Isaac of Nineveh. “Discourse 24.” Based upon Digital Syriac Corpus. Last modified March 5, 2019. https://syriaccorpus.org/415.
    
        
            
                ܥܲܠ ܗܵܠܹܝܢ ܕܡܸܬܼܦܲܪ̈ܢܤܵܢ ܠܘܵܬܼ ܐܲܚܵܐ ܒܓܼܵܘ ܩܸܠܵܝܬܹܗ. ܟܕ.
            
            
                ܙܲܒܼ̈ܝܼܢ ܤܲܓܼܝܼ̈ܐܵܢ ܓܸܕܹܫ ܡܸܨܥܲܬܼ ܫܵܥܹ̈ܐ ܕܐܝܼܡܵܡܵܐ: ܕܐܸܢ ܡܲܠܟܿܘܼܬܼܵܐ
                ܕܐܲܪܥܵܐ ܬܸܬܸܠ ܠܐܲܚܵܐ: ܠܵܐ ܡܸܬܿܛܦܝܼܣ ܒܫܵܥܬܼܵܐ ܗܵܝ̇ ܕܢܸܦܘܿܩ
                ܡ̣ܢ ܩܸܠܵܝܬܹܗ: ܘܠܵܐ ܕܢܸܩܘܿܫ ܠܹܗ ܐ̄ܢܵܫ. ܙܲܒܼܢܵܐ ܐܸܤܬܲܩܒܲܠ ܠܹܗ
                ܕܬܹܐܓܼܘܼܪܬܵܐ: ܡ̣ܢ ܫܹܠܝ. ܘܗܵܠܹܝܢ: ܒܝܵܘ̈ܡܵܬܼܵܐ ܕܡܸܤܬܲܒܼܪܝܼܢ
                ܕܫܲܪܝܘܼܬܼܵܐ ܟܡܵܐ ܙܲܒܼܢ̈ܝܼܢ: ܘܡܲܥܠܵܐ ܘܡܲܦܩܵܐ. ܤܵܥ̇ܪܵܐ ܠܹܗ
                ܡܸܢܫܹܠܝ ܛܲܝܒܿܘܼܬܼܵܐ: ܒܝܲܕܼ ܕܸܡ̈ܥܹܐ ܕܠܵܐ ܟܲܝܠܵܐ: ܐܵܘ ܒܚܲܪܝܼܦܘܼܬܼ
                ܚܲܫܵܐ ܕܢܵܨ̇ܦܵܐ ܒܠܸܒܵܐ: ܐܵܘ ܒܚܲܕܼܘܼܬܼܵܐ ܡܸܕܸܡ ܕܲܕܼܠܵܐ ܥܸܠܬܼܵܐ: ܐܵܘ
                
                 178 
                
                ܒܗܲܢܝܼܐܘܼܬܼܵܐ ܕܲܤܝܵܡ ܒܘܼܪܟܵܐ܀ ܝܵܕܲܥܢܵܐ ܐܲܚܵܐ: ܕܲܩܠܝܼܕܼܵܐ ܪܡ̣ܵܐ
                ܥܲܠ ܬܲܪܥܵܐ ܕܩܸܠܵܝܬܹܗ ܕܢܹܐܤܘܿܪ: ܐܲܝܟܼ ܕܢܸܦܘܿܩ ܢܸܪܥܸܐ ܪܘܼܚܵܐ:
                ܐܲܝܟܼ ܡܸܠܲܝܬܼ ܟܬܼܵܒܼܵܐ: ܘܬܲܡܵܢ ܤܥܲܪܬܹܗ ܛܲܝܒܿܘܼܬܼܵܐ: ܘܲܥܛܲܦ ܒܲܪ
                ܫܵܥܬܹܗ. ܡܵܪܹܝܢ: ܠܵܐ ܐ̄ܢܵܫ ܢܸܥܕܘܼܠ ܠܐܲܚܵܐ: ܐܸܡܲܬܼܝ ܕܲܒܼܝܵܘ̈ܡܬܼܵܐ
                ܕܠܵܐ ܐܲܚܝܼܕܼ ܫܸܠܝܵܐ ܩܵܢܘܿܢܵܝܵܐ: ܢܸܓܼܕܲܫ ܕܲܢܒܲܛܸܠ ܬܸܫܡܸܫܬܼܵܐ
