Isaac of Nineveh. “Discourse 19.” Based upon Digital Syriac Corpus. Last modified March 5, 2019. https://syriaccorpus.org/410.
    
        
            
                ܬܘܼܒܼ ܦܘܼܪ̈ܫܵܢܹܐ ܕܓܸܠܝܵܢܹ̈ܐ ܘܡܲܥܒܿܕܼܵܢ̈ܘܵܬܼܵܐ ܕܗܵܘ̈ܝܵܢ ܨܹܝܕܼ
                ܩܲܕܝ̈ܫܹܐ ܒܕܸܡ̈ܘܵܢ ܕܸܡ̈ܘܵܢ. ܝܛ.
            
            
                ܛܲܟܼܤܵܐ ܕܹܝܢ ܕܓܸܠܝܵܢܵܐ ܦܪܝܼܫܘܼ: ܡ̣ܢ ܗܵܝ̇ ܕܐ̄ܢܵܫ ܒܝܲܕܼ ܕܘܼܪܵܫܵܐ
                ܕܚܸܟܼܡܬܼܵܐ ܘܥܲܡܠܵܐ ܕܪܸܥܝܵܢܵܐ ܡܲܥܡܸܩ ܙܵܘܥܵܘ̈ܗܝ: ܠܘܵܬܼ
                ܤܘܼܟܵܠܵܐ ܡܸܕܸܡ ܘܲܒܼܥܵܬܼܵܐ ܘܬܹܐܘܿܪܝܼܵܐ ܕܥܲܠ ܨܒܼܘܼ: ܒܝܲܕܼ ܦܸܗܝܵܐ
                
                 155 
                
                ܕܡܲܕܥܵܐ ܕܲܥܠܲܝܗܹܝܢ. ܡܸܬܼܐܡܲܪ ܓܹܝܪ ܓܸܠܝܵܢܵܐ: ܫܸܬܼܩܵܐ ܕܡܲܕܥܵܐ.
                ܘܠܵܘ ܗ̤ܘ ܐ̄ܢܵܫ ܒܝܲܕܼ ܚܘܼܦܵܛܵܐ ܘܪܸܢܝܵܐ ܐ̄ܢܵܫܵܝܵܐ ܡܸܬܼܦܲܪܲܣ ܕܡܘܼܬܼܵܐ
                ܠܲܫܟܼܵܚܬܼܵܐ ܕܝܼܕܲܥܬܼܵܐ: ܐܸܠܵܐ ܒܡܲܥܒܕܼܵܢܘܼܬܼܵܐ ܪܘܼܚܵܢܵܝܬܼܵܐ ܗܵܘܹ̇ܐ. ܟܲܕܼ ܗ̤ܘ
                ܗܵܘ̇ ܕܗܵܘܹ̇ܐ ܠܘܵܬܹܗ ܓܸܠܝܵܢܵܐ: ܒܹܗ ܒܥܸܕܵܢܵܐ ܗܵܘ̇: ܒܡܸܕܸܡ ܚܘܼܫܵܒܼܵܐ
                ܢܲܦܫܵܢܵܝܵܐ ܘܒܲܐܝܠܹܝܢ ܕܲܩܕܼܵܡ ܪܸ̈ܓܼܫܹܐ ܠܵܐ ܡܲܪܓܸܫ. ܘܠܵܐ ܡܸܬܼܚܲܫܲܚ:
                ܐܵܦܠܵܐ ܡܦܵܣ. ܘܗܵܕܹܐ: ܠܵܘ ܡ̣ܢ ܪܸܥܝܵܢܲܢ ܐܵܡܪܝܼܢܲܢ: ܐܸܠܵܐ ܐܝܼܬܼ
