Narsai. “On Works - ܥܲܠ ܓܡܝܼܪܘܼܬ ܕܘܼܒܵܪܹ̈ܐ.” Based upon BL Or. 5463. Digital Syriac Corpus. Last modified April 26, 2019. https://syriaccorpus.org/45.
    
        
            
                ܥܲܠ ܓܡܝܼܪܘܼܬ ܕܘܼܒܵܪܹ̈ܐ
            
            
                 f.315v 
                ܣܗ܀ ܥܲܠ ܓܡܝܼܪܘܼܬ ܕܘܼܒܵܪܹ̈ܐ܀
                ܕܝܼܠܹܗ ܟܲܕ ܕܝܼܠܹܗ ܡܸܐܡܪܵܐ ܕܹܫܬܼܝܢ ܘܚܲܡܫܵܐ.
                ܥܲܠ ܓܡܝܼܪܘܼܬ ܕܘܼܒܵܪ̈ܐ.
            
            
                 1 :ܚܹܕ ܙܵܟܝܵܐ ܙܟܵܗ̇ ܠܲܚܛܝܼܬܼܵܐ ܕܩܛܠܲܬ̤ ܐ̄ܢܵܫܵܐ
                 2 ܘܒܙܟܘܬܹܗ ܫܘܬܸܦ ܐ̄ܢܵܫ̈ܐ ܘܫܡܝܢܹ̈ܐ.
                 3 :ܚܲܕ ܓܲܢܵܒܪܵܐ ܢܦ̣ܩ ܠܲܩܪܵܒܼܵܐ ܠܘܼܩܒܼܵܠ ܒܝܼܫܵܐ
                 4 ܘܒܬܟܼܬܘܫܹܗ ܝܠܸܦܘ ܐܪ̈ܥܢܹܐ ܙܢܲܝ̈ ܬܟܬܘܼܫܵܐ.
                 5 :ܚܲܕ ܐܬܠܝܛܵܐ ܢܚܸܬ ܠܐܓܼܘܿܢܵܐ ܕܙܲܕܝܼܩܘܼܬܼܵܐ
                 6 ܘܒܲܠܒܝܼܒܘܼܬܹܗ ܩܢܵܘ ܡܝܘ̈ܬܐ ܣܲܒܼܪܵܐ ܛܵܒܼܵܐ.
                 7 :ܚܲܕ ܐܬܠܝܼܛܵܐ ܢܚܸܡ ܠܐܓܼܘܿܢܵܐ ܕܙܲܕܝܼܩܘܼܬܼܵܐ
                 8 ܘܒܲܠܒܝܼܒܘܼܬܹܗ ܩܢܵܘ ܡܝܼܘ̈ܬܐ ܣܲܒܼܪܵܐ ܛܵܒܼܵܐ.
                 9 :ܚܲܕ ܕܲܪܵܪܵܐ ܐܸܚܲܕ ܕܲܪܵܐ ܥܲܡ ܚܲܣܝܵܢܐ
                 10 ܘܒܼܚܘܡܣܢܹܗ ܚܲܨܘ ܥܦܪܢܹܐ ܪ̈ܥܝܢܲܝܗܘܿܢ.
                 11 :ܥܲܠ ܟܠ ܘܒܼܟܼܠ ܦܕܿܣ ܥܘܕܪܢܵܐ ܕܡ̣ܢ ܡܵܘܗܲܒܼܬܹܗ
                 12 ܘܛܸܒܹ̈ܐ ܘܒܝܼܫ̈ܐ ܙܡܢ ܘܩܪܐ ܠܡܫܬܘܼܬ ܚܘܼܒܹܗ.
                 13 :ܐܲܝܟ ܓܲܢܒܪܵܐ ܩܥ̣ܵܐ ܒܒܪܝܼܬܼܵܐ ܓܢ̄ܒܵܪ ܚܲܝܠܵܐ
                 14 ܕܗܐ ܙܟܐ ܥܠܡܵܐ ܢܩܘܿܡ ܟܠܒܲܪܢܵܫ ܢܕܘܫ ܥܲܠ ܪܸܫܹܗ.
                 15 :ܩܘܡܘ ܘܐܸܬܼܠܒܲܒܼܘ ܐܪ̈ܥܢܵܝܹܐ ܘܫܡܝܼܢܹ̈ܐ
                 16 ܘܣܒܼܘ ܙܟܘܬܵܐ ܒܝܲܕ ܙܟܘܬܼܵܐ ܕܗܘ̤ܬ ܒܐܝܼܕܝ̈.
                 17 :ܬܵܘ ܢܘܚܘ ܒܲܠܡܹܐܝܢܝ ܠܐܝ̈ܐ ܕܠܐܝܼܘ ܒܥܲܡܵܐ ܕܟܢܫܹܐ
                 18 ܘܠܵܐ ܬܫܬܚܩܘܿܢ ܒܹܝܬܼ ܡܚܫܘܼܠܹܐ ܕܪ̈ܓܝܼܓܬܐ.
                 19 :ܬܵܘ ܣܒܼܘ ܝܪ̈ܬܹܐ ܡܲܪ̈ܗܛܝܟܘܿܢ ܕܒܙܝܼܙܝܼܢ ܗ̄ܘ̣ܵܘ
                 20 ܘܐܚܘܕܘ ܢܘ̈ܡܹܐ ܕܚܛܝܦܐ ܗ̄ܘ̣ܵܬ ܡ̣ܢ ܚܝ̈ܟܘܿܢ.
                 21 ܬܵܘ ܐܬܚܲܦܛܘ ܠܡܸܩܢܐ ܚ̈ܝܹܐ ܪ̈ܘܼܚܢܝܹܐ.
                 22 ܘܫܘܛܘ ܦܘܼܠܚܢܵܐ ܕܐܪ̈ܥܢܵܝܵܬܐ ܕܠܵܐ ܫܪܝܪ̈ܲܢ.
                 23 :ܬܵܘ ܐܬܥܝܲܕܘ ܒܗܪܓܵܐ ܕܛܘܼܒܹ̈ܐ ܕܟܼܣܝܹܢ ܒܲܩܢܘܿܡܝ
                 24 ܘܣܢܵܘ ܘܫܕܘ ܥܝܼܕ̈ܐ ܣܢ̈ܝܐ ܕܥܒܘܪ̈ܝܬܵܐ.
                 25 ܫܪܝܼܪ ܘܲܒܼܚܝܼܪ ܡܘܼܠܟܵܢ ܚܲܝܹ̈ܐ ܕܡܸܬܡܠܲܠ ܒܝܼ.
                 26 :ܘܲܕܠܵܐ ܦܘܼܠܵܓܼ ܝ̇ܗܒ ܐܓܼܪܵܬ ܠܕܡܗܝܡܢ ܒܝܼ
                 27 ܚܹܝܠ ܒܵܪܘܿܝܵܐ ܨܒܼܵܐ ܕܢܲܒܕܸܩ ܚܲܝܠܹܗ ܒܐܝܼܕܹ̈ܝ.
                 28 ܡܦܪܢܣ ܒܝܼ ܥܘܼܬܪܵܐ ܕܚܘܼܒܹܗ ܠܥ̇ܒܕ ܐܝܼܕܵܘ̈ܗܝ.
                 29 :ܚܘܒܲܬ ܚܘܼܒܵܐ ܚܝܒܝܼܢ ܠܹܗ ܥܒܵܕܐ ܕܥܒܕ
                 30 ܘܝܲܬܝܼܪܐܝܼܬ ܩܢܝ̈ܝ ܡܸܠܬܐ ܕܦܪܘܿܫܘܼܬܼܵܐ.
                 31 :ܬܵܘ ܡ̈ܠܠܹܐ ܦܪܘܥܘ ܬܘܼܕܝܼܬܼܵܐ ܕܚܝܸܒܝܼܢ ܐ̄ܢܬܘܢ
                 32 ܠܚܹܝܠ ܐܝܼܬܼܘܿܬܼܵܐ ܕܐܟܼܪܲܙ ܚܲܝܠܹܗ ܒܩܸܐܪܣܐ ܕܥܒܼܕܬ.
                 33 ܬܵܘ ܐܸܬܼܒܩܵܘ ܒܢܝܼܫܵܐ ܬܪܝܼܨܵܐ ܕܒܼܪܸܫ ܩܲܝܣܵܐ.
                 34 ܘܝܲܠܲܦܘ ܕܐܝܟܢ ܚܣܢܐ ܩܸܐܪܣܵܐ ܕܚܫܹ̈ܐ ܘܫܐܕ̈ܐ.
                 35 :ܚܲܫܹ̈ܐ ܠܙܝܼܢܹ̈ܐ ܐܣܢܝܼܘ ܫܘܼܦܪܵܐ ܕܪܸ̈ܥܝܢܝܟܘܿܢ
                 36 ܡܪܘܩܘ ܨܐܘܬܼܵܐ ܕܠܲܙܝܙܘܬܼܟܘܢ ܡ̣ܢ ܠܒܝ̈ܟܘܿܢ.
                 37 ܫܸܐܕܹ̈ܐ ܛܪ̈ܘܢܹܐ ܚܛܦܘ ܝܪܬܘܼܬܼܵܐ ܕܩܸܢܝܵܢܲܝ̈ܟܘܿܢ: 

                 f.316r 

                 38 ܐܩܪܸܒܼܘ ܥܲܡܗܘܿܢ ܘܐܲܚܘܕܘ ܢܘ̈ܡܹܐ ܕܚܲܝܹ̈ܐ ܚܲܕܬܹ̈ܐ.
                 39 :ܪܘܼܚܢܵܐܝܼܬ ܥܒܕܘ ܬܟܼܬܘܫܵܐ ܥܲܡ ܣܲܢܐܝ̈ܟܘܿܢ
                 40 ܒܼܗܘ̇ ܐܸܣܟܝܡܵܐ ܕܐܩܪܸܒܼܘ ܥܡܟܼܘܿܢ ܘܒܲܙܘ ܢܸܟܣܝ̈ܟܿܘܿܢ.
                 41 :ܠܦܘܼܬ ܩܲܫܝܘܼܬܼܵܐ ܕܚܫܹ̈ܐ ܩܫܝ̈ܐ ܠܒܸܫܘ ܚܘܼܡܣܢܵܐ
                 42 ܘܡܲܟܟܼܘ ܐܢܘܿܢ ܕܠܵܐ ܬܬܡܟܟܘܿܢ ܬܚܝܹܬ ܪܸ̈ܓܼܠܲܝܗܘܿܢ.
                 43 :ܐܲܝܟ ܚܪܥܘܼܬܼܵܐ ܕܫܸܐܪܹ̈ܐ ܨܢܥ̈ܐ ܩܢܹ̇ܘ ܒܘܼܝܢܵܐ
                 44 ܕܠܵܐ ܬܸܬ[...]ܒܼܘܢ ܡ̣ܢ ܦܲܘܪ̈ܣܲܝܗܘܿܢ ܐܲܝܟ ܕܒܩܲܕܼܡܵܐ.
                 45 :ܠܟܼܠܹܗ ܐ̄ܢܵܫܵܐ ܐܠܒܸܫ ܙܲܝܢܵܐ ܕܙܕܝܼܩܘܼܬܼܵܐ
                 46 ܕܠܵܐ ܢܸܒܼܪܝܨ ܒܹܗ ܓܹܐܪܵܐ ܫܢܝܼܢܵܐ ܕܐܵܟ̇ܠܩܪܨܵܐ.
                 47 ܦܓܼܪܵܐ ܘܢܲܦܫܵܐ ܢܸܐܚܕܘܢ ܕܵܪܵܐ ܥܲܡ ܚܘܼܬܚ̈ܬܹܐ.
                 48 ܘܲܚܠܝܼܨܐܝܼܬ ܢܸܚܢܘܿܢ ܠܢܝܼܫܵܐ ܕܡܘܼܠܟܵܢ ܚܲܝܹ̈ܐ.
                 49 :ܠܢܝܼܫܵܐ ܕܟܸܐܢܸ̈ܐ ܢܸܚܢܘܿܢ ܙܘܥܹ̈ܐ ܘܪܸܓܼܫܝ ܦܓܼܪܵܐ
                 50 ܕܢܫܘܘܢ ܐܟܿܚܕ ܠܡܣܒܼ ܐܲܓܼܪܵܐ ܕܠܹܗ ܡܬܚܒܲܠ.
                 51 :ܙܒܼܢܐ ܗ̄ܘ̣ ܡܟܝܹܠ ܠܡܚܘܝܼܘ ܠܩܪ̈ܒܼܬܢܹܐ
                 52 ܙܢܝ̈ ܬܟܬܘܼܫܵܐ ܡܠܝ̈ܝ ܩܐܪܣܵܐ ܕܠܘܼܩܒܼܵܠ ܚܲܫܹ̈ܐ.
                 53 :ܒܓܸܠܝܐ ܢܐܡܲܪ ܥܠܬܹܗ ܕܡܸܐܡܪܵܐ ܕܡܛܝܒܼ ܠܲܢ
                 54 ܩܕܵܡ ܫܡܘܥܹ̈ܐ ܕܪܚܡܝܼܢ ܫܡܥܵܐ ܕܪܵܘܚܢܝܵܬܐ.
                 55 :ܢܗܝܼܪܐܝܼܬ ܢܕܢܲܚ ܨܡܚܵܐ ܕܡܠܲܬܼ ܦܘܡܲܢ
                 56 ܠܥܝܼܢ ܪ̈ܘܚܢܹܐ ܕܚܵܙܝܢ ܫܦܝܼܪ ܣܘܼܟܵܠ ܡ̈ܠܐ.
                 57 :ܕܠܵܐ ܬܚܦܝܼܬܼܵܐ ܢܨܘܿܪ ܬܲܫܥܝܼܬܼܵܐ ܕܪ̈ܲܓܲܬ ܢܦܫܲܢ
                 58 ܒܕܦܵܐ ܕܗܘܢܵܐ ܕܝ̇ܕܥ ܠܡܚܵܪ ܒܥܬܝܼܕܥ̈ܬܐ.
                 59 :ܥܲܠ ܕܘܪܹ̈ܐ ܕܥܬܝܼܪ̈ܬܐ ܒܥ̇ܝܬ ܕܐܡܠܸܠ
                 60 ܘܥܲܠ ܬܘܩܢܵܐ ܕܠܐ ܡܸܬܚܒܲܠ ܨ̇ܒܝܬ ܕܐܬܢܹܐ.
                 61 :ܒܙܟܘܬܼ ܡܲܠܟܐ ܕܙܟܼܵܐ ܒܩܲܝܣܵܐ ܬܗܕܲܬ ܣܲܓܝܼ
                 62 ܘܪܓܬܢܝ ܕܐܓܼܠܐ ܥܲܠ ܙܟܘܬܹܗ ܠܥܝܼܢ ܦܲܠܚܵܘ̈ܗܝ.
                 63 :ܒܐܓܘܿܢ ܥܡ̈ܠܐ ܕܦܠܚ̈ܐ ܕܓܼܒܵܐ ܦܗܵܘ ܚܘܼܫܒܲܝ̈
                 64 ܕܥܡܵܐ ܥܲܙܝܼܘ ܠܘܼܩܒܼܵܠ ܩܐܪ̈ܣܹܐ ܕܪ̈ܓܝܼܓܬܼܵܐ.
                 65 :ܐܘܪܚܵܐ ܕܝܼܠܹܗ ܘܕܒܢܲܝ̈ ܒܲܝܬܹܗ ܚܙܹܝܬ ܕܐܠܝܼܨܵܐ
                 66 ܘܐܡ̇ܪܬ ܕܐܸܪܕܹܐ ܐܦܸܢ ܒܡ̈ܠܹܐ ܠܘܵܬܼ ܗܲܠܟ̈ܬܐ.
                 67 :ܛܘܒܹ̈ܐ ܡܠܝܼܟܹ̈ܐ ܫܡܥܸ̇ܬ ܕܲܟܣܹܝܢ ܒܐܲܠܝܼܨܘܼܬܵܗ̇
                 68 ܘܐܠܨܢܝ ܪܸܥܝܵܢܝ ܕܐܸܫܡܲܥ ܐܸܢܘܿܢ ܐܦܸܢ ܡܸܫܡܲܥ.
                 69 :ܡܫܡܲܥ ܫܡ̇ܥܬ ܕܛܒ̣ܐ ܐܘܪܚܵܐ ܕܗܵܕܹܐ ܠܘܝܵܬܼܵܐ
                 70 ܘܪܢ̇ܝܬ ܕܕܒܪ ܐܘܬܲܪ ܐ̄ܢܵܫܵܐ ܡ̣ܢ ܝܘܼܬܪܵܢܵܗ̇.
                 71 :ܬܵܘ ܚܙܘܩܹ̈ܐ ܕܪܚܝܼܡܵܐ ܠܗܘܿܢ ܐܘܼܪܚܵܐ ܕܚ̈ܝܹܐ
                 72 ܚܙܘܩܘ ܥܲܡ ܫܪܒܲܢ ܣܘܒܼܘ ܣܘܼܟܝܵܐ ܕܚ̈ܝܹܐ ܚܲܕܹܬܹܐ.
                 73 :ܒܚܘܼܒܐ ܢܫܡܲܥ ܫܲܪܒܵܐ ܕܚ̈ܝܹܐ ܪ̈ܘܚܢܝܹܐ
                 74 ܘܒܣܘܟܠܵܐ ܢܨܘܬ ܣܘܼܟܠܵܐ ܕܣܬܝܼܪ̈ܬܵܐ.
                 75 :ܒܣܲܒܼܪܵܐ ܢܲܫܲܪ ܠܲܕܡܬܡ̈ܠܠܢ ܥܲܠ ܕܥܬܝ̈ܕܵܢ
                 76 ܕܐܦܸܢ ܟܣܝ̈ܢ ܠܹܗ ܫܲܪܝܲܪ̈ܢ ܛܵܒܼ ܡ̣ܢ ܫܸܡܫܵܐ.
                 77 :ܗܵܠܹܝܢ ܐܢܹܝܢ ܬܠܬܼ ܕܡܟܪ̈ܢ ܐܡ̣ܪ ܦܵܘܠܘܿܣ
                 78 ܡܵܕܹܝܢ ܫܲܪܝܼܪ ܕܗܢܹܝܢ ܡܨܝ̈ܢ ܒܚܹܝܠ ܟܠܡܸܕܹܡ.
                 79 :ܥܣܸܩ ܕܘܼܒܪܵܐ ܕܪ̈ܘܚܢܝܬܼܵܐ ܠܦܓܼܪ̈ܢܝܹܐ
                 80 ܘܐܲܝܟܵܐ ܕܗܢܹܝܢ ܚܠܝܼ̈ܛܵܢ ܥܲܡܹܗ ܕܠܝܼܠ ܘܡܛܟܣ.
                 81 :ܐܸܦ ܡܚܝܼܒܲܢ ܦܫܩ ܘܓܼܠܝܗܝ ܠܚܲܝܠܵܐ ܕܒܼܗܝܼܢ
                 82 ܕܡܨܚ̈ܢ ܚܣܢ̈ܢ ܩܸܐܪܣܵܐ ܕܢܲܦܫܵܐ ܘܕܗܕܡܹ̈ܐ.
                 83 :ܟܠ ܠܡ ܐܝܕܐ ܕܠܘܬ ܐ̄ܢܫܐ ܥܛܠܐ ܠܡܸܗܘܵܐ
                 84 ܠܘܵܬ ܐܠܗܵܐ ܡܨܝܵܐ ܠܡܸܗܘܵܐ ܒܗܲܝܡܢܘܬܼܵܐ.
                 85 :ܫܸܡܫܵܐ ܗ̄ܝ̣ ܕܲܬܪܝܼܢ ܗܲܝܡܢܘܼܬܵܐ ܠܥܝܢܲܝ̈ ܦܓܼܪܐ
                 86 ܬܵܘ ܢܚܙܹܐ ܒܗ̇ ܫܘܼܦܪܵܐ ܦܲܐܝܐ ܕܥܬܝܼ̈ܕܵܬܵܐ.
                 87 :ܛܵܒܼ ܡ̣ܢ ܫܸܡܫܵܐ ܢܲܗܝܼܪ ܕܠܸܩܵܗܿ ܠܕܚ̇ܐܪ ܒܵܗ̇
                 88 ܘܟܲܕ ܥܲܠ ܐܪܥܵܐ ܗ̄ܘ̣ ܚ̇ܙܐ ܕܛܣܝ̈ܢ ܠܥܸܠ ܒܲܫܡܲܝܵܐ. 

