Paulus Bedjan ed., Mar Isaacus Ninivita. De perfectione religiosa. (Paris/Leipzig: Otto Harrassowitz, 1909)
    
        
            
                 360 
                
                ܥܲܠ ܬܠܵܬܼܵܐ ܛܲܟܼܤܹ̈ܐ ܕܝܼܕܲܥܬܼܵܐ: ܘܦܘܼܪܫܵܢܵܐ ܕܦܘܼܠܚܵܢܗܘܿܢ
                ܘܙܵܘܥܲܝ̈ܗܘܿܢ. ܘܥܲܠ ܗܲܝܡܵܢܘܼܬܼܵܐ ܕܢܲܦܫܵܐ: ܘܥܘܼܬܼܪܵܐ ܕܐ̄ܪ̈ܵܙܹܐ
                ܕܲܟܼܤܹܝܢ ܒܵܗ̇. ܘܕܲܟܼܡܵܐ ܤܲܩܘܼܒܼܠܵܝܵܐ ܝܑܼܕܲܥܬܼܵܐ ܕܥܵܠܡܵܐ ܗܵܢܵܐ
                ܒܦܘܼܪ̈ܤܹܝܗ̇: ܠܲܦܫܝܼܛܘܼܬܼ ܗܲܝܡܵܢܘܼܬܼܵܐ. ܢܐ.
            
            
                ܢܲܦܫܵܐ ܗܵܟܹܝܠ ܕܒܲܫܒܼܝܼ̈ܠܹܐ ܕܕܼܘܼܒܵܪܹ̈ܝܗ̇ ܒܐܘܼܪܚܵܐ ܕܗܲܝܡܵܢܘܼܬܼܵܐ
ܪܵܕܼܝܵܐ: ܘܗ̤ܝ ܗܵܕܹܐ ܐܲܨܠܚܲܬ̤ ܠܵܗ̇ ܙܲܒܼܢ̈ܝܼܢ ܤܲܓܝܼ̈ܐܵܢ. ܦܢܵܬ̤ ܠܵܗ̇
ܬܘܼܒܼ ܥܲܠ ܦܘܼܪ̈ܤܹܐ ܕܝܼܕܲܥܬܼܵܐ: ܡܸܚܕܼܵܐ ܐܸܬܼܚܲܓܿܪܲܬ̤ ܠܵܗ̇
ܡ̣ܢ ܗܲܝܡܵܢܘܼܬܼܵܐ. ܘܐܸܬܼܚܲܤܟܲܬ̤ ܠܵܗ̇ ܡ̣ܢ ܚܲܝܠܵܐ ܗܵܘ̇ ܡܸܬܼܝܲܕܼܥܵܢܵܐ
ܕܗܲܝܡܵܢܘܼܬܼܵܐ: ܕܲܒܼܥܘܼܕܼܪ̈ܵܢܹܐ ܡܫܲܚ̈ܠ̱ܦܹܐ ܓܿܠܝܵܐ ܝܵܬܼܵܗ̇ ܒܢܲܦܫܵܐ
ܫܦܝܼܬܼܵܐ: ܕܲܕܼܠܵܐ ܥܘܼܩܵܒܼ ܒܵܗ̇ ܡܸܬܼܚܲܫܚܵܐ ܦܫܝܼܛܵܐܝܼܬܼ ܒܟܼܠܗܹܝܢ
ܕܝܼܠܵܗ̇. ܢܲܦܫܵܐ ܕܲܚܕܼܵܐ ܙܒܲܢ ܒܗܲܝܡܵܢܘܼܬܼܵܐ ܐܲܓܼܥܠܲܬ̤ ܝܵܬܼܵܗ̇
ܠܐܲܠܵܗܵܐ: ܘܲܒܼܢܸܤ̈ܝܵܢܹܐ ܤܲܓܝܼ̈ܐܹܐ ܩܲܒܿܠܲܬ̤ ܛܥ̈ܡܵܬܼܵܐ ܕܥܘܼܕܼܪ̈ܵܢܹܝܗ̇:
ܬܘܼܒܼ ܠܲܝܬܿ ܠܵܗ̇ ܪܸܢܝܵܐ ܕܲܩܢܘܿܡܵܗ̇: ܐܸܠܵܐ ܒܬܸܡܗܵܐ ܘܲܒܼܫܸܬܼܩܵܐ
ܒܠܝܼܡܵܐ. ܘܲܕܿܬܸܬܼܦܢܸܐ ܬܘܼܒܼ ܥܲܠ ܦܘܼܪ̈ܤܹܐ ܕܝܼܕܲܥܬܼܵܗ̇:
ܘܲܠܡܸܬܼܚܲܫܵܚܘܼ ܒܗܘܿܢ ܠܵܐ ܫܲܠܝܼܛܵܐ. ܕܠܵܐ ܐܲܝܟܼ ܕܲܒܼܕܲܠܩܘܼܒܼܠܵܐ
ܬܸܬܼܓܠܸܙ ܐܵܦ ܡ̣ܢ ܒܛܝܼܠܘܼܬܼܵܐ ܐܲܠܵܗܵܝܬܼܵܐ: ܗܵܝ̇ ܕܲܒܼܟܸܤܝܵܐ ܤܵܥ̇ܪܵܐ
ܠܵܗ̇ ܕܠܵܐ ܫܸܠܝܵܐ: ܘܝܵܨ̇ܦܵܐ ܕܝܼܠܵܗ̇: ܘܒܲܐܡܝܼܢܘܼ ܢܲܩܝܼܦܵܐ ܠܵܗ̇
ܒܟܼܠܕܘܼܟ. ܐܲܝܟܼ ܡ̇ܢ ܕܫܵܛܲܬ̤ ܥܠܹܝܗ̇: ܕܗ̤ܝ ܠܲܩܢܘܿܡܵܗ̇ ܤܵܦ̇ܩܵܐ
ܠܲܡܕܲܒܵܪܘܼ ܒܚܲܝܠܵܐ ܕܝܼܕܲܥܬܼܵܗ̇. ܐܲܝܠܹܝܢ ܓܹܝܪ ܕܢܘܿܗܪܵܐ ܕܗܲܝܡܵܢܘܼܬܼܵܐ
ܒܠܸܒܵܪ̈ܵܬܼܗܘܿܢ ܕܢܲܚ̣: ܠܵܐ ܬܘܼܒܼ ܕܲܢܨܲܠܘܿܢ ܥܲܠ ܢܲܦܫܗܘܿܢ ܡܲܡܪܚܝܼܢ:
ܐܵܦܠܵܐ ܕܢܸܒܼܥܘܿܢ ܡ̣ܢ ܐܲܠܵܗܵܐ ܗܲܒܼܠܲܢ ܙܲܦܠܵܢ: ܐܵܘ ܕܲܫܩܘܿܠ ܡܼܢܲܢ

 361 

ܙܲܦܠܵܢ: ܘܠܵܐ ܕܢܸܪܢܘܿܢ ܕܢܲܦܫܗܘܿܢ ܒܚܲܕܼ ܡ̣ܢ ܙܢܝܼ̈ܢ. ܒܗܵܝ̇
ܕܲܒܼܥܲܝ̈ܢܹܐ ܝܲܕܼܘܼ̈ܥܬܼܵܢܝܵܬܼܵܐ ܕܗܲܝܡܵܢܘܼܬܼܗܘܿܢ: ܒܟܼܠܥܸܕܵܢ ܚܵܙܹܝܢ
ܠܲܒܼܛܝܼܠܘܼܬܼܵܐ ܐܲܒܼܵܗܵܝܬܵܐ ܕܡܲܛܠܠܵܐ ܥܠܲܝܗܘܿܢ: ܡ̣ܢ ܗܵܘ̇ ܐܲܒܼܵܐ
ܫܲܪܝܼܪܵܐ ܕܙܵܟܼܝܵܐ ܥܲܙܝܼܙܘܼܬܼ ܚܘܼܒܹܗ ܠܵܐ ܡܸܬܼܡܲܫܚܵܢܝܼܬܼܵܐ: ܠܟܼܠܵܗ̇
ܪܸܚܡܬܵܐ ܕܐܲܒܼܵܗܹ̈ܐ ܕܒܸܤܪܵܐ. ܗܵܘ̇ ܕܲܡܨܸܐ ܒܚܲܝܠܵܐ ܝܲܬܝܼܪ ܡ̣ܢ ܟܠ
ܠܡܸܥܒܲܕܼ ܠܲܢ: ܘܝܲܬܝܼܪ ܡ̣ܢ ܡܵܐ ܕܫܵܐܠܝܼܢܲܢ ܘܪܵܢܹܝܢܲܢ. ܤܲܩܘܼܒܼܠܵܝܵܐ
ܓܹܝܪ ܝܑܼܕܲܥܬܼܵܐ ܠܗܲܝܡܵܢܘܼܬܼܵܐ: ܘܫܵܪܘܿܝܬܼܵܐ ܗ̣̄ܝ ܗܲܝܡܵܢܘܼܬܼܵܐ ܒܟܼܠܗܹܝܢ
ܕܝܼܠܵܗ̇: ܠܢܵܡܘܿܤܹ̈ܝܗ̇ ܕܝܼܕܲܥܬܼܵܐ. ܠܵܘ ܕܪܘܼܚ ܐܵܡܲ݁ܪܢܵܐ. ܦܤܵܩܵܐ ܓܹܝܪ
ܕܲܬܼܚܘܼܡܹ̈ܝܗ̇ ܕܝܼܕܲܥܬܼܵܐ ܗܵܢܵܘ: ܕܲܠܒܲܪ ܡ̣ܢ ܥܘܼܩܵܒܼܵܐ ܘܲܒܼܨܵܬܼܵܐ ܕܢܸܥܒܸܕܼ
ܐ̄ܢܵܫ ܚܕܼܵܐ ܡ̣ܢ ܨܒܼܘܼ ܠܵܐ ܫܲܠܝܼܛ ܠܹܗ. ܐܸܠܵܐ ܢܸܗܘܸܐ ܡܥܲܩܸܒܼ:
ܕܐܸܢ ܡܲܨܝܵܐ ܠܡܸܗܘܵܐ: ܗܵܘ̇ ܡܵܐ ܕܢܸܗܡܘܿܣ ܠܘܵܬܹܗ ܐܸܬܼܪܲܥܝܼ.
ܗܲܝܡܵܢܘܼܬܼܵܐ ܕܹܝܢ: ܡܵܢܵܐ؟ ܐܸܡܲܬܼܝ ܗܵܟܹܝܠ ܕܐܹܝܢ ܘܠܵܐ ܫܲܘܝܵܐܝܼܬܼ
ܩܪܸܒܼ ܠܘܵܬܼܵܗ̇: ܕܲܬܼܟܲܬܲܪ ܬܲܡܵܢ ܗܲܝܡܵܢܘܼܬܼܵܐ ܠܵܐ ܡܸܬܿܛܦܝܼܤܵܐ.
ܝܑܼܕܲܥܬܼܵܐ ܡ̇ܢ ܕܠܵܐ ܩܸܦ̈ܠܹܐ ܘܦܘܼܪ̈ܤܹܐ ܕܬܸܬܼܚܲܫܲܚ: ܘܐܵܦܠܵܐ
ܕܐܝܼܬܹܝܗ̇ ܡܸܬܼܝܲܕܼܥܵܐ. ܘܗ̤ܝ ܗܵܕܹܐ ܐܵܬ̤ܵܐ ܐܝܼܬܹܝܗ̇ ܕܲܦܠܝܼܓܼܘܼܬܼܵܗ̇
ܕܥܲܠ ܫܪܵܪܵܐ. ܗܲܝܡܵܢܘܼܬܼܵܐ ܕܹܝܢ: ܚܕܼܵܐ ܬܲܪܥܝܼܬܼܵܐ ܫܦܝܼܬܼܵܐ ܘܲܦܫܝܼܛܬܐ
ܒܵܥ̇ܝܵܐ: ܕܪܲܚܝܼܩܵܐ ܡ̣ܢ ܟ̱ܠܵܗ̇ ܨܢܝܼܥܘܼܬܼܵܐ ܘܲܒܼܥܵܬܵܐ ܕܦܘܼܪ̈ܤܹܐ. ܚܙܝܼ
ܐܲܝܟܲܢ ܤܲܩܘܼ̈ܒܼܠܵܝܵܢ ܠܲܚ̈ܕܼܵܕܹܐ. ܒܲܝܬܵܗ̇ ܕܗܲܝܡܵܢܘܼܬܼܵܐ: ܬܲܪܥܝܼܬܼܵܐ
ܫܒܲܪܬܵܐ: ܘܠܸܒܵܐ ܒܪܝܼܪܵܐ. ܒܲܒܼܪܝܼܪܘܼܬܼܵܐ ܠܲܡ ܕܠܸܒܿܗܘܿܢ:
ܡܫܲܒܿܚܝܼܢ ܗ̄ܘ̣ܵܘ ܠܐܲܠܵܗܵܐ. ܘܐܸܠܵܐ ܠܲܡ ܬܸܬܼܗܲܦܟܿܘܼܢ ܘܬܸܗܘܘܿܢ
ܐܲܝܟܼ ܛܠܵܝܹ̈ܐ: ܘܫܲܪܟܵܐ. ܝܑܼܕܲܥܬܼܵܐ ܕܹܝܢ: ܠܬܲܪ̈ܬܲܝܗܹܝܢ ܗܵܠܹܝܢ