                ܕܲܟܼܢܘܼܫܝܵܐ ܐܝܼܬܼ ܐܸܡܼܬܼܝ. ܝܲܬܿܝܼܪܵܐܝܼܬܼ: ܐܸܢ ܗ̤ܘ ܕܠܵܘ ܡ̣ܢ ܗܵܠܹܝܢ
                ܐܝܼܬܼܵܘܗܝ ܕܲܡܫܲܡܲܗ ܒܒܲܤܝܘܼܬܼܵܐ: ܐܵܘ ܠܥܸܢܝܵܢܹ̈ܐ ܤܦܝܼ̈ܩܹܐ ܡܗܲܓܲܡ:
                ܘܠܵܘ ܒܲܬܼܥܵܫܹ̈ܐ ܦܲܓܼܪ̈ܵܢܵܝܹܐ ܒܲܛܠܵܗ̇. ܝܵܕܼܥ̇ܝܼܢ ܐܢ̄ܬܿܘܿܢ ܐܲܚܲܝ̈:
                ܕܦܘܼܠܚܵܢܲܢ ܠܵܘ ܗܵܢܵܐ ܗ̄ܘ̣ ܒܲܠܚܘܿܕܼ ܕܲܠܥܹܝܢ ܒܢܲܝ̈ܢܵܫܵܐ ܡܸܫܬܲܡܠܸܐ:
                ܐܸܠܵܐ ܐܝܼܬܼ ܠܲܢ ܬܘܼܒܼ ܥ̇ܒܼܵܕܼܵܐ ܕܲܟܼܤܸܐ ܡ̣ܢ ܥܲܝ̈ܢܹܐ ܕܐ̄ܢܵܫܵܐ: ܐܲܝܢܵܐ
                ܕܲܠܫܲܪ̈ܘܵܝܹܐ ܘܲܠܥܵܠܡܵܝܹ̈ܐ ܠܵܐ ܝܑܼܕܼܝܼܥ. ܡܦܵܤܝܼܬܿܘܿܢ ܓܹܝܪ: ܕܲܬܼܚܹܝܬܼ
                ܡܕܲܒܿܪܵܢܘܼܬܼܵܐ ܐܝܼܬܼܵܘܗܝ ܝܑܼܚܝܼܕܼܵܝܵܐ: ܘܠܵܐ ܫܲܠܝܼܛ ܥܲܠ ܝܵܬܹܗ.
                ܗܵܟܲܢܵܐ ܘܐܸܢ ܐ̄ܢܵܫ ܡ̣ܢ ܐܲܚܵܘ̈ܗܝ ܓܕܲܫ̣ ܘܐܸܬܼ݂ܵܐ ܐܲܝܟܼ ܕܢܸܥܘܿܠ
                ܠܘܵܬܹܗ ܘܠܵܐ ܥܢܵܝ̣ܗܝ: ܢܸܥܛܘܿܦ ܒܲܪ ܫܵܥܬܹܗ ܟܲܕܸ ܠܵܐ ܥܵܕ݂ܹܠ
                ܠܐܲܚܘܼܗܝ. ܠܵܐ ܓܹܝܪ ܝܵܕܲܥ̇ ܒܡܵܢ ܐܝܼܬܼܵܘܗܝ ܒܥܸܕܵܢܵܐ ܗܵܘ̇.
                ܩܸܠܵܝܬܹܗ ܕܝܼܚܝܼܕܼܵܝܵܐ ܡܥܲܪܬܼܵܐ ܗ̣̄ܝ ܕܛܲܪܵܢܵܐ: ܐܲܝܟܼ ܡܸܠܲܬܼ ܐܲܒܼ̈ܗܵܬܼܵܐ:
                ܐܲܝܟܵܐ ܕܐܲܠܵܗܵܐ ܡܲܠܸܠ̣ ܥܲܡ ܡܘܼܫܹܐ. ܝܑܼܚܝܼ̈ܕܼܵܝܹܐ ܐܲܝܠܹܝܢ ܕܠܵܐ ܡܢܲܤܹܝܢ
                ܒܦܘܼܠܚܵܢܵܐ ܕܒܲܛܥܵܡܬܼܵܐ ܫܲܪܝܼܪܬܵܐ ܕܫܸܠܝܵܐ: ܠܗܵܠܹܝܢ ܠܵܐ ܝܵܕܼܥܝܼܢ.
                ܘܒܼܵܤܹ̇ܝܢ ܥܲܠ ܐܲܚܲܝ̈ܗܘܿܢ: ܘܕܼܵܝ̇ܢܝܼܢ: ܟܲܕܼ ܬܵܒܼ̇ܥܝܼܢ ܠܗܘܿܢ ܫܲܘܝܘܼܬܼܵܐ
                ܥܲܡܗܘܿܢ ܒܟܼܠ ܐܲܟܼܘܵܬܼܗܘܿܢ.
