Isaac of Nineveh. “Discourse 40.” Based upon Digital Syriac Corpus. Last modified March 5, 2019. https://syriaccorpus.org/431.
    
        
            
                ܦܘܼܫܵܩ ܛܲܟܼܤܹ̈ܐ ܕܕܼܘܼܒܵܪܹ̈ܐ: ܕܡܵܢܵܘ ܚܲܝܠܵܐ ܕܦܘܼܠܚܵܢܵܐ ܕܟܼܠܚܲܕܼ
                ܡܸܢܗܘܿܢ. ܡܩ.
                
            
            
                ܕܘܼܒܵܪܵܐ 	ܦܲܓܼܪܵܢܵܐ ܕܲܒܼܫܸܠܝܵܐ: ܠܦܲܓܼܪܵܐ ܡܕܲܟܸܐ ܡ̣ܢ ܗܝܼܘܼ̈ܠܹܐ
                ܕܒܹܗ. ܕܘܼܒܵܪܵܐ ܕܪܸܥܝܵܢܵܐ: ܠܢܲܦܫܵܐ ܡܡܲܕܸܟܼ: ܘܲܡܨܲܠܸܠ ܠܵܗ̇
                ܡ̣ܢ ܙܵܘ̈ܥܹܐ ܥܒܲܝ̈ܐ ܕܥܲܠ ܡܸܬܼܚܲܒܿܠܵܢ̈ܝܬܼܵܐ. ܡ̣ܢ ܗܵܝ̇ ܕܚܲܫܵܢܵܐܝܼܬܼ
                ܢܸܬܼܥܢܘܿܢ: ܠܘܵܬܼ ܗܵܝ̇ ܕܲܒܼܬܹܐܘܿܪܝܼܵܐ ܕܝܼܠܗܹܝܢ ܢܸܬܿܬܙܝܼܥܘܼܢ. ܘܗ̤ܝ
                ܗܵܕܹܐ ܡܩܲܪܒܼܵܐ ܠܵܗ̇: ܠܥܲܪܛܸܠܵܝܘܼܬܼܵܐ ܕܗܵܘܢܵܐ: ܗܵܝ̇ ܕܩܵܪܹܝܢ ܠܵܗ̇
                ܬܹܐܘܿܪ̈ܝܼܵܣ ܕܠܵܐ ܗܝܼܘܼ̈ܠܹܐ: ܕܗ̤ܘܝܘܼ ܕܘܼܒܵܪܵܐ ܪܘܼܚܵܢܵܐ. ܗܵܢܵܐ ܕܹܝܢ
                ܟܲܕܼ ܡܕܲܠܸܐ ܠܹܗ ܠܡܲܕܥܵܐ ܡ̣ܢ ܐܲܪ̈ܥܵܢܵܝܵܬܼܵܐ: ܡܩܲܪܸܒ ܠܹܗ ܠܬܹܐܘܿܪܝܼܵܐ
                ܩܲܕܼܡܵܝܬܵܐ ܕܪܘܼܚ: ܘܲܠܘܵܬܹܗ ܕܐܲܠܵܗܵܐ ܡܩܝܼܡ ܠܡܲܕܥܵܐ ܒܚܸܙܘܵܐ
                ܕܫܘܼܒܼܚܵܐ ܕܠܵܐ ܡܸܬܼܡܲܠܲܠ: ܘܡܸܬܼܒܲܤܲܡ ܪܸܥܝܵܢܵܐܝܼܬܼ ܒܤܲܒܼܪܵܐ
                ܕܲܥܬܼܝܼ݁ܕܼܵܬܼܵܐ܀ ܡܵܢܵܐ ܘܐܲܝܟܲܢܵܐ ܟܠ ܚܲܕܼ ܚܲܕܼ ܡ̣ܢ ܗܵܠܹܝܢ: ܕܘܼܒܵܪܵܐ
                ܦܲܓܼܪܵܢܵܐ ܕܲܠܘܵܬܼ ܐܲܠܵܗܵܐ: ܠܥܲܡ̈ܠܹܐ ܕܦܲܓܼܪܵܐ ܩܵܪܹܝܢ. ܕܗܵܘܹ̇ܝܢ ܠܕܼܘܼܟܵܝܵܐ
                