 362 

ܪܵܕܼܘܿܦ ܐܝܼܬܹܝܗ̇ ܘܤܲܩܘܼܒܼܠܵܝܵܐ. ܝܑܼܕܲܥܬܼܵܐ: ܬܚܘܿܡܵܘ̈ܗܝ ܕܲܟܼܝܵܢܵܐ
ܢܵܛ̇ܪܵܐ: ܒܟܼܠܗܘܿܢ ܫܒܼܝܼ̈ܠܹܝܗ̇. ܗܲܝܡܵܢܘܼܬܼܵܐ ܓܹܝܪ: ܠܥܸܠ ܡ̣ܢ ܟܝܵܢܵܐ
ܥܵܒܼ̇ܕܵܐ ܡܲܪܕܝܼܬܵܗ̇. ܝܑܼܕܲܥܬܼܵܐ ܠܟܼܠ ܡܸܕܸܡ ܕܫܵܪܘܿܝܵܐ ܗ̄ܘ̣ ܕܲܟܼܝܵܢܵܐ:
ܐܵܦܠܵܐ ܠܲܡܢܲܤܵܝܘܼ ܠܘܵܬܼܵܗ̇ ܫܵܒܼ̇ܩܵܐ: ܐܸܠܵܐ ܠܡܸܫܪܵܐ ܠܗܲܠ ܡܸܢܹܗ
ܒܪܘܼܚܩܵܐ. ܗܲܝܡܵܢܘܼܬܼܵܐ ܕܹܝܢ ܡܫܲܠܛܵܠܝܼܬܼ ܦܵܩ̇ܕܵܐ ܘܐܵܡ̇ܪܵܐ: ܕܥܲܠ
ܓܵܪܤܵܐ ܠܲܡ ܘܥܲܠ ܚܲܪܡܵܢܵܐ ܬܸܕܼܪܘܿܟܼ: ܘܲܬܿܕܼܘܼܫ ܐܲܪܝܵܐ ܘܬܲܢܝܼܢܵܐ.
ܠܝܼܕܼܥܬܼܵܐ: ܕܸܚܠܬܼܵܐ ܢܲܩܝܼܦܵܐ. ܠܗܲܝܡܵܢܘܼܬܼܵܐ ܕܹܝܢ: ܢܘܼܟܼܠܵܢܵܐ. ܟܡܵܐ
ܕܲܒܼܦܘܿܪ̈ܤܹܝܗ̇ ܕܝܼܕܲܥܬܼܵܐ ܪܵܕܹܐ ܒܲܪܢܵܫܵܐ: ܠܵܐ ܡܸܬܼܚܲܪܲܪ ܡ̣ܢ ܕܸܚܠܬܼܵܐ:
ܘܐܵܦܠܵܐ ܠܚܹܐܪܘܼܬܼܵܐ ܕܢܸܫܬܘܸܐ ܡܲܨܝܵܐ. ܡܵܐ ܕܹܝܢ ܕܲܢܩܸܦ̣ ܠܵܗ̇
ܠܗܲܝܡܵܢܘܼܬܼܵܐ: ܡܸܚܕܼܵܐ ܐܲܝܟܼ ܒܲܪ ܚܹܐܪܹ̈ܐ ܘܡܲܠܟܵܐ ܕܢܲܦܫܹܗ: ܘܐܲܝܟܼ
ܒܪܵܐ ܕܐܲܠܵܗܵܐ: ܒܟܼܠܡܸܕܸܡ ܒܚܹܐܪܘܼܬܼܵܐ ܡܸܬܼܚܲܫܲܚ ܡܫܲܠܛܵܐܝܼܬܼ.
ܒܲܪܢܵܫܵܐ ܕܐܸܫܟܲܚ ܩܠܝܼ̈ܕܹܐ ܕܗܲܝܡܵܢܘܼܬܼܵܐ: ܐܲܝܟܼ ܐܲܠܵܗܵܐ ܡܸܬܼܚܲܫܚ
ܒܟܼܠܗܘܿܢ ܟܝܵܢܹ̈ܐ ܕܲܒܼܪܝܼܬܼܵܐ. ܠܗܲܝܡܵܢܘܼܬܼܵܐ ܓܹܝܪ ܫܲܠܝܼܛ ܠܵܗ̇:
ܐܵܦ ܒܪܝܼܬܼܵܐ ܚܕܼܵܬܵܐ ܠܡܸܒܼܪܵܐ: ܒܲܕܼܡܘܼܬܼܵܐ ܕܐܲܠܵܗܵܐ. ܨܒܲܝܬܿ ܠܲܡ:
ܘܟܼܠ ܡܸܕܸܡ ܩܵܡ̣ ܩܕܼܵܡܲܝܟܼ. ܘܲܙܒܼܢ̈ܝܼܢ ܤܲܓܝܼ̈ܐܵܢ: ܡ̣ܢ ܠܵܐ ܡܸܕܸܡ
ܟܠܡܸܕܸܡ ܤܸܦܩܲܬ̤ ܠܡܸܥܒܲܕܼ.
ܝܑܼܕܲܥܬܼܵܐ ܟܹܝܬܼ: ܒܸܠܥܵܕܼ ܡ̣ܢ ܡܠܘܿܐܹ̈ܐ: ܕܬܸܥܒܸܿܕܼ ܡܸܕܸܡ ܠܵܐ
ܡܸܫܟܿܚܵܐ. ܝܑܼܕܲܥܬܼܵܐ ܡܲܢ: ܠܗܵܘ̇ ܡܵܐ ܕܠܵܐ ܐܸܬܼܝܼܗܸܒܼ ܠܲܟܼܝܵܢܵܐ:
ܠܡܸܦܤܲܥ ܥܠܵܘܗܝ ܠܵܐ ܡܲܡܪܚܵܐ. ܕܐܲܝܟܼ ܐܲܝܟܲܢ؟ ܗܵܝ̇ ܓܹܝܪ
ܕܲܟܼܝܵܢܵܐ ܫܲܪܝܵܐ ܕܡܲܝ̈ܵܐ ܠܵܐ ܡܩܲܒܸܠ ܠܥܸܠ ܡ̣ܢ ܚܲܨܹܗ ܕܘܼܪ̈ܟܵܬܼܵܐ
ܒܸܤܪ̈ܵܢܵܝܬܼܵܐ: ܘܕܼܵܐ̇ܠܹܡ ܠܢܘܼܪܵܐ ܡܵܘܩܕܼܵܐ ܠܹܗ: ܘܲܠܡܲܡܪܵܚܘܼ ܥܲܠ

 363 

ܗܵܠܹܝܢ ܕܩܹܘܲܢܕܹܝܢܘܿܣ ܐܝܼܬܹܝܗ̇. ܠܗܵܕܹܐ ܝܑܼܕܲܥܬܼܵܐ: ܙܗܝܼܪܵܐܝܼܬܼ
ܢܵܛ̇ܪܵܐ. ܘܲܕܬܸܦܩܘܿܕܼ ܠܡܸܥܒܲܪ ܥܲܠ ܗܵܢܵܐ ܬܚܘܼܡܵܐ: ܠܲܓܼܡܵܪ ܠܵܐ
ܡܸܬܿܛܦܝܼܤܵܐ. ܗܲܝܡܵܢܘܼܬܼܵܐ ܕܹܝܢ ܡܫܲܠܛܵܐܝܼܬܼ ܦܵܩ̇ܕܵܐ ܗܵܕܹܐ ܟܲܕܼ
ܐܵܡ̇ܪܵܐ: ܕܐܸܢ ܠܲܡ ܬܗܲܠܸܟܼ ܥܲܠ ܢܘܼܪܵܐ: ܠܵܐ ܬܵܘܩܵܕܵܟܼ. ܘܢܲܗܪ̈ܵܘܵܬܼܵܐ:
ܠܵܐ ܢܸܓܼܪܦܘܼܢܵܟܼ. ܘܗ̤ܝ ܗܵܕܹܐ ܙܲܒܼܢ̈ܝܼܢ ܤܲܓܝܼ̈ܐܵܢ ܤܸܥܪܲܬ̤ ܗܲܝܡܵܢܘܼܬܼܵܐ:
ܠܥܹܝܢ ܟ̱ܠܵܗ̇ ܒܪܝܼܬܼܵܐ. ܕܐܸܠܘܼ ܠܝܼܕܲܥܬܼܵܐ ܐܸܬܼܝܼܗܸܒܼ ܐܲܬܼܪܵܐ ܬܲܡܵܢ:
ܠܲܓܼܡܵܪ ܠܲܡܢܲܤܵܝܘܼ ܠܘܵܬܼ ܕܐܲܝܟܼ ܗܵܠܹܝܢ: ܠܵܐ ܡܲܦܤܵܐ ܗ̄ܘ̣ܵܬܼ.
ܒܗܲܝܡܵܢܘܼܬܼܵܐ ܓܹܝܪ: ܤܲܓܝܼ̈ܐܹܐ ܠܦܘܼܡܵܗ̇ ܕܫܲܠܗܹܒܼܝܼܬܼܵܐ ܥܲܠܘ:
ܘܚܲܝܠܵܗ̇ ܕܢܘܼܪܵܐ ܝܵܩܹܕܬܵܐ ܦܲܓܸܕܼܘ: ܘܲܕܼܠܵܐ ܢܸܟܼܝܵܢ ܒܓܼܵܘܵܗ̇ ܩܵܘܝܼܘ:
ܘܥܲܠ ܚܲܨܹܗ ܕܝܲܡܵܐ ܐܲܝܟܼ ܕܥܲܠ ܐܲܪܥܵܐ ܝܲܒܿܝܼܫܬܼܵܐ ܗܲܠܸܟܼܘ. ܘܗܵܐ
ܗܵܠܹܝܢ ܟܠܗܹܝܢ ܠܥܸܠ ܡ̣ܢ ܟܝܵܢܵܐ ܐܸܢܹܝܢ: ܘܤܲܩܒܼܘܼܠܵܐ ܠܩܸܦ̈ܠܹܝܗ̇
ܕܝܼܕܲܥܬܼܵܐ. ܚ̣ܙܲܝܬܿ ܠܗܲܝܡܵܢܘܼܬܼܵܐ: ܐܲܝܟܲܢ ܙܲܥܙܥܲܬ̤ ܠܫܲܬܼܐܸܤܹ̈ܝܗ̇
ܕܝܼܕܲܥܬܼܵܐ: ܘܚܵܘܝܲܬ̤ ܤܪ̈ܝܼܩܹܐ ܠܟܼܠܗܘܿܢ ܦܘܼܪ̈ܤܹܝܗ̇ ܘܢܵܡܘܿܤܹ̈ܝܗ̇؟
ܚ̣ܙܲܝܬܿ ܠܝܼܕܲܥܬܼܵܐ: ܐܲܝܟܲܢ ܢܵܛ̇ܪܵܐ ܬܚܘܼܡܵܘ̈ܗܝ ܕܲܟܼܝܵܢܵܐ؟ ܚ̣ܙܲܝܬܿ
ܘܲܠܗܲܝܡܵܢܘܼܬܼܵܐ: ܐܲܝܟܲܢ ܦܵܤ̇ܥܵܠ ܠܥܸܠ ܡ̣̤ܢ ܟܝܵܢܵܐ ܠܡܸܥܒܲܕܼ ܫܒܼܝܼ̈ܠܹܐ
ܕܡܲܪܕܝܼܬܼܵܗ̇؟ ܚܲܡܫܵܐ ܐܲܠܦܹ̈ܐ ܕܲܫܢܲܝ̈ܵܐ ܚܲܤܝܼܪ ܝܲܬܿܝܼܪ: ܦܘܼܪ̈ܤܹܐ
ܕܝܼܕܲܥܬܼܵܐ ܡܕܲܒܿܪܝܼܢ ܗ̄ܘ̣ܵܘ ܠܥܵܠܡܵܐ. ܘܠܲܓܼܡܵܪ ܠܲܡܪܵܡܘܼ ܪܹܫܹܗ
ܡ̣ܢ ܐܲܪܥܵܐ: ܘܲܠܡܲܪܓܵܫܘܼ ܒܚܲܝܠܵܐ ܕܥܵܒܼܘܿܕ݂ܹܗ ܠܵܐ ܐܸܬܼܡܨܝܼ.
ܥܕܲܡܵܐ ܕܕܸܢܚܲܬ̤ ܠܲܢ ܗܲܝܡܵܢܘܼܬܼܵܐ: ܘܚܲܪܲܪܬܲܢ ܡ̣ܢ ܬܥܵܫܵܐ ܕܥܲܡ̈ܠܹܐ
ܕܒܲܐܪ̈ܥܵܢܝܵܬܼܵܐ: ܘܡ̣ܢ ܫܘܼܥܒܵܕܼܵܐ ܤܪܝܼܩܵܐ ܕܒܼܵܬܲܪ ܦܸܗܝܵܐ ܕܡܲܓܵܢ.
ܘܐܵܦ ܗܵܫܵܐ ܬܘܼܒܼ ܕܐܸܫܟܲܚܢܲܢ ܝܲܡܵܐ ܕܠܵܐ ܡܸܬܼܓܫܸܫ ܘܓܲܙܵܐ ܕܠܵܐ

 364 

ܡܸܤܬܲܝܲܟ: ܨܹܝܕܼ ܪܨܝܼܢܵܐ ܡܸܤܟܹܢܵܐ ܪܓܼܝܼܓܼܵܐ ܠܲܢ ܠܡܸܫܪܲܟܼ. ܠܲܝܬܿ
ܝܑܼܕܲܥܬܼܵܐ ܕܠܵܐ ܤܢܝܼܩܵܐ: ܘܲܟܼܡܵܐ ܐܸܢ ܗܥܵܬܼܪܵܐ. ܠܗܲܝܡܵܢܘܼܬܼܵܐ ܓܲܙܹܝ̈ܗ̇
ܫܡܲܝܵܐ ܘܐܲܪܥܵܐ: ܠܵܐ ܡܤܲܝܟܼܝܼܢ.
	ܠܵܐ ܡܬܼܘܿܡ ܚܲܤܝܼܪ ܠܹܗ ܡܸܕܸܡ: ܠܗܵܘ̇ ܕܲܒܼܬܼܘܼܠܵܢܵܐ
ܕܗܲܝܡܵܢܘܼܬܼܵܐ ܠܸܒܹܗ ܤܡܝܼܟܼ. ܘܟܲܕܼ ܡܸܕܸܡ ܠܲܝܬܿ ܠܹܗ: ܒܗܲܝܡܵܢܘܼܬܼܵܐ
ܟܠܡܸܕܸܡ ܐܲܚܝܼܕܼ. ܐܲܝܟܼ ܕܲܟܼܬܼܝܼܒܼ: ܕܟܼܠܡܸܕܸܡ ܕܬܸܫ̱ܐܠܘܼܢ ܒܲܨܠܘܿܬܼܵܐ
ܘܲܬܼܗܲܝܡܢܘܼܢ: ܬܸܤܒܼܘܼܢ. ܘܬܼܘܼܒܼ: ܡܪܲܢ ܩܲܪܝܼܒܼ ܗ̄ܘ̣. ܕܡܸܕܸܡ:
ܠܵܐ ܬܹܐܨܦܘܼܢ. ܝܑܼܕܲܥܬܼܵܐ ܒܐܲܡܝܼܢܘܼ: ܦܘܼܪ̈ܤܹܐ ܒܵܥ̇ܝܵܐ ܠܢܘܼܛܵܪܵܐ
ܕܩܲܢܵܚܹ̈ܗ̇. ܗܲܝܡܵܢܘܼܬܼܵܐ ܗܵܟܹܝܠ ܡܵܢܵܐ؟ ܐܸܢ ܠܲܡ ܡܲܪܝܵܐ ܠܵܐ ܒܵܢܹ̇ܐ
ܒܲܝܢܵܐ ܘܢܵܛܲܪ ܩܪܝܼܬܼܵܐ: ܤܪܝܼܩܵܐܝܼܬܼ ܥܵܡܹ̇ܠ ܐܲܝܢܵܐ ܕܒܼܵܢܹ̇ܐ ܘܫܵܗܲܪ
ܠܡܸܛܲܪ. ܠܵܐ ܡܸܡܬܼܘܿܡ ܐܲܝܢܵܐ ܕܲܒܼܗܲܝܡܵܢܘܼܬܼܵܐ ܡܸܬܼܓܵܘܲܣ:
ܒܦܘܼܪ̈ܤܹܐ ܡܸܬܼܚܲܫܲܚ. ܝܑܼܕܲܥܬܼܵܐ ܓܹܝܪ ܒܟܼܠܕܼܘܼܟ: ܠܕܸܚ̱ܠܬܼܵܐ
ܡܩܲܠܤܵܐ. ܐܲܝܟܼ ܕܐܵܦ ܚܲܟܝܼܡܵܐ ܐܸܡ݂ܲܪ: ܕܐܲܝܢܵܐ ܠܲܡ ܕܕܵܚܹ̇ܠ
ܠܸܒܹܗ: ܛܘܼܒܼܵܘܗ. ܡܵܢܵܐ ܕܹܝܢ ܗܲܝܡܵܢܘܼܬܼܵܐ؟ ܕܚܸܠ̣ ܠܲܡ: ܘܫܲܪܝܼ
ܠܡܸܛܒܲܥ. ܘܬܼܘܼܒܼ: ܠܵܐ ܠܲܡ ܢܤܲܒܼܬܘܿܢ ܪܘܼܚܵܐ ܕܕܸܚܠܬܼܵܐ
ܠܥܲܒܼܕܘܼܬܼܵܐ: ܐܸܠܵܐ ܪܘܼܚܵܐ ܕܤܝܼܡܲܬܼ ܒܢܲܝ̈ܐ: ܠܚܹܐܪܘܼܬܼܵܐ
ܕܲܒܼܗܲܝܡܵܢܘܼܬܼܵܐ: ܘܬܼܘܼܟܼܠܵܢܵܐ ܕܒܲܐܠܵܗܵܐ. ܘܠܵܐ ܠܲܡ ܬܸܕܼܚܲܠ
ܡܸܢܗܘܿܢ: ܕܕܲܠܡܵܐ ܐܹܬܼܒܿܪܵܟܼ ܩܕܼܵܡܲܝܗܘܿܢ. ܢܲܩܝܼܦܵܐ ܒܟܼܠܙܒܲܢ
ܕܸܚܠܬܼܵܐ ܠܲܦܠܝܼܓܼܘܼܬܼܵܐ: ܘܲܦܠܝܼܓܼܘܼܬܼܵܐ ܠܲܒܼܨܵܬܼܵܐ. ܘܥܘܼܩܵܒܼܵܐ
ܠܦܘܼܪ̈ܤܹܐ: ܘܦܘܼܪ̈ܤܹܐ ܠܝܼܕܲܥܬܼܵܐ. ܘܗ̤ܝ ܗܵܕܹܐ ܕܒܼܵܨܝܵܐ ܘܲܡܥܲܩܒܼܵܐ
ܒܟܼܠܙܒܲܢ: ܦܠܝܼܓܼܘܼܬܼܵܐ ܘܕܸܚܠܬܼܵܐ ܡܫܵܘܕܥܵܐ. ܒܗܵܝ̇ ܕܠܵܘ ܒܟܼܠܙܒܲܢ
ܒܟܼܠܡܸܕܸܡ ܡܲܨܠܚܵܐ ܝܑܼܕܲܥܬܼܵܐ: ܐܲܝܟܼ ܡܵܐ ܕܡ̣ܢ ܠܥܸܠ ܐܸܬܼܚܵܘܝܲܬ̤.

