Isaac of Nineveh. “Discourse 45.” Based upon Digital Syriac Corpus. Last modified March 5, 2019. https://syriaccorpus.org/436.
    
        
            
                ܡܸܠܟܹ̈ܐ ܡܲܠܝܲܝ̈ ܝܘܼܬܼܪܵܢܵܐ. ܡܗ.
            
            
                ܠܲܝܬܿ ܙܵܘܥܵܐ ܛܵܒܼܵܐ: ܕܠܵܘ ܡ̣ܢ ܡܵܘܗܲܒܼܬܼܵܐ ܕܲܠܥܸܠ ܢܵܦܹ̇ܠ ܒܠܸܒܵܐ.
                ܘܠܲܝܬܿ ܚܘܼܫܵܒܼܵܐ ܒܝܼܫܵܐ: ܕܠܵܘ ܐܲܝܟܼ ܕܲܒܼܢܸܤܝܘܿܢܵܐ ܡܸܬܼܩܲܪܲܒܼ ܠܢܲܦܫܵܐ.
                ܒܲܪܢܵܫܵܐ ܕܲܡܛ̣ܵܐ ܠܝܼܕܲܥܬܵܐ ܕܲܡܚܝܼܠܘܼܬܹܗ: ܡܛ̣ܵܐ ܠܤܵܟܼܵܠܐ
                ܕܡܲܟܿܝܼܟܼܘܼܬܼܵܐ܀ ܗܲܕܿܝܵܝܵܐ ܕܛܲܝ̈ܒܿܘܵܬܹܗ ܕܐܲܠܵܗܵܐ ܠܘܵܬܼ ܒܲܪܢܵܫܵܐ:
                
                 322 
                
                ܠܸܒܵܐ ܕܡܸܬܿܬܿܙܝܼܥ ܒܩܘܼܒܵܠܛܲܝܒܿܘܼܬܼܵܐ ܐܲܡܝܼܢܵܐ܀ ܗܲܕܿܝܵܝܵܐ ܕܢܸܤ̈ܝܘܿܢܹܐ
                ܩܕܼܵܡ ܢܲܦܫܵܐ: ܙܵܘܥܵܐ ܕܲܪܛܘܼܢܝܵܐ: ܕܐܲܡܝܼܢ ܕܵܐܹ̇ܠ ܒܠܸܒܵܐ. ܠܟܼܠ
                ܡܚܝܼ̈ܠܵܬܹܗ ܕܒܲܪܢܵܫܵܐ: ܛܵܥܹ̇ܢ ܐܲܠܵܗܵܐ. ܠܒܲܪܢܵܫܵܐ ܕܐܲܡܝܼܢ ܡܪܲܛܸܢ:
                ܠܵܐ ܡܤܲܝܒܲܪ ܕܠܵܐ ܪܵܕܹܐ ܠܹܗ. ܢܲܦܫܵܐ ܕܪܲܚܝܼܩܵܐ ܡ̣ܢ ܟ̱ܠܹܗ ܙܲܗܪܵܐ
                ܕܝܼܕܲܥܬܼܵܐ: ܒܗܵܠܹܝܢ ܙܵܘ̈ܥܹܐ ܡܸܫܬܲܟܼܚܵܐ. ܦܘܼܡܵܐ ܕܐܲܡܝܼܢ ܡܵܘܕܸܐ:
                ܒܘܼܪܟܿܬܼܵܐ ܡܩܲܒܸܠ ܡ̣ܢ ܐܲܠܵܗܵܐ. ܘܠܸܒܵܐ ܕܐܲܡܝܼܢ ܒܩܘܼܒܵܠܛܲܝܒܿܘܼܬܼܵܐ:
                ܫܵܟܼܢܵܐ ܒܹܗ ܛܲܝܒܿܘܼܬܼܵܐ܀ ܩܕܼܵܡ ܛܲܝܒܿܘܼܬܼܵܐ: ܡܘܼܟܵܟܼܵܐ ܤܵܗܹ̇ܛ.
                ܘܲܩܕܼܵܡ ܡܲܪܕܘܼܬܼܵܐ: ܪܵܗܛܵܐ ܡܲܤܒܿܪܵܢܘܼܬܼܵܐ. ܐܲܝܢܵܐ ܕܡܸܛܠ ܝܑܼܕܲܥܬܵܐ
                ܡܸܬܿܬܿܪܝܼܡ ܒܬܹܐܪܬܹܗ: ܒܓܼܘܼܕܵܦܵܐ ܡܸܬܼܢܲܤܸܐ. ܘܐܲܝܢܵܐ ܕܒܲܡܝܲܬܿܪܘܼܬܼܵܐ
                ܕܦܘܼܠܚܵܢܵܐ: ܒܙܵܢܝܘܼܬܼܵܐ ܡܸܬܼܡܲܨܲܥ. ܘܕܲܒܼܚܸܟܼܡܬܼܵܐ ܡܸܫܬܲܩܲܠ:
                ܒܹܝܬܼ ܦܲܚܹ̈ܐ ܥܲܡܘܼ̈ܛܹܐ ܡܸܬܿܕܵܘܲܕܼ܀ ܒܲܪܢܵܫܵܐ ܕܪܲܚܝܼܩ ܡ̣ܢ ܟ̱ܠܹܗ
                ܕܘܼܟܼܪܵܢܵܐ ܕܐܲܠܵܗܵܐ: ܗܵܘ̇ ܕܲܛܥܝܼܢ ܒܠܸܒܹܗ ܡܲܪܢܝܼܬܼܵܐ ܕܥܲܠ ܩܲܪܼܝܼܒܹܗ:
                ܒܒܼܝܼܫܘܼܬܼ ܥܘܼܗܕܵܢܵܐ܀ ܐܲܝܢܵܐ ܕܲܡܝܲܩܲܪ ܠܟܼܠܒܲܪܢܵܫ ܒܥܘܼܗܕܵܢܵܐ
                ܕܐܲܠܵܗܵܐ: ܡܸܫܟܲܚ ܡܥܲܕܪܵܢܵܐ ܠܟܼܠܒܲܪܢܵܫ: ܒܪܸܡܙܵܐ ܟܲܤܝܵܐ
                ܕܐܲܠܵܗܵܐ܀ ܕܢܵܦܹ̇ܩ ܪܘܼܚܵܐ ܥܲܠ ܥܫܝܼܩܵܐ: ܡܸܫܟܲܚ ܤܢܹܐܓܼܪܵܐ
                ܠܒܼܵܪܝܹܗ. ܕܝܵܗܹ̇ܒܼ ܕܪܵܥܹܗ ܠܥܘܼܕܼܪܵܢ ܩܲܪܝܼܒܹܗ: ܕܪܵܥܹܗ ܕܐܲܠܵܗܵܐ
                ܢܵܤܹ̇ܒܼ ܚܠܵܦܵܘܗܝ܀ ܕܲܡܩܲܛܪܸܓܼ ܠܐܲܚܘܼܗܝ ܥܲܠ ܒܝܼ̈ܫܬܹܗ:
                ܡܸܫܟܲܚ ܠܐܲܠܵܗܵܐ ܩܛܹܐܓܼܪܵܢܹܗ. ܕܲܡܬܲܪܸܨ ܠܐܲܚܘܼܗܝ ܒܬܼܵܘܵܢܹ̈ܐ:
                ܡܲܐܤܸܐ ܒܝܼܫܬܹܗ. ܕܲܡܩܲܛܪܸܓܼ ܠܹܗ ܒܲܟܼܢܘܼܫܬܼܵܐ: ܡܲܥܫܸܢ ܚܒܼܵܪ̈ܵܬܹܗ.
                ܕܡܲܐܤܸܐ ܠܐܲܚܘܼܗܝ ܒܲܝܬܵܐܝܼܬܼ: ܥܲܠ ܥܘܼܫܢܵܐ ܕܚܘܼܒܹܗ ܡܒܲܕܸܩ.
                ܘܕܲܡܦܲܪܤܸܐ ܠܹܗ ܠܥܹܝܢ ܚܲܒܼܪ̈ܵܘܗܝ: ܚܲܝܠܵܐ ܕܲܚܤܵܡܹܗ ܐܵܘܕܲܥ̣܀
                ܪܵܘܡܵܐ ܕܲܒܼܛܘܼܫܝܵܐ ܡܲܟܸܿܣ: ܐܵܤܝܵܐ ܗ̄ܘ̣ ܚܲܟܹܝܼܡܵܐ. ܘܕܲܠܥܹܝܢ ܤܲܓܝܼ̈ܐܹܐ
                
