Isaac of Nineveh. “Discourse 41.” Based upon Digital Syriac Corpus. Last modified March 5, 2019. https://syriaccorpus.org/432.
    
        
            
                ܐܸܓܲܪܬܼܵܐ ܕܲܟܼܬܲܒܼ ܠܘܵܬܼ ܐ̄ܢܵܫ ܡ̣ܢ ܐܲܚܹ̈ܐ ܪܵܚܹ̇ܡ ܫܸܠܝܵܐ: ܥܲܠ ܗܵܝ̇
                ܕܐܲܝܟܲܢ ܡܸܬܼܦܲܪܲܣ ܤܵܛܵܢܵܐ ܠܲܡܒܲܛܵܠܘܼ ܠܲܚܦܝܼ̈ܛܹܐ ܡ̣ܢ ܐܲܡܝܼܢܘܼܬܼܵܐ
                ܕܲܒܼܫܸܠܝܵܐ: ܒܦܲܪܨܘܿܦ ܚܘܼܒܵܐ ܕܩܲܪܝܼܒܼܵܐ ܘܲܕܼܐ̄ܢܵܫܵܐ ܡܒܲܩܪܹ̈ܐ: ܘܲܕܼܙܵܕܹܩ
                ܕܲܗܘ̤ܵܐ ܒܤܝܼܪ ܒܥܲܝܢܵܘ̈ܗܝ ܟܠܡܸܕܸܡ: ܚܠܵܦ ܝܑܼܕܲܥܬܹܗ ܕܐܲܠܵܗܵܐ
                ܕܲܒܼܫܸܠܝܵܐ ܡܸܫܬܲܟܼܚܵܐ: ܐܲܝܟܼ ܕܐܸܬܼܚܲܙܝܲܬ̤ ܕܡܘܼܬܼܵܐ ܒܐܲܒܼܵܗܲܝ̈ܢ
                ܩܲܕܼܡܵܝܹ̈ܐ. ܡܐ.
            
            
                ܡܸܛܠ ܕܝܵܕܲܥ̇ܢܵܐ ܠܵܟܼ ܕܪܵܚܹ̇ܡ ܫܸܠܝܵܐ ܐܲܢ̄ܬܿ: ܘܲܒܼܤܲܓܝܼ̈ܐܵܬܼܵܐ
                ܡܥܲܪܩܸܠ ܠܵܟܼ ܤܵܛܵܢܵܐ ܒܦܲܪܨܘܿܦܵܐ ܕܲܡܝܲܬܿܪܘܼܬܼܵܐ: ܒܗܵܝ̇ ܕܝܵܕܲܥ̇
                ܠܢܝܼܫܹܗ ܕܪܸܥܝܵܢܵܟܼ: ܐܲܝܟܼ ܕܲܢܦܲܠܗܕܼܵܟܼ ܡ̣ܢ ܡܝܲܬܿܪܘܼܬܼܵܐ ܗܵܕܹܐ
                ܚܵܒܼܘܿܫܬܼܵܐ ܘܤܲܓܝܼܐܲܬܼ ܡܢܵܘ̈ܬܼܵܐ: ܐܘܿ ܐܲܚܘܼܢ ܡܝܲܬܿܪܵܐ: ܐܲܝܟܼ ܗܲܕܵܡܵܐ
                ܠܒܲܪ ܙܵܘܓܹܗ: ܠܲܡܥܲܕܵܪܘܼ ܠܨܸܒܼܝܵܢܵܟܼ ܫܲܦܝܼܪܵܐ ܒܡܸܠܬܵܐ ܕܝܘܼܢܼܪܵܢܵܐ:
                ܒܛܝܼܠܘܼܬܼܵܐ ܗܘ̤ܵܬܼ ܠܝܼ. ܐܲܝܕܵܐ ܕܡ̣ܢ ܐ̄ܢܵܫܵܐ ܚܲܟܿܝܼ̈ܡܲܝ ܒܕܼܘܼܒܵܪܵܐ:
                ܘܡ̣ܢ ܟܬܼܵܒܹ̈ܐ ܕܐܲܒܼܵܘ̈ܗܝ ܘܢܸܤܝܵܢܵܐ ܩܢܸܐ ܐ̄ܢܵܐ ܠܵܗ̇. ܕܐܸܢ ܠܵܐ ܡܒܲܤܲܪ
                ܒܲܪܢܵܫܵܐ ܥܲܠ ܐܝܼܩܵܪܹ̈ܐ ܘܨܲܥܪܹ̈ܐ: ܘܲܡܤܲܝܒܲܪ ܚܠܵܦ ܫܸܠܝܵܐ ܚܸܤܕܵܐ
                ܘܡܘܼܝܵܩܵܐ ܘܚܘܼܤܪ̈ܵܢܹܐ: ܘܲܥܕܲܡܵܐ ܠܡܲܘ̈ܘܵܬܼܵܐ: ܘܢܸܗܘܸܐ ܓܘܼܚܟܵܐ:
                ܘܢܸܬܼܚܫܸܒܼ ܫܵܢܝܵܐ ܘܫܲܛܘܼܪܵܐ ܡ̣ܢ ܚܲܙܵܝܵܘ̈ܗܝ: ܠܵܐ ܡܩܲܕܹܐ ܠܛܵܒܼ̈ܬܹܗ
                