                 304 
                
                ܕܦܲܓܼܪܵܐ: ܒܦܘܼܠܚܵܢܵܐ ܕܲܡܝܲܬܿܪܘܼܬܼܵܐ: ܕܒܲܥ̈̇ܒܼܵܕܹܐ ܓܠܲܝ̈ܵܐ ܕܒܲܩܢܘܿܡܹܗ:
                ܕܲܒܼܗܘܿܢ ܡܸܨܛܲܠܲܠ ܡ̣ܢ ܬܲܡܤܘܼܬܹܗ ܕܒܸܤܪܵܐ. ܕܘܼܒܵܪܵܐ ܕܪܸܥܝܵܢܵܐ
                ܐܝܼܬܼܵܘܗܝ: ܥܲܡܠܵܐ ܕܠܸܠܵܐ: ܕܗܵܘܹ̇ܐ ܕܠܵܐ ܢܵܘܚܵܐ ܒܡܲܪܢܝܼܬܼܵܐ:
                ܕܗܵܘ̇ ܕܝܼܢܵܐ ܪܲܒܵܐ ܕܲܥܬܼܝܼܕܼ: ܘܒܲܨܠܘܿܬܼܵܐ ܐܲܡܝܼܢܬܵܐ ܕܠܸܒܵܐ:
                ܘܒܲܡܦܲܪܢܤܵܢܘܼܬܹܗ ܘܒܲܒܼܛܝܼܠܘܼܬܹܗ ܕܐܲܠܵܗܵܐ ܕܲܒܼܗܵܢܵܐ ܥܵܠܡܵܐ:
                ܒܲܡ̈ܢܵܘܬܼܵܐ ܝܑܼܚܲܝܼ̈ܕܼܵܝܵܬܵܐ ܘܓܼܵܘܵܢܵܐܝܼܬܼ: ܐܲܟܲܚ̄ܕܼ ܘܲܠܡܸܛܲܪ ܬܚܘܼ̈ܡܲܝ
                ܚܲܫܹ̈ܐ ܓܵܘܵܝܹ̈ܐ: ܕܠܵܐ ܢܸܕܪܘܿܟܼ ܚܲܕܼ ܡܸܢܗܘܿܢ ܒܐܲܬܼܪܵܐ ܟܲܤܝܵܐ ܘܪܘܼܚܵܢܵܐ.
                ܗܵܢܵܘ ܥܲܡܠܵܐ ܕܠܸܒܵܐ: ܕܩܵܪܹܝܢ ܠܹܗ ܕܘܼܒܵܪܵܐ ܕܪܸܥܝܵܢܵܐ. ܒܗܵܢܵܐ
                ܥܲܡܠܵܐ ܕܕܘܼܒܵܪܵܐ: ܕܡܸܬܼܩܪܸܐ ܦܘܼܠܚܵܢܵܐ ܢܲܦܫܵܢܵܝܵܐ: ܡܸܬܼܩܲܛܲܢ
                ܠܸܒܵܐ: ܘܡܸܬܼܩܪܸܫ ܡ̣ܢ ܫܵܘܬܵܦܘܼܬܼܵܐ ܕܲܚܒܼܵܠܵܐ: ܕܚܲܫܹ̈ܐ ܕܲܠܒܲܪ ܡܢ
                ܟܝܵܢܵܐ. ܕܡܸܢܹܗ ܡ̣ܢ ܗܵܪܟܵܐ ܡܫܲܪܸܐ ܡܸܬܿܬܿܙܝܼܥ ܟܠ ܐܸܡܲܬܼܝ ܒܤܘܼܟܵܠܵܐ
                ܥܲܠ ܗܵܠܹܝܢ ܕܡܸܬܼܪ̈ܲܓܼܸܫܵܢ: ܗܵܠܹܝܢ ܕܠܲܚܫܲܚܬܼܵܐ ܒܲܪ̈ܝܵܢ ܕܬܵܪܒܿܝܼܬܹܗ
                ܕܦܲܓܼܪܵܐ: ܘܲܒܼܝܲܕܼ ܬܸܫܡܸܫܬܿܗܹܝܢ ܚܲܝܠܵܐ ܝܵܗ̈ܒܵܢ ܠܐܲܪܒܿܥܵܐ ܐܸܤܛܘܼ̈ܟܼܤܹܐ
                ܕܲܒܼܓܼܘܼܫܡܵܐ. ܕܘܒܵܪܵܐ ܪܘܼܚܵܢܵܐ ܐܝܼܬܼܵܘܗܝ: ܦܘܼܠܚܵܢܵܐ ܕܠܵܐ ܪܸ̈ܓܼܫܹܐ.