 365 

ܙܲܒܼܢ̈ܝܼܢ ܤܲܓܼܝܼ̈ܐܵܢ ܓܸܕܼܫܹ̈ܐ ܥܲܤ̈ܩܹܐ ܘܥܸܠ̈ܠܵܬܼܵܐ ܤܲܓܝܼ̈ܐܵܬܼܵܐ ܡܸܤܬܲܩ̈ܒܿܠܵܢ:
ܕܩܹܘܲܢܕܹܝܢܘܿܣ ܡܲܠ̈ܝܵܢ. ܐܲܝܠܹܝܢ ܕܟܼܠ ܟ̱ܠܹܗ ܝܑܼܕܲܥܬܼܵܐ ܘܦܘܼܪ̈ܤܹܐ
ܕܚܸܟܼܡܬܵܐ ܕܲܢܥܲܕܪܘܼܢ ܬܲܡܵܢ ܡܸܕܸܡ: ܠܵܐ ܡܸܫܟܿܚܝܼܢ. ܗܵܢܹܝܢ
ܕܥܲܤܩܘܼܬܼܗܹܝܢ ܡܵܪܕܵܐ: ܠܟܼܠܹܗ ܚܲܝܠܵܐ ܕܲܬܼܚܘܼ̈ܡܹܐ ܕܝܼܕܲܥܬܼܵܐ
ܐ̄ܢܵܫܵܝܬܵܐ. ܗܲܝܡܵܢܘܼܬܼܵܐ ܓܹܝܪ: ܠܵܐ ܡܸܡܬܼܘܿܢ ܚܵܒܲܬ̤ ܡ̣ܢ ܡܸܕܸܡ. ܡܵܢܵܐ
ܓܹܝܪ ܤܵܦ̇ܩܵܐ ܕܲܬܼܥܲܕܲܪ ܝܑܼܕܲܥܬܼܵܐ ܐ̄ܢܵܫܵܝܬܼܵܐ: ܒܬܲܟܼܬܘܼ̈ܫܹܐ ܓܠܲܝ̈ܵܐ
ܕܠܘܼܩܒܲܠ ܟܝܵܢܹ̈ܐ ܠܵܐ ܡܸܬܼܚܲܙ̈ܝܵܢܹܐ: ܘܚܲܝ̈ܠܹܐ ܠܵܐ ܡܓܲܫܡܹ̈ܐ: ܥܲܡ
ܐ̄ܚܪ̈ܵܝܬܼܵܐ ܤܲܓܝܼ̈ܐܵܬܼܵܐ؟
	ܚ̣ܙܲܝܬܿ ܡܚܝܼܠܘܼܬܼ ܚܲܝܠܵܗ̇ ܕܝܼܕܲܥܬܼܵܐ: ܘܬܼܘܼܩܦܵܐ ܕܚܲܝܠܵܗ̇
ܕܗܲܝܡܵܢܘܼܬܼܵܐ. ܝܑܼܕܲܥܬܼܵܐ: ܠܟܼܠ ܕܢܵܟܼܘܿܝܵܐ ܗ̄ܘ̣ ܕܲܟܼܝܵܢܵܐ: ܠܡܸܬܼܩܲܪܵܒܼܘܼ
ܠܘܵܬܹܗ ܚܵܤ̇ܟܵܐ ܠܬܲܠܡܝܼ̈ܕܹܝܗ̇. ܚܙܝܼ ܓܹܝܪ ܗܵܪܟܵܐ ܠܚܲܝܠܵܗ̇
ܕܗܲܝܡܵܢܘܼܬܼܵܐ: ܡܵܢܵܐ ܦܵܩ̇ܕܵܐ ܠܲܒܼ̈ܢܹܝܗ̇ ܒܫܹܡܝ ܠܲܡ: ܫܹ̈ܐܕܹܐ
ܢܲܦܩܘܼܢ: ܘܲܚ̈ܘܵܘܵܬܼܵܐ ܢܸܫܩܠܘܼܢ. ܘܐܸܢ ܤܲܡܵܐ ܕܡܵܘܬܵܐ ܢܸܫܬܘܿܢ:
ܠܵܐ ܢܲܗܲܪ ܐܸܢܘܿܢ. ܝܑܼܕܲܥܬܼܵܐ ܠܟܼܠ ܕܒܼܐܘܼܪܚܵܗ̇ ܪܵܕܹܝܢ: ܗܵܕܹܐ ܦܵܩܕܵܐ
ܐܲܝܟܼ ܢܵܡܘܿܤܹ̈ܝܗ̇: ܕܡ̣ܢ ܫܘܼܪܵܝܵܐ ܠܟܼܠܡܸܕܸܡ ܥܲܠ ܚܲܪܬܹܗ ܢܥܲܩܒܼܘܼܢ:
ܘܗܵܝܕܹܝܢ ܢܫܲܪܘܿܢ. ܕܕܲܠܡܵܐ ܟܹܝܬܼ ܡܵܪܕܵܐ ܚܲܪܬܹܗ ܕܤܘܼܥܪܵܢܵܐ
ܠܲܬܼܚܘܼ̈ܡܹܐ ܕܚܲܝܠܵܐ ܐ̄ܢܵܫܵܝܵܐ: ܘܲܬܼܥܵܫܹ̈ܐ ܕܡܲܓܵܢ ܤܵܒܼ̇ܠܝܼܢ: ܟܲܕܼ
ܡܸܫܬܲܟܼܚܵܐ ܠܗܘܿܢ ܠܵܐ ܡܸܬܼܡܲܨܝܵܢܝܼܬܼܵܐ ܘܥܲܤܩܲܬܼ ܠܲܗܘܵܝܵܐ.
ܗܲܝܡܵܢܘܼܬܼܵܐ ܕܹܝܢ: ܡܵܢܵܐ ܐܵܡ̇ܪܵܐ؟ ܟܠܡܸܕܸܡ ܠܲܡ ܡܸܫܟܿܚܵܐ ܠܡܸܗܘܵܐ
ܠܗܵܘ̇ ܕܲܡܗܲܝܡܸܢ: ܡܸܛܠ ܕܠܵܐ ܥܛܸܠ ܠܐܲܠܵܗܵܐ ܡܸܕܸܡ. ܐܹܝܘ
ܥܘܼܬܼܪܵܐ ܠܵܐ ܡܸܬܼܡܲܠܠܵܢܵܐ: ܘܝܲܡܵܐ ܥܲܬܝܼܪ ܒܓܲܠܠܵܘ̈ܗܝ ܘܲܒܼܤܝܼ̈ܡܵܬܹܗ

 366 

ܬܡܝܼ̈ܗܵܬܼܵܐ: ܘܫܸܦ̈ܥܹܐ ܕܚܲܝܠܵܗ̇ ܕܗܲܝܡܵܢܘܼܬܼܵܐ! ܕܲܟܼܡܵܐ ܡܲܠܝܵܐ
ܠܘܼܒܵܒܼܵܐ: ܘܲܟܼܡܵܐ ܗܲܢܝܼܐܵܐ ܘܡܲܠܝܵܐ ܬܘܼܟܼܠܵܢܵܐ ܡܲܪܕܝܼܬܼܵܐ ܕܥܲܡܵܗ̇!
ܘܡܵܘܒ̈ܠܹܝܗ̇: ܟܡܵܐ ܦܫܝܼ̈ܩܵܢ! ܘܦܘܼܠܚܵܢܵܗ̇: ܟܡܵܐ ܗܲܢܝܼ! ܐܲܝܢܵܐ
ܕܐܸܫܬܘܝܼ ܠܲܛܥܵܡܬܼܵܐ ܕܗܲܝܡܵܢܘܼܬܼܵܐ: ܘܬܼܘܼܒܼ ܦܢ̣ܵܐ ܥܲܠ ܝܑܼܕܲܥܬܼܵܐ
ܕܢܲܦܫܵܐ: ܠܵܐ ܦܪܝܼܫܵܐ ܨܒܼܘܼܬܹܗ ܡ̣ܢ ܐܲܝܢܵܐ ܕܐܸܫܟܲܚ ܡܲܪܓܵܢܝܼܬܼܵܐ
ܤܲܓܝܼܐܲܬܼ ܕܡܲܝ̈ܵܐ: ܘܚܲܠܦܵܗ̇ ܒܦܘܼܠܤܵܐ ܕܲܢܚܵܫܵܐ. ܕܐܲܪܦܝܼ ܠܚܹܐܪܘܼܬܼܵܐ
ܡܫܲܠܲܛܬܼܵܐ: ܘܐܸܬܼܦܢܝܼ ܥܲܠ ܦܘܼܪ̈ܤܹܐ ܕܡܸܤܟܹܢܘܼܬܼܵܐ: ܕܲܡܠܹܝܢ
ܕܚܸܠܬܼܵܐ ܕܥܲܒܼܕܘܼܬܼܵܐ:
	ܠܵܐ ܗ̄ܘ̣ܵܐ ܝܑܼܕܲܥܬܼܵܐ ܡܲܤܠܝܵܐ: ܐܸܠܵܐ ܗܲܝܡܵܢܘܼܬܼܵܐ ܡܥܲܠܝܵܐ ܡܸܢܵܗ̇.
ܘܐܸܢ ܡܲܤܠܹܝܢܲܢ: ܠܵܐ ܗ̄ܘ̣ܵܐ ܠܵܗ̇ ܠܝܼܕܲܥܬܼܵܐ ܡܲܤܠܹܝܢܲܢ: ܚܵܣ! ܐܸܠܵܐ
ܠܦܘܼܪ̈ܫܵܢܹܐ ܕܲܡܫܲܚܠܦܘܼܬܼ ܛܲܟܼܤܹ̈ܐ ܕܲܒܼܗܘܿܢ ܪܵܕܹܝܵܐ: ܠܘܼܩܒܲܠ
ܫܒܼܝܼܚܘܼܬܼܵܐ ܕܲܟܼܝܵܢܵܐ: ܘܲܠܬܼܓܼܡܵܐ ܕܫܹ̈ܐܕܹܐ ܡܸܬܼܚܲܝܢܵܐ. ܐܲܝܠܹܝܢ ܕܒܼܵܬܲܪܟܸܢ
ܡܦܲܪܫܝܼܢܲܢ ܠܗܘܿܢ ܢܲܗܝܼܪܵܐܝܼܬܼ: ܘܕܲܟܼܡܵܐ ܕܲܪ̈ܓܹܐ ܐܝܼܬܼ ܕܲܒܼܗܘܿܢ
ܪܵܕܹܝܵܐ ܝܑܼܕܲܥܬܼܵܐ: ܘܐܲܝܠܹܝܢ ܦܘܼܪ̈ܫܵܢܹܐ ܐܝܼܬܼ ܒܟܼܠܚܲܕܼ ܡܸܢܗܘܿܢ.
ܘܒܲܐܝܠܹܝܢ ܙܵܘ̈ܥܹܐ ܢܵܒܼ̇ܗܵܐ ܒܟܼܠܚܲܕܼ ܡ̣ܢ ܛܲܟܼܤܹ̈ܐ: ܡܵܐ ܕܲܒܼܗܘܿܢ
ܡܩܵܘܝܵܐ. ܘܲܕܼܒܲܐܝܢܵܐ ܡ̣ܢ ܗܵܠܹܝܢ ܛܲܟܼܤܹ̈ܐ: ܟܲܕܼ ܪܵܕܹܝܵܐ ܒܹܗ: ܗܵܘ̇ܝܵܐ
ܤܲܩܘܼܒܼܠܵܐ ܠܗܲܝܡܵܢܘܼܬܼܵܐ: ܘܢܵܦ̇ܩܵܐ ܠܒܲܪ ܡ̣ܢ ܟܝܵܢܵܐ. ܘܐܲܝܠܹܝܢ
ܐܸܢܘܿܢ ܦܘܼܪ̈ܫܵܢܹܐ ܕܦܘܼܠܚܵܢܵܐ ܕܒܹܗ. ܘܠܲܐܝܢܵܐ ܛܲܟܼܤܵܐ: ܟܲܕܼ
ܬܲܗܦܟܼܝܼܘܗܝ ܠܢܝܼܫܵܗ̇ ܩܲܕܼܡܵܝܵܐ: ܐܵܬܼ̇ܝܵܐ ܠܲܟܼܝܵܢܵܝܘܼܬܼܵܗ̇: ܘܡܲܬܼܩܢܵܐ
ܕܲܪ̈ܓܹܐ ܩܕܼܵܡ ܗܲܝܡܵܢܘܼܬܼܵܐ ܒܕܼܘܼܒܵܪܹ̈ܝܗ̇ ܫܲܦܝܼܪܹ̈ܐ. ܘܲܥܕܲܡܵܐ ܠܐܲܝܟܵܐ
ܡܡܲܢܥܝܼܢ ܠܵܗ̇ ܦܘܼܪ̈ܫܵܢܹܐ ܕܛܲܟܼܤܵܐ ܗܵܢܵܐ. ܘܕܲܐܝܟܲܢ ܬܸܥܒܲܪ ܡ̣ܢ

