Isaac of Nineveh. “Discourse 55.” Based upon Digital Syriac Corpus. Last modified March 5, 2019. https://syriaccorpus.org/446.
    
        
            
                ܕܡ̣ܢ ܐܲܝܟܵܐ ܡܸܬܼܢܲܛܪܵܐ ܥܝܼܪܘܼܬܼܵܐ ܟܤܝܼܬܼܵܐ ܒܓܼܵܘ ܢܲܦܫܵܐ: ܘܡ̣ܢ
                ܡܵܢܵܐ ܥܵܐ̇ܠܵܐ ܕܲܡܟܘܼܬܼܵܐ ܘܩܲܪܝܼܪܘܼܬܼܵܐ ܒܪܸܥܝܵܢܵܐ: ܘܲܡܕܲܥܟܼܵܐ
                ܠܚܲܡܝܼܡܘܼܬܼܵܐ ܩܲܕܝܼܫܬܼܵܐ ܡ̣ܢ ܢܲܦܫܵܐ: ܘܲܡܡܝܼܬܼܵܐ ܠܪܸܓܿܬܼܵܐ ܕܒܲܐܠܵܗܵܐ:
                ܕܥܲܠ ܪ̈ܓܼܝܼܓܼܵܬܼܵܐ ܪ̈ܘܼܚܵܬܵܝܵܬܼܵܐ ܘܲܡܫܲܝܵܢ̈ܝܬܼܵܐ. ܢܗ.
            
            
                ܠܲܝܬܹܝܗ̇ ܡܸܬܼܡܲܨܝܵܢܘܼܬܼܵܐ ܒܤܲܩܘܼܒܼܠܵܝܘܼܬܼܵܐ ܠܘܵܬܼ ܥܘܼܟܵܪܵܐ
                ܒܪ̈ܵܓܲܝ ܫܲܦܝܼܪ̈ܵܬܼܵܐ: ܐܸܠܘܼ ܠܵܗ̇ ܠܒܼܝܼܫܘܼܬܼ ܨܸܢ̈ܥܵܬܹܗ ܐܲܦܬܼܵܐ ܠܵܐ
                ܡܸܫܬܿܟܲܚ ܗ̄ܘ̣ܵܐ ܡ̣ܢ ܝܲܕܼ ܡܲܚܒܼܵܢܲܝ̈ܗܹܝܢ ܕܫܲܦܝܼܪܵܬܼܵܐ. ܐܝܼܬܹܝܗ̇ ܡܲܢ
                ܨܒܼܘܼܬܼܵܐ: ܕܐܲܝܟܼ ܗܵܟܲܢܵܐ. ܠܟܼܠ ܙܵܘܥܵܐ ܕܪܸܚܡܬܼܵܐ ܕܫܲܦܝܼܪܬܵܐ ܕܐܝܼܬܼ:
                ܥܲܡܹܗ ܕܫܘܼܪܵܝ ܡܸܬܿܬܿܙܝܼܥܵܢܘܼܬܼܵܐ ܢܵܩܹ̇ܦ ܠܹܗ ܛܢܵܢܵܐ ܡܸܕܸܡ: ܕܕܼܵܡܹ̇ܐ
                ܠܲܕܼܓܼܘܼܡܪܹ̈ܐ ܕܢܘܼܪܵܐ ܒܚܲܡܝܼܡܘܼܬܹܗ. ܘܗ̤ܘ ܗܵܢܵܐ ܡܥܵܕܼ ܚܵܕܲܪ
                ܠܹܗ ܐܲܝܟܼ ܫܘܼܪܵܐ ܠܹܗ ܠܙܵܘܥܵܐ ܗܵܘ̇ ܕܪܸܚܡܬܼܵܐ: ܘܛܵܪܹܕ ܡ̣ܢ
