Isaac of Nineveh: Discourse 35

ܝܵܠܘܿܦܵܐ ܐܵܡܲ݁ܪ: ܡܵܢܵܐ ܐܸܢܘܿܢ ܐܲܤܘܼܪܹ̈ܐ ܠܵܒܼܘܿܟܹ̈ܐ ܕܪܸܥܝܵܢܵܐ: ܡ̣ܢ ܪܲܗܛܵܐ ܕܨܝܼܕܼ ܒܝܼ̈ܫܵܬܼܵܐ؟ ܡܲܠܦܵܢܵܐ ܐܵܡܲ݁ܪ: ܒܥܵܬܼܵܐ ܐܲܡܝܼܢܬܼܵܐ ܕܚܸܟܼܡܬܼܵܐ: ܘܝܲܥܢܘܼܬܼܵܐ ܕܲܒܼܝܘܼܠܦܵܢܵܐ ܕܚܲܝܹ̈ܐ. ܐܲܤܘܼܪܹ̈ܐ ܓܹܝܪ ܕܚܲܤܝܼܢܝܼܢ ܡܸܢܗܘܿܢ: ܠܘܵܬܼ ܠܵܐ ܡܛܲܟܿܤܘܼܬܹܗ ܕܪܸܥܵܝܢܵܐ ܠܵܐ ܐܝܼܬܼ. ܝܵܠܘܿܦܵܐ ܐܵܡܲ݁ܪ: ܘܲܥܕܲܡܐ ܠܐܲܝܟܵܐ ܐܝܼܬܼ ܬܚܘܼܡܵܐ ܠܪܲܗܛܵܐ ܕܟܸܟܼܡܬܐ ܒܒܲܥܵܚܹ̈ܗ̇: pb. 225 ܘܠܲܐܝܟܵܐ ܫܵܠܹ̇ܡ ܪܲܗܛܹܗ ܕܝܘܼܠܦܵܢܵܐ؟ ܡܲܠܦܵܢܵܐ ܐܵܡܲ݁ܪ: ܗܵܟܲܢܵܐ ܓܹܝܪ ܡܵܪܕܵܐ ܗ̣̄ܝ ܐܘܼܪܲܚ ܡܲܪܕܝܼܬܼܵܗ̇ ܡ̣ܢ ܬܚܘܼܡܵܐ: ܐܲܝܟܼ ܕܐܵܦ ܡܲܠܲܐܟܹ̈ܐ ܩܲܕܝܼ̈ܫܹܐ ܚܲܤܝܼܪܝܼܢ ܡ̣ܢ ܗܵܢܵܐ ܫܘܼܡܠܵܝܵܐ. ܠܟܸܟܼܡܬܐ ܡܲܢ: ܠܲܝܬܿ ܤܵܟܼܵܐ ܠܡܲܪܝܕܝܼܬܼܵܗ̇. ܥܕܲܡܵܐ ܠܗܵܟܼܘܵܬܼ ܡܸܬܼܥܲܠܝܵܐ: ܥܕܲܡܵܐ ܕܒܲܐܠܵܗܵܐ ܡܚܲܠܛܵܐ ܠܹܗ ܠܗܵܘ̇ ܡܲܢ ܕܢܲܩܦ̣ܵܗ̇. ܘܗ̤ܝ ܗܵܕܹܐ: ܐܵܬ̤ܵܐ ܐܝܼܬܹܝܗ̇ ܕܠܵܐ ܡܤܲܝܟܼܘܼܬܼܵܗ̇. ܠܲܝܬܿ ܠܲܡ ܤܵܟܼܵܐ ܠܤܘܼ̈ܟܵܠܹܝܗ̇. ܚܸܟܼܡܬܐ: ܗ̤ܘܝܘܼ ܐܲܠܵܗܵܐ. ܝܵܠܘܿܦܵܐ. ܐܲܝܢܵܘ ܫܒܼܝܼܠܵܐ ܪܹܫܵܝܵܐ ܘܩܲܕܼܡܵܝܵܐ: ܕܲܠܘܵܬܼ ܚܸܟܼܡܬܐ ܡܝܲܒܸܿܠ؟ ܡܲܠܦܵܢܵܐ. ܕܡ̣ܢ ܟ̱ܠܹܗ ܚܲܝܠܹܗ ܐ̄ܢܵܫ ܠܐܲܠܵܗܵܐ ܢܸܒܼܥܸܐ: ܘܢܸܤܬܲܪܗܲܒܼ ܒܲܒܼܥܵܬܹܗ ܡܲܠܝܵܐܝܼܬܼ: ܐܲܝܟܲܢܵܐ ܕܐܵܦ ܚܲܝܵܘ̈ܗܝ ܢܸܫܠܲܚ ܢܸܫܕܸܐ ܡܸܢܹܗ ܡܸܛܠ ܪܸܚܡܬܹܗ: ܠܵܐ ܡܵܐ̇ܢܵܐ ܠܹܗ. ܝܵܠܘܿܦܵܐ. ܐܲܝܢܵܘ ܕܲܦܐܸܐ ܠܹܗ ܕܢܸܬܼܩܪܸܐ ܤܲܟܿܘܼܠܬܼܵܢܵܐ؟ ܡܲܠܦܵܢܵܐ. ܐܲܝܢܵܐ ܕܒܲܫܪܵܪܵܐ ܐܸܤܬܲܟܲܠ ܕܐܝܼܬܼ ܗ̄ܘ̣ ܬܚܘܼܡܵܐ ܠܚܲܝ̈ܘܗܝ ܗܵܠܹܝܢ: ܘܗ̤ܘܝܘܼ ܡܸܫܟܲܚ ܐܵܦ ܕܢܸܥܒܸܿܕܼ ܬܚܘܼܡܵܐ ܠܲܚܛܵܗܵܘ̈ܗܝ. ܐܲܝܕܵܐ ܗ̣̄ܝ ܝܑܼܕܲܥܬܼܵܐ ܘܤܘܼܟܵܠܵܐ ܕܪܲܒܵܐ ܡ̣ܢ ܗܵܕܹܐ: ܕܐ̄ܢܵܫ ܢܸܬܼܚܲܟܲܡ ܕܲܕܼܠܵܐ ܚܒܼܵܠܵܐ ܢܸܦܘܿܩ ܡ̣ܢ ܗܵܠܹܝܢ ܚܲܝܹ̈ܐ ܟܲܕܼ ܠܵܐ ܡܟܲܬܲܡ ܒܗܲܕܵܡܵܘ̈ܗܝ ܪܹܚܝܵܐ ܕܲܪ̈ܓܼܝܼܓܼܵܬܐ: ܘܲܒܼܢܲܦܫܹܗ ܨܵܐܬܼܵܐ ܕܚܲܠܝܘܼܬܼܗܹܝܢ. ܕܐ̄ܢܵܫ ܕܹܝܢ ܢܸܬܼܩܲܛܲܢ ܒܙܵܘܥܵܘ̈ܗܝ ܠܡܸܥܲܠ ܒܐ̄ܪ̈ܵܙܹܐ ܕܟܼܠܗܘܿܢ ܟܝܵܢܹ̈ܐ: ܘܢܸܫܬܲܪܬܲܚ ܒܤܘܼ̈ܟܵܠܹܐ ܕܟܼܠ ܝܵܕܲܥܵܢ ܐܲܝܟܼ ܐ̄ܢܵܫ ܢܹܐܡܲܪ: ܡܟܲܬܡܵܐ ܕܹܝܢ ܒܢܲܦܫܹܗ ܨܵܐܬܼܵܐ ܕܲܚܛܝܼܬܼܵܐ: ܟܲܕܼ ܠܵܐ ܩܢܸܐ ܤܲܒܼܪܵܐ ܒܵܤܗܕܘܼܬܼܵܐ ܕܡ̣ܢ ܢܲܦܫܹܗ: ܕܲܢܡܲܢܲܥ ܫܲܦܝܼܪ ܠܗܵܘ̇ ܠܡܹܐܢܵܐ ܕܬܘܼܟܼܠܵܢܵܐ: ܠܲܝܬܿ ܒܲܒܼܪܝܼܬܼܵܐ ܕܲܤܟܲܠ ܡܸܢܹܗ. ܕܲܥܕܲܡܵܐ ܗ̄ܘ̣ pb. 226 ܠܤܲܒܼܪܵܐ ܕܗܵܢܵܐ ܥܵܠܡܵܐ ܒܲܠܚܘܿܕܼ ܝܲܒܿܠܘܼܗܝ ܥܲܡܠܵܘ̈ܗܝ: ܒܪܲܤܛܗܘܿܢ ܬܟܼܝܼܒܼܵܐ ܕܲܠܘܵܬܹܗ. ܝܵܠܘܿܦܵܐ. ܐܲܝܢܵܘ ܚܲܝܠܬܼܵܢܵܐ ܒܲܫܪܵܪܵܐ؟ ܡܲܠܦܵܢܵܐ. ܐܲܝܢܵܐ ܕܒܼܐܘܼ̈ܠܨܵܢܹܐ ܕܲܡܠܸܐ ܙܒܲܢ: ܕܲܒܼܗܘܿܢ ܟܲܤܝܵܐ ܬܸܫܒܿܘܿܚܬܐ ܕܙܲܟܵܝܘܼܬܹܗ: ܠܵܐ ܐܸܬܼܝܲܐܲܒܼ ܠܲܪܘܲܚܬܼܵܐ: ܕܒܼܵܗ̇ ܟܤܹܝܢ ܚܲܝܹ̈ܐ ܕܒܸܬܿܬܼܵܐ: ܘܲܒܼܟܼܠܙܒܲܢ ܡܲܫܩܝܵܐ ܠܡܸܫ̈ܟܿܚܵܢܹܝܗ̇ ܟܵܤܵܐ ܕܬܸܢ̈ܚܵܬܼܵܐ. ܝܵܠܘܿܦܵܐ. ܡܤܲܓܸܿܦ ܟܲܝ ܠܡܲܪܕܝܼܬܹܗ ܕܲܠܘܵܬܼ ܐܲܠܵܗܵܐ: ܐܸܢ ܐ̄ܢܵܫ ܚܵܐܹ̇ܓܼ ܡ̣ܢ ܥܲܡܠܵܐ؟ ܡܲܠܦܵܢܵܐ. ܠܲܝܬܿ ܦܘܼܪܤܵܐ ܕܐ̄ܢܵܫ ܢܸܬܼܩܲܪܲܒܼ ܠܲܡܫܝܼܚܵܐ ܕܠܵܐ ܐܘܼ̈ܠܨܵܢܹܐ: ܐܵܦܠܵܐ ܕܬܸܬܼܢܛܲܪ ܙܲܕܝܼܩܘܼܬܹܗ ܕܠܵܐ ܫܘܼܚܠܵܦ ܒܸܠܥܵܕܼܝܗܘܿܢ. ܙܲܕܝܼܩܘܼܬܼܵܐ ܕܐܸܬܼܩܲܢܝܼܬ̤ ܡ̣ܢ ܟܲܕܼܘܼ: ܘܓܼܵܙܘ ܡܸܢܵܗ̇ ܥܲܡ̈ܠܹܐ ܡܪ̈ܲܒܿܝܵܢܹܝܗ̇ ܐܲܟܲܚ̄ܕܼ ܘܲܡܢܲܛܪ̈ܵܢܹܝܗ̇: ܐܲܝܟܼ ܤܝܼܡܬܼܵܐ ܕܐܸܫܬܲܟܼܚܲܬ̤ ܡܸܢܫܹܠܝ ܕܠܵܐ ܢܵܛܘܿܕܹ̈ܐ. ܘܐܲܝܟܼ ܐܲܬܼܠܹܝܛܵܐ ܕܐܸܫܬܲܠܲܚ ܡ̣ܢ ܙܲܝܢܹܗ: ܟܲܕܼ ܚܕܝܼܪ ܠܹܗ ܚܲܝܠܵܐ ܕܲܒܼܥܸܠܕܒܼܵܒܹ̈ܐ. ܘܐܲܝܟܼ ܐܸܠܦܵܐ: ܕܐܸܫܬܲܒܼܩܲܬ̤ ܕܠܵܐ ܡܵܐܢܲܝ̈ ܐܘܿܪܓܵܢܘܿܢ ܕܝܼܠܵܗ̇ ܒܓܼܵܘ ܝܲܡܵܐ. ܘܐܲܝܟܼ ܦܲܪܕܲܝܤܵܐ ܟܲܤܝܼܢ ܦܹܐܪܹ̈ܐ: ܕܓܼܵܙ ܡܸܢܹܗ ܡܲܒܘܼܥܵܐ ܕܫܸܩܝܹܗ. ܝܵܠܘܿܦܵܐ. ܐܲܝܢܵܐ ܢܲܗܝܼܪ ܙܵܘ̈ܥܹܐ؟ ܡܲܠܦܵܢܵܐ. ܐܲܝܢܵܐ ܕܐܸܫܟܲܚ̣ ܡܲܕܪܸܟܼ ܡܲܪܝܼܪܘܼܬܼܵܐ ܕܟܲܤܝܵܐ ܒܓܼܵܘ ܚܲܠܝܘܼܬܹܗ ܕܥܵܠܡܵܐ: ܘܚܵܤܹ̇ܟܼ ܦܘܼܡܹܗ ܡ̣ܢ ܟܵܤܹܗ ܕܠܵܐ ܢܸܫܬܹܝܘܗܝ. ܘܒܲܐܟܼܝܼܦܘܼ ܡܥܲܩܸܒܼ ܥܲܠ ܦܘܼܪܩܵܢܵܐ ܕܚܲܝܵܘ̈ܗܝ: ܘܠܵܐ ܫܵܠܹ̇ܐ ܡ̣ܢ ܕܪܵܗܹ̇ܛ ܥܕܲܡܵܐ ܠܝܘܿܡ ܫܪܵܝܹܗ ܕܡ̣ܢ ܥܵܠܡܵܐ. ܘܐܵܚܹ̇ܕܼ ܬܲܪ̈ܥܹܐ ܕܪܸ̈ܓܼܫܵܘܗܝ: ܕܠܵܐ ܢܸܥܘܿܠ ܢܸܫܪܸܐ ܒܓܼܵܘ ܡܸܢܹܗ ܚܘܼܒܹܿܗ ܕܥܵܠܡܵܐ: ܘܲܢܚܲܠܸܨ ܡܸܢܹܗ ܓܲܙܵܘ̈ܗܝ ܟܤܲܝ̈ܵܐ. ܝܵܠܘܿܦܵܐ. ܗܵܢܵܘ ܥܵܠܡܵܐ: ܘܐܲܝܟܲܢ ܢܸܫܬܵܘܕܥܝܼܘܗܝ: ܘܲܒܼܡܵܢܵܐ pb. 227 ܡܸܫܟܲܚ ܡܤܲܓܸܦ ܠܪ̈ܵܚܡܵܘܗܝ؟ ܡܲܠܦܵܢܵܐ. ܙܵܢܝܼܬܼܵܐ ܐܝܼܬܼܵܘܗܝ ܥܵܠܡܵܐ: ܕܲܒܼܪܸܓܿܬܼܵܐ ܕܫܘܼܦܪܹܗ: ܢܵܓܹ̇ܕܼ ܠܡܲܙܵܝ̈ܘܗܝ ܠܪܸܚܡܬܹܗ. ܘܐܲܝܢܵܐ ܕܲܒܼܩܲܠܝܼܠ ܐܸܬܿܬܿܚܸܕܼ ܒܚܘܼܒܹܗ: ܠܵܐ ܡܸܫܟܲܚ ܦܵܠܹ̇ܛ ܡ̣ܢ ܒܹܝܬܼ ܐܝܼܕܼܵܘ̈ܗܝ: ܥܕܲܡܵܐ ܕܐܵܦ ܠܚܲܝܵܘ̈ܗܝ ܡܲܫܠܲܚ ܡܸܢܹܗ: ܘܟܲܕܼ ܥܲܪܛܸܠܵܝ ܡ̣ܢ ܟܠܗܹܝܢ ܢܲܦܸܩ ܠܹܗ ܒܝܲܕܼ ܡܵܘܬܵܐ ܡ̣ܢ ܓܵܘ ܒܲܝܬܹܗ. ܡܸܫܬܵܘܕܲܥ ܠܹܗ ܕܹܝܢ ܐ̄ܢܵܫ: ܡܵܐ ܕܡܸܬܿܚܲܦܲܛ ܕܢܸܗܘܸܐ ܢܵܦܹ̇ܩ ܠܒܲܪ ܡ̣ܢ ܚܸܫܟܹܗ. ܘܗܵܝܕܹܝܢ ܡܸܫܟܲܚ ܚܵܙܹ̇ܐ ܠܤܲܓܝܼܐܘܼܬܼ ܚܲܒܼ̈ܠܹܐ ܕܲܡܨܲܝܼ̈ܕܼܵܬܹܗ. ܟܡܵܐ ܕܲܠܓܼܵܘ ܡܸܢܹܗ ܚܡܝܼܠ: ܠܵܐ ܡܸܫܟܲܚ ܚܵܙܹ̇ܐ ܠܥܘܼܪ̈ܙܵܠܵܘܗܝ. ܗܵܐ ܓܹܝܪ: ܠܵܘ ܒܲܠܚܘܿܕܼ ܠܬܲܠܡܝܼܕܼܵܘ̈ܗܝ ܘܠܲܒܼܢܵܘ̈ܗܝ ܘܠܲܐܤܝܼܪܹ̈ܐ ܕܲܠܓܼܵܘ ܡܸܪܕܹܗ: ܐܸܠܵܐ ܘܠܲܡܤܲܪ̈ܩܹܐ ܘܥܲܢܘܵܝܹ̈ܐ ܘܠܲܐܝܠܹܝܢ ܕܠܲܐܤܘܼܪ̈ܵܘܗܝ ܬܲܒܲܪܘ ܘܲܠܥܸܠ ܡܸܢܹܗ ܗܘ̤ܵܘ ܚܕܼܵܐ ܙܒܲܢ: ܗܵܫܵܐ ܫܲܪܝܼ ܨܵܐܹ̇ܕܼ ܠܗܘܿܢ ܠܦܘܼܠܚܵܢܹܗ ܒܲܡ̈ܢܵܘܵܢ ܡ̈ܢܵܘܵܢ: ܘܥܵܒܹ̇ܕܼ ܠܗܘܿܢ ܕܝܵܫܵܐ ܬܚܹܝܬܼ ܪܸ̈ܓܼܠܵܘܗܝ. ܝܵܠܘܿܦܵܐ. ܡܸܛܠ ܕܹܝܢ ܕܫܲܪܲܪܬܵܢܝ ܡܸܠܬܼܵܐ ܕܚܲܬܼܝܼܬܼܵܐܝܼܬܼ ܥܵܠܡܵܐ ܚܵܢܘܿܩܵܐ ܗ̄ܘ̣ ܕܕܲܝܵܪ̈ܵܘܗܝ: ܘܲܕܼܗܵܟܲܢ ܐܝܼܬܹܝܗ̇ ܥܲܤܩܲܬܼ ܠܡܲܕܼܪܟܼܵܢܘܼܬܼܵܐ ܐܘܼܡܵܢܘܼܬܼܵܐ ܕܐܲܤܘܼܪ̈ܵܘܗܝ: ܩܲܕܼܡܵܝܑܬܼ ܗܵܕܹܐ ܒܵܥܹ̇ܢܵܐ ܕܐܹܠܲܦ: ܕܠܲܝܢܵܘ ܫܘܼܪܵܝ ܙܵܘܥܵܐ ܕܒܹܗ ܡܫܲܪܸܐ ܪܸܥܝܵܢܵܐ ܡܸܬܼܦܲܠܲܓܼ ܥܲܠ ܥܵܠܡܵܐ: ܟܲܕܼ ܗܵܢܵܐ ܟ̱ܠܹܗ ܚܠܹܝܢ ܐܲܤܘܼܪ̈ܵܘܗܝ: ܘܲܟܼܤܹܝܢ ܐܸܤܟܹܡܹ̈ܐ ܕܲܦܟܼܵܘ̈ܗܝ؟ ܡܲܠܦܵܢܵܐ. ܡܵܐ ܕܐܸܬܿܬܿܙܝܼܥ ܒܹܗ ܚܘܼܫܵܒܼܵܐ ܕܪܸܚܡܲܬܼ ܢܲܦܫܵܐ: ܗܵܢܵܐ ܙܵܘܥܵܐ ܕܚܘܼܫܵܒܼܵܐ: ܡܫܲܪܵܐ ܡܲܤܢܸܐ ܠܥܵܠܡܵܐ ܒܐܲܦܵܘ̈ܗܝ: ܘܡܲܪܡܸܐ ܒܹܗ ܦܘܼܠܵܓܼܵܐ ܕܲܥܠܵܘܗܝ. ܝܵܠܘܿܦܵܐ. ܘܡ̣ܢ ܐܲܝܟܵܐ ܗܘ̤ܵܬܼ ܒܹܗ ܗܵܕܹܐ ܡܸܬܿܬܿܙܝܼܥܵܢܘܼܬܼܵܐ: pb. 228 ܕܲܠܗܵܘ̇ ܕܲܒܼܟܼܠܙܒܲܢ ܡܩܲܠܸܣ ܗ̄ܘ̣ܵܐ ܘܲܕܼܫܲܦܝܼܪ ܐܝܼܬܼܵܘܗܝ ܡܸܬܼܚܙܸܐ ܗ̄ܘ̣ܵܐ ܠܹܗ ܐܲܡܝܼܢܵܐܝܼܬܼ: ܕܐܲܝܟܼ ܠܵܐ ܫܲܦܝܼܪܵܐ ܠܹܗ ܢܸܬܼܚܙܸܐ ܡܸܢܫܹܠܝ: ܡܸܬܿܬܿܘܸܐ ܥܲܠ ܚܲܝܵܘ̈ܗܝ ܘܥܲܠ ܝܑܼܕܲܥܬܹܗ ܩܲܕܼܝܼܡܵܝܬܼܵܐ: ܐܲܝܟܼ ܡܲܢ ܕܲܕܼܠܵܐ ܒܛܲܟܼܤܵܐ ܡܸܬܼܪܲܥܸܐ ܗ̄ܘ̣ܵܐ ܥܲܠ ܥܵܠܡܵܐ؟ ܡܲܠܦܵܢܵܐ. ܠܘܼܩܕܲܡ ܗ̤ܘ ܟܝܵܢܵܐ ܡܲܪܡܸܐ ܒܹܗ ܙܵܘܥܵܐ ܦܵܪܘܿܫܵܐ: ܟܲܕܼ ܪܵܡܹ̇ܙ ܠܹܗ ܒܫܸܬܼܩܵܐ: ܥܲܠ ܩܘܼܝܵܡܹܗ ܠܵܐ ܡܫܲܪܪܵܐ ܕܝܼܠܹܗ ܕܥܵܠܡܵܐ: ܘܤܵܟܼܵܐ ܕܗܵܘܹ̇ܐ ܠܪܲܗܛܹܗ. ܘܥܲܠ ܠܵܐ ܡܩܵܘܝܵܢܘܼܬܼܵܐ ܕܐܲܝܠܹܝܢ ܕܥܵܐ̇ܠܝܼܢ ܠܹܗ: ܕܐܲܝܟܼ ܡܲܥܒܲܪܬܵܐ ܚܵܙܹ̇ܐ ܕܤܝܼܡ ܥܵܠܡܵܐ ܗܵܢܵܐ ܠܥܵܠܘܼܠܵܘ̈ܗܝ. ܘܲܠܕܼܵܪܹ̈ܐ ܤܲܓܝܼ̈ܐܹܐ ܕܡ̣ܢ ܩܕܼܵܡܵܘܗܝ: ܕܤܵܟܼܵܐ ܠܡܸܢܝܵܢܗܘܿܢ ܠܵܐ ܝܑܼܕܲܥ. ܕܥܲܠ̣ܘ ܠܓܼܵܘܹܗ ܐܲܝܟܼ ܕܲܠܒܹܝܬܼ ܒܵܘܬܵܐ: ܘܲܢܦܲܩ̣ܘ ܡܸܢܹܗ ܐܲܝܟܼ ܐܵܪ̈ܚܹܐ ܒܐܘܼܪܚܵܐ ܕܟܼܠܵܗ̇ ܐܲܪܥܵܐ: ܠܵܐ ܡܸܬܼܦܲܢܝܵܢܵܐܝܼܬܼ. ܡܸܢܗܘܿܢ ܡܲܠܟܹ̈ܐ: ܘܡܸܢܗܘܿܢ ܫܲܠܝܼ̈ܛܵܢܹܐ. ܡܸܢܗܘܿܢ ܚܲܟܿܝܼ̈ܡܹܐ: ܘܡܸܢܗܘܿܢ ܡܝܲܩܪܹ̈ܐ. ܡܵܪ̈ܲܝ ܚܲܝ̈ܠܹܐ. ܡܸܢܗܘܿܢ ܟܲܗܝܼ̈ܢܲܝ ܒܥܘܼܬܼܪܵܐ: ܘܡܸܢܗܘܿܢ ܡܵܪ̈ܲܝ ܩܸܢ̈ܝܵܢܹܐ. ܘܠܲܝܬܵܘܗܝ ܗܵܫܵܐ ܒܵܬܲܪܗܘܿܢ: ܠܵܐ ܛܲܟܼܤܵܐ ܕܕܲܪܲܓܲܝܗܘܿܢ: ܘܠܵܐ ܬܵܓܹ̈ܐ ܕܪܹܫܵܢܘܼܬܼܗܘܿܢ. ܠܵܐ ܟܘܼܪ̈ܤܵܘܵܬܼܗܘܿܢ ܕܚܝܼܠܹ̈ܐ: ܠܵܐ ܦܘܼ̈ܢܵܩܹܐ ܕܓܹܐ̈ܘܵܬܼܗܘܿܢ: ܠܵܐ ܫܘܼܒܼܚܵܐ ܕܲܡܝܲܩܪ̈ܵܢܲܝܗܘܿܢ: ܠܵܐ ܪܵܚܡܘܼܬܼܵܐ ܕܚܲܒܿܝܼܒܲܝ̈ܗܘܿܢ: ܠܵܐ ܓܘܼܫܡܲܝ̈ܗܘܿܢ ܡܦܲܢ̈ܩܲܝ ܡ̣ܢ ܛܵܒܼ̈ܬܼܵܐ: ܠܵܐ ܫܘܼܦܪܵܐ ܦܲܐܝܵܐ ܕܲܤܩܝܼܠܘܼܬܼܗܘܿܢ: ܠܵܐ ܩܵܘܡܵܐ ܡܫܲܩܠܵܐ ܕܓܲܐܝܘܼܬܼܗܘܿܢ: ܘܠܵܐ ܗܵܘܢܵܐ ܤܦܝܼܪܵܐ: ܘܠܵܐ ܪܸܥܝܵܢܵܐ ܥܲܬܝܼܪ ܙܵܘ̈ܥܹܐ: ܘܠܵܐ ܫܸܦܥܹ̈ܐ ܥܲܬܿܝܼܪܹ̈ܐ ܕܓܼܝܼܚܘܿܢ pb. 229 ܕܡܲܠܦܵܢܘܼܬܼܵܐ ܕܓܼܵܐܲܚ ܗ̄ܘ̣ܵܐ ܡ̣ܢ ܦܘܼܡܗܘܿܢ: ܘܫܵܒܹ̇ܐ ܗ̄ܘ̣ܵܐ ܒܲܤܩܝܼܠܘܼܬܹܗ ܠܠܸܒܵܐ ܕܫܵܡ̈ܘܿܥܹܐ. ܘܕܼܵܡ̇ܟܿܝܝܼܢ ܗܵܐ ܢܘܼܓܼܪܵܐ ܕܲܫ̈ܢܲܝܵܐ ܒܲܫܝܘܿܠ: ܐܲܝܟܼ ܚܲܕܼ ܠܸܠܝܵܐ. ܘܠܵܐ ܝܑܼܕܲܝܥ ܕܲܟܼܡܵܐ ܬܘܼܒܼ ܙܲܒܼܢܵܐ ܐܝܼܬܼ ܠܗܘܿܢ ܒܗܵܕܹܐ ܫܸܢܬܼܵܐ ܐܲܪܝܼܟܼܬܼܵܐ: ܘܕܸܐܡܲܬܼܝ ܕܵܢܲܚ ܠܗܘܿܢ ܨܲܦܪܵܐ ܕܢܘܼܚܵܡܵܐ: ܘܲܡܥܝܼܪ ܠܗܘܿܢ ܡ̣ܢ ܕܲܡܟܿܘܼܬܼܗܘܿܢ. ܘܪܵܢܹܐ ܕܕܲܠܡܵܐ ܟܲܝ ܗܵܟܲܢܵܐ ܡܸܫܬܲܒܼܩܝܼܢ: ܚܲܫܵܐ ܗ̄ܘ̣ ܪܲܒܵܐ. ܘܗܵܐ ܟܡܵܐ ܕܵܪܹ̈ܐ ܚܒܝܼܫܝܼܢ ܬܚܹܝܬܼ ܗܵܕܹܐ ܐܲܪܥܵܐ: ܘܠܵܐ ܝܑܼܕܼܝܼܥܝܼܢ. ܘܐܵܦ ܐܸܢܵܐ ܐܲܝܟܼ ܚܲܕܼ ܡܸܢܗܘܿܢ ܥܵܒܲܪܢܵܐ: ܠܝܼܛܝܼܢ ܥܘܼܬܼܪܹ̈ܐ ܘܲܢܝܵܚܹ̈ܐ. ܘܲܒܼܗܵܢܵܐ ܚܘܼܫܵܒܼܵܐ: ܬܵܘܸܗܬܼܵܐ ܪܲܒܿܬܼܵܐ ܢܵܦ̇ܠܵܐ ܒܠܸܒܹܗ: ܘܚܲܫܵܐ ܡܸܬܼܡܠܸܐ ܪܸܥܝܵܢܹܗ. ܘܡ̣ܢ ܝܲܩܝܼܪܘܼܬܹܗ ܕܚܲܫܵܐ ܡܲܚܸܬܼ ܕܸܡ̈ܥܹܐ: ܒܟܲܪܝܼܘܼܬܼܵܐ ܪܲܒܿܬܼܵܐ. ܘܡܸܟܹܝܠ ܒܵܤܲܪ ܠܹܗ ܠܥܵܠܡܵܐ: ܘܒܼܵܟܹ̇ܐ ܥܲܠ ܚܲܝܵܘ̈ܗܝ. ܘܐܵܠܹ̇ܐ ܠܢܲܦܫܹܗ: ܐܘܿܠ̈ܝܵܬܼܵܐ ܡܦܲܬ̈ܟܼܵܬܼܵܐ ܘܡܲܪܝܼܪ̈ܵܬܼܵܐ. ܘܥܲܡ ܬܸܢ̈ܚܵܬܼܵܐ: ܐܵܡܲ݁ܪ ܗ̤ܘ ܠܹܗ: ܐܲܝܟܵܐ ܐܲܢ̄ܬܿܝ ܢܲܦܫܝ ܕܵܘܝܼܬܼܵܐ: ܘܐܲܝܟܵܐ ܡܸܫܬܲܟܼܚܲܬܿܝ ܒܵܬܲܪ ܡܵܘܬܿܝ؟ ܛܵܟܼ ܘܐܵܦ ܗܵܕܹܐ ܡܲܚܫܲܒܼܬܼܵܐ ܕܵܝܠܵܐ ܒܹܗ: ܕܠܘܲܝ ܠܵܐ ܥܸܠܹ̇ܬܼ ܠܲܒܼܪܝܼܬܼܵܐ: ܘܡ̣ܢ ܟܲܪܤܵܐ ܠܵܐ ܢܸܦܩܹ̇ܬܼ! ܘܲܒܼܗܵܢܵܐ ܐܸܤܟܹܡܵܐ ܕܐܘܿܠ̈ܝܵܬܼܵܐ: ܐܵܫܹ̇ܕܼ ܕܸܡ̈ܥܹܐ ܚܲܝ̈ܠܝܵܬܼܵܐ: ܡ̣ܢ ܚܢܲܓܼܬܼܵܐ ܕܠܸܒܹܗ: ܘܲܨܲܒܲܥ ܠܲܠܒܼܘܼܫܹܗ ܒܕܸܡܥܵܘ̈ܗܝ. ܘܡܸܟܹܝܠ ܗܵܘܹ̇ܐ ܥܠܵܘܗܝ ܥܵܠܡܵܐ ܗܵܢܵܐ: ܐܲܝܟܼ ܒܹܝܬܼ ܐܲܤܝܼܪܹ̈ܐ ܒܥܲܝܢܵܘ̈ܗܝ. ܘܚܲܠܝܘܼܬܹܗ ܗܵܝ̇ ܩܲܕܼܡܵܝܬܼܵܐ: ܝܲܬܝܼܪ ܡ̣ܢ ܟܠ ܡܪܵܪ̈ܝܼܢ ܡܲܪܝܼܪܵܐ. ܘܪܸܚܡܬܼܵܐ ܕܚܲܝܵܘ̈ܗܝ ܘܫܘܼܦܪ̈ܵܘܗܝ ܪ̈ܓܼܝܼܓܹܐ: ܐܲܝܟܼ ܛܘܼܦܤܵܐ ܕܲܫܝܼܠ܀ ܗܵܝܕܹܝܢ ܐܵܬܹ̇ܐ ܒܪܸܥܝܵܢܹܗ ܠܵܘܬܼ ܟܬܼܵܒܼܵܐ ܕܲܡܙܝܼܥ ܒܹܗ ܗܲܝܡܵܢܘܼܬܼܵܐ ܕܥܲܠ ܩܝܵܡܬܐ: ܘܫܘܼܠܵܡܵܐ ܕܗܵܘܹ̇ܐ pb. 230 ܠܟܼܠܗܹܝܢ ܨܸܒܼ̈ܘܵܬܹܗ ܕܥܵܠܡܵܐ ܗܵܢܵܐ: ܘܡܘܼ̈ܠܟܵܢܹܐ ܕܲܪܫܝܼܡܝܼܢ ܒܹܗ ܠܐܲܝܠܹܝܢ ܕܫܲܦܝܼܪ ܚ̣ܝܵܘ ܒܹܗ ܒܥܵܠܡܵܐ: ܘܲܓܼܙܵܪ ܕܝܼ̈ܢܹܐ ܐܲܠܵܗܵܝܹ̈ܐ ܕܲܠܚܝܼܡܝܼܢ ܠܥܵܒܼܪ̈ܲܝ ܥܲܠ ܢܵܡܘܿܤܵܐ: ܘܠܲܐܝܠܹܝܢ ܕܲܪܚܸܡ̣ܘ ܒܲܙܒܼܢܵܐ ܙܥܘܿܪܵܐ ܕܚܲܝܲܝ̈ܗܘܿܢ ܐܘܼܪܚܵܐ ܦܬܼܝܼܬܼܵܐ ܕܲܚܛܝܼܬܼܵܐ. ܘܡ̣ܢ ܗܵܪܟܵܐ: ܐܲܝܟܼ ܡܲܢ ܕܲܒܼܢܘܼܗܪܵܐ ܡܸܕܸܡ ܦܵܓܲܥ: ܫܵܕܹܐ ܡܸܢܹܗ ܝܘܼܩܪܵܐ ܕܟܲܪܝܘܼܬܼܵܐ: ܘܡܸܬܿܬܿܙܝܼܥܵܐ ܒܹܗ ܚܲܕܼܘܼܬܼܵܐ ܪܲܒܿܬܼܵܐ: ܐܲܝܟܼ ܡܲܢ ܕܐܸܫܟܲܚ ܤܲܒܼܪܵܐ ܕܲܡܝܲܬܲܪ ܘܫܲܪܝܼܪ. ܗܵܠܹܝܢ ܘܕܲܐܝܟܼ ܗܵܠܹܝܢ: ܟܝܵܢܵܐ ܠܲܡܚܵܘܵܝܘܼ ܡ̣ܢ ܡܸܬܿܬܿܙܝܼܜܵܢܘܼܬܼܵܐ ܕܡ̣ܢ ܝܵܬܹܗ: ܠܵܐ ܡܸܫܟܲܚ. ܒܗܲܝܡܵܢܘܼܬܼܵܐ ܒܲܠܚܘܿܕܼ ܡܸܤܬܲܪ̈ܠܵܢ: ܡ̣ܢ ܪ̈ܘܼܫܡܹܐ ܕܲܟܼܬܼܝܼ̈ܒܼܵܬܼܵܐ. ܠܵܘ ܟܠܡܸܕܸܡ ܡ̣ܢ ܟܝܵܢܵܐ ܘܡ̣ܢ ܙܵܘ̈ܥܹܐ ܕܦܵܪܘܿܫܘܼܬܼܵܐ ܕܒܹܗ: ܡܸܫܟܲܚ ܒܲܪܢܵܫܵܐ ܕܢܸܩܢܸܐ ܝܘܼܠܦܵܢܵܐ ܕܲܥܠܵܘܗܝ. ܥܲܠ ܡܕܲܒܿܪ̈ܵܢܘܵܬܹܗ ܕܹܝܢ ܕܐܲܠܵܗܵܐ ܕܲܥ̣ܒܲܪ ܘܕܲܥܬܼܝܼ̈ܕܼܵܢ ܕܢܸܗܘ̈ܝܵܢ: ܗܵܠܹܝܢ ܡ̣ܢ ܟܬܼܵܒܹ̈ܐ ܡܨܝܢܲܢ ܕܢܹܐܠܲܦ: ܐܵܘ ܡ̣ܢ ܓܸܠܝܵܢܵܐ ܕܪܘܼܚܵܐ. ܗܵܝܕܹܝܢ ܒܝܲܕܼ ܙܸܠܓܹ̈ܐ ܕܗܲܝܡܵܢܘܼܬܼܵܐ ܘܲܟܼܬܼܵܒܼܵܐ: ܢܵܗܪܵܐ ܥܲܝܢܵܐ ܕܪܸܥܝܵܢܵܐ: ܘܨܵܡ̇ܚܵܐ ܦܵܪܘܿܫܬܹܗ ܕܲܟܼܝܵܢܵܐ: ܘܡܸܬܿܬܿܥܝܼܪ ܠܡܹܐܨܲܦ ܕܢܲܦܫܹܗ. ܘܡ̣ܢ ܗܵܪܟܵܐ ܡܸܟܹܝܠ ܦܘܼܪ̈ܤܹܐ ܡܸܬܼܚܲܫܲܒܼ: ܕܐܲܝܟܲܢ ܢܲܥܕܸܐ ܐܸܢܘܿܢ ܠܚܲܝܵܘ̈ܗܝ ܡ̣ܢ ܥܵܠܡܵܐ: ܕܢܸܫܟܲܚ ܩܕܼܵܡ ܕܢܸܦܘܿܩ ܡ̣ܢ ܦܲܓܼܪܵܐ: ܢܛܲܝܸܒܼ ܠܹܗ ܙܘܵܕܹ̈ܐ ܕܲܠܬܲܡܵܢ ܡܥܲܕܪܝܼܢ. ܝܵܠܘܿܦܵܐ. ܘܐܲܝܟܲܢ ܡܸܫܟܲܚ ܒܲܪܢܵܫܵܐ ܢܵܦܹ̇ܩ ܡ̣ܢ ܥܵܠܡܵܐ ܡܲܠܝܵܐܝܼܬܼ؟ ܡܲܠܦܵܢܵܐ. ܒܪܸܓܿܬܼܵܐ ܕܥܘܼܗܕܵܢܗܹܝܢ ܕܛܵܒܼ̈ܬܼܵܐ ܕܲܥܬܼܝܼ̈ܕܼܵܢ: ܗܵܠܹܝܢ ܕܲܟܼܬܼܵܒܼܵܐ ܐܲܠܵܗܝܵܐ ܙܵܪܲܥ ܒܠܸܒܹܗ ܒܚܲܠܝܘܼܬܼܵܐ ܕܦܸܬܼܓܼܵܡܵܘ̈ܗܝ ܡܲܠܚܲܝ̈ ܤܲܒܼܪܵܐ. ܟܠ ܐܸܡܲܬܼܝ ܓܹܝܪ ܕܪܸܓܿܬܼܵܐ ܕܲܡܝܲܬܿܪܵܐ ܡܸܢܗܹܝܢ ܠܵܐ ܬܸܥܘܿܠ ܥܲܠ ܐܲܝܠܹܝܢ ܕܡܸܤܬܲܒܼܪ̈ܵܢ ܕܲܫܒܼܝܼ̈ܚܵܢ ܘܗܲܢܝܼ̈ܐܵܢ: ܕܲܒܼܗܹܝܢ ܐܲܚܝܼܕܼ pb. 231 ܒܲܪܢܵܫܵܐ: ܠܵܐ ܡܸܫܟܲܚ ܪܸܥܝܵܢܵܐ ܒܵܤܲܪ ܠܪܸܚܡܬܹܗ ܩܲܕܼܡܵܝܬܼܵܐ. ܝܵܠܘܿܦܵܐ. ܗܵܐ ܟܝܵܢܵܐ ܬܵܚܘܿܒܼ: ܘܠܵܐ ܡܸܫܟܲܚ ܒܲܚܕܼܵܐ ܡܲܪܦܸܐ ܡܸܢܫܹܠܝ ܠܲܥܝܵܕܼܵܘ̈ܗܝ ܩܲܕܼܡܵܝܹ̈ܐ: ܘܢܹܐܚܘܿܕܼ ܚܲܝܹ̈ܐ ܕܐܘܼܠܨܵܢܵܐ. ܡܲܠܦܵܢܵܐ. ܐܸܢ ܪܲܒܿܘܼܬܼܗܘܿܢ ܕܚܲܝܹ̈ܐ ܕܲܥܬܼܝܼܕܼܝܼܢ ܠܵܐ ܡܦܲܚܸܩ ܒܲܪܢܵܫܵܐ ܒܪܸܥܝܵܢܹܗ ܒܚܸܟܼܡܬܼܵܐ ܪܲܒܿܬܼܵܐ: ܥܲܡ ܒܨܝܼܪܘܼܬܼܵܐ ܕܟܲܪܝܘܼܬܼ ܚܲܝܹ̈ܐ ܕܙܲܒܼܢܵܐ ܗܵܢܵܐ ܙܥܘܿܪܵܐ: ܠܵܐ ܡܸܫܟܲܚ ܕܢܸܬܼܠܲܒܲܒܼ ܕܲܢܫܝܼܚ ܥܲܠ ܐܘܼ̈ܠܨܵܢܹܐ: ܕܲܢܫܲܪܸܐ ܒܡܲܪܕܝܼܬܹܗ ܒܐܘܼܪܚܵܐ ܕܥܵܠܡܵܐ ܚܲܕܼܬܼܵܐ. ܚܫܘܿܒܼ ܢܹܐ ܒܪܸܥܝܵܢܵܟܼ ܡܸܢܝܵܢܗܹܝܢ ܕܲܫ̈ܢܲܝܵܐ ܕܐܲܬܼܪܵܐ ܕܲܚܢܲܢ ܒܹܗ: ܘܐܸܬܼܥܲܠܵܐ ܟܡܵܐ ܕܲܡܨܸܐ ܐܲܢ̄ܬܿ: ܘܦܲܚܸܩ ܥܲܡ ܝܵܘ̈ܡܵܬܼܵܐ ܕܥܵܠܡܵܐ ܕܲܥܬܼܝܼܕܼ: ܐܸܢ ܤܵܠܹ̇ܩ ܒܚܘܼܫܒܵܢܵܐ ܡܸܕܸܡ ܕܝܵܗܹ̇ܒܼ ܐܲܢ̄ܬܿ ܥܲܡ ܗܵܘ̇ ܕܲܥܬܼܝܼܕܼ ܐܲܢ̄ܬܿ ܠܡܸܤܲܒܼ. ܘܐܸܬܼܒܲܝܲܢ ܡܵܢܵܐ ܡܲܪܦܸܐ ܐܲܢ̄ܬܿ: ܘܡܵܢܵܐ ܢܵܤܹ̇ܒܼ ܐܲܢ̄ܬܿ ܒܚܸܠܦܹܗ: ܐܸܢ ܫܵܘܹ̇ܐ ܗ̤ܘ ܚܘܼܠܵܦܵܐ ܕܥܵܒܹ̇ܕܼ ܐܲܢ̄ܬܿ. ܡܸܛܠ ܗܵܢܵܐ ܟܲܕܼ ܡܸܬܿܬܲܡܲܗ ܚܲܟܿܝܼܡܵܐ ܥܲܠ ܪܲܒܿܘܼܬܹܗ ܕܗܵܘ̇ ܥܵܠܡܵܐ: ܘܠܵܐ ܡܤܲܝܟܼܘܼܬܼܗܘܿܢ ܕܚܲܝܹ̈ܐ ܕܒܹܗ: ܘܲܙܥܘܿܪܘܼܬܼ ܚܲܝܹ̈ܐ ܕܲܬܼܢܵܢ: ܐܵܡܲ݁ܪ: ܡܸܢܝܵܢܵܐ ܕܝܵܘܡܵܘ̈ܗܝ ܕܒܲܪܢܵܫܵܐ: ܟܲܕܼ ܡܲܤܓܸܐ ܠܡܸܚܵܐ. ܡܵܐܐ ܫܢܝܼ̈ܢ. ܐܲܝܟܼ ܕܲܠܡܸܡܠܵܐ ܓܵܘܕܵܐ ܡ̣ܢ ܝܲܡܵܐ: ܘܐܲܝܟܼ ܕܲܠܡܸܤܲܒܼ ܦܪܸܕܿܬܼܵܐ ܡ̣ܢ ܚܵܠܵܐ. ܐܵܠܹܦ ܕܹܝܢ ܫܢ̈ܝܼܢ ܡ̣ܢ ܕܥܵܠܡܵܐ ܗܵܢܵܐ: ܠܵܐ ܐܝܼܬܲܝܗܘܿܢ ܐܲܝܟܼ ܚܲܕܼ ܝܘܿܡ ܒܥܵܠܡܵܐ ܕܙܲܝܼ̈ܩܹܐ. ܝܵܠܘܿܦܵܐ. ܘܡܵܢܵܐ ܢܸܥܒܸܿܕܼ ܠܹܗ ܠܦܲܓܼܪܵܐ: ܕܡܵܐ ܕܟܲܪܟܼܘܼܗܝ ܕܵܘ̈ܘܿܢܹܐ ܐܸܬܼܪܲܦܝܼ ܥܲܡܹܗ ܨܸܒܼܝܵܢܵܐ ܡ̣ܢ ܪܸܓܿܬܐ ܕܛܵܒܼ̈ܬܼܵܐ: ܘܡ̣ܢ ܚܝܼܨܘܼܬܹܗ ܩܲܕܼܡܵܝܵܬܐ؟ ܡܲܠܦܵܢܵܐ. ܗܵܕܹܐ ܗܵܘ̇ܝܵܐ ܐܲܝܟܼ ܕܲܒܼܤܘܿܓܼܵܐܐ: pb. 232 ܠܐܲܝܠܹܝܢ ܕܦܸܠܓܼܘܼܢ ܒܲܪܢܵܫܗܘܿܢ ܢܸܦܩܲܬ̤ ܒܵܬܲܪ ܐܲܠܵܗܵܐ: ܦܸܠܓܗܘܿܢ ܕܹܝܢ ܒܥܵܠܡܵܐ ܦܲܚ̣ܫ. ܗܵܢܵܘ ܕܹܝܢ: ܠܸܒܿܗܘܿܢ ܠܵܐ ܤܦܝܼܩ ܥܕܲܟܹܝܠ ܡ̣ܢ ܕܲܬܼܢܵܢ: ܐܸܠܵܐ ܦܠܝܼܓܼܝܼܢ ܥܲܠ ܢܲܦܫܗܘܿܢ: ܟܲܕܼ ܒܲܙܒܲܢ ܠܒܸܤܬܲܪܗܘܿܢ ܚܵܝ̇ܪܝܼܢ ܘܒܲܙܒܲܢ ܠܩܲܕܕܼܡܵܐ. ܘܤܵܒܲܪܢܵܐ ܕܚܲܟܿܝܼܡܵܐ ܠܐܲܝܠܹܝܢ ܕܲܒܼܗܵܕܹܐ ܦܠܝܼܓܼܘܼܬܼܵܐ ܩܵܪܒܿܝܼܢ ܠܐܘܼܪܚܵܐ ܕܲܐܲܠܵܗܵܐ: ܡܲܪܬܸܐ ܘܐܵܡܲ݁ܪ: ܠܵܐ ܠܲܡ ܬܸܩܪܘܿܒܼ ܥܠܹܝܗ̇ ܒܲܬܼܪܹܝܢ ܠܸܒ̈ܝܵܢ: ܐܸܠܵܐ ܐܲܝܟܼ ܙܵܘܿܥܵܐ ܘܐܲܝܟܼ ܚܵܨܘܿܕܼܵܐ ܐܸܬܼܩܲܪܲܒܼ ܥܠܹܝܗ̇. ܘܡܵܪܲܢ ܬܘܼܒܼ ܠܐܲܝܠܹܝܢ ܕܡܲܦܲܩܬܼܵܐ ܗܵܕܹܐ ܓܡܝܼܪܬܵܐ ܨܵܒܹ̇ܝܢ ܠܡܸܥܒܲܕܼ: ܟܲܕܼ ܚ̣ܙܵܐ ܕܐܝܼܬܼ ܡܸܢܗܘܿܢ ܐ̄ܢܵܫ̈ܝܼܢ ܕܐܲܝܟܼ ܗܵܠܹܝܢ: ܕܨܸܒܼܝܵܢܗܘܿܢ ܡܥܲܬܲܕܼ: ܘܚܘܼܫܵܒܲܝ̈ܗܘܿܢ ܬܘܼܒܼ ܠܒܸܤܬܲܪܗܘܿܢ ܡܸܬܼܢܲܬܼܦܝܼܢ: ܡ̣ܢ ܥܸܠܲܬܼ ܩܸܢܛܵܐ ܕܐܘܼ̈ܠܨܵܢܹܐ: ܡܸܛܠ ܪܸܚܡܬܐ ܕܦܲܓܼܪܵܐ ܕܠܵܐ ܥܕܲܟܹܝܠ ܫܕܵܪܐܝܼܘܼܗ̇ ܡܸܢܗܘܿܢ: ܟܲܕܼ ܫܵܪܹܐ ܡܸܢܗܘܿܢ ܠܪܲܦܝܘܼܬܼ ܪܸܥܝܵܢܵܐ: ܐܵܡܲ݁ܪ ܠܗܘܿܢ ܡܸܠܬܐ ܦܵܤܘܿܩܵܐܝܼܬܼ: ܡ̇ܢ ܠܲܡ ܕܨܵܒܹ̇ܐ ܕܢܹܐܬܸܐ ܒܵܬܲܪܝ: ܠܘܼܩܕܲܡ ܢܸܟܼܦܘܿܪ ܒܢܲܦܫܹܗ. ܡܵܢܵܘ ܟܦܘܼܪܝܵܐ ܕܡܲܕܼܟܲܪ ܗܵܪܟܵܐ: ܗܵܢܵܘ ܕܹܝܢ: ܟܦܘܼܪܝܵܐ ܕܲܒܼܦܲܓܼܪܵܐ. ܘܐܲܝܟܼ ܐܲܝܢܵܐ ܕܠܲܙܩܝܼܦܵܐ ܡܙܲܡܲܢ ܠܡܸܤܲܩ ܡ̣ܢ ܟܲܕܼܘܼ: ܢܸܫܩܘܿܠ ܬܲܪܥܝܼܬܐ ܕܵܡܘܬܵܐ ܒܚܘܼܫܵܒܼܵܘ̈ܗܝ: ܘܗܵܝܕܹܝܢ ܢܸܦܘܼܩ. ܐܲܝܟܼ ܐ̄ܢܵܫ ܕܠܵܐ ܡܸܬܼܪܲܥܸܐ: ܕܬܘܼܒܼ ܐܝܼܬܼ ܠܹܗ ܒܚܲܝܹ̈ܐ ܗܵܠܹܝܢ ܡܢܵܬܐ. ܗܵܕܹܐ ܗ̣̄ܝ: ܗܵܝ̇ ܕܢܸܫܩܘܿܠ ܙܩܝܼܦܹܗ ܘܢܹܐܬܸܐ ܒܵܬܲܪܝ. ܙܩܝܼܦܵܐ: ܠܨܸܒܼܝܵܢܵܐ ܡܥܲܬܿܕܼܵܐ ܕܟܼܠ ܐܘܼܠܨܵܢ ܡܫܲܡܲܗ. ܘܟܲܕܼ ܡܵܘܕܲܥ ܕܡܸܛܠ ܡܵܢܵܐ ܗܵܟܲܢ: ܐܵܡܲ݁ܪ: ܡܲܢ ܕܨܵܒܹ̇ܐ ܕܢܲܚܸܐ ܢܲܦܫܹܗ ܒܥܵܠܡܵܐ ܗܵܢܵܐ: ܡܵܘܒܸܿܕܼ ܠܵܗ̇ ܡ̣ܢ ܚܲܝܹ̈ܐ ܫܲܪܝܼܪܹ̈ܐ. ܘܡܲܢ ܕܢܵܘܒܸܿܕܼ ܩܢܘܼܡܹܗ ܡܸܛܠܵܬܼܝ pb. 233 ܗܵܪܟܵܐ: ܢܸܫܟܿܚܝܼܘܗܝ ܬܲܡܵܢ. ܗܵܢܵܘ ܕܹܝܢ: ܐܲܝܢܵܐ ܕܒܼܐܘܼܪܚܵܐ ܕܲܙܩܝܼܦܘܼܬܼܵܐ ܦܤ̈ܵܥܵܬܹܗ ܪܵܡܹ̇ܐ: ܘܬܼܘܼܒܼ ܥܲܠ ܚܲܝܹ̈ܐ ܗܵܠܹܝܢ ܕܦܲܓܼܪܵܐ ܐܝܼܬܼ ܠܹܗ ܒܛܝܼܠܘܼܬܼܵܐ ܠܡܸܪܢܵܐ: ܗܵܢܵܐ ܡܵܘܒܸܿܕܼ ܢܲܦܫܹܗ ܡ̣ܢ ܤܲܒܼܪܵܐ ܗܵܘ̇ ܕܥܲܠ ܐܲܦܵܘ̈ܗܝ ܠܡܸܚܲܫ ܢܦܲܩ̣. ܒܗܵܝ̇ ܕܗ̤ܝ ܗܵܕܹܐ ܡܲܪܢܝܼܬܼܵܐ: ܠܵܐ ܫܵܒܼܩܵܐ ܠܹܗ ܠܡܸܩܪܲܒܼ ܠܐܘܼ̈ܠܨܵܢܹܐ. ܐܸܠܵܐ ܒܝܲܕܼ ܐܲܡܝܼܢܘܼܬܼܵܗ̇ ܕܲܠܘܵܬܹܗ ܢܵܬܼ̇ܦܵܐ ܠܹܗ ܒܩܲܠܝܼܠ ܩܲܠܝܼܠ: ܘܡܲܦܩܵܐ ܠܹܗ ܡ̣ܢ ܡܸܨܥܲܬܼ ܐܵܓܼܘܿܢܵܐ ܕܥܲܠ ܐܲܦܲܝ̈ ܚܲܝܹ̈ܐ ܛܘܼܒܼ̈ܬܼܵܢܹܐ. ܟܲܕܼ ܡܸܬܼܪܲܒܸܐ ܒܹܗ ܗ̤ܘ ܚܘܼܫܵܒܼܵܐ: ܥܕܲܡܵܐ ܕܡܸܬܼܥܲܫܲܬ ܡܸܢܹܗ. ܘܐܲܝܢܵܐ ܕܐܲܒܼܕܵܢܵܐ ܕܲܩܢܘܿܡܹܗ ܡܸܛܠ ܫܟܼܵܚܬܐ ܕܪܸܚܡܬܐ ܕܝܼܠܝ ܢܤܲܒܼ ܒܪܸܥܝܵܢܹܗ: ܗܵܢܵܐ ܡܸܬܼܢܛܲܪ ܕܠܵܐ ܢܸܟܼܝܵܢ: ܠܚܲܝܹ̈ܐ ܕܲܠܥܵܠܲܡ. ܗܵܕܲܐ ܗ̣̄ܝ ܗܵܝ̇ ܕܡܲܢ ܕܢܵܘܒܸܿܕܼ ܢܲܦܫܹܗ ܡܸܛܠܵܬܼܝ: ܢܸܫܟܿܚܝܼܗ̇. ܗܵܢܵܘ ܕܹܝܢ: ܐܲܝܟܼ ܕܡ̣ܢ ܨܹܐܕܲܝܟ ܡ̣ܢ ܟܲܕܘܼ: ܠܚܘܼܒܵܠܵܐ ܓܡܝܼܪܵܐ ܕܡ̣ܢ ܚܲܝܹ̈ܐ ܛܲܝܸܒܼ ܢܲܦܫܵܟܼ. ܐܸܢܕܹܝܢ ܐܲܒܼܕܵܢܵܐ ܕܡ̣ܢ ܚܲܝܹ̈ܐ ܗܵܠܹܝܢ ܡܲܕܸܪܸܟܼ ܠܵܟܼ ܒܗܵܢܵܐ ܪܸܥܝܵܢܵܐ: ܝܵܗܹ̇ܒܼܢܵܐ ܠܵܟܼ ܚܲܝܹ̈ܐ ܕܲܠܥܵܠܲܡ ܐܲܝܟܼ ܫܘܼܘܕܵܚ. ܘܐܸܢ ܒܚܲܝܹ̈ܐ ܗܵܠܹܝܢ ܡܟܲܬܲܪ ܐܲܢ̄ܬܿ: ܫܘܼܘܕܵܝܝ ܒܲܥ̇ܒܼܵܕܼܵܐ ܡܚܵܘܸܢܵܐ ܒܵܟܼ ܡܸܟܵܐ: ܠܫܘܪܵܪܵܐ ܕܛܵܒܼ̈ܬܐ ܕܲܥܬܼܝܼ̈ܕܼܵܢ. ܒܲܕܼܓܼܘܿܢ ܗܵܝܕܹܝܢ ܗ̄ܘ̣ ܡܸܫܟܲܚ ܐܲܢ̄ܬܿ ܠܗܘܿܢ ܠܚܲܝܹ̈ܐ ܗܵܢܘܿܢ ܠܵܐ ܡܵܝ̈ܘܿܬܹܐ: ܟܲܕܼ ܥܲܠ ܗܵܠܹܝܢ ܚܲܝܹ̈ܐ ܡܲܡܤܲܪ ܐܲܢ̄ܬܿ. ܟܲܕܼ ܒܗܵܢܵܐ ܛܘܼܝܵܒܼܵܐ ܥܵܐܹ̇ܠ ܐܲܢ̄ܬܿ ܠܐܵܓܼܢܘܿܢܵܐ: ܗܵܝܕܹܝܢ ܗܵܘܹ̇ܐ ܒܤܝܼܪ ܒܥܲܝܢܲܝ̈ܟ: ܟܠܡܸܕܸܡ ܕܤܲܓܝܼ ܓܢܝܼܚ ܘܲܥܤܸܩ. ܛܘܼܝܵܒܼܵܐ ܕܹܝܢ ܕܕܲܐܝܟܼ ܗܵܢܵܐ ܨܸܒܼܝܵܢܵܐ: ܐܵܦܠܵܐ ܐܵܓܼܘܿܢܵܐ ܗܵܘܹ̇ܐ ܒܪܸܥܝܵܢܹܗ ܡܸܛܠ ܚܲܝܵܘ̈ܗܝ: ܒܙܲܒܼܢܵܐ ܕܩܵܐܹ̇ܡ ܥܵܠܘܗܝ pb. 234 ܩܹܘܲܢܕܹܝܢܘܿܣ ܕܡܵܘܬܵܐ. ܒܦܵܤܝܼ̈ܩܵܬܼܵܐ: ܐܸܢ ܚܲܝ̈ܘܗܝ ܕܲܬܼܢܵܢ ܠܵܐ ܢܸܤܢܸܐ ܒܲܪܢܵܫܵܐ ܒܪܸܚܡܲܬܼ ܚܲܝܹ̈ܐ ܕܲܥܬܼܝܼܕܼܝܼܢ: ܠܵܐ ܡܸܫܟܲܚ ܡܤܲܝܒܲܪ ܐܘܼ̈ܠܨܵܢܹܐ. ܝܵܠܘܿܦܵܐ. ܒܐܲܝܢܵܐ ܙܢܵܐ ܢܸܦܤܘܿܩ ܡܸܢܹܗ ܐ̄ܢܵܫ ܠܲܥܝܵܕܼܵܘ̈ܗܝ ܩܲܕܼܡܵܝܹ̈ܐ: ܘܲܢܥܲܝܼܕܼܝܼܘܗܝ ܠܲܩܢܘܿܡܹܗ ܒܚܲܝܹ̈ܐ ܕܲܡܙܲܠܗܙܘܼܬܼܵܐ؟ ܡܲܠܦܵܢܵܐ. ܕܢܸܚܸܐ ܡܲܢ ܦܲܓܼܪܵܐ ܒܨܝܼܪܵܐܝܼܬܼ ܠܵܐ ܡܸܬܿܛܦܝܼܣ: ܟܡܵܐ ܕܲܟܼܪ̈ܝܼܟܼܵܢ ܠܹܗ ܥܸܠ̈ܠܵܬܼܵܐ ܕܦܘܼ̈ܢܵܩܹܐ ܘܲܕܼܪܲܦܝܘܼܬܼܵܐ. ܗ̤ܝ ܕܹܝܢ ܚܙܵܬܼܗܹܝܢ ܕܨܸܒܼ̈ܘܵܬܼܵܐ ܘܓܹܐ̈ܘܵܬܼܵܐ ܘܲܫܟܼܝܼܚܘܼܬܼܗܹܝܢ: ܓܵܘܙܵܠܵܐ ܝܲܬܝܼܪܵܐ ܕܪܸܓܲܬܼܗܹܝܢ ܒܹܗ ܡܥܝܼܪܵܐ. ܘܫܲܦܝܼܪ ܐܵܦ ܦܵܪܘܿܩܲܢ ܠܲܕܼܢܵܩ̇ܦܝܼܢ ܠܹܗ: ܠܡܸܤܬܲܪܵܩܘܼ ܦܵܩܹ̇ܕܼ ܠܘܼܩܕܲܡ ܘܡܲܦܲܩܬܐ ܕܡ̣ܢ ܓܵܘ ܥܵܠܡܵܐ. ܟܲܕܼ ܩܲܕܼܡܵܝܑܬܼ ܠܥܸܠ̈ܠܵܬܐ ܕܪܲܦܝܘܼܬܼܵܐ ܫܵܪܹܐ ܡܸܢܗܘܿܢ: ܘܗܵܝܕܹܝܢ ܦܵܩܹ̇ܕܼ ܠܡܸܩܪܲܒܼ ܠܲܥ̇ܒܼܵܕܼܵܐ. ܘܐܵܦ ܗ̤ܘ ܡܵܪܲܢ ܟܲܕܼ ܫܲܪܝܼܪ ܒܲܩܪܵܒܼܵܐ ܕܥܲܡ ܐܵܟ݂̇ܠܩܲܪܨܵܐ: ܒܚܘܼܪܒܵܐ ܝܲܒܿܝܼܫܵܐ ܘܫܵܗܝܵܐ ܐܲܩܪܸܒܼ ܥܲܡܹܗ. ܐܵܦ ܦܵܘܠܘܼܣ: ܕܢܸܦܘܿܩ ܠܒܲܪ ܡ̣ܢ ܡܕܝܼܢ̄ܬܐ ܦܵܩܹ̇ܕܼ ܠܲܫܩ̈ܝܼܠܲܝ ܙܩܝܼܦܹܗ ܕܲܡܫܝܼܚܵܐ. ܢܸܦܘܿܩ ܠܲܡ ܥܲܡܹܗ ܠܒܲܪ ܡ̣ܢ ܡܕܼܝܼܢ̄ܬܐ: ܟܲܕܼ ܫܩܝܼܠܝܼܢܲܢ ܚܸܤܕܹܗ: ܕܐܵܦ ܗ̤ܘ ܠܒܲܪ ܡ̣ܢ ܡܕܼܝܼܢ̄ܬܐ ܚܲܫ̣. ܒܦܘܼܪܫܵܢܵܐ ܕܹܝܢ ܕܡ̣ܢ ܥܵܠܡܵܐ ܘܕܝܼܠܹܗ: ܦܫܝܼܩܵܐܝܼܬܼ ܛܵܥܹ̇ܐ ܒܲܪܢܵܫܵܐ ܐܵܦ ܠܲܥܝܵܕܼܵܘ̈ܗܝ ܩܲܕܝܼܡܵܝܹ̈ܐ: ܘܠܵܘ ܤܲܓܝܼ ܙܲܒܼܢܵܐ ܡܸܬܼܐܠܸܨ ܒܗܵܕܹܐ. ܩܲܪܝܼܒܼܘܼܬܼܵܐ ܡ̇ܢ ܕܲܠܘܵܬܼ ܨܸܒܼ̈ܘܵܬܼܵܐ: ܕܠܝܼܠܵܐܝܼܬܼ ܡܪܲܦܝܵܐ ܚܝܼܨܘܼܬܼܵܗ̇ ܕܬܲܪܥܝܼܬܼܵܐ. ܐܵܦ ܙܵܕܹܩ ܓܹܝܪ ܘܲܡܥܲܕܲܪ ܤܲܓܿܝܼ ܒܐܵܓܼܘܿܢܵܐ: ܕܲܒܼܟܼܠܵܗ̇ ܚܲܤܝܼܪܘܼܬܼܵܐ ܘܲܤܢܝܼܩܘܼܬܼܵܐ ܢܸܗܘܸܐ ܡܛܲܟܲܣ ܥܘܼܡܪܹܗ ܕܐ̄ܢܵܫ: ܟܲܕܼ ܤܦܝܼܩ ܡ̣ܢ ܟܠܗܹܝܢ ܕܠܲܢܚܵܝܵܐ ܡܓܲܪ̈ܓܼܵܢ ܠܹܗ. ܡܵܐ ܕܗܵܟܲܢܵܐ pb. 235 ܥܸܠ̈ܠܵܬܐ ܕܲܠܘܵܬܼ ܪܲܦܝܘܼܬܼܵܐ ܩܵܪ̈ܝܵܢ: ܗ̤ܘܲܝ̈ ܡܲܒܼܥ̈ܕܼܵܢ ܡܸܢܹܗ ܕܒܲܪܢܵܫܵܐ: ܠܵܐ ܡܸܫܬܲܢܲܩ ܒܲܩܪܵܒܼܵܐ ܥܦܝܼܦܵܐ ܕܡ̣ܢ ܠܓܼܵܘ ܘܡ̣ܢ ܠܒܲܪ. ܚܙܝܼ ܕܲܟܼܡܵܐ ܒܨܝܼܪ ܐܵܓܼܘܿܢܵܐ: ܗܵܝ̇ ܕܐ̄ܢܵܫ ܠܨܸܒܼ̈ܘܵܬܼܵܐ ܡ̣ܢ ܪܘܼܚܩܵܐ ܢܸܪܲܓܼ ܠܗܹܝܢ: ܡ̣ܢ ܗܵܝ̇ ܕܟܲܕܼ ܗܸܢܹܝܢ ܨܸܒܼ̈ܘܵܬܼܵܐ ܩܢܘܼܡܗܹܝܢ ܩܲܪ̈ܝܼܒܼܵܢ: ܘܲܒܼܝܲܕܼ ܚܙܵܬܼܗܹܝܢ ܡܚܲܬܼܚ̈ܬܼܵܢ ܠܗܘܿܢ ܠܚܘܼ̈ܫܵܒܹܐ. ܗܵܪܟܵܐ: ܐܵܓܼܘܿܢܵܐ ܥܦܝܼܦܵܐ ܚܵܙܹ̇ܝܢܲܢ ܕܐܝܼܬܼ. ܡܵܐ ܓܹܝܪ ܕܲܨܪܝܼܟܼ ܒܲܪܢܵܫܵܐ ܒܥܘܼܡܪܹܗ: ܘܲܒܼܤܝܼܪܵܐ ܚܫܲܚܬܹܗ: ܐܵܦܠܵܐ ܒܙܲܒܼܢܵܐ ܕܤܘܼܢܩܵܢܹܗ ܒܪܸܓܿܬܼܵܐ ܚܵܐܲܪ ܒܵܗ̇. ܘܲܒܼܡܸܕܸܡ ܙܥܘܿܪ: ܡܦܝܼܣ ܠܹܗ ܠܦܲܓܼܪܵܐ. ܟܲܕܼ ܐܵܦ ܗ̤ܘ ܗܵܢܵܐ ܫܝܼܛ ܥܠܵܘܗܝ: ܘܲܒܼܤܸܐ. ܘܠܵܘ ܡܸܛܠ ܝܵܐܝܘܼܬܹܗ ܘܗܲܢܝܼܐܘܼܬܹܗ ܡܸܬܼܩܲܪܲܒܼ ܠܘܵܬܹܗ: ܐܸܠܵܐ ܐܲܝܟܼ ܕܢܸܤܡܘܿܟܼ ܒܲܠܚܘܿܕܼ ܠܲܟܼܝܵܢܵܐ. ܦܘܼܪ̈ܤܹܐ ܕܹܝܢ ܗܵܠܹܝܢ: ܦܫܝܼܩܵܐܝܼܬܼ ܡܲܝܬܹܝܢ ܠܹܗ ܠܐ̄ܢܵܫ ܠܘܵܬܼ ܥܲܢܘܵܝܘܼܬܼܵܐ: ܕܠܵܐ ܫܚܵܩܹ̈ܐ ܘܬܲܟܼܬܘܼܫܵܐ ܕܡܲܚܫ̈ܒܼܵܬܼܵܐ. ܙܵܕܹܩ ܠܹܗ ܠܒܲܪܢܵܫܵܐ: ܕܨܸܒܼ̈ܘܵܬܼܵܐ ܐܲܝܠܹܝܢ ܕܲܠܡܸܬܼܢܛܵܪܘܼ ܡ̣ܢ ܚܘܼܠܛܵܢܵܐ ܕܲܒܼܗܹܝܢ ܐܵܓܼܘܿܢܵܐ ܐܝܼܬܼ ܒܗܹܝܢ: ܕܐܵܦ ܡ̣ܢ ܚܙܵܬܼܗܹܝܢ ܢܸܙܕܗܲܪ: ܘܡ̣ܢ ܘܲܥܕܗܹܝܢ ܢܸܬܼܪܲܚܲܩ. ܗܵܕܹܐ ܕܹܝܢ ܐܵܡܲ݁ܪܢܵܐ: ܠܵܘ ܒܲܠܚܘܿܕܼ ܥܲܠ ܗܵܠܹܝܢ ܕܟܲܪܤܵܐ: ܐܸܠܵܐ ܐܵܦ ܥܲܠ ܟܠܗܹܝܢ ܐܲܝܠܹܝܢ ܕܲܒܼܒܼܘܼܚܪܵܢܵܐ ܕܲܒܼܗܹܝܢ ܡܸܬܼܒܲܩܝܵܐ ܚܹܐܪܘܼܬܹܗ ܕܝܼܚܝܼܕܼܵܝܵܐ: ܘܐܲܝܟܼ ܕܲܠܦܘܼܪܫܵܢܵܐ ܕܡܸܢܗܹܝܢ ܒܲܩܝܵܡܵܐ ܥܲܠ̣ ܠܘܵܬܼ ܐܲܠܵܗܵܐ. ܗܵܢܵܘ ܕܹܝܢ: ܐܵܦ ܥܲܠ ܚܸܙܘܵܐ ܕܦܲܪܨܘܿܦܵܐ ܕܐܲܢ̄ܬܿܬܼܵܐ: ܐܵܦ ܥܲܠ ܚܙܵܬܼܵܐ ܕܓܹܐ̈ܘܵܬܼܵܐ: ܐܵܦ ܥܲܠ ܓܹܐܘ̈ܬܼܵܢܹܐ ܘܦܘܼܢܵܩܲܝ̈ܗܘܿܢ: ܘܥܲܠ ܤܸܩ̈ܠܹܐ ܘܠܵܒܼܘܿܫܲܝ̈ܗܘܿܢ: ܘܥܲܠ ܟ̱ܠܹܗ ܛܲܟܼܤܵܐ ܕܥܵܠܡܵܝܘܼܬܼܵܐ: ܘܡܡܲܠܠܵܐ ܘܫܸܡܥܵܐ ܕܲܥܠܲܝܗܘܿܢ. ܚܲܝܠܵܐ ܓܹܝܪ ܪܲܒܵܐ ܩܵܢܹ̇ܝܢ ܚܲܫܹ̈ܐ: ܡ̣ܢ ܩܲܪܝܼܒܼܘܼܬܼܵܐ pb. 236 ܕܨܸܒܼ̈ܘܵܬܼܵܐ: ܠܲܡܪܲܦܵܝܘܼ ܠܐܵܓܼܘܿܢܸܤ̈ܛܹܐ: ܘܲܠܘܵܬܼ ܫܘܼܚܠܵܦܵܐ ܠܡܲܝܬܵܝܘܼ ܠܬܲܪܥܝܼܬܐ. ܐܸܢ ܚܙܵܬܼܵܐ ܕܫܲܦܝܼܪ̈ܵܬܼܵܐ ܡܙܝܼܥܵܐ ܠܬܲܪܥܝܼܬܼܵܐ ܒܲܛܢܵܢܵܐ ܠܡܸܤܛܵܐ ܨܹܝܕܼ ܦܘܼܠܚܵܢܗܹܝܢ: ܝܑܼܕܼܝܼܥܵܐ ܕܐܵܦ ܕܗܵܢܹܝܢ܆ ܕܕܲܠܩܘܼܒܼܠܵܐ: ܠܡܸܫܒܵܐ ܠܪܸܥܝܵܢܵܐ ܠܘܵܬܼܗܹܝܢ: ܚܲܝܠܵܐ ܩܲܢܝܵܐ. ܘܐܵܦܸܢ ܡܸܕܸܡ ܝܲܬܝܼܪܵܐ ܠܵܐ ܢܸܗܘܸܐ: ܒܲܠܚܘܿܕܼ ܠܪܸܥܝܵܢܵܐ ܕܲܡܢܵܚ ܒܐܵܓܼܘܿܢܵܐ ܢܲܪܡܸܐ: ܚܘܼܤܪܵܢܵܐ ܗ̄ܘ̣ ܪܲܒܵܐ ܘܗܵܢܵܐ: ܕܡ̣ܢ ܫܲܝܢܵܐ ܠܲܕܼܠܘܼܚܝܵܐ ܢܸܬܿܕܚܸܐ ܐ̄ܢܵܫ ܒܨܸܒܼܝܵܢܹܗ. ܐܸܢܕܹܝܢ ܗܵܘ̇ ܚܲܕܼ ܡ̣ܢ ܩܲܕܝܼ̈ܫܹܐ ܤܵܒܼܵܐ ܥܡܝܼܠܵܐ: ܚܙܵܬܼܵܐ ܕܕܼܟܼܪܵܐ ܡܲܤܒܲܗ ܒܢܸܫܹ̈ܐ ܡܲܟܿܝܵܢܝܼܬܼܵܐ ܚܲܫܒܵܗ̇ ܕܗܵܘܢܵܐ ܘܲܡܤܲܓܿܦܵܢܝܼܬܼܵܐ ܒܐܵܓܼܘܿܢܵܐ: ܟܲܕܼ ܐܸܤܬܲܩܒܲܠ ܒܲܙܒܲܡ ܠܲܚܕܼܵܐ ܡ̣ܢ ܕܲܝܪ̈ܵܬܼܵܐ: ܡܲܢܘܼ ܒܲܐ̄ܚܪ̈ܵܢܝܬܐ ܢܲܗܡܸܐ: ܕܐܵܦܠܵܐ ܠܡܸܥܲܠ ܠܵܗ̇ ܘܲܠܡܸܤܓܲܕܼ ܐܸܬܿܛܦܝܼܣ ܗܵܘ̇ ܛܘܼܒܼܵܢܵܐ؟ ܐܸܬܼܚܲܫܲܒܼ ܦܵܪܘܿܫܵܐܝܼܬܼ ܗܵܘ̇ ܤܵܒܼܵܐ ܚܲܟܝܼܡܵܐ: ܕܐܵܦܸܢ ܒܲܠܚܘܿܕܼ ܢܸܤܲܩ ܥܲܠ ܠܹܒܿܝ ܒܠܸܠܝܵܐ ܗܵܢܵܐ ܕܒܼܵܐܹ̇ܬܼ ܐ̄ܢܵܐ ܒܵܗ̇: ܕܐܝܼܬܼ ܗܵܪܟܵܐ ܡܸܕܸܡ ܕܕܲܐܝܟܼ ܗܵܟܲܢ: ܚܘܼܤܪܵܢܵܐ ܗ̄ܘ̣ ܪܵܒܵܐ. ܘܠܵܐ ܥܲܠ̣: ܡܸܛܠ ܗܵܕܹܐ. ܡܸܕܼܚܲܠ ܠܲܡ: ܒܢܲܝ̈: ܠܵܐ ܕܵܚܹ̇ܠ ܐ̄ܢܵܐ. ܒܪܲܡ: ܡܵܐ ܠܝܼ ܩܪܵܒܼܵܐ ܒܲܛܝܼܠܵܐ؟ ܗܵܢܵܘ ܕܹܝܢ: ܘܐܵܦ ܥܘܼ̈ܗܕܵܢܹܐ ܕܕܲܐܝܟܼ ܗܵܠܹܝܢ: ܚܠܵܦ ܫܲܦܝܼܘܼܬܼܵܐ ܕܦܘܼܠܚܵܢܝ܀ ܟܠܗܹܝܢ ܓܹܝܪ ܐܲܝܠܹܝܢ ܕܕܼܝܼܠܹܗ ܐܸܢܹܝܢ ܕܗܵܢܵܐ ܦܲܓܼܪܵܐ: ܘܥܲܠ ܐܲܦܲܝ̈ܗܹܝܢ ܬܲܟܼܬܘܼܫܵܐ ܐܝܼܬܼ ܠܹܗ ܠܒܲܪܢܵܫܵܐ ܥܲܠ ܐܲܦܲܝ̈ ܢܛܝܼܪ̈ܵܬܼܵܐ ܕܡܸܢܗܹܝܢ: ܟܠ ܟܡܵܐ ܕܪ̈ܲܚܝܼܩܵܢ ܡܸܢܹܗ: ܬܲܟܼܬܘܼܫܵܐ ܒܨܝܼܪܵܐ ܐܝܼܬܼ ܠܹܗ ܡܸܛܠܵܬܼܗܹܝܢ. ܐܲܝܟܲܢܵܐ ܕܐܵܦ ܟܲܕܼ ܢܸܗܘ̈ܝܵܢ ܩܲܪ̈ܝܼܒܼܵܢ: ܟܡܵܐ ܐܸܢ ܒܩܸܢܛܵܐ ܕܒܼܝܼܪ ܨܹܝܕܼ ܛܵܒܼ̈ܬܐ: ܡܸܬܼܠܗܸܩ ܒܩܲܪܝܼܒܼܘܼܬܼܗܹܝܢ ܠܲܚܫܲܚܬܐ ܕܲܒܼܗܹܝܢ. pb. 237 ܥܸܩܵܪܹ̈ܐ ܤܲܓܝܼ̈ܐܹܐ ܚܵܙܹ̇ܝܢܲܢ ܕܲܩܒܼܝܼܪܝܼܢ: ܘܡܲܚܼܬܼܝܼܢ ܬܚܹܝܬܼ ܐܲܪܥܵܐ: ܕܲܒܼܙܲܒܼܢܵܐ ܕܩܲܝܛܵܐ ܡܸܛܠ ܚܲܝܠܹܗ ܕܫܸܡܫܵܐ ܘܥܘܼܙܵܐ ܕܚܘܼܡܵܐ: ܐܵܦܠܵܐ ܕܐܝܼܬܲܝܗܘܿܢ ܠܐ̄ܢܵܫ ܝܑܼܕܼܝܼܥܝܼܢ. ܡܵܐ ܕܲܡܛ̣ܵܘ ܨܹܐܕܲܝܗܘܿܢ ܪ̈ܤܝܼܤܹܐ ܕܡܲܝ̈ܵܐ: ܘܚܵܝܠܵܐ ܕܦܲܝܘܼܚܘܼܬܼܵܐ ܕܐܵܐܲܪ: ܡܸܚܕܼܵܐ ܡܫܲܪܸܐ ܟܠ ܚܲܕܼ ܡܸܢܗܘܿܢ ܡܚܵܘܸܐ ܬܲܦܫܹܗ ܡ̣ܢ ܟܠ ܟܲܪ ܕܲܩܒܼܝܼܪ. ܡܵܕܹܝܢ ܠܵܐ ܬܚܘܼܪ ܐܵܦ ܐܲܢ̄ܬܿ: ܕܲܒܼܚܝܠܵܐ ܕܚܲܡܝܼܡܘܼܬܼܵܗ̇ ܕܥܲܢܘܵܝܘܼܬܼܵܐ: ܘܙܲܠܝܼ̈ܩܹܐ ܕܛܲܝܒܿܘܼܬܼܵܐ ܕܫܸܠܝܵܐ ܡܢܵܚ ܐܲܢ̄ܬܿ ܡ̣ܢ ܚܲܫܹ̈ܐ ܤܲܓܝܼ. ܐܸܢܕܹܝܢ ܬܹܐܬܸܐ ܠܘܵܬܼ ܨܸܒܼ̈ܘܵܬܼܵܐ: ܗܵܕܹܝܢ ܚܵܙܹ̇ܐ ܐܲܢ̄ܬܿ ܐܲܝܟܲܢ ܡܸܬܼܢܲܚܡܝܼܢ ܟܠ ܚܲܕܼ ܡܸܢܗܘܿܢ: ܘܲܡܪܝܼܡ ܪܹܫܹܗ ܡ̣ܢ ܕܘܼܟܿܬܹܗ. ܗܵܢܵܘ ܕܹܝܢ: ܘܐܸܢܗ̤ܘ ܕܩܲܠܝܼܠ ܢܪܝܼܚܘܼܢ ܘܪܹܚܵܝܐ ܕܲܢܝܵܚܵܐ. ܗܵܠܹܝܢ ܐܸܡ̇ܪܹܬܼ: ܕܐܹܚܵܘܸܐ ܕܠܵܐ ܐܲܢܵܫ ܢܸܬܿܬܿܟܸܠ ܥܕܲܡܵܐ ܕܡܵܐܹ̇ܬܼ ܘܲܡܫܲܢܸܐ ܡ̣ܢ ܗܵܠܹܝܢ ܚܲܝܹ̈ܐ. ܘܕܲܥܪܘܼܩܝܵܐ ܘܪܲܚܝܼܩܘܼܬܼܵܐ: ܟܡܵܐ ܐܝܼܬܲܝܗܘܿܢ ܡܥܲܕܪ̈ܵܢܹܐ ܕܐܵܓܼܘܿܢܲܢ. ܨܸܒܼ̈ܘܵܬܼܵܐ ܐܲܝܠܹܝܢ ܕܡ̣ܢ ܥܘܼܗܕܵܢܗܹܝܢ ܒܵܗ̇ ܬܝܼܢܲܢ ܟܲܤܝܵܐܝܼܬܼ: ܙܵܕܹܩ ܕܐܵܦ ܡ̣ܢ ܦܸܓܼܥܵܐ ܕܲܒܼܗܹܝܢ ܢܸܩܢܲܛ. ܘܠܵܐ ܢܕܼܘܼܫ ܠܬܹܐܪܬܵܐ: ܘܲܢܒܲܤܲܪ ܥܲܠ ܡܥܲܗܕܵܢܵܐ. ܒܐܼܲܪܵܐ ܓܹܝܪ ܫܵܗܝܵܐ ܘܲܕܼܠܵܐ ܥܲܠ̈ܠܵܬܼܵܐ ܢܸܒܼܩܹܝܘܗܝ ܠܦܲܓܼܪܲܢ: ܟܲܕܼ ܡܲܩܢܹܝܢ ܚ̄ܢܲܢ ܠܹܗ ܕܘܼܪܵܫܵܐ ܕܚܘܼܡܤܵܢܵܐ܀ ܕܐܵܦ ܐ̄ܚܪܹܬܼܵܐ ܐܝܼܬܹܝܗ̇: ܕܪܲܒܵܐ ܡ̣ܢ ܟܠܗܹܝܢ. ܕܟܼܠ ܟܡܵܐ ܕܐ̄ܢܵܫ ܠܵܐ ܩܲܪܝܼܒܼ ܠܹܗ ܗܵܘ̇ ܡܸܕܸܡ ܕܥܸܠܬܼܵܐ ܐܝܼܬܼܵܘܗܝ ܕܬܲܟܼܬܘܼܫܹܗ: ܐܵܦܸܢ ܢܸܫܬܿܚܸܩ ܒܬܲܪܥܝܼܬܼܵܐ: ܕܠܵܐ ܕܸܚܠܵܐ ܐܝܼܬܼܵܘܗܝ. ܕܕܲܡ ܟܲܕܼ ܢܸܙܕܟܸܐ ܡ̣ܢ ܚܘܼܫܵܒܼܵܐ: ܡܸܬܼܪܡܸܐ ܠܹܗ ܐܵܦ ܠܲܚܫܲܚܬܼܵܐ ܡܸܛܠ ܩܲܪܝܼܒܼܘܼܬܼܵܐ. pb. 238 ܝܵܠܘܿܦܵܐ. ܐܲܝܢܵܐ ܕܲܠܟܼܠܗܹܝܢ ܡܥܵܘ̈ܟܼܵܢܝܬܼܵܐ ܫ̣ܕܼܵܐ ܡ̣ܢ ܢܲܦܫܹܗ: ܘܥܲܠ̣ ܠܒܹܝܬܼ ܐܵܓܼܘܿܢܵܐ: ܡܵܢܵܘ ܫܘܼܪܵܝ ܬܲܟܼܬܘܼܫܹܗ ܕܥܲܡ ܚܛܝܼܬܼܵܐ: ܘܡ̣ܢ ܐܲܝܟܵܐ ܢܫܲܪܸܐ ܒܕܲܪܵܐ؟ ܡܲܠܦܵܢܵܐ. ܗܵܕܹܐ: ܠܟܼܠܢܵܫ ܝܑܼܕܲܥܵܐ. ܕܲܠܟܼܠܗܘܿܢ ܐܵܓܼܘܿܢܹ̈ܐ ܕܠܘܼܩܒܲܠ ܚܛܝܼܬܼܵܐ ܘܲܪ̈ܓܼܝܼܓܼܵܬܼܵܗ̇: ܥܲܡܠܵܐ ܕܨܵܘܡܵܐ ܩܲܕܝܼܡ. ܝܲܬܝܼܪܵܐܝܼܬܼ: ܗܵܘ̇ ܕܠܘܼܩܒܲܠ ܚܛܝܼܬܼܵܐ ܕܲܠܓܼܵܘ ܡܸܢܹܗ ܡܸܬܼܟܲܬܲܫ. ܘܐܵܬ̤ܵܐ ܕܤܸܢܐܬܼܵܐ ܕܥܲܡ ܚܛܝܼܬܼܵܐ ܘܲܪ̈ܓܼܝܼܓܼܵܬܼܵܗ̇: ܡ̣ܢ ܗܵܕܹܐ ܡܸܬܼܚܲܙܝܵܐ ܒܐܲܝܠܹܝܢ ܕܲܠܬܲܟܼܬܘܼܫܵܐ ܗܵܢܵܐ ܠܵܐ ܡܸܬܼܚܲܙܝܵܢܵܐ ܢܵܚܬܝܼܢ: ܕܲܒܼܨܵܘܡܵܐ ܡܫܲܪܹܝܢ. ܘܒܼܵܬܼܪܹܗ: ܩܵܘܡܵܐ ܕܲܒܼܠܸܠܝܵܐ. ܐܲܝܢܵܐ ܕܲܒܼܟܼܠܗܘܿܢ ܚܲܝܵܘ̈ܗܝ ܠܥܸܢܝܵܢܵܐ ܕܨܵܘܡܵܐ ܡܲܚܸܒܼ: ܗܵܢܵܐ: ܪܵܚܡܵܐ ܐܝܼܬܼܵܘܗܝ ܕܢܲܟܼܦܘܼܬܼܵܐ. ܐܲܟܼܙܢܵܐ ܓܹܝܪ ܕܪܹܫ ܛܘܼ̈ܒܹܐ ܟܠܗܘܿܢ ܕܥܵܠܡܵܐ: ܘܲܠܤܲܢ̈ܝܵܬܹܗ ܟܠܗܹܝܢ ܢܝܵܚܵܐ ܕܟܲܪܤܵܐ ܩܲܕܝܼܡ: ܘܪܲܦܝܘܼܬܼܵܐ ܕܫܸܢܬܼܵܐ ܕܲܡܓܲܪܓܼܵܐ ܠܡܲܕܼܡܟܼܵܐ ܛܲܢܦܵܐ: ܗܵܟܲܢܵܐ ܫܘܼܪܵܝ ܐܘܼܪܚܹܗ ܩܲܕܝܼܫܬܼܵܐ ܕܐܲܠܵܗܵܐ ܘܲܕܼܟܼܠܗܹܝܢ ܡܝܲܬܿܪ̈ܵܬܼܵܐ: ܨܵܘܡܵܐ ܐܝܼܬܼܵܘܗܝ ܫܲܬܼܐܸܤܬܼܵܐ: ܘܥܝܼܪܘܼܬܼܵܐ ܙܗܝܼܬܐ ܕܲܒܼܬܸܫܡܸܫܬܐ ܕܐܲܠܵܗܵܐ: ܒܲܙܩܝܼܦܘܼܬܹܗ ܕܦܲܪܵܐ ܕܟܼܠܹܗ ܠܸܠܝܵܐ ܠܘܼܩܒܲܠ ܗܲܢܝܼܐܘܼܬܼܵܗ̇ ܕܫܸܢܬܼܵܐ. ܡܲܥܫܢܵܢܵܐ ܗ̄ܘ̣ ܓܹܝܪ ܨܵܘܡܵܐ ܕܟܼܠܗܹܝܢ ܡܝܲܬܿܪ̈ܵܬܼܵܐ: ܘܫܘܼܪܵܝܵܐ ܗ̄ܘ̣ ܕܐܵܓܼܘܿܢܵܐ: ܘܲܟܼܠܝܼܠܵܐ ܕܲܢܙܝܼܪܹ̈ܐ: ܘܫܘܼܦܪܵܐ ܕܲܒܼܬܼܘܼܠܘܼܬܼܵܐ ܘܩܲܕܝܼܫܘܼܬܼܵܐ: ܘܲܡܙܲܗܝܵܢܵܐ ܕܢܲܟܼܦܘܼܬܼܵܐ: ܘܫܘܼܪܵܝܵܐ ܕܐܘܼܪܚܵܐ ܕܲܟܼܪܸܤܛܝܵܢܘܼܬܼܵܐ: ܘܡܵܘܠܕܼܵܢܵܐ ܕܲܨܠܘܿܬܼܵܐ: ܘܡܲܒܘܼܥܵܐ ܕܲܪܡܝܼܤܘܼܬܼܵܐ: ܘܡܲܠܦܵܢܵܐ ܕܫܲܠܝܘܼܬܼܵܐ: ܘܲܠܟܼܠܗܹܝܢ ܫܲܦܝܼܪ̈ܵܬܼܵܐ ܗ̤ܘ ܩܲܕܝܼܡ. ܐܲܟܼܙܢܵܐ ܓܹܝܪ ܕܢܲܩܝܼܦ ܗ̄ܘ̣ ܒܘܼܤܵܡܵܐ ܕܢܘܼܗܪܵܐ ܠܥܲܝ̈ܢܹܐ ܕܲܚܠܝܼ̈ܡܵܢ: ܗܵܟܲܢܵܐ ܠܨܵܘܡܵܐ ܕܦܘܼܪܫܵܢܵܐ ܪܸܓܿܬܼܵܐ ܕܲܨܠܘܿܬܼܵܐ. ܡܸܚܕܼܵܐ ܓܹܝܪ ܕܫܲܪܝܼ ܐ̄ܢܵܫ pb. 239 ܒܨܵܘܡܵܐ: ܠܥܸܢܝܵܢܵܐ ܕܐܲܠܵܗܵܐ ܡ̣ܢ ܗܵܪܟܵܐ ܡܸܬܼܪܲܓܼܪܲܓܼ ܒܡܲܕܥܹܗ. ܠܵܐ ܡܚܲܡܤܸܢ ܓܘܼܫܡܵܐ ܨܲܝܡܵܐ: ܕܢܲܓܸܣ ܥܲܠ ܬܸܫܘܝܼܬܹܗ ܠܸܠܝܵܐ ܟ̱ܠܹܗ. ܡܚܲܦܛܵܬܵܐ ܗ̄ܘ̣ ܓܹܝܪ ܨܵܘܡܵܐ ܕܥܝܼܪܘܼܬܼܵܐ ܕܲܠܘܵܬܼ ܐܲܠܵܗܵܐ: ܟܝܵܢܵܐܝܼܬܼ. ܠܵܘ ܒܲܠܚܘܿܕܼ ܒܐܝܼܡܵܡܵܐ: ܐܸܠܵܐ ܘܲܒܼܠܸܠܝܵܐ. ܠܵܐ ܓܹܝܪ ܠܵܐܹ̇ܐ ܤܲܓܝܼ ܒܬܲܟܼܬܘܼܫܵܐ ܕܥܲܡ ܫܸܢܬܼܵܐ: ܦܲܓܼܪܵܐ ܤܦܝܼܩܵܐ ܕܨܲܝܵܡܵܐ. ܘܐܵܦܸܢ ܡܚܝܼܠ ܒܪܸ̈ܓܼܫܵܘܗܝ: ܪܸܥܝܵܢܹܗ ܕܹܝܢ: ܥܝܼܪ ܠܘܵܬܼ ܐܲܠܵܗܵܐ ܒܬܲܟܼܫܲܦܬܐ. ܦܲܩܵܚ ܓܹܝܪ ܕܡ̣ܢ ܡܚܝܼܠܘܼܬܼܵܐ ܕܨܵܘܡܵܐ ܢܦܘܼܫ ܡ̣ܢ ܦܘܼܠܚܵܢܵܐ: ܘܠܵܐ ܡ̣ܢ ܝܼܘܼܩܪܵܐ ܕܡܹܐܟܼ̈ܠܵܬܐ. ܥܲܠ ܫܘܼܦܪܹ̈ܐ ܕܹܝܢ ܕܨܵܘܡܵܐ ܠܡܸܬܼܢܵܐ: ܤܲܓܝܼ ܠܵܐ ܐܵܠ̇ܨܵܐ ܠܲܢ. ܠܤܲܓܝܼ̈ܐܹܐ ܡ̣ܢ ܡܲܠܦܵܢܹ̈ܐ ܘܐܲܒܼ̈ܗܵܬܼܵܐ: ܥܲܠ ܢܸܨ̈ܚܵܢܹܐ ܕܨܵܘܡܵܐ ܘܥܲܠ ܫܘܼܦܪܹ̈ܐ ܪܵܘܪ̈ܒܹܐ ܕܡܸܢܹܗ ܨܵܡ̇ܚܝܼܢ: ܐܲܡܝܼܪ ܠܗܘܿܢ. ܘܟܼܠܗܘܿܢ ܟܬܼܵܒܹ̈ܐ ܡܵܘܕܥܝܼܢ ܥܲܠ ܪܲܒܿܘܼܬܹܗ ܕܨܵܘܡܵܐ: ܘܢܸܨ̈ܚܵܢܹܐ ܕܲܤܥܲܪ ܒܟܼܠܕܼܵܪ ܘܕܼܵܪ: ܘܥܲܠ ܪܲܒܿܘܼܬܼ ܥܘܼܕܼܪܵܢܵܐ ܕܡܸܢܹܗ: ܘܫܘܼܒܼܚܵܐ ܡܥܲܠܝܵܐ ܕܨܲܝܵܡܹ̈ܐ. ܘܐܵܦ ܡ̣ܢ ܢܸܤܝܵܢܵܐ ܠܟܼܠܢܵܫ ܝܑܼܕܼܝܼܥ: ܕܡܲܒܿܘܼܥܵܐ ܗ̄ܘ̣ ܕܟܼܠܗܹܝܢ ܫܲܦܝܼܪ̈ܵܬܼܵܐ. ܟܡܵܐ ܕܹܝܢ ܕܛܲܒܼ̈ܥܹܐ ܕܨܵܘܡܵܐ ܪܡܹܝܢ ܥܲܠ ܦܘܼܡܹܗ ܕܒܲܪܢܵܫܵܐ: ܚܘܼܫܵܒܹܗ ܒܲܬܼܘܵܬܼ ܢܲܦܫܵܐ ܗܵܪܹܓܼ. ܘܠܸܒܹܗ: ܨܠܵܘ̈ܵܬܼܵܐ ܡܙܝܼܥ. ܘܥܲܠ ܦܲܪܨܘܿܦܹܐ: ܪܲܡܝܵܐ ܟܡܝܼܪܘܼܬܼܵܐ. ܙܵܘ̈ܥܹܐ ܤܲܢܝܵ̈ܐ: ܘܪܲܚܝܼܩܝܼܢ ܡܸܢܹܗ. ܦܨܝܼܚܘܼܬܼܵܐ: ܐܵܦܠܵܐ ܟܠ ܟ̱ܠܹܗ ܡܸܬܼܚܲܙܝܵܐ ܒܹܝܬܼ ܥܲܝܢܵܘ̈ܗܝ. ܒܥܸܠܕܒܼܵܒܼܵܐ ܗ̄ܘ̣ ܓܹܝܪ ܕܲܪ̈ܓܼܝܼܓܼܵܬܐ ܘܲܕܼܥܸܥ̈ܝܵܢܹܐ ܒܲܛܝܼ̈ܠܹܐ. ܠܵܐ ܡܬܼܘܿܡ ܐܸܬܼܚܙܝܼ ܐ̄ܢܵܫ ܨܲܝܵܡܵܐ ܕܦܘܼܪܫܵܢܵܐ: ܕܫܲܥܒܸܕܼܬܹܗ ܪܸܓܬܐ ܤܢܝܼܬܐ. ܕܘܼܡܤܵܐ ܗ̄ܘ̣ ܓܹܝܪ ܕܟܼܠ ܡܝܲܬܿܪ̈ܵܢ. ܘܐܲܝܢܵܐ ܕܲܒܼܗܵܢܵܐ ܒܵܤܹ̇ܐ: ܠܟܼܠܗܹܝܢ ܡܝܲܬܿܪ̈ܵܬܼܵܐ ܡܙܲܥܲܙܲܥ. ܡܸܛܠ pb. 240 ܕܹܝܢ ܕܦܘܼܩܕܵܢܵܐ ܩܲܕܼܡܵܝܵܐ ܕܐܸܬܿܬܿܤܝܼܡ ܠܲܟܼܝܵܢܲܢ ܒܫܘܼܪܵܝܵܐ: ܥܲܠ ܛܥܵܡܬܐ ܕܡܹܐܟܼܘܼܠܬܐ ܙܲܗܪܹܗ: ܘܡ̣ܢ ܗܵܪܟܵܐ ܢܦܲܠ̣ ܪܹܫ ܛܘܿܗܡܲܢ. ܒܲܕܼܓܼܘܿܢ ܡ̣ܢ ܐܲܝܟܵܐ ܕܲܗܘ̤ܵܐ ܚܘܼܒܼܠܵܐ ܩܲܕܼܡܵܝܵܐ: ܡ̣ܢ ܬܲܡܵܢ ܡܫܲܪܹܝܢ ܒܒܸܢܝܵܢܵܐ ܐܲܬܼܠܹܝ̈ܛܹܐ ܕܕܸܚܠܲܬܼ ܐܲܠܵܗܵܐ: ܡܵܐ ܕܤܵܝ̇ܡܝܼܢ ܫܘܼܪܵܝܵܐ ܠܲܢܛܘܼܪ̈ܵܬܼܵܐ ܕܢܵܡܘܿܤܵܘ̈ܗܝ. ܘܐܵܦ ܦܵܪܘܿܩܲܢ: ܟܲܕܼ ܐܸܬܼܚܵܘܝܼ ܠܥܵܠܡܵܐ ܥܲܠ ܝܘܿܪܕܢܵܢ: ܡ̣ܢ ܗܵܪܟܵܐ ܫܲܪܒܝܼ. ܡ̣ܢ ܒܵܬܲܪ ܠܲܡ ܕܲܥܡܲܕܼ: ܐܲܦܸܩܬܹܗ ܪܘܼܚܵܐ ܠܡܲܕܼܒܿܪܵܐ. ܘܨܵܡ̣ ܐܲܪܒܿܥܝܼܢ ܐܝܼܡܵܡ̈ܝܼܢ: ܘܐܲܪܒܿܥܝܼܢ ܠܲܝ̈ܠܵܘܵܢ. ܘܟܼܠܗܘܿܢ ܕܲܒܼܥܸܩ̈ܒܼܵܬܹܗ ܢܵܦܩ̇ܝܼܢ: ܥܲܠ ܗܵܕܹܐ ܫܲܬܼܐܸܤܬܼܵܐ ܤܵܝ̇ܡܝܼܢ ܫܘܼܪܵܝ ܐܵܓܼܘܿܢܘܗܘܿܢ. ܙܲܝܢܵܐ ܗ̄ܘ̣ ܚܫܝܼܠ ܡ̣ܢ ܐܲܠܵܗܵܐ: ܡܲܢ̣ܘܼ ܢܸܒܼܤܸܐ ܒܹܗ ܘܢܸܗܘܸܐ ܕܠܵܐ ܡܲܪܫܘܼܢ؟ ܐܸܢ ܤܵܐܹ̇ܡ ܢܵܡܘܿܤܵܐ ܨܵܡ̣: ܡܲܢ̣ܘܼ ܡ̣ܢ ܢܵܛܪ̈ܲܝ ܢܵܡܘܿܤܵܐ ܕܠܵܐ ܤܢܝܼܩ ܥܲܠ ܗܵܕܹܐ؟ ܡܸܛܠ ܕܹܝܢ ܕܲܥܕܲܡܵܐ ܠܗܵܝܕܼܝܼܟ ܓܸܢܤܵܐ ܕܲܒܼܢܲܝ̈ܢܵܫܵܐ ܠܵܐ ܝܑܼܕܲܥ̣ ܙܵܟܼܘܼܬܼܵܐ: ܘܠܵܐ ܤܵܛܵܢܵܐ ܡܬܼܘܿܡ ܐܸܬܼܢܲܤܝܼ ܗ̄ܘ̣ܵܐ ܒܚܘܼܝܵܒܹܗ ܕܡ̣ܢ ܟܝܵܢܲܢ: ܘܲܒܼܗܵܢܵܐ ܙܲܝܢܵܐ ܐܸܫܬܲܦܲܠ ܡܸܢܹܗ ܕܫܘܼܪܵܝܵܐ. ܘܗ̤ܘ ܗܘ̤ܵܐ ܒܘܼܟܼܪܵܐ ܕܙܵܟܼܘܼܬܼܵܐ: ܠܲܡܤܵܡ ܟܠܝܼܠܵܐ ܩܲܕܼܡܵܝܵܐ ܒܪܹܫܹܗ ܕܲܟܼܝܵܢܲܢ. ܡܵܐ ܕܡܸܬܼܚܙܸܐ ܗܵܢܵܐ ܙܲܝܢܵܐ ܥܲܠ ܐ̄ܢܵܫ: ܒܲܪ ܫܵܥܬܹܗ ܤܘܼܪܵܕܼܵܐ ܢܵܦܹ̇ܠ ܒܚܘܼܫܵܒܼܵܘ̈ܗܝ ܕܗܵܘ̇ ܪܹܫ ܡܸܪܕܵܐ ܤܵܛܵܢܵܐ. ܘܡܸܚܕܼܵܐ ܒܬܲܪܥܝܼܬܹܗ: ܠܗܵܘ̇ ܚܘܼܝܵܒܹܗ ܕܲܒܼܡܲܕܼܒܿܪܵܐ: ܘܬܼܘܼܪܥܬܐ ܩܲܕܼܡܵܝܬܐ ܕܒܹܗ ܫܲܪܝܲܬ̤: ܡܸܬܬܙܝܼܥ ܒܥܘܼܗܕܵܢܵܐ. ܘܚܲܝܠܹܗ: ܡܸܬܿܬܿܒܲܪ ܒܲܚܙܵܬܹܗ ܕܙܲܝܢܵܐ ܕܐܵܘܸܕܼ ܒܐܝܼ̈ܕܲܝܢ ܪܲܒܿ ܚܲܝܠܲܢ. ܡܸܚܕܼܵܐ ܕܚܵܙܹ̇ܐ ܗܵܢܵܐ ܙܲܝܢܵܐ ܥܲܠ ܐ̄ܢܵܫ: ܒܲܪ ܫܵܥܬܹܗ ܡܸܫܬܵܘܕܲܥ ܕܠܵܐ ܓܼܘܿܢܵܐ ܡܥܲܬܲܕܼ. ܐܲܝܢܵܘ ܙܲܝܢܵܐ ܕܚܲܤܝܼܢ ܡܸܢܹܗ ܘܝܵܗܹ̇ܒܼ ܠܘܼܒܵܒܼܵܐ ܠܠܸܒܵܐ ܒܕܲܪܐ ܕܥܲܡ ܪ̈ܘܼܚܹܐ ܒܝܼ̈ܫܵܬܼܵܐ: ܐܲܝܟܼ pb. 241 ܟܲܦܢܵܐ ܕܡܸܛܠ ܡܫܝܼܚܵܐ؟ ܟܡܵܐ ܓܹܝܪ ܕܲܡܛܲܪܲܦ ܐ̄ܢܵܫ ܘܡܫܲܦܲܠ ܒܦܲܓܼܪܹܗ: ܒܙܲܒܼܢܵܐ ܕܲܚܕܼܝܼܪܵܐ ܠܹܗ ܦܠܲܓܼܵܐ ܕܤܵܛܵܢܵܐ: ܗܵܟܲܢܵܐ ܤܡܝܼܟܼ ܠܸܒܹܗ ܒܬܼܘܼܟܼܠܵܢܵܐ. ܐܲܝܢܵܐ ܕܲܠܗܵܢܵܐ ܐܲܡܝܼܢ ܠܒܼܝܼܫ: ܒܲܛܢܵܢܵܐ ܐܲܝܟܼ ܕܲܒܼܢܘܼܪܵܐ ܫܓܼܝܼܪ ܒܟܼܠܙܒܲܢ. ܨܵܘܡܵܐ ܐܲܡܝܼܢܵܐ: ܐܵܬ̤ܿܐ ܗ̣̄ܝ ܕܛܲܢܵܢܘܼܬܼܵܐ: ܘܚܲܡܝܼܡܘܼܬܼܵܐ ܕܒܲܩܪܵܒܼܵܐ ܡܒܲܕܸܩ. ܐܵܦ ܗܵܘ̇ ܛܲܢܵܢܵܐ ܐܹܠܝܵܐ: ܟܲܕܼ ܚܠܵܦ ܢܵܡܘܿܤܵܐ ܐܲܠܵܗܝܵܐ ܐܸܬܿܛܲܢܲܢ: ܗܵܢܵܐ ܥܲܡܠܵܐ ܩܲܒܸܿܠ̣ ܥܠܵܘܗܝ. ܐܲܪܒܿܥܝܼܢ ܝܵܘܡ̈ܝܼܢ ܚܲܡܤܸܢ ܦܘܼܡܹܗ ܡ̣ܢ ܤܲܝܒܵܪܬܵܐ: ܒܲܗܠܲܟܼܬܐ ܢܲܓܿܝܼܪܬܵܐ ܕܲܒܼܡܲܕܼܒܿܪܵܐ. ܡܥܲܗܕܼܵܢܵܐ ܗ̄ܘ̣ ܓܹܝܪ ܕܦܘܼ̈ܩܕܵܢܹܐ ܕܪܘܼܚܵܐ ܒܡ̇ܢ ܕܲܩܢܸܐ ܠܹܗ. ܡܸܛܠ ܕܗ̤ܘ ܡܸܨܥܵܝܵܐ ܒܢܵܡܘܿܤܵܐ ܥܲܬܝܼܩܵܐ: ܘܲܒܼܛܲܝܒܿܘܼܬܼܵܐ ܗܵܕܹܐ ܕܲܒܼܡܵܪܲܢ ܝܼܫܘܿܥ ܩܲܒܸܠܢܲܢ. ܘܡܵܢܵܐ ܡܲܤܓܸܢܵܐ ܥܲܠ ܫܒܼܝܼ̈ܚܵܬܹܗ ܝܲܬܝܼܪܵܐ: ܕܲܠܟܼܠܢܵܫ ܝܑܼܕܼܝܼ̈ܥܵܢ؟ ܐܲܝܢܵܐ ܕܲܒܼܗܵܢܵܐ ܒܵܤܹ̇ܐ: ܐܵܦ ܠܘܵܬܼ ܫܲܪܟܵܐ ܕܢܸܨ̈ܚܵܢܹܐ ܪܲܦܝܵܐ ܐܝܼܬܼܵܘܗܝ ܘܫܲܦܠܵܐ. ܡܸܛܠ ܕܠܵܐ ܐܝܼܬܼ ܥܠܵܘܗܝ ܙܲܝܢܵܐ: ܕܒܹܗ ܙܟܼܵܘ ܐܲܬܼܠܹܝ̈ܛܹܐ ܐܲܠܵܗܵܝܹ̈ܐ. ܘܲܕܡܸܢܹܗ ܕܫܘܼܪܵܝܵܐ ܐܵܬ̤ܵܐ ܓܪܲܦܝܘܼܬܼܵܐ ܡܚܵܘܸܐ ܒܢܲܦܫܹܗ: ܘܗ̤ܘ ܝܵܗܹ̇ܒܼ ܦܸܠܥܵܐ ܕܬܼܵܚܘܿܒܼܘܹܗ ܠܲܒܼܥܸܠ ܬܲܟܼܘܼܫܹܗ: ܘܲܡܫܲܠܚܵܐܝܼܬܼ ܥܵܐܹ̇ܠ ܠܐܵܓܼܘܿܢܵܐ. ܘܝܼܕܼܝܼܥܵܐ ܗ̣̄ܝ ܕܲܕܼܠܵܐ ܙܵܟܼܘܼܬܼܵܐ ܡܸܢܹܗ ܢܵܦܹ̇ܩ: ܡܸܛܠ ܕܲܫ̣ܕܼܵܐ ܡܸܢܹܗ ܠܚܲܝܠܵܐ ܗܵܘ̇ ܕܲܡܙܝܼܥ ܒܹܗ ܛܢܵܢܵܐ ܐܲܠܵܗܝܵܐ: ܘܩܲܪܝܼܪܵܐܝܼܬܼ ܗ̄ܘ̣ ܥܵܐܹ̇ܠ ܠܬܲܟܼܬܘܼܫܵܐ ܘܠܵܐ ܗ̄ܘ̣ܵܐ ܚܲܡܝܼܡܵܐܝܼܬܼ. ܠܵܐ ܓܹܝܪ ܠܒܼܝܼܫܝܼܢ ܗܲܕܵܡܵܘ̈ܗܝ ܫܲܠܗܹܒܼܝܼܬܼܵܐ ܕܟܲܦܢܵܐ: ܗܵܢܵܘ ܕܹܝܢ ܕܨܵܘܡܵܐ: ܗܵܘ̇ ܕܠܵܐ ܡܸܬܿܬܿܙܝܼܥܵܢܵܐ ܡܩܵܘܸܐ ܒܹܗ ܪܸܥܝܵܢܵܐ: ܒܦܸܓܼ̈ܥܹܐ ܕܟܼܠܗܹܝܢ ܥܲܤ̈ܩܵܬܼܵܐ ܘܲܓܼܢܝܼ̈ܚܵܬܼܵܐ܀ ܡܸܬܼܐܲܡܪܵܐ ܓܹܝܪ ܐܵܦ ܥܲܠ ܤܲܓܝܼ̈ܐܹܐ ܡ̣ܢ ܤܵܗ̈ܕܹܐ ܩܲܕܝܼ̈ܫܹܐ: pb. 242 ܕܲܒܼܝܵܘܡܵܐ ܗܵܘ̇ ܕܲܥܬܼܝܼܕܼܝܼܢ ܗ̄ܘ̣ܵܘ ܕܲܢܩܲܒܿܠܘܼܢ ܟܠܝܼܠܵܐ: ܐܸܢ ܓܕܲܫ̣ ܘܲܡܩܲܕܿܡܝܼܢ ܝܵܠ̇ܦܝܼܢ ܗ̄ܘ̣ܵܘ ܥܲܠ ܗܵܕܹܐ ܡ̣ܢ ܓܸܠܝܵܢܵܐ ܕܪܘܼܚܵܐ: ܐܵܘ ܡ̣ܢ ܐ̄ܢܵܫ ܡ̣ܢ ܪ̈ܵܚܡܲܝܗܘܿܢ: ܒܠܸܠܝܵܐ ܗܵܘ̇ ܡܸܕܸܡ ܠܵܐ ܛܵܥܡ̇ܝܼܢ ܗ̄ܘ̣ܵܘ: ܘܠܵܐ ܢܵܤ̇ܒܿܝܼܢ ܗ̄ܘ̣ܵܘ ܤܲܝܒܵܪܬܵܐ. ܐܸܠܵܐ ܡ̣ܢ ܪܲܡܫܵܐ ܘܲܥܕܲܡܵܐ ܠܨܲܦܪܵܐ ܩܵܝ̇ܡܝܼܢ ܗ̄ܘ̣ܵܘ ܟܲܕܼ ܥܝܼܪܝܼܢ ܒܲܨܠܘܿܬܼܵܐ: ܘܲܡܫܲܒܿܚܝܼܢ ܠܐܲܠܵܗܵܐ ܒܲܙܡܝܼܪ̈ܵܬܼܵܐ ܘܲܒܼܬܸܫ̈ܒܿܚܵܬܐ ܘܲܒܼܡܲܕܼܪ̈ܵܫܹܐ ܘܲܒܼܩܝܼ̈ܢܵܬܼܵܐ ܕܪܘܼܚܵܐ. ܟܲܕܼ ܚܵܕܼܝܼܢ ܘܪܵܘܙܝܼܢ ܘܲܡܤܲܟܹܝܢ ܠܹܗ ܠܥܸܕܵܢܵܐ: ܐܲܝܟܼ ܐ̄ܢܵܫܵܐ ܕܲܠܒܹܝܬܼ ܚܠܘܿܠܵܐ ܡܙܲܡܝܼܢ ܠܡܸܥܲܠ. ܘܲܡܤܲܟܹܝܢ ܕܟܲܕܼ ܨܲܝܡܵܝܼܢ ܢܸܦܓܥܘܼܢ ܒܤܲܝܦܵܐ: ܘܲܢܩܲܒܿܠܘܼܢ ܠܟܼܠܝܼܠܵܐ ܕܡܵܘܕܝܵܢܘܼܬܼܵܐ܀ ܘܐܵܦ ܚܢܲܢ ܒܗܵܢܵܐ ܛܘܼܝܵܒܼܵܐ ܢܩܝܼܡ ܐܲܡܝܼܢܵܐܝܼܬܼ ܐܲܚܲܝ̈: ܕܠܤܵܗܕܘܼܬܼܵܐ ܕܠܵܐ ܡܸܬܼܚܲܙܝܵܐ ܡܙܲܡܢܝܼܢܲܢ: ܕܲܢܩܲܒܸܠ ܟܠܝܼܠܵܐ ܕܩܲܕܝܼܫܘܼܬܼܵܐ: ܕܕܲܠܡܵܐ ܒܚܲܕܼ ܡ̣ܢ ܗܲܕܵܡܲܝ̈ܢ ܡܸܬܼܝܲܗܒܵܐ ܠܲܒܼܥܸܠܕܒܼܵܒܲܝ̈ܢ ܐܵܬܸܵܐ ܕܲܟܼܦܙܼܪܝܵܐ. ܐܸܠܵܐ ܟܲܕܼ ܠܒܼܝܼܫܝܼܢܲܢ ܥܲܠ ܪܸ̈ܓܼܫܲܝܢ ܡ̣ܢ ܠܒܲܪ ܘܥܲܠ ܙܵܘ̈ܥܲܝܢ ܡ̣ܢ ܠܓܼܵܘ ܟ̱ܠܹܗ ܙܲܝܢܵܐ ܕܐܲܠܵܗܵܐ: ܢܩܲܒܸܠ ܠܲܟܼܠܝܼܠܵܐ ܗܵܢܵܐ ܟܲܫܝܼܪܵܐܝܼܬܼ: ܘܢܸܥܘܿܠ ܠܬܸܫܒܿܘܿܚܬܹܗ ܥܲܡ ܤܵܗ̈ܕܹܐ ܩܲܕܝܼ̈ܫܹܐ: ܘܲܢܩܝܼܡ ܐܸܢܘܿܢ ܠܲܒܼܥܸܠ̈ܕܒܼܵܒܲܝܢ ܒܬܸܡܗܵܐ. ܕܠܵܐ ܥܲܡܠܵܐ ܓܹܝܪ ܠܲܝܬܿ ܕܲܡܩܲܒܸܠ ܟܠܝܼܠܵܐ: ܐܲܝܟܼ ܕܐܸܡ݂ܲܪ ܡܲܠܦܵܢܵܐ ܪܲܒܵܐ ܕܝܼܵܕܘܿܪܘܿܣ. ܡܸܬܼܝܼܕܲܥ ܠܲܡ ܕܲܫܟܼܝܼܪܵܐ ܤܲܓܝܼ: ܐܸܢܗ̤ܘ ܕܬܲܓܼܵܪܹ̈ܐ ܕܠܵܐ ܥܲܡܠܵܐ ܘܡܲܚܫܘܼܠܵܐ ܕܩܹܘܲܢܕܹܝܢܘܿܣ ܠܵܐ ܡܫܵܘܙܒܼܝܼܢ ܥܘܼܬܼܪܵܐ: ܙܲܕܝܼܪܵܐ: ܙܲܕܝܼܩܵܐ ܕܹܝܢ ܕܠܵܐ ܫܚܵܩܵܐ ܘܲܕܼܠܵܐ ܥܲܡܠܵܐ ܕܥܲܠ ܐܲܦܲܝ̈ ܙܲܕܝܼܩܘܼܬܼܵܐ: ܡܤܲܟܸܐ ܠܦܘܼܪܥܵܢܘܼܬܼܵܐ ܕܲܟܼܠܝܼܠܵܐ. pb. 243 ܝܠܵܘܿܦܵܐ. ܗܵܐ ܤܲܓܝܼ̈ܐܹܐ ܐܸܢܘܿܢ ܕܐܝܼܬܼ ܠܗܘܿܢ ܗܵܠܹܝܢ ܥܲܡ̈ܠܹܐ: ܘܒܲܒܼܗܝܼܠܘܼܬܼܵܐ ܕܡ̣ܢ ܚܲܫܹ̈ܐ ܘܲܒܼܫܲܝܢܵܐ ܕܡ̣ܢ ܚܘܼ̈ܫܵܒܹܐ: ܠܵܐ ܡܲܪܓܫܝܼܢ. ܡܲܠܦܵܢܵܐ. ܚܲܫܹ̈ܐ ܟܤܲܝ̈ܵܐ ܕܲܒܼܢܲܦܫܵܐ ܐܚܵܝ: ܠܵܐ ܗ̄ܘ̣ܵܐ ܒܥܲܡ̈ܠܹܐ ܝܑܼܚܝܼ̈ܕܼܵܐ ܕܲܒܼܦܲܓܼܪܵܐ ܒܲܠܚܘܿܕܼ ܡܸܫܬܲܝܢܝܼܢ: ܐܵܦܠܸܐ ܠܚܘܼ̈ܫܵܒܹܐ ܟܵܠܹܝܢ ܕܡ̣ܢ ܪܸ̈ܓܼܫܹܐ ܐܲܡܝܼܢ ܡܸܬܿܬܿܥܝܼܪܝܼܢ. ܗܵܠܹܝܢ ܥܲܡ̈ܠܹܐ ܢܵܛ̇ܪܝܼܢ ܠܹܗ ܠܐ̄ܢܵܫ: ܡ̣ܢ ܪ̈ܓܼܝܼܓܼܵܬܼܵܐ: ܕܠܵܐ ܢܸܙܕܟܸܐ ܡܸܢܗܹܝܢ. ܘܡ̣ܢ ܫܹܐܕܹ̈ܐ: ܕܠܵܐ ܢܲܟܿܘܿܢܲܝܗܝ ܒܡܸܕܸܡ. ܠܵܐ ܗ̄ܘ̣ܵܐ ܐܵܦ ܫܲܝܢܵܐ ܘܲܒܼܗܝܼܠܘܼܬܼܵܐ ܝܵܗ̇ܒܿܝܼܢ ܒܢܲܦܫܵܐ. ܥܲܡ̈ܠܹܐ ܕܹܝܢ ܗܵܝܕܹܝܢ ܝܵܗ̇ܒܿܝܼܢ ܠܵܐ ܚܵܫܘܿܫܘܼܬܼܵܐ: ܘܲܡܡܝܼܬܼܝܼܢ ܠܗܲܕܵܡܹ̈ܐ ܕܒܲܐܪܥܵܐ: ܘܝܵܗ̇ܒܿܝܼܢ ܢܵܘܚܵܐ ܕܚܘܼ̈ܫܵܒܹܐ: ܐܸܡܲܬܼܝ ܕܲܠܫܸܠܝܵܐ ܡܸܫܬܵܘܬܿܦܝܼܢ: ܡܵܐ ܕܐܵܦ ܗܸܢܘܿܢ ܪܸ̈ܓܼܫܹܐ ܒܲܪ̈ܝܹܐ ܡܸܬܿܬܿܢܝܼܚܝܼܢ ܡ̣ܢ ܫܓܼܝܼܫܘܼܬܼܵܐ: ܘܡܸܬܼܐܲܡܝܼܢ ܠܦܘܼܠܚܵܢܵܐ ܕܚܸܟܼܡܬܼܵܐ ܙܲܒܼܢܵܐ. ܥܕܲܡܵܐ ܟܹܝܬܼ ܕܡܸܬܼܚܤܸܟܼ ܒܲܪܢܵܫܵܐ ܡ̣ܢ ܦܸܓܼܥܹ̈ܐ ܕܐ̄ܢܵܫܘܼܬܼܵܐ: ܘܗܲܕܵܡܵܘ̈ܗܝ ܡ̣ܢ ܠܲܫܝܼܕܼܘܼܬܼܵܐ ܕܲܒܼܤܲܓܝܼ̈ܐܵܬܼܵܐ: ܘܟܼܵܢܹ̇ܫ ܠܘܵܬܼ ܢܲܦܫܹܗ: ܐܵܦܠܵܐ ܠܚܲܫܵܘ̈ܗܝ ܡܸܬܫܵܘܕܲܥ. ܫܸܠܝܵܐ ܓܹܝܪ: ܐܲܝܟܼ ܕܐܸܡ݂ܲܪ ܠܲܡܦܹܝܕܼܵܐ ܢܲܗܝܼܪܵܐ ܕܟܼܠܵܗ̇ ܬܹܒܹܝܠ ܛܘܼܒܼܵܢܵܐ ܒܵܤܝܼܠܸܣ: ܫܘܼܪܵܝܵܐ ܗ̄ܘ̣ ܕܬܲܕܼܟܿܝܼܬܼܵܗ̇ ܕܢܲܦܫܵܐ. ܡܵܐ ܓܹܝܪ ܕܗܲܕܵܡܹ̈ܐ ܒܲܪ̈ܵܝܹܐ ܫܠܝܼܘ ܡ̣ܢ ܪܵܘܒܵܐ ܕܲܠܒܲܪ: ܗܵܝܕܹܝܢ ܦܵܢܹ̇ܐ ܡܲܕܥܵܐ ܡ̣ܢ ܦܸܗܝܵܐ ܠܓܼܵܘ ܐܲܬܼܪܹܗ: ܘܡܸܬܿܬܿܥܝܼܪ ܠܸܒܵܐ ܠܡܸܒܼܨܵܐ ܠܙܵܘ̈ܥܹܐ ܓܵܘܵܝܹ̈ܐ ܕܢܲܦܫܵܐ. ܘܐܸܢ ܡܚܲܡܤܸܢ ܫܲܦܝܼܪ ܗܵܪܟܵܐ: ܐܵܬܹ̇ܐ ܒܡܲܪܝܼܬܹܗ ܥܕܲܡܵܐ ܠܕܲܟܼܝܘܼܬܼܵܐ ܕܢܲܦܫܵܐ. ܝܵܠܘܿܦܵܐ. ܘܠܵܐ ܡܨܲܝܵܐ ܟܲܝ ܒܗܘܼܦܵܟܼܵܐ ܕܲܠܒܲܪ: ܐܸܢ ܬܥܲܙܸܐ: ܡܸܬܿܕܲܟܿܝܵܐ ܢܲܦܫܵܐ؟ ܡܲܠܦܵܢܵܐ. ܐܝܼܠܵܢܵܐ ܕܟܼܠܝܘܿܡ ܫܵܬܹ̇ܐ: ܐܸܡܲܬܼܝ pb. 244 ܝܵܒܹ̇ܫ ܥܸܩܵܪܹܗ؟ ܘܡܵܐܢܵܐ ܕܟܼܠܝܘܿܡ ܬܵܘܤܲܦܬܐ ܫܵܩܹ̇ܠ: ܐܸܡܲܬܼܝ ܚܵܤܲܪ؟ ܐܸܢ ܕܲܟܼܝܘܼܬܼܵܐ ܘܠܵܐ ܡܸܕܸܡ ܐ̄ܚܪܹܝܢ ܐܝܼܬܹܝܗ̇: ܐܸܠܵܐ ܠܡܸܛܥܵܐ ܗܘܼ̈ܦܵܟܹܐ ܕܠܵܐ ܚܹܐܪܘܼܬܼܵܐ ܘܲܠܡܸܫܬܲܝܵܢܘܼ ܡ̣ܢ ܥܘܼܗܕܵܢܗܘܿܢ: ܘܗ̤ܘ ܗܵܢܵܐ ܟܠܝܘܿܡ ܒܲܩܢܘܿܡܹܗ ܤܘܼܥܪܵܢܵܐܝܼܬܼ ܐܵܘ ܒܲܐ̄ܚܪ̈ܵܢܹܐ: ܒܝܲܕܼ ܪܸ̈ܓܼܫܹܐ ܡܚܲܕܸܬܼ ܠܹܗ ܠܥܘܼܗܕܵܢܗܘܿܢ ܒܢܲܦܫܹܗ: ܗܵܢܵܘ ܕܹܝܢ ܠܝܼܕܲܥܬܼܗܹܝܢ ܕܒܼܝܼ̈ܫܵܬܼܵܐ: ܐܸܡܲܬܼܝ ܢܸܬܿܕܲܟܸܐ ܡܸܢܗܘܿܢ؟ ܐܵܘ ܐܸܡܲܬܼܝ ܢܸܤܬܲܦܲܩ ܡ̣ܢ ܬܲܟܼܬܘܼܫܵܐ ܕܗܵܠܹܝܢ ܕܲܠܒܲ: ܕܲܠܗܵܠܹܝܢ ܕܲܠܓܼܵܘ ܢܸܚܙܸܐ ܘܲܢܫܲܝܸܢ ܡܸܫܟܲܚ؟ ܟܲܕܼ ܟܠܝܘܿܡ ܡܸܨܛܲܐܸܐ ܠܸܒܵܐ: ܐܸܡܲܬܼܝ ܡ̣ܢ ܨܵܐܘܼܬܹܗ ܡܸܬܿܕܲܟܸܐ؟ ܕܲܠܡܵܐ ܘܐܵܦܠܵܐ ܠܘܼܩܒܲܠ ܗܵܝ̇ ܕܤܘܼܥܪܵܢܵܐ ܡܸܫܟܲܚ ܠܲܡܩܵܡ: ܐܲܪܦܵܐ ܕܲܠܥܸܩܵܪܵܐ ܢܕܲܟܸܐ. ܒܲܡܨܲܥܬܼܵܗ̇ ܓܹܝܪ ܕܡܲܫܪܝܼܬܼܵܐ ܩܵܐܹ̇ܡ: ܘܟܼܠܝܘܿܡ ܤܲܒܼܪ̈ܵܬܼܵܐ ܕܲܩܪ̈ܵܒܹܐ ܬܼܵܟܼ̈ܒܵܢ ܠܐܸܕܼܢܵܘ̈ܗܝ: ܐܲܝܟܲܢ ܡܲܡܪܲܚ ܡܲܟܼܪܸܙ ܫܲܝܢܵܐ ܠܢܲܦܫܹܗ؟ ܐܸܢ ܕܹܝܢ ܡ̣ܢ ܗܵܠܹܝܢ ܢܸܬܼܪܲܚܲܩ: ܗܵܝܕܹܝܢ ܡܸܫܟܲܚ ܕܒܼܐܝܼܕܼܵܐ ܒܐܝܼܕܼܵܐ ܢܫܲܠܸܐ ܠܗܵܠܹܝܢ ܕܲܠܓܼܵܘ. ܥܕܲܡܵܐ ܕܢܲܗܪܵܐ ܡ̣ܢ ܠܥܸܠ ܠܵܐ ܡܸܤܬܿܟܲܪ: ܡ̣ܢ ܠܬܲܚܬܿ ܠܵܐ ܝܵܒܼܫ̇ܝܼܢ ܡܵܘ̈ܗܝ. ܡܵܐ ܕܹܝܢ ܕܐܸܬ̣ܼܵܐ ܐ̄ܢܵܫ ܠܫܸܠܝܵܐ: ܗܵܝܕܹܝܢ ܡܲܨܝܵܐ ܢܲܦܫܵܐ ܦܵܪܫܵܐ ܠܗܘܿܢ ܠܚܲܫܹ̈ܐ: ܘܒܼܵܨ̇ܝܵܐ ܚܸܟܼܡܬܐ ܕܒܼܵܗ̇. ܗܵܝܕܹܝܢ ܒܲܪܢܫܵܢܵܐ ܓܵܘܝܵܐ: ܡܸܬܿܬܿܥܝܼܪ ܠܦܘܼܠܚܵܢܵܐ ܕܪܘܼܚ. ܘܝܘܿܡ ܡ̣ܢ ܝܘܿܡ: ܡܲܪܓܸܫ ܒܚܸܟܼܡܬܐ ܟܤܝܼܬܐ ܕܢܵܒܼ̇ܗܵܐ ܒܢܲܦܫܹܗ. ܝܵܠܘܿܦܵܐ. ܐܲܝܠܹܝܢ ܐܸܢܘܿܢ ܫܘܼ̈ܕܵܥܹܐ ܚܲܬܝܼ̈ܬܹܐ ܘܐܵܬܼ̈ܘܵܬܼܵܐ ܩܲܪ̈ܝܼܒܼܵܬܐ: ܡܵܐ ܕܫܲܪܝܼܘ ܡܸܬܼܚܙܹܝܢ ܡ̣ܢ ܓܵܘ ܥܲܡܠܹܗ ܕܒܲܪܢܵܫܵܐ ܦܹܐܪܹ̈ܐ ܟܤܲܝ̈ܵܐ ܕܲܒܼܢܲܦܫܵܐ؟ ܡܲܠܦܵܢܵܐ. ܡܵܐ ܕܡܸܫܬܿܘܸܐ ܠܡܵܘܗܲܒܼܬܵܐ ܕܕܸܡ̈ܥܹܐ: ܗܵܝ̇ ܕܲܡܫܲܪܬܿܚܵܐܝܼܬܼ ܘܲܕܼܠܵܐ ܥܸܨܝܵܢ. ܐܲܝܟܼ ܬܚܘܼܡܵܐ ܡܸܕܸܡ ܤܝܼ̈ܡܵܢ pb. 245 ܕܸܡ̈ܥܹܐ ܠܪܸܥܝܵܢܵܐ: ܒܹܝܬܼ ܦܲܓܼܪܵܢܘܼܬܼܵܐ ܠܪܘܼܚܵܢܘܼܬܼܵܐ: ܘܒܹܝܬܼ ܚܵܫܘܿܫܘܼܬܼܵܐ ܠܕܲܟܼܝܘܼܬܼܵܐ. ܥܕܲܡܵܐ ܓܹܝܪ ܕܲܠܗܵܕܹܐ ܡܵܘܗܲܒܼܬܼܵܐ ܡܩܲܒܸܿܠ: ܥܕܲܟܹܝܠ ܒܒܲܪܢܵܫܵܐ ܒܲܪܵܝܵܐ ܐܝܼܬܼܵܘܗܝ ܥܲܡܠܵܐ ܕܦܘܼܠܚܵܢܹܗ. ܘܟܼܠ ܟ̱ܠܹܗ: ܐܵܦܠܵܐ ܩܲܠܝܼܠ ܐܲܪܓܸܫ̣ ܒܦܘܼܠܚܵܢܵܐ ܟܲܤܝܵܐ ܕܗܵܘ̇ ܒܲܪܢܵܫܵܐ ܕܪܘܼܚ. ܡܵܐ ܕܹܝܢ ܕܫܲܪܝܼ ܫܵܒܹ̇ܩ ܦܲܓܼܪܵܢܘܼܬܹܗ ܕܥܵܠܡܵܐ ܗܵܢܵܐ: ܘܦܵܤܲܥ̇ ܒܗܵܘ̇ ܬܘܼܚܡܵܐ ܕܲܠܓܼܵܘ ܡ̣ܢ ܗܵܢܵܐ ܟܝܵܢܵܐ ܕܡܸܬܼܚܙܸܐ: ܡܸܚܕܼܵܐ ܠܗܵܕܹܐ ܛܲܝܒܿܘܼܬܼܵܐ ܕܕܸܡ̈ܥܹܐ ܡܵܛܹ̇ܐ. ܘܡܸܢܹܗ ܕܐܵܘܵܢܵܐ ܩܲܕܼܡܵܝܵܐ ܕܗܵܘ̇ ܕܘܼܒܵܪܵܐ ܟܲܣܝܵܐ ܡܫܲܪ̈ܝܵܢ ܗܵܠܹܝܢ ܕܸܡ̈ܥܹܐ: ܘܲܡܝܲܒ̈ܠܵܐ ܠܹܗ ܥܕܲܡܵܐ ܠܚܘܼܒܵܐ ܓܡܝܼܪܵܐ ܕܐܲܠܵܗܵܐ. ܘܡܵܐ ܕܲܠܬܲܡܵܢ ܡܸܫܬܵܘܫܲܛ: ܗܵܟܲܢܵܐ ܥܵܬܲܪ ܒܗܵܠܹܝܢ: ܥܕܲܡܵܐ ܕܥܲܡ ܤܲܝܒܵܪܬܹܗ ܘܫܸܩܝܹܗ ܫܵܬܹ̇ܐ ܠܗܹܝܢ: ܡ̣ܢ ܐܲܡܝܼܢܘܼܬܼܗܹܝܢ ܘܤܲܓܝܼܐܘܼܗܹܝܢ. ܘܗܵܢܵܘ ܫܘܼܘܕܵܥܵܐ ܚܲܬܝܼܬܼܵܐ ܕܡܲܦܲܩܬܹܗ ܕܪܸܥܝܵܢܵܐ ܡ̣ܢ ܗܵܢܵܐ ܥܵܠܡܵܐ: ܘܡܲܪܓܫܵܢܘܼܬܹܗ ܕܒܼܗܵܘ̇ ܥܲܠܡܵܐ ܕܪܘܼܚ. ܘܲܟܼܡܵܐ ܕܲܠܗܵܢܵܐ ܥܵܠܡܵܐ ܒܪܸܥܝܵܢܹܗ ܡܸܬܼܩܲܪܲܒܼ: ܗܵܟܲܢܵܐ ܒܵܨܲܪ ܡ̣ܢ ܗܵܠܹܝܢ ܕܸܡ̈ܥܹܐ. ܘܡܵܐ ܕܓܼܡܝܼܪܵܐܝܼܬܼ ܐܝܼܬܼܵܘܗܝ ܒܗܵܠܹܝܢ ܕܲܬܼܢܵܢ ܪܸܥܝܵܢܹܗ: ܓܡܝܼܪܵܐܝܼܬܼ ܘܐܵܦ ܡ̣ܢ ܕܸܡ̈ܥܹܐ ܟܠܸܐ. ܘܗܵܕܲܐ ܗ̣̄ܝ ܐܵܬ̤ܵܐ ܕܲܛܡܝܼܪܘܼܬܹܗ ܕܲܒܼܚܲܫܹ̈ܐ. ܡܸܢܗܹܝܢ ܕܕܸܡ̈ܥܹܐ: ܡܵܘ̈ܩܕܼܵܢܝܬܼܵܐ ܐܸܢܹܝܢ. ܘܡܸܢܗܹܝܢ: ܡܕܲܗ̈ܢܵܢܬܼܵܐ. ܟܠ ܕܸܡ̈ܥܹܐ ܕܹܝܢ: ܕܡ̣ܢ ܬܵܘܬܼܵܐ ܘܡ̣ܢ ܐܲܢܘܼܤܝܵܐ ܕܠܸܒܵܐ ܕܡܸܛܠ ܚܛܵܗܹ̈ܐ ܢܵܚ̈ܬܵܢ: ܡܝܲܒ̈ܫܵܢ ܠܹܗ ܠܦܲܓܼܪܵܐ ܘܡܵܘ̈ܩܕܼܵܢ ܠܹܗ. ܘܙܲܒܼ̈ܢܝܼܢ ܤܲܓܝܼ̈ܐܵܢ: ܐܵܦ ܒܢܸܟܼܝܵܢܹܗ ܕܡܘܼܚܵܐ ܡܲܪܓܸܫ ܒܡܲܪܕܝܼܬܼܗܹܝܢ. ܘܩܲܕܼܡܵܝܑܬܼ ܒܗܵܢܵܐ ܛܲܟܼܤܵܐ ܕܕܸܡ̈ܥܹܐ ܦܵܓܲܥ ܒܲܢܵܫܵܐ ܐܵܠܨܵܐܝܼܬܼ. ܘܲܒܼܗܹܝܢ ܡܸܬܼܦܬܲܚ pb. 246 ܠܹܗ ܬܲܪܥܵܐ ܠܘܵܬܼ ܗܵܘ̇ ܛܲܟܼܤܵܐ ܕܲܬܼܪܹܝܢ: ܕܲܡܝܲܬܲܪ ܤܲܓܝܼ ܡ̣ܢ ܗܵܢܵܐ: ܕܐܝܼܬܼܵܘܗܝ ܐܵܬ̤ܵܐ ܕܩܘܼܒܵܠܵܐ ܕܪ̈ܲܚܡܹܐ. ܐܲܝܢܵܐ ܗܵܢܵܐ؟ ܗܵܠܹܝܢ ܕܡ̣ܢ ܤܘܼܟܵܠܵܐ ܫܵܦ̈ܥܵܢ: ܡܕܲܗ̈ܢܵܢ ܠܹܗ ܠܦܲܓܼܪܵܐ: ܘܡ̣ܢ ܢܲܦܫܗܹܝܢ ܪ̈ܵܕܼܝܵܢ: ܘܥܸܨܝܵܢܵܐ ܠܲܝܬܿ ܒܗܹܝܢ. ܘܐܵܦ ܠܦܲܓܼܪܵܐ ܡܫܲܡ̈ܢܵܢ ܠܹܗ. ܘܚܸܙܘܵܐ ܕܦܲܪܨܘܿܦܵܐ: ܡܸܫܬܲܚܠܲܦ. ܠܸܒܵܐ ܠܲܡ ܚܲܕܵܝܵܐ ܡܲܫܦܲܪ ܓܘܼܫܡܵܐ. ܘܡܸܬܼܐܲܫ̈ܕܵܢ: ܥܲܠ ܟ̱ܠܹܗ ܦܲܪܨܘܿܦܵܐ ܒܫܸܠܝܵܐ ܕܬܲܪܥܝܼܬܼܵܐ. ܘܐܲܝܟܼ ܬܘܼܪܤܵܝܵܐ ܡܸܕܸܡ ܡܩܲܒܸܠ ܡܸܢܗܹܝܢ ܗ̤ܘ ܦܲܓܼܪܵܐ: ܘܲܦܨܝܼܚܘܼܬܼܵܐ ܡܸܬܼܪܲܫܡܵܐ ܥܲܠ ܦܲܪܨܘܿܦܵܐ. ܡܲܢ̣ܘ ܢܤܲܒܼ ܢܸܤܝܵܐ ܕܗܵܠܹܝܢ ܬܪܹܝܢ ܫܘܼܚ̈ܠܵܦܹܐ: ܢܸܤܬܲܟܲܠ. ܝܵܠܘܿܦܵܐ. ܡܵܢܲܐ ܗ̣̄ܝ ܩܝܵܡܬܵܗ̇ ܕܢܲܦܫܵܐ: ܐܸܢ ܩܵܡܬܿܘܿܢ ܠܲܡ ܥܲܡ ܡܫܝܼܚܵܐ؟ ܡܲܠܦܵܢܵܐ. ܗܵܝ̇ ܗ̣̄ܝ ܕܐܡܝܼܪܵܐ ܠܲܫܠܝܼܚܵܐ ܒܕܼܘܼܟܿܬܐ ܐ̄ܚܪܹܬܼܵܐ: ܕܐܲܠܵܗܵܐ ܗܵܘ̇ ܕܐܸܡ݂ܲܪ: ܕܡ̣ܢ ܚܸܫܘܿܟܼܵܐ ܢܘܼܗܪܵܐ ܢܸܕܼܢܲܚ: ܗ̤ܘ ܢܸܕܼܢܲܚ ܒܠܸܒܵܘ̈ܵܬܼܟܼܘܿܢ. ܩܝܵܡܬܐ: ܠܡܲܦܲܩܬܼܵܐ ܕܡ̣ܢ ܥܲܬܝܼܩܘܼܬܼܵܐ ܩܵܪܹܐ: ܗܵܝ̇ ܕܒܲܕܼܡܘܼܬܼܵܐ ܕܲܫܝܘܿܠ ܐܲܚܝܼܕܼܵܐ ܒܐܲܦܵܘ̈ܗܝ: ܕܠܵܐ ܢܸܕܼܢܲܚ ܠܹܗ ܢܘܼܗܪܹܗ ܕܐܹܘܲܢܓܲܝܼܘܿܢ ܒܐ̄ܪܵܙ: ܕܗ̤ܘܝܘܼ ܡܲܦܘܿܚܝܼܬܼܵܐ ܕܚܲܝܹ̈ܐ ܒܤܲܒܼܪܵܐ ܕܲܩܝܵܡܬܼܵܐ: ܗܵܝ̇ ܕܒܼܵܗ̇ ܗ̤ܘ ܕܸܢܚܵܐ ܕܚܸܟܼܡܬܐ ܐܲܠܵܗܝܬܵܐ ܕܵܢܲܚ ܒܠܸܒܵܐ. ܟܲܕܼ ܐܝܼܬܼܵܘܗܝ ܡܸܟܹܝܠ ܒܲܪܢܵܫܵܐ ܚܲܕܼܬܼܵܐ: ܕܠܲܝܬܿ ܒܹܗ ܡܸܕܸܡ ܡ̣ܢ ܕܲܬܼܢܵܢ. ܐܲܝܟܼ ܕܐܲܡܝܼܪ: ܕܐܸܬܸܠ ܠܗܘܿܢ ܠܸܒܵܐ ܚܲܕܼܬܼܵܐ: ܘܪܘܼܚܵܐ ܚܕܼܵܬܵܐ. ܘܗܵܝܕܹܝܢ ܫܲܪܝܼܪܵܐܝܼܬܼ ܡܸܬܿܬܿܨܝܼܪ ܒܗܘܿܢ ܡܫܝܼܚܵܐ: ܒܝܲܕܼ ܪܘܼܚܵܐ ܕܚܸܟܼܡܬܐ ܘܲܕܼܓܸܠܝܵܢܵܐ ܒܝܼܕܲܥܬܼܵܐ ܕܲܥܠܵܘܗܝ. ܝܵܠܘܿܦܵܐ. ܡܵܢܵܘ ܐܲܝܟܼ ܕܲܒܼܤܵܟܼܵܐ ܚܲܝܠܵܐ ܕܤܵܥܘܪܘܼܬܹܗ ܕܫܸܠܝܵܐ؟ ܡܲܠܦܵܢܵܐ. pb. 247 ܠܪܸ̈ܓܼܫܹܐ ܒܲܪ̈ܵܝܹܐ ܡܡܝܼܬܼ: ܘܲܠܙܵܘ̈ܥܹܐ ܓܵܘܵܝܹ̈ܐ ܡܢܲܚܸܡ. ܗܘܼܦܵܟܼܵܐ ܕܹܝܢ ܕܲܠܒܲܪ: ܕܲܠܩܘܼܒܼܠܵܐ ܕܗܵܕܹܐ ܤܵܥܲܪ. ܝܵܠܘܿܦܵܐ. ܐܲܝܕܵܐ ܗ̣̄ܝ ܥܸܠܬܼܵܐ ܕܚܸܙ̈ܘܵܢܹܐ ܘܲܕܼܓܸܝܵܢܹ̈ܐ ܕܡܸܫܬܲܡܫܝܼܢ ܠܘܵܬܼ ܐ̄ܢܵܫ̈ܝܼܢ؟ ܐ̄ܚܪ̈ܵܢܹܐ ܕܹܝܢ ܟܲܕܼ ܝܲܬܝܼܪ ܡܸܢܗܘܿܢ ܥܡܝܼܠܝܼܢ: ܠܵܐ ܡܸܫܬܲܡܫܝܼܢ ܠܘܵܬܼܗܘܿܢ ܕܐܲܝܟܼ ܗܵܠܹܝܢ. ܡܲܠܦܵܢܵܐ. ܥܸܠ̈ܠܵܬܐ ܕܹܝܢ ܠܓܸܠܝܵܢܹ̈ܐ ܘܲܠܚܸܙ̈ܘܵܢܹܐ ܤܲܓܿܝܼ̈ܐܵܬܼܵܐ ܐܸܢܹܝܢ: ܘܠܵܘ ܚܕܼܵܐ. ܘܥܸܠܬܼܵܐ ܩܲܕܼܡܵܝܬܐ ܕܓܸܠܝܵܢܹ̈ܐ ܘܲܕܼܚܸܙ̈ܘܵܢܹܐ: ܬܲܚܘܝܼܬܼܵܐ ܐܝܼܬܹܝܗ̇ ܕܲܡܪܲܚܡܵܢܘܼܬܹܗ ܕܐܲܠܵܗܵܐ: ܕܲܠܘܼܕܼܪܵܢܵܐ ܕܲܒܼܢܲܝ̈ܢܵܫܵܐ ܡܸܬܼܦܲܪܢܤܝܼܢ ܡ̣ܢ ܨܹܐܕܼܵܘܗܝ. ܘܐܝܼܬܼ: ܕܒܲܡܕܲܒܿܪܵܢܘܼܬܼܵܐ ܗܵܘܹ̇ܝܢ. ܗܵܕܹܐ: ܕܓܼܵܘܲܐ ܗ̣̄ܝ. ܕܫܲܪܟܵܐ ܕܹܝܢ: ܐܲܝܟܼ ܕܲܠܚܘܼܝܵܠܵܐ ܘܠܘܼܒܵܒܼܵܐ ܕܲܡܚܝܼ̈ܠܹܐ ܗܵܘܹ̇ܝܢ. ܘܐܲܝܟܼ ܕܲܠܒܼܘܼܝܵܐܵܐ: ܘܐܲܝܟܼ ܕܲܠܝܘܼܠܦܵܢܵܐ܀ ܕܲܡܕܲܒܿܪܵܢܘܼܬܼܵܐ: ܐܲܝܟܼ ܕܐܸܬܼܚܙܝܼܘ ܥܲܠ ܓܸܢ̄ܒܼ ܩܲܒܼܪܵܐ: ܘܐܲܝܟܼ ܐܲܝܠܹܝܢ ܕܲܒܼܙܲܒܼܢܵܐ ܕܤܘܼܠܵܩܵܐ ܐܸܬܼܚܙܝܼܘ ܠܲܫܠܝܼܚܹ̈ܐ ܟܲܕܼ ܡܥܵܩܝܼܢ ܐܲܟܲܚ̄ܕܼ ܘܬܲܡܝܝܼܗܝܼܢ ܘܲܪܡܹܝܢ ܒܦܘܼܫܵܟܼܵܐ: ܒܦܘܼܪܫܵܢܹܗ ܕܡܵܪܲܢ ܕܡܸܢܗܘܿܢ. ܘܒܲܪ ܫܵܥܬܹܗ ܐܸܬܼܚܙܝܼܘ ܠܘܵܬܼܗܘܿܢ ܬܪܹܝܢ ܡܲܠܲܐܟܹ̈ܐ: ܕܩܵܝ̇ܡܝܼܢ ܒܲܠܒܼܘܼܫܵܐ ܚܸܘܵܪܵܐ. ܘܐܲܝܟܼ ܗܵܝ̇ ܕܲܒܼܒܹܝܬܼ ܐܲܤܝܼܪܹ̈ܐ: ܘܲܒܼܕܼܘܼܟ ܕܘܼܟܼ: ܟܲܕܼ ܢܵܦ̇ܠܝܼܢ ܗ̄ܘ̣ܵܘ ܒܐܝܼܕܼܵܐ ܕܲܒܼܢܲܝ̈ܢܵܫܵܐ. ܠܘܵܬܼ ܦܲܪ̈ܨܘܿܦܹܐ ܕܹܝܢ ܝܑܼܚܝܼ̈ܕܵܝܹܐ: ܐܲܝܟܼ ܕܲܠܘܵܬܼ ܫܲܪܟܵܐ ܕܩܲܕܝܼ̈ܫܹܐ ܕܒܼܵܬܲܪܗܘܿܢ: ܐܵܦ ܥܕܲܡܵܐ ܠܝܵܘܡܵܢܵܐ. ܘܲܠܘܵܬܼ ܗܵܠܹܝܢ ܬܠܵܬܐ ܙܢܲܝ̈ܵܐ ܕܐ̄ܢܵܫܵܐ ܡܸܬܼܦܲܪܢܤܝܼܢ ܤܘܼܥܪ̈ܵܢܹܐ ܕܐܲܝܟܼ ܗܵܠܹܝܢ: ܐܲܝܟܼ ܕܲܒܼܤܘܿܓܼܵܐܐ. ܐܵܘ ܠܵܘܬܼ ܐܲܝܠܹܝܢ ܕܲܦܫܝܼܛܝܼܢ ܘܬܲܡܝܼܡܝܼܢ ܠܒܲܪ ܡ̣ܢ ܡܫܘܼܚܬܼܵܐ: ܐܵܘ ܠܘܵܬܼ ܐ̄ܢܵܫܵܐ ܩܲܕܝܼ̈ܫܹܐ ܘܲܓܼܡܝܼܪܹ̈ܐ: ܐܵܘ ܠܘܵܬܼ ܐܲܝܠܹܝܢ ܕܒܲܛܢܵܢܵܐ ܕܪܸܬܼܚܵܐ ܒܲܦܤܵܩ ܤܲܒܼܪܵܐ ܢܵܦܩ̇ܝܼܢ ܡ̣ܢ ܓܵܘ ܥܵܠܡܵܐ. ܘܫܲܒܼܩ̣ܘܗܝ pb. 248 ܓܡܝܼܪܵܐܝܼܬܼ: ܘܐܸܬܼܪܲܚܲܩܘ ܡ̣ܢ ܟ̱ܠܹܗ ܝܲܬܼܒܵܐ ܕܐ̄ܢܵܫܘܼܬܼܵܐ: ܘܲܢܦܲܩ̣ܘ ܒܵܬܲܪ ܐܲܠܵܗܵܐ ܫܠܝܼܚܵܐܝܼܬܼ ܕܠܵܐ ܤܲܒܼܪܵܐ ܘܥܘܼܕܼܪܵܢܵܐ ܕܡܸܕܸܡ ܕܡܸܬܼܚܙܸܐ. ܘܥܵܕܼܝܵܐ ܥܠܲܝܗܘܿܢ ܕܚܸܠܬܐ ܕܡ̣ܢ ܡܫܵܘܚܕܼܘܼܬܼܵܐ: ܐܵܘ ܟܵܪܹܟܼ ܠܗܘܿܢ ܩܹܘܲܢܕܹܝܢܘܿܣ ܕܡܵܘܬܵܐ: ܕܡ̣ܢ ܟܲܦܢܵܐ ܐܵܘ ܡ̣ܢ ܟܘܼܪܗܵܢܵܐ: ܐܵܘ ܚܕܼܵܐ ܡ̣ܢ ܒܝܼ̈ܫܵܬܐ ܐܲܝܠܹܝܢ ܕܗܸܢܹܝܢ: ܘܩܲܪܝܼܒܼܝܼܢ ܠܲܦܤܵܩ ܤܲܒܼܪܵܐ. ܗܵܝ̇ ܕܹܝܢ ܕܲܠܘܵܬܼ ܐ̄ܢܵܫ̈ܝܼܢ ܗܵܘܹ̇ܝܢ ܒܘܼ̈ܝܵܐܹܐ ܕܐܲܝܟܼ ܗܵܠܹܝܢ: ܐ̄ܚܪ̈ܵܢܹܐ ܕܹܝܢ ܕܲܒܼܥܲܡ̈ܠܹܐ ܥܵܠ̇ܒܿܝܼܢ ܠܗܘܿܢ: ܠܵܐ ܗܵܘܹ̇ܐ ܠܘܵܬܼܗܘܿܢ ܡܸܕܸܡ ܕܐܲܝܟܼ ܗܵܟܲܢ: ܥܸܠܬܐ ܩܲܕܼܡܵܝܬܐ ܐܝܼܬܹܝܗ̇: ܕܲܟܼܝܘܼܬܼܵܐ ܘܠܵܐ ܕܲܟܼܝܘܼܬܼܵܐ: ܕܬܹܐܪܬܵܐ ܐܵܡܲ̈ܪܢܵܐ: ܥܸܠܬܐ ܕܹܝܢ ܕܬܲܪܬܹܝܢ ܕܐܝܼܬܹܝܗ̇ ܚܲܬܝܼܬܼܵܐܝܼܬܼ ܗܵܕܲܐ ܗ̣̄ܝ: ܕܲܟܼܡܵܐ ܕܐܝܼܬܼ ܠܹܗ ܠܐ̄ܢܵܫ ܒܘܼܝܵܐܵܐ ܕܡ̣ܢ ܒܢܲܝ̈ܢܵܫܵܐ: ܐܵܘ ܕܡܸܕܸܡ ܡ̣ܢ ܗܵܠܹܝܢ ܡܸܬܼܚܲܙܝܵܢ̈ܝܵܬܐ: ܠܵܐ ܗܵܘܹ̇ܝܢ ܠܘܵܬܹܗ ܒܘܼ̈ܝܵܐܹܐ ܕܐܲܝܟܼ ܗܵܠܹܝܢ. ܐܸܠܵܐ ܐܸܢ ܐܲܝܟܼ ܕܒܲܡܕܲܒܿܪܵܢܘܼܬܼܵܐ. ܘܗܵܕܹܐ: ܕܓܼܵܘܲܐ ܗ̣̄ܝ. ܚܢܲܢ ܕܹܝܢ ܡܸܠܬܲܢ: ܠܘܵܬܼ ܝܑܼܚܝܼ̈ܕܼܵܝܹܐ ܐܝܼܬܹܝܗ̇. ܘܤܵܗܕܵܐ ܕܗܵܕܹܐ: ܚܲܕܼ ܡ̣ܢ ܩܲܕܼܝܼ̈ܫܹܐ ܕܐܲܝܼܣ ܥܠܹܝܗ̇ ܕܗܵܕܹܐ. ܘܐܸܬܿܬ̤ ܠܹܗ ܒܲܪܬܼ ܩܵܠܵܐ ܟܲܕܼ ܐܵܡ̇ܪܵܐ: ܤܵܦܹ̇ܩ ܠܵܟܼ ܒܘܼܝܵܐܵܐ ܘܥܸܢܝܵܢܵܐ ܕܲܒܼܢܲܝ̈ܢܵܫܵܐ. ܘܲܐ̄ܚܪܹܢܵܐ ܕܒܹܗ ܒܲܙܢܵܐ ܐܲܦܝܼܣ ܠܐܲܠܵܗܵܐ: ܕܟܲܕܼ ܒܥܘܼܡܪܵܐ ܝܑܼܚܝܼܕܼܵܝܵܐ ܚܵܝܹ̇ܐ ܗ̄ܘ̣ܵܐ ܘܲܒܼܗܘܼ̈ܦܵܟܹܐ ܕܲܠܚܘܿܕܼܵܝܘܼܬܼܵܐ: ܒܟܼܠܫܵܥ ܡ̣ܢ ܒܘܼ̈ܝܵܐܹܐ ܕܡ̣ܢ ܛܲܝܒܿܘܼܬܼܵܐ ܡܸܬܼܒܲܤܲܡ ܗ̄ܘ̣ܵܐ: ܘܲܒܼܛܝܼܠܘܼܬܼܵܐ ܐܲܠܵܗܵܝܬܐ ܢܲܩܝܼܦܵܐܝܼܬܼ ܒܡܲܪܓܫܵܢܘܼܬܼܵܐ ܓܠܝܼܬܼܵܐ ܠܹܗ ܡܸܬܼܚܲܙܝܵܐ ܗ̄ܘ̣ܵܬܼ. ܘܡܵܐ ܕܐܸܬܼܩܲܪܲܒܼ ܠܝܲܬܼܒܵܐ ܕܥܵܠܡܵܐ: ܠܗܹܝܢ ܠܗܵܠܹܝܢ ܒܥ̣ܵܐ ܐܲܝܟܼ ܥܝܵܕܼܵܐ: ܘܠܵܐ ܐܸܫܟܲܚ. ܐܸܬܼܟܲܫܲܦ ܠܐܲܠܵܗܵܐ ܕܢܸܬܼܝܼܕܲܥ ܠܹܗ ܫܪܵܪܵܐ ܕܤܘܼܥܪܵܢܵܐ: ܟܲܕܼ ܐܵܡܲ݁ܪ: ܕܕܲܠܡܵܐ ܡܵܪܝ: ܡܸܛܠ ܐܲܦܸܤܩܘܿܦܘܼܬܼܵܐ ܐܸܬܼܪܲܚܩܲܬ̤ pb. 249 ܡܹܢܝ ܛܲܝܒܿܘܼܬܼܵܐ. ܘܐܸܬܼܐܡܲܪ ܠܹܗ: ܠܵܐ. ܐܸܠܵܐ ܗܵܝܕܹܝܟ: ܡܲܕܼܒܿܪܵܐ ܗ̄ܘ̣ܵܐ. ܠܲܝܬܿ ܗ̄ܘ̣ܵܐ ܒܢܲܝ̈ܢܵܫܵܐ: ܘܐܲܠܵܗܵܐ ܝܵܨܹ̇ܦ ܗ̄ܘ̣ܵܐ ܕܝܼܠܵܟܼ. ܗܵܫܵܐ ܕܹܝܢ ܝܲܬܼܒܵܐ ܗ̄ܘ̣ ܕܥܵܠܵܡܵܐ: ܘܲܒܼܢܲܝ̈ܢܵܫܵܐ ܝܵܨܦܝܼܢ ܕܝܼܠܵܟܼ. ܕܢܹܐܡܲܪ: ܕܠܵܐ ܡܲܨܝܵܐ ܕܥܲܡ ܒܘܼܝܵܐܵܐ ܕܡܸܬܼܚܙܸܐ: ܢܸܫܬܵܘܬܲܦ ܐ̄ܢܵܫ ܒܒܼܘܼܝܵܐܵܐ ܪܘܼܚܵܢܵܐ. ܝܵܠܘܿܦ. ܘܕܹܐܢ ܚܲܕܼ ܗ̄ܘ̣ ܚܸܙܘܵܐ ܘܓܸܠܝܵܢܵܐ: ܐܵܘ ܕܐܲܝܟܼ ܕܲܦܪܝܼܫܝܼܢ ܒܲܫܡܵܗܹ̈ܐ: ܦܪܝܼܫܝܼܢ ܐܵܦ ܒܤܘܼܥܪ̈ܵܢܹܐ؟ ܡܲܠܦܵܢܵܐ. ܐܝܼܬܼ ܗ̄ܘ̣ ܦܘܼܪܫܵܢܵܐ ܒܹܝܬܼ ܚܸܙܵܐ ܠܓܸܠܝܵܢܵܐ. ܓܸܠܝܵܢܵܐ ܕܹܝܢ ܐܵܦܸܢ ܥܲܠ ܬܪ̈ܲܝܗܘܿܢ ܢܵܦܹ̇ܠ: ܒܗܵܝ̇ ܕܟܲܤܝܘܼܬܼܵܐ ܗ̣̄ܝ ܕܡܸܬܼܓܲܠܝܵܐ: ܕܡܸܕ̤ܡ ܕܲܟܼܤܸܐ ܗ̄ܘ̣ܵܐ ܡ̣ܢ ܩܕܝܼܡ: ܘܗܵܫܵܐ ܢܦܲܩ̣ ܠܓܸܠܝܵܐ ܒܚܲܕܼ ܡ̣ܢ ܦܘܼܪ̈ܫܵܢܹܐ. ܐܸܠܵܐ ܠܵܐ ܒܪܲܡ ܟܠܡܸܕܸܡ ܕܓܸܠܝܵܢܵܐ ܗ̄ܘ̣: ܐܵܦ ܚܸܙܘܵܐ ܗ̄ܘ̣. ܟܠܡܸܕܸܡ ܕܚܸܙܘܵܐ ܗ̄ܘ̣: ܡܸܬܼܩܪܸܐ ܘܐܵܦ ܓܸܠܝܵܢܵܐ. ܡܸܛܠ ܕܟܲܤܝܘܼܬܼܵܐ ܗ̣̄ܝ ܕܡܸܬܼܓܲܠܝܵܐ. ܠܵܘ ܕܹܝܢ ܟܠܡܸܕܸܡ ܕܲܠܓܸܠܝܵܐ ܘܠܝܼܕܲܥܬܼܵܐ ܐܵܬܹ̇ܐ: ܒܚܸܙܘܵܐ ܗܵܘܹ̇ܐ. ܓܸܠܝܵܢܵܐ ܡܲܢ ܐܲܝܟܼ ܕܲܒܼܤܘܿܓܼܵܐܐ: ܥܲܠ ܐܲܝܠܹܝܢ ܕܡܸܬܼܝܲܕܼ̈ܥܵܢ ܘܕܲܒܼܡܲܕܥܵܐ ܡܸܬܿܛܲܥ̈ܡܵܢ ܡܸܬܼܢܤܸܒܼ. ܚܸܙܘܵܐ ܕܹܝܢ ܡ̣ܢ ܟܠܦܪܘܿܣ: ܒܕܸܡ̈ܘܵܬܼܵܐ ܗܵܘܹ̇ܐ. ܐܝܟܼ ܗܵܢܹܝܢ ܕܲܠܘܵܬܼ ܩܲܕܼ̈ܡܵܝܹܐ ܐܸܫܬܲܡܲܫ: ܐܲܝܟܼ ܕܲܒܼܛܲܒܿܝܼܘܼܬܼܵܐ ܡܸܕܸܡ ܕܲܒܼܫܸܬܼܵܐ: ܐܵܘ ܥܒܼܝܼܪܘܼܬܼܵܐ. ܘܒܲܙܒܲܢ ܚܲܬܝܼܬܼܵܐܝܼܬܼ: ܘܒܲܙܒܲܢ ܒܲܗܘܼܪܵܐܝܼܬܼ. ܟܲܕܼ ܗ̤ܘ ܗܵܘ̇ ܕܗܵܘܹ̇ܐ ܠܘܵܬܹܗ ܚܸܙܘܵܐ: ܟܡܵܐ ܙܲܒܼ̈ܢܝܼܢ ܠܵܐ ܝܵܕܲܥ: ܕܐܸܢ ܒܥܝܼܪܘܼܬܼܵܐ ܗ̄ܘ̣ ܕܚܵܙܹ̇ܐ ܐܵܘ ܒܫܸܢܬܼܵܐ. ܐܵܦܠܵܐ ܒܵܬܲܪ ܕܐܸܬ̣ܼܵܐ ܠܘܵܬܼ ܢܲܦܫܹܗ ܝܵܕܲܥ ܕܐܸܢ ܒܲܫܪܵܪܵܐ ܐܸܫܬܲܡܲܫ ܤܘܼܥܪܵܢܵܐ: ܐܵܘ ܐܲܝܟܼ ܕܲܒܼܚܸܠܡܵܐ. ܘܐܝܼܬܼ ܐܸܡܲܬܼܝ: ܕܒܲܪܬܼ ܩܵܠܵܐ ܡܸܫܬܲܡܥܵܐ ܕܥܘܼܕܼܪܵܢܵܐ: ܘܐܝܼܬܼ ܐܸܡܲܬܼܝ ܕܛܘܼܦܤܵܐ pb. 250 ܡܸܕܹܡ. ܘܒܲܙܒܲܢ ܢܲܗܝܼܪܵܐܝܼܬܼ: ܘܲܦܲܝ̈ܢ ܒܐܲܦܝܼ̈ܢ. ܐܵܦ ܚܙܵܬܼܵܐ ܘܡܲܡܠܠܵܐ ܘܫܘ̈ܐܵܠܹܐ ܘܥܸܢܝܵܢܵܐ. ܘܚܲܝ̈ܠܵܘܵܬܼܵܐ ܐܸܢܘܿܢ ܩܲܕܝܼ̈ܫܹܐ: ܕܡܸܬܼܚܙܹܝܢ ܠܐܲܝܠܹܝܢ ܕܫܵܘܹ̇ܝܢ. ܘܓܲܠܝܵܐ: ܕܲܒܼܡܲܕܼܒܿܪܵܐ ܘܲܒܼܚܘܼܪܒܵܐ ܘܲܒܼܕܼܘܼ̈ܟܿܝܵܬܼܵܐ ܕܲܡܫܵܘ̈ܚܕܼܵܢ: ܘܲܒܼܦܘܼܪܢܵܫܵܐ ܕܡ̣ܢ ܥܵܠܡܵܐ: ܗܵܘ̈ܝܵܢ ܨܼܒܼ̈ܘܵܬܼܵܐ ܕܐܲܝܟܼ ܗܵܠܹܝܢ. ܐܲܝܟܵܐ ܕܐܵܦ ܒܲܪܢܵܫܵܐ ܐܵܠܨܵܐܝܼܬܼ ܤܢܝܼܩ ܥܠܲܝܗܹܝܢ: ܒܲܕܼܠܲܝܬܿ ܠܹܗ ܐܝܼܠܵܐ ܡ̣ܢ ܕܘܼܟܼ. ܓܸܠܝܵܢܹ̈ܐ ܕܹܝܢ ܕܐܲܝܠܹܝܢ ܕܲܒܼܤܘܼܟܵܠܵܐ ܡܸܬܼܪ̈ܲܓܼܫܵܢ: ܒܝܲܕܼ ܕܲܟܼܝܘܼܬܼܵܐ ܡܸܬܼܩܲܒܹܠܝܼܢ. ܘܒܲܠܚܘܿܕܼ: ܕܐ̄ܢܵܫܵܐ ܐܝܼܬܹܝܗ̇ ܝܲܕܼܘܼ̈ܥܬܼܵܢܹܐ ܘܲܓܼܡܝܼܪܹ̈ܐ. ܝܵܠܘܿܦܵܐ. ܐܸܢ ܡܲܛܝܼ ܐ̄ܢܵܫ ܠܕܲܟܼܝܘܼܬܼܵܐ ܕܠܸܒܵܐ: ܡܵܢܵܘ ܫܘܼܘܕܵܥܵܗ̇؟ ܘܐܸܡܲܬܼܝ ܢܸܕܲܥ ܩܢܘܿܡܹܗ: ܐܸܢ ܐܸܬ݂ܼܵܐ ܠܸܒܹܗ ܠܕܲܟܼܝܘܼܬܼܵܐ؟ ܡܲܠܦܵܢܵܐ. ܡܵܐ ܕܲܠܟܼܠܗܘܿܢ ܒܢܲܝ̈ܢܵܫܵܐ ܫܲܦܝܼܪ ܚܵܙܹ̇ܐ: ܘܠܵܐ ܡܸܬܼܚܙܸܐ ܠܹܗ ܕܲܛܡܲܐ ܐ̄ܢܵܫ ܐܵܘ ܕܲܡܤܲܝܼܒܲ. ܗܵܢܵܐ ܒܕܲܟܼܝܘܼܬܼܵܐ ܩܵܐܹ̇ܡ: ܫܲܪܝܼܪܵܐܝܼܬܼ. ܘܐܸܠܵܐ: ܐܲܝܟܲܢ ܡܲܨܝܵܐ ܕܢܸܓܼܡܘܿܪ ܡܸܠܬܼܵܐ ܕܲܫܠܝܼܚܵܐ: ܕܟܲܕܼ ܐ̄ܢܵܫ ܒܟܼܠܵܗ̇ ܡܝܲܬܿܪܘܼܬܼܵܐ ܩܵܐܹ̇ܡ ܢܸܚܫܘܿܒܼ ܠܟܼܠܢܵܫ ܐܲܝܟܼ ܕܲܡܝܲܬܲܪ ܡܸܢܹܗ ܒܠܸܒܵܐ ܘܒܲܫܪܵܪܵܐ: ܐܸܠܵܐ ܐܸܢ ܐܸܬܼܡܲܛܝܼ ܠܗܵܝ̇ ܕܐܲܡܝܼܪܵܐ: ܕܕܲܟܼ̈ܝܵܢ ܥܲܝܢܵܘ̈ܗܝ ܠܵܐ ܚܵܙܹ̇ܐ ܒܝܼܫܬܼܵܐ. ܝܵܠܘܿܦܵܐ. ܡܵܢܲܐ ܗ̣̄ܝ ܕܲܟܼܝܘܼܬܼܵܐ؟ ܘܥܕܲܡܵܐ ܠܐܲܝܟܵܐ ܬܚܘܼܡܵܗ̇؟ ܡܲܠܦܵܢܵܐ. ܕܲܟܼܝܘܼܬܼܵܐ ܡܸܬܼܪܲܥܹܢܵܐ ܕܐܝܼܬܹܝܗ̇: ܡܸܬܼܢܲܫܝܵܢܘܼܬܼܵܐ ܕܲܙܢܲܝ̈ ܝܑܼܕܲܥܬܼܵܐ ܕܲܠܒܲܪ ܡ̣ܢ ܟܝܵܢܵܐ: ܗܵܠܹܝܢ ܕܲܒܼܓܼܵܘ ܥܵܠܡܵܐ ܐܸܫܟܲܚ ܐܸܢܘܿܢ ܟܝܵܢܵܐ. ܬܚܘܼܡܗ̇ ܕܹܝܢ: ܕܗܵܢܵܐ ܟ̱ܠܹܗ ܢܸܬܼܚܲܪܲܪ ܡܸܢܗܘܿܢ: ܕܟܹܐܬܸܐ ܥܕܲܡܵܐ ܠܲܦܫܝܼܛܘܼܬܹܗ ܘܬܲܡܝܼܡܘܼܬܹܗ ܩܲܕܼܡܵܝܬܼܵܐ ܕܲܟܼܝܵܢܵܐ: ܐܲܝܟܼ ܫܲܒܼܪܵܐ ܡܸܕܸܡ: ܤܛܲܪ ܡ̣ܢ ܙܥܘܿܪ̈ܝܵܬܼܵܐ pb. 251 ܒܲܠܚܘܿܕܼ. ܝܵܠܘܿܦܵܐ. ܘܡܲܨܝܵܐ ܕܢܹܐܬܸܐ ܒܲܪܢܵܫܵܐ ܠܗܵܢܵܐ ܛܲܟܼܤܵܐ؟ ܡܲܠܦܵܢܵܐ. ܐܹܝܢ. ܗܵܐ ܚܲܕܼ ܡ̣ܢ ܤܵܒܹ̈ܐ ܥܕܲܡܵܐ ܠܗܵܕܹܐ ܐܸܬ̣ܼܵܐ: ܥܕܲܡܵܐ ܕܐܵܦ ܠܬܲܠܡܝܼܕܹܗ ܡܫܲܐܸܠ ܗ̄ܘ̣ܵܐ ܐܲܡܝܼܢܵܐܝܼܬܼ: ܕܐܸܢ ܐܲܝܟܼܝܼܠ ܠܹܗ ܠܲܚܡܵܐ ܐܵܘ ܠܵܐ. ܘܚܲܕܼ ܡ̣ܢ ܩܲܕܝܼ̈ܫܹܐ ܕܒܲܙܒܲܢ ܐ̄ܢܵܫ ܤܵܒܼܵܐ ܥܲܬܝܼܩܵܐ: ܗܵܢܵܐ ܟ̱ܠܹܗ ܐܸܬܿܕܲܟܝܼ ܘܐܸܬܼܦܫܸܛ: ܘܐܸܬ̣ܼܵܐ ܠܬܲܡܝܼܡܘܼܬܼܵܐ ܘܲܠܫܲܦܝܼܘܼܬܼܵܐ: ܥܕܲܡܵܐ ܕܐܲܝܟܼ ܥܘܸܠܵܐ ܢܸܗܘܸܐ ܒܨܝܼܪ ܩܲܠܝܼܠ: ܒܡܸܬܼܢܲܫܝܵܢܘܼܬܼܵܐ ܕܗܵܠܹܝܢ ܕܲܬܼܢܵܢ. ܘܲܟܼܒܲܪ ܠܵܐ ܡܸܬܼܗܲܝܡܲܢ ܠܤܲܓܝܼ̈ܐܹܐ ܡܸܕܸܡ ܕܐܵܡ̇ܪܝܼܢܲܢ: ܡܸܛܠ ܕܕܼܘܼܡܵܪܵܐ ܗ̄ܘ̣ ܒܲܫܪܵܪܵܐ. ܕܐܵܦܠܵܐ ܒܥܸܕܵܢܵܐ ܕܐ̄ܪ̈ܵܙܹܐ ܝܵܕܲܥ ܗ̄ܘ̣ܵܐ ܠܡܸܛܲܪ ܢܲܦܫܹܗ ܐܲܝܟܼ ܕܲܠܡܸܫܩܲܠ ܐ̄ܪ̈ܵܙܹܐ: ܘܕܐܸܢ ܢܛܝܼܪ ܐܵܘ ܠܵܐ: ܥܕܲܡܵܐ ܕܬܲܠܡܝܼܕܼܵܘ̈ܗܝ ܢܵܛ̇ܪܝܼܢ ܗ̄ܘ̣ܵܘ ܠܹܗ ܒܩܸܠܵܝܬܹܗ: ܘܡܵܘܒܿܠܝܼܢ ܗ̄ܘ̣ܵܘ ܠܹܗ ܠܩܘܼܕܼܫܵܐ: ܐܲܝܟܼ ܕܲܠܛܲܠܝܵܐ ܙܥܘܿܪܵܐ. ܗܵܢܵܐ ܟ̱ܠܹܗ ܐܸܫܬܲܦܝܼ ܘܐܸܬܼܦܫܸܛ ܗܵܘ̇ ܛܘܼܒܼܵܢܵܐ. ܘܟܲܕܼ ܗܵܟܲܢܵܐ ܗܘ̤ܵܐ ܒܗܵܠܹܝܢ ܕܲܬܼܢܵܢ: ܒܢܲܦܫܹܗ ܓܡܝܼܪ ܗ̄ܘ̣ܵܐ ܠܘܵܬܼ ܐܲܠܵܗܵܐ. ܝܵܠܘܿܦܵܐ. ܐܲܝܢܵܐ ܗܸܪܓܵܐ ܘܥܸܢܝܵܢܵܐ ܙܵܕܹܩ ܕܢܸܗܘܸܐ ܠܹܗ ܠܐ̄ܢܵܫ ܒܓܼܵܘ ܚܒܼܘܼܫܝܹܗ ܘܲܒܼܫܸܠܝܹܗ: ܕܠܵܐ ܢܸܫܬܿܟܲܚ ܒܲܛܝܼܠ ܡܲܕܿܥܹܗ ܒܚܘܼ̈ܫܵܒܹܐ ܕܫܸܓܼܡܵܐ؟ ܡܲܠܦܵܢܵܐ. ܥܲܠ ܗܸܪܓܵܐ ܡܫܲܐܸܠ ܐܲܢ̄ܬܿ: ܕܡܵܢܵܐ ܢܸܗܘܸܐ ܠܹܗ ܠܡܝܼܬܼ ܠܥܵܠܡܵܐ ܒܩܸܠܵܝܬܹܗ؟ ܒܲܪܢܵܫܵܐ ܕܲܚܦܝܼܛ ܟܲܝ ܘܥܝܼܪܵܐ ܢܲܦܫܹܗ: ܥܲܠ ܫܘܼܐܵܠܵܐ ܤܢܝܼܩ ܕܐܲܝܢܵܐ ܦܘܼܠܚܵܢܵܐ ܢܸܗܘܸܐ ܠܹܗ ܟܲܕܼ ܐܝܼܬܼܵܘܗܝ ܒܲܠܚܘܿܕܼܵܘܗܝ: ܡܵܢܵܐ ܐܝܼܬܼܵܘܗܝ ܗܸܪܓܹܗ ܕܝܼܚܝܼܕܼܵܝܵܐ ܒܩܸܠܵܝܬܹܗ ܐܸܠܵܐ ܐܸܢ ܒܸܟܼܝܵܐ؟ ܡ̣ܢ ܒܸܟܼܝܵܐ ܟܲܝ ܡܸܤܬܿܦܸܩ ܠܘܵܬܼ ܚܘܼܫܵܒܼܵܐ ܐ̄ܚܪܹܢܵܐ ܠܲܡܚܵܪ: ܐܲܝܢܵܘ ܗܸܪܓܵܐ ܕܲܡܝܲܬܲܪ ܡܸܢܹܗ؟ pb. 252 ܟܲܕܼ ܗ̤ܘ ܡܵܘܬܿܒܹܗ ܝܑܼܚܝܼܕܼܵܝܵܐ ܘܲܡܫܵܘܚܕܼܵܐ ܕܡܘܼܬܼ ܩܲܒܼܪܵܐ: ܕܲܫܠܸܐ ܡ̣ܢ ܟܠܗܹܝܢ ܡܚܲܕܝܵܢ̈ܝܵܬܹܗ ܕܥܵܠܡܵܐ ܡܲܠܸܦ ܠܹܗ: ܕܲܕܒܸܟܼܝܵܐ ܗ̄ܘ̣ ܦܘܼܠܚܵܢܹܗ. ܐܵܦ ܗ̤ܘ ܟܘܼܢܵܝܵܐ ܕܲܫܡܹܗ: ܥܲܠ ܗܵܢܵܐ ܡܚܲܦܸܛ ܠܹܗ. ܐܲܒܼܝܼܠܵܐ ܓܹܝܪ ܡܸܬܼܩܪܸܐ: ܗܵܢܵܘ ܕܹܝܢ: ܡܲܪܝܼܪ ܠܸܒܵܐ. ܟܠܗܘܿܢ ܓܹܝܪ ܙܲܕܝܼ̈ܩܹܐ: ܒܒܸܟܼܝܵܐ ܢܦܲܩ̣ܘ ܡ̣ܢ ܥܵܠܡܵܐ ܗܵܢܵܐ. ܐܸܢ ܩܲܕܝܼ̈ܫܹܐ ܒܵܟܹ̇ܝܢ ܗ̄ܘ̣ܵܘ: ܘܦܘܼܡ̈ܡܲܝܗܘܿܢ ܡ̣ܢ ܕܹܡܥܲܝ̈ܗܘܿܢ ܒܟܼܠܥܸܕܵܢ ܡܵܠܹܝܢ ܗ̄ܘ̣ܵܘ: ܘܗܵܟܲܢܵܐ ܢܦܲܩ̣ܘ ܡ̣ܢ ܥܵܠܡܵܐ ܗܵܢܵܐ: ܡܲܢ̣ܘܼ ܠܵܐ ܢܸܒܼܟܸܿܐ؟ ܒܘܼܝܵܐܹܗ ܕܝܼܚܝܼܕܼܵܝܐ: ܡ̣ܢ ܒܸܟܼܝܵܐ ܗ̄ܘ̣ ܡܸܬܼܝܼܠܸܕܼ. ܐܸܢܕܹܝܢ ܐܲܝܠܹܝܢ ܕܙܲܟܵܚܝܼܢ ܗ̄ܘ̣ܵܘ ܕܲܡܥ̣ܘ ܬܢܵܢ: ܐܲܝܢܵܐ ܕܲܚܒܼܵܪ̈ܵܬܼܵܐ ܡܠܸܐ: ܐܲܝܟܲܢ ܡܤܲܝܒܲܪ ܕܢܸܫܠܸܐ ܡ̣ܢ ܒܸܟܼܝܵܐ؟ ܡܵܪܹܐ ܒܲܝܬܐ ܟܲܝ ܕܤܝܼܡ ܚܲܒܿܝܼܒܹܗ ܩܕܼܵܡܵܘܡܝ ܟܲܕܼ ܡܲܚܝܼܬܼ: ܥܲܠ ܝܘܼܠܦܵܢܵܐ ܤܢܝܼܩ ܕܲܐܝܢܵܐ ܚܘܼܫܵܒܼܵܐ ܢܙܝܼܥ ܒܹܗ ܒܸܟܼܝܵܐ؟ ܢܲܦܫܵܟܼ ܕܡܲܚܝܼܬܵܐ ܒܲܚܛܵܗܹ̈ܐ ܤܝܼܡܵܐ ܩܕܼܵܡܲܝܟܼ: ܕܛܵܒܲܐ ܗ̣̄ܝ ܠܵܟܼ ܡ̣ܢ ܥܵܠܡܵܐ ܟ̱ܠܹܗ. ܐܸܢ ܕܹܝܢ ܠܫܸܠܝܵܐ ܢܹܐܬܸܐ: ܐܵܦ ܠܒܸܟܼܝܵܐ ܡܨܹܝܢܲܢ ܕܢܸܬܼܐܡܸܢ. ܡܸܛܠܗܵܢܵܐ ܢܸܒܼܥܸܐ ܡ̣ܢ ܡܵܪܲܢ ܒܪܸܝܵܢܵܐ ܐܲܟܼܝܵܦܵܐ: ܕܗܵܕܹܐ ܢܸܬܸܠ ܠܲܢ. ܐܸܢܕܹܝܢ ܠܗܵܕܹܐ ܢܸܤܲܒܼ: ܡܵܘܗܲܒܼܬܼܵܐ ܕܡ̣ܢ ܟܠ ܡܝܲܬܿܪܵܐ: ܒܹܗ ܒܒܸܟܼܝܵܐ ܠܕܲܟܼܝܘܼܬܼܵܐ ܥܵܐܠܝܼܢ ܚ̄ܢܲܢ. ܘܡܵܐ ܕܲܠܬܲܡܵܢ ܥܲܠܢܲܢ: ܬܘܼܒܼ ܠܵܐ ܡܸܫܬܩܸܠ ܡܸܢܲܢ: ܥܕܲܡܵܐ ܠܝܘܿܡ ܡܲܦܩܵܢܲܢ ܕܡ̣ܢ ܥܵܠܡܵܐ. ܛܘܼܒܲܝܗܘܿܢ ܗܵܟܹܝܠ ܠܕܲܟܼܝܲܝ̈ ܠܸܒܵܐ: ܕܠܲܝܬܿ ܥܸܕܵܢܵܐ ܕܠܵܘ ܒܗܵܢܵܐ ܒܘܼܤܵܡܵܐ ܕܕܸܡ̈ܥܹܐ ܡܸܬܼܦܲܪܦܥܝܼܢ: ܘܒܹܗ ܗ̤ܘ ܚܵܙܹ̇ܝܢ ܠܡܵܪܲܢ ܐܲܡܝܼܢܵܐܝܼܬܼ. ܕܟܲܕܼ ܕܸܡ̈ܥܹܐ ܒܥܲܝܢܲܝ̈ܗܘܿܢ: ܡܸܫܬܿܘܹܝܢ ܠܲܚܙܵܬܼܵܐ ܕܓܸܠܝܵܢܹܗ pb. 253 ܒܪܵܘܡܵܐ ܕܲܨܠܘܿܬܼܵܐ. ܒܕܼܵܐܦܠܵܐ ܐܝܼܬܼ ܠܗܘܿܢ ܨܠܘܿܬܼܵܐ ܕܠܵܐ ܕܸܡ̈ܥܹܐ: ܘܗܵܕܲܐ ܗ̣̄ܝ ܕܐܲܡܝܼܪܵܐ ܡ̣ܢ ܡܵܪܲܢ: ܕܛܘܼܒܲܝܗܘܿܢ ܠܐܲܒܼܝܼ̈ܠܹܐ: ܕܗܸܢܘܿܢ ܢܸܬܼܒܲܝܐܘܼܢ. ܡ̣ܢ ܐܲܒܼܝܼܠܘܼܬܼܵܐ ܟܹܝܬܼ: ܐ̄ܢܵܫ ܐܵܬܹ̇ܐ ܠܕܲܟܼܝܘܼܬܼ ܢܲܦܫܵܐ. ܡܸܛܠܗܵܢܵܐ ܟܲܕܼ ܐܸܡ݂ܲܪ ܡܲܚܝܵܢܲܢ: ܕܛܘܼܒܲܝܗܘܿܢ ܠܐܲܒܼ̈ܝܼܠܹܐ ܕܗܸܢܘܿܢ ܢܸܬܼܒܲܝܐܘܼܢ: ܠܵܐ ܦܲܫܸܩ̣ ܕܐܲܝܢܵܐ ܒܘܼܝܵܐܵܐ. ܟܲܕܼ ܢܸܫܬܿܘܸܐ ܝܑܼܚܝܼܕܼܵܝܵܐ ܕܲܒܼܝܲܕܼ ܐܲܒܼܝܼܠܘܼܬܼܵܐ ܢܸܥܒܲܪ ܠܗܵܢܵܐ ܐܲܬܼܪܵܐ ܕܚܲܫܹ̈ܐ: ܘܲܢܡܲܢܲܥ ܠܘܵܬܼ ܦܩܲܥܬܐ ܗܵܝ̇ ܕܕܲܟܼܝܘܼܬܼ ܢܲܦܫܵܐ: ܕܒܼܵܗ̇ ܒܗܵܕܹܐ ܦܵܓܲܥ ܒܗܵܘ̇ ܒܘܼܝܵܐܵܐ ܕܠܵܐ ܥܵܒܲܪ ܡ̣ܢ ܐܲܝܠܹܝܢ ܕܐܸܫܟܚܘܼܗܝ ܬܢܵܢ. ܗܵܝܕܹܝܢ ܡܸܤܬܲܟܲܠ: ܕܲܠܗܵܢܵܐ ܒܘܼܝܵܐܵܐ ܕܲܒܼܫܘܼܠܵܡܵܐ ܕܐܲܒܼܝܼܠܘܼܬܼܵܐ ܡܸܬܼܩܲܒܲܠ ܒܝܲܕܼ ܕܲܟܼܝܘܼܬܼܵܐ: ܙܲܡܸܢ ܐܸܢܘܿܢ ܡܵܪܲܢ ܠܐܲܒܼܝܼ̈ܠܹܐ. ܒܕܼܵܐܦܠܵܐ ܐܝܼܬܼ ܕܐܲܡܝܼܢ ܒܵܟܹ̇ܐ: ܘܩܲܪܝܼܒܼܝܼܢ ܚܲܫܹ̈ܐ ܠܠܸܒܹܗ. ܡܸܛܠ ܕܒܸܟܼܝܵܢܵܐ: ܠܗܲܠ ܡ̇ܢ ܚܵܫܘܿܫܘܼܬܼܵܐ ܗ̄ܘ̣. ܘܐܸܢ ܐܲܝܢܵܐ ܕܒܲܡܠܸܐ ܙܒܲܢ ܡܸܬܼܐ̱ܒܸܠ ܘܒܼܵܟܹ̇ܐ: ܡܸܫ̈ܟܿܚܵܢ ܐܸܢܹܝܢ ܕܸܡ̈ܥܹܐ ܠܲܡܟܲܦܵܪܘܼ ܡ̣ܢ ܪܸܥܝܵܢܵܐ ܥܘܼܗܕܵܢܵܐ ܕܚܲܫܹ̈ܐ: ܡܵܢܵܐ ܢܹܐܡܲܪ ܥܲܠ ܐܲܝܢܵܐ ܕܦܘܼܠܚܵܢܵܐ ܝܑܼܕܼܝܼܥܵܐ ܠܸܠܝܵܐ ܘܐܝܼܡܵܡܵܐ ܠܗܵܢܵܐ ܤܝܼܡ ܠܹܗ؟ ܥܘܼܕܼܪܵܢܵܐ ܕܡ̣ܢ ܒܸܟܼܝܵܐ ܡܲܢ̣ܘܼ ܝܵܕܲܥ: ܐܸܠܵܐ ܐܲܝܠܹܝܢ ܕܢܲܦܫܗܘܿܢ ܠܗܵܕܹܐ ܝܲܗ̣̄ܝܼܘ؟ ܟܠܗܘܿܢ ܩܲܕܝܼ̈ܫܹܐ: ܪܓܼܝܼܓܼܝܼܢ ܠܵܗ̇ ܠܗܵܕܹܐ ܡܲܥܲܠܬܼܵܐ. ܘܲܒܼܝܲܕܼ ܒܸܟܼܝܵܐ ܡܸܬܼܦܬܲܚ ܬܲܪܥܵܐ ܩܕܼܵܡܲܝܗܘܿܢ: ܠܡܸܥܲܠ ܠܹܗ ܠܗܵܘ̇ ܐܲܬܼܪܵܐ ܕܒܼܘܼ̈ܝܵܐܹܐ: ܐܲܝܟܵܐ ܕܒܹܗ ܥܸܩ̈ܒܼܵܬܐ ܕܚܘܼܒܹܗ ܕܐܲܠܵܗܵܐ ܪ̈ܫܝܼܡܵܢ ܒܝܲܕܼ ܓܸܠܝܵܢܹ̈ܐ. ܝܵܠܘܿܦܵܐ. ܡܸܛܠ ܕܹܝܢ ܕܠܵܐ ܤܵܦܹ̇ܩ ܒܲܪܢܵܫܵܐ ܠܐܲܡܝܼܢܘܼܬܼܵܐ ܗܵܕܹܐ: ܡܸܛܠ ܟܪܝܼܗܘܼܬܼܵܐ ܕܲܟܼܝܵܢܹܗ ܕܦܲܓܼܪܵܐ: ܕܢܸܗܘܸܐ ܐܝܼܬܼ ܠܹܗ ܘܡܸܕܸܡ ܐ̄ܚܪܹܝܢ ܒܵܬܲܪ ܗܵܕܹܐ ܙܵܕܹܩ: ܕܚܵܫܲܝ ܠܲܠܒܼܘܼܟܼܝܵܐ ܕܪܸܥܝܵܢܹܗ. ܕܠܵܐ pb. 254 ܢܸܤܥܘܿܢ ܥܠܵܘܗܝ ܚܲܫܹ̈ܐ: ܒܝܲܕܼ ܒܸܛܠܵܢܵܐ ܕܡܲܕܥܵܐ. ܡܲܠܦܵܢܵܐ. ܠܵܐ ܡܸܫܟܿܚܝܼܢ ܚܲܫܹ̈ܐ ܤܵܥܹ̇ܝܢ ܥܲܠ ܢܲܦܫܵܐ: ܘܫܵܓܼܫ̇ܝܼܢ ܠܝܼܚܝܼܕܼܵܝܵܐ ܕܲܦܤܝܼܩ ܠܸܒܹܗ ܡ̣ܢ ܥܵܠܡܵܐ ܒܕܼܘܼܝܵܪܵܐ ܠܚܘܿܕܼܵܝܵܐ: ܒܗܵܘ̇ ܟ̱ܠܹܗ ܫܸܠܝܵܐ ܕܡܲܕܼܒܿܪܵܐ ܚܤܝܼܟܼ ܡܸܢܟܠ ܙܡܵܡ̈ܝܼܢ ܘܩܵܠ̈ܝܼܢ ܕܲܫܓܼܘܼܫܝܵܗ̇ ܕܲܒܼܪܝܼܬܼܵܐ: ܐܸܠܵܐ ܐܸܢ ܐܲܗܡ̣ܝܼ ܡ̣ܢ ܘܵܠ̈ܝܵܬܹܗ. ܝܲܬܝܼܪܵܐܝܼܬܼ ܕܐܝܼܬܼ ܠܹܗ ܥܲܡ ܥܸܢܝܵܢܵܐ ܕܲܟܼܬܼܵܒܹ̈ܐ: ܘܚܘܼ̈ܫܵܒܹܐ ܡܥܲܕܪ̈ܵܢܹܐ ܕܡܸܬܼܥܢܸܐ ܒܗܘܿܢ: ܕܒܲܡܝܲܬܿܪܘܼܬܼ ܚܵܘܪܵܐ ܕܤܘܼܟܵܠܲܝ̈ܗܘܿܢ ܡܸܬܿܕܚܹܝܢ ܡ̣ܢ ܘܲܥܕܹܗ ܚܘܼ̈ܫܵܒܹܐ ܦܲܟܿܝܼ̈ܗܹܐ: ܕܠܵܐ ܡܸܫܟܲܚ ܢܸܬܼܦܤܸܩ ܪܸܥܝܵܢܹܗ ܡܸܢܗܘܿܢ: ܘܚܵܐܲܪ ܠܘܵܬܼ ܥܵܠܡܵܐ ܟܠ ܟ̱ܠܹܗ: ܡܸܛܠ ܗܲܢܝܼܐܘܼܬܹܗ ܪܲܒܿܬܐ ܕܥܸܢܝܵܢܵܐ ܗܵܘ̇ ܕܒܹܗ ܡܸܬܿܕܲܠܸܐ ܡܲܕܥܵܐ ܪܲܘܝܵܐܝܼܬܼ ܒܗܵܘ̇ ܨܸܕܹܝܗ ܤܲܓܝܼܐܵܐ ܕܡܲܕܼܒܿܪܵܐ. ܘܛܵܥܹ̇ܐ ܢܲܦܫܹܗ: ܘܡܸܬܼܢܫܸܐ ܠܲܟܼܝܵܢܹܗ. ܘܗܵܘܹ̇ܐ ܐܲܝܟܼ ܐ̄ܢܵܫ ܕܲܫܢܸܐ: ܘܠܵܐ ܡܸܬܿܕܟܲܪ ܠܹܗ ܠܥܵܠܵܡ ܟܠ ܟ̱ܠܹܗ. ܘܝܲܬܝܼܪ: ܟܲܕܼ ܡܸܬܼܪܲܥܸܐ ܘܢܵܤܹ̇ܒܼ ܒܡܲܕܥܹܗ ܥܲܠ ܪܲܒܿܘܼܬܹܗ ܕܐܲܠܵܗܵܐ: ܫܘܼܒܼܚܵܐ ܕܲܟܼܝܵܢܹܗ: ܬܸܡܗܵܐ ܕܲܥ̇ܒܼܵܕܼܵܘ̈ܗܝ: ܘܲܒܼܱܝܼܛܘܼܬܼܵܐ ܬܘܼܒܼ ܕܲܩܢܘܿܡܹܗ: ܕܲܥܕܲܡܵܐ ܠܐܲܝܟܵܐ ܐܸܬܼܥܲܠܝܼ. ܕܲܒܼܡ̇ܢ ܢܸܪܢܸܐ: ܘܐܲܝܠܹܝܢ ܚܘܼ̈ܫܵܒܹܐ ܢܲܡܪܲܚ ܢܸܤܲܒܼ ܒܢܲܦܫܹܗ ܠܒܼܘܼܤܵܡܹܗ: ܕܲܒܼܬܸܡܗܵܐ ܕܙܵܘܥܵܘ̈ܗܝ ܢܸܪܘܸܐ ܒܟܼܠܥܸܕܵܢ: ܐܲܝܟܼ ܕܲܒܼܗܵܘ̇ ܕܘܼܒܵܪܵܐ ܕܒܼܵܬܲܪ ܩܝܵܡܬܼܵܐ. ܛܵܒܼ ܓܹܝܪ ܝܵܗܹ̇ܒܼ ܫܸܠܝܵܐ ܐܝܼܕܼܵܐ ܠܗܵܕܹܐ: ܒܗܵܝ̇ ܕܐܝܼܬܼ ܐܲܬܼܪܵܐ ܠܡܲܕܥܵܐ ܠܡܸܫܟܲܢ ܥܲܠ ܝܵܬܹܗ ܒܫܲܝܢܵܐ ܕܲܫܟܝܼܚ ܠܹܗ ܡ̣ܢ ܫܸܠܝܵܐ. ܐܲܟܲܚ̄ܕܼ ܕܹܝܢ ܘܡܸܬܿܬܿܙܝܼܥ ܡ̣ܢ ܗܵܪܟܵܐ ܒܥܘܼܗܕܵܢܵܐ ܠܦܘܼܬܼ ܡܠܲܚܡܘܼܬܼܵܐ ܕܢܝܼܫܵܐ ܕܗܘܼܦܵܟܼܵܘ̈ܗܝ: ܘܢܵܤܹ̇ܒܼ ܒܪܸܥܝܵܢܹܗ ܫܘܼܒܼܚܹ̈ܐ ܕܥܵܠܡܵܐ ܕܲܥܬܼܝܼܕܼ: ܤܲܒܼܪܵܐ ܕܲܢܛܝܼܪ ܠܙܲܕܝܼ̈ܩܹܐ: ܠܗܵܢܘܿܢ ܚܲܝܹ̈ܐ ܡܸܬܿܬܿܙܝܼ̈ܥܲܝ ܠܒܪܘܼܚ: ܘܢܵܒܼ̈ܗܲܝ ܒܐܲܠܵܗܵܐ pb. 255 ܟܠܗܘܿܢ. ܗܵܘ̇ ܗܘܼܦܵܟܼܵܐ ܚܲܕܼܬܼܵܐ: ܕܲܕܼܠܵܐ ܥܘܼܗܕܵܢܵܐ ܘܲܕܼܠܵܐ ܙܵܘܥܵܐ ܕܥܲܠ ܗܵܠܹܝܢ ܕܲܬܼܢܵܢ. ܘܡܵܐ ܕܲܒܼܗܵܠܹܝܢ ܪܘܼܵܐ: ܬܘܼܒܼ ܡܫܲܢܸܐ ܡ̣ܢ ܬܲܡܵܢ ܒܬܹܐܘܿܪܝܹܗ: ܠܘܵܬܼ ܗܵܠܹܝܢ ܕܥܵܠܡܵܐ ܗܵܢܵܐ ܕܐܝܼܬܼܵܘܗܝ ܒܹܗ ܥܕܲܟܹܝܠ: ܟܲܕܼ ܐܵܡܲ݁ܪ ܡܸܬܿܕܲܪܵܢܵܐܝܼܬܼ: ܐܘܿ ܥܘܼܡܩܵܐ ܕܥܘܿܢܼܪܵܐ ܘܚܸܟܼܡܬܐ ܘܡܲܕܥܵܐ ܘܬܲܪܥܝܼܬܼܵܐ ܠܵܐ ܡܸܬܼܒܲܨܝܵܢܘܼܬܼܵܐ ܕܐܲܠܵܗܵܐ. ܕܐ̄ܢܵܫ: ܠܵܐ ܡܵܫ̣ ܕܝܼܢܵܘ̈ܗܝ. ܘܐܘܼܪ̈ܚܵܬܹܗ: ܠܵܐ ܡܸܬܼܥܲܩ̈ܒܼܵܢ. ܕܟܲܕܼ ܥܵܠܡܵܐ ܐ̄ܚܪܹܢܵܐ ܕܗܵܟܲܢܵܐ ܬܡܝܼܗ ܡܛܲܝܲܒܼ ܗ̄ܘ̣ܵܐ ܠܹܗ: ܕܠܹܗ ܢܲܥܸܠ ܐܸܢܘܿܢ ܠܟܼܠܗܘܿܢ ܡܠܝܼ̈ܠܹܐ: ܘܢܸܛܲܪ ܐܸܢܘܿܢ ܕܠܵܐ ܫܘܼܢܵܝ ܒܚܲܝܹ̈ܐ ܕܠܵܐ ܤܵܟܼܵܐ. ܡܵܢܲܐ ܗ̣̄ܝ ܟܲܝ ܥܸܠܬܼܵܐ ܕܲܥܒܲܕܼ ܠܗܵܢܵܐ ܠܘܼܩܕܲܡ: ܟܲܕܼ ܪܵܘܚܹܗ ܘܫܲܪܬܚܹܗ ܒܲܤܒܼܝܼܤܘܼܬܼܵܐ ܤܲܓܝܼܐܬܼܵܐ ܕܲܟܼܝܵܢܹ̈ܐ: ܘܤܵܡ̣ ܒܹܗ ܚܲܫܹ̈ܐ ܤܲܓܝܼ̈ܐܹܐ؟ ܘܤܵܡܲܢ ܒܹܗ ܠܘܼܩܕܲܡ ܒܗܵܢܵܐ: ܘܲܩܒܲܥ̣ ܒܲܟܼܝܵܢܲܢ ܪܸܚܡܲܬܼܗܘܿܢ ܤܲܓܝܼܐܬܼܵܐ ܕܚܲܝܝܵܘ̈ܗܝ: ܘܲܡܫܲܢܸܐ ܠܲܢ ܡܸܢܹܗ ܒܐܝܼܕܼܵܐ ܒܐܝܼܕܼܵܐ ܒܝܲܕܼ ܡܵܘܬܵܐ: ܘܢܵܛܲܪ ܠܲܢ ܡܸܬܼܚܵܐ ܕܠܵܐ ܙܥܘܿܪ ܒܠܵܐ ܡܲܪܓܫܵܢܘܼܬܼܵܐ ܐܲܝܟܼ ܟܹܐܦܹ̈ܐ ܘܩܲܝ̈ܤܹܐ: ܘܲܡܚܲܒܸܠ ܕܸܡ̈ܘܵܬܲܢ: ܘܐܵܫܹ̇ܕܼ ܠܹܗ ܠܡܘܼܙܵܓܲܢ ܘܚܵܠܹ̇ܛ ܒܓܼܵܘ ܐܲܪܥܵܐ. ܘܫܵܒܹ̇ܩ ܠܹܗ ܕܡܸܤܬܿܬܲܪ ܘܢܵܦܹ̇ܠ ܬܘܼܩܵܢܲܢ: ܥܕܲܡܵܐ ܕܢܵܦܹ̇ܩ ܡ̣ܢ ܟ̱ܠܵܗ̇ ܕܡܘܼܬܼܵܐ ܕܪܘܼܟܵܒܼܵܐ. ܘܗܵܝܕܹܝܬ ܒܙܲܒܼܢܵܐ ܕܲܡܬܲܚܲܡ ܠܚܸܟܼܡܬܹܗ ܐܸܡܲܬܼܝ ܕܨܵܒܹ̇ܐ: ܡܢܲܚܸܡ ܠܲܢ ܒܲܕܼܡܘܼܬܼܵܐ ܐ̄ܚܪܹܬܼܵܐ ܕܗ̤ܘ ܝܵܕܲܥ: ܘܡܲܥܸܠ ܠܲܢ ܠܗܵܘ̇ ܬܘܼܩܵܢܵܐ ܐ̄ܚܪܹܢܵܐ. ܘܠܵܘ ܒܲܠܚܘܿܕܼ ܠܲܢ: ܐܸܠܵܐ ܘܲܡܠܲܡܲܠܲܐܟܹ̈ܐ ܩܲܕܝܼ̈ܫܹܐ ܕܠܵܐ ܤܢܝܼܩܝܼܢ ܥܲܠ ܗܵܢܵܐ ܥܵܠܡܵܐ ܒܲܚܫܲܚܬܼܵܐ. ܡܸܛܠ ܬܡܝܼܗܘܼܬܼܵܐ pb. 256 ܕܲܟܼܝܵܢܘܗܘܿܢ: ܕܩܵܝ̇ܡܝܼܢ ܒܨܝܼܪ ܩܲܠܝܼܠ ܒܲܓܼܡܝܼܪܘܼܬܼܵܐ: ܡܤܲܟܹܝܢ ܟܠܗܘܿܢ ܠܢܘܼܚܵܡܵܐ ܕܝܼܠܲܢ ܘܠܲܩܝܵܡܬܐ ܕܚܘܼܒܼܠܲܢ. ܕܐܸܡܲܬܼܝ ܢܩܘܼܡ ܓܸܢܤܵܐ ܕܲܒܼܢܲܝ̈ܢܵܫܵܐ ܡ̣ܢ ܥܲܦܪܵܐ: ܘܢܸܪܦܲܬܼ ܘܢܹܐܬܸܐ ܚܘܼܒܵܠܹܗ ܠܚܘܼܕܵܬܼܵܐ: ܕܡܸܛܠܵܬܲܢ ܟܠܹܝܢ ܡ̣ܢ ܡܲܥܲܠܬܼܵܐ: ܕܒܲܚܕܼܵܐ ܙܒܲܢ ܢܸܬܼܦܬܲܚ ܬܲܪܥܵܐ ܕܗܵܘ̇ ܥܵܠܡܵܐ ܚܲܕܼܬܼܵܐ ܕܠܹܗ ܡܤܲܟܹܝܢ. ܒܕܼܵܐܦ ܗ̤ܝ ܒܪܝܼܬܼܵܐ ܕܡܲܠܲܐܟܹ̈ܐ ܡܸܬܿܬܲܢܚܵܐ ܥܲܡܲܢ: ܡ̣ܢ ܝܘܼܩܪܵܐ ܕܦܲܓܼܪܵܐ ܕܚܵܙ̇ܝܵܐ ܕܐܝܼܬܲܝܢ ܒܹܗ: ܘܲܡܤܲܒܿܪܵܐ ܘܲܡܤܲܟܿܝܵܐ ܠܓܸܠܝܵܢܵܐ ܕܲܒܼܢܵܘ̈ܗܝ ܕܐܲܠܵܗܵܐ. ܐܲܝܟܼ ܕܬܸܬܼܚܲܪܲܪ ܐܵܦ ܗ̤ܝ ܡ̣ܢ ܥܲܒܼܕܘܼܬܼܵܐ ܕܲܚܒܼܵܠܵܐ: ܒܲܚܪܘܼܪܹ̈ܐ ܕܬܸܫܒܿܘܿܚܬܼܵܐ ܕܲܒܼ̈ܢܲܝܵܐ ܕܐܲܠܵܗܵܐ. ܟܲܕܼ ܠܘܼܩܕܲܡ ܤܵܬܲܪ ܠܹܗ ܠܗܵܢܵܐ ܡ̣ܢ ܟ̱ܠܹܗ ܬܘܼܩܵܢܹܗ: ܘܫܵܪܹܬܼ ܠܠܵܐ ܡܸܕܸܡ: ܐܲܝܟܲܢܵܐ ܕܗܵܘ̇ ܬܘܼܩܵܢܵܐ ܩܲܕܼܡܵܝܵܐ ܕܦܲܓܼܪܲܢ. ܡܸܟܹܝܠ ܡܸܬܼܥܲܠܸܐ ܒܡܲܕܥܹܗ ܠܗܲܠ ܡ̣ܢ ܫܘܼܪܵܝ ܗܘܵܝܹܗ ܕܥܵܠܡܵܐ: ܐܸܡܲܬܼܝ ܕܠܵܐ ܗܘ̤ܵܬܼ ܒܪܝܼܬܼܵܐ: ܘܠܵܐ ܡܸܕܸܡ. ܠܵܐ ܫܡܲܝܵܐ: ܘܠܵܐ ܐܲܪܥܵܐ. ܠܵܐ ܡܲܠܲܐܟܹ̈ܐ: ܘܠܵܐ ܚܕܼܵܐ ܡ̣ܢ ܐܲܝܠܹܝܢ ܕܲܗ̤ܘܲܝ̈. ܘܐܲܝܟܲܢ ܡ̣ܢ ܫܹܠܝ ܐܲܝܬܝܼ ܠܲܗܘܵܝܵܐ ܠܟܼܠܗܹܝܢ: ܕܤܸܦܩܲܬ̤ ܠܹܗ ܕܢܸܨܒܸܿܐ ܒܲܠܚܘܿܕܼ. ܘܟܼܠܡܸܕܸܡ ܟܲܕܼ ܡܫܲܡܠܲܝ: ܩܵܡ̣ ܩܕܼܵܡܵܘܗܝ. ܘܢܵܚܹ̇ܬܼ ܡܸܟܹܝܠ ܒܪܸܥܝܵܢܹܗ: ܟܲܕܼ ܡܸܬܼܝܲܒܲܠ ܥܲܠ ܟܠܗܹܝܢ ܒܸܪ̈ܝܵܬܹܗ ܕܐܲܠܵܗܵܐ. ܘܡܸܬܼܒܲܩܸܐ ܒܲܥܒܼܵܕܼܵܘ̈̇ܝ ܪ̈ܵܡܹܐ ܘܲܬܼܗܝܼܪܹ̈ܐ: ܚܸܟܼܡܬܵܐ ܕܒܼܵܪܘܿܝܘܼܬܹܗ ܕܲܒܼܗܘܿܢ. ܡܕܲܒܿܪܵܢܘܼܬܹܗ ܡܵܪܕܲܬ ܠܟܼܠ ܬܲܪ̈ܥܝܵܢ: ܚܲܝܠܵ ܬܡܝܼܗܵܐ ܘܡܸܬܼܡܲܨܝܵܢܵܐ ܕܥܵܒܼܘܿܕܼܘܼܬܹܗ: ܒܪܝܬܼܵܐ ܕܡ̣ܢ ܠܵܐ ܡܸܕܸܡ ܐܲܝܬܝܼ ܠܲܗܘܵܝܵܐ ܒܤܲܓܿܝܼܐܘܼܬܼ ܦܘܼܪ̈ܫܵܢܹܐ ܡܫܲܚ̈ܠܦܹܐ ܕܠܵܐ ܡܸܬܼܡܢܹܝܢ. ܘܕܲܐܝܟܲܢ ܥܬܝܼܕܼ ܕܲܢܚܲܒܹܠܝܼܗ̇ ܬܘܼܒܼ ܠܗܵܕܹܐ: ܡ̣ܢ ܗܵܢܵܐ ܛܘܼܟܵܤܵܐ ܬܡܝܼܗܵܐ: ܡ̣ܢ ܗܵܢܵܐ ܨܸܒܼܬܼܵܐ ܕܲܟܼܝܵܢܹ̈ܐ: ܡ̣ܢ ܗܵܢܵܐ ܪܲܗܛܵܐ ܡܛܲܟܿܤܵܐ ܕܒܸܪ̈ܝܵܬܼܵܐ: pb. 257 ܙܲܒܼ̈ܢܹܐ ܘܥܸܕܵܢܹ̈ܐ: ܡܠܲܚܡܘܼܬܼܵܐ ܕܠܸܠܝܵܐ ܘܐܝܼܡܵܡܵܐ: ܫܘܼܚ̈ܠܵܦܹܐ ܡܥܲܕܼܪ̈ܵܢܹܐ ܕܫܲܢ̄ܬܐ: ܨܘܼܒܵܬܵܐ ܕܐܲܪܥܵܐ: ܐܵܕܼܫܹ̈ܐ ܡܫܲܓܼܢܲܝ̈ܵܐ ܕܡܸܢܵܗ̇. ܒܸܢܝܵܢܹ̈ܐ ܤܩܝܼ̈ܠܹܐ ܕܲܡܕܼܝ̈ܢܵܬܼܵܐ: ܘܒܼܝܼܪ̈ܵܬܼܵܐ ܦܐܲܝ̈ܬܐ ܕܲܒܼܗܹܝܢ. ܪܲܗܛܗܘܿܢ ܬܟܼܝܼܒܼܵܐ ܕܲܒܼܢܲܝ̈ܢܵܫܵܐ: ܟܝܵܢܵܐ ܕܲܥܡܝܼܠ ܘܲܫܚܝܼܩ. ܡ̣ܢ ܕܟܲܕܼ ܥܵܐܹ̇ܠ: ܘܲܥܕܲܡܵܐ ܕܢܵܦܹ̇ܩ ܡܸܢܹܗ. ܘܕܐܲܝܟܲܢ ܒܵܛܹ̇ܠ ܡ̣ܢ ܫܹܠܝ ܛܘܼܟܵܤܵܐ ܗܵܢܵܐ ܬܗܝܼܪܵܐ: ܘܐܵܬܹ̇ܐ ܥܵܠܡܵܐ ܐ̄ܚܪܹܢܵܐ ܕܟܼܠ ܟ̱ܠܹܗ ܥܘܼܗܕܵܢܵܐ ܕܗܵܕܹܐ ܒܪܝܼܬܼܵܐ ܩܲܕܼܡܵܝܵܬܐ ܠܵܐ ܤܵܠܹ̇ܩ ܥܲܠ ܒܵܠܵܐ ܕܐ̄ܢܵܫ. ܘܗܵܘܹ̇ܐ ܗܘܼܦܵܟܼܵܐ ܐ̄ܚܪܹܢܵܐ ܘܚܘܼ̈ܫܵܒܹܐ ܐ̄ܚܪ̈ܵܢܹܐ: ܘܪܸܢܝܵܐ ܐ̄ܚܪܹܢܵܐ؟ ܘܬܼܘܼܒܼ: ܠܵܬ ܡܸܬܼܥܲܗܲܕܼ ܟܝܵܢܵܐ ܕܲܒܼܢܲܝ̈ܢܵܫܵܐ ܠܗܵܢܵܐ ܥܵܠܡܵܐ: ܘܠܵܐ ܠܗܘܼܦܵܟܼܵܐ ܩܲܕܡܵܝܵܐ ܕܒܹܗ. ܡܸܬܼܠܒܸܟܼ ܠܹܗ ܓܹܝܪ ܚܵܘܪܵܐ ܕܪܸܥܝܵܢܗܘܿܢ: ܒܲܚܙܵܬܼܵܐ ܕܗܵܘ̇ ܬܘܼܩܵܢܵܐ. ܘܠܵܐ ܬܘܼܒܼ ܡܸܤܬܿܦܸܩ ܠܡܸܦܢܵܐ ܒܥܘܼܗܕܵܢܹܗ: ܥܲܠ ܕܵܪܹ̈ܐ ܕܒܸܤܪܵܐ ܘܲܕܼܡܵܐ. ܕܥܲܡܹܗ ܕܚܘܼܒܵܠܵܐ ܕܗܵܢܵܐ: ܡܸܚܕܼܵܐ ܫܩܹ̇ܠ ܫܘܼܪܵܝܵܐ ܗܵܘ̇. ܐܘܿ ܐܸܡܵܐ ܕܡܸܬܿܛܲܥܝܵܐ ܡܸܢܫܹܠܝ ܡ̣ܢ ܒܢܹ̈ܝܗ̇ ܕܝܸܠܕܲܬ̤ ܘܪܲܝܲܬ̤ ܘܚܲܟܿܡܲܬ̤: ܘܒܲܪܦܵܦ ܥܲܝܢܵܐ ܡܸܢܼܟܲܬܦܝܼܢ ܠܥܘܼܒܵܐ ܐ̄ܚܪܹܢܵܐ: ܘܗܵܘܹ̇ܝܢ ܒܢܲܝ̈ܵܐ ܚܲܬܝܼ̈ܬܹܐ ܠܲܥܩܲܪܬܼܵܐ ܗܵܝ̇ ܕܠܵܐ ܡܸܡܬܼܘܿܡ ܝܸܠܕܲܬ̤. ܐܸܬܼܒܲܤܲܡܝ ܠܲܡ ܥܩܲܪܬܼܵܐ: ܗܵܝ̇ ܕܠܵܐ ܝܵܠ̇ܕܵܐ: ܒܲܒܼ̈ܢܲܝܵܐ ܕܝܸܠܕܲܬ̤ ܠܹܟܼܝ ܐܲܪܥܵܐ. ܘܪܵܢܹܐ ܒܗܵܘ̇ ܬܲܗܪܹܗ: ܐܵܪܵܐ ܡܟܵܐ ܟܲܝ ܐ̄ܚܪܹܢܵܐ ܐܝܼܬܼ ܠܹܗ ܠܲܡܩܵܡ ܠܗܵܢܵܐ: ܘܕܸܐܡܲܬܼܝ ܫܵܩܹ̇ܠ ܫܘܼܪܵܝܵܐ ܗܵܘ̇؟ ܘܲܟܼܡܵܐ ܟܲܝ ܕܵܡ̇ܟܿܝܼܢ ܗܵܠܹܝܢ ܦܲܓܼܪܹ̈ ܒܗܵܢܵܐ ܙܢܵܐ: ܟܲܕܼ ܡܙܝܼܓܼܝܼܢ ܓܘܿܫܡܵܐ ܘܥܲܦܪܵܐ ܒܲܚ̈ܕܼܵܕܹܐ: ܘܕܲܐܝܟܲܢ ܟܲܝ ܗܵܘܹ̇ܐ ܗܵܘ̇ ܕܘܼܒܵܪܵܐ؟ ܘܒܲܐܝܕܵܐ ܕܡܘܼܬܼܵܐ ܩܵܐܹ̇ܡ ܗܵܢܵܐ ܟܝܵܢܵܐ: ܘܒܲܐܝܢܵܐ ܙܢܵܐ ܐܵܬܹ̇ܐ ܠܲܒܼܪܝܼܬܼܵܐ ܕܬܲܪܬܹܝܢ؟ ܘܲܒܼܗܵܠܹܝܢ ܘܕܲܐܝܟܼ ܗܵܠܹܝܢ: ܫܸܠܝܵܐ ܢܵܦܹ̇ܠ ܥܠܵܘܗܝ. ܘܡܸܬܼܓܲܢܒܵܐ: ܟ̱ܠܵܗ̇ pb. 258 ܪܓܸܫܬܼܵܐ ܕܦܲܓܼܪܵܢܘܼܬܹܗ. ܘܛܵܘܪܵܐ ܪܲܒܵܐ ܒܫܸܬܼܩܵܐ ܡܩܵܘܸܐ: ܟܲܕܼ ܬܲܗܝܼܪ ܥܲܠ ܤܘܼܥܪ̈ܵܢܵܘܗܝ ܠܵܐ ܡܸܬܿܕܲܪ̈ܟܵܢܹܐ ܕܐܲܠܵܗܵܐ. ܘܲܒܼܗܵܝ̇ ܫܵܥܬܐ ܩܵܐܹ̇ܡ ܘܤܵܐܹ̇ܡ ܒܘܼܪܟܵܐ: ܘܡܲܤܸܩ ܬܵܘܕܝܼܬܼܵܐ ܒܕܸܡ̈ܥܹܐ ܤܲܓܝܼ̈ܐܵܬܼܵܐ: ܠܐܲܠܵܗܵܐ ܚܲܟܝܼܢ ܒܲܥܒܼܵܕܼܵܘ̈ܗܝ: ܕܠܵܐ ܡܸܬܿܕܲܪܟܿܝܼܢ ܤܘܼܥܪ̈ܵܢܵܘܗܝ: ܘܠܵܐ ܤܬܝܼܪ̈ܵܬܼܵܐ ܕܬܲܪܥܝܼܬܹܗ ܡܫܲܒܲܚܬܼܵܐ: ܒܐܲܝܠܹܝܢ ܕܲܥܒܲܕܼ ܘܕܲܥܬܼܝܼܕܼ ܕܢܸܒܸܿܕܼ. ܐܲܝܢܵܘ ܠܸܒܵܐ ܕܟܹܐܦܵܐ: ܕܲܒܼܗܵܠܹܝܢ ܙܵܘ̈ܥܹܐ ܠܵܐ ܢܸܗܘܸܐ ܕܠܵܐ ܢܲܦܫܵܐ: ܘܢܸܦܸܠ ܥܠܵܘܗܝ ܫܸܬܼܩܵܐ ܘܒܼܘܼܠܗܵܝܵܐ: ܘܢܸܬܿܕܒܲܪ ܡ̣ܢ ܟ̱ܠܵܗ̇ ܡܸܬܿܬܿܙܝܼܥܵܢܘܼܬܼܵܐ ܕܪܸܓܼܫܹܐ ܘܲܕܼܙܵܘ̈ܥܹܐ؟ ܛܘܼܒܼܵܘܗܝ ܠܡܲܢ ܕܲܠܗܵܠܹܝܢ ܐܸܫܬܘܝܼ! ܛܘܼܒܼܵܘܗܝ ܠܡܲܢ ܕܗܵܕܹܐ ܗܘ̤ܵܬܼ ܡܲܪܢܝܼܬܹܗ ܒܠܸܠܝܵܐ ܘܐܝܼܡܵܡܵܐ! ܛܘܼܒܼܵܘܗܝ ܠܡܲܢ ܕܲܒܼܗܵܠܹܝܢ ܐܸܬܼܥܢܝܼ ܒܟܼܠܗܘܿܢ ܚܲܝܵܘ̈ܗܝ! ܠܟܼܠܒܲܪܢܵܫ ܚܵܫܲܚ ܪܸܥܝܵܢܵܐ ܗܵܢܵܐ: ܘܝܲܬܝܼܪܵܐܝܼܬܼ ܠܐܲܝܢܵܐ ܕܲܒܼܫܸܠܝܵܐ ܚܵܝܹ̇ܐ. ܘܙܵܕܹܩ ܕܢܸܗܘܸܐ ܐܲܡܝܼܢ ܠܘܵܬܹܗ ܪܸܢܝܵܐ ܕܗܵܠܹܝܢ ܥܘܼ̈ܗܕܵܢܹܐ: ܒܟܼܠܗܘܿܢ ܥܸܕܵܘ̈ܗܝ. ܠܗܵܠܹܝܢ ܪ̈ܘܼܫܡܹܐ ܐܵܠ̇ܨܵܐ ܕܢܸܤܲܒܼ ܒܼܲܢܵܫܵܐ ܒܡܲܚܫܲܒܼܬܹܗ: ܘܡ̣ܢ ܕܲܢܦܲܩ̣ ܡ̣ܢ ܨܠܘܿܬܼܵܐ: ܒܗܘܿܢ ܢܸܪܢܸܐ ܘܢܸܗܪܘܿܓܼ. ܒܗܵܠܹܝܢ ܥܸܢ̈ܝܵܢܹܐ ܘܲܒܼܗܵܢܵܐ ܪܸܢܝܵܐ: ܠܵܐ ܗܵܘܹ̇ܐ ܐܲܬܼܪܵܐ ܠܥܘܼܗܕܵܢܵܐ ܢܘܼܟܼܪܵܝܵܐ ܒܓܼܵܘ ܪܸܥܝܵܢܹܗ ܕܒܲܪܢܵܫܵܐ ܠܲܡܒܲܛܵܠܘܼܬܹܗ: ܡ̣ܢ ܥܘܼܗܕܵܢܵܐ ܐܲܡܝܼܢܵܐ ܕܐܲܠܵܗܵܐ. ܘܐܸܢ ܒܫܘܼܪܵܝܵܐ ܠܵܐ ܡܲܪܓܸܫ ܒܚܲܝܠܵܐ ܡܥܲܕܪܵܢܵܐ ܕܡ̣ܢ ܗܵܠܹܝܢ ܡܸܛܠ ܦܲܗܝܘܼܬܹܗ: ܠܵܐ ܬܸܬܼܩܲܛܲܥ ܠܹܗ. ܠܵܘ ܡܸܚܕܼܵܐ ܕܪܵܡܹ̇ܐ ܐܲܟܵܪܵܐ ܙܲܪܥܵܐ ܒܐܲܪܥܹܗ: ܥܲܡܵܗ̇ ܕܬܲܪܡܝܼܬܹܗ ܕܙܲܪܥܵܐ ܡܸܚܕܼܵܐ ܠܲܫܢܵܢܵܐ ܚܵܙܹ̇ܐ. ܢܲܩܝܼܦ ܗ̄ܘ̣ ܠܙܲܪܥܵܐ ܩܘܼܛܵܥܵܐ ܘܲܽܦܤܵܩ ܡܥܲܝ̈ܵܐ. ܐܸܠܵܐ ܗܲܢܝܼ ܠܹܗ ܠܦܲܠܵܚܵܐ ܐܸܡܲܬܼܝ ܕܐܵܟܹ̇ܠ ܡ̣ܢ ܠܲܚܡܹܗ: ܕܘܼܥܬܹܗ ܝܲܬܝܼܪܵܐܝܼܬܼ ܗܲܢܝܼܐܵܐ ܠܹܗ. ܪܸܢܝܵܐ ܕܹܝܢ ܗܵܢܵܐ ܒܓܼܵܘ pb. 259 ܫܸܠܝܵܐ ܢܛܝܼܪܵܐ: ܗܲܢܝܼܐܘܼܬܼܵܐ ܕܠܵܐ ܤܵܟܼ ܢܵܤܹ̇ܝܟܼ ܒܠܸܒܵܐ. ܘܲܠܘܵܬܼ ܬܸܡܗܵܐ ܠܵܐ ܡܸܬܼܡܲܠܠܵܢܵܐ ܢܵܓܹ̇ܕܼ ܠܗܵܘܢܵܐ: ܩܲܠܝܼܠܵܐܝܼܬܼ. ܘܛܘܼܒܼܵܘܗܝ ܠܡܲܢ ܕܐܸܬܼܦܬܲܚ ܩܕܼܵܡܵܘܗܝ ܗܵܢܵܐ ܡܲܒܘܼܥܵܐ: ܘܐܸܫܬܝܼ ܡܸܢܹܗ ܒܟܼܠ ܫܵܥܵܘ̈ܗܝ ܕܠܸܠܝܵܐ ܘܕܐܝܼܡܵܡܵܐ! ܝܵܠܘܿܦܵܐ. ܡܵܢܵܘ ܚܵܒܼܘܼܫܵܐ ܕܟܼܠܗܘܿܢ ܥܲܡ̈ܠܹܐ ܒܗܵܢܵܐ ܕܘܼܒܵܪܵܐ: ܕܟܲܕܼ ܠܵܘܬܹܗ ܢܡܲܢܲܥ ܐ̄ܢܵܫ: ܡܸܫܬܵܘܕܲܥ ܕܲܠܤܵܟܹܗ ܕܕܼܙܼܒܵܪܵܐ ܡܲܓܝܼ؟ ܡܲܠܦܵܢܵܐ. ܡܵܐ ܕܡܸܫܬܿܘܸܐ ܠܐܲܡܝܼܢܘܼܬܼܵܐ ܕܲܨܠܘܿܬܼܵܐ. ܡܵܐ ܕܲܠܗܵܕܹܐ ܡܲܛܝܼ: ܨܹܝܕܼ ܤܵܟܼܵܐ ܕܟܼܠ ܡܝܲܬܿܪ̈ܵܢ ܤ̣ܡܲܟܼ: ܕܡܸܟܹܝܠ ܗܘ̤ܵܐ ܠܹܗ ܒܹܝܬܼ ܡܲܥܡܪܵܐ ܕܪܘܼܚܵܐ: ܐܸܠܵܐ ܐ̄ܢܵܫ ܠܡܵܘܡܲܒܼܬܼܵܐ ܕܦܵܪܲܩܠܹܝܛܵܐ ܩܲܒܸܠ̣ ܚܲܬܝܼܬܼܵܐܝܼܬܼ: ܠܗܵܕܹܐ ܐܲܡܝܼܢܘܼܬܼܵܐ ܕܲܨܠܘܿܬܼܵܐ ܕܲܢܫܲܡܠܸܐ ܒܲܢܝܵܚܵܐ ܠܵܡ ܡܲܨܝܵܐ. ܪܘܼܚܵܐ ܠܲܡ ܡܵܐ ܕܥܸܡܪܲܬ̤ ܒܒܲܪܢܵܫܵܐ: ܠܵܐ ܫܵܠ̇ܝܵܐ ܡ̣ܢ ܨܠܘܿܬܼܵܐ: ܗ̤ܝ ܪܘܼܚܐ ܐܲܡܝܼܢܵܐܝܼܬܼ ܡܨܲܠܝܵܐ. ܗܵܝܕܹܝܟ ܠܵܐ ܟܲܕܼ ܕܲܡܝܼܟܼ ܘܠܵܐ ܟܲܕܼ ܥܝܼܪ: ܨܠܘܿܬܼܵܐ ܠܵܐ ܦܵܤ̇ܩܵܐ ܡ̣ܢ ܢܲܦܫܹܗ. ܐܸܠܵܐ ܐܸܢ ܐܵܟܹ̇ܠ ܘܐܸܢ ܫܵܬܹ̇ܐ: ܘܐܸܢ ܕܲܡܝܼܟܼ ܘܐܸܢ ܨܒܼܘܼ ܤܵܥܲܪ: ܘܲܥܕܲܡܵܐ ܕܐܸܢ ܒܫܸܢܬܼܵܐ ܛܲܒܿܝܼܥ: ܥܸܛܪܹ̈ܐ ܕܲܨܠܘܿܬܼܵܐ ܒܓܼܵܘ ܠܸܒܹܗ ܥܵܛ̇ܪܝܼܢ ܕܠܵܐ ܥܲܡܠܵܐ. ܘܠܲܨܠܘܿܬܼܵܐ ܠܵܘ ܒܲܬܼܚܘܼܡܵܐ ܩܢܸܐ ܠܵܗ̇ ܗܵܝܕܹܝܟܼ: ܐܸܠܵܐ ܘܲܒܼܟܼܠܗܘܿܢ ܥܸܕܵܢܵܘ̈ܗܝ: ܘܟܲܕܼ ܫܠܸܐ ܡ̣ܢ ܠܒܲܪ: ܗ̤ܝ ܟܲܕܼ ܗ̤ܝ ܡܸܫܬܲܡܫܵܐ ܒܟܲܤܝܘܼܬܹܗ. ܫܸܬܼܩܗܘܿܢ ܠܲܡ ܕܲܫ̈ܦܲܝܵܐ ܨܠܘܿܬܼܵܐ ܗ̄ܘ̣: ܐܵܡܲ݁ܪ ܐ̄ܢܵܫ ܠܒܼܝܼܫ ܠܲܫܝܼܚܵܐ. ܡܸܛܠ ܕܚܘܼܫܵܒܲܝ̈ܗܘܿܢ: ܙܵܘ̈ܥܹܐ ܐܸܢܘܿܢ ܐܲܠܵܗܵܝܹ̈ܐ. ܪ̈ܦܵܬܹܝܗ̇ ܠܲܡ ܕܬܲܪܥܝܼܬܼܵܐ܆ ܕܟܼܝܼܵܬܼܵܐ: ܩܵܠܹ̈ܐ ܐܸܢܘܿܢ ܒܗܝܼ̈ܠܹܐ: ܕܲܒܼܗܘܿܢ ܙܵܡ̇ܪܝܼܢ ܠܟܲܤܝܵܐ ܟܲܤܝܵܐܝܼܬܼ. pb. 260 ܝܵܠܘܿܦܵܐ. ܡܵܢܲܐ ܨܠܘܿܬܼܵܐ ܕܪܘܼܚ: ܘܐܲܝܟܲܢ ܢܸܫܬܘܸܐ ܠܗܵܕܹܐ؟ ܡܲܠܦܵܢܵܐ. ܙܵܘ̈ܥܹܐ ܐܸܢܘܿܢ ܢܲܦܫܵܢܵܝܹ̈ܐ: ܕܡܸܫܬܵܘܬܿܦܝܼܢ ܠܡܲܥܒܿܕܼܵܢܘܼܬܼܵܐ ܕܪܘܼܚܵܐ ܕܩܘܼܕܼܫܵܐ: ܒܝܲܕܼ ܚܲܬܿܝܼܬܼܘܼܬܼܵܐ ܕܕܲܟܼܝܘܼܬܼܵܐ. ܘܚܲܕܼ ܡ̣ܢ ܪܸܒܿܘܿ ܒܢܲܝ̈ܢܵܫܵܐ: ܡܸܫܬܿܟܲܚ ܕܡܸܫܬܿܘܸܐ ܠܗܵܕܹܐ. ܐ̄ܪܵܙܵܐ ܗ̄ܘ̣ ܕܲܗܘܵܝܵܐ ܕܗܵܘ̇ ܕܘܼܒܵܪܵܐ ܕܲܥܬܼܝܼܕܼ. ܒܲܕܼܡܸܬܼܥܲܠܸܐ ܘܦܵܐܹ̇ܫ ܟܵܝܵܢܵܐ: ܡ̣ܢ ܟ̱ܠܹܗ ܙܵܘܥܵܐ ܕܥܘܼܗܕܵܢܵܐ ܕܐܲܝܠܹܝܢ ܕܲܬܼܢܵܢ. ܠܵܘ ܕܲܡܨܲܠܵܝܘܼ ܡܨܲܠܸܐ: ܐܸܠܵܐ ܡܲܪܓܵܫܘܼ ܡܲܪܓܫܵܐ ܢܲܦܫܵܐ ܒܨܸܒܼ̈ܘܵܬܼܵܐ ܪ̈ܘܼܚܵܢܵܝܬܼܵܐ ܕܗܵܘ̇ ܥܵܠܡܵܐ: ܡܸܕܸܡ ܕܪܲܒܿ ܡ̣ܢ ܬܲܪܥܝܵܬܼܵܐ ܕܲܒܼܢܲܝ̈ܢܵܫܵܐ. ܐܲܝܠܹܝܢ ܕܤܘܼܟܵܠܵܐ ܕܲܥܠܲܝܗܹܝܢ ܡܸܬܿܬܿܙܝܼܥ ܒܹܗ: ܒܝܲܕܼ ܚܲܝܠܵܐ ܕܪܘܼܚܵܐ. ܚܵܘܪܵܐ ܐܝܼܬܼܵܘܗܝ ܗܵܘܢܵܢܵܝܵܐ:܆ ܘܠܵܘ ܙܵܘܥܵܐ ܘܲܒܼܥܵܬܼܵܐ ܕܲܨܠܘܿܬܼܵܐ. ܡ̣ܢ ܨܠܘܿܬܼܵܐ ܓܹܝܪ: ܥܸܠܬܐ ܫܵܩ̇ܠܵܐ. ܡܸܛܠ ܗܵܟܹܝܠ ܕܐ̄ܢܵܫܵܐ ܕܕܲܐܝܟܼ ܗܵܠܹܝܢ: ܠܤܵܟܼܵܐ ܕܕܲܟܼܝܘܼܬܼܵܐ ܐܸܬܼܡܲܛܝܼܘ ܡ̣ܢ ܟܲܕܘܼ. ܠܲܝܬܿ ܥܸܕܵܢܵܐ ܕܠܵܘ ܒܲܨܠܘܿܬܼܵܐ ܢܵܒܼ̇ܗܝܼܢ ܙܵܘܥܲܝ̈ܗܘܿܢ ܓܵܘܵܝܹ̈ܐ: ܐܲܝܟܼ ܕܐܸܡ̇ܪܹܬܼ ܡ̣ܢ ܠܥܸܠ: ܟܠ ܐܸܡܲܬܼܝ ܕܲܡܕܝܼܩ ܥܠܲܝܗܘܿܢ ܪܘܼܚܵܐ: ܒܲܨܠܘܿܬܼܵܐ ܡܸܫܟܲܚ ܠܗܘܿܢ ܕܐܝܼܬܲܝܗܘܿܢ. ܘܡܸܢܵܗ̇ ܕܵܒܲܪ ܠܗܘܿܢ ܒܝܲܕܼ ܬܹܐܘܿܪܝܼܵܐ: ܗܵܝ̇ ܕܡܸܬܼܦܲܫܩܵܐ ܚܙܵܬܼܵܐ ܕܪܘܼܚ. ܠܵܘ ܟܲܕܼ ܥܲܠ ܡܬܼܵܚܵܐ ܕܲܨܠܘܿܬܼܵܐ ܤܢܝܼܩܝܼܢ: ܘܤܸܕܼܪܵܐ ܕܛܲܟܼܤܵܐ ܕܬܸܫܡܸܫܬܼܵܐ ܤܲܓܝܼܐܬܼܵܐ. ܕܒܲܠܚܘܿܕܼ ܤܵܦܹ̇ܩ ܠܗܘܿܢ ܗ̤ܘ ܥܘܼܗܕܵܢܵܐ ܕܐܲܠܵܗܵܐ: ܘܡܸܚܕܼܵܐ ܐܲܝܟܼ ܕܲܒܼܫܸܒܼܝܼܵܐ ܡܸܬܿܕܲܒܼܪܝܼܢ ܒܚܘܼܒܵܐ. ܒܪܵܡ ܡ̣ܢ ܩܵܘܡܵܐ ܕܒܼܵܗ̇ ܠܵܐ ܡܲܗܡܹܝܢ ܠܲܓܼܡܵܪ: ܟܲܕܼ ܐܝܼܩܵܪܵܐ ܡܦܲܠܓܼܝܼܢ ܠܲܨܠܘܿܬܼܵܐ: ܒܗܵܝ̇ ܕܥܲܠ ܪܸ̈ܓܼܠܲܝܗܘܿܢ ܩܵܝ̇ܡܝܼܢ ܒܥܸܕܵܢܹ̈ܐ ܕܝܼܕܼܝܼܥܝܼܢ: ܤܛܲܪ ܡ̣ܢ ܗܵܝ̇ ܕܐܲܡܝܼܢܘܼܬܼܵܐ. ܚܵܙܹ̇ܝܢܲܢ ܓܹܝܪ ܠܩܲܕܝܼܫܵܐ ܐܲܢܛܘܿܢܝܼܣ: ܕܟܲܕܼ ܥܲܠ ܪܸ̈ܓܼܠܵܘܗܝ ܩܵܐܹ̇ܡ ܒܲܨܠܘܿܬܼܵܐ ܕܲܬܼܫܲܥ pb. 261 ܫܵܥ̈ܝܼܢ: ܐܲܪܓܸܫ̣ ܕܐܸܬܼܥܲܠܝܼ ܡܲܕܥܹܗ. ܘܲܐ̄ܚܪܹܢܵܐ ܡ̣ܢ ܩܲܕܝܼ̈ܫܹܐ: ܟܲܕܼ ܦܫܝܼܛܵܢ ܐܝܼܕܼܵܘ̈ܗܝ ܘܩܵܐܹ̇ܡ ܒܲܨܠܘܿܬܼܵܐ: ܐܸܫܬܿܟܲܚ ܒܬܸܡܗܵܐ ܐܲܪܒܿܥܵܐ ܝܵܘܡ̈ܝܼܢ. ܘܲܐ̄ܚܪ̈ܵܢܹܐ ܤܲܓܝܼ̈ܐܹܐ: ܐܲܝܠܹܝܢ ܕܐܸܢ ܐ̄ܢܵܫ ܒܵܥܹ̇ܐ: ܡܸܫܟܲܚ ܠܗܘܿܢ ܒܬܲܫܥ̈ܝܵܬܼܗܘܿܢ: ܕܲܒܼܩܵܘܡܵܐ ܝܑܼܕܼܝܼܥܵܐ ܕܒܲܨܠܘܿܬܼܵܐ ܐܸܫܬܿܟܲܚܘ: ܟܲܕܼ ܐܝܼܬܲܝܗܘܿܢ ܒܡܵܘܗܲܒܼܬܼܵܐ ܕܐܲܝܟܼ ܗܵܕܹܐ. ܡܸܫܬܿܘܸܐ ܕܹܝܢ ܐ̄ܢܵܫ ܠܵܗ̇ ܠܗܵܕܹܐ: ܐܸܡܲܬܼܝ ܕܢܸܫܠܚܝܼܗ̇ ܠܲܚܛܝܼܬܼܵܐ ܡ̣ܢ ܠܒܲܪ ܘܡ̣ܢ ܠܓܼܵܘ: ܒܝܲܕܼ ܢܛܘܼܪܲܬܼ ܦܘܼܩܕܵܢܵܘ̈ܗܝ ܕܡܵܪܲܢ: ܗܵܠܹܝܢ ܕܤܝܼܡܝܼܢ ܠܘܼܩܒܲܠ ܗܵܕܹܐ. ܗܵܠܹܝܢ ܕܐ̄ܢܵܫ ܒܛܲܟܼܤܹܗ ܐܸܢ ܡܸܬܼܚܲܫܲܚ ܒܗܘܿܢ: ܡܸܬܼܐ̱ܠܸܨ ܗܵܢܵܐ ܡ̣ܢ ܩܛܝܼܪ: ܕܐܵܦ ܡ̣ܢ ܟܠܗܘܿܢ ܤܘܼܥܪ̈ܵܢܹܐ ܐ̄ܢܵܫܵܝܹ̈ܐ ܢܸܦܘܿܩ. ܗܵܢܵܘ ܕܹܝܢ: ܠܦܲܓܼܪܵܐ ܠܡܸܫܠܲܚ: ܘܲܠܡܸܗܘܵܐ ܠܒܲܪ ܡܸܢܹܗ: ܐܲܝܟܼ ܕܲܠܡܹܐܡܲܪ. ܠܵܐ ܠܲܟܼܝܵܢܹܗ: ܐܸܠܵܐ ܠܲܚܫܲܚܬܹܗ. ܠܲܝܬܿ ܐ̄ܢܵܫ ܕܲܒܼܝܼܫܹܗ ܕܤܵܝܘܿܡܵܐ ܐܸܬܼܚܲܫܲܚ ܒܗܘܿܢ ܒܗܵܠܹܝܢ: ܘܲܚܛܝܼܬܼܵܐ ܚܲܡܤܢܲܬ̤ ܕܲܬܼܩܵܘܸܐ ܠܘܵܬܹܗ. ܡܸܛܠܗܵܕܹܐ ܐܵܦ ܡܵܪܲܢ: ܕܐܵܘܵܢܹܗ ܢܸܥܒܿܕܼܝܼܘܗܝ ܠܗܵܘ̇ ܕܲܠܗܘܿܢ ܢܵܛܲܪ: ܐܸܫܬܵܘܕܝܼ ܒܐܹܘܲܢܓܲܠܝܼܘܿܢ. ܝܵܠܘܿܦܵܐ. ܘܐܲܝܢܵܘ ܫܘܼܡܠܵܝܵܐ ܕܟܼܠܗܘܿܢ ܦܹܐܪܹ̈ܐ ܕܪܘܼܚ؟ ܡܲܠܦܵܢܵܐ. ܡܵܐ ܕܡܸܫܬܿܘܸܐ ܐ̄ܢܵܫ ܠܚܘܼܒܵܐ ܓܡܝܼܪܵܐ ܕܐܲܠܵܗܵܐ. ܝܵܠܘܿܦܵܐ. ܘܡ̣ܢ ܐܲܝܟܵܐ ܡܸܫܬܵܘܕܲܥ ܐܲܝܢܵܐ ܕܲܠܗܵܕܹܐ ܡܲܓܝܼ؟ ܡܲܠܦܵܢܵܐ. ܕܟܼܠ ܐܸܡܲܬܼܝ ܕܡܸܬܿܬܿܙܝܼܥ ܥܘܼܗܕܵܢܹܗ ܕܐܲܠܵܗܵܐ ܒܬܲܪܥܝܼܬܼܵܐ:: ܡܸܚܕܼܵܐ ܪܵܬܲܚ ܠܸܒܵܐ ܒܚܘܼܒܹܗ. ܘܥܲܝ̈ܢܹܐ: ܡܲܚ̈ܬܼܵܢ ܕܸܟ̈ܥܹܐ ܒܲܡܫܲܪܬܿܚܘܼܬܼܵܐ. ܡܥܵܕܼ ܗ̄ܘ̣ ܓܹܝܪ ܚܘܼܒܵܐ: ܡ̣ܢ ܥܘܼܗܕܵܢܵܐ ܕܚܲܒܿܝܼܒܼܵܐ: ܠܡܸܫܓܲܪ ܕܸܡ̈ܥܹܐ. ܐܲܝܢܵܐ ܕܐܲܝܟܼ ܗܵܟܲܢܵܐ ܗ̄ܘ̣: ܠܵܐ ܡܸܫܬܿܟܲܚ ܠܹܗ ܥܸܕܵܢܵܐ: ܕܲܤܦܝܼܩ ܡ̣ܢ ܕܸܡ̈ܥܹܐ. ܒܗܵܝ̇ ܕܠܵܐ ܚܵܤܲܪ ܠܹܗ ܐܲܡܝܼܢܵܐܝܼܬܼ ܡܠܘܿܐܵܐ ܕܥܘܼܗܕܵܢܵܐ ܕܸܡ̈ܥܹܐ. ܒܗܵܝ̇ ܕܠܵܐ ܚܤܲܪ ܠܹܗ ܐܡܝܼܢܵܐܝܼܬܼ ܡܠܘܼܐܵܐ ܕܥܘܼܗܪܵܢܵܐ pb. 262 ܕܐܲܠܵܗܵܐ ܠܗܵܢܵܐ. ܐܲܝܟܲܢܵܐ ܕܐܵܦ ܒܓܼܵܘܼ ܫܸܢܬܼܵܐ: ܥܲܡܹܗ ܡܡܲܠܸܠ. ܡܥܵܕܼ ܗ̄ܘ̣ ܚܘܼܒܵܐ ܤܵܥܲܪ ܗܵܠܹܝܢ. ܘܗܵܢܵܘ ܫܘܼܡܠܵܝܹܗ ܕܒܲܪܢܵܫܵܐ ܒܗܵܠܹܝܢ ܚܲܝܹ̈ܐ. ܝܵܠܘܿܦܵܐ. ܐܲܝܢܵܐ ܕܒܼܵܬܲܪ ܥܲܡܠܹ̈ܐ ܤܲܓܝܼ̈ܐܹܐ ܘܛܘܼܪ̈ܵܦܹܐ: ܘܢܸܨ̈ܚ̤ܵܐ ܕܐܸܬܼܟܲܫܲܪ ܘܲܩܢ̣ܵܐ: ܤܵܥܹ̇ܐ ܥܠܵܘܗܝ ܚܘܼܫܒܼܵܐ ܗܵܘ̇ ܕܪܵܡܘܼܬܼܵܐ: ܒܲܕܼܢܵܤܹ̇ܒܼ ܡܠܘܿܐܵܐ ܡ̣ܢ ܫܘܼܦܪܵܐ ܕܲܡܝܲܬܿܪܘܼܬܹܗ: ܘܡܲܝܬܸܐ ܠܥܘܼܗܕܵܢܵܐ ܤܘܿܓܼܵܐܐ ܕܥܲܡ̈ܠܹܐ ܕܲܤܒܲܠ̣: ܒܡܵܢܵܐ ܡܲܨܝܵܐ ܕܢܹܐܚܘܿܕܼ ܚܘܼܫܵܒܼܵܘ̈ܗܝ: ܘܢܲܩܢܸܐ ܙܗܝܼܪܘܼܬܼܵܐ ܠܢܲܦܫܹܗ ܕܠܵܐ ܢܸܬܿܛܦܝܼܣ ܠܹܗ؟ ܡܲܠܦܵܢܵܐ. ܟܲܕܼ ܝܵܕܼܥ̇ ܕܗܵܟܲܢܵܐ ܢܵܦܹ̇ܠ ܡ̣ܢ ܐܲܠܵܗܵܐ ܐܲܝܟܼ ܛܲܪܦܵܐ ܝܲܒܿܝܼܫܵܐ ܕܢܵܦܹ̇ܠ ܡ̣ܢ ܐܝܼܠܵܢܵܐ: ܗܵܝܕܹܝܟ ܝܵܕܲܥ ܠܚܲܝܠܵܐ ܕܢܲܦܫܹܗ: ܕܐܸܢ ܒܚܲܝܠܹܗ ܩܢ̣ܵܐ ܐܸܢܹܝܢ ܠܗܵܠܹܝܢ ܡܝܲܬܿܪ̈ܵܬܼܵܐ: ܘܤܲܝܒܲܪ ܠܗܵܠܹܝܢ ܟܠܗܘܿܢ ܐܵܓܼܘܼܢܹ̈ܐ ܥܲܠ ܐܲܦܲܝ̈ܗܘܿܢ: ܐܸܢ ܩܵܦܹ̇ܣ ܡܸܢܹܗ ܡܵܪܝܵܐ ܠܥܘܼܕܼܪܵܢܹܗ: ܘܠܹܗ ܒܲܠܚܘܿܕܼܵܘܗܝ ܢܲܥܠܝܼܘܗܝ ܥܲܡ ܤܵܛܵܢܵܐ ܠܕܼܪܵܐ: ܟܲܕܼ ܠܵܐ ܢܵܚܹ̇ܬܼ ܥܲܡܹܗ ܐܲܝܟܼ ܥܵܝܵܕܼܵܐ: ܚܲܝܠܵܐ ܗܵܘ̇ ܕܢܵܚܹ̇ܬܼ ܥܲܡ ܢܲܨܝܼ̈ܚܹܐ ܒܐܵܓܼܘܿܢܲܝ̈ܗܘܿܢ. ܬܲܡܵܢ ܓܹܝܪ ܡܸܬܼܓܲܠܝܵܐ ܚܲܝܠܬܼܵܢܘܼܬܹܗ: ܐܵܘ ܡܵܠܘܿܢ ܬܵܚܘܿܒܼܘܼܬܹܗ. ܕܐܝܼܬܼ ܗ̄ܘ̣ ܟܵܟܹܝܠ ܒܛܝܼܠܘܼܬܹܗ ܕܐܲܠܵܗܵܐ ܥܲܠ ܒܲܪܢܵܫܵܐ: ܕܲܒܼܟܼܠܙܒܲܢ ܢܵܛ̇ܪܵܐ ܘܲܡܚܲܝܠܵܐ ܠܹܗ. ܘܒܼܵܗ̇ ܗ̤ܘ ܙܵܟܹ̇ܐ ܟܠ ܬܸܓܼܡ̈ܝܼܢ ܕܲܒܼܢܲܝ̈ܢܵܫܵܐ: ܐܸܢ ܒܐܵܓܼܘܿܢܵܐ ܕܢܲܟܼܦܘܼܬܼܵܐ: ܘܐܸܢ ܒܚܲܫܵܐ ܕܤܵܗܕܘܼܬܼܵܐ: ܘܒܼܫܲܪܟܵܐ ܕܟܼܠܗܹܝܢ ܥܲܤ̈ܩܵܬܼܵܐ ܕܲܡܤܲܝܒܲܪ ܚܠܵܦ ܗܵܠܹܝܢ ܐܲܠܵܗܵܝ̈ܵܬܐ. ܗܵܕܹܐ ܝܑܼܕܼܝܼܥܵܐ ܗ̣̄ܝ ܢܲܗܝܼܪܵܐܝܼܬܼ: ܘܠܲܝܬܿ ܦܘܼܠܵܓܼܵܐ ܕܲܥܠܹܝܗ̇. ܐܲܝܟܲܢܵܐ ܓܹܝܪ ܡܲܨܝܵܐ ܕܲܟܼܝܵܢܵܐ ܢܸܙܟܹܝܘܗܝ ܠܗܵܢܵܐ ܟ̱ܠܹܗ ܚܲܝܠܵܐ ܕܚܘܼ̈ܬܼܚܵܬܹܐ ܕܠܵܐ ܫܲܠܘܵܐ: ܕܤܝܼܡܝܼܢ ܒܗܲܕܵܡܵܘ̈ܗ pb. 263 ܘܲܡܛܲܪܦܝܼܢ ܠܹܗ: ܘܲܢܚܲܡܤܸܢ ܐܸܢܘܿܢ؟ ܘܐܲܝܟܲܢ ܐ̄ܚܪ̈ܵܢܹܐ ܕܠܵܐ ܟܲܕܼ ܠܵܗ̇ ܠܕܲܟܼܝܘܼܬܼܵܐ ܡܲܚܒܼܝܼܢ ܘܝܲܐܝܼܒܼܝܼܢ: ܗܵܕܹܐ ܠܵܐ ܡܸܫܟܿܚܝܼܢ ܟܲܕܼ ܤܲܓܝܼ ܡܸܬܼܟܲܬܿܫܝܼܢ. ܐܸܠܵܐ ܟܠܝܘܿܡ ܚܵܝ̇ܒܝܼܢ ܡܸܢܵܗ̇: ܟܲܕܼ ܡܛܲܪܦܝܼܢ ܘܐܲܒܼܝܼܠܝܼܢ ܘܒܼܵܟܹ̇ܝܢ ܥܲܠ ܢܲܦܫܗܘܿܢ: ܐܲܢ̄ܬܿ ܕܹܝܢ ܦܫܝܼܩܵܐܝܼܬܼ ܛܥܝܼܢ ܐܲܢ̄ܬܿ ܠܗܘܿܢ ܠܥܘܼܤܵܩܵܘ̈ܗܝ ܕܲܟܼܝܵܢܵܐ ܕܗܵܟܲܢ ܩܫܹܝܢ ܘܠܵܐ ܡܸܬܼܐܠܸܨ ܐܲܢ̄ܬܿ ܤܲܓܼܝܼ؟ ܐܵܘ ܐܲܝܟܲܢܵܐ ܡܲܨܝܵܐ ܘܲܐ̄ܚܪܹܢܵܐ: ܕܢܹܐܪܥܝܼܘܗܝ ܗ̄ܘ̣ܵܐ ܒܒܸܤܪܵܐ ܚܵܫܘܿܫܵܐ ܠܲܦܤܵܩܵܐ ܕܲܒܼܦܲܪ̈ܙܠܹܐ ܘܲܤܪ̈ܵܩܹܐ ܕܲܒܼܟܼܠ ܗܲܕܵܡܵܘ̈ܗܝ: ܘܲܒܼܟܼܠܙܢ̈ܝܼܢ ܕܫܸܢ̈ܕܹܐ ܘܠܵܐ ܚܵܐܹ̇ܒܼ ܡ̣ܢ ܚܲܫܹ̈ܐ: ܗܵܘ̇ ܕܠܵܐ ܡܨܸܐ ܡܤܲܝܒܲܪ ܐܵܦܠܵܐ ܠܟܼܘܼܒܵܐ ܙܥܘܿܪܵܐ ܕܕܼܵܥܹ̇ܨ ܒܛܸܦܪܹܗ: ܘܗܵܢܵܐ ܟ̱ܠܹܗ ܫܘܼܚܠܵܦܵܐ ܕܫܸܢ̈ܕܹܐ ܡܤܲܝܒܲܪ ܗ̄ܘ̣ܵܐ ܘܠܵܐ ܚܵܐܹ̇ܫ ܐܲܝܟܼ ܥܝܵܕܹܐ ܕܲܟܼܝܵܢܵܐ: ܐܸܠܘܼ ܠܵܐ ܕܚܲܝܠܵܐ ܐ̄ܚܪܹܢܵܐ ܤܛܲܪ ܡ̣ܢ ܗܵܘ̇ ܕܲܟܼܝܵܢܵܐ ܐܝܼܬܼ ܠܹܗ ܡ̣ܢ ܓܲܒܼ ܐ̄ܚܪܹܝܢ: ܘܗ̤ܘܝܘܼ ܬܼܵܟܹ̇ܣ ܡܸܢܹܗ ܘܲܡܦܲܟܲܗ ܠܚܲܝܠܵܐ ܗܵܘ̇ ܕܬܲܫܢܝܼ̈ܕܹܐ؟