Isaac of Nineveh. “Discourse 22.” Based upon Digital Syriac Corpus. Last modified March 5, 2019. https://syriaccorpus.org/413.
    
        
            
                ܥܲܠ ܦܘܼܪ̈ܫܵܢܹܐ ܤܲܓܼܝܼ̈ܐܹܐ ܕܒܲܨܠܘܿܬܼܵܐ: ܘܥܲܠ ܬܚܘܼ̈ܡܲܝ ܫܘܼܠܛܵܢܹܗ
                ܕܗܵܘܢܵܐ. ܘܲܥܕܲܡܵܐ ܠܐܲܝܟܵܐ ܐܝܼܬܼ ܫܘܼܠܛܵܢܵܐ ܠܲܡܙܵܥܘܼ ܠܙܵܘܥܵܘ̈ܗܝ
                ܨܸܒܼܝܵܢܵܝܹ̈ܐ ܒܫܘܼܚܠܵܦ ܐܸܤܟܹܡܹ̈ܐ ܕܲܨܠܘܿܬܼܵܐ: ܘܕܲܐܝܢܵܘ ܬܚܘܼܡܵܐ ܕܤܝܼܡ
                ܠܲܟܼܝܵܢܵܐ ܒܲܨܠܘܿܬܼܵܐ: ܕܲܥܕܲܡܵܐ ܠܬܲܡܵܢ ܫܲܠܝܼܛ ܠܹܗ ܕܲܢܨܲܠܸܐ. ܘܡܵܐ
                ܕܲܥ̣ܒܲܪ ܡ̣ܢ ܬܲܡܵܢ ܘܲܠܗܲܠ: ܠܲܝܬܹܝܗ̇ ܡܸܟܹܝܠ ܨܠܘܿܬܼܵܐ: ܐܵܦܸܢ
                ܒܫܸܡ ܨܠܘܿܬܼܵܐ ܡܸܬܼܐ̱ܡܲܪ ܗܵܘ̇ ܡܵܐ ܕܗܵܘܹ̇ܐ ܗܵܝܕܹܝܟ. ܟܒ.
            
            
                	ܫܘܼܒܼܚܵܐ ܠܗܵܘ̇ ܕܲܫܦܝܼܥܵܐ ܡܵܘܗܲܒܼܬܹܗ ܥܲܠ ܒܢܲܝ̈ܢܵܫܵܐ: ܕܟܲܕܼ
                ܒܸܤܪܵܢܹܐ ܐܸܢܘܿܢ: ܥ̣ܒܲܕܼ ܕܒܲܐܪܥܵܐ ܢܫܲܡܫܘܼܢ ܛܲܟܼܤܵܐ ܕܲܟܼܝܵܢܹ̈ܐ ܠܵܐ
                ܓܫܘܼ̈ܡܹܐ: ܘܐܲܫܘܝܼ ܠܲܟܼܝܵܢܵܐ ܕܥܲܦܪܵܢܹܐ ܕܲܢܡܲܠܠܘܼܢ ܥܲܠ ܐ̄ܪ̈ܵܙܹܐ
                
                 164 
                
                ܕܐܲܝܟܼ ܗܵܠܹܝܢ. ܝܲܬܝܼܪܵܐܝܼܬܼ: ܠܚܲܛܵܝܹ̈ܐ ܕܐܲܟܼܘܵܬܲܢ: ܐܲܝܠܹܝܢ ܕܠܵܐ ܫܵܘܹ̇ܝܢܲܢ
                ܐܵܦܠܵܐ ܕܢܸܫܡܲܥ ܡܲܡܠܠܵܐ ܕܥܲܠ ܨܸܒܼ̈ܘܵܬܼܵܐ ܕܐܲܝܟܼ ܗܵܠܹܝܢ. ܐܸܠܵܐ
                ܒܛܲܝܒܿܘܼܬܹܗ ܦܬܲܚ ܠܠܸܒܵܐ ܕܤܲܡܝܘܼܬܲܢ ܠܡܸܤܬܲܟܵܠܘܼ ܡ̣ܢ ܬܹܐܘܿܪܝܼܵܐ
                ܕܲܟܼܬܼܵܒܹ̈ܐ ܘܝܘܼܠܦܵܢܵܐ ܕܐܲܒܼܵܗ̈ܬܼܵܐ ܪܵܘܪ̈ܒܹܐ: ܐܵܦܸܢ ܠܵܐ ܐܸܫ̇ܬܘܝܼܬܼ ܕܡ̣ܢ
                ܚܦܝܼܛܘܼܬܼܵܐ ܕܲܩܢܘܿܡܝ ܐܸܤܲܒܼ ܢܸܤܝܵܢܵܐ ܕܲܚܕܼܵܐ ܡ̣ܢ ܐܵܠܹܦ ܡ̣ܢ
                ܐܲܝܠܹܝܢ ܕܒܼܐܝܼ̈ܕܲܝ ܡܸܬܼܟܲܬܼ̈ܒܵܢ: ܝܲܬܿܝܼܪܵܐܝܼܬܼ ܒܡܹܐܡܪܵܐ ܗܵܢܵܐ: ܕܐܲܡ̣ܪܲܚܢܲܢ
                ܐܲܝܟܼ ܕܲܠܢܘܼܗܵܪܵܐ ܘܓܘܼܪܵܓܼܵܐ ܕܢܲܦܫܲܢ ܘܕܲܐܝܠܹܝܢ ܕܦܵܓܼܥ̇ܝܼܢ ܒܹܗ.
                ܕܲܟܼܒܲܪ ܬܸܬܿܥܝܼܪ ܐܵܦܸܢ ܡ̣ܢ ܪܸܓܿܬܼܵܐ ܕܝܼܠܵܗ̇: ܠܘܵܬܼ ܥ̇ܒܼܵܕܼܵܐ ܠܡܸܩܪܲܒܼ.
                ܡܵܢܵܐ ܗܵܟܹܝܠ؟ ܐ̄ܚܪܹܬܼܵܐ ܗ̣̄ܝ ܗܲܢܝܼܐܝܼܬܼܵܐ ܕܲܨܠܘܿܬܼܵܐ: ܘܲܐ̄ܚܪܹܬܼܵܐ ܗ̣̄ܝ
                ܚܙܵܬܼܵܐ ܕܒܲܨܠܘܿܬܼܵܐ. ܡܝܲܬܿܪܵܐ ܕܹܝܢ ܕܬܲܪܬܹܝܢ ܡ̣ܢ ܩܲܕܼܡܵܝܬܼܵܐ: ܐܲܝܟܼ
                ܓܲܒܼܪܵܐ ܡܫܲܠܡܵܢܵܐ ܡ̣ܢ ܛܲܠܝܵܐ ܙܥܘܿܪܵܐ. ܐܝܼܬܼ ܐܸܡܲܬܼܝ ܕܗܸܢܘܿܢ
                ܦܸܬܼܓܼܵܡܹ̈ܐ ܢܸܬܼܚܲܠܘܿܢ ܒܦܘܼܡܵܐ: ܘܬܸܢܝܵܐ ܕܠܵܐ ܡܸܢܝܵܢ ܗܵܘܹ̇ܐ ܠܚܲܕܼ
                ܦܸܬܼܓܼܵܡܵܐ ܕܲܨܠܘܿܬܼܵܐ: ܟܲܕܼ ܠܡܸܫܒܲܩ ܘܲܠܡܸܥܒܲܪ ܠܲܐ̄ܚܪܹܢܵܐ ܤܲܒܼܥܵܐ
                ܠܵܐ ܝܵܕܲܥ̇. ܘܐܝܼܬܼ ܐܸܡܲܬܼܝ: ܕܡܸܢܵܗ̇ ܡ̣ܢ ܨܠܘܿܬܼܵܐ ܡܸܬܼܝܲܠܕܵܐ ܬܹܐܘܿܪܝܼܵܐ
                ܡܸܕܸܩ: ܘܐܵܦ ܠܵܗ̇ ܠܲܨܠܘܿܬܼܵܐ ܦܵܤ̇ܩܵܐ ܡ̣ܢ ܤܸܦ̈ܘܵܬܼܵܐ. ܘܗܵܘܹ̇ܐ
                ܗܵܘ̇ ܡܲܢ ܕܗ̤ܘ ܒܚܵܘܪܵܐ ܕܝܼܠܵܗ̇: ܐܲܝܟܼ ܫܠܲܕܵܐ ܕܠܵܐ ܢܲܦܫܵܐ ܒܬܸܡܗܵܐ.
                ܠܗܵܕܹܐ ܩܵܪܹܝܢܲܢ ܚܙܵܬܼܵܐ ܕܒܲܨܠܘܿܬܼܵܐ: ܘܠܵܘ ܕܡܘܼܬܼܵܐ ܡܸܕܸܡ ܐܵܘ
                ܐܸܤܟܹܡܵܐ ܕܡܸܬܿܬܿܨܝܼܪ: ܐܲܝܟܼ ܕܐܵܡ̇ܪܝܼܢ ܫܵܛܲܝ̈ܵܐ. ܘܐܵܦ ܒܵܗ̇ ܒܗܵܕܹܐ
                ܬܹܐܘܿܪܝܼܵܐ ܕܒܲܨܠܘܿܬܼܵܐ: ܡܘܼ̈ܫܚܵܬܼܵܐ ܐܝܼܬܼ: ܘܦܘܼܪ̈ܫܵܢܹܐ ܕܡܵܘ̈ܗܒܼܵܬܼܵܐ.
                ܐܸܠܵܐ ܘܲܥܕܲܡܵܐ ܠܗܵܪܟܵܐ ܥܕܲܟܹܝܠ: ܨܠܘܿܬܼܵܐ ܗ̣̄ܝ. ܠܵܐ ܓܹܝܪ ܥܒܲܪ
                ܚܘܼܫܵܒܼܵܐ ܥܕܲܟܹܝܠ ܠܗܵܝ̇ ܕܬܸܗܘܸܐ ܠܵܐ ܨܠܘܿܬܼܵܐ: ܟܲܕܼ ܡܝܲܬܿܪܵܐ
                
