Isaac of Nineveh. “Discourse 27.” Based upon Digital Syriac Corpus. Last modified March 5, 2019. https://syriaccorpus.org/418.
    
        
            
                 195 
                ܕܒܲܟܼܡܵܐ ܦܘܼܪ̈ܫܵܢܹܐ ܡܸܬܼܩܲܒܿܠܵܐ ܚܙܵܬܼܵܐ ܕܠܵܐ ܓܫܝܼ̈ܡܹܐ ܠܲܟܼܝܵܢܵܐ
                ܐ̄ܢܵܫܵܝܵܐ. ܟܙ.
            
            
                ܟܠ ܟܝܵܢܹ̈ܐ ܡܲܢ ܗܵܟܹܝܠ ܠܵܐ ܡܚܲܝ̈ܕܹܐ ܘܩܲܛܝܼ̈ܢܹܐ ܡ̣ܢ ܓܘܼܫ̈ܡܹܐ
                ܝܲܕܘܼ̈ܥܬܼܵܢܹܐ ܟܹܝܬܼ: ܒܲܬܼܠܵܬܼܵܐ ܙܢܲܝ̈ܵܐ ܢܵܦ̇ܠܵܐ ܡܸܬܿܕܲܪܟܵܢܘܼܬܼܗܘܿܢ ܬܚܹܝܬܼ
                ܓܸܫܬܼܵܐ ܕܲܟܼܝܵܢܵܐ ܐ̄ܢܵܫܵܝܵܐ. ܒܥܲܒܼܝܘܼܬܼ ܩܢܘܿܡܹ̈ܐ ܕܠܵܐ ܐܘܼܤܝܼܵܐ:
                ܘܲܒܼܩܲܛܝܼܢܘܼܬܼ ܩܢܘܿܡܹ̈ܐ ܕܠܵܐ ܠܘܼܤܝܼܵܐ: ܘܲܒܼܬܹܐܘܿܪܝܼܵܐ ܕܩܘܼܫܬܼܵܐ:
                ܕܗ̤ܝ ܗ̣̄ܝ ܚܙܵܬܼܵܐ ܐܘܼܤܝܼܚܵܐ. ܘܥܲܠ ܚܲܕܼ: ܫܲܠܝܼܛܝܼܢ ܪܸ̈ܓܼܫܹܐ. ܘܥܲܠ
                ܐ̄ܚܪܹܢܵܐ: ܫܚܝܼܡܘܼܬܼ ܚܵܘܪܵܐ ܢܲܦܫܵܢܵܝܵܐ. ܘܥܲܠ ܬܠܝܼܬܼܵܝܵܐ: ܚܲܝܠܵܐ
                ܟܝܵܢܵܝܵܐ ܕܪܸܥܝܵܢܵܐ. ܘܬܘܼܒܼ ܥܲܠ ܚܲܕܼ ܡܸܢܗܘܿܢ ܫܲܠܝܼܛ ܨܸܒܼܝܵܢܵܐ:
                ܘܪܸܥܝܵܢܵܐ. ܘܥܲܠ ܚܲܕܼ ܨܸܒܼܝܵܢܵܐ: ܘܢܘܼܗܪܵܐ ܢܲܦܫܵܢܵܝܵܐ: ܘܗܵܘ̇ ܕܲܠܗܵܢܵܐ
                ܡܚܲܝܸܠ. ܨܸܒܼܝܵܢܵܐ ܡܲܢ ܠܘܼܩܕܲܡ ܥܸܠܬܼܵܐ: ܘܗܵܠܹܝܢ ܝܲܠܕܹ̈ܐ
                ܕܚܹܐܪܘܼܬܼܵܐ: ܐܵܦܸܢ ܒܥܸܕܵܢܵܐ ܕܲܚܫܲܚܬܼܵܐ ܡܸܫܬܲܠܝܵܐ ܚܹܐܪܘܼܬܼܵܐ ܘܨܸܒܼܝܵܢܵܐ:
                ܟܡܵܐ ܕܲܠܡܲܥܒܿܕܼܵܢܘܼܬܼܵܐ ܐܲܬܼܪܵܐ ܐܝܼܬܼ ܘܩܲܝܡܵܐ ܬܲܡܵܢ. ܘܥܲܠ ܚܲܕܼ
                ܗ̤ܘ ܡܚܵܘܝܵܢܵܐ ܒܲܠܚܘܿܕܼܵܘܗܝ ܐܵܦ ܒܸܠܥܵܕܼ ܨܸܒܼܝܵܢܵܐ ܕܡܩܲܒܿܠܵܢܹ̈ܐ:
                ܘܝܼܕܲܥܬܼܵܐ ܩܘܼܫܬܵܢܵܝܬܼܵܐ. ܡܸܛܠ ܕܪܸ̈ܓܼܫܹܐ: ܡܩܲܒܿܠܵܢܹ̈ܐ ܐܸܢܘܿܢ
                ܕܟܼܠ ܓܸܕܼܫܹ̈ܐ: ܘܐܵܦ ܒܸܠܥܵܕܼ ܨܸܒܼܝܵܢܵܐ܀ ܠܗܘܿܢ  ܠܲܙܢܲܝ̈ܵܐ ܬܠܵܬܼܵܐ
                ܗܵܠܹܝܢ: ܡܫܲܡܫܝܼܢ ܚܲܝ̈ܠܹܐ ܩܲܕܝܼ̈ܫܹܐ ܒܚܘܼܠܛܵܢܗܘܿܢ ܕܥܲܡܲܢ:
                ܠܝܘܼܠܦܵܢܵܐ ܕܝܼܠܲܢ ܘܠܲܫܟܼܵܚܬܼܵܐ ܕܚܲܝܲܝ̈ܢ. ܗܵܢܘܿܢ ܕܹܝܢ ܛܲܡ̈ܐܹܐ:
                ܠܲܬܼܪܹܝܢ ܡ̣ܢ ܗܵܠܹܝܢ ܐܝܼܬܼ ܠܗܘܿܢ ܚܲܝܠܵܐ ܠܲܡܫܲܡܵܫܘܼ: ܘܲܠܡܸܬܼܚܲܫܵܚܘܼ
                ܒܗܘܿܢ ܒܩܘܼܪܵܒܼܗܘܿܢ ܕܲܠܘܵܬܲܢ. ܠܐܲܒܼܕܵܢܵܐ: ܘܠܵܐ ܗ̄ܘ̣ܵܐ ܠܝܘܼܬܼܪܵܢܵܐ.
                
                 196 
                
                ܠܲܙܢܵܐ ܡܲܢ ܬܠܝܼܬܼܵܝܵܐ: ܠܵܐ ܡܸܫܟܿܚܝܼܢ ܩܵܪܒܿܝܼܢ ܠܡܸܬܼܚܲܫܵܚܘܼ ܒܹܗ:
                ܐܲܝܟܼ ܕܢܸܬܼܡܨܘܿܢ ܕܐܵܦ ܒܗܵܕܹܐ ܢܲܛܥܘܿܢܵܢ. ܠܲܝܬܿ ܓܹܝܪ ܠܲܒܼܢܲܝ̈
                ܚܸܫܘܿܟܼܵܐ: ܠܡܸܬܼܩܲܪܵܒܼܘܼ ܠܢܘܼܗܪܵܐ. ܡܸܛܠ ܠܲܡ ܕܫܹ̈ܐܕܹܐ ܠܵܐ ܩܢܹܝܢ
                ܚܲܝܠܵܐ: ܠܲܡܙܵܥܘܼ ܤܘܼ̈ܟܵܠܹܐ ܟܝܵܢܵܝܹ̈ܐ ܒܗܵܘܢܵܐ. ܡܲܠܲܐܟܹ̈ܐ ܕܹܝܢ ܩܲܕܝܼ̈ܫܹܐ
                ܩܢܹܝܢ ܠܵܗ̇ ܠܗܵܕܹܐ: ܠܲܡܙܵܥܘܼ ܘܲܠܡܲܢܗܵܪܘܼ. ܗܵܢܘܿܢ ܕܹܝܢ:
                ܠܤܘܼ̈ܟܵܠܹܐ ܕܲܓܵܠܹ̈ܐ: ܝܲܠܕܹ̈ܐ ܕܚܸܫܘܿܟܼܵܐ ܩܢܹܝܢ ܚܲܝܠܵܐ ܘܫܘܼܠܛܵܢܵܐ.
                ܡ̣ܢ ܢܲܗܝܼܪܹ̈ܐ ܢܘܼܗܪܵܐ ܢܵܤܹ̇ܒܼ ܡܩܲܒܿܠܵܢܵܐ: ܘܡ̣ܢ ܚܸܫ̈ܘܿܟܸܐ ܚܸܫܟܵܐ.
                ܘܡܵܢܲܐ ܗ̣̄ܝ ܥܸܠܬܼܵܐ ܕܲܠܗܵܢܘܿܢ ܝܑܼܗܝܼܒܼܵܐ ܗܵܕܹܐ: ܘܲܠܗܵܠܹܝܢ ܠܵܐ؟ ܟܠ
                ܚܲܕܼ ܡ̣ܢ ܗܵܠܹܝܢ ܡܲܠܦܵܢܹ̈ܐ: ܤܘܼܟܵܠܵܐ ܕܲܡܚܵܘܸܐ ܟܠܚܲܕܼ ܚܲܕܼ
                ܘܡܲܠܸܦ: ܠܘܼܩܕܲܡ ܗ̤ܘ ܚܵܙܹ̇ܐ ܒܲܩܢܘܿܡܹܗ ܘܝܵܠܹ̇ܦ ܘܛܵܥܹ̇ܡ:
                ܘܗܵܝܕܹܝܢ ܡܸܫܟܲܚ ܠܲܡܝܼܒܵܠܘܼ ܠܘܵܬܼ ܝܵܠܘܿܦܹ̈ܐ. ܡܲܠܦܵܢܲܝ̈ܢ ܡܲܢ
                ܗܵܠܹܝܢ ܩܲܕܼܡܵܝܹ̈ܐ: ܠܹܗ ܠܲܫܪܵܪܗܹܝܢ ܕܨܸܒܼ̈ܘܵܬܼܵܐ ܡ̣ܢ ܝܑܼܕܲܥܬܼܗܘܿܢ
                ܫܲܪܝܼܪܬܵܐ ܕܲܥܠܲܝܗܹܝܢ ܡܝܲܒܿܠܝܼܢ ܠܘܵܬܲܢ: ܗܵܘ̇ ܕܗܸܢܘܿܢ ܠܘܼܩܕܲܡ
                ܡܸܫܟܿܚܝܼܢ: ܒܡܲܕܼܪܟܼܵܢܘܼܬܼܵܐ ܚܲܪܝܼܦܬܼܵܐ ܕܗܵܘܢܵܐ ܩܲܠܝܼܠܵܐ ܘܕܲܟܼܝܵܐ܀
                ܘܫܹ̈ܐܕܹܐ ܩܢܹܝܢ ܚܲܪܝܼܦܘܼܬܼܵܐ: ܠܵܐ ܘܐܵܦ ܢܲܗܝܼܪܘܼܬܼܵܐ ܒܪܲܡ. ܐ̄ܚܪܹܬܼܵܐ
                ܗ̣̄ܝ ܚܲܪܝܼܦܘܼܬܼܵܐ: ܘܲܐ̄ܚܪܹܬܼܵܐ ܢܲܗܝܼܪܘܼܬܼܵܐ. ܩܲܕܼܡܵܝܬܼܵܐ: ܒܸܠܥܵܕܼ
                ܕܬܲܪܬܹܝܢ: ܠܲܫܪܵܪܵܐ ܡܚܵܘܝܵܐ. ܗܵܝ̇ ܡܲܢ: ܠܕܼܘܼܡܝܵܐ ܕܝܼܠܵܗ̇. ܡܸܛܠ
                ܕܢܘܼܗܪܵܐ: ܡܚܵܘܝܵܢܵܐ ܗ̣̄ܘ ܕܟܼܠ ܚܲܬܝܼܬܼܘܼܬܼ ܨܒܼܝܼܬܼܵܐ: ܘܡ̣ܢ
                ܦܸܚܡܵܐ ܕܕܼܘܼܒܵܪܹ̈ܐ ܤܵܓܹ̇ܐ ܘܒܼܵܨܲܪ܀ ܡ̣ܢ ܝܑܼܕܲܥܬܼܗܘܿܢ ܗ̄ܘ̣ ܢܵܤ̇ܟܿܝܼܢ
                ܒܲܢ ܡܲܠܲܐܟܹ̈ܐ ܩܲܕܝܼ̈ܫܹܐ ܥܲܠ ܙܵܘ̈ܥܹܐ ܕܨܸܒܼ̈ܘܵܬܼܵܐ: ܗܵܘ̇ ܡܵܐ ܕܗܸܢܘܿܢ
                ܩܲܕܼܡܵܝܑܬܼ ܛܵܥ̇ܡܝܼܢ ܘܡܲܕܪܟܼܝܼܢ: ܘܗܵܝܕܹܝܢ ܡܝܲܒܿܠܝܼܢ ܠܹܗ ܠܘܵܬܲܢ.
                