                 323 
                
                ܡܲܐܤܸܐ: ܡܒܲܙܚܵܢܵܐ ܗ̄ܘ̣ ܒܲܫܪܵܪܵܐ. ܐܵܬ̤ܵܐ ܕܲܡܪܲܚܡܵܢܘܼܬܼܵܐ: ܫܘܼܒܼܩܵܢܵܐ
                ܕܟܼܠ ܤܘܼܪܚܵܢ. ܘܐܵܬ̤ܵܐ ܕܒܼܝܼܫܘܼܬܼ ܬܲܪܥܝܼܬܼܵܐ: ܫܘܼܚ̈ܠܵܦܹܐ ܕܡܸܠܹ̈ܐ
                ܕܨܹܐܕܼܵܘܗܝ ܕܡܲܤܟܿܠܵܢܵܐ܀ ܐܲܝܢܵܐ ܕܠܵܐܤܝܘܼܬܼܵܐ ܡܩܲܪܸܒܼ ܡܲܪܕܘܼܬܼܵܐ:
                ܒܚܘܼܒܵܐ ܪܵܕܹܐ. ܘܕܲܢܩܲܡܬܵܐ ܤܝܼܡܵܐ ܬܒܲܥܬܹܗ: ܤܦܝܼܩ ܗ̄ܘ̣ ܡ̣ܢ
                ܚܘܼܒܵܐ. ܐܲܠܵܗܵܐ ܪܵܕܹܐ ܒܚܘܼܒܵܐ: ܘܠܵܘ ܐܲܝܟܼ ܕܠܲܢܩܲܡܬܼܵܐ: ܚܵܣ!
                ܡܸܛܠ ܕܢܸܬܼܐܲܤܸܐ ܨܲܠܡܹܗ ܒܵܥܹ̇ܐ: ܘܠܵܐ ܢܵܛܲܪ ܪܘܼܓܼܙܵܐ: ܠܙܲܒܼܢܵܐ
                ܡܲܪܝܼܕܼ ܡ̣ܢ ܬܘܼܪܨܵܐ. ܡܸܛܠ ܕܠܵܘ ܢܩܲܡܬܵܐ ܕܢܲܦܫܹܗ ܬܵܒܲܥ.
                ܗܵܢܵܘ ܢܝܼܫܹܗ ܕܚܘܼܒܵܐ. ܘܡܲܪܕܘܼܬܼܵܐ ܕܚܘܼܒܵܐ: ܡܸܛܠ ܬܘܼܪܵܨܵܐ ܗ̄ܝ.
                ܘܲܠܦܘܼܪܥܵܢܵܐ: ܠܵܐ ܡܚܝܼܪܵܐ ܒܢܝܼܫܵܐ܀
                	ܙܲܕܝܼܩܵܐ ܕܚܲܕܿܝܼܡ: ܠܐܲܠܵܗܵܐ ܕܵܡܹ̇ܐ. ܠܵܐ ܪܵܕܹܐ ܤܵܟܼ ܠܒܲܪܢܵܫܵܐ:
                ܡܸܛܠ ܕܢܸܬܼܒܲܥ ܤܲܟܼܠܘܼܬܹܗ. ܐܸܠܵܐ ܕܐܵܘ ܗ̤ܘ ܢܸܬܿܬܲܪܲܨ: ܐܵܘ
                ܕܲܐ̄ܚܪ̈ܵܢܹܐ ܢܸܤܬܲܪܕܼܘܼܢ. ܕܲܡܫܲܚܠܦܵܐ ܓܹܝܪ ܡ̣ܢ ܗܵܕܹܐ: ܠܲܝܬܹܿܝܗ̇
                ܡܲܪܕܘܼܬܼܵܐ. ܘܗܵܕܹܐ: ܐܲܝܟܼ ܕܲܒܼܨܲܠܡܵܐ ܨܵܐܲܪ ܒܵܗ̇ ܪܘܼܚܵܐ: ܬܲܪܥܝܼܬܼܵܐ
                ܕܐܝܼܬܼ ܠܹܗ ܠܐܲܠܵܗܵܐ ܡܬܼܘܿܡܵܐܝܼܬܼ. ܐܲܝܢܵܐ ܕܠܲܐܠܵܗܵܐ ܐܲܝܟܼ ܬܵܒܼܘܿܥܵܐ
                ܨܵܒܹ̇ܐ ܕܢܸܪܢܸܐ: ܟܲܕܼ ܠܟܹܐܢܘܼܬܼܵܐ ܤܵܒܲܪ ܕܲܡܩܝܼܡ: ܒܠܵܐ ܛܵܒܼܘܼܬܼܵܐ
                ܡܩܲܛܪܸܓܼ ܠܹܗ. ܚܵܣ ܠܹܗ ܠܗܵܘ̇ ܡܲܒܿܘܼܥ ܚܘܼܒܵܐ: ܘܝܲܡܵܐ
                ܕܲܡܠܸܐ ܛܵܒܼܘܼܬܼܵܐ: ܕܦܘܼܪܥܵܢܘܼܬܼܵܐ ܫܟܼܝܼܚܵܐ ܒܹܗ. ܢܝܼܫܵܐ ܕܬܲܪܥܝܼܬܹܗ:
                ܠܬܼܘܼܪܵܨܵܐ ܗ̄ܘ̣ ܕܲܒܼܢܲܝ̈ܢܵܫܵܐ. ܘܐܸܠܘܼ ܠܵܐ ܕܢܸܫܬܲܠܲܚ ܐܝܼܩܵܪ ܚܹܐܪܘܼܬܼܵܐ:
                ܕܲܠܡܵܐ ܐܵܦܠܵܐ ܒܲܟܼܐܵܬܼܵܐ ܡܲܐܤܸܐ ܠܲܢ. ܬܚܘܼܡܵܐ ܕܚܹܐܪܘܼܬܼܵܐ ܒܝܲܕܼ
                ܤܘܼܥܪ݁ܵܢܲܝܢ: ܚܲܝܠܵܐ ܕܓܲܠܝܘܼܬܼ ܐܲܦܹ̈ܐ ܡܲܤܪܚܵܐ ܠܲܡܠܝܼܠܘܼܬܼܵܐ. ܘܐܵܦ
                ܗܵܕܹܐ: ܠܪܲܒܿܘܼܬܼ ܛܵܒܼܘܼܬܹܗ ܬܸܤܓܘܿܕܼ. ܕܠܵܐ ܐܲܝܟܼ ܕܲܒܼܕܼܝܼܠܹܗ ܨܵܒܹ̇ܐ
                ܕܢܸܚܕܹܐ: ܐܸܠܵܐ ܐܲܝܟܼ ܕܲܒܼܙܸܕܼܩܹ̈ܐ ܕܲܥ̇ܒܼܵܕܲܝ̈ܢ. ܕܟܲܕܼ ܕܝܼܠܹܗ ܗ̄ܘ̣
                