                 308 
                
                ܕܫܸܠܝܵܐ. ܒܗܵܝ̇ ܕܐܸܢ ܚܕܼܵܐ ܙܒܲܢ ܬܲܪܥܵܐ ܠܥܸܠ̈ܠܵܬܼܵܐ ܢܸܦܬܲܚ ܒܲܪܢܵܫܵܐ:
                ܠܵܐ ܫܵܠܹ̇ܐ ܤܵܛܵܢܵܐ ܠܡܲܝܬܵܝܘܼ ܥܠܵܘܗܝ ܒܢܲܝ̈ܢܵܫܵܐ ܒܥܸܠ̈ܠܵܐ  ܥܸܠ̈ܠܵܢ:
                ܥܲܡ ܦܸܓܼܥܹ̈ܐ ܐܲܡܝܼ̈ܢܹܐ ܕܠܵܐ ܡܸܢܝܵܢ. ܡܸܛܠ ܗܵܢܵܐ ܐܵܚܝ: ܐܸܢ ܐܚܲܬܝܼܬܼܘܼܬܼ
                ܕܘܼܒܵܪܵܐ ܕܲܒܼܫܸܠܝܵܐ ܡܲܚܸܒܼ ܐܲܢ̄ܬܿ: ܗܵܝ̇ ܕܠܲܝܬܿ ܒܵܗ̇ ܦܘܼܠܗܵܕܵܐ
                ܘܲܫܘܵܪ̈ܵܬܼܵܐ ܘܲܦܤܵܩܵܐ ܒܲܡܨܲܥܬܼܵܐ: ܐܲܝܟܼ ܕܒܼܵܗ̇ ܐܸܬܼܢܲܨܲܚܘ ܩܲܕܼܡܵܝܹ̈ܐ:
                ܗܵܟܲܢܵܐ ܡܸܫܟܲܚ ܐܲܢ̄ܬܿ ܠܲܡܫܲܠܵܡܘܼ ܪܸܓܿܬܵܐ ܗܵܕܹܐ ܡܩܲܠܲܤܬܵܐ: ܟܲܕܼ
                ܡܸܬܿܕܲܡܸܐ ܐܲܢ̄ܬܿ ܒܐܲܒܼܵܗܲܝ̈ܟ: ܘܫܵܩܹ̇ܠ ܐܲܢ̄ܬܿ ܒܪܸܥܝܵܢܵܟܼ ܐܲܝܟܼ ܕܲܒܼܪ̈ܘܼܫܡܹܐ
                ܥܘܼܗܕܵܢܵܐ ܕܬܲܫ̈ܥܝܵܬܼܗܘܿܢ. ܕܐܲܝܠܹܝܢ ܡܸܢܗܘܿܢ ܕܲܠܫܸܠܝܵܐ ܓܡܝܼܪܵܐ
                ܚܲܒܸܒܼܘ: ܠܵܐ ܠܚܘܼܒܵܐ ܕܩܲܪܝܼܒܼܵܐ ܐܸܬܼܒܿܛܸܠ ܠܗܘܿܢ ܠܲܡܩܲܝܵܡܘܼ:
                ܒܝܲܕܼ ܫܲܪܝܼܘܼܬܼܵܐ ܕܲܩܢܘܿܡܗܘܿܢ: ܘܠܵܐ ܡ̣ܢ ܦܲܪ̈ܨܘܿܦܹܐ ܕܡܸܤܬܲܒܼܪܝܼܢ
                ܡܝܲܩܪܹ̈ܐ: ܒܵܗ̇ܬܿܝܼܢ ܗ̄ܘ̣ܵܘ ܒܲܥܪܘܼܩܝܵܐ ܕܡ̣ܢ ܦܸܓܼܥܲܝ̈ܗܘܿܢ. ܘܟܲܕܼ ܗܵܟܲܢ
