Isaac of Nineveh. “Discourse 32.” Based upon Digital Syriac Corpus. Last modified March 5, 2019. https://syriaccorpus.org/423.
    
        
            
                ܥܲܠ ܢܝܼܫܵܐ ܕܲܢܛܘܼܪܲܬܼ ܠܸܒܵܐ: ܘܥܲܠ ܬܹܐܘܿܪܝܼܵܐ ܩܲܛܝܼܢܬܐ ܕܒܹܗ
                ܒܐܵܘܵܢܵܐ ܡܕܝܼܩܵܐ. ܠܒ.
            
            
                 216 
                
                ܠܵܐ ܢܸܬܿܛܥܸܐ ܠܝܼܕܲܥܬܼܵܟܼ ܚܲܝܠܵܐ ܗܵܘ̇ ܕܤܝܼܡ ܒܩܝܼ̈ܢܵܬܼܵܐ ܕܪܘܼܚܵܐ:
                ܟܲܕܼ ܒܤܘܼܟܵܠܵܐ ܢܸܬܼܚܲܫܲܚ. ܛܵܒܼ ܓܹܝܪ ܫܵܒܹ̇ܐ ܠܚܘܼܫܵܒܼܵܐ ܡ̣ܢ ܥܵܠܡܵܐ.
                ܓܵܢܹ̇ܒܼ ܡܲܢ ܘܲܠܦܸܗܝܵܐ ܡ̣ܢ ܪܸܥܝܵܢܵܐ: ܐܵܦܸܢ ܡܸܤܬܿܒܲܪ ܕܲܠܫܲܒܼܪܹ̈ܐ
                ܚܵܫܲܚ. ܡܸܬܼܥܲܕܲܪ ܓܹܝܪ ܗܵܘܢܵܐ ܦܲܪܝܼܕܼܵܐ ܕܫܵܥܬܼܵܐ. ܚܲܝܠܬܼܵܢ ܗ̄ܘ̣
                ܚܘܼܬܼܚܵܬܐ ܕܪܘܼܚܵܐ: ܡ̣ܢ ܩܛܝܼܪܵܐ ܕܝܼܕܲܥܬܼܵܐ ܠܘܼܩܒܲܠ ܚܲܫܹ̈ܐ. ܐܸܡܲܬܼܝ
                ܕܬܸܗܘܸܐ ܒܲܠܚܘܿܕܲܝܟ: ܛܲܪ ܠܸܒܵܟܼ ܒܝܲܕܼ ܗܵܠܹܝܢ: ܐܸܢ ܠܵܐ ܥܕܲܟܹܝܠ
                ܚܲܝܠܵܐ ܩ̣ܢܲܝܬܿ: ܒܬܹܐܘܿܪܝܼܵܐ ܕܐܝܼܬܹܝܗ̇ ܥܸܢܝܵܢܵܐ ܕܝܼܕܲܥܬܼܵܐ ܕܦܘܼܪܫܵܢܵܐ
                ܠܡܸܛܲܪ ܒܝܵܬܼܵܟܼ: ܐܸܠܵܐ ܕܹܝܢ: ܘܐܲܡܝܼܢܘܼܬܼ ܥܘܼܗܕܵܢܵܐ ܕܫܘܼܢܵܝܵܐ ܡ̣ܢ
                ܦܲܓܼܪܵܐ: ܘܲܒܼܥܘܼܗܕܵܢ ܐܲܝܠܹܝܢ ܕܡܸܤ̈ܬܲܟܿܝܵܢ ܒܤܲܒܼܪܵܐ: ܟܲܕܼ ܡܲܠ̱ܘܬܼܝܼܢ
                ܠܗܘܿܢ ܙܸܕܼܩܹ̈ܐ ܡܲܥ̈ܒܿܕܲܝ ܗܲܢܝܼܐܘܼܬܼܵܐ: ܕܐܝܼܬܲܝܗܘܿܢ ܪ̈ܲܚܝܼܩܘܼܬܼܵܐ ܕܡ̣ܢ
                ܨܸܒܼ̈ܘܵܬܼܵܐ ܡܙܝܼܥܵܢ̈ܝܵܬܼܵܐ: ܘܲܢܛܘܼܪ̈ܵܬܼܵܐ ܙܥܘܿܪ݁ܝܵܬܼܵܐ ܕܲܠܓܼܵܘ ܩܸܠܵܝܬܼܵܐ܀
                ܐܸܢ ܡܸܫܟܲܚ ܐܲܢ̄ܬܿ ܠܹܗ ܠܡܹܐܢܵܟܼ ܒܵܬܲܪ ܤܘܿܓܼܵܐܐ ܕܫܘܼܥܒܵܕܼܵܐ
                ܕܐܵܬܹ̇ܐ ܠܲܩܕܼܵܡܵܘܗܝ ܒܚܹܐܪܘܼܬܼܵܐ: ܐܵܘܫܸܛ ܠܹܗ. ܐܸܢ ܓܹܝܪ ܬܸܚܙܸܐ
                ܕܡܸܫܬܲܛܸܐ: ܟܕܼܘܿܢܲܝܗܝ ܒܢܵܡܘܿܤܹ̈ܐ. ܬܵܪܹܨ ܓܹܝܪ ܕܠܝܼܠܵܐܝܼܬܼ ܗܵܪܟܵܐ.
                ܟܲܕܼ ܕܹܝܢ ܒܗܵܠܹܝܢ ܘܕܲܐܝܟܼ ܗܵܠܹܝܢ ܫܘܼܚ̈ܠܵܦܹܐ ܒܝܲܕܼ ܤܘܼܟܵܠܵܐ ܪܵܕܹܐ
                ܐܲܢ̄ܬܿ: ܒܐܸܠܩܵܐ ܛܥܝܼܢܲܬܼ ܤܝܼ̈ܡܵܬܼܵܐ ܕܩܸܠܵܝܬܐ: ܚܲܓܵܐ ܪܲܒܵܐ ܡܠܸܐ
                ܬܹܐܓܼܘܼܪܬܵܐ ܕܟܲܫܝܼܪܹ̈ܐ: ܗܵܝܕܹܝܢ ܐܸܬܼܒܲܩܵܐ ܩܲܛܝܼܢܵܐܝܼܬܼ ܒܝܲܠܕܹ̈ܐ ܠܵܐ
                ܕܵܡܝܵܚܹ̈ܐ: ܕܡ̣ܢ ܫܘܼܚ̈ܠܵܦܹܐ ܡܸܬܼܪ̈ܲܓܼܫܵܢܹܐ ܡܸܬܼܝܲܠܕܝܼܢ ܠܵܟܼ. ܕܐܲܝܟܲܢ
                ܟܲܝ ܠܟܼܠ ܗܲܢܝܼܐܘܼܬܼܵܐ ܕܪܘܼܚ: ܩܲܕܝܼܡܝܼܢ ܠܵܗ̇ ܐܘܼ̈ܠܨܵܢܹܐ ܕܲܙܩܝܼܦܵܐ.
                