                ܗܵܝ̇ ܗ̣̄ܝ ܕܲܟܼܬܼܝܼܒܼܵܐ ܠܐܲܒܼܵܗ̈ܵܬܼܵܐ: ܕܡܵܐ ܕܗܵܘ̈ܢܹܐ ܕܩܲܪܝܼ̈ܫܹܐ ܩܲܒܸܿܠ̣ܘ
                ܬܹܐܘܿܪܝܼܵܐ ܕܲܩܢܘܿܡܗܘܿܢ: ܗܵܝܕܹܝܢ ܐܵܦ ܥܲܒܼܝܘܼܬܹܗ ܕܓܼܘܼܫܡܵܐ
                ܬܸܫܬܿܩܸܠ ܡ̣ܢ ܡܨܲܥܬܼܵܐ. ܘܲܚܙܵܬܼܵܐ ܡܸܟܹܝܠ ܬܸܗܘܸܐ: ܪܘܼܚܵܢܵܝܬܵܐ܀
                	ܬܹܐܘܿܪܝܼܵܐ ܕܲܩܢܘܿܡܗܘܿܢ: ܥܲܠ ܒܪܝܼܬܼܵܐ ܩܲܕܼܡܵܝܬܼܵܐ ܕܲܟܼܝܵܢܵܐ ܐܵܡܲ݁ܪ.
                ܕܡ̣ܢ ܗܵܪܟܵܐ ܡܸܟܹܝܠ: ܦܫܘܼܩܐܵܝܵܬܼ ܢܸܗܘܸܐ ܡܸܬܿܬܿܙܝܼܥ ܥܲܠ ܗܵܝ̇
                ܕܡܸܫܬܲܡܗܵܐ ܝܑܼܕܲܥܬܵܐ ܝܑܼܚܝܼܕܼܵܝܵܬܐ: ܕܐܝܼܬܹܝܗ̇ ܐܲܝܟܼ ܕܲܒܼܦܘܼܫܵܩܵܐ ܢܲܗܝܼܪܵܐ:
                ܬܲܗܪܵܐ ܕܒܲܐܠܵܗܵܐ. ܗܵܢܵܘ ܛܲܟܼܤܵܐ ܕܗܵܘ̇ ܕܘܼܒܵܪܵܐ ܪܲܒܵܐ ܕܲܥܬܼܝܼܕܼ:
                ܕܡܸܬܼܝܼܗܸܒܼ ܒܚܹܐܪܘܼܬܼܵܐ ܕܚܵܝܵܐ ܕܠܵܐ ܡܵܝܘܿܬܼܘܼܬܼܵܐ: ܒܗܵܘ̇ ܗܘܼܦܵܟܼܵܐ
                
                 305 
                
                ܕܒܼܵܬܲܪ ܩܝܵܡܬܼܵܐ. ܒܗܵܝ̇ ܕܠܵܐ ܬܘܼܒܼ ܡܸܬܼܦܤܸܩ ܟܝܵܢܵܐ ܐ̄ܢܵܫܵܝܵܐ ܡ̣ܢ
                ܗܵܪ ܬܲܡܵܢ: ܡ̣ܢ ܬܲܗܪܵܐ ܐܲܡܝܼܢܵܐ ܕܒܲܐܠܵܗܵܐ: ܠܘܵܬܼ ܡܸܕܸܡ ܡ̣ܢ
                ܒܪܝܼܬܼܵܐ ܠܡܸܬܼܐܵܫܵܕܼܘܼ. ܐܸܠܘܼ ܐܝܼܬܼ ܗ̄ܘ̣ܵܐ ܡܸܕܸܡ ܐ̄ܚܪܹܝܢ ܕܦܵܚܹ̇ܩ ܠܹܗ:
                ܦܵܗܹ̇ܐ ܗ̄ܘ̣ܵܐ ܒܲܙܒܲܢ ܒܹܗ: ܘܒܲܙܒܲܢ ܒܗܵܢܘܿܢ. ܐܸܢ ܕܹܝܢ ܫܘܼܦܪܵܐ
                ܕܟܼܠ ܡܸܕܸܡ ܕܐܝܼܬܼ ܒܗܵܘ̇ ܬܘܼܩܵܢܵܐ ܕܲܥܬܼܝܼܕܼ: ܠܬܲܚܬܿ ܡ̣ܢ ܫܘܼܦܪܹ̈ܐ
                ܐܸܢܘܿܢ ܕܝܼܠܹܗ: ܐܲܝܟܲܢܵܐ ܡܸܫܟܲܚ ܡܲܕܼܥܵܐ ܢܵܦܹ̇ܩ ܒܲܚܙܵܬܹܗ ܠܒܲܪ ܡ̣ܢ
                ܗܵܢܵܐ؟ ܡܵܢܵܐ ܗܵܟܹܝܠ؟ ܡܵܝܘܿܬܼܘܼܬܼܵܐ ܐܵܠ̇ܨܵܐ ܠܹܗ: ܘܐܸܠܵܐ ܝܘܼܩܪܹܗ
                ܕܒܸܤܪܵܐ: ܘܐܸܠܵܐ ܥܘܼܗܕܵܢܵܐ ܕܲܐ̄ܚܝܵܢܵܘ̈ܗܝ: ܘܐܸܠܵܐ ܤܘܼܢܩܵܢܵܐ
                ܕܲܟܼܝܵܢܵܐ: ܘܐܸܠܵܐ ܤܲܩܘܼ̈ܒܼܠܹܐ ܕܲܫܟܼܝܼܚܝܼܢ. ܐܵܘ ܦܸܗܝܵܐ ܕܠܵܐ ܝܑܼܕܲܥܬܼܵܐ:
                ܐܵܘ ܠܵܐ ܓܡܝܼܪܘܼܬܹܗ ܕܲܟܼܝܵܢܵܐ: ܐܵܘ ܦܸܗܝܵܐ ܕܒܸܤܛܘܼ̈ܟܼܤܹܐ: ܐܵܘ
                ܥܸܢܝܵܢܵܐ ܕܚܲܕܼ ܥܲܡ ܚܲܕܼ: ܐܵܘ ܩܘܼܛܵܥܵܐ ܕܡܲܥܡܸܠ: ܐܵܘ ܠܹܐܘܬܹܗ
                ܕܒܸܤܪܵܐ. ܐܸܢܕܹܝܢ ܐܵܦ ܒܥܵܠܡܵܐ ܗܵܢܵܐ: ܟܲܕܼ ܟܠܗܹܝܢ ܗܵܠܹܝܢ ܐܝܼܬܲܝܗܹܝܢ:
                ܐܸܡܲܬܼܝ ܕܒܲܙܒܲܢ ܬܸܬܼܓܠܸܓܼ ܘܹܐܠܵܐ ܕܚܲܫܹ̈ܐ ܡ̣ܢ ܩܕܼܵܡ ܥܲܝ̈ܢܹܐ ܕܪܸܥܝܵܢܵܐ:
                ܘܲܡܕܼܝܼܩ ܒܗܵܘ̇ ܫܘܼܒܼܚܵܐ: ܡܸܚܕܼܵܐ ܡܸܫܬܿܩܸܠ ܡܲܕܥܵܐ ܒܬܸܗܡܵܐ.
