Isaac of Nineveh. “Discourse 59.” Based upon Digital Syriac Corpus. Last modified March 5, 2019. https://syriaccorpus.org/450.
    
        
            
                ܡܹܐܡܪܵܐ ܡܵܘܬܿܪܵܢܵܐ. ܢܛ.
            
            
                ܫܲܪܝܼܪܵܐ ܡܸܠܬܹܗ ܕܡܵܪܲܢ ܕܐܸܡ݂ܲܪ: ܕܠܵܐ ܡܸܫܟܲܚ ܐ̄ܢܵܫ: ܥܲܡ
                ܚܘܼܒܹܗ ܕܥܵܠܡܵܐ: ܠܡܸܩܢܵܐ ܚܘܼܒܵܐ ܕܐܲܠܵܗܵܐ. ܘܠܵܐ ܥܲܡ ܚܘܼܠܛܵܢܵܐ
                ܕܒܹܗ: ܠܡܸܬܼܚܲܠܵܛܘܼ ܒܐܲܠܵܗܵܐ. ܘܠܵܐ ܠܡܹܐܨܲܦ ܕܥܵܠܡܵܐ:
                ܘܲܠܡܹܐܨܲܦ ܕܐܲܠܵܗܵܐ. ܟܲܕܼ ܕܹܝܢ ܫܵܒܹ̇ܩ ܐ̄ܢܵܐ ܗܵܠܹܝܢ ܕܡܸܛܠ ܫܘܼܒܼܚܵܐ
                ܤܪܝܼܩܵܐ: ܐܲܝܟܼ ܕܲܒܼܤܘܿܓܼܵܐܐ ܒܥܸܠܲܬܼ ܚܫܲܚܬܼܵܐ ܕܤܘܼܢܩܵܢ ܦܲܓܼܪܵܐ
                ܡܸܬܼܕܢܹܝܢ ܤܲܓܝܼ̈ܐܹܐ ܡܸܢܲܢ ܠܗܵܕܹܐ: ܗܵܠܹܝܢ ܕܐܸܫܬܵܘܕܝܼܘ ܦܘܼܠܚܵܢ
                ܡܲܠܟܘܼܬܼܵܐ ܕܲܫܡܲܝܵܐ: ܘܠܵܐ ܡܸܬܿܕܲܟܼܪܝܼܢ ܫܘܼܘܕܵܝܹܗ ܕܡܵܪܲܢ ܕܐܸܡ݂ܲܪ:
                ܕܐܸܢ ܥܲܠ ܡܲܠܟܿܘܼܬܼܵܐ ܕܲܫܡܲܝܵܐ ܬܸܥܒܿܕܼܘܼܢ ܟ̱ܠܵܗ̇ ܨܸܦܬܼܟܼܘܿܢ:
                
                 415 
                
                ܗܵܠܹܝܢ ܕܤܘܼܢܩܵܢ ܟܝܵܢܵܐ ܕܡܸܬܼܚܙܸܐ ܠܵܐ ܡܲܚܤܲܪ ܐ̄ܢܵܐ ܠܟܼܘܿܢ.
