Isaac of Nineveh. “Discourse 47.” Based upon Digital Syriac Corpus. Last modified March 5, 2019. https://syriaccorpus.org/438.
    
        
            
                ܥܲܠ ܡܸܬܿܬܿܙܝܼ̈ܥܵܢܘܵܬܼܵܐ ܡܲܠܲܐܟܼܵܝܵܬܼܵܐ: ܕܲܠܬܲܪܒܿܝܼܬܼܵܐ ܕܢܲܦܫܵܐ ܒܪ̈ܘܼܚܵܢܵܝܵܬܼܵܐ:
                ܡ̣ܢ ܦܘܼܪ̈ܢܵܤܹܐ ܐܲܠܵܗܵܝܹ̈ܐ ܢܵܒܼ̈ܗܵܢ ܒܲܢ. ܡܙ.
                
            
            
                ܙܵܘܥܵܐ ܩܲܕܼܡܵܝܵܐ ܕܡ̣ܢ ܪ̈ܲܚܡܹܐ ܐܲܠܵܗܵܝܹ̈ܐ ܢܵܦܹ̇ܠ ܒܒܲܪܢܵܫܵܐ: ܕܲܠܘܵܬܼ
                ܚܲܝܹ̈ܐ ܢܵܓܹ̇ܕܼ ܠܵܗ̇ ܠܢܲܦܫܵܐ: ܥܲܠ ܥܒܼܘܼܪܝܹܗ ܕܗܵܢܵܐ ܟܝܵܢܵܐ ܢܵܦܹ̇ܠ
                