                ܘܲܥܕܹܗ ܟܠ ܤܲܩܘܼܒܼܠܵܐ ܘܥܘܼܘܵܟܼܵܐ ܕܐܝܼܬܼ. ܥܘܼܫܢܵܐ ܕܹܝܢ ܤܲܓܝܼܐܵܐ
                ܘܚܲܝܠܵܐ ܩܢܸܐ ܗܵܢܵܐ ܕܠܵܐ ܡܸܬܼܡܲܠܲܠ: ܠܲܡܚܲܤܢܘܼ ܠܟܼܠܵܗ̇ ܢܵܦܫܵܐ
                ܡ̣ܢ ܕܬܸܬܼܪܲܦܸܐ ܐܵܘ ܕܬܸܬܿܙܝܼܥ ܡ̣ܢ ܚܹܐܦܹ̈ܐ ܕܟܼܠ ܥܘܼܤܵܩ̈ܝܼܢ. ܘܗܵܘ̇
                ܡܲܢ ܩܲܕܡܵܝܵܐ ܐܝܼܬܼܵܘܗܝ: ܚܲܝܠܵܗ̇ ܕܪܸܓܿܬܼܵܐ ܩܲܕܝܼܫܬܼܵܐ: ܕܲܢܨܝܼܒܼܵܐ
                ܒܲܟܪܝܵܢܵܗ̇ ܕܢܲܦܫܵܐ. ܗܵܢܵܐ ܕܹܝܢ: ܢܸܒܼܗܵܐ ܕܡܸܬܿܬܿܙܝܼܥ ܡ̣ܢ ܚܲܝܠܵܗ̇
                
                 393 
                
                ܕܚܸܡܬܼܵܐ ܕܲܡܟܼܝܼܢܵܐ ܒܵܗ̇: ܗܵܝ̇ ܕܡ̣ܢ ܐܲܠܵܗܵܐ ܒܲܢ ܤܝܼܡܵܐ ܡܟܲܝܢܵܐܝܼܬܼ:
                ܠܡܸܛܲܪ ܬܚܘܼܡܵܘ̈ܗܝ ܕܲܟܼܝܵܢܵܐ: ܕܲܬܼܫܲܡܲܪ ܥܘܼܙܵܐ ܕܚܹܐܦܵܗ̇ ܠܡܘܼܠܵܝ
                ܪܸܓܿܬܼܵܐ ܟܝܵܢܵܝܬܼܵܐ ܕܢܲܦܫܵܐ: ܕܗ̤ܝ ܗ̣̄ܝ ܡܝܲܬܿܪܘܼܬܼܵܐ. ܠܲܝܬܿ ܠܡܸܦܠܲܚ
                ܡܝܲܬܿܪܘܼܬܼܵܐ ܒܸܠܥܵܕܼܵܘܗܝ. ܡܸܫܬܲܡܲܗ ܓܹܝܪ: ܛܢܵܢܵܐ. ܗ̤ܘܝܘܼ ܕܲܡܛܲܢܲܢ
                ܘܲܡܙܝܼܥ ܘܲܡܫܲܠܗܸܒܼ ܘܲܡܓܲܒܲܪ ܠܒܲܪܢܵܫܵܐ ܒܲܙܒܲܢ ܙܒܲܢ: ܕܲܢܒܲܤܲܪ
                ܥܲܠ ܦܲܓܼܪܵܐ ܒܐܘܼ̈ܠܨܵܢܹܐ ܘܢܸܤܝ̈ܘܿܢܹܐ ܕܚܝܼ̈ܠܹܐ ܕܐܵܪܥ̇ܝܼܢ: ܠܡܲܫܠܵܡܘܼ
                ܢܲܦܫܹܗ ܬܟܼܝܼܠܵܐܝܼܬܼ ܠܡܵܘܬܵܐ: ܘܲܠܡܹܐܪܲܥ ܚܲܝ̈ܠܲܝ ܡܵܪܘܿܕܼܵܐ: ܚܠܵܦ
                ܫܘܼܡܠܵܝܵܐ ܕܗܵܘ̇ ܡܸܕܸܡ ܕܐܲܚܒܲܬ̤ ܢܲܦܫܵܐ ܡܝܲܬܿܪܵܐܝܼܬܼ.