                ܪܵܕܹܝܢ ܗ̄ܘ̣ܵܘ: ܠܵܐ ܗ̄ܘ̣ܵܐ ܫܵܝܘܿܛܹ̈ܐ ܕܐܲܚܲܝ̈ܗܘܿܢ ܡܸܬܼܚܲܫܒܿܝܼܢ ܗ̄ܘ̣ܵܘ
                ܡ̣ܢ ܝܵܕܼܘܿܥܹ̈ܐ ܘܚܲܟܝܼ̈ܡܹܐ: ܐܵܦܠܵܐ ܡܒܲܤܪ̈ܵܢܹܐ ܘܲܡܒܲܤ̈ܝܵܢܹܐ ܘܲܓܼܠܝܼ̈ܙܲܝ
                ܡ̣ܢ ܦܘܼܪܫܵܢܵܐ: ܐܲܝܟܼ ܕܐܲܡܝܼܪ ܠܐ̄ܢܵܫ̈ܝܼܢ ܡܸܢܗܘܿܢ: ܐܲܝܟܼ ܕܲܠܡܲܦܲܩ
                ܒܪܘܼܚܵܐ: ܕܐܲܝܠܹܝܢ ܕܲܡܝܲܩܪܝܼܢ ܠܫܲܠܝܘܼܬܼܵܐ ܘܲܥܪܘܼܩܝܵܐ: ܝܲܬܝܼܪ ܡ̣ܢ
                ܦܸܓܼܥܵܐ ܕܩܲܪܝܼܒܼܵܐ. ܒܲܪܢܵܫܵܐ ܠܲܡ ܕܝܼܠܸܦ̣ ܒܢܸܤܝܵܢܵܐ ܚܲܠܝܘܼܬܼܵܐ ܕܫܲܠܝܘܼܬܼܵܐ
                ܕܩܸܠܵܝܬܹܗ: ܠܵܐ ܗ̄ܘ̣ܵܐ ܐܲܝܟܼ ܡ̇ܢ ܕܫܵܐܹ̇ܛ ܠܩܲܪܝܼܒܹܗ ܥܵܪܹܩ ܡ̣ܢ
                ܦܸܓܼܥܹܗ: ܐܸܠܵܐ ܡܸܛܠ ܦܹܐܪܵܐ ܕܩܵܛܹ̇ܦ ܡ̣ܢ ܫܸܠܝܵܐ. ܕܐܲܝܟܼ ܐܲܝܟܲܢ
                ܥܵܪܩܝܼܢ ܗ̄ܘ̣ܵܘ؟ ܐܲܒܵܐ ܠܲܡ ܐܲܪܤܵܢܝܼܣ: ܠܵܐ ܡܢܵܚ ܗ̄ܘ̣ܵܐ ܕܢܸܦܓܲܥ
                ܒܐ̄ܢܵܫ. ܐܲܒܵܐ ܕܹܝܢ ܬܹܐܵܕܘܿܪܵܐ ܐܵܦܸܢ ܦܵܓܲܥ ܗ̄ܘܼܵܐ: ܒܲܕܼܡܘܼܬܼ ܤܲܝܦܵܐ
                ܚܲܪܝܼܦܵܐ ܗܵܘܹ̇ܐ ܗ̄ܘ̣ܵܐ ܒܦܸܓܼܥܹܗ. ܗܵܢܵܘ ܕܹܝܢ: ܕܐܵܦܠܵܐ ܒܲܫܠܵܡܵܐ ܕܐ̄ܢܵܫ
                ܫܵܐܹ̇ܠ ܗ̄ܘ̣ܵܐ: ܐܸܡܲܬܼܝ ܕܐܲܝܟܼ ܕܲܒܼܓܸܕܼܫܵܐ ܢܸܫܬܿܟܲܚ ܗ̄ܘ̣ܵܐ ܠܒܲܪ ܡ̣ܢ
                