                 165 
                
                ܡܸܢܵܗ̇. ܒܗܵܝ̇ ܕܙܵܘ̈ܥܹܐ ܕܠܸܫܵܢܵܐ ܘܲܕܼܠܸܒܵܐ ܒܲܨܠܘܿܬܼܵܐ: ܩܠܝܼ̈ܕܹܐ ܐܢܘܿܢ.
                ܗܵܝ̇ ܡ̇ܢ ܕܒܼܵܬܲܪ ܗܵܠܹܝܢ: ܡܲܥܲܠܬܼܵܐ ܗ̣̄ܝ ܕܲܠܒܹܝܬܼ ܓܲܙܵܐ. ܢܸܫܠܘܿܢ
                ܡܵܕܹܝܢ ܗܵܪܟܵܐ ܟܠ ܦܘܼܡ̈ܝܼܢ ܘܠܸܫܵܢ̈ܝܼܢ: ܘܠܸܒܵܐ ܓܹܙܲܒܼܪܵܐ ܕܚܘܼ̈ܫܵܒܹܐ:
                ܘܗܵܘܢܵܐ ܡܕܲܒܿܪܵܢܵܐ ܕܪܸ̈ܓܼܫܹܐ: ܘܪܸܥܝܵܢܵܐ ܦܵܪܲܚܬܼܵܐ ܩܲܠܝܼܠܬܼܵܐ ܕܡܲܚܨܸܦ:
                ܘܟܼܠܗܘܿܢ ܦܘܼܪ̈ܤܹܐ ܘܚܘܼܫܵܚܵܐ ܕܲܒܼܗܘܿܢ: ܘܲܦܝܵܤܹ̈ܐ ܢܦܘܼܫܘܼܢ ܬܢܵܢ:
                ܕܡܵܪܹܐ ܒܲܝܬܼܵܐ ܐܸܬ̣ܼܵܐ ܠܹܗ.
                	ܐܲܝܟܲܢܵܐ ܓܹܝܪ ܕܟܼܠܹܗ ܚܲܝܠܵܐ ܕܢܵܡܘܿܤܹ̈ܐ ܘܦܘܼܩ̈ܕܵܢܹܐ
                ܕܐܸܬܿܬܿܤܝܼܡܘ ܡ̣ܢ ܐܲܠܵܗܵܐ ܠܲܒܼܢܲܝ̈ܢܵܫܵܐ: ܥܕܲܡܵܐ ܗ̄ܘ̣ ܠܕܲܟܼܝܘܼܬܼܵܐ
                ܕܠܸܒܵܐ ܐܝܼܬܼܵܘܗܝ ܬܚܘܼܡܵܐ ܐܲܝܟܼ ܡܸܠܲܬܼ ܐܲܒܼܵܗ̈ܬܼܵܐ: ܗܵܟܲܢܵܐ ܘܟܼܠܗܘܿܢ
                ܙܢܲܝ̈ܵܐ ܘܐܸܤܟܹܡܹ̈ܐ ܕܲܨܠܘܿܬܼܵܐ ܕܲܡܨܲܠܹܝܢ ܒܢܲܝ̈ܢܵܫܵܐ ܠܐܲܠܵܗܵܐ: ܥܕܲܡܵܐ
                ܠܲܨܠܘܿܬܼܵܐ ܕܟܼܝܼܬܼܵܐ ܐܝܼܬܼܵܘܗܝ ܬܚܘܼܡܵܐ. ܚܸܢ̈ܓܼܵܬܼܵܐ ܘܓܼܘܼܪ̈ܓܵܚܹܐ ܘܲܦܝܵܤܹ̈ܐ
                ܘܟܼܘܼ̈ܫܵܦܹܐ ܠܸܒܵܢܵܝܹ̈ܐ: ܘܕܸܡ̈ܥܹܐ ܚܲܝ̈ܠܝܵܬܼܵܐ ܘܟܼܠܗܘܿܢ ܐܸܤܟܹܡܹ̈ܐ ܐ̄ܚܪܵܢܹܐ
                ܕܐܝܼܬܼ ܒܲܨܠܘܿܬܼܵܐ ܐܲܝܟܼ ܕܐܸܡ̇ܪܹܬܼ: ܥܕܲܡܵܐ ܠܲܨܠܘܿܬܼܵܐ ܕܟܼܝܼܬܼܵܐ ܐܝܼܬܼܵܘܗܝ
                ܬܚܘܼܡܗܘܿܢ ܘܫܘܼܠܛܵܢܗܘܿܢ ܠܡܸܬܿܬܿܙܵܥܘܼ. ܡ̣ܢ ܕܲܟܼܝܘܼܬܼܵܐ ܕܹܝܢ
                ܕܲܨܠܘܿܬܼܵܐ ܘܲܠܓܼܵܘ: ܡܵܐ ܕܲܥܒܲܪ ܠܗܵܢܵܐ ܬܚܘܼܡܵܐ: ܠܲܝܬܿ ܠܹܗ
                ܠܪܸܥܝܵܢܵܐ: ܘܠܵܐ ܨܠܘܿܬܼܵܐ: ܘܠܵܐ ܙܵܘܥܹ̈ܐ: ܘܠܵܐ ܕܸܡ̈ܥܹܐ: ܘܠܵܐ
                ܫܘܼܠܛܵܢܵܐ: ܘܠܵܐ ܚܹܐܪܘܼܬܼܵܐ: ܘܠܵܐ ܦܝܵܤܹ̈ܐ: ܘܠܵܐ ܪܸܓܿܬܼܵܐ: ܘܠܵܐ
                ܝܘܼܐܵܒܼܵܐ ܕܚܲܕܼ ܡܸܕܸܡ: ܡ̣ܢ ܡܵܐ ܕܡܸܤܬܲܟܸܐ ܒܥܵܠܡܵܐ ܗܵܢܵܐ ܐܵܘ
                ܒܥܵܠܡܵܐ ܕܲܬܬܼܝܼܕܼ. ܡܸܛܠܗܵܢܵܐ ܡ̣ܢ ܒܵܬܲܪ ܨܠܘܿܬܼܵܐ ܕܟܼܝܼܬܼܵܐ: ܬܘܼܒܼ
                ܨܠܘܿܬܼܵܐ ܠܲܝܬܿ: ܘܟܼܠܗܘܿܢ ܙܵܘܥܹ̈ܝܗ̇ ܘܐܸܤܟܹܡܹ̈ܝܗ̇ ܥܕܲܡܵܐ ܠܗܵܪܟܵܐ
                ܡܝܲܒܿܠܝܼܢ ܠܪܸܥܝܵܢܵܐ ܒܫܘܼܠܛܵܢܵܐ ܕܚܹܐܪܘܼܬܼܗܘܿܢ. ܡܸܛܠܗܵܢܵܐ: ܐܵܦ
                
                 166 
                
                ܬܲܟܼܬܘܼܫܵܐ ܐܝܼܬܼ ܒܵܗ̇. ܒܵܬܲܪ ܗܵܢܵܐ ܕܹܝܢ ܬܚܘܼܡܵܐ: ܡܸܟܹܝܠ ܬܸܡܗܵܐ
                ܐܝܼܬܼܵܘܗܝ: ܘܠܵܘ ܨܠܘܿܬܼܵܐ. ܡܸܟܵܐ ܘܲܠܗܲܠ: ܡ̣ܢ ܨܠܘܿܬܼܵܐ ܦܵܫ̣.
                ܘܲܚܙܵܬܼܵܐ ܐܝܼܬܹܝܗ̇: ܘܠܵܘ ܡܨܲܠܵܝܘܼ ܡܨܲܠܸܐ ܪܸܥܝܵܢܵܐ.
                	ܟܠ ܙܢܵܐ ܕܹܝܢ ܕܲܨܠܘܿܬܼܵܐ ܕܐܝܼܬܼ: ܒܙܵܘ̈ܥܹܐ ܢܲܦܫܵܢܵܝܹ̈ܐ ܗܵܘ̇ܝܵܐ
                ܡܸܬܿܬܿܙܝܼܥܵܢܘܼܬܼܵܗ̇. ܡܵܐ ܕܥܲܠ̣ ܠܹܗ ܗܵܘܢܵܐ ܠܙܵܘ̈ܥܹܐ ܕܪܘܼܚܵܢܘܼܬܼܵܐ:
                ܬܲܡܵܢ ܠܲܝܬܿ ܠܹܗ ܠܲܡܨܲܠܵܝܘܼ. ܐ̄ܚܪܹܬܼܵܐ ܗ̣̄ܝ ܨܠܘܿܬܼܵܐ: ܘܲܐ̄ܚܪܹܬܼܵܐ
                ܗ̣̄ܝ ܬܹܐܘܿܪܝܼܵܐ ܕܒܼܵܗ̇: ܐܵܦܸܢ ܡ̣ܢ ܚܕܼܵܕܹ̈ܐ ܫܵܩ̈ܠܵܢ ܥܸܠܬܼܵܐ. ܗܵܝ̇ ܡ̇ܢ:
                ܙܲܪܥܵܐ. ܗܵܕܹܐ ܕܹܝܢ: ܫܩܘܼܠܬܼܵܐ ܕܟܲܦܹ̈ܐ. ܟܲܕܼ ܒܲܚܙܵܬܼܵܐ ܠܵܐ ܡܸܬܼܡܲܠܠܢܝܼܬܼܵܐ
                ܬܵܡܲܗ ܚܵܨܘܿܕܼܵܐ: ܕܡ̣ܢ ܦܸܪ̈ܕܹܐ ܫܝܼ̈ܛܵܬܼܵܐ ܘܥܲܪ̈݁ܛܸܠܵܝܬܼܵܐ ܕܲܙܪܲܥ̣:
                ܐܲܝܠܹܝܢ ܫܢܵܢܹ̈ܐ ܫܒܼܝܼ̈ܚܵܬܼܵܐ ܫܘܲܚ̣ ܩܕܼܵܡܵܘܗܝ ܡ̣ܢ ܫܸܠܝܵܐ. ܘܦܵܐܹ̇ܫ
                ܒܲܚܙܵܬܹܗ: ܡ̣ܢ ܟܠ ܪܦܵܬܼܵܐ. ܟܠ ܨܠܘܿܬܼܵܐ ܕܹܝܢ ܕܐܝܼܬܼ: ܒܥܵܬܼܵܐ
                ܐܝܼܬܹܝܗ̇ ܘܫܸܐܠ̱ܬܼܵܐ: ܐܵܘ ܬܸܫܒܿܘܿܚܬܼܵܐ: ܐܵܘ ܩܘܼܒܵܠܛܲܝܒܿܘܼܬܼܵܐ. ܒܨܝܼ
                ܐܸܢ ܐܝܼܬܼ ܚܕܼܵܐ ܡ̣ܢ ܗܵܠܹܝܢ: ܐܵܘ ܒܥܵܬܼܵܐ ܕܡܸܕܸܡ: ܡܵܐ ܕܲܥ̣ܒܲܪ ܗܵܘܢܵܐ
                ܠܲܬܼܚܘܼܡܵܐ ܗܵܢܵܐ ܘܥܲܠ̣ ܠܐܲܬܼܪܵܐ ܗܵܘ̇: ܠܝܵܕܼܥܲܝ̈ ܫܪܵܪܵܐ ܗ̄ܘ̣
                ܡܫܲܐܸܠ ܐ̄ܢܵܫ. ܐܵܦ ܦܘܼܪ̈ܫܵܢܹܐ ܕܹܝܢ ܗܵܠܹܝܢ ܠܵܘ ܕܟܼܠܢܵܫ ܗ̣̄ܝ
                ܠܲܡܥܲܩܵܒܼܘܼ: ܐܸܠܵܐ ܒܲܠܚܘܿܕܼ ܕܐܲܝܠܹܝܢ ܕܗܸܢܘܿܢ ܒܲܩܢܘܿܡܗܘܿܢ ܗܘ̤ܵܘ
                ܚܲܙܵܝܹ̈ܐ ܘܲܡܫܲܡ̈ܫܵܢܹܐ ܕܝܼܠܵܗ̇ ܕܲܨܒܼܘܼܬܼܵܐ: ܐܵܘ ܩܕܼܵܡܲܝܗܘܿܢ ܕܲܐܲܒܼܵܗ̈ܵܬܼܵܐ
                ܕܐܲܝܟܼ ܗܵܠܹܝܢ ܐܸܬܼܪܲܒܿܝܼܘ: ܘܡ̣ܢ ܦܘܼܡܗܘܿܢ ܩܲܒܸܠ̣ܘ ܫܪܵܪܵܐ: ܘܲܒܼܗܵܠܹܝܢ
                ܥܸܢܝܵܢܹ̈ܐ ܘܕܲܐܝܟܼ ܗܵܠܹܝܢ ܐܲܦܸܩ̣ܘ ܝܵܘ̈ܡܵܬܼܗܘܿܢ ܒܫܘܼ̈ܐܵܠܹܐ ܘܲܒܼܦܘܼܢܵܝ
                ܦܸܬܼܓܼܵܡܹ̈ܐ ܕܲܥܠܹܝܗ̇ ܕܫܲܪܝܼܪܬܵܐ. ܐܲܝܟܲܢܵܐ ܗܵܟܹܝܠ ܕܲܠܡܲܚܤܸܢ ܘܡ̣ܢ
                ܪܸܒܿܘܿ ܒܢܲܝ̈ܢܵܫܵܐ ܡܸܫܬܿܟܲܚ ܚܲܕܼ: ܕܫܲܡ̣ܠܝܼ ܦܘܼܩ̈ܕܵܢܹܐ ܘܢܵܡܘܿܤܹ̈ܐ
                