                ܐܸܠܵܐ ܐܵܬܼ̈ܝܵܢ ܠܟܼܘܿܢ ܗܸܢܹܝܢ ܡ̣ܢ ܢܲܦܫܗܹܝܢ: ܡ̣ܢ ܩܕܼܵܡ ܕܬܸܪܢܘܿܢ
                ܠܲܚܫܲܚܬܼܗܹܝܢ ܠܥܸܕܵܢܵܐ ܕܤܘܼܢܩܵܢܵܐ: ܟܲܕܼ ܐܵܦܠܵܐ ܥܲܠ ܪܸܢܝܵܐ
                ܕܲܚܠܵܦܲܝܗܹܝܢ ܡܲܪܦܸܐ ܐ̄ܢܵܐ ܠܟܼܘܿܢ ܕܬܸܤܬܲܢܩܘܼܢ܀ ܥܲܠ ܦܵܪܲܚܬܼܵܐ
                ܕܲܕܼܠܵܐ ܢܦܸܫ ܕܡܸܛܠܵܬܼܟܼܘܿܢ ܕܬܸܤܬܲܢܩܘܼܢ܀ ܥܲܠ ܦܵܪܲܚܬܼܵܐ
                ܕܲܕܼܠܵܐ ܢܦܸܫ ܕܡܸܛܠܵܬܼܟܼܘܿܢ ܐܸܬܼܒܲܪܝܲܬ̤ ܒܛܝܼܠ ܠܹܗ ܠܐܲܠܵܗܵܐ:
                ܘܲܠܟܼܘܿܢ ܕܙܕܝܼܩܘܼܬܼܵܐ ܝܵܨ̇ܦܝܼܢ ܐܢ̄ܬܘܿܢ ܡܲܗܡܸܫ ܡܸܢܟܼܘܿܢ؟ ܐܲܝܢܵܐ
                ܕܥܲܠ ܪ̈ܘܼܚܵܢܵܝܵܬܼܵܐ ܒܛܝܼܠ ܠܹܗ: ܐܵܦܸܢ ܒܲܡܢܵܬܼܵܐ: ܦܲܓܼܪ̈ܵܢܵܝܵܬܼܵܐ ܡܸܬܿܛܲܝ̈ܒܼܵܢ
                ܠܹܗ: ܐܵܦ ܕܠܵܐ ܝܲܨܝܼܦܘܼܬܼܵܐ ܕܲܥܠܲܝܗܹܝܢ: ܠܦܘܼܬܼ ܐܵܠܨܘܼܬܼܗܹܝܢ
                ܘܲܠܦܘܼܬܼ ܙܲܒܼܢܗܹܝܢ. ܐܲܝܢܵܐ ܕܹܝܢ: ܕܒܲܬܼܪ̈ܲܝܵܢܝܵܬܼܵܐ ܝܲܨܝܼܦܘܼܬܼܵܐ ܡܚܵܘܸܐ
                ܠܒܲܪ ܡ̣ܢ ܙܸܕܼܩܵܐ: ܐܵܦ ܟܲܕܼ ܠܵܐ ܨܵܒܹ̇ܐ: ܢܵܦܹ̇ܠ ܡ̣ܢ ܐܲܠܵܗܵܐ. ܟܲܕܼ
                ܕܹܝܢ ܚܢܲܢ ܝܵܨ̇ܦܝܼܢܲܢ ܕܗܵܠܹܝܢ ܕܡܸܛܠ ܫܡܹܗ ܕܡܵܪܲܢ: ܡܵܪܲܢ ܝܵܨܹ̇ܦ
                ܠܲܢ ܕܬܲܪ̈ܬܲܝܗܹܝܢ: ܠܦܘܼܬܼ ܡܫܘܼܚܬܼܵܐ ܕܝܲܨܝܼܦܘܼܬܲܢ: ܘܝܲܩܝܼܪܘܼܬܹܗ
                ܕܤܘܼܢܩܵܢܵܐ ܕܟܼܠ ܚܕܼܵܐ ܡܸܢܗܹܝܢ. ܒܪܲܡ ܕܹܝܢ: ܚܢܲܢ ܒܘܼܩܝܵܐ
                ܕܐܲܠܵܗܵܐ ܠܵܐ ܗ̄ܘ̣ܵܐ ܒܗܵܠܹܝܢ ܦܲܗܼܪ̈ܵܢܵܝܵܬܼܵܐ ܢܸܒܼܥܸܐ ܒܢܲܦܫܲܢ ܚܠܵܦ
                ܥܲܡ̈ܠܲܝܢ: ܐܸܠܵܐ ܥܲܠ ܤܲܒܼܪܵܐ ܕܲܥܬܼܝܼܕܼ ܢܚܝܼܪ ܠܟܼܠܹܗ ܦܘܼܠܚܵܢܲܢ.