                 336 
                
                ܒܠܸܒܵܐ. ܠܗܵܢܵܐ ܚܘܼܫܵܒܼܵܐ ܢܵܩ̇ܦܵܐ ܟܝܵܢܵܐܝܼܬܼ: ܒܲܤܝܘܼܬܼܵܐ ܕܥܲܠ ܥܵܠܡܵܐ.
                ܘܡ̣ܢ  ܗܵܪܟܵܐ ܡܫܲܪ̈ܝܵܢ ܒܒܲܪܢܵܫܵܐ: ܠܗܹܝܢ ܡܸܬܿܬܿܙܝܼ̈ܥܵܢܘܵܬܼܵܐ ܫܲܦܝܼܪ̈ܵܬܼܵܐ
                ܕܲܠܘܵܬܼ ܚܲܝܹ̈ܐ ܡܬܲܪ̈ܐܵܢ ܠܹܗ. ܐܲܝܟܼ ܫܲܬܼܐܸܤܬܼܵܐ ܡܸܕܸܡ ܤܵܐܹ̇ܡ
                ܒܒܲܪܢܵܫܵܐ ܚܲܝܠܵܐ ܗܵܘ̇ ܐܲܠܵܗܵܝܵܐ ܕܢܲܩܝܼܦ ܠܹܗ: ܨܵܒܹ̇ܐ ܕܢܸܓܼܠܸܐ
                ܒܹܗ ܚܲܝܹ̈ܐ. ܠܹܗ ܠܗܵܢܵܐ ܙܵܘܥܵܐ ܕܐܸܡ̇ܪܹܬܼ: ܘܐܸܢ ܠܵܐ ܡܕܲܥܸܟܼ ܠܹܗ
                ܒܲܪܢܵܫܵܐ ܒܝܲܕܼ ܢܲܩܝܼܦܘܼܬܼܵܐ ܕܐܲܝܠܹܝܢ ܕܥܵܠܡܵܐ ܗܵܢܵܐ ܘܥܸܢܝܵܢܵܐ ܒܲܛܝܼܠܵܐ:
                ܘܲܡܪܲܒܸܐ ܒܵܗ̇ ܒܢܲܦܫܹܗ ܠܗܵܢܵܐ ܙܵܘܥܵܐ ܒܲܟܼܢܝܼܫܘܼܬܼܵܐ ܐܲܡܝܼܢܬܼܵܐ ܕܥܲܡ
                ܢܲܦܫܹܗ ܘܚܵܘܪܵܐ ܕܒܹܗ: ܠܘܵܬܼ ܗܵܘ̇ ܡܸܕܸܡ ܡܩܲܪܸܒܼ ܠܹܗ: ܕܠܸܫܵܢܵܐ
                ܕܢܸܫܬܲܥܸܐ ܠܵܐ ܡܸܫܟܲܚ. ܠܗܵܢܵܐ ܚܘܼܫܵܒܼܵܐ: ܤܵܛܵܢܵܐ ܪܲܒܲܬܼ ܤܵܢܹ̇ܐ:
                ܘܲܒܼܟܼܠܹܗ ܚܲܝܠܹܗ ܡܸܬܼܟܲܬܲܫ ܕܢܸܥܛܸܐ ܡ̣ܢ ܒܲܪܢܵܫܵܐ. ܘܐܸܢ ܡܲܨܝܵܐ
                ܕܡܲܠܟܿܘܼܬܼܵܐ ܕܟܼܠܵܗ̇ ܐܲܪܥܵܐ ܢܸܬܸܠ ܠܹܗ: ܕܲܒܼܝܲܕܼ ܦܘܼܪ̈ܬܵܟܹܐ ܕܒܼܵܗ̇
