵܐ
                ܒܹܗ ܚܲܕܼܘܼܬܼܵܐ ܕܥܵܠ̇ܒܵܐ ܠܚܲܠܝܘܼܬܹܗ ܕܕܸܒܼܫܵܐ. ܟܠ ܟܡܵܐ ܕܡܸܬܼܪܲܒܸܐ
                ܗܵܘ̇ ܥܘܸܠܵܐ ܕܲܠܓܼܵܘ: ܗܵܟܲܢܵܐ ܗܵܘ̇ܝܵܐ ܬܵܘܤܲܦܬܼܵܐ ܒܕܸܡ̈ܥܹܐ. ܡܲܪܕܝܼܬܼܵܐ
                ܕܹܝܢ ܕܕܸܡ̈ܥܹܐ: ܡ̣ܢ ܐܸܡܲܬܼܝ ܕܫܲܪܝܼ ܪܸܥܝܵܢܵܐ ܡܸܫܬܲܦܸܐ: ܗܵܘ̇ܝܵܐ. ܒܪܲܡ
                ܪܸܕܿܝܵܐ ܕܕܸܡ̈ܥܹܐ ܕܡ̣ܢ ܗܵܢܵܐ ܛܲܟܼܤܵܐ ܕܐܵܡܲ݁ܪܢܵܐ: ܠܵܐ ܗ̄ܘ̣ܵܐ ܥܲܠ
                ܗܵܘ̇ ܡܢܵܬܼܵܢܵܝܵܐ ܪܡܸܐ ܠܝܼ ܕܒܲܙܒܲܢ ܙܒܲܢ. ܗܵܢܵܐ ܕܹܝܢ ܒܘܼܝܵܐܵܐ ܕܒܲܙܒܲܢ
                ܙܒܲܢ: ܠܟܼܠܢܵܫ ܗܵܘܹ̇ܐ ܕܦܵܠܲܚ ܥܲܡ ܐܲܠܵܗܵܐ ܒܫܸܠܝܵܐ. ܒܲܙܒܲܢ:
                ܒܬܹܐܘܿܪܝܼܵܐ ܕܪܸܥܵܝܵܢܵܐ. ܘܒܲܙܒܲܢ: ܒܡܸܠܹ̈ܐ ܕܲܟܼܬܼܵܒܹ̈ܐ. ܘܒܲܙܒܲܢ: ܒܥܸܢܝܵܢܵܐ
                ܕܬܲܟܼܫܲܦܬܼܵܐ. ܠܝܼ ܡ̇ܢ ܪܡܸܐ ܠܝܼ ܠܡܹܐܡܲܪ ܥܲܠ ܗܵܘ̇ ܟ̱ܠܵܢܵܝܵܐ:
                ܕܐܝܼܬܼܵܘܗܝ ܕܠܵܐ ܦܤܵܩ ܕܠܸܠܝܵܐ ܘܐܝܼܡܵܡܵܐ: ܕܲܠܗܵܘ̇ ܕܲܒܼܚܲܬܝܼܬܼܘܼܬܼܵܐ
                ܕܕܼܘܼܒܵܪܹ̈ܐ ܐܸܫܟܲܚ̣ ܫܪܵܪܵܐ ܒܓܼܵܘ ܫܸܠܝܵܐ ܗܵܘܹ̇ܐ: ܕܗܵܘ̈ܝܵܢ ܥܲܝ̈ܢܹܐ ܡܥܝܼ̈ܢܹܐ
                ܕܡܲܝ̈ܵܐ: ܙܲܒܼܢܵܐ ܕܬܲܪܬܹܝܢ ܫܢ̈ܝܼܢ ܚܲܤܝܼܪ ܝܲܬܝܼܪ؟ ܗܵܕܹܐ: ܒܙܲܒܼܢܵܐ
                ܕܡܲܥܒܲܪܬܵܐ ܗܵܘ̇ܝܵܐ. ܐܵܡܲ݁ܪܢܵܐ ܕܹܝܢ: ܡܲܥܒܲܪܬܵܐ ܐ̄ܪܵܙܵܢܵܝܬܼܵܐ. ܬܘܼܒܼ ܡ̣ܢ
                ܒܵܬܲܪ ܕܸܡ̈ܥܹܐ: ܥܵܐܹ̇ܠ ܐܲܢ̄ܬܿ ܠܫܲܝܢܵܐ ܕܚܘܼ̈ܫܵܒܹܐ. ܘܒܹܗ ܒܗܵܢܵܐ ܫܲܝܢܵܐ
                ܕܚܘܼ̈ܫܵܒܹܐ: ܥܵܐܹ̇ܠ ܐܲܢ̄ܬܿ ܠܗܵܝ̇ ܢܝܵܚܝܵܬܼܵܐ ܐܲܠܵܗܵܝܬܼܵܐ ܕܐܸܡ݂ܲܪ ܦܵܘܠܘܿܣ.