                 324 
                
                ܟܠܡܸܕܸܡ: ܠܵܐ ܪܵܚܹ̇ܡ ܕܢܸܚܫܘܿܒܼ ܕܝܼܠܹܗ: ܐܸܠܵܐ ܐܲܝܟܼ ܕܲܒܼܕܼܝܼܠܲܢ
                ܢܸܬܼܒܲܤܲܡ܀ ܠܦܘܼܬܼ ܛܵܒܼܘܼܬܹܗ ܕܒܲܪܢܵܫܵܐ: ܥܲܠ ܐܲܠܵܗܵܐ ܡܸܬܼܢܲܗܲܪ.
                ܘܲܠܦܘܼܬܼ ܕܢܸܬܿܕܲܠܸܐ ܠܘܵܬܼ ܝܑܼܕܲܥܬܹܗ: ܠܚܹܐܪܘܼܬܼ ܢܲܦܫܵܐ ܡܸܬܼܩܲܪܲܒܼ܀
                ܐܲܝܢܵܐ ܕܡܸܛܠ ܦܘܼܪܥܵܢܵܐ ܕܲܥܬܼܝܼܕܼ ܡܸܬܼܝܲܬܲܪ ܒܫܲܦܝܝܼܪ̈ܵܬܼܵܐ: ܕܠܝܼܠ
                ܗ̄ܘ̣ ܤܲܓܝܼ ܠܫܘܼܚܠܵܦܵܐ. ܐܲܝܢܵܐ ܕܚܲܝܠܵܐ ܕܝܼܕܲܥܬܹܗ ܡܲܬܼܗܲܪ ܠܹܗ:
                ܒܲܚܙܵܬܼܵܐ ܕܚܘܼܒܵܐ ܕܐܝܼܬܼ ܠܹܗ ܠܐܲܠܵܗܵܐ: ܗܵܢܵܐ ܐܵܦܸܢ ܒܸܤܪܹܗ
                ܢܸܬܼܦܲܤܲܩ: ܠܵܐ ܒܪܸܥܝܵܢܹܗ ܡܸܬܿܬܿܪܝܼܡ: ܘܠܵܐ ܡ̣ܢ ܡܝܲܬܿܪܘܼܬܼܵܐ
                ܡܸܫܬܲܓܼܢܸܐ. ܐܲܝܢܵܐ ܕܲܒܼܚܘܼ̈ܒܼܠܹܐ ܕܐܝܼܬܼ ܠܹܗ ܠܐܲܠܵܗܵܐ ܥܠܲܝܢ ܡܸܬܼܢܲܗܲܪ
                ܪܸܥܝܵܢܹܗ: ܗܵܢܵܐ ܠܥܘܼܡܩܵܐ ܕܡܘܼܟܵܟܼܵܐ ܢܵܚܹ̇ܬܼ ܒܦܲܓܼܪܹܗ ܘܲܒܼܢܲܦܫܹܗ.
                ܩܕܼܵܡ ܕܢܸܬܼܩܲܪܲܒܼ ܒܲܪܢܵܫܵܐ ܠܘܵܬܼ ܝܑܼܕܲܥܬܼܵܐ: ܡܸܬܿܕܠܸܐ ܘܡܸܬܿܬܲܚܬܸܐ
                ܒܕܼܘܼܒܵܪܹܗ. ܡܵܐ ܕܹܝܢ ܕܐܸܬܼܩܲܪܲܒܼ ܨܹܝܕܼ ܝܑܼܕܲܥܬܼܵܐ: ܟ̱ܠܹܗ ܡܸܬܿܕܲܠܵܝܘܼ
                ܡܸܬܿܕܲܠܸܐ: ܘܟܼܠ ܟܡܵܐ ܕܡܸܬܿܕܲܠܸܐ: ܠܵܐ ܫܵܠܡܵܐ ܡܲܤܲܩܬܵܗ̇
                ܕܝܼܕܲܥܬܼܵܐ: ܩܕܼܵܡ ܕܢܹܐܬܸܐ ܗܵܘ̇ ܥܵܠܡܵܐ ܕܬܸܫܒܿܘܿܚܬܼܵܐ: ܘܢܸܤܲܒܼ
                ܤܵܟܼܵܐ ܕܥܘܼܬܼܪܹܗ. ܟܡܵܐ ܐܸܢ ܢܸܬܼܓܡܲܪ ܒܲܪܢܵܫܵܐ ܠܘܵܬܼ ܐܲܠܵܗܵܐ:
                ܡܹܐܙܲܠ ܗ̄ܘ̣ ܐܵܙܹ̇ܠ ܒܵܬܼܪܹܗ. ܒܥܵܠܡܵܐ ܕܹܝܢ ܕܲܫܪܵܪܵܐ: ܐܲܦܵܘ̈ܗܝ
                ܡܚܵܘܸܐ ܠܹܗ: ܠܵܐ ܗ̄ܘ̣ܵܐ ܕܐܝܼܬܼܘܼܬܹܗ. ܟܡܵܐ ܐܸܢ ܢܸܬܼܓܵܘܘܿܢ ܘܲܕܝܼ̈ܩܹܐ
                ܒܚܸܙܘܵܘ̈ܗܝ: ܦܸܠ̱ܐܬܼܵܗ̇ ܗ̄ܘ̣ ܕܲܚܙܵܬܼܵܐ ܚܵܙܹ̇ܝܢ: ܐܲܝܟܼ ܨܲܠܡܵܐ ܕܡܸܬܼܚܵܘܸܐ
                ܒܝܲܕܼ ܡܲܚܙܝܼܬܼܵܐ. ܬܲܡܵܢ ܕܹܝܢ: ܠܓܸܠܝܵܢܹܗ ܕܲܫܪܵܪܵܐ ܚܵܙܹ̇ܝܢ܀
                	ܢܘܼܪܵܐ ܕܲܒܼܩܲܝ̈ܤܹܐ ܝܲܒܝܼ̈ܫܹܐ ܐܵܚ̇ܕܵܐ: ܥܲܤܩܵܐܝܼܬܼ ܕܵܥ̇ܟܵܐ. ܘܪܸܬܼܚܵܐ
                ܕܒܲܐܠܵܗܵܐ: ܕܲܒܼܠܸܒܵܐ ܕܲܦܤܝܼܩ ܡ̣ܢ ܥܵܠܡܵܐ ܢܵܦܹ̇ܠ: ܢܲܒܼܪܲܫܬܹܗ ܠܵܐ
                ܡܸܬܿܕܲܥܟܼܵܢܝܼܬܵܐ ܗ̣̄ܝ. ܘܚܲܪܝܼܦܵܐ: ܐܵܦ ܡ̣ܢ ܢܘܼܪܵܐ. ܚܲܡܪܵܐ ܡܵܐ ܕܥܲܠ̣
                ܚܲܝܠܹܗ ܒܫܸܪ̈ܝܵܢܹܐ: ܛܵܥܹ̇ܐ ܗܵܘܢܵܐ ܚܲܬܝܼܬܼܘܼܬܼܵܐ ܕܟܼܠܡܸܕܸܡ.
                
