Isaac of Nineveh. “Discourse 29.” Based upon Digital Syriac Corpus. Last modified March 5, 2019. https://syriaccorpus.org/420.
    
        
            
                ܥܲܠ ܫܘܼܚܠܵܦ ܙܢܹ̈ܝܗ̇ ܦܵܩܚܵܝܹ̈ܐ ܕܲܡܕܲܒܿܪܵܢܘܼܬܼܵܐ ܚܲܟܿܝܼܡܬܼܵܐ ܠܬܲܪܒܿܝܼܬܼܵܐ
                ܕܡܸܬܿܕܲܒܿܪܵܢܹܐ. ܟܛ.
                
            
            
                ܟܠ ܚܸܟܼܡܵܐ ܡ̣ܢ ܩܕܼܵܡ ܡܵܪܝܵܐ ܗ̄ܝ̇: ܐܲܝܟܼ ܕܐܲܡܝܼܪ. ܘܲܒܼܗܵܠܹܝܢ
                ܕܝܼܠܲܢ ܡܸܬܿܕܲܪܫܝܼܢܲܢ: ܠܡܸܬܼܚܲܟܵܡܘܼ ܥܲܠ ܗܵܠܹܝܢ ܕܡܵܪܝܵܐ ܕܲܠܘܵܬܲܢ.
                ܐܲܒܼܵܐ ܕܲܫܪܵܪܵܐ: ܡܫܲܚܠܦܵܐܝܼܬܼ ܡܸܬܼܗܲܦܲܟܼ ܥܲܡ ܒܢܵܘ̈ܗܝ. ܡ̣ܢ ܫܲܘܝܘܼܬܼܵܐ
                ܕܹܝܢ: ܢܵܛܲܪ ܢܲܦܫܹܗ. ܕܡܸܬܼܚܵܘܝܵܢܘܼܬܼܵܐ ܕܲܚܕܼܵܢܵܝܘܼܬܼ ܦܲܪܨܘܿܦܵܐ ܒܟܼܠܙܒܲܢ:
                ܠܝܘܼܬܼܪܵܢܵܐ ܕܝܼܠܗܘܿܢ ܕܲܒܼܢܵܘ̈ܗܝ. ܡܵܠܘܿܢ ܕܹܝܢ: ܠܕܼܘܼܪܵܫܵܐ: ܓܵܢܹ̇ܒܼ
                ܠܚܘܼܒܹܗ: ܐܲܦܲܝ̈ ܛܲܟܼܤܵܐ ܓܹܝܪ: ܕܗܵܝ̇ ܕܠܵܐ ܐܝܼܬܹܝܗ̇ ܡܚܵܘܸܐ.
                ܠܕܼܐܝܼܬܹܝܗ̇ ܕܹܝܢ: ܚܵܡܹ̇ܠ. ܘܲܒܼܪܵܐ ܚܲܟܿܝܼܡܵܐ ܡ̣ܢ ܫܘܼ̈ܚܠܵܦܹܐ ܕܲܠܘܵܬܹܗ:
                ܡܸܫܬܵܘܕܲܥ ܒܛܝܼܠܘܼܬܼܵܐ ܕܐܲܒܼܘܼܗܝ ܕܲܥܠܵܘܗܝ: ܘܚܘܼܒܹܗ ܐܲܟܲܚ̄ܕܼ
                ܦܵܪܘܿܫܵܐ. ܥܦܝܼܦܬܼܵܐ ܠܤܘܼܟܵܠܵܐ ܡܸܬܼܚܲܙܝܵܐ ܬܪܝܼܨܵܐ: ܤܵܥܘܿܪܘܼܬܹܗ
                ܕܚܘܼܒܵܐ ܕܲܫܪܵܪܵܐ. ܒܲܡܚܲܕܝܵܢ̈ܝܵܬܼܵܐ ܓܹܝܪ: ܐܸܠܵܐ ܘܲܒܡܲܚܫܵܢ̈ܝܬܼܵܐ. ܗܵܢܵܘ
                ܕܹܝܢ: ܐܲܡܝܼܢ ܠܲܢܚܵܝܵܐ ܡܸܬܼܥܲܬܲܕܼ ܕܚܲܒܿܝܼܒܹܗ. ܡܲܚܸܫ ܕܹܝܢ ܬܘܼܒܼ ܐܝܼܬܼ
                
