Paulus Bedjan ed., Mar Isaacus Ninivita. De perfectione religiosa. (Paris/Leipzig: Otto Harrassowitz, 1909)
    
        
            
                ܥܲܠ ܬܘܼܩܦܵܗ̇ ܘܡܲܥܒܿܕܼܵܢܘܼܬܼܵܗ̇ ܒܝܼܫܬܵܐ ܕܲܚܛܝܼܬܼܵܐ: ܕܒܲܐܝܠܹܝܢ
                ܡܸܬܼܩܲܝܡܵܐ: ܘܒܲܐܝܠܹܝܢ ܒܵܛ̇ܠܵܐ. ܠ.
            
            
                ܥܕܲܡܵܐ ܕܡ̣ܢ ܠܸܒܵܐ ܘܒܲܫܪܵܪܵܐ ܢܸܤܢܸܐ ܐ̄ܢܵܫ ܠܥܸܠܬܼܵܗ̇ ܕܲܚܛܝܼܬܼܵܐ:
                ܡ̣ܢ ܗܲܢܝܼܐܘܼܬܼܵܗ̇ ܕܡܲܥܒܿܕܼܵܐ ܒܠܸܒܵܐ ܠܵܐ ܡܸܬܼܚܲܪܲܪ. ܗܵܕܹܐ ܗ̣̄ܝ
                ܚܲܤܝܼܢܘܼܬܼ ܐܵܓܼܘܿܢܵܐ: ܗܵܝ̇ ܕܲܠܩܘܼܒܼܠܹܗ ܩܵܝ̇ܡܵܐ ܕܒܲܪܢܵܫܵܐ ܥܕܲܡܵܐ
                ܠܲܕܼܡܵܐ: ܕܒܼܵܗ̇ ܡܸܬܼܒܲܚܪܵܐ ܚܹܐܪܘܿܬܹܗ ܒܲܚܕܼܵܢܵܝܘܼܬܼ ܪܸܚܡܬܼܵܐ ܕܲܠܘܵܬܼ
                ܡܝܲܬܿܪ̈ܵܬܼܵܐ. ܘܗܵܢܵܘ ܚܲܝܠܵܐ ܗܵܘ̇ ܕܲܡܫܲܡܗܝܼܢ ܠܹܗ ܚܘܼ̈ܬܼܚܵܬܹܐ:
                ܕܡ̣ܢ ܪܹܚܝܹܗ ܡܸܬܫܲܠܦܵܐ ܢܲܦܫܵܐ ܚܲܠܵܫܬܼܵܐ: ܡܸܛܠ ܓܘܼܪܵܓܼܵܐ ܥܲܙܝܼܙܵܐ
                ܕܤܝܼܡ ܒܹܗ. ܗܵܢܵܘ ܚܲܝܠܵܗ̇ ܬܲܩܝܼܦܵܐ ܕܲܚܛܝܼܬܼܵܐ: ܕܒܹܗ ܡܕܼܵܘܕܼܵܐ
                
