Isaac of Nineveh: Discourse 57

ܟܡܵܐ ܕܒܼܵܤܹ̇ܐ ܒܲܪܢܵܫܵܐ ܒܗܵܢܵܐ ܥܵܠܡܵܐ: ܟܲܕܼ ܝܵܨܹ̇ܦ ܕܕܸܠܲܬܼ ܐܲܠܵܗܵܐ: ܗܵܟܲܢܵܐ ܡܸܬܼܩܲܪܒܼܵܐ ܠܘܵܬܹܗ ܒܛܝܼܠܘܼܬܼܵܐ ܐܲܠܵܗܵܝܬܼܵܐ: ܘܲܒܼܥܘܼܕܼܪܵܢܵܗ̇ ܡܲܪܓܸܫ ܒܟܸܤܝܵܐ: ܘܡܸܬܼܝܲܗܒܿܝܼܢ ܠܹܗ ܙܵܘ̈ܥܹܐ ܫܦܲܝ̈ܵܐ ܠܡܸܤܬܲܟܵܠܘܼ ܒܵܗ̇. ܐܵܦܸܢ ܕܠܵܐ ܒܨܸܒܼܝܵܢܹܗ ܢܸܗܘܸܐ ܓܠܝܼܙ ܐ̄ܢܵܫ ܡ̣ܢ ܛܵܒܼ̈ܬܹܗ ܕܥܵܠܡܵܐ ܗܵܢܵܐ: ܟܡܵܐ ܕܲܨܪܝܼܟܼ ܡܸܢܗܹܝܢ: ܗܵܟܲܢܵܐ ܪ̈ܲܚܡܹܐ ܢܩ̇ܦܝܼܢ ܠܹܗ: ܘܛܵܥ̇ܢܵܐ ܠܹܗ ܡܪܲܚܡܵܢܘܼܬܼܵܐ ܐܲܠܵܗܵܝܬܼܵܐ. ܫܘܼܒܼܚܵܐ ܠܗܵܘ̇ ܕܲܒܼܕܲܝܲܡܝܼܢܵܐ ܘܒܲܕܼܤܸܡܵܠܵܐ ܚܵܐܹ̇ܢ ܠܲܢ: ܘܲܒܼܟܼܠܗܹܝܢ ܥܸܠܬܼܵܐ ܤܵܐܹ̇ܡ ܠܲܫܟܼܵܚܬܼܵܐ ܕܚܲܝܲܝ̈ܢ! ܕܠܲܐܝܠܹܝܢ ܕܡ̣ܢ ܨܼܸܒܼܝܵܢܗܘܿܢ ܡܚܝܼܠܝܼܢ ܠܩܸܢܝܵܢ ܚܲܝܲܝ̈ܗܘܿܢ: ܒܥܵܩܬܼܵܐ ܕܠܵܐ ܒܨܸܒܼܝܵܢܵܐ ܡܕܲܪܸܓܼ ܢܲܦܫܵܬܼ̈ܗܘܿܢ ܠܘܵܬܼ ܡܝܲܬܿܪܘܼܬܼܵܐ. ܐܵܦ ܗܵܝ̇ ܠܵܥܵܙܲܪ ܡܸܤܟܹܢܵܐ: ܠܵܐ ܗ̄ܘ̣ܵܐ pb. 400 ܒܨܸܒܼܝܵܢܹܗ ܚܲܤܝܼܪ ܗ̄ܘ̣ܵܐ ܡ̣ܢ ܛܵܒܼ̈ܬܹܗ ܕܗܵܢܵܐ ܥܵܠܡܵܐ: ܐܸܠܵܐ ܘܦܲܓܼܪܹܗ ܡܡܲܝܲܚ ܗ̄ܘ̣ܵܐ ܒܫܘܼ̈ܚܢܹܐ. ܬܪܹܝܢ ܟܹܐܒܼ̈ܝܼܢ ܡܲܪܝܼܪܹ̈ܐ ܐܝܼܬܼ ܗ̄ܘ̣ܵܐ ܠܹܗ: ܕܚܲܕܼ ܡ̣ܢ ܚܲܒܼܪܹܗ ܩܫܸܐ. ܟܘܼܪܗܵܢܵܐ: ܘܡܸܤܟܹܢܘܼܬܼܵܐ. ܒܪܲܡ: ܒܥܘܼܒܵܐ ܕܪܹܫ ܐܲܒܼܵܗ̈ܵܬܼܵܐ ܐܸܬܼܝܲܩܲܪ ܒܚܲܪܬܼܵܐ. ܩܲܪܝܼܒܼܘܼ ܐܲܠܵܗܵܐ ܠܠܸܒܵܐ ܚܲܫܝܼܫܵܐ: ܕܡ̣ܢ ܐܘܼܠܨܵܢܵܐ ܓܵܥܹ̇ܐ ܠܘܵܬܹܗ. ܘܐܵܦܸܢ ܒܲܕܼܦܲܓܼܪܵܐ ܐܝܼܬܼ ܐܸܡܲܬܼܝ ܕܡܲܗܡܸܐ ܠܲܡܤܲܝܒܵܪܘܼ ܗܵܠܹܝܢ ܠܥܘܼܕܼܪܵܢܵܐ: ܐܲܝܟܼ ܐܵܤܝܵܐ ܕܲܒܼܟܹܐܒܼܵܐ ܥܲܤܩܵܐ ܕܓܼܙܵܕܹ̈ܐ ܡܲܤܪܲܚ ܚܘܼܠܡܵܢܵܐ: ܐܸܠܵܐ ܒܢܲܦܫܹܗ ܪܵܘܪܒܵܐܝܼܬܼ ܚܵܐܹ̇ܢ ܠܹܗ ܡܵܪܝܵܐ: ܠܦܘܼܬܼ ܩܲܫܝܘܼܬܼܵܐ ܕܟܹܐܒܲܝ̈ ܥܵܩ̈ܬܹܗ. ܐܸܡܲܬܼܝ ܗܵܟܹܝܠ ܕܪܸܚܡܬܹܗ ܕܲܡܫܝܼܚܵܐ: ܠܵܘ ܗܵܟܲܢ ܥܸܠܒܲܬ̤ ܒܵܟܼ: ܕܲܕܼܠܵܐ ܚܲܫܵܐ ܬܸܗܘܸܐ ܒܟܼܠܗܘܿܢ ܐܘܼ̈ܠܨܵܢܹܐ ܡܸܛܠ ܚܲܕܼܘܼܬܼܵܐ ܕܒܹܗ: ܕܲܥ ܕܝܲܚ ܒܵܟܼ ܥܵܠܡܵܐ ܝܲܬܝܼܪ ܡ̣ܢ ܡܫܝܼܚܵܐ. ܐܸܡܲܬܼܝ ܕܟܼܘܼܪ̈ܗܵܢܹܐ ܘܚܲܤܝܼܪܘܼܬܼܵܐ: ܐܵܘ ܚܘܼܒܵܠܵܐ ܕܦܲܓܼܪܵܐ: ܐܵܘ ܕܸܚܠܬܼܵܐ ܕܡ̣ܢ ܢܸܟܼܝܵܢܵܘ̈ܗܝ: ܡܕܼܵܘܸܕܼ ܪܸܥܝܵܢܵܟܼ ܡ̣ܢ ܚܲܕܼܘܼܬܼܵܐ ܕܤܲܒܼܪܵܟܼ ܘܪܸܢܝܵܐ ܫܲܦܝܵܐ ܕܲܒܼܡܵܪܲܢ: ܕܲܥ ܕܝܲܚ ܒܵܟܼ ܦܲܓܼܪܵܐ: ܘܠܵܘ ܡܫܝܼܚܵܐ. ܐܲܝܢܵܐ ܕܝܲܬܝܼܪ ܚܲܝܠܬܼܵܢܝܵܐ ܥܠܲܝܟܼ ܪܸܚܡܬܹܗ: ܗ̤ܘܝܘܼ ܚܲܝ ܒܵܟܼ. ܐܸܢ ܐܸܡܲܬܼܝ ܕܲܒܼܡܘܼܠܵܝܵܐ ܕܨܸܒܼ̈ܘܵܬܼܵܐ ܟܠܗܹܝܢ ܕܲܚܫܲܚܬܼܵܐ ܕܠܵܐ ܚܲܤܝܼܪܘܼ: ܘܦܲܓܼܪܵܐ ܠܵܐ ܡܢܵܘܠܵܐ: ܘܠܵܐ ܩܸܢܛܵܐ ܕܤܲܩܘܼ̈ܒܼܠܹܐ: ܗܵܝܕܹܝܢ ܡܸܫܟܲܚ ܐܲܢ̄ܬܿ ܫܲܦܝܵܐܝܼܬܼ ܕܬܸܪܕܸܐ ܒܡܲܪܕܝܼܬܼܵܟܼ ܕܲܠܘܵܬܼ ܡܫܝܼܚܵܐ: ܕܲܥ ܕܲܟܼܪܝܼܗ ܐܲܢ̄ܬܿ ܒܪܸܥܝܵܢܵܟܼ: ܘܚܲܤܝܼܪ ܐܲܢ̄ܬܿ ܡ̣ܢ ܛܥܵܡܬܼܵܐ ܕܬܸܫܒܿܘܿܚܬܼܵܐ ܕܐܲܠܵܗܵܐ. ܠܵܘ ܕܡܸܛܠ ܡܵܢܵܐ ܗܵܟܲܢ ܐܝܼܬܲܝܟ ܕܵܐܹ̇ܢ ܐ̄ܢܵܐ ܠܵܟܼ: ܐܸܠܵܐ ܕܒܲܠܚܘܿܕܼ ܬܸܕܲܥ: ܕܲܟܼܡܵܐ ܚܲܤܝܼܪ ܐܲܢ̄ܬܿ ܡ̣ܢ ܫܘܼܡܠܵܝܵܐ: ܐܵܦܸܢ ܗܵܘ̇ pb. 401 ܕܲܡܢܵܬܼܵܐ: ܕܕܼܘܼܒܵܪܵܐ ܕܩܲܕܝܼ̈ܫܹܐ ܕܡ̣ܢ ܩܕܼܵܡܲܝܢ. ܠܵܐ ܬܹܐܡܲܪ: ܕܠܵܐ ܐܸܫܬܿܟܲܚ ܒܲܪܢܵܫܵܐ ܕܐܸܬܼܥܲܠܝܼ ܪܸܥܝܵܢܹܗ ܡ̣ܢ ܟܪܝܼܗܘܼܬܼܵܐ ܠܲܓܼܡܵܪ: ܐܵܦ ܟܲܕܼ ܦܲܓܼܪܵܐ ܐܸܬܼܢܵܘܲܓܼ ܒܟܼܠ ܢܸܤܝܘܿܢ ܕܐܘܼ̈ܠܨܵܢܹܐ: ܘܲܙܟܼܵܐ ܓܲܒܵܐ ܕܚܘܼܒܹܗ ܕܲܡܫܝܼܚܵܐ ܠܚܲܫܝܼܘܼܬܹܗ ܕܪܸܥܝܵܢܵܐ. ܫܵܠܹ̇ܐ ܐ̄ܢܵܐ ܕܹܝܢ ܡ̣ܢ ܕܲܢܩܲܪܸܒܼ ܠܥܘܼܗܕܵܢܵܐ: ܠܗܵܠܹܝܢ ܕܤܵܗ̈ܕܹܐ. ܕܲܠܡܵܐ ܠܵܐ ܡܸܫܟܿܚܝܼܢܲܢ ܠܲܡܩܵܡ ܩܕܼܵܡ ܡܵܡܘܿܠܵܐ ܕܚܲܫܲܝ̈ܗܘܿܢ: ܕܲܟܼܡܵܐ ܙܟܼܵܐ ܓܲܒܵܐ ܕܲܡܤܲܝܒܿܪܵܢܘܼܬܼܵܐ ܕܡ̣ܢ ܚܲܝܠܵܐ ܕܚܘܼܒܵܐ: