Isaac of Nineveh. “Discourse 16.” Based upon Digital Syriac Corpus. Last modified March 5, 2019. https://syriaccorpus.org/407.
    
        
            
                ܥܲܠ ܕܲܟܼܡܵܐ ܡܥܲܕܪܵܐ ܒܓܼܵܘ ܫܸܠܝܵܐ ܤܦܝܼܩܘܼܬܼܵܐ ܕܡ̣ܢ ܥܒܼܵܕܹ̈ܐ
                ܠܢܲܦܫܵܐ: ܘܡܲܚܤܪܝܼܢ ܡܲܥܠܵܐ ܘܡܲܦܩܵܐ ܠܗܵܘܢܵܐ ܫܲܪܘܵܝܵܐ:
                ܕܚܲܕܼܬܼܵܐܝܼܬܼ ܫܲܪܝܼ ܚܵܐܲܪ ܒܲܩܢܘܿܡܹܗ. ܘܲܕܼܢܲܗܝܼܪܵܐܝܼܬܼ ܥܒܼܵܕܼ̈ܐ ܦܲܓܼܪ̈ܵܢܵܝܹܐ
                ܠܝܼܚܝܼܕܼܵܝܵܐ: ܚܲܤܝܼܪܘܼܬܼܵܐ ܒܲܥܒܼܵܕܼܵܘ̈ܗܝ ܕܐܲܠܵܗܵܐ ܕܢܸܥܒܸܿܕܼ: ܐܵܠܨܵܐ
                ܠܹܗ. ܝܘ.
            
            
                ܒܼܪܢܵܫܵܐ ܤܲܓܝܼ ܨܸܦܬܼܵܐ: ܕܢܸܗܘܸܐ ܢܝܼܚܵܐ ܘܲܡܫܲܝܢܵܐ: ܠܵܐ ܡܸܫܟܲܚ.
                ܗܸܢܹܝܢ ܓܹܝܪ ܥܸܠ̈ܠܵܬܼܵܐ ܐܵܢܲܢ̈ܩܵܝܵܬܼܵܐ ܐܵܐܲܢ̈ܩܵܝܵܬܼܵܐ ܕܢܵܩ̈ܦܵܢ ܠܨܸܒܼ̈ܘܵܬܼܵܐ ܕܬܼܵܥܹ̇ܫ ܒܗܹܝܢ:
                ܗܸܢܘܿܢ ܥܵܒܼ̈ܕܵܢ ܠܹܗ ܕܢܸܬܿܬܿܙܝܼܥ ܡ̣ܢ ܩܛܝܼܪ: ܘܒܼ̈ܙܵܢ ܠܢܝܼܚܘܼܬܹܗ
                ܘܲܒܼܗܝܠܘܼܬܹܗ. ܒܸܠܥܵܕܼ ܢܘܼ̈ܬܵܦܹܐ ܕܹܝܢ ܕܢܸܥܘܿܠ ܤܵܛܵܢܵܐ ܥܲܠ
                ܢܲܦܫܵܐ: ܐܲܬܼܪܵܐ ܠܲܝܬܿ ܠܹܗ. ܙܵܕܹܩ ܠܹܗ ܠܝܼܚܝܼܕܼܵܝܐ: ܕܲܩܕܼܵܡ ܐܲܦܵܘ̈ܗܝ
                ܕܐܲܠܵܗܵܐ ܢܩܝܼܡ ܢܲܦܫܹܗ ܐܲܡܝܼܢܵܐܝܼܬܼ: ܘܲܠܪܸܡܙܹܗ ܢܲܨܸܕܼ. ܐܸܢ ܐܹܝܢ