 367 

ܗܵܢܵܐ: ܠܗܵܘ̇ ܕܲܡܥܲܠܲܝ ܡܸܢܹܗ. ܘܡܵܢܵܐ ܐܸܢܘܿܢ ܙܢܲܝ̈ ܦܘܼܠܚܵܢܵܐ
ܕܛܲܟܼܤܵܐ ܗܵܘ̇ ܐ̄ܚܪܵܝܵܐ: ܕܐܲܝܟܼ ܕܒܼܐܝܼܩܵܪܵܐ ܗ̤ܘܝܘܼ ܩܲܕܼܡܵܝܵܐ.
ܘܕܸܐܡܲܬܼܝ ܡܸܬܼܚܲܝܕܼܵܐ ܝܑܼܕܲܥܬܼܵܐ ܠܗܲܝܡܵܢܘܼܬܼܵܐ: ܘܗܵܘ̇ܝܵܐ ܥܲܡܵܗ̇ ܚܕܼܵܐ:
ܘܠܵܒܼ̇ܫܵܐ ܡܸܢܵܗ̇ ܙܵܘ̈ܥܹܐ ܢܘܼܪ̈ܵܢܹܐ ܘܡܸܫܬܲܓܼܪܵܐ ܒܪܘܼܚܵܐ: ܘܩܵܢ̇ܝܵܐ
ܐܸܒܼܪܹ̈ܐ ܕܠܵܐ ܚܵܫܘܿܫܘܼܬܼܵܐ: ܘܡܸܬܼܥܲܠܝܵܐ ܡ̣ܢ ܬܸܫܡܸܫܬܼܵܐ ܕܐܲܪ̈ܥܵܢܵܝܵܬܵܐ
ܠܐܲܬܼܪܵܐ ܕܥܲܒܼܘܿܕܼܵܗ̇: ܥܲܡ ܢܝܼ̈ܫܹܐ ܐ̄ܚܪ̈ܵܢܹܐ. ܕܒܲܕܓܼܘܿܢ ܙܵܕܹܩ ܠܲܢ
ܠܡܸܕܲܥ: ܕܗܲܝܡܵܢܘܼܬܼܵܐ ܡܥܲܠܲܝ ܗ̄ܘ̣ ܕܲܪܓܼܵܐ ܕܦܘܼܠܚܵܢܵܗ̇ ܡ̣ܢ
ܕܝܼܕܲܥܬܼܵܐ. ܐܵܦ ܗ̤ܝ ܝܑܼܕܲܥܬܼܵܐ: ܒܗܲܝܡܵܢܘܼܬܼܵܐ ܡܸܬܼܓܲܡܪܵܐ. ܘܩܵܢ̇ܝܵܐ
ܚܲܝܠܵܐ ܠܡܸܤܲܩ ܠܥܸܠ: ܘܲܠܡܲܪܓܵܫܘܼ ܒܗܵܘ̇ ܕܲܡܥܲܠܲܝ ܡ̣ܢ ܟ̱ܠܵܗ̇
ܡܲܪܓܫܵܢܘܼܬܼܵܐ: ܘܲܠܡܸܚܙܵܐ ܨܸܡܚܹܗ ܕܗܵܘ̇ ܕܠܵܐ ܡܸܬܿܕܪܸܟܼ: ܡ̣ܢ
ܗܵܘܢܵܐ ܘܝܼܕܲܥܬܼܵܐ ܕܲܥܒܼܝܼ̈ܕܹܐ.
	ܝܼܕܲܥܬܼܵܐ ܗܵܟܹܝܠ: ܕܲܪܓܼܵܐ ܗ̣̄ܝ ܕܒܼܵܗ̇ ܤܵܠܹ̇ܩ ܐ̄ܢܵܫ ܠܪܵܘܡܵܐ
ܕܗܲܝܡܵܢܘܼܬܼܵܐ. ܕܟܲܕܼ ܡܲܛܝܼ ܠܘܵܬܼܵܗ̇: ܠܵܐ ܬܘܼܒܼ ܚܵܫ̇ܚܵܐ ܗܵܕܹܐ.
ܗܵܫܵܐ ܠܲܡ ܩܲܠܝܼܠ ܗ̄ܘ̣ ܡ̣ܢ ܤܲܓܝܼ ܝܵܕܼܥ̇ܝܼܢܲܢ: ܘܩܲܠܝܼܠ ܗ̄ܘ̣ ܡ̣ܢ
ܤܲܓܝܼ ܡܸܤܬܲܟܿܠܝܼܢܲܢ. ܡܵܐ ܕܹܝܢ ܕܐܸܬܲܬ̤ ܓܡܝܼܪܘܼܬܼܵܐ: ܒܸܛܠܲܬ̤ ܠܵܗ̇
ܘܐܵܦ ܗܵܝ̇ ܕܩܲܠܝܼܠ. ܗܲܝܡܵܢܘܼܬܼܵܐ ܗܵܟܹܝܠ: ܐܲܝܟܼ ܕܲܒܼܥܲܝ̈ܢܹܐ ܡܚܵܘ̇ܝܵܐ
ܠܲܢ: ܫܪܵܪܵܗ̇ ܕܗܵܝ̇ ܓܡܝܼܪܘܼܬܼܵܐ ܕܲܥܬܼܝܼܕܼܵܐ. ܒܗܲܝܡܵܢܘܼܬܼܵܐ ܡܵܕܹܝܢ
ܝܵܠܦ̇ܝܼܢܲܢ ܥܲܠ ܗܵܝ̇ ܠܵܐ ܡܸܬܿܕܲܪܟܵܢܘܼܬܼܵܐ: ܘܠܵܐ ܗ̄ܘ̣ܵܐ ܒܥܘܼܩܵܒܼܵܐ
ܘܚܲܝܠܵܐ ܕܝܼܕܲܥܬܼܵܐ. ܟܠܗܘܿܢ ܥ̇ܒܼܵܕܹ̈ܐ ܕܙܲܝܼܩܘܼܬܼܵܐ: ܨܵܘܡܵܐ: ܙܸܕܼܩܬܼܵܐ:
ܫܲܗܪܵܐ: ܩܲܕܝܼܫܘܼܬܼܵܐ: ܥܲܡ ܫܲܪܟܵܐ ܐܲܝܠܹܝܢ ܕܲܒܼܦܲܓܼܪܵܐ ܡܸܬܼܦܲܠ̈ܚܵܢ:
ܘܚܘܼܒܵܐ ܕܲܠܘܵܬܼ ܩܲܪܝܼܒܼܵܐ: ܡܘܼܟܵܟܼܵܐ ܕܠܸܒܵܐ: ܫܘܼܒܼܩܵܢܵܐ ܕܤܲܟܼ̈ܠܘܵܬܼܵܐ:
ܘܗܸܪܓܵܐ ܕܫܲܦܝܼܪ̈ܵܬܼܵܐ: ܥܘܼܩܵܒܼܵܐ ܕܐ̄ܪ̈ܵܙܹܐ ܕܒܲܟܼܬܼܵܒܹ̈ܐ ܩܲܕܝܼ̈ܫܹܐ

 368 

ܡܚܲܦܹܝܢ: ܘܥܸܢܝܵܢܵܐ ܕܡܲܕܥܵܐ ܒܥܲܡ̈ܠܹܐ ܕܛܵܒܼ̈ܬܼܵܐ: ܘܲܠܡܸܛܲܪ ܬܚܘܼ̈ܡܹܐ
ܕܚܲܫܲܝ̈ ܢܲܦܫܵܐ: ܘܫܲܪܟܵܐ ܕܲܡܝܲܬܿܪ̈ܵܬܼܵܐ ܐܲܝܠܹܝܢ ܕܲܒܼܢܲܦܫܵܐ ܡܸܬܼܓܲܡܪܵܢ:
ܗܵܠܹܝܢ ܟܠܗܹܝܢ ܥܲܠ ܝܑܼܕܲܥܬܼܵܐ ܤܢܝܼ̈ܩܵܢ: ܘܗ̤ܝ ܐܝܼܬܹܝܗ̇ ܡܛܲܪܤܵܢܝܼܬܼܗܹܝܢ.
ܘܟܼܠܗܘܿܢ ܗܵܠܹܝܢ ܥܕܲܟܹܝܠ ܕܪ̈ܓܹܐ ܐܸܢܘܿܢ: ܕܲܒܼܗܘܿܢ ܤܵܠ̇ܩܵܐ ܢܲܦܫܵܐ
ܠܪܵܘܡܵܐ ܡܥܲܠܝܵܐ ܕܗܲܝܡܵܢܘܼܬܼܵܐ: ܘܲܡܝܲܬܿܪ̈ܵܬܼܵܐ ܡܸܬܼܩܲܪ̈ܝܵܢ. ܕܘܼܒܵܪܵܐ
ܕܹܝܬ ܕܗܲܝܡܵܢܘܼܬܼܵܐ: ܘܐܵܦ ܠܥܸܠ ܡ̣ܢ ܡܝܲܬܪܘܼܬܼܵܐ ܗ̄ܘ̣ ܦܘܼܠܚܵܢܹܗ.
ܠܵܐ ܗ̄ܘ̣ܵܐ ܕܥܲܡܠܵܐ ܗ̄ܘ̣: ܐܸܠܵܐ ܕܲܢܝܵܚܵܐ ܡܫܲܠܡܵܢܵܐ. ܘܒܼܘܼܝܵܐܵܐ:
ܘܡܲܡܠܸܐ ܒܠܸܒܵܐ. ܘܲܒܼܙܵܘ̈ܥܹܐ ܕܢܲܦܫܵܐ ܡܸܬܼܓܲܡܪܵܐ. ܟܠܗܘܿܢ
ܟܲܟܼܤܹ̈ܐ ܬܗܝܼܪܹ̈ܐ ܕܕܼܘܼܒܵܪܵܐ ܪܘܼܚܵܢܵܝܵܐ: ܕܐܝܼܬܼܵܘܗܝ ܦܘܼܠܚܵܢܹܗ
ܡܲܪܓܫܵܢܘܼܬܼܵܐ ܕܲܒܼܚܲܝ̈ܠܹܐ ܪ̈ܘܼܚܵܢܹܐ: ܘܒܼܘܼܤܵܡܵܐ ܘܲܪܘܵܙܵܐ ܕܢܲܦܫܵܐ:
ܘܚܘܼܒܵܐ ܘܚܲܕܼܘܼܬܼܵܐ ܕܒܲܐܠܵܗܵܐ: ܘܫܲܪܟܵܐ ܕܟܼܠܡܸܕܸܡ ܕܡܸܫܬܲܟܲܢ
ܒܗܵܘ̇ ܕܘܼܒܵܪܵܐ: ܠܢܲܦܫܵܐ ܕܲܫܘܵܬ̤ ܒܛܲܝܒܿܘܼܬܼܵܐ ܠܗܵܝ̇ ܛܘܼܒܼܬܼܵܢܘܼܬܼܵܐ:
ܐܲܝܟܼ ܪܸ̈ܡܙܿܐ ܕܲܛܥܝܼܢܝܼܢ ܟܬܼܵܒܹ̈ܐ ܩܲܕܝܼ̈ܫܹܐ: ܒܗܲܝܡܵܢܘܼܬܼܵܐ ܡܸܬܼܚܲܡܪܵܢ
ܡܸܟܵܐ ܠܘܵܬܼܵܗ̇ ܡ̣ܢ ܐܲܠܵܗܵܐ ܥܲܬܝܼܪ ܒܡܵܘ̈ܗܒܼܵܬܹܗ.
	ܐܸܠܵܐ ܐܵܡܲ݁ܪ ܐ̄ܢܵܫ: ܕܐܸܢ ܗܵܢܹܝܢ ܟܠܗܹܝܢ ܛܵܒܼ̈ܬܼܵܐ ܘܲܥ̇ܒܼܵܕܹ̈ܐ
ܕܲܡܝܲܬܿܪܘܼܬܼܵܐ ܕܡ̣ܢ ܠܥܸܠ ܐܸܬܼܐܡܲܪܘ: ܘܐܵܦ ܚܤܝܼܟܼܘܼܬܼܵܐ ܕܡ̣ܢ
ܒܝܼ̈ܫܵܬܼܵܐ: ܘܲܠܡܸܦܪܲܫ ܙܵܘ̈ܥܹܐ ܩܲܛܝܼ̈ܢܹܐ ܕܒܼܢܲܦܫܵܐ ܢܵܒܼܗ̇ܝܼܢ: ܘܬܲܟܼܬܘܼܫܵܐ
ܕܥܲܡ ܚܘܼ̈ܫܵܒܹܐ: ܘܐܵܓܼܘܿܢܵܐ ܕܠܘܼܩܒܲܠ ܚܲܫܹ̈ܐ ܡܓܲܪ̈ܓܼܵܢܹܐ: ܘܫܲܪܟܵܐ:
ܕܒܸܠܥܵܕܲܝܗܹܝܢ ܐܵܦ ܠܵܐ ܗ̤ܝ ܗܲܝܡܵܢܘܼܬܼܵܐ ܡܲܨܝܵܐ ܠܲܡܚܵܘܵܝܘܼ ܚܲܝܠܵܗ̇
ܒܡܲܥܒܿܕܼܵܢܘܼܬܼܵܗ̇ ܕܢܲܦܫܵܐ: ܗܵܠܹܝܢ ܟܠܗܹܝܢ ܝܑܼܕܲܥܬܼܵܐ ܗ̣̄ܝ ܓܵܡܘܿܪܬܗܹܝܢ:
ܐܲܝܟܲܢ ܡܵܕܹܝܢ ܡܸܬܼܪܲܢܝܵܐ: ܕܤܲܩܘܼܒܼܠܵܝܵܐ ܝܑܼܕܲܥܬܼܵܐ ܠܗܲܝܡܵܢܘܼܬܼܵܐ؟