                ܠܡܸܕܲܥ ܝܲܬܿܝܼܪ ܡ̣ܢ ܟܬܼܵܒܹ̈ܐ ܕܲܢܒܼܝܹ̈ܐ: ܕܲܒܼܕܵܢܹ̈ܐ ܕܗܵܘܹ̇ܝܢ ܗ̄ܘ̣ܵܘ
                ܠܘܵܬܼܗܘܿܢ ܓܸܠܝܵܢܹ̈ܐ: ܒܗܵܝ̇ ܕܲܒܼܝܲܕܼ ܬܸܡܗܵܐ ܗܵܘܹ̇ܝܢ ܗ̄ܘ̣ܵܘ: ܒܗܘܿܢ
                ܒܥܸܕܵܢܹ̈ܐ ܗܵܢܘܿܢ ܡܸܕܸܡ ܡ̣ܢ ܗܵܠܹܝܢ ܕܲܥܝܵܕܼܵܐ ܘܲܚܫܲܚܬܼܵܐ ܕܚܘܼ̈ܫܵܒܹܐ
                ܨܸܒܼܝܵܢܵܝܹ̈ܐ: ܐܵܘ ܒܐܲܝܠܹܝܢ ܕܲܩܕܼܵܡ ܪܸ̈ܓܼܫܹܐ: ܠܲܝܬ ܗ̄ܘ̣ܵܐ ܠܗܘܿܢ. ܐܸܠܵܐ
                ܟ̱ܠܹܗ ܒܟܼܠܹܗ ܟܢܝܼܫ ܗ̄ܘ̣ܵܐ ܗܵܘܢܗܘܿܢ ܠܘܵܬܼ ܗܵܢܹܝܢ ܒܲܠܚܘܿܕܼ:
                ܕܲܒܼܓܸܠܝܵܢܵܐ ܡܸܬܼܚܲܙ̈ܝܵܢ ܗ̣̄ܘܲܝ̈ ܠܗܘܿܢ. ܘܐܲܝܟܼ ܗܵܝ̇ ܕܲܠܘܵܬܼ ܛܘܼܒܼܵܢܵܐ
                ܦܲܛܪܘܿܣ ܐܸܤܬܲܥܪܲܬ̤: ܟܲܕܼ ܟܦܸܢ ܘܲܤܠܸܩ̣ ܠܐܸܓܵܪܵܐ ܕܲܢܨܲܠܸܐ.
                ܡ̣ܢ ܕܲܗܘ̤ܵܐ ܥܠܵܘܗܝ ܓܸܠܝܵܢܵܐ ܗܵܘ̇: ܗܵܝܕܹܝܢ ܐܵܦܠܵܐ ܒܟܲܦܢܹܗ ܐܲܪܓܸܫ
                ܗ̄ܘ̣ܵܐ. ܐܸܠܵܐ ܕܐܵܦ ܥܘܼܗܕܵܢܵܐ ܕܤܲܝܒܵܪܬܵܐ: ܐܸܬܼܥܛܝܼ ܡ̣ܢ ܪܸܥܝܵܢܹܗ.
                ܒܕܲܗܘ̤ܵܐ ܒܬܸܡܗܵܐ: ܐܲܝܟܼ ܕܐܸܡ݂ܲܪ ܟܬܼܵܒܼܵܐ.
                	ܘܲܠܗܵܠܹܝܢ ܟܠܗܹܝܢ ܡ̣ܢ ܡܲܟܼܬܒܼܵܢܘܼܬܹܗ ܕܢܲܗܝܼܪܵܐ ܕܟܼܠܵܗ̇ ܬܹܒܹܝܠ
                ܛܘܼܒܼܵܢܵܐ ܬܹܐܵܕܘܿܪܘܿܣ ܐܲܦܸܤܩܘܿܦܵܐ ܦܘܼܪ̈ܵܫܲܝܗܹܝܢ ܫܲܦܝܼܪ ܐ̄ܢܵܫ ܡܨܸܐ
                ܕܢܹܐܠܲܦ. ܡܡܲܠܸܠ ܕܹܝܢ ܥܲܠ ܙܢܵܐ ܘܛܲܟܼܤܵܐ ܕܓܸܠܝܵܢܹ̈ܐ: ܝܲܬܿܝܼܪܵܐܝܼܬܼ
                ܒܗܵܠܹܝܢ ܟܬܼܵܒܹ̈ܐ. ܒܲܬܼܠܵܐ ܦܸܢܩ̈ܝܵܬܼܵܐ ܕܲܒܼܪܝܼܬܼܵܐ: ܘܲܒܼܬܲܪ̈ܬܹܝܢ ܕܐܝܼܘܿܒܼ:
                