܀ ܠܲܝܬܿ ܓܹܝܪ ܟܵܠܝܼܬܼܵܐ ܕܐܵܦ ܢܤܝܼܡ ܗܵܪܟܵܐ ܬܲܫܥܝܼܬܼܵܐ: ܕܬܲܗܪܵܐ ܗ̄ܘ̣ ܐܲܝܟܼ ܕܒܲܫܪܵܪܵܐ ܫܲܪܒܵܗ̇ ܠܫܵܡܘܿܥܹ̈ܐ. ܡܸܛܠ ܕܹܝܢ ܕܐܲܝܬܝܼܢܲܢ ܠܥܘܼܗܕܵܢܵܐ ܫܲܪܒܵܐ ܕܲܒܼܛܝܼܠܘܼܬܹܗ ܕܐܲܠܵܗܵܐ ܕܨܹܝܕܼ ܒܲܪܢܵܫܵܐ: ܗܵܝ̇ ܕܲܡܢܲܨܚܵܐ ܠܹܗ ܒܟܼܠܗܘܿܢ ܐܵܓܼܘܿܢܹ̈ܐ ܕܲܚܠܵܦ ܡܝܲܬܿܪܘܼܬܼܵܐ: ܠܵܐ ܙܵܕܹܩ ܕܢܸܥܒܲܪ ܠܬܲܫܥܝܼܬܼܵܐ ܗܵܕܹܐ܀ ܤܘܿܩܪܵܛܝܼܣ ܡܲܟܼܬܒܼܵܢܵܐ ܒܫܲܪܒܵܐ ܕܥܲܠ ܬܲܫܥ̈ܝܵܬܼܵܐ ܥܹܕ̈ܬܵܢܵܝܵܬܼܵܐ ܕܡܲܟܼܬܿܒܼܵܢܘܼܬܹܗ: ܟܲܕܼ ܥܵܒܹ̇ܕܼ ܥܘܼܗܕܵܢܵܐ ܕܡܲܠܟܹ̈ܐ ܕܪ̈ܗܘܿܡܵܝܹܐ: ܘܡܵܛܹ̇ܐ ܠܘܵܬܼ ܝܘܼܠܝܵܢܘܿܣ ܡܲܠܟܵܐ: ܟܲܕܼ ܒܲܙܥܘܿܪ̈ܝܵܬܼܵܐ ܡܚܵܘܸܐ ܥܲܠ ܒܝܼ̈ܫܬܼܵܐ ܕܲܤܒܲܠ̣ܘ ܒܢܲܝ̈ ܥܹܕܬܵܐ ܘܢܵܚܹ̇ܬܼ ܩܲܠܝܼܠ ܒܫܲܪܒܹܗ: ܐܵܡܲ݁ܪ ܬܲܫܥܝܼܬܼܵܐ ܚܕܼܵܐ ܡ̣ܢ ܗܵܠܹܝܢ ܕܲܗ̤ܘܲܝ̈ ܒܐܲܢܛܝܵܟܼܝܵܐ pb. 264 ܡܕܼܝܼܢ̄ܬܐ܀ ܠܚܲܕܼ ܠܲܡ ܕܹܝܢ ܛܲܠܝܵܐ ܕܲܫܡܹܗ ܬܹܐܵܕܘܿܪܘܿܣ: ܕܐܸܬܼܩܲܪܲܒܼ ܠܹܗ ܡ̣ܢ ܚܲܢ̈ܦܹܐ ܠܤܘܿܠܘܼܣܛܝܼܣ ܕܐܸܬܼܦܩܸܕܼ ܗ̄ܘ̣ܵܐ ܥܲܠ ܗܵܕܹܐ: ܠܐܘܼ̈ܠܨܵܢܹܐ ܘܲܠܫܸܢ̈ܕܹܐ ܐܲܫܠ̱ܡܹܗ. ܟܲܕܼ ܦܩܲܕܼ ܕܢܸܤܬܿܪܸܩ ܥܲܠ ܟ̱ܠܹܗ ܦܲܓܼܪܹܗ: ܘܗܵܝܕܹܝܢ ܫܲܒܼܩܹܗ ܗ̄ܘ̣ܵܐ ܡ̣ܢ ܫܸܢ̈ܕܹܐ: ܟܲܕܼ ܒܤܲ ܕܠܵܐ ܡܸܟܹܝܠ ܚܵܝܹ̇ܐ. ܐܲܠܵܗܵܐ ܕܹܝܢ ܐܝܼܬܼܵܘܗܝ ܗ̄ܘ̣ܵܐ ܡܫܵܘܙܒܼܵܢܹܗ ܕܓܲܒܼܪܵܐ ܗܵܘ̇ ܛܘܼܒܼܵܢܵܐ: ܚ̣ܝܵܐ ܓܹܝܪ ܡ̣ܢ ܒܵܬܲܪ ܗܵܝ̇ ܡܵܘܕܝܵܢܘܼܬܼܵܐ ܙܲܒܼܢܵܐ ܤܲܓܝܼܐܵܐ. ܠܹܗ ܠܗܵܢܵܐ ܬܹܐܵܕܘܿܪܘܼܣ: ܪܘܼܦܝܼܢܘܿܣ ܗܵܘ̇ ܕܐܲܟܼܬܸܒܼ ܐܹܩܠܹܤܝܲܣܬܝܼܩܹܐ ܒܠܸܫܵܢܵܐ ܪܗܘܿܡܵܝܵܐ: ܐܸܡ݂ܲܪ: ܕܒܼܵܬܲܪ ܙܲܒܼܢܵܐ ܤܲܓܝܼܐܵܐ ܗܘ̤ܵܐ ܒܥܸܢܝܵܢܹܗ ܕܗܵܢܵܐ ܛܘܼܒܼܵܢܵܐ ܬܹܐܵܕܘܘܿܪܘܿܣ. ܘܫܲܐܠܹܗ ܕܐܸܢ ܟܲܕܼ ܒܵܠܲܥ ܗ̄ܘ̣ܵܐ: ܡܲܪܓܸܫ ܗ̄ܘ̣ܵܐ ܒܟܹܐܒܼܵܐ ܤܲܓܝܼܐܵܐ. ܗ̤ܘ ܕܹܝܢ ܠܲܡ ܦܲܢܝܼ ܠܹܗ ܦܸܬܼܓܼܵܡܵܐ: ܕܩܠܝܼܠ ܙܥܘܿܪ ܛܵܒܼ ܗܵܘ̇ܝܵܐ ܗ̄ܘ̣ܵܬܼ ܠܹܗ ܡܲܪܓܫܵܢܘܼܬܼܵܐ ܕܚܲܫܹ̈ܐ. ܥܠܲܝܡܵܐ ܓܿܝܪ ܚܲܕܼ ܩܵܐܹ̇ܡ ܗ̄ܘ̣ܵܐ ܠܘܵܬܹܗ: ܘܲܡܟܲܦܲܪ ܗ̄ܘ̣ܵܐ ܠܹܗ ܕܘܼܥܬܼܵܐ ܡ̣ܢ ܐܵܓܼܘܿܢܵܐ: ܘܲܡܚܲܝܸܠ ܗ̄ܘ̣ܵܐ ܢܲܦܫܹܗ: ܘܦܘܼܪܓܵܝܵܐ ܥܵܒܹ̇ܕܼ ܗ̄ܘ̣ܵܐ ܠܹܗ ܥܸܕܵܢܵܐ ܕܐܵܓܼܘܿܢܵܐ ܕܫܸܢܕܵܘ̈ܗܝ. ܐܘܿ ܠܲܡܪܲܚܡܵܢܘܼܬܹܗ ܕܲܠܵܗܵܐ: ܟܡܵܐ ܩܲܪܝܼܒܼܵܐ ܛܲܝܒܿܘܼܬܹܗ: ܠܐܲܝܠܹܝܢ ܕܡܸܛܠܵܬܹܗ ܥܵܐ̇ܠܝܼܢ ܠܐܵܓܼܘܿܢܵܐ ܠܲܡܤܲܝܒܵܪܘܼ ܒܲܤܝܼܡܵܐܝܼܬܼ ܚܲܫܹ̈ܐ ܕܲܚܠܵܦܵܘܗܝ! ܠܵܐ ܬܸܛܠܘܿܡ ܛܲܝܒܿܘܼܬܹܗ ܕܐܲܠܵܗܵܐ ܕܲܠܘܵܬܼܵܟܼ: ܐܘܿ ܒܲܪܢܵܫܵܐ. ܐܸܢ ܕܹܝܢ ܓܲܠܝܵܐ ܗ̣̄ܝ ܡܵܕܹܝܢ ܕܠܵܘ ܐܲܢ̄ܬܿ ܗ̄ܘ̣ ܙܲܟܵܝܵܐ: ܐܸܠܵܐ ܐܝܼܬܲܝܟ ܐܲܢ̄ܬܿ ܐܲܝܟܼ ܐܘܿܪܓܵܢܘܿܢ: ܘܡܵܪܝܵܐ ܗ̄ܘ̣ ܙܵܟܹ̇ܐ ܚܠܵܦܲܝܟ: ܘܐܲܢ̄ܬܿ ܫܵܩܹ̇ܠ ܐܲܢ̄ܬܿ ܫܡܵܐ ܕܙܲܟܵܝܹ̈ܐ ܡܵܘܗܲܒܼܬܼܵܐ ܕܡܲܓܵܢ: ܡܵܢܵܐ ܟܵܠܝܼܬܼܵܐ ܐܝܼܬܼ ܕܲܒܼܟܼܠܙܒܲܢ ܠܹܗ ܟܲܕܼ ܠܹܗ ܠܚܲܝܠܵܐ ܬܸܫܐܲܠ: ܕܲܒܼܟܼܠܙܒܲܢ ܠܗܘܿܢ ܟܲܕܼ ܠܗܘܿܢ ܠܢܸܨ̈ܚܵܢܹܐ ܬܸܤܲܒܼ ܟܲܕܼ ܡܵܘܕܸܐ ܐܲܢ̄ܬܿ ܒܗܵܕܹܐ؟ ܠܵܐ ܟܲܝ pb. 265 ܫܡܝܼܥܵܐ ܠܵܟܼ ܐܘܿ ܓܲܒܼܪܵܐ: ܡ̣ܢ ܒܪܵܫܝܼܬܼ ܘܡ̣ܢ ܪܵܘܡܵܐ ܕܝܵܘ̈ܡܵܬܼܵܐ: ܕܲܟܼܡܵܐ ܐܲܬܼܠܹܝ̈ܛܹܐ ܢܦܲܠ̣ܘ ܡ̣ܢ ܪܵܘܡܵܐ ܕܢܸܨܚܵܢܲܝ̈ܗܘܿܢ ܟܲܕܼ ܠܗܵܕܹܐ ܛܠܲܡ̣ܘܼ؟ ܥܠܵܘܗܝ ܕܫܲܪܒܵܐ. ܟܲܕܼ ܤܲܓܝܼ̈ܐܵܢ ܘܲܡܫܲܚ̈ܠܦܵܢ ܡܵܘ̈ܗܒܼܵܬܹܗ ܕܐܲܠܵܗܵܐ ܠܘܵܬܼ ܓܸܢܤܵܐ ܐ̄ܢܵܫܵܝܵܐ: ܦܘܼܪܫܵܢܵܐ ܐܝܼܬܼ ܒܗܹܝܢ ܠܘܵܬܼ ܡܩܲܒܿܠܵܢܲܝ̈ܗܹܝܢ: ܘܲܙܥܘܿܪܘܼܬܼܵܐ ܘܪܲܒܿܘܼܬܼܵܐ ܒܡܵܘ̈ܗܒܼܵܬܵܐ. ܘܐܵܦܸܢ ܟܠܗܹܝܢ ܬܡܝܼ̈ܗܵܢ ܐܸܢܹܝܢ ܘܲܫܒܼܝܼ̈ܚܵܢ: ܐܝܼܬܼ ܗ̄ܘ̣ ܒܗܹܝܢ ܕܥܵܠܒܵܐ ܠܲܚܒܲܪܬܼܵܗ̇ ܒܲܫܒܼܝܼܚܘܼܬܼܵܐ ܘܒܼܐܝܼܩܵܪܵܐ. ܘܕܲܪܓܼܵܐ ܡ̣ܢ ܕܲܪܓܼܵܐ ܡܥܲܠܲܝ ܗ̄ܘ̣: ܐܲܝܟܼ ܡܸܠܲܬܼ ܟܬܼܵܒܼܵܐ. ܘܗܵܕܹܐ ܬܘܼܒܼ ܕܐ̄ܢܵܫ ܠܤܵܥܘܿܪܘܼܬܼܵܐ ܕܛܵܒܼ̈ܬܼܵܐ ܘܲܠܕܼܘܼܒܵܪܹ̈ܐ ܬܲܩ̈ܢܹܐ ܢܸܬܼܦܪܸܫ: ܚܕܼܵܐ ܡ̣ܢ ܡܵܘ̈ܗܒܼܵܬܼܵܐ ܗ̣̄ܝ ܪܹ̈ܫܵܝܵܬܼܵܐ ܕܲܡܫܝܼܚܵܐ. ܤܲܓܝܼ̈ܐܹܐ ܓܹܝܪ ܠܗܵܕܹܐ ܛܲܝܒܿܘܼܬܼܵܐ ܛܵܥܹ̇ܝܢ: ܕܲܫ̣ܘܵܘ ܕܒܹܝܬܼ ܠܗܘܿܢ ܘܲܠܫܲܪܟܵܐ ܕܲܒܼܢܲܝ̈ܢܵܫܵܐ ܦܘܼܪܫܵܢܵܐ ܢܸܗܘܸܐ ܡ̣ܢ ܐܲܠܵܗܵܐ: ܘܢܸܗܘܘܿܢ ܡ̇ܢ ܢܵܤܘܿܒܹ̈ܐ ܕܡܵܘ̈ܗܒܼܵܬܹܗ: ܘܗܵܢܵܐ ܟ̱ܠܹܗ ܥܕܲܡܵܐ ܕܐܵܦ ܠܬܸܫܡܸܫܬܹܗ ܕܡܵܪܝܵܐ ܡܸܬܼܓܒܹܝܢ: ܚܠܵܦ ܩܘܼܒܵܠܛܲܝܒܿܘܼܬܼܵܐ ܕܐܲܡܝܼܢ ܒܦܘܼܡܗܘܿܢ ܥܲܠ ܐܲܦܲܝ̈ ܗܵܕܹܐ: ܠܘܵܬܼ ܚܬܝܼܪܘܼܬܼܵܐ ܐܸܨܛܠܝܼܘ: ܘܪܵܡܘܼܬܼܵܐ ܕܬܲܪܥܝܼܬܼܵܐ ܢܤܲܒܼܘ: ܘܠܵܘ ܐܲܝܟܼ ܡ̇ܢ ܕܢܵܤܘܿܒܹ̈ܐ ܐܸܢܘܿܢ ܕܛܲܝܒܿܘܼܬܼܵܐ: ܒܕܲܫ̣ܘܵܘ ܕܲܢܫܲܡܫܘܼܢ ܠܐܲܠܵܗܵܐ ܒܕܼܘܼܒܵܪܹ̈ܐ ܕܟܲܝ̈ܵܐ ܘܲܒܼܥܲܡ̈ܠܹܐ ܪ̈ܘܼܚܵܢܹܐ: ܐܸܠܵܐ ܐܲܝܟܼ ܡ̇ܢ ܕܒܹܗ ܒܐܲܠܵܗܵܐ ܡܸܙܕܲܕܩܝܼܢ ܒܗܵܕܹܐ: ܗܵܟܲܢܵܐ ܚܵܫ̇ܒܿܝܼܢ ܢܲܦܫܗܘܿܢ: ܚܠܵܦ ܗܵܕܹܐ ܕܐܸܬܼܓܒܼܝܼܘ ܡ̣ܢ ܫܲܪܟܵܐ ܕܲܒܼܢܲܝ̈ܢܵܫܵܐ ܠܒܲܝܬܵܝܘܼܬܹܗ: ܘܠܝܼܕܲܥܬܼܵܐ ܕܐ̄ܪ̈ܵܙܵܘܗܝ. ܘܐܵܦܠܵܐ ܡܸܪܥܲܠ ܪ̈ܵܥ̇ܠܝܼܢ ܒܟܼܠܵܗ̇ ܢܲܦܫܗܘܿܢ ܡܵܐ ܕܗܵܠܹܝܢ ܡܸܬܼܪܲܥܹܝܢ: ܕܲܚ̣ܙܵܘ ܠܚܲܒܼܪ̈ܲܝܗܘܿܢ ܐܲܝܠܹܝܢ ܕܗܵܠܹܝܢ ܐܸܬܼܪܲܥܝܼܘ: ܕܐܲܝܟܲܢ ܐܸܫܬܿܩܸܠ ܡܸܢܗܘܿܢ pb. 266 ܡ̣ܢ ܫܸܠܝܵܐ ܚܲܝܠܵܐ ܗܵܘ̇ ܕܐܸܬܼܗܲܝܡܲܢ ܦܵܛܪܘܿܢܘܼܬܼܗܘܿܢ: ܘܐܸܫܬܿܕܼܝܼܘ ܒܲܪܦܵܦ ܥܲܝܢܵܐ ܡ̣ܢ ܐܝܼܩܵܪܵܐ ܗܵܘ̇ ܪܲܒܵܐ ܕܲܩܢܹܝܢ ܗ̄ܘ̣ܵܘ: ܘܐܸܨܛܠܝܼܘ ܡ̣ܢ ܫܹܠܝ ܘܠܵܬܼ ܦܲܚܙܘܼܬܼܵܐ: ܘܐܸܬܼܦܢܝܼܘ ܥܲܠ ܕܘܼܒܵܪܹ̈ܐ ܨܥܝܼܪܹ̈ܐ ܕܚܲܝ̈ܘܵܬܼܵܐ ܠܵܐ ܡܠܝܼ̈ܠܵܬܐ. ܘܒܲܕܼܠܵܐ ܝܑܼܕܲܥ̣ܘ ܠܚܲܝܠܵܐ ܕܢܲܦܫܗܘܿܢ: ܘܐܸܬܼܥܲܗܲܕܼܘ ܕܠܵܐ ܫܲܠܘܵܐ ܠܗܵܘ̇ ܕܐܲܫܘܝܼ ܐܸܢܘܿܢ ܠܪܲܒܿܘܼܬܼܵܐ ܗܵܕܹܐ ܟ̱ܠܵܗ̇ ܕܲܢܫܲܡܫܘܼܢܵܝܗܝ: ܘܲܠܓܼܵܘ ܡ̣ܢ ܐܝܼܩܵܪܵܐ ܕܡܲܠܟܘܼܬܹܗ ܢܸܗܘܘܿܢ: ܘܚܲܒܼܪܹ̈ܐ ܠܪ̈ܘܼܚܵܢܹܐ ܥܒܲܕܼ ܐܸܢܘܿܢ: ܘܲܠܕܼܘܼܒܵܪܹ̈ܐ ܕܡܲܠܲܐܟܹ̈ܐ ܩܲܪܸܒܼ ܐܸܢܘܿܢ: ܫ̣ܪܵܐ ܐܸܢܘܿܢ ܡ̣ܢ ܦܘܼܠܚܵܢܗܘܿܢ. ܘܚܵܘ̣ܝܼ ܐܸܢܘܿܢ ܒܝܲܕܼ ܫܘܼ̈ܚܠܵܦܹܐ ܕܕܼܘܼܒܵܪ̈ܲܝܗܘܿܢ ܕܡ̣ܢ ܫܸܠܝܵܐ: ܕܠܵܘ ܕܝܼܠܗܘܿܢ ܗ̄ܘ̣ܵܬܼ ܗ̤ܝ ܗܵܕܹܐ ܕܲܢܚܲܡܤܢܘܼܢ ܒܕܼܘܼܒܵܪܹ̈ܐ ܬܲܩ̈ܢܹܐ ܒܟܼܠܵܗ̇ ܗܵܝ̇ ܠܸܙܬܼܵܐ ܕܡ̣ܢ ܟܝܵܢܵܐ ܘܡ̣ܢ ܫܹܐܕܹ̈ܐ ܘܫܲܪܟܵܐ ܕܤܲܩܘܼ̈ܒܼܠܹܐ ܐ̄ܚܪ̈ܵܢܹܐ. ܐܸܠܵܐ ܕܚܲܠܵܐ ܗ̄ܘ̣ܵܬܼ ܕܡܵܘܗܲܒܼܬܼܵܐ ܕܡܸܢܹܗ. ܕܡܸܕܸܡ ܕܫܲܪܟܵܐ ܕܲܒܼܢܲܝ̈ܢܵܫܵܐ ܐܵܦܠܵܐ ܕܢܸܫܡܥܘܼܢ ܡܚܲܡܤܢܝܼܢ ܗ̄ܘ̣ܵܘ ܡܸܛܠ ܥܲܤܩܘܼܬܹܗ: ܗܸܢܘܿܢ ܢܘܼܓܼܪܵܐ ܕܙܲܒܼܢܵܐ ܚܲܡܤܸܢܘ ܒܹܗ ܘܠܵܐ ܚܵܒܼܘ. ܒܗܵܝ̇ ܕܤܵܦܹ̇ܩ ܗ̄ܘ̣ܵܐ ܚܲܝܠܵܐ ܗܵܘ̇ ܕܢܲܩܝܼܦ ܠܗܘܿܢ ܠܲܡܥܲܕܵܪܘܼܬܗܘܿܢ ܒܟܼܠ ܘܠܲܡܢܲܛܵܪܘܼ ܐܸܢܘܿܢ ܒܟܼܠ. ܕܒܲܕܼܓܼܘܿܢ ܟܲܕܼ ܠܗܵܕܹܐ ܛܥ̣ܵܘ: ܫܸܠܡܲܬ̤ ܠܘܵܬܼܗܘܿܢ ܡܸܠܬܼܵܐ ܗܵܝ̇ ܕܐܲܡܝܼܪܵܐ: ܕܒܲܕܼܠܵܐ ܕܵܢ̣ܘ ܒܢܲܦܫܗܘܿܢ ܕܢܸܕܥܘܼܢ ܠܐܲܠܵܗܵܐ. ܗܵܢܵܘ ܕܹܝܢ ܠܡܵܪܗܘܿܢ: ܕܲܠܥܲܦܪܵܐ ܩܲܪܸܒܼ ܠܬܸܫܡܸܫܬܐ ܕܪ̈ܘܼܚܵܢܹܐ. ܐܲܫܠܸܡ̣ ܐܸܢܘܿܢ ܐܲܠܵܗܵܐ: ܠܡܲܕܥܵܐ ܕܲܤܪܝܼܩܘܼܬܼܵܐ. ܘܦܘܼܪܥܵܢܵܐ ܕܙܵܕܹܩ ܗ̄ܘ̣ܵܐ ܠܛܵܥܝܘܼܬܼܗܘܿܢ: ܒܲܩܢܘܿܡܗܘܿܢ ܩܲܒܿܠܘܼܗܝ. ܝܵܠܘܼܦܵܐ. ܐܝܼܬܼ ܟܲܝ ܐ̄ܢܵܫ ܕܟܲܕܼ ܡܲܡܪܲܚ ܐܲܝܟܼ ܕܲܠܡܹܐܡܲܪ ܘܒܲܚܕܼܵܐ ܫܵܒܹ̇ܩ ܠܥܘܼܡܪܵܐ ܕܲܒܼܢܲܝ̈ܢܵܫܵܐ: ܘܡ̣ܢ ܫܹܠܝ ܐܵܕܼܵܡܵܐܝܼܬܼ ܢܵܦܹ̇ܩ ܠܡܲܕܼܒܿܪܵܐ pb. 267 ܠܵܐ ܡܝܲܬܿܒܼܵܐ: ܘܲܠܚܘܼܪܒܵܐ ܕܚܝܼܠܵܐ ܒܲܛܢܵܢܵܐ ܫܲܦܝܼܪ: ܕܡܸܛܠܗܵܕܹܐ ܡܵܐܹ̇ܬܼ ܡ̣ܢ ܝܲܕܼ ܟܲܦܫܵܐ: ܗܵܢܵܘ ܕܹܝܢ ܘܡ̣ܢ ܠܵܐ ܫܟܼܝܼܚܘܼܬܼܵܐ ܕܤܸܬܵܪܵܐ ܘܫܲܪܟܵܐ؟ ܡܲܠܦܵܢܵܐ. ܗܵܘ̇ ܓܹܝܪ ܕܛܲܝܸܒܼ ܥܘܼܡܪܵܐ ܠܚܲܝ̈ܘܵܬܼܵܐ ܡ̣ܢ ܩܕܼܵܡ ܕܢܸܒܼܪܸܐ ܐܸܢܹܝܢ ܘܝܵܨܹ̇ܦ ܕܲܚܫܲܚܬܼܗܹܝܢ: ܠܵܐ ܡܲܗܡܸܐ ܡ̣ܢ ܕܵܚܠܵܘ̈ܗܝ. ܝܲܬܝܪܵܐܝܼܬܼ ܕܲܦܫܝܼܛܵܐܝܼܬܼ: ܘܲܕܼܠܵܐ ܥܘܼܬܵܕܼܵܐ ܐܸܙܲܠ̣ܘ ܒܵܬܼܪܹܗ. ܐܲܝܢܵܐ ܕܠܲܐܠܵܗܵܐ ܫܵܠܹ̇ܡ ܨܸܒܼܝܵܢܹܗ ܒܟܼܠܡܸܕܸܡ: ܠܵܐ ܡܬܼܘܿܡ ܡܸܬܼܪܲܥܸܐ ܡܸܛܠ ܒܝܼ̈ܫܵܬܹܗ ܕܦܲܓܼܪܵܐ ܘܩܸܢܛܹܗ ܠܲܡܦܵܫ ܒܨܵܐܘܼܬܼܵܐ ܕܕܼܘܼܒܵܪܹ̈ܐ: ܘܠܲܡܤܲܝܒܵܪܘܼ ܚܲܝܹ̈ܐ ܕܡܘܼܟܵܟܼܵܐ: ܒܲܕܸܟܵܘܹ̇ܙ ܡ̣ܢ ܐܘܼ̈ܠܨܵܢܹܐ. ܐܸܠܵܐ ܕܓܲܒܼܝܵܐ ܘܗܲܢܝܼܐܵܐ ܚܵܫܹ̇ܒܼ ܗܵܕܹܐ: ܕܟܲܕܼ ܡܸܬܼܢܲܟܼܪܸܐ ܠܟܼܠܹܗ ܥܵܠܡܵܐ ܒܕܲܟܼܝܘܼܬܼܵܐ ܕܕܼܘܼܒܵܪܹ̈ܐ: ܡܸܬܿܛܲܦ ܒܹܝܬܼ ܪ̈ܵܡܵܬܐ ܘܛܘܼܪܹ̈ܐ ܘܛܵܥܹ̇ܐ ܒܐܲܬܼܪܵܐ ܕܚܲܝ̈ܘܵܬܼܵܐ: ܘܠܵܐ ܕܟܲܕܼ ܡܸܬܿܬܿܬܝܼܚ ܒܲܦܓܲܪ ܕܲܡܠܹܝܢ ܨܵܐܘܼܬܼܵܐ ܢܸܚܸܐ: ܟܲܕܼ ܡܫܲܥܒܸܕܼ ܢܲܦܫܹܗ ܠܡܵܘܬܵܐ ܕܟܠܥܸܕܵܢ ܕܡ̣ܢ ܚܲܤܝܘܼܬܼܵܐ ܕܕܼܘܼܒܵܪܹ̈ܐ ܕܟܲܝ̈ܵܐ ܕܲܠܘܵܬܼ ܐܲܠܵܗܵܐ. ܕܠܹܗ ܫܘܼܒܼܚܵܐ ܘܐܝܼܩܵܪܵܐ: ܘܠܲܢ ܢܸܛܲܪ ܒܚܲܤܝܘܼܬܹܗ ܘܲܢܩܲܕܼܫܲܢ ܒܪܘܼܚܹܗ ܠܐܝܼܩܵܪܵܐ ܕܲܫܡܹܗ: ܕܲܢܫܲܒܿܚܝܼܘܗܝ ܙܲܗܝܵܐܝܼܬܼ ܟܠܗܘܿܢ ܝܵܘ̈ܡܵܬܼܵܐ ܕܚܲܝܲܝ̈ܢ. ܐܵܡܹܝܢ܀ ܐܵܡܲ݁ܪ ܓܹܝܪ ܚܲܕܼ ܡ̣ܢ ܩܲܕܝܼ̈ܫܹܐ: ܕܗܵܘܹ̇ܐ ܠܲܡ ܦܲܓܼܪܵܐ ܠܲܚܛܝܼܬܼܵܐ ܚܲܒܼܝܵܘ̈ܗܝ. ܗܵܟܲܢ ܓܹܝܪ ܐܵܠ̇ܨܵܐ ܠܹܗ ܪܘܼܚܵܐ ܕܐܲܠܵܗܵܐ: ܕܲܢܡܘܼܬܼ. ܝܑܼܕܼܝܼܥܵܐ ܓܹܝܪ: ܕܐܸܢ ܠܵܐ ܡܵܐܹ̇ܬܼ: ܠܵܐ ܙܵܟܹ̇ܐ ܠܲܚܛܝܼܬܼܵܐ. ܡ̇ܢ ܕܨܵܒܹ̇ܐ ܠܲܡ ܕܹܝܢ ܕܢܸܥܡܲܪ ܒܹܗ ܡܵܪܲܢ: ܐܵܠܹ̇ܨ ܦܲܓܼܪܹܗ: ܘܲܡܫܲܡܸܫ ܠܡܵܪܲܢ ܒܗܵܠܹܝܢ ܦܹܐܪܹ̈ܐ ܕܪܘܼܚܵܐ ܕܲܟܼܬܼܝܼܒܼܝܼܢ ܒܲܫܠܝܼܚܵܐ. ܘܢܵܛܲܪ ܢܲܦܫܹܗ ܡ̣ܢ ܗܵܠܹܝܢ ܥܒܼܵܕܹ̈ܐ ܕܒܸܤܪܵܐ: ܕܲܟܼܬܲܒܼ ܦܵܘܠܘܿܣ. ܦܲܓܼܪܵܐ ܕܹܝܢ ܕܲܡܙܝܼܓܼܵܐ pb. 268 ܒܹܗ ܚܛܝܼܬܼܵܐ: ܥܲܠ ܥܒܼܵܕܹ̈ܐ ܕܒܸܤܪܵܐ ܡܸܬܿܬܿܬܝܼܚ. ܘܪܘܸܚܵܐ ܕܐܲܠܵܗܵܐ ܡܸܬܿܬܿܢܝܼܚܵܐ: ܥܲܠ ܦܹܐܪܹ̈ܝܗ̇. ܐܸܡܲܬܼܝ ܠܲܡ ܓܹܝܪ ܕܲܟܼܪܝܼܗ ܦܲܓܼܪܵܐ ܒܨܵܘ̈ܡܹܐ ܘܲܒܼܡܘܼ̈ܟܵܟܹܐ: ܚܲܝܠܬܼܵܢܝܵܐ ܗ̣̄ܝ ܢܲܦܫܵܐ ܗ̣̄ ܢܲܦܫܵܐ ܒܪܘܼܚ ܒܲܨܠܘܿܬܼܵܐ. ܡܥܵܕܼ ܗ̄ܘ̣ ܦܲܓܼܪܵܐ ܕܡܵܐ ܕܡܸܬܼܐܠܸܨ ܤܲܓܼܝܼ ܒܐܘܼ̈ܠܨܵܢܹܐ ܕܫܸܠܝܵܐ ܘܚܲܤܝܼܪܘܼܬܼܵܐ: ܘܩܲܪܝܼܒܼܝܼܢ ܕܢܸܬܿܛܲܠܩܘܼܢ ܚܲܝܵܘ̈ܗܝ: ܡܦܝܼܣ ܠܵܟܼ ܕܐܲܪܦܵܢܝ ܩܲܠܝܼܠ: ܕܐܸܬܕܲܝܲܤ ܒܲܡܫܘܼܚܬܼܵܐ. ܗܵܫܵܐ ܠܲܡ ܬܵܪܹܨ ܐ̄ܢܵܐ: ܒܲܕܸܫܸܩ̇ܠܹܬܼ ܢܸܤܝܵܢܵܐ ܕܗܵܟܼܘܵܬܼ ܒܝܼ̈ܫܬܼܵܐ. ܘܡܵܐ ܕܐܲܪܦܝܼܬܵܝܗܝ ܩܲܠܝܼܠ ܡ̣ܢ ܐܘܼܠܨܵܢܵܐ: ܘܤܵܡ̇ܟܲܬܿ ܠܹܗ ܒܲܢܝܵܚܵܐ ܙܥܘܿܪܵܐ: ܒܲܕܼܚܵܤ̣ܬܿ ܥܠܵܘܗܝ: ܘܐܸܬܼܪܵܘܲܚ ܩܲܠܝܼܠ: ܗܵܝܕܹܝܢ ܠܵܚܹ̇ܫ ܠܵܟܼ ܢܝܼܚܵܐܝܼܬܼ ܩܲܠܝܼܠ ܩܲܠܝܼܠ: ܕܐܵܦ ܡ̣ܢ ܚܘܼܪܒܵܐ ܢܸܦܘܿܩ. ܚܲܝܠܬܼܵܢܝܼܢ ܫܘܼܕܵܠܵܘ̈ܗܝ ܤܲܓܝܼ: ܡܨܹܝܢܲܢ ܗ̄ܘ̣ ܠܲܡ ܡ̣ܢ ܗܵܫܵܐ ܕܢܸܬܿܕܲܒܲܪ ܫܲܦܝܼܪ: ܘܲܒܼܩܲܪܝܼܒܼܘܼܬܼܵܐ ܕܝܲܬܼܒܵܐ. ܐܸܬܼܢܲܤܝܼܢܲܢ ܓܹܝܪ ܤܒܲܓܝܼ̈ܐܵܬܼܵܐ: ܘܲܒܼܗܹܝܢ ܒܗܵܠܹܝܢ ܬܲܡܵܢ ܡܸܬܿܕܲܒܿܪܝܼܢܲܢ. ܢܲܤܵܢܝ ܠܲܡ ܡܢܲܤܵܝܘܼ: ܘܐܸܠܵܐ ܗܵܘܹ̇ܐ ܐ̄ܢܵܐ ܐܲܝܟܼ ܨܸܒܼܝܵܢܵܟܼ: ܡܨܹܝܢܲܢ ܗ̄ܘ̣ ܬܘܼܒܼ ܠܡܹܐܬܼܵܐ ܡܸܢܕܪܹܫ: ܗܵܐ ܡܲܕܼܒܿܪܵܐ ܩܕܼܵܡܲܝܢ. ܠܵܐ ܓܹܝܪ ܬܗܲܝܡܢܝܼܘܗܝ: ܐܵܦܸܢ ܪܲܒܲܬܼ ܡܦܝܼܣ ܘܡܸܫܬܵܘܕܸܐ: ܡܸܛܠ ܕܠܵܐ ܥܵܒܹ̇ܕ. ܕܡ̣ܢ ܕܝܲܗ̣̄ܒܼܬܿ ܠܹܗ ܗܵܝ̇ ܩܲܠܝܼܠ ܕܲܬܼܒܲܥ̣: ܕܵܚܹ̇ܐ ܠܵܟܼ ܠܪܵܘܪ̈ܒܼܵܬܼܵܐ: ܕܬܼܘܼܒܼ ܠܵܐ ܤܵܠܹ̇ܩ ܐܲܢ̄ܬܿ ܡܸܢܗܹܝܢ. ܐܸܡܲܬܼܝ ܕܡܸܬܼܩܲܛܥܵܐ ܠܵܟܼ ܡ̣ܢ ܐܘܼ̈ܠܨܵܢܹܐ ܒܕܲܤܒܲܥ̣ܬܿ ܐܸܢܘܿܢ: ܐܸܡܲܪ ܐܲܢ̄ܬܿ ܠܵܟܼ: ܠܗܵܝ̇ ܛܲܡܐܘܼܬܼܵܐ ܘܚܲܝܹ̈ܐ ܡܟܲܬܡܹ̈ܐ ܪܓܝܼܓܼܵܐ ܠܵܟܼ. ܘܐܸܢ ܐܵܡܲ݁ܪ ܠܵܟܼ ܕܲܚܛܝܼܬܼܵܐ ܪܲܒܿܬܐ ܕܗܵܐ ܩܵܛܹ̇ܠ ܐܲܢ̄ܬܿ ܢܲܦܫܵܟܼ: ܐܸܡܲܪ ܠܹܗ: ܩܵܛܹ̇ܠ ܐ̄ܢܵܐ ܠܢܲܦܫܝ: ܡܸܛܠ ܕܠܵܐ ܡܨܸܐ ܐ̄ܢܵܐ ܠܡܸܚܵܐ ܕܲܟܼܝܵܐܝܼܬܼ. ܐܹܡܘܼܬܼ ܗܵܪܟܵܐ: ܘܠܵܐ ܬܘܼܒܼ ܐܸܚܙܸܐ ܡܵܘܬܵܗ̇ ܫܲܝܼܪܵܐ ܕܢܲܦܫܝ ܕܡ̣ܢ ܐܲܠܵܗܵܐ. ܦܲܩܵܚ ܠܝܼ pb. 269 ܕܗܵܪܟܵܐ ܐܹܡܘܼܬܼ ܚܠܵܦ ܕܲܟܼܝܘܼܬܼܵܐ: ܘܠܵܐ ܚܲܝܹ̈ܐ ܒܝܼ̈ܫܹܐ ܐܸܚܸܐ ܒܥܵܠܡܵܐ. ܗܵܢܵܐ ܡܵܘܬܵܐ: ܒܨܸܝܼܢܝ ܓܒܹܝ̇ܬܼ ܚܠܵܦ ܚܛܗܲܝ̈. ܩܵܛܹ̇ܠ ܐ̄ܢܵܐ ܢܲܦܫܝܼ: ܡܸܛܠ ܕܲܚܛܹ̇ܝܬܼ ܠܐܲܠܵܗܵܐ. ܘܬܼܘܼܒܼ: ܠܵܐ ܡܲܪܓܸܙ ܐ̄ܢܵܐ ܠܹܗ. ܡܵܐ ܠܝܼ ܚܲܝܹ̈ܐ ܕܪܲܚܝܼܩܝܼܢ ܡ̣ܢ ܐܲܠܵܗܵܐ؟ ܗܵܠܹܝܢ ܒܝܼ̈ܫܵܬܼܵܐ ܡܚܲܡܤܸܢ ܐ̄ܢܵܐ ܠܗܹܝܢ: ܘܡܸܛܠܵܬܼܗܹܝܢ: ܠܵܐ ܐܸܗܘܸܐ ܢܘܼܟܼܪܵܝܵܐ ܠܗܵܘ̇ ܤܲܒܼܪܵܐ ܫܡܲܝܵܢܵܐ. ܡܵܢܵܐ ܐܸܬܼܒܿܪܝܼܬܼ ܒܥܵܠܡܵܐ: ܐܸܢ ܤܦܝܼܩܵܐܝܼܬܼ ܥܸܠܹ̇ܬܼ ܘܢܸܦ̇ܩܹܬܼ ܡܸܢܹܗ؟ ܘܡܵܢܵܐ ܝܘܼܬܼܪܵܢܵܐ ܐܝܼܬܼ ܠܐܲܠܵܗܵܐ ܡ̣ܢ ܚܲܝܹ̈ܐ ܕܝܼܠܝ ܕܲܒܼܥܵܠܡܵܐ: ܐܸܢ ܒܝܼܫܵܐܝܼܬܼ ܚܵܝܹ̇ܐ ܐ̄ܢܵܐ ܒܹܗ؟ ܕܲܠܩܘܼܒܼܠܵܐ: ܐܵܦ ܡܲܪܓܵܙܘܼ ܡܲܪܓܸܙ ܐ̄ܢܵܐ ܠܹܗ!