                	ܐ̄ܢܵܫ ܓܹܝܪ ܠܒܼܝܼܫ ܠܲܡܫܝܼܚܵܐ ܒܕܼܘܼܟ ܒܲܟܼܬܼܵܒܹܗ: ܟܲܠܒܵܐ
                ܩܪܵܝܗܝ ܠܗܵܢܵܐ ܛܢܵܢܵܐ: ܘܢܵܛܘܿܪܵܐ ܕܢܵܡܘܿܤܹܗ ܕܐܲܠܵܗܵܐ: ܕܗ̤ܝ
                ܗ̣̄ܝ ܡܝܲܬܿܪܘܼܬܼܵܐ. ܡܝܲܬܿܪܘܼܬܼܵܐ ܐܝܼܬܹܝܗ̇: ܫܘܼܡܠܵܝ ܢܵܡܘܿܤܵܘ̈ܗܝ
                ܕܐܲܠܵܗܵܐ. ܥܵܫ̇ܢ ܓܹܝܪ ܗ̤ܘ ܗܵܢܵܐ ܚܲܝܠܵܐ ܛܲܢܵܢܵܐ: ܘܡܸܬܿܬܿܥܝܼܪ
                ܘܡܸܫܬܲܠܗܲܒܼ ܠܡܸܛܲܪ ܒܲܝܬܵܐ ܒܬܲܪܬܹܝܢ ܥܸܠ̈ܠܵܢ. ܘܡܸܬܼܡܚܸܠ
                ܬܘܼܒܼ ܘܢܵܐܹ̇ܡ ܘܒܼܵܤܹ̇ܐ: ܒܬܲܪܬܹܝܢ ܥܸܠ̈ܠܵܬܼܵܐ ܐ̄ܚܪ̈ܢܝܬܼܵܐ. ܘܥܸܠܬܼܵܐ
                ܩܲܕܼܡܵܝܬܼܵܐ ܕܚܲܡܝܼܡܘܼܬܹܗ ܘܥܝܼܪܘܼܬܹܗ: ܐܸܡܲܬܼܝ ܕܕܸܚܠܬܵܐ ܡܸܕܸܡ
                ܢܵܒܼ̇ܗܵܐ ܒܹܗ ܒܒܲܪܢܵܫܵܐ: ܒܲܕܼܩܵܢܹ̇ܛ ܥܲܠ ܐܲܦܲܝ̈ ܡܝܲܬܿܪ̈ܵܬܼܵܐ ܕܲܩܢܸܐ
                ܐܵܘ ܕܲܥܬܼܝܼܕܼ ܕܢܸܩܢܸܐ. ܕܕܲܡ ܬܸܬܼܚܲܠܲܨ ܐܵܘ ܬܸܬܼܚܲܒܲܠ: ܡ̣ܢ ܓܸܕܼܫܵܐ
                ܡܸܕܸܡ ܕܢܵܩܹ̇ܦ ܠܵܗ̇. ܘܗܵܕܹܐ ܡ̣ܢ ܒܛܝܼܠܘܼܬܼܵܐ ܐܲܠܵܗܵܝܬܵܐ ܡܸܬܿܬܿܙܝܼܥܵܐ:
                ܒܟܼܠܗܘܿܢ ܦܵܠܚܹ̈ܝܗ̇ ܚܲܬܝܼ̈ܬܹܐ ܕܲܡܝܲܬܿܪܘܼܬܼܵܐ: ܠܥܝܼܪܘܼܬܼܵܐ ܘܲܛܢܵܢܵܐ
                ܐܲܡܝܼܢܵܐ ܕܢܲܦܫܵܐ: ܕܠܵܐ ܬܸܗܘܸܐ ܢܵܝ̇ܡܵܐ. ܐܸܡܲܬܼܝ ܕܹܝܢ: ܕܗܵܕܹܐ ܕܸܚܠܬܼܵܐ
                ܡܸܬܿܬܿܙܝܼܥܵܐ ܒܲܟܼܝܵܢܵܐ: ܟܲܠܒܵܐ ܗܵܢܵܐ ܕܐܸܡ݂ܲܪܢܲܢ: ܒܠܸܠܝܵܐ ܘܒܼܐܝܼܡܵܡܵܐ
                
                 394 
                
                ܐܲܝܟܼ ܬܲܢܘܼܪܵܐ ܕܲܫܓܼܝܼܪ ܚܵܐܹ̇ܡ. ܟܲܕܼ ܡܥܝܼܪ ܠܹܗ ܠܲܟܼܝܵܢܵܐ: ܕܒܲܕܼܡܘܼܬܼ