 369 

	ܫܪܵܝܵܐ ܕܦܘܼܫܵܟܼܵܐ. ܬܠܵܬܼܵܐ ܐܸܢܘܿܢ ܛܲܟܼܤܹ̈ܐ: ܕܡܸܬܼܝܲܕܼܥܵܢܵܐܝܼܬܼ
ܒܗܘܿܢ ܤܵܠ̇ܩܵܐ ܘܢܵܚ̇ܬܼܵܐ ܝܑܼܕܲܥܬܼܵܐ. ܕܲܠܦܘܼܬܼ ܫܘܼ̈ܚܠܵܦܹܐ ܕܐܲܬܼܪ̈ܵܘܵܬܼܵܐ
ܕܲܒܼܗܘܿܢ ܪܵܕܹܝܵܐ: ܗܵܟܲܢܵܐ ܡܩܲܒܿܠܵܐ ܫܘܼܚܠܵܦܵܐ: ܐܵܦ ܡܤܲܓܦܵܐ ܐܵܘ
ܡܥܲܕܼܪܵܐ. ܐܵܡܲ݁ܪܢܵܐ ܕܹܝܢ ܬܠܵܬܼܵܐ ܛܲܟܼܤ̈ܝܼܢ: ܦܲܓܼܪܵܐ: ܢܲܦܫܵܐ: ܪܘܼܚܵܐ.
ܘܟܲܕܼ ܚܕܼܵܐ ܗ̣̄ܝ ܝܑܼܕܲܥܬܼܵܐ ܒܲܟܼܝܵܗ̇: ܠܦܘܼܬܼ ܗܘܵܝܵܗ̇ ܕܲܒܼܗܵܠܹܝܢ
ܐܲܬܼܪ̈ܵܘܵܬܼܵܐ ܡܸܬܼܝܲܕ̈ܥܵܢܹܐ ܡܸܬܼܓܲܫܡܵܐ ܘܡܸܬܼܩܲܢܵܐ. ܘܲܡܫܲܚܠܦܵܐ ܐܵܦ
ܐܼܲܤܵܢܹ̈ܝܗ̇: ܐܵܦ ܡܲܥܒܿܕܼܵܢܘܼܬܼܵܐ ܕܙܵܘ̈ܥܹܝܗ̇. ܫܡܲܥ ܡܵܕܹܝܢ ܛܲܟܼܤܹ̈ܐ
ܕܦܘܼܠܚܵܢܵܗ̇: ܘܥܸܠ̈ܠܵܬܼܵܐ ܕܡܸܛܠܵܬܼܗܹܝܢ ܡܤܲܓܦܵܐ ܐܵܘ ܡܥܲܕܼܪܵܐ.
ܝܑܼܕܲܥܬܼܵܐ ܗܵܟܹܝܠ: ܡܵܘܗܲܒܼܬܼܵܐ ܗ̣̄ܝ ܕܡ̣ܢ ܐܲܠܵܗܵܐ ܠܲܟܼܝܵܢܵܐ ܕܲܡܠܝܼ̈ܠܹܐ
ܡ̣ܢ ܫܘܼܪܵܝ ܗܘܵܝܗܘܿܢ ܐܸܬܼܝܲܗܒܲܬ̤. ܘܲܦܫܝܼܛܬܵܐ ܗ̣̄ܝ ܘܠܵܐ
ܡܸܬܼܦܲܠܓܼܵܢܝܼܬܼܵܐ ܒܲܟܼܝܵܢܵܗ̇: ܐܲܝܟܼ ܢܘܼܗܪܹܗ ܕܫܸܡܫܵܐ. ܩܵܢ̇ܝܵܐ ܕܹܝܢ
ܫܘܼ̈ܚܠܵܦܹܐ ܘܦܘܼ̈ܠܵܓܹܐ: ܠܦܘܼܬܼ ܦܘܼܠܚܵܢܵܗ̇.
	ܟܲܟܼܤܵܐ ܩܲܕܼܡܵܝܵܐ ܕܝܼܕܲܥܬܼܵܐ. ܐܸܡܲܬܼܝ ܕܲܠܪܸܚܡܬܼܵܐ ܕܦܲܓܼܪܵܐ ܢܵܩ̇ܦܵܐ
ܗ̤ܝ ܝܑܼܕܲܥܬܼܵܐ: ܗܵܠܹܝܢ ܐܲܤܵܢܹ̈ܐ ܟܵܢ̇ܫܵܐ: ܕܐܝܼܬܲܝܗܘܿܢ: ܥܘܼܬܼܪܵܐ: ܫܒܼܚܵܐ
ܤܪܝܼܩܵܐ: ܐܝܼܩܵܪܵܐ: ܤܸܩ̈ܠܹܐ: ܢܝܵܚܹ̈ܐ ܕܦܲܓܼܪܵܐ: ܦܘܼܪ̈ܤܹܐ ܠܢܘܼܛܵܪܹܗ
ܡ̣ܢ ܐܲܝܠܹܝܢ ܕܤܲܩܘܼܒܼܠܵܐ ܐܸܢܹܝܢ ܕܲܟܼܝܵܢܵܐ ܕܦܲܚܼܪܵܐ: ܚܘܼܦܵܛܵܐ ܕܚܸܟܼܡܬܼܵܐ
ܕܲܡܠܝܼܠܘܼܬܼܵܐ ܕܚܵܫ̇ܚܵܐ ܠܲܡܕܲܒܿܪܵܢܘܼܬܼܵܐ ܕܥܵܠܡܵܐ ܗܵܢܵܐ: ܘܲܠܡܸܗܘܵܐ
ܡܲܒܿܥܵܢܵܐ ܕܚܲܕܿܬܼܘܼܬܼ ܫܟܼܵܚ̈ܬܼܵܐ ܕܐܘܼܡܵܢ̈ܘܵܬܼܵܐ ܘܝܘܼ̈ܠܦܵܢܹܐ: ܘܫܲܪܟܵܐ
ܐܲܝܠܹܝܢ ܕܲܠܦܲܓܼܪܵܐ ܡܟܲܠ̈ܠܵܢ ܒܥܵܠܡܹܗ ܗܵܢܵܐ ܡܸܬܼܚܲܙܝܵܢܵܐ. ܡ̣ܢ
ܕܝܼ̈ܠܵܝܵܬܼܵܐ ܕܗܵܕܹܐ ܝܑܼܕܲܥܬܼܵܐ ܐܝܼܬܲܝܗܹܝܢ: ܗܵܢܹܝܢ ܕܡ̣ܢ ܠܥܸܠ ܠܘܼܩܒܲܠ
ܗܲܝܡܵܢܘܼܬܼܵܐ ܤܕܼܝܼܪ̈ܵܢ. ܗܵܕܹܐ ܕܐܵܦ ܝܑܼܕܲܥܬܼܵܐ ܫܚܝܼܡܬܼܵܐ ܡܸܬܼܩܲܪܝܵܐ:
ܡܸܛܠ ܕܲܡܫܲܠܚܵܐ ܡ̣ܢ ܟ̱ܠܹܗ ܪܸܢܝܵܐ ܐܲܠܵܗܵܝܵܐ. ܘܲܡܚܝܼܠܘܼܬܼܵܐ ܕܠܵܐ

 370 

ܡܸܬܼܡܲܠܠܵܐ ܡܲܥܠܵܐ ܥܲܠ ܡܲܕܥܵܐ: ܡܸܛܠ ܐܲܚܝܼܕܼܘܼܬܼܵܗ̇ ܕܲܒܼܦܲܓܼܪܵܐ:
ܘܟܼܠܵܢܵܝܘܼܬܼ ܡܲܪܢܝܼܬܼܵܗ̇ ܕܲܒܼܗܵܢܵܐ ܥܵܠܡܵܐ. ܗܵܕܹܐ ܗܵܟܹܝܠ ܡܫܘܼܚܬܼܵܐ
ܕܝܼܕܲܥܬܼܵܐ: ܕܐܝܼܬܼ ܟܠ ܟ̱ܠܹܗ ܚܲܝܠܵܐ ܡܸܬܼܝܲܓܼܥܵܢܵܐ ܘܲܡܕܲܒܪܵܢܵܐ ܟܲܤܝܵܐ
ܠܘܵܬܼ ܒܲܪܢܵܫܵܐ: ܐܵܘ ܒܛܝܼܠܘܼܬܼܵܐ ܐܲܠܵܗܵܝܬܼܵܐ ܕܝܵܨ̇ܦܵܐ ܕܝܼܠܹܗ: ܠܲܓܼܡܵܪ
ܠܵܐ ܪܵܢܝܵܐ. ܐܸܠܵܐ ܟ̱ܠܵܗ̇ ܛܵܒܼܬܼܵܐ ܕܗܵܘܝܵܐ ܨܹܝܕܼ ܒܲܪܢܵܫܵܐ: ܘܫܘܼܘܙܵܒܹܗ
ܕܡ̣ܢ ܢܸܟܼܝܵܢܹ̈ܐ: ܘܲܢܛܝܼܪܘܼܬܹܗ ܕܡ̣ܢ ܓܸܕܼܫܹ̈ܐ ܥܲܤܩܹ̈ܐ: ܘܡ̣ܢ
ܤܲܩܘܼ̈ܒܼܠܹܗ ܤܲܓܝܼ̈ܐܹܐ ܕܢܲܩܦܝܼܢ ܠܲܟܼܝܵܢܲܢ ܒܓܸܠܝܵܐ ܘܲܒܼܟܸܤܝܵܐ: ܒܝܲܕܼ
ܚܦܝܼܛܘܼܬܼܵܗ̇ ܘܦܘܼܪ̈ܤܹܐ ܕܝܼܠܵܗ̇ ܪܵܢܝܵܐ ܕܐܝܼܬܲܝܗܹܝܢ. ܗܵܕܹܐ ܡܫܘܼܚܬܼܵܐ
ܕܝܼܕܼܥܬܼܵܐ ܗ̣̄ܝ ܕܪܵܢܝܵܐ ܗܵܝ̇ ܕܐܲܡܝܼܪܵܐ: ܕܐܵܡ̇ܪܝܼܢ ܕܠܲܝܬܿ ܠܲܡ
ܡܕܲܒܿܪܵܢܘܼܬܼܵܐ ܒܗܵܠܹܝܢ ܕܡܸܬܼܚܲܙ̈ܝܵܢ. ܘܒܲܕܼܓܼܘܿܢ: ܕܲܬܼܦܘܼܫ ܡ̣ܢ
ܐܲܡܝܼܢܘܼܬܼ ܡܲܪܢܝܼܬܼܵܐ: ܘܕܸܚܠܬܼܵܐ ܕܲܚܠܵܦ ܗܵܠܹܝܢ ܕܦܲܓܼܪܵܐ: ܠܵܐ
ܡܸܫܟܚܵܐ. ܘܡܸܛܠܗܵܢܵܐ: ܙܥܘܿܪܘܼܬܼ ܢܲܦܫܵܐ: ܟܲܪܝܘܼܬܼܵܐ: ܦܤܵܩ
ܤܲܒܼܪܵܐ: ܕܸܚܠܬܼܵܐ ܕܫܹ̈ܐܕܹܐ: ܩܸܢܛܵܐ ܕܡ̣ܢ ܒܢܲܝ̈ܢܵܫܵܐ: ܛܸܒܹ̈ܐ ܕܓܲܝܵܤܹ̈ܐ:
ܫܸܡ̈ܥܹܐ ܕܡܵܘ̈ܬܵܢܹܐ: ܪܸܢܝܵܐ ܕܟܼܘܼܪ̈ܗܵܢܹܐ: ܡܲܪܢܝܼܬܼܵܐ ܕܚܲܤܝܼܪܘܼܬܼ
ܡܵܙܘܿܢܵܐ: ܡܸܬܿܬܿܙܝܼܥܵܢܘܼܬܼܵܐ ܕܡ̣ܢ ܡܵܘܬܵܐ: ܕܸܚܠܬܼܵܐ ܕܪ̈ܲܚܫܵܐ ܘܚܲܝ̈ܘܵܬܼܵܐ:
ܘܫܲܪܟܵܐ ܕܐܲܝܟܼ ܗܵܠܹܝܢ. ܘܒܲܕܼܡܘܼܬܼ ܝܲܡܵܐ ܡ̣ܢ ܓܲܠ̈ܠܹܐ: ܡܸܫܬܲܓܼܫܵܐ
ܒܟܼܠܗܘܿܢ ܥܸܕܼܵܢܹ̈ܐ ܕܐܝܼܡܵܡܹ̈ܐ ܘܠܲܝ̈ܠܵܘܵܬܼܵܐ: ܕܠܵܐ ܝܵܕܼܥܵܐ ܠܡܸܫܕܵܐ
ܨܸܦܬܼܵܗ̇ ܥܲܠ ܐܲܠܵܗܵܐ ܒܬܼܘܼܟܼܠܵܢܵܐ ܕܗܲܝܡܵܢܘܼܬܼܵܐ ܕܒܹܗ. ܡܸܛܠܗܵܢܵܐ
ܒܦܘܼܪ̈ܤܹܐ ܘܨܸܢ̈ܥܵܬܼܵܐ ܡܸܬܼܚܲܫܚܵܐ: ܒܟܼܠܗܹܝܢ ܕܝܼܠܵܗ̇. ܘܐܸܡܲܬܼܝ
ܕܡܸܬܼܒܲܛܠܝܼܢ ܦܘܼܪ̈ܤܹܝܗ̇ ܒܲܚܕܼܵܐ ܡ̣ܢ ܥܸܠ̈ܠܵܢ: ܒܲܕܼ ܠܵܐ ܚܵܙ̇ܝܵܐ
ܠܡܦܲܪܤܵܢܘܬܼܵܐ ܟܤܝܼܬܼܵܐ: ܥܲܡ ܒܢܲܝ̈ܢܵܫܵܐ ܢܵܨ̇ܝܵܐ: ܐܲܝܟܼ ܡܥܵܘ̈ܟܼܵܢܹܐ