                 206 
                
                ܐܸܡܲܬܼܝ: ܡܸܛܠ ܗܵܝ̇ ܕܡܲܚܸܒܼ ܤܲܓܝܼ. ܚܵܐܹ̇ܫ ܡܲܢ ܥܲܡܹܗ: ܘܟܲܕܼ
                ܡܲܚܸܫ. ܡܚܲܡܤܸܢ ܠܗܘܿܢ ܒܪܲܡ ܘܲܠܪ̈ܲܚܡܹܐ ܟܝܵܢܵܝܹ̈ܐ ܟܲܕܼ ܢܸܫܓܿܫܘܼܢ:
                ܡܸܛܠ ܩܸܢܛܵܐ ܕܡ̣ܢ ܚܘܼܒܵܠܵܐ ܕܒܼܵܬܲܪܟܸܢ. ܗܵܝ̇ ܕܢܸܫܬܵܘܬܲܦ: ܚܘܼܒܵܐ
                ܐܵܠܹ̇ܨ. ܗܵܝ̇ ܕܲܢܚܲܡܤܸܢ ܬܘܼܒܼ ܘܲܠܗܵܠܹܝܢ: ܝܑܼܕܲܥܬܼܵܐ ܡܚܲܝܠܵܐ. ܥܲܡ
                ܫܘܼ̈ܓܼܢܵܝܹܐ ܕܲܓܒܼܝܼܬܼܵܐ: ܗܵܟܲܢܵܐ ܘܲܡܫܲܚܠܦܘܼܬܼ ܐܵܕܹܫܹ̈ܐ ܕܚܘܼܒܵܐ ܚܲܟܿܝܼܡܵܐ:
                ܠܘܵܬܼ ܡܩܲܒܿܠܵܢܹ̈ܐ ܕܦܘܼܪ̈ܢܵܤܹܐ ܗܵܠܹܝܢ. ܠܵܐ ܢܸܒܼܥܸܐ ܡ̣ܢ ܪܵܚܡܵܐ
                ܚܲܟܿܝܼܡܵܐ ܚܘܼܒܵܐ ܦܲܟܿܝܼܗܵܐ. ܠܵܐ ܦܪܝܼܫ ܐܲܝܢܵܐ ܕܠܲܒܼܪܹܗ ܒܬܲܪܤܝܼܬܼܵܐ
                ܕܕܸܒܼܫܵܐ ܩܵܛܹ̇ܠ: ܡ̣ܢ ܗܵܘ̇ ܕܩܵܛܹ̇ܠ ܒܤܲܟܿܝܼܢܵܐ܀ ܠܵܐ ܓܹܝܪ ܝܵܐܝܵܐ
                ܠܚܸܟܼܡ̱ܬܹܗ ܒܲܚܕܼܵܢܵܝܘܼܬܼ ܐܵܕܫܵܐ ܢܬܲܪܤܸܐ ܠܚܲܒܿܝܼܒܹܗ: ܒܙܲܒܼ̈ܢܲܝ
                ܚܘܼܠܡܵܢܵܐ ܠܲܟܲܚ̄ܕܼ ܘܲܒܼܟܼܘܼܪܗܵܢܵܐ. ܗܵܠܹܝܢ ܕܨܸܒܼܝܵܢܵܐ ܛܥܝܼܢ ܐܵܡܲ݁ܪܢܵܐ