                 209 
                
                ܠܫܲܦܝܼܘܼܬܼܵܐ ܕܢܲܟܼ̈ܦܹܐ: ܘܥܵܨ̇ܝܵܐ ܠܙܵܘ̈ܥܹܐ ܕܟܲܝ̈ܵܐ ܒܐܲܝܠܹܝܢ ܕܠܵܐ ܡܬܼܘܿܡ
                ܫܩܝܼܠܝܼܢ ܢܸܤܝܵܢܵܐ ܕܝܼܕܲܥܬܼܗܹܝܢ. ܗܵܪܟܵܐ ܢܚܵܘܸܐ ܚܘܼܡܤܵܢܲܢ ܚܲܒܿܝܼ̈ܒܲܝ܀
                ܗܵܢܵܘ ܙܲܒܼܢܵܐ ܕܤܵܗܕܘܼܬܼܵܐ ܕܠܵܐ ܡܸܬܼܚܲܝܵܐ: ܕܒܼܵܗ̇ ܡܸܬܼܐܡܲܪ ܬܸܓܼܡܵܐ
                ܕܝܼܚܝܼ̈ܕܵܝܹܐ ܡܸܬܼܢܲܨܲܚ ܒܟܼܠܥܸܕܵܢ. ܒܦܸܓܼܥܵܐ ܕܗܵܢܵܐ ܩܪܵܒܼܵܐ ܡܸܬܿܕܵܘܲܕܼ
                ܗܵܘܢܵܐ ܕܬܲܩ̈ܢܹܐ ܘܡܸܬܼܒܲܠܒܲܠ: ܐܸܢ ܠܵܐ ܐܝܼܬܼܵܘܗܝ ܙܗܝܼܪܵܐ ܕܛܵܒܼ.
                ܡܵܪܲܢ ܡܨܸܐ ܚܹܝܠ ܟܠ: ܡܲܒܘܼܥܵܐ ܕܟܼܠܗܘܿܢ ܥܘܼܕܼܪ̈ܵܢܹܐ: ܐܲܢ̄ܬܿ
                ܤܲܡܸܟܼ ܒܥܸܕܵܢܹ̈ܐ ܗܵܠܹܝܢ ܕܐܝܼܬܲܝܗܘܿܢ ܙܲܒܼ̈ܢܹܐ ܕܤܵܗܕܘܼܬܼܵܐ: ܠܢܲܦ̈ܫܵܬܼܵܐ
                ܕܐܲܡܟܲܪ ܝܵܬܼܗܹܝܢ ܚܵܕܼܝܵܐܝܼܬܼ ܠܵܟܼ ܚܲܬܼܢܵܐ ܫܡܲܝܵܢܵܐ: ܘܝܲܗ̣̄ܒܼ ܠܵܟܼ
                ܫܘܼܘܕܵܝܵܐ ܕܩܲܕܝܼܫܘܼܬܼܵܐ: ܒܟܼܠܵܗ̇ ܫܲܦܝܘܼܬܼܵܐ ܕܙܵܘ̈ܥܹܐ ܘܠܵܘ ܚܵܪܥܵܐܝܼܬܼ.
                ܗܲܒܼ ܒܗܹܝܢ ܚܲܝܠܵܐ ܗܵܘ̇ ܟܵܒܹ̇ܫ ܚܸܤ̈ܢܹܐ ܡܪ̈ܝܼܕܹܐ ܘܟܼܠ ܪܵܘܡܵܐ
                ܕܡܸܬܿܬܿܪܝܼܡ ܠܘܼܩܒܲܠ ܩܲܕܝܼܫܘܼܬܼܵܐ: ܕܠܵܐ ܢܸܬܿܕܵܘ̈ܕܼܵܢ ܡ̣ܢ ܢܝܼܫܵܐ
                ܕܤܝܼܡ ܠܗܹܝܢ: ܒܲܩܛܝܼܪܵܐ ܠܵܐ ܡܸܤܬܲܝܒܿܪܵܢܵܐ ܕܥܸܕܵܢܵܐ ܗܵܘ̇ ܕܟܼܵܬܹ̇ܫ
                ܒܹܗ ܐܵܓܼܘܿܢܵܐ ܕܲܕܼܡܵܐ. ܠܵܘ ܟܠ ܐܸܡܲܬܼܝ ܗܵܘܹ̇ܐ ܒܐܵܓܼܘܿܢܵܐ ܕܢܲܟܼܦܘܼܬܼܵܐ
                ܬܲܟܼܬܘܼܫܵܐ ܗܵܢܵܐ ܥܲܤܩܵܐ. ܡܸܫܬܲܒܼܩܵܢܘܼܬܼܵܐ ܛܵܟܼ ܗܵܘ̇ܝܵܐ: ܐܲܝܟܼ
                ܕܲܠܒܼܘܼܚܪܵܢܵܐ. ܘܵܝ ܠܚܲܠܵܫܵܐ ܕܡܸܬܼܒܿܚܲܪ ܒܗܵܢܵܐ ܬܲܟܼܬܘܼܫܵܐ ܦܪܝܼܫܵܐ.
                ܚܲܝܠܵܐ ܪܲܒܵܐ ܠܗܵܢܵܐ ܐܝܼܬܼ: ܬܘܼܩܦܵܐ ܕܡ̣ܢ ܥܝܵܕܼܵܐ ܢܵܤ݂̇ܒܼ: ܒܐܲܝܠܹܝܢ
                ܕܠܲܓܼܡܵܪ ܝܲܗ̣̄ܒܼܘ ܢܲܦܫܗܘܿܢ ܠܡܸܙܕܲܟܼܝܵܢܘܼܬܼܵܐ ܐܵܦܸܢ ܚܕܼܵܐ ܙܒܲܢ:
                ܒܲܪܟܼܝܼܢܘܼܬܼ ܚܘܼܫܵܒܼܵܐ ܠܘܵܬܹܗ܀
                	ܐܸܙܕܲܗ̄ܪܘ ܡ̣ܢ ܒܸܛܠܵܢܵܐ ܚܲܒܿܝܼ̈ܒܲܝ: ܡܵܘܬܵܐ ܡܸܬܼܝܲܕܼܥܵܢܵܐ ܟܤܸܐ
                ܒܓܼܵܘܹܗ. ܒܸܠܥܵܕܼܵܘܗܝ ܕܢܸܦܸܠ ܝܑܼܚܝܼܕܼܵܝܵܐ ܒܐܝܼܕܼܵܐ ܕܫܲܒܵܝܵܘ̈ܗܝ: ܠܵܐ
                ܡܸܫܟܿܚܵܐ. ܠܵܘ ܕܥܲܠ ܡܲܙܡܘܿܪܹ̈ܐ ܕܵܐܹ̇ܢ ܠܲܢ ܐܲܠܵܗܵܐ ܒܗܵܘ̇ ܝܵܘܡܵܐ:
                