 371 

ܘܤܵܩܘܿܪܹ̈ܐ ܕܝܼܠܵܗ̇. ܒܵܗ̇ ܓܹܝܪ ܒܗܵܕܹܐ ܝܑܼܕܲܥܬܼܵܐ ܢܨܝܼܒܼ ܐܝܼܠܵܢܵܐ ܗܵܘ̇
ܕܛܵܒܼܬܼܵܐ ܘܲܕܼܒܼܝܼܫܬܼܵܐ: ܕܐܝܼܬܼܵܘܗܝ ܥܵܩܘܿܪܹܗ ܕܚܘܼܒܵܐ. ܗ̤ܝ ܒܵܨ̇ܝܵܐ
ܡܘܼ̈ܡܹܐ ܩܲܛܝܼ̈ܢܹܐ ܕܒܲܐ̄ܚܪ̈ܵܢܹܐ: ܘܒܼܘܼܨܵܪܹ̈ܐ ܘܲܡܚܝܼ̈ܠܵܬܼܵܐ ܕܲܒܼܢܲܝ̈ܢܵܫܵܐ:
ܘܐܵܪܘܿܥܘܼܬܼܵܐ ܕܲܕܼܪܵܫܵܐ: ܘܲܗ̈ܦܵܟܼܵܬܼܵܐ ܕܡܸܠܹ̈ܐ: ܘܨܸܢ̈ܥܵܬܼܵܐ ܡܕܲܪ̈ܡܵܬܼܵܐ:
ܘܫܲܪܟܵܐ ܕܟܼܠܗܘܿܢ ܦܘܼܪ̈ܤܹܐ ܡܨܲܥܪ̈ܵܢܵܘܗܝ ܕܒܲܪܢܵܫܵܐ ܒܵܗ̇
ܐܝܼܬܲܝܗܘܿܢ. ܒܵܗ̇ ܐܵܦ ܚܘܼܬܼܪܵܐ ܘܪܵܡܘܼܬܼܵܐ: ܒܗܵܝ̇ ܕܥܲܠ ܩܢܘܿܡܵܗ̇
ܤܵܝ̇ܡܵܐ ܟܠܗܹܝܢ ܕܗܵܘ̈ܝܵܢ: ܐܸܢ ܕܲܫܠܵܡܵܐ ܐܸܢܹܝܢ: ܘܠܵܘ ܥܲܠ ܐܲܠܵܗܵܐ.
	ܗܲܝܢܵܘܼܬܼܵܐ ܕܹܝܢ: ܥܲܠ ܛܲܝܒܿܘܼܬܼܵܐ ܤܵܝ̇ܡܵܐ ܥܒܼܝܼ̈ܕܵܪܬܼܵܗ̇. ܡܸܛܠܗܵܢܵܐ
ܠܡܸܬܿܬܿܪܵܡܘܼ ܠܵܐ ܡܸܫܟܿܚܵܐ: ܐܲܝܟܼ ܕܲܟܼܬܼܝܼܒܼ: ܕܟܼܠܡܸܕܸܡ ܠܲܡ
ܡܸܫܟܲܚ ܐ̄ܢܵܐ ܚܲܝܠܵܐ: ܒܛܲܝܒܿܘܼܬܼܵܐ ܕܲܡܤܲܝܵܐ ܠܝܼ. ܘܬܼܘܼܒܼ: ܠܵܐ
ܐܸܢܵܐ: ܐܸܠܵܐ ܛܲܝܒܿܘܼܬܼܵܐ ܕܥܲܡܝ. ܘܗܵܝ̇ ܕܐܸܡ݂ܲܪ ܛܘܼܒܼܵܢܵܐ ܫܠܝܼܚܵܐ:
ܕܝܼܕܲܥܬܼܵܐ ܡܲܚܬܿܪܵܐ. ܥܲܠ ܗܵܕܹܐ ܝܑܼܕܲܥܬܼܵܐ ܐܸܡ݂ܲܪ: ܕܠܵܐ ܡܡܲܙܓܼܵܐ
ܒܗܲܝܡܵܢܘܼܬܼܵܐ ܘܬܼܘܼܟܼܠܵܢܵܐ ܕܒܲܐܠܵܗܵܐ: ܘܠܵܘ ܥܲܠ ܝܑܼܕܲܥܬܼܵܐ ܕܲܫܪܵܪܵܐ:
ܚܵܣ! ܝܑܼܕܲܥܬܼܵܐ ܓܹܝܪ ܕܲܫܪܵܪܵܐ: ܒܡܲܟܿܝܼܟܼܘܼܬܼܵܐ ܓܵܡܪܵܐ ܠܢܲܦ̈ܫܵܬܼܵܐ
ܕܩܲܢܵܚܚܹ̈ܗ̇. ܐܲܝܟܼ ܡܘܼܫܹܐ ܘܕܼܵܘܝܼܕܼ ܘܐܹܫܲܥܝܵܐ ܘܦܲܛܪܘܿܣ ܘܦܵܘܠܘܿܣ:
ܘܫܲܪܟܵܐ ܕܩܲܕܝܼ̈ܫܹܐ: ܕܐܸܫܬܿܘܝܼܘ ܠܝܼܕܲܥܬܼܵܐ ܓܡܝܼܪܬܵܐ: ܐܲܝܟܼ ܬܚܘܼܡܹܗ
ܕܲܟܼܝܵܢܵܐ. ܘܲܒܼܗܵܝ̇ ܕܲܒܼܫܘܼܚܠܵܦ ܚܸܙ̈ܘܵܢܹܐ ܘܓܸܠܝܵܢܹ̈ܐ ܐܲܠܵܗܵܝܹ̈ܐ: ܘܒܲܚܙܵܬܼܵܐ
ܡܥܲܠܲܝܬܼܵܐ ܕܪ̈ܘܼܚܵܢܝܬܼܵܐ: ܘܲܒܼܐ̄ܪ̈ܵܙܹܐ ܠܵܐ ܡܸܬܼܡܲܠ̈ܠܵܢܹܐ ܡܸܬܼܒܲܠܥܵܐ
ܝܼܕܲܥܬܼܗܘܿܢ ܒܲܐܡܝܼܢܘܼ. ܡ̣ܢ ܦܸܚܡܵܐ ܕܗܵܠܹܝܢ: ܥܲܦܪܵܐ ܘܩܸܛܡܵܐ
ܚܫܝܼܒܼܵܐ ܢܲܦܫܗܘܿܢ ܒܥܲܝܢܲܝ̈ܗܘܿܢ. ܗܵܝ̇ ܝܑܼܕܲܥܬܼܵܐ ܐ̄ܚܪܹܬܼܵܐ: ܘܵܠܝܵܐܝܼܬܼ
ܡܸܬܼܚܲܬܪܵܐ. ܡܸܛܠ ܕܲܒܼܚܸܫܘܿܟܼܵܐ ܪܵܕܼܝܵܐ: ܘܡ̣ܢ ܦܸܚܡܵܐ ܕܗܵܠܹܝܢ
ܕܒܲܐܪܥܵܐ ܒܵܩ̇ܝܵܐ ܨܸܒܼ̈ܘܵܬܼܵܗ̇. ܘܕܲܐܝܼܬܼ ܡܸܕܸܡ ܕܲܡܝܲܬܲܪ: ܠܵܐ ܝܵܕܼܥܵܐ.

 372 

ܘܟܼܠܗܘܿܢ ܐܲܝܠܹܝܢ ܕܡܸܬܼܚܲܛܦܝܼܢ ܡ̣ܢ ܪܵܡܘܼܬܼܵܐ: ܡܸܛܠ ܕܡ̣ܢ
ܗܵܠܹܝܢ ܕܒܲܐܪܥܵܐ ܘܲܕܼܦܲܓܼܪܵܐ ܬܵܩ̇ܠܝܼܢ ܕܘܼܒܵܪ̈ܲܝܗܘܿܢ: ܘܥܲܠ ܦܘܼܠܚܵܢܵܐ
ܡܸܤܬܲܡܟܿܝܼܢ: ܘܠܵܐ ܗ̄ܘ̣ܵܐ ܒܠܵܐ ܡܸܬܿܕܲܪ̈ܟܵܢܝܬܼܵܐ ܡܲܥܠܝܼܢ ܗܵܘܢܗܘܿܢ.
ܟܡܵܐ ܕܲܒܼܗܵܢܘܿܢ ܓܲܠ̈ܠܹܐ ܕܙܝܼܘܵܐ ܡܫܲܒܿܚܵܐ ܕܐܲܠܵܗܘܼܬܼܵܐ ܗܵܪܓܝܼܢ:
ܘܦܘܼܠܚܵܢܗܘܿܢ ܠܥܸܠ ܐܝܼܬܼܵܘܗܝ: ܠܵܐ ܡܸܨܛܲܠܝܵܐ ܬܲܪܥܝܼܬܼܗܘܿܢ
ܠܡܸܪܢܵܐ ܒܲܫܟܼܝܼܪ̈ܵܬܼܵܐ ܘܲܒܼܚܘܼ̈ܫܵܒܹܐ ܤܪ̈ܝܼܩܹܐ. ܐܲܝܠܹܝܢ ܓܹܝܪ ܕܲܒܼܢܘܼܗܪܵܐ
ܪܵܕܹܝܢ: ܠܵܐ ܡܸܫܟܿܚܝܼܢ ܠܡܸܛܥܵܐ. ܡܸܛܠܗܵܢܵܐ: ܟܠܗܘܿܢ ܐܲܝܠܹܝܢ
ܕܛܵܥܹ̇ܝܢ ܡ̣ܢ ܢܘܼܗܪܵܐ ܕܝܼܕܲܥܬܼܵܐ ܕܲܒܼܪܹܗ ܕܐܲܠܵܗܵܐ: ܘܤܵܛܹ̇ܝܢ ܡ̣ܢ
ܩܘܼܫܬܼܵܐ: ܒܗܵܠܹܝܢ ܫܒܼܝܼ̈ܠܹܐ ܪܵܕܹܝܢ. ܗܵܢܵܐ ܛܲܟܼܤܵܐ ܩܲܕܼܡܵܝܵܐ ܕܝܼܕܲܥܬܼܵܐ:
ܡܵܐ ܕܲܠܪܸܚܡܬܼܵܐ ܕܦܲܓܼܪܵܐ ܢܵܩ̇ܦܵܐ. ܠܵܗ̇ ܗ̄ܘ̣ ܡܲܤܠܹܝܢܲܢ:
ܘܤܲܩܘܼܒܼܠܵܝܵܐ ܐܵܡ̇ܪܝܼܢܲܢ ܕܐܝܼܬܹܝܗ̇: ܠܵܘ ܒܲܠܚܘܿܕܼ ܠܗܲܝܡܵܢܘܼܬܼܵܐ:
ܐܸܠܵܐ ܘܲܠܟܼܠܗܘܿܢ ܥ̇ܒܼܵܕܹ̈ܐ ܕܲܡܝܲܬܿܪܘܼܬܼܵܐ.
	ܛܲܟܼܤܵܐ ܕܲܬܼܪܹܝܢ ܕܝܼܕܲܥܬܼܵܐ. ܐܸܡܲܬܼܝ ܓܹܝܪ ܕܲܠܢܝܼܫܵܐ ܩܲܕܼܡܵܝܵܐ
ܬܸܫܒܿܘܿܩ: ܘܲܠܘܵܬܼ ܗܸܪܓܵܐ ܘܪܸܚܡܬܼܵܐ ܕܢܲܦܫܵܐ ܦܵܢܝܵܐ: ܗܵܢܹܝܢ
ܫܲܦܝܼܪ̈ܵܬܼܵܐ ܕܡ̣ܢ ܠܥܸܠ ܪ̈ܫܝܼܡܵܢ ܦܵܠ̇ܚܵܐ: ܒܙܵܘ̈ܥܹܝܗ̇ ܕܢܲܦܫܵܐ ܥܲܡ
ܪܸ̈ܓܼܫܵܘܗܝ ܕܦܲܓܼܪܵܐ: ܒܢܘܼܗܪܵܐ ܕܲܟܼܝܵܢܵܗ̇. ܗܵܢܵܘ ܕܹܝܢ: ܨܵܘܡܵܐ:
ܨܠܘܿܬܼܵܐ: ܡܪܲܚܡܵܢܘܼܬܼܵܐ: ܩܸܪܝܵܢܵܐ ܕܲܟܼܬܼܵܒܹ̈ܐ ܩܲܕܝܼ̈ܫܹܐ ܒܢܝܼ̈ܫܲܝ
ܡܝܲܬܿܪܘܼܬܼܵܐ: ܬܲܟܼܬܘܼܫܵܐ ܕܠܘܼܩܒܲܠ ܚܲܫܹ̈ܐ: ܥܲܡ ܫܲܪܟܵܐ: ܟܠܗܘܿܢ
ܓܹܝܪ ܤܘܼܥܪ̈ܢܹܐ ܫܲܦܝܼܪܹ̈ܐ: ܘܦܘܼܪ̈ܫܵܢܹܐ ܡܝܲܬܿܪܹ̈ܐ ܕܲܒܼܢܲܦܫܵܐ
ܡܸܬܼܚܙܹܝܢ: ܘܛܲܟܼܤܹ̈ܐ ܬܡܝܼ̈ܗܹܐ ܕܲܒܼܥܹܕܬܹܗ ܕܲܡܫܝܼܚܵܐ ܡܸܫܬܲܡܫܝܼܢ:
ܒܛܲܟܼܤܵܐ ܗܵܢܵܐ ܡܸܨܥܵܝܵܐ ܕܝܼܲܕܲܥܬܼܵܐ: ܓܵܡܪܵܐ ܪܘܼܚܵܐ ܕܩܘܼܕܼܫܵܐ