ܠܥܲܤܩܘܼܬܼ ܐܘܼܠܨܵܢܹܗ ܘܲܠܚܘܼܒܹܗ ܕܝܼܠܹܗ ܕܦܲܓܼܪܵܐ. ܐܸܠܵܐ ܡܸܛܠ ܕܗܵܠܹܝܢ ܥܲܤ̈ܩܵܢ ܐܵܦ ܥܘܼܗܕܵܢܗܹܝܢ ܠܲܟܼܝܵܢܵܐ ܐ̄ܢܵܫܵܝܵܐ: ܡܸܛܠ ܕܡܸܬܕܵܘܕܝܼܢܲܢ ܒܪܲܒܿܘܼܬܼܵܗ̇ ܕܲܨܒܼܘܼܬܼܵܐ ܘܬܲܗܪܵܐ ܕܲܚܙܵܬܼܵܗ̇: ܢܸܬܼܦܲܪܲܒܼ ܠܘܵܬܼ ܦܝܼܠܵܤ̈ܘܿܦܹܐ ܕܠܵܐ ܐܲܠܵܗ. ܘܡ̣ܢ ܬܵܡܵܢ ܢܹܐܠܲܦ ܥܲܠ ܡܚܝܼܠܘܼܬܼܵܐ ܕܨܸܒܼܝܵܢܲܢ: ܡ̣ܢ ܦܸܚܡܵܐ ܕܲܡܤܲܝܒܿܪܵܢܘܼܬܼܗܘܿܢ. ܐܸܠܵܐ ܐܵܦ ܗܵܢܵܐ ܢܸܬܼܢܛܲܪ ܠܙܲܒܼܢܹܗ: ܕܲܒܼܘܼܟܿܬܹܗ ܥܬܼܝܼܕܼܝܼܢܲܢ ܠܲܡܚܵܘܵܝܘܼ: ܟܲܕܼ ܝܵܕܼܥܝܼܢܲܢ ܕܐܵܦ ܗ̤ܝ ܗܵܕܹܐ ܐܵܬܹ̇ܐ ܗ̣̄ܝ ܕܟܼܪܝܼܗܘܼܬܼܵܐ. ܕܡ̣ܢ ܢܲܦܫܲܢ ܠܵܐ ܕܵܝ̇ܢܝܼܢܲܢ ܨܒܼܘܼܬܼܵܐ: ܕܢܗܲܝܡܸܢ ܕܲܟܼܡܵܐ ܪܡܹܝܢܲܢ ܠܬܲܚܬܿ: ܘܡܲܨܝܵܐ ܗ̣̄ܝ ܕܢܸܗܘܸܐ ܥܸܠܝܵܐ ܐ̄ܢܵܫ ܠܲܓܼܡܵܪ. ܠܵܐ ܡܸܡܬܼܘܿܡ ܡܗܲܝܡܸܢ ܪܵܘܝܵܐ: ܕܐܝܼܬܼ ܤܲܓܝܼ̈ܐܹܐ ܕܐܵܦܠܵܐ ܫܵܬܹ̇ܝܢ ܚܲܡܪܵܐ. ܘܠܵܐ ܦܲܚܙܵܐ: ܕܐܝܼܬܼ ܗ̄ܘ̣ ܕܐܵܦ ܐܲܓܼܡܵܪ ܠܵܐ ܡܸܙܕܵܘܓܼܝܼܢ. ܘܠܵܐ ܐܲܝܢܵܐ ܕܲܒܼܪܸܓܿܬܼܵܐ ܐܲܠܝܼܨ: ܕܐܝܼܬܼ ܗ̄ܘ̣ ܕܟܼܠ ܟ̱ܠܹܗ ܠܵܐ ܡܸܬܼܐܠܸܨ ܒܗܵܕܹܐ: ܐܵܦܸܢ ܡ̣ܢ ܐ̄ܚܪ̈ܵܢܝܵܬܼܵܐ ܡܸܬܼܠܙܸܙ. ܘܠܵܐ ܕܲܟܼܪܝܼܗ ܐܲܡܝܼܢܵܐܝܼܬܼ: ܕܐܝܼܬܼ ܦܲܓܼܪܵܐ ܕܠܵܐ ܫܚܵܩܵܐ ܕܟܼܘܼܪ̈ܗܵܢܹܐ. ܗܵܟܲܢ ܐܸܢܘܿܢ ܐܲܝܠܹܝܢ ܕܲܠܗܵܠܹܝܢ ܕܪܸܥܝܵܢܵܐ ܠܵܐ pb. 402 ܡܨܹܝܢ ܙܵܟܹ̇ܝܢ ܡܫܲܡܠܝܵܐܝܼܬܼ. ܒܘܼܝܵܐܗܘܿܢ ܕܹܝܢ ܒܗܵܕܹܐ ܗܵܘܹ̇ܐ: ܕܠܲܝܬܿ ܠܲܡ ܒܲܪܢܵܫܵܐ ܕܲܡܚܲܤܲܪ ܡ̣ܢ ܡܸܙܕܲܟܼܝܵܢܘܼܬܼܵܐ ܕܗܵܠܹܝܢ ܠܲܓܼܡܵܪ. ܕܐܝܼܬܼ ܗ̄ܘ̣ ܓܹܝܪ ܐ̄ܢܵܫܵܐ: ܕܪܸܚܡܬܹܗ ܕܲܡܫܝܼܚܵܐ ܚܸܤܢܲܬ̤ ܒܗܘܿܢ ܠܲܡܚܝܼܠܘܼܬܹܗ ܕܲܟܼܝܵܢܵܐ: ܘܒܲܤܲܪܘ ܥܲܠ ܦܲܓܼܪܵܐ ܘܚܘܼܒܹܗ ܠܲܓܼܡܵܪ: ܘܪܸܥܝܵܢܵܐ ܠܵܐ ܐܸܬܿܕܵܘܲܕܼ ܡ̣ܢ ܚܲܕܼܘܼܬܼܵܐ ܕܒܲܡܫܝܼܚܵܐ: ܘܝܲܗ̣̄ܒܼܘ ܐܝܼܕܼܵܐ ܠܡܸܙܕܲܟܼܝܵܢܘܼܬܼܵܐ ܡ̣ܢ ܚܹܐܦܹ̈ܐ ܕܤܲܩܘܼ̈ܒܼܠܵܝܵܬܼܵܐ ܕܡ̣ܢ ܓܲܒܵܐ ܕܦܲܓܼܪܵܐ: ܘܲܕܼܫܘܼ̈ܟܵܢܹܐ ܙܟܼܵܘ ܠܠܵܐ ܤܵܦܩܘܼܬܹܗ ܕܲܟܼܝܵܢܵܐ: ܠܲܓܼܡܵܐ ܠܵܐ ܡܗܲܝܡܢܝܼܢ. ܠܵܘ ܕܫܵܠ̈ܡܵܢ ܥܲܤ̈ܩܵܬܼܵܐ ܡ̣ܢ ܐܘܼܪܚܹܗ ܕܐܲܠܵܗܵܐ ܐܵܡܲ݁ܪ ܐ̄ܢܵܐ: ܐܵܘ ܕܐܝܼܬܼ ܗ̄ܘ̣ ܕܲܕܼܠܵܐ ܢܸܤܝܘܿܢܵܐ ܚܲܝܹ̇ܐ ܒܐܘܼܪܚܵܐ ܗܵܕܹܐ. ܕܲܠܩܘܼܒܼܠܵܐ ܕܹܝܢ: ܐܵܡܲ݁ܪ ܐ̄ܢܵܐ: ܕܐܲܝܢܵܐ ܕܒܲܡܝܲܬܿܪܘܼܬܼܵܐ ܚܵܝܹ̇ܐ: ܝܘܿܡ ܡ̣ܢ ܝܘܿܡ ܥܲܠ ܐܘܼܠܨܵܢܵܘ̈ܗܝ ܡܸܬܿܬܵܘܤܲܦ. ܘܲܟܼܡܵܐ ܕܡܸܬܼܩܲܪܲܒܼ ܠܲܩܕܼܡܵܘܗܝ: ܒܥܵܩ̈ܬܼܵܐ ܡܸܬܼܡܲܨܲܥ. ܘܗܵܕܲܐ ܗ̣̄ܝ ܐܵܬ̤ܵܐ ܕܫܲܪܝܼܪܘܼܬܼ ܡܲܪܕܝܼܬܹܗ: ܕܚܲܝܹ̈ܐ ܡܲܪܝܼܪܹ̈ܐ ܚܲܝܹ̇ܐ ܒܥܵܠܡܵܐ ܗܵܢܵܐ: ܘܲܒܼܫܘܼܢܵܩܵܐ ܢܵܦܹ̇ܩ ܡ̣ܢ ܗܵܢܵܐ ܦܲܓܼܪܵܐ. ܡܸܛܠ ܕܥܵܠܡܵܐ ܕܙܲܕܝܼ̈ܩܹܐ: ܠܵܘ ܗܵܢܵܘ. ܘܲܕܼܠܵܐ ܥܵܩ̇ܬܼܵܐ: ܠܵܐ ܡܸܫܟܿܚܵܐ ܕܢܸܗܘܘܿܢ ܒܹܗ. ܐܸܠܵܐ ܕܨܸܒܼܝܵܢܵܐ ܡܸܫܟܲܚ ܗ̄ܘ̣ ܒܝܲܕܼ ܫܘܼܟܵܢܵܐ ܕܢܸܬܼܚܲܝܲܠ: ܘܲܢܒܲܤܲܪ ܥܲܠ ܟܠܗܹܝܢ: ܘܢܸܛܲܪ ܠܪܸܥܝܵܢܵܐ ܕܠܵܐ ܕܘܼܘܵܕܼ: ܒܚܲܕܼܘܼܬܼܵܐ ܕܚܘܼܒܹܗ ܕܲܡܫܝܼܚܵܐ܀ ܘܕܐܝܼܬܼ ܗ̄ܘ̣ܵܘ ܐ̄ܢܵܫܵܐ ܕܲܡܛ̣ܵܘ ܠܗܵܕ݂ܹܐ: ܘܡܸܫܟܿܚܵܐ ܐܵܦ ܗܵܫܵܐ ܕܢܸܗܘܘܿܢ ܕܐܲܝܟܼ ܗܵܟܲܢ: ܒܪܲܒܘܼܬܼ ܥܘܼܕܼܪܵܢܵܐ ܕܡܵܘܗܲܒܼܬܹܗ ܕܲܡܫܝܼܚܵܐ. ܐܘܿ ܒܲܪܢܵܫܵܐ: ܠܵܐ ܬܕܘܼܢ ܠܤܘܼܥܪܵܢܵܐ ܕܟܼܠܗܘܿܢ ܒܢܲܝ̈ܢܵܫܵܐ ܡ̣ܢ pb. 403 ܨܒܼܘܼܬܼܵܟܼ ܕܝܼܠܵܟܼ. ܘܠܵܐ ܬܸܬܩܘܿܠ ܕܘܼܒܵܪܗܘܿܢ: ܡ̣ܢ ܡܲܬܼܩܵܠܵܐ ܕܲܡܚܝܼܠܘܼܬܼܵܟܼ. ܐܸܢ ܒܵܥܹ̇ܐ ܐܲܢ̄ܬܿ ܫܲܪܵܐ ܥܲܠ ܤܲܒܼܪܵܐ: ܘܡܸܬܼܥܲܕܲܪ ܐܲܢ̄ܬܿ. ܘܠܵܐ ܬܸܗܘܸܐ ܠܵܐ ܡܗܲܝܡܢܵܐ: ܕܲܠܡܵܐ ܐܵܦܠܵܐ ܬܸܫܬܒܸܩ ܡ̣ܢ ܗܵܘ̇ ܕܗܵܠܹܝܢ ܒܵܟܼ ܙܵܪܲܥ: ܕܬܲܕܪܸܟܼ ܡܫܘܼܚܬܼܵܐ ܕܚܲܤܝܼܪܘܼܬܼܵܟܼ ܕܲܟܼܡܵܐ ܗ̣̄ܝ: ܡ̣ܢ ܦܸܚܡܵܐ ܕܐܲܝܠܹܝܢ ܕܲܙܟܼܵܘ ܠܥܵܠܡܵܐ ܘܕܼܘܼܘܵܕܹܗ ܠܲܓܼܡܵܪ. ܐܸܢ ܠܥܹܕܬܵܐ ܠܵܐ ܡܗܲܝܡܸܢ ܐܲܢ̄ܬܿ: ܩܪܘܿܒܼ ܠܘܵܬܼ ܦܝܼܠܵܤ̈ܘܿܦܹܐ. ܘܬܸܚܙܸܐ ܕܲܟܼܡܵܐ ܚܲܝܠܵܐ ܐܝܼܬܼ ܠܨܸܒܼܝܵܢܵܐ ܠܡܸܗܘܵܐ ܠܥܸܠ ܡ̣ܢ ܦܲܓܼܪܵܐ: ܘܕܲܢܩܵܘܸܐ ܕܠܵܐ ܕܘܼܘܵܕܼܵܐ ܒܲܓܼܒܼܝܼܬܼܵܐ ܕܓܼܵܒܹ̇ܐ. ܟܲܕܼ ܬܸܚܙܸܐ ܐܸܢܘܿܢ: ܠܗܵܠܹܝܢ ܕܐܵܦܠܵܐ ܝܵܕܼܥܝܼܢ ܗ̄ܘ̣ܵܘ ܠܐܲܠܵܗܵܐ: ܟܡܵܐ ܚܘܼܤܵܢܵܐ ܘܚܲܝܠܬܵܢܘܼܬܼܵܐ ܚܵܘܝܼܘ ܠܥܵܠܡܵܐ ܒܓܲܢ̄ܒܵܪܘܼܬܼܵܐ ܕܨܸܒܼܝܵܢܵܐ: ܘܚܵܘܝܼܘ ܕܲܟܼܡܵܐ ܚܲܝܠܵܐ ܩܢܸܐ ܗܵܘ̇ ܟܝܵܢܵܐ ܕܲܠܓܼܵܘ. ܕܐܸܢ ܨܵܒܹ̇ܐ: ܠܟܼܠܡܸܕܸܡ ܙܵܟܹ̇ܐ. ܐܲܝܟܲܢܵܐ ܕܡ̣ܢ ܩܸܪܝܵܢܵܐ ܕܬܲܫܥ̈ܝܵܬܼܗܘܿܢ: ܬܸܡܗܵܐ ܢܵܦܹ̇ܠ ܥܲܠ ܐ̄ܢܵܫ. ܕܲܟܼܡܵܐ ܚܲܝܠܵܐ ܐܲܤܸܢ ܐܲܠܵܗܵܐ ܤܵܡ̣ ܒܗܵܢܵܐ ܟܝܵܢܵܐ: ܕܐܸܢ ܢܸܨܒܸܿܐ: ܢܸܙܟܸܿܐ ܠܟܼܠܡܸܕܸܡ. ܘܡܸܛܠ ܕܲܚܢܲܢ ܠܵܐ ܨܵܒܹ̇ܝܢܲܢ: ܡܚܝܼܠܘܼܬܹܗ ܕܲܟܼܝܵܢܵܐ ܡܲܟܼܪܙܝܼܢܲܢ. ܘܟܲܕܼ ܒܲܡܚܝܼܠܘܼܬܹܗ ܕܨܸܒܼܝܵܢܲܢ ܡܚܲܦܹܝܢܲܢ ܠܚܲܝܠܬܼܵܢܘܼܬܹܗ ܕܲܟܼܝܵܢܵܐ: ܐܵܡܪܝܼܢܲܢ: ܡܲܢ̣ܘܼ ܡܸܫܟܲܚ ܠܡܸܙܟܵܐ ܠܗܵܠܹܝܢ ܡ̣ܢ ܡܬܼܘܿܡ؟ ܚܲܕܼ ܡܸܢܗܘܿܢ ܓܹܝܪ ܥܕܲܡܵܐ ܠܗܵܕܹܐ ܐܸܬܼܓܲܒܲܪ ܥܲܠ ܨܸܒܼܝܵܢܹܗ ܕܦܲܓܼܪܵܐ: ܡܸܛܠ ܕܠܵܐ ܢܸܫܪܸܐ ܠܲܓܼܒܼܝܼܬܼܵܐ ܕܲܓܼܒܼܵܐ ܘܲܫܲܢܸܐ ܡܸܢܵܗ̇: ܕܐܵܦܠܵܐ ܥܸܕܵܢܵܐ ܕܤܲܝܦܵܐ ܡܫܝܼܛܵܐ ܕܵܘܸܕܼ ܠܪܸܥܝܵܢܹܗ: ܘܲܙܟܼܵܬ̤ ܕܸܚܠܲܬܼ ܡܵܘܬܵܐ ܠܲܬܼܚܘܼܡܵܐ ܕܤܵܡ̣ ܠܢܲܦܫܹܗ. ܗܵܘ̇ ܕܟܲܕܼ ܫܢܲܝ̈ܵܐ ܠܵܐ ܙܥܘܿܪ ܢܛܲܪ ܫܸܬܼܩܵܐ: ܘܡܲܠܟܵܐ ܕܝܵܘ̈ܢܵܝܹܐ ܬܗܲܪ ܡ̣ܢ ܫܸܡܥܵܐ ܕܲܨܒܼܘܼܬܼܵܐ: pb. 404 ܘܲܨܒܼܵܐ ܕܢܸܤܲܒܼ ܒܘܼܚܪܵܢܹܗ: ܦ̣ܩܲܕܼ ܠܡܹܐܬܼܵܐ ܠܲܩܕܼܵܡܵܘܗܝ. ܘܟܲܕܼ ܗ̤ܘ ܫܠܸܐ ܗ̄ܘ̣ܵܐ ܥܲܠ ܟܠ ܡܸܕܸܡ ܕܡܲܠܸܠ̣ ܥܲܡܹܗ ܘܫܸܿܐܠܹܗ: ܘܡܸܕܸܡ ܠܲܓܼܡܵܪ ܠܵܐ ܦܲܢܝܼ ܠܹܗ. ܐܸܬܼܓܵܘܙܲܠ ܡܲܠܟܵܐ: ܘܲܦ̣ܩܲܕܼ ܕܲܢܡܘܼܬܼ: ܕܐܵܦܠܵܐ ܡ̣ܢ ܐܝܼܩܵܪܵܐ ܕܟܼܘܼܪܤܝܹܗ ܘܬܼܵܓܹܗ ܒܗܸܬܼ. ܗ̤ܘ ܕܹܝܢ: ܠܵܐ ܙܵܥ̣ ܡ̣ܢ ܗܵܕܹܐ: ܐܸܠܵܐ ܢܵܡܘܿܤܹܗ ܢܵܛܲܪ ܗ̄ܘ̣ܵܐ ܟܲܕܼ ܒܗܝܼܠ. ܡܲܠܟܵܐ ܕܹܝܢ ܙܲܗܲܪ ܗ̄ܘ̣ܵܐ ܠܩܵܛ̈ܘܿܠܹܐ: ܕܐܸܢ ܗ̤ܘ ܕܢܵܡܘܿܤܹܗ ܢܸܫܪܸܐ: ܟܲܕܼ ܩܵܢܹ̇ܛ ܡ̣ܢ ܤܲܝܦܵܐ: ܢܸܩܛܠܘܼܢܵܝܗܝ. ܐܸܢܕܹܝܢ ܒܹܗ ܒܨܸܼܝܢܵܐ ܢܩܘܼܡ: ܢܲܝܬܿܘܿܢܵܝܗܝ ܬܘܼܒܼ ܠܘܵܬܹܗ ܟܲܕܼ ܚܲܝ. ܗ̤ܘ ܕܹܝܢ: ܟܲܕܼ ܡܛ̣ܵܐ ܥܸܕܵܢܵܐ: ܘܐܵܠܨ̇ܝܼܢ ܗ̄ܘ̣ܵܘ ܠܹܗ ܗܵܢܘܿܢ ܕܤܝܼܡܝܼܢ ܗ̄ܘ̣ܵܘ ܥܲܠܗܵܕܹܐ: ܕܢܸܫܪܸܐ ܨܸܒܼܝܵܢܹܗ ܘܐܸܠܵܐ ܡܵܐܹ̇ܬܼ. ܗ̤ܘ ܐܸܬܼܚܲܫܲܒܼ ܕܦܲܩܵܚ ܡܵܘܬܵܐ ܕܚܲܕܼ ܥܸܕܵܢܵܐ ܠܲܡܤܲܝܒܵܪܘܼ ܟܲܕܼ ܢܛܝܼܪ ܬܚܘܼܡܹܗ ܕܨܸܒܼܝܵܢܝ: ܕܗܵܢܵܐ ܟ̱ܠܹܗ ܙܲܒܼܢܵܐ ܒܹܗ ܚܲܡܤ̇ܢܸܬܼ: ܡ̣ܢ ܕܐܹܚܘܼܒܼ ܡ̣ܢ ܕܸܚܠܲܬܼ ܡܵܘܬܵܐ: ܘܐܹܨܲܥܲܪ ܠܚܸܟܼܡܲܬܼܝ: ܘܐܸܫܬܿܟܲܚ ܫܲܦܠܵܐ: ܡܸܛܠ ܗܵܘ̇ ܡܸܕܸܡ ܕܡ̣ܢ ܟܠ ܦܪܘܿܣ ܥܬܼܝܼܕܼ ܐ̄ܢܵܐ ܗ̄ܘ̣ ܕܐܸܦܓܲܥ ܒܹܗ ܐܸܡܲܬܼܝ ܕܗ̤ܘ. ܘܲܒܼܗܵܕܹܐ ܡܛܲܝܒܼܘܼܬܼܵܐ ܕܨܸܒܼܝܵܢܵܐ ܘܪܸܥܝܵܢܵܐ ܓܲܢ̄ܒܵܪܵܐ: ܐܵܦ ܡ̣ܢ ܡܵܘܬܵܐ ܐܸܫܬܵܘܙܲܒܼ: ܐܵܦ ܒܢܵܡܘܿܤܹܗ ܐܸܫܟܲܚ ܟܹܐܢܵܐ ܘܫܲܪܝܼܪܵܐ. ܚ̣ܙܲܝܬܿ ܚܲܝܠܵܐ ܕܲܩܢܸܐ ܨܸܒܼܝܵܢܵܐ؟ ܦܫܲܛ̣ ܨܵܘܪܹܗ ܩܕܼܵܡ ܤܲܝܦܵܐ ܗܵܢܵܐ ܚܲܟܿܝܼܡܵܐ: ܘܠܵܐ ܫ̣ܪܵܐ ܠܢܵܡܘܿܤܵܐ ܕܢܲܦܫܹܗ. ܘܲܐ̄ܚܪܵܢܹܐ: ܥܲܠ ܪܸܓܿܬܹܗ ܕܲܟܼܝܵܢܵܐ ܕܵܫ̣ܘ: ܘܲܗܘ̤ܵܘ ܠܥܸܠ ܡܸܢܹܗ ܒܲܦܓܼܘܼܕܼܵܐ ܕܐܲܡ̣ܝܼܘ ܒܹܗ. ܐ̄ܚܪ̈ܵܢܹܐ ܒܨܲܥܪܹ̈ܐ: ܠܵܐ ܡܸܬܿܬܿܙܝܼ̈ܥܵܢܹܐ pb. 405 ܩ̣ܵܘܝܘܼ. ܐ̄ܚܪ̈ܵܢܹܐ ܒܡܲܚ̈ܘܵܬܼܵܐ ܕܠܵܐ ܚܵܘܤܵܢ: ܕܠܵܐ ܚܸܡܬܼܵܐ ܐܸܫܬܿܟܲܚܘ. ܘܗܵܠܹܝܢ ܡ̣ܢ ܒܢܲܝ̈ ܦܸܚܡܵܐ: ܗܵܝ̇ ܕܲܠܡܲܚܤܸܢ ܡܸܤܬܲܝܒܿܪܵܐ. ܐܚܪ̈ܵܢܹܐ: ܘܐܵܦ ܡ̣ܢ ܐܲܝܠܹܝܢ ܕܲܒܼܨܝܼܪܝܼܢ ܤܲܓܝܼ. ܐ̄ܚܪ̈ܵܢܹܐ ܒܒܸܙܬܼܵܐ ܕܩܸܢܝܵܢܗܘܿܢ: ܕܠܵܐ ܒܥܸܠܕܒܼܵܒܼܘܼܬܼܵܐ ܘܲܕܼܠܵܐ ܪܘܼܓܼܙܵܐ ܟܲܬܲܪܘ. ܐ̄ܚܪ̈ܵܢܹܐ ܒܟܼܘܼܪ̈ܗܵܢܹܐ ܢܕܝܼ̈ܕܹܐ ܘܥܲܤ̈ܩܹܐ: ܚܘܼܡܤܵܢܵܐ ܚܵܘܝܼܘ ܕܠܵܐ ܟܡܝܼܪܘܼܬܼܵܐ. ܘܥܲܡܗܘܿܢ ܐܵܘܤܸܦ̣ܘ: ܐܵܦ ܢܛܘܼܪ̈ܬܼܵܐ ܕܲܐ̄ܚܪ̈ܵܢܝܬܼܵܐ. ܐ̄ܚܪ̈ܵܢܹܐ: ܥܲܡ̈ܠܹܐ ܨܼܒܼ̈ܝܵܢܵܝܹܐ. ܐ̄ܚܪ̈ܵܢܹܐ: ܥܲܪܛܸܠܵܝܘܼܬܼܵܐ ܕܠܲܓܼܡܵܪ: ܤܛܲܪ ܡ̣ܢ ܬܲܚܦܝܼܬܼܵܐ ܕܢܘܼܟܵܦܵܐ: ܘܥܘܼܡܪܵܐ ܡܫܵܘܚܕܼܵܐ ܘܤܲܝܒܵܪܬܵܐ ܝܘܼܪܵܩܵܐ ܕܡ̣ܢ ܢܲܦܫܹܗ ܝܵܥܹ̈ܐ. ܐܲܝܟܲܢܵܐ ܕܐܵܦ ܡܲܠܟܵܐ ܐܵܠܹܟܼܤܲܢܕܪܘܿܣ: ܟܲܕܼ ܒܲܙܒܲܢ ܐܸܬܼܘܲܥܲܕܼ ܠܲܚܙܵܬܼܵܐ ܕܚܲܕܼ ܡܸܗܘܿܢ: ܡܸܢܹܗ ܠܵܐ ܫܡܲܥ̣: ܐܸܠܵܐ ܥܲܠ ܒܲܤܝܘܼܬܼܵܐ ܕܥܲܠ ܥܵܠܡܵܐ. ܘܗܵܠܹܝܢ ܟܠܗܹܝܢ: ܡܸܛܠ ܕܠܵܐ ܢܸܬܼܒܲܛܠܘܼܢ ܡ̣ܢ ܗܸܪܓܵܐ ܘܥܸܢܝܵܢܵܐ ܕܚܸܟܼܡܲܬܼܗܘܿܢ. ܐܸܢ ܥܲܡܠܵܐ ܕܝܘܼܠܦܵܢܵܐ ܘܡܲܪܕܘܼܬܼܵܐ ܕܚܸܟܼܡܬܼܵܐ: ܠܒܲܪ ܡ̣ܢ ܕܸܚܠܲܬܼ ܐܲܠܵܗܵܐ ܘܢܘܼܗܪܵܐ ܕܗܲܝܡܵܢܘܼܬܼܵܐ ܘܤܲܒܼܪܵܐ ܕܥܵܠܡܵܐ ܕܲܥܬܼܝܼܕܼ: ܗܵܠܹܝܢ ܡܲܨܝܵܐ ܠܡܸܬܼܓܲܒܵܪܘܼ: ܡܲܢ̣ܘܼ ܕܠܵܐ ܢܸܬܼܒܿܤܲܪ ܡ̣ܢ ܬܹܐܪܬܹܗ: ܕܲܒܼܗܵܢܵܐ ܟ̱ܠܹܗ ܢܘܼܗܪܵܐ ܕܲܡܫܝܼܚܵܐ ܕܐܸܬܼܐܫܸܕܼ ܥܲܠ ܥܵܠܡܵܐ: ܘܫܘܼ̈ܟܵܢܹܐ ܤܲܓܝܼ̈ܐܹܐ ܕܲܒܼܤܸܝܵܐ ܫܦܝܼܥܵܐܝܼܬܼ: ܘܤܲܒܼܪܵܐ ܕܐܲܠܵܗܵܐ ܕܡ̣ܢ ܤܘܼܥܪ̈ܵܢܹܐ ܕܝܘܿܡ ܡ̣ܢ ܝܘܿܡ ܡܸܫܬܲܪܲܪ: ܥܕܲܟܹܝܠ ܙܵܟܼ̈ܝܵܢ ܠܹܗ ܥܲܤ̈ܩܵܬܼܵܐ ܘܚܲܕܼܘܼܬܼܵܐ ܕܗܵܢܵܐ ܦܲܓܼܪܵܐ: ܘܠܵܐ ܢܩܵܘܸܐ ܐܲܝܟܼ ܐܵܕܵܡܘܿܣ ܡܸܛܠ ܪܸܚܡܬܹܗ ܕܐܲܠܵܗܵܐ: ܘܢܲܩܠܸܐ ܚܵܕܼܝܵܐܝܼܬܼ ܥܲܠ ܟܠܡܸܕܸܡ؟ ܐܸܠܵܐ ܘܐܵܦ ܕܐܝܼܬܼ ܠܹܗ ܦܘܼܠܵܓܼܵܐ ܕܐܲܝܟܲܢ ܙܵܟܹ̇ܝܢ ܒܢܲܝ̈ܢܵܫܵܐ ܠܗܵܠܹܝܢ: pb. 406 ܕܠܵܐ ܡܨܸܐ ܐ̄ܢܵܫ ܒܚܹܝܠ ܢܲܦܫܹܗ ܡܸܕܸܡ ܠܡܸܥܒܲܕܼ: ܠܟܼܠܢܵܫ ܕܚܲܟܿܝܼܡ ܝܑܼܕܼܝܼܥܵܐ ܗܵܕܹܐ. ܕܲܒܼܥܘܼܕܼܪܵܢܵܐ ܕܡ̣ܢ ܐܲܠܵܗܵܐ ܘܨܸܒܼܝܵܢܵܐ ܡܛܲܝܒܼܵܐ ܡܸܫܟܲܚ ܚܵܐܹ̇ܒܼ ܡܸܢܸܗ: ܗܵܕܹܐ ܡܲܨܝܵܐ ܗ̣̄ܝ. ܒܗܵܠܹܝܢ ܐܸܬܿܛܲܢܲܢܘ ܐ̄ܢܵܫܵܐ ܝܑܼܚܝܼ̈ܕܼܵܝܹܐ: ܘܐܲܪܫܸܠ̣ܘ ܫܒܲܩ̣ܘ ܡܸܢܫܹܠܝ ܠܥܵܠܡܵܐ ܘܲܠܕܼܝܼܠܹܗ: ܘܥܲܙܝܼܘ ܘܩܵܡ̣ܘ ܠܘܼܩܒܲܠ ܟܠܗܹܝܢ ܤܲܩܘܼ̈ܒܼܠܵܝܬܼܵܐ: ܘܲܙܟܼܵܘ ܒܚܘܼܡܤܵܢܵܐ ܕܨܸܒܼܝܵܢܵܐ ܘܥܘܼܕܼܪܵܢܵܐ ܕܡܵܪܗܘܿܢ ܠܟܼܠ ܥܘܼܤܵܩ̈ܝܼܢ ܕܐܝܼܬܼ. ܒܲܝܢܵܬܼܗܘܿܢ ܓܹܝܪ ܥܵܡܪܝܼܢ ܗ̄ܘ̣ܵܘ. ܤܲܓܝܼ̈ܐܹܐ ܡܸܢܗܘܿܢ: ܡ̣ܢ ܝܘܼܠܦܵܢܵܐ ܕܝܼܠܗܘܿܢ ܕܦܝܼܠܵܤ̈ܘܿܦܹܐ ܗ̄ܘ̣ܵܘ. ܕܐܸܢ ܠܲܡ ܚܲܟܝܼ̈ܡܹܐ ܒܲܪ̈ܵܝܹܐ ܚܠܵܦ ܚܸܟܼܡܬܼܵܐ ܥܵܒܼܘܿܪܬܵܐ ܘܕܼܘܼܪܵܫܵܐ ܕܲܒܼܝܘܼܠܦܵܢܵܐ ܕܥܵܠܡܵܐ ܗܵܢܵܐ ܕܡܸܬܼܒܲܛܲܠ: ܠܒܲܪ ܡ̣ܢ ܐܘܼܪܚܵܐ ܕܐܲܠܵܗܵܐ ܗܵܠܹܝܢ ܡܩܲܒܿܠܝܼܢ ܥܠܲܝܗܘܿܢ ܠܲܡܤܲܝܒܵܪܘܼ: ܕܐܵܦ ܠܥܵܠܡܵܐ ܡܸܬܼܢܲܟܼܪܹܝܢ: ܘܗܵܘܹ̇ܝܢ ܠܒܲܪ ܡܸܢܹܗ ܒܗܘܼܦܵܟܲܝ̈ܗܘܿܢ: ܡܸܛܠ ܕܢܸܡܛܘܿܢ ܠܪܸܓܿܬܼܵܐ ܕܨܸܒܼܝܵܢܗܘܿܢ: ܕܠܵܐ ܟܹܐܢܘܼܬܼܵܐ ܐܝܼܬܼ ܒܪܸܢܝܼܗܘܿܢ: ܘܠܵܐ ܤܲܒܼܪܵܐ ܕܒܼܵܬܲܪ ܡܵܘܬܵܐ ܒܥܲܡܠܲܝ̈ܗܘܿܢ: ܘܗܵܠܹܝܢ ܗܵܢܵܐ ܟ̱ܠܹܗ ܥܲܠ ܐܲܦܲܝ̈ ܤܲܒܼܪܵܐ ܤܦܝܼܩܵܐ. ܟܡܵܐ ܝܲܬܝܝܼܪܵܐܝܼܬܼ ܠܲܢ ܙܵܕܹܩ ܠܲܡܤܲܝܒܵܪܘܼ ܚܠܵܦ ܪܸܚܡܬܼܵܐ ܕܐܲܠܵܗܵܐ: ܘܠܲܡܒܲܗܵܪܘܼ ܥܲܠ ܟܠ ܥܘܼܤܵܩ̈ܝܼܢ: ܚܠܵܦ ܤܲܒܼܪܵܐ ܪܵܒܵܐ ܕܲܡܠܝܼܟܼ ܠܲܢ. ܘܐܸܬܼܚܲܝܲܠܘ ܒܗܵܢܵܐ ܪܸܥܝܵܢܵܐ: ܘܐܲܡܠܸܟܼܘ ܥܲܠ ܪܲܦܝܘܼܬܼܵܐ ܕܚܘܼܫܵܒܲܝ̈ܗܘܿܢ. ܘܥܲܠ̣ܘ ܠܐܵܓܼܘܿܢܵܐ ܘܠܵܐ ܗܦܲܟܼܘ: ܥܕܲܡܵܐ ܕܲܢܤܲܒܼܘ ܟܠܝܼܠܵܐ. ܘܲܗܘ̤ܵܘ ܚܵܘܪܵܐ: ܐܵܦ ܠܕܼܵܪܹ̈ܐ ܕܒܼܵܬܲܪܗܘܿܢ. ܘܐܲܩܝܼܡ̣ܘ ܢܝܼܫܵܐ ܠܥܵܠܡܵܐ: ܕܐܲܝܟܲܢ ܙܵܕܹܩ ܠܗܘܿܢ ܕܢܸܥܠܘܼܢ ܠܐܵܓܼܘܿܠܹܝܢ ܕܠܐܘܼܪܚܵܐ ܗܵܕܹܐ ܡܲܦܠܚܝܼܢ.