Isaac of Nineveh. “Discourse 17.” Based upon Digital Syriac Corpus. Last modified March 5, 2019. https://syriaccorpus.org/408.
    
        
            
                 134 
                ܥܲܠ ܐܘܼܪ̈ܚܵܬܼܵܐ ܩܲܪ̈ܝܼܒܼܵܬܼܵܐ ܕܲܠܘܵܬܼ ܐܲܠܵܗܵܐ: ܕܡܸܬܼܓܲܠ̈ܝܵܢ ܠܐ̄ܢܵܫ
                ܡ̣ܢ ܥܲܡܠܹ̈ܐ ܚܠܲܝ̈ܵܐ ܕܲܒܼܫܲܗܪܵܐ ܕܠܸܠܝܵܐ. ܘܕܲܐܝܠܹܝܢ ܕܥܵܡ̇ܠܝܼܢ ܒܹܗ
                ܒܕܼܘܼܒܵܪܵܐ ܕܫܲܗܪܵܐ: ܕܸܒܼܫܵܐ ܡܸܤܬܲܝܒܿܪܝܼܢ ܟܠܗܘܿܢ ܝܵܘ̈ܡܵܬܼܗܘܿܢ. ܝܙ.
            
            
                ܠܵܐ ܬܸܤܒܲܪ ܠܵܟܼ ܐܘܿ ܒܲܪܢܵܫܵܐ: ܕܐܝܼܬܼ ܒܟܼܠܗܘܿܢ ܥܲܡܠܹ̈ܐ
                ܕܥܲܢܘܵܝܹ̈ܐ ܕܘܼܒܵܪܵܐ ܕܪܲܒܿ ܘܲܡܝܲܬܲܪ ܡ̣ܢ ܥܲܡܠܵܐ ܕܫܲܗܪܵܐ. ܫܲܪܝܼܪܵܐܝܼܬܼ
                ܐܲܝܲܚ̈: ܕܐܸܢ ܐܵܦ ܒܐܝܼܡܵܡܵܐ ܠܵܐ ܢܸܗܘܸܐ ܠܥܲܢܘܵܝܵܐ ܦܘܼܠܗܵܕܼܵܐ
                ܒܨܸܒܼ̈ܘܵܬܼܵܐ ܡܸܕܸܡ ܦܲܓܼܪ̈ܵܢܵܝܬܼܵܐ ܘܪܸܢܝܵܐ ܥܵܒܼܘܿܪܵܐ: ܐܸܠܵܐ ܘܩܲܠܝܼܠ
                ܦܤܝܼܩܘܼܬܼܵܐ ܕܡ̣ܢ ܥܵܠܡܵܐ: ܘܲܢܛܘܼܪܬܵܐ ܙܥܘܿܪܬܵܐ ܗܵܘ̇ܝܵܐ ܠܹܗ
                ܥܲܡ ܫܲܗܪܵܐ: ܠܵܐ ܥܲܤܩܵܐ ܠܝܼ ܕܐܹܡܲܪ ܠܟܼܘܿܢ ܗܵܝ̇ ܕܫܲܪܝܼܪܵܐ:
                ܕܐܲܝܟܼ ܕܲܒܼܓܸܦܹ̈ܐ ܦܵܪܲܚ ܪܸܥܝܵܢܹܗ ܒܩܲܠܝܼܠ ܙܲܒܼܢܵܐ: ܘܤܵܠܹ̇ܩ ܠܘܵܬܼ
                ܐܲܠܵܗܵܐ ܠܒܼܘܼܤܵܡܹܗ. ܘܲܒܼܗܵܘ̇ ܫܘܼܒܼܚܵܐ ܡܸܬܼܒܲܩܸܐ ܦܫܝܼܩܵܐܝܼܬܼ: ܘܲܒܼܗܵܝ̇
                ܝܑܼܕܲܥܼܵܬܼܵܐ ܕܪܵܡܵܐ ܡ̣ܢ ܬܲܪܥܝܼܬܼܵܐ ܕܲܒܼܢܲܝ̈ܢܲܫܵܐ ܤܵܚܹ̇ܐ ܒܩܲܠܝܼܠܘܼܬܹܗ.