                 f.316v 

                 89 :ܬܗܪܵܐ ܪܲܒܵܐ ܡܠܹܐ ܕܘܒܪܵܐ ܕܗܲܝܡܢܘܼܬܼܵܐ
                 90 :ܬܵܘ ܢܬܗܲܪ ܒܵܗ̇ ܘܢܹܐܠܲܦ ܛܲܟܼܣܵܐ ܕܡܸܬܡܠܲܠ ܒܵܗ̇
                 91 :ܓܲܙ̈ܐ ܣܒܝܼ̈ܣܸܐ ܡܠܹܝܢ ܣܘܼܥܪ̈ܢܹܐ ܕܣܥܘܿܪܘܼܬܵܗ̇
                 92 ܢܩܪܘܿܒܼ ܟܠܢܵܫ ܢܸܣܲܒܼ ܡܓܢ ܣܘܼܢܩܵܢ ܚܲܝܵܘ̈ܗܝ.
                 93 :ܠܲܬܪܲܥ ܒܝܬܗ̇ ܢܨܘܒܼܘܼܢ ܐܦ ܚܲܟܝܼܡܹ̈ܐ
                 94 ܘܗܵܐ ܡܬܡܠܝܢ ܣܘܼܢܩܢܲܝܗ̈ܘܿܢ ܕܠܵܐ ܫܘܼܚܵܪܵܐ.
                 95 :ܬܵܘ ܟܠ ܬܓܼܡܝܼ̈ܢ ܥܲܡ ܟܠ ܡܘܼܫ̈ܚܵܢ ܥܬܲܪܘ ܫܲܘܝܵܐܝܼܬ
                 96 ܡ̣ܢ ܒܹܝܬܼ ܓܲܙܵܐ ܕܗܝܡܢܘܼܬܼܵܐ ܕܠܵܐ ܡܸܣܬܝܲܟ.
                 97 :ܒܗܝܡܢܘܼܬܼܵܐ ܢܫܡܲܠ ܐܪ̈ܙܹܐ ܕܗܝܡܢܘܼܬܼܵܐ
                 98 ܘܲܒܼܬܘܟܼܠܢܵܗ̇ ܢܣܝܼܡ ܬܘܟܠܢܲܢ ܥܲܠ ܕܥ̣ܬܝܕ̈ܢ.
                 99 :ܒܢܘܼܗܪܵܗ̇ ܢܚܸܙܹܐ ܠܲܕܠܵܐ ܓܠܝ̈ܢ ܠܥܝܢܲܝ̈ ܒܸܣܪܵܐ
                 100 ܡܥܢܝ ܡܥܢܝܢܵܗ̇ ܢܥܝܪ ܢܦܫܲܢ ܒܫܒܝܼܚ̈ܬܵܐ.
                 101 :ܫܘܼܒܚܵܐ ܪܲܒܵܐ ܕܠ̇ܐ ܡܬܡܲܠܲܠ ܡܠܹܐ ܥܸܢܝܵܢܵܗ̇
                 102 ܘܫܒܼܝܼܚܐܝܼܬ ܡܫܲܒܚܵܐ ܒܫܘܼܒܼܚܵܐ ܠܪ̈ܚܡܲܝ ܚܘܼܒܵܗ̇.
                 103 :ܒܗ̇ ܐܫܬܲܒܲܚܘ ܢܒܼܝ̈ܐ ܒܐܪ̈ܙܹܐ ܕܥܬܝܕܬ̈ܐ
                 104 ܘܒܵܗ̇ ܐܬܢܨܲܝܘ ܫܠܝܼܚܹ̈ܐ ܒܚܲܝܠܵܐ ܕܓܒܪ̈ܘܼܬܼܵܐ.
                 105 :ܥܲܠ ܒܢܝܢܗ̇ ܒܢܵܘ ܥܡܠܲܝ̈ܗܘܿܢ ܟܐܢܹ̈ܐ ܘܢܲܟ̈ܦܹܐ
                 106 ܘܡܛܵܐ ܪܘܡܵܐ ܕܕܘܒܪ̈ܲܝܗܘܿܢ ܥܕܡܵܐ ܠܪܵܘܡܵܐ.
                 107 :ܗܢܘܿܢ ܫܪܝܼܘ ܠܡܒܼܢܵܐ ܫܪܵܪܵܐ ܒܥܠܡܵܐ ܪܲܦܝܵܐ
                 108 ܘܫܪܝܼܘ ܐ̄ܢܵܫ̈ܐ ܠܡܒܼܢܵܐ ܥܡ̈ܠܹܐ ܥܲܠ ܥܲܡܠܲܝ̈ܗܘܿܢ.
                 109 :ܥܲܠ ܫܬܐܣܬܵܗ̇ ܣܡ ܬܘܕܝܼܬܹܗ ܫܡܥܘܿܢ ܟܹܐܦܵܐ
                 110 ܘܢܣܲܒܼ ܐܓܼܪܵܐ ܟܠܝܼܠ̇ܐ ܕܛܘܼܒܹ̈ܐ ܕܠܵܐ ܡܸܬܚܒܲܠ.
                 111 :ܛܘܒܲܝܟ ܫܡܥܘܿܢ ܐܡ̣ܪ ܦܘܡܵܐ ܕܡܠܸܐ ܛܘܼܒܹ̈ܐ
                 112 ܕܫܘܼܝܬ ܕܬܐܠܦ ܐ̄ܪܙ ܟܣܝ̈ܬܐ ܡ̣ܢ ܦܘܼܡ ܟܣܝܵܐ.
                 113 :ܠܵܘ ܠܲܡ ܒܸܣܪܵܐ ܘܲܕܼܡܵܐ ܓܼܠܐ ܠܵܟ ܕܬܲܘܕܹܐ ܫܲܦܝܼܪ
                 114 ܐܸܠܵܐ ܐܒܼܵܐ ܕܐܝܼܬ ܠܹܗ ܝܲܠܕܵܐ ܕܕܡ̇ܐ ܠܝܘܼܩܢܹܗ.
                 115 :ܝܘܩܢܵܐ ܦܐܝ̇ܐ ܕܠܵܐ ܪܘܟܒܼܵܐ ܓܠ̣ܐ ܠܹܗ ܠܫܸܡܥܘܿܢ
                 116 :ܕܢܘܼܕܹܐ ܒܐܒܼܵܐ ܕܐܝܬܼ ܠܹܗ ܝܲܠܕܵܐ ܕܬܪܬܹܝܢ ܕܡ̈ܘܢ
                 117 :ܒܕܡܘܼܬ ܫܡܥܘܿܢ ܢܘܕܐ ܟܠܢܵܫ ܕܡܵܘܕܹܐ ܒܒܼܪܵܐ
                 118 ܘܠܵܐ ܢܬܦܠܓܼ ܕܐܝܟܵܢ ܡܠܬܐ ܘܦܓܼܪܵܐ ܐܟ̄ܚܕ.
                 119 :ܫܠܝܼܚܹ̈ܐ ܒܚܘܒܵܐ ܩܲܒܠܘ ܘܲܫܠܸܡܘ ܠܗ̇ܝ ܕܐܣܬܥܪܲܬ̤
                 120 ܕܡܠܬܼܵܐ ܒܦܓܼܪܐ ܥܡ̣ܪ ܨܒܝܢܹܗ ܠܦܘܼܪܩܵܢ ܚܲܝܲܝ̈ܢ.
                 121 :ܡܛܠ ܚܲܝ̈ܢ ܥܡ̇ܪ ܨܒܝܢܹܗ ܒܦܓܼܪܐ ܕܡܫܲܢ
                 122 ܘܚܲܪܲܪ ܚܲܝܲܝ̈ܢ ܡ̣ܢ ܥܲܒܼܕܘܼܬܼܵܐ ܕܒܝܼܫܵܐ ܘܡܵܘܬܼܵܐ.
                 123 :ܒܚܫ̈ܐ ܓܡܪܗ̇ ܠܗ̇ܝ ܕܗܘ̤ܵܐ ܠܲܢ ܥܠܲܬܼ ܚܲܝܹ̈ܐ
                 124 ܒܚܲܫܹ̈ܐ ܡܕܝܹܢ ܒܓܼܡܘܿܪ ܪܗܛܵܐ ܕܕܘܒܵܪ ܚܲܝܹ̈ܢ.
                 125 :ܡܢܹܗ ܢܐܠܲܦ ܒܐܲܝܠܹܝܢ ܚܫܹ̈ܐ ܫܩ݂ܲܠ ܙܟܘܬܼܵܐ
                 126 ܘܐܝܟܵܢ ܐܩܠܝܼ ܥܲܠ ܚܘܬܚ̈ܬܹܐ ܕܪ̈ܓܝܼܓܼܵܬܼܵܐ.
                 127 :ܡ̣ܢ ܟܪ̈ܘܙܵܘܗܝ ܢܫܡܲܥ ܥܲܡܠܹܗ ܘܚܘܼܡܣܵܢ ܢܲܦܫܹܗ
                 128 ܕܐܲܝܠܹܝܢ ܥܡܠ̈ܐ ܨܵܪ ܒܩܢܘܿܡܹܗ ܩܕܲܡ ܥܡܠܲܝ̈ܗܘܿܢ.
                 129 :ܗܢܘܿܢ ܢܬܢܘܿܢ ܐܦ ܥܲܠ ܕܘܡܝܵܐ ܕܕܘܒܪ̈ܝܗܘܿܢ
                 130 ܕܐܝܟܵܢ ܥܲܙܝܼܘ ܠܘܩܒܼܵܠ ܚܫܹ̈ܐ ܒܲܩܢܘܡܲܝ̈ܗܘܿܢ.
                 131 ܒܦܕܼܪܐ ܐܩܪܸܒܼܘ ܥܲܡ ܚܘܬܚ̈ܬܹܐ ܕܪܓܲܬܼ ܒܸܣܪܵܐ.
                 132 ܘܒܪܥܝܢܵܐ ܐܚܲܕܘ ܕܲܪܵܐ ܥܲܡ ܙܘܿܥܹܝ̈ܗܘܿܢ.
                 133 :ܒܚܫܘܿܫܘ̈ܬܐ ܚܣܲܢܘ ܠܥܝܼܪ̈ܐ ܕܚܫܘܿܫܘܼܬܼܵܐ
                 134 ܘܒܪܝܼܗܘܼܬܼܵܐ ܐܩܢܝܼܘ ܚܲܝܠܵܐ ܠܡܝܘܬܘܼܬܼܵܐ.
                 135 :ܒܐܘܟܼܠܵܐ ܐܘܟܸܠܘ ܐܡ̣ܠܵܐ ܕܪܘܚܵܐ ܠܪܸܥܝܵܢܝܗܘܿܢ
                 136 ܘܒܝܲܕ ܫܢܬܐ ܪܕܦ̣ܘ ܩܘܛܥܵܐ ܡ̣ܢ ܡܲܕܥܲܝ̈ܗܘܿܢ.
                 137 :ܒܹܗ ܒܟܼܝܢܵܐ ܙܟܼܘ ܠܟܼܝܢܵܐ ܘܲܠܚܘܼܬܚܵܬܵܘ̈
                 138 ܘܟܲܕ ܒܹܗ ܐܢܘܿܢ ܗܘ̤ܵܘ ܐܲܝܟ ܐ̄ܢܵܫ̈ܐ ܕܠܵܘ ܐܸܢܘܿܢ. 