                 156 
                
                ܘܒܲܐ̄ܚܪܵܝܬܼܵܐ ܕܲܬܼܪܸܥܤܲܪ: ܘܲܒܼܦܘܼܫܵܩܵܐ ܕܲܦܪܲܤܝܼܣ ܘܒܲܕܼܡܲܬܲܝ܀
                ܠܸܫܬܼܵܐ ܓܹܝܪ ܙܢܲܝ̈ܵܐ ܕܓܸܠܝܵܢܹ̈ܐ ܐܵܡܲ݁ܪ ܟܬܼܵܒܼܵܐ. ܚܲܕܼ: ܗܵܘ̇ ܕܲܒܼܪܸ̈ܓܼܫܹܐ.
                ܘܕܲܬܼܪܹܝܢ: ܒܚܸܙܘܵܐ ܢܲܦܫܵܢܵܝܐ. ܘܕܲܬܼܠܵܬܼܵܐ: ܒܝܲܕܼ ܚܛܘܼܦܝܵܐ ܪܸܗܝܵܢܵܝܐ.
                ܘܕܲܐܪܒܿܥܵܐ: ܒܛܲܟܼܤܵܐ ܕܢܒܼܝܼܘܼܬܼܵܐ. ܘܲܚܡܝܼܫܵܝܵܐ: ܒܲܙܢܵܐ ܡܸܕܸܡ
                ܡܸܤܬܲܟܿܠܵܢܵܐ. ܘܕܸܫܬܼܵܐ: ܐܲܝܟܼ ܕܲܒܼܚܸܠܡܵܐ. ܘܗܵܢܘܿܢ ܡܲܢ ܕܲܒܼܪܸ̈ܓܼܫܹܐ:
                ܠܲܬܼܪܹܝܢ ܦܘܼܪ̈ܫܵܢܝܼܢ ܡܸܬܼܦܲܠܓܼܝܼܢ. ܠܓܸܠܝܵܢܵܐ ܕܐܸܤܛܘܼ̈ܟܼܤܹܐ:
                ܘܠܲܐܝܠܹܝܢ ܕܒܸܠܥܵܕܼ ܗܝܼܘܼܠܹ̈ܐ ܗܵܘܹ̇ܝܢ. ܒܐܸܤܛܘܼ̈ܟܼܤܹܐ ܕܹܝܢ: ܐܲܝܟܼ
                ܗܵܘ̇ ܕܤܲܢܝܵܐ: ܘܒܲܥܢܵܢܵܐ: ܘܲܒܼܠܘܼ̈ܚܹܐ ܘܫܲܪܟܵܐ: ܕܐܸܬܼܚܙܝܼ ܐܵܦ ܠܥܲܡܵܐ.
                ܘܐܲܝܟܼ ܗܵܠܹܝܢ ܬܗܝܼܪ̈ܵܬܼܵܐ ܕܟܼܠܝܘܿܡ ܡܸܤܬܲܥܪܵܢ ܒܗܵܢܵܐ ܟܠ:
                ܘܕܲܒܼܝܲܕܼܸ ܓܸܠܝܵܢܹ̈ܐ ܡܲܕܼܪܟܼܝܼܢ ܩܲܕܝܼ̈ܫܹܐ ܥܸܠ̈ܠܵܬܼܗܹܝܢ ܘܡܵܢܵܝܘܼܬܼܗܹܝܢ:
                ܘܕܼܵܐܦ ܥ̇ܒܼܵܕܹ̈ܐ ܘܤܘܼܥܪ̈ܵܢܹܐ ܘܨܸܒܼ̈ܘܵܬܼܵܐ ܟܲܤ̈ܝܵܬܼܵܐ ܐܵܘ ܪ̈ܲܚܝܼܩܵܬܼܵܐ
                ܕܡܸܬܼܓܲܠ̈ܝܵܢ ܠܐ̄ܢܵܫܝܼ̈ܢ ܟܲܕܼ ܡܸܤܬܲܥܪ̈ܵܢ ܘܗܵܘ̈ܝܵܢ. ܒܸܠܥܵܕܼ ܗܝܼܘܼܠܹ̈ܐ
                ܕܹܝܢ: ܐܲܝܟܼ ܓܲܒܼܪܹ̈ܐ ܕܐܸܬܼܚܙܝܼܘ ܠܐܲܒܼܪܵܗܵܡ: ܘܤܸܒܠܬܼܵܐ ܕܝܲܥܩܘܿܒܼ:
                ܘܓܸܠܝܵܢܵܐ ܕܥܲܠ ܡܲܫܟܲܢ ܙܲܒܼܢܵܐ. ܚܙܝܼ ܠܲܡ ܘܲܥܒܸܕܼ ܒܲܕܼܡܘܼܬܼܵܐ ܗܵܝ̇
                ܕܐܸܬܼܚܲܙܝܲܬ̤ ܠܵܟܼ ܒܛܘܼܪܵܐ: ܥܲܡ ܫܲܪܟܵܐ ܕܐܲܝܟܼ ܗܵܠܹܝܢ. ܘܐܲܝܟܼ
                ܢܘܼܗܪܵܐ ܗܵܘ̇ ܐܲܠܵܗܝܵܐ ܘܪܵܡ ܙܸܠܓܹ̈ܐ ܕܐܲܒܼܪܸܩ̣ ܥܲܠ ܦܵܘܠܘܿܣ
                ܒܐܘܼܪܚܵܐ: ܘܲܠܥܲܝܢܵܘ̈ܗܝ ܤܲܡܝܼ. ܘܝܑܼܕܼܝܼܥܵܐ ܗ̣̄ܝ ܓܹܝܪ: ܕܐܵܦܸܢ ܓܸܠܝܵܢܵܐ
                ܗ̄ܘ̣ܵܐ ܡܸܬܼܚܲܙܝܵܢܵܐ ܗܵܢܵܐ ܘܲܒܼܪܸ̈ܓܼܫܹܐ ܡܸܬܼܩܲܒܲܠ ܗ̄ܘ̣ܵܐ: ܐܲܝܟܼ ܕܐܵܦ
                ܐܲܝܠܹܝܢ ܕܥܲܡܹܗ ܚܵܙܹ̇ܝܬ ܐܵܦ ܫܵܡܥܝܼܢ ܗ̄ܘ̣ܵܘ: ܐܸܠܵܐ ܠܵܘ ܓܸܠܝܵܢܵܐ
                ܗܘܼܠܵܢܵܝܵܐ ܗ̄ܘ̣ܵܐ: ܘܠܵܘ ܢܘܼܗܪܵܐ ܟܝܵܢܵܝܵܐ ܘܐܸܤܛܘܼܟܼܤܵܝܵܐ. ܐܲܝܟܼ ܕܐܵܦ
                ܛܘܼܒܼܵܢܵܐ ܡܦܲܫܩܵܢܵܐ: ܟܲܕܼ ܡܦܲܫܸܩ ܠܹܗ ܒܲܦܪܲܟܤܝܼܣ ܡܵܘܕܲܥ
                