                ܬܢܵܢ ܫܘܼ̈ܚܠܵܦܹܐ ܒܲܓܼܒܼܝܼܬܼܵܐ ܕܙܵܘ̈ܥܹܐ: ܘܠܵܘ ܕܓܼܘܼܫܡܵܐ. ܘܐܸܢ ܚܢܲܢ
                ܝܵܕܼܥܝܼܢܲܢ ܠܲܡܦܲܪܢܵܣܘܼ ܠܙܲܒܼ̈ܢܹܐ ܗܵܠܹܝܢ ܐܸܡܲܬܼܝ ܕܲܒܼܦܘܼܪܢܵܫܵܐ ܢܲܚܸܒܼ
                ܠܐ̄ܢܵܫ: ܡܵܠܘܿܢ ܘܟܲܕܼ ܒܫܘܼܥܒܵܕܲܢ ܐܝܼܬܼܵܘܗܝ: ܠܐܲܠܵܗܵܐ ܟܲܝ ܠܵܐ
                ܝܵܐܝܵܐ ܕܢܸܬܸܠ ܠܹܗ ܕܲܢܫܲܡܠܸܐ ܙܸܕܼܩܹ̈ܐ ܕܚܘܼܒܹܗ ܦܵܪܘܿܫܵܐ ܕܲܠܘܵܬܲܢ:
                ܐܵܦܸܢ ܐܲܝܟܼ ܫܘܼ̈ܚܠܵܦܹܐ ܕܲܚܢܲܢ ܝܵܕܼܥܝܼܢܲܢ ܠܡܸܬܲܠ ܠܡܲܚ̈ܒܼܵܢܲܝܢ؟ ܐܸܠܵܐ
                ܥܲܤܩܵܐ ܗ̣̄ܝ ܠܲܡܤܲܝܒܵܪܘܼ: ܐܵܦ ܐܸܢܵܐ ܝܵܕܲܥ̇ܢܵܐ: ܐܸܠܵܐ ܡܵܘܬܿܪܵܢܝܵܐ
                ܒܪܲܡ. ܡܸܨܛܲܠܝܵܢܘܼܬܼܵܐ ܐܲܤܢܸܩܬܵܟܼ ܥܲܠ ܗܵܕܹܐ: ܐܵܦܸܢ ܠܵܘ ܠܦܘܼܪܥܵܢܵܐ
                ܕܗܵܝ̇ ܕܡ̣ܢ ܟܲܕܼܘܼ: ܡ̣ܢ ܩܸܢܛܵܐ ܕܗܵܝ̇ ܕܲܥܬܼܝܼܕܼܵܐ ܡ̣ܢ ܟܠ ܦܪܘܿܣ.
                ܓܸܕܼܫܹ̈ܐ ܡܥܝܼ̈ܩܵܢܹܐ ܠܬܲܪܒܿܝܼܬܼܵܐ ܓܵܘܵܝܬܼܵܐ: ܐܲܝܟܼ ܤܲܡ̈ܡܵܢܹܐ ܡܥܲܕܪ̈ܵܢܹܐ:
                ܠܠܵܐ ܫܲܘܝܘܼܬܼܵܐ ܕܓܼܘܼܫܡܹ̈ܐ. ܟܠ ܕܠܵܐ ܡܚܲܝܕܼܵܐ ܗ̄ܘ̣ ܒܲܥܒܼܝܼ̈ܕܹܐ:
                ܕܠܵܐ ܐܵܓܼܘܿܢܵܐ ܗ̄ܘ̣ ܒܕܼܘܼܒܵܪܹܗ. ܐܸܢ ܡ̣ܢ ܓܫܝܼ̈ܡܹܐ ܬܹܐܡܲܪ: ܘܐܸܢ
                
