Isaac of Nineveh: Discourse 50
ܬܘܼܒܼ ܪܹ̈ܫܹܐ ܟܪ̈ܲܝܵܐ ܕܐܝܼܬܼ ܒܗܘܿܢ ܪܸ̈ܥܝܵܢܹܐ ܡܫܲܚ̈ܠ̱ܦܹܐ: ܕܲܒܼܗܘܿܢ
ܡܵܘܕܲܥ ܤܘܼܓܦܵܢܵܐ ܕܡ̣ܢ ܛܢܵܢܵܐ ܤܲܟܼܠܵܐ ܕܲܒܼܦܲܪܨܘܿܦ ܕܸܚܠܲܬܼ
ܐܲܠܵܗܵܐ. ܘܥܘܼܕܼܪܵܢܵܐ ܕܡ̣ܢ ܢܝܼܚܘܼܬܼܵܐ: ܥܲܡ ܢܝܼ̈ܫܹܐ ܐ̄ܚܪ̈ܢܹܐ. ܢܢ.
ܒܲܪܢܵܫܵܐ ܛܲܢܵܢܵܐ: ܠܵܐ ܡܬܼܘܿܡ ܡܵܛܹ̇ܐ ܠܫܲܝܢܵܐ ܕܪܸܥܝܵܢܵܐ.
ܘܕܲܓܼܠܝܼܙ ܡ̣ܢ ܫܲܝܢܵܐ: ܓܠܝܼܙ ܘܡ̣ܢ ܚܲܕܼܘܼܬܼܵܐ. ܐܸܢ ܓܹܝܪ ܫܲܝܢܵܐ
ܕܪܸܥܝܵܢܵܐ ܚܘܼܠܡܵܢܵܐ ܓܡܝܼܪܵܐ ܡܸܬܼܐܡܲܪ: ܛܢܵܢܵܐ ܕܹܝܢ ܤܲܩܘܼܒܼܠܵܐ
ܗ̄ܘ̣ ܠܫܲܝܢܵܐ. ܡܵܕܹܝܢ ܟܘܼܪܗܵܢܵܐ ܗ̄ܘ̣ ܪܲܒܵܐ ܟܪܝܼܗ: ܐܲܝܢܵܐ ܕܒܲܛܢܵܢܵܐ
ܡܸܬܿܬܿܙܝܼܥ. ܐܘܿ ܒܲܪܢܵܫܵܐ: ܥܕܲܡܵܐ ܕܠܘܼܩܒܲܠ ܟܘܼܪܗܵܢܵܐ ܕܲܐ̄ܚܪ̈ܵܢܹܐ
ܡܸܤܬܒܲܪ ܕܲܡܙܝܼܥ ܐܲܢ̄ܬܿ ܛܢܵܢܵܟܼ: ܐܲܢ̄ܬܿ ܕܹܝܢ ܠܚܘܼܠܡܵܢܵܐ ܡ̣ܢ
ܢܲܦܫܵܟܼ ܛܲܪܕܬܿ. ܥܲܠ ܐܵܤܝܘܼܬܼܵܐ ܕܲܩܢܘܿܡܵܟܼ: ܝܲܬܝܼܪ ܢܸܗܘܸܐ ܠܵܟܼ
ܐܘܼܟܼܦܵܢܵܐ. ܐܸܢܕܹܝܢ ܘܠܲܟܼܪ̈ܝܼܗܹܐ ܨܵܒܹ̇ܐ ܐܲܢ̄ܬܿ ܠܡܲܐܤܵܝܘܼ: ܕܲܥ ܕܐܲܝܠܹܝܢ
ܕܼܟܼܪܝܼܗܝܼܢ: ܥܲܠ ܤܘܼܤܵܝܵܐ ܝܲܬܝܼܪ ܤܢܝܼܩܝܼܢ: ܡ̣ܢ ܕܥܲܠ ܟܐܵܬܼܵܐ.
ܒܲܕܓܼܘܿܢ ܟܲܕܼ ܠܲܐ̄ܚܪ̈ܵܢܹܐ ܠܵܐ ܡܥܲܕܲܪ ܐܲܢ̄ܬܿ: ܠܲܩܢܘܿܡܵܟܼ ܒܟܼܘܼܪܗܵܢܵܐ
ܪܲܒܵܐ ܡܢܵܘܸܠ ܐܲܢ̄ܬܿ. ܠܵܘ ܡ̣ܢ ܐܵܕܹܫܹ̈ܐ ܕܚܸܟܼܡܬܼܵܐ ܡܢܸܐ ܛܢܵܢܵܐ
pb. 344
ܒܲܒܼܢܲܝ̈ܢܵܫܵܐ: ܐܸܠܵܐ ܡ̣ܢ ܚܲܕܼ ܡ̣ܢ ܟܘܼܪ̈ܗܵܢܹܐ ܕܢܲܦܫܵܐ: ܕܐܝܼܬܹܝܗ̇
ܐܲܠܝܼܨܘܼܬܼܵܐ ܕܬܲܪܥܝܼܬܼܵܐ: ܘܠܵܠ ܝܑܼܕܲܥܬܼܵܐ ܤܲܓܝܼܐܬܼܵܐ. ܪܹܫ ܚܸܟܼܡܬܼܵܐ
ܐܲܠܵܗܝܬܼܵܐ: ܒܗܝܼܠܘܼܬܼܵܐ: ܕܡ̣ܢ ܪܲܒܿܘܼܬܼ ܢܲܦܫܵܐ ܡܸܬܼܩܲܢܝܵܐ: ܘܛܵܥܘܿܢܘܼܬܼܵܐ
ܕܲܡܚܝܼ̈ܠܬܼܵܐ ܕܲܒܼܢܲܝ̈ܢܵܫܵܐ. ܐܲܢ̄ܬܿܘܿܢ ܠܲܡ ܚܲܝ̈ܠܬܼܵܢܹܐ: ܤܲܒܼܘ ܛܲܥܢܵܐ
ܕܲܟܼܪ݁ܝܼܗܹܐ. ܘܐܲܬܼܩܢܘܼܗܝ ܠܡܸܬܼܥܲܒܼܪܵܢܵܐ: ܒܪܘܼܚܵܐ ܡܲܟܿܝܼܟܼܬܼܵܐ. ܡ̣ܢ
ܦܹܐܪܹ̈ܐ ܕܪܘܼܚܵܐ ܕܩܘܼܕܼܫܵܐ ܡܵܢܹ̇ܐ ܫܠܝܼܚܵܐ ܠܫܲܝܢܵܐ ܘܲܡܤܲܝܒܿܪܵܢܘܼܬܼܵܐ܀
ܠܸܒܵܐ ܕܲܡܠܸܐ ܚܲܫܵܐ ܥܲܠ ܐܲܦܲܝ̈ ܠܵܐ ܤܵܦܩܘܼܬܹܗ ܕܲܠܘܵܬܼ ܓܲܠܝܘܼܬܼ
ܥܲܡ̈ܠܹܐ ܕܼܒܼܓܼܘܼܫܡܵܐ: ܤܵܟܼܵܐ ܗ̄ܘ̣ ܕܟܼܠܗܘܿܢ ܥܲܡ̈ܠܹܐ ܦܲܓܼܪ̈ܵܢܵܝܹܐ܀
ܥܲܡ̈ܠܹܐ ܕܦܲܓܼܪܵܐ: ܒܸܠܥܵܕܼ ܚܲܫܵܐ ܕܪܸܥܝܵܢܵܐ: ܐܲܝܟܼ ܦܲܓܼܪܵܐ ܕܠܵܐ ܢܲܦܫܵܐ܀
ܕܚܲܫܝܼܫ ܒܠܸܒܹܗ ܘܲܫܪܸܐ ܒܪܸ݁ܓܼܫܵܘܗܝ: ܐܲܝܟܼ ܟܪܝܼܗܵܐ ܕܡܲܟܼܐܲܒܼ
ܒܦܲܓܼܪܹܗ: ܘܲܫܪܸܐ ܦܘܼܡܹܗ ܠܡܼܠ ܡܹܐܟܼ̈ܠܵܢ ܕܲܡܤܲܓ̈ܦܵܢ܀ ܕܚܲܫܝܼܫ
ܒܠܸܒܹܗ ܘܲܫܪܸܐ ܒܪܸ̈ܓܼܫܵܘܗܝ: ܐܲܝܟܼ ܐ̄ܢܵܫ ܕܐܝܼܬܼ ܠܹܗ ܒܪܵܐ ܝܑܼܚܝܼܕܼܵܝܵܐ
ܘܢܟܹ̇ܣ ܠܹܗ ܒܐܝܼܓܼܵܘ̈ܗܝ ܒܩܲܠܝܼܠ ܩܲܠܝܼܠ܀ ܚܲܫܝܼܫܘܼܬܼܵܐ ܕܪܸܥܝܵܢܵܐ܀
ܡܵܘܗܲܒܼܬܼܵܐ ܗ̣̄ܝ ܡܝܲܩܲܪܬܵܐ ܕܡ̣ܢ ܐܲܠܵܗܵܐ. ܘܐܲܝܢܵܐ ܕܲܛܥܝܼܢ ܠܵܗ̇ ܥܲܡ
ܙܸܕܼܩܹ̈ܝܗ̇: ܐܲܝܟܼ ܐ̄ܢܵܫ ܕܲܛܥܝܼܢ ܩܘܼܕܼܫܵܐ ܥܲܠ ܗܲܕܵܡܵܘ̈ܗܝ܀ ܒܲܪܢܵܫܵܐ
ܕܲܡܫܲܠܲܛ ܒܹܗ ܠܸܫܵܢܵܐ ܒܟܼܠ ܛܵܒܼ ܘܒܼܝܼܫ: ܠܵܐ ܡܸܫܬܿܘܸܐ ܠܗܵܕܹܐ
ܛܲܝܒܿܘܼܬܼܵܐ܀ ܬܝܵܒܼܘܼܬܼܵܐ ܘܥܸܢܝܵܢܵܐ: ܝܸܨܒܵܐ ܢܩܝܼܒܼܵܐ. ܡܵܘܗܲܒܼܬܼܵܐ
ܘܩܘܼ̈ܦܵܚܹܐ: ܤܲܟܿܝܼܢܵܐ ܕܲܡܛܲܫܝܵܐ ܒܕܸܒܼܫܵܐ܀ ܢܲܟܼܦܘܼܬܼܵܐ ܘܥܸܢܝܵܢܵܐ
ܕܥܲܡ ܐܲܢ̄ܬܿܬܼܵܐ: ܐܲܝܟܼ ܐܲܪܝܘܼܬܼܵܐ ܘܐܸܡܪܵܐ ܒܚܲܕܼ ܒܲܝܬܼܵܐ܀ ܥܲܡ̈ܠܹܐ
ܘܚܲܪܡܘܼܬܼܵܐ ܩܕܼܵܡ ܐܲܠܵܗܵܐ: ܐܲܝܟܼ ܐ̄ܢܵܫ ܕܢܵܟܹ̇ܣ ܒܪܵܐ ܩܕܼܵܡ
ܐܲܒܼܘܗܝ܀ ܕܲܟܼܪܝܼܗ ܒܢܲܦܫܹܗ ܘܲܡܬܲܪܸܨ ܚܲܒܼܪ̈ܵܘܗܝ: ܐܲܝܟܼ ܐ̄ܢܵܫ
pb. 345
ܕܤܲܡ̈ܝܵܢ ܥܲܝܢܵܘ̈ܗܝ ܘܲܡܚܵܘܸܐ ܐܘܼܪܚܵܐ܀ ܡܪܲܚܡܵܢܘܼܬܼܵܐ ܘܟܹܐܢܘܼܬܼܵܐ
ܒܲܚܕܼܵܐ ܢܲܦܫܵܐ: ܐܲܝܟܼ ܐ̄ܢܵܫ ܕܤܵܓܹ̇ܕܼ ܠܐܲܠܵܗܵܐ ܘܠܲܦܬܲܟܼܪܹ̈ܐ ܒܚܲܕܼ
ܒܲܝܬܵܐ. ܒܟܼܠܕܘܼܟ ܡܪܲܚܡܵܢܘܼܬܼܵܐ: ܒܥܸܠܕܒܼܵܒܼܵܐ ܗ̣̄ܝ ܕܟܹܐܢܘܼܬܼܵܐ܀
ܟܹܐܢܘܼܬܼܵܐ ܐܝܼܬܹܝܗ̇: ܬܪܝܼܨܘܼܬܼ ܡܲܬܼܩܵܠܵܐ ܫܲܘܝܵܐ: ܕܲܠܟܼܠܢܵܫ
ܐܲܝܟܼ ܕܫܵܘܹ̇ܐ ܝܵܗ̇ܒܵܐ: ܟܲܕܼ ܠܵܐ ܡܸܨܛܲܠܝܵܐ ܠܚܲܕܼ ܡ̣ܢ ܓܲܒܿܝܼ̈ܢ
ܠܡܸܤܲܒܼ ܒܐܲܦܹ̈ܐ ܦܘܼܪܥܵܬܵܗ̇. ܡܪܲܚܡܵܢܘܼܬܼܵܐ ܕܹܝܢ: ܚܲܫܵܐ ܐܝܼܬܹܝܗ̇:
ܕܡ̣ܢ ܛܵܒܼܘܼܬܼܵܐ ܡܸܬܿܬܿܙܝܼܥܵܐ: ܕܲܠܘܵܬܼ ܟܠ ܡܸܬܼܪܲܟܼܢܵܐ ܠܚܵܘܤܵܢܵܐ.