                 157 
                
                ܒܦܘܼܫܵܩܹܗ ܕܫܲܪܒܵܐ ܐܲܝܟܵܐ ܕܐܵܡܲ݁ܪ: ܘܗܵܢܘܿܢ ܕܪܵܕܹܝܢ ܗ̄ܘ̣ܵܘ ܥܲܡ
                ܦܵܘܠܘܿܣ ܒܐܘܼܪܚܵܐ ܩܵܝ̇ܡܝܼܢ ܗ̄ܘ̣ܵܘ ܬܲܡܝܼ̈ܡܹܐ: ܟܲܕܼ ܫܵܡ̇ܥܝܼܢ ܩܵܠܵܐ:
                ܐ̄ܢܵܫ ܕܹܝܢ ܠܵܐ ܚܵܙܹ̇ܝܢ ܗ̄ܘ̣ܵܘ. ܘܲܡܦܲܫܸܩ: ܬܲܡܝܼ̈ܗܹܐ ܠܲܡ ܐܵܡܲ݁ܪ:
                ܗܵܢܵܘ ܕܹܝܢ: ܒܫܸܬܼܩܵܐ ܘܲܕܼܠܵܐ ܡܸܠܬܼܵܐ: ܒܦܘܼܪܬܵܟܼܵܐ ܐܵܦ ܗܸܢܘܿܢ
                ܐܸܬܿܬܿܚܸܕܼܘ. ܒܗܵܝ̇ ܕܲܪܓܸܫܬܼܵܐ ܕܩܵܠܵܐ ܕܲܗܘ̤ܵܐ ܠܘܵܬܹܗ ܢܵܤ̇ܒܿܝܼܢ ܗ̄ܘ̣ܵܘ:
                ܘܲܒܼܢܘܼܗܪܵܐ ܕܐܸܬܼܚܙܝܼ ܠܹܗ ܟܡܵܐ ܕܲܡܨܹܝܢ ܗ̄ܘ̣ܵܘ ܠܡܸܚܙܵܐ: ܚܵܙܹ̇ܝܢ
                ܗ̄ܘ̣ܵܘ. ܕܠܵܐ ܢܸܤܬܒܲܪ ܫܵܐܘܿܠ ܒܵܬܲܪܟܸܿܢ ܕܡܸܒܼܕܵܐ ܒܕܼܵܐ ܗܵܘ̇ ܡܵܐ
                ܕܲܗܘ̤ܵܐ ܘܲܠܘܵܬܹܗ ܐܸܤܥܬܲܪ: ܟܲܕܼ ܠܵܐ ܐ̄ܢܵܫ ܡ̣ܢ ܗܵܢܘܿܢ ܕܥܲܡܹܗ
                ܐܵܘ ܫܡܲܥ̣ ܐܵܘ ܚ̣ܙܵܐ. ܠܐ̄ܢܵܫ ܕܹܝܢ: ܠܵܐ ܚ̣ܙܵܘ. ܠܵܐ ܓܹܝܪ ܚܵܙܹ̇ܝܢ
                ܗ̄ܘ̣ܵܘ ܗܵܢܘܿܢ ܠܝܼܫܘܿܥ. ܡܸܛܠ ܕܐܲܝܟܼ ܕܐܸܡ̇ܪܹܬܼ: ܐܵܦܠܵܐ
                ܢܘܼܗܪܵܐ ܗ̄ܘ̣ܵܐ ܡܸܬܼܪܲܓܼܫܵܢܵܐ ܗܵܘ̇ ܕܐܸܬܼܚܙܝܼ. ܡܲܪܓܫܵܢܘܼܬܼܵܐ ܕܹܝܢ
                ܕܠܵܐ ܡܸܬܿܕܲܪܟܵܐ ܒܲܙܢܵܐ ܠܵܐ ܡܓܲܫܡܵܐ: ܒܝܲܕܼ ܡܲܥܒܿܕܼܵܢܘܼܬܼܵܐ ܐܲܠܵܗܵܝܬܼܵܐ
                ܗܘ̤ܵܬܼ ܠܘܵܬܹܗ: ܒܲܕܼܡܘܼܬܼ ܚܙܵܬܼܵܐ ܕܢܘܼܗܪܵܐ: ܐܲܝܟܼ ܕܢܸܤܒܲܪ ܕܲܫܡܲܝܵܐ
                ܐܸܬܦܬܲܚ̣ܘ: ܘܫܲܪܟܵܐ. ܗܵܠܹܝܢ ܓܸܠܝܵܢܹ̈ܐ ܐܸܢܘܿܢ ܕܲܒܼܪܸ̈ܓܼܫܹܐ ܕܦܲܓܼܪܵܐ
                ܗܵܘܹ̇ܝܢ ܗ̄ܘ̣ܵܘ: ܟܲܕܼ ܪܵܡܝܼܢ ܡ̣ܢ ܚܘܼܠܛܵܢܵܐ ܕܒܸܐܤܛܘܼ̈ܟܼܤܹܐ ܘܲܙ̈ܢܲܝܵܐ
                ܕܤܵܥܘܿܪ̈ܘܵܬܼܵܐ ܕܲܒܼܡܸܬܼܪ̈ܲܓܼܫܵܢܝܬܼܵܐ ܘܐ̄ܢܵܫܵܢܵܝ̈ܬܼܵܐ.
                	ܒܪܲܡ: ܠܵܐ ܡܫܵܘܬܸܦ ܬܸܡܗܵܐ ܕܗܵܘܢܵܐ ܠܲܡܩܲܒܿܠܵܢܲܝ̈ܗܘܿܢ: ܐܲܝܟܼ
                ܓܸܠܝܵܢܵܐ ܕܲܒܼܥܲܝ̈ܢܹܐ ܕܢܲܦܫܵܐ ܗܵܘܹ̇ܐ. ܒܚܸܙܘܵܐ ܕܹܝܢ ܢܲܦܫܵܢܵܐ: ܐܲܝܟܼ ܗܵܝ̇
                ܕܲܚܙܹ̇ܝܬܼ ܠܡܵܪܝܵܐ ܝܵܬܹ̇ܒܼ ܥܲܠ ܟܘܼܪܤܝܵܐ ܪܵܡܵܐ: ܘܲܤܪ̈ܵܦܹܐ ܕܸܫܬܼܵܐ
                ܫܬܼܵܐ ܓܸܦܲܝ̈݁ܗܘܿܢ ܚܕܼܵܪܵܘܗܝ. ܘܐܲܝܟܼ ܓܸܠܝܵܢܵܐ ܗܵܘ̇ ܕܚܲܙܩܝܼܐܹܝܠ:
                ܕܓܼܝܼ̈ܓܼܠܹܐ ܘܕܸܡ̈ܘܵܬܼܵܐ ܬܗܝܼܪ̈ܵܬܼܵܐ: ܘܩܵܠܵܐ ܕܡ̣ܢ ܓܵܘ ܓܝܼ̈ܓܼܠܹܐ
                ܒܲܕܼܡܘܼܬܼ ܩܵܠܵܐ ܕܕܼܵܡܹ̇ܐ ܠܲܕܼܝܲܡܵܐ: ܘܬܸܫ̈ܒܿܚܵܬܼܵܐ ܕܡܸܫܬܲܡ̈ܥܵܢ ܡ̣ܢ
                