                 197 
                
                ܘܐܵܦ ܗܵܠܹܝܢ ܡܲܠܦܵܢܹ̈ܐ ܬܪ̈ܲܢܹ̈ܐ: ܡ̣ܢ ܦܸܚܡܵܐ ܕܝܼܕܲܥܬܼܗܘܿܢ
                ܡܙܝܼܥܝܼܢ ܒܲܢ ܙܵܘ̈ܥܹܐ ܕܥܲܠ ܨܸܒܼ̈ܘܵܬܼܵܐ. ܗܵܘ̇ ܡܵܐ ܕܗܸܢܘܿܢ ܒܹܗ ܠܵܐ
                ܫܒܼܝܼܩܝܼܢ: ܒܲܢ ܠܲܡܙܵܥܘܼ ܚܘܼ̈ܫܵܒܹܐ ܬܪ̈ܝܼܨܹܐ ܕܥܲܠ ܕܐܲܝܟܼ ܗܵܠܹܝܢ:
                ܐܵܢܲܢܩܹܐ ܗ̣̄ܝ. ܒܲܕܼܓܼܘܿܢ ܐܲܟܼܡܵܐ ܕܐܸܡ̇ܪܹܬܼ: ܬܸܫܲܪ ܠܵܟܼ ܗܵܕܹܐ: ܕܐܵܦܠܵܐ
                ܐܸܠܘܼ ܤܵܦܩܝܼܢܲܢ ܠܲܡܩܲܒܵܠܘܼ: ܗܸܢܘܿܢ ܠܡܲܠܵܦܘܼ ܬܹܐܘܿܪܝܼܵܐ ܕܩܘܼܫܬܼܵܐ
                ܠܲܢ ܡܸܫܟܿܚܝܼܢ: ܘܟܲܕܼ ܛܵܒܼ ܡ̣ܢ ܩܕܝܼܡ ܒܵܗ̇ ܐܝܼܬܲܝܗܘܿܢ ܗ̄ܘ̣ܵܘ܀
                ܬܘܼܒܼ ܕܹܝܢ ܟܠܚܲܕܼ ܚܲܕܼ ܡ̣ܢ ܗܵܠܹܝܢ ܘܡ̣ܢ ܗܵܠܹܝܢ: ܠܦܘܼܬܼ ܕܘܼܒܵܪܵܐ
                ܕܒܹܗ ܡܸܬܿܕܲܒܲܪ: ܡܲܠܸܦ ܘܲܡܚܲܦܸܛ ܘܐܵܦܠܲܢ ܠܝܵܠܘܿܦܹ̈ܐ ܠܡܸܬܿܕܲܒܵܪܘܼ:
                ܐܸܢ ܡܲܠܲܐܟܹ̈ܐ ܩܲܕܝܼ̈ܫܹܐ: ܘܐܸܢ ܗܵܠܹܝܢ ܕܲܠܩܘܼܒܼܠܵܐ܀
                	ܠܝܼ ܕܹܝܢ ܘܗܵܕܹܐ ܚܲܬܝܼܬܼܵܐ ܠܝܼ: ܕܗܵܘܢܲܢ: ܘܒܸܠܥܵܕܼ ܡ̣ܢ
                ܡܸܨܥܵܝܘܼܬܼܵܐ ܕܡܲܠܲܐܟܹ̈ܐ ܩܲܕܝܼ̈ܫܹܐ: ܡ̣ܢ ܝܵܬܹܗ ܡܸܬܿܬܿܙܝܼܥ ܗ̄ܘ̣ ܥܲܠ
                ܛܵܒܼܬܼܵܐ: ܘܐܵܦ ܕܠܵܐ ܝܘܼܠܦܵܢܵܐ. ܝܑܼܕܲܥܬܼܗܹܝܢ ܕܹܝܢ ܕܒܼܝܼ̈ܫܵܬܼܵܐ: ܒܸܠܥܵܕܼ
                ܡܸܨܥܵܝܘܼܬܼܵܐ ܕܫܹܐܕܹ̈ܐ ܐܵܘ ܪܸ̈ܓܼܫܹܐ ܠܲܡܩܲܒܵܠܘܼ: ܐܵܘ ܥܠܲܝܗܹܝܢ
                ܠܡܸܬܿܬܿܙܵܥܘܼ ܡ̣ܢ ܝܵܬܹܗ: ܠܵܐ ܡܸܫܟܲܚ ܗܵܘܢܲܢ܀ ܒܲܟܼܝܵܢܲܢ: ܛܵܒܼܬܼܵܐ
                ܢܨܝܼܒܼܵܐ. ܒܝܼܫܬܼܵܐ ܕܹܝܢ: ܠܵܐ. ܘܟܼܠ ܕܢܘܼܟܼܪܵܝܬܼܵܐ ܗ̣̄ܝ: ܘܡ̣ܢ ܠܒܲܪ
                ܥܵܐ̇ܠܵܐ ܫܟܼܵܚܬܼܵܐ ܕܝܘܼܠܦܵܢܵܗ̇: ܥܲܠ ܡܸܨܥܵܝܵܐ ܤܢܝܼܩ. ܗܵܝ̇ ܕܹܝܢ
                ܕܲܠܓܼܵܘ ܢܨܝܼܒܼܵܐ: ܐܵܦ ܕܠܵܐ ܝܘܼܠܦܵܢܵܐ: ܪܵܦܹ̇ܬܼ ܗ̄ܘ̣ ܟܝܵܢܵܐ: ܐܵܦܸܢ
                ܒܲܗܘܼܪܵܐܝܼܬܼ܀ ܒܪܲܡ ܘܐܵܦܸܢ ܗܵܟܲܢ: ܘܐܝܼܬܼܵܘܗܝ ܟܝܵܢܲܢ ܡܙܝܼܥ ܡ̣ܢ
                ܝܵܬܹܗ ܥܲܠ ܛܵܒܼܬܼܵܐ: ܬܲܪܒܿܝܼܬܼܵܗ̇ ܕܗܵܕܹܐ ܘܲܠܡܸܬܼܢܲܗܵܪܘܼ ܒܵܗ̇:
                ܒܸܠܥܵܕܼ ܬܵܪܐܘܼܬܼܵܐ ܕܡܲܠܲܐܟܹ̈ܐ ܩܲܕܝܼ̈ܫܹܐ: ܠܵܐ ܡܸܫܟܿܚܵܐ܀ ܡܲܠܦܵܢܹ̈ܐ
                ܩܢܹܝܢܲܢ ܠܗܘܿܢ: ܐܲܝܟܲܢܵܐ ܕܐܵܦ ܗܸܢܘܿܢ ܠܲܚܕܼܵܕܹ̈ܐ. ܗܵܠܹܝܢ ܕܲܡܬܲܚܬܹܝܢ:
                
