Isaac of Nineveh. “Discourse 23.” Based upon Digital Syriac Corpus. Last modified March 5, 2019. https://syriaccorpus.org/414.
    
        
            
                ܥܲܠ ܢܝܼܫܵܐ ܕܡܲܡܠܠܵܐ ܕܝܼܕܲܥܬܼܵܐ ܕܲܫܪܪܵܐ. ܟܓ.
            
            
                ܟܠܡܸܕܸܡ ܡܸܬܼܪܲܓܼܫܵܢܵܐ: ܐܸܢ ܤܘܼܥܪܵܢܵܐ ܘܐܸܢ ܡܸܠܬܼܵܐ: ܕܸܢܚܵܐ
                ܗ̄ܘ̣ ܕܡܸܕܸܡ ܕܲܟܼܤܸܐ ܠܓܼܵܘ: ܐܸܢ ܠܵܐ ܐܝܼܬܼܵܘܗܝ ܓܸܕܼܫܵܐ ܡܫܲܡܫܵܢܹܗ:
                ܐܸܠܐ ܕܐܲܡܝܼܢܘܼܬܼܵܐ ܗ̄ܘ̣ ܦܘܼܠܚܵܢܹܗ. ܐܸܠܵܐ ܬܪܲܝܵܢܝܼܬܼܵܐ ܗ̣̄ܝ ܕܡܸܬܼܚܲܫܒܵܐ
                ܠܦܘܼܪܥܵܢܘܼܬܼܵܐ: ܩܲܕܼܡܵܝܬܼܵܐ ܕܹܝܢ ܒܨܝܼܪ ܐܵܬܲܝܵܐ ܠܚܘܼܫܒܵܢܵܐ. ܚܲܝܠܬܼܵܢܘܼܬܼܵܐ
                ܟܹܝܬܼ ܐܵܘ ܡܚܝܼܠܘܼܬܼܵܐ ܕܨܸܒܼܝܵܢܵܐ: ܒܤܵܥܘܿܪܘܼܬܼܵܐ ܕܒܼܝܼ̈ܫܵܬܼܵܐ ܐܵܘ ܕܛܵܒܼ̈ܬܼܵܐ:
                ܠܵܘ ܒܓܸܕܼܫܵܢܘܼܬܼܵܐ ܕܲܨܒܼܘܼ ܡܸܬܼܒܲܩܝܵܐ: ܐܸܠܵܐ ܡ̣ܢ ܐܲܡܝܼܢܘܼܬܼ ܗܘܵܝܵܐ
                ܡܸܬܼܢܤܸܒܼ ܒܘܼܩܝܵܐ ܕܚܹܐܪܘܼܬܹܗ. ܝܑܼܗܝܼܒܼ ܫܘܼܠܛܵܢܵܐ ܠܓܸܕܼܫܵܐ: ܘܲܠܥܸܠ
                ܡ̣ܢ ܚܹܐܪܘܼܬܼܵܐ ܨܸܒܼܝܵܢܵܝܬܼܵܐ ܠܡܸܪܕܵܐ ܐܝܼܬܼ ܐܸܡܲܬܼܝ. ܓܸܕܼܫܹ̈ܐ ܡܲܢ ܛܵܒܹ̈ܐ
                