                	ܐܝܼܬܼ ܬܘܼܒܼ ܐܸܡܲܬܼܝ ܕܲܩܪܵܒܼܵܐ ܡܸܕܸܡ ܐܵܢܲܢܩܵܝܵܐ ܡܸܢܼܦܲܢܲܣ
                
                 179 
                
                ܠܘܵܬܼ ܐܲܚܵܐ ܡܸܢܹܫܠܝ: ܘܐܝܼܬܼܵܘܗܝ ܒܩܹܘܲܢܕܹܝܢܘܿܣ: ܟܲܕܼ ܤܝܼ̈ܡܵܢ
                ܠܹܗ ܐܝܼܕܼܵܘ̈ܗܝ ܒܠܸܒܹܗ: ܕܠܵܐ ܢܸܦܪܲܚ ܠܹܗ. ܘܥܲܠ ܐܲܦܵܘ̈ܗܝ ܪܡܸܐ:
                ܟܲܕܼ ܒܵܥܹ̇ܐ ܡ̣ܢ ܐܲܠܵܗܵܐ. ܘܩܵܠܵܐ ܕܐ̄ܢܵܫ: ܠܵܐ ܡܨܸܐ ܫܵܡܲܥ̇. ܠܗܵܠܹܝܢ
                ܫܘܼ̈ܚܠܵܦܹܐ ܝܵܕܼܥ̇ܝܼܢ: ܐܲܝܠܹܝܢ ܕܡܲܥܒܲܬܵܐ ܗܘ̤ܵܬܼ ܠܗܘܿܢ ܒܝܲܡܵܐ
                ܗܵܢܵܐ: ܘܲܡܦܵܤܝܼܢ ܒܪ̈ܘܼܚܹܐ ܕܢܵܫ̈ܒܵܢ܀ ܘܐܝܼܬܼ ܕܚܘܼܫܵܒܼܵܐ ܕܲܬܼܝܵܒܼܘܼܬܼܵܐ
                ܢܒܲܥ̣ ܠܹܗ: ܘܐܸܬܼܟܲܢܲܫܹ̈ܝܢ ܡܸܢܫܹܠܝ ܩܲܕܼ̈ܡܵܝܵܬܹܗ ܥܲܡ ܥܘܼܗܕܵܢܵܐ
                ܕܥܘܼܢܕܵܢܹܗ: ܘܩ̣ܵܡ ܩܕܼܵܡܵܘܗܝ. ܘܫܸܡܫܵܐ ܗܵܢܵܐ ܢܲܗܝܼܪܵܐ ܚܫܸܟܼ
                ܠܹܗ ܒܐܲܦܵܘ̈ܗܝ: ܘܐܸܬܼܢܫܝܼ ܡ̣ܢ ܠܸܒܹܗ ܟ̱ܠܹܗ ܕܘܼܟܼܪܵܢܹܗ
                ܕܥܵܠܡܵܐ܀ ܘܐܝܼܬܼ ܕܓܲܠܹ̈ܐ ܩܵܡ̣ܘ ܥܠܵܘܗܝ ܡܸܢܫܹܠܝ: ܘܛܸܒܼܥܲܬ̤
                ܐܸܠܦܹܗ ܒܡܲܦ̈ܠܵܬܵܐ ܟܲܤ̈ܝܵܬܼܵܐ. ܗܵܠܹܝܢ ܕܠܵܘ ܠܟܼܠܢܵܫ ܝܑܼܕܼܝ̈ܥܵܢ:
                ܕܥܵܪ݁ܨܵܐ ܥܲܠ ܝܑܼܚܝܼܕܼܵܝܵܐ ܒܓܼܵܘ ܫܸܠܝܵܐ ܕܠܵܐ ܤܘܼܟܵܝ: ܒܲܩܪ̈ܵܒܼܵܘܗܝ
                ܬܲܩܝܼ̈ܦܹܐ ܕܤܵܛܵܢܵܐ: ܘܐܝܼܬܼ ܠܹܗ ܒܹܝܬܼ ܒܵܟܹ̈ܐ ܒܩܸܠܵܝܬܹܗ. ܤܲܓܝܼܐܝܼܢ
                ܐܸܢܘܿܢ ܫܘܼ̈ܚܠܵܦܹܐ ܕܝܲܡܵܐ ܗܵܢܵܐ: ܘܡܲܢ̣ܘܼ ܝܵܕܲܥ̇ ܠܥܲܡܠܵܘ̈ܗܝ