 373 

ܒܡܲܥܒܿܕܼܵܢܘܼܬܼܵܐ ܕܚܲܝܠܵܗ̇. ܘܗ̤ܝ ܕܵܪܫܵܐ ܒܠܸܒܲܢ ܫܒܼܝܼ̈ܠܹܐ: ܕܲܠܘܵܬܼ
ܗܲܝܡܵܢܘܼܬܼܵܐ ܡܡܲܢܥܝܼܢ. ܘܒܼܵܗ̇ ܡܟܲܢܫܝܼܢܲܢ ܙܘܵܪܹ̈ܐ ܠܗܵܘ̇ ܥܵܠܡܲܢ
ܫܲܪܝܼܪܵܐ. ܘܲܥܕܲܡܵܐ ܬܘܼܒܼ ܠܗܵܪܟܵܐ: ܥܕܲܟܹܝܠ ܓܫܝܼܡܬܼܵܐ ܗ̣̄ܝ ܝܑܼܕܲܥܬܼܵܐ.
ܘܲܡܪܲܟܲܒܼܬܼܵܐ ܐܵܦܸܢ ܒܲܡܝܲܬܪܘܼܬܼܵܐ ܥܲܢܝܵܐ: ܘܐܵܦܸܢ ܗ̤ܝ ܗ̣̄ܝ ܐܘܼܪܚܵܐ
ܕܲܡܝܲܒܿܠܵܐ ܠܲܢ ܠܘܵܬܼ ܗܲܝܡܵܢܘܼܬܼܵܐ. ܐܝܼܬܼ ܗ̄ܘ̣ ܓܹܝܪ ܛܲܟܼܤܵܐ:
ܕܲܡܥܲܠܲܝ ܡܸܢܵܗ̇. ܕܐܸܢ ܡܲܟܼܫܪܵܐ: ܡܸܫܟܿܚܵܐ ܠܡܸܬܿܕܲܪܵܓܼܘܼ ܒܤܘܼܝܵܥܹܗ
ܕܲܡܫܝܼܚܵܐ: ܟܲܕܼ ܤܵܝ̇ܡܵܐ ܫܲܬܼܤܬܼܵܐ ܠܦܘܼܠܚܵܢܵܗ̇: ܫܸܠܝܵܐ ܕܡ̣ܢ
ܒܢܲܝ̈ܢܵܫܵܐ: ܘܩܸܪܝܵܢܵܐ ܕܲܟܼܬܼܵܒܹ̈ܐ ܩܲܕܝܼ̈ܫܹܐ ܘܲܨܠܘܿܬܼܵܐ. ܘܫܲܪܟܵܐ ܕܛܵܒܼ̈ܬܼܵܐ:
ܒܗܵܠܹܝܢ ܡܸܬܼܓܲܡܪ̈ܵܢ. ܗܵܕܹܐ ܗ̣̄ܝ ܡܫܘܼܚܵܬܼܵܐ ܕܬܲܪܬܹܝܢ ܕܝܼܕܲܥܬܼܵܐ:
ܕܒܼܵܗ̇ ܡܸܬܼܦܲܠ̈ܚܵܢ ܟܠܗܹܝܢ ܫܲܦܝܼܪ̈ܬܼܵܐ. ܘܡܸܬܼܩܲܪܝܵܐ: ܝܑܼܕܲܥܬܼܵܐ
ܕܤܘܼܥܪ̈ܢܹܐ. ܡܸܛܠ ܕܲܒܼܤܘܼܥܪ̈ܵܢܹܐ ܡܸܬܼܪ̈ܲܓܼܫܵܢܹܐ ܒܪܸ̈ܓܼܫܲܝ ܦܲܓܼܪܵܐ
ܓܵܡܪܵܐ ܤܵܥܘܿܪܘܼܬܼܵܗ̇: ܒܛܲܟܼܤܵܐ ܕܲܠܒܲܪ.
	ܛܲܟܼܤܵܐ ܕܲܬܼܠܵܬܼܵܐ ܕܝܼܕܲܥܬܼܵܐ: ܕܗ̤ܘܝܘܼ ܛܲܟܼܤܵܐ ܕܫܘܼܡܠܵܝܵܐ.
ܕܐܲܝܟܲܢ ܕܝܼܢ ܡܸܬܼܩܲܛܢܵܐ ܘܩܵܢ̇ܝܵܐ ܪܘܼܚܵܢܘܼܬܼܵܐ: ܘܡܲܤܒܿܗܵܐ ܒܕܼܘܼܒܵܪܵܐ
ܕܗܵܢܘܿܢ ܚܲܝ̈ܠܵܘܵܬܼܵܐ ܠܵܐ ܡܸܬܼܚܲܙ̈ܝܵܢܹܐ: ܐܲܝܠܹܝܢ ܕܬܸܫܡܸܫܬܿܗܘܿܢ ܠܵܐ
ܗ̄ܘ̣ܵܐ ܒܤܵܥܘܿܪܘܼܬܼܵܐ ܡܸܬܼܪܲܓܼܫܵܢܝܼܬܼܵܐ ܕܥܲܡ̈ܠܹܐ: ܐܸܠܵܐ ܒܪܸܢܝܵܐ ܕܡܲܕܼܥܵܐ
ܡܸܬܼܓܲܡܪܵܐ: ܫܡܲܥ. ܡܵܐ ܕܹܝܢ ܕܗ̤ܝ ܝܑܼܕܲܥܬܼܵܐ ܐܸܬܼܥܲܠܝܲܬ̤ ܡ̣ܢ
ܐܲܪ̈ܥܵܢܵܝܬܼܵܐ ܘܡ̣ܢ ܪܸܢܝܵܐ ܕܦܘܼܠܚܵܢܵܐ: ܘܫܲܪܝܲܬ̤ ܠܲܡܢܲܤܵܝܘܼ ܙܵܘ̈ܥܹܝܗ̇
ܒܐܲܝܠܹܝܢ ܕܲܠܓܼܵܘ ܡ̣ܢ ܥܲܝ̈ܢܹܐ ܡܚܲܦ̈ܝܵܢ: ܘܫܵܛܲܬ̤ ܠܵܗ̇ ܒܲܡܢܵܬܼܵܐ
ܥܘܼ̈ܗܕܵܢܹܐ ܕܨܸܒܼ̈ܘܵܬܼܵܐ: ܕܡܸܢܗܘܿܢ ܗܵܘܹ̇ܐ ܦܘܼܬܵܠܵܐ ܕܚܲܫܹ̈ܐ. ܘܦܸܫܛܲܬ̤
ܝܵܬܼܵܗ̇ ܠܥܸܠ: ܘܢܸܩܦܲܬ̤ ܠܗܲܝܡܵܢܘܼܬܼܵܐ ܒܪܸܝܢܵܐ ܕܥܵܠܡܵܐ ܕܲܥܬܼܝܼܕܼ:
ܘܪܸܚܡܬܼܵܐ ܕܡܘܼ̈ܠܟܵܢܹܐ: ܘܥܘܼܩܵܒܼܵܐ ܕܥܲܠ ܟܲܤ̈ܝܵܬܼܵܐ. ܗܵܝܕܹܝܢ ܗ̤ܝ 

 374 

ܗܲܝܡܵܢܘܼܬܼܵܐ ܒܵܠ̇ܥܵܐ ܠܵܗ̇ ܠܝܼܕܲܥܬܼܵܐ: ܘܗܵܦ̇ܟܵܐ ܝܵܠܕܵܐ ܠܵܗ̇ ܡܸܢܕܪܹܫ:
ܟܲܕܼ ܐܝܼܬܹܝܗ̇ ܟ̱ܠܵܗ̇ ܒܟܼܠܵܗ̇ ܕܪܘܼܚ. ܗܵܝܕܝܼܢ ܡܸܫܟܿܚܵܐ ܛܵܝ̇ܤܵܐ
ܒܐܲܬܼܪ̈ܵܘܵܬܼܵܐ ܠܵܐ ܓܫܝܼ̈ܡܹܐ: ܘܲܠܡܸܓܲܫ ܥܘܼ̈ܡܩܹܐ ܕܝܲܡܵܐ ܠܵܐ
ܡܸܬܼܓܲܫܫܵܢܵܐ ܕܲܡܕܲܒܿܪܵܢܘܼܬܼܵܐ ܬܡܝܼܗܬܵܐ ܘܐܲܠܵܗܵܝܬܼܵܐ: ܕܒܲܟܼ̈ܝܵܢܹܐ
ܡܸܬܼܝܲܕܼ̈ܥܵܢܹܐ ܘܡܸܪ̈ܲܓܼܫܵܢܹܐ: ܘܲܠܡܸܒܼܨܵܐ ܐ̄ܪ̈ܵܙܹܐ ܪ̈ܘܼܚܵܢܹܐ: ܕܲܒܼܡܲܕܥܵܐ
ܦܫܝܼܛܵܐ ܘܩܲܛܝܼܢܵܐ ܡܸܬܿܕܲܪܟܿܝܼܢ. ܗܵܝܕܹܝܢ ܪܸ̈ܓܼܫܹܐ ܓܵܘܵܝܹ̈ܐ: ܡܸܬܿܬܿܥܝܼܪܝܼܢ
ܠܦܘܼܠܚܵܢܵܐ ܕܪܘܼܚ: ܐܲܝܟܼ ܛܲܟܼܤܵܐ ܕܗܵܘܹ̇ܐ ܒܗܵܘ̇ ܗܘܼܦܵܟܼܵܐ
ܕܠܵܐ ܡܵܝܘܿܬܼܘܼܬܼܵܐ ܘܠܵܐ ܡܸܬܼܚܲܒܿܠܵܢܘܼܬܼܵܐ. ܡܛܸܠ ܕܲܩܝܵܡܬܼܵܐ
ܡܸܬܼܝܲܕܼܥܵܢܝܼܬܼܵܐ ܐܲܝܟܼ ܕܲܒܼܐ̄ܪܵܙܵܐ ܩܲܒܸܠ̣ܘ ܡܸܟܵܐ: ܠܬܲܚܘܝܼܬܼܵܐ ܫܲܪܝܼܪܬܵܐ
ܕܗܵܘ̇ ܚܘܼܕܵܬܼܵܐ ܕܓܼܵܘܵܐ܀ ܗܵܠܹܝܢ ܐܸܢܘܿܢ ܬܠܵܬܼܵܐ ܛܲܟܼܤܹ̈ܐ ܕܝܼܕܲܥܬܼܵܐ:
ܕܲܒܼܗܘܿܢ ܡܤܲܝܲܟ ܟ̱ܠܹܗ ܪܲܗܛܵܐ ܕܒܲܪܢܵܫܵܐ: ܕܦܲܓܼܪܵܐ: ܘܢܲܦܫܵܐ:
ܘܪܘܼܚܵܐ. ܡ̣ܢ ܕܲܡܫܲܪܸܐ ܒܲܪܢܵܫܵܐ ܠܡܸܦܪܲܫ ܒܹܝܬܼ ܛܵܒܼܬܼܵܐ ܠܒܼܝܼܫܬܼܵܐ:
ܘܲܥܕܲܡܵܐ ܕܢܵܦܹ̇ܩ ܡ̣ܢ ܥܵܠܡܵܐ: ܒܗܵܠܹܝܢ ܬܠܵܬܼ ܡܘܼ̈ܫܚܵܬܼܵܐ ܥܵܐ̇ܠܵܐ
ܝܑܼܕܥܕܲܡܵܐ ܕܢܵܦܹ̇ܩ ܡ̣ܢ ܥܵܠܡܵܐ: ܒܗܵܠܹܝܢ ܬܠܵܬܼ ܡܘܼ̈ܫܚܵܬܼܵܐ ܥܵܐ̇ܠܵܐ
ܝܑܼܕܲܥܬܼܵܐ ܕܢܲܦܫܹܗ: ܘܫܘܼܡܠܵܝܵܐ ܕܟܼܠܹܗ ܥܵܘ̣ܠܵܐ ܘܪܘܼܫܥܵܐ: ܘܤܵܟܼܵܐ
ܕܟܼܠܵܗ̇ ܙܲܕܝܼܩܘܼܬܼܵܐ: ܘܲܠܡܸܓܲܫ ܥܘܼ̈ܡܩܹܐ ܕܟܼܠܗܘܿܢ ܐ̄ܪ̈ܵܙܹܐ ܕܪܘܼܚ:
ܚܕܼܵܐ ܝܑܼܕܲܥܬܼܵܐ ܤܵܥ̇ܪܵܐ ܒܗܵܠܹܝܢ ܬܠܵܬܼ ܡܘܼ̈ܫܚܵܬܼܵܐ. ܘܲܒܼܗܹܝܢ ܐܝܼܬܹܝܗ̇:
ܟ̱ܠܵܗ̇ ܡܸܬܿܬܿܙܝܼܥܵܢܘܼܬܼܵܐ ܕܗܵܘܢܵܐ ܕܤܵܠܹ̇ܩ ܐܵܘ ܢܵܚܹ̇ܬܼ: ܒܛܵܒܼ̈ܬܼܵܐ:
ܐܵܘ ܒܼܒܼܝܼ̈ܫܵܬܼܵܐ: ܐܵܘ ܒܡܸܨܥܵܝܘܼܬܼܵܐ. ܠܗܵܠܹܝܢ ܡܘܼ̈ܫܚܵܬܼܵܐ ܩܵܪܹܝܢ ܐܲܒܼܵܗ̈ܬܼܵܐ:
ܟܝܵܢܵܐ: ܠܒܲܪ ܡ̣ܢ ܟܝܵܢܵܐ: ܠܥܸܠ ܡ̣ܢ ܟܝܵܢܵܐ. ܘܗܵܠܹܝܢ ܐܸܢܹܝܢ ܬܠܵܬܼ
ܦܸܢ̈ܝܵܢ: ܕܲܠܗܹܝܢ ܡܸܬܼܥܲܠܸܐ ܘܡܸܬܿܬܲܚܬܸܐ ܥܘܼܗܕܵܢܵܗ̇ ܕܢܲܦܫܵܐ
ܡܲܠܵܠܬܼܵܐ: ܐܲܝܟܼ ܕܐܲܡܝܼܪ. ܐܵܘ ܒܲܟܼܝܵܢܵܐ ܦܵܠ̇ܚܵܐ ܙܲܕܝܼܩܘܼܬܼܵܐ: ܐܵܘ
ܠܥܸܠ ܡ̣ܢ ܟܝܵܢܵܐ ܡܸܬܼܚܲܛܦܵܐ ܒܥܘܼܗܕܵܢܵܗ̇ ܒܬܹܐܘܿܪܝܼܵܐ ܕܲܠܘܵܬܼ