ܘܠܲܐܝܢܵܐ ܕܲܠܒܼܝܼܫܬܼܵܐ ܫܵܘܹ̇ܐ: ܠܵܐ ܦܵܪܥܵܐ. ܘܲܕܼܫܵܘܹ̇ܐ ܠܛܵܒܼܬܼܵܐ: ܒܐܲܥ̈ܦܹܐ
ܡܲܫܦܥܵܐ. ܐܸܢ ܗܵܕܹܐ ܡ̣ܢ ܓܲܒܵܐ ܕܙܲܕܝܼܩܘܼܬܼܵܐ ܗ̣̄ܝ: ܡܵܕܹܝܢ ܗܵܝ̇ ܡ̣ܢ
ܓܲܒܵܐ ܕܒܼܝܼܫܘܼܬܼܵܐ ܗ̣̄ܝ. ܐܲܝܟܼ ܕܠܵܐ ܡܤܲܝܒܿܪܝܼܢ ܘܢܘܼܪܵܐ ܒܚܲܕܼ
ܒܲܝܬܵܐ: ܗܵܟܲܢܵܐ ܟܹܐܢܘܼܬܼܵܐ ܘܪ̈ܲܚܡܹܐ ܒܲܚܕܼܵܐ ܢܲܦܫܵܐ܀ ܐܲܝܟܼ ܕܠܵܐ
ܬܵܩ̇ܠܵܐ ܦܪܸܕܿܬܼܵܐ ܕܚܵܠܵܐ ܠܘܼܩܒܲܠ ܝܘܼܩܪܵܐ ܤܲܓܝܼܐܵܐ ܕܕܲܗܒܼܵܐ:
ܗܵܟܲܢܵܐ ܚܫܲܚܬܼܵܐ ܕܟܹܐܬܘܼܬܹܗ ܕܐܲܠܵܗܵܐ: ܠܘܼܩܒܲܠ ܦܸܚܡܵܐ
ܕܲܡܪܲܚܡܵܢܘܼܬܹܗ ܒܡܲܬܼܩܵܠܵܐ. ܐܲܝܟܼ ܟܲܦܵܐ ܕܚܵܠ̇ܐ ܕܢܵܦܹ̇ܠ ܒܝܲܡܵܐ
ܪܲܒܵܐ: ܗܵܟܲܢܵܐ ܚܛܵܗܹ̈ܐ ܕܟܼܠ ܒܤܲܪ: ܒܦܸܚܡܵܐ ܕܬܲܪܥܝܼܬܹܗ
ܕܐܲܠܵܗܵܐ܀ ܐܲܝܟܼ ܕܠܵܐ ܡܸܤܬܿܟܲܪ ܡܲܒܿܘܼܥܵܐ ܥܲܬܝܼܪ ܫܸܦܥܹ̈ܐ ܒܲܡܠܸܐ
ܚܘܼܦܢܵܐ ܕܥܲܦܪܵܐ: ܗܵܟܲܢܵܐ ܠܵܐ ܡܸܙܕܟܹܝܢ ܪ̈ܲܚܡܹܐ ܕܥܵܒܼܘܿܕܼܵܐ: ܡ̣ܢ
ܒܝܼܫܘܼܬܼܵܐ ܕܲܥܒܼܝܼ̈ܕܹܐ܀ ܐܲܝܟܼ ܐ̄ܢܵܫ ܕܙܵܪܲܥ ܒܝܲܡܵܐ ܘܲܡܤܲܟܸܐ
ܕܢܸܚܨܘܿܕܼ: ܗܵܟܲܢܵܐ ܡܲܢ ܕܐܲܚܝܼܕܼ ܐܲܟܿܬܼܵܐ ܘܲܡܨܲܠܸܐ܀ ܐܲܝܟܼ ܕܠܵܐ
ܡܸܬܼܟܲܒܼ̈ܫܵܢ ܨܘܿܨ̈ܝܵܬܼܵܐ ܕܢܘܼܪܵܐ ܡ̣ܢ ܡܲܤܲܩܬܼܵܐ ܕܲܠܥܸܠ: ܗܵܟܲܢܵܐ ܠܵܐ
ܡܸܬܼܥܵܘ̈ܟܼܵܢ ܨܠܵܘ̈ܬܹܗ ܕܲܡܪܲܚܡܵܢܵܐ ܡ̣ܢ ܡܲܤܲܩܬܼܵܐ ܕܠܲܫܡܲܝܵܐ܀ ܐܲܝܟܼ
pb. 346
ܚܹܐܦܵܐ ܕܡܲܝ̈ܵܐ ܒܐܲܬܼܪܵܐ ܨܲܠܝܵܐ: ܗܵܟܲܢܵܐ ܚܲܝܠܵܗ̇ ܕܚܸܡܬܼܵܐ ܐܸܡܲܬܼܝ
ܕܢܸܫܟܲܚ ܐܲܦܬܼܵܐ ܒܬܲܪܥܝܼܬܲܢ܀
ܕܲܩܢܸܐ ܡܘܼܟܵܟܼܵܐ ܒܠܸܒܹܗ: ܗܘ̤ܵܐ ܡܝܼܬܼܵܐ ܠܥܵܠܡܵܐ. ܕܡܝܼܬܼ
ܠܥܵܠܡܵܐ: ܡܝܼܬܼ ܠܚܲܫܹ̈ܐ܀ ܡܝܼܬܼ ܒܠܸܒܹܗ ܡ̣ܢ ܩܲܪ̈ܝܼܒܼܵܘܗܝ: ܡܝܼܬܼ
ܡܸܢܹܗ ܤܵܛܵܢܵܐ܀ ܕܐܸܫܟܲܚ ܠܲܚܤܵܡܵܐ: ܘܥܲܡܹܗ ܐܸܫܟܲܚ ܠܗܵܘ̇
ܕܲܗܘܸܵܐ ܡܸܫܟܚܵܢܹܗ ܩܲܕܼܡܵܝܵܐ܀ ܐܝܼܬܼ ܡܲܟܿܝܼܟܼܘܼܬܼܵܐ ܕܡ̣ܢ ܕܸܚܠܲܬܼ
ܐܲܠܵܗܵܐ: ܘܐܝܼܬܼ ܕܡ̣ܢ ܪܸܚܡܲܬܼ ܐܲܠܵܗܵܐ. ܐܝܼܬܼ ܕܡ̣ܢ ܕܸܚܠܬܹܗ
ܡܸܬܼܡܲܟܲܟܼ: ܘܐܝܼܬܼ ܕܡ̣ܢ ܚܲܕܼܘܼܬܹܗ ܡܸܬܼܡܲܟܲܟ. ܘܲܠܗܵܘ̇ ܢܲܩܝܼܦܵܐ
ܟܢܝܼܟܼܘܼܬܼܵܐ ܕܗܲܕܵܡܹ̈ܐ: ܥܲܡ ܡܛܲܟܿܤܘܼܬܼܵܐ ܕܪܸ̈ܓܼܫܹܐ: ܘܠܸܒܵܐ
ܕܲܒܼܟܼܠܙܒܲܢ ܬܒܼܝܼܪ. ܠܗܵܢܵܐ ܕܹܝܢ ܐܲܫܝܼܕܼܘܼܬܼܵܐ ܤܲܓܝܼܐܬܼܵܐ ܘܠܸܒܵܐ
ܕܫܵܘܲܚ: ܘܠܵܐ ܡܸܬܼܠܒܸܟܼ. ܚܘܼܒܵܐ: ܠܵܐ ܝܵܕܲܥ̇ ܟܘܼܚܵܕܼܵܐ. ܡܸܛܠܗܵܢܵܐ:
ܠܵܐ ܝܵܕܲܥ̇ ܕܢܸܬܸܠ ܐܸܤܟܹܡܵܐ ܘܲܡܛܲܟܿܤܘܼܬܼܵܐ ܠܗܲܕܵܡܵܘ̈ܗܝ. ܚܘܼܒܵܐ:
ܟܝܵܢܵܐܝܼܬܼ ܐܝܼܬܼ ܠܹܗ ܠܵܐ ܡܸܬܼܟܲܚܕܼܵܢܘܼܬܼܵܐ ܘܢܘܼܫܵܝܵܐ ܕܲܡܫܘܼܚܬܹܗ܀
ܛܘܼܒܼܵܘܗܝ ܠܡܲܢ ܕܐܸܫܟܚܵܟܼ: ܠܡܹܐܢܵܐ ܕܟܼܠ ܚܲܕ̈ܘܵܢ܀ ܪܚܝܼܡ
ܥܲܠ ܐܲܠܵܗܵܐ ܟܢܘܼܫܝܵܐ ܕܡܲܟܼܝܼ̈ܟܹܐ: ܐܲܝܟܼ ܗܵܘ̇ ܟܢܘܼܫܝܵܐ ܕܲܤܪ̈ܵܦܹܐ܀
ܝܲܩܝܼܪ ܗ̄ܘ̣ ܥܲܠ ܐܲܠܵܗܵܐ ܦܲܓܼܪܵܐ ܢܲܟܼܦܵܐ: ܛܵܒܼ ܡ̣ܢ ܕܼܒܼܚܵܐ ܕܲܟܼܝܵܐ.
ܬܲܪ̈ܬܲܝܗܹܝܢ ܕܹܝܢ: ܡܲܫܟܢܵܐ ܠܲܬܼܠܝܼܬܼܵܝܘܼܬܼܵܐ ܡܛܲܝ̈ܒܼܵܢ ܒܢܲܦܫܵܐ܀
ܠܘܵܬܼ ܪ̈ܵܚܡܲܝܟܼ: ܒܐܸܤܟܹܡܵܐ ܗܲܠܸܟܼ. ܟܲܕܼ ܗܵܕܹܐ ܬܸܥܒܸܕܼ: ܐܵܦ
ܠܢܲܦܫܵܟܼ ܐܵܦ ܠܗܘܿܢ ܬܵܘܬܲܪ. ܐܲܝܟܼ ܕܲܒܼܤܘܿܓܼܵܐܐ ܓܹܝܪ: ܒܐܸܤܟܹܡܵܐ
ܕܪܵܚܡܘܼܬܼܵܐ ܫܵܠ̇ܚܵܐ ܢܲܦܫܵܐ ܦܓܼܘܼ̈ܕܹܐ ܕܲܙܗܝܼܪܘܼܬܼܵܐ܀ ܡ̣ܢ ܥܸܢܝܵܢܵܐ
ܐܸܙܕܲܗ̄ܪ: ܠܵܐ ܗ̄ܘ̣ܵܐ ܒܟܼܠܙܒܲܢ ܡܵܘܬܲܪ܀ ܒܲܟܼܢܘܼܫܝܵܐ ܕܹܝܢ ܝܲܩܲܪ
ܫܸܬܼܩܵܐ: ܬܘܼ̈ܟܹܐ ܓܹܝܪ ܤܲܓܝܼ̈ܐܹܐ ܬܵܟܹ̇ܣ ܗܵܢܵܐ܀ ܒܟܲܪܤܵܐ ܡ̇ܢ
pb. 347
ܐܸܙܕܲܗ̄ܕܼ: ܠܵܐ ܗ̄ܘ̣ܵܐ ܐܲܝܟܼ ܕܒܲܚܝܵܪܵܐ. ܦܫܝܼܚ ܗ̣̄ܝ ܩܪܵܒܼܵܐ ܒܲܝܬܵܝܵܐ:
ܡ̣ܢ ܟܠܦܪܘܼܣ܀ ܠܵܐ ܬܗܲܝܡܸܢ ܐܲܚܘܼܢ ܕܡܸܬܬܲܟܼܤܝܼܢ ܚܘܼ̈ܫܵܒܹܐ
ܓܵܘܵܝܹ̈ܐ: ܒܸܠܥܵܕܼ ܛܘܼܟܵܤܹܗ ܕܦܲܓܼܪܵܐ܀
ܕܚܲܕܠ ܡ̣ܢ ܥܝܵܕܹ̈ܐ: ܝܲܬܝܼܪ ܡ̣ܢ ܒܥܸܠܕܒܼܵܒܹ̈ܐ. ܕܲܡܬܲܪܤܸܐ ܠܲܥܝܵܕܼܵܐ:
ܐܲܝܟܼ ܐ̄ܢܵܫ ܕܲܡܬܲܪܤܸܐ ܠܢܘܼܪܵܐ. ܬܪ̈ܲܝܗܘܿܢ: ܒܲܡ̈ܠܘܿܐܹܐ ܩܵܝ̇ܡܵܐ
ܡܫܘܼܚܬܼܵܐ ܕܚܲܝܠܗܘܿܢ. ܥܝܵܕܼܵܐ ܐܸܢ ܡܵܐ ܕܲܬܼܒܲܥ ܚܕܼܵܐ ܙܒܲܢ
ܐܸܬܼܟܲܠܝܲܬ̤ ܒܥܵܬܹܗ: ܙܒܲܢ̄ܬܵܐ ܐ̄ܚܪܹܬܼܵܐ: ܡܚܝܼܠܵܐ ܡܸܫܟܲܚ ܐܲܢ̄ܬܿ ܠܹܗ.