                ܒܕܲܐܝܢܵܐ ܕܲܚܕܼܵܐ ܙܒܲܢ ܡ̣ܢ ܚܘܼܒܵܐ ܕܢܲܦܫܵܐ ܠܲܡܝܲܬܿܪܘܼܬܼܵܐ ܝܲܗ̣̄ܒܼ
                ܢܲܦܫܹܗ: ܘܐܸܬܼܝܲܐܲܒܼ ܠܦܘܼܠܚܵܢܵܗ̇ ܓܡܝܼܪܵܐܝܼܬܼ: ܠܵܐ ܘܬܼܒܼ ܒܛܝܼܠ
                ܠܹܗ ܥܲܠ ܗܵܠܹܝܢ ܕܦܲܓܼܪܵܐ ܠܲܡܚܵܪ: ܕܐܸܢ ܢܸܗܘ̈ܝܵܢ ܐܵܘ ܠܵܐ ܢܸܗܘ̈ܝܵܢ.
                ܗܵܝ̇ ܕܲܟܼܡܵܐ ܙܲܒܼܢ̈ܝܼܢ ܫܵܒܹ̇ܩ ܐܲܠܵܗܵܐ ܕܢܸܬܼܢܲܤܘܿܢ ܒܕܲܐܝܼܟܼ ܗܵܠܹܝܢ
                ܪ̈ܵܚܡܹܝܗ̇ ܕܲܡܝܲܬܿܪܘܼܬܼܵܐ. ܘܠܵܘ ܒܲܠܚܘܿܕܼ: ܐܸܠܵܐ ܘܒܼܝܼ̈ܫܵܬܼܵܐ ܤܲܓܝܼ̈ܐܵܬܼܵܐ
                ܕܡ̣ܢ ܟܠ ܕܘܼܟܼ ܫܵܒܹ̇ܩ ܠܡܸܬܿܬܿܥܵܪܘܼ ܥܠܲܝܗܘܿܢ. ܘܡܵܚܹ̇ܐ ܠܗܘܿܢ
                ܐܲܝܟܼ ܕܠܐܝܼܘܿܒܼ ܒܦܲܓܼܪܗܘܿܢ: ܘܡܲܥܸܠ ܠܗܘܿܢ ܠܚܲܤܝܼܪܘܼܬܼܵܐ:
                
                 416 
                
                ܘܲܡܟܲܦܲܪ ܡܸܢܗܘܿܢ ܠܐ̄ܢܵܫܘܼܬܼܵܐ. ܘܡܵܚܹ̇ܐ ܠܗܘܿܢ ܒܟܼܠ ܕܲܩܢܹܝܢ:
                ܒܲܠܚܘܿܕܼ ܕܹܝܢ ܕܲܠܢܲܦܫܗܘܿܢ ܠܵܐ ܢܸܬܼܩܲܪܲܒܼ ܢܸܟܼܝܵܢܵܐ܀
                ܠܵܐ ܡܲܨܝܵܐ ܕܒܼܐܘܼܪܚܵܐ ܕܟܹܐܢܘܼܬܼܵܐ ܪܵܕܼܝܼܢܲܢ: ܘܠܵܐ ܢܸܦܓ̈ܥܵܢ ܒܲܢ
                ܟܡܝܼܪ̈ܵܬܼܵܐ: ܐܵܦ ܦܲܓܼܪܵܐ ܕܠܵܐ ܢܸܚܲܫ ܟܘܼܪ̈ܗܵܢܹܐ ܘܟܹܐܒܹ̈ܐ: ܘܲܢܩܵܘܸܐ
                ܕܠܵܐ ܫܘܼܚܠܵܦ: ܐܸܢ ܐܹܝܢ ܒܲܡܝܲܬܿܪܘܼܬܼܵܐ ܐܲܚܸܒܼܢܲܢ ܠܡܸܚܵܐ. ܕܐ̄ܢܵܫ
                ܕܹܝܢ ܢܸܬܼܚܲܫܲܚ ܒܨܸܒܼܝܵܢܹܗ ܒܩܸܛܠܵܐ ܐܵܘ ܒܚܘܼܒܵܠܵܐ ܕܲܩܢܘܿܡܹܗ: ܐܵܘ
