Isaac of Nineveh. “Discourse 42.” Based upon Digital Syriac Corpus. Last modified March 5, 2019. https://syriaccorpus.org/433.
    
        
            
                ܥܸܢܝܵܢܵܐ ܕܫܲܕܲܪ ܠܘܵܬܼ ܐܲܚܘܼܗܝ ܟܝܵܢܵܝܵܐ ܘܪܘܼܚܵܢܵܝܵܐ: ܕܐܲܦܝܼܤܹܗ
                ܒܲܟܼܬܼܝܼ̈ܒܼܵܬܵܐ ܕܢܹܐܙܲܠ ܢܸܤܥܪܝܼܘܗܝ ܒܓܼܵܘ ܝܲܬܼܒܵܐ: ܐܲܝܟܼ ܡܲܢ ܕܲܨܗܸܐ
                ܠܲܚܙܵܬܹܗ. ܡܒ.
            
            
                ܠܵܘ ܐܲܝܟܼ ܡܵܐ ܕܤܵܒܲܪ ܐܲܢ̄ܬܿ: ܐܝܼܬܲܝܢ ܚܲܝ̈ܠܬܼܵܢܹܐ: ܐܘܿ ܛܘܼܒܼܵܢܵܐ.
                ܐܸܠܵܐ ܟܒܲܪ ܡܦܵܣ ܐܲܢ̄ܬܿ ܒܲܡܚܝܼܠܘܼܬܼܝ: ܦܫܝܼܩ ܠܵܟܼ ܕܹܝܢ ܐܲܒܼܕܵܢܝ.
                ܥܲܠ ܗܵܕܹܐ ܐܲܡܝܼܢܵܐܝܼܬܼ ܬܵܒܲܥ ܐܲܢ̄ܬܿ ܡܹܢܝ: ܗܵܝ̇ ܕܟܲܕܼ ܟܝܵܢܵܐ ܬܥܲܠܸܐ
                ܡ̣ܢ ܪܸܥܝܵܢܵܐ ܕܝܵܩܹ̇ܕܼ ܒܵܟܼ ܐܲܝܟܼ ܥܝܵܕܹܗ. ܠܵܘ ܫܲܘܝܲܬܼ ܠܨܸܦܬܼܵܐ ܕܐܝܼܬܹܝܗ̇
                ܘܠܵܟܼ ܡܸܬܼܚܲܙܝܵܐ: ܐܸܢܗ̤ܘ ܕܡܸܢܲܢ ܡܸܬܼܨܦܵܢܝܼܬܼܵܐ ܬܸܬܼܚܵܘܸܐ. ܠܵܐ ܬܸܒܼܥܸܐ
                ܡܹܢܝ: ܗܵܘ̇ ܡܸܕܸܡ ܕܲܠܦܲܓܼܪܵܐ ܘܬܲܪܥܝܼܬܼܵܐ ܡܢܝܼܚ ܐܵܚܝ: ܐܸܠܵܐ
                ܕܦܘܼܪܩܵܢܵܗ̇ ܕܢܲܦܫܝ ܐܸܬܼܦܲܪܲܣ. ܩܲܠܝܼܠ ܬܘܼܒܼ ܙܲܒܼܢܵܐ: ܘܲܥܒܲܪܢܲܢ ܡ̣ܢ
                ܥܵܠܡܵܐ ܗܵܢܵܐ. ܕܒܲܟܼܡܵܐ ܦܲܪ̈ܨܘܿܦܝܼܢ ܦܵܓܲܥ̇ܢܵܐ ܡܵܐ ܕܐܹܬܸܐ ܠܬܲܡܵܢ:
                ܘܒܲܟܼܡܵܐ ܙܢܲܝ̈ܵܐ ܕܐ̄ܢܵܫܵܐ ܘܕܘܼ̈ܟܿܝܬܼܵܐ: ܥܲܕܼ ܐܸܥܛܘܿܦ ܬܘܼܒܼ ܠܕܼܘܼܟܿܬܼܝ؟
                
