Isaac of Nineveh. “Discourse 43.” Based upon Digital Syriac Corpus. Last modified March 5, 2019. https://syriaccorpus.org/434.
    
        
            
                 315 
                ܫܲܪ̈ܒܹܐ ܡܵܘܬܿܪ̈ܵܢܹܐ ܡܲܠܝܲܝ̈ ܚܸܟܼܡܬܵܐ ܕܪܘܼܚ. ܡܓ.
            
            
                ܗܲܝܡܵܢܘܼܬܼܵܐ ܐܝܼܬܹܝܗ̇: ܬܲܪܥܵܐ ܕܐ̄ܪ̈ܵܙܹܐ. ܗܵܘ̇ ܡܸܕܸܡ ܕܥܲܝ̈ܢܹܐ
                ܕܦܲܓܼܪܵܐ ܠܨܸܒܼ̈ܘܵܬܼܵܐ ܕܡܸܬܼܪ̈ܲܝܓܼܫܵܢ: ܗ̤ܘ ܟܲܕܼܸ ܗ̤ܘ ܗܲܝܡܵܢܘܼܬܼܵܐ ܒܓܲܙܹ̈ܐ
                ܟܤܲܝ̈ܵܐ ܠܥܲܝ̈ܢܹܐ ܕܗܵܘܢܵܐ. ܬܲܪܬܹܝܢ ܥܲܝ̈ܢܹܐ ܢܲܦ̈ܫܵܢܵܝܬܵܐ ܩܢܹܝܢܲܢ: ܐܲܝܟܼ
                ܕܐܵܡ̇ܪܝܼܢ ܐܲܒܼܵܗ̈ܬܼܵܐ: ܐܲܝܟܼ ܬܲܪܬܹܝܢ ܥܲܝ̈ܢܹܐ ܕܦܲܓܼܪܵܐ. ܘܠܵܘ ܗ̤ܝ ܟܲܕܼ
                ܗ̤ܝ ܚܫܲܚܬܵܐ ܠܲܚܙܵܬܼܵܐ: ܒܟܼܠ ܚܕܼܵܐ. ܒܲܚܕܼܵܐ ܡܸܢܗܹܝܢ ܚܵܙܹ̇ܝܢܲܢ: ܠܟܲܤܝܘܼܬܼ
                ܫܘܼܒܼܚܹܗ ܕܐܲܠܵܗܵܐ ܕܒܲܟܼ̈ܝܵܢܹܐ ܛܡܝܼܪܵܐ. ܘܚܲܝܠܹܗ: ܘܚܸܟܼܡܬܹܗ.
                ܘܬܲܪܥܝܼܬܹܗ ܡܬܼܘܿܡܵܝܬܵܐ ܕܲܥܠܲܝܢ: ܕܡ̣ܢ ܦܪܝܼܫܘܼܬܼ ܡܕܲܒܿܪܵܢܘܼܬܹܗ
                ܡܸܬܿܕܲܪܟܵܐ ܠܘܵܬܲܢ. ܘܒܼܵܗ̇ ܟܲܕܼ ܒܵܗ̇: ܐܵܦ ܠܬܸܓܼܡܹ̈ܐ ܪ̈ܘܼܚܵܢܹܐ
                ܟܢܵܘ̈ܬܲܢ. ܘܲܒܼܗܵܝ̇ ܚܕܼܵܐ ܚܵܙܹ̇ܝܢܲܢ: ܠܫܘܼܒܼܚܵܐ ܕܲܟܼܝܵܢܹܗ ܩܲܕܝܼܫܵܐ.