                 f.317r 

                 139 :ܫܡ̣ܥܘ ܕܥܬܝܼܕܝܼܢ ܠܡܸܗܘܵܐ ܒܚ̈ܝܹܐ ܠܵܐ ܡܵܝܘ̈ܬܼܵܐ
                 140 ܘܐܫܝܼܛܘ ܐܸܢܘܿܢ ܠܚܲ̈ܝܹܐ ܕܙܒܼܢܵܐ ܐܲܝܟ ܠܵܐ ܚܲܝܹ̈ܐ.
                 141 :ܚ̣ܙܵܘ ܕܐܬܚܕܲܬܘ ܐ̄ܪܙܢܵܐܝܼܬ ܒܡܲܥܡܘܿܕܝܼܬܼܵܐ
                 142 ܘܲܠܒܸܫܘ ܕܘܡܝܵܐ ܕܪ̈ܘܚܢܝܵܬܐ ܥܲܠ ܪ̈ܓܫܲܝܗܘܿܢ.
                 143 :ܚܙ̣ܵܘ ܕܩܪܸܒܼ ܠܹܗ ܙܒܲܢ ܦܘܪܥܢܵܐ ܕܐܓܘܢܝ̈ܗܘܿܢ
                 144 ܘܩܕܡܘ ܨܪܘܼܗ̇ ܠܗ̇ܝ ܕܥܬܼܝܕܵܐ ܥܲܕܠܵܐ ܬܸܗܘܹܐ.
                 145 :ܥܠܡܵܐ ܕܥܬܝܼܕ ܨܵܪܘ ܫܪܝܼܪܹ̈ܐ ܒܕܘܼܒܵܪ̈ܲܝܗܘܿܢ
                 146 ܘܒܼܕܡܘܼܬ ܨܲܠܡܵܐ ܣܡܘܼܗܝ ܒܐܪܵܥܵܐ ܩܕܼܵܡ ܚܙ̈ܝܹܐ.
                 147 :ܐܲܝܟ ܣܡܡܢܹ̈ܐ ܡܕܟܼܘ ܥܲܡܠܹ̈ܐ ܕܟܼܠ ܐܸܣܟܹܝܡܝܼ̈ܢ
                 148 ܘܒܓܚ̈ܬܐ ܪܫܡܘ ܬܚܘܝܼܬܵܐ ܕܣܬܝܼܪ݁ܬܼܵܐ.
                 149 :ܒܨܘܡܵܐ ܚܵܘܝܼܘ ܕܕܠܵܐ ܐܘܼܟܼܠܵܐ ܚ̇ܝܐ ܦܓܼܪܵܐ
                 150 ܘܒܨܠܘ̈ܬܐ ܕܒܼܪܘܼܚ ܗܘ̇ܐ ܥܢܵܝܵܐ ܕܢܲܦܫܵܐ.
                 151 :ܒܫܲܗܪܵܐ ܐܠܸܦܘ ܕܠܵܐ ܬܘܼܒܼ ܕܡ̇ܟ ܟܝܵܢ ܡܵܝܘ̈ܬܐ
                 152 ܘܒܙܡܝܼܪ̈ܬܵܐ ܕܕܠܵܐ ܩܘܛܵܥ ܙܡ̇ܪ ܫܘܒܼܚܵܐ.
                 153 :ܒܫܝܛܘܼ ܢܟܣܹ̈ܐ ܒܕܸܩܘ ܥܘܼܬܪܵܐ ܕܟܼܣܹܐ ܒܪܘܡܵܐ
                 154 ܘܒܨܥܝܼܪ݁ܬܵܐ ܕܪܫ̣ܘ ܡܲܪܕܝܼܬܼܵܐ ܠܘܬܼ ܕܲܫܒܝܼ̈ܚܵܢ.
                 155 :ܨܡ̣ܘ ܡ̣ܢ ܠܲܚܡܵܐ ܠܵܘ ܕܣܢܹܐ ܗ̄ܘ̣ܵܐ ܐܘܟܼܠܵܐ ܕܡܸܢܹܗ
                 156 ܐܸܠܐ ܕܢܸܚܢܘܢ ܠܗ̇ܘ ܕܘܒܪܵܐ ܕܕܠܵܐ ܐܘܼܟܼܠܵܐ.
                 157 :ܫܒܲܩܘ ܙܘܘܓܹܐ ܠܵܘ ܕܛܡܐ ܗ̄ܘ̣ܵܐ ܢܩܦܐ ܕܥܡܹܗ
                 158 ܐܸܠܵܐ ܕܢܗܘܘܿܢ ܐܲܝܟ ܕܥܬܼܝܼܕܝܼܢ ܠܡܸܗܘܵܐ ܬܲܡ̇ܢ.
                 159 :ܫܛܘ ܠܥܢܝܢܵܐ ܠܵܘ ܟܕ ܪܡ̇ܝܢ ܡ̣ܢ ܣܘܼܢܩܵܢܵܐ
                 160 ܐܠܵܐ ܕܢܫܘܘܿܢ ܠܡܬܒܣܡܘܼ ܒܲܕܼ ܠܵܐ ܫܘܼܠܵܡ.
                 161 :ܟܒܸܫܘ ܚ̇ܫܵܐ ܒܥܪܝܼܪ̈ܝܹܐ ܕܦܓܪܵܐ ܘܢܲܦܫܵܐ
                 162 ܟܲܕ ܐܝܬܝܗܘܿܢ ܦܓܼܪ̈ܢܵܝܹܐ ܘܢܲܦܫܢܝܹ̈ܐ.
                 163 :ܣܢܵܘ ܥܸܢܝܵܢܵܐ ܕܐܪ̈ܥܢܝܵܬܐ ܟܲܕ ܐܲܪ̈ܥܵܢܝܵܢ
                 164 ܘܪܚܸܡܘ ܗܪ̈ܓܹܐ ܕܪ̈ܘܚܢܝܵܬܐ ܟܲܕ ܪܚܝܼܩܝܼܢ.
                 165 :ܥܒ̣ܕ ܬܟܬܘܫܵܐ ܥܲܡ ܟܠ ܚܫܝܼ̈ܢ ܕܟܣܹܝܢ ܘܓܼܠܹܝܢ
                 166 ܘܠܵܐ ܐܬܪܦܝܼܘ ܡ̣ܢ ܬܘܟܼܠܢܵܐ ܕܥܬܼܝܼܪ̈ܬܵܐ.
                 167 :ܫܝܢܘ ܚܡܬܐ ܡܟܟܘ ܚܘܬܪܐ ܣܚܦܘ ܠܚܣܡܵܐ
                 168 ܘܠܐ ܐܦܣܘ ܠܹܗ ܠܚܲܨܪܵܐ ܕܢܪܗܲܛ ܐܲܝܟ ܨܒܝܢܹܗ.
                 169 :ܦܓܘ̈ܕܐ ܢܟܦܹܐ ܐܪܡܝܼܘ ܢܟܦܹ̈ܐ ܒܪܓܲܬܼ ܦܓܼܪܵܐ
                 170 ܘܟܲܕ ܩܠܝܼܠܵܐ ܗ̄ܝ݂ ܥܲܒܼܕܘܗ̇ ܕܬܸܪܗܲܛ ܡܲܬܝܼܢܵܐܝܼܬ.
                 171 :ܡܝ̈ܐ ܟܢܝܼܪܹ̈ܐ ܪܣܘ ܥܲܠ ܢܘܼܪܵܐ ܕܒܗܕܵܡܹ̈ܐ
                 172 ܘܲܫܗܵܐ ܥܘܼܙܵܗ̇ ܘܠܵܐ ܐܬܟܬܫܲܬ̤ ܐܲܝܟ ܕܡܥܕܵܐ.
                 173 :ܐܲܝܟ ܕܥܲܠ ܪ̈ܟܼܫܐ ܪܟܸܒܘ ܙܘܥܲܝ̈ܗܘܿܢ ܥܲܠ ܪ̈ܓܫܲܝܗܘܿܢ
                 174 ܘܛܟܸܣܘ ܪܗܛܵܐ ܕܟܼܠܗ̇ ܐ̄ܢܵܫܐ ܕܠܵܐ ܢܸܬܕܘܕ.
                 175 :ܩܐܡܵܐ ܕܫܝܢܵܐ ܐܪܡܝܼܘ ܒܦܘܼܡܵܐ ܣܘܣܝܵܐ ܕܡ̈ܠܹܐ
                 176 ܘܪܸܟܫܲܬ̤ ܢܦܫܵܐ ܐܲܝܟ ܗܸܢܝܘܟܵܐ ܠܥܸܠ ܡ̣ܢ ܚܨܹܗ.
                 177 :ܠܥܝܢܹ̈ܐ ܒܛܟܼܣܵܐ ܝܗܒܼܘ ܕܢܚܘܪ̈ܢ ܒܲܕܡܬ ܚܙ̈ܝܢ
                 178 ܘܠܐܕܼܢܹ̈ܐ ܒܟܝܠܵܐ ܐܦܣܘ ܫܸܡܥܵܐ ܕܲܟܼܡܐ ܢܥܘܠ.
                 179 :ܠܐܝܼܕܐ ܐܠܦܘܼܗ̇ ܕܬܙܪܘܿܥ ܙܲܪ̈ܥܹܐ ܕܙܕܝܼܩܘܼܬܼܵܐ
                 180 ܘܬܟܢܸܫ ܠܗ̇ ܦܐܪܹ̈ܐ ܕܫܘܒܼܚܵܐ ܒܝܲܕܼ ܙܕܩ̈ܬܵܗ̇.
                 181 :ܠܪܓܼܠܐ ܕܪܫܘܼܗ̇ ܕܬܪܕܹܐ ܒܐܘܼܪܚܵܐ ܕܠܘܵܬ ܐ̄ܢܵܫܵܐ
                 182 ܘܬܸܣܥܘܿܪ ܐܢܘܿܢ ܒܝܲܕܼ ܕܘܼܪ̈ܘܬܼܵܐ ܪ̈ܘܚܢܝܵܬܼܵܐ.
                 183 :ܠܟܠܹܗ ܦܓܹܪܐ ܕܟܢܘ ܐ̄ܢܵܫܝ̈ܐ ܒܦܘܼܠܚܵܢ ܚܲܝܹ̈ܐ
                 184 ܘܐܥܢܝܼܘ ܚܲܝܵܘ̈ܗܝ ܒܥܢܝܵܢ ܚܲܝܹ̈ܐ ܕܢܘܟܪ̈ܝܝܼܢ ܠܹܗ.
                 185 :ܠܟܼܠܹܗ ܟܝܢܵܐ ܥ̣ܨܘ ܕܢܕܡܹܐ ܒܕܠܵܐ ܟܝܢܹܗ
                 186 ܘܐܪܦܝܼ ܕܝܼܠܹܗ ܘܫܲܪܝܼ ܡܕܲܡܹܐ ܒܲܕܠܵܐ ܕܝܼܠܹܗ.
                 187 ܟܝܵܢܹܗ ܕܦܓܼܪܵܐ ܒܦܓܼܪ̈ܢܝܵܬܐ ܗ̇ܪܓ ܟܠܫܵܥ 