                ܒܲܫܪܵܪܵܐ ܤܝܼܡܵܐ ܠܹܗ ܗܵܘܢܹܗ ܕܢܸܛܲܪ ܒܲܙܗܝܼܪܘܼܬܼܵܐ: ܘܲܠܢܘܼ̈ܩܙܹܐ
                ܙܥܘܿܪܹ̈ܐ ܕܪܵܦܬܿܝܼܢ ܒܹܗ ܠܡܲܕܼܪܵܟܼܘܼ ܚܲܪܝܼܦܵܐܝܼܬܼ ܨܵܒܹ̇ܐ: ܘܲܠܡܸܕܲܥ
                ܒܫܲܝܢܵܐ ܕܬܲܪܥܝܼܬܼܵܐ ܠܡܸܦܪܲܫ ܠܲܕܼܥܵܐ̇ܠܝܼܢ ܘܢܵܦ̇ܩܝܼܢ܀ ܥܲܪ̈ܝܵܬܼܵܐ
                
                 131 
                
                ܤܲܓܝܼ̈ܐܵܬܼܵܐ ܒܝܼܚܝܼܕܼܵܝܵܐ: ܐܵܬ̤ܵܐ ܐܸܢܹܝܢ ܕܲܡܪܲܫܠܘܼܬܹܗ ܡ̣ܢ ܛܘܼܝܵܒܼܵܐ
                ܕܦܘܼܠܚܵܢܹܗ ܕܲܡܫܝܼܚܵܐ. ܘܝܼܕܲܥܹ̈ܐ ܕܚܲܤܝܼܪܘܼܬܼܵܐ ܕܲܒܼܗܵܠܹܝܢ ܐܲܠܵܗܵܝ̈ܬܼܵܐ
                ܡܒܲܕ̈ܩܵܢ. ܒܸܠܥܵܕܼ ܡ̣ܢ ܤܦܝܼܩܘܼܬܼܵܐ: ܢܲܗܝܼܪܘܼܬܼܵܐ ܠܵܐ ܬܸܒܼܥܸܐ ܡ̣ܢ
                ܢܲܦܫܵܟܼ. ܘܠܵܐ ܢܝܼܚܘܼܬܼܵܐ ܘܲܒܼܗܝܼܠܘܼܬܼܵܐ: ܒܐܲܫܝܼܕܼܘܼܬܼܵܐ ܕܪܸ̈ܓܼܫܹܐ. ܘܠܵܐ
                ܟܢܝܼܫܘܼܬܼܵܐ ܕܪܸ̈ܓܼܫܹܐ: ܥܲܡ ܥܲܪ݁ܝܵܬܼܵܐ ܕܤܘܼܥܪ̈ܵܢܹܐ. ܠܵܐ ܬܲܤܓܸܐ ܥܲܪ̈ܝܵܬܼܵܐ
                ܠܢܲܦܫܵܟܼ: ܘܠܵܐ ܡܸܫܟܲܚ ܐܲܢ̄ܬܿ ܒܘܼܠܒܵܠܵܐ ܒܗܵܘܢܵܟܼ. ܒܸܠܥܵܕܼ
                ܬܲܟܼܫܲܦܬܼܵܐ ܐܲܡܝܼܢܬܼܵܐ: ܠܡܸܬܼܩܲܪܵܒܼܘܼ ܠܐܲܠܵܗܵܐ ܠܵܐ ܡܲܨܝܵܐ. ܘܥܲܡ
                ܥܲܡܠܵܐ ܕܬܲܟܼܫܲܦܬܼܵܐ: ܠܡܸܪܡܵܐ ܠܪܸܥܝܵܢܵܐ ܡܲܪܢܝܼܬܼܵܐ ܐ̄ܚܪܹܬܼܵܐ:
                ܦܘܼܠܗܵܕܼܵܐ ܗ̣̄ܝ ܕܠܸܒܵܐ. ܙܵܘ̈ܥܹܐ ܚܲܡܝܼ̈ܡܹܐ ܕܐܲܕܼܝܼܩܘ ܥܠܲܝܟ
                ܒܲܙܒܲܢ ܒܲܛܥܵܡܬܼܵܐ ܕܐܲܠܵܗܵܐ ܒܲܫܓܼܵܪܵܐ ܚܲܪܝܼܦܵܐ ܕܗܵܠܹܝܢ ܕܡܸܛܠܵܬܹܗ:
                ܘܬܼܘܼܒܼ ܟܲܕܼ ܦܢܲܝܬܿ ܤܥܲܪܬܿ ܐܸܢܘܿܢ: ܐܸܫܟܲܚܬܿ ܐܸܢܘܿܢ ܟܲܕܼ ܦܲܪܝܼܗܝܼܢ
                ܒܲܛܥܵܡܬܗܘܿܢ ܘܩܲܪܝܼܪܝܼܢ ܒܓܼܵܘ ܢܲܦܫܵܟܼ: ܡܫܵܟܼܘܼܬܼ ܥܸܢܝܵܢܵܐ ܕܒܲܪܢܵܫܵܐ
                ܓܵܚܲܬ̤ ܥܠܲܝܟ ܡ̣ܢ ܕܘܼܟܼ: ܐܵܘ ܝܲܩܲܪܬܿ ܠܲܥ̇ܒܼܵܕܼܵܐ ܦܲܓܼܪܵܢܵܝܵܐ ܝܲܬܝܼܪ
                ܡܸܢܗܘܿܢ: ܘܥܲܠ ܗܵܕܹܐ ܩܸܪܲܬ̤ ܫܲܚܝܼܢܘܼܬܼܵܐ ܕܚܘܼ̈ܫܵܒܲܝܟ. ܕܸܡ̈ܥܹܐ ܕܹܝܢ
                ܘܲܢܩܵܫܹ̈ܐ ܕܪܹܫܵܐ ܕܒܲܨܠܘܿܬܼܵܐ ܘܓܘܼܪ̈ܓܵܚܹܐ ܚܲܡܝܼ̈ܡܹܐ: ܡܥܝܼܪܝܼܢ ܠܵܗ̇
                ܬܘܼܒܼ ܠܚܲܡܝܼܡܘܼܬܼܵܐ ܕܚܲܠܝܘܼܬܼܗܘܿܢ ܒܓܼܵܘ ܠܸܒܵܐ. ܘܲܒܼܫܵܢܝܘܼܬܼܵܐ
                ܡܩܲܠܲܤܬܼܵܐ ܦܵܪܲܚ ܠܸܒܵܐ ܒܵܬܲܪ ܐܲܠܵܗܵܐ ܟܲܕܼ ܓܵܥܹ̇ܐ: ܨܲܗܝܵܐ ܗ̣̄ܝ ܠܵܟܼ
                ܢܲܦܫܝ ܐܲܠܵܗܵܐ ܚܲܝܵܐ: ܕܐܸܡܲܬܼܝ ܐܹܬܸܐ ܘܐܸܚܙܸܐ ܐܲܦܲܝ̈ܟ. ܐܲܝܢܵܐ ܕܐܸܫܬܿܝܼ
                ܡ̣ܢ ܗܵܢܵܐ ܚܲܡܪܵܐ ܘܬܼܘܼܒܼ ܐܸܬܼܓܠܸܙ: ܗܵܝܕܹܝܢ ܗ̤ܘܝܘܼ ܒܲܠܚܘܿܕܼܵܘܗܝ
                ܝܵܕܲܥ̇ ܒܐܲܝܢܵܐ ܛܘܼܪܵܦܵܐ ܐܸܫܬܿܒܸܩ: ܘܡܵܢܵܐ ܐܸܫܬܿܩܸܠ ܡܸܢܹܗ ܡܸܛܠ
                ܪܲܦܝܘܼܬܹܗ܀ ܐܘܿ ܟܡܵܐ ܒܝܼܫܵܐ ܚܙܵܬܼܵܐ ܘܥܸܢܵܝܵܢܵܐ ܕܐ̄ܢܵܫܵܐ ܠܐܲܝܢܵܐ
                
                 132 
                
                ܕܡܸܬܿܕܲܒܲܪ ܒܫܸܠܝܵܐ: ܘܐܵܦ ܝܲܬܼܝܼܪ ܡ̣ܢ ܗܵܘ̇ ܕܲܫܪܸܐ ܘܲܫܒܼܝܼܩ.