                 158 
                
                ܟܪ̈ܘܿܒܹܐ ܗܵܢܘܿܢ ܤܲܓܝܼ̈ܐܲܝ ܥܲܝ̈ܢܹܐ ܕܐܵܡ̇ܪܝܼܢ: ܒܪܝܼܟܼܘܼ ܐܝܼܩܵܪܹܗ
                ܕܡܵܪܝܵܐ ܡ̣ܢ ܐܲܬܼܪܹܗ. ܕܲܟܼܡܵܗ. ܕܲܟܼܡܵܐ ܕܹܝܢ ܩܲܛܝܼܢܝܼܢ ܗܵܠܹܝܢ ܓܸܒܝܵܢܹ̈ܐ
                ܡ̣ܢ ܛܲܟܼܤܹ̈ܐ ܗܵܢܘܿܢ ܩܲܕܼܡܵܝܹ̈ܐ ܕܐܸܬܼܐܡܲܪܘ: ܝܑܼܕܼܝܼܥܵܐ ܠܢܲܗܝܼܪܹ̈ܐ. ܘܐܲܝܟܼ
                ܡܵܐܢܵܐ ܗܵܘ̇ ܕܐܸܬܼܚܙܝܼ ܠܦܲܛܪܘܿܣ ܘܚܲܝ̈ܘܵܬܼܵܐ ܕܒܹܗ: ܥܲܡ ܐ̄ܚܪ̈ܵܢܝܼܬܼܵܐ
                ܕܲܟܼܬܼܝܼ̈ܒܼܵܢ. ܘܐܲܝܢܵܐ ܕܒܼܵܥܹ̇ܐ: ܡܨܸܐ ܠܡܸܕܲܥ ܐܸܢܹܝܢ ܡ̣ܢ ܟܬܼܵܒܹ̈ܐ.
                ܒܲܚܛܘܼܦܝܵܐ ܕܹܝܢ ܪܸܥܝܵܢܵܝܵܐ: ܐܲܝܟܼ ܗܵܝ̇ ܕܐܸܬܼܚܛܸܦ ܠܲܡ ܥܕܲܡܵܐ
                ܠܬܼܘܼܠܬܼܵܐ ܕܲܡܫܲܝܵܐ: ܘܐܸܢ ܒܲܦܓܲܪ ܘܐܸܢ ܕܠܵܐ ܦܓܲܪ: ܠܵܐ ܝܵܕܲܥ̇ܢܵܐ.
                ܘܐܸܬܼܚܛܸܦ ܠܦܲܪܕܲܝܤܵܐ: ܘܲܡܫܲܥ̣ ܡܸܠܹ̈ܐ ܕܠܵܐ ܡܸܬܼܡܲܠ̈ܠܵܢ: ܐܲܝܠܹܝܢ
                ܕܠܵܐ ܫܲܠܝܼܛ ܠܹܗ ܠܒܲܪܢܵܫܵܐ ܠܲܡܡܲܠܵܠܘܼ ܐܸܢܹܝܢ܀ ܕܲܢܒܼܝܼܘܼܬܼܵܐ ܕܹܝܢ:
                ܐܲܝܟܼ ܗܵܢܹܝܢ ܕܲܗܘܲܝ̈ ܠܘܵܬܼ ܢܒܼܝܹ̈ܐ: ܕܩܲܕܼܸܡ̣ܘ ܡܲܠܸܠ̣ܘ ܥܲܠ ܥܬܼܝܼ̈ܕܼܵܬܼܵܐ
                ܕܡ̣ܢ ܩܕܼܵܡ ܕܵܕܹ̈ܐ ܤܲܓܿܝܼ̈ܐܹܐ. ܐܲܝܟܼ ܕܐܵܦ ܠܒܸܠܥܲܡ ܩܵܨܘܿܡܵܐ ܐܸܬܼܝܼܗܸܒܼ
                ܠܲܡܡܲܠܵܠܘܼ ܪܵܘܪ̈ܒܼܵܬܼܵܐ ܒܪܘܼܚܵܐ ܕܲܢܒܼܝܼܘܼܬܼܵܐ: ܐܲܝܠܹܝܢ ܕܥܵܠ̈ܒܵܡ
                ܒܤܲܓܝܼܐܘܼܬܼܗܹܝܢ ܐܵܦ ܡ̣ܢ ܕܲܢܒܼܝܹ̈ܐ ܐܸܬܼܢܲܒܿܝܼܘ܀
                	ܒܲܙܢܵܐ ܡ̇ܢ ܡܸܤܬܲܟܿܠܵܢܵܐ: ܐܲܝܟܼ ܗܵܠܹܝܢ ܕܛܘܼܒܼܵܢܵܐ ܦܵܘܠܘܿܣ
                ܐܵܡܲ݁ܪ: ܡܨܲܠܸܐ ܐ̄ܢܵܐ ܠܲܡ ܕܬܸܬܼܡܠܘܿܢ ܝܑܼܕܲܥܬܼܵܐ ܕܐܲܠܵܗܵܐ: ܒܟܼܠ
                ܚܸܟܼܡܵܐ ܘܲܒܼܟܼܠ ܤܘܼܟܵܠ ܕܪܘܼܚ. ܘܐܲܠܵܗܹܗ ܠܲܡ ܕܡܵܪܲܢܝܼܫܘܿܥ
                ܡܫܝܼܚܵܐ ܐܲܒܼܵܐ ܕܬܸܫܒܿܘܿܚܬܼܵܐ: ܢܸܬܸܠ ܠܟܼܘܿܢ ܪܘܼܚܵܐ ܕܟܸܟܼܡܬܼܵܐ ܘܲܕܼܓܸܠܝܵܢܵܐ
                ܒܝܼܕܲܥܬܹܗ: ܘܢܸܢܗܪ̈ܵܢ ܥܲܝ̈ܢܹܐ ܕܠܸܒܵܘ̈ܵܬܼܟܼܘܿܢ: ܕܬܸܕܿܘܼܢ ܡܵܢܵܘ
                ܤܲܒܼܪܵܐ ܕܩܸܪܝܵܢܹܗ: ܘܡܵܢܵܘ ܥܘܼܬܼܪܵܐ ܕܫܘܼܒܼܚܹܗ ܒܩܲܕܝ̈ܫܹܐ: ܘܡܵܢܲܐ
                ܗ̣̄ܝ ܝܲܬܝܼܪܘܼܬܼܵܐ ܪܪܲܒܿܘܼܬܼܵܐ ܕܚܲܝܠܹܗ: ܒܲܢ ܒܐܲܝܠܹܝܢ ܕܲܡܗܲܝܡܢܝܼܢܲܢ.
                ܘܫܲܪܟܵܐ ܗܵܢܹܝܢ ܕܠܹܗ ܠܲܫܠܝܼܚܵܐ ܐܸܬܼܝܸܗܸܒܼ: ܒܓܸܠܝܵܢܵܐ ܕܝܼܕܲܥܬܼܵܐ ܥܲܠ
                