                ܒܚܲܕܼ ܡ̣ܢ ܢܸܟܼܝܵܢ̈ܝܼܢ: ܕܝܼܢܵܐ ܐܝܼܬܼ ܠܹܗ. ܐܸܢ ܕܹܝܢ ܟܲܕܼ ܒܐܘܼܪܚܵܐ
                ܕܟܹܐܢܘܼܬܼܵܐ ܪܵܕܹܐ: ܘܥܵܒܹ̇ܕܼ ܡܲܪܕܝܼܬܼܵܐ ܠܘܵܬܼ ܐܲܠܵܗܵܐ: ܘܐܝܼܬܼ ܠܹܗ
                ܤܲܓܝܼ̈ܐܹܐ ܒܢܲܝ̈ ܕܘܼܡܚܵܐ: ܘܒܼܵܗ̇ ܒܐܘܼܪܚܵܐ ܦܵܓܼܥܵܐ ܒܹܗ ܚܕܼܵܐ ܡ̣ܢ
                ܗܵܠܹܝܢ: ܠܵܐ ܙܵܕܹܩ ܠܹܗ ܕܢܸܤܛܸܐ ܡܸܢܵܗ̇: ܐܸܠܵܐ ܚܵܕܼܝܵܐܝܼܬܼ ܢܲܩܲܒܸܠ
                ܕܠܵܐ ܥܘܼܩܵܒܼ: ܟܲܕܼ ܡܵܘܕܹܐ ܕܫܲܕܲܪ ܠܹܗ ܐܲܠܵܗܵܐ ܡܵܘܗܲܒܼܬܹܗ.
                ܕܐܸܫܬܘܝܼ ܡܸܛܠܵܬܹܗ ܕܢܸܬܼܡܲܨܲܥ ܒܢܸܤܝ̈ܘܿܢܹܐ: ܕܢܸܗܘܸܐ ܫܵܘܬܵܦܵܐ
                ܠܚܲܫܵܐ ܕܲܢܒܼܝܹ̈ܐ ܘܕܲܫܠܝܼܚܹ̈ܐ: ܘܲܕܼܫܲܪܟܵܐ ܕܩܲܕܝܼ̈ܫܹܐ: ܕܲܚܠܵܦ ܐܘܼܪܚܵܐ
                ܕܐܲܠܵܗܵܐ ܐܘܼ̈ܠܨܵܢܹܐ ܤܲܝܒܲܪܘ. ܕܐܲܫܘܝܹܗ ܐܲܠܵܗܵܐ ܕܐܵܦ ܗ̤ܘ: ܚܠܵܦ
                ܐܘܼܪܚܵܐ ܕܲܡܝܲܬܿܪܘܼܬܼܵܐ ܥܵܩ̈ܬܼܵܐ ܢܸܤܒܿܘܿܠ: ܐܵܦܸܢ ܒܝܲܕܼ ܒܢܲܝ̈ܢܵܫܵܐ ܐܵܬܼ̈ܝܵܢ:
                ܐܵܘ ܡ̣ܢ ܫܹ̈ܐܕܹܐ ܐܵܘ ܡ̣ܢ ܦܲܓܼܪܵܐ. ܠܵܘ ܒܸܠܥܵܕܼ ܡ̣ܢ ܪܸܡܙܵܐ ܐܲܠܵܗܵܝܐ
                ܗܵܠܹܝܢ ܡܸܫܬܲܒܼ̈ܩܵܢ ܠܡܹܐܬܼܵܐ: ܐܸܠܵܐ ܐܲܝܟܼ ܕܬܸܗܘܸܐ ܠܵܟܼ ܥܸܠܬܼܵܐ
                ܕܙܲܕܝܼܩܘܼܬܼܵܐ. ܕܠܵܐ ܡܲܨܝܵܐ ܕܲܐ̄ܚܪܵܢܝܵܐܝܼܬܼ ܢܸܥܒܿܕܼܝܼܘܗܝ ܐܲܠܵܗܵܐ
                ܕܢܸܬܼܝܲܬܲܪ: ܠܐܲܝܢܵܐ ܕܐܸܬܼܪܲܓܼܪܲܓܼ ܠܡܸܗܘܸܐ ܠܘܵܬܹܗ: ܐܸܠܵܐ ܐܸܢ ܟܲܕܼ