                ܘܲܠܤܘܿܓܼܵܐܐ ܕܬܹܐܓܼܘܼܪܬܹܗ: ܘܲܠܡܲܪ̈ܓܵܢܝܵܬܼܵܐ ܬܡܝܼ̈ܗܵܬܼܵܐ ܕܲܒܼܓܼܵܘ
                ܥܘܼܡܩܹܗ: ܘܲܠܚܲܝ̈ܘܵܬܼܵܐ ܕܡ̣ܢ ܓܵܘܹܗ ܤܵܠ̈ܩܵܢ؟ ܛܘܼܒܼܵܘܗܝ ܠܡܲܢ
                ܕܠܵܐ ܢ̣ܵܡ ܒܟܼܠܵܗ̇ ܡܲܪܕܝܼܬܹܗ: ܥܕܲܡܵܐ ܠܲܠܡܹܐܝܢ ܥܘܼܢܕܵܢܵܐ. ܠܲܝܬܿ
                ܐ̄ܢܵܫ ܕܲܠܡܸܕܸܡ ܡܲܚܸܒܼ: ܘܠܵܘ ܘܐܵܦ ܠܥܲܠ̈ܠܵܬܹܗ ܡܪܲܒܸܿܐ. ܠܵܐ
                ܐ̄ܢܵܫ ܐܸܫܟܲܚ ܥܢܸܐ ܒܐܲܠܵܗܵܝ̈ܬܼܵܐ: ܐܸܠܵܐ ܐܸܢ ܐܲܪܚܸܩ ܘܒܲܤܲܪ ܥܲܠ
                ܙܲܒܼ̈ܢܵܢܵܝܵܬܼܵܐ. ܟܲܕܼ ܐܸܬܼܢܲܟܼܪܝܼ ܠܐܝܼܩܵܪ ܥܵܠܡܵܐ ܘܗܲܢܝܼ̈ܐܵܬܹܗ: ܘܐܸܬܼܢ̱ܩܸܦ
                ܠܨܲܥܪܹܗ ܕܲܨܠܝܼܒܼܵܐ. ܟܲܕܼ ܡ̣ܢ ܚܲܫܹ̈ܐ ܘܐ̄ܢܵܫܵܐ ܘܫܹ̈ܐܕܹܐ ܘܡܸܤܟܹܢܘܼܬܼܵܐ:
                ܫܵܬܹ̇ܐ ܟܠܝܘܿܡ ܚܲܠܵܐ ܘܲܡܪܵܪܹ̈ܐ܀
                	ܐܸܬܼܟܲܫܲܪ ܐܵܚܝ: ܘܲܗ̤ܘܝܼ ܐܲܝܟܼ ܬܲܓܵܪܵܐ ܚܲܟܿܝܼܡܵܐ: ܟܲܕܼ ܛܥܝܼܢ
                
                 180 
                
                ܐܲܢ̄ܬܿ ܠܡܲܪܓܵܢܝܼܬܼܵܟܼ ܘܦܵܗܹ̇ܐ ܒܬܹܒܹܝܠ: ܕܠܵܐ ܢܸܫܬܲܟܲܪ ܫܘܼܦܪܵܐ
                ܕܙܲܗܝܘܼܬܼܵܗ̇: ܐܸܙܕܲܗ̄ܪ ܕܲܠܡܵܐ ܬܸܬܼܓܢܸܒܼ ܡܸܢܵܟܼ ܒܝܲܕܼ ܪܲܦܝܘܼܬܼܵܟܼ:
                ܘܲܒܼܥܵܩܬܼܵܐ ܬܸܥܘܿܠ ܠܲܫܝܘܿܠ. ܗܲܪܛ ܒܵܬܲܪ ܒܘܼܝܵܐܵܐ ܙܥܘܿܪܵܐ
                ܕܡܸܬܼܩܢܸܐ ܡ̣ܢ ܥܲܡܠܵܐ ܐܲܝܟܼ ܙܲܒܼܢܹܗ: ܕܬܸܫܬܿܘܸܐ ܠܗܵܘ̇ ܒܘܼܝܵܐܵܐ
                ܪܲܒܵܐ: ܕܲܡܦܝܼܫ ܡ̣ܢ ܛܘܼܪ̈ܵܦܹܐ ܒܥܘܼܡܪܵܐ ܗܵܢܵܐ ܕܥܵܩ̈ܵܬܵܐ ܠܐܲܝܠܹܝܢ