                ܝܑܼܚܝܼܕܼܵܝܵܐ ܕܲܒܼܫܲܗܪܵܐ ܐܲܡܝܼܢ ܒܦܼܪܫܵܢܵܐ ܕܗܵܘܢܵܐ: ܠܗܵܢܵܐ ܠܵܐ
                ܬܸܚܙܹܝܘܗܝ ܐܲܝܟܼ ܠܒܝܼܫ ܒܸܤܪܵܐ. ܫܲܪܝܼܪܵܐܝܼܬܼ: ܛܲܟܼܤܵܐ ܗ̄ܘ̣ ܕܡܲܠܲܐܟܹ̈ܐ
                ܥ̇ܒܼܵܕܼܵܐ ܗܵܢܵܐ: ܐܵܦܠܵܐ ܓܹܝܪ ܡܲܨܝܵܐ ܕܐܲܝܠܹܝܢ ܕܲܒܼܗܵܢܵܐ ܕܘܼܒܵܪܵܐ ܥܵܡ̇ܠܝܼܢ:
                ܡܸܫܬܲܒܼܩܝܼܢ ܕܠܵܐ ܫܘܼ̈ܟܵܢܹܐ ܪܵܘܟܵܢܹܐ ܪܵܘܪ̈ܒܹܐ ܕܡ̣ܢ ܐܲܠܵܗܵܐ: ܡܸܛܠ ܥܝܼܪܘܼܬܼܵܐ
                ܘܢܲܗܝܼܪܘܼܬܼܵܐ ܕܠܸܒܿܗܘܿܢ: ܘܡܸܛܠ ܪܸܢܝܵܐ ܐܲܡܝܼܢܵܐ ܕܚܘܼܫܵܒܲܝ̈ܗܘܿܢ
                ܕܲܠܘܵܬܹܗ܀ ܢܲܦܫܵܐ ܗܵܟܹܝܠ ܕܲܒܼܗܵܢܵܐ ܕܘܼܒܵܪܵܐ ܕܫܲܗܪܵܐ ܥܵܡ̇ܠܵܐ
                ܡܸܬܼܢܲܦܩܵܐ: ܥܲܝ̈ܢܹܐ ܕܲܟܼܪ̈ܘܿܒܹܐ ܗܵܘ̈ܝܵܢ ܠܵܗ̇ ܒܩܲܠܝܼܠܘܼܬܼ ܕܵܘܩܵܐ
                ܘܚܲܪܝܼܦܘܼܬܼܵܐ: ܠܲܡܕܼܵܩ ܒܟܼܠܥܸܕܵܬ ܒܬܹܐܘܿܪ̈ܝܼܵܣ ܫܡܲܝܵܢ̈ܝܵܬܼܵܐ. ܐܸܢܵܐ
                ܡܲܢ ܤܵܒܲ݁ܪ ܐ̄ܢܵܐ: ܕܠܵܐ ܡܲܨܝܵܐ ܕܐܲܝܢܵܐ ܕܒܼܝܼܕܲܥܬܼܵܐ ܪܲܒܿܬܼܵܐ ܘܲܒܼܦܘܼܪܫܵܢܵܐ
                
                 135 
                
                ܓܒܼܵܐ ܠܢܲܦܫܹܗ ܥܲܡܠܵܐ ܗܵܢܵܐ ܪܲܒܵܐ ܘܐܲܠܵܗܵܝܵܐ: ܕܟܲܕܼ ܗܵܢܵܐ ܟ̱ܠܹܗ
                ܝܘܼܩܪܵܐ ܐܸܬܼܒܛܸܠ ܠܹܗ ܠܡܸܛܥܲܢ: ܒܲܡܢܵܬܼܵܐ ܗܵܕܹܐ ܫܒܼܝܚܬܼܵܐ ܕܲܓܼܒܼܵܐ
                ܠܹܗ: ܕܠܵܐ ܡܸܬܼܚܲܦܲܛ ܕܐܵܦ ܒܐܝܼܡܵܡܵܐ ܢܸܛܲܪ ܢܲܦܫܹܗ ܡ̣ܢ ܫܓܼܘܼܫܝܵܐ
                ܕܥܸܢܝܵܢܹ̈ܐ ܘܪܸܢܝܵܐ ܕܲܥܒܼܵܕܹ̈ܐ: ܕܠܵܐ ܢܸܗܘܸܐ ܤܪܝܼܩ ܐܵܦ ܡ̣ܢ ܦܹܐܪܹ̈ܐ
                ܬܡܝܼ̈ܗܹܐ ܘܒܼܘܼ̈ܤܵܡܹܐ ܪܵܘܪ̈ܒܹܐ ܕܡܸܢܹܗ ܥܬܼܝܼܕܼ ܠܡܸܩܛܲܦ. ܘܐܲܝܢܵܐ
                ܕܗܵܕܹܐ ܒܲܤܝܵܐ ܠܹܗ: ܬܟܼܝܼܠܵܐܝܼܬܼ ܐܝܼܬܼ ܠܝܼ ܕܐܹܡܲܪ: ܟܲܕܼ ܠܵܐ ܡܟܲܕܸܒܼ
                ܐ̄ܢܵܐ: ܕܐܵܦܠܵܐ ܝܵܕܲܥ̇ ܕܡܸܛܠ ܡ̇ܢ ܗܵܢܵܐ ܥܲܡܠܵܐ ܟ̱ܠܹܗ:
                ܘܒܸܛܠܵܢܵܐ ܕܡ̣ܢ ܫܸܢܬܼܵܐ: ܘܬܸܢܝܵܐ ܤܲܓܿܝܼܐܵܐ: ܘܠܹܐܘܬܼܵܐ ܕܠܸܫܵܢܵܐ:
                ܘܩܵܘܡܵܐ ܕܥܲܠ ܪܸ̈ܓܼܠܵܘܗܝ ܕܟܼܠܹܗ ܠܸܠܝܵܐ: ܒܕܼܵܐܦ ܠܵܐ ܗܵܘܢܹܗ
                ܬܲܡܵܢ ܐܝܼܬܼܵܘܗܝ ܐܲܝܟܵܐ ܕܲܡܙܲܡܲܪ ܘܲܡܨܲܠܸܐ. ܐܸܠܵܬ ܒܲܥܝܵܕܼܵܐ ܐܲܚܝܼܕܼ:
                ܘܐܲܝܟܼ ܕܲܒܼܡܸܕܸܡ ܕܠܵܐ ܦܘܼܪܫܵܢ. ܘܐܸܠܘܼ ܠܵܐ ܕܗܵܟܲܢ ܐܝܼܬܹܝܗ̇ ܐܲܝܟܼ
                ܕܐܵܡܲ݁ܪܢܵܐ: ܐܲܝܟܲܢ ܡܚܲܡܤܸܢ ܗ̄ܘ̣ܵܐ ܕܢܸܬܼܓܠܸܙ ܘܲܢܦܘܼܫ ܡ̣ܢ ܕܲܠܡܸܨܲܕܼ
                ܡ̣ܢ ܪܸܥܝܵܢܹܗ ܬܟܝܼܒܼܵܐ ܕܥܲܡܠܹܗ ܦܹܐܪܹ̈ܐ ܡܝܲܬܿܪܹ̈ܐ؟ ܐܸܠܵܐ ܚܠܵܦ
                ܗܵܠܹܝܢ ܥܵܡܹ̇ܠ ܗ̄ܘ̣ܵܐ: ܒܥܸܢܝܵܢܵܐ ܩܲܕܝܼܫܵܐ ܕܩܸܪܝܵܢܵܐ ܕܲܟܼܬܼܵܒܹ̈ܐ: ܗܵܘ̇
                ܕܲܡܚܲܠܵܢܵܐ ܗ̄ܘ̣ ܕܗܵܘܢܵܐ: ܘܝܲܬܿܝܼܪܵܐܝܼܬܼ ܐܝܼܬܼܵܘܗܝ ܫܸܩܝܵܐ ܠܲܨܠܘܿܬܼܵܐ:
                ܘܲܡܥܲܕܼܪܵܢܵܐ ܕܫܲܗܪܵܐ ܘܒܲܪ ܢܝܼܪܹܗ: ܘܢܘܼܗܪܵܐ ܕܐܲܪܥܝܼܬܼܵܐ: ܘܫܲܒܵܠܵܐ
                ܕܐܘܼܪܚܵܐ: ܘܙܵܪܘܿܥܵܐ ܕܲܡܠܘܿܐܵܐ ܕܬܹܐܘܿܪܝܼܵܐ ܒܲܨܠܘܿܬܼܵܐ. ܘܐܵܤܲ݁ܪ ܠܵܗ̇
                ܠܬܲܪܥܝܼܬܼܵܐ ܡ̣ܢ ܕܬܸܦܗܸܐ: ܘܲܠܡܹܐܙܲܠ ܠܡܸܪܥܵܠ ܒܲܤܪ̈ܝܼܩܵܬܼܵܐ.
                ܘܙܵܪܲܥ ܒܢܲܦܫܵܐ ܐܲܡܝܼܢܘܼܬܼ ܥܘܼܗܕܵܢܵܐ ܕܐܲܠܵܗܵܐ: ܘܐܘܼܪ̈ܚܵܬܼܵܐ ܕܩܲܕܝܼ̈ܫܹܐ
                ܕܲܫܦܲܪܘ ܠܹܗ. ܘܲܠܗܵܘܢܵܐ: ܡܲܩܢܸܐ ܠܹܗ ܚܸܟܼܡܬܼܵܐ ܘܩܲܛܝܼܢܘܼܬܼܵܐ܀
                	ܡܸܛܠ ܡܵܢܵܐ ܗܵܟܹܝܠ: ܐܘܿ ܒܲܪܢܵܫܵܐ ܚܦܝܼܛܵܐ: ܗܵܟܲܢ ܠܵܐ
                
                 136 
                
                ܦܵܪܘܿܫܵܐܝܼܬܼ ܡܕܲܒܲܪ ܐܲܢ̄ܬܿ ܨܸܒܼ̈ܘܵܬܼܵܟܼ؟ ܡܚܵܘܸܐ ܐܲܢ̄ܬܿ ܓܹܝܪ ܥܲܠ
                ܢܲܦܫܵܟܼ ܒܛܝܼܠܘܼܬܼܵܐ ܕܐܲܝܟܼ ܗܵܕܹܐ: ܕܠܸܠܝܵܐ ܟ̱ܠܹܗ ܩܵܐܹܡ ܐܲܢ̄ܬܿ ܥܲܠ
                ܪܸ̈ܓܼܠܲܝܟ: ܘܡܲܥܡܸܠ ܐܲܢ̄ܬܿܝܵܬܼܵܟܼ ܒܬܸܫ̈ܒܿܚܬܼܵܐ ܘܲܒܼܡܲܙܡܘܿܪܹ̈ܐ ܘܲܨ̈ܠܵܘܵܬܼܵܐ.
