Isaac of Nineveh. “Discourse 56.” Based upon Digital Syriac Corpus. Last modified March 5, 2019. https://syriaccorpus.org/447.
    
        
            
                 396 
                ܦܘܼܪ̈ܫܵܢܹܐ ܫܲܦܝܼܪܹ̈ܐ ܕܥܲܠ ܚܲܝܵܘ̈ܗܝ ܕܒܲܪܢܵܫܵܐ. ܢܘ.
            
            

                ܟܠ ܟܡܵܐ ܕܒܲܪܢܵܫܵܐ ܒܕܼܘܼܒܵܪܹܗ ܡܸܬܼܩܲܪܲܒܼ ܠܥܵܠܡܵܐ ܗܵܢܵܐ:
                ܪܸܚܡܬܼܵܐ ܕܨܸܒܼ̈ܘܵܬܼܵܐ ܡܸܤܬܲܬܿܬܼܵܐ ܒܹܗ. ܘܲܒܼܪܸܢܝܵܐ ܕܲܒܼܗܹܝܢ: ܡܸܫܬܓܸܫ
                ܐܲܡܝܼܢܵܐܝܼܬܼ. ܘܲܚܠܵܦܝܗܹܝܢ: ܢܵܨܹ̇ܐ ܥܲܡ ܒܢܲܝ̈ܢܵܫܵܐ. ܘܲܒܼܚܲܕܼ ܚܲܕܼ ܡ̣ܢ
                ܦܲܪ̈ܨܘܿܦܹܐ ܐܲܝܠܹܝܢ ܕܗܸܢܘܿܢ: ܡܸܬܿܬܿܚܸܕܼ ܕܠܵܐ ܒܘܼܝܵܢ ܒܪܸܚܡܬܼܵܐ. ܟܲܕܼ
                ܕܹܝܢ ܒܗܸܪܓܵܐ ܩܲܛܝܼܢܵܐ ܕܥܵܠܡܵܐ ܕܲܥܬܼܝܼܕܼ ܡܸܬܼܝܲܬܲܪ ܪܸܥܝܵܢܵܐ: ܪܸܢܝܵܐ
                ܕܠܵܐ ܕܡܘܼ ܢܵܒܲܗ ܒܹܗ ܐܲܡܝܼܢܵܐܝܼܬܼ. ܘܕܲܐܝܠܹܝܢ ܕܠܵܐ ܚܲܙ̈ܝܵܢ ܠܹܗ:
                ܒܤܲܒܼܪܵܐ ܤܵܘܲܚ ܠܗܹܝܢ: ܒܡܸܬܼܢܲܫܝܵܢܘܼܬܼܵܐ ܕܐܲܝܠܹܝܢ ܕܲܬܼܢܵܢ. ܘܛܵܥܹ̇ܐ
                ܢܲܦܫܹܗ ܒܲܙܒܲܢ ܙܒܲܢ ܟܲܕܼ ܡܸܬܼܒܿܠܲܥ ܒܤܘܼ̈ܟܵܠܹܐ: ܘܲܒܼܚܘܼܫܵܒܼܵܘ̈ܗܝ
                ܡܲܗܡܸܐ ܥܲܠ ܗܵܠܹܝܢ ܕܡܸܬܼܚܲܙ̈ܝܵܢ. ܗܵܟܲܢܵܐ ܘܐܲܝܟܼ ܚܘܼܫܵܒܼܵܐ ܐܵܦ
                ܤܘܼܥܪܵܢܵܐ: ܡܸܬܼܒܿܤܸܐ ܟܡܵܐ ܕܡܸܛܠܵܬܼܗܹܝܢ ܡܸܬܼܝܼܨܸܦ. ܚܘܼܒܵܐ ܚܒܼܝܼܟܼܵܐ
                ܡܵܘܕܥܵܢܵܐ ܕܦܲܪ̈ܨܘܿܦܹܐ ܡܸܬܼܠܚܸܐ ܡܸܢܹܗ: ܘܪܸܚܡܬܼܵܐ ܝܑܼܚܝܼܕܼܵܝܵܬܼܵܐ ܕܠܵܐ