                ܐܸܡܲܬܼܝ ܕܹܝܢ ܕܢܸܨܒܸܐ ܡܵܪܲܢ: ܕܢܲܥܸܠ ܠܲܢ ܠܘܵܬܼ ܐ̄ܪ̈ܙܹܐ ܪ̈ܘܿܚܵܢܹܐ:
                ܝܲܡܵܐ ܕܗܲܝܡܵܢܘܼܬܼܵܐ ܦܵܬܲܚ ܒܪܸܥܝܵܢܲܢ܀ ܛܲܝܒܿܘܼܬܼܵܐ ܥܲܠ ܛܲܝܒܿܘܼܬܼܵܐ:
                ܬܝܵܒܼܘܼܬܼܵܐ ܐܸܬܼܝܲܗܒܲܬ̤ ܠܲܒܼܢܲܝ̈ܢܵܫܵܐ. ܬܝܵܒܼܘܼܬܼܵܐ ܐܝܼܬܹܝܗ̇: ܡܵܘܠܵܕܼܵܐ ܕܲܬܼܪ݂ܝܢ
                ܕܡ̣ܢ ܐܲܠܵܗܵܐ. ܗܵܘ̇ ܡܸܕܸܡ ܕܲܒܼܡܲܥܡܘܿܕܼܝܼܬܼܵܐ ܢܤܲܒܼܢܲܢ ܪܲܗܒܼܘܿܢܹܗ:
                ܒܲܬܼܝܵܒܼܘܼܬܼܵܐ ܢܵܤ̇ܒܿܝܼܢܲܢ ܫܘܼܟܵܢܹܗ. ܬܝܵܒܼܘܼܬܼܵܐ ܐܝܼܬܹܝܗ̇: ܬܲܪܥܵܐ ܕܪ̈ܲܚܡܹܐ.
                ܗܵܘ̇ ܕܲܦܬܼܝܼܚ: ܠܟܼܠ ܕܒܼܵܥܹ̇ܝܢ ܠܹܗ. ܒܝܲܕܼ ܗܵܢܵܐ ܬܲܪܥܵܐ ܥܵܠ̇ܝܼܢܲܢ:
                ܠܘܵܬܼ ܪ̈ܲܚܡܹܐ ܐܲܠܵܗܵܝܹ̈ܐ. ܒܸܠܥܵܕܼ ܡ̣ܢ ܡܲܥܲܠܬܵܐ ܗܵܕܹܐ: ܠܲܝܬܿ ܠܡܸܫܟܵܚܘܼ
                ܪ̈ܲܚܡܹܐ. ܡܸܛܠ ܕܟܼܠܗܘܿܢ ܚܛ̣ܵܘ. ܐܲܝܟܼ ܡܸܠܲܬ̤ ܟܬܼܵܒܼܵܐ. ܘܡܙܕܲܕܩܝܼܢ
                ܒܛܲܝܒܿܘܼܬܼܵܐ ܡܲܓܵܢ. ܕܗ̤ܝ ܗ̣̄ܝ ܬܝܵܒܼܘܼܬܼܵܐ: ܛܲܝܒܿܘܼܬܼܵܐ ܬܸܢܝܵܢܵܝܬܵܐ.
                ܡܸܬܼܝܲܠܕܵܐ ܡܲܢ ܒܠܸܒܵܐ: ܡ̣ܢ ܗܲܝܡܵܢܘܼܬܼܵܐ ܘܕܸܚܠܬܵܐ. ܕܸܚܠܬܵܐ ܐܝܼܬܹܝܗ̇:
                ܫܲܒܼܛܵܐ ܐܲܒܼܵܗܵܝܵܐ: ܕܲܡܕܲܒܿܪܵܐ ܠܲܢ ܥܕܲܡܵܐ ܠܲܥܕܸܢ ܪܘܼܚܵܢܵܝܬܵܐ. ܘܡܵܐ
                
                 316 
                
                ܕܡܲܛܝܼܢ ܠܬܲܡܵܢ: ܫܵܒܼ̇ܩܵܐ ܠܲܢ ܘܗܵܦ̇ܟܵܐ. ܥܕܸܢ ܐܝܼܬܹܝܗ̇: ܚܘܼܒܵܐ
                ܐܲܠܵܗܵܝܵܐ. ܕܐܝܼܬܼ ܒܹܗ ܦܲܪܕܲܝܤܵܐ: ܕܟܼܠܗܘܿܢ ܛܲܘܼ̈ܒܹܐ. ܐܲܝܟܵܐ ܕܛܘܼܒܼܵܢܵܐ
                ܦܵܠܘܿܣ: ܐܸܬܿܬܲܪܤܝܼ ܤܲܝܒܵܪܬܵܐ ܕܠܵܐ ܒܲܟܼܝܵܢܵܐ. ܘܒܼܵܬܲܪ ܕܛܥܸܡ̣
                ܡ̣ܢ ܐܝܼܠܵܢ ܚܲܝܹ̈ܐ ܕܬܲܡܵܢ: ܩܵܥܹ̇ܐ ܗ̄ܘ̣ܵܐ ܘܐܵܡܲ̇ܪ: ܥܲܝܢܵܐ: ܠܵܐ ܚܙܵܬ̤.