                ܙܥܘܿܪܝܵܐ ܥܠܲܝܟ ܗܵܕܹܐ ܕܒܲܢܛܘܼܪܬܵܐ ܩܲܠܝܼܠ ܕܒܼܐܝܼܡܵܡܵܐ ܬܸܫܬܿܘܸܐ
                ܠܛܲܝܒܿܘܼܬܼܵܐ ܕܡ̣ܢ ܐܲܠܵܗܵܐ: ܡܸܛܠ ܠܹܐܘܬܼܵܟܼ ܕܲܒܼܫܲܪܟܵܐ: ܠܡܵܢܵܐ
                ܡܲܥܡܸܠ ܐܲܢ̄ܬܿ ܢܲܦܫܵܟܼ ܘܙܵܪܲܥ ܐܲܢ̄ܬܿ ܒܠܸܠܝܵܐ: ܘܲܡܦܲܪܲܚ ܐܲܢ̄ܬܿ
                ܠܥܲܡ̈ܠܲܝܟ ܒܐܝܼܡܵܡܵܐ: ܘܗܵܘܹ̇ܐ ܐܲܢ̄ܬܿ ܕܠܵܐ ܦܹܐܪ̈ܝܼܟ؟ ܘܲܡܦܲܠܗܸܕܼ
                ܐܲܢ̄ܬܿ ܠܗܵܝ̇ ܥܝܼܪܘܼܬܼܵܐ ܘܚܲܡܝܼܡܘܼܬܼܵܐ ܕܲܒܼܫܲܗܪܵܐ ܩܵܢܹ̇ܐ ܐܲܢ̄ܬܿ: ܒܥܸܢܝܵܢܹ̈ܐ
                ܫܓܼܝܼ̈ܫܹܐ ܕܐ̄ܢܵܫܵܐ ܘܲܥ̇ܒܼܵܕܼܵܐ ܕܲܡܫܵܟܼܵܐ: ܘܡܵܘܒܸܿܕܼ ܐܲܢ̄ܬܿ ܠܝܘܼܬܼܪܵܢܵܟܼ:
                ܒܦܘܼܠܗܵܕܼܵܐ ܕܲܒܼܠܵܐ ܡܸܕܸܡ. ܐܸܠܘܼ ܠܗܸܪܓܵܟܼ ܕܠܸܠܝܵܐ ܐܘܿ ܒܲܪܢܵܫܵܐ
                ܡܲܩܸܦ ܗ̣̄ܘܲܝܬܿ ܠܦܘܼܠܚܵܢܵܐ ܕܐܝܼܡܵܡܵܐ: ܘܚܲܡܝܼܡܘܼܬܼܵܐ ܗܵܝ̇ ܕܥܸܢܝܵܢܹ̈ܐ
                ܕܠܸܒܵܐ: ܦܤܵܩܵܐ ܒܲܡܨܲܥܬܼܵܐ ܠܵܐ ܥܵܒܹ̇ܕܼ ܗ̣̄ܘܲܝܬܿ: ܒܩܲܠܝܼܠ ܙܲܒܼܢܵܐ
                ܠܚܲܕܹܝܗ ܕܝܼܫܘܿܥ ܡܥܲܦܸܩ ܗ̣̄ܘܲܝܬܿ. ܐܸܠܵܐ ܡ̣ܢ ܗܵܕܹܐ ܝܑܼܕܲܝܼܥ ܐܲܢ̄ܬܿ:
                ܕܲܒܼܠܵܐ ܦܵܪܘܿܫܘܼܬܼܵܐ ܟܪܝܼܗ ܐܲܢ̄ܬܿ. ܘܠܵܐ ܬܘܼܒܼ ܪܓܼܝܼܫ ܐܲܢ̄ܬܿ:
                ܕܡܸܛܠܡܵܢܵܐ ܡܬܼܒܿܥܸܐ ܫܲܗܪܵܐ ܠܥܲܢܘܵܝܹ̈ܐ. ܡܲܤܒܲܪ ܐܲܢ̄ܬܿ ܗܵܟܹܝܠ
                ܕܡܸܛܠ ܠܹܐܘܬܼܵܐ ܒܲܠܚܘܿܕܼ: ܘܠܵܐ ܡܸܛܠ ܡܸܕܸܡ ܐ̄ܚܪܹܝܢ ܕܚܵܝܪܝܼܢ
                ܕܡܸܬܼܝܼܠܸܕܼ ܡܸܢܹܗ. ܐܲܝܢܵܐ ܗܵܟܹܝܠ ܕܲܒܼܨܝܼܪ ܩܲܠܝܼܠ ܐܲܫܘܝܵܬܹܗ ܛܲܝܒܿܘܼܬܼܵܐ:
                ܘܝܼܕܲܥ̣ ܡܸܛܠ ܐܲܝܢܵܐ ܤܲܒܼܪܵܐ ܡܥܲܙܹܝܢ ܚܲܟܝܼ̈ܡܹܐ ܠܘܼܩܒܲܠ ܫܸܢܬܼܵܐ:
                ܘܗܵܢܵܐ ܟ̱ܠܹܗ ܥܵܨܹ̇ܝܢ ܠܹܗ ܠܲܟܼܝܵܢܵܐ: ܕܟܲܕܼ ܥܝܼܪܝܼܢ ܒܦܲܚܼܪ̱ܗܘܿܢ