                 198 
                
                ܠܗܵܢܘܿܢ ܕܲܡܕܼܵܩܝܼܢ ܡܸܢܗܘܿܢ ܘܢܲܗܝܼܪܝܼܢ ܝܲܬܝܼܪ. ܘܗܵܟܲܢܵܐ ܠܲܚܕܼܵܕܹ̈ܐ:
                ܥܕܲܡܵܐ ܠܗܵܘ̇ ܚܲܕܼ: ܕܲܩܢܸܐ ܡܲܠܦܵܢܵܐ ܬܠܝܼܬܼܵܝܘܼܬܼܵܐ ܩܲܕܝܼܫܬܼܵܐ. ܘܐܵܦ
                ܗܵܢܵܐ: ܬܟܼܝܼܠܵܐܝܼܬܼ ܐܹܡܲܪ: ܠܵܘ ܡܸܢܹܗ ܘܠܹܗ: ܐܸܠܵܐ ܡܲܠܦܵܢܵܐ
                ܩܢܸܐ: ܠܡܸܨܥܵܝܵܐ ܝܼܫܘܿܥ. ܗܵܘ̇ ܕܒܼܐܝܼܕܹܗ ܡܩܲܒܸܠ: ܘܲܠܘܵܬܼ
                ܐܲܝܠܹܝܢ ܕܡܸܢܹܗ ܘܲܠܬܲܚܬܿ ܡܝܲܒܸܿܠ܀ ܐܸܢܵܐ ܡܲܢ ܡܸܬܼܪܲܥܸܐ ܐ̄ܢܵܐ: ܐܵܦ
                ܗܵܕܹܐ. ܕܟܲܕܼ ܛܵܒܼ ܬܹܐܘܿܪܝܼܵܐ ܐܲܠܵܗܵܝܵܬܐ ܠܵܐ ܩܢܸܐ ܗܵܘܢܲܢ ܟܝܵܢܵܐܝܼܬܼ
                ܚܲܝܠܵܐ ܠܡܸܬܿܬܿܙܵܥܘܼ ܥܠܹܝܗ̇: ܘܲܠܗܵܕܹܐ ܚܲܤܝܼܪܘܼܬܼܵܐ ܫܲܘܝܵܐܝܼܬܼ ܩܢܹܝܢܲܢ
                ܠܵܗ̇ ܚܢܲܢ ܥܲܡ ܟܠܗܹܝܢ ܐܘܼܤ̈ܝܼܵܣ ܫܡܲܝܵܢ̈ܝܵܬܼܵܐ: ܘܠܵܢ ܘܲܠܗܹܝܢ ܕܠܵܐ
                ܕܘܼܪܵܫܵܐ ܘܡܲܚܫܲܒܼܬܼܵܐ ܕܲܥܠܹܝܗ̇: ܒܛܲܝܒܿܘܿܬܼܵܐ ܒܲܠܚܘܿܕܼ ܡܸܬܿܬܿܙܝܼܥܵܐ
                ܒܲܢ: ܡܸܕܸܡ ܕܢܘܼܟܼܪܵܝ ܟܝܵܢܵܐܝܼܬܼ ܠܗܵܘܢܵܐ ܐ̄ܢܵܫܵܝܵܐ ܘܡܲܠܲܐܟܼܵܝܵܐ. ܒܗܵܝ̇
                ܕܠܵܐ ܡܸܬܼܡܲܢܝܵܐ ܬܹܐܘܿܪܝܼܵܐ ܕܥܲܠ ܐܲܠܵܗܘܼܬܼܵܐ ܥܲܡ ܬܹܐܘܿܪ̈ܝܼܵܣ ܐ̄ܚܪ̈ܵܢܝܵܬܼܵܐ:
                ܒܗܵܝ̇ ܕܲܠܗܵܠܹܝܢ ܒܫܵܘܬܵܦܘܼܬܼ ܟܝܵܢܵܐ ܥܦܝܼܦܵܐ ܕܠܲܟܼܝܵܢܹ̈ܐ ܬܹܐܘܿܪܝܼܵܐ
                ܕܝܼܠܗܘܿܢ ܩܢܹܝܢܲܢ: ܕܲܡܢܵܬܼܵܐ ܡ̣ܢ ܟܠ ܒܲܢ ܗ̣̄ܝ: ܡ̣ܢ ܟܝܵܢܵܐ ܕܹܝܢ
                ܕܐܝܼܬܼܘܼܬܼܵܐ ܠܵܐ: ܒܲܕܼܓܼܘܿܢ: ܐܵܦܠܵܐ ܬܹܐܘܿܪܝܼܵܗ̇. ܘܟܲܕܼ ܠܟܼܠܗܘܿܢ
                ܡܠܝܼ̈ܠܹܐ ܩܲܕܡܵܝܹ̈ܐ ܘܡܸܨܥܵܝܹ̈ܐ ܡܸܕܸܡ ܗ̄ܘ̣ ܕܠܵܐ ܒܲܟܼܝܵܢܵܐ: ܘܲܕܛܲܝܒܿܘܼܬܼܵܐ
                ܗ̣̄ܝ ܡܸܬܿܬܿܙܝܼܥܵܢܘܼܬܼܵܐ ܕܥܲܠ ܗܵܕܹܐ ܬܹܐܘܿܪܝܼܵܐ ܒܟܼܠܗܘܿܢ ܗܵܘܢܹ̈ܐ
                ܫܡܲܝܵܢܹ̈ܐ ܘܐܲܪ̈ܥܵܢܵܝܹܐ. ܘܠܵܘ ܫܟܼܵܚܬܼܵܐ ܗ̣̄ܝ ܕܲܟܼܝܵܢܵܐ ܐܲܝܟܼ ܕܫܲܪܟܵܐ:
                ܘܲܟܼܡܵܐ ܐܸܢ ܢܸܬܼܢܗܲܪ ܘܢܸܬܿܕܲܟܸܐ. ܐܸܢܵܐ ܕܹܝܢ ܡܸܬܼܪܲܥܸܐ ܐ̄ܢܵܐ: ܗܵܝ̇
                ܕܐܝܼܬܹܝܗ̇ ܐܵܦ ܫܲܪܝܼܪܵܐ: ܘܲܚܢܲܢ ܒܢܲܝ̈ܢܵܫܵܐ ܓܸܠܝܵܢܹ̈ܐ ܘܤܘܼ̈ܟܵܠܹܐ
                ܕܲܡܝܲܒܿܠܝܼܢ ܥܕܲܡܵܐ ܕܲܢܡܲܢܲܥ ܠܘܵܬܼܵܗ̇ ܕܗܵܕܹܐ ܬܹܐܘܿܪܝܼܵܐ ܐܝܼܬܼܵܚܵܝܬܐ:
                ܕܐܝܼܬܹܝܗ̇ ܐ̄ܪܵܙ ܓܸܠܝܵܢܵܐ ܚܲܬܝܼܬܼܵܐ: ܒܸܠܥܵܕܼ ܡܸܨܥܵܝܘܼܬܼܵܐ ܕܝܼܠܗܘܿܢ: ܠܵܐ
                