                 217 
                
                ܗܲܢܝܼܐܘܼܬܼܵܐ ܕܹܝܢ ܕܲܚܛܝܼܬܼܵܐ: ܡ̣ܢ ܢܝܵܚܵܐ ܡܸܬܼܝܲܠܕܵܐ ܒܓܼܘܼܫܡܵܐ.
                ܘܲܕܼܡܸܛܠ ܡܵܢܵܐ ܒܲܠܡܹܐܝܢ ܢܲܟܼܦܘܼܬܼܵܐ ܬܹܐܘܿܪܝܼܵܐ ܕܪܘܼܚ ܗܵܝ̇
                ܕܲܠܗܵܘܢܵܐ ܡܲܐܤܝܵܐ: ܚܘܼܒܵܐ ܕܹܝܢ ܪܘܼܚܵܢܵܐ ܠܵܗ̇ ܥܸܠܬܼܵܐ ܩܢܸܐ. ܘܠܵܐ
                ܬܪܲܝܵܢܝܼܬܼܵܐ ܒܸܠܥܵܕܼ ܥܸܠܬܼܵܐ ܕܡ̣ܢ ܟܲܕܼܘܼ: ܘܠܵܐ ܡܝܲܬܿܪܘܼܬܼܵܐ ܬܠܝܼܬܼܵܝܬܐ
                ܒܸܠܥܵܕܼ ܕܲܩܕܼܵܡܹܝܗ̇. ܡܸܫܟܲܚ ܐܲܢ̄ܬܿ ܡܲܢ ܕܗܵܘܢܵܐ: ܕܲܒܼܡܲܪܒܿܥܵܗ̇
                ܕܢܲܟܼܦܘܼܬܼܵܐ ܝܵܥܹ̈݁ܝܢ: ܕܲܒܼܗܘܿܢ ܡܸܬܼܥܲܠܸܐ ܠܚܘܼܒܵܐ ܐܲܠܵܗܵܝܵܐ: ܗܵܘ̇
                ܕܒܹܗ ܠܘܵܬܼ ܥܲܪܦܸܠܵܐ ܕܢܸܗܡܘܿܣ ܡܸܬܿܬܲܡܪܲܚ.
                	ܗܵܢܵܐ ܕܹܝܢ ܤܘܼܟܵܠܵܐ: ܚܲܝܠܵܐ ܕܛܵܒܼ ܡܵܘܫܸܛ ܠܐ̄ܢܵܫ: ܙܗܝܼܪܘܼܬܼܵܐ
                ܠܡܸܚܠܲܛ ܒܨܸܒܼ̈ܘܵܬܹܗ: ܐܲܟܲܚ̄ܕܼ ܘܓܼܘܼܪ̈ܵܓܹܐ ܕܚܘܼܦܵܛܵܐ. ܕܘܼܒܵܪܵܐ
                ܕܲܕܼܠܵܐ ܥܲܝ̈ܢܹܐ: ܢܸܬܼܒܲܛܲܠ. ܕܠܝܼܠܵܐܝܼܬܼ ܓܹܝܪ ܡܲܝܬܸܐ ܠܩܘܼܛܵܥܵܐ:
                ܡܸܛܠ ܦܸܗܝܵܐ. ܨܲܠܵܐ ܠܡܵܪܲܢ: ܕܢܲܩܢܸܐ ܥܲܝ̈ܢܹܐ ܠܕܼܘܼܒܵܪܵܟܼ. ܡܸܟܵܐ