                ܘܲܒܼܚܘܼܫܵܒܲܝ̈ܗܘܿܢ ܢܩܲܪܒܼܘܼܢ ܨܠܵܘ̈ܵܬܼܵܐ ܠܸܠܝܵܐ ܟܠܹܗ: ܝܵܕܲܥ ܗ̄ܘܑ̣ܵܐ
                ܘܐܵܦ ܠܚܲܝܠܵܐ ܕܡ̣ܢ ܢܛܘܼܪܬܵܐ ܕܒܼܐܝܼܡܵܡܵܐ. ܘܕܲܐܝܢܵܐ ܥܘܼܕܼܪܵܢܵܐ
                ܝܵܗ̇ܒܵܐ ܠܪܸܥܝܵܢܵܐ ܒܗܵܘ̇ ܨܸܕܝܹܗ ܕܠܸܠܝܵܐ ܒܓܼܵܘ ܫܲܗܪܹܗ ܗܵܘ̇ ܕܦܘܼܪܫܵܢܵܐ:
                
                 137 
                
                ܘܕܲܐܝܕܵܐ ܡܫܲܠܛܘܼܬܼܵܐ ܕܠܵܐ ܚܘܼ̈ܫܵܒܹܐ ܘܲܙܗܝܼܪܘܼܬܼܵܐ ܘܲܟܼܢܝܼܫܘܼܬܼܵܐ
                ܕܗܵܘܢܵܐ ܡܲܩܢܝܵܐ ܠܹܗ: ܕܠܵܐ ܥܸܨܝܵܢܵܐ ܘܬܲܟܼܬܘܼܫܵܐ: ܚܹܐܪܵܐܝܼܬܼ ܐܲܨܸܕܼ.
                ܥܲܪܥܝܼܬܼܵܐ ܒܪܲܒܿܘܼܬܼܗܹܝܢ ܕܡܸܠܹ̈ܐ. ܐܸܢܵܐ ܕܹܝܢ ܐܵܦ ܗܵܕܹܐ ܐܵܡܲ݁ܪܢܵܐ:
                ܕܐܵܦܸܢ ܦܲܓܼܪܵܐ ܢܸܓܼܕܲܫ ܠܹܗ ܕܲܢܦܘܼܫ ܡܸܛܠ ܡܚܝܼܠܘܼܬܼܵܐ ܡ̣ܢ
                ܥܲܡܠܹܗ ܕܨܵܘܡܵܐ: ܘܡܸܛܠ ܢܵܚܘܿܒܼܘܼܬܹܗ ܤܲܓܝܼܐܬܼܵܐ: ܡܸܫܟܲܚ ܗ̣̄ܘ
                ܓܹܝܪ ܫܲܗܪܵܐ ܒܲܠܚܘܿܕܼܵܝܘܼܬܼ ܥܲܡܠܹܗ ܡܲܩܢܸܐ ܠܗܵܘܢܵܐ ܬܲܩܢܘܼܬܼܵܐ
                ܕܒܲܨܠܘܿܬܼܵܐ: ܘܲܠܠܸܒܵܐ ܠܡܸܬܲܠ ܒܘܼܝܵܢܵܐ ܠܡܸܕܲܥ ܚܲܝ̈ܠܹܐ ܪ̈ܘܼܚܵܢܹܐ.
                ܒܲܠܚܘܿܕܼ ܐܸܢ ܒܠܝܼܠܘܼܬܼܵܐ ܥܠܵܘܗܝ ܠܵܐ ܥܵܐ̇ܠܵܐ: ܡ̣ܢ ܫܲܪܝܘܼܬܼܵܐ
                ܕܥܸܠ̈ܠܵܬܼܵܐ ܕܒܼܐܝܼܡܵܡܵܐ.
                	ܒܲܕܼܓܼܘܿܢ ܡܦܝܼܣ ܐ̄ܢܵܐ ܠܵܟܼ ܦܵܪܘܿܫܵܐ ܕܲܪܓܼܝܼܓܼ ܠܡܸܩܢܵܐ ܥܝܼܪܘܼܬܼܵܐ
                ܕܗܵܘܢܵܐ ܕܒܲܐܠܵܗܵܐ ܘܝܼܕܵܥܬܼܵܐ ܕܚܲܝܹ̈ܐ ܚܲܕܼ̈ܬܹܐ: ܕܲܒܼܟܼܠܗܘܿܢ ܚܲܝܲܝ̈ܟ
                ܠܵܐ ܬܸܒܼܤܸܐ ܒܕܼܘܼܒܵܪܵܐ ܗܵܢܵܐ ܕܫܲܗܪܵܐ: ܕܡܸܢܹܗ ܡܸܬܼܦܲܬܼ̈ܚܵܢ ܥܲܝܢܲܝ̈ܟ
                ܠܡܸܚܙܵܐ ܠܟܼܠܹܗ ܫܘܼܒܼܚܵܐ ܕܕܼܘܼܒܵܪܵܐ: ܘܚܝܠܵܐ ܕܐܘܼܪܚܵܐ ܕܙܲܕܝܼܩܘܼܬܼܵܐ.