                ܟܪܘܿܒܼܵܐ ܗܘ̤ܵܐ ܥܝܼܪ ܘܕܼܵܐܹ̇ܩ ܠܟܼܠ ܚܘܼܕܼܪ̈ܵܘܗܝ ܒܟܼܠܥܸܕܵܢ. ܐܲܝܟܼ
                ܐ̄ܢܵܫ ܢܹܐܡܲܪ: ܐܸܢ ܦܵܪܲܚܬܼܵܐ ܬܸܥܒܲܪ ܚܕܼܵܪܵܘܗܝ: ܡܸܬܿܬܿܙܝܼܥ ܘܢܵܒܲܚ
                ܒܚܹܐܦܵܐ ܚܲܪܝܼܦܵܐ ܕܠܵܐ ܡܸܬܼܡܲܠܲܠ. ܗ̤ܝ ܕܸܚܠܬܼܵܐ: ܐܸܡܲܬܼܝ ܕܲܚܠܵܦ
                ܦܲܓܼܪܵܐ ܬܸܗܘܸܐ: ܤܵܛܵܢܵܝܬܼܵܐ ܗ̣̄ܝ. ܒܕܸܐܬܼܦܲܠܲܓܼ ܥܲܠ ܒܛܝܼܠܘܼܬܹܗ
                ܕܐܲܠܵܗܵܐ ܒܗܲܝܡܵܢܘܼܬܹܗ: ܘܲܛܥ̣ܵܐ ܕܐܲܝܟܲܢ ܒܛܝܼܠ ܠܹܗ ܠܐܲܠܵܗܵܐ
                ܥܲܠ ܐܲܝܠܹܝܢ ܕܝܵܨ̇ܦܝܼܢ ܕܲܡܝܲܬܪܘܼܬܼܵܐ: ܠܡܹܐܨܲܦ ܕܝܼܠܗܘܿܢ ܒܟܼܠܥܸܕܵܢ.
                ܐܲܝܟܼ ܕܐܸܡ݂ܲܪ ܪܘܼܚܵܐ ܕܩܘܼܕܼܫܵܐ ܒܦܘܼܡܵܐ ܕܲܢܒܼܝܼܵܐ: ܥܲܝܢܵܘ̈ܗܝ ܠܲܡ
                ܕܡܵܪܝܵܐ ܥܲܠ ܙܲܕܝܼ̈ܩܹܐ: ܘܐܸܕܼܢܵܘ̈ܗܝ ܠܡܸܫܡܲܥ ܐܸܢܘܿܢ. ܘܬܲܪܥܝܼܬܹܗ
                ܠܲܡ ܕܡܵܪܝܵܐ: ܥܲܠ ܕܵܚܠܵܘ̈ܗܝ. ܘܐܲܝܟܼ ܕܡ̣ܢ ܦܲܪܨܘܿܦܵܐ ܕܝܼܠܹܗ ܠܘܵܬܼ
                ܦܵܠܚܲܝ̈ ܡܝܲܬܿܪܘܼܬܼܵܐ ܒܕܼܘܼܟܿܬܼܵܐ ܐ̄ܚܪܹܬܼܵܐ ܐܵܡܲ݁ܪ: ܠܵܐ ܠܲܡ ܬܸܩܪܘܿܒܼ
                ܠܵܟܼ ܒܝܼܫܬܼܵܐ: ܘܲܡܚܘܿܬܼܵܐ ܠܵܐ ܬܸܬܼܩܲܪܲܒܼ ܠܒܹܝܬܼ ܡܲܫܪܝܵܟܼ. ܡܸܛܠ
                ܕܲܠܡܲܠܲܐܟܼܵܘ̈ܗܝ ܢܦܲܩܸܕܼ ܥܠܲܝܟܼ ܕܲܢܢܲܛܪܘܼܢܵܟܼ: ܘܥܲܠ ܕܪ̈ܵܥܲܝܗܘܿܢ
                ܢܸܫܩܠܘܼܢܵܟܼ. ܥܲܡ ܫܲܪܟܵܐ ܕܦܸܬܼܓܼܵܡܹ̈ܐ ܕܲܟܼܬܼܝܼܒܼܝܼܢ. ܐܸܡܲܬܼܝ ܗܵܟܹܝܠ
                ܕܲܚܠܵܦ ܢܲܦܫܵܐ ܬܸܗܘܸܐ ܗ̤ܝ ܕܸܚܠܬܼܵܐ: ܡܸܛܠ ܓܸܕܼܫܹ̈ܐ ܕܲܢܩܹܝܢ
                ܠܲܡܝܲܬܿܪܘܼܬܼܵܐ: ܕܕܲܡ ܬܸܬܼܚܲܠܲܨ ܐܵܘ ܬܸܬܼܢܟܸܐ ܒܲܚܕܼܵܐ ܡ̣ܢ ܥܸܠ̈ܠܵܬܼܵܐ:
                ܚܘܼܫܒܼܵܐ ܗ̄ܘ̣ ܐܲܠܵܗܵܝܵܐ ܗܵܢܵܐ: ܘܪܸܢܝܵܐ ܡܝܲܬܿܪܵܐ. ܘܡ̣ܢ ܒܛܝܼܠܘܼܬܼܵܐ
                ܕܐܲܠܵܗܵܐ ܐܝܼܬܹܝܗ̇ ܗ̤ܝ ܥܵܩܬܼܵܐ ܘܕܸܚܠܬܼܵܐ ܒܢܲܦܫܵܐ: ܘܩܸܢܛܵܐ
                ܕܲܡܫܲܢܸܩ ܠܪܸܥܝܵܢܵܐ ܒܨܸܦܬܹܗܘ
                	ܐܵܦ ܥܸܠܬܼܵܐ ܬܘܼܒܼ ܕܬܲܪܬܹܝܢ: ܕܥܘܼܫܢܹܗ ܘܬܲܒܼܪܲܫܬܹܗ ܕܟܲܠܒܵܐ
                ܐܝܼܬܹܝܗ̇: ܡܵܐ ܕܲܒܼܝܲܬܝܼܪܵܐ ܝܵܪܒܵܐ ܪܸܚܡܬܼܵܐ ܕܲܡܝܲܬܿܪܘܼܬܼܵܐ ܒܢܲܦܫܵܐ.
                ܒܦܘܼܚܵܡܵܐ ܓܹܝܪ ܕܪܸܚܡܬܼܵܐ ܕܲܒܼܢܲܦܫܵܐ: ܥܲܠ ܗܵܘ̇ ܡܵܐ ܕܐܲܚܝܼܕܼܵܐ
                
                 395 
                
                ܒܚܘܼܒܹܗ: ܕܗ̤ܘܝܘܼ ܚܘܼܫܵܒܼܵܐ ܐܲܠܵܗܵܝܵܐ: ܗܵܟܲܢܵܐ ܡܸܬܼܢܲܒܼܪܲܫ ܛܢܵܢܵܐ
                ܗܵܢܵܐ ܟܝܵܢܵܝܵܐ ܥܲܠ ܐܲܦܹ̈ܝܗ̇. ܥܸܠ̈ܠܵܬܼܵܐ ܕܫܘܼܗܵܝܹܗ ܘܲܕܿܕܲܡܟܿܘܼܬܹܗ:
                ܚܕܼܵܐ ܡܸܢܗܹܝܢ: ܐܸܡܲܬܼܝ ܕܗ̤ܝ ܪܸܚܡܬܼܵܐ ܩܵܗ̇ܝܵܐ ܘܡܸܬܼܒܲܨܪܵܐ ܒܢܲܦܫܵܐ.
                ܕܬܲܪܬܹܝܢ ܕܹܝܢ: ܡܵܐ ܕܚܘܼܫܵܒܼܵܐ ܡܸܕܸܡ ܕܬܼܘܼܟܼܠܵܢܵܐ ܥܵܐܹ̇ܠ ܫܵܪܹܐ
                ܒܵܗ̇ ܒܢܲܦܫܵܐ. ܟܲܕܼ ܡܸܬܿܬܿܟܸܠ ܒܲܪܢܵܫܵܐ ܘܪܵܢܹܐ ܟܡܵܐ ܙܲܒܼܢ̈ܝܼܢ: ܕܠܲܝܬܿ
                ܠܹܗ ܩܸܢܛܵܐ ܡ̣ܢ ܡܸܕܸܡ ܕܡܲܨܝܵܐ ܕܲܢܤܲܓܿܦܝܼܘܗܝ. ܘܡ̣ܢ ܗܵܪܟܵܐ
                ܫܵܕܹܐ ܡܸܢܹܗ ܠܙܲܝܢܵܐ ܕܲܛܢܵܢܵܐ: ܘܗܵܘܹ̇ܐ ܐܲܝܟܼ ܒܲܝܬܼܵܐ ܕܠܵܐ ܢܵܛܘܿܪܵܐ.