                 199 
                
                ܡܸܬܼܝܲܒܿܠܝܼܢܲܢ ܒܗܵܘܢܲܢ. ܘܠܲܝܬܿ ܠܹܗ ܠܗܵܘܢܲܢ ܕܝܼܠܲܢ ܗܵܢܵܐ ܚܲܝܠܵܐ:
                ܕܐܲܝܟܼ ܗܵܢܹܝܢ ܐܘܼܤ̈ܝܼܵܣ ܪ̈ܵܡܵܬܼܵܐ ܘܥܸܠܵܝ̈ܵܬܐ: ܕܡܸܢܵܗ̇ ܡ̣ܢ ܐܝܼܬܼܘܼܬܼܵܐ
                ܕܠܵܐ ܡܸܨܥܵܝܵܐ ܡܩܲܒܿܠܝܼܢ ܓܸܠܝܵܢܹ̈ܐ ܟܠܗܘܿܢ ܘܬܹܐܘܿܪ̈ܝܼܵܣ܀ ܟܲܕܼ
                ܘܐܵܦ ܗܸܢܘܿܢ ܒܝܲܕܼ ܨܲܠܡܵܐ ܕܝܼܠܵܗ̇ ܘܠܵܘ ܡܸܢܵܗ̇ ܡܫܲܠܚܵܐܝܼܬܼ:
                ܕܐܵܦ ܗܵܘܢܲܢ ܕܝܼܠܲܢ ܗܵܟܲܢܵܐ: ܐܲܝܟܵܐ ܕܐܵܦܠܵܐ ܬܸܓܼܡܹ̈ܐ ܐ̄ܚܪ̈ܵܢܹܐ ܤܛܲܪ
                ܡ̣ܢ ܗܵܘ̇ ܚܲܕܼ: ܡܸܢܹܗ ܡ̣ܢ ܝܼܫܘܿܥ ܐܲܚܝܼܕܼ ܬܲܩܕܵܐ ܕܡܲܠܟܘܼܬܼܵܐ:
                ܡܨܹܝܢ ܡܩܲܒܿܠܝܼܢ ܓܸܠܝܵܢܹ̈ܐ ܘܬܹܐܘܿܪܝܼܵܐ ܡܸܢܗܘܿܢ ܘܲܠܗܘܿܢ ܕܠܵܐ
                ܡܸܨܥܵܝܵܐ܀ ܕܐܝܼܬܲܝܗܘܿܢ: ܬܸܓܼܡܹ̈ܐ ܐ̄ܚܪ̈ܵܢܹܐ ܩܲܕܼܡܵܝܹ̈ܐ. ܐܸܠܵܐ ܒܝܘܼܒܵܠܵܐ
                ܡܩܲܒܿܠܝܼܢ ܚܲܕܼ ܡ̣ܢ ܚܲܕܼ: ܥܲܠ ܟܠܗܹܝܢ ܡܕܲܒܿܪ̈ܵܢܘܵܬܼܵܐ ܘܤܘܼ̈ܟܵܠܹܐ
                ܕܲܥܠܲܝܗܹܝܢ. ܠܵܘ ܕܥܲܠ ܐܝܼܬܼܘܼܬܼܵܐ ܐܵܡܲ݁ܪܢܵܐ: ܡ̣ܢ ܗܵܘ̇ ܩܲܕܼܡܵܝܵܐ
                ܠܘܵܬܼ ܬܪܲܝܵܢܵܐ. ܘܗܵܟܲܢܵܐ: ܥܕܲܡܵܐ ܕܥܵܒܲܪ ܐ̄ܪܵܙܵܐ ܒܟܼܠܗܘܿܢ ܬܸܓܼܡܹ̈ܐ܀
                	ܤܲܓܝܼ̈ܐܹܐ ܕܹܝܢ ܐ̄ܪ̈ܵܙܹܐ ܕܲܒܼܗܵܘ̇ ܚܲܕܼ ܬܸܓܼܡܵܐ ܩܲܕܼܡܵܝܵܐ ܦܵܝ̇ܫܝܼܢ:
                ܘܠܵܐ ܢܵܦ̇ܩܝܼܢ ܠܬܸܓܼܡܹ̈ܐ ܐ̄ܚܪ̈ܵܢܹܐ. ܐܲܝܟܼ ܡܲܢ ܕܠܵܐ ܤܵܦ̇ܩܝܼܢ ܤܛܲܪ
                ܡ̣ܢ ܗܵܘ̇: ܠܘܵܬܼ ܩܘܼܒܵܠܵܐ ܕܪܲܒܿܘܼܬܹܗ ܕܐ̄ܪܵܙܵܐ. ܘܐܝܼܬܼ ܡܸܢܗܘܿܢ
                ܕܐ̄ܪ̈ܵܙܹܐ: ܕܟܲܕܼ ܡ̣ܢ ܬܸܓܼܡܵܐ ܗܵܘ̇ ܩܲܕܼܡܵܝܵܐ ܢܦܲܩ̣: ܠܘܵܬܼ
                ܬܪܲܝܵܢܵܐ ܒܲܠܚܘܿܕܼ ܡܸܬܼܓܠܸܐ: ܘܬܲܡܵܢ ܡܸܬܼܢܛܲܪ ܒܫܸܬܼܩܵܐ: ܟܲܕܼ
                ܗܵܠܹܝܢ ܬܸܓܼܡܹ̈ܐ ܐ̄ܚܪ̈ܵܢܹܐ ܒܹܗ ܠܵܐ ܪܓܼܝܼܫܝܼܢ. ܘܐܝܼܬܼ: ܕܲܠܘܵܬܼ ܬܠܝܼܬܼܵܝܵܐ
                ܘܲܪܒܼܝܼܥܵܝܵܐ܀ ܐܵܦ ܪܲܒܿܘܼܬܼܵܐ ܘܲܡܬܲܚܬܿܝܘܼܬܼܵܐ ܐܝܼܬܼ ܒܓܸܠܝܵܢܵܐ: ܕܗܵܘܹ̇ܐ
                ܠܘܵܬܼ ܚܲܕܼ ܚܲܕܼ ܡܸܢܗܘܿܢ ܕܡܲܠܲܐܟܹ̈ܐ ܩܲܕܝܼ̈ܫܹܐ. ܐܝܼܬܼ ܕܥܲܬܿܝܼܪ ܒܓܸܠܝܵܢܹ̈ܐ:
                