                ܘܐܸܢ ܐܝܼܬܼ ܐܸܡܲܬܼܝ ܬܘܼܒܼ: ܕܚܵܣ: ܢܸܓܼܕܲܫ ܕܚܘܼܫܵܒܼܵܐ ܕܪܲܦܝܘܼܬܼܵܐ
                ܢܲܩܸܢ ܒܵܟܼ: ܐܲܝܟܼ ܕܡ̣ܢ ܢܸܤܝܵܢܵܐ: ܕܲܡܥܲܕܼܪܵܢܵܟܼ ܗܵܘ̇ ܕܲܡܥܵܕܼ ܡܕܲܪܸܫ
                ܘܲܡܚܲܟܸܿܡ ܠܵܟܼ ܒܫܘܼ̈ܚܠܵܦܹܐ ܕܐܲܝܟܼ ܗܵܠܹܝܢ: ܒܩܲܪܝܼܪܘܼܬܼܵܐ ܘܐܵܦ
                ܒܪܸܬܼܚܵܐ: ܐܵܘ ܕܡ̣ܢ ܓܸܕܼܫܹ̈ܐ ܘܥܸܠܵܠܵܬܼܵܐ: ܐܵܘ ܡܸܛܠ ܕܲܟܼܪܝܼܗ ܐܵܘ
                ܬܵܚܘܿܒܼ ܓܘܼܫܡܵܟܼ: ܘܡܸܛܬܹܗ ܬܹܐܬܸܐ ܥܕܲܡܵܐ ܠܗܵܕܹܐ: ܕܒܲܕܼܠܵܐ
                ܨܵܒܹ̇ܐ ܐܲܢ̄ܬܿ ܕܬܲܠܐܹܝܘܗܝ ܠܦܲܓܼܪܵܐ: ܡܲܗܡܸܬ ܐܲܢ̄ܬܿ ܠܡܸܕܼܡܲܟܼ ܡ̣ܢ
                ܪܲܡܫܵܐ: ܒܵܥܹ̇ܐ ܐ̄ܢܵܐ ܡܸܢܵܟܼ ܒܚܘܼܒܵܐ: ܕܐܵܦܸܢ ܬܦܘܼܫ ܡ̣ܢ ܗܵܝ̇
                ܟ̱ܠܵܗ̇ ܬܟܼܝܼܒܼܘܼܬܼܵܐ ܕܙܘܼܡܵܪܵܐ ܘܥܲܡܠܹ̈ܐ ܕܬܸܫܡܸܫܬܼܵܐ: ܘܲܒܼܪ̈ܵܟܹܐ ܤܲܓܝܼ̈ܠܐܹܐ
                
                 138 
                
                ܕܒܲܨܠܘܿܬܼܵܐ ܐܲܝܟܼ ܥܝܵܕܼܵܐ: ܡܸܬܲܒܼ ܬܸܒܼ ܠܵܟܼ ܒܲܠܚܘܿܕܼ ܐܸܢ ܠܲܓܼܡܵܪ
                ܐܝܼܬܼ ܤܵܦܩܘܼܬܼܵܐ: ܐܵܡܲ݁ܪܢܵܐ: ܟܲܕܼ ܥܝܼܪ ܐܲܢ̄ܬܿ: ܘܠܵܐ ܬܸܙܡܲܪ ܘܠܵܐ
                ܬܸܤܓܿܘܿܕܼ. ܘܐܸܢ ܡܨܸܐ ܐܲܢ̄ܬܿ: ܒܠܸܒܵܟܼ ܨܲܠܵܐ ܒܲܠܚܘܿܕܼ. ܘܡܸܕܼܡܲܟܼ:
                ܠܵܐ ܬܸܕܼܡܲܟܼ. ܘܲܒܼܟܼܠ ܦܘܼܪ̈ܤܝܼܢ ܠܸܠܝܵܐ ܐܲܥܒܲܪܲܝܗܝ ܟܲܕܼ ܝܲܬܿܝܼܒܼ
                ܐܲܢ̄ܬܿ: ܒܗܸܪܓܵܐ ܫܲܦܝܼܪܵܐ ܕܲܥܝܵܕܼܵܐ. ܘܒܲܠܚܘܿܕܼ ܠܠܸܒܵܟܼ: ܠܵܐ ܬܥܲܒܸܿܐ
                ܘܬܲܚܫܸܟܼ ܒܝܲܕܼ ܫܸܢܬܼܵܐ. ܘܬܼܘܼܒܼ ܗܵܝ̇ ܩܲܠܝܼܠܘܼܬܼܵܐ ܕܡ̣ܢ ܩܕܝܼܡ
                ܘܚܲܝܠܵܐ ܘܪܸܬܼܚܵܐ ܐܵܬܹ̇ܝܢ ܠܵܟܼ ܡ̣ܢ ܛܲܝܒܿܘܼܬܼܵܐ: ܘܚܵܕܹܐ ܐܲܢ̄ܬܿ ܘܪܵܘܹܙ:
                ܘܡܵܘܕܸܐ ܐܲܢ̄ܬܿ ܠܐܲܠܵܗܵܐ. ܝܘܼܩܪܵܐ ܓܹܝܪ ܘܩܲܠܝܼܠܘܼܬܼܵܐ ܕܐܲܝܟܼ ܗܵܕܹܐ:
                ܐܲܝܟܼ ܕܲܠܒܼܘܼܚܪܵܢܵܐ ܡܸܫܬܲܒܼܩܝܼܢ ܥܲܠ ܒܲܪܢܵܫܵܐ.