                 176 
                
                ܐܵܘ ܒܝܼ̈ܫܹܐ ܦܵܓܼܥܝܼܢ ܐܸܢܘܿܢ ܒܐ̄ܢܵܫ: ܐܵܘ ܐܲܝܟܼ ܕܲܠܓܼܘܼܪܵܓܼܵܐ: ܐܵܘ
                ܠܒܼܘܼܩܝܵܐ: ܐܵܘ ܠܢܘܼܩܵܦܵܐ: ܐܵܘ ܠܦܘܼܪܥܵܢܵܐ. ܠܓܼܘܼܪܵܓܼܵܐ: ܓܸܕܼܫܵܐ
                ܛܵܒܼܵܐ. ܠܒܼܘܼܩܝܵܐ: ܗܵܘ̇ ܕܡܸܤܬܿܒܲܪ ܒܝܼܫܵܐ. ܠܢܘܼܦܵܩܵܐ ܕܹܝܢ ܘܦܘܼܪܥܵܢܵܐ:
                ܒܲܬܼܪ̈ܲܝܗܘܿܢ ܓܸܕܼܫܹ̈ܐ. ܠܲܝܬܿ ܓܸܕܼܫܵܐ ܕܫܸܓܼܡܵܐ: ܒܫܸܓܼܡܵܐ ܡܸܕܸܡ ܠܐ̄ܢܵܫ
                ܠܵܐ ܓܵܕܹܫ: ܠܵܐ ܕܛܵܒܼ ܘܠܵܐ ܕܒܼܝܼܫ. ܡܕܲܒܿܪܵܢܵܐ ܐܝܼܬܼ: ܕܲܡܕܲܒܲܪ
                ܨܸܒܼ̈ܘܵܬܹܗ ܕܥܵܠܡܵܐ ܗܵܢܵܐ. ܘܢܵܛܘܿܪܵܐ ܐܝܼܬܼ ܥܲܡ ܟܠܚܲܕܼ ܚܲܕܼ
                ܡܸܢܲܢ: ܕܠܵܐ ܛܵܥܹ̇ܐ ܠܹܗ ܡܸܕܸܡ ܘܠܵܐ ܡܸܬܼܡܚܲܠ. ܐܸܠܵܐ ܡܸܬܼܦܲܪܢܵܤܘܼ
                ܡܸܬܼܦܲܪܢܲܣ ܟܠ ܓܸܕܼܫܵܐ: ܡܸܢܹܗ ܕܗܵܘ̇ ܢܵܛܘܿܪܵܐ ܕܲܦܩܝܼܕܼ: ܘܲܒܼܗܵܠܹܝܢ
                ܐܲܪܒܿܥܵܐ ܙܢܲܝ̈ܵܐ: ܗܵܘܹ̇ܐ ܦܘܼܪܢܵܤܹܗ ܠܚܘܼܫܵܚܵܐ܀ ܨܠܘܿܬܼܵܐ ܕܹܝܢ ܕܚܲܫܵܐ:
                ܕܡܲܠܘܬܼܝܼܢ ܠܵܗ̇ ܕܘܼܒܵܪܹ̈ܐ ܕܠܵܚ̇ܡܝܼܢ ܠܚܲܫܝܼܫܘܼܬܼܵܗ̇: ܠܲܙܢܵܢܵܝܘܼܬܼܵܐ ܕܗܵܠܹܝܢ
                ܡܫܲܚܠܦܵܐ: ܘܲܠܦܲܩܚܘܼܬܼܵܐ ܡܲܝܬܿܬܿܝܵܐ. ܟܲܕܼ ܠܛܵܒܼܵܐ ܡܲܢ: ܡܲܥܫܢܵܐ
                ܘܲܡܫܲܪܪܵܐ. ܠܒܼܝܼܫܵܐ ܕܹܝܢ: ܫܘܼܚܠܵܦܵܐ ܕܲܠܩܘܼܒܼܠܵܝܵܐ ܝܵܗ̇ܒܵܐ. ܡܵܕܹܝܢ:
                ܠܵܐ ܬܸܬܼܦܲܠܲܓܼ ܕܐܸܡ̇ܪܹܬܼ: ܕܠܲܝܬ ܓܸܕܼܫܵܐ ܕܫܸܓܼܡܵܐ ܘܲܕܼܠܵܐ ܡܕܲܒܿܪܵܢܵܐ.
                ܐܸܢ ܐܹܝܢ ܡܸܫܟܿܚܵܐ ܗ̣̄ܝ ܨܠܘܿܬܼܵܐ ܕܥܲܡ ܬܲܩܢܘܼܬܼܵܐ ܡܫܲܚܠ̱ܦܵܐ ܐܵܘ
                ܬܵܟܼܤܵܐ: ܡܵܕܹܝܢ ܢܗܲܝܡܸܢ: ܕܲܠܟܼܠ ܓܸܕܼܫܵܐ ܡܕܲܒܿܪܵܢܵܐ ܐܝܼܬܼ ܠܹܗ.
                ܛܘܼܒܼܵܘܗܝ ܠܡܲܢ ܕܦܲܚܸܡ ܟܠ ܓܸܕܼܫܵܐ ܕܲܠܘܵܬܹܗ ܠܟܲܤ̈ܝܵܬܹܗ:
                ܘܥܲܩܸܒܼ ܥܲܠ ܥܸܠܬܹܗ: ܘܲܚ̣ܙܵܐ ܠܲܡܕܲܒܿܪܵܢܹܗ. ܐܲܝܢܵܐ ܕܲܠܘܵܬܼ ܐܲܠܵܗܵܐ
                ܨܸܒܹ̇ܐ ܠܡܸܬܼܚܲܟܵܡܘܼ: ܠܲܝܬܼ ܠܹܗ ܦܘܼܪܤܵܐ: ܐܸܠܵܐ ܐܸܢ ܗܵܘܹ̇ܐ ܫܵܛܘܿܪܵܐ
                ܠܥܵܠܡܵܐ: ܘܗܵܘܹ̇ܐ ܤܵܢܐܵܐ ܠܫܘܼܒܼܚܵܐ ܕܲܒܼܢܲܚܵܐ. ܬܡܝܼܗ ܗ̄ܘ̣ ܒܲܪܢܵܫܵܐ:
                ܕܲܒܼܫܝܼܛܘܼܬܼ ܢܲܦܫܵܐ ܡܚܲܦܸܐ ܪܲܒܿܘܼܬܼܵܐ ܕܦܘܼܠܚܵܢܹܗ. ܒܗܵܢܵܐ: ܡܲܠܲܐܟܹ̈ܐ
                ܡܸܬܿܕܲܡܪܝܼܢ. ܢܵܛܘܿܤܪܹ̈ܐ ܕܙܲܕܝܼܩܘܼܬܼܵܐ ܢܸܬܼܚܲܫܒܿܘܼܢ ܠܵܟܼ: ܒܘܼܨܵܪܹ̈ܐ ܕܠܵܐ
                