                 309 
                
                ܩܸܠܝܵܬܹܗ. ܩܲܕܝܼܫܵܐ ܕܹܝܢ ܐܲܪܤܵܢܝܼܣ: ܘܐܵܦܠܵܐ ܬܘܼܒܼ ܐܲܝܢܵܐ ܕܠܲܫܠܵܡܹܗ
                ܐܵܙܹ̇ܠ ܗ̄ܘ̣ܵܐ: ܡܫܲܠܸܡ ܗ̄ܘ̣ܵܐ ܠܹܗ. ܒܲܙܒܲܢ ܠܲܡ ܚܲܕܼ ܡ̣ܢ ܐܲܒܼܵܗ̈ܬܼܵܐ:
                ܐܸܙܲܠ̣ ܕܢܸܚܙܸܐ ܠܐܲܒܼܵܐ ܐܲܪܤܵܢܝܼܣ: ܘܲܦܬܲܚ̣ ܤܵܒܼܵܐ ܟܲܕܼ ܤ̣ܒܲܪ ܠܹܗ:
                ܕܲܡܫܲܡܫܵܢܹܗ ܐܝܼܬܼܵܘܗܝ. ܘܟܲܕܼ ܚ̣ܙܵܝܗܝ ܕܡܲܢ̣ܘܼ: ܫ̣ܕܼܵܐ ܢܲܦܫܹܗ ܥܲܠ
                ܐܲܦܵܘ̈ܗܝ. ܘܟܲܕܼ ܤܲܓܝܼ ܐܲܦܝܼܤܹܗ ܟܲܕܼ ܐܵܡܲ݁ܪ: ܕܩܘܼܡ ܐܲܒܵܐ ܕܐܵܦܸܢ
                ܒܹܗ ܒܬܲܪܥܵܐ ܐܹܫܲܠܡܵܟܼ ܘܐܹܙܲܠ. ܗ̤ܘ ܕܹܝܢ ܩܲܕܝܼܫܵܐ ܡܸܬܼܚܪܸܐ ܗ̄ܘ̣ܵܐ
                ܘܐܵܡܲ݁ܪ: ܕܠܵܐ ܩܵܐܹ̇ܡ ܐ̄ܢܵܐ ܥܕܲܡܵܐ ܕܐܵܙܹ̇ܠ ܐܲܢ̄ܬܿ. ܘܠܵܐ ܩܵܡ̣: ܥܕܲܡܵܐ
                ܕܫܲܒܼܩܹܗ ܘܫܲܢܝܼ. ܗܵܕܹܐ ܕܹܝܢ ܥܵܒܹ̇ܕܼ ܗ̄ܘ̣ܵܐ ܗܵܘ̇ ܛܘܼܒܼܵܢܵܐ: ܕܠܵܐ ܟܲܕܼ
                ܢܸܬܸܠ ܠܗܘܿܢ ܚܕܼܵܐ ܙܒܲܢ ܐܝܼܕܼܵܐ: ܬܘܼܒܼ ܙܒܲܢ̄ܬܵܐ ܐ̄ܚܪܹܬܼܵܐ ܢܹܐܬܼܘܿܢ.
                	ܐ̄ܢܵܫ ܠܲܡ ܡ̣ܢ ܐܲܒܼܵܗ̈ܬܼܵܐ. ܚܙܝܼ ܤܸܕܼܪܵܗ̇ ܕܡܸܠܬܼܵܐ: ܕܠܵܐ ܬܹܐܡܲܪ
                ܕܕܲܠܡܵܐ ܡܸܛܠ ܒܨܝܼܪܘܼܬܹܗ ܒܲܤܲܪ ܥܠܵܘܗܝ. ܐܸܠܵܐ ܚܲܕܼ ܡ̣ܢ ܐܲܒܼܵܘ̈ܬܼܵܐ
                ܐܵܡܲ݁ܪ ܠܹܗ. ܐܝܼܬܼ ܠܲܢ ܬܲܚܘܝܼܬܼܵܐ ܕܪܲܒܵܐ ܤܲܓܝܼ: ܡ̣ܢ ܓܲܒܿ ܐ̄ܚܪܹܝܢ.
                ܕܠܵܐ ܬܹܐܡܲܪ ܕܲܠܚܲܕܼ ܫܵܐܹ̇ܛ ܗ̄ܘ̣ܵܐ: ܘܠܲܐ̄ܚܪܹܢܵܐ ܡܸܛܠ ܐܝܼܩܵܪܹܗ
                ܢܵܤܹ̇ܒܼ ܗ̄ܘ̣ܵܐ ܒܐܲܦܵܘ̈ܗܝ: ܘܡܸܬܼܥܢܸܐ ܥܲܡܹܗ. ܐܸܠܵܐ ܚܕܼܵܐ ܫܲܘܝܘܼܬܼܵܐ
                ܩܢܸܐ ܗ̄ܘ̣ܵܐ ܒܲܥܪܘܼܩܝܵܐ: ܡ̣ܢ ܦܸܓܼܥܵܐ ܕܟܼܠ ܡܘܼ̈ܫܚܵܢ. ܘܚܲܕܼ ܚܫܝܼܒܼ
                ܗ̄ܘ̣ܵܐ ܒܥܲܝܢܵܘ̈ܗܝ ܠܲܡܒܲܤܵܪܘܼ ܥܲܠ ܦܸܓܼܥܲܝ̈ܗܘܿܢ ܚܠܵܦ ܫܸܠܝܵܐ:
                ܠܪܲܒܵܐ: ܐܲܝܟܼ ܙܥܘܿܪܵܐ. ܘܲܠܡܸܛܥܲܢ ܥܸܕܼܠܵܝܵܐ ܥܠܵܘܗܝ ܡ̣ܢ ܟܠܢܵܫ:
                ܚܠܵܦ ܐܝܼܩܵܪܹܗ ܕܫܸܠܝܵܐ ܘܫܸܬܼܩܵܐ. ܝܵܕܼܥܝܼܢܲܢ ܓܹܝܪ: ܕܟܲܕܼ ܒܲܙܒܲܢ
                ܐܸܙܲܠ̣ ܠܘܵܬܹܗ ܛܘܼܒܼܵܢܵܐ ܬܹܐܘܿܦܝܼܠܵܐ ܪܹܫ ܐܲܦܸܤܩ̈ܘܿܦܹܐ ܕܐܵܠܹܟܼܤܲܢܕܪܝܼܵܐ:
                ܟܲܕܼ ܕܒܼܝܼܪ ܥܲܡܹܗ ܐܵܦ ܕܲܝܵܢܵܐ ܕܐܲܬܼܪܵܐ: ܐܲܝܟܼ ܕܠܐܝܼܩܵܪܵܐ ܘܝܲܐܝܼܒܼܘܼܬܼܵܐ
                ܕܲܚܙܵܬܹܗ ܕܩܲܕܝܼܫܵܐ. ܟܲܕܼ ܝܑܼܬܸܒܼ ܠܘܵܬܼܗܘܿܢ: ܐܵܦܠܵܐ ܒܡܸܠܬܼܵܐ
                ܙܥܘܿܪܬܵܐ ܐܲܝܟܼ ܕܠܐܝܼܩܵܪܗܘܿܢ ܐܲܢܝܼܚ ܐܸܢܘܿܢ: ܘܟܲܕܼ ܪܲܒܲܬܼ ܝܲܐܝܼܒܼܝܼܢ
                