                	ܐܸܢܕܹܝܢ ܐܲܙܝܼܥ ܐ̄ܢܵܫ ܝܵܬܹܗ ܚܲܡܝܼܡܵܐܝܼܬܼ ܘܲܢ̣ܦܲܨ ܫ̣ܕܼܵܐ ܡܸܢܹܗ:
                ܘܲܥ̣ܨܵܐ ܩܲܠܝܼܠ ܢܲܦܫܹܗ: ܡܸܚܕܼܵܐ ܩܵܪܒܵܐ ܛܲܝܒܿܘܼܬܼܵܐ ܐܲܝܟܼ ܕܒܲܙܒܲܢ.
                ܘܐܵܬܹ̇ܐ ܠܹܗ ܚܲܝܠܵܐ ܐ̄ܚܪܹܢܵܐ: ܕܟܲܤ̈ܝܵܢ ܒܹܗ ܪܸܒܿܘܿ ܛܵܒܼ̈ܬܼܵܐ ܘܫܘܼ̈ܚܠܵܦܹܐ
                ܕܥܘܼܕܪܵܢܵܐ. ܘܬܼܵܡܲܗ ܘܡܸܬܿܕܲܡܲܪ ܒܲܪܢܵܫܵܐ: ܟܲܕܼ ܡܸܬܿܕܟܲܪ ܠܝܘܼܩܪܵܐ
                ܩܲܕܝܼܡܵܝܵܐ: ܘܲܠܩܲܠܝܼܠܘܼܬܼܵܐ ܘܚܲܠܵܐ ܕܗܵܝܕܹܝܟ: ܕܐܲܝܟܲܢ ܡܸܢܫܹܠܝ
                ܩܲܒܸܠ̣ ܫܘܼܚܠܵܦܵܐ ܕܐܲܝܟܼ ܗܵܢܵܐ. ܘܒܲܕܼܓܼܘܿܢ ܡܸܬܼܚܲܟܲܡ ܡ̣ܢ ܗܵܪܟܵܐ:
                ܕܐܵܦ ܒܙܲܒܼ̈ܢܹܐ ܐ̄ܚܪ̈ܵܢܹܐ ܟܲܕܼ ܢܹܐܬܸܐ ܗܵܘ̇ ܝܘܼܩܪܵܐ: ܡܸܫܬܵܘܕܲܥ ܠܹܗ.
                ܘܐܸܠܘܼ ܒܙܲܒܼܢܹ̈ܐ ܩܲܕܼܡܵܝ݂̈ܬ ܠܵܐ ܐܲܚܨܼܦ̣: ܠܗܵܕܹܐ ܝܑܼܕܲܥܬܼܵܐ ܠܵܐ ܩܵܢܹ̇ܐ
                ܗ̄ܘ̣ܵܐ܀ ܚܵܙܹ̇ܐ ܐܲܢ̄ܬܿ ܟܡܵܐ ܡܸܬܼܚܲܟܲܡ ܒܲܪܢܵܫܵܐ: ܡܵܐ ܕܩܲܠܝܼܠ ܡܥܝܼܪ
                ܢܲܦܫܹܗ ܘܲܡܥܲܙܸܐ ܒܙܲܒܼܢܵܐ ܕܲܩܪ̈ܵܒܹܐ: ܐܸܠܵܐ ܐܸܢ ܟܝܵܢܵܐ ܒܲܠܚܘܿܕܼ
                ܕܟܲܬܿܝܼܬܼܵܐܝܼܬܼ ܦܵܫ̣ ܠܹܗ ܘܠܵܘ ܩܪܵܒܼܵܐ ܗ̄ܘ̣: ܐܸܠܵܐ ܟܘܼܪܗܵܢܵܐ ܐܵܘ
                ܡܚܝܼܠܘܼܬܼܵܐ ܕܐܵܢܲܢܩܹܐ: ܕܲܠܡܸܬܼܟܲܬܵܫܘܼ ܠܩܘܼܒܼܠܹܗ ܠܵܐ ܡܵܘܬܲܪ.
                ܐܸܠܵܐ ܒܲܕܼܫܲܪܟܵܐ ܠܡܸܥܨܵܐ ܐ̄ܢܵܫ ܢܲܦܫܹܗ: ܒܟܼܠܡܸܕܸܡ ܡܸܬܼܥܲܕܲܪ.