                ܒܲܡܢܵܬܼܵܐ: ܐܲܝܟܼ ܟܝܵܢܵܐ. ܡ̣ܢ ܗܵܢܵܐ ܐܲܬܼܪܵܐ ܕܫܲܝܢܵܐ: ܡܫܲܪܸܐ ܗܵܘܢܵܐ:
                
                 127 
                
                ܒܗܵܝ̇ ܕܢܸܚܙܸܐ ܟܲܤ̈ܝܵܬܼܵܐ. ܗܵܝܕܹܝܢ ܪܘܼܚܵܐ ܕܩܘܼܕܼܫܵܐ ܡܫܲܪܸܐ ܓܵܠܹ̇ܐ
                ܩܕܵܡܵܘܗܝ ܫܡܲܝܢ̈ܝܬܼܵܐ. ܟܲܕܼ ܥܵܡܲܪ ܒܵܟܼ ܐܲܠܵܗܵܐ: ܘܦܹܐܪ̈ܵܘܗܝ
                ܕܪܘܼܚܵܐ ܡܚܲܦܸܛ ܒܵܟܼ. ܘܡܸܟܵܐ ܡܲܪܓܸܫ ܐܲܢ̄ܬܿ ܒܫܘܼܠܵܦܵܐ ܗܵܘ̇:
                ܕܲܥܬܼܝܼܕܼ ܟ̱ܠܹܗ ܟܝܵܢܵܐ ܠܲܡܩܲܒܵܠܘܼ ܒܚܘܼܕܵܬܼܵܐ ܕܟܼܠ. ܒܲܗܘܼܪܵܐܝܼܬܼ:
                ܐܲܝܟܼ ܕܲܒܪܸܡܙܵܐ܀ ܗܵܐ ܗܵܠܹܝܢ ܟܸܬܼܒܹ̇ܬܼ: ܠܥܘܼܕܼܪܵܢܵܐ ܕܝܼܠܝ: ܘܲܕܼܟܼܠ
                ܕܦܵܓܲܥ̇ ܒܲܟܼܬܼܵܒܼܵܐ ܗܵܢܵܐ. ܐܲܝܟܼ ܡܸܕܸܡ ܕܐܲܕܪܟܹܬܼ ܡ̣ܢ ܬܹܐܘܿܪܝܼܵܐ
                ܕܲܟܼܬܼܵܒܹ̈ܐ: ܘܡ̣ܢ ܦܘܼܡܵܐ ܕܫܲܪܝܼܪܹ̈ܐ: ܘܩܲܠܝܼܠ ܡ̣ܢ ܢܸܤܝܵܢܵܐ. ܕܢܸܗܘܸܐ
                ܐܵܦ ܠܝܼ ܥܘܼܕܼܪܵܢܵܐ ܒܲܨ̈ܠܵܘܼܗܘܿܢ ܕܐܲܝܠܹܝܢ ܕܡܸܬܼܥܲܕܪܝܼܢ ܡ̣ܢ
                ܗܵܠܹܝܢ: ܡܸܛܠ ܕܥܸܡ̇ܠܹܬܼ ܒܗܹܝܢ. ܫܡܲܥ ܐܵܦ ܡܸܕܸܡ ܐ̄ܚܪܹܝܢ
                ܕܐܵܡܲ݁ܪܢܵܐ ܠܵܟܼ: ܐܲܟܼܡܵܐ ܕܝܸܠܦܹ̇ܬܼ ܡ̣ܢ ܦܘܼܡܵܐ ܕܠܵܐ ܡܕܲܓܸܠ:
                ܘܡܵܐ ܕܲܠܗܵܢܵܐ ܐܲܬܼܪܵܐ ܡܫܲܝܢܵܐ ܕܚܘܼ̈ܫܵܒܹܐ ܥܲܠ̣ܬܿ: ܗܵܝܕܹܝܢ ܡܸܫܬܲܩܠܵܐ
                ܬܘܼܒܼ ܡܸܢܵܟܼ ܬܟܼܝܼܒܼܘܼܬܼܵܐ ܕܕܸܡ̈ܥܹܐ: ܘܐܵܬܹ̇ܐ ܐܲܢ̄ܬܿ ܠܗܵܝ̇ ܕܲܒܼܟܲܝܠܵܐ
                ܘܒܲܡܫܘܼܚܬܼܵܐ. ܗܵܢܵܘ ܫܪܵܪܵܐ ܚܲܬܿܝܼܬܼܵܐ ܐܲܝܟܼ ܕܲܒܼܦܵܤܝܼ̈ܩܵܬܼܵܐ: ܘܫܲܪܝܼܪ
                ܗ̄ܘ̣ ܘܲܡܗܲܝܡܲܢ ܡ̣ܢ ܟ̱ܠܵܗ̇ ܥܹܕܬܵܐ: ܘܡ̣ܢ ܛܘܼܠܝܵܩܹ̈ܐ ܘܪܹ̈ܫܲܝ
                ܕܲܪܵܪܹ̈ܐ ܕܲܒܼܢܹ̈ܝܗ̇.