                 310 
                
                ܗ̄ܘ̣ܵܘ ܕܢܸܫܡܥܘܼܢ ܡܸܠܬܹܗ. ܘܟܲܕܼ ܐܲܦܝܼܤܹܗ ܪܹܫܵܐ ܕܐܲܦܸܤܩ̈ܘܿܦܹܐ
                ܥܲܠ ܗܵܕܹܐ: ܩܲܠܝܼܠ ܠܲܡ ܕܹܝܢ ܫܬܸܩ̣ ܤܵܒܼܵܐ. ܘܐܲܓܼܝܼܒܼ ܐܸܢܘܿܢ
                ܡܸܠܬܼܵܐ: ܘܐܸܡ݂ܲܪ ܠܗܘܿܢ: ܘܐܸܢ ܐܹܡܲܪ ܠܟܼܘܿܢ: ܬܸܛܪܘܼܢ؟
                ܘܗܸܢܘܿܢ: ܐܸܫܬܵܘܕܝܼܘ ܠܹܗ. ܐܵܡܲ݁ܪ ܠܗܘܿܢ ܤܵܒܼܵܐ: ܐܲܝܟܵܐ ܕܫܵܡ̇ܥܝܼܬܿܘܿܢ
                ܕܐܝܼܬܼܵܘܗܝ ܐܲܪܤܵܬܝܼܣ: ܠܬܲܡܵܢ ܠܵܐ ܬܸܬܼܩܲܪܒܼܘܼܢ. ܚ̣ܙܲܝܬܿ ܬܡܝܼܗܘܼܬܹܗ
                ܕܤܵܒܼܵܐ؟ ܚܙܲܝܬܿ ܡܒܲܤܪܵܢܘܼܬܼܵܐ ܕܥܲܠ ܐܝܼܩܵܪܵܐ ܕܐ̄ܢܵܫܵܐ؟ ܗܵܢܵܘ ܕܝܼܕܲܥ̣
                ܠܡܸܩܛܲܦ ܦܹܐܪ̈ܵܘܗܝ ܕܫܸܠܝܵܐ: ܟܲܕܼ ܠܵܐ ܐܸܬܼܚܲܫܲܒܼ ܗܵܘ̇ ܛܘܼܒܼܵܢܵܐ:
                ܕܓܲܒܼܪܵܐ ܗ̄ܘ̣ ܩܵܬܼܘܿܠܝܼܩܵܐ: ܘܪܹܫܵܐ ܕܟܼܠܵܗ̇ ܥܹܕܼܬܵܐ. ܟܲܕܼ ܗܵܕܹܐ
                ܐܸܬܼܪܲܥܝܼ: ܕܐܸܢܵܐ ܚܕܼܵܐ ܙܒܲܢ ܠܥܵܠܡܵܐ ܡܲܚܬܼ ܐ̄ܢܵܐ ܗ̄ܘ̣: ܡܵܢܵܐ
                ܡܵܘܬܲܪ ܡܝܼܬܼܵܐ ܠܚܲܝܹ̈ܐ؟ ܘܐܸܬܼܪܫܝܼ ܥܲܠ ܗܵܕܹܐ ܪܸܫܝܵܢܵܐ ܕܿܡܠܸܐ ܚܘܼܒܵܐ
                ܡ̣ܢ ܛܘܼܒܼܵܢܵܐ ܡܵܩܵܪܝܼܣ ܟܲܕܼ ܐܵܡܲ݁ܪ ܠܹܗ: ܠܡܵܢܵܐ ܠܲܡ ܥܵܪܹܩ ܐܲܢ̄ܬܿ
                ܡܸܢܲܢ؟ ܘܲܥܒܲܕܼ ܤܵܒܼܵܐ ܩܲܕܝܼܫܵܐ ܡܲܦܲܩ ܒܪܘܼܚܵܐ ܬܡܝܼܗܵܐ ܕܫܵܘܹ̇ܐ
                ܠܩܘܼܠܵܤܵܐ: ܐܲܠܵܗܵܐ ܠܲܡ ܝܵܕܲܥ̇ ܕܡܲܚܸܒܼ ܐ̄ܢܵܐ ܠܟܼܘܿܢ: ܐܸܠܵܐ ܠܵܐ
                ܡܸܫܟܲܚ ܐ̄ܢܵܐ ܕܐܸܗܘܸܐ ܥܲܡ ܐܲܠܵܗܵܐ ܘܥܲܡ ܒܢܲܝ̈ܢܵܫܵܐ܀
                ܙܒܲܢ̄ܬܼܵܐ ܕܹܝܢ ܐ̄ܚܪܹܬܼܵܐ ܫܠܲܚ̣ ܠܹܗ ܪܹܫܵܐ ܕܐܲܦܸܤܩ̈ܘܿܦܹܐ ܥܲܠ ܗܵܕܹܐ.
                ܘܲܫܠܲܚ̣ ܠܹܗ ܤܵܒܼܵܐ ܟܲܕܼ ܐܵܡܲ݁ܪ: ܕܐܸܢ ܗ̤ܘ ܕܬܹܐܬܸܐ: ܦܵܬܲܚܢܵܐ
                ܠܵܟܼ. ܐܸܢܕܹܝܢ ܠܵܟܼ ܐܸܦܬܲܚ: ܠܟܼܠܢܵܫ ܦܵܬܲܚܢܵܐ. ܘܐܸܢ ܠܟܼܠܢܵܫ
                ܦܵܬܲܚܢܵܐ: ܬܘܼܒܼ ܗܵܪܟܵܐ ܠܵܐ ܡܟܲܬܲܪ ܐ̄ܢܵܐ. ܘܠܵܗ̇ ܠܗܵܕܹܐ ܕܡܝܼܪܘܼܬܼ
                ܝܘܼܠܦܵܢܵܐ: ܠܵܘ ܡ̣ܢ ܓܲܒܿ ܐ̄ܚܪܹܝܢ: ܐܸܠܵܐ ܡ̣ܢ ܒܲܪܬܼ ܩܵܠܵܐ ܐܲܠܵܗܵܝܬܵܐ
                ܝܲܠܦܵܗ̇. ܐܲܪܤܵܢܝܲܐ ܠܲܡ: ܥܪܘܿܩ ܡ̣ܢ ܒܢܲܝ̈ܢܵܫܵܐ: ܘܚܵܝܹ̇ܐ ܐܲܢ̄ܬܿ. ܠܵܐ
                ܐ̄ܢܵܫ ܡ̣ܢ ܒܲܛܝܼ̈ܠܹܐ ܘܪ̈ܵܚܡܲܝ ܥܸܢ̈ܝܵܢܹܐ: ܡܲܡܪܲܚ ܠܡܸܫܪܵܐ ܒܲܗ̈ܦܵܟܼܵܬܵܐ
                ܕܡܸܠܵܘ̈ܗܝ ܠܗܵܕܹܐ: ܘܠܲܡܡܲܠܵܠܘܼ ܠܩܘܼܒܼܠܵܗ̇: ܐܲܝܟܼ ܡ̇ܢ ܕܲܫܟܼܵܚܬܵܐ
                