                 314 
                
                ܘܐܲܝܠܹܝܢ ܥܸܠ̈ܠܵܬܵܐ ܕܚܘܼ̈ܫܵܒܹܐ ܡܩܲܒܿܠܵܐ ܢܲܦܫܝ ܒܦܸܓܼܥܲܝ̈ܗܘܿܢ: ܕܡܸܫܬܲܓܼܫܵܐ
                ܒܝܲܕܼ ܚܲܫܹ̈ܐ ܕܡܸܬܿܬܿܥܝܼܪܝܼܢ ܒܵܗ̇؟ ܕܲܡܢܵܚܵܐ ܡܸܢܗܘܿܢ ܩܲܠܝܼܠ: ܡܸܢܵܟܼ
                ܠܵܐ ܡܟܲܤ̈ܝܵܢ. ܕܡܲܟܿܝܵܐ ܠܹܗ ܗܵܟܹܝܠ ܠܝܼܚܝܼܕܼܵܝܵܐ ܚܙܵܬܼܢܗܘܿܢ ܕܥܵܠܡܵܝܹ̈ܐ:
                ܘܐܲܢ̄ܬܿ ܡܦܵܣ ܐܲܢ̄ܬܿ. ܠܵܘ ܒܲܠܚܘܿܕܼ ܕܢܸܫܹ̈ܐ: ܐܸܠܵܐ ܘܐܵܦ ܕܓܲܒܼܪܹ̈ܐ܀
                ܘܲܚܙܝܼ ܕܲܟܼܡܵܐ ܫܘܼ̈ܚܠܵܦܹܐ ܡܩܲܒܸܠ ܒܬܲܪܥܝܼܬܹܗ: ܐܲܝܢܵܐ ܕܲܫܠܸܐ ܙܲܒܼܢܵܐ
                ܤܲܓܝܼܐܵܐ ܥܲܡ ܢܲܦܫܹܗ: ܐܸܡܲܬܼܝ ܕܬܘܼܒܼ ܒܗܵܠܹܝܢ ܦܵܓܲܥ̇ ܡܸܢܫܹܠܝ:
                ܘܡܸܕܸܡ ܕܲܠܒܲܪ ܡ̣ܢ ܥܝܵܕܹܗ ܫܵܡܲܥ ܘܚܵܙܹ̇ܐ. ܐܸܢܕܹܝܢ ܦܸܓܼܥܹ̈ܐ ܕܒܼܢܲܝ̈
                ܐܸܤܟܹܡܹܗ: ܡܲܟܹܿܝܢ ܠܐܲܝܢܵܐ ܕܲܪܡܸܐ ܒܐܵܓܼܘܿܢܵܐ: ܘܲܥܕܲܟܹܝܠ ܟܵܬܹ̇ܫ
                ܥܲܡ ܒܥܸܠܕܲܪܹܗ: ܐܸܡܲܬܼܝ ܕܲܠܢܝܼܫܹܗ ܠܵܐ ܫܵܠܡ̇ܝܼܢ: ܒܐܲܝܕܵܐ ܒܹܪܵܐ
                ܢܸܦܸܠ ܡܵܕܹܝܢ ܕܢܸܬܼܦܲܨܸܐ ܡ̣ܢ ܫܦܵܝܵܐ ܕܲܒܼܥܸܠܕܲܪܲܢ؟ ܝܲܬܝܼܪܵܐܝܼܬܼ ܠܐܲܝܠܹܢܝ
                ܕܢܸܤܝܵܢܵܐ ܕܤܲܓܝܼ̈ܐܵܬܼܵܐ: ܝܑܼܕܲܥܬܵܐ ܩܢܹܝܢ ܡ̣ܢ ܟܲܕܘܼ. ܡܸܛܠܗܵܢܵܐ ܕܹܝܢ
                ܕܠܵܐ ܐܵܢܲܢܩ̈ܘܿܣ: ܗܵܕܹܐ ܐܸܥܒܸܿܕܼ ܠܵܐ ܐܸܬܛܦܝܼܣ ܠܝܼ. ܠܵܐ ܢܸܛܥܸܐ
                ܠܸܒܲܢ ܒܵܬܲܪ ܐܲܝܠܹܝܢ ܕܐܵܡ̇ܪܝܼܢ: ܕܠܵܐ ܒܡܸܕܸܡ ܡܤܵܓܿܦܝܼܢ ܠܲܢ
                ܫܸܡܥܵܐ ܘܲܚܙܵܬܼܵܐ: ܘܕܲܫܘܹܝܢܲܢ ܠܲܡ ܒܚܘܼܪܒܵܐ ܘܲܒܼܝܲܬܼܒܵܐ: ܒܩܸܠܵܝܬܲܢ
                ܘܲܠܒܲܪ ܒܚܘܼ̈ܫܵܒܲܝܢ: ܒܝܲܕܼ ܢܵܘܚܵܐ ܕܡ̣ܢ ܕܠܘܼܚܝܵܐ: ܟܲܕܼ ܠܵܐ
                ܡܩܲܒܿܠܝܼܢܲܢ ܫܘܼܚܠܵܦܵܐ ܒܝܼܫܵܐ: ܘܠܵܐ ܡܲܪܓܫܝܼܢ ܚ̄ܢܲܢ ܒܦܸܓܼܥܹ̈ܐ
                ܕܦܪ̈ܨܘܿܦܹܐ ܘܨܸܒܼ̈ܘܵܬܼܵܐ ܒܲܫܚܵܩܵܐ ܕܚܲܫܹ̈ܐ. ܐܲܝܠܹܝܢ ܕܗܵܠܹܝܢ ܐܵܡ̇ܪܝܼܢ:
                ܐܵܦܠܵܐ ܟܲܕܼ ܡܸܬܼܡܚܹܝܢ ܝܵܕܼܥ̇ܝܼܢ. ܚܢܲܢ ܓܹܝܪ: ܠܵܐ ܥܕܲܟܹܝܠ ܠܗܵܢ
                ܚܘܼܠܡܵܢ ܢܲܦܫܵܐ ܡܲܛܝܼܢ. ܫܘܼ̈ܚܢܹܐ ܐܝܼܬܼ ܠܲܢ: ܤܪ̈ܲܝܵܐ. ܕܐܸܢ ܡ̣ܢ
                ܥܨܵܒܼܵܐ ܢܸܫܬܲܒܼܩܘܼܢ ܐܵܦܸܢ ܚܲܕܼ ܝܘܿܡ: ܘܡ̣ܢ ܬܚܹܝܬܼ ܐܸܤܦܠܵܢܝܼܵܐ
                ܘܐܲܤܘܿܪܹ̈ܐ ܢܸܦܩܘܼܢ: ܬܵܘܼ̈ܠܥܹܐ ܢܸܪܦܬܼܘܼܢ.