                 f.317v 

                 188 ܘܗܸܢܘܿܢ ܥܲܒܼܘܼܗܝ ܕܢܛܥܹܐ ܕܝܼܠܹܗ ܘܢܗܪܘܿܓܼ ܒܕܪܘܼܚ.
                 189 :ܟܝܢܵܐ ܕܢܲܦܫܵܐ ܟܝܢܝ̈ܬܐ ܡܥܕ ܡܬܪܥܹܐ
                 190 ܘܗܢܘܿܢ ܫܲܚܠܸܦܘ ܥܢܝܵܢ ܢܦܫܵܐ ܠܘܬ ܕܫܒܝܼܚܵܢ.
                 191 :ܬܗܪܵܐ ܪܲܒܵܐ ܚܘܝܼܘ ܒܐܪܥܵܐ ܐ̄ܢܵܫ̈ܐ ܠܐܢ̄ܫ̈ܐ
                 192 ܕܒܦܓܪ̈ܝܗܘܿܢ ܥܒܲܕܘ ܬܟܬܘܫܵܐ ܥܲܡ ܦܓܼܪ̈ܲܝܗܘܿܢ.
                 193 :ܐܘܪܚܵܐ ܚܲܕܬܼܵܐ ܕܪܫܘ ܒܲܒܼܪܝܼܬܼܵܐ ܒܢܲܝ̈ ܕܚܝܼܚܵܐ
                 194 ܕܐܚܲܕܘ ܕܲܪܐ ܥܲܡ ܩܘ̈ܠܥܹܐ ܕܗܕܡܲܝ̈ܗܘܿܢ.
                 195 :ܕܠܵܐ ܒܥܝܕܵܐ ܣܥ̣̇ܘ ܡܝܘ̈ܬܹܐ ܒܡܵܝܘܿܬܘܼܬܼܵܐ
                 196 ܕܨܪܘ ܚܘܕܬܵܐ ܟܲܕ ܐܣܝܼܪܝܢ ܒܚܒܠܲܝ̈ ܡܵܘܬܼܵܐ.
                 197 :ܡܢܘܼ ܡ̣ܢ ܡܬܘܡ ܚ̣ܙܵܐ ܗܕܡܹ̈ܐ ܡܸܬܚܒܠܢܹ̈ܐ
                 198 ܕܥܒܼܕܝܼܢ ܩܐܪܣܵܐ ܥܲܡ ܚܲܫܝ̈ܘܿܢ ܚܫܘܿܫܵܐܝܼܬ.
                 199 :ܡ̇ܢ ܐܬܒܩܝܼ ܒܙܘ̈ܥܹܐ ܢܣܝܼ̈ܣܹܐ ܘܡܨܛܠܝܢܹ̈ܐ
                 200 ܕܐܚܕܝܼܢ ܕܲܪܵܐ ܥܲܡ ܫܘܼܚܠܦܹ̈ܐ ܪ̈ܦܝܐ ܕܒܼܗܘܿܢ.
                 201 :ܠܡ̇ܢ ܐܬܝܼܗܒܲܬ̤ ܓܲܢܒܵܪܘܼܬܼܵܐ ܐܲܝܟ ܕܠܐ̄ܢܵܫܵܐ
                 202 ܕܟܲܕ ܚܲܝܵܒܝܹܢ ܫܩܲܠ̣ܘ ܙܟܘܼܬܐ ܕܠܵܐ ܡܙܕܟܝܵܐ.
                 203 :ܐ̄ܢܫܐ ܐ̄ܢܫܐ ܗ̄ܘ̣ ܟܡ̣ܵܐ ܐܸܢ ܙܟ̇ܐ ܒܲܕܠܵܐ ܕܝܼܠܹܗ
                 204 ܘܗܢܵܘ ܬܗܪܵܐ ܕܙܟ̇ܐ ܒܲܐܚ̄ܪܹܝܢ ܐܲܝܟ ܕܒܕܝܼܠܹܗ.
                 205 :ܚܕܬܵܐ ܓܕܫܬ̤ ܠܒܢܲܝ̈ ܐܵܕܵܡ ܐܕܡܬܼܵܐ ܕܐܪܥܵܐ
                 206 ܘܫܚܠܸܦܘ ܥܲܦܪܵܐ ܒܕܘܼܒܪ̈ܝܗܘܿܢ ܠܕܗܒܼܵܐ ܕܪܘܚܵܐ.
                 207 :ܐܕܡ ܐܵܕܹܡܵܬܐ ܓܒܝܠܲܬ̤ ܒܐܝܼܕܵܐ ܠܵܐ ܡܪܟܒܬܼܵܐ
                 208 ܡܢܘܼ ܥܒܕܵܟ ܕܬܛܥܹܐ ܟܝܵܢܵܟ ܒܕܠܵܐ ܟܝܢܵܟ.
                 209 :ܟܝܵܢܵܟ ܥܦܪܐ ܗ̄ܘ̣ ܘܣܗ̇ܕ ܥܲܦܪܟ ܕܥܲܦܪܵܟ ܥܲܦܪܵܐ ܗ̄ܘ̣
                 210 :ܘܕܘܒܵܪ ܚ̈ܝܹܐ ܕܐܚܕܬ ܗܵܫ̇ܐ ܪܡ ܡ̣ܢ ܥܲܦܪܵܟ
                 211 ܘܐܝܟ ܕܠܟܸܬܐ ܗܦܝܼܟ ܚܫܹ̈ܐ ܠܚܫܘܿܫܘܼܬܹܗ.
                 212 :ܚܫܘܫܵܐ ܐܢܬ ܘܚܫ̈ܐ ܥܙܝܼܠܝܼܢ ܒܟܘܬܝܼܢ ܓܘܼܫܡܵܟ
                 213 ܘܡ̇ܢ ܠܵܐ ܢܬܗܲܪ ܒܚܫܘܫܘܼܬܵܟ ܕܚܫܢܬ̤ ܗܝ̣ ܠܗ̇.
                 214 :ܬܵܘ ܚܫܘܫܹ̈ܐ ܬܗܲܪܘ ܘܐܬܕܡܲܪܘ ܒܐ̄ܚܢܲܝ̈ܟܘܿܢ
                 215 ܕܲܚܣܸܢܘ ܚܫܹ̈ܐ ܕܩܢܘܡܲܝ̈ܗܘܿܢ ܒܨܒܝܢܲܝ̈ܗܘܿܢ.
                 216 :ܬܵܘ ܡܝܘ̈ܬܐ ܚܙ̣ܵܘ ܡܝܘ̈ܬܐ ܟܡܵܐ ܐܬܓܢܒܲܪܘ
                 217 ܕܡܝܼܬܘ ܟܲܕ ܠܐ ܡܝܼܬܘ ܘܩܕܡܘ ܘܚܝܵܘ ܥܕܠܵܐ ܢܚܘܢ.
                 218 :ܬܵܘ ܐܪ̈ܥܢܹܐ ܚܘܪܘ ܒܐܪ̈ܥܢܹܐ ܟܡܵܐ ܐܬܚܟܲܡܘ
                 219 ܕܕܵܢܘ ܟܹܐܢܵܐܝܹܬ ܣܘܼܥܪܵܢܲܝܗܘܿܢ ܩܕܼܵܡ ܝܘܿܡ ܕܝܼܢܵܐ.
                 220 :ܕܝܢܵܐ ܟܹܐܢܵܐ ܣܡܘ ܐܲܝܟ ܢܝܼܫܵܐ ܩܕܼܵܡ ܥܲܝܢܲܝ̈ܗܘܿܢ
                 221 ܘܚܢ̣ܘ ܣܓܝܼ ܠܡܒܣܲܪ ܡܘܼܡܹ̈ܐ ܕܩܢܘ ܕܩܢܘܡܲܝ̈ܗܘܿܢ.
                 222 :ܩܕܲܡ ܒܘܚܪܢܵܐ ܥܲܠܘ ܠܒܨܵܬܼܵܐ ܕܚܘܼܫܒܲܝ̈ܗܘܿܢ
                 223 ܘܩܛܪܓܼܘ ܘܐܲܟܸܣܘ ܠܫܟܼܝܼܪ̈ܬܐ ܕܦܓܼܪܐ ܘܢܦܫܵܐ.
                 224 :ܠܚܨܪܵܐ ܕܒܼܗܘܿܢ ܥܒܲܕܘ ܕܝ̇ܢܐ ܒܹܝܬܼ ܛܵܒܼ ܘܲܠܒܝܼܫ
                 225 ܘܩܠܸܣܘ ܩܘܼܫܬܐ ܘܓܢܝܼܘ ܠܙܹܐܦܵܐ ܕܠܵܐ ܒܘܼܣܪܢܵܐ.
                 226 :ܕܠܐ ܒܘܣܪܢܵܐ ܕܢܘ ܫܲܪܝܼܪܹ̈ܐ ܐܝܕܵܐ ܕܟܹܐܢܵܐ
                 227 ܘܚܘܝܼܘ ܕܡܨܝܢ ܐ̄ܢܫܐ ܠܡܕܢ ܫܪ̣ܪܵܐ ܒܟܹܐܢܘܼ.
                 228 :ܠܲܝܬ ܟܹܝܬ ܥܸܠܬܼܵܐ ܠܪ̈ܚܡܲܝ ܥܠܠܹ̈ܐ ܠܡܸܬܥܠܠܘܼ
                 229 ܕܗܵܐ ܗܘ̤ܘ ܐ̄ܢܫܐ ܡ̣ܢ ܐ̄ܢܫܘܼܬܵܐ ܕܕܢܘ ܟܐܢܘܼܬܼܵܐ.
                 230 :ܠܲܝܬ ܠܵܟ ܐ̄ܢܫ̈ܐ ܡܦܬܲܚ ܦܘܡܵܐ ܥܲܠ ܣܘܼܥܪ̈ܢܲܝܟ
                 231 ܘܠܵܐ ܡܨܝܬ ܕܬܐܡܲܪ ܕܲܥܣܸܩ ܪܗܛܵܐ ܕܙܲܕܝܩܘܼܬܵܐ.
                 232 :ܦܫܝܼܩ ܠܵܟ ܣܓܝܼ ܐܸܢܗܘ̤ ܕܬܨܒܹܐ ܠܡܸܙܕܕܩܘܼ
                 233 ܐܲܝܟ ܕܐܙܕܕܲܩܘ ܟܐܢܹ̈ܐ ܐܚܝܢܲܝ̈ܟ ܒܕܪ̈ܝܢ ܕܪ̈ܝܼܢ.
                 234 :ܡܬܘܚ ܪܥܝܢܵܟ ܨܝܕ ܕܘܼܒܵܪܵܐ ܕܒܢܲܝ̈ ܓܸܢܣܟ
                 235 ܘܲܚܙܝܼ ܫܪܵܪܵܐ ܕܡܸܕܡ ܕܐܡ̇ܪܬ ܒܣܘܼܥܪ̈ܢܲܝܗܘܿܢ.
                 236 :ܚܙܘܩ ܒܠܘܼܝܬܵܐ ܕܣܦܪ̈ܲ ܪܘܼܚܵܐ ܒܪܸ̈ܓܼܠܹܐ ܕܗܵܘܢܵܐ
                 237 ܘܲܪܕܝܼ ܫܲܦܝܼܪ ܠܘܲܥܕܵܐ ܟܹܐܢܵܐ ܕܥܲܡ̈ܠܹܐ ܕܲܒܼܗܘܿܢ. 

                 f.318r 

                 238 :ܐܲܚܘܼܕ ܐܘܼܪܚܵܐ ܡ̣ܢ ܫܘܼܪܵܝܵܐ ܕܫܘܼܪܵܝ ܐ̄ܢܵܫ̈ܐ
                 239 ܘܣܝܼܡ ܐܵܬܘܿܬܼܵܐ ܒܒܹܝܬܼ ܐܵܘܵܢܹ̈ܐ ܕܕܘܼܒܵܪ̈ܲܝܗܘܿܢ.
                 240 :ܥܘܼܠ ܠܒܹܝܬܼ ܐܪ̈ܟܐ ܕܲܟܼܬܝܼ̈ܒܵܬܼܵܐ ܕܲܡܠܸܟ ܡܲܠܟܹ̈ܐ
                 241 ܘܲܩܪܝܼ ܒܫܲܪ̈ܒܹܐ ܕܡܠܝܼܢ ܡܸܐܹܐ ܕܢܸܨܚܵܢ ܐ̄ܢܵܫܵܐ.
                 242 :ܠܒܘܿܟ ܩܲܪܛܲܝܣܵܐ ܕܲܪܫܝܼܡܵܐ ܒܹܗ ܬܲܫܥܝܼܬ ܗܵܒܹܝܠ
                 243 ܘܚܘܪ ܟܲܕ ܕܵܒܲܚ ܐܸܡܪܵܬ ܕܲܟܼܝܵܐ ܘܕܲܟܼܝܘܼܬܼ ܢܦܲܫܵܐ.
                 244 :ܡܪܘܿܩ ܪܸܥܝܵܢܵܟ ܡ̣ܢ ܨܵܐܘܼܬܼܵܐ ܕܢܸܟܼܠܵܐ ܨܐܐ
                 245 ܘܩܲܪܸܒܼ ܕܸܒܼܚܵܐ ܕܕܲܟܼܝܼܘܼܬ ܢܲܦܫܵܐ ܕܕܵܡܹܐ ܠܕܝܼܠܸܗ.
                 246 :ܦܬܲܚ ܡܲܫܡܲܥܬܵܟ ܠܡܨܬ ܫܸܡܥܵܐ ܕܝܘܿܡ ܥܘܼܢܕܵܢܹܗ
                 247 ܘܨܘܼܬܼ ܒܲܪܬ ܩܵܠܵܐ ܕܬܲܒܼܥܵܐ ܥܝܵܪܬܵܐ ܕܛܠܝܼܡܘܼܬܹܗ.
                 248 :ܩܵܠܵܐ ܕܕܵܡܸ̇ܐ ܢܸܗܘܹܐ ܒܝܼܫܵܐ ܠܚܘܼܡܣܵܢ ܢܲܦܫܵܟ
                 249 ܘܠܵܐ ܬܸܟܼܪܹܐ ܠܵܟ ܡܵܐ ܕܡܬܥܠܒܬ ܥܵܘܼܠܵܐܝܼܬ.
                 250 :ܘܡܵܐ ܕܐܸܬܒܲܝܐܬ ܒܣܲܒܼܪܵܐ ܕܡܵܘܬܹܗ ܕܒܘܼܟܼܪܵܐ ܕܡܝܼ̈ܬܹܐ
                 251 ܐܲܗܦܸܟ ܕܲܦܵܐ ܘܲܚܙܝܼ ܩܪܸܫܹܗ ܚܢܘܿܟ ܕܐܸܫܬܲܢܝܼ.
                 252 :ܫܡܲܥ ܥܲܠ ܓܲܒܼܪܵܐ ܠܒܝܼܫ ܗܲܕܡܹ̈ܐ ܡܸܬܼܚܲܒܠܵܢܹܐ
                 253 ܕܐܵܘܥܝܼ ܓܸܦܹ̈ܐ ܘܲܦܪܲܚ ܒܐܵܐܲܪ ܠܥܸܠ ܡ̣ܢ ܚܲܫܹ̈ܐ.
                 254 :ܚܙ̣ܵܝ ܬܸܕܡܘܼܪܬܵܐ ܚܲܕܬܵܐ ܕܲܗܘ̤ܬ ܨܝܹܕ ܒܲܪܢܵܫܵܐ
                 255 ܕܥܲܒܼܕܹܗ ܠܛܲܟܼܣܵܐ ܕܲܒܼܢܲܝ̈ܢܵܫܵܐ ܒܝܲܕ ܫܘܼܢܝܹܗ.
                 256 :ܒܵܬܲܪ ܫܲܪܒܹܗ ܩܪܝܼ ܒܦܵܣܘܿܩܵܐ ܕܲܪܫܝܼܡ ܒܹܗ ܢܘܼܚ
                 257 ܕܲܒܼܢܝܼܚܘܼܬܹܗ ܢܵܚ ܠܘܼܚܵܡܵܐ ܕܲܓܙܪ ܕܝܼܢܵܐ.
                 258 :ܥܒܼܪ ܦܘܼܩܕܵܢܵܐ ܓܙܪ ܥܲܠ ܐ̄ܢܵܫܵܐ ܟܸܐܒܹ̈ܐ ܘܚܲܫܹ̈ܐ
                 259 ܘܲܒܼܢܘܿܚ ܢܚܲܬ̤ ܥܲܙܝܼܙܘܼܬܼܵܐ ܕܢܸܓܼܕܵܗ̇ ܕܐܲܪܥܵܐ.
                 260 :ܐܵܘܠܹܟܝ ܢܲܦܫܵܐ ܡܲܠܝܲܬ̤ ܢܵܘܚܵܐ ܕܙܲܕܝܼܩܘܼܬܼܵܐ
                 261 ܕܢܵܚܘ ܒܹܟܼܝ ܐ̄ܢܵܫ̈ܐ ܡ̣ܢ ܛܘܼܪܵܦܵܐ ܕܚܲܝܹ̈ܐ ܥܡ̈ܝܼܠܹܐ.
                 262 :ܡ̣ܢ ܢܘܿܚ ܢܹܐܠܲܦ ܐܲܝܢܵܐ ܕܒܵܥܹܐ ܕܢܹܐܠܲܦ ܫܲܦܝܼܪ
                 263 ܕܡܨܹܐ ܗ̄ܘ̣ ܐ̄ܢܵܫܵܐ ܠܡܸܙܟܼܵܐ ܠܚܲܫ̈ܐ ܠܕܚܵܫܘܿܫܵܐ ܗ̄ܘ̣.
                 264 :ܚܵܫܘܿܫܵܐ ܗ̄ܘ̣ܵܐ ܢܘܿܚ ܢܝܼܚ ܢܲܦܫܵܐ ܘܲܒܼܢܲܝ̈ ܕܲܪܹܗ
                 265 ܘܒܹܗ ܒܲܟܼܝܵܢܹܗ ܙܟܼܵܐ ܠܲܩܪܵܒܼܵܐ ܕܚܲܫܹ̈ܐ ܘܡܲܝ̈ܵܐ.
                 266 :ܘܐܵܦ ܫܝܹܡ ܒܘܼܘܼܪܹܗ ܠܢܝܼܫܵܐ ܕܝܼܠܹܗ ܚܢܵܐ ܕܲܟܼܝܵܐܝܼܬ
                 267 ܘܒܼܲܕܿܟܼܝܼܘܼܬܹܗ ܫܘܐ ܕܲܢܩܲܒܸܠ ܕܲܪܓܼܵܐ ܪܵܡܵܐ.
                 268 :ܒܝܲܕ ܒܘܼܪ̈ܟܵܬܹܗ ܒܛܠ ܠܵܘܛܵܬܐ ܕܓܙܵܪ ܕܝܼܢܵܐ
                 269 ܘܫܲܪܝܼܘ ܐ̄ܢܵܫ̈ܐ ܠܡܸܬܒܲܪܵܟܼܘܼ ܒܫܸܡ ܒܵܪܘܿܝܵܐ.
                 270 :ܘܥܲܡ ܝܲܠܕܵܬܹ̈ܗ ܪ̈ܕܲܝ ܒܘܼܪ̈ܟܵܬܐ ܕܝܲܗܒ̣ ܠܹܗ ܐܲܒܘܼܗܝ
                 271 ܥܕܲܡܵܐ ܕܡܛܝܼ ܨܹܝܕ ܐܲܒܼܪܵܗܵܡ ܐܲܒܼܵܐ ܕܥܲܡܡܹ̈ܐ.
                 272 :ܨܝܹܕ ܐܲܒܼܪܵܗܵܡ ܣܡܟ ܒܘܼܪ̈ܟܵܬܼܵܐ ܕܲܪ̈ܓܲܝ ܡ̣ܢ ܢܘܿܚ
                 273 ܘܒܹܗ ܐܸܫܬܵܘܬܲܦܘ ܥܲܡܡܹ̈ܐ ܥܘܼܪ̈ܠܹܐ ܒܒܘܼܪܟܲܬ ܟܹܐܢܵܐ.
                 274 :ܒܪܘܼܚ ܨܸܒܼܝܵܢܹܗ ܓ̣ܡܲܪ ܨܒܼܝܵܢܹܗ ܡܲܬܩܸܢ ܟܠܵܐ
                 275 ܘܫܵܘܬܹܦ ܐ̄ܢܵܫܵܐ ܒܥܘܼܬܼܪܵܐ ܪܲܒܵܐ ܕܒܲܣܝܼܡܘܼܬܹܗ.
                 276 :ܥܘܼܬܼܪܵܐ ܕܲܪ̈ܚܡܵܘܗܝ ܝܲܗ̣ܒ ܪܲܚܡܵܢܵܐ ܒܝܲܕ ܐܲܒܼܪܵܗܵܡ
                 277 ܘܐܲܩܸܨ ܥܘܼܬܪܵܐ ܕܪܲܒܘܼܬܼ ܚܘܼܒܹܗ ܥܲܠ ܒܲܪ ܒܲܝܬܹܗ.
                 278 :ܥܸܠܬܼܵܢܵܐܝܼܬ ܣܟܲܪ ܨܒܼܝܵܢܹܗ ܨܝܕ ܬܘܩܵܢܹܗ
                 279 ܕܢܛܢ ܐ̄ܢܵܫܵܐ ܠܡܸܪܕܵܐ ܒܐܘܼܪܚܵܐ ܕܗܲܝܡܵܢܘܼܬܹܗ.
                 280 :ܛܢܵܢܵܐ ܐܲܪܡܝܼ ܐ̄ܢܵܫܵܐ ܒܐ̄ܢ̇ܫܵܐ ܪܵܚܸܡܢܵܫܵܐ
                 281 ܕܢܹܐܣܘܿܪ ܐܸܢܘܿܢ ܒܚܘܼܒܵܐ ܕܲܫܡܹܗ ܕܠܐ ܢܛܥܘܼܢܵܘܗܝ.
                 282 :ܡ̣ܢ ܐܲܒܼܪܵܗ̇ܡ ܚܙܲܩ ܨܒܝܵܢܹܗ ܘܲܫܪܵܐ ܒܐܝܼܣܚܲܩ
                 283 ܘܬܲܪܓܸܡ ܥܲܡܹܗ ܩܵܠܹ̈ܐ ܕܚܘܼܒܵܐ ܘܲܕܬܿܥܘܼܬܼܵܐ.
                 284 :ܐܝܼܣܚܲܩ ܡܪܝܼ ܒܨܒܝܢ ܐܲܒܼܘܼܗܝ ܕܲܠܘܵܬ ܡܵܪܹܗ
                 285 ܘܲܗܘ̤ܵܐ ܝܵܪܬܵܐ ܕܡܘܼܠܟܵܢ ܚܲܝܹ̈ܐ ܕܠܵܐ ܡܸܬܕܲܓܲܠ.
                 286 ܒܗܲܝܡܵܢܘܼܬܼܵܐ ܫܠܸܡ ܙܲܕܝܼܩܵܐ ܠܩܵܠ ܡܘܼܠܟܵܢܵܐ: 