                 200 
                
                ܘܪܵܡ ܛܲܟܼܤܵܐ ܕܐ̄ܪ̈ܵܙܹܐ ܕܲܠܘܵܬܹܗ ܡܸܬܼܓܠܹܝܢ: ܘܲܡܩܲܒܿܠܵܢܵܐ ܗ̄ܘ̣
                ܕܢܘܼܗܪܵܐ ܝܲܬܝܼܪܵܐ. ܘܐܝܼܬܼ ܕܲܡܬܲܚܬܲܝ ܡܸܢܹܗ: ܘܲܡܚܝܼܠܝܼܢ ܠܐ̄ܪ̈ܵܙܹܐ
                ܗܵܠܹܝܢ ܙܵܘܥܵܘ̈ܗܝ. ܘܗܵܟܲܢܵܐ: ܝܲܬܝܼܪܘܼܬܼܵܐ ܘܲܒܼܨܝܼܪܘܼܬܼܵܐ: ܘܪܲܒܿܘܼܬܼܵܐ
                ܘܲܡܬܲܚܬܿܝܘܼܬܼܵܐ ܐܝܼܬܼ: ܒܛܲܟܼܤܹ̈ܐ ܪ̈ܘܼܚܵܢܹܐ ܒܩܘܼܒܵܠܵܐ ܕܓܸܠܝܵܢܹ̈ܐ. ܡ̣ܢ
                ܟܠܦܪܘܿܣ ܕܹܝܢ: ܤܛܲܪ ܡ̣ܢ ܗܵܘ̇ ܒܲܠܚܘܿܕܼܵܘܗܝ ܬܸܓܼܡܵܐ ܪܹܫܵܝܵܐ
                ܘܩܲܕܼܡܵܝܵܐ ܕܟܼܠܗܹܝܢ ܛܲܟܼܤ̈ܝܼܵܣ. ܕܫܲܪܟܵܐ ܕܹܝܢ: ܡ̣ܢ ܚܲܒܼܪ̈ܲܝܗܘܿܢ
                ܡܩܲܒܿܠܝܼܢ ܬܹܐܘܿܪܝܼܵܐ ܘܪܸ̈ܡܙܹܐ ܕܥܲܠ ܟܠ ܡܕܲܒܿܪܵܢܘܼܬܼܵܐ ܐܲܠܵܗܵܝܬܼܵܐ܀
                ܘܐܸܢ ܗܵܢܘܿܢ ܗܵܟܲܢܵܐ: ܟܡܵܐ ܝܲܬܝܼܪܵܐܝܼܬܼ ܚܢܲܢ: ܒܸܠܥܵܕܲܝܗܘܿܢ ܘܲܕܼܠܵܐ
                ܡܸܨܥܵܝܵܐ ܠܵܐ ܡܨܸܝܼܢܲܢ ܠܲܡܩܲܒܵܠܘܼ ܐ̄ܪ̈ܵܙܹܐ ܕܐܲܝܟܼ ܗܵܠܹܝܢ. ܐܸܠܵܐ ܡܸܢܗܘܿܢ
                ܗ̄ܘ̣ ܗܵܘ̇ܝܵܐ: ܐܸܡܲܬܼܝ ܕܢܵܦ̇ܠܵܐ ܒܗܵܘ̈ܢܹܐ ܕܩܲܕܝ̈ܫܹܐ ܡܲܪܓܫܵܢܘܼܬܼܵܐ:
                ܕܓܸܠܝܵܢܵܐ ܕܐ̄ܪܵܙܵܐ ܐܲܝܢܵܐ ܕܗ̤ܘ. ܘܐܲܝܟܲܢܵܐ ܕܡܵܐ ܕܡܸܬܼܦܤܸܣ ܡ̣ܢ
                ܐܲܠܵܗܵܐ: ܡܸܬܼܓܠܸܐ ܠܬܸܓܼܡܵܐ ܡ̣ܢ ܬܸܓܼܡܵܐ ܕܲܠܥܸܠ ܡܸܢܹܗ: ܘܲܥܕܲܡܵܐ
                ܠܲܐ̄ܚܪ̈ܵܝܹܐ. ܒܹܗ ܒܲܙܢܵܐ ܐܸܡܲܬܼܝ ܕܡܸܬܼܦܤܸܣ ܡ̣ܢ ܪܸܡܙܵܐ: ܐܵܦ
                ܥܕܲܡܵܐ ܠܲܟܼܝܵܢܵܐ ܐ̄ܢܵܫܵܝܵܐ ܡܸܬܼܝܲܒܲܠ ܐ̄ܪܵܙܵܐ ܒܐܲܝܠܹܝܢ ܕܫܵܘܹ̇ܝܢ.܀ ܡ̣ܢ
                ܟܠܦܪܘܿܣ: ܒܐܝܼܕܲܝ̈ܗܘܿܢ ܗܵܘܹ̇ܝܢ ܩܲܕܝܼ̈ܫܹܐ ܡܩܲܒܠܵܢܹ̈ܐ ܕܢܘܼܗܪܵܐ
                ܕܬܹܐܘܿܪܝܼܵܐ: ܥܕܲܡܵܐ ܠܘܵܬܼܵܗ̇ ܕܐܝܼܬܼܘܼܬܼܵܐ ܡܫܲܒܲܚܬܐ. ܐ̄ܪܵܙܵܐ ܕܠܵܐ
                ܡܸܬܼܝܼܠܸܦ: ܐܵܦܠܵܐ ܗܸܢܘܿܢ ܡ̣ܢ ܚܕܼܵܕ̈ܐ. ܪ̈ܘܼܚܹܐ ܐܸܢܘܿܢ ܕܬܸܫܡܸܫܬܼܵܐ:
                ܕܡܸܫܬܲܕܪܝܼܢ ܠܘܵܬܼ ܐܲܝܠܹܝܢ ܕܲܥܬܼܝܼܕܝܼܢ ܠܡܹܐܪܲܬܼ ܚܲܝܹ̈ܐ: ܒܡܲܪܓܫܵܢܘܼܬܼܵܐ
                ܕܤܘܼ̈ܟܵܠܹܐ ܕܲܫܪܵܪܵܐ ܕܲܒܼܗܘܿܢ ܡܕܸܝܠܝܼܢ. ܒܥܵܠܡܵܐ ܕܹܝܢ ܕܲܥܬܼܝܼܕܼ:
                