                 207 
                
                ܠܵܐ ܓܫܝܼ̈ܡܹܐ. ܥܡܝܼܠܘܼܬܼܵܐ: ܒܠܵܐ ܫܲܘܝܘܼܬܼܵܐ ܡܟܼܵܢܵܐ ܠܡܸܗܘܵܐ.
                ܘܠܵܐ ܫܲܘܝܘܼܬܼܵܐ ܒܲܡܝܼܚ̈ܕܹܐ: ܡܸܛܠ ܬܪܲܝܵܢܘܼܬܼܵܐ ܐܲܤܝܼܬܵܐ. ܘܐܵܦܸܢ
                ܐܝܼܬܲܝܗܘܿܢ ܘܡܸܬܼܩܪܹܝܢ ܡܸܨܛܲܠܝܵܢܹ̈ܐ ܒܠܵܐ ܡܚܲܝ̈ܕܹܐ ܘܲܦܫܝܼ̈ܛܹܐ:
                ܘܗܵܕܹܐ: ܠܘܵܬܼ ܝܲܡܝܼܢܵܐ ܟ̱ܠܵܗ̇. ܠܵܐ ܥܲܡܘܼܠܬܼܵܢܵܐܝܼܬܼ ܒܪܲܡ: ܟܲܕܼ
                ܠܵܐ ܝܵܕܼܥܝܼܢ ܢܸܤܝܵܢܵܐ ܕܗܵܘ̇ ܐ̄ܚܪܹܢܵܐ. ܚܵܫܘܿܫܹ̈ܐ ܡܲܢ: ܠܘܵܬܼ ܛܵܒܼܬܼܵܐ.
                ܡܦܲܓܿܕܼܵܐ ܓܹܝܪ ܡܸܨܛܲܠܝܵܢܘܼܬܼܗܘܿܢ: ܒܝܲܕܼ ܚܘܼܒܵܐ ܚܲܪܝܼܦܵܐ. ܘܐܲܝܟܵܐ
                ܕܚܘܼܒܵܐ: ܠܵܐ ܐܵܓܼܘܿܢܵܐ ܐܵܦܠܵܐ ܩܸܢܛܵܐ. ܘܗܵܕܹܐ: ܟܲܕܼ ܐܝܼܬܲܝܗܘܿܢ
                ܡܫܲܠܛܲܝ̈ ܒܝܵܬܼܵܐ: ܗܵܝ̇ ܕܡܸܢܵܗ̇ ܐܵܦ ܠܡܸܨܛܲܠܝܵܢܘܼܬܼܵܐ: ܐܲܬܼܪܵܐ
                ܡܸܬܼܐܲܡܪܵܐ. ܕܡܸܛܠܗܵܕܹܐ: ܫܵܘܼ̈ܚܲ ܠܩܘܼܠܵܤܵܐ ܝܲܬܝܼܪ܀
                	ܛܵܒܼ̈ܬܼܵܐ ܘܒܼܝܼ̈ܫܵܬܼܵܐ: ܝܲܠܕܼܵܐ ܐܸܢܹܝܢ ܕܚܹܐܪܘܼܬܼܵܐ. ܐܲܝܟܵܐ ܕܗܵܕܹܐ
                ܚܲܤܝܼܪܵܐ: ܠܦܘܼܪܥܵܢܘܼܬܼܵܐ ܝܲܬܝܼܪܵܐ ܗ̄ܘ̣ ܐܵܦ ܦܘܼܠܚܵܢܗܹܝܢ. ܠܲܟܼܝܵܢܵܐ
                ܡܲܢ: ܠܲܝܬܿ ܦܘܼܪܥܵܢܘܼܬܼܵܐ. ܐܲܓܼܪܵܐ: ܠܬܲܟܼܬܘܼܫܵܐ ܡܲܓܼܙܲܪ. ܙܵܟܼܘܼܬܼܵܐ
                ܕܹܝܢ: ܠܵܐ ܡܸܬܼܐܲܡܪܵܐ ܒܠܵܐ ܐܵܓܼܘܿܢܵܐ. ܐܸܡܲܬܼܝ ܕܤܲܩܘܼܒܼܠܵܝܘܼܬܼܵܐ
                ܡ̣ܢ ܡܨܲܥܬܼܵܐ ܬܸܬܿܪܝܼܡ: ܘܐܵܦ ܚܹܐܪܘܼܬܼܵܐ ܥܲܡܵܗ̇ ܒܵܛ̇ܠܵܐ܀ ܗܵܝܕܹܝܢ
                ܟܝܵܢܵܐ: ܒܠܵܐ ܐܵܓܼܘܿܢܵܐ ܡܟܲܬܲܪ. ܢܛܝܼܪ ܗ̄ܘ̣ ܙܲܒܼܢܵܐ ܠܒܼܘܼܛܵܠ
                ܚܹܐܪܘܼܬܼܵܐ: ܗܵܘ̇ܝܵܐ ܡܸܟܵܐ ܡܠܝܼܠܘܼܬܼܵܐ ܐܲܤܝܼܪܬܵܐ. ܒܲܒܼܢܲܝ̈ܢܵܫܵܐ ܐܲܟܲܚ̄ܕܼ:
                ܘܲܒܼܡܲܠܲܐܟܹ̈ܐ. ܡܠܝܼܠܘܼܬܼܵܐ: ܠܵܘ ܡܸܬܿܬܿܙܝܼܥܵܢܘܼܬܼܵܐ ܡܸܬܼܪܲܓܼܫܵܢܝܼܬܼܵܐ.
                ܒܝܲܕܘܼܥܬܼܵܢܘܼܬܼܵܐ ܓܹܝܪ: ܬܲܪܬܹܝܢ ܩܲܢܝܵܐ ܕܝܼ̈ܠܵܝܵܬܼܵܐ ܡܠܝܼܠܘܼܬܼܵܐ.
                ܗܵܢܵܘ ܕܹܝܢ: ܬܪܹܝܢ ܚܲܝ̈ܠܝܼܢ. ܚܲܝܠܵܐ ܡܲܠܵܠܐ: ܘܝܲܕܘܼܥܬܼܵܢܵܐ. ܩܲܕܼܡܵܝܬܼܵܐ
                ܡܲܢ: ܡܸܤܬܲܝܟܼܵܐ ܠܲܓܼܡܵܪ. ܒܲܬܼܪܲܝܵܢܝܼܬܼܵܐ ܕܹܝܢ: ܡܸܬܼܟܲܠܲܠ ܟܝܵܢܵܐ:
                ܝܲܕܘܼܥܬܼܵܢܵܐ ܟܹܝܬܼ. ܐܸܠܵܐ ܘܐܲܤܝܼܪܬܵܐ ܗܵܝܕܹܝܟ. ܠܵܘ ܥܸܨܝܵܢܵܝܬܐ
                
