Isaac of Nineveh. “Discourse 39.” Based upon Digital Syriac Corpus. Last modified March 5, 2019. https://syriaccorpus.org/430. ܬܘܼܒܼ ܡܸܠܟܹ̈ܐ ܡܥܲܕܪ̈ܵܢܹܐ ܕܚܘܼܒܵܐ. ܠܛ. ܪ̈ܚܝܼ̈ܡܵܢ ܥܲܤ̈ܩܵܬܵܐ ܕܲܚܠܵܦ ܛܵܒܼܬܵܐ: ܐܲܟܼܘܵܬܼܵܗ̇ ܕܛܵܒܼܬܵܐ. ܠܲܝܬܿ ܕܐܸܫܟܲܚ ܢܹܐܚܘܿܕܼ ܡܤܲܪܩܘܼܬܼܵܐ ܚܲܬܝܼܬܬܵܐ: ܐܸܠܵܐ ܐܲܝܢܵܐ ܕܲܦܤܲܩ̣ ܒܪܸܥܝܵܢܹܗ ܕܲܢܤܲܝܒܲܪ ܐܘܼ̈ܠܨܵܢܹܐ ܗܲܢܝܼܐܝܼܬܼ. ܘܠܲܝܬܿ ܕܐܸܫܟܲܚ ܢܤܲܝܒܲܪ ܐܘܼ̈ܠܨܵܢܹܐ: ܐܸܠܵܐ ܐܲܝܢܵܐ ܕܗܲܝܡܸܢ ܕܐܝܼܬܼ ܗ̄ܘ̣ ܡܸܕܸܡ ܕܲܡܝܲܬܲܪ ܡ̣ܢ ܢܝܵܚܹ̈ܐ ܦܲܓܼܪ̈ܵܢܵܝܹܐ: ܕܲܚܠܵܦ ܐܘܼ̈ܠܨܵܢܹܐ ܥܬܝܼܕܼ ܕܢܸܤܲܒܼ. ܟܠ ܕܠܲܡܤܲܪܩܘܼܬܼܵܐ ܥܲܬܸܕܼ ܢܲܦܫܹܗ: ܩܲܕܼܡܵܝܑܬܼ ܪܸܚܡܲܬܼ ܐܘܼ̈ܠܨܵܢܹܐ ܡܸܬܿܬܿܙܝܼܥܵܐ ܒܹܗ: ܘܗܵܝܕܹܝܢ ܕܵܐܹ̇ܠ ܒܹܗ ܚܘܼܫܵܒܼܵܐ ܠܡܸܤܬܲܪܵܩܘܼ ܡ̣ܢ ܡܵܐ ܕܲܬܼܢܵܢ. ܘܟܼܠ ܕܠܐܘܼ̈ܠܨܵܢܹܐ ܡܸܬܼܩܲܪܲܒܼ: ܩܲܕܼܸܡܵܝܑܬܼ ܒܗܲܝܡܵܢܘܼܬܼܵܐ ܡܸܫܬܲܪܲܪ: ܘܗܵܝܕܹܝܢ ܩܵܪܹܒܼ ܠܐܘܼ̈ܠܨܵܢܹܐ. ܐܲܝܢܵܐ ܕܟܲܕܼܸ ܡ̣ܢ ܨܸܒܼ̈ܘܵܬܼܵܐ ܐܸܤܬܲܪܲܩ: ܡ̣ܢ ܪܸ̈ܓܼܫܹܐ ܠܵܐ ܐܸܤܬܲܪܲܩ ܒܲܚܙܵܬܼܵܐ ܘܲܒܼܫܸܡܥܵܐ: ܐܘܼ̈ܠܨܵܢܹܐ ܥܦܝܼ̈ܦܹܐ ܥܲܬܸܕܼܸ ܠܢܲܦܫܹܗ: ܘܲܥܦܝܼܦܵܐܝܼܬܼ ܡܸܬܼܐܠܸܨ. ܡܵܠܘܿܢ ܕܹܝܢ: ܕܟܲܕܼ ܡ̣ܢ ܚܫܲܚܬܵܐ ܕܲܒܼܗܹܝܢ ܐܸܬܼܢܙܲܪ: ܒܝܲܕܼ ܪܸ̈ܓܼܫܹܐ ܡܸܬܼܒܲܤܲܡ ܒܗܹܝܢ: ܗܸܢܹܝܢ ܟܲܕܼ ܗܸܢܹܝܢ ܤܵܒܹ̇ܠ ܡ̣ܢ ܚܲܫܹ̈ܐ ܕܲܒܼܗܹܝܢ: 297 ܐܲܝܠܹܝܢ ܕܡ̣ܢ ܩܕܝܼܡ ܬܵܥܹ̇ܫ ܗ̄ܘ̣ܵܐ ܤܘܼܥܪܵܢܵܐܝܼܬܼ. ܡܸܛܠ ܕܥܘܼܗܕܵܢܵܐ ܕܲܥܝܵܕܲܝ̈ܗܹܝܢ: ܠܵܐ ܡܸܬܼܠܚܸܐ ܡ̣ܢ ܬܲܪܥܝܼܸܬܼܵܐ. ܐܸܢܕܼܝܼܢ ܨܘܼܪ̈ܵܬܼܵܐ ܗܲܓܵܓܼܵܝ̈ܵܬܐ ܕܪܸܥܝܵܢܵܐܝܼܬܼ ܗܵܘ̈ܝܵܢ: ܐܵܠ̈ܨܵܢ ܠܒܲܪܢܵܫܵܐ ܒܸܠܥܵܕܼ ܨܸܼܒܼ̈ܘܵܬܼܵܐ: ܡܵܢܵܐ ܢܹܐܡܲܪ ܥܲܠ ܐܝܼܬܼܘܼܬܼܵܐ ܩܲܪܝܼܒܼܵܬܐ؟ ܀ ܫܲܦܝܼܸܪܵܐ ܡܵܕܹܝܢ ܝܑܼܚܝܼܕܼܵܝܘܼܬܼܵܐ ܘܛܵܒܼ ܡܥܲܕܪܵܐ: ܕܲܠܚܘܼ̈ܫܵܒܹܐ ܓܲܢ̄ܒܵܪܵܐܝܼܬܼ ܡܫܲܬܿܩܵܐ: ܘܒܲܡܤܲܝܒܿܪܵܢܘܼܬܼܵܐ ܕܢܸܬܿܕܲܪܲܫ ܚܵܝܠܵܐ ܩܵܪܝܵܐ. ܘܚܘܼܡܤܵܢܵܐ ܪܲܒܵܐ ܡܲܠܦܵܐ ܠܹܗ ܠܐ̄ܢܵܫ: ܒܝܲܕܼ ܕܘܼܪܵܫܵܐ ܕܡܲܩܢܝܵܐ ܠܹܗ ܥܪܝܼܨܘܼܬܼ ܐܘܼ̈ܠܨܵܢܹܐ: ܕܲܫܟܼܝܼܚܵܐ ܒܵܗ̇ ܐܵܐܲܢܩܵܐܝܼܬܼ܀ ܠܵܐ ܬܸܒܼܥܸܐ ܡܸܠܟܵܐ ܡ̣ܢ ܐܲܝܢܵܐ ܕܠܵܐ ܐܝܼܬܼܵܘܗ ܒܲܪ ܢܝܼܫܵܟܼ ܒܕܼܘܼܒܵܪܵܐ: ܘܐܵܦܸܢ ܛܵܒܼ ܚܲܟܿܝܼܡ. ܡܗܲܝܡܲܢ ܗ̄ܘ̣ ܗܸܕܼܸܝܘܿܛܵܐ ܕܢܲܤ̣ܝܼ ܨܸܒܼ̈ܘܵܬܼܵܐ: ܡ̣ܢ ܚܲܟܿܝܼܡܵܐ ܕܲܡܡܲܠܸܠ ܡ̣ܢ ܒܘܼܚܵܢܵܐ: ܠܒܲܪ ܡ̣ܢ ܢܸܤܝܵܢܵܐ ܕܲܒܼܗܹܝܢ. ܡܵܢܵܘ ܢܸܤܝܵܢܵܐ؟ ܢܸܤܝܵܢܵܐ؟ ܢܸܤܝܵܢܵܐ ܠܵܘ ܗܵܢܵܘ: ܕܐ̄ܢܵܫ ܢܸܥܘܿܠ ܘܢܸܓܘܿܫ ܨܸܒܼ̈ܘܵܬܼܸܵܐ: ܟܲܕܼ ܠܵܐ ܢܵܤܹ̇ܒܼ ܝܲܕܼܥܵܬܼ̈ܗܹܝܢ ܒܝܘܼܬܼܪܵܢܵܐ ܘܚܘܼܤܪܵܢܵܐ: ܘܙܲܒܼܢܵܐ ܢܟܲܬܲܪ ܒܗܹܝܢ. ܟܡܵܐ ܙܲܒܼ̈ܢܝܼܢ ܐܲܦܲܝ̈ܗܹܝܢ ܕܨܸܒܼ̈ܘܵܬܼܵܐ ܡܚܵܘ̈ܝܵܢ ܕܚܘܼܤܪܵܢܵܐ: ܟܲܕܼ ܠܓܼܵܘ ܡܸܢܗܹܝܢ: ܬܹܐܓܼܘܪܬܵܐ ܫܟܼܝܼܚܵܐ ܕܡܲܠܝܵܐ ܝܘܼܬܼܪ̈ܵܢܹܐ. ܒܹܗ ܒܲܙܢܵܐ ܘܗܵܝ̇ ܕܕܲܠܩܘܼܒܼܠܵܐ ܕܗܵܕܹܐ: ܗܵܟܲܢܵܐ ܡܸܤܬܲܟܿܠܵܐ܀ ܤܲܓܝܼ̈ܐܹܐ ܬܘܼܒܼ ܐܝܼܬܼ: ܕܡ̣ܢ ܨܸܒܼ̈ܘܵܬܼܵܐ ܕܝܘܼܬܼܪܵܢܵܐ: ܚܘܼܤܪܵܢܵܐ ܤܵܒܼ̇ܠܝܼܢ. ܘܐܵܦܠܵܐ ܕܗܵܠܹܝܢ ܫܲܪܝܼܪܵܐ ܤܵܗܕܘܼܬܼܵܐ ܕܝܼܕܲܥܬܼܗܘܿܢ. ܐܸܠܵܐ ܕܐܲܝܢܵܐ ܕܝܵܕܲܥ̇ ܠܡܸܒܼܩܵܐ ܨܸܒܼ̈ܘܵܬܼܵܐ ܒܲܡܤܲܝܒܪܵܢܘܼܬܼܵܐ ܕܦܘܼܪܫܵܢܵܐ. ܡܸܛܠ ܗܵܢܵܐ: ܠܵܐ ܗ̄ܘ̣ܵܐ ܟܠܢܵܫ ܡܗܲܝܡܲܢ ܠܡܸܬܲܠ ܡܸܠܟܵܐ. ܐܸܠܵܐ ܐܲܝܢܵܐ ܕܠܘܼܩܕܲܡ ܕܲܒܲܪ ܝܵܬܹܗ ܫܲܦܝܼܪ: ܘܐܝܼܬܼ ܠܹܗ ܝܑܼܕܲܥܬܵܐ ܕܢܸܤܝܵܢܵܐ ܒܟܼܠ ܨܒܼܘܼ: ܘܠܵܐ ܪܵܚܹ̇ܡ ܝܵܬܹܗ: ܘܠܵܐ ܢܵܐܹ̇ܕܼ ܡ̣ܢ ܓܘܼ̈ܢܵܝܹܐ܀ ܟܠ ܓܹܝܪ ܐܸܡܲܬܼܝ 298 ܕܐܘܼܪܚܵܐ ܕܡܲܪܕܝܼܬܼܵܟܼ ܒܫܲܝܢܵܐ ܕܠܵܐ ܫܘܼܚܠܵܦܵܐ ܡܸܫܬܲܟܼܚܵܐ ܠܵܟܼ: ܩܢܲܛ. ܡܲܒܼܥܵܕܼܘܼ ܡܲܒܼܥܲܕܼ ܐܲܢ̄ܬܿ ܡ̣ܢ ܨܹܝܕܼ ܫܒܼܝܼ̈ܠܹܐ ܐܲܠܵܗܵܝܹ̈ܐ: ܕܪ̈ܝܼܫܲܝ ܒܕܼܘܼܪ̈ܟܵܬܼܵܐ ܠܲܐܝܵ̈̄ܬܐ ܕܩܲܕܝܼ̈ܫܹܐ. ܟܡܵܐ ܓܹܝܪ ܕܬܸܫܬܵܘܲܛ ܒܐܘܼܪܚܵܐ ܕܲܡܕܲܝܼܢܲܬܼ ܡ̣ܠܟܘܼܬܼܵܐ: ܘܲܒܼܘܲܥܕܵܐ ܬܸܩܪܘܿܒܼ ܕܲܫܒܵܒܼܘܼܬܼܵܗ̇: ܫܘܼܘܕܵܥܵܟܼ ܗܵܢܵܐ ܢܸܗܘܸܐ: ܕܥܲܤܩܘܼܬܼ ܢܸܤܝ̈ܘܿܢܹܐ ܐܵܪܥܵܐ ܠܵܟܼ. ܘܲܟܼܡܵܐ ܕܝܲܬܝܼܪ ܬܸܬܼܩܲܪܲܒܼ: ܝܲܬܝܼܪ ܬܸܥܘܿܠ ܠܢܸܤ̈ܝܘܿܢܹܐ܀ ܗܵܟܲܢܵܐ ܓܹܝܪ: ܟܠ ܐܸܡܲܬܼܝ ܕܫܘܼܚ̈ܠܵܦܹܐ ܥܲܤ̈ܩܹܐ ܬܲܪܓܸܫ ܢܲܦܫܵܟܼ ܒܐܘܼܪܚܵܗ̇: ܕܲܥ ܒܙܲܒܼ̈ܢܹܐ ܗܵܢܘܿܢ: ܕܫܘܼܚܠܵܦܵܐ ܕܕܲܪܓܼܵܠܐ ܩܲܒܿܠܲܬ̤ ܢܲܦܫܵܟܼ ܒܟܸܤܝܵܐ: ܘܬܼܵܘܤܲܦܬܵܐ ܕܡܵܘܗܲܒܼܬܼܵܐ ܗܘ̤ܵܬܼ ܨܹܐܕܹܝܗ̇: ܥܲܠ ܛܲܟܼܤܵܐ ܕܒܹܗ ܩܵܝ̇ܡܵܐ ܗ̄ܘ̣ܵܬܼ܀ ܠܦܘܼܬܼ ܪܲܒܿܘܼܬܼܵܐ ܕܫܘܼ̈ܟܵܢܹܐ: ܗܵܟܲܢܵܐ ܠܩܲܫܝܘܼܬܼܵܐ ܕܢܸܤ̈ܝܘܿܢܹܐ ܡܲܥܸܠ ܠܵܗ̇ ܐܲܠܵܗܵܐ ܠܢܲܦܫܵܐ. ܐܸܢ ܕܹܝܢ ܐܝܼܬܼ ܢܲܦܫܵܐ ܕܲܡܚܝܼܠܵܐ: ܘܲܠܢܸܤܝܘܿܢܵܐ ܕܤܲܓܝܼ ܩܫܸܐ ܠܵܐ ܤܵܦ̇ܩܵܐ: ܘܡܲܫܸܦ ܠܘܵܬܼܵܗ̇ ܐܲܠܵܗܵܐ: ܕܲܥ ܚܲܟܿܝܼܡܵܐܝܼܬܼ: ܕܲܟܼܡܵܐ ܕܲܠܢܸܤܝܘܿܢܵܐ ܪܲܒܵܐ ܠܵܐ ܤܵܦ̇ܩܵܐ: ܘܐܵܦܠܵܐ ܠܫܘܼܟܵܢܵܐ ܪܲܒܵܐ. ܐܲܝܟܼ ܕܐܸܬܼܟܠܝܼ ܡܸܢܵܗ̇ ܪܲܒܿܘܼܬܼ ܢܸܤܝܘܿܢܵܐ: ܗܵܟܲܢܵܐ ܟܠܸܐ ܡܸܢܵܗ̇ ܘܪܲܒܿܘܼܬܼ ܫܘܼܟܵܢܵܐ. ܠܵܐ ܠܲܓܼܡܵܪ ܡܵܘܗܲܒܼܬܵܐ ܕܪܲܒܵܐ ܘܢܸܤܝܘܿܢܵܐ ܒܨܝܼܪܵܐ ܝܲܗ̣̄ܒܼ ܐܲܠܵܗܵܐ. ܡܛܲܟܿܤܝܼܢ ܗܵܟܹܝܠ ܢܸܤ̈ܝܘܿܢܹܐ ܒܦܘܼܚܵܡܵܐ ܕܫܘܼ̈ܟܵܢܹܐ. ܡܵܕܹܝܢ: ܡܸܢܗܹܝܢ ܕܥܲܤ̈ܩܵܬܼܵܐ ܕܨܹܐܕܲܝܟ ܐܸܬܼܦܲܪܢܲܣ: ܡܲܕܪܸܟܼ ܐܲܢ̄ܬܿ ܟܡܵܝܘܼܬܼܵܐ ܕܪܲܒܿܘܼܬܼܵܐ ܕܩܲܒܿܒܲܬ̤ ܢܲܦܫܵܟܼ. ܒܦܸܚܡܵܐ ܕܚܲܫܵܐ: ܒܘܼܝܵܐܵܐ܀ ܡܵܢܵܐ ܗܵܟܹܝܠ؟ ܢܸܤܝܘܿܢܵܐ: ܘܗܵܝܝܕܹܝܢ ܫܘܼܟܵܢܵܐ. ܐܵܘ ܡܵܘܗܲܒܼܬܼܵܐ: ܘܒܼܵܬܼܪܵܗ̇ ܢܸܤܝܘܿܢܵܐ. ܠܵܐ ܓܹܝܪ ܐܵܬܹ̇ܐ ܢܸܤܝܘܿܢܵܐ: ܐܸܠܵܐ ܩܲܒܿܠܲܬ̤ ܢܲܦܫܵܐ ܪܲܒܿܘܼܬܼܵܐ ܒܟܸܤܝܵܐ ܥܲܠ ܡܫܘܼܚܬܼܵܗ̇ ܩܲܕܼܡܵܝܬܵܐ: ܘܩܲܒܿܠܲܬ̤ 299 ܪܘܼܚܵܐ ܕܤܝܼܡܲܬܼ ܒܢܲܝ̈ܵܐ. ܐܝܼܬܼ ܠܲܢ ܬܲܚܘܝܼܬܼܵܐ ܒܗܵܕܹܐ: ܡ̣ܢ ܢܸܤܝܘܿܢܹܗ ܕܡܵܪܲܢ. ܗܵܟܲܢܵܐ: ܘܕܲܫܠܝܼܚܹ̈ܐ. ܠܵܐ ܓܹܝܪ ܐܸܫܬܒܸܩܘ ܠܡܸܥܲܠ ܠܒܼܘܼܚܪܵܢܵܐ: ܥܕܲܡܵܐ ܕܩܲܒܸܠ̣ܘ ܦܵܪܲܩܠܹܝܛܵܐ. ܐܲܝܠܹܝܢ ܕܡܸܫܬܵܘܬܦܝܼܢ ܒܛܵܒܼܬܼܵܐ: ܙܵܕܹܩ ܕܲܢܤܲܝܒܿܪܘܼܢ ܐܵܦ ܢܸܤ̈ܝܘܿܢܹܐ. ܥܲܡܵܗ̇ ܕܛܵܒܼܬܵܐ: ܬܘܼܟܹ̈ܝܝܗ̇. ܗܵܟܲܢܵܐ ܫ̣ܦܲܪ ܠܚܲܪܝܼܡ ܒܟܼܠ ܐܲܠܵܗܵܐ. ܘܟܿܕܼ ܗܵܟܲܢ: ܩܲܕܝܼܡܵܐ ܒܪܲܡ ܡܲܪܓܫܵܢܘܼܬܼܵܐ ܕܢܸܤܝܘܿܢܵܐ ܠܡܲܪܓܫܵܢܘܼܬܼܵܗ̇ ܕܡܵܘܗܲܒܼܬܼܵܐ: ܡܸܛܠ ܒܘܼܚܪܵܢܵܗ̇ ܕܚܹܐܪܘܼܬܼܵܐ. ܠܵܐ ܡܬܼܘܿܡ ܩܲܕܡܲܬ̤ ܛܲܝܒܿܘܼܬܼܸܵܐ ܠܒܲܪܢܵܫܵܐ: ܩܕܼܵܡ ܛܥܵܡܬܼܵܐ ܕܢܸܤܝܘܿܢܵܐ. ܒܲܗܘܵܝܵܐ ܡܲܢ: ܩܲܕܝܼܡܵܐ. ܒܲܪܓܸܫܬܵܐ ܕܹܝܢ: ܡܵܘܚܪܵܐ܀ ܒܲܕܓܼܘܿܢ: ܙܵܕܹܩ ܕܲܗ̤ܘܲܝ̈ ܐܝܼܬܼ ܨܹܐܲܕܝܟ ܒܲܙܒܼ̈ܢܹܐ ܗܵܠܹܝܢ: ܬܲܪܬܹܝܢ ܤܲܩܘܼ̈ܒܼܠܵܝܵܬܼܵܐ ܠܵܐ ܕܵܡ̈ܝܵܬܵܐ. ܡܵܢܵܐ ܗܵܠܹܝܢ؟ ܚܲܕܼܘܼܬܼܵܐ: ܘܕܸܚܠܬܼܵܐ. ܚܲܕܼܘܼܬܼܵܐ: ܡܸܛܠ ܕܒܼܐܘܼܪܚܵܐ ܕܪܝܼܫܲܬܼ ܠܩܲܪܝ̈ܫܹܐ: ܡܵܠܘܿܢ ܠܡܲܚܝܵܢܵܐ ܕܟܼܠ ܐܸܫܬܿܟܲܚ ܪܵܕܹܐ ܐܲܢ̄ܬܿ: ܐܲܝܟܼ ܕܡ̣ܢ ܫܘܼ̈ܘܕܵܥܹܐ ܕܢܸܤ̈ܝܘܿܢܹܐ. ܕܸܚܠ̱ܬܵܐ ܕܹܝܢ: ܕܕܲܠܡܵܐ ܡ̣ܢ ܥܸܠܲܬܼ ܪܵܡܘܼܬܼܵܐ ܡܸܬܼܢܲܤܸܐ ܐܲܢ̄ܬܿ ܗ̄ܘ̣ ܒܗܵܠܹܝܢ. ܡܸܬܼܚܲܟܿܡܝܼܢ ܒܪܲܡ ܡܲܟܿܝܼ̈ܟܹܐ ܡ̣ܢ ܛܲܝܒܿܘܼܬܼܵܐ: ܠܡܸܫܬܵܘܕܵܥܘܼ ܦܘܼܪ̈ܫܵܢܹܐ ܕܗܵܠܹܝܢ. ܗܵܢܵܘ ܕܹܝܢ: ܢܸܤ̈ܝܘܿܢܹܐ ܕܡ̣ܢ ܦܹܐܪ̈ܲܝ ܪܵܡܘܼܬܼܵܐ: ܡ̣ܢ ܦܲܟܹ̈ܐ ܕܒܼܵܠܥܹܝܢ ܡ̣ܢ ܚܘܼܒܵܐ. ܦܪܝܼܫܝܼܢ ܓܹܝܪ ܢܸܤ̈ܝܘܿܢܹܐ ܕܲܠܬܲܪܒܿܝܼܬܼܵܐ ܕܕܘܼܒܵܪܹ̈ܐ ܗܵܘܹ̇ܝܢ: ܠܐܲܝܠܹܝܢ ܕܡ̣ܢ ܡܸܫܬܲܒܼܩܵܢܘܼܬܼܵܐ ܗܵܘܹܝܢ: ܠܩܘܼܦܵܚܵܐ ܕܲܡܫܲܩܠܘܼܬܼܵܐ ܕܠܸܒܵܐܘ ܢܸܤ̈ܝܘܿܢܹܐ ܡܲܢ ܐܲܝܠܹܝܢ ܕܲܬܼܚܹܝܬܼ ܫܲܒܼܛܵܐ ܕܐܲܒܼܵܗܘܼܬܼܵܐ ܠܬܲܪܒܿܝܼܬܼܵܐ ܕܢܲܦܫܵܐ ܗܵܘܹ̇ܝܢ: ܗܵܠܹܝܢ ܕܲܒܼܗܘܿܢ ܡܸܬܿܕܲܪܫܵܐ ܘܡܸܬܼܒܲܚܪܵܐ ܘܗܵܘ̇ܝܵܐ ܢܲܨܝܼܚܬܼܵܐ: ܐܝܼܬܲܝܗܘܿܢ ܗܵܠܹܝܢ: ܡܲܐܝܼܢܘܼܬܼܵܐ: ܝܘܼܩܪܵܐ ܕܦܲܓܼܪܵܐ: ܫܘܼܪܵܝ ܗܲܕܵܡܹ̈ܐ: ܩܘܼܛܵܥܵܐ: 300 ܒܘܼܠܒܵܠܵܐ ܕܬܲܪܥܝܼܬܼܵܐ: ܟܹܐܢܹ̈ܐ ܦܲܓܼܪ̈ܵܢܵܝܹܐ: ܦܤܵܩ ܤܲܒܼܪܵܐ ܕܲܡܠܸܐ ܥܸܕܵܢܵܐ: ܥܲܡܛܵܢܵܐ ܕܚܘܼ̈ܫܵܒܹܐ: ܓܠܝܼܙܘܼܬܼ ܐܝܼܠܵܐ ܐ̄ܢܵܫܵܝܵܐ: ܨܪܝܼܟܼܘܼܬܼ ܚܫܲܚܬܵܐ ܦܲܓܼܪܵܢܵܝܬܵܐ: ܘܲܕܼܫܲܪܟܵܐ. ܕܡ̣ܢ ܗܵܠܹܝܢ ܩܵܢܹ̇ܐ ܒܲܪܢܵܫܵܐ ܢܲܦܫܵܐ ܡܫܵܘܚܲܕܬܵܐ ܘܡܘܼܟܵܟܼܵܐ: ܘܠܸܒܵܐ ܡܝܼܬܼܵܐ. ܘܡܸܬܼܒܿܚܲܪ ܡ̣ܢ ܗܵܠܹܝܢ: ܒܪܸܚܡܲܬܼ ܚܘܼܒܹܗ ܕܒܼܵܪܘܿܝܵܐ. ܗܵܠܹܝܢ ܕܲܠܦܘܼܬܼ ܚܲܝܠܵܐ ܡܦܲܪܢܸܣ ܠܵܗ̇ ܡܕܲܒܿܪܵܢܵܐ ܠܲܚܫܲܚܬܵܐ ܕܲܒܼܗܘܿܢ: ܠܘܵܬܹܗ ܕܲܡܩܲܒܿܠܵܢܵܐ. ܘܲܒܼܗܘܿܢ ܒܗܵܠܹܝܢ ܡܡܲܙܓܼܝܼܢ: ܒܘܼ̈ܝܵܐܹܐ: ܘܥܵܩ̈ܵܬܵܐ. ܢܘܼܗܪܵܐ: ܘܚܸܫܘܿܟܼܵܐ. ܩܪ̈ܵܒܹܐ: ܘܥܘܼܕܼܪܵܢܵܐ. ܘܐܲܝܟܼ ܕܒܲܟܼܢܝܼܫܘܼ: ܐܵܠܹ̇ܨ ܘܡܲܪܘܲܚ: ܕܐܝܼܬܹܝܗ̇ ܐܵܬ̤ܵܐ ܕܬܲܪܒܿܝܼܬܼܵܐ ܕܥܘܼܕܼܪܵܢܵܐ. ܢܸܤ̈ܝܘܿܢܹܐ ܕܹܝܢ ܐܲܝܠܹܝܢ ܕܲܒܼܡܸܫܬܲܒܼܩܵܢܘܼܬܼܸܵܐ ܗܵܘܹ̇ܝܢ: ܨܹܝܕܼ ܐܲܝܠܹܝܢ ܕܲܩܕܼܵܡ ܗܵܝ̇ ܒܲܤܝܼܡܘܼܬܼܵܐ ܕܥܵܒܹ̇ܕܼ ܛܵܒܼ̈ܬܲܢ ܡܲܡܪܚܝܼܢ ܠܡܸܫܬܲܩܵܠܘܼ ܒܬܲܪܥܝܼܬܼܗܘܿܢ: ܘܲܠܡܸܗܘܵܐ ܛܵܠܘܿܡܹ̈ܐ ܕܛܵܒܼ̈ܬܹܗ ܪܵܡܵܐܝܼܬܼ: ܐܝܼܬܲܝܗܘܿܢ ܗܵܠܹܝܢ: ܢܸܤ̈ܝܘܿܢܹܐ ܓܠܲܝܵ̈ܐ ܕܫܹܐܕܹ̈ܐ: ܕܲܠܒܲܪ ܡ̣ܢ ܬܚܘܼ̈ܡܹܐ ܕܚܲܝ̈ܠܹܐ ܢܲܦܫܵܢܵܝܹ̈ܐ: ܟܲܕܼ ܓܠܝܼܙܝܼܢ ܡ̣ܢ ܚܲܝܠܵܐ ܡܚܲܟܿܡܵܢܵܐ ܕܲܒܼܗܘܿܢ. ܪܓܸܫܬܵܐ ܚܲܪܝܼܦܬܵܐ ܕܙܵܘ̈ܥܹܐ ܕܙܵܢܝܘܼܬܼܵܐ: ܕܐܲܝܟܼ ܕܲܠܩܘܼܦܵܚܵܐ ܕܫܘܼܩܵܠܗܘܿܢ ܒܵܗ̇ ܡܸܫܬܲܒܼܩܝܼܢ. ܕܠܝܼܠܘܼܬܼܵܐ ܕܲܠܘܵܬܼ ܚܸܡܬܵܐ: ܡܩܵܡܘܼܬܼ ܨܸܒܼܝܼܢܵܐ: ܪܸܚܡܲܬܼ ܙܵܟܼܘܼܬܼܵܐ ܕܲܒܼܡܸܠܹ̈ܐ: ܙܥܝܼܦܘܼܬܼܵܐ: ܠܸܒܵܐ ܫܵܝܘܿܛܵܐ: ܛܵܥܝܘܼܬܼܵܐ ܓܡܝܼܪܬܵܐ ܕܗܵܘܢܵܐ: ܓܘܼܕܵܦܵܐ ܕܥܲܠ ܒܪܝܼܟܸ ܐܝܼܩܵܪܹܗ: ܬܲܪ̈ܥܝܵܬܵܐ ܤܲܟܼ̈ܠܵܬܵܐ ܕܡܲܠ̈ܝܵܢ ܓܘܼܚܟܵܐ. ܡܵܠܘܿܢ ܕܹܝܢ ܒܸܟܼܝܵܐ: ܫܝܼܛܘܼܬܼܵܐ ܕܡ̣ܢ ܒܢܲܝ̈ܢܵܫܵܐ: ܙܲܠܝܼܠܘܼܬܼܵܐ ܕܝܲܩܝܼܪܘܼܬܼܵܐ: ܒܘܼ̈ܙܵܚܹܐ ܕܒܸܐܤ̈ܟܹܡܹܐ ܤܲܓܝܼ̈ܐܹܐ ܕܡ̣ܢ ܫܹܐܕܹ̈ܐ: ܒܟܸܤܝܵܐ ܐܲܟܲܚ̄ܕܼ ܘܲܒܼܓܸܠܝܵܐ. ܪܸܚܡܲܬܼ ܚܘܼܠܛܵܢܵܐ ܘܗܘܼܦܵܟܼܵܐ ܕܲܒܼܥܵܠܡܵܐ: ܦܲܠܝܼ̈ܛܵܬܵܐ ܤܒܼܝܼ̈ܤܵܬܵܐ ܕܡܸܠܹ̈ܐ ܫܲܛܘܼܪ̈ܵܬܼܵܐ. ܫ̈ܟܼܵܚܵܬܵܐ ܚܲܕܼ̈ܬܼܵܬܼܵܐ 301 ܕܡ̣ܢ ܢܲܦܫܹܗ: ܥܲܡ ܢܒܼ̈ܝܼܵܘܵܬܼܵܐ ܕܲܓܵܠ̈ܬܐ. ܘܫܘܼܘ̈ܕܵܝܹܐ ܤܲܓܝܼ̈ܐܹܐ: ܕܲܠܥܸܠ ܡ̣ܢ ܚܲܝܠܵܐ. ܘܐܵܦ ܒܗܵܠܹܝܢ ܕܦܲܓܼܪܵܐ: ܐܲܡܝܼܢܘܼܬܼ ܓܸܕܼܫܹ̈ܐ ܥܲܤ̈ܩܹܐ ܘܲܡܥܲܪ̈ܩܠܹܐ: ܠܵܐ ܕܠܝܼ̈ܠܲܝ ܠܲܫܲܪܵܝܵܐ. ܦܸܓܼܥܹ̈ܐ ܐܲܡܝܼ̈ܢܹܐ ܕܐ̄ܢܵܫܵܐ ܒܝܼ̈ܫܹܐ ܘܲܕܼܠܵܐ ܐܲܠܵܗ. ܡܲܦܘܼܠܬܐ ܕܒܼܐܝܼ̈ܕܲܝ ܒܢܲܝ̈ܢܵܫܵܐ ܒܝܼ̈ܫܹܐ. ܡܸܬܿܬܿܙܝܼܥܵܢܘܼܬܼܵܐ ܐܲܡܝܼܢܬܵܐ ܕܠܸܒܵܐ: ܒܕܸܚܠ̱ܬܐ ܕܲܕܼܠܵܐ ܥܸܠܬܵܐ ܕܡܸܢܫܹܠܝ. ܘܲܟܼܡܵܐ ܙܲܒܼ̈ܢܝܼܢ ܡܲܦܘܼܠܬܵܐ ܚܲܤܝܼܢܬܵܐ ܕܡ̣ܢ ܫܩܝܼ̈ܦܹܐ: ܘܕܼܘܼ̈ܟܿܝܵܬܵܐ ܪ̈ܵܡܵܬܼܵܐ ܘܲܕܼܫܲܪܟܵܐ: ܐܲܝܟܼ ܕܠܲܬܼܒܼܵܪܵܐ ܕܝܼܠܹܗ ܕܓܼܘܼܫܡܵܐ. ܨܪܝܼܟܼܘܼܬܼܵܐ ܕܠܸܒܵܐ ܕܡ̣ܢ ܤܘܼܡܵܟܼܵܐ ܕܥܲܠ ܒܛܝܼܠܘܼܬܼܵܐ ܐܲܠܵܗܵܝܬܵܐ: ܘܬܼܘܼܟܼܠܵܢܵܐ ܕܗܲܝܡܵܢܘܼܬܹܗ. ܘܐܲܝܟܼ ܕܲܒܼܦܵܤܝܼ̈ܩܵܬܵܐ: ܟܠܗܹܝܢ ܠܵܐ ܡܸܬܼܡܲܨ̈ܝܵܢܝܵܬܐ ܘܕܲܠܥܸܠ ܡ̣ܢ ܚܲܝܠܵܐ: ܡܸܫܬܲܡܪ̈ܵܢ ܥܠܵܘܗܝ ܘܗܵܠܹܝܢ ܕܲܠܘܵܬܹܗ܀ ܗܵܠܹܝܢ ܟܠܗܹܝܢ ܕܤܸܕܼܪܹܬܼ: ܡ̣ܢ ܡܢܵܬܵܐ ܐܸܢܹܝܢ ܕܢܸܤܝܘܿܢܹ̈ܐ ܕܪܵܡܘܼܬܼܵܐ. ܗܵܠܹܝܢ ܕܫܘܼܪܵܝܵܐ ܕܲܒܼܗܘܿܢ ܡܸܬܼܚܵܘܸܐ ܒܐ̄ܢܵܫ: ܡ̣ܢ ܐܸܡܲܬܼܝ ܕܲܡܫܲܪܸܐ ܕܢܸܗܘܸܐ ܚܲܟܿܝܼܡ ܒܥܲܝ̈ܢܲܝ ܢܲܦܫܹܗ. ܘܡܸܬܼܝܲܒܲܠ ܒܟܼܠܗܹܝܢ ܗܵܠܹܝܢ ܒܝܼ̈ܫܵܬܼܵܐ: ܠܦܘܼܬܼ ܦܸܚܡܵܐ ܕܡܸܬܿܛܦܝܼܤܵܢܘܼܬܹܗ ܕܲܠܚܘܼܫܵܒܼܵܐ ܗܵܢܵܐ. ܡܵܕܹܝܢ: ܡ̣ܢ ܦܘܼܪܫܵܢܵܐ ܕܢܸܤܝܘܿܢܲܝ̈ܟ: ܩܵܐܹ̇ܡ ܐܲܢ̄ܬܿ ܥܲܠ ܐܘܼܪ̈ܚܵܬܵܐ ܩܲܛܝܼ̈ܢܵܬܵܐ ܕܪܸܥܝܵܢܵܟܼ. ܐܸܢ ܕܹܝܢ ܬܸܚܙܸܐ ܘܡܸܕܸܡ ܡܸܕܸܡ ܡ̣ܢ ܗܵܠܹܝܢ ܕܲܚܠܝܼܛܝܼܢ ܒܗܵܢܘܿܢ: ܕܲܥ ܕܐܲܝܟܼ ܟܡܵܝܘܼܬܼܵܐ ܕܡ̣ܢ ܗܵܠܹܝܢ: ܐܵܦ ܡܲܤܒܪܵܢܘܼܬܼܵܐ ܡܟܲܬܿܡܵܐ ܬܲܡܵܢ܀ ܬܘܼܒܼ ܐܵܦ ܢܝܼܫܵܐ ܐ̄ܚܪܹܢܵܐ ܫܡܲܥ. ܟܠ ܥܲܤ̈ܩܵܬܼܵܐ ܕܹܝܢ ܘܐܘܼ̈ܠܨܵܢܹܐ: ܕܲܡܤܲܝܒܿܪܵܢܘܼܬܼܵܐ ܥܲܡܗܘܿܢ ܠܵܐ ܐܝܼܬܼ: ܥܦܝܼܦܵܐ ܐܝܼܬܼܵܘܗ ܫܘܼܢܵܩܗܘܿܢ. ܡܤܲܝܒܿܪܵܢܘܼܬܹܗ ܕܓܲܒܼܪܵܐ: ܕܲܚ̇ܩܵܐ ܥܵܩ̈ܬܹܗ. ܙܥܘܿܪܘܼܬܼ ܢܲܦܫܵܐ ܕܹܝܢ: ܐܸܡܲܐ ܗ̣̄ܝ ܕܫܘܼ̈ܢܵܩܹܐ. ܡܤܲܝܒܪܵܢܘܼܬܼܵܐ ܐܝܼܬܹܝܗ̇: ܐܸܡܵܐ ܕܒܼܘܼ̈ܝܵܐܹܐ: 302 ܚܲܝܠܵܐ ܡܸܕܸܡ ܕܡ̣ܢ ܪܘܼܝܼܚܘܼܬܼ ܠܸܒܵܐ ܡܸܬܼܝܼܠܸܕܼ. ܥܲܤܩܵܐ ܗ̣̄ܝ ܠܒܲܪܢܵܫܵܐ ܗܵܕܹܐ ܠܡܸܫܟܵܚܘܼ ܡ̣ܢ ܢܲܦܫܹܗ ܒܐܘܼܠܨܵܢܵܘ̈ܗܝ: ܒܸܠܥܵܕܼ ܡ̣ܢ ܗܵܘܗܒܲܬܼ ܐܲܠܵܗܵܐ: ܕܲܒܼܝܲܕܼ ܫܸܐܠܲܬܼ ܨܠܘܿܬܼܵܐ ܘܐܲܫܝܼܕܼܘܼܬܼ ܕܸܡ̈ܥܹܐ ܡܸܫܬܲܟܼܚܵܐ. ܡܵܐ ܕܹܝܢ ܕܨܵܒܹ̇ܐ ܐܲܠܵܗܵܐ ܕܲܒܼܝܲܬܝܝܼܪܵܐ ܢܸܬܼܐܠܸܨ ܒܲܪܢܵܫܵܐ: ܡܲܪܦܸܐ ܠܹܗ ܒܐܝܼܕܼܵܐ ܕܲܙܥܘܿܪܘܼܬܼ ܢܲܦܫܵܐ. ܘܗ̤ܝ ܗܵܕܹܐ ܡܵܘܠܕܼܵܐ ܒܹܗ: ܚܲܝܠܵܐ ܚܲܤܝܼܢܵܐ ܕܩܘܼܛܵܥܵܐ: ܗܵܘ̇ ܕܡܸܬܿܛܥܸܡ ܒܐܝܼܕܹܗ ܚܢܘܼܩܝܵܐ ܢܲܦܫܵܢܵܝܵܐ: ܕܗܸܢܹܝܢ ܐܸܢܹܝܢ ܛܥܵܡܬܵܗ̇ ܕܓܼܗܲܢܵܐ. ܡ̣ܢ ܗܵܪܟܵܐ ܕܹܝܢ ܡܸܫܬܲܡܪܵܐ ܥܠܵܘܗܝ ܪܘܼܚܵܐ ܕܕܼܘܼܘܵܕܼܵܐ: ܗܵܝ̇ ܕܡܸܢܵܗ̇ ܢܵܒܼܥ̇ܝܼܢ ܪܸܒܿܘܿ ܢܸܤܝ̈ܘܿܢܝܼܢ: ܒܠܝܼܠܘܼܬܼܵܐ: ܚܸܡܬܼܵܢܘܼܬܼܵܐ: ܓܘܼܕܵܦܵܐ: ܡܸܬܼܥܲܕܿܠܵܢܘܼܬܼܵܐ: ܠܵܐ ܫܲܘܝܘܼܬܼ ܚܘܼ̈ܫܵܒܹܐ: ܫܘܼܢܵܝܵܐ ܕܡ̣ܢ ܐܲܬܲܪ ܠܐܲܬܲܪ: ܥܲܡ ܐ̄ܚܪ̈ܵܢܝܬܵܐ ܕܐܲܟܼܘܵܬܼܗܹܝܢ. ܐܸܢܕܹܝܢ ܬܹܐܡܲܪ: ܕܥܸܠܬܵܐ ܕܗܵܠܹܝܢ ܟܠܗܹܝܢ ܡܲܢ ܐܝܼܬܼܵܘܗܝ؟ ܐܵܡܲ݁ܪ ܐ̄ܢܵܐ ܠܵܟܼ: ܕܐܲܢ̄ܬܿ. ܡܸܛܠ ܗܵܝ̇ ܕܠܵܐ ܐܸܬܼܒܛܸܠ ܠܵܟܼ ܠܲܡܥܲܩܵܒܼܘܼ ܥܸܠܬܼܵܐ ܕܐܵܤܝܘܼܬܼܗܹܝܢ. ܐܵܤܝܘܼܬܼܵܐ ܕܹܝܢ ܕܗܵܠܹܝܢ ܟܠܗܹܝܢ: ܐܝܼܬܹܝܗ̇ ܚܕܼܵܐ. ܕܒܼܐܝܼܕܼܵܗ̇: ܡܸܚܕܼܵܐ ܡܸܫܟܲܚ ܐ̄ܢܵܫ ܒܓܼܵܘ ܢܲܦܫܹܗ ܒܘܼܝܵܐܵܐ. ܡܵܢܲܐ ܗ̣̄ܝ ܕܹܝܢ ܗܵܕܹܐ؟ ܡܘܼܟܵܟܼܵܐ ܕܠܸܒܵܐ. ܒܸܠܥܵܕܼ ܗܵܕܹܐ ܕܹܝܢ: ܕܐ̄ܢܵܫ ܢܸܫܪܸܐ ܤܝܵܓܼܵܐ ܕܗܵܠܹܝܢ ܒܝܼ̈ܫܵܬܼܵܐ: ܠܵܐ ܡܸܫܟܲܚ. ܒܝܲܬܝܼܪܵܐ ܕܹܝܢ ܡܸܫܬܲܚ ܠܗܹܝܢ ܕܥܵܫ̈ܢܵܢ ܥܠܵܘܗܝ. ܠܵܐ ܬܸܬܼܚܲܡܲܬܼ ܥܠܲܝ ܕܐܵܡܲ݁ܪܢܵܐ ܠܵܟܼ ܫܪܵܪܵܐ: ܕܠܵܐ ܡܬܼܘܿܡ ܒܥܲܝܬܵܗ̇ ܒܓܼܵܘ ܢܲܦܫܵܟܼ ܠܗܵܕܹܐ. ܘܐܸܢ ܨܵܒܹ̇ܐ ܐܲܢ̄ܬܿ: ܗ̤ܘܝܼ ܒܵܬܼܪܵܗ̇: ܘܚܵܙܹ̇ܐ ܐܲܢ̄ܬܿ ܐܲܝܟܲܢ ܝܵܗ̇ܒܵܐ ܫܪܵܝܗܹܝܢ ܕܒܼܝܼ̈ܫܵܬܼܵܟܼ. ܡ̣ܢ ܦܸܚܡܵܐ ܕܡܘܼܟܵܟܼܵܟܼ: ܡܸܬܼܝܲܗܒܵܐ ܠܵܟܼ ܡܤܲܝܒܿܪܵܢܘܼܬܼܵܐ ܒܥܵܩ̈ܵܬܼܵܟܼ. ܘܡ̣ܢ ܦܸܚܡܵܐ ܕܲܡܤܲܝܒܿܪܵܢܘܼܬܼܵܟܼ: ܩܵܐܹ̇ܠ ܝܘܼܩܪܗܹܝܢ ܡ̣ܢ ܢܲܦܫܵܟܼ: ܘܬܸܬܼܒܲܝܲܐ 303 ܒܐܘܼ̈ܠܨܵܢܹܝܗ̇. ܘܡ̣ܢ ܦܸܚܡܵܐ ܕܒܼܘܼܝܵܐܵܗ̇: ܝܵܪܹܒܼ ܚܘܼܒܵܟܼ ܕܒܲܐܠܵܗܵܐ. ܘܡ̣ܢ ܦܸܚܡܵܐ ܕܚܘܼܒܵܟܼ: ܝܵܪܒܵܐ ܚܲܕܼܘܼܬܼܵܟܼ ܕܲܒܼܪܘܼܚ. ܠܐܲܝܠܹܝܢ ܕܲܒܼ̈ܢܲܝܵܐ ܐܸܢܘܿܢ ܚܲܬܼܝܼ̈ܬܹܐ: ܐܲܒܼܘܼܢ ܡܪܲܚܡܵܢܵܐ ܟܲܕܼ ܨܵܒܹ̇ܐ ܕܢܲܪܘܲܚ ܐܸܢܘܿܢ ܒܢܸܤܝܘܿܢܲܝ̈ܗܘܿܢ: ܠܵܐ ܗ̄ܘ̣ܵܐ ܡܸܫܩܲܠ ܫܵܩܹ̇ܠ ܠܗܘܿܢ ܡܸܢܗܘܿܢ: ܐܸܠܵܐ ܠܲܡܤܲܝܒܿܪܵܢܘܼܬܼܵܐ ܡܫܲܟܸܢ ܠܵܗ̇ ܠܗܘܿܢ ܒܢܸܤ̈ܝܘܿܢܹܐ. ܘܗܵܠܹܝܢ ܟܠܗܹܝܢ ܛܵܒܼ̈ܬܼܵܐ ܒܐܝܼܕܸܿܗ̇ ܡܩܲܒܿܠܝܼ̤ܢ: ܠܫܘܼܡܠܵܝܵܐ ܕܢܲܦ̈ܫܵܬܼܗܘܿܢ. ܕܐܵܦ ܠܲܢ ܢܲܫܘܸܐ ܡܫܝܼܚܵܐ ܒܛܲܝܒܿܘܼܬܹܗ: ܕܲܢܤܲܝܒܲܪ ܒܝܼ̈ܫܵܬܼܵܐ ܡܸܛܠ ܚܘܼܒܹܗ: ܒܬܼܵܘܕܝܼܬܼܵܐ ܕܠܸܒܵܐ. ܐܵܡܹܝܢ.