                ܘܐܸܕܼܢܵܐ: ܠܵܐ ܫܸܡܥܲܬ̤. ܘܥܲܠ ܠܸܒܵܐ ܕܒܲܪܢܵܫܵܐ ܠܵܐ ܤܠܸܩ̣: ܡܸܕܸܡ
                ܕܛܲܝܸܒܼ ܐܲܠܵܗܵܐ ܠܪ̈ܵܚܡܵܘܗܝ. ܡ̣ܢ ܗܵܢܵܐ ܐܝܼܠܵܢܵܐ ܐܸܬܼܓܠܸܙ ܐܵܕܼܵܡ
                ܒܡܘܼܠܟܵܢܹܗ ܕܐܵܟܹ̇ܠܩܲܪܨܵܐ. ܐܝܼܠܵܢ ܚܲܝܹ̈ܐ: ܗ̤ܘܝܘܼ ܚܘܼܒܵܐ ܕܐܲܠܵܗܵܐ:
                ܗܵܘ̇ ܕܡܸܢܹܗ ܢܦܲܠ̣ ܐܵ݊ܕܼܵܡ: ܘܬܼܘܼܒܼ ܠܵܐ ܦܸܓܼܥܲܬ̤ ܒܹܗ ܚܲܕܼܘܼܬܼܵܐ:
                ܐܸܠܵܐ ܒܐܲܪܥܵܐ ܕܟܼܘ̈ܒܹܐ ܦܵܠܲܚ ܘܡܸܬܿܛܲܪܲܦ ܗ̄ܘ̣ܵܐ. ܐܲܝܠܹܝܢ ܕܡ̣ܢ
                ܚܘܼܒܵܐ ܐܲܠܵܗܵܝܵܐ ܓܠܝܼܙܝܼܢ: ܠܲܚܡܵܐ ܕܕܘܼܥܬܼܵܐ ܐܵܟܼ̇ܠܝܼܢ ܥܕܲܟܹܝܠ
                ܒܦܘܼܠܚܵܢܗܘܿܢ: ܐܵܦܸܢ ܟܹܐܢܘܼܬܼܵܐ ܦܵܠ̇ܚܝܼܢ: ܗܵܘ̇ ܕܐܸܬܼܦܩܸܕܼ ܪܹܫ
                ܛܘܿܗܡܲܢ ܒܡܲܦܘܼܠܬܵܐ ܕܡܸܢܹܗ. ܥܕܲܡܵܐ ܕܡܸܫܟܿܚܝܼܢܲܢ ܠܚܘܼܒܵܐ:
                ܒܐܲܪܥܵܐ ܗ̄ܘ̣ ܕܟܼܘܼ̈ܒܹܐ ܦܵܠܚܝܼܢܲܢ. ܘܡܸܨܥܲܬܼ ܟܘܼ̈ܒܹܐ ܙܵܪܥܝܝܼܢܲܢ ܘܚܵܨܕܝܼܢܲܢ:
                ܐܵܦܸܢ ܙܲܪܥܵܐ ܕܟܹܐܢܘܼܬܼܵܐ. ܘܲܒܼܟܼܠܥܸܕܵܢ ܡܸܬܿܕܲܒܼܨܼܢܲܢ ܡܸܢܗܘܿܢ: ܘܲܟܼܡܵܐ
                ܐܸܢ ܢܸܙܕܲܕܲܩ: ܘܲܒܼܕܼܘܼܥܬܵܐ ܚܵܐܹ̇ܝܢܲܢ ܕܐܲܦܲܝ̈ܢ.
