Isaac of Nineveh. “Discourse 15.” Based upon Digital Syriac Corpus. Last modified March 5, 2019. https://syriaccorpus.org/406.
    
        
            
                ܥܲܠ ܝܘܼܒܵܠܵܐ ܕܐܘܼܪܚܵܐ ܕܝܼܚܝܼܕܼܵܝܘܼܬܼܵܐ: ܟܲܪܝܵܐܝܼܬܼ ܘܩܲܠܝܼܠ
                ܡܦܲܪܫܵܐܝܼܬܼ: ܘܕܲܐܝܟܲܢ ܘܒܲܐܝܢܵܐ ܙܢܵܐ ܡܸܬܼܝܼܠ̈ܕܵܢ ܡ̣ܢ ܚܕܼܵܕܹ̈ܐ
                ܡܝܲܬܪ̈ܵܬܼܵܐ ܕܒܼܵܗ̇ ܝܗ.
            
            
                ܢܲܗܝܼܪܵܐܝܼܬܼ ܕܹܝܢ ܘܲܡܦܲܪܫܵܐܝܼܬܼ: ܕܐܲܝܟܼ ܗܵܟܲܢ ܐܝܼܬܼܵܘܗܝ ܝܘܼܒܵܠܗܹܝܢ.
                ܡ̣ܢ ܥܲܡ̈ܠܹܐ ܕܥܸܨܝܵܢܵܐ ܕܲܒܼܫܸܠܝܵܐ ܡܸܬܼܝܼܠܸܕܼ ܪܸܬܼܚܵܐ ܗܵܘ̇ ܫܓܼܝܼܪܵܐ
                