                 208 
                
                ܐܲܤܝܼܪܘܼܬܼܵܐ: ܒܗܲܝܢܝܘܼܬܼܵܐ ܡܵܠܘܿܢ: ܩܛܝܼܪܵܐ ܗܲܢܝܼܐܵܐ. ܐܝܼܬܼ ܐܸܡܲܬܼܝ:
                ܘܗܵܫܵܐ ܒܐ̄ܪܵܙܵܐ ܒܕܲܠܝܼ̈ܠܹܐ. ܒܫܘܼܢܵܝܵܐ ܒܪܲܡ. ܒܲܡܠܝܼ̈ܠܹܐ ܡܲܢ ܩܲܕܼܡܵܝܹ̈ܐ:
                ܒܠܵܐ ܫܘܼܢܵܝ ܟܡܵܐ ܕܡܲܨܝܵܐ: ܐܵܦܸܢ ܠܵܘ ܓܡܝܼܪܹ̈ܐ. ܘܡܵܢܵܐ ܗܘܵܝܵܐ
                ܕܠܵܐ ܫܘܼܢܵܝܵܐ ܘܠܵܐ ܓܡܝܼܪܹ̈ܐ؟ ܐܝܼܬܼ ܗ̄ܘ̣ ܓܹܝܪ ܐ̄ܪ̈ܵܙܹܐ ܕܠܵܐ ܡܲܨܝܵܐ
                ܕܢܸܬܼܩܲܒܿܠܘܼܢ: ܩܕܼܵܡ ܙܲܒܼܢܵܐ ܕܲܚܪܝܼܩ. ܠܵܐ ܓܡܝܼܪܹ̈ܐ ܡܸܛܠܵܬܹܗ:
                ܠܵܘ ܡܸܛܠ ܓܲܒܼܫܘܼܢܵܝܵܐ ܩܢܹܝܢ ܠܗܵܘ̇ ܡܵܐ ܕܒܹܗ ܐܝܼܬܲܝܗܘܿܢ ܗܵܫܵܐ.
                ܠܲܝܬܹܝܗ̇ ܠܲܓܼܡܵܪ ܗܵܕܹܐ ܠܘܵܬܼ ܗܵܢܘܿܢ. ܐܲܡܝܼܢܘܼܬܼܵܐ ܡܵܠܘܿܢ: ܘܠܵܐ
                ܫܘܼܢܵܝܵܐ. ܘܐܸܢ ܫܘܼܢܵܝܵܐ: ܠܐܲܝܠܹܝܢ ܕܝܲܬܼܝܼܪ ܡܝܲܬܿܪ̈ܵܢ. ܡܵܕܹܝܢ ܗܘ̤ܵܐ
                ܠܹܗ ܫܘܼܢܵܝܵܐ ܕܗܵܢܘܿܢ ܕܝܼܠܗܘܿܢ: ܚܘܼܠܵܦܵܐ ܡܝܲܬܿܪܵܐ. ܕܝܼܠܲܢ ܕܹܝܢ
                ܒܘܼܛܵܠܵܐ: ܡܸܛܠ ܟܪܝܼܗܘܼܬܼܵܐ ܕܒܸܤܪܵܐ.