                 167 
                
                ܒܨܝܼܪ ܩܲܠܝܼܠ: ܘܐܸܫܬܘܝܼ ܠܫܲܦܝܘܼܬܼܵܐ ܕܢܲܦܫܵܐ: ܗܵܟܲܢܵܐ ܘܚܲܕܼ ܡ̣ܢ
                ܤܲܓܝܼ̈ܐܹܐ ܡܸܫܬ̣ܿܟܲܚ: ܕܐܸܫܬܿܘܝܼ ܒܝܲܕܼ ܢܛܘܼܪܬܵܐ ܤܲܓܝܼܐܬܼܵܐ ܠܲܨܠܘܿܬܼܵܐ
                ܕܟܼܝܼܬܼܵܐ: ܘܲܬܼܪܲܥ̣ ܠܗܵܢܵܐ ܬܚܘܼܡܵܐ: ܘܐܸܫܬܘܝܼ ܐܵܦ ܠܐ̄ܪܵܙܵܐ ܗܵܘ̇.
                ܠܵܘ ܤܲܓܝܼ̈ܐܹܐ ܡܸܫܬܿܘܹܝܢ ܐܵܦܠܵܐ ܠܲܨܠܘܿܬܼܵܐ ܕܟܼܝܼܬܼܵܐ: ܐܸܠܵܐ ܐܸܢ
                ܕܲܠܝܼ̈ܠܹܐ. ܠܗܵܘ̇ ܕܹܝܢ ܐ̄ܪܵܙܵܐ ܐ̄ܚܪܹܢܵܐ ܕܡܸܢܹܗ ܘܲܠܗܲܠ: ܠܡܲܚܤܸܢ
                ܡܸܫܬܿܟܲܚ ܒܕܼܵܪ ܕܵܪ: ܕܲܩ̣ܪܸܒܼ ܠܗܵܕܹܐ ܝܑܼܕܲܥܬܼܵܐ ܒܛܲܝܒܿܘܼܬܹܗ
                ܕܐܲܠܵܗܵܐ.
                	ܨܠܘܿܬܼܵܐ ܐܝܼܬܹܝܗ̇: ܟܘܼܫܵܦܵܐ ܘܡܲܪܢܝܼܬܼܵܐ ܘܝܲܐܝܼܒܼܘܼܬܼܵܐ ܕܲܠܡܸܕܸܡ: ܐܵܘ
                ܓܗܵܝܬܼܵܐ ܕܡ̣ܢ ܒܝܼ̈ܫܵܬܼܵܐ ܕܲܬܼܢܵܢ ܐܵܘ ܕܲܓܿܬܼܵܐ ܕܡܘܼ̈ܠܟܵܢܹܐ:
                ܐܵܘ ܫܸܐܬܼܵܐ ܡܸܕܸܡ ܕܒܼܵܗ̇ ܡܸܬܼܥܲܕܲܪ ܒܲܪܢܵܫܵܐ ܠܘܵܬܼ ܐܲܠܵܗܵܐ. ܒܗܵܠܹܝܢ
                ܙܵܘ̈ܥܹܐ ܡܸܬܼܚܲܒܼܫܝܼܢ ܟܠܗܘܿܢ ܐܸܤܟܹܡܹ̈ܐ ܕܲܨܠܘܿܬܼܵܐ. ܕܲܟܼܝܼܘܼܬܼܵܗ̇ ܕܹܝܢ
                ܐܵܘ ܠܵܐ ܕܲܟܼܝܘܼܬܼܵܗ̇: ܐܝܼܬܹܝܗ̇ ܕܐܲܝܟܼ ܗܵܟܲܢܵܐ. ܐܸܡܲܬܼܝ ܗܵܟܹܝܠ ܕܲܒܼܥܸܕܵܢܹ̈ܐ
                ܗܵܠܹܝܢ ܕܲܡܙܲܡܸܢ ܪܸܥܝܵܢܵܐ ܠܲܡܕܲܒܵܚܘܼ ܚܲܕܼ ܡ̣ܢ ܙܵܘ̈ܥܵܘܗܝ ܗܠܹܝܢ
                ܕܲܤܕܲܪܢ: ܚܵܠܹ̇ܛ ܒܹܗ ܚܘܼܫܵܒܼܵܐ ܡܸܕܸܡ ܢܘܼܟܼܪܵܝܵܐ ܐܵܘ ܦܸܗܝܵܐ
                ܕܒܲܨܒܼܘܼ: ܡܸܬܼܩܲܪܝܵܐ ܠܵܐ ܕܟܼܝܼܬܼܵܐ. ܒܗܵܝ̇ ܕܡ̣ܢ ܚܲܝ̈ܘܵܬܼܵܐ ܗܵܢܹܝܢ
                ܕܠܵܐ ܡܲܦܲܣ ܐܲܤܸܩ̣ ܥܲܠ ܡܲܕܼܒܿܚܹܗ ܕܡܵܪܝܵܐ: ܕܐܝܼܬܼܵܘܗ ܠܸܒܵܐ
                ܩܵܝܑܸܡܬܼܵܐ ܡܸܬܼܝܲܕܼܥܵܢܝܼܬܼܵܐ. ܡܵܐ ܓܹܝܪ ܕܝܲܐܝܼܒܼܵܐܝܼܬܼ ܥܲܠܝܼܠ ܪܸܥܢܵܝܵܐ ܒܚܲܕܼ
                ܡ̣ܢ ܗܵܠܹܝܢ ܙܵܘ̈ܥܹܐ ܠܦܘܼܬܼ ܐܵܠܨܘܼܬܼܵܗ̇ ܕܥܸܠܬܼܵܐ ܒܥܸܕܵܢܵܐ ܕܬܲܚܢܲܢܬܼܵܐ:
                ܘܡܸܛܠ ܤܘܼܘܵܚܵܐ ܤܲܓܝܼܐܵܐ ܢܓܝܸܕܼ ܚܝܵܪܵܐ ܕܙܵܘܥܹܗ ܒܥܲܝܢܵܐ ܕܗܲܝܡܵܢܘܼܬܼܵܐ
                ܠܓܼܵܘ ܡ̣ܢ ܐܲܦܲܝ̈ ܬܲܪܥܵܐ ܕܠܸܒܵܐ: ܒܝܲܕܼ ܗܵܠܹܝܢ ܤܝܼܓܼܝܼܢ ܡܸܟܹܝܠ
                ܡܲܥ̈ܠܵܢܹܐ ܕܢܲܦܫܵܐ: ܩܕܼܵܡ ܚܘܼ̈ܫܵܒܹܐ ܢܘܼܟܼܪܵܝܹܐ ܗܵܢܘܿܢ ܕܡܸܬܼܩܪܹܝܢ
                