                 128 
                
                ܘܲܕܼܠܵܐ ܡܘܼܫܚܵܐ: ܗܵܘ̇ ܕܡܸܬܼܢܲܒܼܪܲܫ ܒܠܸܒܵܐ ܡ̣ܢ ܚܘܼ̈ܫܵܒܹܐ ܚܲܡܝܼ̈ܡܹܐ
                ܕܚܲܕܼܬܼܵܐܝܼܬܼ ܒܵܠ̇ܩܝܼܢ ܒܪܸܥܝܵܢܵܐ. ܗܸܢܘܿܢ ܕܹܝܢ ܥܲܡ̈ܠܹܐ ܘܲܙܗܝܼܪܘܼܬܼܵܐ:܆
                ܡܩܲܛܢܝܼܢ ܠܗܵܘܢܵܐ ܒܚܲܡܝܼܡܘܼܬܼܗܘܿܢ: ܘܝܵܗ̇ܒܿܝܼܢ ܠܹܗ ܚܙܵܝܵܐ. ܘܗ̤ܘ
                ܚܙܵܝܵܐ ܡܵܘܠܸܕܼ ܠܚܘܼ̈ܫܵܒܹܐ ܚܲܡܝ̈ܡܹܐ ܕܐܸܡ̇ܪܹܬܼ: ܒܝܲܕܼ ܥܲܡܝܼܩܘܼܬܼ
                ܚܙܵܬܼܵܐ ܢܲܦܫܵܢܵܝܬܼܵܐ: ܗܵܝ̇ ܕܡܸܬܼܩܲܪܝܵܐ ܬܹܐܘܿܪܝܼܵܐ. ܘܗ̤ܝ ܬܹܐܘܿܪܝܼܵܐ:
                ܡܵܘܠܕܼܵܐ ܠܪܸܬܼܚܵܐ. ܘܡ̣ܢ ܪܵܬܼܚܵܐ ܗܵܢܵܐ: ܚܙܵܝܵܐ ܕܡ̣ܢ ܛܲܝܒܿܘܼܬܼܵܐ.
                ܘܟܸܢ ܡܸܬܼܝܲܠܕܵܐ: ܬܪܝܼܥܘܼܬܼܵܐ ܕܕܸܡ̈ܥܹܐ. ܩܲܕܼܡܵܝܑܬܼ: ܗܵܝ̇ ܕܒܲܡܢܵܬܼܵܐ.
                ܗܵܢܵܘ ܕܹܝܢ: ܕܙܲܒܼ̈ܢܝܼܢ ܤܲܓܝܼ̈ܐܵܢ ܢܸܬܿܬܲܪ̈ܥܵܢ ܠܹܗ ܠܐ̄ܢܵܫ ܕܸܡ̈ܥܹܐ ܒܚܲܕܼ
                ܝܵܘܡܵܐ. ܘܡ̣ܢ ܗܵܕܹܐ: ܐܵܬܹ̇ܐ ܠܗܵܝ̇ ܕܠܵܐ ܦܤܵܩ. ܘܡ̣ܢ ܕܸܡ̈ܥܹܐ:
                ܡܩܲܒܿܠܵܐ ܢܲܦܫܵܐ ܫܲܝܢܵܐ ܕܚܘܼ̈ܫܵܒܹܐ. ܘܡ̣ܢ ܫܲܝܢܵܐ ܕܚܘܼ̈ܫܵܒܹܐ:
                ܡܸܬܼܥܲܠܝܵܐ ܠܫܲܦܝܘܼܬܼ ܡܲܕܥܵܐ. ܘܲܒܼܡܲܕܥܵܐ ܫܲܦܝܵܐ: ܐܵܬܹ̇ܐ ܐ̄ܢܵܫ ܠܗܵܝ̇
                ܕܲܗܘ̤ܵܐ ܚܵܙܹ̇ܐ ܤܬܝܼܪ̈ܵܬܼܵܐ. ܡܸܛܠ ܕܕܲܟܼܝܘܼܬܼܵܐ: ܒܲܡܫܲܝܢܘܼܬܼܵܐ ܕܡ̣ܢ
                ܩܪ̈ܵܒܹܐ ܚܡܝܼܠܵܐ. ܘܡ̣ܢ ܒܵܬܲܪ ܗܵܠܹܝܢ: ܡܵܛܹܐ ܗܵܘܢܵܐ ܠܡܸܕܸܡ
                ܕܲܪܫܝܼܡܵܐ ܒܹܗ ܬܲܚܘܝܼܬܼܵܐ ܕܗܵܝ̇ ܪܓܸܠܬܼܵܐ ܕܲܒܼܚܲܙܩܝܼܐܹܝܠ ܢܒܼܝܼܵܐ:
                ܕܨܵܝܪܵܐ ܛܘܼܦܤܵܐ ܕܗܵܠܹܝܢ ܬܠܵܬܼ ܡܘܼ̈ܫܚܵܬܼܵܐ ܕܢܲܦ̈ܫܵܬܼܵܐ ܕܡܸܬܼܩܲܪ̈ܒܼܵܢ
                ܠܐܲܠܵܗܵܝ̈ܬܼܵܐ: ܕܲܬܼܠܝܼܬܼܵܝܬܵܗ̇ ܐܝܼܬܹܝܗ̇ ܕܠܵܐ ܡܲܥܒܲܪܬܵܐ. ܠܗܵܠܹܝܢ
                ܟܠܗܹܝܢ ܫܘܼܪܵܝܵܐ ܐܝܼܬܼܵܘܗܝ ܨܸܒܼܝܵܢܵܐ ܫܲܦܝܼܪܵܐ ܕܲܠܘܵܬܼ ܐܲܠܵܗܵܐ:
                ܘܥܲܡ̈ܠܹܐ ܡܦܲܬ̈ܟܹܐ ܕܲܒܼܫܸܠܝܵܐ: ܘܠܵܐ ܡܥܲܩܡܘܼܬܼܵܐ ܗܵܝ̇ ܕܡܸܬܼܝܲܠܕܵܐ
                ܡ̣ܢ ܦܤܝܼܩܘܼܬܼܵܐ ܤܲܓܝܼܐܬܼܵܐ ܕܡ̣ܢ ܥܵܠܡܵܐ܀ ܦܘܼܪ̈ܫܵܢܹܐ ܕܹܝܢ
                ܕܥܲܡ̈ܠܹܐ: ܠܵܐ ܐܵܠܨܵܐ ܗ̄ܘ̣ܵܬܼ ܠܡܸܥܒܲܕܼ: ܕܲܠܟܼܠܢܵܫ ܝܑܼܕܼܝܼܥܝܼܢ. ܐܸܠܵܐ
                ܡ̣ܢ ܟܠܦܪܘܿܣ ܡܵܐ ܕܦܵܓܲܥ̇ ܒܗܘܿܢ ܐ̄ܢܵܫ: ܠܵܐ ܚܵܤܲܪ. ܡܹܐܬܲܪ
                