                 f.318v 

                 287 ܘܕܲܚܙܵܐ ܕܫܲܪܝܼܪ ܝܲܗܒܹܗ ܠܝܲܥܩܘܿܒܼ ܕܢܸܬܼܦܲܪܢܲܣ ܒܹܗ.
                 288 :ܝܲܥܩܘܿܒܼ ܐܲܩܠܝܼ ܥܲܠ ܟܠ ܩ̈ܠܝܼ̈ܢ ܕܩ̣ܫܝܘܼܬܼ ܚܲܫܹ̈ܐ
                 289 ܘܲܚܦܝܼܛܵܐܝܼܬ ܚܒܲܨ ܥܲܠ ܕܲܪܓܼܵܐ ܕܒܹܝܬܼ ܐܲܒܼܪܵܗܵܡ.
                 290 :ܫܲܪܝܼܪ ܗ̄ܘ̣ܵܐ ܠܹܗ ܩ̇ܠܵܐ ܕܩܵܪܹܐ ܐܲܒܼܪܵܡ ܐܲܒܼܪܵܡ
                 291 ܘܪܲܟܸܒܼ ܥܸܠܠܹ̈ܐ ܕܢܸܗܘܹܐ ܚܲܒܼܪܵܐ ܠܗ̇ܝ ܒܲܪܬܿ ܩܵܠܵܐ.
                 292 :ܟܠ ܐܘܼܠܨܵܢܝܼ̈ܢ ܣܲܝܒܲܪ ܘܲܣܒܲܠ ܡܠܹܐ ܚܵܘܣܵܢܵܐ
                 293 ܕܠܵܐ ܢܼܬܢܲܟܼܪܹܐ ܡ̣ܢ ܡܘܼܠܟܵܢܵܐ ܕܒܹܝܬܼ ܐܲܒܼܵܗܵܘ̈ܗܝ.
                 294 :ܫ̈ܢܲܝܵܐ ܥܸܣܪ̈ܝܼܢ ܦܠܲܚ ܬܲܡܝܼܡܵܐ ܒܲܐ̄ܓܼܪܵܐ ܕܢܸܫܹ̈ܐ
                 295 ܕܲܒܼܝܲܕ ܢܸܫܹ̈ܐ ܢܸܫܬܘܸܐ ܠܐܲܓܼܪܵܐ ܕܡ̣ܢ ܐܲܠܵܗܵܐ.
                 296 :ܐܲܓܼܪܵܐ ܛܵܒܼܵܐ ܩܨ ܒܵܪܘܿܝܵܐ ܠܲܟܼܝܵܢ ܐ̄ܢܵܫܵܐ
                 297 ܘܛܢܘ ܫܲܪܝܼܪܹ݁ܐ ܕܲܢܝܲܒܠܘܼܢܸܝܗܝ ܡ̣ܢ ܚܲܕ ܠܲܐ̄ܚܪܹܝܢ.
                 298 :ܫܲܪܝܼܪ ܗ̄ܘ̣ܵܐ ܠܗܘܿܢ ܩܵܠ ܡܘܼܠܟܵܢܵܐ ܟܲܕ ܛܵܒܼ ܪܲܚܝܼܩ
                 299 ܘܐܲܝܟ ܩܲܪܝܼܒܼܵܐ ܡܸܬܒܲܩܝܼܢ ܒܵܗ̇ ܒܪܲܚܝܼܩܘܼܬܹܗ.
                 300 :ܒܝܲܕ ܥܲܡܠܲܝ̈ܗܘܿܢ ܒܲܕܩܸܘ ܚܘܼܒܵܐ ܕܪܸ̈ܥܝܵܢܲܝܗܘܿܢ
                 301 ܕܲܟܼܡܵܐ ܪܲܚܡܘܼܗܝ ܠܫܸܡ ܒܵܪܘܿܝܵܐ ܕܝܲܩܲܪ ܐܸܢܘܿܢ.
                 302 :ܥܲܡܠܹܗ ܕܝܵܘܣܸܦ ܣܵܗܕܵܐ ܗ̄ܘ̣ ܓܲܠܝܵܐ ܕܩܘܼܫܬܼܵܐ ܓܲܠܝܵܐ
                 303 ܕܲܗܘ̤ܵܐ ܥܲܒܼܕܵܐ ܘܠܵܐ ܐܸܫܬܿܥܒܲܕ ܠܲܪ̈ܓܼܝܼܓܼܵܬܐ.
                 304 :ܙܲܒܼܢܹܗ ܚܣܵܡܵܐ ܡ̣ܢ ܡܵܪܘܼܬܵܐ ܠܘܵܬܼ ܥܲܒܼܕܘܼܬܼܵܐ
                 305 ܘܠܵܐ ܐܸܬܼܥܲܣܲܩ ܕܐܲܝܟܲܢ ܘܥܲܠ ܡ̇ܢ ܥܵܘܠܵܐܝܼܬܼ.
                 306 :: ܗ̄: ܢܘܼܟܼܪܵܝܵܐ
                 307 :ܒܹܝܬܼ ܢܘܼܟܼܪ̈ܵܝܹܐ ܦܠܲܚ ܒܲܪ ܒܲܝܬܼܵܐ ܕܗܲܝܡܵܢܘܼܬܼܵܐ
                 308 ܘܟܲܕ ܥܘܼ̇ܕܚܵܐ ܗ̄ܘ̣ ܢܣܲܒܼ ܫܘܼܠܛܵܢܵܐ ܕܡܵܪ̈ܲܝ ܐܲܬܼܪܵܐ.
                 309 :ܝܵܘܣܸܦ ܢܸܗܘܸܐ ܚܘܪܵܐ ܦܲܐܝܵܐ ܠܲܕܡܵܫܬܲܚܩܝܼܢ
                 310 ܕܲܟܼܡܵܐ ܫܲܚܩܘܼܗܝ ܚܲܫܹ̈ܐ ܘܐ̄ܢܫ̈ܐ ܘܠܵܐ ܚܵܒܼ ܘܐܲܫܦܸܠ.
                 311 :ܩܪܵܒܹܐ ܕܢܸܫܹ̈ܐ ܘܲܕܣܵܩܘܿܪ̈ܵܘܗܝ ܙܟܼܵܐ ܒܲܪ ܝܲܥܩܘܿܒܼ
                 312 ܘܒܲܕܸܩ ܘܲܓܼܠܵܐ ܕܫܲܠܝܼܛ ܐ̄ܢܵܫܵܐ ܥܲܠ ܚܹܐܪܘܼܬܹܗ.
                 313 :ܐܲܝܟ ܫܝܼܦܘܿܪܵܐ ܩܵܥܹ̇ܐ ܥܲܡܠܹܗ ܒܟܼܠܗܘܿܢ ܕܵܪܹ̈ܐ
                 314 ܕܲܫܡܲܥ ܐ̄ܢܵܫܵܐ ܙܵܟܘܼܬܼ ܐ̄ܢܵܫܵܐ ܕܲܒܼܒܲܪܢܵܫܵܐ.
                 315 :ܩܸܐܪܣܵܐ ܕܚܲܫܹ̈ܐ ܙܟܼܵܐ ܐܵܦ ܡܘܼܫܹܐ ܚܲܒܼܪܹܗ ܕܝܵܘܣܸܦ
                 316 ܘܲܗܘ̤ܵܐ ܪܕܝܼܦܵܐ ܘܣܲܝܒܲܪ ܚܲܫܹ̈ܐ ܕܥܸܕܚܵܘܼܬܼܵܐ.
                 317 ܠܦܵܠܚܲܝ̈ ܫܸܐܕܹ̈ܐ ܐܵܘܓܲܪ ܢܲܦܫܹܗ ܦܵܠܚܵܐ ܕܩܘܼܫܬܵܐ.
                 318 ܘܠܵܐ ܐܸܬܼܟܲܬܡܲܬ̤ ܕܲܟܼܝܘܼܬ ܢܲܦܫܹܗ ܒܥܘܼܡܪܵܐ ܛܲܡܐܵܐ.
                 319 :ܫܲܪܝܼܪܵܐܝܼܬ ܦܠܲܚ ܫܲܪܝܼܪܵܐ ܒܒܹܝܬ ܕܲܓܵܠܹ̈ܐ
                 320 ܘܠܵܐ ܐܸܬܪܦܝܼ ܒܕܲܓܵܠܘܼܬܼܵܐ ܕܕܸܚܠܲܬܼ ܫܸܐܕܹ̈ܐ.
                 321 :ܒܵܬܲܪ ܥܲܡܠܹܗ ܚܙܵܐ ܠܲܚܙܬܵܐ ܘܲܫܡܲܥ ܩܵܠܵܐ
                 322 ܕܲܡܬܲܪܓܼܡ ܗ̄ܘܵܐ ܩܠܹ̈ܐ ܚܲܕ̈ܬܹܐ ܒܹܝܬܼ ܐܲܪ̈ܥܵܢܹܐ.
                 323 :ܩܵܠܵܐ ܕܲܩܪܵܐ ܒܪܵܫܝܼܬ̇ ܒ̇ܪܝܼܬܼܵܐ ܩܪܵܝܗܝ ܠܲܬܼܪܝܼܨܵܐ
                 324 ܕܢܟܼܪܸܙ ܒܐܝܼܕܹܗ ܪܲܒܘܼܬ ܚܲܝܠܵܐ ܕܥܒܲܕ ܐܝܼܕܵܘ̈ܗܝ.
                 325 :ܐܲܝܟ ܨܲܝܵܪܵܐ ܨܵܪܹܗ ܠܥܵܠܡܵܐ ܒܝܲܕ ܒܲܪܬ ܩܵܠܹܗ
                 326 ܘܐܲܠܸܠ ܣܵܡܹܗ ܩܕܵܡ ܡܲܠܵܠܹ̈ܐ ܕܢܸܬܒܲܩܘܿܢ ܒܹܗ.
                 327 :ܩܲܢܝܵܬ ܬܪܝܼܨܵܐ ܗܘ̤ܵܐ ܠܸܫܵܢܹܗ ܠܐܝܼܕܵܐ ܕܪܘܼܚ̇ܐ
                 328 ܘܨܵܪ ܒܸܪ̈ܝܬܼܵܐ ܒܛܘܼܦܣܵܐ ܕܲܗܘ̤̈ܝ ܡ̣ܢ ܫܘܼܪܵܝܵܐ.
                 329 :ܣܸܦܪܵܐ ܕܪܘܼܚܵܐ ܟܬܲܒܼ ܠܲܡܠܝܼ̈ܠܹܐ ܠܥܸܠ ܠܸܫܢܵܐ
                 330 ܘܐܲܗܓܝܼ ܐܸܢܘܿܢ ܒܲܗܘܵܝ ܬܸܒܹܝܠ ܕܐܲܝܟܵܢ ܬܩܢܲܬ̤.
                 331 :ܐܲܝܟ ܣܘܦܣܛܵܐ ܬܲܪܓܸܡ ܦܹܐܩܵܐ ܒܐܸܕܢܲܝ̈ ܐ̄ܢܵܫ̈ܐ
                 332 ܘܐܲܫܡܲܥ ܐܸܢܘܿܢ ܫܸܡ ܒܪ̈ܵܘܿܝܵܐ ܕܥܒܲܕ ܐ̄ܢܵܫܵܐ.
                 333 :ܐܣܩܛܐ ܕܪܘܼܚܵܐ ܠܒܲܟ ܡܲܠܦ̇ܢܵܐ ܕܕܸܚܲܠܬܼ ܩܘܼܫܬܵܐ
                 334 ܘܫܲܪܝܼ ܕܢܸܕܪܹܐ ܫܲܒܼܪܘܼܬܼ ܐ̄ܢܵܫ̈ܐ ܒܕܸܚܠܲܬܼ ܩܘܼܫܬܵܐ.
                 335 :ܥܲܠ ܡܸܨܪ̈ܵܝܹܐ ܐܲܪܝܼܡ ܐܝܼܕܹܗ ܪܲܒܵܐ ܡܗܝܼܪܵܐ
                 336 ܘܲܒܼܡܲܪܕܝܼܬܗܘܿܢ ܐܲܪܡܝܼ ܕܸܚܠܵܐ ܟܠ ܥܲܡܡܝ̈ܢ. 

