Isaac of Nineveh. “Discourse 21.” Based upon Digital Syriac Corpus. Last modified March 5, 2019. https://syriaccorpus.org/412.
    
        
            
                ܥܲܠ ܗܵܠܹܝܢ ܕܒܲܨܠܘܿܬܼܵܐ ܗܵܘ̈ܝܵܢ ܒܓܼܵܘ ܫܸܠܝܵܐ. ܟܐ.
                
            
            
                ܡܲܢ̣ܘܼ ܝܲܕܼܥܹܗ ܠܲܤܝܵܡ ܒܘܼܪܟܵܐ ܗܵܘ̇ ܗܲܢܝܼܐܵܐ: ܕܲܒܼܫܸܠܝܵܐ ܕܠܸܫܵܢܵܐ
                ܡܫܲܒܲܚ ܠܸܒܵܐ ܫܲܠܝܵܐܝܼܬܼ ܬܸܫܒܿܘܿܚܬܵܐ ܡܸܕܸܡ: ܕܠܵܐ ܦܵܤܹ̇ܩ ܙܵܘܥܵܗ̇
                ܡ̣ܢ ܗܲܢܝܼܐܘܼܬܼܵܐ: ܟܲܕܼ ܦܲܓܼܪܵܐ ܒܲܪܝܼܟܼ ܥܲܠ ܒܘܼܪ̈ܟܹܐ ܘܲܫܠܸܐ؟ ܛܘܼܒܼܵܘܗܝ
                
                 163 
                
                ܠܡܲܢ ܕܐܵܟܹ̇ܠ ܡ̣ܢ ܗܵܠܹܝܢ ܐܲܡܝܸܢܵܐܝܼܬܼ! ܐܸܠܵܐ ܗ̤ܘܲܝ̈ ܕܨܸܒܼܝܵܢܵܐ:
                ܘܠܵܘ ܐܸܡܲܬܼܝ ܕܒܼܵܥܹ̇ܐ. ܗܵܢܵܘ ܒܘܼܤܵܡܵܐ ܡܢܵܬܼܵܢܵܝܵܐ ܕܡܸܬܼܝܸܗܸܒܼ ܠܒܼܘܼܝܵܐܵܐ:
                ܕܐܲܝܢܵܐ ܕܬܲܡܝܼܡܵܐܝܼܬܼ ܡܸܬܿܕܲܒܲܪ ܩܕܼܵܡ ܐܲܠܵܗܵܐ ܒܕܼܘܼܒܵܪܵܐ ܕܲܒܼܫܸܠܝܵܐ.
                ܐܸܢ ܕܹܝܢ ܒܟܼܠܵܗ̇ ܦܫܝܼܛܘܼܬܼܵܐ ܢܚܲܡܤܸܢ ܒܹܗ: ܟܲܕܼ ܝܵܨܹ̇ܦ ܕܕܲܟܼܝܘܼܬܼܵܐ
                ܕܦܘܼܠܚܵܢܹܗ: ܘܫܵܘܹ̇ܝܢ ܕܘܼܒܵܪܵܘܗܝ: ܒܵܬܲܪ ܙܲܒܼܢܵܐ ܡܸܫܬܿܘܸܐ: ܘܐܵܦ
                ܠܗܵܠܹܝܢ ܩܲܕܼ̈ܡܵܝܵܬܼܵܐ ܕܐܸܬܼܐܡܲܪ. ܠܐܲܝܠܹܝܢ ܕܹܝܢ ܕܫܲܪܘܵܚܑܝܼܢ ܒܕܼܘܼܒܵܪܵܐ
                ܘܲܬܼܪܝܼܨ ܢܝܼܫܗܘܿܢ: ܩܲܕܼܡܵܝܑܬܼ ܒܩܸܪܝܵܢܵܐ ܡܲܛܥܡܵܐ ܠܗܘܿܢ ܛܲܝܒܿܘܼܬܼܵܐ
                ܗܵܠܹܝܢ ܘܕܲܐܝܟܼ ܗܵܠܹܝܢ: ܘܲܡܩܲܪܒܼܵܐ ܠܚܫܵܒܲܝ̈ܗܘܿܢ ܡ̣ܢ ܪܸܢܝܵܐ
                ܕܐܲܪ̈ܥܵܢܵܝܵܬܐ ܠܘܵܬܼܵܗ̇. ܘܥܵܡ̇ܠܝܼܢ ܘܫܵܗܪܝܼܢ ܘܲܡܨܲܠܹܝܢ: ܘܠܵܐ ܠܵܐܹ̇ܝܢ.
                ܠܐܲܝܠܹܝܢ ܕܹܝܢ ܕܲܒܼܨܝܼܪ ܩܲܠܝܼܠ ܐܸܬܼܢܲܦܲܩܘ ܒܐ̄ܪ̈ܵܙܹܐ ܕܫܸܠܝܵܐ: ܠܘܵܬܼܗܘܿܢ
                ܗܵܘ̇ܝܵܐ ܡܲܪܓܿܫܵܢܘܼܬܼܵܐ ܕܒܲܨܠܘܿܬܼܵܐ ܘܲܒܼܬܸܫܡܸܫܬܼܵܐ.