                 201 
                
                ܡܸܬܼܒܲܛܲܠ ܠܹܗ ܗܵܢܵܐ ܛܲܟܼܤܵܐ ܕܝܘܼܒܵܠܵܐ. ܗܵܝܕܹܝܟ ܓܹܝܪ: ܠܵܘ ܚܲܕܼ
                ܡ̣ܢ ܚܲܒܼܪܹܗ: ܡܩܲܒܸܿܠ ܓܸܠܝܵܢܵܐ ܕܫܘܼܒܼܚܹܗ ܕܐܲܠܵܗܵܐ ܠܒܼܘܼܤܵܡ
                ܢܲܦܫܹܗ: ܐܸܠܵܐ ܠܐ̄ܢܵܫ ܐ̄ܢܵܫ ܡܸܢܹܗ ܘܠܹܗ ܡܸܬܼܝܸܗܸܒܼ: ܗܵܘ̇ ܡܵܐ
                ܕܡܸܫܬܿܘܸܐ ܐܲܝܟܼ ܡܫܘܼܚܬܼܵܐ ܕܲܡܝܲܬܿܪܘܼܬܹܗ ܡ̣ܢ ܡܵܪܹܟܠ: ܘܠܵܘ
                ܒܝܲܕܼ ܚܲܒܼܪܹܗ ܡܩܲܒܸܿܠ ܡܵܘܗܲܒܼܬܼܵܐ ܐܲܝܟܼ ܕܗܵܪܟܵܐ. ܠܲܝܬܿ ܓܹܝܪ ܬܲܡܵܢ
                ܕܝܵܠܹ̇ܦ ܘܡܲܠܸܦ: ܘܠܲܝܬܿ ܕܲܤܢܝܼܩ ܕܡ̣ܢ ܚܲܒܼܪܹܗ ܢܸܤܲܒܼ ܚܲܤܝܼܪ̈ܵܬܹܗ.
                ܚܲܕܼ ܗ̄ܘ̣ ܓܹܝܪ ܝܵܗ̇ܘܿܒܼܵܐ: ܡܸܬܼܓܠܸܐ ܬܲܡܵܢ ܕܠܵܐ ܡܸܨܥܵܝܵܐ: ܠܘܵܬܼ
                ܟܠܗܘܿܢ ܢܵܤܘܿܒܹ̈ܐ. ܘܡܸܢܹܗ ܕܝܼܠܹܗ ܡܩܲܒܿܠܝܼܢ ܐܲܝܠܹܝܢ ܕܲܡܩܲܒܿܠܝܼܢ:
                ܟܠܗܘܿܢ ܒܘܼ̈ܤܵܡܹܐ ܪ̈ܘܼܚܵܢܹܐ. ܒܕܼܵܐܦܠܵܐ ܒܝܲܕܼ ܤܘܼ̈ܟܵܠܹܐ ܕܡܸܕܸܡ ܡܸܕܸܡ
                ܡܲܪܓܫܝܼܢ ܒܹܗ: ܐܸܠܵܐ ܒܹܗ ܒܓܸܠܝܵܢܵܐ ܕܝܼܠܹܗ ܕܠܵܐ ܡܲܦܲܩܬܼܵܐ ܕܲܠܒܲܪ
                ܡܸܢܹܗ ܒܙܵܘ̈ܥܝܼܢ. ܦܵܐܹ̇ܫ ܠܹܗ ܬܲܡܵܢ ܛܲܟܼܤܵܐ ܕܝܵܠܘܿܦܹ̈ܐ ܘܲܕܼܡܲܠܦܵܢܹ̈ܐ:
                ܘܲܒܼܚܲܕܼ ܡܸܬܿܬܲܠܝܵܐ ܚܲܪܝܼܦܘܼܬܼ ܚܘܼܒܵܐ ܕܟܼܠ܀
                	ܐܸܢܵܐ ܕܹܝܢ ܐܵܡܲ݁ܪܢܵܐ: ܕܐܵܦ ܡܸܬܼܢܲܓܿܕܼܵܢܹ̈ܐ ܕܲܒܼܓܹܗܲܢܵܐ: ܒܢܸܓܼܕܹܐ
                ܕܚܘܼܒܵܐ ܡܸܫܬܲܢܩܝܼܢ. ܩܫܹܝܢ ܘܡܲܪܝܼܪܝܼܢ ܐܸܢܘܿܢ ܢܸܓܼܕܹ̈ܐ ܕܡ̣ܢ ܚܘܼܒܵܐ
                ܗܵܘܹ̇ܝܢ: ܗܵܢܵܘ ܕܹܝܢ ܕܐܲܝܠܹܝܢ ܕܐܲܪܓܸܫ̣ܘ ܕܲܒܼܚܘܼܒܵܐ ܐܲܤܟܸܠ̣ܘ: ܡ̣ܢ
                ܫܘܼ̈ܢܵܩܹܐ ܕܡ̣ܢ ܕܸܚܠ̱ܬܼܵܐ. ܚܲܫܵܐ ܕܡ̣ܢ ܡܲܤܟܠܵܢܘܼܬܼܵܐ ܕܲܒܼܚܘܼܒܵܐ ܕܢܵܨܹܦ
                ܒܠܸܒܵܐ: ܚܲܪܝܼܦ ܡ̣ܢ ܟܠ ܫܘܼܢܵܩ̈ܝܼܢ ܕܗܵܘܹ̇ܝܢ. ܫܟܼܝܼܪܵܐ ܗ̣̄ܝ ܕܐ̄ܢܵܫ
                ܢܸܬܼܪܲܥܸܐ: ܕܚܲܛܵܝܹ̈ܐ ܒܓܹܗܲܢܵܐ ܡܸܬܼܓܲܠܙܝܼܢ ܡ̣ܢ ܚܘܼܒܵܐ ܕܲܠܘܵܬܼ
                ܥܵܒܼܘܿܕܼܵܐ: ܚܘܼܒܵܐ ܓܹܝܪ ܝܲܠܕܵܐ ܗ̄ܘ̣ ܕܝܼܕܲܥܬܼܵܐ ܕܲܫܪܵܪܵܐ: ܐܲܝܕܵܐ ܕܲܠܟܼܠܹܗ
                ܓܵܘܵܐ ܡܸܬܿܬܵܘܕܝܵܐ ܕܡܸܬܼܝܲܗܒܵܐ. ܤܵܥܲܪ ܕܹܝܢ ܗ̤ܘ ܚܘܼܒܵܐ ܒܚܲܝܠܹܗ:
                ܥܦܝܼܦܵܐܝܼܬܼ. ܠܐܲܝܠܹܝܢ ܕܠܲܤܟܸܠ̣ܘ: ܡܫܲܢܸܩ. ܐܲܝܟܼ ܕܐܵܦ ܬܢܵܢ
                