                ܚܸܙܘܵܐ ܡܸܬܼܩܲܒܼܥܵܐ ܒܬܲܦܫܹܗ. ܪܓܸܫܬܼܵܐ ܕܥܘܼܗܕܵܢܵܐ ܒܐܝܼܕܼܵܐ ܒܐܝܼܕܼܵܐ
                ܡܸܬܼܓܲܢܒܵܐ ܡ̣ܢ ܪܸܥܝܵܢܹܗ ܒܗܵܠܹܝܢ ܐ̄ܢܵܫܝ̈ܬܼܵܐ: ܘܪܸܢܝܵܐ ܕܟܲܤ̈ܝܵܬܼܵܐ ܤܵܓܹ̇ܐ
                ܒܹܗ. ܘܥܵܫܹ̇ܢ: ܘܙܵܟܹ̇ܐ ܠܚܘܼ̈ܫܵܒܹܐ ܦܲܓܼܪ̈ܵܢܵܝܹܐ. ܘܦܵܐܹ̇ܫ ܡܸܟܹܝܠ ܡ̣ܢ
                ܗܵܠܹܝܢ ܡܸܬܼܚܲܒܿܠܵܢ̈ܝܵܬܼܵܐ: ܟܡܵܐ ܕܤܵܦܹ̇ܩ ܟܝܵܢܵܐ. ܘܐܸܠ̣ܘܼ ܠܵܐ ܕܗ̤ܘ
                ܕܘܼܟܼܪܵܢܵܐ ܕܓܼܵܘܵܐ ܡܥܝܼܪ ܠܹܗ: ܒܲܙܒܲܢ ܤܘܼܢܩܵܢܵܐ ܠܡܸܕܸܡ ܡܸܕܸܡ
                ܕܠܲܝܬܿ ܠܡܸܬܼܒܿܤܵܝܘܼ ܠܲܓܼܡܵܪ: ܤܘܼܓܹܐܗ ܕܥܸܕܵܢܵܐ ܒܗܵܢܹܝܢ ܥܬܼܝܼ̈ܕܼܵܬܼܵܐ
                ܚܡܝܼܠ ܪܸܥܝܵܢܵܐ: ܒܪܸܢܝܵܐ ܕܐܸܬܼܝܲܬܲܪ ܒܹܗ ܕܝܼܠܗܹܝܢ. ܘܗܵܘܹ̇ܐ ܫܵܛܝܵܐ
                ܡܸܛܠܵܬܼܗܹܝܢ: ܠܟܼܠܵܗ̇ ܚܸܟܼܡܬܼܵܐ ܕܲܬܼܢܵܢ. ܘܗܵܘܹ̇ܐ ܒܨܝܼܪ ܥܘܼܗܕܵܢܵܐ:
                ܘܠܸܠܵܐ ܐܲܝܟܼ ܕܡ̣ܢ ܒܘܼܚܵܢܵܐ ܕܝܼܕܲܥܬܼܵܐ ܐ̄ܢܵܫܵܝܬܼܵܐ܀
                
                 397 
                
                ܛܘܼܒܼܵܘܗ ܠܒܲܪܢܵܫܵܐ ܕܲܠܗܵܠܹܝܢ ܐܸܫܬܘܝܼ! ܕܸܡ̈ܥܹܐ ܕܡ̣ܢ ܥܲܝܢܵܘ̈ܗܝ
                ܠܵܐ ܫܵܠ̈ܝܵܢ: ܐܸܡܲܬܼܝ ܕܦܵܢܹ̇ܐ ܠܘܵܬܼ ܢܲܦܫܹܗ: ܒܕܼܘܼܟܼܪܵܢܵܐ ܕܐܲܝܠܹܝܢ
                ܕܲܒܼܗܹܝܢ ܛܵܥܹ̇ܝܢ ܒܢܲܝ̈ܢܵܫܵܐ. ܕܲܠܡܵܢ ܫܒܼܝܼܩ ܠܗܘܿܢ: ܘܒܲܐܝܠܹܝܢ ܚܡܝܼܠ
                ܤܵܟܹܗ ܕܓܼܵܘܵܐ. ܘܐܲܝܢܵܐ ܥܲܡܠܵܐ: ܘܐܲܝܕܵܐ ܛܵܥܝܘܼܬܼܵܐ ܡܸܛܠ ܐܲܝܠܹܝܢ.
                ܬܠܵܬܼ ܫܢ̈ܝܼܢ ܐܲܡܝܼܪܵܐ ܡܸܛܠ ܦܵܘܠܘܿܣ ܕܲܒܼܗܵܠܹܝܢ ܙܵܘ̈ܥܹܐ ܕܐܲܡܠܸܟܼܘ
                ܒܢܲܦܫܹܗ: ܐܸܬܼܝܲܬܲܪ ܒܹܗ ܕܸܡ̈ܥܹܐ ܟܲܕܼ ܠܵܐ ܤܦܲܩ̣ ܠܲܡܫܲܠܵܝܘܼ ܐܸܢܹܝܢ.
                ܗܵܢܵܐ ܚܘܼܫܵܒܼܵܐ ܒܡܸܬܿܬܿܙܝܼܥܵܢܘܼܬܼܵܐ ܕܕܸܡܥ̱ܬܼܵܐ ܡܲܡܠܸܟ ܒܒܲܪܢܵܫܵܐ:
                ܡܵܐ ܕܡܲܪܓܸܫ ܒܗܵܘ̇ ܤܲܒܼܪܵܐ ܕܲܥܬܼܝܼܕܼ: ܘܦܵܢܹ̇ܐ ܒܪܸܥܝܵܢܹܗ ܥܲܠ
                ܗܵܠܹܝܢ ܕܥܵܠܡܵܐ ܗܵܢܵܐ. ܕܲܟܼܡܵܐ ܒܨܝܼܪܝܼܢ ܚܲܝܹ̈ܐ ܢܲܦܫܵܢܵܝܹ̈ܐ: ܡ̣ܢ ܗܵܘ̇
                ܤܲܒܼܪܵܐ ܕܲܢܛܝܼܪ ܠܥܵܠܡܹ̈ܐ ܒܚܲܝܹ̈ܐ ܚܲܕܼ̈ܬܹܐ. ܘܲܒܼܗܵܢܵܐ ܚܲܫܵܐ ܗܵܘܹ̇ܐ ܡܝܼܬܼܵܐ:
                ܠܟܼܠܗܹܝܢ ܥܵܒܼܘܿܪ̈ܝܵܬܼܵܐ ܘܨܸܦܬܼܵܐ ܕܲܒܼܗܹܝܢ. ܘܡܝܼܬܼܝܼܢ ܒܹܗ: ܟܠܗܘܿܢ
                ܚܲܫܹ̈ܐ ܕܦܲܓܼܪܵܐ ܘܲܕܼܢܲܦܫܵܐ. ܠܗܵܠܹܝܢ ܢܸܬܼܥܲܗܲܕܼ ܚܲܒܿܝܲܒܲܝ: ܘܲܢܫܘܼܛ
                ܥܠܲܝܗܹܝܢ ܕܗܵܠܹܝܢ ܕܲܬܼܢܵܢ: ܟܡܵܐ ܕܡܸܫܟܚܝܼܢܲܢ: ܗܵܟܲܢܵܐ ܒܩܲܠܝܼܠ ܩܲܠܝܼܠ
                ܡܸܬܼܩܲܪܒܼܝܼܢܲܢ ܠܘܵܬܼ ܗܵܢܹܝܢ ܥܬܝܼ̈ܕܼܵܬܼܵܐ ܒܙܵܘ̈ܥܲܝܢ. ܐܸܠܵܐ ܓܹܝܪ ܠܘܼܩܕܲܡ
                ܥܵܨܹ̇ܐ ܐ̄ܢܵܫ ܢܲܦܫܹܗ: ܘܒܲܙܝܒܲܢ ܙܒܲܢ ܢܒܲܤܲܪ ܥܲܠ ܐܲܝܠܹܝܢ ܕܲܩܕܼܵܡ
                ܥܲܝܢܵܘ̈ܗܝ: ܕܲܒܼܩܲܠܝܼܠ ܩܲܠܝܼܠ ܢܸܫܒܿܘܿܩ ܠܗܹܝܢ: ܕܗܵܟܲܢܵܐ ܢܸܬܼܩܲܪܲܒܼ