                 177 
                
                ܒܨܸܒܼܝܵܢܵܐ: ܕܲܒܼܗܘܿܢ ܡܸܫܬܲܟܼܚܝܼܢ ܒܲܙܒܲܢ ܙܒܲܢ ܐܲܝܠܹܝܢ ܕܲܙܗܝܼܪܝܼܢ.
                ܠܲܝܬܿ ܨܠܘܿܬܼܵܐ ܕܩܲܠܝܼܠܵܐܝܼܬܼ ܡܸܬܼܩܲܒܿܒܠܵܐ: ܐܲܝܟܼ ܗܵܝ̇ ܕܢܸܫܐܲܠ ܐ̄ܢܵܫ
                ܥܲܠ ܬܲܪܥܘܼܬܼܵܐ ܕܲܪ̈ܓܼܝܼܙܵܘܗܝ. ܕܟܲܕܼ ܤܲܟܼܠܘܼܬܼܵܐ ܥܲܠ ܢܲܦܫܹܗ
                ܓܵܙܲܪ: ܕܠܵܐ ܬܘܼܗܵܝ ܡܸܬܼܦܲܢܝܵܐ ܫܸܐܠ̱ܬܼܵܐ ܗܵܕ݂ܹܐ. ܐܸܡܲܬܼܝ ܓܹܝܪ ܕܟܲܕܼ
                ܘܵܠܝܼܬܼܵܐ ܬܫܲܡܠܸܐ: ܘܲܙܗܝܼܪ ܐܲܢ̄ܬܿ ܒܕܝܼܠܵܟܼ: ܬܸܚܙܸܐ ܩܢܘܿܡܵܟܼ ܚܲܠܵܫܵܐ:
                ܘܒܲܤܝܵܐ ܢܲܦܫܵܟܼ ܒܥܲܝܢܲܝ̈ܟܼ: ܘܲܤܢܸܐ ܥܠܲܝܟܼ ܫܘܼܒܼܚܵܐ ܕܲܒܼܢܲܝ̈ܢܵܫܵܐ: ܕܲܥ
                ܕܫܲܪܝܼܪܵܐܝܼܬܼ ܒܐܘܼܪܚܹܗ ܕܐܲܠܵܗܵܐ ܩܵܐܹ̇ܡ ܐܲܢ̄ܬܿ. ܘܐܸܡܲܬܼܝ ܕܲܡܫܲܓܼܢܲܝ
                ܡ̣ܢ ܗܵܕܹܐ ܬܲܪܓܸܫ ܐܲܢ̄ܬܿ ܒܵܟܼ: ܐܸܠܵܐ ܕܹܝܢ ܘܟܲܕܼ ܬܸܓܘܿܫ ܝܵܬܼܵܟܼ
                ܬܸܚܙܸܐ ܕܡܲܟܼܐܒܼܝܼܢ ܠܵܟܼ ܘܗܲܓܵܓܹ̈ܐ ܕܓܼܘܼܢܵܝܵܐ: ܕܲܥ ܕܲܤܪܝܼܩ ܐܲܢ̄ܬܿ
                ܡ̣ܢ ܫܪܵܪܵܐ: ܘܲܠܫܘܼܩܪܵܐ ܓܢܝܼܒܼ ܐܲܢ̄ܬܿ.