                 159 
                
                ܗܵܢܹܝܢ ܕܥܵܠܡܵܐ ܕܲܬܬܼܝܼܕܼ: ܘܛܲܟܼܤܵܐ ܕܲܩܝܵܡܬܼܵܐ: ܘܫܘܼܚܠܵܦܵܐ
                ܕܦܲܓܼܪܹ̈ܐ ܐ̄ܢܵܫܵܝܹ̈ܐ: ܥܲܡ ܕܫܲܪܟܵܐ. ܘܥܲܠ ܛܲܟܼܤܵܐ ܬܘܼܒܼ ܕܤܘܼ̈ܟܵܠܹܐ
                ܪ̈ܵܡܹܐ: ܘܝܼܕܲܥܬܼܵܐ ܬܘܼܒܼ ܕܥܲܠ ܟܝܵܢܵܐ ܐܲܠܵܗܵܝܵܐ: ܐܲܝܟܼ ܗܵܝ̇ ܕܗܸܘܝܘܼ
                ܕܡܘܼܬܼܵܐ ܕܐܲܠܵܗܵܐ ܕܠܵܐ ܡܸܬܼܚܙܸܐ: ܘܒܼܐܝܼܕܹܗ ܠܲܡ ܥ̣ܒܲܕܼ ܐܸܢܘܿܢ
                ܠܥܵܠܡܹ̈ܐ. ܠܲܢ ܠܲܡ ܓܠ̣ܵܐ ܐܲܠܵܗܵܐ ܒܪܘܼܚܹܗ. ܘܬܼܘܼܒܼ: ܩܲܠܝܼܠ
                ܗ̄ܘ̣ ܡ̣ܢ ܤܲܓܝܼ ܝܵܕܼܥܝܼܢܲܢ: ܘܩܲܠܝܼܠ ܗ̄ܘ̣ ܡ̣ܢ ܤܲܓܝܼ ܤܸܡܬܲܟܿܠܝܼܢܲܢ.
                ܘܐܲܝܟܼ ܗܵܝ̇ ܕܲܒܼܪܵܫܝܼܬܼ ܐܝܼܬܼܵܘ̈ܗܝ ܗ̄ܘ̣ܵܐ ܡܸܠܬܼܵܐ: ܘܗܵܝ̇ ܕܐܲܢ̄ܬܿܘܼ
                ܡܫܝܼܚܵܐ ܒܪܹܗ ܕܐܲܠܵܗܵܐ ܚܲܝܵܐ: ܘܫܲܪܟܵܐ. ܘܐܲܝܟܼ ܗܵܝ̇ ܕܐ̄ܢܵܫ ܠܵܐ
                ܡܵܫ̣ ܕܝܼܢܵܘ̈ܗܝ: ܘܐܘܼܪ̈ܚܵܬܹܗ ܠܵܐ ܡܸܬܼܥܲܩ̈ܒܼܵܢ. ܘܗܵܘ̇ ܠܲܡ ܕܟܼܠ
                ܤܵܥܲܪ ܐܲܝܟܼ ܬܲܪܥܝܼܬܼܵܐ ܕܨܸܒܼܝܵܢܹܗ. ܘܗܵܝ̇ ܕܲܚܒܲܫ̣ ܐܲܠܵܗܵܐ ܐܟܼܠܢܵܫ
                ܒܠܵܐ ܡܸܬܿܛܦܝܼܤܵܢܘܼܬܼܵܐ: ܕܥܲܠ ܟܠܢܵܫ ܢܪ̈ܲܚܸܡ: ܘܫܲܪܟܵܐ. ܗܵܠܝܹܢ
                ܝܲܕ̈ܥܵܬܼܵܐ ܐܸܢܹܝܢ ܕܤܘܼ̈ܟܵܠܹܐ: ܕܲܒܼܝܲܕܼ ܪܘܼܚܵܐ ܥܲܠ ܟܝܵܢܵܐ ܐܲܠܵܗܵܝܵܐ ܐܸܬܼܝܼܗܸܒܼ
                ܠܗܘܿܢ ܠܡܸܕܲܥ ܘܲܠܡܸܤܬܲܟܵܠܘܼ܀ ܒܝܲܕܼ ܚܸܠܡܹ̈ܐ ܕܹܝܢ: ܐܲܝܟܼ ܗܵܝ̇
                ܕܲܠܘܵܬܼ ܐܲܒܼܝܲܡܠܟ ܘܝܵܘܤܸܦ ܘܦܸܪܥܘܿܢ ܘܲܢܒܼܘܼܟܲܕܼܢܵܨܲܪ. ܘܗܵܝ̇
                ܕܐܸܬܼܚܙܝܼ ܠܲܡ ܡܲܠܲܐܟܼܵܐ ܕܡܵܪܝܵܐ ܒܚܸܠܡܵܐ ܠܝܵܘܤܸܦ ܓܲܒܼܪܵܗ̇
                ܕܡܲܪܝܲܡ: ܘܫܲܪܟܵܐ܀
                	ܐܵܦ ܗܵܕܹܐ ܕܹܝܢ: ܐܵܠܨܵܐ ܠܡܸܕܲܥ. ܕܟܼܠ ܓܸܠܝܵܢܹ̈ܐ: ܐܲܝܠܹܝܢ
                ܕܲܠܝܘܼܠܦܵܢܵܐ ܕܲܒܼܢܲܝ̈ܢܵܫܵܐ ܘܝܼܕܲܥܬܼܵܐ ܕܥܲܠ ܨܸܒܼ̈ܘܵܬܼܵܐ ܥܒܲܕܼ ܐܲܠܵܗܵܐ:
                ܒܝܲܕܼ ܕܸܡ̈ܘܵܬܼܵܐ ܗܵܘܹ̇ܝܢ: ܝܲܬܝܼܪܵܐܝܼܬܼ ܠܘܵܬܼ ܦܫܝܼ̈ܛܲܝ ܒܝܼܕܲܥܬܼܵܐ
                ܘܲܒܼܨܝܼܪ̈ܲܝ ܤܘܼ̈ܟܵܠܹܐ ܕܲܫܪܵܪܵܐ. ܐܲܝܠܹܝܢ ܓܹܝܪ ܕܲܠܒܼܘܼܤܵܡܵܐ ܘܲܦܝܵܤܵܐ
                ܕܝܼܠܹܗ ܕܐ̄ܢܵܫ: ܘܒܼܘܼܝܵܐܵܐ ܡܸܕܸܡ ܘܲܦܝܵܤܵܐ ܕܲܠܘܵܬܼ ܩܢܘܿܡܵܐ ܝܑܼܚܝܼܕܼܵܝܵܐ:
                
                 160 
                
                ܒܠܵܐ ܕܸܡ̈ܘܵܬܼܵܐ: ܘܲܒܼܡܲܪܓܫܵܢܘܼܬܼܵܐ ܡܸܬܼܝܲܕܼܥܵܢܝܼܬܼܵܐ ܗܵܘܹ̇ܐ. ܘܲܠܗܵܕܹܐ
                ܢܲܗܝܼܪܵܐܝܼܬܼ ܡܚܵܘܸܐ ܛܘܼܒܼܵܢܵܐ ܡܦܲܫܩܵܢܵܐ: ܒܦܸܢܩܝܼܬܼܵܐ ܕܬܲܪܬܹܝܢ
                ܕܐܝܼܘܿܒܼ. ܚܙܝܼ ܓܹܝܪ ܕܲܟܼܡܵܐ ܪܵܘܪ̈ܒܼܵܢ ܗܵܠܹܝܢ ܕܲܒܼܓܸܠܝܵܐ ܕܝܼܕܲܥܬܼܵܐ
                ܘܤܘܼ̈ܟܵܠܹܐ: ܒܝܲܕܼ ܡܲܕܥܵܐ ܡܸܤܬܲܟܿܠܵܢܵܐ ܡܸܬܼܝܼܗܸܒܼ: ܘܲܟܼܡܵܐ ܪܵܡܝܼܢ
                ܐ̄ܪ̈ܵܙܹܐ ܗܵܠܹܝܢ ܕܠܝܼܕܲܥܬܼܵܐ ܕܟܼܠ ܕܥܲܠ ܐܲܠܵܗܵܐ: ܡ̣ܢ ܗܵܢܘܿܢ ܓܸܠܝܵܢܹ̈ܐ
                ܕܫܲܪܟܵܐ. ܗܵܕܹܐ: ܓܡܝܼܪܘܼܬܼܵܐ ܗ̣̄ܝ ܕܝܼܕܲܥܬܼܵܐ܀ ܘܬܼܘܼܒܼ ܐܵܦ ܗܵܕܹܐ
                ܙܵܕܹܩ ܠܡܸܕܲܥ: ܕܲܐ̄ܚܪܹܢܵܐ ܗ̄ܘ̣ ܓܸܠܝܵܢܵܐ ܘܡܲܥܒܿܕܼܵܢܘܼܬܼܵܐ: ܘܲܐ̄ܚܪܹܢܵܐ
                ܗ̄ܘ̣ ܫܪܵܪܵܐ ܘܝܼܕܲܥܬܼܵܐ. ܒܗܵܝ̇ ܕܠܸܠܝܵܢܵܐ: ܠܵܘ ܚܲܬܿܝܼܬܼܘܼܬܼܵܐ ܕܥܲܠ
                ܫܪܵܪܵܐ ܐܝܼܬܹܒܗ̇: ܐܸܠܵܐ ܠܦܘܼܬܼ ܚܲܝܠܵܐ ܐ̄ܢܵܫܵܝܵܐ ܪܸ̈ܡܙܹܐ ܘܐܸܬܼ̈ܘܵܬܼܵܐ
                ܡܸܕܸܡ ܡܚܵܘܸܐ. ܘܐܵܦ ܡܲܥ̈ܒܿܕܼܵܢܘܵܬܼܵܐ ܘܬܸܡ̈ܗܹܐ ܕܲܒܼܗܘܿܢ ܒܓܸܠܝܵܢܹ̈ܐ:
                ܠܵܘ ܝܑܼܕܲܥܬܼܵܐ ܘܲܫܪܵܪܵܐ ܡܸܬܼܐܡܲܪ. ܠܗܵܢܹܝܢ: ܡܲܓܿܢܵܢܘܼܬܼܵܐ ܕܡܲܥܒܿܕܼܵܢܘܼܬܼܵܐ