                ܠܲܩܕܼܵܡܵܘܗܝ. ܘܤܵܓܹ̇ܝܢ ܒܹܗ ܪܸܢܝܵܐ ܘܗܸܪܓܵܐ ܕܗܵܢܹܝܢ: ܦܵܐܹ̇ܫ ܠܹܗ
                ܒܲܪܢܵܫܵܐ ܒܗܵܢܵܐ ܦܲܓܼܪܵܐ ܒܕܼܘܼܒܵܪ̈ܵܘܗܝ. ܐܵܦ ܗܵܢܘܿܢ ܕܒܼܐܘܼܪܚܵܐ ܪܵܕܹܝܢ:
                ܐܸܠܘܼܠܵܐ ܕܒܲܗܠܲܟܼܬܼܵܐ ܕܝܘܿܡ ܡ̣ܢ ܝܘܿܡ ܐܵܬܹ̇ܝܢ ܠܲܩܕܼܵܡܲܝܗܘܿܢ:
                ܘܒܲܨܲܪܘ ܡ̣ܢ ܐܘܼܪܚܗܘܿܢ: ܐܸܠܵܐ ܐܸܠܘܼ ܥܲܠ ܕܘܲܟܲܬܼܗܘܿܢ ܩܵܝ̇ܡܝܼܢ:
                ܠܵܐ ܡܸܡܬܼܘܿܡ ܚܵܤ̇ܪܵܐ ܐܘܼܪܚܵܐ ܕܲܩܕܼܵܡܲܝܗܘܿܢ: ܘܠܵܐ ܡܸܡܬܼܘܿܡ
                
                 398 
                
                ܡܵܛܹ̇ܝܢ ܠܐܲܝܟܵܐ ܕܚܵܝܪܝܼܢ ܕܲܡܡܲܢܥܝܼܢ. ܗܵܟܲܢܵܐ ܘܲܠܗܵܠܹܝܢ ܕܵܡܝܵܐ ܐܵܦ
                ܨܒܼܘܼܬܲܢ ܕܝܼܠܲܢ. ܐܸܢ ܠܵܐ ܥܵܨܹ̇ܝܢܲܢ ܢܲܦܫܲܢ ܒܩܲܠܝܼܠ ܩܲܠܝܼܠ: ܠܵܐ
                ܡܸܡܬܼܘܿܡ ܡܸܬܼܚܲܝܠܝܼܢܲܢ ܠܡܸܤܬܲܦܵܩܘܼ ܡ̣ܢ ܗܵܠܹܝܢ ܕܦܲܓܼܪܵܐ ܠܲܡܚܵܪ
                ܠܘܵܬܼ ܐܲܠܵܗܵܐ. ܚܸܟܼܡܬܼܵܐ: ܗܵܕܲܐ ܗ̣̄ܝ. ܕܡܸܛܠ ܕܲܪܵܝܗܹܝܢ ܗܵܟܲܢ ܥܤܸܩ:
                ܡܵܐ ܕܲܚܕܼܵܐ ܙܒܲܢ ܐ̄ܢܵܫ ܐܸܬܿܬܿܚܸܕܼ ܒܡܸܕܸܡ ܡܸܢܗܹܝܢ: ܢܸܬܼܟܲܬܲܫ
                ܕܠܵܐ ܢܸܬܼܩܲܪܲܒܼ ܠܗܹܝܢ. ܘܗܵܟܲܢܵܐ ܒܵܨܲܪ: ܐܵܦ ܡ̣ܢ ܚܘܼܫܵܒܲܝ̈ܗܹܝܢ.