                ܘܐܸܠܘܼ ܠܵܐ ܕܲܬܼܚܘܼܡܵܐ ܤܝܼܡ ܠܹܗ ܠܐܲܠܵܗܵܐ ܒܗܵܠܹܝܢ ܚܲܝܹ̈ܐ ܠܨܸܒܼ̈ܘܵܬܼܵܐ
                ܕܐܲܝܟܼ ܗܵܠܹܝܢ: ܕܲܟܼܡܵܐ ܬܸܗܘܸܐ ܬܵܘܚܲܪܬܵܐ ܕܲܒܼܗܹܝܢ: ܒܟܼܠܗܘܿܢ
                ܚܲܝܵܘ̈ܗܝ ܕܒܲܪܢܵܫܵܐ ܐܸܠܘܼ ܐܸܫܬܒܸܩ: ܠܵܐ ܢܵܦܹ̇ܩ ܗ̄ܘ̣ܵܐ ܡ̣ܢ ܬܲܡܵܢ.
                ܐܲܝܟܲܢܵܐ ܡܵܕܹܝܢ ܠܗܲܠ ܟܲܕܼ ܟܠܗܹܝܢ ܗܵܠܹܝܢ ܠܲܝܬܿ: ܘܕܼܘܼܒܵܪܵܐ ܗ̄ܘ̣
                ܕܠܵܐ ܬܚܘܼܡܵܐ: ܘܲܒܼܗܘܿܢ ܒܤܘܼܥܪ̈ܵܢܹܐ ܩܢܘܿܡܵܐܝܼܬܼ: ܗܵܘܹܝܢܲܢ ܡܸܟܹܝܠ
                ܠܓܼܵܘ ܡ̣ܢ ܕܵܪ̈ܲܝ ܡܲܠܟܿܘܼܬܼܵܐ ܐܸܢ ܫܵܘܹ̇ܝܢ ܕܘܼܒܵܪ̈ܲܝܢ: ܬܘܼܒܼ ܗܵܘܹ̇ܐ
                ܠܹܗ ܡܲܦܩܵܢܵܐ ܠܪܸܥܝܵܢܵܐ: ܠܡܸܬܼܪܲܚܵܩܘܼ ܡ̣ܢ ܚܙܵܬܼܵܐ ܕܬܸܕܼܡܘܼܪܬܵܐ
                ܕܐܲܠܵܗܵܐ: ܠܡܸܫܟܲܢ ܠܘܵܬܼ ܡܸܕܸܡ ܐ̄ܚܪܹܝܢ؟܀ ܘܵܝ ܠܲܢ ܕܠܵܐ ܝܵܕܼܥܝܼܢܲܢ
                
                 306 
                
                ܢܲܦܫܲܢ: ܕܠܲܐܝܢܵܐ ܕܘܼܒܵܪܵܐ ܡܙܲܡܢܝܼܢܲܢ. ܘܲܠܗܵܠܹܝܢ ܚܲܝܹ̈ܐ ܕܲܟܼܪܝܼܗܘܼܬܼܵܐ
                ܘܛܲܟܼܤܵܐ ܕܚܲܝ̈ܘܵܬܼܵܐ: ܘܲܠܥܵܠܡܵܐ ܘܠܐܘܼ̈ܠܨܵܢܵܘܗܝ ܘܒܼܝܼ̈ܫܵܬܹܗ ܘܲܢܚܵܝܹܗ:
                ܕܡܸܕܸܡ ܐܝܼܬܼܵܘܗܝ ܚܵܫܒܿܝܼܢܲܢ܀
