Isaac of Nineveh. “Discourse 31.” Based upon Digital Syriac Corpus. Last modified March 5, 2019. https://syriaccorpus.org/422.
    
        
            
                ܕܒܲܐܝܢܵܐ ܬܲܟܼܬܘܼܫܵܐ ܐܝܼܬܼ ܥܲܡܠܵܐ ܝܲܬܝܼܪܵܐ: ܡܵܠܘܿܢ ܩܹܘܲܢܕܹܝܢܘܿܣ
                ܕܡܲܦܘܼܠܬܼܵܐ. ܠܐ.
                
            
            
                ܠܲܝܬܿ ܠܡܸܙܟܵܐ ܠܚܘܼ̈ܫܵܒܹܐ ܒܝܼ̈ܫܹܐ ܕܥܲܡ ܚܘܼ̈ܬܼܚܵܬܹܐ ܕܲܒܼܓܼܘܼܫܡܵܐ
                ܡܲܠ̱ܘܬܼܝܼܢ: ܐܵܘ ܠܡܲܚܤܸܢ: ܙܲܝܢܵܐ ܥܦܝܼܦܵܐ ܕܲܠܩܘܼܒܼܠܲܢ ܐܸܫܬܲܡܲܗܘ
                ܡ̣ܢ ܐ̄ܢܵܫ̈ܝܼܢ. ܘܠܵܐ ܫܸܠܝܵܐ ܕܗܵܠܹܝܢ: ܥܲܡ ܤܲܒܼܥܵܐ ܕܠܲܚܡܵܐ ܘܡܲܝ̈ܵܐ
                ܘܫܸܢܬܼܵܐ: ܘܩܘܼܪܵܒܼܵܐ ܕܲܠܘܵܬܼ ܨܸܒܼ̈ܘܵܬܼܵܐ ܡܙܝܼ̈ܥܵܢܝܵܬܼܵܐ ܕܲܒܼܪܸ̈ܓܼܫܹܐ. ܦܲܩܵܚ
                ܛܘܼܠܵܩܵܐ ܕܡ̣ܢ ܚܲܝܹ̈ܐ: ܘܠܵܐ ܒܸܗܬܿܬܼܵܐ ܕܲܒܼܗܘܿܢ. ܟܲܕܼ ܬܹܐܟܲܦ
                ܠܲܢ ܕܘܵܠ̈ܝܵܬܼܵܐ: ܡܲܥܒܿܕܼܵܢܘܼܬܼܵܐ ܕܒܸܤܪܵܐ ܡ̣ܢ ܗܲܕܵܡܹ̈ܐ ܫܵܗ̇ܝܵܐ܀ ܠܲܝܬܿ
                ܠܡܹܐܨܲܦ ܕܡܸܬܼܪ̈ܲܓܼܫܵܢܝܬܼܵܐ: ܘܠܲܡܬܲܪܵܨܘܼ ܚܲܫܹ̈ܐ ܕܲܩܢܘܿܡܲܢ. ܕܒܸܠܥܵܕܼ
                ܚܲܫܝܪܫܘܼܬܼ ܬܲܟܼܫ̈ܦܵܬܼܵܐ ܘܲܟܼ̈ܦܵܦܹܐ ܐܲܡܝܼ̈ܢܹܐ: ܕܢܸܓܸܕܼ ܪ̈ܲܚܡܹܐ ܠܘܵܬܲܢ:
                ܠܵܐ ܡܸܫܟܿܚܵܐ. ܘܲܠܗܵܠܹܝܢ ܥܲܡ ܗܵܢܹܝܢ ܠܡܸܬܼܐ̱ܡܵܢܘܼ: ܐܵܢܲܢܩܹܐ. ܒܸܠܥܵܕܼ
                ܫܩܵܠ ܛܲܥܢܵܐ ܕܲܙܥܘܿܪ̈ܝܵܬܼܵܐ: ܠܡܸܦܠܲܛ ܡ̣ܢ ܒܝܼ̈ܫܵܬܐ ܪܵܘܪ̈ܒܼܵܬܼܵܐ: ܠܵܐ
                ܡܸܫܟܿܚܵܐ.