                	ܡܵܐ ܕܹܝܢ ܕܐܸܫܟܲܚ̄ܢ ܚܘܼܒܵܐ: ܠܲܚܡܵܐ ܫܡܲܝܝܵܢܵܐ ܐܵܟܼܠܝܼܢܲܢ:
                ܘܡܸܬܿܬܲܪܤܹܝܢܲܢ ܕܠܵܐ ܥܲܡܠܵܐ ܘܲܕܼܠܵܐ ܠܹܐܘܬܼܵܐ. ܠܲܚܡܵܐ ܫܡܲܝܵܢܵܐ
                ܐܝܼܬܼܵܘܗܝ: ܗܵܘ̇ ܕܲܢܚܸܬܼ ܡ̣ܢ ܫܡܲܝܵܐ: ܘܝܵܗܹ̇ܒܼ ܚܲܝܹ̈ܐ ܠܥܵܠܡܵܐ. ܗܵܢܵܘ
                ܤܲܝܒܵܪܬܵܐ ܕܡܲܠܲܐܟܹ̈ܐ. ܐܲܝܢܵܐ ܕܲܠܚܘܼܒܵܐ ܐܸܫܟܲܚ: ܠܲܡܫܝܼܚܵܐ ܐܵܟܹ̇ܠ
                ܒܟܼܠ ܥܸܕܵܢ: ܘܗܵܘܹ̇ܐ ܠܵܐ ܡܵܝܘܿܬܼܵܐ ܡ̣ܢ ܗܵܝܕܹܝܟ. ܡܲܢ ܠܲܡ ܕܐܵܟܹ̇ܠ
                ܡ̣ܢ ܗܵܢܵܐ ܠܲܚܡܵܐ: ܡܵܘܬܵܐ ܠܵܐ ܢܸܛܥܲܡ ܠܥܵܠܲܡ. ܛܘܼܒܼ ܠܡ̇ܢ
                
                 317 
                
                ܕܐܸܟܲܠ̣ ܡ̣ܢ ܠܲܚܡܵܐ ܕܚܘܼܒܵܐ: ܕܗ̤ܘܝܘܼ ܝܼܫܘܿܥ. ܡܲܢ ܕܚܘܼܒܵܐ
                ܡܸܤܬܲܝܒܲܪ: ܠܲܡܫܝܼܚܵܐ ܡܸܤܬܲܝܒܲܪ: ܕܐܝܼܬܼܵܘܗܝ ܐܲܠܵܗܵܐ ܕܥܲܠ ܟܠ.