                 311 
                
                ܗ̣̄ܝ ܐ̄ܢܵܫܵܝܬܵܐ ܒܥܵܬܵܐ ܕܫܲܠܝܘܼܬܼܵܐ. ܕܗܵܐ: ܝܘܼܠܦܵܢܵܐ ܗ̄ܘ̣ ܕܡ̣ܢ ܫܡܲܝܵܐ.
                ܘܲܕܼܠܵܐ ܢܸܤܒܲܪ ܕܗܵܕܹܐ ܥܲܠ ܥܪܘܼܩܝܵܐ ܘܡܲܦܲܩܬܼܵܐ ܕܡ̣ܢ ܓܵܘ ܥܵܠܡܵܐ
                ܐܸܬܼܐܲܡܪܲܬ̤ ܠܹܗ: ܘܠܵܘ ܠܗܵܝ̇ ܕܫܲܘܝܵܐܝܼܬܼ ܐܵܦ ܡܸܢܗܘܿܢ ܕܐܲܚܹ̈ܐ
                ܢܸܥܪܘܿܩ: ܡ̣ܢ ܒܵܬܲܪ ܕܲܫܒܲܩ̣ ܬܘܼܒܼ ܠܥܵܠܡܵܐ: ܘܐܝܼܬܼܵܘܗܝ ܡܸܟܹܝܠ
                ܒܥܘܼܡܪܵܐ ܕܕܲܝܪܵܐ: ܬܘܼܒܼ ܡܨܲܠܸܐ ܠܘܵܬܼ ܡܵܪܲܢ: ܕܐܲܝܟܲܢ ܡܲܨܝܵܐ
                ܕܢܸܚܐ ܫܲܦܝܼܪ. ܡܵܪܝܵܐ ܠܲܡ: ܕܲܒܲܪܲܝܢܝ ܠܡܸܚܵܐ. ܟܲܕܼ ܤܵܒܲܪ ܕܗܵܫܵܐ
                ܡܸܟܹܝܠ: ܡܸܕܸܡ ܐ̄ܚܪܹܝܢ ܡܸܫܬܿܡܲܥ ܠܹܗ. ܘܩܵܠܵܐ ܡܵܪܵܢܵܝܵܐ ܬܘܼܒܼ
                ܠܵܗ̇ ܟܲܕܼ ܠܵܗ̇ ܠܡܸܠܬܼܵܐ ܡܲܫܡܲܥ ܠܹܗ ܬܸܢܝܵܢܘܼܬܼ: ܟܲܕܼ ܡܵܘܤܸܦ
                ܠܹܗ ܐܲܝܟܼ ܕܲܠܢܘܼܗܵܪܵܐ: ܘܐܵܡܲ݁ܪ: ܥܪܘܿܩ ܠܲܡ ܘܲܫܬܼܘܿܩ: ܘܲܫܠܝܼ.
                ܐܵܦܸܢ ܠܲܡ ܪܲܒܲܬܼ ܡܵܘܬܪܵܐ ܚܙܵܬܼܗܘܿܢ ܘܥܸܢܝܵܢܗܘܿܢ ܕܐܲܚܹ̈ܐ: ܠܵܐ
                ܓܹܝܪ ܤܵܘܬܪܵܐ ܠܵܟܼ ܗܵܝ̇ ܕܬܸܬܼܥܢܸܐ ܥܲܡܗܘܿܢ: ܐܲܝܟܼ ܗܵܝ̇ ܕܬܸܥܪܘܿܩ
                ܡܸܢܗܘܿܢ. ܘܟܲܕܼ ܗܵܠܹܝܢ ܒܓܸܠܝܵܢܵܐ ܐܲܠܵܗܵܝܵܐ ܩܲܒܸܿܠ̣ ܛܘܼܒܼܵܢܵܐ ܐܲܪܤܵܢܝܼܣ:
                ܕܟܲܕܼ ܥܕܲܟܹܝܠ ܒܥܵܠܡܵܐ ܗ̄ܘ̣ ܕܢܸܥܪܘܿܩ ܦܵܩܹ̇ܕܼ ܠܹܗ: ܘܐܵܦ ܟܲܕܼ
                ܥܲܡܗܘܿܢ ܕܐܲܚܹ̈ܐ ܐܝܼܬܼܵܘܗܝ: ܗ̤ܝ ܟܲܕܼ ܗ̤ܝ ܡܸܬܼܐܲܡܪܵܐ ܠܘܵܬܹܗ:
                ܗܵܝܕܹܝܢ ܐܸܫܬܲܪܲܪ ܘܝܼܕܲܥ̣: ܕܠܵܐ ܤܵܦܹ̇ܩ ܠܘܵܬ ܩܸܢܝܵܢܵܐ ܕܚܲܝܹ̈ܐ ܬܲܩ̈ܢܹܐ:
                ܥܪܘܼܩܝܵܐ ܒܲܠܚܘܿܕܼ ܕܡ̣ܢ ܥܵܠܡܵܝܹ̈ܐ: ܐܸܠܵܐ ܫܲܘܝܵܐܝܼܬܼ ܡ̣ܢ ܟܠܢܵܫ.
                ܕܲܠܡܵܐ ܐܝܼܬܼ ܐ̄ܢܵܫ: ܕܠܘܼܩܒܲܠ ܩܵܠܵܐ ܐܲܠܵܗܵܝܵܐ ܐܝܼܬܼ ܠܹܗ ܠܲܡܡܲܠܵܠܘܼ:
                ܘܠܲܐܒܵܐ ܐܲܢܛܘܿܢܝܼܣ ܡܸܬܼܐܡܲܪ ܠܹܗ ܒܓܸܠܝܵܢܵܐ: ܐܸܢ ܠܲܡ ܒܵܥܹ̇ܐ ܐܲܢ̄ܬܿ
                ܠܡܸܗܘܵܐ ܒܫܸܠܝܵܐ: ܠܵܘ ܒܲܠܚܘܿܕܼ ܠܬܹܐܒܼܵܐܝܼܣ ܬܹܐܙܲܠ: ܐܸܠܵܐ
                ܠܡܲܕܼܒܪܵܐ ܓܵܘܝܵܐ܀ ܐܸܢܕܹܝܢ ܐܲܠܵܗܵܐ ܗܵܟܲܢ ܦܵܩܹ̇ܕܼ ܠܲܢ ܠܡܸܥܪܲܩ
                ܡ̣ܢ ܟܠ: ܘܗܵܟܲܢ ܡܲܚܸܒܼ ܫܸܠܝܵܐ ܟܲܕܼ ܢܟܲܬܪܘܼܢ ܒܹܗ ܪ̈ܵܚܡܵܘܗܝ:
                ܡܲܢ̣ܘܼ ܒܥܸܠ̈ܠܵܬܼܵܐ ܢܩܵܘܸܐ ܒܥܸܢܝܵܢܵܐ ܘܩܲܪܝܼܒܼܘܼܬܼܵܐ ܕܲܒܼܢܲܝ̈ܢܵܫܵܐ؟ ܐܸܢ
                