                 210 
                
                ܐܵܘ ܥܲܠ ܒܸܛܠܵܢܵܐ ܕܥܸܕܵܢܹ̈ܐ ܕܬܸܫܡܸܫܬܼܵܐ ܐܸܡܲܬܼܝ ܕܢܸܓܼܕܲܫ. ܐܸܠܵܐ
                ܒܲܫܒܼܝܼܩܘܼܬܼܗܘܿܢ: ܗܵܘܹ̇ܐ ܡܲܥܠܵܢܵܐ ܠܫܹܐܕܹ̈ܐ. ܘܡܵܐ ܕܐܸܫܟܲܚ̣ܘ ܐܲܬܼܪܵܐ:
                ܘܥܲܠ̣ܘ ܘܐܸܚܲܕܼܘ ܩܲܝ̈ܛܘܿܢܲܝܢ: ܡܫܲܡܠܹܝܢ ܒܲܢ ܛܪܘܼܢܵܐܝܼܬܼ: ܗܵܠܹܝܢ
                ܕܲܬܼܚܹܝܬܼ ܓܙܵܪ ܕܝܼܢܹ̈ܐ ܐܲܠܵܗܵܝܹ̈ܐ ܚܵܒܼ̈ܫܵܢ ܠܤܵܥܘܿܪ̈ܲܝܗܹܝܢ ܒܲܬܼܒܼܥܬܼܵܐ ܩܫܝܼܬܼܵܐ
                ܕܲܥܠܲܝܗܹܝܢ: ܘܗܵܘ̇ܿܝܢܲܢ ܡܫܲܥ̈ܒܿܕܹܐ ܡܸܛܠ ܫܒܼܝܼܩܘܼܬܼܵܐ ܕܲܙܥܘܿܪ̈ܝܵܬܼܵܐ:
                ܕܒܲܫܩܵܠ ܛܲܥܢܵܐ ܡܸܬܼܝܲܨ̈ܦܵܢ ܡܸܛܠ ܡܫܝܼܚܵܐ ܡ̣ܢ ܚܲܟܿܝܼ̈ܡܹܐ. ܐܲܝܟܼ
                ܗܵܝ̇ ܕܐܲܡܝܼܪܵܐ: ܕܡܲܢ ܕܠܵܐ ܡܫܲܥܒܸܕܼ ܠܐܲܠܵܗܵܐ ܨܸܒܼܝܵܢܹܗ: ܗܵܘܹ̇ܐ
                ܡܫܲܥܒܿܕܼܵܐ ܠܲܒܼܥܸܠܕܝܼܢܹܗ. ܫܘܼܪܹ̈ܐ ܡܵܕܹܝܢ ܢܸܬܼܚܲܫ̈ܒܵܢ ܠܲܢ ܩܕܼܵܡ
                ܫܲܒܼܵܝܲܝ̈ܢ ܗܵܠܹܝܢ ܕܡܵܟ̈ܵܬܼܵܐ ܡܸܤܬܲܒܼܪ̈ܵܢ: ܕܗܵܘܹ̇ܐ ܫܘܼܡܠܵܝܗܹܝܢ ܒܓܼܵܘ
                ܩܸܠܵܝܬܼܵܐ: ܗܵܠܹܝܢ ܕܡ̣ܢ ܐܲܚܝܼ̈ܕܲܝ ܛܲܟܼܤܹ̈ܐ ܕܚܝܼ̈ܠܹܐ ܕܥܹܕܬܵܐ ܒܚܸܟܼܡܬܼܵܐ
                ܐܸܬܿܬܿܤܝܼܡ: ܠܢܘܼܛܵܪ ܚܲܝܲܝ̈ܢ ܒܪܘܼܚ ܓܸܠܝܵܢܵܐ. ܗܵܠܹܝܢ ܕܲܫܒܼܝܼܩܘܼܬܼܗܹܝܢ:
                ܙܥܘܿܪܝܵܐ ܡܸܬܼܚܲܫܒܵܐ ܨܒܼܘܼܬܼܵܐ ܠܠܵܐ ܚܲܟܿܝܼ̈ܡܹܐ. ܒܤܘܼܪ̈ܚܵܢܹܐ ܕܹܝܢ
                ܕܡܸܢܵܗ̇ ܡܸܬܼܝܲܠܕܝܼܢ: ܠܵܐ ܡܸܬܼܒܲܩܹܝܢ. ܫܘܼܪܵܝܵܐ ܘܲܡܨܲܥܬܼܵܐ ܕܐܘܼܪܚܗܘܿܢ:
                ܚܹܐܪܘܼܬܼܵܐ ܕܠܵܐ ܡܢܲܦܩܵܐ: ܕܗ̤ܝ ܗ̣̄ܝ ܐܸܡܵܐ ܕܬܼܘܼ̈ܟܹܐ. ܠܡܸܬܼܐ̱ܠܵܨܘܼ.
                ܒܲܫܩܝܼܠܘܼܬܼ ܨܸܦܬܼܵܐ ܕܲܙܥܘܿܪ̈ܝܵܬܼܵܐ ܦܲܩܵܚ: ܡ̣ܢ ܕܲܠܡܸܬܲܠ ܠܲܚܛܝܼܬܼܵܐ
                ܐܲܬܼܪܵܐ ܒܲܪܘܲܚܬܼܵܐ ܕܡܸܢܗܹܝܢ. ܗܵܕܼܵܐ ܗ̣̄ܝ ܚܹܐܪܘܼܬܼܵܐ ܕܠܵܐ ܒܙܲܒܼܢܵܗ̇:
                ܕܚܲܪܬܼܵܗ̇ ܫܘܼܥܒܵܕܼܵܐ ܩܲܫܝܵܐ܀ ܟܠ ܟܡܵܐ ܕܪܸ̈ܓܼܫܲܝܟ ܚܲܝܼܢ ܠܦܸܓܼܥܹ̈ܐ
                ܕܟܼܠ ܓܸܕܼܫ̈ܝܼܢ: ܡ̣ܢ ܟܲܕܘܼ ܡܝܼܬܼܵܐ ܬܸܚܫܘܿܒܼ ܢܲܦܫܵܟܼ. ܠܵܐ ܓܹܝܪ
                ܡܬܼܘܿܡ ܚܵܤ̇ܪܵܐ ܠܵܟܼ ܝܵܩܘܿܕܼܘܼܬܼܵܐ ܕܲܚܛܝܼܬܼܵܐ ܒܟܼܠ ܫܘܼܚ̈ܠܵܦܝܼܢ ܡ̣ܢ
                ܗܲܕܵܝ̈ܟ: ܘܠܵܐ ܫܲܝܢܵܐ ܕܲܢܨܘܼܒܼ ܒܢܲܦܫܵܟܼ ܡܸܫܟܿܚܵܐ. ܐܸܢ ܐܝܼܬܼ
                ܡ̣ܢ ܝܑܼܚܝܼ̈ܕܼܵܐ ܕܥܲܡ ܗܵܠܹܝܢ ܕܢܸܙܕܗܲܪ ܒܠܸܒܹܗ ܡܸܫܬܵܘܕܹܐ: ܗܵܢܵܐ:
                