                ܢܸܠܚܸܐ ܡ̣ܢ ܪܸܥܝܵܢܹܗ ܠܗܵܢܵܐ ܚܘܼܫܵܒܼܵܐ: ܐ̄ܚܪܹܝܵܐܝܼܬܼ ܠܵܐ ܥܵܒܹ̇ܕܼ.
                ܝܵܕܲܥ ܗ̄ܘ̣ ܓܹܝܪ: ܕܐܸܢ ܗܵܢܵܐ ܥܘܼܗܕܵܢܵܐ ܡܟܲܬܲܪ ܠܘܵܬܹܗ: ܬܘܼܒܼ
                ܪܸܥܝܵܢܹܗ ܒܐܲܪܥܵܐ ܗܵܕܹܐ ܕܛܵܥܝܘܼܬܼܵܐ ܠܵܐ ܡܩܵܘܸܐ. ܘܦܘܼܪ̈ܤܹܐ ܕܝܼܠܹܗ:
                ܠܘܵܬܹܗ ܠܵܐ ܡܸܬܼܩܲܪܒܼܝܼܢ܀ ܙܵܘ̈ܥܹܐ ܢܘܼܪ̈ܵܢܹܐ ܠܒܼܝܼܫܵܐ ܚܙܵܬܼܵܐ ܗܵܕܹܐ.
                ܘܬܼܘܼܒܼ ܒܥܵܠܡܵܐ: ܠܵܐ ܡܸܬܼܒܲܩܸܐ ܐܲܝܢܵܐ ܕܫܲܩܠ̣ܵܗ̇. ܘܲܠܘܵܬܼ ܦܲܓܼܪܵܐ:
                ܠܵܐ ܡܟܲܬܲܪ.
                	ܫܲܪܝܼܪܵܐܝܼܬܼ ܚܲܒܿܝܼ̈ܒܲܝ: ܕܐܸܢ ܐܲܠܵܗܵܐ ܫܵܒܹ̇ܩ ܠܗܵܕܹܐ ܚܲܬܝܼܬܼܘܼܬܼ
                ܚܙܵܬܼܵܐ ܠܘܵܬܼ ܒܢܲܝ̈ܢܵܫܵܐ ܩܲܠܝܼܠ ܙܲܒܼܢܵܐ: ܦܵܐܹ̇ܫ ܠܹܗ ܪܲܗܛܹܗ ܕܥܵܠܡܵܐ
                ܡ̣ܢ ܝܘܼܒܵܠܵܐ. ܐܲܤܘܼܪܵܐ ܗ̣̄ܝ: ܕܠܵܐ ܡܸܫܟܲܚ ܟܝܵܢܵܐ ܩܵܐܹ̇ܡ ܩܕܼܵܡܵܘܗܝ.
                ܘܐܲܝܢܵܐ ܕܡܸܬܼܝܼܗܸܒܼ ܠܹܗ ܥܸܢܝܵܢܵܐ ܗܵܢܵܐ ܒܢܲܦܫܹܗ: ܡܵܘܗܲܒܼܬܼܵܐ ܗ̣̄ܝ
                ܕܡ̣ܢ ܐܲܠܵܗܵܐ: ܕܚܲܤܝܼܢܵܐ ܡ̣ܢ ܟܠܗܹܝܢ ܡܲܥܒܿܕܼܵܢ̈ܘܵܬܼܵܐ ܡܢܵܬܼܵܢܵܝ̈ܬܼܵܐ:
                