                 f.319r 

                 337 :ܢܸܓܼܪܹ̈ܐ ܩܫܲܝܵܐ ܐܲܣܪܲܚ ܦܘܼܡܹܗ ܕܦܘܼܡܵܐ ܕܪܘܼܚܵܐ
                 338 ܕܢܣܓܹܐ ܢܫܲܪܲܪ ܦܓܼܪ̈ܵܢܵܝܹܐ ܒܪ̈ܘܼܚܵܢܝܵܬܼܵܐ.
                 339 :ܒܲܕܡܘܼܬ ܐܵܣܝܵܐ ܗܘ̤ܬ ܒܲܪܬ ܩܵܠܹܗ ܒܹܝܬܼ ܡܵܝܘ̈ܬܹܐ
                 340 ܘܥܨܒܹܗ ܠܥܲܡܵܠܹܐ ܕܲܡܒܲܣܒܲܣ ܗ̄ܘ̣ܵܐ ܒܟܸܐܒܹ̈ܐ ܕܛܘܥܝܲܝ.
                 341 :ܡ̇ܢ ܠܵܐ ܢܬܗܲܪ ܒܚܹܝܠ ܥܘܼܕܵܪܢܵܐ ܐܲܠܵܗܵܝܵܐ
                 342 ܕܒܼܐܝܼܕܵܐ ܕܐ̄ܢܵܫܵܐ ܐܲܣܝܼ ܠܐ̄ܢܵܫܵܐ ܡܹܢ ܟܹܐܒܲܝ̈ܗܘܿܢ.
                 343 :ܒܡܘܼܫܹܐ ܐܲܣܝܼ ܠܟܘܼܪܗܵܢ ܥܵܘ̣ܠܵܐ ܕܲܒܼܢܲܝ̈ ܥܲܡܹܗ
                 344 ܘܚܵܘܝܼ ܕܡܵܨܐ ܕܢܲܐܣܹܐ ܐ̄ܢܵܫܵܐ ܠܲܒܼܢܲܝ̈ܢܵܫܵܐ.
                 345 :ܐܵܣܘ̈ܬܐ ܗܘ̤ܵܘ ܙܕܝܼܩܹ̈ܐ ܒܕܵܪ̈ܝܼܢ ܕܵܪ̈ܝܼܢ
                 346 ܘܦܸܬܓܼܵܡܲܝ̈ܗܘܿܢ ܐܲܝܟ ܣܲܡܡܵܢܹ̈ܐ ܠܫܘܼܚ̈ܢܹܐ ܕܥܵܘ̣ܠܵܐ.
                 347 :ܡܘܼܫܹܐ ܐܲܫܠܸܡ ܐܘܼܡܵܢܘܼܬܹܗ ܠܝܼܫܘܿܥ ܒܲܪܢܘܿܢ
                 348 ܕܢܲܐܣܸܐ ܟܸܐܒܸ̈ܐ ܕܝܣܲܪ̈ܠܵܝܹܐ ܒܣܲܡܵܐ ܕܡܸܠܘ̈ܗܝ.
                 349 :ܦܲܪܙܠܵܐ ܕܪܘܼܚܵܐ ܠܒܼܵܟ ܬܲܠܡܝܼܕܵܐ ܕܪܒܵܐ ܡܗܝܼܕܵܐ
                 350 ܘܓܲܙܪܹܗ ܠܥܲܡܵܐ ܡ̣ܢ ܥܘܼܪܠܘܼܬܼܵܐ ܕܦܲܓܼܪܵܐ ܘܢܲܦܫܵܐ.
                 351 :ܛܢܵܢܵܐ ܩܲܫܝܵܐ ܠܒܸܫ ܚܲܡܝܼܡܵܐ ܠܘܼܩܒܼܵܠ ܥܵܘ̣ܠܵܐ
                 352 ܘܚܲܪܲܪ ܦܲܣܩܹܗ ܡ̣ܢ ܗܲܕܵܡܹ̈ܐ ܘܡ̣ܢ ܪܸܥܝܵܢ̇ܐ.
                 353 :ܗܵܐ ܣܘܼܥܪ̈ܵܢܹܐ ܕܐ̄ܢܫ̈ܐ ܟܸܐܢܸ̈ܐ ܕܲܗܘ̤ܵܘ ܒܓܸܢܣܲܢ
                 354 ܢܩܘܿܡ ܢܸܬܼܕܲܡܹܐ ܒܕܘܼܡܝܵܐ ܛܵܒܼܵܐ ܕܚܵܘܝܼܘ ܒܐܲܪܥܵܐ.
                 355 :ܒܪܲܗܛܐ ܛܵܒܼܵܐ ܕܕܘܼܒܵܪ̈ܲܝܗܘܿܢ ܢܚܘܿܪ ܬܲܩܢܵܐܝܼܬ
                 356 ܘܐܲܝܟ ܗܲܠܟܼܵܬܼܗܘܿܢ ܢܗܲܠܸܟ ܒܲܐܪܥܵܐ ܕܬܵܘܬܵܒܼܘܿܬܲܢ.
                 357 :ܥܘܼܡܪܵܐ ܕܙܲܒܼܢܵܐ ܚܲܫܒܼܘܗܝ ܠܥܘܼܡܪܵܐ ܐܲܪܥܵܢܵܝܵܐ
                 358 ܒܲܕܡܘܼܬ ܐܲܪ̈ܚܹܐ ܒܬܼܵܘ ܒܲܒܼܪܝܼܬܼܵܐ ܘܩܕܡܘ ܫܲܢܝܼܘ.
                 359 :ܐܝܼܘܿܒܼ ܩܵܥܹ̇ܐ ܕܠܵܐ ܫܲܪܝܼܪܝܼܢ ܛܘܼܒܹ̈ܐ ܕܙܲܒܼܢܵܐ
                 360 ܘܚܲܬܸܡ ܘܐܸܡܲܪ ܕܥܲܪܛܸܠ ܐܸܬܹܝܬܼ ܘܥܲܪܛܸܠ ܐܹܙܲܠ.
                 361 :ܥܲܪܛܸܠܵܐܝܼܬܼ ܩܵܡܘ ܙܲܕܝܼ̈ܩܹܐ ܕܠܵܐ ܬܲܟܼܣܝܼܬܼܵܐ
                 362 ܘܚܵܘܝܼܘ ܠܟܼܠ ܐ̄ܢܵܫ ܕܠܲܝܬ ܗܸܢܝܵܢܐ ܒܲܕܡܸܬܚܲܙ̈ܝܢ.
                 363 :ܫܸܡ ܒܵܪܘܿܝܵܐ ܐܲܚܸܒܘ ܘܲܪܚܸܡܘ ܡ̣ܢ ܟܠ ܡܸܕܸܡ
                 364 ܘܠܵܐ ܣܲܡ̣ܵܘ ܡܸܕܸܡ ܡܸܬܚܲܙܝܵܢܵܐ ܥܲܡ ܟܲܣܝܘܼܬܹܗ.
                 365 :ܐܲܝܟ ܕܲܒܓܸܠܝܵܐ ܡܸܬܼܒܲܩܹܐ ܗ̄ܘ̣ܵܐ ܒܲܕܠܵܐ ܓܲܠܝܵܢ
                 366 ܘܲܒܓܠܝܵܬܼܵܐ ܐܲܝܟ ܠܵܐ ܓܲܠܝ̈ܢ ܡܸܬܼܚܲܫܲܝ ܗ̄ܘ̣ܵܐ.
                 367 :ܐܵܘ ܐܲܪܥܵܢܵܐ ܕܲܫܒܲܩ ܐܲܪܥܵܐ ܟܲܕ ܐܲܪܥܵܢܵܐ ܗ̄ܘ̣
                 368 ܘܪܓܼ ܠܲܫܡܲܝܵܐ ܟܲܕ ܠܵܐ ܚܙܹܐ ܠܹܗ ܥܘܼܡܪܵܐ ܕܲܠܥܸܠ.
                 369 :ܐܘ ܠܒܲܪ ܐ̄ܢܵܫܵܐ ܠܒܝܼܫ ܗܲܕܡܹ̈ܐ ܡܸܬܼܚܲܒܠܵܢܹ̈ܐ
                 370 ܕܥܒܼܕ ܓܘܼܫܡܹܗ ܐܲܝܟ ܐܵܕܵܡܘܿܣ ܩܕܼܵܡ ܢܸܣܝܘܿܢܹ̈ܐ.
                 371 :ܒܲܪ ܐ̄ܢܵܫܵܐ ܗ̄ܘ̣ܵܐ ܐܝܼܘܿܒܼ ܐ̄ܢܵܫܵܐ ܐܘ ܐ̄ܢܵܫܝܼ̈ܐ
                 372 ܘܟܲܕ ܐ̄ܢܵܫܵܝܵܐ ܗ̄ܘ̣ ܙܟܼܵܐ ܬܲܟܼܬܘܼ̈ܫܹܐ ܕܚܲܫܹ̈ܐ ܫܓܼܝܼ̈ܫܹܐ.
                 373 :ܒܕܲܡܘܼܬ ܓܲܠܠܹ̈ܐ ܫܓܲܫܘ ܢܸܣܝܘܿܢܹ̈ܐ ܠܦܲܓܼܪܹܗ ܘܢܲܦܫܹܗ
                 374 ܘܠܵܐ ܐܸܬܛܲܒܲܥ ܒܒܹܝܬܼ ܡܲܚܫܘ̈ܠܹܐ ܕܲܦܣܵܩ ܣܲܒܼܪܵܐ.
                 375 :ܣܲܒܼܪܵܐ ܛܵܒܼܵܐ ܠܒܲܟ ܠܲܝܟ ܠܹܐܩܵܐ ܒܐܝܼܕܼܵܐ ܕܙܵܘܥܘ̈ܗܝ
                 376 ܘܲܕܩܲܪ ܢܲܦܫܹܗ ܠܲܠܡܹܐܝܢ ܫܲܝܢܵܐ ܕܡܸܠܲܬܼ ܡܵܪܹܗ.
                 377 :ܐܲܝܟ ܕܲܒܼܝܲܡܵܐ ܕܪܵܘ ܢܲܨܝܼܚܹ̈ܐ ܒܡܸܨܥܲܬ̤ ܚܲܫܹ̈ܐ
                 378 ܘܲܕܠܵܐ ܩܸܢܛܵܐ ܕܲܒܲܪܘ ܐܸܠܦܹ̈ܐ ܕܪܸ̈ܥܝܵܢܲܝܗܘܿܢ.
                 379 :ܠܘܲܥܕܵܐ ܕܫܲܝܢܵܐ ܚܵܪܵܘ ܡܲܠܵܚܹ̈ܐ ܕܗܲܝܡܵܢܘܼܬܼܵܐ
                 380 ܘܗܲܝܼܡܸܢܘ ܘܐܲܫܲܪܘ ܕܠܵܐ ܡܸܬܛܲܠܡܝܼܢ ܦܘܼܪ̈ܥܵܢܲܝܗܘܿܢ.
                 381 :ܒܗܲܝܡܵܢܘܼܬܵܐ ܣܒܲܠܘ ܟܠ ܚܲܫܲܝܼܢ ܕܲܟܼܣܹܝܢ ܘܲܓܼܠܹܝܢ
                 382 ܘܐܲܪܦܝܼܘ ܛܘܼܦܣܵܐ ܕܕܘܼܒܵܪ̈ܝܗܘܿܢ ܠܲܕܒܵܬܲܪܗܘܿܢ.
                 383 :ܚܲܕ ܒܵܬܲܪ ܚܲܕ ܚܙܲܩܘ ܒܲܫܒܝܼ̈ܠܹܐ ܕܥܲܡܹ̈ܐ ܥܡܝܼ̈ܠܹܐ
                 384 ܘܡܲܢܲܥܘ ܘܲܡܛܵܘ ܠܘܵܬܼ ܐܵܘܵܢܵܐ ܕܲܡܠܹܐ ܛܘܼܒܹ̈ܐ.
                 385 ܒܡܘܼܫܸܐ ܘܝܼܫܘܿܥ ܕܲܡܝܼ ܒܵܪܲܡ ܘܡܲܪܝܼ ܓܸܕܥܘܿܢ: 