                 202 
                
                ܠܪ̈ܵܚܡܹ̇ܐ ܠܘܵܬܼ ܪ̈ܵܚܡܹ̇ܐ ܓܵܕܹܫ. ܘܠܲܐܝܠܹܝܢ ܕܲܢܛܲܪܘ ܘܵܠ̈ܝܵܬܹܗ:
                ܡܒܲܤܸܡ ܚܘܼܒܵܐ. ܗܵܟܲܢܵܐ ܘܲܒܼܓ݂ܹܗܲܢܵܐ. ܬܘܵܬܼܵܐ ܕܡ̣ܢ ܚܘܼܒܵܐ ܐܵܡܲ̇ܪܢܵܐ
                ܕܐܝܼܬܹܝܗ̇: ܩܲܫܝܘܼܬܼ ܫܘܼܢܵܩܵܐ. ܠܲܒܼ̈ܢܲܝ ܪܵܘܡܵܐ ܕܹܝܢ: ܒܘܼܤܵܡܵܐ
                ܕܲܒܼܗܵܢܵܐ ܡܲܪܘܸܐ ܢܲܦܫܗܘܿܢ܀ ܐܸܫܬܲܐܲܠ ܐ̄ܢܵܫ: ܕܐܸܡܲܬܼܝ ܡܸܬܿܬܿܟܸܠ
                ܐ̄ܢܵܫ ܕܐܸܫܬܿܘܝܼ ܠܫܘܼܒܼܩܵܢܵܐ ܕܲܚܛܵܗܵܘ̈ܗܝ. ܘܦܲܢܝܼ: ܕܐܸܡܲܬܼܝ ܕܡܲܪܓܸܫ
                ܒܢܲܦܫܹܗ ܕܲܤܢ̣ܵܐ ܐܸܢܘܿܢ ܡ̣ܢ ܠܸܒܹܗ ܡܲܠܝܵܐܝܼܬܼ: ܘܲܒܼܓܲܠ̈ܝܵܬܹܗ
                ܕܲܠܩܘܼܒܼܠܵܐ ܕܩܲܕܼ̈ܡܵܝܵܬܹܗ ܡܸܬܼܗܲܦܲܟܼ. ܐܲܝܢܵܐ ܕܐܲܝܟܼ ܗܵܟܲܢܵܐ ܗ̄ܘ̣:
                ܐܝܼܬܼ ܠܹܗ ܬܘܼܟܼܠܵܢܵܐ ܒܫܘܼܒܼܩܵܢ ܚܛܵܗܹ̈ܐ ܠܘܵܬܼ ܐܲܠܵܗܵܐ: ܒܤܵܗܕܘܼܬܼܵܐ
                ܕܬܹܐܪܬܵܐ ܕܲܩܢܸܐ ܒܢܲܦܫܹܗ: ܐܲܝܟܼ ܡܸܠܬܹܗ ܕܲܫܠܝܼܚܵܐ. ܠܸܒܵܐ ܕܹܝܢ
                ܕܲܕܼܠܵܐ ܥܸܕܼܠܵܝ: ܗ̤ܘ ܤܵܗܹ̇ܕܼ ܥܲܠ ܢܲܦܫܹܗ.