                ܢܩܲܪܸܒܼ ܠܹܗ ܢܸܤܝ̈ܘܿܢܹܐ ܕܥܲܠ ܐܲܦܲܝ̈ ܩܘܼܫܬܼܵܐ. ܘܲܕܼܗܵܕܹܐ ܐ̄ܢܵܫ ܡ̣ܢ
                ܢܲܦܫܹܗ ܕܢܸܥܒܸܿܕܼ ܠܵܐ ܡܸܫܟܲܚ: ܕܲܠܗܕܹܐ ܪܲܒܿܘܼܬܼܵܐ ܢܸܫܬܿܘܸܐ: ܕܲܚܠܵܦ
                
                 417 
                
                ܗܵܠܹܝܬ ܐܲܠܵܗܵܝ̈ܬܼܵܐ ܠܢܸܤܝܘܿܢܵܐ ܢܸܥܘܿܠ ܟܲܕܼ ܚܵܕܹܐ: ܒܸܠܥܵܕܼ ܡ̣ܢ ܡܵܘܗܲܒܼܬܼܵܐ
                ܕܡ̣ܢ ܡܫܝܼܚܵܐ: ܤܵܗܹ̇ܕܼ ܛܘܼܒܼܵܢܵܐ ܫܠܝܼܚܵܐ. ܕܗܵܟܲܢܵܐ ܪܲܒܵܐ ܨܒܘܼܬܼܵܐ
                ܗܵܕܹܐ: ܕܓܲܠܝܵܐܝܼܬܼ ܡܵܘܗܲܒܼܬܼܵܐ ܩܵܪܹܐ: ܠܗܵܝ̇ ܕܐ̄ܢܵܫ ܥܲܠ ܐܲܦܲܝ̈
                ܤܲܒܼܪܵܐ ܕܒܲܐܠܵܗܵܐ ܠܚܲܫܵܐ ܢܸܬܿܛܲܝܲܒܼ ܒܗܲܝܡܵܢܘܼܬܼܵܐ: ܟܲܕܼ ܐܵܡܲ݁ܪ:
                ܘܗܵܕܹܐ ܠܲܡ ܡ̣ܢ ܐܲܠܵܗܵܐ ܗ̄ܘ̣ ܐܵܬܼܝܲܗܒܲܬ̤ ܠܟܼܘܿܢ: ܕܠܵܐ ܒܲܠܚܘܿܕܼ
                ܡܗܲܝܡܵܢܘܼ ܬܗܲܝܡܢܘܼܢ ܒܹܗ ܠܲܫܡܝܼܚܵܐ: ܐܸܠܵܐ ܕܐܵܦ ܥܲܠ ܐܲܦܵܘ̈ܗܝ
                ܬܸܚܫܘܼܢ. ܘܲܗ̤ܘܲܝܬܿܘܿܢ ܡܵܘܕܹܝܢ ܕܠܵܐ ܫܲܠܘܵܐ: ܠܗܵܘ̇ ܕܲܦܪܲܩܟܼܘܿܢ ܡ̣ܢ
                ܫܘܼܠܛܵܢܹܗ ܕܚܸܫܘܿܟܼܵܐ ܕܥܵܠܡܵܐ: ܘܩܲܪܸܒܼܟܼܘܿܢ ܠܡܲܠܟܿܘܼܬܼܵܐ ܕܲܒܼܪܹܗ:
                ܘܲܥܒܲܕܼܟܼܘܿܢ ܫܵܘ̈ܬܵܦܹܐ ܥܲܡ ܟܠܗܘܿܢ ܒܢܲܝ̈ ܢܘܼܗܪܵܐ ܕܚܲܫ̣ܘ ܡܸܛܠ
                ܐܲܠܵܗܵܐ: ܐܲܝܟܼ ܕܬܸܡܛܘܿܢ ܠܲܡܢܵܬܼܵܐ ܕܲܡܛܵܬ̤ ܠܩܲܕܝܼ̈ܫܹܐ ܒܢܘܼܗܪܵܐ.