                 168 
                
                ܓܝܼܘܿܪܹ݁ܐ: ܕܠܵܐ ܤܲܦܲܣ ܠܗܘܿܢ ܡ̣ܢ ܢܵܡܘܿܤܵܐ ܠܡܸܥܲܠ ܠܓܼܵܘ ܡ̣ܢ
                ܡܲܫܟܿܢܵܐ ܕܤܵܗܕܘܼܬܼܵܐ. ܘܲܠܗܵܕܹܐ ܡܫܲܡܗܝܼܢ ܕܸܒܼܚܬܼܵܐ ܡܩܲܒܲܠܬܼܵܐ
                ܕܠܸܒܵܐ: ܘܲܨܠܘܼܬܼܵܐ ܕܟܼܝܼܬܼܵܐ. ܐܵܦ ܬܚܘܼ̈ܡܹܝܗ̇ ܬܘܼܒܼ: ܥܕܲܡܵܐ
                ܠܗܵܪܟܵܐ. ܒܵܬܲܪ ܗܵܕܹܐ ܕܹܝܢ: ܠܲܝܬܿ ܠܡܸܫܬܲܡܵܗܘܼ ܨܠܘܿܬܼܵܐ.
                	ܐܸܢ ܐ̄ܢܵܫ ܕܹܝܢ ܡܲܝܬܸܐ ܠܥܘܼܗܕܵܢܵܐ ܗܵܝ̇ ܕܡܸܫܬܲܡܗܵܐ ܡ̣ܢ
                ܐܲܒܼܵܗ̈ܬܼܵܐ ܨܠܘܿܬܼܵܐ ܪܘܼܚܵܢܵܝܬܼܵܐ: ܟܲܕܼ ܠܵܐ ܡܸܤܬܲܟܲܠ ܚܲܝܠܵܐ ܕܡܸܠܲܝ̈ܗܘܿܢ
                ܕܐܼܵܒܼܵܗ̈ܬܼܵܐ: ܘܐܵܡܲ݁ܪ: ܕܐܵܦ ܗܵܕܹܐ ܡ̣ܢ ܬܚܘܼ̈ܡܹܝܗ̇ ܕܲܨܠܘܿܬܼܵܐ ܐܝܼܬܹܝܗ̇:
                ܤܵܒܲܪܢܵܐ ܕܐܸܢ ܠܚܲܬܿܝܼܬܼܘܼܬܼܵܐ ܕܤܘܼܟܵܠܵܐ ܐܵܬܹ̇ܐ: ܓܘܼܕܵܦܵܐ ܐܝܼܬܹܝܗ̇:
                ܕܐ̄ܢܵܫ ܡܨܸܐ ܒܲܥܒܼܝܼ̈ܕܹܐ ܕܢܹܐܡܲܪ: ܕܲܨܠܘܿܬܼܵܐ ܪܘܼܚܵܢܵܝܬܼܵܐ ܡܸܨܛܲܠܝܵܐ
                ܟܠ ܟ̱ܠܹܗ. ܟܠ ܕܹܝܢ ܕܡܸܨܛܲܠܵܝܘܼ ܡܸܨܛܲܠܝܵܐ: ܠܟܼܵܐ ܡ̣ܢ
                ܪܘܼܚܵܢܘܼܬܼܵܐ ܗ̣̄ܝ. ܘܟܼܠ ܕܪܘܼܚܵܢܵܝܬܼܵܐ ܗ̣̄ܝ: ܡ̣ܢ ܙܵܘܥܵܐ ܘܡ̣ܢ ܨܠܘܿܬܼܵܐ
                ܡܒܲܪ̈ܲܝ ܗ̄ܘ̣ ܛܲܟܼܤܵܗ̇. ܐܸܢ ܓܹܝܪ ܘܐܵܦ ܕܲܟܼܝܵܐܝܼܬܼ ܠܡܲܚܤܸܢ
                ܡܨܲܠܸܐ ܒܲܪܢܵܫܵܐ: ܡܵܢܵܐ ܢܹܐܡܲܪ ܗܵܝ̇ ܕܪܘܼܚܵܢܵܐܝܼܬܼ؟ ܠܐܲܒܼܵܗ̈ܬܼܵܐ ܓܹܝܪ
                ܩܲܕܝܼ̈ܫܹܐ ܐܝܼܬܼ ܠܗܘܿܢ ܥܝܵܕܼܵܐ: ܕܟܼܠ ܙܵܘ̈ܥܹܐ ܡܝܲܬܿܪܹ̈ܐ: ܘܟܼܠ
                ܡܲܥܒܒܿܕܵܢܘܼܬܼܵܐ ܪܘܼܚܢܵܝܬܼܵܐ: ܒܫܸܡ ܨܠܘܿܬܼܵܐ ܢܟܲܢܘܿܢ. ܘܠܵܘ ܒܲܠܚܘܿܕܼ
                ܗܵܠܹܝܢ: ܐܸܠܵܐ ܘܛܘܼܒܼܵܢܵܐ ܡܦܲܫܩܵܢܵܐ ܘܐܵܦ ܠܤܘܼܥܪ̈ܵܢܹܐ ܫܲܦܝܼܪܹ̈ܐ
                ܕܘܼܟܲܬܼ ܨܠܘܿܬܼܵܐ ܡܵܢܹ̇ܐ ܠܗܘܿܢ. ܟܲܕܼ ܓܲܠܝܵܐ ܗ̣̄ܝ: ܕܲܐ̄ܚܪܹܬܼܵܐ ܗ̣̄ܝ
                ܨܠܘܿܬܼܵܐ: ܘܲܐ̄ܚܪ̈ܵܢܹܐ ܐܸܢܘܿܢ ܤܘܼܥܪ̈ܵܢܹܐ ܕܡܸܬܼܦܲܠܚܝܼܢ. ܐܸܠܵܐ ܘܒܲܙܒܲܢ
                ܠܵܗ̇ ܠܗܵܕܹܐ: ܕܲܒܼܕܼܘܼܟ ܕܘܼܟ ܨܠܘܿܬܼܵܐ ܪܘܼܚܵܢܵܝܬܼܵܐ ܡܟܲܢܹܝܢ ܠܵܗ̇.
                ܐܝܼܬܼ ܐܲܝܟܵܐ: ܕܬܹܐܘܿܪܝܼܵܐ ܡܫܲܡܗܝܼܢ ܠܵܗ̇. ܘܒܲܙܒܲܢ: ܝܑܼܕܲܥܬܼܵܐ. ܘܒܲܙܒܲܢ:
                ܓܸܠܝܵܢܹ̈ܐ ܕܡܸܬܼܝܲܕܼܥܵܢ̈ܝܵܬܼܵܐ. ܚܵܙܹ̇ܐ ܐܲܢ̄ܬܿ: ܕܐܲܝܟܲܢ ܡܫܲܚܠ̱ܦܝܼܢ ܐܲܒܼܵܗ̈ܬܼܵܐ
                
                 169 
                
                ܫܘܼܡܵܗܹ̈ܐ ܒܨܸܒܼ̈ܘܵܬܼܵܐ ܪ̈ܘܼܚܵܢܵܝܬܼܵܐ؟ ܗܵܕܹܐ ܗܵܟܹܝܠ ܚܲܬܝܼܬܼܘܼܬܼܵܐ ܕܟܼܘܼ̈ܢܵܝܹܐ:
                ܒܨܸܒܼ̈ܘܵܬܼܵܐ ܕܲܬܼܢܵܢ ܡܸܬܼܩܲܝܡܵܐ. ܫܡܵܐ ܕܹܝܢ ܫܲܪܝܼܪܵܐ: ܠܨܸܒܼ̈ܘܵܬܼܵܐ
                ܕܥܵܠܡܵܐ ܚܲܕܼܬܼܵܐ: ܠܲܝܬܿ. ܐܸܠܵܐ ܚܕܼܵܐ ܝܑܼܕܲܥܬܼܵܐ ܦܫܝܼܛܬܼܵܐ: ܕܲܠܥܸܠ
                ܡ̣ܢ ܟܠ ܫܸܡ ܘܐܵܬܼ̈ܘܵܬܼܵܐ ܘܨܘܼܪ̈ܵܬܼܵܐ ܘܓܼܵܘ̈ܢܹܐ: ܘܐܸܤܟܹܡܹ̈ܐ ܘܟܼܘܼ̈ܢܵܝܹܐ
                ܡܪܸ̈ܟܿܒܹܐ. ܡܸܛܠܗܵܢܵܐ ܡܵܐ ܕܐܸܬܼܥܲܠܝܲܬ̤ ܝܑܼܕܲܥܬܼܵܐ ܕܢܲܦܫܵܐ ܡ̣ܢ ܗܵܕܹܐ
                ܚܘܿܓܼܬܼܵܐ ܕܡܸܬܼܚܲܙܝܵܢ̈ܝܬܼܵܐ: ܐܲܝܟܼ ܕܒܼܵܥܹ̇ܝܢ ܡܸܬܼܚ̇ܫܚܝܼܢ ܐܲܒܼܵܗ̈ܬܼܵܐ
                ܒܫܘܼܘ̈ܕܵܥܹܐ ܕܡܸܛܠܵܬܼܵܗ̇. ܟܲܕܼ ܫܡܵܡܲܝ̈ܗܘܿܢ ܚܲܬܝܼ̈ܬܹܐ: ܠܲܝܬܿ
                ܕܝܵܕܲܥ̇: ܐܸܠܵܐ ܐܲܝܟܼ ܕܚܘܼ̈ܫܵܒܹܐ ܢܲܦܫܵܢܵܝܹ̈ܐ ܥܠܲܝܗܘܿܢ ܢܸܤܡܟܼܘܼܢ.
                ܒܟܼܘܼ̈ܢܵܝܹܐ ܘܦܸ̈ܠܵܐܝܼܬܼܵܐ ܡܸܬܼܚܲܫܚܝܼܢܲܢ: ܐܲܝܟܼ ܡܸܠܬܹܗ ܕܩܲܕܝܼܫܵܐ
                ܕܝܵܢܹܘܤܝܼܘܿܣ ܕܐܸܡ݂ܲܪ: ܕܒܼܵܐܬܼ̈ܘܵܬܼܵܐ ܘܲܒܼܗܸܓܼ̈ܝܵܢܹܐ ܘܒܲܫܡܵܗܹ̈ܐ ܡܟܲܝ̈ܢܹܐ
                ܘܲܒܼܡܸܠܹ̈ܐ ܡܸܬܼܸܚܲܫܚܝܼܢܲܢ ܡܸܛܠ ܪܸ̈ܓܼܫܹܐ. ܐܸܡܲܬܼܝ ܠܲܡ ܕܲܒܼܡܲܥܒܿܕܵܢܘܼܬܼܵܐ
                ܕܪܘܼܚ ܬܸܬܿܙܝܼܥ ܢܲܦܫܲܢ ܠܘܵܬܼ ܗܵܠܹܝܢ ܐܲܠܵܗܵܝ̈ܬܼܵܐ: ܝܲܬܝܼܪܹ̈ܐ ܐܝܼܬܲܝܗܘܿܢ
                ܠܲܢ ܗܵܝܕܹܝܢ ܪܸ̈ܓܼܫܹܐ ܘܡܲܥܒܿܕܼܵܢ̈ܘܵܬܼܵܐ ܕܲܒܼܗܘܿܢ. ܐܲܝܟܼ ܕܐܵܦ ܚܲܝ̈ܠܹܝܗ̇
                ܪ̈ܘܼܚܵܢܹܐ ܕܢܲܦܫܵܐ: ܝܲܬܝܼܪܹ̈ܐ ܐܸܢܘܿܢ: ܡܵܐ ܕܬܸܗܘܸܐ ܢܲܦܫܲܢ ܕܘܼܡܝܵܐ
                ܕܐܲܠܵܗܘܼܬܼܵܐ: ܒܝܲܕܼ ܚܕܼܵܝܘܼܬܼܵܐ ܕܠܵܐ ܡܸܬܿܕܲܪܟܵܐ: ܘܬܲܨܡܲܚ ܒܙܲܠܝܼܩܵܘ̈ܗܝ
                ܕܢܘܼܗܪܵܐ ܕܲܡܥܲܠܝܘܼܬܼܵܐ: ܒܲܝܕܼ ܙܵܘ̈ܥܹܐ ܗܵܢܘܿܢ ܕܲܕܼܠܵܐ ܥܲܝ̈ܢܹܐ.
                	ܡܵܕܹܝܢ ܐܵܚܝ: ܬܸܫܲܪ ܠܵܟܼ ܗܵܕܹܐ: ܕܫܘܼܠܛܵܢܵܐ ܕܗܵܘܢܵܐ ܠܲܡܙܵܥܘܼ
                ܦܘܼܪܫܵܢܵܐ ܕܙܵܘ̈ܥܹܐ: ܥܕܲܡܵܐ ܠܕܲܟܼܝܘܼܬܼܵܐ ܕܒܲܨܠܘܿܬܼܵܐ ܐܝܼܬܼ ܠܹܗ
                ܐܲܬܼܪܵܐ. ܡܵܐ ܕܲܡܛ̣ܵܐ ܕܹܝܢ ܠܬܲܡܵܢ: ܐܵܘ ܗܦܲܟܼ ܠܒܸܤܬܪܹܗ: ܐܵܘ
                ܦܵܫ̣ ܡ̣ܢ ܨܠܘܿܬܼܵܐ: ܡܸܟܹܝܠ ܗܘ̤ܵܬܼ ܠܵܗ̇ ܨܠܘܿܬܼܵܐ ܐܲܝܟܼ ܡܸܨܥܵܝܵܐ
                ܡܸܕܸܡ ܒܹܝܬܼ ܬܲܦܫܵܢܘܼܬܼܵܐ ܠܪܘܼܚܵܢܘܼܬܼܵܐ. ܡܵܐ ܕܡܸܬܿܬܿܙܝܼܥܵܐ ܕܹܝܢ:
                
                 170 
                
                ܒܐܲܬܼܪܵܐ ܕܢܲܦܫܵܢܘܼܬܼܵܐ ܐܝܼܬܹܝܗ̇. ܡܵܐ ܕܥܸܠܲܬ̤ ܡܲܢ ܠܗܵܘ̇ ܐܲܬܼܪܵܐ:
                ܒܸܛܠܲܬ̤ ܠܵܗ̇ ܨܠܘܿܬܼܵܐ܀ ܐܲܝܟܲܢܵܐ ܗܵܟܹܝܠ ܕܩܲܕܝܼ̈ܫܹܐ ܒܥܵܠܡܵܐ ܚܲܕܼܬܼܵܐ
                ܠܵܘ ܡܨܲܠܵܝܘܼ ܡܨܲܠܹܝܢ: ܡܵܐ ܕܐܸܬܼܒܿܠܲܥ ܗܵܘܢܵܐ ܒܪܘܼܚ: ܐܸܠܵܐ
                ܒܬܸܡܗܵܐ ܫܵܪܹܝܢ ܒܗܵܝ̇ ܬܸܫܒܿܘܿܚܬܼܵܐ ܡܒܲܤܲܡܬܼܵܐ: ܗܵܟܲܢܵܐ ܘܡܵܐ ܕܐܸܫܬܿܘܝܼ
                ܗܵܘܢܵܐ ܠܡܲܪܓܵܫܘܼ ܒܗܵܝ̇ ܛܘܼܒܼܬܼܵܢܘܼܬܼܵܐ ܕܲܥܬܼܝܼܕܼܵܐ: ܛܵܥܹ̇ܐ ܝܵܬܹܗ
                ܘܲܠܟܼܠ ܕܲܬܼܢܵܢ: ܘܬܼܘܼܒܼ ܠܲܝܬܿ ܠܹܗ ܠܡܸܬܿܬܿܙܵܥܘܼ ܒܪܸܢܝܵܐ ܕܡܸܕܸܡ.
                ܡܸܛܠ ܗܵܕܹܐ: ܬܟܼܝܼܠܵܐܝܼܬܼ ܡܲܡܪܲܚ ܐ̄ܢܵܫ ܠܡܹܐܡܲܪ: ܕܟܼܠ
                ܡܝܲܬܪܘܼܬܼܵܐ ܕܐܝܼܬܼ: ܘܟܼܠ ܛܲܟܼܤ̈ܝܼܢ ܕܲܨܠܘܿܬܼܵܐ ܕܗܵܘܹ̇ܝܢ: ܐܸܢ
                ܒܲܦܓܲܪ ܘܐܸܢ ܒܬܲܪܥܝܼܬܼܵܐ: ܚܹܐܪܘܼܬܼܵܐ ܕܨܸܒܼܝܵܢܵܐ ܡܕܲܒܿܪܵܐ ܘܲܡܙܝܼܥܵܐ
                ܠܗܹܝܢ: ܘܲܠܗܵܘܢܵܐ ܕܐܝܼܬܼܵܘܗܝ ܫܲܠܝܼܛܵܐ ܕܪܸ̈ܓܼܫܹܐ. ܡܵܐ ܕܹܝܢ
                ܕܡܲܥܒܿܕܼܵܢܘܼܬܼܵܐ ܕܪܘܼܚ ܡܲܡܠܟܼܵܐ ܥܲܠ ܗܵܘܢܵܐ ܡܛܲܟܿܤܵܢܵܐ ܕܪܸ̈ܓܼܫܹܐ
                ܘܲܕܼܚܘܼ̈ܫܵܒܹܐ: ܡܸܫܬܲܩܠܵܐ ܚܹܐܪܘܼܬܼܵܐ ܡ̣ܢ ܟܝܵܢܵܐ: ܘܡܸܬܿܕܒܼܵܪܘܼ ܡܸܬܿܕܒܲܪ
                ܗܵܝܕܼܝܟ: ܘܠܵܘ ܡܕܲܒܵܪܘܼ ܡܕܲܒܲܪ. ܘܐܲܝܟܲܢ ܐܝܼܬܹܝܗ̇ ܨܠܘܿܬܼܵܐ ܒܗܵܘ̇
                ܥܸܕܵܢܵܐ: ܟܲܕܼ ܟܝܵܢܵܐ ܠܵܐ ܫܲܠܝܼܛ ܥܲܠ ܝܵܬܹܗ: ܒܚܲܝܠܵܐ ܐ̄ܚܪܹܢܵܐ
                ܡܸܬܿܕܒܲܪ ܠܐܲܝܟܵܐ ܕܠܵܐ ܝܵܕܲܥ̇. ܠܵܘ ܗ̤ܘ ܬܵܪܹܝܨ ܠܙܵܘ̈ܥܹܝܗ̇ ܕܬܲܪܥܝܼܬܼܵܐ
                ܒܡܸܕܸܡ ܕܨܵܒܹ̇ܐ: ܐܸܠܵܐ ܫܒܼܝܼܵܬܼܵܐ ܡܲܡܠ̱ܟܼܵܐ ܥܲܠ ܟܝܵܢܵܐ ܒܫܵܥܬܼܵܐ ܗܵܝ̇:
                ܘܗ̤ܝ ܕܵܒܼܪܵܐ ܠܹܗ ܠܐܲܝܟܵܐ ܕܠܵܐ ܪܓܼܝܼܫ. ܒܕܼܵܐܦܠܵܐ ܓܹܝܪ ܨܸܒܼܝܵܢܵܐ
                ܐܝܼܬܼ ܠܹܗ ܒܗܵܘ̇ ܥܸܕܵܢܵܐ. ܘܲܥܕܲܡܵܐ ܠܗܵܕܹܐ: ܕܐܵܦܠܵܐ ܐܸܢ ܒܲܦܓܲܪ
                ܘܐܸܢ ܕܠܵܐ ܦܓܲܪ ܝܵܕܲܥ̇: ܐܲܝܟܼ ܤܵܗܕܘܼܬܹܗ ܕܲܟܼܬܼܵܒܼܵܐ. ܡܵܕܹܝܢ ܐܝܼܬܼ
                ܠܹܗ ܟܲܝ ܨܠܘܿܬܼܵܐ: ܠܗܵܢܵܐ ܕܗܵܟܲܢܵܐ ܫܒܸܐ: ܟܲܕܼ ܐܵܦܠܵܐ ܢܲܦܫܹܗ
                ܝܵܕܲܥ؟ ܡܸܛܠܗܵܢܵܐ: ܠܵܐ ܐ̄ܢܵܫ ܢܓܲܕܸܦ: ܕܐܝܼܬܼ ܒܲܪܢܵܫܵܐ ܕܡܲܡܪܲܝ
                ܠܡܹܐܡܲܪ: ܕܡܸܫܟܿܚܵܐ ܠܲܡܨܲܠܵܝܘܼ ܨܠܘܿܬܼܵܐ ܪܘܼܚܵܢܵܝܬܼܵܐ. ܠܗܵܕܹܐ
                