ܘܐܸܢ ܗܵܕܹܐ ܙܒܲܢ̄ܬܼܵܐ ܥܒܲܕܼܬܵܝܗܝ ܨܸܒܼܝܵܢܹܗ: ܙܒܲܢ̄ܬܼܵܐ ܕܬܲܪܬܹܝܢ ܝܲܬܝܼܪ
ܚܲܝܠܬܼܵܢܵܐ ܡܸܫܟܲܚ ܐܲܢ̄ܬܿ ܒܥܵܬܹܗ ܥܠܲܝܟܼ. ܥܲܠ ܟܠ ܤܘܼܥܪ̈ܵܢܝܼܢ:
ܗܵܢܵܐ ܥܘܼܗܕܵܢܵܐ ܢܩܵܘܸܐ ܒܵܟܼ܀ ܛܵܒܼ ܗ̄ܘ̣ ܥܘܼܕܼܪܵܢܵܐ ܕܡ̣ܢ ܙܗܝܼܪܘܼܬܼܵܐ:
ܡ̣ܢ ܥܘܼܕܼܪܵܢܵܐ ܕܡ̣ܢ ܥܲܡ̈ܠܹܐ܀ ܠܪܵܚܹ̇ܡ ܓܘܼܚܟܵܐ ܘܪܵܚܹ̇ܡ ܨܲܕܘܵܐ:
ܪܵܚܡܵܐ ܠܵܐ ܬܸܗܘܸܐ: ܢܵܓܹܕܼ ܠܵܟܼ ܓܹܝܪ: ܠܲܥ̈ܝܵܕܹܐ ܪ̈ܦܲܝܵܐ܀ ܥܲܡ
ܐܲܝܢܵܐ ܕܲܫܪܹܝܢ ܕܘܼܒܵܪ̈ܵܘܗܝ: ܠܵܐ ܬܲܦܨܲܚ ܐܲܦܲܝ̈ܟ. ܡ̣ܢ ܕܬܸܤܢܹܝܘܗܝ
ܓܹܝܪ: ܐܸܙܕܲܗ̄ܪ. ܐܸܢ ܪܵܚܹܡ ܠܲܡܩܵܡ: ܗܲܒܼ ܠܹܗ ܐܝܼܕܼܵܐ. ܘܥܕܲܡܵܐ
ܠܡܵܘܬܵܐ: ܝܑܼܨܲܦ ܕܲܫܟܼܵܚܬܹܗ܀ ܐܸܢ ܟܪܝܼܗ ܐܲܢ̄ܬܿ ܥܕܲܟܹܝܠ: ܠܵܐ ܠܵܟܼ
ܘܠܵܐ ܤܝܘܼܬܼܵܐ. ܪܹܫ ܚܘܼܛܪܵܟܼ ܠܲܡ ܐܵܘܫܸܛ ܠܹܗ: ܘܲܕܼܫܲܪܟܵܐ܀
ܩܕܼܵܡ ܫܲܒܼܗܪܵܢܵܐ ܘܲܟܼܪܝܼܗ ܒܲܚܤܵܡܵܐ: ܒܲܙܗܝܼܪܘܼ ܬܡܲܠܸܠ. ܕܟܲܕܼ
ܐܲܢ̄ܬܿ ܡܡܲܠܸܠ: ܗ̤ܘ ܥܵܒܹ̇ܕܼ ܠܗܹܝܢ ܦܘܼܫܵܩܵܐ ܠܡܸܠܲܝ̈ܟ ܒܠܸܒܹܗ:
ܐܲܝܟܼ ܡܵܐ ܕܗ̤ܘ ܪܵܚܹ̇ܡ. ܐܵܦ ܡ̣ܢ ܫܲܦܝܼܪ̈ܵܬܼܵܐ ܕܒܼܵܟܼ: ܢܵܤܹ̇ܒܼ ܡܠܘܿܐܵܐ
ܠܡܲܬܼܩܵܠܘܼ ܠܲܐ̄ܚܪ̈ܵܢܹܐ. ܘܡܸܬܼܗܲܦ̈ܟܵܢ ܡܸܠܲܝ̈ܟ ܒܓܼܵܘ ܬܲܪܥܝܼܬܹܗ:
ܠܲܡ̈ܠܘܿܐܹܐ ܕܟܼܘܼܪ̈ܗܵܢܹܐ܀ ܥܲܡ ܐܲܝܢܵܐ ܕܲܡܫܲܪܸܐ ܡܡܲܠܸܠ ܥܲܠ ܐܲܚܵܘ̈ܗܝ
pb. 348
ܩܕܼܵܡܲܝܟ: ܐܲܟܼܡܲܪ ܐܲܦܲܝ̈ܟ. ܟܲܕܼ ܗܵܕܹܐ ܬܸܥܒܸܿܕܼ: ܗܵܟܲܢܵܐ ܠܐܲܠܵܗܵܐ
ܘܠܹܗ ܡܸܫܬܿܟܲܚ ܐܲܢ̄ܬܿ ܙܗܝܼܪܵܐ܀ ܐܸܢ ܬܸܬܸܠ ܡܸܕܸܡ ܠܲܤܢܝܼܩܵܐ:
ܬܸܩܕܘܿܡ ܠܡܵܘܗܲܒܼܬܼܵܟܼ ܦܨܝܼܚܘܼܬܼܵܐ ܕܦܲܪܨܘܿܦܵܐ: ܘܡܸܠܹ̈ܐ ܒܲܤܝܼ̈ܡܵܬܼܵܐ:
ܘܠܘܼܒܵܒܼܵܐ ܠܚܲܫܝܼܫܘܼܬܹܗ. ܟܲܕܼ ܕܹܝܢ ܗܵܕܹܐ ܬܸܥܒܸܿܕܼ: ܥܵܠܹ̇ܒܼ
ܒܡܵܘܗܲܒܼܬܼܵܟܼ ܒܘܼܤܵܡܵܐ ܕܪܸܥܝܵܢܹܗ: ܝܲܬܝܼܪ ܡ̣ܢ ܚܫܲܚܬܼܵܐ ܕܦܲܓܼܪܵܐ܀
ܒܝܵܘܡܵܐ ܕܦܵܬܲܚ ܐܲܢ̄ܬܿ ܦܘܼܡܵܟܼ ܠܲܡܡܲܠܵܠܘܼ ܥܲܠ ܒܲܪܢܵܫܵܐ:
ܡܝܼܬܼܵܐ ܬܸܚܫܲܘܿܒܼ ܢܲܦܫܵܟܼ ܠܐܲܠܵܗܵܐ: ܘܲܤܪܝܼܩܵܐ ܠܟܼܠ ܥܲܡܠܲܝ̈ܟ:
ܐܵܦܸܢ ܡܸܤܬܿܒܲܪ ܕܲܠܬܼܘܼܪܵܨܵܐ ܘܲܠܒܸܢܝܵܢܵܐ ܡܗܲܓܸܓܼ ܠܵܟܼ ܚܘܼܫܵܒܼܵܐ
ܠܲܡܡܲܠܵܠܘܼ. ܠܡܵܢܵܐ ܐܵܠ̇ܨܵܐ ܠܡܸܤܬܲܪ ܐ̄ܢܵܫ ܒܸܢܝܵܢܹܗ: ܘܲܠܡܲܬܼܩܵܢܘܼ
ܕܚܲܒܼܪܹܗ܀ ܒܝܵܘܡܵܐ ܕܚܵܐܹ̇ܫ ܐܲܢ̄ܬܿ ܚܠܵܦ ܒܲܪܢܵܫܵܐ ܒܚܲܕܼ ܡ̣ܢ ܐܸܤܟܹܡ̈ܝܼܢ:
ܐܸܢ ܚܠܵܦ ܛܵܒܹ̈ܐ ܘܐܸܢ ܚܠܵܦ ܪ̈ܲܫܝܼܥܹܐ: ܒܦܲܓܼܪܵܐ ܐܵܘ ܒܬܲܪܥܝܼܬܼܵܐ:
ܤܵܗܕܵܐ ܬܸܚܫܘܿܒܼ ܢܲܦܫܵܟܼ ܒܝܵܘܡܵܐ ܗܵܘ̇: ܘܐܲܝܟܼ ܡܲܢ ܕܲܠܚܲܫܵܐ
ܕܡܵܘܕܝܵܢܘܼܬܼܵܐ ܚܠܵܦ ܡܫܝܼܚܵܐ ܐܸܫ̣ܬܘܝܼܬܿ. ܐܸܬܼܥܲܗܲܕܼ ܕܲܡܫܝܼܚܵܐ:
ܚܠܵܦ ܪ̈ܲܫܝܼܥܵܐ ܡܝܼܬܼ: ܐܲܝܟܼ ܡܸܠܬܹܗ ܕܼܟܼܬܼܵܒܼܵܐ: ܠܵܘ ܚܠܵܦ ܛܵܒܹ̈ܐ.
ܚܙܝܼ ܕܲܟܼܡܵܐ ܪܲܒܵܐ ܨܒܼܘܼܬܼܵܐ ܠܡܸܚܲܫ ܚܠܵܦ ܒܝܼ̈ܫܹܐ ܘܲܠܡܲܛܐܵܒܼܘܼ
ܠܚܲܛܵܝܹ̈ܐ: ܐܵܦ ܝܲܬܼܝܼܪ ܡ̣ܢ ܗܵܝ̇ ܕܲܠܙܲܕܝܼ̈ܩܹܐ. ܫܠܝܼܚܵܐ: ܐܲܝܟܼ ܡܸܕܸܡ
ܕܫܵܘܹ̇ܐ ܠܕܼܘܼܡܵܪܵܐ ܡܥܲܗܸܕܼ ܠܵܗ̇ ܠܗܵܕܹܐ܀ ܐܸܢ ܬܸܫܟܲܚ ܬܸܙܕܲܕܲܩ
ܒܪܲܡ: ܐܲܢ̄ܬܿ ܒܵܟܼ ܠܓܼܵܘ ܢܲܦܫܵܟܼ: ܠܵܐ ܢܸܬܼܒܛܸܠ ܠܵܟܼ ܠܡܸܒܼܥܵܐ
ܙܲܕܝܼܩܘܼܬܼܵܐ ܐ̄ܚܪܹܬܼܵܐ܀ ܠܟܼܠ ܤܘܼܥܪ̈ܵܢܲܝܟ ܗ̤ܘܲܝ̈ ܩܲܕܝܼ̈ܡܵܢ ܢܲܟܼܦܘܼܬܼܵܐ
ܕܦܲܓܼܪܵܐ: ܘܕܼܟܼܝܘܼܬܼܵܐ ܕܬܹܐܪܬܵܐ. ܒܸܠܥܵܕܲܝܗܹܝܢ: ܤܪܝܼܩܘܼ ܩܕܼܵܡ
ܐܸܠܵܗܵܐ ܟܠ ܤܘܼܥܪܵܢ܀ ܟܠ ܥ̇ܒܼܵܕܼ ܕܲܕܼܠܵܐ ܚܘܼܫܵܒܼ ܬܸܥܒܸܿܕܼ ܘܲܕܼܠܵܐ
ܒܘܼܚܵܢ: ܕܲܥ ܕܲܤܪܝܼܩܘܼ ܥܲܡܠܵܟܼ ܕܒܹܗ: ܐܵܦܸܢ ܕܫܲܦܝܼܪܬܵܐ
pb. 349
ܢܸܗܘܸܐ. ܐܲܠܵܗܵܐ ܓܹܝܪ ܠܲܚܫܲܚܬܼܵܐ ܕܩܘܼܪܫܵܢܵܐ ܡܲܩܸܨ ܙܲܕܝܼܩܘܼܬܼܵܐ: ܘܠܵܐ
ܗ̄ܘ̣ܵܐ ܠܦܘܼܠܚܵܢܵܐ ܕܫܸܓܼܡܵܐ܀
ܫܪܵܓܼܵܐ ܕܲܒܼܫܸܡܫܵܐ: ܙܲܕܝܼܩܵܐ ܕܠܵܐ ܚܲܟܿܝܼܡ܀ ܙܲܪܥܵܐ ܕܥܲܠ
ܫܘܿܥܵܐ: ܨܠܘܿܬܹܗ ܕܐܲܟܿܬܼܵܢܵܐ܀ ܐܝܼܠܵܢܵܐ ܕܠܵܐ ܦܹܐܪܹ̈ܐ: ܥܲܢܘܵܝܵܐ ܕܠܵܐ
ܡܪܲܚܡܵܢ܀ ܓܹܐܪܵܐ ܕܲܤܡܝܼܡ: ܡܲܟܿܤܵܢܘܼܬܼܵܐ ܕܚܲܤܵܡܵܐ܀ ܦܲܚܵܐ ܟܲܤܝܵܐ:
ܩܘܼܠܵܤܹܗ ܕܲܢܟܼܝܼܠܵܐ܀ ܡܵܠܘܿܟܼܵܐ ܤܲܟܼܠܵܐ: ܕܵܘܩܵܐ ܥܘܿܝܼܪܵܐ܀ ܬܒܼܵܪܵܐ
ܕܠܸܒܵܐ: ܡܵܘܬܿܒܼܵܐ ܕܥܲܡ ܤܲܟܼ̈ܠܹܐ܀ ܡܲܒܿܘܼܥܵܐ ܚܲܠܝܵܐ: ܥܸܢܝܵܢܵܐ