                 211 
                
                ܠܵܐ ܨܵܒܹ̇ܐ ܕܢܸܗܘܸܐ ܝܵܕܲܥ ܟܲܕܼ ܒܵܠܲܥ. ܕܲܒܼܚܲܒܼܪܹܗ ܐ̄ܢܵܫ ܢܲܛܥܸܐ
                ܠܠܵܘܛܬܼܵܐ ܡܚܲܝܲܒܼ: ܐܲܝܟܼ ܕܡ̣ܢ ܢܵܡܘܿܤܵܐ. ܕܐ̄ܢܵܫ ܕܹܝܢ ܒܢܲܦܫܹܗ
                ܢܲܛܥܸܐ: ܠܐܲܝܠܹܝܢ ܡܤܵܡ ܒܪܹܫܹܐ ܠܵܐ ܫܵܘܹ̇ܐ: ܕܟܲܕܼ ܝܵܕܲܥ̇: ܥܵܒܹ̇ܕܼ
                ܗܘ̤ ܠܹܗ ܕܠܵܐ ܢܸܕܲܥ ܕܝܵܕܲܥ̇: ܡܸܛܠ ܗܵܝ̇ ܕܲܠܥܸܠܬܼܵܐ ܠܡܸܫܪܵܐ
                ܡܸܬܿܬܿܒܲܥ ܗܵܝܕܹܝܟ ܡ̣ܢ ܬܹܐܪܬܹܗ. ܗܵܕܲܐ ܗ̣̄ܝ ܕܥܲܤܩܵܐ ܒܥܲܝܢܵܘ̈ܗܝ:
                ܕܡܸܛܠܵܬܼܵܗ̇ ܟܲܕܼ ܝܵܕܼܘܿܥܵܐ ܗ̄ܘ̣: ܨܵܒܹ̇ܐ ܕܢܸܗܘܸܐ ܐܝܼܬܼܵܘܗܝ ܠܵܐ
                ܝܵܕܼܸܘܿܥܵܐ. ܐܘܿ ܟܡܵܐ ܚܲܠܝܵܐ ܥܸܠܬܼܵܐ ܕܚܲܫܹ̈ܐ! ܠܗܘܿܢ ܠܚܲܫܹ̈ܐ: ܦܵܤܹ̇ܩ
                ܐܝܼܬܼ ܐܸܡܲܬܼܝ. ܘܲܠܡܸܕܼܚܵܐ ܐܸܢܘܿܢ: ܡܢܵܚ. ܒܒܼܘܼܛܵܠܗܘܿܢ ܕܹܝܢ ܚܵܕܹܐ
                ܟܡܵܐ ܙܲܒܼ̈ܢܝܼܢ: ܠܥܸܠܬܼܵܐ ܕܹܝܢ ܕܝܼܠܗܘܿܢ ܕܢܸܥܩܪ̱ܝܼܗ̇ ܠܵܐ ܡܸܫܟܲܚ.
                ܡܸܛܠ ܗܵܢܵܐ: ܘܐܵܦ ܟܲܕܼ ܠܵܐ ܨܵܒܹ̇ܝܢܲܢ: ܡܸܬܼܢܲܤܹܝܢܲܢ. ܒܚܲܫܹ̈ܐ:
                ܡܥܵܩ̇ܝܼܢܲܢ. ܠܥܸܠ̈ܠܵܬܼܗܘܿܢ ܕܹܝܢ ܕܲܢܩܵܘ̈ܝܵܢ ܠܘܵܬܲܢ: ܡܲܚܒܼܝܼܢܲܢ.
                ܒܲܚܛܵܗܹ̈ܐ: ܠܵܐ ܨܵܒܹ̇ܝܢܲܢ. ܠܡܲܝܬܿܝܵܢܹ̈ܐ ܕܹܝܢ ܕܝܼܠܗܘܿܢ: ܗܲܢܝܼܵܐܝܼܬܼ
                ܡܩܲܒܿܠܝܼܢܲܢ. ܡܸܛܠ ܗܵܢܵܐ: ܥܸܠܬܼܵܐ ܗܵܘܹ̇ܝܢ ܬܪ̈ܲܝܵܢܹܐ ܠܩܲܕܼܡܵܝܹ̈ܐ
                ܠܲܓܼܡܵܪܵܐ. ܐܲܝܢܵܐ ܕܲܒܼܥܸܠ̈ܠܵܬܼܗܘܿܢ ܠܲܡ ܕܚܲܫܹ̈ܐ ܨܵܒܹ̇ܐ: ܡܫܲܥܒܲܕܼ ܗ̄ܘ̣
                ܠܗܘܿܢ: ܘܟܲܕܼ ܠܵܐ ܨܵܒܹ̇ܐ܀
                	ܕܤܵܢܹ̇ܐ ܠܲܚܛܵܗܵܘ̈ܗ: ܦܵܐܹ̇ܫ ܡܸܢܗܘܿܢ. ܘܲܕܼܡܵܘܕܸܐ
                ܒܚܵܘ̈ܒܵܬܹܗ: ܫܵܩܹ̇ܠ ܫܘܼܒܼܩܵܢܵܐ. ܘܠܵܐ ܦܵܘܫܵܐ ܕܡ̣ܢ ܚܛܵܗܹ̈ܐ ܕܲܥܝܵܕܼܵܐ
                ܒܸܠܥܵܕܼ ܩܲܢܵܝܘܼܬܼ ܤܸܢܐܬܼܵܐ: ܘܠܵܐ ܡܲܤܒܼܵܐ ܕܫܘܼܒܼܩܵܢܵܐ ܒܸܠܥܵܕܼ
                ܬܵܘܕܝܼܬܼܵܐ ܕܚܵܘ̈ܒܵܬܼܵܐ. ܠܗܵܕܹܐ: ܚܲܬܝܼܬܼܘܼܬܼ ܡܘܼܟܵܟܼܵܐ. ܘܲܠܗܵܝ̇: ܬܘܵܬܼܵܐ
                ܕܡ̣ܢ ܒܸܗܬܿܬܼܵܐ ܕܲܒܼܠܸܒܵܐ ܢܵܩ̇ܦܵܐ. ܥܕܲܡܵܐ ܕܲܠܤܸܢܐܲܬܼܗܹܝܢ ܢܸܫܪܲܟܼ
                ܕܲܥܕܼܝܼ̈ܠܵܬܼܵܐ: ܠܵܐ ܡܲܨܝܵܐ ܕܲܒܼܤܲܪܝܼܘܼܬܼܵܐ ܡܲܪܓܸܫ ܕܲܥܒܼܝܼܕܿܬܿܗܹܝܢ: ܘܠܵܐ
                