                 312 
                
                ܕܹܝܢ ܠܐܲܢܛܘܿܢܝܼܣ ܘܐܲܪܤܵܢܝܼܣ: ܙܗܝܼܪܘܼܬܼܵܐ ܡܵܘܬܪܵܐ ܘܲܥܪܘܼܩܝܵܐ
                ܡܥܲܕܲܪ: ܟܡܵܐ ܝܲܬܿܝܼܪܵܐܝܼܬܼ ܠܲܡܚܝܼ̈ܠܹܐ؟ ܘܐܸܢ ܐܲܝܠܹܝܢ ܕܥܵܠܡܵܐ
                ܟ̱ܠܹܗ: ܥܲܠ ܡܸܠܲܝ̈ܗܘܿܢ ܘܥܘܼܕܼܪܵܢܵܐ ܕܡ̣ܢ ܚܙܵܬܼܗܘܿܢ ܤܢܝܼܩ
                ܗ̄ܘ̣ܵܐ: ܡܝܲܩܲܪ ܐܲܠܵܗܵܐ ܠܲܗܘܵܝܗܘܿܢ ܕܲܒܼܫܸܠܝܵܐ: ܝܲܬܝܼܪ ܡ̣ܢ ܥܘܼܕܼܪܵܢܵܐ
                ܕܟܼܠܵܗ̇ ܐ̄ܢܵܫܘܼܬܼܵܐ: ܟܡܵܐ ܝܲܬܝܼܪܵܐܝܼܬܼ ܠܐܲܝܢܵܐ ܕܐܵܦܠܵܐ ܩܢܘܿܡܹܗ
                ܡܨܸܐ ܕܢܸܛܲܪ ܫܲܦܝܼܪ؟
                	ܝܵܕܼܥܝܼܢܲܢ ܠܲܐ̄ܚܪܹܢܵܐ ܡ̣ܢ ܩܲܕܝܼ̈ܫܹܐ: ܕܐܲܚܘܼܗܝ ܟܝܵܢܵܝܵܐ: ܟܪܝܼܗ
                ܗ̄ܘ̣ܵܐ. ܘܗ̤ܘ ܚܒܲܫ̣ ܗ̄ܘ̣ܵܐ ܢܲܦܫܹܗ: ܒܩܸܠܵܝܬܼܵܐ ܐ̄ܚܪܹܬܼܵܐ. ܘܟܲܕܼ ܚܲܡܤܸܢ
                ܠܪ̈ܲܚܡܵܘܗܝ ܙܲܒܼܢܵܐ ܟܠܹܗ ܕܟܼܘܼܪܗܵܢܹܗ ܡ̣ܢ ܕܢܸܦܘܼܩ ܢܸܚܙܹܝܘܗܝ:
                ܒܙܲܒܼܢܵܐ ܡܸܟܹܝܠ ܕܡܲܦܩܵܢܹܗ ܕܡ̣ܢ ܥܵܠܡܵܐ: ܫܠܲܚ̣ ܠܹܗ: ܕܐܵܦܸܢ
                ܗܵܫܵܐ ܬܵܐ ܐܸܚܙܹܝܟܼ ܩܕܼܵܡ ܕܐܸܦܘܿܩ ܡ̣ܢ ܥܵܠܡܵܐ: ܐܵܦܸܢ ܒܠܸܠܝܵܐ.
                ܘܐܹܫܲܠܡܵܟܼ: ܘܐܸܬܿܬܿܬܝܼܚ. ܘܠܵܐ ܐܸܬܿܛܦܝܼܣ ܗܵܘ̇ ܛܘܼܒܼܵܢܵܐ: ܐܵܦܠܵܐ
                ܒܥܸܕܵܢܵܐ ܗܵܢܵܐ: ܕܲܡܥܵܕܼܝܼܢ ܢܫܲܓܿܫܘܼܢ ܪ̈ܲܚܡܹܐ ܟܝܵܢܵܝܹ̈ܐ: ܠܡܸܙܟܵܐ
                ܠܲܬܼܚܘܼ̈ܡܹܐ ܨܸܒܼܝܵܢܵܝܹ̈ܐ: ܟܲܕܼ ܐܵܡܲ݁ܪ: ܕܐܸܢ ܐܸܦܘܿܩ: ܠܵܐ ܗܵܘܹ̇ܐ ܕܟܸܐ
                ܠܹܒܿܝ ܩܕܼܵܡ ܐܲܠܵܗܵܐ: ܕܒܲܐܚܹ̈ܐ ܕܲܒܼܪܘܼܚ ܐܸܒܼܤܸܐ ܕܐܸܤܥܘܿܪ ܐܸܢܘܿܢ:
                ܠܲܟܼܝܵܢܵܐ ܕܹܝܢ ܐܹܝܲܩܲܪ ܝܲܬܝܼܪ ܡ̣ܢ ܡܫܝܼܚܵܐ. ܘܡܝܼܬܼ ܐܲܚܘܼܗܝ: ܘܠܵܐ
                ܚ̣ܙܵܝܗܝ܀ ܠܵܐ ܐ̄ܢܵܫ ܡܵܕܹܝܢ ܠܪܲܦܝܘܼܬܼܵܐ ܕܚܘܼ̈ܫܵܒܹܐ ܥܸܠܬܼܵܐ ܢܤܝܼܡܝܼܗ̇:
                ܠܵܐ ܡܸܬܼܡܲܨܡܵܝܵܢܝܼܬܼܵܐ ܘܠܵܐ ܡܫܲܥܒܿܕܲܬܼ ܠܲܫܪܵܝܵܐ: ܘܦܘܼܪܢܵܤܵܐ ܕܡ̣ܢ
                ܠܥܸܠ ܠܒܼܘܼܛܵܠܵܐ ܕܫܸܠܝܵܐ. ܐܸܢ ܠܲܟܼܝܵܢܵܐ ܕܗܵܟܲܢ ܚܲܤܝܼܢ ܙܵܟܹ̇ܝܢ
                ܩܲܕܝܼ̈ܫܹܐ: ܘܲܡܫܝܼܚܵܐ ܟܲܕܼ ܢܸܬܼܒܿܤܸܐ ܒܲܒܼܢܵܘ̈ܗܝ: ܡܲܚܸܒܼ ܐܲܝܟܵܐ ܕܫܸܠܝܵܐ
                ܡܸܬܼܝܲܩܲܪ: ܐܲܝܕܵܐ ܐܵܢܲܢܩܹܐ ܐ̄ܚܪܹܬܼܵܐ ܐܝܼܬܼ ܕܠܵܐ ܝܵܗ̇ܒܵܐ ܐܝܼܕܼܵܐ ܠܡܸܬܼܒܤܵܝܘܼ
                ܟܲܕܼ ܬܸܥܪܲܨ؟ ܗܵܘ̇ ܦܘܼܩܕܵܢܵܐ: ܕܐܲܚܸܒܼ ܠܡܵܪܝܵܐ ܐܲܠܵܗܵܟܼ: ܡ̣ܢ
                