                	ܡܫܝܼܚܵܐ ܕܒܲܠܚܘܿܕܼܵܘܗ ܝܚܲܠܬܼܵܢܵܐ: ܛܘܼܒܼܵܘܗܝ ܠܒܲܪܢܵܫܵܐ
                ܕܐܲܢ̄ܬܿ ܗ̄ܘ̣ ܡܤܲܝܥܵܢܹܗ: ܘܡܲܤܩܵܢܲܢܝ̈ܟ ܒܠܸܒܹܗ. ܐܲܢ̄ܬܿ ܡܵܪܝ ܐܲܗܦܸܟܼ
                ܐܲܦܲܝ̈ܢ ܡ̣ܢ ܥܵܠܡܵܐ ܒܝܲܕܼ ܪܸܓܿܬܼܵܐ ܕܒܼܵܟܼ: ܕܢܸܗܘܸܐ ܚܵܙܹ̇ܝܢܲܢ ܠܹܗ ܐܲܝܟܼ
                ܕܐܝܼܬܼܵܘܗܝ: ܕܠܵܐ ܬܘܼܒܼ ܢܲܫܲܪ ܛܸܠܵܢ̈ܝܬܼܵܐ ܐܲܝܟܼ ܫܲܪܝܼܪ̈ܵܬܼܵܐ. ܐܲܪܡܵܐ
                ܡܵܪܝ ܒܪܸܥܝܵܢܲܢ ܚܘܼܦܵܛܵܐ ܡ̣ܢ ܩܕܼܵܡ ܡܵܘܬܵܐ: ܕܲܒܼܥܸܕܵܢܵܐ ܗܵܘ̇
                ܕܡܲܦܩܵܢܲܢ: ܢܸܕܲܥ ܕܲܠܡܵܢܵܐ ܗܘ̤ܵܬܼ ܡܲܥܲܠܬܲܢ ܘܡܲܦܲܩܬܲܢ ܕܲܠܗܵܢܵܐ
                ܥܲܠܡܵܐ. ܕܟܲܕܼ ܠܲܥ̇ܒܼܵܕܼܵܐ ܕܠܹܗ ܐܸܬܼܩܪܝܼܢ ܢܫܲܡܠܸܐ: ܐܲܝܟܼ ܢܝܼܫܵܟܼ
                ܕܒܲܤܝܵܡܲܢ ܕܲܒܼܗܵܠܹܝܢ ܚܲܝܹ̈ܐ ܠܘܼܩܕܼܵܡ: ܢܤܲܟܸܿܐ ܒܪܸܥܝܵܢܵܐ ܕܲܡܠܸܐ
                ܬܘܼܟܼܠܵܢܵܐ: ܠܩܘܼܒܵܠܵܐ ܕܪܵܘܪ̈ܒܼܵܬܼܵܐ: ܕܐܲܝܟܼ ܫܘܼ̈ܘܼܕܵܝܹܐ ܕܲܟܼܬܼܵܒܹ̈ܐ ܒܲܒܼܪܝܼܬܼܵܐ
                ܕܬܲܪܬܹܝܢ ܡܛܲܝ̈ܒܼܵܢ ܠܚܘܼܒܵܟܼ: ܐܲܝܠܹܝܢ ܕܲܢܛܝܼܪ ܠܘܵܬܲܢ ܥܘܼܗܕܵܢܗܹܝܢ
                ܒܗܲܝܡܵܢܘܼܬܼܵܐ ܕܐ̄ܪܵܙ܀
                	ܕܲܟܼܝܘܼܬܼܵܐ ܕܦܲܓܼܪܵܐ ܐܝܼܬܹܝܗ̇: ܚܲܤܝܘܼܬܼܵܐ ܕܡ̣ܢ ܛܲܡܐܘܼܬܼܵܐ.
                ܕܲܟܼܝܘܼܬܼܵܐ ܕܹܝܢ ܕܢܲܦܫܵܐ ܐܝܼܬܹܝܗ̇: ܡܚܲܪܪܘܼܬܼܵܐ ܕܡ̣ܢ ܚܲܫܹ̈ܐ ܟܤܲܝ̈ܵܐ:
                ܕܲܒܼܬܲܪܥܝܼܬܼܵܐ ܡܸܬܼܩܲܝܡܝܼܢ. ܕܲܟܼܝܘܼܬܼܵܐ ܕܗܵܘܢܵܐ ܐܝܼܬܹܝܗ̇: ܗܵܝ̇ ܕܲܒܼܓܸܠܝܵܢܹ̈ܐ
                ܢܸܬܿܕܲܟܸܐ: ܡ̣ܢ ܙܵܘܥܵܐ ܕܥܲܠ ܟܠ ܟܢܵܦܹ̇ܠ ܬܚܹܝܬܼ ܪܓܸܫܬܵܐ ܒܢܝܼܫܵܐ
                ܕܥܲܒܼܝܘܼܬܼܗܹܝܢ. ܐܵܦ ܛܠܵܝܗܹܐ ܫܲܒܼܪܹ̈ܐ: ܕܟܹܝܢ ܐܸܢܘܿܢ ܒܦܲܓܼܪܵܐ.
                ܘܲܒܼܢܲܦܫܢܗܘܿܢ ܐܝܼܬܲܝܗܘܿܢ: ܕܠܵܐ ܚܲܫܹ̈ܐ. ܠܵܐ ܓܹܝܪ ܐ̄ܢܵܫ ܩܵܪܹܐ ܠܗܘܿܢ
                ܕܲܟܼܝܲܝ̈ ܒܗܵܘܢܵܐ. ܕܲܟܼܝܘܼܬܼܵܐ ܕܗܵܘܢܵܐ: ܓܡܝܼܪܘܼܬܼܵܐ ܐܝܼܬܹܝܗ̇ ܕܲܒܼܕܼܘܼܪܵܫܵܐ
                
                 307 
                
                ܕܬܹܐܘܿܪ̈ܝܼܵܣ ܫܡܲܝܵܢ̈ܝܵܬܼܵܐ: ܕܒܸܠܥܵܕܼ ܡ̣ܢ ܪܸ̈ܓܼܫܹܐ ܡܸܬܿܬܿܙܝܼܥ: ܥܲܠ
                ܚܲܝ̈ܠܹܐ ܪ̈ܘܼܚܵܢܹܐ ܕܥܵܠܡܹ̈ܐ ܗܵܢܘܿܢ ܕܲܠܥܸܠ: ܬܡܝܼ̈ܗܹܐ ܘܥܵܒܼܪ̈ܲܝ
                ܠܡܸܢܝܵܢܵܐ: ܘܲܦܪ̈ܝܼܫܲܝ ܒܗܘܼ̈ܦܵܟܹܐ ܘܲܚܠܝܼ̈ܛܲܝ ܒܬܸܫܡܸܫܬܵܐ ܠܵܐ
                ܡܸܬܼܚܲܙܝܵܢܝܼܬܼܵܐ: ܕܲܒܼܙܵܘܥܵܐ ܕܓܸܠܝܵܢܹ̈ܐ ܐܲܠܵܗܵܝܹ̈ܐ ܤܒܼܝܼ̈ܤܲܝ ܒܫܘܼܚܠܵܦܝ̈ܗܘܿܢ
                ܕܲܒܼܟܼܠܥܵܕܵܢ.