                 171 
                
                ܡܲܪܵܚܘܼܬܼܵܐ ܫܵܐܹ̇ܠܝܼܢ ܠܢܲܦܫܗܘܿܢ: ܡܨܲܠܝܵܢܹ̈ܐ ܪ̈ܵܡܹܐ ܗܸܕܼܝܘܿܛܲܝ̈ ܒܝܼܕܲܥܬܐ
                ܕܡܲܛܒܼܝܼܢ ܥܲܠ ܢܲܦܫܗܘܿܢ: ܕܐܸܡܲܬܼܝ ܕܒܼܵܥܹ̇ܝܢ ܨܠܘܿܬܼܵܐ ܕܪܘܼܚ
                ܡܨܝܢ ܠܲܡܨܲܠܵܝܘܼ. ܡܲܟܿܝܼ̈ܟܹܐ ܕܹܝܢ ܘܝܵܕܼ̈ܥܲܝ ܤܘܼܟܵܠܵܐ: ܕܡܸܬܼܪܲܟܼܢܝܼܢ
                ܡ̣ܢ ܐܲܒܼܵܗ̈ܬܼܵܐ ܠܡܹܐܠܲܦ: ܘܝܵܕܼܥ̇ܝܼܢ ܬܚܘܼܡܵܘ̈ܗܝ ܕܲܟܼܝܵܢܵܐ: ܠܗܵܕܹܐ
                ܡܲܪܵܚܘܼܬܼܵܐ ܠܵܐ ܝܵܗ̇ܒܿܝܼܢ ܚܘܼܫܵܒܲܝ̈ܗܘܿܢ: ܘܡܸܛܠܡܵܢܵܐ: ܟܲܕܼ ܠܲܝܬܹܝܗ̇
                ܨܠܘܿܬܼܵܐ: ܒܫܸܡ ܨܠܘܿܬܼܵܐ ܡܸܬܼܟܲܢܝܵܐ ܡܵܘܗܲܒܼܬܼܵܐ ܗܵܕܹܐ ܠܵܐ
                ܡܸܬܼܡܲܠܠܵܢܝܼܬܼܵܐ؟ ܥܸܠܬܼܵܐ: ܗܵܕܹܐ ܕܐܵܡܪܝܼܢܲܢ: ܒܗܵܝ̇ ܕܲܒܼܙܲܒܼܢܵܐ
                ܕܲܨܠܘܿܬܼܵܐ ܡܸܫܬܲܟܿܢܵܐ ܥܲܠ ܐܲܝܠܹܝܢ ܕܫܵܘܹܝܢ. ܘܡ̣ܢ ܨܠܘܿܬܼܵܐ ܫܵܩ̇ܠܵܐ
                ܥܸܠܬܼܵܐ: ܒܗܵܝ̇ ܕܠܲܝܬܿ ܠܵܗ̇ ܐܲܬܼܪܵܐ ܠܗܵܕܹܐ ܫܒܼܒܼܚܘܼܬܼܵܐ ܠܡܸܫܬܲܟܵܢܘܼ:
                ܐܸܠܵܐ ܐܸܢ ܒܥܸܕܵܢܵܐ ܗܵܢܵܐ: ܐܲܝܟܼ ܤܵܗܕܘܼܬܼܵܐ ܕܐܲܒܼܵܗ̈ܵܬܼܵܐ. ܡܸܛܠܗܵܕܹܐ
                ܒܫܸܡ ܨܠܘܼܬܼܵܐ ܡܸܫܬܲܡܗܵܐ: ܡܸܛܠ ܗܵܝ̇ ܕܡܸܢܵܗ̇ ܕܲܨܠܘܿܬܼܵܐ ܐܸܬܿܕܒܲܪ
                ܗܵܘܢܵܐ ܠܘܵܬܼ ܗܵܝ̇ ܛܘܼܒܼܬܼܵܢܘܼܬܼܵܐ. ܘܡܸܛܠ ܗܵܝ̇ ܕܲܨܠܘܿܬܼܵܐ ܐܝܼܬܹܝܗ̇
                ܠܵܗ̇ ܥܸܠܬܼܵܐ: ܘܲܒܼܙܲܒܼ̈ܢܹܐ ܐ̄ܚܪ̈ܵܢܹܐ ܠܲܝܬܿ ܠܵܗ̇ ܐܲܬܼܪܵܐ: ܐܲܝܟܼ ܤܵܗܕܘܼܬܹܗ
                ܕܡܵܪܝ ܐܹܘܲܓܼܪܝܼܣ: ܘܫܲܪܟܵܐ. ܘܚܵܙ̇ܝܢܲܢ ܐܵܦ ܠܤܲܓܝܼ̈ܐܹܐ ܡ̣ܢ ܩܲܕܝ̈ܫܹܐ
                ܒܬܲܫ̈ܥܝܵܬܼܗܘܿܢ: ܕܟܲܕܼ ܒܲܨܠܘܿܬܼܵܐ ܩܵܝ̇ܡܝܼܢ: ܡܸܬܚܛܸܦ ܗ̄ܘ̣ܵܐ
                ܗܵܘܢܗܘܿܢ.
                	ܐܸܠܵܐ ܡܫܲܐܸܠ ܐ̄ܢܵܫ: ܕܡܸܛܠܡܵܢܵܐ ܥܸܕܵܢܵܐ ܒܲܠܚܘܿܕܼ ܗܵܘܹ̇ܝܢ
                ܗܵܠܹܝܢ ܫܘܼ̈ܟܵܢܹܐ ܪܵܘܪ̈ܒܹܐ ܘܠܵܐ ܡܸܬܼܡܲܠܠܵܢܹ̈ܐ؟ ܐܵܡ̇ܪܝܼܢܲܢ: ܡܸܛܠ
                ܗܵܟܹܝܠ ܕܲܒܼܕܵܢܵܐ ܗܵܢܵܐ: ܝܲܬܝܼܪ ܡ̣ܢ ܟܠܗܹܝܢ ܫܵܥܹ̈ܐ ܕܫܲܪܟܵܐ ܟܢܝܼܫ
                ܘܲܡܥܲܬܲܕܼ ܒܲܪܢܵܫܵܐ ܠܲܡܚܵܪ ܠܘܵܬܼ ܐܲܠܵܗܵܐ: ܘܲܡܤܵܘܲܚ ܘܲܡܤܲܟܸܐ
                ܠܪ̈ܲܚܡܹܐ ܕܡ̣ܢ ܠܘܵܬܹܗ. ܘܐܲܝܟܼ ܕܲܒܼܦܵܤ̈ܝܼܩܵܬܼܵܐ ܠܡܹܐܡܲܪ: ܙܲܒܼܢܵܐ
                ܐܝܼܬܼܵܘܗܝ ܕܩܵܐܹ̇ܡ ܥܲܠ ܬܲܪܥܵܐ ܕܡܲܠܟܵܐ ܘܲܡܦܝܼܣ: ܐܵܦ ܫܸܐܠ̱ܬܹܗ
                