                ܕܐܸܫܟܿܚܘܼܗܝ. ܠܵܐ ܬܲܤܠܸܐ ܠܲܙܥܘܿܪ̈ܝܵܬܼܵܐ: ܕܠܵܐ ܬܸܬܼܓܠܸܙ ܡ̣ܢ
                ܪܵܘܪ̈ܒܼܵܬܼܵܐ. ܠܵܐ ܡܸܡܬܼܘܿܡ ܚ̣ܙܵܐ ܐ̄ܢܵܫ ܛܲܠܝܵܐ ܕܚܲܠܒܼܵܐ ܝܵܢܹ̇ܩ:
                ܒܸܤܪܵܐ ܤܵܡ̣ ܒܦܘܼܡܹܗ. ܒܝܲܕܼ ܙܥܘܿܪ̈ܝܵܬܼܵܐ: ܡܸܬܼܦܬܲܚ ܬܲܪܥܵܐ
                ܠܪܵܘܪ̈ܒܼܵܬܼܵܐ. ܠܐܲܠܵܗܵܐ ܡܨܲܥܲܪ ܐܲܢ̄ܬܿ ܐܵܚܝ: ܕܲܕܠܵܐ ܒܛܲܟܼܤܵܐ ܪܵܐܹܓܼ
                ܐܲܢ̄ܬܿ ܕܲܢܕܲܒܿܪܵܟܼ. ܠܵܐ ܐ̄ܢܵܫ ܐܸܬܼܗܲܝܡܲܢ ܪܵܘܪ̈ܒܼܵܬܼܵܐ: ܐܸܠܵܐ ܠܘܼܩܕܲܡ
                ܒܲܒܼܨܝܼܪ̈ܵܬܼܵܐ ܐܸܬܼܢܲܤܝܼ. ܗܵܕܹܐ ܤܝܼܡ ܒܠܸܒܵܟܼ ܐܵܚܝ: ܘܐܸܬܿܕܲܟܲܪܲܝܢܝ
                ܒܙܲܒܼܢܵܗ̇. ܕܟܼܠ ܐܵܘܢܵܐ ܕܠܲܡܚܵܪ ܡܵܛܹ̇ܐ ܐܲܢ̄ܬܿ ܠܹܗ ܒܐܘܼܪܚܵܐ ܗܵܕܹܐ
                ܕܲܡܝܲܬܿܪܘܼܬܼܵܐ ܘܕܼܝܼܕܲܥܬܼܵܐ ܕܲܫܪܵܪܵܐ: ܫܒܼܝܼܚ ܘܲܡܝܲܬܲܪ ܬܸܫܟܚܝܼܘܗܝ:
                ܡ̣ܢ ܐܲܝܠܹܝܢ ܕܒܼܵܬܬܿ ܒܗܘܿܢ ܐܸܬܼܡܵܠܝ. ܫܲܢ̣ܝܬܿ ܡܲܢ: ܘܲܬܼܡܲܗܬܿ
                ܒܫܘܼܦܪܹ̈ܐ ܕܐܵܘܢܵܐ ܕܝܵܘܡܵܢ ܠܹܗ ܥܲܠ̣ܬܿ. ܡܸܬܼܒܿܠܲܥ ܕܹܝܢ ܫܘܼܦܪܵܐ
                ܕܗܵܢܵܐ: ܒܗܵܘ̇ ܕܠܲܡܚܵܪ ܥܬܼܝܼܕܼ ܐܲܢ̄ܬܿ ܠܡܸܦܓܲܥ. ܡܲܢ̣ܘܼ ܐܲܪܓܸܫ̣
                ܒܫܘܼ̈ܚܠܵܦܹܐ ܗܲܢܝܼ̈ܐܹܐ ܕܪܸܥܝܵܢܵܐ؟ ܨܲܠܵܐ ܒܲܠܚܘܿܕܼ: ܕܬܲܪܥܵܐ ܢܸܬܼܦܬܲܚ
                ܩܕܼܵܡܲܝܟ. ܐܸܙܕܲܗ̄ܪ ܡ̣ܢ ܦܤܵܩ ܤܲܒܼܪܵܐ. ܠܵܘ ܠܘܵܬܼ ܛܪܘܼܢܵܐ
                ܦܵܠܲܚ ܐܲܢ̄ܬܿ: ܠܘܵܬܼ ܡܵܪܵܐ ܒܲܤܝܼܡܵܐ ܐܝܼܬܼܵܘܗܝ ܦܘܼܠܚܵܢܵܟܼ. ܗܵܘ̇