                 325 
                
                ܘܥܘܼܗܕܵܢܵܐ ܕܐܲܠܵܗܵܐ ܡܵܐ ܕܐܸܚܲܕܼ ܢܘܿܡܹܐ ܒܢܲܦܫܵܐ: ܥܵܛܹ̇ܐ ܕܘܼܟܼܪܵܢܵܐ
                ܕܡܸܬܼܚܲܙ̈ܝܵܢܝܵܬܼܵܐ ܡ̣ܢ ܠܸܒܵܐ. ܪܸܥܝܵܢܵܐ ܕܐܸܫܟܲܚ ܚܸܟܼܡܬܵܐ ܕܪܘܼܚ: ܐܲܝܟܼ
                ܐ̄ܢܵܫ ܕܐܸܫܟܲܚ ܐܸܠܦܵܐ ܡܛܲܝܝܲܒܼܬܵܐ ܒܓܼܵܘ ܝܲܡܵܐ. ܕܡܵܐ ܕܝܼܬܸܒܼ ܒܵܗ̇:
                ܡܲܥܒܿܪܵܐ ܠܹܗ ܡ̣ܢ ܝܲܡܵܐ ܕܥܵܠܡܵܐ ܗܵܢܵܐ: ܘܲܡܡܲܢܥܵܐ ܠܹܗ ܠܘܵܬܼ ܓܵܙܲܪܬܵܐ
                ܕܥܵܠܡܵܐ ܕܲܥܬܼܝܼܕܼ. ܗܵܟܲܢܵܐ ܓܹܝܪ ܐܝܼܬܹܝܗ̇ ܡܲܪܓܫܵܢܘܼܬܼܵܐ ܕܲܥܬܼܝܼ̈ܕܼܵܬܼܵܐ
                ܒܥܵܠܡܵܐ ܗܵܢܵܐ: ܐܲܝܟܼ ܓܵܙܲܪܬܵܐ ܙܥܘܿܪܬܵܐ ܒܓܼܵܘ ܝܲܡܵܐ. ܘܐܲܝܢܵܐ
                ܕܲܠܘܵܬܼܵܗ̇ ܐܸܬܼܩܲܪܲܒܼ: ܠܵܐ ܬܘܼܒܼ ܡܸܬܿܛܲܪܲܦ ܒܡܲܚܫܘܼ̈ܠܹܐ ܕܗܲܓܵܓܲܝ̈
                ܙܲܒܼܢܵܐ. ܬܲܓܵܪܵܐ ܡܵܐ ܕܫܲܡܠܝܼ ܙܸܒܼܢܹܗ: ܠܒܲܝܬܹܗ ܡܸܟܹܝܠ ܡܸܤܬܲܪܗܲܒܼ
                ܕܢܹܐܙܲܠ. ܘܕܲܝܪܵܐ ܟܡܵܐ ܕܲܥܕܲܟܹܝܠ ܦܲܚ̣ܫ ܙܲܒܼܢܵܐ ܕܦܘܼܠܚܵܢܹܗ:
                ܡܥܵܩ ܕܢܸܦܘܿܩ ܡ̣ܢ ܦܲܓܼܪܵܐ. ܡܵܐ ܕܹܝܢ ܕܐܲܪܓܸܫ̣ ܒܢܲܦܫܹܗ ܕܲܙܒܲܢ
                ܩܹܐܪܤܹܗ ܘܲܢܤܲܒܼ ܪܲܗܒܼܘܿܢܹܗ: ܡܸܬܼܪܲܓܼܪܲܓܼ ܠܥܵܠܡܵܐ ܕܲܥܬܼܝܼܕܼ.
                ܬܲܓܵܪܵܐ ܟܡܵܐ ܕܲܒܼܝܼܡܵܐ ܗ̄ܘ̣: ܙܵܘܥܵܐ ܫܪܸܐ ܥܲܠ ܗܲܕܵܡܵܘ̈ܗܝ. ܕܕܲܡ
                ܢܸܙܕܩܸܦ ܡܲܚܫܘܼܠܵܐ: ܘܢܸܛܒܲܥ ܤܲܒܼܪܵܐ ܕܥܲܡܠܹܗ. ܘܕܲܝܪܵܝܵܐ
                ܟܡܵܐ ܕܲܒܼܥܵܠܡܵܐ ܗ̄ܘ̣: ܩܸܢܛܵܐ ܐܲܚܝܼܕܼ ܠܦܘܼܠܚܵܢܹܗ. ܕܕܲܡ
                ܢܸܬܿܬܿܥܝܼܪ ܥܠܵܘܗܝ ܟܝܼܡܘܿܢܵܐ: ܘܢܹܐܒܲܕܼ ܥܲܡܠܵܐ ܕܡ̣ܢ ܛܲܠܝܝܘܼܬܼܵܐ
                ܠܤܲܝܒܲܘܼܬܼܵܐ. ܬܲܓܵܪܵܐ ܠܝܲܒܼܫܵܐ ܚܵܐܲܪ: ܘܕܲܝܪܵܝܵܐ ܠܥܸܕܵܢ ܡܵܘܬܹܗ.
                ܡܲܠܵܚܵܐ ܒܟܼܵܘܟܿܒܼܵܐ ܚܵܐܲܪ: ܡܵܐ ܕܪܵܕܹܐ ܡܸܨܥܲܬܼ ܝܲܡܵܐ. ܘܲܠܘܲܥܕܹܗ
                ܬܵܪܹܨ ܐܸܠܦܹܗ: ܕܲܢܚܵܘܸܐ ܠܹܗ ܠܲܠܡܹܐܢܵܐ. ܘܕܲܝܪܵܝܵܐ ܚܵܐܲܪ ܒܲܨܠܘܿܬܼܵܐ:
                ܕܗ̤ܝ ܬܵܪܨܵܐ ܠܹܗ ܡܲܪܕܝܼܬܼܵܐ: ܕܠܲܐܝܢܵܐ ܠܡܹܐܢܵܐ ܢܸܬܼܪܘܿܨ ܕܘܼܒܵܪܹܗ.
                ܒܲܨܠܘܿܬܼܵܐ ܚܵܐܲܪ ܕܲܝܪܵܝܵܐ ܒܟܼܠܥܸܕܵܢ: ܕܲܬܼܚܵܘܸܐ ܠܹܗ ܓܵܙܲܪܬܵܐ: ܕܒܼܵܗ̇
                ܢܹܐܤܘܿܪ ܐܸܠܦܹܗ ܡ̣ܢ ܩܸܢܛܵܐ. ܘܡ̣ܢ ܬܲܡܵܢ ܬܲܡܵܢ ܢܸܥܒܸܿܕܼ ܙܘܵܕܹ̈ܐ: ܘܢܸܬܼܪܘܿܨ
                