                ܫܲܪܝܼܪܵܐܝܼܬܼ ܐܲܝܲܚ̈: ܕܐܲܝܟܼ ܚܹܐܦܵܐ ܥܲܙܝܼܙܵܐ ܕܥܲܪܝܵܐ: ܕܡ̣ܢ ܫܹܠܝ ܥܵܪܹܨ
                ܥܲܠ ܦܸܪ̈ܥܹܐ ܕܐܝܼܠܵܢܹ̈ܐ: ܘܡܵܘܩܸܕܼ ܪܹ̈ܫܲܝܗܘܿܢ ܙܥܘܿܪܹ̈ܐ ܕܲܒܼܠܲܨ̣ܘ ܡ̣ܢ
                ܤܵܘ̈ܟܵܬܼܵܐ: ܗܵܟܲܢܵܐ ܥܸܢܝܵܢܵܐ ܕܲܒܼܢܲܝ̈ܢܵܫܵܐ: ܘܐܵܦܸܢ ܛܵܒܼ ܙܥܘܿܪ: ܘܡܸܤܬܿܒܲܪ
                ܕܲܠܛܵܒܼܬܼܵܐ ܗ̄ܘ̣ ܟܢܘܼܫܝܼܗܘܿܢ: ܡܵܘܒܸܿܫ ܢܘܼܪ݁ܒܹܐ ܕܲܡܝܲܬܿܪ̈ܵܬܼܵܐ ܕܐܲܦܸܩ̣ܘ
                ܪܹ̈ܫܲܝܗܘܿܢ ܚܲܕܼܬܼܵܐܝܼܬܼ ܡ̣ܢ ܡܡܲܙܓܼܘܼܬܹܗ ܕܐܵܐܲܪ ܕܫܸܠܝܵܐ: ܕܲܟܼܪܝܼܟܼܝܼܢ
                ܪܲܓܼܝܵܐܝܼܬܼ ܠܐܝܼܠܵܢܵܐ ܕܢܲܦܫܵܐ ܕܐܸܬܼܢܨܸܒܼ ܥܲܠ ܬܲܦܹ̈ܐ ܕܲܬܼܝܵܒܼܘܼܬܼܵܐ.
                ܘܐܲܝܟܼ ܥܘܼܙܹܗ ܕܲܓܼܝܼܕܼܵܐ: ܕܡܲܕܼܪܸܟܼ ܠܡܵܘ̈ܥܝܵܬܼܵܐ ܚܲܕܼ̈ܬܼܵܬܼܵܐ ܕܥܸܩܵܪܹ̈ܐ:
                ܘܲܡܩܲܦܲܚ ܪܹ̈ܫܲܝܗܘܿܢ ܘܡܲܥܸܠ ܠܓܼܵܘ ܐܲܪܥܵܐ: ܗܵܟܲܢܵܐ ܥܸܢܝܵܢܵܐ
                ܕܲܒܼܢܲܝ̈ܢܵܫܵܐ ܠܥܸܩܵܪܵܐ ܕܪܸܥܝܵܢܵܐ: ܕܫܲܪܝܼ ܡܵܘܪܸܩ ܒܥܸܤܒܹ̈ܐ
                ܕܲܡܝܲܬܿܪ̈ܵܬܼܵܐ: ܡܩܲܦܲܚ ܪܹ̈ܫܲܝܗܹܝܢ: ܘܡܲܥܸܠ ܠܗܹܝܢ ܬܘܼܒܼ
                ܠܕܘܼܟܲܬܼܗܹܝܢ: ܘܥܵܛܹ̇ܐ ܪܲܥܕܘܼܬܼܗܹܝܢ. ܘܐܸܢ ܥܸܢܝܵܢܵܐ ܕܐܲܝܠܹܝܢ ܕܲܒܼܨܝܼܪ
                ܩܲܠܝܼܠ ܐܲܚܝܼܕܼܝܼܢ ܢܲܦܫܗܘܿܢ: ܒܥܸܠܲܬܼ ܥܘܼܘܵܟܹ̈ܐ ܒܲܠܚܘܿܕܼ ܕܡ̣ܢ