                ܕܟܲܕܼ ܠܵܐ ܫܩܲܠ̣ ܡܸܢܵܟܼ ܡܸܕܸܡ: ܝܲܗ̣̄ܒܼܠܵܟܼ ܟܠܡܸܕܸܡ. ܘܟܲܕܼ
                ܠܵܐ ܗ̤ܘܲܝܬܿ ܠܲܓܼܡܵܪ: ܥܲܒܼܕܵܟܼ ܕܬܸܗܘܸܐ ܒܗܵܕܹܐ ܕܐܝܼܬܲܝܟ. ܐܵܦܸܢ
                ܒܗܵܕܹܐ ܕܐܲܝܬܿܝܲܢ ܠܲܗܘܵܝܵܐ: ܡܲܢ̣ܘܼ ܡܵܘܦܸܐ ܠܛܲܝܒܿܘܼܬܹܗ܀ ܐܘܿ
                
                 181 
                
                ܠܛܲܝܒܿܘܼܬܼܵܐ ܕܠܵܐ ܡܸܬܼܡܲܫܚܵܐ! ܡܲܢ̣ܘܼ ܤܵܦܹ̇ܩ ܠܬܸܫ̈ܒܿܚܵܬܹܗ:
                ܕܝܲܗ̣̄ܒܼܠܲܢ ܝܑܼܕܲܥܬܵܐ ܕܟܼܠܡܸܕܸܡ؟ ܠܵܘ ܒܲܠܚܘܿܕܼ ܕܐܲܝܠܹܝܢ ܕܓܲܠ̈ܝܵܢ:
                ܐܸܠܵܐ ܐܵܦ ܕܐܲܝܠܹܝܢ ܕܟܲܤ̈ܝܵܢ. ܕܢܸܕܲܥ ܕܐܝܼܬܼ ܗ̄ܘ̣ ܡܸܕܸܡ ܕܟܲܕܼ ܠܵܐ
                ܝܵܕܼܥܝܼܢܲܢ ܠܹܗ: ܤܝܼܢܩܝܼܢܲܢ ܕܢܸܫܐܲܠ ܡܸܢܹܗ. ܘܡܲܢ̣ܘܼ ܐܲܠܦ̣ܵܟܼ ܒܲܪ
                ܡܵܝ̈ܘܿܬܹܐ: ܕܗܵܘ̇ ܡܵܐ ܕܠܲܝܬܹܝܗ̇ ܒܲܟܼܝܵܢܵܟܼ ܝܑܼܕܲܥܬܹܗ: ܬܸܬܿܙܝܼܥ
                ܒܪܸܚܡ̱ܬܵܐ ܕܲܒܼܥܵܬܹܗ؟ ܠܵܐ ܡܬܼܘܿܡ ܬܸܒܼܥܸܐ ܒܘܼܝܵܐܵܐ: ܕܲܠܒܲܪ ܡ̣ܢ
                ܠܸܒܵܐ ܤܝܼܡ: ܕܐܝܼܬܼܵܘܗܝ ܝܑܼܕܲܥܬܼܵܐ ܕܦܘܼܪ̈ܫܵܢܹܐ. ܐܸܬܼܥܲܠܵܐ ܡ̣ܢ ܟܠ
                ܒܘܼܝܵܐܵܐ ܕܪܸ̈ܓܼܫܹܐ ܡܫܲܡܫܵܢܵܘ̈ܗܝ: ܕܬܸܫܬܿܘܸܐ ܠܗܵܘ̇ ܕܲܠܓܼܵܘ ܡ̣ܢ
                ܗܵܠܹܝܢ ܡܸܬܼܩܢܸܐ. ܝܑܼܚܝܼܕܼܵܝܵܐ ܕܐܸܬܼܢܲܟܼܪܝܼ ܠܒܘܼܝܵܐܵܐ ܕܥܵܠܡܵܐ: ܘܠܵܐ
                ܡܤܲܟܸܿܐ ܟܠܝܘܿܡ ܠܒܼܘܼܝܵܐܵܐ ܕܲܡܫܝܼܚܵܐ: ܡܝܼܬܼܵܐ ܗ̄ܘ̣ ܒܚܲܝܘܼܬܹܗ܀
                	ܡܪܲܚܡܵܢܵܐ ܗ̄ܘ̣ ܓܹܝܪ ܐܲܠܵܗܵܐ: ܐܵܦ ܡܲܚܸܒܼ ܕܢܸܬܸܠ: ܐܸܠܵܐ ܨܵܒܹ̇ܐ