                 f.319v 

                 386 ܘܲܒܼܦܲܠܚܘܼܬܼܗܘܿܢ ܐܲܦܠܲܚ ܢܲܦܬܲܚ ܘܫܸܡܫܘܿܢ ܪܲܒܵܐ.
                 387 :ܫܡܘܼܐܹܝܠ ܐܲܪܝܼܡ ܓܸܦܵܐ ܕܪܲܗܛܹܗ ܘܲܥܒܲܪ ܐܸܢܘܿܢ
                 388 ܘܲܢܣܲܒܼ ܕܪܓܼܵܐ ܕܲܢܒܼܝܘܼܬܵܐ ܘܲܕܟܼܵܗܢܘܼܬܼܵܐ.
                 389 :ܡ̣ܢ ܛܲܠܝܘܼܬܹܗ ܫܲܪܝܼ ܒܪܲܗܛܵܐ ܕܙܲܕܝܼܩܘܼܬܵܐ
                 390 ܘܥܲܡ ܡܸܢܝܵܢܵܐ ܕܲܫܢܲܝ̈ ܚܲܝܵܘ̈ܗܝ ܡܬܲܚ ܚܘܼܡܵܣܵܢܹܗ.
                 391 :ܣܵܗܕܘܼܬ ܩܘܼܫܬܵܐ ܣܗܸܕ ܥܲܠ ܢܲܦܫܹܗ ܩܕܼܵܡ ܐܲܠܵܗܵܐ
                 392 ܕܠܵܐ ܐܸܬܼܟܲܬܡܲܬ̤ ܦܵܪܘܿܫܘܼܬܹܗ ܒܡܣܒܼ ܒܲܐܦܹ̈ܐ.
                 393 :ܫܒܼܝܠ ܦܘܼܠܚܵܢܹܗ ܚܙܵܐ ܐܵܦ ܕܵܘܝܼܕ ܕܟܹܐ ܪܸܥܝܵܢܵܐ
                 394 ܘܥܲܬܸܕ ܢܲܦܫܹܗ ܠܡܸܪܕܵܐ ܒܥܲܡܹ̈ܠܹܐ ܪ̈ܘܼܚܵܢܵܝܹܐ.
                 395 :ܪܘܼܚܵܢܐܼܬܼ ܓܒܼܵܐ ܠܹܗ ܕܢܸܦܐܘܿܝܝ ܦܵܠܚܵܐ ܕܪܘܼܚܵܐ
                 396 ܘܥܲܡ ܪ̈ܘܼܚܵܢܹܐ ܪܓܼܝܼܓܼ ܗ̄ܘ̣ܵܐ ܠܡܸܦܪܲܝܝ ܠܐܲܦܝ̈ ܪܵܘܡܵܐ.
                 397 :ܐܲܝܟ ܨܒܼܝܵܢܵܐ ܕܗ̇ܘ ܕܲܨܒܼܵܐ ܒܹܗ ܡܢܚ ܗ̄ܘ̣ܵܐ ܕܢܚܵܐ
                 398 ܘܐܸܠܘܼ ܩܲܠܝܼܠ ܠܵܐ ܢܡ ܘܲܕܡܸܟ ܓܡܝܼܪ ܗ̄ܘ̣ܵܐ ܒܚܘܼܒܹܗ.
                 399 :ܚܛܝܼܬܵܐ ܙܟܬܹܗ ܒܲܕܡܘܼܬ ܫܸܢܬܵܐ ܠܥܝܼܪ ܪܸܥܝܵܢܵܐ
                 400 ܘܟܲܕ ܛܵܒܼ ܐܲܣܟܸܠ ܦܢܵܐ ܘܐܸܬܥܪܡ ܕܠܵܐ ܬܘܼܒܼ ܢܲܣܟܸܠ.
                 401 :ܦܘܼܪ̈ܣܸܐ ܨܢܝܼ̈ܥܹܐ ܝܠܦ ܒܲܚܛܝܼܬܹܗ ܥܠܹܝܗ̇ ܕܲܚܛܝܼܬܵܐ
                 402 ܘܠܵܐ ܬܘܼܒܼ ܝܲܗ̣ܒ ܠܵܗ̇ ܐܲܬܼܪܵܐ ܕܬܸܥܘ̇ܠ ܨܝܕ ܚܘܼܫܵܒܼܵܘ̈ܗܝ.
                 403 :ܥܸܠܬܵܐ ܛܒܼܬܵܐ ܗܘ̤ܵܬ ܠܹܗ ܒܝܼܫܬܵܐ ܟܡܵܐ ܐܸܢ ܒܝܼܫܵܐ
                 404 ܘܐܲܥܝܼܪ ܢܲܦܫܹܗ ܕܠܵܐ ܬܘܼܒܼ ܢܸܕܡܲܟ ܘܬܒܙܲܚ ܒܹܗ.
                 405 :ܪܲܒܵܐ ܡܗܝܼܪܵܐ ܗܘ̤ܵܐ ܢܸܣܝܵܢܵܐ ܠܲܡܗܝܼܪ ܗܵܘܢܵܐ
                 406 ܘܢܛܲܪ ܓܲܙܹܗ ܕܠܵܐ ܢܸܬܼܚܲܝܠܲܟ ܡ̣ܢ ܢܸܟܼܝܵܢܹ̈ܐ.
                 407 :ܬܵܘ ܟܠ ܬܸܓܼܡܝܼ̈ܢ ܕܟܸܐܢܹ̈ܐ ܘܟܲܟܼ̈ܦܹܐ ܘܲܕܚܲܛܝܹ̈ܐ
                 408 ܘܚܘܼܪܘ ܒܲܬܼܪܝܼܨܵܐ ܟܡܵܐ ܐܸܬܓܲܢ̄ܒܹܿܪ ܥܲܠ ܣܘܼܪܚܵܢܹܗ.
                 409 :ܬܵܘ ܨܘܼܬܼܘ ܩܵܠܹܗ ܟܲܕ ܡܸܬܬܲܢܲܚ ܥܲܠ ܡܲܦܘܼܠܬܹܗ
                 410 ܘܡܒܟܐ ܠܹܗ ܠܥܵܘ̣ܠܹܗ ܒܩܵܠܵܐ ܪܵܥܘܡܵܐܝܼܬ.
                 411 :ܩܵܠܹܐ ܚܢܲܝ̈ܓܹܐ ܪܲܟܸܒ ܟܸܐܢܵܐ ܒܢܒܼܝܘܼܬܵܐ
                 412 ܘܲܚܢܝܼܵܓܼܐܝܼܬ ܐܲܝܠܸܠ ܘܲܒܟܼܵܐ ܥܲܠ ܣܘܼܪܚܵܢܹܗ.
                 413 :ܐܲܠܵܗܝ ܐܲܠܵܗܝ ܠܡܵܢܵܐ ܫܒܲܩܬܵܢܝ ܠܡܵܪܹܗ ܐܸܡܲܪ
                 414 ܘܐܲܪܚܸܩܬܝܗܝ ܡܸܢܝ ܠܦܘܼܪܩܵܢ ܚܲܝܹ̈ܐ ܡܛܠ ܣܲܟܼܠܘܼܬܝ.
                 415 :ܐܵܘ ܠܹܟܼܝ ܢܦܲܫܵܐ ܝܲܕܥܬ̤ ܦܘܼܪ̈ܣܹܐ ܕܲܬܼܘܵܬܼ ܢܲܦܫܵܐ
                 416 ܟܡܵܐ ܐܬܦܪܣܬܝ ܠܡܸܥܨܲܒܼ ܟܸܐܒܹ̈ܐ ܕܚܲܝܵܒܘܼܬܹܟܼܝ.
                 417 :ܐܘ ܠܵܟ ܓܲܒܼܪܵܐ ܓܲܢ̄ܒܵܪ ܚܲܝܠܐ ܕܚܵܒܼ ܒܚܛܝܼܬܵܐ
                 418 ܟܡܵܐ ܐܬܓܢ̄ܒܪܬ ܕܬܣܲܒܼ ܡܸܢܵܟ ܫܸܡ ܚܲܝܵܒܹ̈ܐ.
                 419 :ܐܘ ܠܵܟ ܕܵܘܝܼܕ ܪܚܸܡ ܕܝܼܢܵܐ ܕܙܲܕܝܼܩܘܼܬܵܐ
                 420 ܟܡܵܐ ܥܲܩܸܒܼܬܵܝܗܝ ܠܕܝܼܢܵܐ ܕܢܲܦܫܵܟ ܚܲܬܝܼܬܵܐܝܼܬ.
                 421 :ܠܵܐ ܐ̄ܢܵܫ ܝܵܕܼܥ ܕܲܢܕܘܢ ܗܵܟܼܵܢ ܥܲܠ ܣܘܼܪ̈ܚܵܢܵܘܗܝ
                 422 ܐܲܝܟ ܡܵܐ ܕܕܵܘܝܼܕ ܕܪܵܠ ܠܲܩܢܘܿܡܹܗ ܒܐܲܝܠܹܝܢ ܕܲܚܛܐ.
                 423 :ܚܛܵܐ ܘܐܬܟܬܡ ܢܲܚܬܐ ܕܢܲܦܫܹܗ ܒܲܕܡܵܐ ܛܠܝܼܡܵܐ
                 424 ܘܩܵܡ ܘܐܲܫܝܼܓܹܗ ܒܡ̈ܝܵܐ ܕܕܸܡ̈ܥܹܐ ܪ݁ܵܥܘܿܡܵܬܵܐ.
                 425 :ܚܕܵܐ ܙܒܲܢ ܐܲܣܟܸܿܠ ܟܲܕܼ ܠܵܐ ܪܥܹܐ ܗ̄ܘ̣ܵܐ ܕܢܸܣܟܲܠ ܡܸܡܬܘܿܡ
                 426 ܘܲܕܠܐ ܡܸܢܝܵܢ ܥܵܦ ܬܸܢܚ̈ܬܐ ܕܲܬܸܘܵܬ ܢܲܦܫܵܐ.
                 427 :ܬܵܒܼ ܘܐܸܬܼܟܲܫܲܦ ܘܲܒܼܥܵܐ ܘܐܲܦܝܼܣ ܥܲܠ ܣܘܼܪܚܵܢܹܗ
                 428 ܘܲܦܫܵܐ ܠܕܲܪܓܹܗ ܘܬܲܪܓܸܡ ܩܵܠܹܐ ܕܲܢܒܼܝܼܘܼܬܵܐ.
                 429 :ܒܦܘܼܡܹܗ ܐܲܟܼܪܸܙ ܪܘܼܚ ܓܸܠܝܢܵܐ ܥܲܠ ܪܘܼܡܪܵܡܹܗ
                 430 ܕܗܘ̤ ܠܹܗ ܐܲܫܡܲܥ ܥܲܠ ܡܘܼܠܟܵܢܵܐ ܕܲܠܘܵܬ ܙܲܪܥܹܗ
                 431 ܒܙܲܪܥܹܗ ܩܲܒܸܠ ܡܘܼܠܟܵܢ ܚܲܝܹ̈ܐ ܕܠܵܐ ܫܘܼܠܵܡܵܐ: 