                 326 
                
                ܬܘܼܒܼ ܠܓܼܵܙܲܪܬܵܐ ܐ̄ܚܪܹܬܼܵܐ. ܗܵܟܲܢܵܐ ܐܝܼܬܹܝܗ̇ ܡܲܪܕܝܼܬܹܗ ܕܝܼܚܝܼܕܼܵܝܵܐ:
                ܟܡܵܐ ܕܐܝܼܬܼܵܘܗܝ ܒܗܵܠܹܝܢ ܚܲܝܹ̈ܐ. ܘܡ̣ܢ ܓܵܙܲܪܬܵܐ ܠܓܼܵܙܲܪܬܵܐ ܡܫܲܢܸܐ:
                ܘܡ̣ܢ ܝܑܼܕܲܥܬܼܵܐ ܠܝܼܕܼܥܬܼܵܐ. ܘܐܲܝܟܼ ܕܲܒܼܫܘܼ̈ܚܠܵܦܹܐ ܕܓܼܵܙܪ̈ܵܬܼܵܐ: ܒܝܲܕܼ̈ܥܵܬܼܵܐ
                ܡܫܲܚ̈ܠܦܵܬܼܵܐ ܦܵܓܲܥ̇. ܥܕܲܡܵܐ ܕܤܵܠܹ̇ܩ ܡ̣ܢ ܝܲܡܵܐ: ܘܲܠܗܵܝ̇ ܡܕܼܝܼܢ̄ܬܹܗ
                ܕܲܫܪܵܪܵܐ ܡܲܪܕܝܼܬܹܗ ܬܸܡܤܲܟܼ. ܕܠܵܐ ܬܘܼܒܼ ܡܸܬܿܬܲܓܿܪܝܼܢ ܒܵܗ̇
                ܥܵܡܘܿܪܹ݁ܝܗ̇: ܐܸܠܵܐ ܟܠܢܵܫ ܥܲܠ ܡܲܪ̈ܗܵܛܵܘܗܝ ܡܸܬܿܬܿܢܝܼܚ. ܛܘܼܒܼ
                ܠܡܲܢ ܕܠܵܐ ܐܸܬܿܕܵܘܕܲܬ̤ ܡܲܪܕܝܝܼܬܹܗ: ܒܓܼܵܘ ܝܲܡܵܐ ܪܲܒܵܐ! ܛܘܼܒܼ
                ܠܡܲܢ ܕܠܵܐ ܐܸܬܿܬܲܒܼܪܲܬ̤ ܐܸܠܦܹܗ: ܘܲܡܛ̣ܵܐ ܠܲܠܡܹܐܢܵܐ ܗܵܘ̇ ܟܲܕܼ ܚܵܪܹܐ!
                	ܤܲܚܵܝܵܐ ܥܲܪܛܸܠ ܥܵܡܹ̇ܕܼ ܒܓܼܵܘ ܝܵܡܵܐ: ܐܲܝܟܼ ܕܢܸܫܟܲܚ ܡܲܪܓܵܢܝܼܬܼܵܐ.
                ܘܕܲܝܪܵܝܵܐ ܚܲܟܿܝܼܡܵܐ ܥܲܪܛܵܠ ܪܵܕܹܐ ܒܲܒܼܪܝܼܬܼܵܐ: ܕܢܸܫܟܲܚ ܠܡܲܪܓܵܢܝܼܬܼܵܐ
                ܝܼܫܘܿܥ ܡܫܝܼܚܵܐ ܒܲܩܢܘܿܡܹܗ. ܘܡܵܐ ܕܐܸܫܟܿܚܵܗ̇: ܥܲܡܵܗ̇ ܠܵܐ ܩܵܢܹ̇ܐ
                ܬܘܼܒܼ ܡܸܕܸܡ. ܡܲܪܓܵܢܝܼܬܼܵܐ: ܒܬܼܵܘܵܢܹ̈ܐ ܡܸܬܼܢܲܛܪܵܐ. ܘܒܼܘܼܤܵܡܹܗ
                ܕܝܼܚܝܼܕܼܵܝܵܐ: ܒܓܼܵܘ ܫܸܠܝܵܐ. ܒܬܼܘܼܠܬܼܵܐ: ܒܲܟܼܢܘܼ̈ܫܝܹܐ ܡܸܬܼܚܲܠܨܵܐ. ܘܪܸܥܝܵܢܹܗ
                ܕܕܲܝܪܵܝܵܐ: ܒܥܸܢܝܵܢܹ̈ܐ. ܦܵܪܲܚܬܼܵܐ ܡ̣ܢ ܟܠ ܕܘܼܟ ܠܩܸܢܵܗ̇ ܪܵܗ̇ܛܵܐ:
                ܕܬܸܥܒܸܿܕܼ ܒܢ̈ܵܬܼܵܐ. ܘܕܲܝܪܵܝܵܐ ܦܵܪܘܿܫܵܐ: ܡܸܤܬܲܪܗܲܒܼ ܠܟܼܘܼܪܚܹܗ:
                ܕܢܸܥܒܸܿܕܼ ܒܓܼܵܘܹܗ ܦܹܐܪܹ̈ܐ ܕܚܲܝܹ̈ܐ. ܚܸܘܝܵܐ ܟܲܕܼ ܟ̱ܠܹܗ ܓܘܼܫܡܹܗ
                ܡܪܲܨܨܝܼܢ: ܒܪܹܫܹܗ ܡܸܙܕܗܲܪ. ܘܝܼܚܝܼܕܼܵܝܵܐ ܕܚܲܟܿܝܼܡ: ܡܸܙܕܗܲܪ ܒܟܼܠ
                ܒܝܼ̈ܫܵܢ ܒܗܲܝܡܵܢܘܼܬܹܗ: ܕܐܝܼܬܹܝܗ̇ ܪܹܫܵܐ ܕܚܲܝܵܘ̈ܗܝ. ܥܢܵܢܵܐ: ܡܚܲܦܝܵܐ
                ܠܫܸܡܫܵܐ. ܘܡܲܡܠܵܠܐ ܤܲܓܝܼܐܵܐ: ܠܢܲܦܫܵܐ ܕܫܲܪܝܲܬ̤ ܢܵܗ̇ܪܵܐ ܒܬܹܐܘܿܪܝܼܵܐ
                ܕܲܨܠܘܼܬܼܵܐ. ܗܵܝ̇ ܦܵܪܲܚܬܼܵܐ ܕܡܸܬܼܩܲܪܝܵܐ ܚܘܼܪܒܼܵܐ: ܒܗܵܘ̇ ܙܲܒܼܢܵܐ ܪܵܘܙܵܐ
                ܘܡܸܬܼܒܲܤܡܵܐ: ܐܲܝܟܼ ܡܸܠܬܼܵܐ ܕܚܲܟܿܝܼ̈ܡܹܐ: ܡܵܐ ܕܦܵܪܫܵܐ ܢܲܦܫܵܗ̇ ܡ̣ܢ
                
                 327 
                
                ܕܘܼ̈ܟܿܝܵܬܼܵܐ ܕܫܲܝܢܵܐ: ܘܐܵܙܵܠ̇ܐ ܥܵܡ̇ܪܵܐ ܒܐܲܬܼܪܵܐ ܚܘܼܪܒܵܐ. ܘܢܲܦܫܹܗ
                ܕܝܼܚܕܼܵܝܵܐ: ܒܗܵܘ̇ ܙܲܒܼܢܵܐ ܡܩܲܒܿܠܵܐ ܚܲܕܼܘܼܬܼܵܐ ܫܡܲܝܵܢܼܬܼܵܐ: ܡܵܐ ܕܡܲܪܚܩܵܐ
                ܝܵܬܼܵܗ̇ ܡ̣ܢ ܒܢܲܝ̈ܢܵܫܵܐ: ܘܐܵܙܵܠ̇ܐ ܥܵܡ̇ܪܵܐ ܒܐܲܬܼܪ̈ܵܘܵܬܼܵܐ ܕܲܫܠܹܝܢ: ܘܬܲܡܵܢ
                ܡܤܲܟܿܝܵܐ ܠܙܲܒܼܢܵܐ ܕܡܲܦܩܵܢܵܗ̇. ܐܲܡܝܼܪܵܐ ܓܹܝܪ ܥܲܠ ܦܵܪܲܚܬܵܐ ܗܵܝ̇
                ܕܡܸܬܼܩܲܪܝܵܐ ܤܹܝܪܹܝܢܵܣ: ܕܟܼܠ ܐܲܝܢܵܐ ܕܢܸܥܡܬܼܵܗ̇ ܨܵܐܹ̇ܬܼ: ܗܵܢܵܐ ܟ̱ܠܹܗ
                ܡܸܫܬܿܒܸܐ ܒܵܬܼܪܵܗ̇ ܒܡܲܪܕܝܼܬܼܵܐ ܕܲܒܼܡܲܕܼܒܿܪܵܐ: ܥܕܲܡܵܐ ܕܲܒܼܚܲܠܝܘܼܬܼܵܐ
                ܕܩܝܼ̈ܢܵܬܼܵܗ̇ ܛܵܥܹ̇ܐ ܚܲܝܵܘ̈ܗܝ: ܘܢܵܦܹ̇ܠ ܡܵܐܹ̇ܬܼ. ܠܗܵܕܹܐ ܕܵܡ̇ܝܵܐ ܨܒܼܘܼܬܼܵܗ̇
                ܕܢܲܦܫܵܐ: ܕܐܸܡܲܬܼܝ ܕܢܵܦ̇ܠܵܐ ܒܵܗ̇ ܚܲܠܝܘܼܬܼܵܐ ܗܵܝ̇ ܫܡܲܝܵܢܝܼܬܼܵܐ: ܡ̣ܢ
                ܢܸܥ̈ܡܵܬܼܵܐ ܕܦܸܬܼܓܼܵܡܵܘ̈ܗܝ ܕܐܲܠܵܗܵܐ: ܒܝܲܕܼ ܡܲܪܓܿܫܵܢܘܼܬܼܵܐ ܕܲܒܼܗܵܘܢܵܐ:
                ܗܵܢܵܐ ܟ̱ܠܹܗ ܐܵܙܵܠ̇ܐ ܒܵܬܼܪܹܗ: ܥܕܲܡܵܐ ܕܛܵܥ̇ܝܵܐ ܠܚܲܝܹܝ̈ܗ̇ ܓܘܼܫܡܵܢܵܝܹ̈ܐ:
                ܘܫܵܒܼ̇ܩܵܐ ܠܦܲܓܼܪܵܐ ܡ̣ܢ ܗܲܢܝܼܐܘܼܬܼܵܗ̇: ܘܡܸܬܼܥܲܠܝܵܐ ܠܘܵܬܹܗ ܡ̣ܢ
                ܚܲܝܹ̈ܐ. ܚܠܹܝܢ ܚܲܝܵܘ̈ܗܝ ܕܥܵܠܡܵܐ ܗܵܢܵܐ: ܠܐܲܝܢܵܐ ܕܚܵܝܹ̇ܐ ܦܲܓܼܪܵܢܵܐܝܼܬܼ.
                ܠܵܘ ܕܹܝܢ ܐܲܝܟܼ ܦܘܼܪܫܵܢܵܐ ܕܡܸܢܗܘܿܢ: ܠܐܲܝܢܵܐ ܕܦܵܪܹܫ ܡܸܢܗܘܿܢ ܒܝܲܕܼ
                ܪܓܸܫܬܼܵܐ ܕܒܲܐܠܵܗܵܐ. ܐܝܼܠܵܢܵܐ ܥܕܲܡܵܐ ܕܠܵܐ ܫܵܠܲܚ ܛܲܪ̈ܦܹܐ ܩܲܕܼܡܵܝܹ̈ܐ:
                ܠܵܐ ܡܲܦܸܩ ܦܸܪ̈ܥܹܐ ܚܲܕܼ̈ܬܹܐ. ܘܝܼܚܝܼܕܼܵܝܵܐ ܥܕܲܡܵܐ ܕܠܵܐ ܢܵܦܹ̇ܨ ܡ̣ܢ
                ܠܸܒܹܗ ܥܘܼ̈ܗܕܵܢܹܐ ܕܩܲܕܼ̈ܡܵܝܵܬܹܗ: ܠܵܐ ܡܲܦܸܩ ܦܸܪ̈ܥܹܐ ܚܲܕܼ̈ܬܹܐ: ܒܝܲܕܼ
                ܝܼܫܘܿܥܡܫܝܼܚܵܐ܀
                	ܪܘܼܚܵܐ: ܡܫܲܡܢܵܐ ܦܹܐܪܹ̈ܐ. ܘܪܘܼܚܵܐ ܕܐܲܠܵܗܵܐ: ܠܦܹܐܪܹ̈ܐ ܕܲܒܼܢܲܦܫܵܐ.
                ܙܠܵܦܬܼܵܐ ܗܵܝ̇ ܕܡܸܬܼܓܲܒܼܠܵܐ ܒܵܗ̇ ܡܲܪܓܵܢܝܼܬܼܵܐ: ܡ̣ܢ ܐܵܐܲܪ ܡܩܲܒܿܠܵܐ
                ܡܠܘܿܐܵܗ̇: ܐܲܝܟܼ ܕܐܵܡ̇ܪܵܐ ܡܸܠܬܼܵܐ. ܘܲܥܕܲܡܵܐ ܠܗܵܝܕܹܝܟ: ܒܸܤܪܵܐ ܗ̄ܘ̣
                ܫܚܝܼܡܵܐ܀ ܘܠܸܒܹܗ ܕܕܲܝܪܵܝܵܐ: ܥܕܲܡܵܐ ܕܲܡܩܲܒܸܠ ܡܠܘܿܐܵܐ ܫܡܲܝܵܢܵܐ
                ܒܝܲܕܼ ܤܘܼ̈ܟܵܠܹܐ: ܥܕܲܟܹܝܠ ܫܚܝܼܡܵܐ ܗ̄ܘ̣ ܦܘܼܠܚܵܢܹܗ: ܘܠܲܝܬܼ ܒܵܗ̇
                