                ܡܫܲܪܝܵܐ ܢܵܒܼ̇ܥܵܐ ܠܵܟܼ ܚܲܕܼܘܼܬܼܵܐ: ܗܵܝܕܹܝܢ ܐܘܼ̈ܠܨܵܢܹܐ ܚܠܹܝܢ ܠܵܟܼ ܐܲܝܟܼ
                ܟܲܟܵܪܝܼܬܼܵܐ: ܒܹܝܬܼ ܚܠܘܿܠܵܐ ܬܸܫܟܿܚܝܼܗ̇ ܠܲܤܝܵܓܼܬܵܟܼ ܡܸܟܵܐ܀ ܠܲܝܬܿ
                ܠܡܸܙܟܵܐ ܠܚܲܫܹ̈ܐ ܒܸܠܥܵܕܼ ܡܝܲܬܿܪ̈ܵܬܼܵܐ ܡܸܬܼܪ̈ܲܓܼܫܵܢܝܬܼܵܐ: ܘܠܵܐ ܠܦܸܗܝܵܐ
                ܕܫܸܓܼܡܵܐ ܒܸܠܥܵܕܼ ܥܸܢܝܵܢܵܐ ܕܝܼܕܲܥܬܼܵܐ ܪܘܼܚܵܢܵܝܬܼܵܐ. ܨܒܼܘܼܬܼܵܐ ܗ̣̄ܝ ܩܲܠܝܼܠܬܐ
                ܗܵܘܢܲܢ: ܘܐܸܠܵܐ ܢܸܬܼܐ̱ܤܲܪ ܒܦܘܼܪܫܵܢܵܐ ܒܲܨܒܼܘܼ: ܠܵܐ ܫܵܠܹ̇ܐ ܡ̣ܢ
                ܕܲܠܡܸܦܗܵܐ. ܘܒܸܠܥܵܕܼ ܫܘܼܡܠܵܝܵܐ ܕܩܲܕܼ̈ܡܵܝܵܬܼܵܐ: ܠܵܐ ܝܵܗ̇ܒܵܐ ܐܝܼܕܼܵܐ
                ܠܗܵܕܹܐ ܗ̤ܝ ܨܒܼܘܼܬܼܵܐ. ܒܲܕܼܠܲܝܬܿ: ܒܸܠܥܵܕܼ ܙܵܟܼܘܼܬܼܵܐ ܕܥܲܠ
                ܒܥܸܠܕܒܼܵܒܹ̈ܐ: ܫܲܝܢܵܐ. ܘܐܸܢ ܫܲܝܢܵܐ ܠܵܐ ܡܲܡܠܸܟܼ: ܟܸܢ ܠܡܸܫܟܵܚܘܼ:
                ܠܗܵܝ̇ ܕܲܠܓܼܵܘ ܡ̣ܢ ܫܲܝܢܵܐ ܤܝܼܡܵܐ: ܚܲܫܹ̈ܐ: ܤܝܵܓܼܵܐ ܐܸܢܘܿܢ ܕܲܡܝܲܬܿܪ̈ܵܬܼܵܐ
                ܟܲܤ̈ܝܵܬܼܵܐ. ܗܵܠܹܝܢ ܕܐܸܠܵܐ ܠܘܼܩܕܲܡ ܢܸܦܠܘܼܢ ܒܝܲܕܼ ܡܝܲܬܿܪ̈ܵܬܼܵܐ ܓܲܠ̈ܝܵܬܼܵܐ:
                ܠܲܝܬܿ ܠܡܸܚܙܵܐ ܠܗܵܠܹܝܢ ܕܲܠܓܼܵܘ ܡܸܢܗܘܿܢ. ܠܲܝܬܿ ܓܹܝܪ ܠܲܡܩܵܡ
                
