Discourse 46

ܠܵܐ ܬܸܤܒܲܪ ܠܵܟܼ ܕܡܸܬܼܩܲܪܲܒܼ ܠܦܵܪܹܗ̄ܤܝܼܵܐ ܕܒܲܨܠܘܿܬܼܵܐ ܩܕܼܵܡ ܐܲܠܵܗܵܐ: ܒܲܪܢܵܫܵܐ ܕܐܲܤܝܼܪ ܒܦܲܓܼܪ̈ܵܢܵܝܵܬܼܵܐ. ܢܲܦܫܵܐ ܚܲܤܘܼܟܼܬܼܵܢܝܼܵܬܵܐ: ܡܸܬܼܓܲܠܙܵܐ ܡ̣ܢ ܚܸܟܼܡܬܵܐ. ܘܐܲܝܕܵܐ ܕܡܸܬܼܪܲܚܡܵܐ: ܡܸܬܼܚܲܟܿܡܵܐ ܡ̣ܢ ܪܘܼܚܵܐ. ܐܲܝܟܼ ܡܸܫܚܵܐ ܠܕܸܠܩܹܗ ܕܠܲܡܦܹܝܕܼܵܐ: ܗܵܟܲܢܵܐ ܪ̈ܲܚܡܹܐ ܠܝܼܕܲܥܬܼܵܐ ܡܬܲܪܤܹܝܢ ܒܓܼܵܘ ܢܲܦܫܵܐ܀ ܩܠܝܼܕܼܵܐ ܕܫܘܼ̈ܟܵܢܹܐ ܐܲܠܵܗܵܝܹ̈ܐ ܠܠܸܒܵܐ: ܒܝܲܕܼ ܕܘܼܒܵܐ ܕܩܲܪܝܼܒܼܵܐ ܡܸܬܼܝܼܗܸܒܼ܀ ܒܡܲܬܼܩܵܠܵܐ ܕܡܸܫܬܿܪܸܐ ܠܸܒܵܐ pb. 331 ܡ̣ܢ ܐܲܤܘܼܪܹ̈ܐ ܕܲܒܼܦܲܓܼܪܵܐ: ܒܹܗ ܒܲܙܢܵܐ ܡܸܬܼܦܬܲܚ ܩܕܼܵܡܵܘܗܝ ܬܲܪܥܵܐ ܠܝܼܕܲܥܬܼܵܐ. ܡܲܥܒܲܪܬܵܐ ܕܢܲܦܫܵܐ ܡ̣ܢ ܥܵܠܡܵܐ ܠܥܵܠܡܵܐ: ܒܲܡܩܲܒܿܠܵܢܘܼܬܼܵܐ ܕܤܘܼ̈ܟܵܠܹܐ ܤܝܼܡ ܠܵܟܼ ܕܐܝܼܬܹܝܗ̇. ܫܒܼܝܼܚ ܘܲܡܝܲܬܲܪ ܚܘܼܒܵܐ ܕܩܲܪܝܼܒܼܵܐ: ܐܸܠܵܐ ܐܸܡܲܬܼܝ ܕܠܵܐ ܡܕܼܵܘܸܕܼ ܠܲܢ ܡ̣ܢ ܚܘܼܒܵܐ ܕܐܲܠܵܗܵܐ ܒܡܲܪܢܝܼܬܹܗ. ܒܲܤܝܼܡ ܗ̄ܘ̣ ܥܸܢܝܵܢܵܐ ܕܐܲܝܲܚܝ̈ܢ ܪ̈ܘܼܚܵܢܵܝܹܐ: ܐܸܠܵܐ ܕܟܲܕܼ ܡܲܨܝܵܐ ܗ̄ܘ̣ܵܬܼ ܕܥܲܡܹܗ ܢܸܛܲܪ: ܗܵܘ̇ ܕܥܲܡ ܡܵܪܲܢ: ܫܲܦܝܼܪ ܡܵܕܹܝܢ ܫܩܵܠܛܲܥܢܵܐ ܕܗܵܠܹܝܢ: ܥܕܲܡܵܐ ܠܐܲܝܟܵܐ ܕܦܵܩ̇ܕܵܐ ܘܵܠܝܼܬܼܵܐ. ܗܵܢܵܘ ܕܹܝܢ: ܥܕܲܡܵܐ ܕܡ̣ܢ ܦܘܼܠܚܵܢܵܐ ܟܲܤܝܵܐ ܘܥܸܢܝܵܢܵܐ ܐܲܡܝܼܪܵܐ ܕܒܲܐܠܵܗܵܐ: ܠܵܐ ܢܸܦܸܠ ܒܥܸܠ̈ܠܵܬܹܗ. ܕܘܼܘܵܕܼܵܐ ܕܲܬܼܪܲܝܵܢܵܐ: ܩܘܼܝܵܡܵܐ ܕܩܲܕܼܡܵܝܵܐ. ܠܵܐ ܤܵܦܹ̇ܿܩ ܗܵܘܢܵܐ ܠܲܬܼܪܹܝܢ ܥܸܢܝܵܢ̈ܝܼܢ܀ ܚܙܵܬܼܵܐ ܕܥܵܠܡܵܝܹ̈ܐ: ܫܵܓܼܫܵܐ ܠܢܲܦܫܵܐ ܕܟܸܦܪܲܬ̤ ܚܕܼܵܐ ܙܒܲܢ ܒܕܼܝܼܠܗܘܿܢ: ܡܸܛܠ ܦܘܼܠܚܵܢܵܐ ܕܒܲܐܠܵܗܵܐ. ܕܗܵܢܘܿܢ ܡ̇ܢ: ܐܲܡܝܼܢܘܼܬܼ ܥܸܢܝܵܢܵܐ. ܕܗܵܠܹܝܢ ܕܹܝܢ: ܐܵܦ ܒܲܪܵܢܵܝܘܼܬܼ ܚܙܵܬܼܵܐ. ܠܥܲܡ̈ܠܹܐ ܦܲܓܼܪ̈ܵܢܵܝܹܐ: ܠܵܐ ܡܥܵܘܟܼܝܼܢ ܦܸܓܼܥܹ̈ܐ ܕܲܒܼܪܸ̈ܓܼܫܹܐ. ܐܲܝܢܵܐ ܦܘܼܠܚܵܢܵܐ: ܐܵܦ ܒܢ̈ܵܬܼ ܩܵܠܹ̈ܐ ܕܠܵܐ ܚܸܙܘܵܐ: ܡܕܼܵܘ̈ܕܼܵܢ ܠܢܝܼܚܘܼܬܼܵܐ ܕܠܸܒܹܗ. ܡܝܼܬܼܘܼܬܼܵܐ ܓܵܘܵܝܬܼܵܐ ܥܲܡ ܠܵܐ ܒܘܼܛܵܠܵܐ ܕܪܸ̈ܓܼܫܹܐ: ܠܵܐ ܡܸܬܼܩܲܝܡܵܐ. ܕܘܼܒܵܪܵܐ ܦܲܓܼܪܵܢܵܝܵܐ: ܥܝܼܪܘܼܬܼܵܐ ܕܪܸ̈ܓܼܫܹܐ ܒܵܥܹ̇ܐ. ܕܘܼܒܵܪܵܐ ܢܲܦܫܵܢܵܝܵܐ: ܥܝܼܪܘܼܬܼܵܐ ܕܠܸܒܵܐ. ܐܲܝܟܼ ܕܲܡܝܲܬܿܪܵܐ ܒܲܟܼܝܵܢܵܗ̇ ܢܲܦܫܵܐ ܡ̣ܢ ܦܲܓܼܪܵܐ: ܗܵܟܲܢܵܐ ܡܝܲܬܲܪ ܦܘܼܠܚܵܢܵܗ̇ ܕܢܲܦܫܵܐ ܡ̣ܢ ܕܘܼܒܵܪܵܐ ܕܦܲܕܼܪܵܐ. ܘܐܲܝܟܼ ܕܩܲܕܝܼܡ ܗ̄ܘ̣ ܒܲܗܘܵܝܹܗ ܦܲܓܼܪܵܐ ܡ̣ܢ ܢܲܦܫܵܐ: ܗܵܟܲܢܵܐ ܙܸܕܼܩܹ̈ܐ ܦܲܓܼܪ̈ܵܢܵܝܹܐ ܠܦܘܼܠܚܵܢܵܐ ܢܲܦܫܵܢܵܝܵܐ. ܪܲܒܿܘܼ ܚܲܝܠܵܐ ܕܕܼܘܼܒܵܪܵܐ ܙܥܘܿܪܵܐ: ܟܲܕܼ ܥܲܡ ܐܲܡܝܼܢܘܼܬܼܵܐ ܐܲܤܝܼܪ. ܢܘܼܛܦܬܼܵܐ ܪܲܟܿܝܼܟܼܬܼܵܐ ܡܸܛܠ pb. 332 ܐܲܡܝܼܢܘܼܬܼܵܗ̇: ܐܵܦ ܠܫܘܿܥܹ̈ܐ ܩܫܲܝ̈ܵܐ ܢܸܩܒܲܬ̤. ܐܸܡܲܬܼܝ ܕܩܲܪܝܼܒܼ ܕܢܸܬܼܢܲܚܲܡ ܒܵܟܼ ܒܲܪܢܵܫܵܐ ܗܵܘ̇ ܕܪܘܼܚ: ܡܝܼܬܼܘܼܬܼܵܐ ܕܡ̣ܢ ܟܠ ܢܵܒܼܗܵܐ ܒܵܟܼ. ܘܪܵܬܼܚܵܐ ܢܲܦܫܵܟܼ ܒܚܲܕܼܘܼܬܼܵܐ: ܕܠܲܝܬܼ ܠܵܗ̇ ܦܸܚܡܵܐ ܒܲܥܒܼܝܼ̈ܕܹܐ. ܘܩܵܦ̇ܤܝܼܢ ܚܘܼܫܵܒܲܝ̈ܟ ܠܓܼܵܘ ܡܸܢܵܟܼ: ܒܚܲܠܝܘܼܬܼܵܐ ܕܲܒܼܠܸܒܵܟܼ. ܡܵܐ ܕܹܝܢ ܕܲܥܬܼܝܼܕܼ ܕܢܸܬܼܢܲܚܲܡ ܒܵܟܸ ܥܵܠܡܵܐ: ܦܸܗܝܵܐ ܕܪܸܥܝܵܢܵܐ ܤܵܓܹ̇ܐ ܒܵܟܼ. ܘܬܲܪܥܝܼܬܼܵܐ ܙܥܘܿܪܬܵܐ: ܘܲܕܼܠܵܐ ܩܵܘܡܵܐ. ܥܵܠܡܵܐ ܩܵܪܹܐ ܐ̄ܢܵܐ: ܠܚܲܫܹ̈ܐ ܕܒܼܵܛܹ̇ܐ ܠܗܘܿܢ ܦܸܗܝܵܐ. ܘܡܵܐ ܕܐܸܬܼܝܼܠܸܕܼܘ ܘܐܸܫܬܲܡܠܝܼܘ: ܗܵܘܹ̇ܝܢ ܚܛܝܼܬܼܵܐ: ܘܩܵܛ̇ܠܝܼܢ ܠܒܲܪܢܵܫܵܐ. ܐܲܝܟܲܢܵܐ ܕܠܵܐ ܡܸܬܼܝܲܠܕܝܼܢ ܒܢܲܝ̈ܵܐ ܕܠܵܐ ܐܸܡܵܐ: ܗܵܟܲܢܵܐ ܠܵܐ ܡܸܬܼܝܠܕܝܼܢ ܚܲܫܹ̈ܐ: ܒܸܠܥܵܕܼ ܦܸܗܝܵܐ ܕܪܸܥܝܵܢܵܐ. ܘܠܵܐ ܫܘܼܡܵܠܝ ܚܛܝܼܬܼܵܐ: ܒܸܠܥܵܕܼ ܥܸܢܝܵܢ ܚܲܫܹ̈ܐ. ܐܸܡܲܬܸܼܝ ܕܬܸܤܓܸܐ ܡܤܲܝܒܿܪܵܢܘܼܬܼܵܐ ܒܢܲܦܫܲܢ: ܐܵܬܼ̈ܐ ܗ̣̄ܝ ܕܢܸܤܒܲܬ̤ ܠܵܗ̇ ܡܵܘܗܲܒܼܬܼܵܐ ܕܒܼܘܼܝܵܐܵܐ ܒܟܸܤܝܵܐ. ܥܲܫܝܼܢ ܗ̄ܘ̣ ܚܲܝܠܵܐ ܕܲܡܤܲܝܒܿܪܵܢܘܼܬܼܵܐ: ܡ̣ܢ ܢܸܒܼܗܹ̈ܐ ܕܚܲܕܼܘܼܬܼܵܐ ܕܢܵܨ̇ܦܵܐ ܒܠܸܒܵܐ. ܚܲܝܹ̈ܐ ܕܒܲܐܠܵܗܵܐ: ܡܲܦܘܼܠܬܼܵܐ ܕܪܸ̈ܓܼܫܹܐ. ܡܵܐ ܕܲܚܝ̣ܵܐ ܠܸܒܵܐ: ܢܦܲܠ̣ܘ ܪܸ̈ܓܼܫܹܐ. ܢܘܼܚܵܡܵܐ ܕܪܸ̈ܓܼܫܹܐ: ܡܵܘܬܵܐ ܕܠܸܒܵܐ. ܡܵܐ ܕܐܸܬܼܢܲܚܲܡܘ ܪܸ̈ܓܼܫܹܐ: ܐܵܬ̤ܿܐ ܗ̣̄ܝ ܕܡܝܼܬܼܘܼܬܼܵܐ ܕܠܸܒܵܐ ܕܡ̣ܢ ܐܲܠܵܗܵܐ. ܒܲܡܝܲܬܿܪ̈ܵܬܼܵܐ ܕܒܹܝܬܼ ܒܢܲܝ̈ܢܵܫܵܐ ܡܸܬܼܩܲܠ̈ܚܵܢ: ܠܵܐ ܫܵܩ̇ܠܵܐ ܬܹܐܪܬܵܐ ܬܘܼܪܵܨܵܐ. ܡܝܲܬܿܪܘܼܬܼܵܐ ܕܒܲܐ̄ܚܪ̈ܵܢܹܐ ܦܵܠܲܚ ܐ̄ܢܵܫ: ܠܵܐ ܡܲܨܝܵܐ ܡܕܲܟܿܝܵܐ ܠܢܲܦܫܵܐ. ܠܐܲܓܼܪܵܐ ܡ̇ܢ ܘܲܠܦܘܼܪܥܵܢܵܐ: ܡܸܬܼܚܲܫܒܵܐ ܩܕܼܵܡ ܐܲܠܵܗܵܐ. ܐܲܝܕܵܐ ܕܹܝܢ ܕܒܲܩܢܘܿܡܹܗ ܦܵܠܲܚ ܐ̄ܢܵܫ: ܬܲܪ̈ܬܲܝܗܹܝܢ ܡܡܲܠܝܵܐ. ܘܲܠܦܘܼܪܥܵܢܵܐ ܡܸܬܼܚܲܫܒܵܐ: ܘܕܲܟܼܝܘܼܬܼܵܐ ܥܵܒܹ̇ܕܵܐ. ܡܸܛܠܗܵܢܵܐ ܤܛܝܼ ܡ̣ܢ ܩܲܕܼܡܵܝܬܵܐ: ܒܝܲܕܼ ܢܸܩܦܵܐ ܕܬܲܪܬܹܝܢ. ܒܸܠܥܵܕܼ ܐܘܼܟܼܦܵܢܵܐ ܕܲܒܼܗܵܕܹܐ: ܦܵܘܫܵܐ ܕܡ̣ܢ pb. 333 ܗܵܝ̇: ܡܲܦܘܼܠܬܵܐ ܓܠܝܼܬܼܵܐ ܕܡ̣ܢ ܐܲܠܵܗܵܐ. ܬܪܲܝܵܢܝܼܬܼܵܐ ܕܹܝܢ: ܘܕܼܘܼܟܲܬܼ ܩܲܕܼܡܵܝܬܵܐ ܡܡܲܠܝܵܐ: ܐܵܦ ܒܠܵܐ ܦܘܼܠܚܵܢܵܗ̇. ܗ̤ܘܝܼ ܡܝܼܬܼܵܐ ܒܚܲܝܹ̈ܐ: ܕܬܸܗܘܸܐ ܡܚܲܪܪܵܐ ܒܡܝܼܬܼܘܼܬܼܵܟܼ. ܗ̤ܘܝܼ ܡܝܼܬܼܵܐ ܠܥܵܠܡܵܐ: ܕܬܸܗܘܸܐ ܡܚܲܪܪܵܐ ܡ̣ܢ ܢܵܘܡܘܿܤܹ̈ܐ. ܕܐܲܝܠܹܝܢ ܕܲܒܼܗܘܿܢ ܐܸܬܿܕܲܒܲܪܘ: ܘܠܵܐ ܚܲܕܼ ܡܸܢܗܘܿܢ ܡܲܛܝܼ ܠܫܘܼܡܠܵܝܗܘܿܢ: ܒܗܵܠܹܝܢ ܚܲܝܹ̈ܐ. ܡܝܼܬܼܵܐ ܚܲܝܵܐ ܐܸܬܼܚܲܪܲܪ ܟܲܕܼ ܚܲܝ: ܘܲܚ̣ܝܵܐ ܟܲܕܼ ܡܝܼܬܼ܀ ܫܩܵܠܛܲܥܢܵܐ ܕܥܲܠ ܨܸܒܼܬܵܐ ܕܡܸܠܹ̈ܐ: ܫܚܝܼܡܘܼܬܼܵܐ ܕܠܸܒܵܐ ܕܡ̣ܢ ܐܲܠܵܗܵܐ ܬܸܤܬܲܟܲܠ܀ ܢܲܦܫܵܐ ܕܐܲܪܓܫܲܬ̤ ܒܚܲܝܹ̈ܐ ܕܲܠܥܸܠ ܡ̣ܢ ܦܲܓܼܪܵܐ: ܠܵܐ ܡܸܨܛܲܒܿܬܵܐ ܠܥܵܠܡܵܐ. ܠܡܲܚܤܸܢ ܡܸܫܟܲܚ ܒܲܪܢܵܫܵܐ ܒܸܠܵܕܼ ܫܟܼܵܚܬܵܐ ܕܗܵܠܹܝܢ: ܒܗܵܢܹܝܢ ܠܡܸܒܼܤܵܐ. ܓܡܝܼܪܵܐܝܼܬܼ ܕܹܝܢ: ܘܠܵܐ ܠܲܓܼܡܵܪ. ܘܐܲܝܢܵܐ ܕܥܵܨܹ̇ܐ: ܐܵܓܼܘܿܢܵܐ ܪܲܒܵܐ ܡܙܝܼܥ ܥܲܠ ܝܵܬܹܗ. ܥܲܡ ܫܟܼܵܚܬܵܐ ܕܗܵܠܹܝܢ: ܕܠܵܐ ܐܵܓܼܘܿܢܵܐ ܡܸܫܟܲܚ ܟܵܦܲܪ ܒܗܵܢܹܝܢ. ܢܵܚܝܹ̈ܐ ܘܒܸܛܠܵܢܵܐ: ܐܲܒܼܕܵܢܵܐ ܐܸܢܘܿܢ ܕܢܲܦ̈ܫܵܬܵܐ. ܐܵܦ ܝܲܬܝܼܪ ܡ̣ܢ ܫܹܐܕܹ̈ܐ: ܤܵܦ̇ܩܝܼܢ ܕܲܢܤܲܓܿܦܘܼܢ ܗܵܠܹܝܢ. ܫܹܐܕܹ̈ܐ ܕܹܝܢ ܐܲܝܟܵܐ ܕܐܝܼܬܹܝܗ̇ ܢܲܦܫܵܐ ܕܲܒܼܢܘܼܗܪܵܐ ܫܲܪܝܵܐ: ܒܥܲܡ̈ܠܹܐ ܫܒܼܝܼܚܹ̈ܐ ܕܛܵܒܼ̈ܬܵܐ: ܕܢܲܥܒܿܕܼܘܼܢ ܬܲܡܵܢ: ܠܵܐ ܡܸܫܟܿܚܝܼܢ. ܢܲܦܫܵܐ ܕܹܝܢ ܕܚܲܫܝܼܟܼܵܐ: ܐܵܦ ܠܫܹ̈ܐܕܹܐ ܗܲܕܿܝܵܚܵܐ ܗܵܘ̇ܝܵܐ ܗ̤ܝ ܒܵܗ̇: ܠܡܘܼܠܵܝܵܐ ܕܟܼܠ ܒܝܼ̈ܫܵܢ. ܦܲܓܼܪܵܐ ܕܲܡܚܝܼܠ: ܟܲܕܼ ܢܸܬܼܥ̱ܨܸܐ ܠܥܲܡ̈ܠܹܐ ܝܲܬܝܼܪܹ̈ܐ: ܚܸܫܟܵܐ ܥܲܠ ܚܸܫܟܵܐ ܟܵܫܹ̇ܐ ܒܢܲܦܫܵܐ. ܘܲܠܕܼܘܼܘܵܕܼܵܐ ܘܥܲܡܛܵܢܵܐ: ܝܲܬܿܝܼܪܵܐܝܼܬܼ ܡܲܝܬܸܐ ܠܵܗ̇. ܓܘܼܫܡܵܐ ܕܹܝܢ ܥܲܒܼܝܵܐ: ܐܵܘ ܟܹܝܬܼ ܫܲܪܝܼܪ ܟܘܼܝܵܢܵܐ: ܐܸܢ ܠܒܸܛܠܵܢܵܐ ܢܸܫܪܲܟܼ ܘܒܲܢܝܵܚܹ̈ܐ ܢܸܤܬܿܡܸܟܼ: ܟܠ ܒܝܼ̈ܫܵܢ ܡܫܲܡܠܸܐ ܒܢܲܦܫܵܐ: ܗܵܝ̇ ܕܒܹܗ ܥܵܡ̇ܪܵܐ. ܘܐܵܦܸܢ ܪܲܒܲܬܼ ܪܲܥܝܵܐ ܒܛܵܒܼܬܼܵܐ: ܒܵܬܲܪ ܩܲܠܝܼܠ ܕܹܝܢ: ܐܵܦ ܗ̤ܝ ܬܲܪܥܝܼܬܼܵܐ ܪܲܥܝܵܐ ܒܛܵܒܼܬܵܐ ܡܚܲܠܸܨ ܡܸܢܵܗ̇. ܐܸܡܲܬܼܝ ܕܹܝܢ ܕܢܲܦܫܵܐ ܪܵܘܝܵܐ ܠܵܗ̇ pb. 334 ܒܚܲܕܼܘܼܬܼܵܐ ܕܲܒܼܪܲܒܼܪܵܗ̇: ܘܲܒܼܗܵܘ̇ ܪܘܵܙܵܐ ܕܒܲܐܠܵܗܵܐ: ܦܲܓܼܪܵܐ ܠܵܐ ܡܲܪܓܫܵܢܵܐ ܗܵܘܹ̇ܐ ܒܐ̈ܘܼܠܨܵܢܹܐ: ܐܵܦܸܢ ܡܫܲܦܠܵܐ ܗ̄ܘ̣. ܛܵܥܹ̇ܢ ܓܹܝܪ ܝܘܼܩܪܵܐ ܥܦܝܼܦܵܐ: ܘܠܵܐ ܠܵܐܹ̇ܐ. ܐܲܝܟܼ ܗܵܘ̇ ܕܡܸܬܼܦܲܛܲܡ ܓܹܝܪ: ܘܡܸܤܬܿܡܸܟܼ ܗ̤ܘ ܦܲܓܼܪܵܐ ܒܒܼܘܼܤܵܡܵܗ̇ ܕܢܲܦܫܵܐ: ܐܵܦܸܢ ܡܫܲܦܲܠ: ܐܸܡܲܬܼܝ ܕܢܲܦܫܵܐ ܥܵܐ̇ܠܵܐ ܠܗܵܝ̇ ܚܲܕܼܘܼܬܑܵܐ ܕܲܒܼܪܘܼܚ. ܐܸܢ ܠܸܫܵܢܵܟܼ ܬܸܛܲܪ ܐܲܚܝ: ܡܸܬܼܝܲܗܒܵܐ ܠܵܟܼ ܡ̣ܢ ܐܲܠܵܗܵܐ ܡܵܘܗܲܒܼܬܼܵܐ: ܚܲܫܝܼܫܘܼܬܼܵܐ ܕܠܸܒܵܐ: ܠܡܸܚܙܵܐ ܒܵܗ̇ ܢܲܦܫܵܟܼ. ܘܒܼܵܗ̇ ܒܗܵܕܹܐ: ܠܚܲܕܼܘܼܬܼܵܐ ܕܲܒܼܪܘܼܚ ܬܸܥܘܿܠ. ܐܸܢܕܹܝܢ ܗܵܢܵܐ ܢܸܙܟܹܝܼܟܼ: ܐܲܫܲܪ ܠܡܸܕܸܡ ܕܐܵܡܲ݁ܪܢܵܐ: ܕܠܵܐ ܡܸܡܬܼܘܿܡ ܬܲܡܸܕܼ ܢܲܦܫܵܟܼ ܡ̣ܢ ܚܸܫܟܵܐ. ܐܸܢ ܐܲܝܬܿ ܠܵܟܼ ܠܸܒܵܐ ܕܲܟܼܝܵܐ: ܢܸܗܘܸܐ ܠܵܟܼ ܐܵܦܸܢ ܦܘܼܡܵܐ ܕܲܟܼܝܵܐ. ܐܲܝܟܼ ܕܐܸܡ݂ܲܪ ܛܘܼܒܼܵܢܵܐ ܝܘܿܚܲܢܝܼܣ. ܡܵܐ ܕܨܵܒܹ̇ܐ ܐܲܢ̄ܬܿ ܠܐ̄ܢܵܫ ܠܡܲܪܬܵܝܘܼ ܠܫܲܦܝܼܪ̈ܵܬܼܵܐ: ܩܲܕܼܡܵܝܑܬܼ ܩܲܪܸܒܲܝܗܝ ܠܲܢܝܵܚܵܐ ܒܦܲܓܼܪܹܗ: ܘܝܲܗܲܪܲܝܗܝ ܒܡܸܠܬܼܵܐ ܛܥܝܼܢܲܬܼ ܚܘܼܒܵܐ. ܠܲܝܬܿ ܡܸܕܸܡ ܕܗܵܟܲܢ ܡܟܲܚܸܕܼ ܠܐ̄ܢܵܫ: ܘܲܡܦܝܼܣ ܠܹܗ ܕܢܸܫܬܲܚܠܲܦ ܡ̣ܢ ܒܝܼ̈ܫܵܬܵܐ ܠܘܵܬܼ ܛܵܒܼ̈ܬܼܵܐ: ܐܲܝܟܼ ܛܵܒܼܬܵܐ ܦܲܓܼܪܵܢܵܝܬܼܵܐ: ܘܐܝܼܩܵܪܵܐ ܕܚܵܙܹ̇ܐ ܡ̣ܢ ܐ̄ܢܵܫ܀ ܦܝܵܤܵܐ ܬܘܼܒܼ ܕܲܬܼܪܹܝܢ ܐܝܼܬܼܵܘܗ: ܐܘܼܟܼܦܵܢܵܐ ܕܐ̄ܢܵܫ ܥܲܠ ܩܢܘܿܡܹܗ ܠܚܵܘܪܵܐ ܕܲܫܒܼܝܼ̈ܚܵܬܼܵܐ. ܐܲܝܢܵܐ ܕܠܲܩܢܘܿܡܹܗ ܐܸܫܟܲܚ ܩܵܢܹ̇ܐ ܒܝܲܕܼ ܨܠܘܿܬܼܵܐ ܘܲܙܗܝܼܪܘܼܬܼܵܐ: ܠܚܲܒܼܪܹܗ ܦܫܝܼܩܵܐܝܼܬܼ ܡܨܸܐ ܢܵܛܹ̇ܕܼ ܠܚܲܝܹ̈ܐ: ܐܵܦ ܒܸܠܥܵܕܼ ܠܹܐܘܬܼܵܐ ܕܲܒܼܡܸܠܹ̈ܐ ܘܡܲܪܬܿܝܵܢܘܼܬܼܵܐ ܡܸܬܼܪܲܓܼܫܵܢܝܼܬܼܵܐ. ܒܲܤܝܘܼܬܼܵܐ ܕܹܝܢ ܘܪܲܦܝܘܼܬܼܵܐ: ܠܵܘ ܒܲܠܚܘܿܕܼ ܠܲܡܩܲܒܿܠܵܢܲܝ̈ܗܹܝܢ ܡܤܲܓ̈ܦܵܢ: ܐܸܠܵܐ ܐܵܦ ܠܚܲܙܵܝܲܝ̈ܗܹܝܢ. ܕܐ̄ܢܵܫ ܓܹܝܪ ܒܝܲܕܼ ܝܲܨܝܼܦܘܼܬܼܵܐ ܕܥܲܠ ܩܢܘܿܡܹܗ ܢܲܪܡܸܐ ܛܢܵܢܵܐ ܒܚܲܒܼܪ̈ܵܘܗܝ ܠܫܲܦܝܼܪ̈ܵܬܼܵܐ: ܘܲܢܟܲܚܸܕܼ ܠܲܚܙܵܬܹܗ ܠܲܪ̈ܦܲܝܵܐ: ܠܲܝܬܿ ܡܸܠܬܼܵܐ ܕܤܵܦ̇ܩܵܐ ܕܬܸܫܬܲܥܸܐ ܛܘܼܒܹܗ pb. 335 ܕܲܟܼܡܵܐ ܪܲܒܿ܀ ܚܲܝܠܬܼܵܢ ܗ̄ܘ̣ ܫܸܬܼܩܹܗ ܕܤܘܼܥܪܵܢܵܐ ܠܬܼܘܼܪܵܨܵܐ ܕܲܐ̄ܚܪ̈ܵܢܹܐ: ܡ̣ܢ ܝܲܨܝܼܦܘܼܬܼܵܐ ܕܲܒܼܡܸܠܹ̈ܐ ܕܡܸܬܼܩܲܛܪܓܼܵܐ ܡ̣ܢ ܫܲܪܝܘܼܬܼܵܐ ܕܕܼܘܼܒܵܪܹ̈ܐ. ܟܲܕܼ ܕܹܝܢ ܐܲܢ̄ܬܿ ܠܲܩܢܘܿܡܵܟܼ ܬܬܲܪܸܨ: ܠܵܐ ܒܨܝܼܪ ܡܸܬܼܥܲܕܲܪ ܩܲܪܝܼܒܼܵܟܼ܀ ܟܠ ܟܡܵܐ ܕܠܵܐ ܓܼܘܿܢܵܐ ܕܲܚܠܵܦ ܐܲܠܵܗܵܐ ܢܸܥܘܿܠ ܒܲܪܢܵܫܵܐ: ܗܵܟܲܢܵܐ ܠܦܵܪܹܗ̄ܤܝܼܵܐ ܡܸܬܼܩܲܪܲܒܼ ܕܠܸܒܵܐ ܒܲܨܘܿܬܹܗ. ܘܟܼܠ ܟܡܵܐ ܕܡ̣ܢ ܤܲܓܝܼ̈ܐܹܐ ܡܸܬܼܢܓܸܕܼ: ܡ̣ܢ ܥܘܼܕܼܪܵܢܵܐ ܡܸܫܬܲܠܲܚ. ܢܲܦܫܵܐ ܕܫܲܠܝܵܐ ܡ̣ܢ ܕܘܼܥܵܪܵܐ ܕܦܲܓܼܪܵܐ: ܬܸܗܘܸܐ ܡܫܲܝܢܵܐ ܒܙܵܘ̈ܥܹܝܗ̇܀ ܗ̤ܘܝܼ ܒܲܪ ܚܹܐܪܹ̈ܐ ܒܦܲܓܼܪܵܐ: ܕܬܸܫܬܿܘܸܐ ܠܚܹܐܪܘܼܬܼܵܐ ܕܲܒܼܪܘܼܚ. ܗ̤ܘܝܼ ܟܕܼܝܼܢܵܐ ܒܚܹܐܪܘܼܬܼܵܟܼ: ܕܠܵܐ ܬܸܬܼܟܿܕܸܢ ܒܢܝܼܪܵܐ ܕܥܲܒܼܕܘܼܬܼܵܐ ܠܲܒܼܥܸܠܕܒܼܵܒܲܝ̈ܟܼ܀ ܐܸܢ ܚܕܼܵܐ ܙܒܲܢ ܠܗܵܘ̇ ܛܘܼܦܤܵܐ ܕܲܫܪܵܝ ܚܲܝܹ̈ܐ ܕܙܲܒܼܢܵܐ ܩܲܕܼܡܬܿ ܚܵܘܝܼܬܿ ܒܲܩܢܘܿܡܵܟܼ: ܒܝܲܕܼ ܢܵܘܚܵܐ ܕܡ̣ܢ ܗܘܼܦܵܟܲܝ̈ܗܘܿܢ ܬܸܗܘܸܐ ܡܝܼܬܼܵܐ ܕܠܲܓܼܡܵܪ: ܠܬܲܚܘܝܼܬܼܵܐ ܕܗܵܘ̇ ܒܘܼܛܵܠܵܐ ܕܲܥܬܼܝܼܕܼ: ܐܲܝܟܼ ܕܲܥܬܼܝܼܕܼܵܐ ܕܬܸܒܼܛܲܠ ܡܸܢܵܟܼ ܒܝܲܕܼ ܡܵܘܬܵܐ ܝܲܨܝܼܦܘܼܬܼܵܐ ܕܟܼܠܡܸܕܸܡ܀ ܠܵܐ ܬܸܩܨܲܦ ܡ̣ܢ ܢܸܟܼ̈ܝܵܢܹܐ ܕܦܲܓܼܪܵܐ: ܕܲܥܬܼܝܼܕܼ ܗ̄ܘ̣ ܡܵܘܬܵܐ ܕܢܸܤܲܒܼ ܡܸܢܵܟܼ ܓܡܝܼܪܵܐܝܼܬܼ. ܡ̣ܢ ܡܵܘܬܵܐ ܠܵܐ ܬܸܕܼܚܲܠ: ܕܲܥܬܼܝܼܕܼ ܗ̄ܘ̣ ܐܲܠܵܗܵܐ ܕܢܸܥܒܿܕܼܵܟܼ ܠܥܸܠ ܡܸܢܹܗ.