                 328 
                
                ܒܘܼܝܵܐܵܐ ܒܓܼܵܘ ܙܠܵܦܬܹܗ܀ ܦܹܐܪܹ̈ܐ ܕܐܝܼ̈ܠܵܢܹܐ ܚܲܪܘܼܤܝܼܢ: ܘܲܓܼܥܝܼܨܝܼܢ
                ܒܛܲܥܡܘܿܢ. ܘܠܵܐ ܚܵܫ̇ܚܝܼܢ ܠܡܹܐܟܼܘܼܠܬܼܵܐ: ܥܕܲܡܵܐ ܕܢܵܦ̇ܠܵܐ ܒܗܘܿܢ
                ܚܲܠܝܘܼܬܼܵܐ ܡ̣ܢ ܫܸܡܫܵܐ. ܘܥܲܡ̈ܠܹܐ ܩܲܕܼ̈ܡܵܝܹܐ ܕܲܬܼܝܵܒܼܘܼܬܼܵܐ: ܡܲܪܝܼܪܝܼܢ
                ܘܲܓܼܥܝܼܨܝܼܢ ܤܲܓܿܝܼ. ܘܠܵܐ ܡܒܲܝܐܝܼܢ ܠܝܼܚܝܼܕܼܵܝܵܐ: ܥܕܲܡܵܐ ܕܢܵܦ̇ܠܵܐ
                ܒܗܘܿܢ ܚܲܠܝܘܼܬܼܵܐ ܗܵܝ̇ ܕܬܹܐܘܿܪܝܼܵܐ: ܕܡܫܲܢܝܵܐ ܠܠܸܒܵܐ ܡ̣ܢ ܐܲܪ̈ܥܵܢܵܝܵܬܼܵܐ:
                ܘܛܵܥܹ̇ܐ ܩܢܘܿܡܹܗ܀ ܟܲܠܒܵܐ ܕܲܡܠܲܚܸܟܼ ܫܘܿܦܝܼܢܵܐ: ܡ̣ܢ ܕܡܹܗ ܫܵܬܹ̇ܐ.
                ܘܠܵܐ ܝܵܕܲܥ̇ ܤܘܼܓܦܵܢܹܗ: ܡ̣ܢ ܚܲܠܝܘܼܬܼܵܐ ܕܡܸܢܹܗ. ܘܝܼܚܝܼܕܼܵܝܵܐ
                ܘܡܸܬܼܪܟܸܢ ܠܡܸܫܬܼܵܐ ܫܘܼܒܼܚܵܐ ܪܤܝܼܩܵܐ: ܡ̣ܢ ܚܲܝܵܘ̈ܗܝ ܡܵܐܹ̇ܨ. ܘܠܵܐ
                ܡܲܪܓܸܫ ܒܤܘܼܓܦܵܢܹܗ: ܡܸܛܠ ܚܲܠܝܘܼܬܼܵܐ ܕܫܵܥܬܼܵܐ. ܫܘܼܒܼܚܵܐ
                ܕܥܵܠܡܵܝܹ̈ܐ: ܐܲܝܟܼ ܩܲܬܵܪܵܐ ܗ̄ܘ̣ ܕܲܡܟܲܤܲܝ ܒܓܼܵܘ ܝܲܡܵܐ. ܘܠܵܐ
                ܡܸܬܼܝܼܕܲܥ ܠܡܲܠܵܚܵܐ: ܥܕܲܡܵܐ ܕܡܸܬܼܢܲܩܫܵܐ ܒܹܗ ܐܸܠܦܵܐ. ܘܢܵܩܹ̇ܒܼ
                ܠܐܸܫܬܵܗ̇: ܘܡܸܬܼܡܲܠܝܵܐ ܡܲܝ̈ܵܐ. ܐܲܡܝܼܪܵܐ ܗ̣̄ܝ ܡܸܛܠܵܬܹܗ ܠܐܲܒܼ̈ܗܵܬܼܵܐ:
                ܕܒܼܐܝܼܕܹܗ ܥܵܛ̇ܦܝܼܢ ܬܘܼܒܼ ܟܠܗܘܿܢ ܚܲܫܹ̈ܐ ܠܓܼܵܘ ܢܲܦܫܵܐ: ܐܲܝܠܹܝܢ
                ܕܲܚܕܼܸܵܐ ܙܒܲܢ ܐܸܙܕܟܼܝܼܘ ܗ̄ܘ̣ܵܘ ܘܲܢܦܲܩ̣ܘ ܡܸܢܵܗ̇܀ ܥܢܵܢܵܐ ܙܥܘܿܪܬܵܐ:
                ܡܚܲܦܝܵܐ ܐܸܤܦܹܪܵܐ. ܘܫܸܡܫܵܐ ܕܒܼܵܬܼܪܵܗ̇: ܨܲܚܝܝܼܚ ܤܲܓܿܝܼ. ܘܩܘܼܛܵܥܵܐ
                ܙܥܘܿܪܵܐ: ܡܟܲܤܸܐ ܠܢܲܦܫܵܐ. ܘܚܲܕܼܘܼܬܼܵܐ ܕܡ̣ܢ ܒܵܬܼܪܹܗ: ܝܲܬܿܝܼܪ ܦܨܝܼܚܵܐ.
                ܙܲܡܵܪܵܐ ܕܙܵܡܲܪ ܐܲܒܿܘܼܒܼܵܐ: ܡ̣ܢ ܩܵܠ ܩܝܼ̈ܢܵܬܹܗ ܠܵܐ ܡܸܬܿܬܲܪܤܸܐ.
                ܘܡܵܐ ܕܐܲܪܦ̣ܝܼ ܙܡܵܪܹܗ: ܝܲܬܝܼܪ ܟܲܦܢܵܐ ܟܲܪܤܹܐ. ܘܚܲܠܝܘܼܬܼܵܐ ܕܡܸܠܹ̈ܐ
                ܕܠܵܐ ܥ̇ܒܼܵܕܹ̈ܐ: ܠܵܐ ܡܤܲܒܿܥܵܐ. ܘܡܵܐ ܕܫܲܢܝܼ ܡܸܢܗܹܝܢ ܒܲܪܢܵܫܵܐ: ܝܲܬܝܼܪ
                ܒܵܗܹ̇ܬܼ. ܐܲܟܼܙܢܵܐ ܕܠܵܐ ܡܲܨܝܵܐ ܕܐ̄ܢܵܫ ܢܸܫܬܸܐ ܚܲܡܪܵܐ: ܘܠܵܐ ܢܵܦܲ݁ܚ
                ܪܹܝܚܵܐ ܡ̣ܢ ܦܘܼܡܹܗ: ܗܵܟܲܢܵܐ ܠܵܐ ܡܲܨܝܵܐ ܕܢܸܫܬܘܸܐ ܐ̄ܢܵܫ ܠܲܝܵܚܵܐ
                