                ܩܵܪܹܝܢ. ܕܡܸܕܸܡ ܒܗܹܝܢ ܥܲܠ ܡܩܲܕܿܡܘܼܬܼ ܝܑܼܕܲܥܬܼܵܐ ܕܐܲܠܵܗܵܐ: ܐܵܘ
                ܥܲܠ ܠܵܐ ܡܸܬܿܕܲܪܟܵܢܘܼܬܼܵܐ ܕܲܟܼܝܵܢܹܗ: ܐܵܘ ܥܲܠ ܦܼܘܼܪ̈ܫܵܢܹܐ ܕܕܸܝ̈ܠܵܝܵܬܹܗ:
                ܐܵܘ ܤܘܼܟܵܠܵܐ ܕܐ̄ܪ̈ܵܙܲܝ ܨܸܒܼܝܵܢܹܗ ܕܲܠܘܵܬܼܸ  ܓܵܘܵܐ: ܘܫܲܪܟܵܐ ܐܲܝܠܹܝܢ
                ܕܒܼܝܼܕܲܥܬܼܵܐ ܚܠܝܼܡܬܼܵܐ ܥܠܵܘܗܝ ܐܝܼܬܼ ܠܡܲܕܼܪܵܟܼܘܼ: ܡ̣ܢ ܗܵܢܹܝܢ ܠܡܹܐܠܲܦ
                ܗܵܠܹܝܢ: ܠܝܬܹܝܗ̇. ܡܵܕܹܝܢ ܐ̄ܚܪ̈ܵܢܹܐ ܐܸܢܘܿܢ ܐ̄ܪ̈ܵܙܹܐ ܕܲܒܼܗܘܼܟܵܠܵܐ ܥܲܠ
                ܟܝܵܢܵܐ ܐܲܠܵܗܵܝܵܐ ܡܸܬܿܕܪܸܟܼ ܠܡܲܕܥܵܐ: ܘܲܐ̄ܚܪܹܬܼܵܐ ܗ̣̄ܝ ܡܲܥܒܿܕܼܵܢܘܼܬܼܵܐ
                ܡܸܕܸܡ ܕܥܲܠ ܗܵܘܢܵܐ ܡܲܓܿܝܵܐ ܒܲܡܠܸܐ ܙܒܲܢ. ܡܵܕܹܝܢ: ܠܵܘ ܟܠ
                ܕܓܸܠܝܵܢܵܐ ܠܘܵܬܹܗ ܗܵܘܹ̇ܐ: ܐܵܘ ܡܲܥܒܿܕܼܵܢܘܼܬܼܵܐ ܡܸܕܸܡ ܒܘܼܝܵܐܵܐ ܕܲܠܘܵܬܹܗ
                ܡܸܬܿܬܿܙܝܼܥ: ܡ̣ܢ ܟܠܦܪܘܿܣ ܐܵܦ ܠܲܫܪܵܪܵܐ ܘܲܠܚܲܬܝܼܬܼܘܼܬܼܵܐ ܕܝܼܕܲܥܬܼܵܐ
                
                 161 
                
                ܕܐܲܠܵܗܵܐ ܝܵܕܲܥ̇. ܤܲܓܝܼ̈ܐܹܐ ܕܹܝܢ ܗܘ̤ܵܘ ܕܗܵܢܹܝܢ ܨܹܐܕܲܝܗܘܿܢ ܗ̤ܘܲܝ̈: ܟܲܕ
                ܠܐܲܠܵܗܵܐ: ܐܲܝܟܼ ܫܲܒܼܪܹ̈ܐ ܝܵܕܼܥ̇ܝܼܢ ܗ̄ܘ̣ܵܘ.