                 129 
                
                ܕܹܝܢ ܝܵܕܲܥ̇ ܐ̄ܢܵܐ: ܕܝܵܬܲܪ. ܕܐܝܼܬܲܝܗܘܿܢ ܗܵܠܹܝܢ: ܥܲܡܠܵܐ ܕܟܲܦܢܵܐ.
                ܘܩܸܪܝܵܢܵܐ: ܘܫܲܗܪܵܐ ܥܝܼܪܵܐ ܕܠܲܝ̈ܠܵܘܵܬܼܵܐ: ܐ̄ܢܵܫ ܐܲܝܟܼ ܚܲܝܠܹܗ.
                ܘܤܸܓܼ̈ܕܵܬܼܵܐ ܤܲܓܝܼ̈ܐܵܬܼܵܐ: ܕܤܵܓܹ̇ܕܼ ܐ̄ܢܵܫ ܒܥܸܕܵܢܹ̈ܐ ܕܐܝܼܡܵܡܵܐ:
                ܘܙܲܒܼ̈ܢܵܬܼܵܐ ܤܲܓܝܼ̈ܐܵܬܼܵܐ ܒܠܸܠܝܵܐ. ܐܝܼܬܼ ܕܲܬܼܠܵܬܼܝܼܢ ܒܲܚܕܼܵܐ ܙܒܲܢ ܤܵܓܹ̇ܕܼ
                ܘܲܡܫܲܠܸܡ: ܘܟܸܢ ܢܵܦܹ̇ܩ ܡ̣ܢ ܩܕܼܵܡ ܨܠܝܼܒܼܵܐ. ܘܐܝܼܬܼ: ܕܐܵܦ ܥܲܠ
                ܗܵܠܹܝܢ ܡܸܢܝܵܢܹ̈ܐ ܡܵܘܤܸܦ. ܘܐܝܼܬܼ: ܕܒܲܚܕܼܵܐ ܨܠܘܿܬܼܵܐ: ܬܠܵܬܼܵܐ ܥܸܕܵܢ̈ܝܼܢ
                ܡܵܘܚܲܪ: ܘܲܢܓܼܝܼܕܼ ܠܘܵܬܼ ܡܲܕܥܹܗ ܟܲܕܼ ܪܡܸܐ ܥܲܠ ܐܲܦܵܘ̈ܗܝ: ܟܲܕܼ
                ܠܲܝܬܿ ܬܲܡܵܢ ܥܸܨܝܵܢܵܐ: ܘܠܵܐ ܦܸܗܝܵܐ ܕܚܘܼ̈ܫܵܒܹܐ. ܘܲܬܼܪ̈ܲܝܗܘܿܢ ܗܵܠܹܝܢ
                ܫܘܼ̈ܚܠܵܦܹܐ ܪܲܒܿܘܼܬܼ ܥܘܼܬܼܪܵܐ ܡܚܵܘܹܝܢ ܕܛܲܝܒܿܘܼܬܼܵܐ: ܕܲܡܫܲܚܠܦܵܐܝܼܬܼ
                ܤܵܥ̇ܪܵܐ ܠܐ̄ܢܵܫ ܐ̄ܢܵܫ ܐܲܝܟܼ ܡܫܘܼܚܬܹܗ. ܐܸܢ ܗܵܝ̇ ܕܤܲܓܝܼܐܘܼܬܼܵܐ
                ܕܲܒܼܪܸܬܼܚܵܐ ܫܓܼܝܼܪܵܐ ܡܲܤܓܸܐ ܡܸܢܝܵܢܵܐ: ܘܐܸܢ ܗܵܝ̇ ܕܲܒܼܗܝܼܠܘܼܬܼܵܐ
                ܡܩܲܒܿܠܵܐ ܒܹܗ ܢܲܦܫܹܗ: ܘܚܵܒܼ̇ܫܵܐ ܒܝܲܕܼ ܚܕܼܵܐ ܠܲܤܓܝܼܐܘܼܬܼܵܐ ܕܡܸܢܝܵܢܹ̈ܐ
                ܕܩܲܕܼ̈ܡܵܝܵܬܼܵܐ܀ ܕܡܵܢܲܐ ܗ̣̄ܝ ܕܹܝܢ ܥܸܠܬܼܵܐ ܕܲܨܠܘܿܬܼܵܐ ܗܵܝ̇ ܐ̄ܚܪܹܬܼܵܐ