                ܘܗܵܝ̇ ܕܲܟܼܬܲܒܼ ܦܲܛܪܘܿܣ ܒܐܸܓܲܪܬܹܗ: ܐܸܡܲܬܼܝ ܠܲܡ ܕܚܵܫ̇ܝܼܢ
                ܐܢ̄ܬܿܘܿܢ ܥܲܠ ܐܲܦܲܝ̈ ܙܲܕܝܼܩܘܼܬܼܵܐ: ܛܘܼܒܲܝܟܿܘܿܢ. ܕܫܵܘ̈ܬܵܦܹܐ ܬܸܗܘܘܿܢ
                ܕܚܲܫܹܗ ܕܲܡܫܝܼܵܚܵܐ. ܠܵܐ ܡܵܕܹܝܢ ܐܸܡܲܬܼܝ ܕܬܸܗܘܸܐ ܒܲܪܘܲܚܬܼܵܐ ܒܚܲܕܼܿܘܼܬܼܵܐ
                ܬܕܼܘܼܨ: ܟܲܕܼ ܕܹܝܢ ܥܵܪ݁ܨܵܬܼܵܐܢ ܢܸܤܡ̈ܟܼܵܢ ܥܠܲܝܟ ܬܲܠܒܸܫ ܟܡܝܼܪܘܼܬܼܵܐ
                ܠܦܲܪܨܘܿܦܵܟܼ: ܘܐܲܝܟܼ ܡܸܕܸܡ ܕܢܘܼܟܼܪܵܝܵܐ ܗ̄ܘ̣ ܠܐܘܼܪܚܵܐ ܕܐܲܠܵܗܵܐ
                ܬܸܚܫܘܿܒܼ.
                ܗܵܐ ܡ̣ܢ ܫܢܲܝ̈ܵܐ ܘܕܼܵܪܹ̈ܐ: ܒܝܲܕܼ ܙܩܝܼܦܵܐ ܘܡܵܘܬܵܐ ܕܪܝܼܫܵܐ
                ܐܘܼܪܚܹܗ ܕܐܲܠܵܗܵܐ. ܠܵܟܼ ܡ̣ܢ ܐܲܝܟܵܐ ܠܵܟܼ ܗܵܕܹܐ: ܕܲܠܒܲܪ ܡ̣ܢ ܐܘܼܪܚܵܐ
                ܡܸܬܼܚܲܙ̈ܝܵܢ ܠܵܟܼ ܥܵܩ̈ܬܼܵܐ ܕܒܼܵܗ̇؟ ܠܵܐ ܗ̄ܘ̣ܵܐ ܒܥܸܩܒܼܵܐ ܕܩܲܕܝܼ̈ܫܹܐ ܨܵܒܹ̇ܐ
                ܐܲܢ̄ܬܿ ܠܡܸܪܕܵܐ؟ ܐܵܘ ܐܘܼܪܚܵܐ ܦܪܝܼܫܬܼܵܐ ܡܸܢܵܟܼ ܡܸܢܵܟܼ ܘܠܵܟܼ ܨܵܒܹ̇ܐ ܐܲܢ̄ܬܿ
                ܠܡܸܕܼܪܲܫ: ܘܲܕܼܠܵܐ ܚܲܫܵܐ ܬܸܪܕܹܐ ܒܵܗ̇؟ ܐܘܼܪܚܵܐ ܕܲܠܘܵܬܼ ܐܲܠܵܗܵܐ:
                
                 418 
                
                ܙܩܝܼܦܵܐ ܗ̄ܘ̣ ܕܟܼܠܝܘܿܡ. ܠܵܐ ܐ̄ܢܵܫ ܒܲܢܝܵܚܵܐ ܤܵܠܹ̇ܩ ܠܲܫܡܲܝܵܐ: ܝܵܕܼܥܝܼܢܲܢ
                ܐܘܼܪܚܵܐ ܕܲܢܝܵܚܵܐ ܠܐܲܝܟܵܐ ܕܵܪܫܵܐ. ܐܲܝܢܵܐ ܕܹܝܢ ܕܲܒܼܟܼܠܹܗ ܠܸܒܵܐ ܐܲܓܼܥܸܠ
                ܢܲܦܫܹܗ ܠܐܲܠܵܗܵܐ: ܠܵܐ ܡܸܡܬܼܘܿܡ ܨܵܒܹ̇ܐ ܐܲܠܵܗܵܐ ܕܲܕܼܠܵܐ ܨܸܦܬܼܵܐ