                 212 
                
                ܒܙܲܦܘܼܪܘܼܬܼܗܹܝܢ ܟܡܵܐ ܕܲܒܲܩܢܘܿܡܲܢ ܛܥܝܼܢܝܼܢܲܢ. ܥܕܲܡܵܐ ܕܬܸܫܕܹܝܗ̇
                ܠܲܤܢܝܼܬܼܵܐ ܡܸܢܵܟܼ: ܐܵܦ ܠܵܐ ܠܐܲܝܕܵܐ ܒܸܗܬܿܬܼܵܐ ܥܲܦܝܼܩ ܐܲܢ̄ܬܿ ܬܸܕܲܥ:
                ܘܠܵܐ ܠܟܼܘܼܚܵܕܼܵܐ ܕܡܸܢܵܗ̇. ܡܵܐ ܕܒܲܐ̄ܚܪ̈ܵܢܹܐ ܬܸܚܙܹܝܗ̇ ܠܲܛܥܘܼܢܬܵܟܼ:
                ܗܵܝܕܹܝܟ ܬܸܕܲܥ ܠܟܼܘܼܐܵܪܵܐ ܕܲܥܛܝܼܦ ܠܵܟܼ. ܐܲܪܚܸܩ ܡ̣ܢ ܒܝܼܫܬܼܵܐ:
                ܘܬܸܕܲܥ ܤܲܪܝܼܘܼܬܼܵܗ̇. ܐܸܠܵܐ ܬܲܚܸܩ: ܐܵܦܠܵܐ ܬܸܕܲܥ. ܐܲܝܟܼ ܪܹܝܚܵܐ
                ܓܹܝܪ ܒܲܤܝܼܡܵܐ ܬܥܲܦܸܩ ܤܲܪܝܘܼܬܼܵܗ̇: ܘܥܲܪܛܸܠܵܝܘܼܬܼ ܦܘܼܪܤܵܝܵܟܼ
                ܐܲܝܟܼ ܬܲܟܼܤܝܼܬܼܵܐ ܕܬܸܫܒܿܘܿܚܬܼܵܐ܀ ܛܘܼܒܼܵܘܗܝ ܠܡܲܢ ܕܐܲܪܚܸܩ̣ ܡ̣ܢ
                ܚܸܫܘܿܟܼܵܐ ܘܲܚ̣ܙܵܐ ܢܲܦܫܹܗ: ܠܵܐ ܡܲܨܝܵܐ ܒܓܼܵܘܹܗ ܬܫܲܡܸܫ ܚܙܵܬܼܵܐ
                ܘܲܠܡܸܦܪܲܫ. ܛܘܼܒܼ ܠܲܕܼܫܲܒܼܩܹܗ ܨܕܼܵܪܵܐ ܕܚܲܡܪܹܗ: ܘܲܠܙܲܠܝܼܠܘܼܬܼܵܐ
                ܕܪܵܘܵܝܘܼܬܹܗ ܒܲܐ̄ܚܪ̈ܵܢܹܐ ܚ̣ܙܵܗ̇ ܕܐܲܝܟܲܢ ܐܝܼܬܹܝܗ̇: ܗܵܝܕܹܝܟ ܡܸܤܬܲܟܲܠ
                ܒܸܗܬܿܬܼܵܐ ܕܲܩܢܘܿܡܹܗ. ܟܡܵܐ ܕܹܝܢ ܕܗ̤ܘ ܒܲܩܢܘܿܡܹܗ ܛܥܝܼܢ ܠܵܗ̇
                ܠܪܵܘܵܝܘܼܬܼܵܐ ܕܒܲܚܛܵܗܹ̈ܐ: ܫܲܦܝܼܪ ܗ̄ܘ̣ ܒܥܲܝܢܵܘ̈ܗܝ ܟܠܡܸܕܸܡ ܕܤܵܥܲܪ.
                ܐܸܡܲܬܼܝ ܕܲܟܼܝܵܢܵܐ ܡ̣ܢ ܛܲܟܼܤܹܗ ܢܦܲܩ̣: ܫܘܸܐ ܗ̄ܘ̣ ܟܲܕܼ ܒܚܲܡܪܵܐ
                ܪܘܸܐ ܘܒܲܪ̈ܓܼܝܼܓܼܵܬܐ. ܬܪ̈ܲܝܗܘܿܢ: ܡ̣ܢ ܘܵܠܝܼܬܼܵܐ ܡܲܦܩܝܼܢ. ܬܪ̈ܲܝܗܘܿܢ:
                ܠܲܚܕܼܵܐ ܗ̄ܘ̣ ܚܲܡܝܼܡܘܼܬܼܵܐ ܡܙܝܼܥܝܼܢ ܒܓܼܘܼܫܡܵܐ ܡܩܲܒܿܠܵܢܘܿܢ. ܐܵܕܼܫܹ̈ܐ
                ܦܪܝܼܫܝܼܢ: ܡܘܼܙܵܓܼܵܐ ܕܹܝܢ ܚܲܕܼ ܗ̄ܘ̣: ܘܫܵܢܝܘܼܬܼܵܐ ܚܕܼܵܐ. ܠܵܐ ܫܲܘܝܘܼܬܼܵܐ
                ܓܹܝܪ: ܒܐܵܕܼܫܹ̈ܐ ܥܸܠܬܼܵܢܹ̈ܐ. ܒܲܡܩܲܒܿܠܵܢܹ̈ܐ ܕܹܝܢ: ܠܲܝܬܿ ܦܘܼܪܫܵܢܵܐ܀
                ܠܟܼܠ ܢܝܵܚܵܐ ܡܲܢ ܗܵܟܹܝܠ ܕܐܝܼܬܼ: ܤܝܼܡ ܗ̄ܘ̣ ܒܵܬܼܪܹܗ ܛܘܼܪܵܦܵܐ.
                ܘܲܠܟܼܠ ܛܘܼܪܵܦܵܐ: ܢܝܵܚܵܐ. ܐܸܢܕܹܝܢ ܟܠ ܕܲܒܼܥܵܠܡܵܐ ܗܵܢܵܐ ܡܸܫܬܲܚܠܦܵܢܵܐ
                ܐܝܼܬܼܵܘܗܝ: ܫܘܼܚܠܵܦܹܗ ܕܹܝܢ ܤܲܩܘܼܒܼܠܵܐܝܼܬܼ ܡܩܲܒܸܠ: ܐܵܘ ܗܵܪܟܵܐ
                ܐܵܘ ܠܗܲܠ: ܐܵܘ ܒܥܸܕܵܢ ܡܲܦܩܵܢܹܗ ܕܐ̄ܢܵܫ. ܘܝܲܬܝܼܪܵܐܝܼܬܼ: ܠܲܢܝܵܚܵܐ
                