                
                 139 
                
                ܫܸܠܝܵܐ ܐܲܡܝܼܢܵܐ ܥܲܡ ܩܸܪܝܵܢܵܐ: ܘܤܲܝܒܵܪܬܵܐ ܡܡܲܫܲܚܬܼܵܐ: ܦܫܝܼܩܵܐܝܼܬܼ
                ܡܙܝܼܥܝܼܢ ܒܪܸܥܝܵܢܵܐ ܬܲܗܪܵܐ ܕܥܲܠ ܨܸܒܼ̈ܘܵܬܼܵܐ: ܐܸܢ ܒܝܲܕܼ ܥܸܠ̈ܠܵܬܼܵܐ
                ܠܵܐ ܢܸܗܘܸܐ ܠܐܲܡܝܼܢܘܼܬܼ ܫܸܠܝܵܐ ܐܲܬܼܪܵܐ ܒܲܡܨܲܥܬܼܵܐ. ܤܘܼ̈ܟܵܠܹܐ ܕܡ̣ܢ
                ܥܲܡܠܹ̈ܐ ܡܸܬܿܬܿܙܝܼܥܝܼܢ ܒܫܸܠܝܵܐ: ܗܸܢܘܿܢ ܡ̣ܢ ܢܲܦܫܗܘܿܢ ܕܠܵܐ ܒܥܵܬܼܵܐ
                ܕܲܥܠܲܝܗܘܿܢ ܡܸܢܫܹܠܝ: ܥܵܒܼ̇ܕܝܼܢ ܠܗܵܠܹܝܢ ܬܲܪܬܹܝܢ ܥܲܝ̈ܢܹܐ ܘܲܙܢܵܐ
                ܕܡܲܥܡܘܿܕܼܝܵܬܼܵܐ: ܒܝܲܕܼ ܕܸܡ̈ܥܹܐ ܕܫܵܽܦ̈ܥܵܢ ܘܲܡܨܲܒ̈ܥܵܢ ܠܦܲܟܹ̈ܐ ܒܤܲܓܝܼܐܘܼܬܼܗܹܝܢ.
                ܐܸܡܲܬܼܝ ܕܹܝܢ: ܕܟܲܕܼ ܡܡܲܟܲܟܼ ܦܲܓܼܪܵܟܼ ܒܥܲܢܘܵܝܘܼܬܼܵܐ ܒܝܲܕܼ ܫܸܠܝܵܐ
                ܙܗܝܼܪܵܐ: ܬܸܪܓܲܫ ܒܦܲܓܼܪܵܟܼ ܚܲܪܝܼܦܘܼܬܼ ܚܲܫܵܐ ܬܟܼܝܼܒܼܵܐ ܕܙܵܢܝܘܼܬܼܵܐ:
                ܕܲܠܒܲܪ ܡ̣ܢ ܙܵܘܥܵܐ ܥܲܡܘܼܛܵܐ ܕܲܥܝܼܕܼܵܐ ܕܲܟܼܝܵܢܵܐ: ܕܲܥ ܕܲܒܼܪܵܡܘܼܬܼܵܐ
                ܐܸܬܼܢܲܤ̣ܝܼܬܿ ܒܬܲܪܥܝܼܬܼܵܟܼ. ܡܙܘܿܓܼ ܤܲܝܒܵܪܬܵܟܼ ܒܩܸܛܡܵܐ: ܘܲܕܼܒܼܘܿܩ
                ܟܲܪܤܵܟܼ ܠܥܲܦܪܵܐ: ܘܥܲܩܸܕܼ ܡܵܢܵܐ ܪܢܲܝܬܿ. ܘܕܲܥ ܫܘܼ̈ܚܠܵܦܹܐ ܕܲܟܼܝܵܢܵܟܼ:
                ܘܦܘܼܠܚܵܢܵܟܼ ܕܲܠܥܸܠ ܡ̣ܢ ܟܝܵܢܵܟܼ. ܕܲܠܡܵܐ ܢܸܬܼܪܲܚܲܡ ܥܠܲܝܟܼ ܐܲܠܵܗܵܐ:
                ܘܲܢܫܲܕܲܪ ܠܵܟܼ ܢܘܼܗܪܵܐ ܠܡܸܕܲܥ ܠܡܸܬܼܡܲܟܵܟܼܘܼ: ܕܠܵܐ ܬܹܐܪܲܒܼ
                ܒܝܼܫܬܵܟܼ. ܠܵܐ ܢܸܫܠܸܐ ܡ̣ܢ ܝܲܨܝܼܦܘܼܬܼܵܐ: ܥܕܲܡܵܐ ܕܬܸܕܼܢܲܚ ܒܠܸܒܲܢ
                ܬܝܵܒܼܘܼܬܼܵܐ: ܘܢܸܫܟܿܚܝܼܗ̇ ܠܡܲܟܿܝܼܟܼܘܼܬܼܵܐ: ܘܢܸܬܿܬܿܢܝܼܚ ܠܸܒܲܢ ܒܐܲܠܵܗܵܐ.