                 313 
                
                ܟ̱ܠܹܗ̇ ܢܲܦܫܵܟܼ ܘܡ̣ܢ ܟ̱ܠܹܗ ܠܸܒܵܟܼ: ܘܝܲܬܝܼܪ ܡ̣ܢ ܥܵܠܡܵܐ ܟ̱ܠܹܗ
                ܘܲܟܼܝܵܢܵܐ ܘܕܝܼܠܹܗ: ܗܵܟܲܢܵܐ ܡܸܬܼܓܡܲܪ: ܟܲܕܼ ܗܵܪܟܵܐ ܬܩܵܘܸܐ. ܐܵܦ
                ܗܵܝ̇ ܕܥܲܠ ܚܘܼܒܵܐ ܕܩܲܪܝܼܒܼܵܐ ܦܵܩ̇ܕܵܐ: ܠܓܼܵܘ ܡܸܢܵܗ̇ ܚܒܼܝܼܫܵܐ. ܨܵܒܹ̇ܐ
                ܐܲܢ̄ܬܿ ܠܡܸܩܢܵܐ ܚܘܼܒܵܐ ܕܩܲܪܝܼܒܼܵܐ: ܐܲܝܟܼ ܦܘܼܩܕܵܢܹܐ ܕܐܹܘܲܢܓܲܠܝܼܘܿܢ:
                ܒܓܼܵܘ ܢܲܦܫܵܟܼ؟ ܐܸܬܼܪܲܚܲܩ ܡܸܢܹܗ. ܘܗܵܝܕܹܝܢ: ܬܹܐܩܲܕܼ ܒܵܟܼ ܫܲܠܗܹܒܼܝܼܬܼܵܐ
                ܕܚܘܼܒܹܗ ܘܬܸܤܘܲܚ ܠܲܚܙܵܬܹܗ: ܐܲܝܟܼ ܠܲܚܙܵܬܼܵܐ ܕܡܲܠܐܟܼ ܢܘܼܗܪܵܐ.
                ܨܵܒܹ̇ܐ ܐܲܢ̄ܬܿ ܬܘܼܒܼ ܕܢܸܨܛܲܗܘܿܢ ܠܵܟܼ ܚܲܒܿܝܼܒܲܝ̈ܟܼ؟ ܒܲܬܼܚܘܿܬܡ ܝܵܘ̈ܡܵܬܼܵܐ
                ܬܸܚܙܸܐ ܦܲܪ̈ܨܘܿܦܲܝܗܘܿܢ. ܫܲܪܝܼܪܵܐܝܼܬܼ ܢܸܤܝܵܢܵܐ: ܡܲܠܦܵܢܵܐ ܗ̄ܘ̣ ܕܟܼܠ.
                ܗ̤ܘܝܼ ܚܠܝܼܡ.