                 337 
                
                ܕܲܒܼܛܲܟܼܤܵܐ ܗܵܢܵܐ ܡܸܨܥܵܝܵܐ ܡܸܫ̈ܬܲܟܿܢܵܢ ܠܐܲܝܠܹܝܢ ܕܲܒܼܠܸܒܵܐ ܬܪܝܼܨܵܐ
                ܪܵܓܼܝܼܢ ܬܝܵܒܼܘܼܬܼܵܐ. ܕܡܸܬܼܝܲܒܵܐ ܚܲܬܝܼܬܵܐܝܼܬܼ: ܠܐܲܝܢܵܐ ܕܝܵܕܲܥ ܐܲܠܵܗܵܐ
                ܕܚܵܫܲܚ ܠܫܘܼܢܵܝܵܐ ܚܲܬܝܼܬܼܵܐ ܡ̣ܢ ܥܵܠܡܵܐ ܠܘܵܬܼ ܚܲܝܹ̈ܐ ܡܝܲܬܿܪܹ̈ܐ:
                ܡܸܛܠ ܨܸܒܼܝܵܢܵܐ ܛܵܒܼܵܐ ܕܡܸܫܟܲܚ ܒܹܗ. ܡܸܬܼܪܲܒܿܝܵܐ ܕܹܝܢ ܘܲܡܟܲܬܿܪܵܐ
                ܠܘܵܬܹܗ: ܒܲܥܡܘܼܪܝܵܐ ܠܚܘܿܕܼܵܝܵܐ ܕܐ̄ܢܵܫ ܥܲܡ ܢܲܦܫܹܗ. ܠܗܵܕܹܐ:
                ܒܲܨܠܘܿܬܼܵܐ ܢܸܒܼܥܸܐ. ܚܠܵܦ ܗܵܕܹܐ: ܫܲܗܪܹ̈ܐ ܢܲܓܝܼܪܹ̈ܐ ܢܸܥܒܸܿܕ. ܘܐܲܝܟܼ
                ܡܵܘܗܲܒܼܬܼܵܐ ܕܠܲܝܬܿ ܠܵܗ̇ ܦܸܚܡܵܐ: ܒܕܸܡ̈ܥܹܐ ܢܸܫܗܲܪ ܥܲܠ ܬܲܪܥܹܗ
                ܕܡܵܪܲܢ ܕܲܢܫܲܟܸܢ ܠܲܢ. ܘܬܼܘܼܒܼ: ܠܵܐ ܠܵܐܹ̇ܝܢܲܢ ܒܲܬܼܥܵܫܹܗ ܕܥܵܠܡܵܐ
                ܗܵܢܵܐ. ܗܵܢܵܘ ܫܘܼܪܵܝ ܙܵܘܥܵܐ ܕܚܲܝܹ̈ܐ: ܕܓܼܵܡܲܪ ܒܒܲܪܢܵܫܵܐ ܟ̱ܠܹܗ
                ܫܘܼܡܠܵܝܵܐ ܕܙܲܕܝܼܩܘܼܬܼܵܐ.
                	ܥܲܠ ܡܲܥܒܿܕܼܵܢܘܼܬܼܵܐ ܕܬܲܪܬܹܝܢ ܕܲܠܘܵܬܼ ܒܲܪܢܵܫܵܐ. ܡܲܥܒܿܕܼܵܢܘܼܬܼܵܐ
                ܐ̄ܚܪܹܬܼܵܐ ܕܒܼܵܬܲܪ ܗܵܕܹܐ: ܡܵܐ ܕܫܲܦܝܼܪ ܪܵܕܹܐ ܒܲܪܢܵܫܵܐ ܒܕܼܘܼܒܵܪܵܐ:
                ܘܲܡܛ̣ܵܐ ܠܡܸܤܲܩ ܡ̣ܢ ܕܲܪܓܼܵܐ ܕܲܬܼܝܼܒܼܘܼܬܼܵܐ: ܘܲܩܪܸܒܼ ܠܡܸܛܥܲܡ
                ܡ̣ܢ ܬܹܐܘܿܪܝܼܵܐ ܕܦܘܼܠܚܵܢܹܗ: ܡܵܐ ܕܢܵܦ̇ܠܵܐ ܒܹܗ ܡܵܘܗܲܒܼܬܼܵܐ ܕܡ̣ܢ
                ܠܥܸܠ: ܠܡܸܛܥܲܡ ܗܲܢܝܼܐܘܼܬܼܵܐ ܕܝܼܕܲܥܬܼܵܐ ܕܪܘܼܚ: ܐܝܼܬܼܵܘܗܝ ܫܘܼܪܵܝܵܗ̇
                ܡ̣ܢ ܗܵܪܟܵܐ. ܩܲܕܼܡܵܝܑܬܼ: ܥܲܠ ܒܛܝܼܠܘܼܬܹܗ ܕܐܲܠܵܗܵܐ ܕܲܠܘܵܬܼ ܒܲܪܢܵܫܵܐ
                ܡܸܫܬܲܪܲܪ: ܘܥܲܠ ܚܘܼܒܹܗ ܕܲܠܘܵܬܼ ܒܪܝܼܬܼܵܐ ܡܸܬܼܢܲܗܲܪ. ܒܪܝܼܬܼܵܐ
                ܕܲܡܠܝܼ̈ܠܹܐ: ܘܐܘܼܟܼܦܵܢܹܗ ܤܲܓܝܼܐܵܐ ܕܥܲܠ ܗܵܠܹܝܢ ܕܡܸܛܠܵܬܼܗܘܿܢ.
                ܡܸܟܵܐ ܓܹܝܪ ܡܫܲܪܝܵܐ ܒܹܗ ܗܵܝ̇ ܚܲܠܝܘܼܬܼܵܐ ܕܐܲܠܵܗܵܐ: ܘܓܼܵܘܙܵܠܵܐ
                ܕܚܘܼܒܹܗ ܕܝܵܩܹ̇ܕܼ ܒܠܸܒܵܐ: ܘܡܵܘܩܸܕܼ ܠܟܼܠܗܘܿܢ ܚܲܫܹ̈ܐ ܕܦܲܓܼܪܵܐ
                ܘܲܕܼܢܲܦܫܵܐ. ܘܲܠܗܵܢܵܐ ܚܲܝܠܵܐ ܡܲܪܓܸܫ ܠܹܗ ܒܟܼܠܗܘܿܢ ܟܝܵܢܹ̈ܐ
                ܕܲܒܼܪܝܼܬܼܵܐ: ܘܲܒܼܟܼܠ ܨܒܼܘܼ ܕܦܵܓܼܥܵܐ ܒܹܗ. ܘܒܲܙܒܲܢ ܙܒܲܢ ܪܵܘܹܐ ܒܹܗ:
                