                 218 
                
                ܠܒܲܪ ܡ̣ܢ ܫܘܼܪܵܐ: ܘܠܲܡܡܲܠܵܠܘܼ ܥܲܠ ܡܵܐ ܕܲܠܓܼܵܘ. ܠܲܝܬܿ ܠܡܸܚܙܵܐ
                ܠܫܸܡܫܵܐ ܒܥܲܪܦܸܠܵܐ: ܘܠܵܐ ܠܲܡܝܲܬܿܪ̈ܵܬܼܵܐ ܟܝܵܢܵܝ̈ܬܼܵܐ ܕܢܲܦܫܵܐ ܥܲܡ
                ܫܓܼܘܼܫܝܵܐ ܕܚܲܫܹ̈ܐ ܐܲܡܝܼ̈ܢܹܐ܀ ܨܲܠܵܐ ܠܐܲܠܵܗܵܐ: ܕܢܸܬܸܠ ܠܵܟܼ ܕܬܲܪܓܸܫ
                ܒܚܘܼ̈ܬܹܚܵܬܹܐ ܕܪܘܼܚܵܐ. ܐܸܢ ܗܵܠܹܝܢ ܢܸܦܠܘܼܢ ܒܢܲܦܫܵܟܼ: ܦܵܐܹ̇ܫ ܡܸܢܵܟܼ
                ܥܵܠܡܵܐ: ܘܐܲܢ̄ܬܿ ܡܸܢܹܗ. ܗܵܠܹܝܢ: ܒܸܠܥܵܕܼ ܡ̣ܢ ܫܸܠܝܵܐ ܘܢܵܚܘܿܒܼܘܼܬܼܵܐ
                ܘܥܸܢܝܵܢܵܐ ܕܩܸܪܝܵܢܵܐ ܦܪܝܼܫܵܐ: ܠܵܐ ܡܸܬܼܪܲܓܼܫܝܼܢ. ܒܸܠܥܵܕܼ ܗܵܠܹܝܢ:
                ܗܵܢܘܿܢ ܠܵܐ ܬܸܒܼܥܸܐ. ܐܸܢ ܕܹܝܢ ܬܸܒܼܥܸܐ ܒܸܠܥܵܕܲܝܗܘܿܢ: ܡܸܬܼܗܲܦܟܝܼܢ
                ܠܗܘܿܢ ܒܵܬܲܪ ܩܲܠܝܼܠ ܘܗܵܘܹ̇ܝܢ ܓܫܝܼ̈ܡܹܐ. ܡܲܢ̣ܘܼ ܕܡܸܤܬܲܟܲܠ:
                ܢܸܤܬܲܟܲܠ. ܒܕܘܼܥܬܼܵܐ ܐܸܨܛܒܼܝܼ ܕܢܹܐܟܼܠܝܼܘܗܝ ܠܗܵܢܵܐ ܠܲܚܡܵܐ: ܗܵܘ̇
                ܡܵܪܵܐ ܚܲܟܿܝܼܡܵܐ. ܠܵܐ ܡ̣ܢ ܒܝܼܫܘܼ: ܐܸܠܵܐ ܕܠܵܐ ܢܸܗܘܸܐ ܠܲܢ ܐܲܦܬܿܪܵܐ
                ܘܲܢܡܘܼܬܼ܀ ܟܠ ܡܝܲܬܿܪܘܼܬܼܵܐ ܕܹܝܢ: ܕܐܸܡܵܐ ܐܝܼܬܹܝܗ̇ ܠܲܬܼܪܲܝܵܢܝܼܬܼܵܐ:
                ܩܲܕܝܼܡܘܼܬܼ ܫܟܼܵܚܬܼܵܐ ܕܝܼܠܵܗ̇: ܐܵܟܸܕܼܢܵܐ ܗ̣̄ܝ ܠܢܲܦ̄ܫܵܬܼܵܐ ܕܡܸܫܟܿܚܵܢܹ̈ܝܗ̇:
                ܐܸܢ ܠܝܼܓܼ ܠܝܼܓܼ ܡܸܢܗܘܿܢ ܠܵܐ ܢܸܫܕܘܿܢܵܗ̇.