                 172 
                
                ܕܐܲܝܢܵܐ ܕܲܪܓܼܝܼܓܼ ܘܡܸܬܼܟܲܫܲܦ: ܒܗܵܢܵܐ ܥܸܕܵܢܵܐ ܦܐܸܐ ܕܬܸܬܼܦܲܢܸܐ ܠܹܗ.
                ܐܲܝܢܵܘ ܥܸܕܵܢܵܐ ܕܗܵܟܲܢ ܙܗܝܼܪ ܘܲܡܛܲܝܲܒܼ ܘܲܡܥܲܬܲܕܼ ܒܲܪܢܵܫܵܐ: ܐܲܝܟܼ
                ܕܲܒܼܥܸܕܵܢܵܐ ܗܵܘ̇ ܕܲܡܨܸܲܐ؟ ܐܵܘ ܕܲܠܡܵܐ ܙܵܕܹܩ ܗ̄ܘ̣ܵܐ: ܕܲܒܼܥܸܕܵܢܵܐ
                ܕܕܲܡܝܼܟܼ ܐܵܘ ܨܒܼܘܼ ܤܵܥܲܪ: ܐܵܘ ܡܦܲܠܗܲܕܼ ܒܗܵܘܢܹܗ: ܢܸܫܬܘܸܐ
                ܗ̄ܘ̣ܵܐ ܠܗܵܕܹܐ؟ ܗܵܐ ܘܐܵܦܸܢ ܠܩܲܕܝܼ̈ܫܹܐ ܠܲܝܬܿ ܗ̄ܘ̣ܵܐ ܠܗܘܿܢ ܥܵܕܵܢܵܐ
                ܕܒܸܛܠܵܢܵܐ: ܕܲܒܼܟܼܠܗܘܿܢ ܥܸܕܵܢܲܝ̈ܗܘܿܢ ܒܪ̈ܘܼܚܵܢܵܝܬܼܵܐ ܡܸܬܼܥܥܹܝܢ: ܐܸܠܵܐ
                ܐܸܡܲܬܼܝ ܕܠܵܘ ܒܥܘܼܬܵܕܼܵܐ ܕܲܨܠܘܿܬܼܵܐ ܩܵܝ̇ܡܝܼܢ: ܟܡܵܐ ܙܲܒܼ̈ܢܝܼܢ: ܐܵܘ
                ܒܬܼܫ̈ܥܝܵܬܼܵܐ ܡܸܕܸܡ ܕܒܲܟܼܬܼܵܒܹ̈ܐ ܗܵܪܓܝܼܢ: ܐܵܘ ܒܬܹܐܘܿܪܝܼܵܐ ܕܒܸܪ̈ܝܵܬܼܵܐ
                ܡܸܬܼܗܲܓܸܐ ܗܵܘܢܗܘܿܢ: ܥܲܡ ܫܲܪܟܵܐ ܕܲܐ̄ܚܪ̈ܵܢܝܵܬܼܵܐ: ܗܵܠܹܝܢ ܕܐܵܦ
                ܗܸܢܹܝܢ ܗܸܪ̈ܓܹܐ ܐܝܼܬܲܝܗܹܝܢ ܡܵܘܬܿܪ̈ܵܢܹܐ. ܒܥܸܕܵܢܵܐ ܕܹܝܢ ܕܲܨܠܘܿܬܼܵܐ:
                ܒܹܗ ܒܐܲܠܵܗܵܐ ܝܑܼܚܝܼܕܵܐܝܼܬܼ ܡܲܩܲܬܼ ܚܵܘܪܹܗ ܕܪܸܥܝܵܢܵܐ: ܘܲܠܘܵܬܹܗ ܡܬܼܝܼܚ
                ܟ̱ܠܹܗ ܛܵܘܚܵܐ ܕܙܵܘܥܹܐ: ܘܲܦܝܵܤܹ̈ܐ ܠܸܒܵܢܵܝܹ̈ܐ ܒܲܚܦܝܼܛܘܼܬܼܵܐ ܕܐܵܠܨܵܐ
                ܬܟܼܝܼܒܼܵܐܝܼܬܼ ܘܚܲܡܝܼܡܵܐܝܼܬܼ ܡܩܲܪܸܒܼ ܠܹܗ. ܘܡܸܛܠ ܗܵܕܹܐ: ܒܗܵܢܵܐ
                ܥܸܕܵܢܵܐ ܕܪܸܢܝܵܐ ܝܑܼܚܝܼܕܼܵܝܵܐ ܪܡܸܐ ܒܢܲܦܫܵܐ: ܙܵܕܹܩ ܗ̄ܘ̣ܵܐ ܕܐܵܦ ܢܸܗܘܘܿܢ
                ܢܸܒܼܥܘܿܢ ܡܸܢܹܗ ܪ̈ܲܚܡܹܐ ܐܲܠܵܗܵܝܹ̈ܐ܀ ܚܵܙܹܝܢܲܢ ܓܹܝܪ ܕܐܵܦ ܡܵܘܗܲܒܼܬܼܵܐ
                ܕܪܘܼܚܵܐ ܥܲܠ ܩܘܼܪܒܵܢܵܐ ܗܵܢܵܐ ܓܲܠܝܵܐ ܕܲܡܩܲܪܒܼܝܼܢܲܢ: ܟܲܕܼ ܟܠܢܵܫ
                ܡܥܲܬܲܕܼ ܘܩܵܐܹ̇ܡ ܒܲܨܠܘܿܬܼܵܐ: ܘܡܸܬܼܚܲܢܲܢ ܘܡܸܬܼܟܲܫܲܦ: ܘܲܟܼܢܝܼܫ
                ܗܵܘܢܹܗ ܠܘܵܬܼ ܐܲܠܵܗܵܐ: ܢܵܚܬܼܵܐ ܥܲܠ ܠܲܚܡܵܐ ܘܚܲܡܪܵܐ ܕܤܵܝ̇ܡܝܼܢ
                ܥܲܠ ܡܲܕܼܒܿܚܵܐ܀ ܘܐܵܦ ܠܲܙܟܲܪܝܵܐ ܒܥܸܕܵܢܵܐ ܕܲܨܠܘܿܬܼܵܐ ܐܸܬܼܚܙܝܼ ܠܹܗ
                ܡܲܠܲܐܟܼܵܐ: ܘܤܲܒܿܪܹܗ ܥܲܠ ܒܲܛܢܹܗ ܕܝܘܿܚܲܢܵܢ. ܘܲܠܦܲܛܪܘܿܣ: ܟܲܕܼ ܡܨܲܠܸܐ
                
                 173 
                
                ܗ̄ܘ̣ܵܐ ܒܐܸܓܵܪܵܐ: ܒܲܨܠܘܿܬܼܵܐ ܕܫܸܬܼ ܫܵܥ̈ܝܼܢ: ܐܸܬܼܚܙܝܼ ܠܹܗ ܓܸܠܝܵܢܵܐ ܗܵܘ̇
                ܕܡܵܘܕܲܥ ܥܲܠ ܡܸܬܼܩܲܪܒܼܵܢܘܼܬܼܵܐ ܕܥܲܡܡܹ̈ܐ: ܒܡܵܐܢܵܐ ܕܫܵܐܹ̇ܒܼ ܡ̣ܢ
                ܫܡܲܝܵܐ ܘܚܲܝ̈ܘܵܬܼܵܐ ܕܒܹܗ܀ ܘܠܲܩܘܿܪܢܹܠܝܼܘܿܣ: ܟܲܕܼ ܡܨܲܠܸܐ ܐܸܬܼܚܙܝܼ
                ܠܹܗ ܗܵܠܹܝܢ ܕܲܟܼܢܼܝܼ̈ܒܼܵܢ ܡܸܛܠܵܬܹܗ܀ ܘܲܠܝܼܫܘܿܥ ܒܲܪܢܘܿܢ. ܟܲܕܼ
                ܪܡܸܐ ܥܲܠ ܐܲܦܵܘ̈ܗܝ ܒܲܨܠܘܿܬܼܵܐ: ܡܲܠܸܠ̣ ܥܲܡܹܗ ܐܲܠܵܗܵܐ܀ ܘܐܵܦ
                ܛܲܤܵܐ ܗܵܘ̇ ܕܤܝܼܡ ܗ̄ܘ̣ܵܡ ܠܥܸܠ ܡ̣ܢ ܩܹܒܼܘܿܬܼܵܐ: ܗܵܘ̇ ܕܡܸܢܹܗ
                ܝܵܠܹ̇ܦ ܗ̄ܘ̣ܵܐ ܟܵܗܢܵܐ ܡ̣ܢ ܐܲܠܵܗܵܐ ܒܓܸܠܝܵܢܵܐ ܡܸܕܸܡ ܕܡܸܬܼܒܿܥܸܐ: ܒܲܙܒܲܢ
                ܕܥܵܐܹ̇ܠ ܗ̄ܘ̣ܵܐ ܪܹܫ ܟܵܗ̈ܢܹܐ ܚܕܼܵܐ ܒܫܲܢ̄ܬܼܵܐ ܒܥܸܕܵܢܵܐ ܕܚܝܼܠܵܐ ܕܲܨܠܘܿܬܼܵܐ:
                ܟܲܕܼ ܟܢܝܼܫܝܼܢ ܟܠܗܘܿܢ ܫܲܒܼ̈ܛܹܐ ܕܲܒܼܢܲܝ̈ ܝܑܼܤܪܵܝܼܠ: ܘܩܵܝ̇ܡܝܼܢ ܒܪܸܥܠܵܐ
                ܘܕܸܚܠܵܐ ܒܡܲܫܟܿܢܵܐ ܗܵܘ̇ ܕܲܠܒܲܪ ܒܲܨܠܘܿܬܼܵܐ: ܥܵܐܹ̇ܠ ܗ̄ܘ̣ܵܐ ܪܲܒܿܘܿܟܼܡܪܹ̈ܐ
                ܠܗܵܘ̇ ܩܘܼܕܼܫܵܐ ܓܵܘܵܝܵܐ. ܘܟܲܕܼ ܪܡܸܐ ܥܲܠ ܐܲܦܵܘ̈ܗܝ: ܡܸܫܬܲܡ̈ܥܵܢ
                ܗ̣̄ܘܲܝ̈ ܒܢܵܬܼ̈ ܩܵܠܵܘ̈ܗܝ ܕܐܲܠܵܗܵܐ: ܡ̣̤ܢ ܓܵܘ ܛܲܤܵܐ ܗܵܘ̇ ܕܲܠܥܸܠ
                ܡ̣ܢ ܩܹܒܼܘܿܬܼܵܐ: ܒܓܸܠܝܵܢܵܐ ܕܚܝܼܠܵܐ ܕܠܵܐ ܡܸܬܼܡܲܠܲܠܘ. ܐܘܿ ܟܡܵܐ
                ܕܚܝܼܠ ܗ̄ܘ̣ܵܐ ܐ̄ܪܵܙܵܐ: ܕܡܸܫܬܲܡܲܫ ܗ̄ܘ̣ܵܐ ܒܲܨܒܼܘܼܬܼܵܐ! ܗܵܟܲܢܵܐ
                ܘܟܼܠܗܘܿܢ ܓܸܠܝܵܢܹ̈ܐ ܘܚܸܙܘܵܢܹ̈ܐ ܕܲܗܘ̤ܵܘ ܠܘܵܬܼ ܩܲܕܝܼ̈ܫܹܐ: ܒܥܸܕܵܢܵܐ
                ܕܲܨܠܘܿܬܼܵܐ ܗܵܘܹ̇ܝܢ ܗ̄ܘ̣ܵܘ ܨܹܐܕܲܝܗܘܿܢ܀
                	ܐܲܝܢܵܘ ܙܲܒܼܢܵܐ ܕܩܲܕܝܼܫ ܘܥܵܗܹ̇ܢ ܠܩܘܼܕܵܫܵܐ ܘܲܠܩܘܼܒܵܠܵܐ ܕܡܵܘ̈ܗܒܼܵܬܼܵܐ:
                ܐܲܝܟܼ ܙܲܒܼܢܵܐ ܕܲܨܠܘܿܬܼܵܐ: ܕܒܹܗ ܡܡܲܠܸܠ ܒܲܪܢܵܫܵܐ ܥܲܡ ܐܲܠܵܗܵܐ؟ ܀
                ܒܲܕܓܼܘܿܢ ܡܸܛܠ ܕܲܒܼܗܵܢܵܐ ܥܵܕܵܢܵܐ ܕܐܝܼܬܼܵܘܗܝ ܒܒܼܵܥܘܼܬܼܵܐ ܕܲܠܘܵܬܼ
                ܐܲܠܵܗܵܐ: ܘܲܦܝܵܤܵܐ ܘܡܲܡܠܠܵܐ ܕܥܲܡܹܗ: ܘܟܼܠܹܗ ܙܵܘܥܹܗ ܘܚܘܼܫܵܒܹܗ
                ܕܒܲܪܢܵܫܵܐ ܡ̣ܢ ܟܠ ܕܘܼܟ ܥܸܨܝܵܢܵܐܝܼܬܼ ܠܬܲܡܵܢ ܟܢܝܼܫ: ܘܒܹܗ ܒܐܲܠܵܗܵܐ
                