 375 

ܐܲܠܵܗܵܐ: ܐܵܘ ܠܒܲܪ ܡ̣ܢ ܟܝܵܢܵܐ ܬܸܦܘܿܩ ܠܡܸܪܥܵܐ ܚܙܝܼܪܹ̈ܐ: ܐܲܝܟܼ
ܗܵܘ̇ ܕܐܵܘܒܸܕܼ ܥܘܼܬܼܪܵܐ ܕܦܵܪܘܿܫܘܼܬܹܗ: ܟܲܕܼ ܦܵܠܲܚ ܗ̄ܘ̣ܵܐ ܥܲܡ
ܫܸܚܪܵܐ ܕܫܹ̈ܐܕܹܐ.
	ܛܲܟܼܤܵܐ ܓܹܝܪ ܩܲܕܼܡܵܝܵܐ ܕܝܼܕܲܥܬܼܵܐ: ܡܫܲܗܝܵܢܵܐ ܗ̄ܘ̣ ܕܢܲܦܫܵܐ ܡ̣ܢ
ܥܲܡ̈ܠܹܐ ܕܲܒܼܪܲܗܛܼܵܐ ܕܒܼܵܬܲܪ ܛܵܒܼ̈ܬܼܵܐ. ܘܛܲܟܼܤܵܐ ܡܸܨܥܵܝܵܐ: ܡܲܪܬܚܵܢܵܐ
ܗ̄ܘ̣ ܕܢܲܦܫܵܐ ܒܚܹܐܦܵܐ ܕܪܲܗܛܵܐ ܕܲܒܼܕܲܪ̈ܓܹܐ ܕܗܲܝܡܵܢܘܼܬܼܵܐ. ܘܛܲܟܼܤܼܵܐ
ܬܠܝܼܬܼܵܝܵܐ: ܦܵܘܫܵܐ ܗ̄ܘ̣ ܕܢܲܦܫܵܐ ܡ̣ܢ ܦܘܼܠܚܵܢܵܐ: ܘܛܘܼܦܤܵܐ ܗ̄ܘ̣
ܕܗܵܝ̇ ܕܲܥܬܼܝܼܕܼܵܐ: ܕܒܼܪܸܢܝܵܐ ܒܲܠܚܘܿܕܼ ܕܡܲܕܼܥܵܐ ܡܸܬܼܒܲܤܡܵܐ: ܒܐ̄ܪ̈ܵܙܹܐ
ܕܛܵܒܼ̈ܬܼܵܐ ܕܲܥܬܼܝܼ̈ܕܼܵܢ. ܐܸܠܵܐ ܡܸܛܠ ܕܲܥܕܲܟܹܝܠ ܠܵܐ ܐܸܬܼܥܲܠܝܼ ܟܝܵܢܵܐ
ܡ̣ܢ ܛܲܟܼܤܵܐ ܕܡܵܝܘܿܬܼܘܼܬܼܵܐ ܘܡ̣ܢ ܝܘܼܩܪܵܐ ܕܒܸܤܪܵܐ: ܕܢܸܗܘܸܐ
ܓܡܝܼܪܵܐܝܼܬܼ ܒܗܵܝ̇ ܕܘܼܚܵܢܘܼܬܼܵ ܕܲܡܥܲܠܝܵܐ ܡ̣ܢ ܡܸܨܛܲܠܝܵܢܘܼܬܼܵܐ: ܘܠܵܐ
ܡܲܨܝܵܐ ܕܠܲܓܼܡܝܼܪܘܼܬܼܵܐ ܕܠܵܐ ܚܲܤܝܼܪܵܐ ܢܫܲܡܸܫ ܒܥܵܠܡܵܐ ܕܡܵܝܘܿܬܼܘܼܬܼܵܐ:
ܘܢܲܪܦܸܐ ܠܲܟܼܝܵܢܵܐ ܕܒܸܤܪܵܐ ܓܡܝܼܪܵܐܝܼܬܼ: ܟܲܕܼ ܥܕܲܟܹܝܠ ܒܵܗ̇ ܡܸܬܼܗܲܦܲܟܼ:
ܒܫܘܼܢܵܝܵܐ ܗܵܘܹ̇ܐ ܒܗܵܢܵܐ ܘܲܒܼܗܵܘ̇. ܟܲܕܼ ܒܲܙܒܲܢ ܐܲܝܟܼ ܡܸܤܟܹܢܵܐ ܘܲܤܢܝܼܩܵܐ
ܥܲܢܝܵܐ ܢܲܦܫܵܐ ܒܛܲܟܼܤܵܐ ܗܵܘ̇ ܡܸܨܥܵܝܵܐ ܕܝܼܕܲܥܬܼܵܐ: ܒܲܡܝܲܬܪ̈ܵܬܼܵܐ
ܕܒܲܟܼܝܵܢܵܐ ܤܝܼ̈ܡܵܢ ܒܚܲܝܠܵܐ ܠܡܸܦܠܲܚ: ܡܸܛܠ ܟܝܵܢܹܗ ܕܦܲܓܼܪܵܐ.
ܘܒܲܙܒܲܢ ܐܲܝܟܼ ܐܲܝܠܹܝܢ ܕܪܘܼܚܵܐ ܕܤܝܼܡܲܬܼ ܒܢܲܝ̈ܵܐ ܢܤܲܒܼܘ: ܒܐ̄ܪ̈ܵܙܹܐ
ܕܚܹܐܪܘܼܬܼܵܐ ܡܸܬܼܒܲܤܡܵܐ ܒܡܵܘܗܲܒܼܬܼܵܐ ܕܪܘܼܚ: ܐܲܝܟܼ ܟܡܵܐ
ܕܲܠܝܵܗܘܿܒܼܵܗ̇ ܫܵܦ̇ܪܵܐ. ܘܬܼܘܼܒܼ ܦܵܢ̇ܝܵܐ ܠܡܸܤܟܹܿܢܘܼܬܼܵܐ ܕܥܵܠܡܵܗ̇:
ܗܵܢܵܘ ܕܹܝܢ ܕܦܲܓܼܪܵܐ: ܟܲܕܼ ܙܗܝܼܪܵܐ ܒܹܗ ܒܦܲܓܼܪܵܐ: ܕܠܵܐ ܢܸܫܒܹܝܗ̇
ܒܲܡܓܲܪ̈ܓܼܵܢܝܬܼܵܐ ܕܲܫܟܼܝܼ̈ܚܵܢ ܒܥܵܠܡܹܗ: ܒܝܲܕܼ ܙܵܘܥܵܘ̈ܗܝ ܫܓܼܝܼ̈ܫܹܐ
ܘܡܸܨ̈ܛܲܠܝܵܢܹܐ. ܒܕܲܟܼܡܵܐ ܕܲܬܼܚܹܝܬܼ ܐܲܦܲܝ̈ ܬܲܪܥܵܐ ܕܒܸܤܪܵܐ ܚܒܼܝܼܫܵܐ:

 376 

ܠܲܝܬܿ ܠܵܗ̇ ܬܘܼܟܼܠܵܢܵܐ. ܠܲܝܬܿ ܓܹܝܪ ܚܘܼܪܵܪܵܐ ܓܡܝܼܪܵܐ ܒܥܵܠܡܵܐ ܠܵܐ
ܓܡܝܼܪܵܐ. ܟ̱ܠܹܗ ܓܹܝܪ ܦܘܼܠܚܵܢܵܐ ܕܝܼܕܲܥܬܼܵܐ: ܕܥܲܠܡܵܐ ܗ̄ܘ̣ ܘܲܕܿܕܼܘܼܪܵܫܵܐ
ܗ̄ܘ̣. ܥ̇ܒܼܵܕܹ̈ܐ ܕܹܝܢ ܕܗܲܝܡܵܢܘܼܬܼܵܐ: ܠܵܐ ܗ̄ܘ̣ܵܐ ܒܥܲܡ̈ܠܹܐ ܡܸܬܼܦܲܠܚܝܼܢ.
ܡܸܛܠ ܕܲܒܼܙܵܘ̈ܥܹܐ ܪ̈ܘܼܚܵܢܹܐ ܒܡܲܥܕܼܵܢܘܼܬܼܵܐ ܥܲܪܛܸܠܵܝܵܬܼܵܐ ܕܢܲܦܫܵܐ
ܡܸܬܼܓܲܡܪܝܼܢ: ܘܲܠܥܸܠ ܡ̣ܢ ܪܸ̈ܓܼܫܹܐ. ܩܲܛܝܼܢܵܐ ܓܹܝܪ ܗܲܝܡܵܢܘܼܬܼܵܐ ܡ̣ܢ
ܝܑܼܕܲܥܬܼܵܐ: ܐܲܝܟܼ ܡܵܐ ܕܝܼܕܲܥܬܼܵܐ ܡ̣ܢ ܤܘܼܥܪ̈ܵܢܹܐ ܡܸܬܼܪ̈ܓܼܫܵܢܹܐ. ܟܠܗܘܿܢ
ܓܹܝܪ ܩܲܕܝܼ̈ܫܹܐ ܕܲܠܕܼܘܼܒܵܪܵܐ ܪܘܼܚܵܢܵܐ ܐܸܫܬܿܘܝܼܘ: ܕܐܝܼܬܼܵܘܗܝ ܬܲܗܪܵܐ
ܕܒܲܐܠܵܗܵܐ: ܒܚܲܝܠܵܐ ܕܗܲܝܡܵܢܘܼܬܼܵܐ ܡܸܬܿܕܲܒܿܪܝܼܢ: ܒܒܼܘܼܤܵܡܵܐ ܕܕܼܘܼܒܵܪܵܐ
ܗܵܘ̇ ܕܲܠܥܸܠ ܡ̣ܢ ܟܝܵܢܵܐ. ܗܲܝܡܵܢܘܼܬܼܵܐ ܕܹܝܢ ܐܵܡܲ݁ܪܢܵܐ: ܠܵܘ ܠܗܵܝ̇
ܕܲܝܢܲܗܝܡܸܢ ܐ̄ܢܵܫ ܒܦܘܼܪܫܵܢܵܐ ܕܲܩܢܘܿܡܹ̈ܐ ܤܓܿܝܼ̈ܕܹܐ ܕܐܝܼܬܼܵܘܬܼܵܐ:
ܘܲܒܼܕܼܝܼ̈ܠܵܝܬܼܵܐ ܕܲܟܼܝܵܢܵܗ̇: ܘܒܲܡܕܲܒܿܪܵܢܘܼܬܼܵܐ ܬܡܝܼܗܬܵܐ ܕܲܗܘ̤ܵܬܼ
ܒܐ̄ܢܵܫܘܼܬܲܢ ܒܲܢܤܝܼܒܼܘܼܬܹܗ ܕܲܟܼܝܵܢܲܢ. ܐܸܠܵܐ ܗܲܝܡܵܢܘܼܬܼܵܐ ܗܵܕܹܐ ܐܵܡܲ݁ܪܢܵܐ:
ܠܢܘܼܗܪܵܐ ܡܸܬܼܝܲܕܼܥܵܢܵܐ: ܕܡ̣ܢ ܛܲܝܒܿܘܼܬܼܵܐ ܕܵܢܲܚ ܒܢܲܦܫܵܐ.
ܘܲܒܼܤܵܗܕܘܼܬܼܵܐ ܕܪܸܥܝܵܢܵܐ ܤܵܡܹ̇ܟܼ ܠܠܸܒܵܐ ܠܵܐ ܦܠܝܼܓܼܵܐܝܼܬܼ: ܒܲܦܝܵܤܵܐ
ܕܤܲܒܼܪܵܐ ܕܪܲܝܼܩ ܡ̣ܢ ܟܠܗܹܝܢ ܡܲܤܒܪ̈ܵܢܘܵܬܼܵܐ: ܘܠܵܐ ܒܝܘܼܒܵܠܵܐ
ܕܡ̣ܢ ܡܲܫܡܲܥ ܐܸܕܼܢܵܐ. ܘܲܡܚܵܘܸܐ ܠܵܗ̇ ܒܥܲܝ̈ܢܹܐ ܪ̈ܘܼܚܵܢܵܝܬܼܵܐ: ܐ̄ܪ̈ܵܙܹܐ
ܛܡܝܼܪܹ̈ܐ ܕܲܒܼܢܲܦܫܵܐ: ܘܥܘܼܬܼܪܵܐ ܓܢܝܼܙܵܐ ܕܐܲܠܵܗܘܼܬܼܵܐ: ܕܲܡܤܲܬܲܪ ܡ̣ܢ
ܥܲܝ̈ܢܹܐ ܕܲܒܼܢܲܝ̈ ܒܸܤܪܵܐ: ܘܡܸܬܼܓܠܸܐ ܒܪܘܼܚܵܐ ܠܐܲܝܠܹܝܢ ܕܥܲܠ
ܦܵܬܼܘܿܪܹܗ ܕܲܡܫܝܼܚܵܐ ܡܸܬܼܪܲܒܹܝܢ ܒܗܸܪܓܵܐ ܕܢܵܡܘܿܤܵܘ̈ܗܝ. ܐܲܝܟܼ
ܕܐܸܡ݂ܲܪ: ܕܐܸܢ ܦܘܼܩ̈ܕܵܢܲܝ ܬܸܛܪܘܼܢ: ܡܫܲܕܲܪܢܵܐ ܠܟܼܘܿܢ ܪܘܼܚܵܐ
ܦܵܪܲܩܠܹܝܛܵܐ: ܗܵܘ̇ ܕܥܵܠܡܵܐ ܠܵܐ ܡܸܫܟܲܚ ܠܲܡܩܲܒܵܠܘܼܬܹܗ:

 377 

ܘܲܢܚܵܘܹܝܟܼܘܿܢ ܟ̱ܠܹܗ ܫܪܵܪܵܐ. ܗܵܟܲܢܵܐ ܘܲܡܚܵܘܸܐ ܠܹܗ ܠܒܲܪܢܵܫܵܐ
ܚܲܝܠܵܐ ܩܲܕܝܼܫܵܐ: ܕܡܲܓܸܢ ܥܠܵܘܗܝ ܒܟܼܠܥܸܕܵܢ܀ ܚܲܝܠܵܐ ܗܵܘ̇:
ܗ̤ܘ ܐܝܼܬܼܵܘܗܝ ܦܵܪܲܩܠܹܝܛܵܐ. ܒܚܲܝܠܵܗ̇ ܕܗܵܕܹܐ ܗܲܝܡܵܢܘܼܬܼܵܐ
ܡܸܫܬܲܓܼܪܵܢ ܟܠܗܹܝܢ ܡܢܵܘ̈ܬܼܵܗ̇ ܕܢܲܦܫܵܐ ܐܲܝܟܼ ܕܲܒܼܢܘܼܪܵܐ:
ܘܡܲܤܪܵܐ ܥܲܠ ܟܠ ܩܹܘܲܢܕܹܝܢܘܿܣ ܒܬܼܘܼܟܼܠܵܢܵܐ ܕܥܲܠ ܐܲܠܵܗܵܐ.
ܘܒܸܐܒܼܪܹ̈ܐ ܕܡ̣ܢ ܗܲܝܡܵܢܘܼܬܼܵܐ ܡܸܬܼܥܲܠܝܵܐ ܡ̣ܢ ܚܘܿܓܼܬܼܵܗ̇ ܕܲܒܼܪܝܼܬܼܵܐ
ܗܵܕܹܐ ܡܸܬܼܚܲܙܝܵܢܝܼܬܼܵܐ: ܘܐܲܝܟܼ ܪܵܘܝܵܐ ܗܵܘܝܵܐ ܒܐܲܡܝܼܢܘܼ ܒܬܲܗܪܵܐ ܕܡܲܪܢܝܬܼܵܐ
ܕܒܲܐܠܵܗܵܐ. ܘܲܒܼܚܸܙܘܵܐ ܠܵܐ ܡܪܲܟܿܒܼܵܐ: ܘܲܒܼܤܘܼ̈ܟܵܠܹܐ ܕܠܵܐ ܚܸܙܘܵܐ ܕܥܲܠ
ܟܝܵܢܵܐ ܐܲܠܵܗܵܝܵܐ: ܡܥܲܝܕܼܵܐ ܠܹܗ ܠܡܲܕܥܵܐ ܠܲܡܚܵܪ ܒܗܸܪܓܵܐ ܕܥܲܠ
ܟܲܤܝܘܼܬܹܗ. ܥܕܲܡܵܐ ܓܹܝܪ ܕܢܹܐܬܸܐ ܗܵܘ̇ ܕܐܝܼܬܼܵܘܗܝ ܫܘܼܡܠܵܝܵܐ
ܕܐ̄ܪ̈ܵܙܹܐ: ܘܲܠܓܸܠܝܵܢܹܗ ܥܹܝܢ ܒܲܓܼܠܸܐ ܢܸܫܬܿܘܸܐ: ܗܲܝܡܵܢܘܼܬܼܵܐ ܡܫܲܡܫܵܐ
ܒܹܝܬܼ ܐܲܠܵܗܵܐ ܠܩܲܕܝܼ̈ܫܹܐ ܐ̄ܪ̈ܵܙܹܐ ܕܠܵܐ ܡܸܬܼܡܲܠܠܝܼܢ. ܕܲܠܗܘܿܢ ܢܸܫܬܿܘܸܐ
ܒܛܲܝܒܿܘܼܬܹܗ ܕܲܡܫܝܼܚܵܐ: ܗܵܪܟܵܐ ܒܪܲܗܒܼܘܿܢܵܐ: ܘܬܲܡܵܢ ܒܲܩܢܘܿܡܹ̈ܐ
ܚܲܬܝܼ̈ܬܹܐ ܒܡܲܠܟܿܘܼܬܼܵܐ ܕܲܫܡܲܝܵܐ: ܥܲܡ ܟܠܗܘܿܢ ܪ̈ܵܚܡܵܘܗܝ. ܐܵܡܹܝܢ.