                ܦܘܼܠܚܵܢܵܐ ܕܲܥܝܵܕܼܵܐ: ܗܵܢܵܐ ܟ̱ܠܹܗ ܡܲܟܸܿܐ ܠܢܲܦܫܵܐ: ܟܡܵܐ ܝܲܬܿܝܼܪܵܐܝܼܬܼ
                ܡܲܡܠܠܵܐ ܘܲܚܙܵܬܼܵܐ ܕܦܲܟܝܼ̈ܗܹܐ ܘܗܸܕܼܝܘܿܛܹ̈ܐ: ܕܠܵܐ ܐܹܡܲܪ ܕܥܵܠܡܵܝܹ̈ܐ:
                ܗܵܘ̇ ܕܐܝܼܬܼܵܘܗܝ ܐܲܝܟܼ ܢܘܼܪܵܐ ܠܥܵܒܼܵܐ. ܘܐܲܟܼܙܢܵܐ ܕܓܲܒܼܪܵܐ ܝܲܩܝܼܪܵܐ
                ܘܲܗܕܼܝܼܪܵܐ: ܕܛܵܥܹ̇ܐ ܝܵܬܹܗ ܒܡܲܫܬܿܝܵܐ ܤܲܓܝܼܐܵܐ ܕܚܲܡܪܵܐ: ܘܡܸܬܿܕܵܘܕܼܵܐ
                ܟܢܝܼܟܼܘܼܬܹܗ ܘܡܸܙܕܲܠܠܵܐ ܝܲܩܝܼܪܘܼܬܹܗ: ܘܡ̣ܢ ܚܘܼ̈ܫܒܹܐ ܢܘܼܟܼܪ̈ܝܹܐ
                ܕܥܵܪܨܝܼܢ ܒܪܸܥܝܵܢܹܗ ܡ̣ܢ ܚܲܝܠܹܗ ܕܚܲܡܪܵܐ: ܡܸܬܼܕܵܘܕܼܵܐ ܢܲܟܼܦܘܼܬܹܗ:
                ܗܵܟܲܢܵܐ ܡܸܬܿܕܵܘܕܼܵܐ ܟܢܝܼܟܼܘܼܬܼܵܗ̇ ܕܢܲܦܫܵܐ ܒܥܸܢܝܵܢܵܐ ܘܲܚܙܵܬܼܵܐ ܕܲܒܼܢܲܝ̈ܢܵܫܵܐ:
                
                 133 
                
                ܘܛܵܥ̇ܝܵܐ ܢܝܼܫܵܐ ܕܲܙܗܝܼܪܘܼܬܼܵܗ̇: ܘܡܸܬܼܠܚܸܐ ܡ̣ܢ ܪܸܥܝܵܢܵܗ̇ ܟ̱ܠܹܗ
                ܢܝܼܫܵܐ ܕܨܸܒܼܝܵܢܵܗ̇: ܘܥܵܒܲܪ ܡ̣ܢ ܫܸܪ̈ܫܹܝܗ̇ ܟ̱ܠܵܗ̇ ܫܲܬܼܐܸܤܬܼܵܐ ܕܕܼܘܼܒܵܪܹ̈ܐ
                ܫܒܼܝܼܚܹ̈ܐ: ܥܸܢܝܵܢܵܐ ܘܲܪܘܲܚܬܼܵܐ ܘܲܚܫܲܚܬܼܵܐ ܕܦܘܼܪܚܵܓܵܝܵܐ. ܐܵܦܸܢ ܗ̤ܘ ܐ̄ܢܵܫ
                ܗܘܑ̤ܵܐ ܫܠܸܐ: ܘܒܲܠܚܘܿܕܼ ܩܢܘܿܡܹܗ ܢܸܗܘܸܐ ܤܲܩܘܼܒܼܠܵܐ ܒܘܲܥܕܵܐ