                ܘܪܸܥܝܵܢܵܐ ܬܘܼܒܼ ܡܸܤܬܿܦܸܩ ܡܸܛܠ ܒܨܝܼܪܘܼܬܼ ܪܸܢܝܵܐ: ܘܠܲܡܚܵܪ ܠܘܵܬܼ
                ܡܸܕܸܡ ܐ̄ܚܪܹܢܵܐ. ܠܵܘ ܕܠܵܐ ܢܹܐܨܲܦ ܕܲܚܫܲܚܬܲܢ ܐܵܡܲܪܢܵܐ: ܗܵܢܵܐ ܩܛܝܼܪܵܐ
                ܗ̄ܘ̣ ܕܫܵܪܹܐ ܠܲܟܼܝܵܢܵܐ ܡ̣ܢ ܚܲܝܹ̈ܐ. ܐܸܠܵܐ ܠܵܐ ܢܤܝܼܡܝܼܗ̇ ܕܘܼܟܲܬܼ ܦܘܼܠܚܵܢܵܐ
                ܪܹܫܝܵܐ: ܘܲܬܼܪܲܝܵܢܵܐ ܢܤܝܼܡ ܕܗܵܕܹܐ ܦܘܼܠܚܵܢܵܐ ܐܲܠܵܗܵܝܵܐ. ܐܸܠܵܐ ܕܟܲܕܼ
                ܗܵܕܹܐ ܒܲܡܢܵܬܼܵܐ ܬܵܒܼܥܝܼܢܲܢ: ܨܸܦܬܵܐ ܕܲܥܠܹܝܗ̇ ܠܐܲܠܵܗܵܐ ܢܸܫܒܿܘܿܩ. ܝܲܬܿܝܼܪ
                ܡ̣ܢ ܕܥܲܠ ܢܲܦܫܲܢ: ܢܤܝܼܡ ܬܘܼܟܼܠܵܢܲܢ ܥܲܠ ܐܲܠܵܗܵܐ. ܘܕܸܐܢ ܢܲܡܪܲܚ
                ܐ̄ܢܵܫ: ܕܐܵܦ ܓܡܝܼܪܵܐܝܼܬܼ ܥܲܠ ܗܵܕܹܐ ܢܒܲܤܲܪ ܡܸܛܠ ܗܵܢܹܝܢ. ܠܵܐ
                ܤܵܒܲܪܢܵܐ ܕܲܫܟܼܝܼܪܵܐ ܗ̣̄ܝ: ܐܲܝܟܵܐ ܕܟܼܠܗܘܿܢ ܗܵܠܹܝܢ ܠܘܼܒܵܒܹ̈ܐ ܡ̣ܢ
                ܟܬܼܵܒܹ̈ܐ ܐܝܼܬܼ ܠܲܢ: ܘܲܕܼܢܸܬܼܓܲܒܲܪ ܒܤܲܒܼܪܵܐ ܡܲܠܦܝܼܢ ܠܲܢ: ܐܲܝܟܼ
                ܕܲܟܼܬܼܝܼܒܼ: ܕܡܵܪܲܢ: ܩܲܪܝܼܒܼܘܼ. ܕܡܸܕܸܡ: ܠܵܐ ܬܸܐܨܦܘܼܢ. ܘܕܼܵܘܝܼܕܼ
                ܐܵܡܲ݁ܪ: ܫܕܼܝܼ ܠܲܡ ܨܸܦܬܼܵܟܼ ܥܲܠ ܡܵܪܝܵܐ: ܘܗ̤ܘ ܢܬܲܪܤܹܝܟܼ.