                ܢܸܥܒܿܕܼܝܼܘܗܝ: ܗܵܢܵܘ ܕܹܝܢ ܨܸܦܬܼܵܐ ܕܥܲܠ ܐܲܦܲܝ̈ ܩܘܼܫܬܼܵܐ. ܐܸܠܵܐ ܡ̣ܢ
                ܗܵܕܹܐ ܝܵܕܲܥ̇ ܕܡ̣ܢ ܐܲܠܵܗܵܐ ܡܸܬܿܕܲܒܲܪ: ܕܐܲܡܝܼܢܵܐܝܼܬܼ ܡܫܲܕܲܪ ܥܠܵܘܗܝ
                ܥܵܩ̈ܬܼܵܐ. ܐܲܝܠܹܝܢ ܕܹܝܢ ܕܲܒܼܢܸܤܝ̈ܘܿܢܹܐ ܡܸܬܿܕܲܒܿܪܝܼܢ: ܠܵܐ ܡ̣ܢ ܡܬܼܘܿܡ
                ܡܸܫܬܲܒܼܩܝܼܢ ܡ̣ܢ ܒܛܝܼܠܘܼܬܼܵܐ ܐܲܠܵܗܵܝܬܼܵܐ ܠܡܸܦܲܠ ܒܐܝܼ̈ܕܲܝ ܫܹ̈ܐܕܹܐ.
                ܝܲܬܿܝܼܪܵܐܝܼܬܼ ܐܸܢ ܡܢܲܫܩܝܼܢ ܠܪܸ̈ܓܼܠܹܐ ܕܐܲܚܹ̈ܐ: ܘܲܡܚܲܦܹܝܢ ܥܲܠ
                ܒܘܼܨܵܪ̈ܲܝܗܘܿܢ: ܘܲܡܤܲܬܿܪܝܼܢ ܐܲܝܟܼ ܕܝܼܠܗܘܿܢ. ܐܲܝܢܵܐ ܕܲܕܼܠܵܐ ܨܸܦܬܼܵܐ
                ܨܵܒܹ̇ܐ ܕܢܸܗܘܸܐ ܒܥܵܠܡܵܐ ܗܵܢܵܐ ܘܒܲܡܝܲܬܿܪܘܼܬܼܵܐ ܢܸܬܿܕܲܒܲܪ: ܗܵܢܵܐ:
                ܠܵܗ̇ ܠܐܘܼܪܚܵܐ ܤܲܒܼܥܵܗ̇. ܐܲܝܟܼ ܕܐܸܡ݂ܲܪ ܛܘܼܒܼܵܢܵܐ ܡܦܲܫܩܵܢܵܐ
                ܒܦܸܢܩܝܼܬܼܵܐ ܕܡܲܬܲܝ: ܐܲܝܠܹܝܢ ܠܲܡ ܕܠܲܡܝܲܬܿܪܘܼܬܼܵܐ ܪܓܼܝܼܓܼܝܼܢ: ܠܵܐ
                ܡܸܫܟܿܚܵܐ ܕܢܲܡܕܘܼܢ ܡ̣ܢ ܥܵܩ̈ܬܼܵܐ. ܟܡܵܐ ܕܹܝܢ ܕܠܘܼܩܒܲܠ
                ܤܲܩܘܼ̈ܒܼܠܵܝܵܬܼܵܐ ܪܵܕܝܼܝܵܐ ܢܲܦܫܵܐ: ܐܲܢܲܢܩܹܐ: ܕܥܵܩ̈ܬܼܵܗ̇ ܤܵܓܼ̈ܝܵܢ. ܐܸܡܲܬܼܝ
                ܕܹܝܢ ܕܗܵܠܹܝܢ ܦܵܫ̣ ܡܸܢܵܗ̇: ܠܘܼܩܕܲܡ ܗ̤ܝ ܦܵܫܲܬ̤ ܡ̣ܢ ܕܝܼܠܵܗ̇. ܐܲܝܢܵܐ
                ܕܐܵܡܼܲܪ ܕܲܕܼܠܵܐ ܨܸܦܬܼܵܐ ܐܝܼܬܼܵܘܗܝ ܘܒܲܡܝܲܬܿܪܘܼܬܼܵܐ ܡܸܬܿܕܲܒܲܪ: ܗܵܢܵܐ
                ܐܵܦܠܵܐ ܕܡ̣ܢ ܡܵܢܵܐ ܕܡ̣ܢ ܡܵܢܵܐ ܡܸܬܼܝܲܠܕܵܐ ܗ̤ܝ ܡܝܲܬܿܪܘܼܬܼܵܐ ܒܢܲܦܫܵܐ ܝܵܕܲܥ̇.
                ܡܦܵܤܝܼܢܲܢ ܓܹܝܪ ܕܲܡܕܲܒܿܪܵܢܹܝܗ̇ ܕܲܡܝܲܬܿܪܘܼܬܼܵܐ ܡܵܢܵܐ ܐܸܢܘܿܢ. ܒܝܲܕܼ
                ܢܸܤܝܘܿܢܹ̈ܐ ܡܸܬܼܦܲܬܲܚ ܬܲܪܥܵܐ ܕܲܫܡܲܝܵܐ ܩܕܼܵܡ ܢܲܦܫܵܐ. ܐܲܒܼܵܗܲܝ̈ܢ:
                ܒܗܵܕܹܐ ܐܘܼܪܚܵܐ ܕܲܒܿܪܘܼܢ. ܐܲܠܵܗܵܐ ܕܹܝܢ ܕܢܲܨܲܚ ܠܩܲܕܝܼܫܵܘ̈ܗܝ
                ܒܐܵܓܘܿܢܵܐ: ܘܠܵܐ ܐܸܬܼܡܚܸܠܘ ܚܘܼܫܵܒܲܝ̈ܗܘܿܢ ܡ̣ܢ ܤܲܒܼܪܵܐ ܕܲܥܬܼܝܼܕܼ:
                ܗܘ̣ ܢܢܲܛܲܪ ܘܲܢܥܲܕܲܪ ܠܲܢ ܒܲܨ̈ܠܵܘܵܬܼܗܘܿܢ. ܐܵܡܹܝܢ܀ ܙܲܕܝܼ̈ܩܹܐ ܕܹܝܢ ܠܵܘ
                
                 419 
                
                ܒܲܠܚܘܿܕܼ ܒܨܸܒܼܝܵܢܗܘܿܢ ܡܸܬܼܢܲܨܚܝܼܢ ܒܥܲܡ̈ܠܹܐ ܫܲܦܝܼܪܹ̈ܐ: ܐܸܠܵܐ ܐܵܦ
                ܒܢܸܤܝܘܿܢܹ̈ܐ ܕܠܵܐ ܒܨܸܒܼܝܵܢܵܐ ܪܵܘܪܒܼܵܐܝܼܬܼ ܡܸܬܼܢܲܨܚܝܼܢ: ܒܝܲܕܼܸ ܒܘܼܚܪܵܢܵܐ
                ܕܲܡܤܲܝܒܿܪܵܢܘܼܬܼܗܘܿܢ. ܒܗܵܝ̇ ܕܲܚܠܝܼܨܵܐܝܼܬܼ ܡܤܲܝܒܿܪܝܼܢ: ܟܠܗܹܝܢ
                ܟܡܝܼܪ̈ܵܬܼܵܐ ܕܲܬܼܢܵܢ. ܟܲܕܼ ܡܤܲܟܹܿܝܢ ܠܐܲܓܼܪܵܐ ܬܡܝܼܗܵܐ: ܕܥܵܠܡܵܐ
                ܕܲܥܬܼܝܼܕܼ. ܢܲܦܫܵܐ ܕܐܲܚܝܼܕܼܵܐ ܒܕܸܚܠܲܬܼ ܐܲܠܵܗܵܐ: ܠܵܐ ܕܵܚ̇ܠܵܐ ܡ̣ܢ ܡܸܕܸܡ
                ܕܡܲܟܸܿܐ ܠܵܗ̇ ܦܲܓܼܪܵܢܵܐܝܼܬܼ.