                 213 
                
                ܗܵܘ̇ ܕܡ̣ܢ ܦܲܚܙܘܼܬܼܵܐ: ܐܵܘ ܠܛܘܼܪܵܦܵܐ ܗܵܘ̇ ܕܠܘܼܩܒܲܠ ܗܵܢܵܐ:
                ܕܗܵܘܹ̇ܐ ܩܲܕܝܼܫܵܐܝܼܬܼ. ܘܗܵܕܹܐ ܟܲܕܼ ܡܤܲܚܡܵܢܵܐܝܼܬܼ ܡܸܬܼܚܲܫܲܚ ܐܲܠܵܗܵܐ:
                ܕܐܵܘ ܒܵܗ̇ ܒܐܘܼܪܚܵܐ: ܐܵܘ ܒܫܘܼܠܵܡܵܗ̇ ܛܵܥܹ̇ܡ ܠܹܗ ܐ̄ܢܵܫ ܠܗܵܘ̇
                ܫܘܼܢܵܩܵܐ: ܘܗܵܝܕܹܝܢ ܥܵܒܲܪ. ܘܡܸܛܠ ܥܘܼܬܼܪܵܐ ܕܲܡܪܲܚܡܵܢܘܼܬܹܗ
                ܕܐܲܠܵܗܵܐ: ܠܵܗ̇ ܠܗܵܕܹܐ: ܐܲܝܟܼ ܕܲܒܼܦܘܼܪܥܵܢܵܐ. ܠܗܵܝ̇ ܡܲܢ: ܐܲܝܟܼ
                ܪܲܗܒܼܘܿܢܵܐ. ܒܗܵܝ̇ ܕܠܵܐ ܐܵܟܼܠܵܐ ܪܸܒܿܝܼܬܼܵܗ̇ ܕܛܵܒܼܬܼܵܐ ܠܩܲܪܢܵܗ̇. ܒܝܼܫܬܼܵܐ
                ܕܹܝܢ: ܐܹܝܢ. ܐܲܝܟܼ ܕܐܲܡܝܼܪ: ܕܐܲܝܢܵܐ ܕܡܸܬܼܪ̱ܕܸܐ ܬܢܵܢ: ܡ̣ܢ ܓܹܗܲܢܹܗ
                ܐܵܟܹ̇ܠ܀
                	ܐܸܙܕܲܗ̄ܪ ܡ̣ܢ ܚܹܐܪܘܼܬܼܵܐ ܕܲܩܕܼܵܡ ܫܘܼܥܒܵܕܼܵܐ: ܐܸܙܕܲܗ̄ܪ ܡ̣ܢ
                ܒܘܼܝܵܐܵܐ ܕܩܲܕܝܼܡ ܠܲܩܪ̈ܵܒܹܐ܀ ܐܲܙܕܲܗ̄ܪ ܡ̣ܢ ܝܑܼܕܲܥܬܼܵܐ ܕܩܲܫܝܼܫܵܐ ܠܦܸܓܼܥܹ̈ܐ
                ܕܢܸܤܝ̈݁ܘܿܢܹܐ. ܝܲܬܝܼܪ ܕܹܝܢ: ܡ̣ܢ ܚܘܼܒܵܐ ܗܵܘ̇ ܕܩܲܕܝܼܡ ܠܫܘܼܡܠܵܝܵܐ
                ܕܲܬܼܝܵܒܼܘܼܬܼܵܐ. ܐܸܢ ܟ̱ܠܲܢ ܚܲܛܵܝܹ̈ܐ: ܘܠܲܝܬܿ ܕܥܸܠܵܝ ܡ̣ܢ ܢܸܤܝܵܢܗܘܿܢ:
                ܠܲܝܬܿ ܕܩܲܕܝܼܡܵܐ ܒܲܡܝܲܬܿܪ̈ܵܬܼܵܐ ܠܲܬܼܝܵܒܼܘܼܬܼܵܐ. ܥܗܲܕܼ ܕܟܼܠ ܗܲܢܝܼܐܘܼܬܼܵܐ:
                ܬܪܲܝܵܢܝܼܬܼܵܐ ܗ̣̄ܝ ܕܲܓܼܥܝܼܨܘܼܬܼܵܐ ܘܲܡܪܵܪܹ݁ܐ܀ ܐܸܙܕܲܗ̄ܪ ܘܡ̣ܢ ܚܲܕܼܘܼܬܼܵܐ:
                ܕܫܘܼܚܠܵܦܵܐ ܕܠܵܐ ܥܸܠܬܼܵܐ ܥܲܡܵܗ̇ ܠܵܐ ܟܕܼܝܼܢܵܐ. ܟܠܡܸܕܸܡ ܕܦܘܼܪܢܵܤܹܗ
                ܡ̣ܢ ܠܥܸܠ: ܡܵܪܕܲܬܼ ܠܝܼܕܲܥܬܼܵܐ ܬܸܫܟܲܚ ܥܸܠܬܼܵܐ ܕܫܘܼܚܠܵܦܹܗ. ܡ̣ܢ
                ܐܲܝܕܵܐ ܕܫܲܘܝܘܼܬܼܵܐ ܡܸܤܬܲܒܼܪܵܐ ܕܲܛܥܝܼܢܵܐ: ܕܚܲܠ. ܠܒܲܪ ܡ̣ܢ ܐܘܼܪܚܵܐ
                ܡܸܬܼܐܲܡܪܵܐ ܕܲܕܼܪܝܼܫܵܐ. ܗܵܘ̇ ܕܚܲܟܿܝܼܡܵܐܝܼܬܼ ܝܵܕܲܥ ܕܲܢܕܲܒܲܪ ܐܸܠܦܹܗ
                ܕܥܵܠܡܵܐ: ܫܘܼܚܠܵܦܵܐ ܐܲܠܘܸܬܼ ܠܟܼܠ ܕܝܼܠܹܗ. ܕܲܦܪܝܼܫ ܡ̣ܢ ܗܵܢܵܐ:
                ܕܘܼܡܝܵܐ. ܢܲܩܝܼܦ ܗ̄ܘ̣ ܠܲܢܝܵܚܵܐ ܕܗܲܕܵܡܹ̈ܐ: ܦܸܗܝܵܐ ܕܚܘܼܫܵܒܹ̈ܐ. ܠܥܲܡܠܵܐ
                ܕܹܝܢ ܕܠܵܐ ܡܡܲܫܲܚ: ܩܘܼܛܵܥܵܐ. ܘܲܠܩܘܼܛܵܢܵܐ ܬܘܼܒܼ: ܦܸܗܝܵܐ.
                ܦܪܝܼܫ ܦܸܗܝܵܐ ܡ̣ܢ ܦܸܗܝܵܐ. ܠܗܵܘ̇ ܩܲܕܼܡܵܝܵܐ: ܐܵܓܼܘܿܢܵܐ ܕܨܲܚܢܘܼܬܼܵܐ
                