                ܥܲܬܼܝܼܪܹ̈ܐ ܐܸܬܼܡܲܤܟܲܢܘ ܘܲܟܼܦܸܢ̣ܘ. ܘܐܲܝܠܹܝܢ ܕܲܠܡܵܪܝܵܐ ܒܵܥܹ̇ܝܢ: ܠܵܐ
                ܬܸܚܤܲܪ ܠܗܘܿܢ ܛܵܒܼܬܼܵܐ. ܘܡܵܪܲܢ ܦܲܩ̣ܕܲܢ ܘܐܸܡ݂ܲܪ: ܕܠܵܐ ܬܹܐܨܦܘܼܢ
                ܕܡܸܕܸܡ: ܐܸܠܵܐ ܐܲܤܓܵܘ ܒܢܲܦܫܟܼܘܿܢ ܪܸܢܝܵܐ ܕܲܥܬܼܝܼ̈ܕܼܵܬܼܵܐ. ܘܗܵܠܹܝܢ
                ܐܲܪ̈ܥܵܢܵܝܵܬܼܵܐ ܕܐܵܠ̈ܨܵܢ ܡܸܛܠ ܤܘܼܢܩܵܢ ܟܝܵܢܵܐ: ܠܵܐ ܚܵܤܪܵܢ ܠܟܼܘܿܢ.
                
                 399 
                
                ܕܐܲܠܵܗܵܐ ܒܛܲܝܒܿܘܼܬܹܗ ܢܸܬܸܠ ܠܲܢ ܕܢܸܬܼܝܲܬܲܪ ܒܲܢ ܚܘܼܒܹܗ: ܕܲܒܼܪܸܢܝܵܐ
                ܐܲܡܝܼܢܵܐ ܕܒܹܗ ܢܸܛܥܸܐ ܠܥܵܠܡܵܐ ܘܲܠܕܼܝܼܠܹܗ: ܒܲܫܪܵܝܵܐ ܕܡ̣ܢ
                ܐܲܤܘܼܪ̈ܵܘܗܝ. ܘܲܚܠܵܦ ܐܲܤܘܼܪܹ̈ܐ ܤܲܓܝܼ̈ܐܹܐ: ܢܸܬܼܐܤܲܪ ܒܚܲܕܼ ܐܲܤܘܼܪܵܐ:
                ܗܵܘ̇ ܕܠܲܝܬܿ ܠܹܗ ܫܪܵܝܵܐ ܒܡܲܚܒܼܵܢܵܘ̈ܗܝ. ܕܗ̤ܘܝܘܼ ܡܲܠܟܿܘܼܬܼܗܘܿܢ
                ܕܥܵܠܡܹ̈ܐ ܕܲܠܥܸܠ: ܕܒܹܗ ܘܲܚܢܲܢ ܢܸܬܼܐܤܲܪ: ܕܢܸܫܬܿܘܸܐ ܠܐ̄ܪܵܙ
                ܛܘܼ̈ܒܹܐ. ܕܤܵܟܼܗܘܿܢ ܢܛܝܼܪ ܒܥܵܠܡܵܐ ܕܲܥܬܼܝܼܕܼ ܠܐܲܝܠܹܝܢ ܕܲܩܢܵܐܘܼܗܝ
                ܬܢܵܢ. ܕܐܵܦ ܚܢܲܢ ܢܸܩܢܹܝܘܗܝ ܘܢܸܬܼܩܢܸܐ ܠܹܗ ܒܚܲܝܠܵܐ ܕܡ̣ܢ
                ܨܹܐܕܼܵܘܗܝ: ܠܥܵܠܲܡ ܥܵܠܡܝܼܢ. ܐܵܡܹܝܢ.