                ܘܤܵܗܹ̇ܕܼ ܝܘܿܚܲܢܵܢ ܕܐܸܡ݂ܲܪ: ܚܘܼܒܵܐ: ܗ̤ܘܝܘܼ ܐܲܠܵܗܵܐ. ܡܵܕܹܝܢ: ܚܲܝܹ̈ܐ ܡ̣ܢ
                ܐܲܠܵܗܵܐ ܤܵܐܹ̇ܩ: ܡ̇ܢ ܕܲܒܼܚܘܼܒܵܐ ܚܵܝܹ̇ܐ ܒܲܒܼܪܝܼܬܼܵܐ ܗܵܕܹܐ. ܡ̣ܢ ܗܵܘ̇ ܐܵܐܲܪ
                ܕܢܘܼܚܵܡܵܐ: ܤܵܐܹ̇ܩ ܗܵܪܟܵܐ ܗܵܢܵܐ. ܒܗܵܢܵܐ ܐܵܐܲܪ ܡܸܬܼܒܲܤܡܝܼܢ ܙܲܕܝܼ̈ܩܹܐ
                ܒܲܩܝܵܡܬܵܐ. ܚܘܼܒܵܐ: ܗ̤ܘܝܘܼ ܡܲܠܟܘܼܬܼܵܐ: ܗܵܝ̇ ܕܒܼܵܗ̇ ܐܸܫܬܵܘܕܝܼ ܡܵܪܲܢ
                ܠܲܫܠܝܼܚܹ̈ܐ ܐ̄ܪܵܙܵܢܵܐܝܼܬܼ: ܕܢܹܐܟܼܠܘܼܢ ܒܡܲܠܟܘܼܬܹܗ. ܬܹܐܟܼܠܘܼܢ ܠܲܡ
                ܘܬܸܫܬܘܿܢ ܥܲܠ ܦܵܬܼܘܿܪܵܐ ܕܡܲܠܟܿܘܼܬܼܵܐ ܕܝܼܠܝ. ܡܵܢܵܘ ܕܐܵܟܹ̇ܠܝܼܢ: ܐܸܠܵܐ
                ܐܸܢ ܚܘܼܒܵܐ؟ ܤܵܦܹ̇ܩ ܗ̤ܘ ܚܘܼܒܵܐ: ܕܘܼܟܲܬܼ ܡܹܐܟܼܠܵܐ ܘܡܲܫܬܿܝܵܐ
                ܡܬܲܪܤܸܐ ܠܐ̄ܢܵܫ. ܗܵܢܵܘ ܚܲܡܪܵܐ ܡܚܲܕܸܐ ܠܸܒܹܗ ܕܒܲܪܢܵܫܵܐ. ܛܘܼܒܼܵܘܗ
                ܠܡܲܢ ܕܐܸܫܬܼܝ ܡ̣ܢ ܗܵܢܵܐ ܚܲܡܪܵܐ! ܗܵܢܵܘ ܕܐܸܫܬܝܼܘ ܡܸܢܹܗ ܙܲܠܝܼ̈ܠܹܐ:
                ܘܐܸܬܼܢܲܟܲܦܘ. ܘܚܲܛܵܝܹ̈ܐ: ܘܲܛܥ̣ܵܘ ܠܐܘܼܪ̈ܚܵܬܼܵܐ ܕܬܼܘܼ̈ܩܠܵܬܵܐ. ܘܪ̈ܵܘܵܝܹܐ:
                ܘܲܗܘ̤ܵܘ ܨܲܝܡܹ̈ܐ. ܘܥܲܬܝܼܪܹ̈ܐ: ܘܐܸܬܼܪܲܓܼܪܲܓܼܘ ܠܡܸܤܟܹܢܘܼܬܼܵܐ. ܘܡܸܤ̈ܟܹܢܹܐ:
                ܘܲܥܬܲܪܘ ܒܤܲܒܼܪܵܐ. ܘܲܟܼܪ̈ܝܼܗܹܐ: ܘܲܗܘ̤ܵܘ ܚܲܝ̈ܠܬܼܵܢܹܐ. ܘܗܸܕܼܝܼܘܿܛܹ̈ܐ:
                ܘܐܸܬܼܚܲܟܲܡܘ. ܐܲܝܟܲܢܵܐ ܠܵܐ ܐ̄ܢܵܫ ܥܵܒܲܪ: ܒܸܠܥܵܕܼ ܡ̣ܢ ܕܸܚܠܬܼܵܐ ܠܘܵܬܼ
                ܚܘܼܒܵܐ. ܗܵܘ̇ ܝܲܡܵܐ ܤܲܪܝܵܐ: ܕܤܝܼܡ ܒܹܝܬܼ ܠܲܢ ܘܲܠܦܲܪܕܲܝܤܵܐ ܡܸܬܼܝܲܕܼܥܵܢܵܐ:
                ܒܩܲܪܩܘܼܪܵܐ ܕܲܬܼܝܵܒܼܘܼܬܼܵܐ ܥܵܒܼܪܝܼܢܲܢ: ܕܐܝܼܬܼ ܠܹܗ ܠܹܐܩܹ̈ܐ ܕܕܸܚܠܬܼܵܐ.