ܕܥܲܡ ܚܲܟܿܝܼ̈ܡܹܐ܀ ܡܵܠܘܿܟܼܵܐ ܕܚܲܟܿܝܼܡ: ܫܘܼܪܵܐ ܗ̄ܘ̣ ܕܬܼܘܼܟܼܠܵܢܵܐ܀
ܪܵܚܡܵܐ ܤܲܟܼܠܵܐ: ܓܲܙܵܐ ܗ̄ܘ̣ ܕܚܘܼܤܪܵܢܵܐ܀ ܡܝܲܬܲܪ ܗ̄ܘ̣ ܠܡܸܚܙܵܐ
ܒܹܝܬܼ ܒܵܟܹ̈ܐ. ܡ̣ܢ ܕܲܠܡܸܚܙܵܐ ܚܲܟܿܝܼܡܵܐ ܕܢܲܩܝܼܦ ܠܤܲܟܼܠܵܐ܀ ܡܝܲܬܲܪ
ܗ̄ܘ̣ ܠܡܸܥܡܲܪ ܥܲܡ ܚܲܝ̈ܘܵܬܼܵܐ: ܡ̣ܢ ܕܲܠܡܸܥܡܲܪ ܥܲܡ ܚܲܤܵܡܹ̈ܐ܀
ܛܵܒܼ ܗ̄ܘ̣ ܥܡܘܼܪܝܵܐ ܕܲܒܼܩܲܒܼܪܵܐ: ܡ̣ܢ ܠܡܸܥܲܡܲܪ ܥܲܡ ܫܟܼܝܼܪ̈ܲܝ
ܒܗܘܼ̈ܦܵܟܹܐ܀ ܬܸܒܼ ܥܲܡ ܟܘܼܕܼܪܹ̈ܐ: ܘܠܵܐ ܥܲܡ ܝܲܥ̈ܢܹܐ܀ ܐܸܬܼܠܵܘܵܐ
ܠܩܵܛܘܿܠܵܐ: ܘܠܵܐ ܠܚܸܪܝܵܝܵܐ܀ ܘܐܸܬܼܥܲܢܵܐ ܥܲܡ ܚܙܝܼܪܵܐ: ܘܠܵܐ ܥܲܡ
ܦܲܟܵܢܵܐ. ܡܝܲܬܲܪ ܗ̄ܘ̣ ܓܘܼܪܝܵܐ ܕܲܚܙܝܼܪܵܐ: ܡ̣ܢ ܦܘܼܡܹܗ ܕܦܲܟܵܢܵܐ܀
ܬܸܒܼ ܡܸܨܥܲܬܼ ܐܲܪ̈ܝܵܢܹܐ: ܘܠܵܐ ܡܸܨܥܲܬܼ ܪ̈ܵܡܹܐ܀ ܗ̤ܘܝܼ ܪܕܝܼܦܵܐ: ܘܠܵܐ
ܪܵܕܼܘܿܦܵܐ܀ ܗ̤ܘܝܼ ܙܩܝܼܦܵܐ: ܘܠܵܐ ܙܵܩܘܿܦܵܐ܀ ܗ̤ܘܝܼ ܥܲܠܝܼܒܼܵܐ: ܘܠܵܐ
ܥܵܠܘܿܒܼܵܐ܀ ܗ̤ܘܝܼ ܥܫܝܼܩܵܐ: ܘܠܵܐ ܥܵܫܘܿܩܵܐ܀ ܗ̤ܘܝܼ ܢܝܼܚܵܐ: ܘܠܵܐ
ܛܲܢܵܢܵܐ܀ ܐܲܚܘܿܕܼ ܛܲܒܼܘܼܬܼܵܐ: ܘܠܵܐ ܟܹܐܢܘܼܬܼܵܐ. ܟܹܐܢܘܼܬܼܵܐ: ܠܵܘ ܡ̣ܢ
ܕܘܼܒܵܪܵܐ ܗ̄ܝ̣ ܕܲܟܼܪܸܤܛܝܵܢܘܼܬܼܵܐ: ܘܠܵܐ ܪܫܝܼܡ ܕܘܼܟܼܪܵܢܵܗ̇ ܒܝܘܼܠܦܵܢܹܗ
ܕܲܡܫܝܼܚܵܐ܀ ܚܕܝܼ ܥܲܡ ܕܚܵܕܹܝܢ: ܘܲܒܼܟܼܝܼ ܥܲܡ ܕܒܼܵܟܹ̇ܝܢ. ܕܐܝܼܬܹܝܗ̇:
pb. 350
ܐܵܬ̤ܵܐ ܕܫܲܦܝܼܘܼܬܼܵܐ܀ ܥܲܡ ܟܪ̈ܝܼܗܹܐ: ܐܸܬܼܟܲܪܗ. ܘܥܲܡ ܚܲܛܵܝܹ̈ܐ:
ܐܸܬܼܐܲܒܼ̄ܠ. ܘܥܲܠ ܬܲܝܵܒܹ̈ܐ: ܚܕܝܼ܀ ܗ̤ܘܝܼ ܪܵܚܡܵܐ ܠܟܼܠܢܵܫ: ܘܲܡܫܵܘܚܕܼܵܐ
ܒܪܸܥܝܵܢܵܟܼ܀ ܐܸܫܬܵܘܬܲܦ ܒܚܲܫܵܐ ܕܟܼܠ: ܘܲܒܼܦܲܓܼܪܵܟܼ ܗ̤ܘܝܼ ܪܲܚܝܼܩ
ܡ̣ܢ ܟܠ܀ ܠܐ̄ܢܵܫ: ܠܵܐ ܬܲܟܸܣ. ܘܲܠܐ̄ܢܵܫ: ܠܵܐ ܬܟܼܵܘܸܢ: ܐܵܦܠܵܐ
ܠܐܲܝܠܹܝܢ ܕܒܼܝܼܫܝܼܢ ܤܲܓܿܝܼ ܒܕܼܘܼܒܵܪ̈ܲܝܗܘܿܢ܀ ܦܪܘܿܣ ܓܵܠܵܟܼ ܥܲܠ
ܚܲܛܵܝܵܐ: ܘܟܲܤܵܐ ܥܠܵܘܗܝ. ܐܸܢ ܠܵܐ ܡܸܫܟܲܚ ܐܲܢ̄ܬܿ ܕܲܬܼܤܝܼܡ ܥܲܠ
ܢܲܦܫܵܟܼ ܤܘܼܪ̈ܚܵܢܵܘܗܝ: ܘܲܬܼܩܲܒܸܠ ܚܠܵܦܵܘܗܝ ܡܲܪܕܘܼܬܼܵܐ: ܐܵܦܸܢ
ܡܦܲܪܤܵܝܘܼ ܬܚܲܡܤܸܢ ܕܠܵܐ ܬܦܲܪܤܹܝܘܗܝ܀ ܠܵܐ ܬܸܨܸܐ ܡܸܛܠ
ܟܲܪܤܵܐ܀ ܘܠܵܐ ܬܸܤܢܸܐ ܚܠܵܦ ܐܝܼܩܵܪܵܐ܀ ܘܠܵܐ ܬܸܪܚܲܡ ܕܲܝܵܢܘܼܬܼܵܐ܀
ܗ̤ܘܲܝܬܿ ܝܵܕܲܥ̇ ܐܵܚܝ: ܕܡܸܛܠܗܵܢܵܐ ܗܵܘܹ̇ܝܢܢ ܠܓܼܵܘ ܡ̣ܢ
ܬܲܪܥܵܐ: ܐܲܝܟܼ ܕܠܵܐ ܢܸܕܲܥ ܤܘܼܥܪ̈ܵܢܹܐ ܒܝܼ̈ܫܹܐ ܕܲܒܼܢܲܝ̈ܢܵܫܵܐ܀
ܕܟܲܕܼ ܠܟܼܠܢܵܫ ܐܲܝܟܼ ܕܲܠܛܵܒܹ̈ܐ ܢܸܚܙܸܐ: ܢܸܡܛܸܐ ܠܕܲܟܼܝܘܼܬܼܵܐ
ܒܬܲܪܥܝܼܬܲܢ. ܐܸܢܕܹܝܢ ܘܐܵܦ ܚܢܲܢ ܢܸܗܘܸܐ ܡܲܟܿܤܵܢܹ̈ܐ ܘܪ̈ܵܕܼܘܿܝܹܐ: ܘܕܲܝܢܹ̈ܐ
ܘܬܼܵܒܼ̈ܘܿܥܹܐ: ܘܒܼܵܨ̈ܘܿܝܹܐ: ܒܡܲܢ̣ܘܼ ܕܲܤܢܸܐ ܡܵܘܬܿܒܼܵܐ ܕܒܲܡܕܼܝܼ̈ܢܵܬܼܵܐ
ܡ̣ܢ ܥܘܼܡܪܵܐ ܕܲܒܼܡܲܕܼܒܿܪܵܐ؟ ܐܸܢ ܠܵܐ ܐܝܼܬܲܝܟ ܫܲܠܝܵܐ ܒܠܸܒܵܟܼ: ܗ̤ܘܝܼ
ܫܲܠܝܵܐ ܒܠܸܫܵܢܵܟܼ܀ ܐܸܢ ܠܵܐ ܡܨܸܐ ܐܲܢ̄ܬܿ ܕܬܸܗܘܸܐ ܡܬܲܟܿܤܵܢܵܐ
ܕܚܘܼ̈ܫܵܒܲܝܟܼ: ܗ̤ܘܝܼ ܡܛܲܟܿܤܵܢܵܐ ܕܪܸ̈ܓܼܫܲܝܟ܀ ܐܸܢ ܠܵܐ ܐܝܼܬܲܝܟ ܡܫܵܘܚܕܼܵܐ
ܒܬܲܪܥܝܼܬܼܵܟܼ: ܗ̤ܘܝܼ ܡܫܵܘܚܕܼܵܐ ܒܦܲܓܼܪܵܟܼ܀ ܐܸܢ ܠܵܐ ܡܨܸܐ ܐܲܢ̄ܬܿ ܕܬܸܫܗܲܪ
ܥܲܠ ܪܸ̈ܓܼܠܲܝܟܼ: ܫܗܲܪ ܥܲܠ ܬܸܫܘܼܝܼܬܼܵܟ܀ ܐܸܢ ܠܵܐ ܤܵܦܹ̇ܩ ܐܲܢ̄ܬܿ
ܠܒܼܵܘ̈ܬܹܐ: ܨܘܼܡ ܐܵܦܸܢ ܪܲܡܫܵܝܵܐ܀ ܘܐܸܢ ܠܵܐ ܤܵܦܹ̇ܩ ܐܲܢ̄ܬܿ ܠܨܵܘܡܵܐ
pb. 351
ܪܲܡܫܵܝܵܐ: ܛܲܪ ܐܵܦܸܢ ܡ̣ܢ ܤܲܒܼܥܘܼܬܼܵܐ܀ ܠܵܐ ܐܝܼܬܲܝܟ ܩܲܕܝܼܫܵܐ ܒܠܸܒܵܟܼ:
ܗ̤ܘܝܼ ܩܲܕܝܼܫܵܐ ܒܦܲܓܼܪܵܟܼ܀ ܘܐܸܢ ܠܵܐ ܐܝܼܬܲܝܟ ܐܲܒܼܝܼܠܵܐ ܒܠܸܒܵܟܼ:
ܐܸܬܼܥܲܛ̄ܦ ܐܸܒܼܠܵܐ ܐܵܦܸܢ ܥܲܠ ܦܲܪܨܘܿܦܵܟܼ܀ ܠܵܐ ܡܨܸܐ ܐܲܢ̄ܬܿ ܕܬܸܙܕܲܕܲܩ:
ܗ̤ܘܝܼ ܡܡܲܠܸܠ ܐܲܝܟܼ ܚܲܛܵܝܵܐ܀ ܠܵܐ ܐܝܼܬܲܝܟ ܥܵܒܹ̇ܕ ܫܲܝܢܵܐ: ܠܵܐ ܬܸܗܘܸܐ
ܐܵܦ ܕܵܠܘܿܚܵܐ܀ ܠܵܐ ܡܸܫܟܲܚ ܐܲܢ̄ܬܿ ܕܬܸܬܼܟܲܫܲܪ: ܗ̤ܘܝܼ ܒܬܲܪܥܝܼܬܼܵܟܼ
ܐܲܝܟܼ ܫܲܦܠܵܐ܀ ܠܵܐ ܐܝܼܬܲܝܟ ܙܲܟܵܝܵܐ: ܠܵܐ ܬܸܫܬܓܲܪ ܥܲܠ ܚܲܝܵܒܹ̈ܐ܀
ܠܵܐ ܤܵܦܹ̇ܩ ܐܲܢ̄ܬܿ ܕܬܸܤܟܘܿܪ ܦܘܼܡܵܐ ܕܐܲܝܢܵܐ ܕܲܡܡܲܠܸܠ ܥܲܠ
ܚܲܒܼܪܹܗ: ܛܲܪ ܐܵܦܸܢ ܢܲܦܫܵܟܼ: ܕܠܵܐ ܬܸܗܘܸܐ ܠܹܗ ܫܵܘܬܵܦܵܐ܀
ܕܲܥ ܕܐܸܢ ܡܸܢܵܟܼ ܬܸܦܘܿܩ ܢܘܼܪܵܐ ܘܬܼܵܘܩܸܕܼ ܠܲܐ̄ܚܪ̈ܵܢܹܐ: ܢܲܦܫܵܬܼܵܐ
ܕܟܼܠ ܕܤܵܪܟܵܐ ܒܗܘܿܢ ܡ̣ܢ ܗܵܝ̇ ܢܘܼܪܵܐ: ܒܐܝܼܕܲܝ̈ܟ ܡܸܬܿܬܲܒܼ̈ܥܵܢ.
ܘܐܸܢ ܐܲܢ̄ܬܿ ܠܵܐ ܬܲܪܡܸܐ ܢܘܼܪܵܐ: ܫܵܠܹ̇ܡ ܐܲܢ̄ܬܿ ܠܐܲܝܢܵܐ ܕܪܵܡܹ̇ܐ:
ܘܲܡܢܵܚ ܐܲܢ̄ܬܿ ܒܹܗ ܒܤܘܼܥܪܵܢܵܐ: ܡܫܵܘܬܸܦ ܐܲܢ̄ܬܿ ܥܲܡܹܗ ܒܕܼܝܼܢܵܐ܀
ܐܸܢ ܠܢܝܼܚܘܼܬܼܵܐ ܬܸܪܚܲܡ: ܬܸܗܘܸܐ ܡܫܲܝܢܵܐ. ܘܐܸܢ ܠܫܲܝܢܵܐ ܬܸܫܬܿܘܸܐ:
ܬܸܚܕܸܐ ܒܟܼܠܙܒܲܢ܀ ܒܥܝܼ ܤܘܼܟܵܠܵܐ: ܘܠܵܐ ܕܲܗܒܼܵܐ܀ ܠܒܲܫ ܡܘܼܟܵܟܼܵܐ:
ܘܠܵܐ ܒܘܼܨܵܐ܀ ܩܢܝܼ ܫܲܝܢܵܐ: ܘܠܵܐ ܡܲܠܟܿܘܼܬܼܵܐ܀ ܠܲܝܬܿ ܕܡܸܤܬܲܟܿܠܵܢ
ܘܠܵܐ ܡܲܟܿܝܼܟܼ. ܘܲܐܲܝܢܵܐ ܕܠܵܐ ܡܲܟܿܝܼܟ: ܐܵܦܠܵܐ ܡܸܤܬܲܟܿܠܵܢ܀ ܠܲܝܬܿ
ܡܲܟܿܝܼܟܼ ܘܠܵܐ ܡܫܲܝܲܢ. ܘܐܲܝܢܵܐ ܕܠܵܐ ܡܫܲܝܲܢ: ܐܵܦܠܵܐ ܡܲܟܿܝܼܟܼ܀ ܠܲܝܬܿ
ܕܲܡܫܲܝܲܢ: ܘܠܵܐ ܚܵܕܹܐ܀ ܟܲܕܼ ܒܟܼܠ ܐܘܼܪ̈ܚܵܬܼܵܐ ܕܐܝܼܬܼ ܪܵܕܹܝܢ ܒܢܲܝ̈ܢܵܫܵܐ
ܒܥܵܠܡܵܐ ܗܵܢܵܐ: ܠܵܐ ܡܸܫܟܿܚܝܼܢ ܫܲܝܢܵܐ: ܥܕܲܡܵܐ ܕܩܵܪܒܿܝܼܢ ܠܘܵܬܼ
ܤܲܒܼܪܵܐ ܕܒܲܐܠܵܗܵܐ܀ ܠܵܐ ܡܸܫܬܲܝܲܢ ܠܸܒܵܐ ܡ̣ܢ ܛܘܼܪ̈ܵܦܹܐ ܘܬܼܘܼ̈ܩܠܵܬܼܵܐ:
ܥܕܲܡܵܐ ܕܡܸܬܼܩܲܪܲܒܼ ܠܗܵܪܟܵܐ. ܘܗ̤ܘ ܤܲܒܼܪܵܐ ܡܫܲܝܸܢ ܠܗܘܿܢ:
ܘܐܵܫܹ̇ܕܼ ܚܲܕܼܘܼܬܼܵܐ ܒܠܸܒܿܗܘܿܢ. ܘܗܵܕܲܐ ܗ̣̄ܝ ܗܵܝ̇ ܕܐܸܡ݂ܲܪ ܗܵܘ̇ ܦܘܼܡܵܐ
pb. 352
ܤܓܼܝܼܕܼܵܐ ܡܠܸܐ ܩܘܼ̈ܕܫܹܐ: ܕܬܼܵܘ ܠܘܵܬܼܝ ܟܠܟܼܘܿܢ ܠܐܲܝ̈ܵܐ ܘܲܫܩܝܼ̈ܠܲܝ
ܡܵܘ̈ܒܿܠܹܐ: ܘܐܸܢܵܐ ܐܲܢܚܝܼܟܼܘܿܢ. ܩܪܘܿܒܼܘ ܠܲܡ ܠܘܵܬܼ ܤܲܒܼܪܵܐ ܕܒܼܝܼ:
ܘܦܘܼܫܘ ܡ̣ܢ ܐܘܼܪ̈ܚܵܬܼܵܐ ܤܲܓܝܼ̈ܐܵܬܼܵܐ: ܘܡܸܬܿܬܿܢܝܼܚܝܼܢ ܐܢ̄ܬܿܘܿܢ ܡ̣ܢ
ܥܲܡ̈ܠܹܐ: ܘܡ̣ܢ ܕܸܚܠܬܼܵܐ. ܤܲܒܼܪܵܐ ܕܒܲܐܠܵܗܵܐ: ܡܪܝܼܡ ܠܸܒܵܐ. ܕܸܚܠܬܼܵܐ
ܕܓܹܗܲܢܵܐ: ܬܵܒܼܪܵܐ ܠܹܗ܀ ܢܘܼܗܪܵܐ ܕܪܸܥܝܵܢܵܐ: ܡܵܘܠܸܕܼ ܗܲܝܡܵܢܘܼܬܼܵܐ.
ܘܗܲܝܡܵܢܘܼܬܼܵܐ ܡܵܘܠܕܼܵܐ: ܒܘܼܝܵܐܵܐ ܕܤܲܒܼܪܵܐ. ܘܤܲܒܼܪܵܐ: ܡܲܫܥܸܢ ܠܸܒܵܐ܀
ܗܲܝܡܵܢܘܼܬܼܵܐ ܐܝܼܬܹܝܗ̇: ܓܸܠܝܵܢܵܐ ܕܤܘܼ̈ܟܵܠܹܐ. ܡܵܐ ܕܲܚܫܸܟܼ ܪܸܥܝܵܢܵܐ:
ܡܸܬܿܛܲܫܝܵܐ ܗܲܝܡܵܢܘܼܬܼܵܐ. ܘܫܵܠܛܵܐ ܒܲܢ ܕܸܚܠܬܼܵܐ: ܘܦܵܤ̇ܩܵܐ ܠܹܗ
ܠܤܲܒܼܪܲܢ. ܗܲܝܡܵܢܘܼܬܼܵܐ ܕܡ̣ܢ ܝܘܼܠܦܵܢܵܐ: ܠܵܐ ܡܚܲܪܪܵܐ ܠܐ̄ܢܵܫ ܡ̣ܢ
ܡܲܤܒܿܪܵܢܘܼܬܼܵܐ ܘܦܘܼ̈ܠܵܓܹܐ: ܐܸܠܵܐ ܐܲܝܕܵܐ ܕܲܒܼܤܘܼ̈ܟܵܠܹܐ ܕܵܢܚܵܐ. ܘܡܸܬܼܩܲܪܝܵܐ:
ܓܸܠܝܵܢܹܗ ܕܲܫܪܵܪܵܐ܀ ܟܡܵܐ ܕܠܐܠܵܗܵܐ ܡܸܤܬܲܟܲܠ ܗܵܘܢܵܐ ܐܲܝܟܼ ܐܲܠܵܗܵܐ:
ܒܝܲܕܼ ܓܸܠܝܵܢܵܐ ܕܤܘܼ̈ܟܵܠܹܐ: ܠܵܐ ܩܵܪܒܵܐ ܕܸܚܠܬܼܵܐ ܠܘܵܬܼ ܠܸܒܵܐ. ܡܵܐ
ܕܡܸܫܬܲܒܼܩܝܼܢܲܢ ܒܚܸܫܟܵܐ: ܘܡܵܘܒܿܕܼܝܼܢܲܢ ܠܗܵܢܵܐ ܤܘܼܟܵܠܵܐ ܐܲܝܟܼ
ܕܢܸܬܼܡܲܟܲܟܼ: ܥܵܕܼܝܵܐ ܥܠܲܝܢ ܕܸܚܠܬܼܵܐ: ܕܲܬܼܩܲܪܒܲܢ ܠܡܘܼܟܵܟܼܵܐ
ܘܠܲܬܼܝܵܒܼܘܼܬܼܵܐ܀
ܒܪܵܐ ܕܐܲܠܵܗܵܐ ܨܠܝܼܒܼܵܐ ܤܲܝܒܲܪ: ܚܲܛܵܝܹ̈ܐ ܐܸܬܼܠܲܒܲܒܼܘ ܒܲܬܼܝܵܒܼܘܼܬܼܵܐ܀
ܐܸܢ ܐܸܤܟܹܡܵܐ ܕܲܬܼܝܵܒܼܘܼܬܼܵܐ ܐܲܗܦܸܟܼ ܪܘܼܓܼܙܵܐ ܡ̣ܢ ܡܲܠܟܵܐ: ܠܵܐ
ܡܲܤܠܸܐ ܗܵܫܵܐ ܫܪܵܪܵܐ ܕܪܸ̈ܥܝܵܢܲܝܟܿܘܿܢ. ܐܸܢ ܠܗܵܘ̇ ܕܝܵܕܲܥ̇ ܗ̄ܘ̣ܵܐ ܠܹܗ
ܕܠܵܐ ܫܲܪܝܼܪ: ܐܸܤܟܹܡܵܐ ܕܡܲܟܿܝܼܟܼܘܼܬܼܵܐ ܐܲܗܦܸܟܼ ܪܘܼܓܼܙܵܐ ܡܸܢܹܗ: ܟܡܵܐ
ܠܟܼܘܿܢ ܝܲܬܝܼܪܵܐܝܼܬܼ: ܕܒܲܫܪܵܪܵܐ ܚܵܫ̇ܝܼܢ ܐܢ̄ܬܿܘܿܢ ܥܲܠ ܤܘܼܪ̈ܚܵܢܲܝܟܿܘܿܢ!
ܤܵܦܹ̇ܩ ܠܹܗ ܚܲܫܵܐ ܕܪܸܥܝܵܢܵܐ: ܚܠܵܦ ܤܵܟܼܵܐ ܕܥܲܡ̈ܠܲܝ ܦܲܓܼܪܵܐ: ܐܲܝܟܼ
ܡܸܠܬܹܗ ܕܲܡܦܲܫܩܵܢܵܐ܀ ܢܵܘܤܵܐ ܕܛܲܝܒܿܘܼܬܼܵܐ ܐܝܼܬܼܵܘܗܝ: ܡ̇ܢ ܕܲܡܡܡܲܙܲܓܼ
pb. 353
ܒܐܲܠܵܗܵܐ ܒܐܲܡܝܼܢܘܼܬܼ ܪܸܢܝܵܐ ܕܲܒܼܕܼܝܼܠܹܗ. ܡܵܢܲܐ ܗ̣̄ܝ ܡܲܪܢܝܼܬܼܵܐ
ܕܲܒܼܕܼܝܼܠܹܗ؟ ܦܸܗܝܵܐ ܐܲܡܝܼܢܵܐ ܕܒܲܢܝܵܚܹܗ: ܘܚܲܫܵܐ ܕܲܒܼܟܼܠ ܙܒܲܢ:
ܘܲܫܚܝܼܩܘܼܬܼ ܪܸܢܝܵܐ ܐܲܡܝܼܢܵܐ ܕܲܚܠܵܦ ܐܲܝܠܹܝܢ ܕܡܸܛܠ ܕܵܘܝܘܼܬܹܗ ܕܲܟܼܝܵܢܵܐ
ܕܒܲܐܡܝܼܢܘܼ ܦܵܝ̈ܫܵܢ ܡ̣ܢ ܫܘܼܡܠܵܝܵܐ: ܘܟܿܪܝܘܼܬܼܵܐ ܐܲܡܝܼܢܬܵܐ ܕܥܲܠ ܐܲܦܲܝ̈ܗܹܝܢ:
ܕܲܛܥܝܼܢ ܪܸܥܝܵܢܵܐ ܒܙܵܘ̈ܥܹܐ ܚܲܤܝܼ̈ܢܹܐ: ܘܲܡܩܲܪܸܒܼ ܩܕܼܵܡܵܘܗܝ ܒܲܬܼܘܵܬܼܵܐ
ܕܡܘܼܟܵܟܼܵܐ ܐܲܝܟܼ ܩܘܼܪܒܵܢܵܐ ܒܲܨܠܘܿܬܹܗ. ܘܲܟܼܡܵܐ ܕܡܲܨܝܵܐ ܒܲܤܝܵܐ
ܠܹܗ ܨܸܦܬܼܵܐ ܕܥܲܠ ܦܲܓܼܪܵܐ: ܐܲܝܟܼ ܚܲܝܠܹܗ. ܗܵܢܵܘ ܕܲܛܥܝܼܢ ܒܢܲܦܫܹܗ
ܕܘܼܟܼܪܵܢܵܐ ܐܲܡܝܼܢܵܐ ܕܐܲܠܵܗܵܐ: ܐܲܝܟܼ ܕܐܸܡ݂ܲܪ ܛܘܼܒܼܵܢܵܐ ܒܵܤܝܼܠܸܣ
ܐܲܦܸܤܩܘܿܦܵܐ. ܨܠܘܿܬܼܵܐ ܠܲܡ ܕܠܵܐ ܦܸܗܝܵܐ ܐܝܼܬܹܝܗ̇: ܐܲܝܕܵܐ ܕܥܵܒܼ̇ܕܵܐ
ܒܵܗ̇ ܒܢܲܦܫܵܐ ܪܸܢܝܵܐ ܐܲܡܝܼܢܵܐ ܕܐܲܠܵܗܵܐ. ܐܵܦ ܓܹܝܪ ܗܵܢܵܘ ܠܲܡ ܡܲܥܡܪܵܐ
ܕܐܲܠܵܗܵܐ: ܕܲܒܼܝܲܕܼ ܥܘܼܗܕܵܢܵܐ ܐܲܡܝܼܢܵܐ ܕܥܵܗܕܝܼܢܲܢ ܠܹܗ: ܒܲܢ ܗ̄ܘ̣
ܥܵܡܲܪ. ܗܵܢܵܘ ܕܹܝܢ: ܒܪܸܢܝܵܐ ܫܚܝܼܩܵܐ ܕܲܒܼܠܸܒܵܐ ܒܥܘܼܬܵܕܼܵܐ ܕܲܢܝܵܚܵܘ̈ܗܝ.
ܚܘܼ̈ܫܒܹܐ ܒܝܼ̈ܫܹܐ ܕܠܵܐ ܡ̣ܢ ܨܸܒܼܝܵܢܵܐ: ܡ̣ܢ ܫܲܪܝܘܼܬܼܵܐ ܕܡ̣ܢ ܩܕܼܵܡܲܝܗܘܿܢ
ܗܵܘܹ̇ܝܢ܀ ܐ̄ܢܵܫܵܐ: ܐܲܚܲܝ̈: ܕܐܲܝܟܼ ܕܲܠܤܘܼܡܵܟܼܵܐ ܒܲܠܚܘܿܕܼ ܨܵܒܹ̇ܝܢ ܕܲܢܢܝܼܚܘܼܢ
ܠܦܲܓܼܪܵܐ ܩܲܠܝܼܠ ܡܸܛܠ ܦܘܼܠܚܵܢܵܐ ܕܐܲܠܵܗܵܐ: ܐܲܝܟܼ ܕܢܸܬܼܚܲܝܠܘܼܢ
ܘܬܼܘܼܒܼ ܢܸܗܦܟܼܘܼܢ ܠܦܘܼܠܚܵܢܗܘܿܢ. ܒܝܵܘ̈ܡܵܬܼܵܐ ܙܥܘܿܪܹ̈ܐ ܕܲܢܝܵܚܲܢ:
ܠܵܐ ܢܸܫܪܸܐ ܙܗܝܼܪܘܼܬܲܢ ܓܡܲܝܼܪܵܐܝܼܬܼ: ܘܢܸܬܸܠ ܟܠܵܗ̇ ܢܲܦܫܲܢ ܠܫܲܪܝܘܼܬܼܵܐ:
ܐܲܝܟܼ ܐ̄ܢܵܫܵܐ ܕܠܵܐ ܬܘܼܒܼ ܤܝܼܡܵܐ ܠܗܘܿܢ ܠܡܸܦܢܵܐ ܠܦܘܼܠܚܵܢܗܘܿܢ܀
ܐܲܝܠܹܝܢ ܕܲܒܼܙܲܒܼܢܵܐ ܕܫܲܝܢܵܐ ܓܹܐܪܹ̈ܐ ܒܵܠ̇ܥܝܼܢ: ܗܵܠܹܝܢ ܐܸܢܘܿܢ ܕܡ̣ܢ
ܦܵܪܹܗ̄ܤܝܼܵܐ ܕܨܸܒܼܝܵܢܵܐ: ܡܠܘܿܐܹ̈ܐ ܒܓܼܵܘ ܢܲܦܫܗܘܿܢ ܚܡܲܠ̣ܘ. ܘܲܠܒܼܘܼܫܵܐ
ܕܨܵܐܘܼܬܼܵܐ ܕܒܲܐܬܼܪܵܐ ܩܲܕܝܼܫܵܐ ܚܵܙܹ̇ܝܢ ܕܲܠܒܼܝܼܫܝܼܢ: ܗܵܢܵܘ ܕܹܝܢ: ܒܥܸܕܵܢܵܐ
pb. 354
ܕܐܲܠܵܗܵܐ ܒܢܲܦܫܗܘܿܢ ܕܐܹ̇ܠ ܗܵܠܹܝܢ ܐܸܢܘܿܢ: ܕܲܒܼܙܲܒܼܢܵܐ ܕܫܲܪܝܘܼܬܼܵܐ ܙܩܲܪܘ.
ܗܵܠܹܝܢ ܕܲܒܼܙܲܒܼܢܵܐ ܕܲܨܠܘܿܬܼܵܐ ܕܟܼܝܼܬܼܵܐ: ܕܟܲܕܼ ܢܸܒܼܥܸܐ ܠܲܡܩܲܪܵܒܼܘܼ
ܘܡܲܒܼܗܬܼܝܼܢ ܠܲܢ: ܗܵܠܹܝܢ ܐܸܢܘܿܢ ܕܲܒܼܙܲܒܼܢܵܐ ܕܒܲܤܝܘܼܬܼܵܐ ܕܪܸ̈ܓܼܫܲܝܢ ܥܒܲܕܼܢ
ܐܸܢܘܿܢ ܒܲܝܬܵܝܹ̈ܐ܀ ܡܥܲܕܪܵܐ ܗ̣̄ܝ ܙܗܝܼܪܘܼܬܼܵܐ ܠܒܲܪܢܵܫܵܐ: ܝܲܬܝܼܪ ܡ̣ܢ
ܥܲܡ̈ܠܹܐ. ܘܲܡܤܲܓܦܵܐ ܠܹܗ ܫܲܪܝܘܼܬܼܵܐ: ܝܲܬܝܼܪ ܡ̣ܢ ܢܝܵܚܵܐ. ܡ̣ܢ ܢܝܵܚܵܐ
ܓܹܝܪ: ܩܪ̈ܵܒܹܐ ܒܲܝܬܵܝܹ̈ܐ ܗܵܘܹ̇ܝܢ. ܕܐܵܦܸܢ ܫܵܚ̇ܩܝܼܢ ܠܹܗ ܠܐ̄ܢܵܫ: ܫܲܠܝܼܛ
ܠܹܗ ܠܡܸܫܪܵܐ ܐܸܢܘܿܢ. ܟܡܵܐ ܕܐܲܪܦܝܼ ܠܲܢܝܵܚܵܐ: ܘܲܥܛܲܦ ܬܘܼܒܼ ܠܐܲܬܼܪܵܐ
ܕܥܲܠܡܵܐ: ܐܸܫܬܲܬܲܩܘ ܘܲܥܪܲܩ̣ܘ ܡܸܢܹܗ. ܠܵܐ ܗܵܟܲܢܵܐ ܐܵܦ ܡܸܕܸܡ
ܕܡ̣ܢ ܫܲܪܝܘܼܬܼܵܐ ܡܸܬܼܝܼܠܸܕܼ: ܐܵܦܸܢ ܡܸܬܼܝܲܠܕܵܐ ܗ̤ܝ ܪܲܦܝܘܼܬܼܵܐ ܡ̣ܢ
ܢܝܵܚܹ̈ܐ: ܡܵܐ ܓܹܝܪ ܕܲܥܕܲܟܹܝܠ ܒܐܲܬܼܪܵܐ ܕܚܹܐܪܘܼܬܹܗ ܐܝܼܬܼܵܘܗܝ:
ܡܸܫܟܲܚ ܗ̣̄ܘ ܬܘܼܒܼ ܢܸܚܛܘܿܦ ܢܕܲܒܲܪܝܵܬܹܗ ܠܛܲܟܼܤܵܐ ܕܢܵܡܘܿܤܵܘ̈ܗܝ.
ܒܐܲܬܼܪܵܐ ܕܚܹܐܪܘܼܬܹܗ ܐܝܼܬܼܵܘܗܝ ܥܕܲܟܹܝܠ: ܒܫܲܪܝܘܼܬܼܵܐ ܕܹܝܢ: ܢܦܲܩ̣
ܠܹܗ ܡ̣ܢ ܐܲܬܼܪܵܐ ܕܚܹܐܪܘܼܬܼܵܐ. ܐܸܠܵܘܼ ܒܲܪܢܵܫܵܐ ܓܡܝܼܪܵܐܝܼܬܼ ܟ̱ܠܵܗ̇
ܙܗܝܼܪܘܼܬܹܗ ܡܸܢܹܗ ܠܵܐ ܢܸܫܕܸܐ: ܠܵܐ ܡܸܬܼܢܲܨܲܥ ܒܲܩܛܝܼܪܵܐ: ܕܲܕܼܠܵܐ
ܒܨܸܒܼܝܵܢܹܗ ܢܸܬܼܥܨܸܐ ܠܡܸܬܿܛܦܵܤܘܼ ܠܐܲܝܠܹܝܢ ܕܠܵܐ ܡܢܵܚ. ܘܐܸܠܘܼ
ܬܚܘܼܡܵܐ ܕܚܹܐܪܼܬܹܗ ܓܡܝܼܪܵܐܝܼܬܼ ܠܵܐ ܢܲܪܦܸܐ: ܠܵܐ ܥܵܪܨܝܼܢ ܥܠܵܘܗܝ
ܓܸܕܼܫܹ݁ܐ: ܕܦܵܟܼܪܝܼܢ ܠܹܗ ܠܐܵܢܲܢܩܹܐ ܕܲܢܩܘܼܡ ܠܩܘܼܒܼܠܵܗ̇ ܠܵܐ
ܡܲܨܝܵܐ܀
ܠܵܐ ܬܲܪܦܸܐ ܠܐܲܬܼܪܵܐ ܕܚܹܐܪܘܼܬܼܵܐ ܒܝܲܕܼ ܡ̣ܢ ܪܸ̈ܓܼܫܲܝܟ: ܐܘܿ
ܒܲܪܢܵܫܵܐ. ܕܲܠܡܵܐ ܬܘܼܒܼ ܠܡܸܥܲܠ ܠܬܲܡܵܢ: ܠܵܐ ܡܸܫܟܲܚ ܐܲܢ̄ܬܿ.
ܢܝܵܚܵܐ ܡ̇ܢ: ܠܲܛܠܵܝܹ̈ܐ ܒܲܠܚܘܿܕܼ ܡܤܲܓܸܦ. ܫܲܪܝܘܼܬܼܵܐ ܕܹܝܢ: ܐܵܦ
pb. 355
ܠܲܓܼܡܝܼܪܹ̈ܐ ܘܲܠܤܵܒܹ̈ܐ. ܐܲܝܠܹܝܢ ܕܹܝܢ ܕܡ̣ܢ ܢܝܵܚܵܐ ܕܚܘܼ̈ܫܵܒܹܐ ܒܝܼ̈ܫܹܐ
ܐܸܬܿܕܒܲܪܘ: ܬܘܼܒܼ ܡܸܛܠ ܙܗܝܼܪܘܼܬܼܵܐ ܥܛܲܦ̣ܘ ܩܵܡ̣ܘ ܥܲܠ ܪܵܘܡܵܐ
ܕܕܼܘܼܒܵܪܹ̈ܐ ܛܵܒܹ̈ܐ. ܐܲܝܠܹܝܢ ܓܹܝܪ ܕܲܒܼܬܼܘܼܟܼܠܵܢܵܐ ܕܥܲܡ̈ܠܹܐ ܒܲܙܗܝܼܪܘܼܬܼܵܐ
ܐܲܗܡ̣ܝܼܘ: ܡ̣ܢ ܪܵܘܡܵܐ ܕܕܼܘܼܒܵܪܹ̈ܐ ܠܘܵܬܼ ܫܲܪܝܘܼܬܼܵܐ ܕܚܲܝܹ̈ܐ ܐܸܫܬܒܼܝܼܘ܀
ܐܝܼܬܼ ܕܒܲܐܬܼܪܵܐ ܕܲܒܼܥܸܠܕܒܼܵܒܹ̈ܐ ܒܠܲܥ̣ܘ: ܘܲܒܼܙܲܒܼܢܵܐ ܕܫܲܝܢܵܐ ܡܝܼܬܼܘ.
ܘܐܝܼܬܼ ܕܲܒܼܥܸܠܲܬܼ ܬܹܐܓܼܘܼܪܬܵܐ ܕܚܲܝܹ̈ܐ ܢܦܲܩ̣ܘ: ܘܲܫܦܵܝܵܐ ܠܢܲܦܫܗܘܿܢ
ܫܩܲܠ̣ܘ܀ ܠܵܐ ܗ̄ܘ̣ܵܐ ܡܵܐ ܕܡܸܫܬܲܪܥܝܼܢ ܚ̄ܢܲܢ ܒܲܨܒܼܘܼܢ ܢܸܬܿܬܿܥܝܼܩ:
ܐܸܠܵܐ ܡܵܐ ܕܲܡܩܵܘܹܝܢܲܢ ܒܵܗ̇. ܫܵܪ̈ܥܵܬܼܵܐ ܕܹܝܢ: ܐܵܦ ܠܲܙܗܝܼܪܹ̈ܐ ܓܵܕܼ̈ܫܵܢ
ܐܝܼܬܼ ܐܸܡܲܬܼܝ. ܦܵܘܫܵܐ ܕܹܝܢ ܕܲܒܼܗܹܝܢ: ܡܝܼܬܼܘܼܬܼܵܐ ܗ̣̄ܝ ܕܠܲܓܼܡܵܪ.
ܚܲܫܵܐ ܕܤܵܒܼܠܝܼܢܲܢ ܚܠܵܦ ܚܲܕܼܚ̈ܕܼܵܢܵܝܵܬܼܵܐ ܕܡܸܬܼܥܲܒܼܪܝܼܢܲܢ ܒܗܹܝܢ
ܥܵܪܨܵܐܝܼܬܼ. ܕܘܼܟܲܬܼ ܦܘܼܠܚܵܢܵܐ ܕܲܟܼܝܵܐ ܠܲܢ ܡܸܬܼܚܫܸܒܼ ܡ̣ܢ ܛܲܝܒܿܘܼܬܼܵܐ
ܛܥܝܼܢܲܬܼ ܚܲܝܹ̈ܢ܀ ܐܲܝܢܵܐ ܕܲܒܼܤܘܼܟܵܝܵܐ ܚܵܛܹ̇ܐ ܒܬܸܢܝܵܐ ܕܫܘܼܪܥܬܹܗ:
ܥܲܡ ܐܲܠܵܗܵܐ ܒܨܸܢܥܬܼܵܐ ܡܗܲܠܸܟܼ. ܠܗܵܢܵܐ ܟܲܕܼ ܠܵܐ ܝܵܕܲܥ
ܫܵܘܪܵܐ ܥܠܵܘܗܝ ܨܵܦܲܚܬܵܐ ܕܲܡܤܵܡ ܒܪܹܫܵܐ: ܘܠܵܐ ܡܲܕܪܸܟܼ ܠܙܲܒܼܢܵܐ
ܕܤܘܼܟܵܝܹܗ܀
ܟܠ ܒܲܪܢܵܫܵܐ ܕܲܫܪܹܝܢ ܪܸ̈ܓܼܫܵܘܗܝ: ܫܪܸܐ ܠܸܒܹܗ. ܦܘܼܠܚܵܢܵܐ
ܕܠܸܒܵܐ: ܐܲܤܘܼܪܵܐ ܗ̄ܘ̣ ܕܗܲܕܵܡܹ̈ܐ ܒܲܪ̈ܵܝܹܐ. ܐܸܢ ܐܝܼܬܼ ܡܲܢ ܕܲܒܼܦܘܼܪܫܵܢܵܐ
ܥܵܒܹ̇ܕܼ ܠܵܗ̇ ܠܗܵܕܹܐ ܐܲܝܟܼ ܐܲܒܼܵܗ̈ܬܼܵܐ ܕܡ̣ܢ ܩܕܼܵܡܲܝܢ: ܝܑܼܕܼܝܼܥܵܐ ܗ̣̄ܝ
ܓܹܝܪ ܡ̣ܢ ܐ̄ܚܪ̈ܵܢܝܵܬܼܵܐ ܕܡܸܬܼܚܲܙ̈ܝܵܢ ܒܹܗ: ܕܠܵܐ ܐܲܤܝܼܪ ܒܝܘܼܬܼܪ̈ܵܢܹܐ
ܦܲܓܼܪ̈ܵܢܵܝܹܐ: ܘܠܵܐ ܪܵܚܹ̇ܡ ܟܸܤܦܵܐ: ܘܦܲܪܝܼܩܵܐ ܡܸܢܹܗ ܚܸܡܬܼܵܐ ܓܡܝܼܪܵܐܝܼܬܼ.