                 329 
                
                ܪܘܼܚܵܢܵܐ ܒܕܼܘܼܒܵܪܹܗ: ܘܫܘܼܚܠܵܦܵܐ ܕܨܸܒܼ̈ܘܵܬܹܗ ܠܵܐ ܡܸܫܬܵܘܕܲܥ
                ܠܚܲܟܿܝܼ̈ܡܹܐ. ܠܸܒܵܐ ܕܩܲܒܸܿܠ̣ ܙܲܪܥܵܐ ܫܡܲܝܵܢܵܐ: ܡܫܲܓܼܢܲܝ ܒܡܲܡܠܠܹܗ:
                ܡܫܲܓܼܢܲܝ ܒܬܲܪܥܝܼܬܹܗ: ܡܫܲܓܼܢܲܝ ܒܕܼܘܼܒܵܪܹܗ: ܡܫܲܓܼܢܲܝ ܒܪܸ̈ܓܼܫܵܘܗܝ.
                ܘܲܒܼܟܼܠܡܸܕܸܡ ܕܝܼܠܹܗ: ܡܫܲܚܠܲܦ ܡ̣ܢ ܫܲܪܟܵܐ ܕܲܒܼܢܲܝ̈ܢܵܫܵܐ ܫܚܝܼ̈ܡܹܐ.
                ܘܐܲܝܟܼ ܐ̄ܢܵܫ ܕܕܲܡܝܼܟܼ ܗ̄ܘ̣ܵܐ: ܘܢܵܕܼ ܡ̣ܢ ܫܸܢܬܼܵܐ. ܠܡܹܠܹ̈ܐ ܐ̄ܪ̈ܵܙܵܢܵܝܵܬܼܵܐ
                ܕܒܲܟܼܬܼܵܒܹ̈ܐ: ܕܠܵܐ ܨܠܘܿܬܼܵܐ ܘܫܸܐܠܲܬܼ ܥܘܼܕܼܪܵܢܵܐ ܕܡ̣ܢ ܐܲܠܵܗܵܐ ܠܵܐ
                ܬܸܩܪܘܿܒܼ: ܟܲܕܼ ܐܵܡܲ݁ܪ ܐܲܢ̄ܬܿ: ܡܵܪܝܵܐ ܗܲܒܼܠܝܼ ܕܐܸܤܲܒܼ ܪܓܸܫܬܼܵܐ
                ܕܚܲܝܠܵܐ ܕܲܒܼܗܹܝܢ. ܩܠܝܼ̈ܕܹܐ ܕܤܘܼ̈ܟܵܠܹܐ ܕܲܫܪܵܪܵܐ ܒܲܟܼܬܼܵܒܼܵܐ: ܨܠܘܼܬܼܵܐ
                ܫܚܘܿܒܼ ܠܵܟܼ ܕܐܝܼܬܹܝܗ̇܀
                	ܐܸܡܲܬܼܝ ܕܨܵܒܹ̇ܐ ܐܲܢ̄ܬܿ ܕܬܸܬܼܩܲܪܲܒܼ ܒܠܸܒܵܟܼ ܠܘܵܬܼ ܐܲܠܵܗܵܐ:
                ܠܘܼܩܕܲܡ ܒܦܲܓܼܪ̈ܵܢܵܝܵܬܼܵܐ ܚܵܘܵܐ ܠܹܗ ܚܘܼܒܵܐ. ܡ̣ܢ ܗܵܪܟܵܐ ܐܝܼܬܼܵܘܗܝ
                ܫܘܼܪܵܝܵܐ ܕܕܘܼܒܵܪܵܐ. ܪܵܘܪܒܼܵܐܝܼܬܼ ܓܹܝܪ ܡܸܬܼܩܲܪܲܒܼ ܠܸܒܵܐ ܠܘܵܬܼ ܐܲܠܵܗܵܐ:
                ܒܤܘܼܪܵܩܵܐ ܕܤܘܼܢܩܵܢ ܚܫܲܚܬܼܵܐ ܕܒܲܚܕܼܵܐ: ܘܢܘܼܩܵܦܵܐ ܕܲܠܥܲܡ̈ܠܹܐ. ܐܵܦ
                ܡܵܪܲܢ: ܡ̣ܢ ܗܵܪܟܵܐ ܥ̣ܒܲܕܼ ܫܲܬܼܐܸܤܬܵܐ ܠܲܓܼܡܝܼܪܘܼܬܼܵܐ. ܠܚܸܫܟܵܐ
                ܕܢܲܦܫܵܐ ܚܫܘܿܒܼ ܠܵܟܼ ܕܐܝܼܬܼܵܘܗܝ ܫܘܼܪܵܝܵܐ: ܒܸܛܠܵܢܵܐ. ܚܸܫܟܵܐ ܥܲܠ
                ܚܸܫܟܵܐ: ܥܸܢܝܵܢܵܐ ܕܡܲܡܠܠܵܐ. ܘܥܸܠܬܵܐ ܠܩܲܕܼܡܵܝܵܐ: ܬܪܲܝܵܢܵܐ. ܐܵܦ
                ܡܸܠܹ̈ܐ ܡܵܘܬܿܪ̈ܵܢܝܵܬܼܵܐ ܕܠܵܐ ܬܚܘܼܡܵܐ: ܚܸܫܟܵܐ ܥܵܒܼ̈ܕܵܢ. ܡܸܙܕܲܠܠܵܐ
                ܠܵܗ̇ ܢܲܦܫܵܐ ܒܥܸܢܝܵܢܵܐ ܝܲܬܝܼܪܵܐ: ܐܵܦܸܢ ܢܸܗܘܸܐ ܕܲܠܕܼܸܚܠܲܬܼ ܐܲܠܵܗܵܐ
                ܐܝܼܬܼܵܘܗܝ ܥܘܼܬܵܕܼܵܐ: ܘܲܙܢܵܐ ܕܩܘܼܪܵܒܼܵܐ. ܡܙܝܝܼܥܵܢܵܐ ܠܕܼܘܼܘܵܕܼܵܐ ܚܫܘܿܒܼ
                ܠܵܟܼ ܕܐܝܼܬܼܵܘܗܝ: ܚܸܫܟܵܐ ܢܲܦܫܵܢܵܝܵܐ. ܚܸܫܟܵܐ ܕܹܝܢ ܒܢܲܦܫܵܐ: ܡ̣ܢ ܠܵܐ
                ܡܛܲܟܿܤܘܼܬܼܵܐ ܕܕܼܘܼܒܵܪܹ̈ܐ܀ ܡܫܘܼܚܬܼܵܐ ܘܙܲܒܼܢܵܐ ܒܕܼܘܼܒܵܪܵܐ: ܡܲܢܗܪ̈ܵܢܹܐ
                
                 330 
                
                ܕܪܸܥܵܝܵܐ ܘܕܼܵܘܘܿܩܹ̈ܐ ܕܕܼܘܼܘܵܕܼܵܐ. ܡܵܐ ܕܡܸܬܼܒܲܠܒܲܠ ܪܸܥܵܝܵܢܵܐ ܡ̣ܢ ܠܵܐ
                ܡܛܲܟܿܤܘܼܬܼܵܐ: ܚܵܫܹ̇ܟܼ. ܘܡܵܐ ܕܲܚܫܵܟܼ: ܡܸܬܿܕܵܘܕܼܵܐ ܢܲܦܫܵܐ. ܫܲܝܢܵܐ:
                ܡ̣ܢ ܡܛܲܟܿܤܘܼܬܼܵܐ ܗܵܘܹ̇ܿܐ. ܘܢܘܼܗܪܵܐ: ܡ̣ܢ ܫܲܝܢܵܐ ܒܢܲܦܫܵܐ ܡܸܬܼܝܼܠܸܕܼ.
                ܘܡ̣ܢ ܫܲܝܢܵܐ: ܐܵܐܲܪ ܦܨܝܼܚܵܐ ܒܪܸܥܝܵܢܵܐ. ܒܡܲܬܼܩܵܠܵܐ ܕܡܸܬܼܩܲܪܲܒܼ ܠܸܒܵܐ
                ܠܚܸܟܼܡܬܼܵܐ: ܗܵܟܲܢܵܐ ܡܩܲܒܸܠ ܚܲܕܼܘܼܬܼܵܐ ܕܒܲܐܠܵܗܵܐ. ܦܘܼܪܫܵܢܵܐ ܕܚܸܟܼܡܬܼܵܐ
                ܕܪܘܼܚܵܐ: ܡ̣ܢ ܗܵܝ̇ ܕܥܵܠܡܵܐ ܡܲܪܓܸܫ ܐܲܢ̄ܬܿ ܒܢܲܦܫܵܟܼ. ܒܗܵܝ̇ ܡ̇ܢ:
                ܫܸܬܼܩܵܐ ܡܲܡܠܸܟܼ ܥܲܠ ܢܲܦܫܵܟܼ. ܒܗܵܕܹܐ ܕܹܝܢ: ܡܲܒܿܘܼܥܵܐ ܕܦܸܗܝܵܐ
                ܬܸܗܘܸܐ. ܘܒܼܵܬܲܪ ܫܟܼܵܚܬܼܵܐ ܕܩܲܕܼܡܵܝܬܼܵܐ: ܡܸܬܼܡܠܸܐ ܐܲܢ̄ܬܿ ܡܘܼܟܵܟܼܵܐ
                ܤܲܓܝܼܐܵܐ. ܘܲܒܼܗܝܼܠܘܼܬܼܵܐ: ܘܫܲܝܢܵܐ ܕܡܲܡܠܸܟܼ ܒܟܼܠܗܘܿܢ ܚܘܼܫܵܒܲܝ̈ܟ:
                ܘܗܲܕܲܡܲܝܝ̈ܟ ܕܐܸܬܼܒܗܸܠܘ: ܘܲܫܠܝܼܘ ܡ̣ܢ ܬܲܙܝܼܙܘܼܬܼܵܐ ܘܕܼܘܼܘܵܕܼܵܐ. ܒܵܬܲܪ
                ܫܟܼܵܚܬܼܵܐ ܕܲܬܼܪܲܝܵܢܝܼܬܼܵܐ: ܩܵܢܹܐ ܐܲܢ̄ܬܿ ܡܲܤܒܿܪܵܢܘܼܬܼܵܐ ܒܬܲܪܥܝܼܬܼܵܟܼ:
                ܘܚܲܘܼ̈ܫܵܒܹܐ ܡܫܵܚ̈ܠ̱ܦܹܐ ܕܠܵܐ ܡܸܬܼܡܲܠܠܝܼܢ: ܘܕܼܘܼܥܵܪܵܐ ܕܗܵܘܢܵܐ:
                ܘܪܸ̈ܓܼܫܲܝܟ ܕܗܵܘܹ̇ܝܢ ܬܲܙܝܼܙܝܼܢ ܘܝܲܨܝܼܦܝܼܢ܀