                ܘܕܼܵܡܹ̇ܝܟܼ ܟܲܠܒܵܐ: ܘܲܠܡܲܛܪܬܵܐ ܡܲܪܦܸܐ. ܐܲܝܟܼ ܕܲܒܼܤܘܿܓܼܵܐܐ: ܡ̣ܢ
                ܗܵܢܵܐ ܚܘܼܫܵܒܼܵܐ ܗܵܘܹ̇ܐ ܚܘܼܠܨܵܐ ܠܤܘܿܓܼܐܗܘܿܢ ܕܒܼܵܬܹ̈ܐ ܡܸܬܼܝܲܕܼ̈ܥܵܢܹܐ.
                ܗܵܕܹܐ ܗܵܘ̇ܝܵܐ: ܐܸܡܲܬܼܝ ܕܥܵܡ̇ܛܵܐ ܠܵܗ̇ ܫܲܦܝܼܘܼܬܼ ܕܸܠܩܵܐ ܗܵܘ̇
                ܕܝܼܕܲܥܬܼܵܐ ܩܲܕܝܼܫܬܼܵܐ ܕܲܒܼܢܲܦܫܵܐ. ܡ̣ܢ ܡܵܢܵܐ ܥܵܡ̇ܛܵܐ ܗܵܕܹܐ: ܐܸܠܵܐ ܐܸܢ
                ܕܐܵܘ ܚܘܼܫܵܒܼܵܐ ܡܸܕܸܡ ܩܲܛܝܼܢܵܐ ܕܡܲܤܒܿܪܵܢܘܼܬܼܵܐ ܥܵܐܹ̇ܠ ܚܵܠܹ̇ܕܼ ܒܵܗ̇
                ܒܢܲܦܫܵܐ: ܐܵܘ ܠܢܸܩܦܵܐ ܕܝܲܬܝܼܪܘܼܬܼ ܨܸܦܬܼܵܐ ܕܗܵܠܹܝܢ ܦܲܓܼܪ̈ܵܢܵܝܬܼܵܐ
                ܡܸܬܼܪܡܸܐ ܒܲܪܢܵܫܵܐ: ܐܵܘ ܕܦܸܓܼܥܹ̈ܐ ܬܟܼܝܼ̈ܒܹܐ ܕܥܵܠܡܵܐ ܡܸܤܬܲܩܒܼܠܝܼܢ
                ܠܹܗ. ܟܠ ܐܸܡܲܬܼܝ ܕܲܡܩܲܒܸܠ ܐܵܓܼܘܿܢܸܤܛܵܐ ܦܸܓܼܥܵܐ ܕܥܵܠܡܵܝܹ̈ܐ: ܒܲܪ
                ܫܵܥܬܹܗ ܡܸܫܬܲܦܠܵܐ ܢܲܦܫܵܐ: ܝܲܬܝܼܪܵܐܝܼܬܼ ܕܐܲܢ̄ܬܿܬܼܵܐ. ܗܵܟܲܢܵܐ ܐܸܢ
                ܢܸܤܬܲܩܒܿܠܘܼܢ ܤܲܓܝܼ̈ܐܹܐ: ܗܵܠܹܝܢ ܕܲܒܼܚܵܘܪܗܘܿܢ ܡ̣ܢ ܐܵܢܲܢܩܹܐ ܡ̣ܢ
                ܫܘܼܒܼܚܵܐ ܤܪܝܼܩܵܐ ܡܸܫܬܲܚܩܵܐ ܢܲܦܫܵܐ. ܘܐܲܝܟܼ ܕܲܒܼܦܵܤܝܼ̈ܩܵܬܼܵܐ: ܡܸܬܿܕܲܡܸܐ
                ܗܵܘܢܵܐ ܫܵܢܘܿܙܵܐ: ܟܠ ܐܸܡܲܬܼܝ ܕܐܵܪܲܥ̇ ܠܹܗ ܥܵܠܡܵܐ: ܠܩܘܼܒܲܪܢ݂ܝܛܵܐ
                ܕܪܵܕܹܐ ܗ̄ܘ̣ܵܐ ܒܲܤܝܼܡܵܐܝܼܬܼ ܒܝܲܡܵܐ: ܟܲܕܼ ܢܵܫ̇ܒܵܐ ܠܹܗ ܪܘܼܚܵܐ ܒܲܤܝܼܡܬܼܵܐ
                ܡ̣ܢ ܒܸܤܪܹܗ ܠܘܼܩܒܲܠ ܠܡܹܐܢܵܐ: ܘܢܸܢܫܹܠܝ ܢܦܲܠ̣ ܒܲܝܢܵܬܼ ܫܩܝܼ̈ܦܹܐ.