                ܕܐܲܝܠܹܝܢ ܕܕܲܐܝܟܼ ܗܵܠܹܝܢ ܟܲܕܼ ܢܸܚܙܸܐ ܘܢܸܫܡܲܥ: ܤܵܦܹ̇ܩ ܗ̄ܘ̣ ܡܵܐ
                ܕܡܲܥܠܝܼܢ ܒܲܠܚܘܿܕܼ ܐܲܪ̈ܥܹܐ ܕܥܲܝܢܵܘ̈ܗܝ ܘܲܕܼܡܲܫܡܲܥܬܹܗ: ܠܫܘܼܗܵܝܵܐ
                ܕܬܲܪܥܝܼܬܹܗ ܡ̣ܢ ܐܲܠܵܗܵܝ̈ܬܼܵܐ ܘܲܕܼܠܘܼܚܝܵܐ ܤܲܓܝܼܐܵܐ. ܗܵܢܵܘ ܕܹܝܢ: ܗ̤ܘ
                ܚܸܙܘܵܐ ܒܲܠܚܘܿܕܼ ܕܐ̄ܢܵܫܵܐ ܘܫܸܡܥܵܐ ܤܦܝܼܩܵܐ ܕܡܲܡܠܲܠܗܘܿܢ:
                ܘܐܸܢܗ̤ܘ ܕܲܡܠܸܐ ܥܸܕܵܢܵܐ ܒܲܠܚܘܿܕܼ ܗܵܢܵܐ ܟ̱ܠܹܗ ܚܘܼܒܵܠܵܬ ܡܸܫܟܲܚ
                ܥܵܒܹ̇ܕܼ ܒܝܼܚܝܼܕܼܵܝܵܐ ܕܲܢܛܝܼܪ: ܡܵܢܵܐ ܢܹܐܡܲܪ ܥܲܠ ܤܘܼܩ̈ܒܵܠܹܐ
                ܕܐܲܡܝܼܢܘܼܬܼܵܐ: ܐܵܘ ܥܲܠ ܫܘܼܘܚܵܪܵܐ ܝܲܬܝܼܪܵܐ܀ ܬܸܢܵܢܵܐ ܕܡ̣ܢ ܟܲܪܤܵܐ
                ܤܵܠܹ̇ܩ ܠܝܼܕܲܥܬܼܵܐ ܕܐܲܠܵܗܵܝܵܬܼܵܐ: ܐܲܝܟ ܥܸܛܪܹ̈ܐ ܕܡ̣ܢ ܪܲܛܝܼܒܼܘܼܬܼܵܐ
                ܕܐܲܪܥܵܐ ܤܵܠܩ̇ܝܼܢ ܠܐܲܦܲܝ̈ ܫܸܡܫܵܐ. ܪܵܡܘܼܬܼܵܐ: ܠܵܐ ܬܸܤܬܲܟܲܠ
                ܕܲܒܼܚܸܫܘܿܟܼܵܐ ܪܵܕܼܝܵܐ: ܘܤܘܼܟܵܠܵܐ ܘܚܸܟܼܡܬܼܵܐ ܠܵܐ ܬܸܕܲܥ. ܠܥܸܠ ܡ̣ܢ
                ܟܠ ܡܸܫܬܲܩܠܵܐ ܒܚܘܼ̈ܫܵܒܹܝܗ̇: ܘܡ̣ܢ ܟܠ ܗ̤ܝ ܡܸܤܟܹܢܝܵܐ ܘܲܡܫܲܦܠܵܐ.
                ܘܐܘܼܪ̈ܚܵܬܹܗ ܕܐܲܠܵܗܵܐ: ܠܵܐ ܬܸܫܟܲܚ ܠܡܸܕܲܥ. ܘܡܵܪܝܵܐ: ܡܟܲܤܸܐ
                ܡܸܢܵܗ̇ ܨܸܒܼܝܵܢܹܗ. ܡܸܛܠ ܕܐܘܼܪܚܵܐ ܕܡܲܟܼܝܼ̈ܟܹܐ: ܠܵܐ ܪܸܚܲܡܲܬ̤
                ܠܡܹܐܙܲܠ ܒܵܗ̇.