                ܘܫܘܼܘܚܵܪܵܐ ܕܒܼܵܗ̇ ܘܕܲܡܒܲܪܝܵܐ ܡ̣ܢ ܥܸܨܝܵܢܵܐ: ܠܵܐ ܐܸܬܼܚܲܙܝܲܬ̤ ܠܝܼ
                ܕܙܵܕܹܩ ܕܲܢܦܲܪܸܫ ܠܨܸܒܼ̈ܘܵܬܼܵܐ ܕܐܲܝܟܼ ܗܵܠܹܝܢ: ܟܲܕܼ ܘܲܥܕܲܡܵܐ ܠܡܲܡܠܠܵܐ
                ܕܠܸܫܵܢܵܐ ܘܲܕܼܤܘܼܪ̈ܛܹܐ ܢܲܝܬܸܐ ܙܢܲܝ̈ܗܹܝܢ. ܕܠܵܐ ܟܲܕܼ ܠܵܐ ܢܸܫܟܲܚ
                ܢܲܕܼܪܸܟܼ ܡܸܢܵܗ̇ ܡܸܕܸܡ ܗܵܘ̇ ܡܲܢ ܕܩܵܪܹܐ: ܡܸܬܼܚܲܙܝܵܐ ܠܹܗ ܐܲܝܟܼ
                ܡܸܕܸܡ ܦܲܟܿܝܼܗܵܐ. ܘܐܸܢ ܬܘܼܒܼ ܝܵܕܲܘܿܥܵܐ ܐܝܼܬܼܵܘܗܝ ܕܗܵܠܹܝܢ: ܒܵܤܲܪ
                ܠܹܗ ܠܗܵܘ̇ ܡܲܢ ܕܲܬܼܚܘܼܡܵܐ ܕܨܸܒܼ̈ܘܵܬܼܵܐ ܠܵܐ ܝܵܕܲܥ̇ ܕܢܸܥܒܸܿܕܼ. ܘܡ̣ܢ ܗܵܢܵܐ
                ܕܹܝܢ: ܥܸܕܼܠܵܝܵܐ. ܘܡ̣ܢ ܗܵܘ̇: ܓܘܼܚܟܵܐ. ܘܗܵܘܹ̇ܐ ܐ̄ܢܵܐ ܠܹܗ: ܒܲܪܒܪܵܝܵܐ
                ܒܫܲܪܒܵܐ: ܠܗܵܘ̇ ܡ̇ܢ ܕܗ̤ܘ: ܐܲܝܟܼ ܡܸܠܬܹܗ ܕܲܫܠܝܼܚܵܐ ܕܐܸܡ݂ܲܪ ܥܲܠ
                
                 130 
                
                ܗܵܘ̇ ܕܡܸܬܼܢܲܒܸܐ܀ ܐܲܝܢܵܐ ܕܹܝܢ ܕܲܪܓܼܝܼܓܼ ܠܡܸܕܲܥ ܠܗܵܠܹܝܢ: ܗܵܐ
                ܪܫܝܼܡ ܝܘܼܒܵܠܗܹܝܢ ܠܥܸܠ. ܢܲܩܸܦ ܥ̇ܒܼܵܕܼܵܐ ܠܚܘܼܫܵܒܼܵܐ: ܒܛܲܝܒܿܘܼܬܹܗ
                ܕܡܵܪܲܢ. ܘܡܵܐ ܕܲܗܘ̤ܵܐ ܒܗܹܝܢ ܤܘܼܥܪܵܢܵܐܝܼܬܼ: ܝܵܠܹ̇ܦ ܗ̤ܘ ܡ̣ܢ
                ܢܲܦܫܹܗ. ܬܸܒܼ ܠܲܡ ܒܩܸܠܵܝܬܵܟܼ: ܘܗ̤ܝ ܩܸܠܵܝܬܼܵܐ ܡܲܠܦܵܐ ܠܵܟܼ
                ܡܠܡܸܕܸܡ.