                ܕܲܚܢܲܢ ܢܸܗܘܸܐ ܥܸܠܬܼܵܐ. ܚܵܕܹܐ ܓܹܝܪ: ܐܸܡܲܬܼܝ ܕܐ̄ܢܵܫ ܨܠܘܼܬܼܵܐ ܚܲܟܿܝܼܡܬܼܵܐ
                ܢܩܲܪܸܒܼ ܠܹܗ. ܐܸܬܸܿܐ ܗ̣̄ܝ ܕܫܲܪܝܼ ܡܸܬܼܚܠܸܡ ܡ̣ܢ ܟܘܼܗܵܢܵܐ:
                ܐܸܡܲܬܼܝ ܕܲܠܟܲܤ̈ܝܵܬܼܵܐ ܪܵܐܹ̇ܓܼ. ܡܬܲܗܸܐ ܕܹܝܢ: ܟܲܕܼ ܚܵܐܲܪ ܠܚܘܼܠܡܵܢܹܗ
                ܚܲܬܝܼܬܼܵܐ. ܚܲܒܼܪܵܐ ܗ̄ܘ̣ ܕܐܲܝܢܵܐ ܕܡܲܡܐܸܢ ܠܡܸܫܐܲܠ: ܗܵܘ̇ ܐܲܝܢܵܐ
                ܕܲܡܩܲܛܲܥ ܡܵܐ ܕܡܸܬܿܬܲܗܸܐ. ܡܲܐܝܼܢܘܼܬܼܵܐ: ܡܲܥܒܿܪܵܐ ܫܸܐܠ̱ܬܼܵܐ ܕܲܨܠܘܿܬܼܵܐ.
                ܗܵܢܵܘ ܕܹܝܢ. ܟܵܠ̇ܝܵܐ ܡ̣ܢ ܕܬܸܫܐܲܠ. ܩܘܼܛܵܥܵܐ ܕܹܝܢ: ܦܵܤܹ̇ܩ: ܕܠܵܐ
                ܬܵܘܪܟܼܝܼܗ̇ ܘܬܼܵܘܚܲܪ ܒܵܗ̇ ܒܫܸܐܬܼܵܐ: ܡܤܲܝܒܪܵܢܘܼܬܼܵܐ
                ܡܲܩܢܸܐ. ܘܒܼܵܗ̇ ܒܲܨܠܘܿܬܼܵܐ ܕܢܸܫܬܵܘܚܲܪ: ܡܓܲܪܸܓ. ܤܘܼܟܵܝܵܐ: ܡܲܩܸܠ
                ܝܘܼܩܪܵܐ ܕܠܹܐܘܬܼܵܐ ܡ̣ܢ ܗܲܕܵܡܹ̈ܐ. ܝܵܕܲܥ̇ ܕܹܝܢ: ܘܲܠܡܸܬܲܠ ܠܠܸܒܵܐ
                ܢܝܵܚܵܐ ܒܐܘܼܠܨܵܢܵܘ̈ܗܝ. ܠܲܝܬܿ ܡܵܘܒܿܠܵܐ ܕܗܲܢ̣ܝܼ ܝܘܼܩܪܵܗ̇: ܡ̣ܢ
                ܥܲܡܠܵܐ ܕܥܲܡ ܗܵܢܵܐ. ܠܲܝܬܿ ܒܲܪ ܠܘܝܼܬܼܵܐ: ܕܲܪܓܼܝܼܓܼ ܥܸܢܝܵܢܹܗ ܡ̣ܢ
                
                 182 
                
                ܕܝܼܠܹܗ. ܒܹܝܬܼ ܐܲܤܝܼܪܹ̈ܐ: ܗܲܢܝܼ ܠܡܸܥܡܲܪ ܥܲܡܹܗ. ܥܒܸܕܲܝܗܝ ܠܗܵܢܵܐ
                ܒܲܪ ܥܸܢܝܵܢܵܟܼ: ܐܘܿ ܐܲܚܵܐ ܬܲܝܵܒܼܵܐ: ܘܠܵܐ ܡܲܪܓܫܵܢܵܐ ܬܸܗܘܸܐ ܒܟܼܠܗܘܿܢ
                ܥܲܡ̈ܠܹܐ ܕܐܵܓܼܘܿܢܵܟܼ. ܐܸܢ ܒܩܸܠܵܝܬܵܟܼ ܬܸܗܘܸܐ: ܥܲܡܵܟܼ ܢܸܗܘܸܐ. ܘܒܹܝܬܼ
                ܒܢܲܝ̈ܢܵܫܵܐ ܐܸܢ ܬܸܫܬܿܟܲܚ: ܒܹܗ ܐܲܩܸܬܼ ܪܸܥܝܵܢܵܟܼ. ܘܠܵܐ ܡܸܡܬܼܘܿܡ
                ܦܵܗܹ̇ܐ ܠܸܒܵܟܼ ܒܡܸܕܸܡ ܕܬܹܒܹܝܠ: ܢܘܼܟܼܪܵܝܵܐ ܢܸܫܬܿܟܲܚ ܠܵܟܼ ܥܵܠܡܵܐ
                ܘܟܼܠ ܕܒܹܗ. ܘܐܸܢ ܬܸܕܼܡܲܝܟܼ: ܒܲܪ ܬܸܫܘܝܼܬܼܵܟܼ ܥܒܸܕܲܝܗܝ. ܘܲܥܕܲܡܵܐ
                ܕܛܵܒܲܥ̇ ܐܲܢ̄ܬܿ ܒܫܸܢܬܼܵܐ: ܒܹܗ ܬܸܬܼܥܢܸܐ. ܘܡܸܕܹܡ ܚܘܼܫܵܒܼܵܐ ܡܫܲܟܿܪܵܐ:
                ܠܠܸܒܵܟܼ ܠܵܐ ܩܵܪܹܒܼ. ܡܸܛܠ ܕܲܕܼܠܵܐ ܗܘܼܠܹ̈ܐ ܗ̄ܘ̣ ܥܸܢܝܵܢܵܟܼ. ܡܸܕܸܡ
                ܢܝܼܫܵܐ ܕܗܘܼܠܹ̈ܐ ܛܥܝܼܢ: ܕܲܒܼܚܸܙܘܹܗ ܡܙܝܼܥ ܠܪܸܥܝܵܢܵܐ: ܠܵܐ ܡܸܫܟܲܚ
                ܕܢܸܬܼܚܵܘܸܐ ܬܲܡܵܢ. ܘܚܘܼܫܵܒܼܵܐ ܫܹܐܕܼܵܢܵܝܵܐ: ܠܒܲܪ ܡ̣ܢ ܗܘܼܠܵܢܵܝܘܼܬܼ
                ܚܸܙܘܵܐ: ܕܲܢܚܵܘܸܐ ܩܢܘܿܡܹܗ ܠܵܐ ܝܵܕܲܥ܀ ܡܲܓܿܪܲܬܼ ܪܘܼܚܵܐ ܕܒܲܨܠܘܿܬܼܵܐ:
                ܦܹܐܪܵܐ ܕܚܲܝܹ̈ܐ ܡܸܢܵܗ̇ ܡܕܝܼܩ. ܘܤܘܼܟܵܝܵܐ: ܡܥܲܕܪܵܢܵܐ ܗ̄ܘ̣ ܒܲܨܠܘܿܬܼܵܐ
                ܠܐܵܚܘܿܕܼܵܘ̈ܗܝ. ܡܵܐ ܕܲܡܨܲܠܸܐ ܐܲܢ̄ܬܿ: ܐܸܬܿܕܲܟܼܪ ܠܐܲܟܵܪܵܐ ܕܙܵܪܲܥ ܥܲܠ
                ܤܲܒܼܪܵܐ. ܘܗܵܘ̇ ܕܲܡܦܲܢܸܐ ܒܐܲܥܦܹ̈ܐ ܠܙܲܪܥܹܗ ܕܐܲܟܵܪܵܐ ܕܫܵܕܹܐ
                ܒܗܲܝܡܵܢܘܼܬܼܵܐ: ܘܐܵܘܪܒܼܵܗ̇ ܠܫܹܐܠܲܬܼ ܡܲܠܟܿܘܼܬܹܗ ܘܙܲܕܝܼܩܘܼܬܹܗ
                ܝܲܬܝܼܪ ܡ̣ܢ ܙܲܒܼ̈ܢܵܢܵܝܵܬܼܵܐ: ܗ̤ܘ ܡܸܬܼܦܢܸܐ ܥܲܠ ܫܸܐ̈ܠܵܬܲܢ ܐܲܝܟܼ
                ܫܘܼܘܕܵܝܹܗ. ܐܵܡܹܝܢ.