                 214 
                
                ܢܲܩܝܼܦ. ܠܗܵܢܵܐ ܕܹܝܢ: ܫܘܼܢܵܝܵܐ ܕܡ̣ܢ ܟܘܼܪܚܵܐ: ܘܫܘܼܚܠܵܦ ܕܘܼ̈ܟܿܝܵܬܼܵܐ.
                ܠܥܲܡܠܹ̈ܐ ܕܹܝܢ ܡܡܲܫ̈ܚܹܐ ܟܲܕܼ ܟܕܼܝܼܢܵܐ ܥܲܡܗܘܿܢ ܐܲܡܝܼܢܘܼܬܼܵܐ: ܠܲܝܬܿ
                ܕܡܲܝ̈ܵܐ. ܚܲܤܝܼܪܘܼܬܼܗܘܿܢ  ܕܗܵܢܘܿܢ: ܝܲܬܝܼܪܘܼܬܼܵܐ ܒܪܸܓܿܬܼܵܐ.
                ܥܵܠܘܿܒܼܘܼܬܼܗܘܿܢ ܡܲܢ: ܐܲܬܼܪܵܐ ܠܕܼܸܘܼܘܵܕܼܵܐ܀
                	ܚܲܡܤܸܢ ܫܵܛܝܼܬܹܗ ܕܲܟܼܝܵܢܵܐ ܕܥܵܠ̇ܒܵܐ ܒܦܲܓܼܪܵܟܼ: ܐܲܚܵܐ: ܡܸܛܠ
                ܕܲܥܬܼܝܼܕܼ ܐܲܢ̄ܬܿ ܠܡܸܗܘܵܐ ܒܗܵܝ̇ ܚܸܟܼܡܬܼܵܐ ܕܠܵܐ ܥܵܒܲܪ ܬܵܓܼܵܐ ܕܪܹܫܢܘܼܬܼܵܗ̇.
                ܠܵܐ ܬܸܬܿܕܵܘܲܕܼ ܒܲܕܼܠܘܼܚܝܵܐ ܕܦܲܓܼܪܵܐ ܐܵܕܼܵܡܵܝܵܐ: ܕܲܥܬܼܝܼܕܼ ܠܡܸܗܘܵܐ
                ܒܗܵܘ̇ ܒܘܼܤܵܡܵܐ: ܕܝܲܬܝܼܪܵܐ ܝܑܼܕܲܥܬܹܗ ܬܢܵܢ ܠܗܵܘ̈ܢܹܐ ܕܲܒܼ̈ܢܲܝ ܒܸܤܪܵܐ:
                ܡܵܐ ܕܢܸܠܒܲܫ ܨܲܠܡܵܐ ܗܵܘ̇ ܫܡܲܝܵܢܵܐ: ܕܐܝܼܬܼܵܘܗܝ ܡܲܠܟܵܐ ܕܫܲܝܢܵܐ.
                ܠܵܐ ܬܸܫܬܓܸܫ ܩܕܼܵܡ ܫܘܼ̈ܚܠܵܦܹܐ ܕܠܝܼܚܹ̈ܐ ܕܲܟܼܝܵܢܵܐ. ܡܠܸܐ ܙܲܒܼܢܵܐ ܗ̄ܘ̣
                ܓܹܝܪ ܥܲܡܠܵܐ ܕܲܒܼܗܘܿܢ ܠܪܲܡܥܲܙܸܐ: ܐܲܝܟܼ ܗܸܢܝܵܢܵܐ ܕܩܘܼܒܵܠܗܘܿܢ.
                ܟܲܠܒܹ̈ܐ ܐܸܢܘܿܢ. ܕܐܸܬܼܥܲܝܲܕܼܘ ܠܘܵܬܼ ܛܲܒܵܚܵܐ. ܒܩܵܠܵܐ ܒܲܠܚܘܿܕܼ
                ܕܦܘܼܡܵܐ: ܥܵܪܩܝܼܢ ܠܗܘܿܢ. ܐܸܢ ܕܹܝܢ ܬܸܬܼܪܡܸܐ ܠܥܸܢܝܵܢܗܘܿܢ: ܬܸܥܒܸܿܕܼ
                ܐܸܢܘܿܢ ܐܲܪ̈ܝܵܘܵܬܼܵܐ ܥܲܫܝܼ̈ܢܹܐ. ܫܘܼܛ ܠܗܲܢܝܼܐܘܼܬܼܵܐ ܙܥܘܿܪܬܵܐ: ܕܠܵܐ