                 f.320r 

                 432 ܘܗܲܝܡܸܢ ܘܐܲܫܲܪ ܕܗܘܝܵܐ ܘܗܘ̤ܬ ܐܲܝܟ ܕܐܸܬܢܲܒܝܼ.
                 433 :ܗܘ̤ܵܬ ܒܲܥܒܵܕܵܐ ܡܸܠܬܐ ܕܠܸܥܙܲܬ̤ ܒܙܵܘܥܲܝ̈ ܢܦܲܫܹܗ
                 434 ܘܩܵܡ ܡ̣ܢ ܙܪܲܥܹܗ ܓܲܒܼܪܵܐ ܕܝܵܗܸܒ̣ ܚܲܝܹ̈ܐ ܠܐ̄ܢܵܫܵܐ.
                 435 :ܙܪܲܥܹܗ ܐܝܼܬܼܵܘܗܝ ܗܘ̇ ܕܲܗܘ̤ܵܐ ܠܲܢ ܥܠܲܬܼ ܚܲܝܹ̈ܐ
                 436 ܘܣܵܗܸܕ ܙܪܲܥܹܗ ܕܚܲܝ̣ܵܐ ܘܐܲܚܝܼ ܠܲܕܗܲܝܡܢ ܒܹܗ.
                 437 :ܐܝܼܬܼ ܟܲܝ ܕܲܪܓܝܼܫ ܒܗܵܢ ܦܘܪܩܵܢܵܐ ܕܡ̣ܢ ܒܹܝܬܼ ܕܵܘܝܼܕ
                 438 ܘܝܵܕܲܥ ܕܲܢܚܘܿܪ ܒܕܘܼܒܵܪ ܟܸܐܢܹ̈ܐ ܕܨܵܪܘ ܕܸܡܘܵܬܹ̈ܗ.
                 439 :ܐܝܼܬܼ ܟܲܝ ܕܡܦܣ ܒܪܘܼܚ ܓܸܠܝܵܢܵܐ ܕܲܢܒܼܝܼܘܬܵܐ
                 440 ܘܥܝܼܪ ܪܸܥܝܵܢܹܗ ܠܡܸܣܬܲܟܵܠܘܼ ܒܦܘܼܫܵܩ ܐ̄ܪܵܙܹܗ.
                 441 :ܐܝܼܬ ܟܲܝ ܕܲܚܠܝܼܡ ܡ̣ܢ ܟܘܼܪܗܵܢܵܐ ܕܠܵܐ ܝܼܕܲܥܬܵܐ
                 442 ܘܫܲܪܝܼܪ ܠܸܒܹܗ ܠܡܸܣܲܒ ܐܘܼܟܼܠܵܐ ܕܗܲܝܡܵܢܘܼܬܵܐ.
                 443 :ܒܗܲܝܡܵܢܘܼܬܵܐ ܚܵܪܘ ܩܲܕܡܵܝܹ̈ܐ ܒܕܲܩܕܵܡܲܝ̈ܗܘܿܢ
                 444 ܘܛܢܘ ܘܐܸܬܕܲܡܝܼܘ ܒܕܘܼܡܝܵܐ ܕܩܲܒܸܠܘ ܚܲܕ ܡ̣ܢ ܚܲܒܼܪܹܗ.
                 445 :ܕܘܼܡܝܵܐ ܕܕܵܘܝܼܕ ܚܙ̣ܵܐ ܚܙܩܝܵܐ ܒܲܟܼܬܝܼܒܼܵܬܹܗ
                 446 ܘܲܫܩܲܠ ܨܵܪܹܗ ܥܲܠ ܗܲܕܵܡܵܘ̈ܗܝ ܘܥܲܠ ܪܸܥܝܵܢܹܗ.
                 447 :ܚܲܬܝܼܬܵܐܝܼܬ ܨܵܪ ܕܸܡ̈ܘܬܵܐ ܕܲܨܠܸܡ ܥܲܡܠܘ̈ܗܝ
                 448 ܘܛܵܟ ܥܒܼܪܸܗ ܗ̄ܘ̣ܵܐ ܕܲܓܼܡܝܼ̇ܪܘܼܬܵܐ ܒܐܘܼܡܵܢܘܬܵܐ.
                 449 :ܐܵܦ ܝܘܿܫܝܼܵܐ ܛܵܒܼ ܐܸܬܓܢ̄ܒܼܪ ܥܲܠ ܕܲܟܸܬܝܼ̈ܒܵܢ
                 450 ܘܡ̣ܢ ܨܒܼܝܵܢܹܗ ܪܓܼܝܼܓܼ ܗ̄ܘ̣ܵܐ ܕܟܼܠܢܵܫ ܠܹܗ ܢܸܬܕܲܡܹܐ.
                 451 :ܕܲܓܬܵܐ ܛܵܒܼܬܵܐ ܕܪܸܚܡܲܬܼ ܩܘܼܫܬܵܐ ܡܠܹܝܢ ܗ̄ܘ̣ܵܘ ܟܸܐܢܸ̈ܐ
                 452 ܘܡܸܬܼܬܼܝܲܐܒܝܼܢ ܗ̄ܘ̣ܵܘ ܕܲܢܲܨܘܼܪܘܼܢܵܗ̇ ܒܪܸܥܝܵܢ ܐ̄ܢܵܫܵܐ.
                 453 :ܡܠܘܿܐ̇ܐ ܛܵܒܼܵܐ ܕܕܘܼܒܵܪ̈ܝܗܘܿܢ ܫܒܲܩܘ ܒܲܒܼܪܝܼܬܵܐ
                 454 ܕܢܸܬܬܲܓܪܘܢ ܒܹܗ ܨܪ̈ܝܼܟܲܝ ܥܘܼܡܪܵܐ ܘܢܸܩܢܘܿܢ ܚܲܝܹ̈ܐ.
                 455 :ܗܸܢܘܿܢ ܚܵܘܝܼܘ ܙܢܲܝ̈ ܬܹܐܓܼܘܿܪܬܵܐ ܪܘܼܚܵܢܝܵܬܵܐ
                 456 ܘܝܼܠܸܦ ܐ̄ܢܵܫ̈ܐ ܠܡܸܬܬܲܓܵܪܘܼ ܪܘܼܚܵܢܵܐܝܼܬ.
                 457 :ܐܸܠܦܸ̈ܐ ܕܚܘܼܒܵܐ ܪܼ̈ܟܸܒܼܘ ܘܲܩܛܲܪܘ ܒܪܸ̈ܥܝܵܢܲܝܗܘܿܢ
                 458 ܘܫܲܡܲܪܘ ܐܸܢܹܝܢ ܒܝܲܡܵܐ ܫܓܼܝܼܫܵܐ ܕܚܲܫܲܝ̈ ܦܲܓܼܪܵܐ.
                 459 :ܐܘܼܡܵܢܘܼܬܵܐ ܚܲܕܬܵܐ ܐܲܦܸܩܘ ܒܒܹܝܬܼ ܐܲܪ̈ܥܵܢܹܐ
                 460 ܕܢܸܗܘܘܿܢ ܐ̄ܢܵܫ̈ܐ ܦܠܚ̈ܝ ܒܲܐܪܥܵܐ ܫܡܲܝܵܢܵܝ̈ܬܐ.
                 461 :ܐܸܠܦܪܘܼܬܵܐ ܕܝܲܡܵܐ ܕܗܵܘܢܵܐ ܥܒܲܕܘ ܟܲܫܝܼܪܹ݁ܐ
                 462 ܕܠܵܐ ܩܲܝ̈ܣܹܐ ܐܲܪܡܝܼܘ ܠܸܩܹ̈ܐ ܡܨܥܲܬ̤ ܚܲܫܹ̈ܐ.
                 463 :ܐܲܝܟ ܐܪܡܢܘܿܢ ܩܛܲܪܘ ܙܵܘܥܲܝܗܘܿܢ ܥܲܡ ܪܸ̈ܫܲܝܼܗܘܿܢ
                 464 ܕܢܸܗܘܘܿܢ ܩܒܝܐ ܕܚܲܝܠܵܐ ܠܪܲܗܛܵܐ ܕܪܘܼܚܵܐ.
                 465 :ܠܘܲܥܕܵܐ ܕܠܗܠ ܬܪܲܨܘ ܡܲܪܕܝܼܬܵܐ ܕܣܘܼܥܵܪ݁ܢܲܝܼܗܘܿܢ
                 466 ܘܐܲܝܟ ܕܲܒܼܟܼܵܘܟܒܼܵܐ ܚܵܪܘ ܘܐܸܬܼܒܲܩܝܼܘ ܒܲܥܬܝܼ̈ܕܵܬܵܐ.
                 467 :ܒܪܵܘܡܵܐ ܐܲܣܪܘܼܗ̇ ܠܗܲܝܡܵܢܘܼܗܘܿܢ ܐܲܝܟ ܐܘܩܝܢܵܐ
                 468 ܕܠܵܐ ܬܸܙܕܲܥܙܲܥ ܡ̣ܢ ܢܸܟܼܝܵܢܹ̈ܐ ܕܪ̈ܘܼܚܲܝ ܚܲܫܹ̈ܐ.
                 469 :ܥܲܣܩܘܼܬ ܚܲܫܹ̈ܐ ܚܙܵܘ ܚܵܫܘܿܫܹ̈ܐ ܕܲܟܼܡܵܐ ܥܲܣܩܵܐ
                 470 :ܘܐܲܣܓܝܼܘ ܪܲܟܒܘ ܦܘܼܪ̈ܣܹܐ ܕܥܵܗܢܝܼܢ ܠܡܸܙܟܵܐ ܠܚܲܫܹ̈ܐ
                 471 :ܐܘܼܡܵܢܵܐܝܼܬ ܥܲܠܘ ܠܲܩܪܵܒܼܵܐ ܥܲܡ ܚܲܫܲܝ̈ܗܘܿܢ
                 472 ܘܲܒܼܢܝܼܚܘܼܬܼܵܐ ܡܲܟܸܟܼܘ ܪܵܘܡܵܐ ܕܚܘܼܬܚܵܬܲܝ̈ܗܘܿܢ.
                 473 :ܐܲܝܟ ܐܲܬܼܠܹܝܛ̈ܐ ܣܠܸܩܘ ܡ̣ܢ ܥܵܠܡܵܐ ܡܠܹܐ ܬܲܟܼܬܼܘܼ̈ܫܹܐ
                 474 ܘܢܵܚܘ ܒܲܠܡܹܐܢܵܐ ܕܣܲܒܼܪܵܐ ܛܵܒܼܵܐ ܕܡܘܼܠܟܵܢܲܝ̈ܗܘܿܢ.
                 475 :ܒܣܲܒܼܪܵܐ ܣܲܝܟܘܼܗܝ ܠܪܲܗܛܵܐ ܠܲܐܝܵܐ ܕܐܵܓܼܘܿܢܲܝ̈ܗܘܿܢ
                 476 ܐܵܦ ܗܘ̤ ܣܲܒܼܪܵܐ ܫܲܪܲܪ ܐܸܢܘܿܢ ܣܲܒܼܪܵܐ ܕܲܥܠܵܘܗܝ.
                 477 :ܒܐܝܼܕܵܘ̈ܗܝ ܐܲܓܼܥܸܠܘ ܓܘܼܥܵܠܢܲܝ̈ܗܘܿܢ ܐܲܝܟ ܫܲܪܝܼܪܹ̈ܐ
                 478 ܕܢܲܛܲܪ ܐܸܢܘܿܢ ܠܝܘܿܡ ܦܘܼܪܥܵܢܵܐ ܕܲܒܼܫܘܼܠܵܡܵܐ.
                 479 :ܬܵܘ ܟܹܝܬܼ ܐ̄ܢܵܫ̈ܐ ܒܲܓܼܥܸܠ ܚܲܝܲܝ̈ܢ ܠܣܲܒܼܪܵܐ ܛܵܒܼܵܐ
                 480 ܕܠܵܐ ܢܸܬܚܲܠܨܘܢ ܡ̣ܢ ܓܲܢܒܹ̈ܐ ܐ̄ܢܵܫ̈ܐ ܨܢܝܼ̈ܥܹܐ. 

                 f.320v 

                 481 :ܒܐܲܬܼܪܵܐ ܕܲܠܥܸܠ ܢܣܝܼܡ ܣܝܼ̈ܡܵܬܵܐ ܕܦܘܼܠܚܵܢ ܢܲܦܫܲܢ
                 482 ܐܲܝܟܵܐ ܕܠܵܐ ܐܝܼܬܼ ܚܵܫܘܿܫܘܼܬܵܐ ܣܵܣܵܐ ܕܬܸܪܹܝܢ.
                 483 :ܒܲܕܡܘܼܬ ܣܵܣܵܐ ܡܚܲܒܠܝܼܢ ܚܲܫܹ̈ܐ ܠܢܚ̈ܬܝ ܢܲܦܫܲܢ
                 484 ܢܢܲܦܸܨ ܐܸܢܘܿܢ ܒܫܸܡܥܵܐ ܕܚܲܝܹ̈ܐ ܠܵܐ ܚܵܫܘܵܫܹ̈ܐ.
                 485 :ܥܘܼܡܪܵܐ ܗ̄ܝ̣ ܨܵܐܬܼܵܐ ܦܲܓܼܪܵܢܘܼܬܵܐ ܘܚܲܝܝܢ ܪܚܝܗ̇
                 486 :ܢܸܫܝܼܓܼܝܼܗ̇ ܒܡܲܝ̈ܐ ܕܡܸܠܲܬܼ ܩܘܼܫܬܵܐ ܢܸܒܼܥܵܐ ܚܲܠܝܵܐ
                 487 :ܚܨܦܵܐ ܗ̄ܘ̣ ܦܲܓܼܪܲܢ ܘܲܙܓܘܿܓܼܝܼܬܵܐ ܡܲܠܝܲܬ̤ ܥܸܠܠܹ̈ܐ
                 488 ܠܵܐ ܢܩܪܸܒܼ ܠܵܗ̇ ܥܝܵܕܹ̈ܐ ܒܝܼܫܹ̈ܐ ܕܠܵܐ ܬܬܒܲܪ.
                 489 :ܥܸܠܬܐ ܗ̄ܘ̣ ܒܵܥܹܝܢ ܡܵܐܢܲܝ̈ ܪܸ̈ܓܼܫܲܝܢ ܩܪ̈ܘܣܬܢܹܐ
                 490 :ܘܐܲܝܟ ܕܲܠܚܸܨܦܵܐ ܡܥܕܝܢ ܚܲܫ̈ܐ ܕܢܲܟܘܢ ܐܸܢܘܿܢ
                 491 :ܟܹܐܦܲܝ̈ ܚܲܫܹ̈ܐ ܢܵܩܫܝܼܢ ܟܠܫܵܥ ܥܲܠ ܗܲܕܸܡܲܝ̈ܢ
                 492 ܘܐܸܠܘܼ ܒܪܘܼܚܵܐ ܠܵܐ ܫܓܼܝܪܝܼܢ ܗ̄ܘ̣ܵܘ ܐܲܒܕܝܼܢܝܼܢ ܗ̄ܘ̣ܵܘ.
                 493 :ܒܚܲܝܠܵܐ ܕܪܘܼܚܵܐ ܢܛܝܼܪ ܫܪܟܵܢܵܐ ܕܫܝܼܛܘܼܬܼ ܡܸܕܪܲܢ
                 494 ܘܲܒܼܥܘܼܕܪ̈ܵܢܵܘܗܝ ܒܥܸܢܵܐ ܚܲܝܹ̈ܐ ܠܓܼܘ ܡ̣ܢ ܚܸܨܦܵܘ̈ܗܝ.
                 495 :ܠܲܝܬܵܘܗܝ ܡܸܕܸܡ ܒܸܠܥܵܕ ܚܲܝܠܵܐ ܕܲܡܚܲܝܠܵܢܹܗ
                 496 ܘܐܸܢ ܫܵܒܸܩ ܠܹܗ ܐܵܘܦܝܼ ܘܛܵܠܸܩ ܡ̣ܢ ܚܲܝܘܼܬܵܐ.
                 497 :ܒܚܲܝܘܼܬܼ ܚܲܝܹ̈ܐ ܠܵܐ ܡܵܝܘ̈ܬܹܐ ܚܲܝ ܘܲܡܗܲܠܸܟ
                 498 ܘܐܸܢ ܡܲܪܦܝܼܢ ܠܹܗ ܗܵܦܸܟ ܠܐܲܪܥܹܗ ܘܗܵܘܹܐ ܡܸܕܪܵܐ.
                 499 :ܡܸܕܪܵܐ ܗ̄ܘ̣ ܡܸܕܿܪܢ ܘܲܒܼܡܲܝ̈ ܚܲܫܹ̈ܐ ܓܒܝܼܠ ܬܘܼܩܵܢܲܢ
                 500 ܠܵܐ ܢܲܣܓܹܐ ܒܹܗ ܡܲܝܵ̈ܐ ܕܚܲܫܹ̈ܐ ܕܠܵܐ ܢܲܬܼܪܘܼܢܵܝܗܝ.
                 501 :ܚܹܝܠ ܕܘܼܒܵܪܵܐ ܢܸܗܘܸܐ ܥܵܠܸܒܼ ܠܡܵܝܘܿܬܘܼܬܵܐ
                 502 ܕܠܵܐ ܬܹܐܒܲܕ ܠܵܗ̇ ܡ̣ܢ ܪܲܦܝܘܼܬܵܐ ܕܡܵܝܘܿܬܘܼܬܵܗ̇.
                 503 :ܒܗܲܝܡܵܢܘܼܬܼܵܐ ܢܚܘܿܨ ܪܲܦܝܼܘܬܹܗ ܕܛܝܼܢܲܢ ܪ̈ܲܦܝܵܐ
                 504 ܘܠܵܐ ܢܬܪܦܹܐ ܘܢܸܗܘܸܐ ܡܲܝܵ̈ܐ ܡܸܬܼܐܫܕܵܢܹ̈ܐ.
                 505 :ܒܚܘܼܒܵܐ ܢܟܲܦܲܪ ܕܘܥܬܵܐ ܣܢܝܼܬܵܐ ܕܚܵܫܘܿܫܘܼܬܲܢ
                 506 ܕܠܵܐ ܢܥܬܩ ܒܲܢ ܪܹܚܵܐ ܕܥܵܘ̣ܠܵܐ ܡܣܢܐ ܕܦܲܐ̄ܝܵܢ.
                 507 :ܒܣܲܒܼܪܵܐ ܢܚܙܹܩ ܒܸܢܝܵܢ ܢܲܦܫܲܢ ܐܲܝܟ ܕܒܥܪ̈ܩܹܐ
                 508 ܕܠܵܐ ܢܟܼܘܼܢܵܝܗܝ ܡܲܫܒܹ̈ܐ ܕܚܲܫܹ̈ܐ ܒܲܥܪܝܼܵܪ̈ܝܹܐ.
                 509 :ܫܪܵܪܵܐ ܢܸܒܼܢܸܐ ܥܲܠ ܫܲܬܸܐܣܬܵܐ ܕܣܵܡܘ ܩܲܕܡܵܝܹ̈ܐ
                 510 ܘܐܲܝܟ ܥܲܡܠܲܝ̈ܗܘܿܢ ܢܛܟܸܣ ܪܲܗܛܵܐ ܕܡܸܠܲܬܼ ܦܘܼܡܲܢ.
                 511 :ܒܗܘܿܢ ܢܸܬܼܕܲܡܹܐ ܒܦܘܼܠܚܵܢ ܚܲܝܹ̈ܐ ܪ̈ܘܼܚܵܢܝܼܐ
                 512 ܘܨܠܡ ܨܲܠܡܵܐ ܕܕܘܼܒܵܪ݁ܲܝܗܘܿܢ ܢܨܘܪ ܒܲܩܢܘܿܡܲܢ.