                 174 
                
                ܒܲܠܚܘܿܕܼܵܘܗܝ ܪܵܢܹܐ ܘܡܸܬܼܚܲܢܲܢ: ܘܒܲܠܝܼܥ ܟ̱ܠܹܗ ܪܸܥܝܵܢܹܗ ܒܡܲܡܠܠܵܐ
                ܕܲܠܘܵܬܹܗ: ܘܲܡܠܸܐ ܠܸܒܹܗ ܡܸܢܹܗ. ܡܸܟܵܐ ܗܵܟܹܝܠ ܡ̣ܢ ܗܵܪܟܵܐ:
                ܤܘܼ̈ܟܵܠܹܐ ܡܸܕܸܡ ܠܵܐ ܡܸܬܿܕܲܪ̈ܟܵܢܹܐ: ܪܘܼܚܵܐ ܕܩܘܼܕܼܫܵܐ ܠܦܘܼܬܼ
                ܡܫܘܼܚܬܹܗ ܕܒܲܪܢܵܫܵܐ ܠܲܡܙܵܥܘܼ ܒܹܗ: ܡܸܢܗܹܝܢ ܡ̣ܢ ܗܵܠܹܝܢ ܕܲܡܨܲܠܸܐ
                ܡܠܘܿܐܵܐ ܢܵܤܹ̇ܒܼ: ܘܲܡܙܝܼܥ ܒܹܗ. ܐܲܝܟܲܢܵܐ ܕܲܒܼܗܘܿܢ ܡܤܘܼ̈ܟܵܠܹܐ:
                ܨܠܘܼܬܼܵܐ ܡܸܬܼܦܲܤܩܵܐ ܠܵܗ̇ ܡ̣ܢ ܡܸܬܿܬܿܙܝܼܥܵܢܘܼܬܼܵܐ. ܘܲܒܼܬܲܗܪܵܐ ܗܵܘܢܵܐ
                ܡܸܬܼܒܿܠܲܥ: ܘܪܸܓܿܬܼܵܐ ܕܲܒܼܥܵܬܹܗ ܡܸܬܼܢܫܸܐ. ܘܲܒܼܪܵܘܵܝܘܼܬܼܵܐ ܥܲܡܝܼܩܬܵܐ
                ܥܵܡ̇ܕܝܼܢ ܙܵܘܥܵܘ̈ܗܝ: ܘܠܲܝܬܵܘܗܝ ܒܥܵܠܡܵܐ ܗܵܢܵܐ. ܘܡܸܟܹܝܠ: ܠܵܐ
                ܦܘܼܪܫܵܢܵܐ ܕܦܲܓܼܪܵܐ ܬܲܡܵܢ ܘܠܵܐ ܕܢܲܦܫܵܐ: ܘܠܵܐ ܥܘܼܗܕܵܢܵܐ ܕܡܸܕܸܡ:
                ܐܲܝܟܼ ܕܐܵܡܲܪ ܐܹܘܲܓܼܪܝܼܣ. ܨܠܘܿܬܼܵܐ ܠܲܡ ܐܝܼܬܹܝܗ̇: ܬܲܩܢܘܼܬܹܗ
                ܕܗܵܘܢܵܐ: ܗܵܝ̇ ܕܒܲܠܚܘܿܕܼ ܡ̣ܢ ܢܘܼܗܪܵܐ ܕܲܬܼܠܝܼܬܼܵܝܘܼܬܼܵܐ ܩܲܕܝܼܫܬܵܐ
                ܒܝܲܕܼ ܬܲܗܪܵܐ ܡܸܬܼܦܲܤܩܵܐ. ܚ̣ܙܲܝܬܿ ܕܼܐܲܝܟܲܢܵܐ ܡܸܬܼܦܲܤܩܵܐ ܨܠܘܿܬܼܵܐ
                ܒܝܲܕܼ ܬܲܗܪܵܐ ܡܸܬܼܦܲܤܩܵܐ. ܗܵܠܹܝܢ ܕܡܸܢܵܗ̇ ܡ̣ܢ ܨܠܘܿܬܼܵܐ ܡܸܬܼܝܲܠܕܝܼܢ
                ܒܪܸܥܝܵܢܵܐ: ܐܲܝܟܼ ܕܲܒܼܪܹܫܹܗ ܕܡܹܐܡܪܵܐ ܐܸܡ̇ܪܹܬܼ: ܘܲܒܼܕܼܘ̈ܟܿܝܵܬܼܵܐ ܤܲܓܝܼ̈ܐܵܬܼܵܐ:
                ܥܕܲܡܵܐ ܠܗܵܪܟܵܐ.
                	ܬܘܼܒܼ ܐܵܡܲ̇ܪ: ܬܲܩܢܘܼܬܹܗ ܕܗܵܘܢܵܐ ܐܝܼܬܹܝܗ̇: ܪܵܘܡܵܐ
                ܕܡܸܬܼܝܲܕܼܥܵܢ̈ܝܵܬܼܵܐ: ܗܵܝ̇ ܕܡܸܬܿܕܲܡܝܵܐ ܒܓܼܵܘܢܵܐ ܕܲܫܡܲܝܵܐ: ܕܲܥܠܵܘܗܝ
                ܕܵܢܲܚ ܒܥܸܕܵܢ ܨܠܘܿܬܼܵܐ: ܢܘܼܗܪܵܐ ܕܲܬܼܠܝܼܬܼܵܝܘܼܬܼܵܐ ܩܲܕܝܼܫܬܼܵܐ. ܘܐܸܡܲܬܼܝ
                ܡܸܫܬܿܘܸܐ ܒܲܪܢܵܫܵܐ ܠܗܵܕܹܐ ܟ̱ܠܵܗ̇ ܛܲܝܒܿܘܼܬܼܵܐ: ܕܲܒܼܙܲܒܢܵܐ ܕܲܨܠܘܿܬܼܵܐ
                ܠܗܵܕܹܐ ܪܲܒܿܘܼܬܼܵܐ ܡܸܬܼܥܲܠܸܐ: ܐܵܡܲ̇ܪ: ܡܵܐ ܠܲܡ ܕܗܵܘܢܵܐ ܫܵܠܲܚ
                ܠܒܲܪܢܵܫܵܐ ܥܲܬܝܼܩܵܐ: ܘܲܠܚܲܕܼܬܼܵܐ ܒܝܲܕܼ ܛܲܝܒܿܘܼܬܼܵܐ ܠܵܒܹ̇ܫ: ܗܵܝܕܹܝܢ ܐܵܦ
                
                 175 
                
                ܬܲܩܢܘܼܬܹܗ ܒܥܸܕܵܢ ܨܠܘܿܬܼܵܐ ܚܵܙܹ̇ܐ: ܟܲܕܼ ܕܵܡ̇ܝܵܐ ܠܤܲܦܝܼܠܵܐ: ܐܵܘ
                ܠܓܼܵܘܢܵܐ ܕܲܫܡܲܝܵܐ. ܗܵܝ̇ ܕܕܼܘܼܟܿܬܼܵܐ ܕܐܲܠܵܗܵܐ ܡ̣ܢ ܩܲܫܝ̈ܫܹܐ ܕܝܼܤܪܵܝܹܠ
                ܐܸܫܬܲܡܗܲܬ̤: ܕܲܠܗܘܿܢ ܐܸܬܼܚܙܝܲܬ̤ ܒܛܘܼܪܵܐ. ܡܵܕܹܝܢ ܐܲܝܟܼ ܡܵܐ
                ܕܐܸܡ̇ܪܹܬܼ: ܠܵܘ ܨܠܘܿܬܼܵܐ ܪܘܼܚܵܢܵܝܬܼܵܐ ܙܵܕܹܩ ܕܬܸܬܼܩܪܸܐ ܗ̤ܝ ܡܵܘܗܲܒܼܬܼܵܐ:
                ܐܸܠܵܐ ܡܵܢܵܐ؟ ܝܲܠܕܵܐ ܕܲܨܠܘܿܬܼܵܐ ܕܟܼܝܼܬܼܵܐ: ܕܲܒܼܪܘܼܚ ܡܸܬܼܒܲܠܥܵܐ.
                ܡܲܕܥܵܐ ܡܸܟܹܝܠ ܬܲܡܵܢ: ܗܘ̤ܵܐ ܠܹܗ ܠܥܸܠ ܡ̣ܢ ܨܠܘܿܬܼܵܐ. ܘܒܲܫܟܼܵܚܬܼܵܐ
                ܕܐܲܝܕܵܐ ܕܲܡܝܲܬܿܪܵܐ: ܨܠܘܿܬܼܵܐ ܦܵܫܲܬ̤ ܡܸܢܹܗ. ܘܡܸܟܵܐ ܠܵܘ ܡܨܲܠܵܝܘܼ
                ܡܨܲܠܸܐ: ܐܸܠܵܐ ܚܵܘܪܵܐ ܗ̄ܘ̣ ܕܲܒܼܬܸܡܗܵܐ: ܒܨܸܒܼ̈ܘܵܬܼܵܐ ܠܵܐ ܡܸܬܿܕܲܪ̈ܟܵܢܝܵܬܼܵܐ
                ܕܠܵܐ ܡ̣ܢ ܥܵܠܡܵܐ ܕܡܵܝ̈ܘܿܬܹܐ: ܘܲܫܠܸܐ ܒܠܵܐ ܝܑܼܕܲܥܬܼܵܐ ܕܡ̣ܢ ܟܠ
                ܕܲܬܼܢܵܢ. ܗܵܕܲܐ ܗ̣̄ܝ ܠܵܐ ܝܼܕܲܥܬܼܵܐ ܕܐܲܡܝܼܪܵܐ: ܘܗܵܝ̇ ܕܛܘܼܒܼܵܘܗܝ ܠܡ̇ܢ
                ܕܲܡܛ̣ܵܐ ܠܠܵܐ ܝܑܼܕܲܥܬܼܵܐ ܕܠܵܐ ܡܸܬܼܥܲܒܼܪܵܐ: ܕܒܲܨܠܘܿܬܼܵܐ: ܐܲܝܟܼ
                ܕܐܸܡ݂ܲܪ ܐܹܘܲܓܼܪܝܼܣ.