                 338 
                
                ܐܲܝܟܼ ܕܲܒܼܚܲܡܪܵܐ. ܘܡܸܬܼܪܲܫܠܝܼܢ ܗܲܕܵܡܵܘ̈ܗܝ: ܘܦܵܐܹ̇ܫ ܪܸܥܝܵܢܹܗ:
                ܘܡܸܫܬܒܸܐ ܠܸܒܹܗ ܒܵܬܲܪ ܐܲܠܵܗܵܐ. ܘܗܵܟܲܢ ܗܵܘܹ̇ܐ ܐܲܝܟܼ ܕܐܸܡ̇ܪܹܬܼ:
                ܐܲܝܟܼ ܐ̄ܢܵܫ ܕܲܒܼܚܲܡܪܵܐ ܪܘܸܐ. ܘܲܟܼܡܵܐ ܕܡܸܬܼܚܲܝܠܝܼܢ ܪܸ̈ܓܼܫܵܘܗܝ ܓܵܘܵܝܹ̈ܐ:
                ܗܵܟܲܢܵܐ ܡܸܬܼܚܲܝܠܵܐ ܚܙܵܬܼܵܐ ܗܵܕܹܐ. ܘܲܟܼܡܵܐ ܕܝܵܨܹ̇ܦ ܕܕܼܘܼܒܵܪܵܐ
                ܘܲܙܗܝܼܪܘܼܬܼܵܐ: ܘܥܵܡܹ̇ܠ ܒܩܸܪܝܵܢܵܐ ܘܲܨܠܘܿܬܼܵܐ: ܗܵܟܲܢܵܐ ܡܸܤܬܲܬܲܬܼ
                ܘܡܸܫܬܲܪܲܪ ܒܹܗ ܚܲܝܠܵܗ̇. ܫܲܪܝܼܪܵܐܝܼܬܼ ܐܲܝܲܚ̈: ܕܲܠܗܵܕܹܐ ܐܵܬܹ̇ܐ ܒܲܙܒܲܢ
                ܙܒܲܢ: ܕܠܵܐ ܡܸܬܿܕܟܲܪ ܩܢܘܿܡܹܗ ܕܦܲܓܼܪܵܐ ܠܒܼܝܼܫ: ܘܠܵܐ ܝܵܕܲܥ
                ܕܲܒܼܥܵܠܡܵܐ ܐܝܼܬܼܵܘܗܝ. ܗܵܢܵܘ ܫܘܼܪܵܝܵܐ ܕܲܚܙܵܬܼܵܐ ܪܘܼܚܵܢܵܝܬܼܵܐ ܒܒܲܪܢܵܫܵܐ.
                ܘܗܵܕܹܐ ܗ̣̄ܝ ܪܹܫܝܼܬܼܵܐ ܕܟܼܠܗܘܿܢ ܓܸܠܝܵܢܹ̈ܐ ܕܡܲܕܥܵܐ. ܘܒܼܵܗ̇ ܡܸܬܼܪܲܒܸܐ
                ܡܲܕܥܵܐ ܠܘܵܬܼ ܟܲܤ̈ܝܵܬܼܵܐ ܘܡܸܬܼܥܲܠܲܡ: ܘܒܼܵܗ̇ ܡܸܬܿܕܲܪܲܓܼ ܠܘܵܬܼ
                ܐ̄ܚܪ̈ܵܢܝܬܼܵܐ: ܕܪ̈ܵܡܵܢ ܡ̣ܢ ܟܝܵܢܵܐ ܐ̄ܢܵܫܵܝܵܐ. ܘܐܲܝܟܼ ܕܲܒܼܦܵܤܝܼ̈ܩܬܼܵܐ ܠܡܹܐܡܲܪ:
                ܒܐܝܼܕܼܵܗ̇ ܡܸܬܼܝܲܒܿܠܝܼܢ ܠܘܵܬܹܗ ܕܒܲܪܢܵܫܵܐ: ܟܠܗܘܿܢ ܚܸܙ̈ܘܵܢܹܐ ܐܲܠܵܗܵܝܹ̈ܐ
                ܘܓܸܠܝܵܢܹ̈ܐ ܕܪܘܼܚܵܐ: ܕܡܲܩܲܒܿܠܝܼܢ ܩܲܕܝܼ̈ܫܹܐ ܒܥܵܠܡܵܐ ܗܵܢܵܐ: ܘܐܝܼܬܼ
                ܠܲܟܼܝܵܢܵܐ ܠܡܸܕܲܥ ܡܵܘܗܲܒܼܬܼܵܐ  ܕܓܸܠܝܵܢܹ̈ܐ ܕܒܼܗܵܠܹܝܢ ܚܲܝܹ̈ܐ. ܗܵܢܵܘ
                ܥܸܩܵܪܵܐ ܕܡܲܪܓܫܵܢܘܼܬܲܢ ܕܲܒܼܥܵܒܼܘܿܕܲܢ. ܛܘܼܒܼܵܘܗܝ ܠܡܲܢ ܕܢܲܛܪܹܗ
                ܠܗܵܢܵܐ ܙܲܪܥܵܐ ܛܵܒܼܵܐ ܡܵܐ ܕܲܢܦܲܠ̣ ܒܢܲܦܫܹܗ: ܘܪܲܒܿܝܹܗ: ܘܠܵܐ
                ܦܲܠܗܸܕܼ ܡܸܢܹܗ ܒܲܪܤ̈ܝܼܩܵܬܼܵܐ ܘܦܸܗܝܵܐ ܕܥܵܒܼܘܿܪ̈ܝܵܬܼܵܐ!