pb. 356
ܐܲܝܟܵܐ ܕܹܝܢ ܕܲܬܼܠܵܬܼ ܗܵܠܹܝܢ ܒܕܲܠܩܘܼܒܼܠܵܐ ܫܟܼܝܼ̈ܚܵܢ: ܪܸܚܡܲܬܼ ܝܘܼܬܼܪ̈ܵܢܹܐ
ܦܲܓܼܪ̈ܵܢܵܝܹܐ ܐܸܢ ܒܲܙܥܘܿܪ ܘܐܸܢ ܒܪܲܒܿ: ܘܲܕܼܠܝܼܠܘܼܬܼ ܚܸܡܬܼܵܐ: ܘܡܸܙܕܲܟܼܝܵܢܘܼܬܼܵܐ
ܕܡ̣ܢ ܟܲܪܤܵܐ: ܐܵܦܸܢ ܒܩܲܕܝܼ̈ܫܹܐ ܩܲܕܼܡܵܝܹ̈ܐ ܡܗܲܓܸܠܼ: ܕܲܥ: ܕܡ̣ܢ
ܠܵܐ ܡܤܲܝܒܿܪܵܢܘܼܬܼܵܐ ܕܲܠܓܼܵܘ ܐܝܼܬܹܝܗ̇ ܫܲܪܝܘܼܬܼܵܐ ܕܒܲܪ̈ܵܝܵܬܹܗ: ܘܠܵܐ
ܗ̄ܘ̣ܵܐ ܚܠܵܦ ܫܝܼܛܘܼܬܼ ܢܲܦܫܵܐ ܕܦܘܼܪܫܵܢܵܐ. ܘܐܸܠܵܐ: ܐܲܝܟܲܢ ܒܲܤܝܘܼܬܼܵܐ
ܕܥܲܠ ܦܲܓܪ̈ܵܢܵܝܬܼܵܐ: ܘܢܝܼܚܘܼܬܼܵܐ ܠܵܐ ܩܢܸܐ؟ ܠܫܝܼܛܘܼܬܼܵܐ ܕܦܘܼܪܫܵܢܵܐ
ܢܲܩܝܼ̈ܦܵܢ: ܠܵܐ ܐܲܤܝܼܪܘܼܬܼܵܐ ܕܒܲܨܒܼܘܼ: ܘܒܲܤܝܘܼܬܼ ܚܲܝܹ̈ܐ: ܘܪܸܚܡܲܬܼ
ܒܢܲܝ̈ܢܵܫܵܐ. ܐܸܢ ܡܥܲܬܿܕܼܵܐܝܼܬܼ ܤܵܒܹ̇ܠ ܚܘܼܤܪ̈ܵܢܹܐ ܡܸܛܠ ܐܲܠܵܗܵܐ:
ܕܟܸܐ ܡ̣ܢ ܠܓܼܵܘ. ܐܸܢ ܠܵܐ ܫܵܐܹ̇ܛ ܠܐ̄ܢܵܫ ܡܸܛܠ ܡܘܼ̈ܡܹܐ ܕܐܝܼܬܼ
ܠܹܗ: ܫܲܪܝܼܪܵܐܝܼܬܼ ܒܲܪ ܚܹܐܪܹ̈ܐ ܗ̄ܘ̣. ܐܸܢ ܠܵܐ ܤܲܘܲܚ ܠܘܼܩܒܲܠ
ܡܝܲܩܪ̈ܵܢܵܘܗܝ: ܘܡܸܬܿܬܿܙܝܼܥ ܒܦܸܓܼܥܵܐ ܕܐܲܝܠܹܝܢ ܕܠܹܗ ܠܵܐ ܫܵܠ̇ܡܝܼܢ:
ܡܝܼܬܼܵܐ ܗ̄ܘ̣ ܒܲܫܪܵܪܵܐ ܠܚܲܝܹ̈ܐ ܕܲܬܼܢܵܢ܀ ܛܵܒܲܐ ܗ̣̄ܝ ܙܗܝܼܪܘܼܬܼܵܐ ܕܦܘܼܪܫܵܢܵܐ:
ܡ̣ܢ ܕܘܼܒܵܪܹ̈ܐ ܕܟܼܠ ܐܸܤܟܹܝܡ ܕܡܸܬܼܩܲܠܚܝܼܢ ܒܟܼܠ ܡܘܼ̈ܫܚܵܢ ܕܲܒܼܢܲܝ̈ܢܵܫܵܐ܀
ܠܵܐ ܬܸܤܢܸܐ ܠܚܲܛܵܝܵܐ. ܟ̱ܠܲܢ: ܡܚܲܝܒܼܝܼܢܲܢ. ܐܸܢ ܡܸܛܠ ܐܲܠܵܗܵܐ ܗ̄ܘ̣
ܡܸܬܿܬܿܙܝܼܥ ܐܲܢ̄ܬܿ: ܒܟܼܝܼ ܥܠܵܘܗܝ. ܠܡܵܢܵܐ ܤܵܢܹ̇ܐ ܐܲܢ̄ܬܿ ܠܹܗ؟
ܠܲܚܛܵܗܵܘ̈ܗܝ ܟܲܝ ܤܵܢܹ̇ܐ ܐܲܢ̄ܬܿ؟ ܨܲܠܵܐ ܥܲܠ ܩܢܘܿܡܹܗ: ܕܒܲܡܫܝܼܚܵܐ
ܬܸܬܿܕܲܡܸܐ: ܕܠܵܐ ܪܵܓܹ̇ܙ ܗ̄ܘ̣ܵܐ ܥܲܠ ܚܲܛܵܝܹ̈ܐ: ܐܸܠܵܐ ܡܨܲܠܸܐ ܗ̄ܘ̣ܵܐ
ܥܠܲܝܗܘܿܢ. ܠܵܐ ܚ̣ܙܲܝܬܿ ܐܲܝܟܲܢ ܒܵܟܹ̇ܐ ܗ̄ܘ̣ܵܐ ܥܲܠ ܐܘܿܪܸܫܠܸܡ؟ ܒܤܲܓܝܼ̈ܐܵܬܼܵܐ
ܓܹܝܪ ܡܸܬܼܓܲܚܟܿܝܼܢܲܢ ܡ̣ܢ ܤܵܛܵܢܵܐ. ܡܸܛܠ ܡܵܢܵܐ ܠܗܵܘ̇ ܕܐܸܬܼܓܚܸܟܼ
ܐܲܟܼܘܵܬܲܢ ܡ̣ܢ ܗܵܘ̇ ܕܲܡܓܲܚܸܟܼ ܒܲܢ ܢܸܤܢܹܝܘܗܝ؟ ܠܡܵܢܵܐ ܤܵܢܹ̇ܐ ܐܲܢ̄ܬܿ
pb. 357
ܠܹܗ ܠܚܲܛܵܝܵܐ: ܐܘܿ ܒܲܢܵܫܵܐ؟ ܐܵܪܵܐ: ܕܡܸܛܠ ܡܵܢܵܐ ܠܵܐ ܙܲܕܝܼܩ
ܐܲܟܼܘܵܬܼܵܟܼ؟ ܘܐܲܝܟܵܘ ܐܝܼܬܲܝܟ ܙܲܕܝܼܩܵܐ: ܕܠܲܝܬܿ ܠܵܟܼ ܚܘܼܒܵܐ؟ ܘܐܸܢ
ܐܝܼܬܼ ܠܵܟܼ ܚܘܼܒܵܐ: ܠܡܵܢܵܐ ܠܵܐ ܒܵܟܹ̇ܐ ܐܲܢ̄ܬܿ ܥܠܵܘܗܝ: ܐܸܠܵܐ ܪܵܕܹܦ
ܐܲܢ̄ܬܿ ܠܹܗ؟ ܡ̣ܢ ܠܵܐ ܝܑܼܕܲܥܬܼܵܐ ܡܸܬܿܬܿܙܝܼܥܝܼܢ ܐ̄ܢܵܫ̈ܝܼܢ ܕܡܸܤܬܲܒܼܪܝܼܢ
ܦܵܪ̈ܘܿܫܹܐ: ܥܲܠ ܥ̇ܒܼܵܕܹ̈ܐ ܕܚܲܛܵܝܹ̈ܐ܀ ܗ̤ܘܝܼ ܟܵܪܟܿܙܵܐ ܕܛܲܝܒܿܘܼܬܹܗ
ܕܐܲܠܵܗܵܐ: ܡ̣ܢ ܗܵܝ̇ ܕܟܲܕܼ ܠܵܐ ܫܵܘܹ̇ܐ ܐܲܢ̄ܬܿ ܡܦܲܪܢܸܣ ܠܵܟܼ. ܘܟܲܕܼ
ܤܲܓܿܝܼ̈ܐܵܬܼܵܐ ܡܚܲܝܲܒܼ ܐܲܢ̄ܬܿ: ܒܬܲܥܬܹܗ ܒܵܟܼ ܠܵܐ ܝܑܼܕܼܝܼܥܵܐ. ܘܒܲܙܥܘܿܪ̈ܝܵܬܼܵܐ
ܕܲܡܚܵܘܸܐ ܐܲܢ̄ܬܿ ܨܸܒܼܝܵܢܵܐ: ܪܵܘܪ̈ܒܼܵܬܼܵܐ ܦܵܪܲܥ ܠܵܟܼ.
ܠܵܐ ܬܘܼܒܼ ܬܸܩܪܸܐ ܟܹܐܢܵܐ ܠܐܲܠܵܗܵܐ: ܕܟܹܐܢܘܼܬܹܗ ܠܵܐ ܝܑܼܕܼܝܼܥܵܐ
ܒܤܘܼܥܪ̈ܵܢܲܝܟܼ. ܐܵܦܸܢ ܕܵܘܝܼܕܼ ܫܲܡܗܹܗ ܟܹܐܢܵܐ ܘܲܬܼܪܝܼܨܵܐ: ܐܸܠܵܐ ܒܪܹܗ
ܒܲܕܼܩ̣ ܠܲܢ ܕܛܵܒܼܵܐ ܐܝܼܬܼܵܘܗܝ ܘܒܲܤܝܼܡܵܐ. ܒܲܤܝܼܡ ܗ̄ܘ̣ ܠܲܡ ܥܲܠ
ܒܝܼ̈ܫܹܐ ܘܥܲܠ ܟܵܦܘܿܪܹ̈ܐ. ܐܲܝܟܲܢܵܐ ܡܫܲܡܲܗ ܐܲܢ̄ܬܿ ܟܹܐܢܵܐ ܠܐܲܠܵܗܵܐ:
ܐܸܡܲܬܼܝ ܕܦܵܓܲܥ ܐܲܢ̄ܬܿ ܒܦܵܤܘܿܩܵܐ ܗܵܘ̇ ܕܥܲܠ ܐܲܓܼܪܵܐ ܕܦܵܥܠܹ̈ܐ؟
ܚܲܒܼܪܝܼ: ܠܵܐ ܡܲܥܘܸܠ ܐ̄ܢܵܐ ܒܵܟܼ. ܨܵܒܹ̇ܐ ܐ̄ܢܵܐ ܕܐܸܬܸܠ ܠܗܵܢܵܐ ܐ̄ܚܪܵܝܵܐ:
ܐܲܝܟܼ ܕܠܵܟܿ. ܐܵܘ ܥܲܝܢܵܟܼ ܕܝܼܠܵܟܼ ܒܝܼܫܵܐ ܕܐܸܢܵܐ ܛܵܒܼ ܐ̄ܢܵܐ؟ ܐܲܝܟܲܢܵܐ
ܐ̄ܢܵܫ ܠܐܲܠܵܗܵܐ ܢܸܩܪܸܐ ܟܹܐܢܵܐ: ܡܵܐ ܕܢܸܦܓܲܥ ܒܫܲܪܒܵܐ ܗܵܘ̇ ܕܥܲܠ
ܒܪܵܐ ܐܵܤܘܿܛܵܐ؟ ܕܟܲܕܼ ܦܲܪܲܚ ܩܸܢܝܵܢܹܗ ܒܲܫܟܼܝܼܪܘܼܬܼܵܐ: ܒܲܬܼܘܵܬܼܵܐ
ܒܲܠܚܘܿܕܼ ܕܚ̣ܵܘܝܼ: ܪܗܸܛ̣ ܘܲܢܦܲܠ̣ ܥܲܠ ܨܵܘܪܹܗ: ܘܐܲܫܠܛܹܗ
ܥܲܠ ܟ̱ܠܹܗ ܩܸܢܝܵܢܹܗ. ܠܵܘ ܐ̄ܢܵܫ ܐ̄ܚܪܹܝܢ ܐܵܡܲ݁ܪ ܡܸܛܠܹܵܗ: ܕܢܸܬܼܦܲܠܲܓܼ
ܥܲܠ ܛܵܒܼܘܼܬܹܗ. ܒܪܹܗ ܗ̤ܘ ܡܲܤܗܸܕܼ ܥܠܵܘܗܝ ܗܵܠܹܝܢ. ܐܲܝܟܵܐ
ܐܝܼܬܹܝܗ̇ ܟܹܐܢܘܼܬܼܵܐ ܒܐܲܠܵܗܵܐ: ܕܟܲܕܼ ܚܲܛܵܝܹ̈ܐ ܐܝܼܬܲܝܢ ܗ̣̄ܘܲܝܢ: ܡܫܝܼܚܵܐ
ܚܠܵܦܲܝܢ ܡܝܼܬܼ؟ ܐܸܢܕܹܝܢ ܗܵܪܟܵܐ ܡܪܲܚܡܵܢܵܐ ܗ̄ܘ̣: ܡܗܲܝܡܢܝܼܢܲܢ
pb. 358
ܕܫܘܼܚܠܵܦܵܐ ܠܵܐ ܡܩܲܒܸܠ. ܚܵܣ: ܕܢܸܬܼܪܲܥܸܐ ܪܘܼܫܥܵܐ ܗܵܢܵܐ: ܕܐܝܼܬܼ
ܐܸܡܲܬܼܝ ܕܗܵܘܹ̇ܐ ܐܲܠܵܗܵܐ ܠܵܐ ܡܪܲܚܡܵܢܵܐ. ܠܵܐ ܡܸܫܬܲܚ̈ܠܦܵܢ ܕܝܼ̈ܠܵܝܵܬܹܗ
ܕܐܲܠܵܗܵܐ ܐܲܝܟܼ ܡܵܝ̈ܘܿܬܹܐ. ܘܠܲܝܬܿ ܐܸܡܲܬܝ ܕܠܵܐ ܩܢܸܐ ܡܸܕܸܡ: ܘܒܼܵܬܲܪܟܸܢ
ܩܵܢܹ̇ܐ: ܐܵܘ ܡ̣ܢ ܡܵܐ ܕܲܩܢܸܐ ܡܸܬܼܒܲܨܲܪ: ܐܵܘ ܡܸܬܿܬܵܘܤܲܦ ܐܲܝܟܼ
ܥܒܼܝܼ̈ܕܹܐ. ܐܸܠܵܐ ܐܲܝܠܹܝܢ ܕܐܝܼܬܼ ܠܹܗ ܠܐܲܠܵܗܵܐ: ܡܬܼܘܿܡܵܐܝܼܬܼ: ܘܲܕܼܠܵܐ
ܤܵܘܦܵܐ ܐܝܼܬܼ ܠܘܵܬܹܗ: ܐܲܝܟܼ ܕܐܸܡ݂ܲܪ ܐܵܦ ܛܘܼܒܼܵܢܵܐ ܡܦܲܫܩܵܢܵܐ ܒܦܘܼܫܵܩܵܐ
ܕܲܒܼܪܝܼܬܼܵܐ܀ ܕܚܲܠ ܡ̣ܢ ܚܘܼܒܹܗ: ܘܠܵܐ ܡ̣ܢ ܫܡܵܐ ܕܩܲܫܝܘܼܬܼܵܐ ܕܤܝܼܡ
ܥܠܵܘܗܝ. ܐܲܚܸܒܲܝܗܝ: ܡܸܛܠ ܕܚܲܝܵܒܼܝܼܢ ܚ̄ܢܲܢ ܕܢܲܚܒܼܝܘܼܗܝ. ܠܵܘ ܡܸܛܠ
ܐܲܝܠܹܝܢ ܕܲܥܬܼܝܼܕܼ ܕܢܸܬܸܠ: ܐܸܠܵܐ ܐܵܦ ܚܠܵܦ ܐܲܝܠܹܝܢ ܕܲܢܤܲܒܼܢ. ܐܵܦܸܢ