                ܬܸܬܼܚܒܸܫ ܠܥܘܼܙܵܐ ܕܚܲܡܝܼܡܘܼܬܼܵܗ̇. ܡܤܲܝܒܿܪܵܢܘܼܬܼܵܐ ܙܥܘܿܪܬܵܐ
                ܕܠܘܼܒܒܲܠ ܨܸܒܼ̈ܘܵܬܼܵܐ ܙܥܘܿܪ̈ܝܵܬܼܵܐ ܗܵܘ̇ܝܵܐ: ܠܩܹܘܲܢܕܹܝܢܘܿܣ ܕܡܹܐܬܼܝܼܬܼܗܹܝܢ
                ܕܨܸܒܼ̈ܘܵܬܼܵܐ ܪܵܘܪ̈ܒܼܵܬܼܵܐ ܪܵܘܪ̈ܒܼܵܬܼܵܐ ܬܵܟܼ̇ܤܵܐ. ܠܲܝܪ ܠܡܸܙܟܵܐ ܠܒܼܝܼ̈ܫܵܬܼܵܐ ܪܵܘܪ̈ܒܼܵܬܼܵܐ:
                ܒܸܠܥܵܕܼ ܙܵܟܼܘܼܬܼܵܐ ܙܥܘܿܪܬܵܐ ܕܥܲܠ ܒܨܝܼܪ̈ܵܬܼܵܐ܀ ܐܸܬܿܕܲܟܼ̄ܪ ܠܗܵܘ̇
                ܐܸܤܟܹܡܵܐ ܕܲܥܬܼܝܼܕܼ ܐܲܢ̄ܬܿ ܠܡܸܗܘܵܐ ܒܹܗ ܐܲܚܵܐ: ܕܠܵܐ ܬܘܼܒܼ ܗܵܘܹ̇ܝܢ
                ܒܹܗ ܚܲܝܹ̈ܐ ܕܲܒܼܟܼܘܿܡܘܿ ܪܵܦܬܿܝܼܢ: ܕܲܒܼܗܘܿܢ ܡܸܫܬܲܚܩܵܐ ܡܵܝܘܿܬܼܘܼܬܼܵܐ.
                ܘܠܵܐ ܬܘܼܒܼ ܪܸܬܼܚܵܐ ܕܡܘܼܙܵܓܼܵܐ: ܕܲܒܼܫܘܼܕܵܠܵܐ ܕܗܲܢܝܼܐܘܼܬܹܗ ܡܛܲܪܸܦ
                ܠܲܟܼܝܵܢܵܐ ܫܲܒܼܪܵܐ. ܤܲܝܒܲܪ ܠܥܲܡܠܵܐ ܕܐܵܓܼܘܿܢܵܐ ܕܲܠܒܼܘܼܚܪܵܢܵܐ ܐܲܥܠܵܟܼ
                
                 215 
                
                ܒܹܗ: ܐܲܝܟܼ ܕܲܠܡܸܤܲܒܼ ܟܠܝܼܠܵܐ ܘܲܠܡܸܥܒܲܪ. ܒܵܬܲܪ ܩܲܠܝܼܠ ܓܹܝܪ:
                ܢܵܐܲܚ ܐܲܢ̄ܬܿ ܡ̣ܢ ܥܵܠܡܵܐ ܗܵܢܵܐ. ܐܲܬܿܕܲܟܼ̄ܪ ܠܗܵܘ̇ ܢܵܘܚܵܐ ܕܠܵܐ ܫܘܼܠܵܡܵܐ:
                ܠܗܵܢܘܿܢ ܚܲܝܹ̈ܐ ܕܠܵܐ ܫܘܼܕܵܠܵܐ: ܠܗܵܝ̇ ܩܵܘܡܬܼܵܐ ܡܫܲܡܠܲܝܬܼܵܐ ܕܓܲܒܼܪܘܼܬܼܵܐ:
                ܠܗܵܘ̇ ܕܘܼܒܵܪܵܐ ܕܲܕܼܠܵܐ ܫܘܵܪ̈ܵܬܼܵܐ: ܠܗܵܝ̇ ܫܲܒܼܝܘܼܬܼܵܐ ܕܲܩܛܝܼܪܹܗ
                ܕܚܘܼܒܵܐ ܐܲܠܵܗܵܝܵܐ: ܕܥܲܠ ܟܝܵܢܵܐ ܡܲܡܠܸܟܼ.