                ܐܸܢ ܠܹܐܩܹ̈ܐ ܕܕܸܚܠܬܵܐ ܠܵܐ ܡܕܲܒܿܪ̈ܵܢ ܠܗܵܕܹܐ ܐܸܠܦܵܐ ܕܲܬܼܝܵܒܼܘܼܬܼܵܐ:
                ܗܵܕܹܐ ܕܒܼܵܗ̇ ܥܵܒܼܪܝܼܢܲܢ ܠܝܲܡܵܐ ܕܥܵܠܡܵܐ ܗܵܢܵܐ ܠܘܵܬܼ ܐܲܠܵܗܵܐ:
                ܡܸܬܿܛܲܒܿܥܼܝܼܢܲܢ ܒܝܲܡܵܐ ܤܲܪܝܵܐ. ܬܝܵܒܼܘܼܬܼܵܐ ܐܝܼܬܹܝܗ̇: ܐܸܠܦܵܐ. ܕܸܚܠܬܵܐ
                ܕܹܝܢ: ܡܕܲܒܿܪܵܢܵܐ ܕܝܼܠܵܗ̇. ܘܚܘܼܒܵܐ: ܠܡܹܐܢܵܐ ܐܲܠܵܗܵܝܵܐ. ܡܵܘܬܿܒܼܵܐ 
                
                 318 
                
                ܠܲܢ ܕܸܚܠܬܵܐ ܒܐܸܠܦܵܐ ܕܲܬܼܝܵܒܼܘܼܬܼܵܐ: ܘܡܲܥܒܹܪܵܐ ܠܲܢ ܠܝܲܡܵܐ ܤܲܪܝܵܐ
                ܕܥܵܠܡܵܐ. ܘܲܡܡܲܢܥܵܐ ܠܲܢ ܠܲܠܡܹܐܢܵܐ ܐܲܠܵܗܵܝܵܐ: ܕܗ̤ܘܝܘܼ ܚܘܼܒܵܐ:
                ܠܐܲܝܟܵܐ ܕܚܵܝ̇ܪܝܼܢ ܟܠܗܘܿܢ ܠܐܲܝ̈ܐ ܫܚܝܼ̈ܩܲܝ ܒܲܬܼܝܵܒܼܘܼܬܼܵܐ. ܡܵܐ ܕܹܝܢ
                ܕܡܲܢܲܥܢܲܢ ܠܚܘܼܒܵܐ: ܡܲܢܲܥܢ ܠܘܵܬܼ ܐܲܠܵܗܵܐ. ܘܫܸܠܡܲܬ̤ ܐܘܼܪܝܲܝܢ:
                ܘܲܥܒܲܪܢܲܢ ܠܓܼܵܙܲܪܬܵܐ ܕܲܠܗܲܠ ܡ̣ܢ ܥܵܠܡܵܐ: ܠܐܲܝܟܵܐ ܕܐܝܼܬܼܵܘܗܝ
                ܐܲܒܼܵܐ ܘܲܒܼܪܵܐ ܘܪܘܼܚܵܐ ܕܩܘܼܕܼܫܵܐ. ܕܠܹܗ ܫܘܼܒܼܚܵܐ ܘܐܘܼܪܚܕܵܢܵܐ: ܘܠܲܢ
                ܢܲܫܘܸܐ ܠܕܸܚܠܬܹܗ ܘܲܠܚܘܼܒܹܗ. ܐܵܡܹܝܢ.