ܗܵܢܵܐ ܚܲܕܼ ܥܵܠܡܵܐ ܒܲܠܚܘܿܕܼ ܥ̣ܒܲܕܼ ܡܸܛܠܵܬܲܢ: ܡܲܢ̣ܘܼ ܡܵܘܦܸܐ
ܠܛܲܝܒܿܘܼܬܹܗ؟ ܐܲܝܟܵܐ ܐܸܢܘܿܢ ܦܘܼܪ̈ܥܵܢܵܘܗܝ ܒܤܘܼܥܪ̈ܵܢܲܝܢ؟ ܡܲܢ̣ܘܼ
ܐܲܦܝܼܤܹܗ ܡ̣ܢ ܠܘܼܩܕܲܡ ܕܢܲܝܬܝܲܢ ܠܲܗܘܵܝܵܐ؟ ܘܡܲܢ̣ܘܼ ܡܦܝܼܣ ܠܹܗ
ܚܠܵܦܲܝܢ: ܡܵܐ ܕܗܵܘܹ̇ܝܢܲܢ ܕܠܵܐ ܕܘܼܟܼܪܵܢ ܐܲܝܟܼ ܠܵܐ ܗ̤ܘܲܝܢܲܢ؟ ܡܲܢ̣ܘܼ
ܡܙܝܼܥ ܗܵܘ̇ ܚܘܼܒܵܠܲܢ ܠܘܵܬܼ ܚܲܝܹ̈ܐ؟ ܘܡ̣ܢ ܐܲܝܟܵܐ ܬܘܼܒܼ ܢܵܦܹ̇ܠ ܙܵܘܥܵܐ
ܕܝܼܕܲܥܬܼܵܐ ܒܓܼܵܘ ܕܲܚܝܼܚܵܐ؟ ܐܘܿ ܠܬܸܡܗܵܐ ܕܲܡܪܲܚܡܵܢܘܼܬܹܗ ܕܐܲܠܵܗܵܐ!
ܐܘܿ ܠܕܼܘܼܡܵܪܵܐ ܕܛܵܒܼܘܼܬܹܗ ܕܒܼܵܪܘܿܝܲܢ! ܐܘܿ ܠܚܲܝܠܵܐ ܕܤܵܦܩܘܼܬܹܗ
ܕܲܠܟܼܠ! ܐܘܿ ܠܒܲܤܝܼܡܘܼܬܼܵܐ ܕܠܵܐ ܟܲܝܠܵܐ ܕܥܲܠ ܟܝܵܢܲܢ: ܐܵܦܸܢ
ܠܚܲܛܵܝܹ̈ܐ ܡܲܝܬܸܐ ܬܘܼܒܼ ܠܲܗܘܵܝܵܐ! ܡܲܢ̣ܘܼ ܤܵܦܹ̇ܩ ܠܬܸܫ̈ܒܿܚܵܬܹܗ؟ ܗܵܘ̇
ܕܐܲܪܫܲܥ̣ ܘܓܲܕܸܦ̣ ܥܠܵܘܗܝ: ܕܲܡܩܝܼܡ ܠܹܗ ܠܥܲܦܪܵܐ ܕܠܵܐ ܙܵܘܥܵܐ:
ܬܘܼܩܵܢܵܐ ܫܒܼܝܼܚܵܐ ܘܝܲܕܼܘܼܥܬܼܵܢܵܐ ܘܡܲܠܵܠܵܐ. ܘܲܙܪܝܼܩܘܼܬܹܗ ܕܕܲܚܝܼܚܵܐ
ܠܵܐ ܪܵܓܼܘܿܫܵܐ ܘܪܸ̈ܓܼܫܹܐ ܡܒܲܕܿܪܹ̈ܐ: ܟܝܵܢܵܐ ܡܲܠܵܠܵܐ ܘܩܲܠܝܼܠ ܙܵܘ̈ܥܹܐ.
ܐܵܦܸܢ ܠܢܘܼܚܵܡܹܗ ܠܵܐ ܤܵܦܹ̇ܩ ܚܲܛܵܝܵܐ: ܠܛܲܝܒܿܘܼܬܹܗ ܠܡܸܬܼܪܲܥܵܝܘܼ.
pb. 359
ܐܲܝܟܵܐ ܗ̣̄ܝ ܓܹܗܲܢܵܐ ܕܡܲܨܝܵܐ ܕܬܲܚܸܫ ܠܲܢ؟ ܘܐܲܝܢܵܐ ܗ̄ܘ̣ ܬܲܫܢܝܼܕܼܵܐ
ܕܥܵܠܒܵܐ ܒܲܢ ܕܼܸܚܠ̱ܬܹܗ: ܠܡܸܙܟܵܐ ܠܚܲܕܼܘܼܬܼܵܐ ܕܚܘܼܒܹܗ؟ ܘܡܵܢܲܐ ܗ̣̄ܝ
ܓܹܗܲܢܵܐ: ܠܘܼܩܒܲܠ ܛܲܝܒܿܘܼܬܼܵܐ ܕܢܘܼܚܵܡܵܐ؟ ܕܡ̣ܢ ܫܝܘܿܠ ܟܲܝ ܡܢܲܚܸܡ
ܠܲܢ: ܘܥܵܒܹ̇ܕܼ ܠܗܵܢܵܐ ܡܸܬܼܚܲܒܿܠܵܢܵܐ ܕܢܸܠܒܲܫ ܠܵܐ ܡܸܬܼܚܲܒܿܠܵܢܘܼܬܼܵܐ:
ܘܲܠܗܵܢܵܐ ܥܓܼܝܼܢ ܒܨܲܥܪܵܗ̇ ܕܲܫܝܘܿܠ ܡܩܝܼܡ ܒܫܘܼܒܼܚܵܐ؟ ܐܘܿ ܦܵܪ̈ܘܿܫܹܐ:
ܬܵܘ ܐܸܬܿܕܲܡܲܪܘ! ܡ̇ܢ ܐܝܼܬܼ ܠܹܗ ܡܲܕܥܵܐ ܚܲܟܿܝܼܡܵܐ ܕܬܼܵܡܲܗ؟ ܬܵܘ
ܢܸܬܼܡܲܗ ܥܲܠ ܛܲܝܒܿܘܼܬܹܗ ܕܒܼܵܪܘܿܝܲܢ! ܦܘܼܪܥܵܢܵܐ ܕܚܲܛܵܝܹ̈ܐ ܗܵܢܵܐ ܗܵܘܹ̇ܐ:
ܕܲܚܠܵܦ ܦܘܼܪܥܵܢ ܟܹܐܢܘܼܬܼܵܐ: ܗ̤ܘ ܢܘܼܚܵܡܵܐ ܦܵܪܲܥ ܠܗܘܿܢ. ܘܲܚܠܵܦ
ܦܲܓܼܪܹ̈ܐ ܗܵܢܘܿܢ ܕܕܼܵܫ̣ܘ ܥܲܠ ܢܵܡܘܿܤܵܘ̈ܗܝ: ܗ̤ܘ ܫܘܼܒܼܚܵܐ ܕܲܓܼܡܝܼܪܘܼܬܼܵܐ
ܠܗܘܿܢ ܢܲܠܒܸܫ. ܪܲܒܵܐ ܗ̣̄ܝ ܗܵܕܹܐ ܛܲܝܒܿܘܼܬܼܵܐ ܕܒܼܵܬܲܪ ܕܐܲܤܟܸܠܢ:
ܡ̣ܢ ܗܵܝ̇ ܕܟܲܕܼ ܠܵܐ ܗ̤ܘܲܝܢܲܢ: ܐܲܝܬܝܼ ܠܬܼܘܿܩܵܢܲܢ ܠܲܗܘܵܝܵܐ܀ ܫܘܼܒܚܵܐ
ܠܛܲܝܒܲܘܼܬܼܵܟܼ ܕܠܵܐ ܡܸܬܼܡܲܫܚܵܐ! ܗܵܫܵܐ ܫܲܬܿܩܘܼܢܝ ܡܵܡ̈ܘܿܠܲܝ ܛܲܝ̈ܒܿܘܵܬܼܵܟܼ:
ܘܠܵܐ ܐܸܫܬܚܲܪ ܒܝܼ ܙܵܘܥܵܐ: ܐܵܦܠܵܐ ܠܩܘܼܒܵܠܛܲܝܒܿܘܼܬܼܵܟܼ. ܒܐܲܝܠܹܝܢ
ܦܘܼ̈ܡܹܐ ܢܵܘܕܹܐ ܠܵܟܼ: ܡܲܠܟܵܐ ܛܵܒܼܵܐ ܪܵܚܹ̇ܡ ܚܲܝܲܝ̈ܢ؟ ܫܘܼܒܼܚܵܐ ܠܵܟܼ
ܒܲܬܼܪ̈ܲܝܗܘܿܢ ܥܵܠܡܹ̈ܐ ܕܲܒܼܪܲܝܬܿ ܠܬܲܪܒܿܝܼܬܲܢ ܘܲܠܒܼܘܼܤܵܡܲܢ: ܡ̣ܢ ܟܠ
ܕܐܲܝܬܝܼܬܿ ܠܲܗܘܵܝܵܐ ܠܡܸܕܲܥ ܬܸܫܒܿܘܿܚܬܵܟܼ: ܐܵܦ ܗܵܫܵܐ ܘܲܒܼܟܼܠܙܒܲܢ
ܘܲܠܥܵܠܲܡ ܥܵܠܡܝܼܢ. ܐܵܡܹܝܢ.
Corpus Text ID:
Source:
Paulus Bedjan (ed.), Mar Isaacus Ninivita. De perfectione religiosa. (Paris/Leipzig: Otto Harrassowitz, 1909).Publication Date: March 5, 2019
Preparation of Electronic Edition:
TEI XML encoding by James E. Walters.Syriac text transcribed by .
Open Access and Copyright:
This electronic edition is designed for open access reuse. The Syriac base text is in the public domain. The TEI XML edition is copyrighted by James E. Walters and is released under a Creative Commons Attribution 4.0 International Public License (CC BY 4.0).
The HTML page is copyrighted by Vanderbilt University and released under a under a Creative Commons Attribution 4.0 International Public License (CC-BY 4.0, https://creativecommons.org/licenses/by/4.0/). Attribution for reuse should follow the suggested citation and also credit the copyright holder of the TEI XML edition.
See details...
How to Cite this Electronic Edition
Note:
Isaac of Nineveh, “Discourse 50” based upon Paulus Bedjan (ed.), Mar Isaacus Ninivita. De perfectione religiosa. (Paris/Leipzig: Otto Harrassowitz, 1909), Digital Syriac Corpus, last modified March 5, 2019, https://syriaccorpus.org/441.Bibliography:
“Discourse 50.” In Mar Isaacus Ninivita. De perfectione religiosa., edited by . Syriaca.org, 2016-. Entry published . https://syriaccorpus.org/441.Show Citation Styles